དཔལ་ནཱ་ལེནྡྲ། བྱོན་པ་ལེགས།

  ༄༅། །རིག་པའི་དབང་ཕྱུག་དཔལ་ཆོས་ཀྱི་གྲགས་པ་ལ་བསྟོད་པ་སེངྒེ་ང་རོ་བཞུགས་སོ།།[1]   ༼ངག་དབང་མཁྱེན་རབ་ (འཁྲུངས་དུས། དུས་རབས་18པ།) ཀྱིས་མཛད་པ།༽   བསྐལ་བཟང་འདྲེན་མཆོག་ཚད་མའི་སྐྱེས་བུ་ཡི། །རླབས་ཆེན་མཛད་བཟང་སྣང་བའི་མུ་ཁྱུད་ཅན། །བསྟན་འགྲོའི་ལྷ་ལམ་ཡངས་པོར་འདྲེན་མཁས་པ། །པཎ་ཆེན་ཉི་མའི་ཤིང་རྟ་རྒྱལ་གྱུར་ཅིག །གང་ཐུགས་དགའ་མའི་དཀྱུས་རིང་ཟུར་མིག་གིས། །ཀུན་གཟིགས་རབ་འབྱམས་ཟག་མེད་ཡེ་ཤེས་དབྱིངས། །དམར་སེར་གཞོན་ནུའི་ལང་ཚོའི་སྡུག་གུ་ཅན། །མཛའ་བོའི་ཁུག་པ་ཆོས་ཀུན་མཁྱེན་པའི་དཔྱིད། །

  ༄༅། །དཔལ་ཆོས་ཀྱི་གྲགས་པའི་གསོལ་འདེབས།[1] ༼ པཎ་ཆེན་བློ་བཟང་དཔལ་ལྡན་ཡེ་ཤེས་ (1738-1780) ཀྱིས་མཛད་པ།༽   ན་མོ་དྷརྨ་ཀཱིརྟཱི་ཡ། དཔལ་གྱི་མཐར་ཐུག་དོན་གཉིས་ལྷུན་གྲུབ་པའི། །ཡོན་ཏན་ལྡན་ཞིང་ཆོས་ཀྱི་རྔ་བོ་ཆེ། །སྲིད་པ་གསུམ་ན་སྒྲོག་པའི་གྲགས་པ་ཅན། །སྐྱབས་ཀྱི་མཐར་ཐུག་ཁྱོད་ལ་གསོལ་བ་འདེབས། །ཁྱོད་ཀྱི་ལེགས་བཤད་ཆ་ཤས་ཙམ་གྱིས་ཀྱང་། །གདུལ་བྱའི་བློ་མུན་ཐམས་ཅད་དྲུངས་འབྱིན་པའི། །རིགས་ལམ་འདི་ཉིད་རྒྱས་པར་བྱ་བའི་ཕྱིར། །རྗེ་བཙུན་བླ་མ་བསྐལ་བརྒྱར་ཞབས་བརྟན་ཤོག །

  ༄༅། །ཆོས་གྲགས་ཀྱི་སྐུའི་འདོད་གསོལ་བཞུགས་སོ།།[1] ༼ངག་དབང་ཀུན་དགའ་བློ་གྲོས་ (1729-1783) མཆོག་གིས་མཛད་པ།༽   ཨོཾ་སྭསྟི་སིདྡྷི། ལྔ་བདོའི་དཔལ་མགོན་བདག་ཅག་སྟོན་པ་ཡི། །བསྟན་པ་དག་པར་བསྒྲུབ་ཕྱིར་བསམ་བཞིན་དུ། །ལྷོ་ཕྱོགས་རྒྱལ་དབང་གཙུག་ནོར་མུ་སྟེགས་རིགས། །ལེགས་འཁྲུངས་གཞོན་ནུ་སྒྲ་མཁན་དེ་ལ་འདུད། །ཞང་པོ་གཞོན་ནུ་ལེགས་ལྡན་གྱིས་བསྐྲད་པས། །མུ་སྟེགས་མཐར་མཛད་ནང་པའི་བསྟན་ལ་བྱོན། །དྷརྨཱ་ཀིརྟིའི་མཚན་འཆང་དབང་ཕྱུག་སྡེར། །ཚད་མའི་གཞུང་གསན་སློབ་དཔོན་ལས་ལྷག་འདུད། །

