ཁ༽ བུ་སྟོན་ཆོས་འབྱུང་དུ་གསལ་བའི་ཀླུ་སྒྲུབ་ཀྱི་རྣམ་ཐར།

ཁ༽ བུ་སྟོན་ཆོས་འབྱུང་དུ་གསལ་བའི་ཀླུ་སྒྲུབ་ཀྱི་རྣམ་ཐར།

༡༽ སྐུ་འཁྲུངས་ནས་རབ་ཏུ་བྱུང་ཚུལ།

 

དེ་ཡང་བུ་སྟོན་རིན་ཆེན་གྲུབ་ (1290-1364) ཀྱིས་མཛད་པའི་བུ་སྟོན་ཆོས་འབྱུང་ལས^[1]། སངས་རྒྱས་འདས་ནས་ལོ་བཞི་བརྒྱ་ན་ལྷོ་ཕྱོགས་བེ་དརྦྷའི་ཡུལ་དུ་བྲམ་ཟེ་ཕུན་སུམ་ཚོགས་པ་ཞིག་ལ་བུ་མེད་པ་ན་རྨི་ལམ་དུ་བྲམ་ཟེ་བརྒྱ་ལ་ཆོས་སྟོན་དྲངས་ན་བུ་རྙེད་ཅེས་ལྷས་ལུང་བསྟན་ཏོ། །དེ་ནས་དེ་ལྟར་བྱས་ཏེ་གསོལ་བ་བཏབ་པས་ཟླ་བ་བཅུ་ན་ཁྱེའུ་ཞིག་བཙས་ཏེ་མཚན་མཁན་ལ་བསྟན་པས་མཚན་བཟང་མོད་ཀྱི།

འོན་ཀྱང་ཞག་བདུན་གྱི་ཚེ་ལས་མེད་དོ་ཟེར་རོ། །དེ་ལ་ཅི་ཕན་དྲིས་པས་བྲམ་ཟེ་བརྒྱ་ལ་ཆོས་སྟོན་དྲངས་པས་ཟླ་བ་བདུན་དང༌། དགེ་སློང་བརྒྱ་ལ་ཆོས་སྟོན་དྲངས་པས་ལོ་བདུན་ཐུབ། དེ་ནས་ཐབས་མེད་དོ་ཟེར་རོ། །དེ་ནས་དེ་བཞིན་བྱས་ཏེ་ལོ་བདུན་དུ་ཉེ་བ་ན། བུའི་རོ་མཐོང་བ་ཕ་མས་མི་བཟོད་པས་གཡོག་དང་བཅས་པ་འཁྱམ་དུ་བཏང་ངོ༌།།

དེ་རིམ་གྱིས་སོང་སོང་སྟེ་ཁ་ས་པཱ་ཎིའི་ཞལ་བལྟས་ཏེ་རིམ་གྱིས་དཔལ་ནཱ་ལེནྡྲའི་སྒོ་དྲུང་དུ་སོང་སྟེ་སྙན་དངགས་ཀྱི་རིག་བྱེད་དག་བསྒྲགས་པ་ན། དེ་ན་བྲམ་ཟེ་ས་ར་ཧ་བཞུགས་པས་གསན་ནས་ནང་དུ་ཁྲིད་ནས་ཇི་ལྟར་གྱུར་པའི་རྒྱུ་མཚན་བཤད་པས། སློབ་དཔོན་ན་རེ། རབ་ཏུ་འབྱུང་ནུས་ན་ཐབས་ཡོད་གསུངས་པས་རབ་ཏུ་བྱུང༌། ཚེ་དཔག་མེད་འཆི་བདག་འཇོམས་པའི་དཀྱིལ་འཁོར་དུ་དབང་བསྐུར་ནས་གཟུངས་འདོན་དུ་བཅུག །ཁྱད་པར་ལོ་བདུན་ལོན་པའི་ནུབ་མོ་མཚན་ཐོག་ཐག་བཏོན་པས་འཆི་བདག་ལས་ཐར་ཏེ་ཕ་མ་དང་ཕྲད་པས་ཀྱང་ཤིན་ཏུ་དགའོ།།

