པཎ་གྲུབ་ཀྱི་རྣམ་ཐར།

ཟ༽ སློབ་དཔོན་ཨཱརྱ་དེ་བའི་རྣམ་ཐར་གྱི་སྙིང་པོ།   སིངྒ་ལ་རུ་རྒྱལ་པོའི་རིགས་སུ་འཁྲུངས། །འཕགས་པས་རྗེས་བཟུང་ཐེག་ཆེན་བསྟན་པ་སྤེལ། ། རྒོལ་ངན་ཚར་བཅད་འཁོར་སློབ་མང་དུ་བསྐྱངས། །མདོ་སྔགས་གཞུང་མཛད་འཕགས་པ་ལྷ་ལ་འདུད། ། ཅེས་བསྟོད་ཕྱག་སྔོན་དུ་བཏང་སྟེ། སློབ་དཔོན་འདིའི་ལེགས་སྦྱར་གྱི་མཚན་ལ་ཨཱརྱ་དེ་ཝ་ (आर्यदेवः) (Aryadeva) དང་། རྒྱའི་སྐད་དུ། (聖天) བོད་སྐད་ཀྱི་མཚན་ལ་འཕགས་པ་ལྷ་ཞེས་ཞུ་ཞིང་། རྒྱལ་བས་ལུང་བསྟན་པ་ལྟར། དུས་རབས་གཉིས་པར་སིངྒ་ལའི་རྒྱལ་པོ་པཉྩ་ཤྲི་གའི་སྲས་སུ་འཁྲུངས།

ཞ༽ པཎ་གྲུབ་གསོལ་འདེབས་ཀྱི་ཚིག་འགྲེལ།   དེ་ཡང་དཔལ་མགོན་འཕགས་པ་ཀླུ་སྒྲུབ་ཞབས་ཀྱི་སྲས་ཀྱི་ཐུ་བོ་རྒྱལ་སྲས་འཕགས་པ་ལྷ་ལ་གསོལ་བ་འདེབས་པ་ནི། ༸གོང་ས་༸སྐྱབས་མགོན་༸རྒྱལ་དབང་ཐམས་ཅད་མཁྱེན་པས་མཛད་པའི་དཔལ་ནཱ་ལེནྡྲའི་པཎ་ཆེན་བཅུ་བདུན་གྱི་གསོལ་འདེབས་དད་གསུམ་གསལ་བྱེད་ལས[1]། དེ་སྲས་ཐུ་བོ་མཁས་ཤིང་གྲུབ་པའི་མཆོག །ཕྱི་ནང་གྲུབ་མཐའ་རྒྱ་མཚོའི་ཕ་མཐར་སོན། ། ཀླུ་སྒྲུབ་གཞུང་འཛིན་ཀུན་གྱི་གཙུག་ནོར་དཔལ། །རྒྱལ་སྲས་འཕགས་པ་ལྷ་ལ་གསོལ་བ་འདེབས། །

ཝ༽ འཕགས་པ་ལྷའི་ལྟ་གྲུབ་ཀྱི་ཁྱད་ཆོས།   དེ་ཡང་རྗེ་བདག་ཉིད་ཆེན་པོས་ (1357-1419) མཛད་པའི་དྲང་ངེས་ལེགས་བཤད་སྙིང་པོ་ལས[1]། སློབ་དཔོན་ (ཀླུ་སྒྲུབ།) འདི་ཡི་རྗེས་སུ་འབྲང་བའི་གཙོ་བོ་ནི་སློབ་དཔོན་འཕགས་པ་ལྷ་ཡིན་ཏེ། འདིས་རྣལ་འབྱོར་སྤྱོད་པ་བཞི་བརྒྱ་པར་སློབ་དཔོན་གྱི་སྲོལ་འདི་རྒྱས་པར་བཀྲལ་ཞིང་། སངས་རྒྱས་བསྐྱངས་དང་ལེགས་ལྡན་འབྱེད་ཟླ་བ་གྲགས་པ་དང་ཞི་བ་འཚོ་ལ་སོགས་པ་དབུ་མ་པ་ཆེན་པོ་རྣམས་ཀྱིས་ཀྱང་སློབ་དཔོན་དང་འདྲ་བར་ཡིད་ཆེས་པའི་ཁུངས་སུ་བྱེད་དོ། །

ཛ༽ འཕགས་པ་ལྷས་མཛད་པའི་བསྟན་བཅོས།   ཆོས་རྗེ་བློ་བཟང་ཆོས་འཛིན་དཔལ་བཟང་པོས་མཛད་པའི་སློབ་དཔོན་ཨཱརྱ་དེ་བ་ལ་བསྟོད་པ་འཕགས་པ་དགྱེས་པའི་གླུ་དབྱངས་ལས[1]། ཞལ་གདམས་གསུང་གི་བདུད་རྩི་ནི། །དང་པོ་བསོད་ནམས་མིན་བཟློག་ཆེད། །གཙང་བདེ་རྟག་འགོག་རབ་བྱེད་གསུམ། །བར་དུ་བདག་ལྟ་བཟློག་བྱེད་གཅིག །ཐ་མར་ལྟ་ངན་ཀུན་བཟློག་ཆེད། །རབ་བྱེད་ལྷག་མ་བཅུ་གཉིས་ཏེ། །བཅུ་དྲུག་བདག་ཉིད་བཞི་བརྒྱ་པ། །