  ༄༅། །དཔལ་ཆོས་ཀྱི་གྲགས་པའི་རྟོགས་པ་བརྗོད་པའི་རྣམ་པར་ བཤད་པ་འཕྲིན་ལས་རྒྱ་མཚོའི་རླབས་ཀྱི་འཕྲེང་བ་ ཞེས་བྱ་བ་བཞུགས་སོ།།[1]   ༼མཛད་པ་པོ། གཙང་མཁན་ཆེན་དཔལ་ལྡན་རྒྱ་མཚོས་ (1610-1684) མཛད་པ།༽   ན་མོཿཤྲི་ཤཱཀྱ་ཝཱ་ར་ཝཱནྟ་ཡ། ཆོས་ཀྱི་རྒྱ་མཚོའི་ཟླ་དབང་ཆེ། །གཞན་འཕྲུལ་དབང་བྱེད་བདག་པོའི་དཔུང་། །རྣམ་གནོན་སྟོབས་བཅུའི་ཟློས་གར་མཁན། །གྲགས་པའི་འཁོར་ལོ་འཛིན་དེ་རྒྱལ། །དྲི་ཟའི་རྒྱུད་མངས་མགྲིན་པར་འཆང་བ་དྲང་སྲོང་ཟླ་སྲིན་ཡིད་སྲུབས་གཉེན། །ཞིང་ཤེས་ངང་པའི་ཤིང་རྟ་ཅན་གྱི་ཨུཏྤལ་སྔོ་ལྡན་ཀུན་དགའི་སླད། །ཤེས་བྱ་མ་ལུས་བདག་གིར་བྱེད་པོ་དྷརྨ་ཀཱིརྟིའི་རབ་རྟོགས་གཏམ། །

  ༄༅། །དཔལ་ཆོས་ཀྱི་གྲགས་པའི་རྟོགས་བརྗོད་པདྨ་དཀར་པོའི་ཕྲེང་བ་བཞུགས་སོ།།[1]   ༼པཎ་ཆེན་ཤཱཀྱ་མཆོག་ལྡན་ (1428-1507) གྱིས་མཛད་པ།༽   ༄༅། །ན་མོ་མཉྫུ་ཤྲཱི་ཡེ། དཔལ་ཕྱོགས་ཐམས་ཅད་ལས་རྣམ་པར་རྒྱལ་བ་ཆོས་ཀྱི་གྲགས་པའི་ཞལ་སྔ་ནས་ཀྱི་རྟོགས་པ་བརྗོད་པ་ངེས་དོན་པདྨ་དཀར་པོའི་ཕྲེང་བས་རིགས་པའི་སྣང་བ་རྒྱས་བྱེད་ཅེས་བྱ་བ། ཆོས་ཀྱི་ཉི་མ་གྲུབ་པའི་ལང་ཚོ་ཅན། །ནམ་ཡང་གྲགས་པའི་ཁྲི་ལ་རབ་འཁོད་ནས། །རིགས་པའི་སྣང་བ་བགྲང་ཡས་སྤྲོ་མཁས་པ། །རྒྱལ་བས་ལུང་བསྟན་དེ་ལ་ཕྱག་འཚལ་ལོ། །

  ༄༅། །སློབ་དཔོན་ཕྱོགས་གླང་གི་བསྟོད་པ་བཞུགས་སོ།།[1] ༼ཨཀྱཱ་བློ་བཟང་བསྟན་པའི་རྒྱལ་མཚན་དཔལ་བཟང་པོས་ (1910-1948/1949) མཛད་པ།༽ ཨོཾ་བདེ་ལེགས་སུ་གྱུར་ཅིག །ཞིང་མང་རྡུལ་གྱི་གྲངས་མཉམ་རྒྱལ་བ་ཡི། །ཡབ་གཅིག་ཡེ་ཤེས་སྣང་བའི་རང་གཟུགས་ཅན། །སྐལ་བཟང་བློ་ཡི་པདྨོ་ཁ་འབྱེད་པ། །ལྷ་མཆོག་སྨྲ་བའི་ཉི་མས་དགེ་ལེགས་མཛོད། །མགོན་པོ་དེ་ཡི་ཐུགས་རྗེའི་འོད་ཟེར་གྱིས། །གང་གི་རྣམ་དཔྱོད་གསུང་རབ་འདབ་སྟོང་ཅན། །རིགས་ཚུལ་སྦྲང་རྩིའི་མངར་པོའི་དཔལ་རྒྱས་པ། །དཔལ་ལྡན་དེ་ཡི་ཞབས་པད་སྤྱི་བོར་འཛིན། །

