པཎ་གྲུབ་སྐོར་བཀའ་སློབ།

༄༅། །ངོས་ནས་བསྟན་པ་སྤྱིར་དམིགས་ཏེ་རྒྱུན་དུ་བཀའ་འགྱུར་བསྟན་འགྱུར་ལ་དོ་སྣང་བྱ་དགོས་པའི་འབོད་བསྐུལ་སྔ་ཕྱིར་བྱས་ཤིང་། ཤིང་རྟ་ཆེན་པོ་རྣམ་གཉིས་སོགས་པཎ་གྲུབ་བཅུ་བདུན་གྱི་གཞུང་རྣམས་བཤད་སྒྲུབ་ཟུང་གིས་འཛིན་དགོས་པ་ནི་འཇིག་རྟེན་འདིར་རྒྱལ་བའི་བསྟན་པ་རིང་དུ་གནས་མིན་གྱི་འགག་རྩར་སོང་གཤིས། བཀའ་བསྟན་འགྱུར་ལ་དོ་སྣང་དང་འཆད་ཀློག་བྱེད་པོ་ཇེ་མང་དུ་བྱུང་ཡོད་པ་ནི་སྤྲོ་བ་སྐྱེ་འོས་སུ་གྱུར།

༄༅། །ཕྱི་ལོ་ ༢༠༢༠ ཟླ་བ་ ༡༡ ཚེས་ ༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རཱ་ཤི་ཡའི་དད་ལྡན་ཆོས་ཞུ་བས་ཇི་ལྟར་གསོལ་བ་བཏབ་པ་ལྟར་མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་ཆོས་འབྲེལ་བཀའ་དྲིན་སྩལ་བ་ལས།   ཁལ་མུག་ཏུ་གཙུག་ལག་ཁང་དང་པཎ་གྲུབ་བཅུ་བདུན་གྱི་སྐུ་བརྙན་བཞེངས་པ་ནས་ད་ལན་མགོན་པོ་ཀླུ་སྒྲུབ་ཀྱི་འདྲ་སྐུ་མཇལ་རྒྱུ་བྱུང་བ་རེད། ཁལ་མུག་གནམ་གཤིས་གྲང་མོ་ཡིན་སྟབས་མགོན་པོ་ཀླུ་སྒྲུབ་སྐུ་བསིལ་གྱི་མེད་དམ་སྙམ་པ་དྲན་བྱུང་།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སྩལ་བར[1]། རྒྱ་ནག་ལ་ནང་ཆོས་ཐོག་མར་སྤེལ་མཁན་གྱི་ཐང་སན་བླ་མ་ནཱ་ལེནྡྲར་ཕེབས་ནས་སློབ་གཉེར་གནང་སྟེ་མཐར་རྒྱ་ནག་ཏུ་ཕེབས་ཡུལ་གྱི་མཚོ་ཁར་ངོས་རང་སླེབས་ཤིང་། རྒྱབ་ངོས་རི་སྟེང་དུ་ཀླུ་སྒྲུབ་བཞུགས་མྱོང་བའི་བྲག་ཕུག་ཅིག་འདུག་པར་ངོས་རང་ཧ་ཅང་དགའ་པོ་བྱུང་།

  ཚད་མའི་རིག་པའི་གཞུང་གི་འཕེལ་རིམ། ༸གོང་ས་༸སྐྱབས་མགོན་ཆེན་པོ་མཆོག་གིས[1]། ངོས་ཀྱིས་ནམ་རྒྱུན་འདི་ལྟར་རྗོད་ཀྱི་ཡོད། མུ་སྟེགས་པ་དེ་དག་གི་གཞུང་དང་། ལྷག་པར་ཚད་མའི་གཞུང་དང་། ཀླུ་སྒྲུབ་ཡབ་སྲས་ཀྱིས་སྟོང་ཉིད་ཀྱི་ལྟ་བའི་སྐོར་གསུངས་པའི་གཞུང་དེ་དག་ལྗགས་རྩོམ་མཛད་སྐབས་མང་ཆེ་བ་རྟགས་གསལ་བཏང་ནས་རིགས་པས་བསྒྲུབས་ཏེ་ཐལ་འགྱུར་དང་གཏན་ཚིགས་འགོད་པ་སོགས་ཀྱི་ཐོག་ནས་ནང་པའི་ལྟ་གྲུབ་གསུང་གི་ཡོད་སྟབས།