དེ་ནས་བྲམ་ཟེ་ས་ར་ཧ་ལ་དཔལ་གསང་བ་འདུས་པ་ལ་སོགས་པའི་གཞུང་གདམས་པ་དང་བཅས་པ་ཞུས་སོ། །དེ་ནས་ནཱ་ལེནྡྲའི་མཁན་པོ་སྒྲ་གཅན་འཛིན་བཟང་པོ་ལ་མཁན་པོ་ཞུས་ཏེ་བསྙེན་པར་རྫོགས་ཏེ་དགེ་སློང་དཔལ་ལྡན་ཞེས་གྲགས་སོ།།

 

༢༽ ནཱ་ལེནྡྲར་གསེར་འགྱུར་གྱི་རྩི་མཛད་ཚུལ།

དེ་ཡང་བུ་སྟོན་རིན་ཆེན་གྲུབ་ (1290-1364) ཀྱིས་མཛད་པའི་བུ་སྟོན་ཆོས་འབྱུང་ལས^[2]། དེའི་ཚེ་ནཱ་ལེནྡྲའི་དགེ་འདུན་གྱི་ཞལ་ཏ་བ་བྱས་པའི་ཚེ་མུ་གེ་ཆེན་པོ་བྱུང་བ་ལ་གླིང་བར་ནས་གསེར་འགྱུར་གྱི་རྩི་བླངས་ཏེ་གསེར་འགྱུར་བྱས་ནས་དགེ་འདུན་གྱི་གདུགས་ཚོད་སྦྱར་ཏེ་དབྱར་གནས་ཐོན་པ་དང་དགེ་འདུན་རྣམས་ཀྱིས་མི་རིད་པ་དང་ཤི་བ་མཐོང་ནས་མུ་གེ་བྱུང་འདུག་པས་དགེ་འདུན་གྱི་གདུགས་ཚོད་ཇི་ལྟར་སྦྱར་ཞེས་དྲིས་པས་སྔར་གྱི་ཚུལ་བརྗོད་པས་དགེ་འདུན་ལ་མ་ཞུས་པར་དགེ་འདུན་ལོག་འཚོ་ལ་བཀོད་འདུག་པས་གནས་ནས་ཕྱུང་ལ་གཙུག་ལག་ཁང་དང་མཆོད་རྟེན་བྱེ་བ་གྱིས་ཤིག་ཅེས་བསྒོ་འོ།།

 

༣༽ ཀླུ་ཡུལ་དུ་བྱོན་ནས་འབུམ་གདན་དྲངས་ཚུལ།

དེ་ཡང་བུ་སྟོན་རིན་ཆེན་གྲུབ་ (1290-1364) ཀྱིས་མཛད་པའི་བུ་སྟོན་ཆོས་འབྱུང་ལས^[3]། དེ་ནས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་བསྒྲུབས་པས་ཐོབ་སྟེ་དེའི་ཚེ། དགེ་སློང་བདེ་བྱེད་ཅེས་པས་རིག་པའི་རྒྱན་ཞེས་པའི་གཞུང་འབུམ་ཕྲག་བཅུ་གཉིས་པ་བྱས་ནས་ཐམས་ཅད་སུན་ཕྱུང་བ་བྱུང་བས་དེ་གདུལ་བའི་དོན་དུ་ནཱ་ལེནྡྲར་ཆོས་གསུངས་སོ། །དེའི་ཚེ་བྱིས་པ་གཉིས་ཆོས་མཉན་ཅིང་ས་འོག་ཏུ་སོང་བ་ལ་སུ་ཡིན་དྲིས་པས་ཀླུ་ཡིན་ཟེར་བ་ལ་སློབ་དཔོན་གྱིས་གནོད་སྦྱིན་གྱི་འདམ་ཁྱེར་ལ་ཤོག་གསུངས་པས། དེ་དག་གིས་ཀླུའི་རྒྱལ་པོ་ལ་ཞུས་པས་སློབ་དཔོན་སྤྱན་དྲངས་པས་དོན་དུ་འགྱུར་བར་མཁྱེན་ནས་ཀླུའི་ཡུལ་དུ་བྱོན་ནས་ཆོས་གསུངས་སོ།།

