དཔལ་ནཱ་ལེནྡྲ། བྱོན་པ་ལེགས།

༄༅།  །རྒྱན་དྲུག་མཆོག་གཉིས་ཀྱི་སྐུ་བསྟོད་གསོལ་འདེབས་ཟླ་བ་གཞོན་ནུའི་འོད་སྣང་ཞེས་བྱ་བ་བཞུགས་སོ།།   ཕྱི་དང་ནང་གིས་བསྡུས་པའི་ཆོས་རྣམས་ཀུན། །བདེན་བཞིར་བསྡུས་ནས་གནས་ལུགས་སྟོན་པ་ལ། །རྟེན་འབྱུང་སྨྲ་བས་སྟོང་ཉིད་གསལ་མཛད་པ། །རྒྱལ་བ་ཐུབ་པའི་དབང་པོར་གསོལ་བ་འདེབས། །ཤེར་ཕྱིན་དགོངས་དོན་མཐའ་བྲལ་དེ་ཉིད་དོན། །ལུང་དང་རྟེན་འབྱུང་རིགས་པས་རབ་བསྒྲུབས་ནས། །སྤྲོས་མཐའ་བརྒྱད་བྲལ་ཟབ་མོ་ལྟ་བའི་སྲོལ། །འབྱེད་མཛད་ཀླུ་སྒྲུབ་ཞབས་ལ་གསོལ་བ་འདེབས། །ཀླུ་སྒྲུབ་དགོངས་དོན་མཐའ་བྲལ་དབུ་མའི་ལམ། །མཐར་ཐུག་སྙིང་པོར་གཟིགས་པའི་ལེགས་བཤད་ཀྱིས། །ཟབ་མོ་དབུ་མའི་གཞུང་ལུགས་གསལ་མཛད་པ། །རྒྱལ་སྲས་འཕགས་པ་ལྷ་ལ་གསོལ་བ་འདེབས། །

  ༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ།   ཕྱི་ལོ་ ༢༠༡༧ ཟླ་བ་ ༦ ཚེས་ ༦ ཉིན་༸གོང་ས་མཆོག་གིས་བཀའ་སྩལ་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རིགས་གཞོན་སྐྱེས་ལ་དམིགས་བསལ་ནང་ཆོས་ངོ་སྤྲོད་ཐེངས་ ༡༡ པའི་ཉིན་གཉིས་པར་སྩལ་བའི་བཀའ་སློབ་བཀའ་དྲིན་ཆེ་གནང་བར། དེ་ཡང་རྒྱལ་བ་རིན་པོ་ཆའི་དྲ་བར་རིན་པོ་ཆེ་མཆོག་གིས་བཀའ་སློབ་བཀའ་དྲིན་ཆེ་སྩལ་བ་བོད་ཡིག་ཐོག་ཕབ་པ་ལྟར་ན། བོད་གངས་ཅན་གྱི་ལྗོངས་ལ་ཡོད་པའི་རིག་གཞུང་སྤྱི་དང་། ལྷག་པར་དུ་དཔལ་ནཱ་ལེནྡྲ་ནས་བརྒྱུད་པའི་ཆོས་བརྒྱུད་ཀྱི་ཚད་མ་རིག་པའི་རིགས་ལམ་གྱི་ཐོག་ནས་གཏན་ལ་འབེབ་པའི་ལུགས་འདིས་འཛམ་བུ་གླིང་ལ་ཏན་ཏན་ཕན་ཐོགས་བྱེད་ཐུབ་པའི་ཆ་རྐྱེན་ཡོད་པ་མཐོང་གི་འདུག

