པཎ་གྲུབ་ཀྱི་རྣམ་ཐར།

༦༽ མཁན་པོ་ཡང་དག་རྣམ་སྣང་མཛད།   དེ་ཡང་གྲུབ་པ་བརྙེས་ཤིང་འཕགས་པའི་ཡོན་ཏན་དང་ལྡན་པའི་རྣམ་པར་སྣང་མཛད་བཟང་པོ་ཞེས་པ་མཁན་ཆེན་ཞི་བ་འཚོའི་མཚན་གྱི་རྣམ་གྲངས་ཡིན་པ་ནི། སློབ་དཔོན་སེངྒེ་བཟང་པོས་མཛད་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་ཞེས་བྱ་བའི་འགྲེལ་པའི་མཛད་བྱང་ལས[1]།

༥༽ དཔལ་ལྡན་ཞི་བ་འཚོ། དེ་ཡང་བོད་ཀྱི་འཇམ་དབྱངས་རྣམ་གསུམ་གྱི་ཡ་གྱལ་འཇམ་མགོན་ས་པཎ་ (1182-1251) གྱིས་མཛད་པའི་སྡོམ་བརྩོན་དམ་པའི་དཔེ་རིས་ཀྱི་ཕྱག་མཚན་རི་མོའི་བསྟོད་ཚིག་ལས[1]། སྡོམ་བརྩོན་དམ་པ་དཔལ་ལྡན་ཞི་བ་འཚོ། །བརྟུལ་ཞུགས་གྲུབ་པ་པདྨ་འབྱུང་གནས་དཔལ། ། བློ་གསལ་དབང་པོ་པདྨའི་ངང་ཚུལ་སོགས། །སྙིགས་མའི་དུས་ཀྱི་རྒྱལ་བ་གཉིས་པ་ཡིན། །

༤༽ དྷརྨ་ཤཱནྟི་གྷོ་ཥ་སྟེ་ཆོས་ཀྱི་ཞི་བའི་དབྱངས།   དེ་ཡང་རྡོ་གྲུབ་འཇིགས་མེད་བསྟན་པའི་ཉི་མས་ (1865-1926) མཛད་པའི་ཞི་བ་འཚོའི་བསྟོད་པ་ལས[1]། དྲན་དང་ཤེས་བཞིན་བག་ཡོད་མཆོག་བརྙེས་པས། །དབང་པོ་ཞི་ཞིང་ཐུགས་ཀྱང་ཞི་གྱུར་ཏེ། ། དུལ་བའི་སྤྱོད་ལམ་མ་རྨས་མ་འཁྲུལ་བ། །མཐོང་ན་མི་མཐུན་མེད་པའི་དཔལ་གྱིས་མཛེས། །

༣༽ བོདྷི་ས་ཏྭ་སྟེ་བྱང་ཆུབ་སེམས་དཔའ།   དེ་ཡང་གཉན་དགོན་སྤྲུལ་སྐུ་གསུང་རབ་མདོ་སྔགས་ཆོས་ཀྱི་རྒྱ་མཚོས་ (1903-1957) མཛད་པའི་མཁན་ཆེན་བོ་དྷི་ས་ཏྭ་ལ་བརྟེན་པའི་བླ་མའི་རྣལ་འབྱོར་ཐུབ་བསྟན་ཉིན་བྱེད་འདྲེན་པའི་སྐྱ་རེངས་ལས[1]། ཚུལ་གཉིས་ཤིང་རྟའི་སྲོལ་ཕྱེས་ཤིང་། །ཐམས་ཅད་ཡོད་སྨྲའི་སྡེ་བཙུགས་དེ། ། མཐའ་འཁོབ་མུན་པ་སེལ་མཛད་པའི། །བོདྷི་ས་ཏྭར་གསོལ་བ་འདེབས། །