དེའི་ཚེ་ཀླུས་བཞུགས་པར་ཞུས་པས་ང་མཆོད་རྟེན་བྱེ་བ་བཞེངས་པའི་འདམ་འཚོལ་བ་དང་འབུམ་གདན་འདྲེན་དུ་འོངས་ཀྱི་བསྡད་མི་ཁོམ། ཕྱིས་འོང་སྲིད་གསུངས་ཏེ་འདམ་མང་པོ་དང༌། འབུམ་དག་ཡི་གེ་ཉུང་ངུ་ཡང་གདན་དྲངས་ཏེ། འབུམ་གྱི་ཞབས་ནས་བག་ཙམ་ཀླུས་མ་བསྐུར་ཞེས་གྲག་གོ །དེ་ནས་འདམ་དེས་མཆོད་རྟེན་ལ་སོགས་བྱེ་བ་བྱས། ཀླུ་རྣམས་ཀྱིས་གྲོགས་བྱས་ཏེ་ཕལ་ཆེར་གྲུབ་ལ་འགའ་ཞིག་ཀླུ་ཡུལ་དུ་མི་འགྲོ་བའི་ཕྱིར་མ་བྱས་ཏེ་ཀླུ་སྒྲུབ་ཅེས་པའི་མིང་དུ་གྱུར་ཏོ། །དེ་ནས་ལི་ཁ་ར་ཤིང་འཕེལ་དུ་གསེར་འགྱུར་བྱས་ཏེ་སྦྱིན་པ་རྒྱ་ཆེན་པོ་བྱས་ཏེ་དེའི་ཚེ་བྲམ་ཟེ་རྒན་རྒོན་གཉིས་ལ་གསེར་མང་པོ་གནང་བས་དད་དེ་རྒན་པོས་ཉེ་གནས་བྱས་ཆོས་མཉན་ཏེ་ཤི་ནས་སློབ་དཔོན་ཀླུའི་བྱང་ཆུབ་ཏུ་གྱུར་ཏོ།།

དེ་ནས་ཤར་ཕྱོགས་པ་ཊ་བེ་སར་བྱོན་ནས་ལྷ་ཁང་མང་པོ་བཞེངས། ཡུལ་ར་དྷར་ཡང་བཞེངས། དྲིལ་བུ་ལྟ་བུའི་བྲག་གསེར་དུ་བྱ་བར་བཞེད་པ་ལྷས་བཀག་སྟེ། སྒྲ་མི་སྙན་དུ་གཤེགས་པའི་ལམ་གྲོང་ཁྱེར་ས་ལ་མ་ན་བྱིས་པ་ཛི་ཏ་ཀའི་ལག་རིས་ལས་རྒྱལ་པོར་ལུང་བསྟན་ནས་སྒྲ་མི་སྙན་དུ་བྱོན་ནས་ན་བཟའ་ཤིང་ལ་བཀལ་ཏེ་ཁྲུས་མཛད་པས་གོས་དེ་དག་གིས་ཁྱེར་བ་ལ། ངའི་ཡིན་གསུངས་པས་ང་བདག་ཅན་ཟེར་ནས་བལྟ་སྐད། དེར་དོན་བྱས་ཏེ་བྱོན་པས་སྔར་གྱི་བྱིས་པ་རྒྱལ་པོར་གྱུར་ཏེ་དེས་རིན་པོ་ཆེ་མང་དུ་ཕུལ་ཏེ་སྐྱེས་ལན་དུ་ཆོས་ཀྱི་རིན་པོ་ཆེའི་ཕྲེང་བ་གནང་ངོ༌། །སློབ་དཔོན་དེས། བསྟན་པའི་བྱ་བ་དགེ་འདུན་གྱི་ཞལ་ཏ་བྱས། མཆོད་རྟེན་དང་ལྷ་ཁང་མང་པོ་བཞེངས། རྡོ་རྗེ་གདན་ལ་རྡོའི་དྲ་མིག་གི་ར་བས་བསྐོར། དཔལ་འབྲས་སྤུངས་ཀྱི་མཆོད་རྟེན་གྱི་བཀོད་པ་བཞེངས།

