དཔལ་ནཱ་ལེནྡྲ། བྱོན་པ་ལེགས།

ཕ༽ མུ་སྟེགས་པའི་བྲམ་ཟེ་དང་རྩོད་པ་མཛད་ཚུལ།   དེ་ཡང་འགྲོ་མགོན་ཆོས་རྒྱལ་འཕགས་པས་ (1235-1280) མཛད་པའི་རྒྱན་དྲུག་མཆོག་གཉིས་ཀྱི་བསྟོད་པ་གཞུང་ལུགས་མ་ལས[1]། མང་དུ་སྦྱངས་པས་མཁྱེན་པའི་དཀྱིལ་འཁོར་རྒྱས། ། སྤོབས་པ་ཤེས་བྱའི་མཁའ་ལ་ཐོགས་མེད་རྒྱུ། ། རིགས་པའི་ཟེར་གྱིས་གཞན་གཞུང་ཚང་ཚིང་སྲེག ། དབྱིག་གཉེན་ཆོས་ཀྱི་ཉི་མ་ལ་ཕྱག་འཚལ། །

པ༽ རྒྱའི་ཡིག་ཆར་གསལ་བའི་དབྱིག་གཉེན་གྱི་རྣམ་ཐར།   དེ་ཡང་འཕགས་པ་ཐོགས་མེད་དང་དབྱིག་གཉེན་གཉིས་ཀྱི་བྱུང་བ་བརྗོད་པ་ལས[1]། ཁོང་ཉིད་ཐོག་མར་ཐེག་དམན་ལ་མོས་ཤིང་། གཞུང་ལུགས་འབུམ་སྡེ་བཅོ་བརྒྱད་ལ་མཁས། ཐོགས་མེད་དགུང་ལོ་མཐོན་པོར་སོན་སྐབས་གཅུང་གི་གསུང་རྩོམ་རྣམས་གཟིགས་པས་འདི་ཤེས་རབ་ཤིན་ཏུ་ཆེ་བར་འདུག་ཅིང་། ཐེག་ཆེན་ལ་མི་མོས་པས་འདི་མ་བཏུལ་ན་ཁོ་བོ་གཤེགས་རྗེས་འདིའི་རྩོད་ཟླར་ཡོང་བ་དཀའ་བས་ཐེག་ཆེན་ལ་གནོད་པ་འོང་དགོངས།

ན༽ ཐོགས་མེད་མཇལ་ནས་ཐེག་ཆེན་དུ་ཞུགས་ཚུལ།   དེ་ཡང་ཀུན་དགའ་འཇམ་དབྱངས་མཁྱེན་རབ་རྒྱ་མཚོས་ (1901-1959) མཛད་པའི་འཛམ་གླིང་རྒྱན་དྲུག་མཆོག་གཉིས་རྣམས་ཀྱི་རྟོགས་བརྗོད་ངོ་མཚར་སྙན་ངག་གསེར་གྱི་ཉག་ཐག་ལ་བསྟར་བའི་བསྟོད་པ་རྨད་བྱུང་ནོར་བུའི་འཕྱང་འཕྲུལ་བློ་གསལ་མགུལ་རྒྱན་ལས[1]། གང་གི་གཅེན་པོ་འཕགས་པ་ཐོགས་མེད་ལས། ། ཐེག་ཆེན་མདོ་རྣམས་ལན་གཅིག་གསན་པས་ཀྱང་། ། མ་ལུས་ཐུགས་སུ་ཆུད་ཅེས་གྲགས་དཀར་གྱི། ། སྙན་པའི་བ་དན་སྲིད་པའི་ཁོང་ན་ཁྱབ། །

ད༽ འབུམ་སྡེ་དགུ་བཅུ་གོ་དགུ་ཐུགས་ལ་མངའ་ཚུལ།   དེ་ཡང་པཎ་ཆེན་ཤཱཀྱ་མཆོག་ལྡན་ (1428-1507) གྱིས་མཛད་པའི་སློབ་དཔོན་དབྱིག་གཉེན་ཞབས་ཀྱི་རྟོགས་བརྗོད་བསྟན་པ་ལ་འཇུག་པའི་ཡིད་བཞིན་མཛོད་སྒོ་ལས[1]། ཐུབ་བསྟན་འབུམ་ཕྲག་བརྒྱ་ཡི་མཛོད་བཟུང་ནས། ། ཉིན་རེ་བཞིན་ཡང་ངེས་དོན་མཆོག་གཅིག་པའི། ། ཕ་རོལ་ཕྱིན་གྱུར་སྟོང་ཕྲག་བརྒྱ་པའི་མདོ། ། ཚིག་ཟུར་མ་ཉམས་ལྗགས་རྩེར་འདོན་པས་གདོན། །

ཐ༽ ཆོས་གཞི་དྲུག་བརྒྱ་ལྔ་བཅུ་རྩ་བཞི་བཙུགས་ཚུལ།   དེ་ཡང་རོང་སྟོན་ཤཱཀྱ་རྒྱལ་མཚན་ (1367-1449) གྱིས་མཛད་པའི་འཛམ་གླིང་རྒྱན་དྲུག་གི་བསྟོད་པ་རིན་ཆེན་སྤུངས་པ་ལས[1]། ཐོས་པ་རྒྱ་མཚོའི་བློ་གྲོས་ཕུལ་བྱུང་བརྙེས། ། རིག་གནས་ཀུན་ལ་མི་འཇིགས་བདེན་པ་ཐོབ། ། འཕགས་པའི་ཡུལ་དུ་སངས་རྒྱས་གཉིས་པ་ཞེས། ། རབ་ཏུ་གྲགས་པ་དབྱིག་གཉེན་ཞབས་ལ་འདུད། །

