པཎ་གྲུབ་ཀྱི་རྣམ་ཐར།

མ༽ མདོ་ཀུན་ལས་བཏུས་པ།   དེ་ཡང་རྒྱལ་སྲས་ཆེན་པོ་ཞི་བ་ལྷ་ (650-700) རང་ཉིད་ཀྱིས་མཛད་པའི་སྤྱོད་འཇུག་ཤེས་བཞིན་ལེའུ་ལས[1]། དཔལ་འབྱུང་བ་ཡི་རྣམ་ཐར་ལས། །བླ་མ་བསྟེན་པའི་ཚུལ་ལྟར་བསླབ། ། འདི་དང་སངས་རྒྱས་བཀའ་སྩལ་གཞན། །མདོ་སྡེ་བཀླགས་ནས་ཤེས་པར་བྱ། །

བ༽ སྤྱོད་འཇུག་གི་བརྒྱུད་པའི་རིམ་པ།   དེ་ཡང་རྒྱ་གར་གྱི་སློབ་དཔོན་མཁས་པ་ཆེན་པོ་ཀྲིཥྞ་པའི་ཞལ་སྔ་ནས་མཛད་པའི་བྱང་ཆུབ་སེམས་དཔའི་སྤྱོད་པ་ལ་འཇུག་པའི་རྟོགས་པར་དཀའ་བའི་གནས་གཏན་ལ་དབབ་པ་ལས[1]། ཡུན་རིང་དད་དང་བརྩོན་པའི་སྟོབས་ཀྱིས་བསམ་གཏན་མཆོག་ལ་རབ་གཞོལ་ཞིང༌། །གང་གི་སྤྱི་གཙུག་མཆོག་གིས་འཇམ་དབྱངས་ཞབས་ཀྱི་པདྨ་ལ་རེག་པ། །ས་སྟེང་འཇམ་དབྱངས་གཉིས་པ་ཡིན་ཞེས་མཁས་པ་རྣམས་ཀྱིས་བསྟོད་པ་བསྟན་བཅོས་རྩོམ་པ་པོ། །

ཕ༽ བསླབ་སྤྱོད་ཀྱི་བརྒྱུད་རིམ་དང་། སྤྱོད་འཇུག་མཛད་དུས།   དེ་ནས་ཟ་ཧོར་གྱི་སློབ་དཔོན་དཔའ་བོ་རྡོ་རྗེ་བྱ་བས་ཐོས་ནས་ཉི་མ་དྲུག་ཅུར་ཕྱིན་ཏེ་གངྒཱ་པ་ཏ་ལ་དྲིས་པས་བྲམ་ཟེ་རྒན་པོ་ཞིག་ན་རེ། འདི་ག་ན་ཡོད་ཟེར་ཏེ་གཙུག་ལག་ཁང་ཞིག་པོ་ཞིག་ན་བསོད་སྙོམས་པ་ཞིག་འདུག །དེ་ལ་དྲིས་པས་འདི་ན་ང་མིན་པ་མེད་ཟེར། དེ་རྐང་པ་ས་ལ་མི་རེག་པར་མཐོང་ནས་དད་པ་ན་ས་ལ་མི་རེག་པ་ལ་དད་ན་བྱ་ལ་ཡང་དད་པར་རིགས་གསུངས།

པ༽ གསང་སྔགས་ཀྱི་ཐུན་མིན་ཡོན་ཏན་བརྒྱད། ༡༽ གདོལ་པ་མོ་ལྔ་བརྒྱ་བཏུལ་བ།   དེ་ཡང་གསང་སྔགས་ཀྱི་ཡོན་ཏན་བརྒྱད་ནི། དཔའ་བོ་གཙུག་ལག་ཕྲེང་བས་ (1504-1566) མཛད་པའི་བྱང་ཆུབ་སེམས་དཔའི་སྤྱོད་པ་ལ་འཇུག་པའི་རྣམ་པར་བཤད་པ་ཐེག་ཆེན་ཆོས་ཀྱི་རྒྱ་མཚོ་ཟབ་རྒྱས་མཐའ་ཡས་པའི་སྙིང་པོ་ལས[1]། གདོལ་པ་མོ་དང་ཆང་ཚོང་ཐ་ག་པ། །བྲམ་ཟེ་རྔོན་པ་ཞིང་པ་སོགས་རྗེས་བཟུང་། ། ཕྱག་རྒྱ་ཆེན་པོ་མཆོག་གི་ལམ་ལ་བཀོད། །གྲུབ་ཐོབ་ཀུན་གྱི་བླ་མར་གྱུར་དེར་འདུད། །