པཎ་གྲུབ་ཀྱི་ལས་གཞི།

རྩོམ་སྒྲིག་པའི་སྔོན་གླེང་། ཀ༽ གསུང་འབུམ་རྩོམ་སྒྲིག་གི་དམིགས་ཡུལ། རྒྱན་དྲུག་མཆོག་གཉིས་སློབ་དཔོན་སངས་རྒྱས་བསྐྱངས། ། ལེགས་ལྡན་ཟླ་གྲགས་ཞི་ལྷ་འཕགས་སེང་དང་། ། ཞི་བ་འཚོ་དང་པདྨའི་ངང་ཚུལ་ཞབས། ། ཨ་ཏི་ཤ་བཅས་པཎ་གྲུབ་རྣམས་ལ་འདུད། ། འཛམ་གླིང་མཛེས་རྒྱན་པཎ་གྲུབ་བཅུ་བདུན་གསུང་། ། རྣམ་དཔྱོད་མིག་སྦྱིན་པོད་ཕྲེང་དགའ་ཚལ་དུ། ། ཐུགས་བསྐྱེད་དམ་བཅའ་རྣམ་བཞིའི་དཔལ་འབར་བས། ། ཕན་བདེའི་སྤྱི་ནོར་སྲིད་མཐར་གནས་ཕྱིར་འབུལ། །

རྩོམ་པ་པོའི་སྔོན་གླེང་། ཀ༽ པཎ་གྲུབ་བཅུ་བདུན་གསར་གཏོད་མཛད་ཚུལ།   ཀླུ་སྒྲུབ་འཕགས་པ་ལྷ་དང་སངས་རྒྱས་བསྐྱངས། །ལེགས་ལྡན་འབྱེད་དང་ཟླ་གྲགས་ཞི་བ་ལྷ། ། ཞི་འཚོ་པདྨའི་ངང་ཚུལ་ནཱ་ལེནྡྲའི། །ཟབ་མོ་ལྟ་བརྒྱུད་པཎ་གྲུབ་རྣམས་ལ་བསྟོད། ། ཐོགས་མེད་དབྱིག་གཉེན་ཕྱོགས་གླང་ཆོས་ཀྱི་གྲགས། །འཕགས་གྲོལ་སེང་བཟང་ཡོན་ཤཱཀ་རྣམ་གཉིས་དང་། ། ཟབ་རྒྱས་གདམས་པའི་མཛོད་འཛིན་ཨ་ཏི་ཤ །རྒྱ་ཆེན་སྤྱོད་རྒྱུད་པཎ་གྲུབ་རྣམས་ལ་བསྟོད། །