༤༽ ཀླུ་སྒྲུབ་ཀྱིས་མཛད་པའི་བསྟན་བཅོས།

དེ་ཡང་བུ་སྟོན་རིན་ཆེན་གྲུབ་ (1290-1364) ཀྱིས་མཛད་པའི་བུ་སྟོན་ཆོས་འབྱུང་ལས^[4]། བསྟན་བཅོས་ལ་ནང་རིག་པ་ལ། ལྟ་བ་གཙོ་བོར་སྟོན་པ་ལ་མཐའ་བྲལ་གྱི་དབུ་མ་ལུང་གིས་སྟོན་པ་ལ་དབུ་མ་བསྟོད་པའི་སྐོར། རིགས་པས་སྟོན་པ་རིགས་པའི་ཚོགས། སྤྱོད་པ་གཙོ་བོར་སྟོན་པ་ལ་ལུང་གིས་སྟོན་པ་མདོ་ཀུན་ལས་བཏུས། རིགས་པས་སྟོན་པ་ཐེག་ཆེན་བློ་སྦྱོང༌། ཉན་ཐོས་རིགས་སད་པར་བྱེད་པ་རྨི་ལམ་ཡིད་བཞིན་གྱི་ནོར་བུ། རྟེན་ཁྱིམ་པའི་སྤྱོད་པ་གཙོ་བོར་སྟོན་པ་བཤེས་སྤྲིང༌། རབ་བྱུང་གི་སྤྱོད་པ་གཙོ་བོར་སྟོན་པ་བྱང་ཆུབ་ཀྱི་ཚོགས། སྔགས་ཀྱི་ཕྱོགས་ལ་ལྟ་སྤྱོད་མདོར་བསྡུས་པ་རྒྱུད་ཀུན་ལས་བཏུས། ལྟ་བ་གཏན་ལ་འབེབས་པ་བྱང་ཆུབ་སེམས་འགྲེལ། བསྐྱེད་རིམ་སྟོན་པ་འདུས་པའི་སྒྲུབ་ཐབས། མདོར་བྱས། མདོ་བསྲེ། དཀྱིལ་ཆོག་ཉི་ཤུ་པ། རྫོགས་རིམ་སྟོན་པ་རིམ་པ་ལྔ་ལ་སོགས་པ་མཛད་དོ། །གསོ་བ་རིག་པའི་བསྟན་བཅོས་སྦྱོར་བ་བརྒྱ་པ་ལ་སོགས་པ་དང༌། ལུགས་ཀྱི་བསྟན་བཅོས་དམངས་ལ་གདམས་པ་སྐྱེ་བོ་གསོ་ཐིགས། བློན་པོ་ལ་གདམས་པ་ཤེས་རབ་བརྒྱ་པ། རྒྱལ་པོ་ལ་ཐེག་ཆེན་གྱི་ལྟ་སྤྱོད་ཟུང་འབྲེལ་དུ་སྟོན་པ་དབུ་མ་རིན་ཆེན་ཕྲེང་བ། གཞན་ཡང་རྟེན་འབྲེལ་གྱི་རྩིས། སྤོས་སྦྱོར་གསེར་འགྱུར་ལ་སོགས་རང་རྐང་དུ་བརྩམས་པ་མང་པོ་དང༌། གཞན་འགྲེལ་དུ་བཏགས་པ་གསང་འདུས་འགྲེལ་པ་དང་། སཱ་ལུ་ལྗང་པའི་མདོ་ཚིགས་བཅད་དུ་བསྡུས་པ་ལ་སོགས་པ་མཛད་དོ། །ཕྱག་རྒྱ་བཞི་པ་ནི། ཀླུ་སྒྲུབ་ཀྱིས་མཛད་པ་མིན་ནོ་ཞེས་མན་ངག་སྙེ་མར་བཤད་དོ། །སློབ་དཔོན་ཤེས་རབ་འབྱུང་གནས་བློ་གྲོས་ཀྱིས། སྤྱོད་འཇུག་འགྲེལ་པར་སློབ་དཔོན་ཀླུ་སྒྲུབ་ཀྱིས་བསླབ་པ་ཀུན་ལས་བཏུས་པ་ཞིག་ཀྱང་མཛད་པར་བཤད་དོ། །དེ་ལྟར་ལོ་དྲུག་བརྒྱར་བསྟན་པའི་བྱ་བ་མཛད་དོ།།