  ༄༅། །ཕྱི་ལོ་ ༢༠༢༠ ཟླ་བ་ ༨ ཚེས་ ༦ ཉིན་བོད་རིགས་གཞོན་སྐྱེས་རྣམས་ལ་དྲ་ཐོག་ནས་རྟེན་འབྲེལ་བསྟོད་པའི་བཀའ་ཆོས་སྩལ་བ་ནས་ཡིག་འབེབས་ཟུར་འདོན་ཞུས་པ།   བོད་ཀྱི་ཆོས་དང་རིག་གཞུང་འདི་ཉིད་ཧ་ལམ་འཛམ་གླིང་འདིའི་ཐོག་གི་ཡག་ཤོས་ཀྱི་གྲས་ཆགས་ཡོད། བོད་ཀྱི་སངས་རྒྱས་པའི་བསྟན་པ་འདི་བཞིན་དཔལ་ནཱ་ལེནྡྲའི་ཆོས་བརྒྱུད་ཅིག་དང་། དེ་ཡང་མཁན་ཆེན་ཞི་བ་འཚོས་བོད་མིར་ངོ་སྤྲོད་གནང་བ་ཞིག་ཡིན་པར་མ་ཟད། ལྷག་པར་རྒྱ་ཆེ་ལ་གཏིང་ཟབ་པ། ཚད་མའི་གཞུང་དང་འབྲེལ་ཞིང་རིགས་པའི་ལམ་ནས་འཆད་རྒྱུ་ཡོད་པ་ནི་ང་ཚོ་བོད་གཅིག་པུ་རེད་འདུག །རྒྱ་ནག་ནང་པའི་ལུང་པ་ཡིན་ལ། ནང་པ་ཡང་ཧ་ཅང་མང་པོ་ཞིག་ཡོད། དེ་བཞིན་ཐའེ་ལན་ཌི་དང་། འབར་མ་ལ་སོགས་པ་རྣམས་ནང་པའི་ཡུལ་གྲུ་ཡིན་ནའང་། ཚད་མའི་གཞུང་ནས་གསུངས་པའི་རིགས་པའི་ལམ་གྱི་ཐོག་ནས་འཆད་ཉན་བྱེད་པའི་ནཱ་ལེནྡྲའི་སྲོལ་རྒྱུན་ལྟ་བུ་ཕལ་ཆེར་མེད།

དཔལ་ལྡན་ཟླ་བ་གྲགས་པའི་བསྟོད་པ་ངོ་མཚར་ཚིགས་བཅད་མ།[1]   འཇམ་དཔལ་སྐུ་ཡི་སྤྲུལ་པར་འཁྲུངས། །ཀླུ་སྒྲུབ་དགོངས་པ་ཐུགས་སུ་ཆུད། །ཟླ་བ་གྲགས་པ་ཞེས་བྱ་བའི། །བླ་མ་དེ་ལ་ཕྱག་འཚལ་ལོ། །དཔལ་ལྡན་ཟླ་བ་གྲགས་པ་ཡི། །རྣམ་དག་ཚུལ་ཁྲིམས་གཙང་མའི་མཐུས། །སོལ་བ་ལས་འཁྲུངས་ལྗོན་ཤིང་ནི། །ཡལ་ག་རྫོགས་པ་ངོ་མཚར་ཆེ། །དཔལ་ལྡན་ཟླ་བ་གྲགས་པ་ཡིས། །རི་མོར་བྲིས་པའི་བ་རྣམས་ལས། །འོ་མ་བཞོས་པས་གཞན་རྒྱུད་ཀྱི། །བདེན་ཞེན་བཟློག་པ་ངོ་མཚར་ཆེ། །དཔལ་ལྡན་ཟླ་བ་གྲགས་པ་ཡིས། །བརྡ་སྤྲོད་ཀུན་ཏུ་བཟང་པོའི་གཞུང་། །བསྐུལ་བས་གངྒཱའི་ཆུ་ཀླུང་གིས། །ཤེས་རབ་བསྐྱེད་པ་ངོ་མཚར་ཆེ། །དཔལ་ལྡན་ཟླ་བ་གྲགས་པ་ཡིས། །སྟོབས་ལྡན་རྡོ་ཡི་སེངྒེ་བསྐུལ། །དུ་རུ་ཀ་ཡི་དམག་བཟློག་ཀྱང་། །ཤི་རྨས་མེད་པ་ངོ་མཚར་ཆེ། །  