པཎ་གྲུབ་སྐོར་བཀའ་སློབ།

རིགས་པ་དང་ལྡན་ཞིང་ཚན་རིག་དང་མཐུན་པའི་ཆོས་ལུགས།   སྔར་ནས་རྟག་པར་ཞུས་པ་ལྟར། དབང་རྟུལ་དད་པའི་རྗེས་འབྲང་གི་ལམ་ཁྲིད་སྟངས་ལྟར་ཕྱིན་ན། སངས་རྒྱས་པའི་ཆོས་འདི་ཉིད་ལོ་མང་རིང་གནས་མི་ཐུབ་མིན་ཐེ་ཚོམ་རེད། དབང་རྣོན་ཆོས་ཀྱི་རྗེས་འབྲང་གི་དཔེ་ཆ་ཁྲིད་སྟངས་དང་། སངས་རྒྱས་པའི་ཆོས་ངོ་སྤྲོད་བྱེད་སྟངས་ལྟར་བྱུང་ན། འཛམ་གླིང་འདིའི་ཐོག་ཤེས་ཡོན་མུ་མཐུད་ཡར་རྒྱས་འགྲོ་ངེས་ཡིན།

བོད་གངས་ཅན་ལྗོངས་སུ་མཁན་སློབ་ཆོས་གསུམ་གྱིས་རྩིས་སྤྲོད་གནང་བའི་སངས་རྒྱས་ཀྱི་བསྟན་པ་འདི་ཉིད། དུས་རབས་ཉེར་གཅིག་པའི་ནང་འཛམ་གླིང་འདིའི་ཐོག་གི་ནང་པ་སངས་རྒྱས་པའི་ཆོས་བརྒྱུད་ཀྱི་ནང་ནས། དཔལ་ནཱ་ལེནྡྲའི་ཆོས་བརྒྱུད་དྲི་མ་མེད་པ་རིགས་པའི་ལམ་ནས་གཏན་ལ་ཕབ་སྟེ་འཆད་རྒྱུ་ཡོད་པ་ཞིག་དང་། བསམས་ན་བསམ་རྒྱུ་ཡོད་པ། བསྒོམས་ན་བསྒོམ་རྒྱུ་ཡོད་པ། མཐར་དེའི་ལག་རྗེས་སུ་རང་གི་སྒོ་གསུམ་ཞི་ཞིང་དུལ་བ་ཡོང་ཐུབ་པའི་ཆོས་ཚུལ་ཁྱད་པར་ཅན་ཞིག་ཡིན།

གཞན་དང་མི་འདྲ་བའི་ནང་ཆོས་ཀྱི་ཁྱད་ཆོས།   ༄༅། །ནང་པའི་ཆོས་ཞེས་པ་ནི། དད་པ་གཅིག་པུའི་ཐོག་ནས་འགྲོ་རྒྱུ་ཞིག་ཆགས་མེད། སྔོན་རྒྱ་གར་གྱི་ཕྱི་ནང་གི་གྲུབ་མཐའ་སྨྲ་བ་མང་པོས་བདར་ཤ་བཅད་ནས་རྟག་པ་རང་བྱུང་གི་སྐྱེས་བུ་འདོད་ན་སྐྱོན་གང་ཞིག་ཡོད་པ་བགྲོ་གླེང་བྱེད་པ་དང་། དེ་བཞིན་འཁོར་འདས་ཀྱི་བདེ་སྡུག་མྱོང་མཁན་གྱི་ཕུང་པོ་ལས་དོན་གཞན་པའི་བདག་ཅེས་པ་ཞིག་བཤད་ན་འགལ་འདུ་གང་འདྲ་ཡོད་པ་དེ་རིགས་ཧ་ཅང་ཞིབ་ཚགས་ཀྱིས་རྒྱ་གར་མཁས་པའི་གཞུང་དུ་གཏན་ལ་ཕབ་ནས་ཡོད།

བོད་དང་བོད་མིའི་མགྲིན་ཚབ་དང་དཔལ་ནཱ་ལེནྡྲ། ༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གིས་མཛད་པའི་བོད་དང་བོད་མིའི་མགྲིན་ཚབ་ལས[1]། དེ་ཡང་ཕྱི་ལོའི་དུས་རབས་བདུན་པར། ནང་པའི་གསུང་རབ་ལེགས་སྦྱར་སྐད་ནས་བོད་སྐད་དུ་ཐོག་མར་བསྒྱུར་བ་ནས་བཟུང་། བོད་མིས་རྒྱ་གར་ནི་འཕགས་པའི་ཡུལ་དུ་བཀུར་ཞིང་། རང་རེས་གཅེས་སྤྲས་ཆེན་པོ་བྱེད་པའི་བོད་ཀྱི་ནང་པ་སངས་རྒྱས་པའི་ཆོས་ཀྱང་རྒྱ་གར་ནས་བྱུང་།