 

༥༽ བདེ་སྤྱོད་ཀྱི་བུ་ལ་དབུ་སྦྱིན་པ་བཏང་ཚུལ།

དེ་ཡང་བུ་སྟོན་རིན་ཆེན་གྲུབ་ (1290-1364) ཀྱིས་མཛད་པའི་བུ་སྟོན་ཆོས་འབྱུང་ལས^[5]། དེའི་ཚེ་རྒྱལ་པོ་མཐར་འགྲོ་ཞོན་ནམ་བདེ་སྤྱོད་བཟང་པོ་ལ་བུ་གཞོན་ནུ་ནུས་ལྡན་ཞེས་བྱ་བ་ཞིག་ལ་མས་གོས་བཟང་སྲུབས་མེད་པ་ཞིག་བྱིན་པས་འདི་ངས་རྒྱལ་སྲིད་འཛིན་དུས་སུ་དགོས་ཟེར་བ་ལ། མས་ཁྱོད་ཀྱིས་རྒྱལ་སྲིད་འཛིན་པ་མི་འོང༌། ཡབ་དང་སློབ་དཔོན་ཀླུ་སྒྲུབ་ཚེ་སྒྲུབ་དང་བཅུད་ལེན་སྟབས་སུ་བྱས་པས་གྲུབ་སྟེ་སློབ་དཔོན་དང་སྲོག་གཅིག་པ་ཡིན་ཟེར་བ་དང༌། དེས་དཔལ་གྱི་རི་ལ་སློབ་དཔོན་ཀླུ་སྒྲུབ་བཞུགས་སར་ཕྱིན་ཏེ་དབུ་བསླངས་པས་ཆོད་གསུངས་ཏེ་རལ་གྲིས་བཅད་པས་མ་ཆོད་པ་ན། སློབ་དཔོན་ན་རེ། ངས་རྩྭ་ཀུ་ཤ་བཅད་པས་སྲོག་ཆགས་ཤི་བའི་རྣམ་སྨིན་ཡོད་པས་ཀུ་ཤས་ཆོད་གསུངས་ནས་བཅད་པས་སྐེའི་རྩ་བ་ནས།

ང་ནི་བདེ་བ་ཅན་གྱི་འཇིག་རྟེན་དུ། །ཕྱིན་ནས་ལུས་འདི་ལ་ཡང་འཇུག་པར་འགྱུར། །

ཞེས་ཚིགས་བཅད་བྱུང་ངོ་། །དབུ་དེ་དེས་ཁྱེར་ཏེ་ཕྱིན་ནས་གནོད་སྦྱིན་མོས་འཕྲོགས་ཏེ་དཔག་ཚད་གཅིག་ཏུ་དོར་རོ། །དབུ་དང་སྐུ་ལུས་གཉིས་ཀ་མ་ཉམས་པར་ལོ་རེ་བཞིན་ཇེ་ཉེར་སོང་ནས་མཐར་འབྱར་ནས་བསྟན་པ་དང་འགྲོ་དོན་མཛད་ཅེས་གྲག་གོ།

 