དཔལ་ལྡན་ཟླ་བ་གྲགས་པ་ལ། །མཁས་པ་ཙནྡྲ་གཽ་མི་ཡིས། །ལོ་བདུན་བར་དུ་བརྩད་བྱས་ཀྱང་། །རྒོལ་བར་མ་ནུས་ངོ་མཚར་ཆེ། །དཔལ་ལྡན་ཟླ་བ་གྲགས་པ་ཡིས། །ཡང་དག་རིགས་ལམ་སེངྒེའི་སྒྲས། །ཕྱི་ནང་གྲུབ་མཐའི་གླང་པོ་ཀུན། །འཇིག་པར་བྱེད་པ་ངོ་མཚར་ཆེ། །དཔལ་ལྡན་ཟླ་བ་གྲགས་པ་ཡིས། །ཀླུ་སྒྲུབ་ཡབ་སྲས་དགོངས་པའི་མཐིལ། །མཁས་པ་སྟོང་གིས་མ་དཔོག་པ། །ཇི་བཞིན་གསལ་བ་ངོ་མཚར་ཆེ། །དཔལ་ལྡན་ཟླ་བ་གྲགས་པ་ཡིས། །ངེས་དོན་མཐར་ཐུག་ཐལ་འགྱུར་གཞུང་། །འཛམ་གླིང་ཀུན་ཏུ་སྣང་བ་དང་། །ལོག་སྨྲ་བཟློག་པ་ངོ་མཚར་ཆེ། །དཔལ་ལྡན་ཟླ་བ་གྲགས་པ་ཡིས། །དངོས་པོ་སྟོབས་ཞུགས་རིགས་པའི་ལམ། །མཐོང་ནས་མཁས་མཆོག་ལེགས་ལྡན་འབྱེད། །རྗེས་སུ་འབྲངས་པ་ངོ་མཚར་ཆེ། །དཔལ་ལྡན་ཟླ་བ་གྲགས་པ་ཡིས། །གསང་སྔགས་ཐེག་པ་ཆེན་པོ་ནི། །མཐའ་དྲུག་ཚུལ་བཞིས་རབ་བརྟགས་ནས། །མྱུར་ལམ་བསྟན་པ་ངོ་མཚར་ཆེ། །དཔལ་ལྡན་ཟླ་བ་གྲགས་པ་ཡིས། །མཆོག་གསང་རྡོ་རྗེ་སྙིང་པོའི་དོན། །རྟོགས་ཏེ་འཕོ་ཆེན་དྭངས་མའི་སྐུ། །སྐྱེ་ཤི་སྤངས་པ་ངོ་མཚར་ཆེ། །དཔལ་ལྡན་ཟླ་བ་གྲགས་པ་ཡིས། །ཕྱོགས་རིས་མེད་པའི་ཐུགས་རྗེ་ཡི། །[2]ཕྱི་མའི་མུ་མཐའ་ཐུག་པ་རུ། །འགྲོ་བ་སྒྲོལ་བ་ངོ་མཚར་ཆེ། །དཔལ་ལྡན་ཟླ་བ་གྲགས་པ་ཡི། །མཚན་ཙམ་ཐོས་པས་ཚེ་རབས་ཀུན། །རྨོངས་པའི་མུན་པ་སེལ་མཛད་ཅིང་། །ཡེ་ཤེས་སྟེར་བ་ངོ་མཚར་ཆེ། །བྱམས་མགོན་སྙིང་རྗེའི་བློ་ཅན་ལ། …

༄༅། །ཕྱི་ལོ་ ༢༠༢༠ ཟླ་བ་ ༨ ཚེས་ ༤ ཉིན་དེང་དུས་བོད་རིགས་ན་གཞོན་རྣམས་ལ་རྟེན་འབྲེལ་བསྟོད་པའི་བཀའ་ཁྲིད་སྐབས་སྩལ་བ་ཡིག་འབེབས་ལས་ཟུར་འདོན་ཞུས་པ།   