  ༄༅། །སྭསྟི། དཔལ་ཕྱོགས་ཀྱི་གླང་པོའི་རྟོགས་པ་བརྗོད་པའི་གཏམ། །[1] (པཎ་ཆེན་ཤཱཀྱ་མཆོག་ལྡན་ (1428-1507) གྱིས་མཛད་པ།༽   དེ་ཉིད་ཀྱི་གསུང་རབ་ལ་གུས་པས་ཕྱག་འཚལ་ལོ། །དཔལ་ལྡན་ཕྱོགས་རྣམས་ཐམས་ཅད་ལས། །རྒྱལ་རྔ་ལན་བརྒྱར་བརྡུངས་རྣམས་ཀྱི། །བསྟན་པའི་བརྒྱ་བྱིན་དེ་འཛིན་པའི། །ཉེ་དབང་ཚོགས་དང་བཅས་རྣམས་ནི། །ས་གསུམ་གླང་པོས་རྣམ་དཔྱོད་དང༌། །རིག་པའི་བརྩལ་གྱིས་འདིར་འདེགས་པ། །ཐུབ་པའི་དབང་པོས་དེ་མཁྱེན་ནས། །རྒྱལ་བའི་སྲས་པོར་ལུང་བསྟན་པ། །

  ༄༅། །ཀུན་མཁྱེན་གཉིས་པ་དབྱིག་གཉེན་གྱི་བསྟོད་པ་བཞུགས་སོ།།[1] ༼ཨཀྱཱ་བློ་བཟང་བསྟན་པའི་རྒྱལ་མཚན་དཔལ་བཟང་པོས་ (1910-1948/1949) མཛད་པ།༽   ན་མོ་མཉྫུ་གྷོ་ཥཱ་སུ་མ་ཏི་ཀིརྟི་ཤྲི་ཡེ། དཔལ་ལྡན་ཚོགས་གཉིས་སྟོབས་དང་སྐྱེས་ཐོབ་ཐོགས་པ་མེད་པས་ཐུབ་པའི་གསུང་རབ་ཀུན། །ཡང་དག་གཟིགས་པས་བསྟན་པ་འདི་ལ་ཀུན་མཁྱེན་གཉིས་པར་གྲགས་པའི་བ་དན་ཅན། །ས་སྟེངས་མཁས་པ་ཀུན་གྱིས་དྲན་པའི་མོད་ལ་ལག་པད་སྤྱི་བོར་ཟུམ་པ་གང་། །དེ་ཡི་རྣམ་ཐར་དྲན་པས་བདག་ཀྱང་དད་པའི་ཡིད་གཡོས་སྤོབས་པ་ཅུང་ཟད་སྐྱེས། །

  ༄༅། །ཀུན་མཁྱེན་གཉིས་པ་དབྱིག་གཉེན་ཞབས་ཀྱི་རྟོགས་བརྗོད་བསྟན་པ་ལ་འཇུག་པའི་ཡིད་བཞིན་མཛོད་སྒོ་ཞེས་བྱ་བ།།[1] ༼པཎ་ཆེན་ཤཱཀྱ་མཆོག་ལྡན་ (1428-1507) གྱིས་མཛད་པ།༽ ༄༅། །ན་མོ་བུདྡྷ་ཡ། ངོ་མཚར་ཆོས་ཀྱི་ཡིན་ལུགས་མཐར་ཐུག་པ། །རབ་དགོངས་མཛད་པས་མཁྱེན་པའི་རྩེ་མོར་སོན། །ཐུགས་རྗེའི་དབང་གྱུར་འགྲོ་བ་ཐམས་ཅད་ཀྱི། །བྲན་བཞིན་མཛད་པས་ཕྱག་འོས་ཤཱཀྱའི་སྲས། །སུམ་རྩེན་དཔའ་བོ་རྗེ་བཙུན་མ་ཕམ་པས། །ངེས་དོན་བདུད་རྩིར་མཛད་པའི་འཆི་མེད་བཅུད། །ཐུབ་བསྟན་སྦྲང་རྩིའི་དགྲ་བོ་མ་མྱངས་པ། །ཐོགས་མེད་སྙན་ཤལ་རིང་པོའི་དཔལ་དུ་བྱོན། །

མཁྱེན་དང་བརྩེ་བའི་དཔལ་ལྡན་སྤྱན་ཟུང་བྱིན་ཟ་ཆེ་ལྟར་རབ་ཏུ་འབར། །རྣམ་དཔྱོད་གཤོག་ཡངས་བདེན་གཉིས་ཤེས་བྱའི་ཆུ་མཐོང་འགོག་པར་བསྐྱོད་པ་ཡིས། །ཐེག་གསུམ་དམ་ཆོས་ལྷ་ལམ་དབྱིངས་སུ་ཐོགས་པ་མེད་པར་ཉེར་ལྡིང་བ། །མཚུངས་མེད་མཁའ་ལྡིང་དབང་པོའི་ཞབས་ལ་སྒོ་གསུམ་གུས་པས་ཕྱག་འཚལ་ལོ། །