༦༽ ཀླུ་སྒྲུབ་ཅེས་མཚན་ཐོགས་ཚུལ།

དེ་ཡང་བུ་སྟོན་རིན་ཆེན་གྲུབ་ (1290-1364) ཀྱིས་མཛད་པའི་བུ་སྟོན་ཆོས་འབྱུང་ལས^[6]། ནཱ་གཱརྫུ་ནའི་ནཱ་ག་ནི་ཀླུ་སྟེ། ཆོས་ཀྱི་དབྱིངས་སུ་སྐྱེས་པ་རྟག་ཆད་གཉིས་ཀྱི་མཐའ་ལ་མི་གནས་པ། གསུང་རབ་རིན་པོ་ཆེའི་བང་མཛོད་ལ་མངའ་བརྙེས་པ། སྲེག་ཅིང་གསལ་བའི་ལྟ་བ་དང་ལྡན་པས་ཀླུའོ། །ཨརྫུ་ན་ནི་སྲིད་སྒྲུབ་སྟེ། ཆོས་ཀྱི་རྒྱལ་སྲིད་སྐྱོང་བ་དང༌། ཉེས་པའི་དགྲ་ཚོགས་འདུལ་བས་སྲིད་སྒྲུབ་སྟེ། བསྡུས་པས་ཀླུ་སྒྲུབ་བོ། །ཚིག་གསལ་དུ། གང་ཞིག་མཐའ་གཉིས་གནས་ལ་གནས་བསལ་ཞིང༌། །རྫོགས་སངས་རྒྱས་བློ་རྒྱ་མཚོར་སྐྱེ་བ་བརྙེས། །དམ་ཆོས་མཛོད་ཀྱི་ཟབ་མོ་ཉིད་ཇི་ལྟར། །རྗེས་སུ་རྟོགས་བཞིན་ཐུགས་རྗེས་སྟོན་པར་མཛད། །གང་གི་ལྟ་བའི་མེ་དཔུང་གིས། །ད་དུང་ཕས་རྒོལ་གཞུང་ལུགས་ཀྱི། །བུད་ཤིང་དང་ནི་འཇིག་རྟེན་གྱི། །ཡིད་ཀྱི་མུན་རྣམས་འཇོམས་པར་མཛད། །གང་གིས་གཉིས་མེད་ཡེ་ཤེས་གསུང་མདའི་ཚོགས། །ལྷ་དང་བཅས་པའི་གདུལ་བྱའི་འཇིག་རྟེན་ལ། །ཁམས་གསུམ་དག་ཏུ་རྒྱལ་ཐབས་ལེགས་མཛད་ནས། །སྲིད་པའི་དགྲ་སྡེ་མ་ལུས་འཇོམས་མཛད་པ། །ཀླུ་སྒྲུབ་དེ་ལ་ཕྱག་འཚལ་ནས་ནི་དེའི། །ཞེས་པ་དང༌། དབུ་ནི་དོན་དུ་གཉེར་བ་འོངས་ལ་ཐུགས་རྗེས་དབུ་ནི་བཅད་དེ་སྩོལ་མཛད་ནས། །བདེ་བ་ཅན་དུ་རྒྱལ་བའི་སྲས་པོ་ཀླུ་སྒྲུབ་གཤེགས་པར་གྱུར་པ་དེས་མཛད་པའི། །ཞེས་གསུངས་སོ།།

 