ཏ༽ སྔགས་སུ་ཞུགས་ཤིང་། མང་ཐོས་ཀྱི་ཡོན་ཏན།   དེ་ཡང་ཨཀྱཱ་བློ་བཟང་བསྟན་པའི་རྒྱལ་མཚན་དཔལ་བཟང་པོས་ (1910-1948/1949) མཛད་པའི་ཀུན་མཁྱེན་གཉིས་པ་དབྱིག་གཉེན་གྱི་བསྟོད་པ་ལས[1]། རྡོ་རྗེ་སློབ་དཔོན་ཞལ་ལས་སྨིན་བྱེད་ཀྱི། ། བདུད་རྩིས་ཐུགས་ཀྱི་མེ་ལོང་བཀྲུས་པའི་ངོས། ། གསང་བདག་རིག་སྔགས་ནུས་པའི་རི་མོ་ནི། ། དབང་པོའི་གཞུ་ལྟར་གྲུབ་ལ་ཕྱག་འཚལ་ལོ། །

ཉ༽ མངོན་པ་མཛོད་ལྗགས་རྩོམ་མཛད་ཚུལ།   དེ་ཡང་པཎ་ཆེན་ཤཱཀྱ་མཆོག་ལྡན་ (1428-1507) གྱིས་མཛད་པའི་སློབ་དཔོན་དབྱིག་གཉེན་ཞབས་ཀྱི་རྟོགས་བརྗོད་བསྟན་པ་ལ་འཇུག་པའི་ཡིད་བཞིན་མཛོད་སྒོ་ལས[1]། བདེན་བཞིའི་ཆོས་དང་བདེན་གཉིས་རྣམ་དབྱེ་བ། ། ཐུབ་བསྟན་ཡོངས་ཀྱི་རྩ་བར་མཁྱེན་གྱུར་ནས། ། གྲུབ་མཐའ་རྣམ་བཞིའི་དྲང་ངེས་མ་ལུས་ཕྱེ། ། འདུལ་བའི་ལུང་དང་ཉན་ཐོས་མདོ་སྡེའི་གཞུང༌། །

༡༽ ཁ་ཆེ་འདུས་བཟང་དང་བླ་སློབ་ཡིན་མིན།   དེ་ཡང་བཙུན་པ་དཀོན་མཆོག་འཇིགས་མེད་དབང་པོས་ (1728-1791) མཛད་པའི་རྒྱན་དྲུག་མཆོག་གཉིས་ལ་བསྔགས་པ་ལས[1]། སྐྱེས་སྟོབས་རྣམ་དཔྱོད་མཁའ་ལྟར་རབ་ཡངས་པས། ། འབུམ་སྡེ་དགུ་བཅུ་རྩ་དགུ་ཐུགས་ལ་མངའ། ། ཆོས་མངོན་རྒྱ་མཚོའི་དགོངས་དོན་གསལ་མཛད་པ། ། ཀུན་མཁྱེན་དབྱིག་གཉེན་ཞབས་ལ་ཕྱག་འཚལ་ལོ། །

ཇ༽ ཁ་ཆེར་བྱོན་ནས་མཁས་པར་གྱུར་ཚུལ།   དེ་ཡང་ཨཀྱཱ་བློ་བཟང་བསྟན་པའི་རྒྱལ་མཚན་དཔལ་བཟང་པོས་ (1910-1948/1949) མཛད་པའི་ཀུན་མཁྱེན་གཉིས་པ་དབྱིག་གཉེན་གྱི་བསྟོད་པ་ལས[1]། དེ་ནས་སྡེ་སྣོད་གསུམ་ལ་མཁས་གྱུར་ཀྱང་། ། ད་དུང་ཆོས་མངོན་རྒྱ་མཚོའི་མཐའ་འཚོལ་ཞིང་། ། རིག་གནས་ཀུན་དང་རང་གཞན་གྲུབ་པའི་མཐའ། ། མ་ལུས་མཁྱེན་པར་བཞེད་ལ་ཕྱག་འཚལ་ལོ། །

ཆ༽ སྐུ་འཁྲུངས་ནས་ནཱ་ལེནྡྲར་རབ་ཏུ་བྱུང་ཚུལ།   དེ་ཡང་དཀོན་མཆོག་འཇིགས་མེད་དབང་པོས་ (1728-1791) མཛད་པའི་འཛམ་གླིང་མཛེས་བྱེད་རྒྱན་དྲུག་མཆོག་གཉིས་ལ་གསོལ་འདེབས་ཕན་བདེའི་དཔག་བསམ་ལྗོན་པ་ལས[1]། དལ་འབྱོར་ཆུ་གཏེར་བསྲུབས་པ་ལས་བྱུང་ཞིང་། ། རྨད་བྱུང་མཁྱེན་རབ་རི་དྭགས་གཟུགས་ཀྱིས་མཚན། ། ངེས་ལེགས་ཀུན་དའི་ཚུལ་ཀུན་འཛུམ་བྱེད་པ། ། དབྱིག་གཉེན་ཆུ་ཤེལ་དབང་པོར་གསོལ་བ་འདེབས། །