སངས་རྒྱས་པའི་ཆོས་ནི་མི་རྣམ་དཔྱོད་དང་བློ་གྲོས་མཆོག་ཏུ་གྱུར་པ་དག་གིས་དགོངས་པ་མང་དུ་བཞེས་ནས་བྱུང་བ་ཞིག་སྟེ། དེ་ཡང་ཐོག་མར་སྟོན་པ་བཅོམ་ལྡན་འདས་ཀྱིས་གསུངས་ཤིང་། དེ་རྗེས་པཱ་ལིའི་ཆོས་བརྒྱུད་རྣམས་ནི་སྟོན་པ་བཅོམ་ལྡན་འདས་ཀྱིས་གསུངས་པའི་ལུང་ལ་གཙོ་བོར་བརྟེན་ནས་འགྲོ་བ་དང་། ལེགས་སྦྱར་གྱི་ཆོས་བརྒྱུད་ནི་དཔལ་ནཱ་ལེནྡྲར་དར་བ་དང་། ནཱ་ལེནྡྲ་ནི་ཤེས་ཡོན་གྱི་ལྟེ་གནས་ཤིག་ཏུ་གྱུར་པར་མ་ཟད། ནཱ་ལེནྡྲའི་ལམ་ལུགས་ནང་རིགས་པས་དཔྱད་པ་བྱ་རྒྱུའི་རིགས་ཤུགས་ཆེར་ཐོན་ཡོང་གི་ཡོད། བོད་ལ་ཡོད་པའི་ནང་ཆོས་ནི་ནཱ་ལེནྡྲ་ནས་བརྒྱུད་པ་དེ་ཡིན་ཅིང་། དེ་ཡང་མཁན་ཆེན་ཞི་བ་འཚོས་ནཱ་ལེནྡྲའི་ཆོས་བརྒྱུད་དེ་ཉིད་བོད་དུ་སྤེལ་གནང་བ་ཞིག་ཡིན། དེ་ནི་ཚད་མ་རིགས་པའི་ལམ་ནས་བརྟག་དཔྱད་བྱ་རྒྱུ་གཙོ་བོ་ཞིག་སྟེ། གང་ཞིག་ཡིན་ཡང་རིགས་པས་དཔྱད་པ་བྱ་རྒྱུའི་ལམ་སྲོལ་འདི་ནི་ཧ་ཅང་རྩ་ཆེན་པོ་ཞིག་རེད་འདུག །

མཁན་སློབ་ཆོས་གསུམ་གྱི་གསོལ་འདེབས[1]། མཛད་པ་པོ། འཇམ་མགོན་ཀོང་སྤྲུལ་བློ་གྲོས་མཐའ་ཡས་ (1813-1899) མཆོག  རབ་འབྱམས་རྒྱལ་བའི་སྤྱི་གཟུགས་པདྨ་འབྱུང་། །ཐུབ་དབང་གཉིས་པ་མཁན་ཆེན་ཞི་བ་འཚོ། །ཆོས་སྐྱོང་རྒྱལ་པོ་ཁྲི་སྲོང་ལྡེའུ་བཙན་ལ། །གུས་པས་ཕྱག་འཚལ་སྙིང་ནས་གསོལ་བ་འདེབས། །གངས་ཅན་ལྗོངས་སུ་ཐུབ་བསྟན་ཉིན་མོར་བྱེད། །ཐོག་མར་འདྲེན་མཛད་ཆོས་རྒྱལ་མེས་དབོན་གྱི། །ངོ་མཚར་ཕྱག་རྗེས་ཆོས་འཁོར་རྣམ་པ་གསུམ། །རྟེན་དང་བརྟེན་པར་བཅས་ལ་གསོལ་བ་འདེབས། །ཁྱད་པར་མཁན་སློབ་ཆོས་གསུམ་ཞལ་འཇོམས་ཏེ། །འཛམ་གླིང་རྒྱན་གྱུར་སྤྲུལ་པའི་གཞལ་མེད་ཁང་། །བསམ་ཡས་མི་འགྱུར་ལྷུན་གྲུབ་གཙུག་ལག་ཁང་། །ས་གསུམ་སྙན་པར་གྲགས་ལ་གསོལ་བ་འདེབས། །འདུལ་བར་གཙུག་ལག་མདོ་སྡེར་ཞིང་ཁམས་ཚུལ། །མངོན་པ་ལྟར་ན་སྣོད་བཅུད་གཅིག་ཏུ་གྲུབ། །སྔགས་ཀྱི་ལུགས་སུ་དཀྱིལ་འཁོར་ཆེན་པོར་རྫོགས། །ངོ་མཚར་འགྲན་ཟླ་བྲལ་ལ་གསོལ་བ་འདེབས། །