༧༽ ཀླུ་སྒྲུབ་མདོ་རྒྱུད་ལས་ལུང་བསྟན་ཚུལ།

དེ་ཡང་བུ་སྟོན་རིན་ཆེན་གྲུབ་ (1290-1364) ཀྱིས་མཛད་པའི་བུ་སྟོན་ཆོས་འབྱུང་ལས^[7]། ཁ་ཅིག་སྤྲིན་ཆེན་པོའི་མདོ་ལས་ལི་ཙ་བྱི་འདི་ང་འདས་ནས་ལོ་བཞི་བརྒྱ་ན་ཀླུ་ཞེས་བྱ་བའི་དགེ་སློང་དུ་གྱུར་ནས། ངའི་བསྟན་པ་རྒྱས་པར་བྱེད་དེ་མཐར་འཇིག་རྟེན་གྱི་ཁམས་དང་བའི་འོད་དུ་སངས་རྒྱས་ཡེ་ཤེས་འབྱུང་གནས་འོད་དུ་འཚང་རྒྱའོ་ཞེས་བཤད་ཟེར་ཏེ། །སྤྲིན་ཆེན་ལས། ལྷོ་ཕྱོགས་དྲང་སྲོང་བྱི་པོའི་ཡུལ་དུ་རྒྱལ་པོ་རྒུད་པ་གསོ་བ་ཞེས་བྱ་བ་འབྱུང་སྟེ་དེའི་ཚེ་ལོ་བརྒྱད་ཅུ་པ་ན་དམ་པའི་ཆོས་ཞིག་པའི་ལྷག་མ་ཙམ་དུ་གྱུར་པ་ན། བསོད་ནམས་ལྡན་གྱི་གྲོང་ཁྱེར་བྱེ་མ་ཆེན་པོ་ཞེས་པའི་འབབ་ཆུ་མཛེས་འབྱོར་གྱི་བྱང་གི་འགྲམ་དུ་རྗེ་རིགས་འབྲ་གོ་ཅན་གྱི་ཕྱོགས་སུ་ལི་ཙ་བྱི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་དེ་བཞིན་གཤེགས་པའི་ཆོས་དབྱུང་བའི་ཕྱིར་ངའི་མིང་ཅན་དུ་སྐྱེའོ། །དེས་དེ་བཞིན་གཤེགས་པ་ཀླུ་རིགས་སྒྲོན་མའི་དྲུང་དུ་ཐུབ་པའི་བསྟན་པ་ལ་ཆོས་ཕྱིར་སྲོག་བཏོང་བར་དམ་བཅས་པ་དེས་བསྟན་པ་རྒྱས་པར་བྱེད་དོ། །ཞེས་འབྱུང་གི་ཀླུ་སྒྲུབ་ཀྱི་གསལ་ཁ་མེད་མོད། ཁ་ཅིག་ཀླུ་སྒྲུབ་ཀྱི་མཚན་ཤཱཀྱ་བཤེས་གཉེན་དུ་འདོད་པ་ལྟར་ན་བརྟག་ཅིང༌། རྔ་བོ་ཆེའི་མདོ་ལས། ཀླུ་སྒྲུབ་ལུང་བསྟན་པ་རྒྱས་པར་བཤད་ཅེས་པའང་བརྟག་པར་བྱའོ། །ཞེས་གསུངས་སོ།།  །།

 

དཔྱད་གཞིའི་ལུང་ཁུངས་ཡིག་ཆ།

^[1]  བུ་སྟོན་ཆོས་འབྱུང་། མཚོ་སྔོན་མི་རིགས་དཔེ་སྐྲུན་ཁང་། ༡༩༨༨ ལོ། ཤོག་གྲངས་ ༡༤༥

^[2]  བུ་སྟོན་ཆོས་འབྱུང་། མཚོ་སྔོན་མི་རིགས་དཔེ་སྐྲུན་ཁང་། ༡༩༨༨ ལོ། ཤོག་གྲངས་ ༡༤༦

^[3]  བུ་སྟོན་ཆོས་འབྱུང་། མཚོ་སྔོན་མི་རིགས་དཔེ་སྐྲུན་ཁང་། ༡༩༨༨ ལོ། ཤོག་གྲངས་ ༡༤༦

^[4]  བུ་སྟོན་ཆོས་འབྱུང་། མཚོ་སྔོན་མི་རིགས་དཔེ་སྐྲུན་ཁང་། ༡༩༨༨ ལོ། ཤོག་གྲངས་ ༡༤༧

^[5]  བུ་སྟོན་ཆོས་འབྱུང་། མཚོ་སྔོན་མི་རིགས་དཔེ་སྐྲུན་ཁང་། ༡༩༨༨ ལོ། ཤོག་གྲངས་ ༡༤༨

^[6]  བུ་སྟོན་ཆོས་འབྱུང་། མཚོ་སྔོན་མི་རིགས་དཔེ་སྐྲུན་ཁང་། ༡༩༨༨ ལོ། ཤོག་གྲངས་ ༡༤༨

^[7]  བུ་སྟོན་ཆོས་འབྱུང་། མཚོ་སྔོན་མི་རིགས་དཔེ་སྐྲུན་ཁང་། ༡༩༨༨ ལོ། ཤོག་གྲངས་ ༡༤༩

 

ཡོང་ཁུངས། པཎ་གྲུབ་བཅུ་བདུན་གྱི་རྣམ་ཐར་འཛམ་གླིང་མཛེས་རྒྱན། ༼ཀ༽ རྩོམ་པ་པོ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༥༢༩ ནས་ ༥༣༦ བར་གསལ་བ་ལས་བཏུས།