པཎ་གྲུབ་སྐོར་བཀའ་སློབ།

རྣམ་དཔྱོད་ཀྱི་མིག་སྦྱིན་མཁན། པཎ་གྲུབ་བཅུ་བདུན། པཎ་གྲུབ་བཅུ་བདུན་གྱི་གཞུང་དེ་དག་ང་ཚོར་རྣམ་དཔྱོད་ཀྱི་མིག་འབྱིན་མཁན་ལྟ་བུ་ཡིན་པས། གཞུང་དེ་དག་ཧ་ཅང་གལ་གནད་ཆེན་པོ་ཆགས་ཡོད། གཞུང་དེ་དག་ལ་རྒྱུས་མངའ་ཅུང་ཟད་ཡོད་པ་ཞིག་བྱུང་ན། དབང་རྣོན་ཆོས་ཀྱི་རྗེས་འབྲང་གི་དད་པ་དེ་བྱུང་བ་དང་། དེ་མིན་ཕ་མ་དང་མི་ཐོག་གོང་མ་དག་གིས་སྐྱབས་སུ་མཆིའོ་ཞེས་བརྗོད་པ་དེ་གའི་ཐོག་ཏུ་མུ་མཐུད་ཕྱིན་ན་དབང་རྟུལ་དད་པའི་རྗེས་འབྲང་ཆགས་པ་རེད།

ནཱ་ལེནྡྲའི་རིག་གཞུང་།   ཏཱ་ལའི་བླ་མ་ཁ་བདེ་པོ་ཡོད་པ་འདི་ནཱ་ལེནྡྲའི་རིག་གཞུང་སྦྱངས་ནས་བྱུང་བ་རེད། ང་ཚོས་ནཱ་ལེནྡྲའི་ཆོས་བརྒྱུད་ཅེས་མི་བརྗོད་པར་རིག་གཞུང་ཞེས་བརྗོད་ན་ཡག་པོ་འདུག །དེར་བརྟེན་ངོས་ཀྱི་རེ་བར་མ་འོངས་པར་ཁ་ཆེའི་ཆོས་གྲོགས་ཚོས་ཀྱང་དཔལ་ནཱ་ལེནྡྲའི་རིག་གཞུང་ནས་གསུངས་པའི་སེམས་ཁམས་རིག་པ་དང་། ཚད་མ་རིག་པའི་རྣམ་གཞག་སློབ་ཐུབ་པ་ཡིན་ན་ཏན་ཏན་ཕན་ཐོགས་ཡོང་རྒྱུ་རེད།   ཕྱི་ལོ་ ༢༠༡༨ ཟླ་བ་ ༧ ཚེས་ ༦ ཉིན་ལ་དྭགས་ཞི་བའི་ཚལ་ཕོ་བྲང་དུ་སྐུའི་འཁྲུངས་སྐར་ཉིན་སྩལ་བའི་བཀའ་སློབ་ལས་བཏུས།  

༄༅། །ཕྱི་ལོ་ ༢༠༡༧ ཟླ་བ་ ༣ ཚེས་ ༡༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བྷི་ཧཱར་མངའ་སྡེའི་ནཱ་ལེནྡྲ་རྫོང་དུ་རྟེན་གཞི་བྱས་པའི་རྒྱལ་པོའི་ཁབ་ཏུ་ Rajgir ནཱ་ལེནྡྲ་གཙུག་ལག་ཁང་ཆེན་གསར་པའི་ Nav Nalanda Mahavira University ནང་བཀའ་སློབ་སྩལ་དོན། རྒྱ་གར་སྤྱི་དང་ལྷག་པར་དཔལ་ནཱ་ལེནྡྲའི་གཙུག་ལག་སློབ་གྲྭའི་པཎ་གྲུབ་རྣམས་ཀྱིས་ཕྱི་རོལ་པ་རྣམས་ལ་རིགས་པའི་ལམ་ནས་ཚར་བཅད་པ་དང་སྦྲགས། ནང་པའི་གཞུང་དེ་ཡང་ཕྱུག་ཏུ་ཕྱིན་པ་དེ་འདྲ་བྱུང་ཡོད།