༄༅། །དཔལ་ནལནྡཱའི་པཎ་ཆེན་བཅུ་བདུན་གྱི་རྣམ་ཐར་བསྟན་འཛིན་རྒྱ་མཚོའི་ཞལ་ལུང་ཞེས་བྱ་བ་བཞུགས་སོ།། རྩོམ་པ་པོ། མཁན་པོ་བསོད་ནམས་ཚེ་རྒྱལ། འཕགས་ཡུལ་དྷེ་ར་དྷུན་བཀའ་བརྒྱུད་ནང་བསྟན་མཐོ་སློབ་ཁང་།   དཀར་ཆག སྔོན་དུ་འགྲོ་བའི་གཏམ།   ༸གོང་ས་༸སྐྱབས་མགོན་ཆེན་པོ་མཆོག་ནས་བསྩལ་བའི་ངོས་སྦྱོར་བཀའ་ཡིག འབྲི་གུང་༸སྐྱབས་མགོན་རིན་པོ་ཆེ་མཆོག་ནས་བསྩལ་བའི་ངོས་སྦྱོར་བཀའ་ཡིག དཔལ་ནལནྡཱའི་པཎ་ཆེན་བཅུ་བདུན་གྱི་གསོལ་འདེབས་དད་གསུམ་གསལ་བྱེད། དཔལ་ནལནྡཱའི་པཎ་ཆེན་བཅུ་བདུན་གྱི་རྣམ་ཐར་བསྟན་འཛིན་རྒྱ་མཚོའི་ཞལ་ལུང་ཞེས་བྱ་བ་ལ་གསུམ།

༄༅། །ཇོ་བོ་རྗེས་མཛད་པའི་མར་མེའི་སྨོན་ལམ།[1] ༼མཛད་པ་པོ། ཇོ་བོ་རྗེ་དཔལ་ལྡན་ཨ་ཏི་ཤས་ 982-19054 མཛད་པ།༽   མར་མེའི་སྣོད་(འོད་)ནི། སྟོང་གསུམ་གྱི་སྟོང་ཆེན་པོ་འཇིག་རྟེན་ཁམས་ཀྱི་ཁོར་ཡུག་དང་མཉམ་པར་གྱུར་ཅིག །སྡོང་བུ་ནི་རིའི་རྒྱལ་པོ་རི་རབ་(དང་མཉམ་པར་)ཙམ་དུ་གྱུར་ཅིག །མར་ཁུ་ནི་མཐའི་རྒྱ་མཚོ་ཙམ་དུ་གྱུར་ཅིག །གྲངས་ནི་སངས་རྒྱས་རེ་རེའི་མདུན་དུ་དུང་འགྱུར་(འཕྱུར་)རེ་རེ་འབྱུང་བར་གྱུར་ཅིག །འོད་ཀྱི་(ཀྱིས་)སྲིད་པའི་རྩེ་མོ་མན་ཆད་ནས་མནར་མེད་པའི་དམྱལ་བ་ཡན་ཆད་ཀྱི་མ་རིག་པའི་མུན་པ་ཐམས་ཅད་བསལ་ནས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའི་ཞིང་ཁམས་ཐམས་ཅད་མངོན་སུམ་དུ་མཐོང་ཞིང་གསལ་བར་གྱུར་ཅིག །ཨོཾ་བཛྲ་ཨཱ་ལོ་ཀེ་ཨཱཿཧཱུཾ། ཨེ་མ་ཧོ། ངོ་མཚར་རྨད་འབྱུང་(བྱུང་)སྣང་གསལ་སྒྲོན་མེ་འདི། །བསྐལ་བཟང་སངས་རྒྱས་སྟོང་རྩ་ལ་སོགས་པའི། །རབ་འབྱམས་ཕྱོགས་བཅུའི་ཞིང་ཁམས་མ་ལུས་པའི་(ཐམས་ཅད་དང་)། །བླ་མ་ཡི་དམ་མཁའ་འགྲོ་ཆོས་སྐྱོང་དང་། །དཀྱིལ་འཁོར་ལྷ་ཚོགས་རྣམས་ལ་འབུལ་བར་བགྱི། །ཕ་མས་གཙོ་བྱས་སེམས་ཅན་ཐམས་ཅད་ཀྱི་(ཀྱིས)། །

ན་མོ་ཨཱརྱ་ཏཱ་རེ་ཡ། ཨོཾ་བཅོམ་ལྡན་འདས་མ་ལྷ་མོ་སྒྲོལ་མ་ལ་ཕྱག་འཚལ་ལོ།། ཕྱག་འཚལ་སྒྲོལ་མ་ཏཱ་རེ་དཔའ་མོ། །ཏུཏྟཱ་རེ་ཡིས་འཇིགས་ཀུན་སེལ་མ། ། ཏུ་རེས་དོན་རྣམས་ཐམས་ཅད་སྟེར་མ། །སྭཱ་ཧཱ་ཡི་གེ་བཅུ་ལ་རབ་འདུད། ། ཨོཾ་ཏ་རེ་ཏུཏྟཱ་རེ་ཏུ་རེ་སྭཱ་ཧཱ།

པཎྜི་ཏ་མན་ཛ་གླིང་པ།   ༸རྒྱལ་དབང་ལྔ་པ་ཆེན་པོ་ངག་དབང་བློ་བཟང་རྒྱ་མཚོ་ (1617-1682) མཆོག་གིས་མཛད་པའི་ཚར་ཆེན་ཆོས་ཀྱི་རྒྱལ་པོ་ལ་བརྟེན་པའི་ཟབ་ལམ་བླ་མའི་རྣལ་འབྱོར་མ་དྲོས་ཆུ་ཀླུང་ལས[1]། རྗེ་བཙུན་སྒྲོལ་མ་སིངྷ་ནཱ་ད་དང་། །སློབ་དཔོན་ཙནྡྲ་གོ་མི་སློབ་མར་བཅས། ། ཨ་ཐུ་ལ་དྷ་མན་ཛ་གླིང་པའི་ཞབས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། ། ཞེས་གསོལ་བ་འདེབས་ཡུལ་པཎ་ཆེན་མན་ཛ་[2]གླིང་པ་ནི། བོད་ཀྱི་སྐད་གཉིས་སྨྲ་བའི་ལོ་ཙཱ་བ་རྭ་ཆེན་རྡོ་རྗེ་གྲགས་ཀྱི་སློབ་དཔོན་གཙོ་བོ་སྟེ། རྭ་ཡེ་ཤེས་སེངྒེས་ (དུས་རབས་12པ།) མཛད་པའི་རྗེ་བཙུན་རྭ་ལོའི་རྣམ་ཐར་ཀུན་ཁྱབ་སྙན་པའི་རྔ་སྒྲ་ལས[3]། བདག་རྭའི་བན་ཆུང་རྡོར་གྲགས་ངས། །ལྷོ་བལ་ཕྱོགས་སུ་ལན་གཉིས་བྱོན། ། རྗེ་ཕམ་ཐིང་པ་དང་ཕྱག་ན་སོགས། །སྤྱིར་ཆོས་འབྲེལ་ཐོབ་པའི་བླ་མ་མང་། ། སྒོས་ནཱ་ལེནྡྲའི་གཙུག་ལག་ཏུ། །དཔལ་མན་ཛ་གླིང་ལས་བསྙེན་པར་རྫོགས། ། སྔོན་བྱོན་མཁས་གྲུབ་རྣམས་ཀྱང་མཇལ། །ཆོས་མདོ་སྔགས་འདུལ་བ་སྣ་ཚོགས་ཞུས། །