དཔལ་ནཱ་ལེནྡྲ། བྱོན་པ་ལེགས།
༡༨༽ སློབ་དཔོན་བྷ་ཝི་ལྷ།
སློབ་དཔོན་བྷ་ཝི་ལྷ་ནི། ས་སྐྱ་རྗེ་བཙུན་གྲགས་པ་རྒྱལ་མཚན་ (1147-1216) གྱིས་མཛད་པའི་བླ་མ་བསྟེན་པའི་ཐབས་ཤླཽ་ཀ་ལྔ་བཅུ་པའི་གསལ་བྱེད་ལས[1]། དེ་ལ་རྩོམ་པའི་སློབ་དཔོན་ནི། བྷ་ཝི་ལྷ་ཞེས་གྲགས་པ་ཡིན་ཏེ། དེའི་རིགས་ནི་རྒྱལ་པོ་ཟླ་བའི་རིགས་ཡིན་ཏེ་རྒྱལ་སྲིད་སྤངས་ནས་དཔལ་ནཱ་ལེནྡྲའི་གཙུག་ལག་ཁང་ན་རབ་ཏུ་བྱུང་སྟེ། བླ་མ་ཛེ་ཏཱ་རི་དང་ནོར་བཟང་ཞེས་བྱ་བ་ཡིན་ཏེ།
པཎྜི་ཏ་ཆེན་པོར་གྱུར་ཀྱང་པ་ཏྲ་མ་ཐོབ་པས་གཙུག་ལག་ཁང་ན་པཎྜི་ཏ་རྣམས་ལ་རྩོད་པ་མཛད་ཅིང་ཤར་ཕྱོགས་བྷཾ་ག་ལར་གཤེགས་སོ།།
ཁ་ཅིག་ནི་དང་པོ་ཕྱི་རོལ་པའི་པཎྜི་ཏ་མཁས་པ་ཡིན་ཞེས་ཀྱང་གྲགས་སོ། །བྷཾ་ག་ལ་དེ་དང་ཉེ་བ་ན་ཙནྡྲ་གོ་མིས་བཞེངས་པའི་གླིང་གི་སྒྲོལ་མ་ཞེས་བྱ་བ་བྱེ་མ་ལས་བྱས་པ་དེ་ལ་མཆོད་པ་ལ་བྱོན་པས། འཛམ་བུའི་གླིང་དང་ཉེ་བ་ན་ཙུ་ཏའི་གླིང་ཞེས་བྱ་བ་དབང་ཕྱུག་ནགས་ཚལ་གྱི་དུར་ཁྲོད་ཅེས་ཀྱང་བྱ་ཟེར་བ་དེའི་མི་རྐང་པ་གཅིག་ལས་མེད་དེ། མི་གཉིས་གཉིས་གཤིབས་ནས་འཕྲུལ་འཁོར་གྱིས་འགྲོ་བ་དེའི་མིས་གཟིངས་བཏང་ནས་བྱུང་བས་སློབ་དཔོན་འཛམ་བུའི་གླིང་གི་མི་རྐང་པ་གཉིས་པ་ངོ་མཚར་ཆེ་བས་ཁྱེར་རོ།།
དེ་ནས་སློབ་དཔོན་ཉིད་སྒྲུབ་པ་མཛད་ཀྱིན་བཞུགས་མོད་ཀྱང༌། གླིང་དེ་ན་ཆོས་མེད་པས་རང་གི་ཡུལ་དུ་ཕྱིན་ན་འགྲོ་བ་ལ་ཕན་གདགས་པ་ཡིན་པ་ལ་ང་ལ་འགྲོ་བའི་ཐབས་མེད་སྙམ་ནས་སྒྲོལ་མ་ལ་བསྟོད་པ་བྱེད་ཅིང་གསོལ་བ་བཏབ་པས། ནུབ་ཅིག་རྨི་ལམ་ན་ཡུལ་ཡིད་ལ་གྱིས་ལ་འགྲོ་འདོད་པའི་བསམ་པས་ཡུལ་དུ་མགོ་སྟོན་ལ་གཉིད་ལོག་ཅིག་གསུངས་ནས་དེ་ལྟར་མཛད་པས་གཉིད་སད་ཙ་ན་རྒྱ་མཚོའི་ཕར་འགྲམ་ན་བསྐྱལ་ནས་འདུག་སྟེ། སློབ་དཔོན་གྱིས་ནཱ་ལེནྡྲར་བྱོན་ཙ་ན་པཎྜི་ཏ་རྒན་པོ་རྣམས་ནི་འདས། སྔར་ཀློག་སློབ་པ་རྣམས་ནི་ཡོངས་སུ་རྫོགས་པའི་པཎྜི་ཏར་གྱུར་ཏེ་ངས་གཞན་དོན་བྱ་བའི་དུས་འདས་སྙམ་སྟེ། ཐུགས་ཁྲོས་ཏེ་བདེ་མཆོག་ (རྩ་བའི་རྒྱུད་) ལེའུ་བཞི་བཅུ་བདུན་པའི་ཡི་གེ་བདུན་པའི་སྔགས་ཀྱིས་ས་གཡོ་བའི་འཕྲུལ་འཁོར་བཅས་ཏེ་སྒྱོགས་སུ་འཕངས་ནས་ས་གཡོར་བཅུག་པས་སློབ་དཔོན་ཉིད་ཀྱི་བྲང་ཁང་ཡང་ཞིག །ཁང་པ་གཞན་ཡང་ཞིག །ཙུ་ཏའི་གླིང་གི་དུད་འགྲོ་དང་མི་ཐམས་ཅད་ཤིར་བཅུག་བརླག་པར་བྱས་པས། ཡང་སྒྲོལ་མས་རྨི་ལམ་དུ་ལུང་བསྟན་ཏེ། ཐེག་པ་ཆེན་པོ་བ་བྱ་བ་སེམས་ཅན་ལ་ཕན་འདོགས་པ་ཡིན་པ་ལ་ཁྱོད་ཀྱི་སེམས་ཅན་མང་པོ་བསད་པས་ཁྱོད་ཀྱི་རྒྱུད་ལ་སེམས་ཅན་ལ་བྱམས་པ་སྤོང་བའི་སྡིག་པ་ཡོད་པས་ཁྱོད་བཤགས་པ་གྱིས། ཞེས་གསུངས་པས་སློབ་དཔོན་གྱི་ཐུགས་དགོངས་ལ། རྒྱ་ནག་རི་བོ་རྩེ་ལྔར་འཕགས་པ་འཇམ་དཔལ་བཞུགས་པའི་སྤྱན་སྔར་ཕྱིན་ལ་སྡིག་པ་བཤགས་དགོས་སྙམ་ནས་ཡོད་ཙ་ན། ཡང་སྒྲོལ་མས་དེས་ཁྱོད་ཀྱི་སྡིག་པ་མི་འདགས་པས། རྡོ་རྗེ་ཐེག་པ་ལ་འཇུག་པའི་ལས་དང་པོ་བའི་དོན་དུ་རྩ་ལྟུང་དང་བླ་མ་ལྔ་བཅུ་པ་རྩོམས། རྒྱུད་སྡེ་མང་པོ་ལ་འགྲེལ་པ་རྩོམས་ཞེས་ལུང་བསྟན་ཏོ། །དེ་ནས་སློབ་དཔོན་གྱིས་བླ་མ་ལ་བརྙས་པ་སྤང་ཞིང་གུས་པར་བྱ་བའི་ཕྱིར་བླ་མ་ལྔ་བཅུ་པ། རིགས་ལྔའི་དམ་ཚིག་མི་ཉམས་པར་བྱ་བའི་དོན་དུ་རྩ་ལྟུང་བརྩམས་སོ། །ཕྱག་ན་རྡོ་རྗེ་དབང་བསྐུར་བ་དང༌། ལེགས་པར་གྲུབ་པ་དང༌། རྣམ་སྣང་མངོན་པར་བྱང་ཆུབ་པ་དང༌། སངས་རྒྱས་མཉམ་སྦྱོར་དང༌། གདན་བཞི་དང༌། རྡོ་རྗེ་མཁའ་འགྲོ་དང་། དགྱེས་པ་རྡོ་རྗེ་དང༌། བདེ་མཆོག་འཁོར་ལོ་རྣམས་ལ་འགྲེལ་པ་མཛད་དོ། །དེ་ལྟ་བུའི་སློབ་དཔོན་དེ་ལ་ལྷ་གསུམ་པར་ཡང་གྲགས་ཏེ། ཕྱག་རྒྱ་ཆེན་པོ་སྒྲུབ་པའི་ལྷ་བདེ་མཆོག །ཕྱིའི་བར་ཆད་སེལ་བ་སྒྲོལ་མ། ནང་གི་བར་ཆད་སེལ་བ་མི་གཡོ་བའོ། །ཡང་འདི་དང་འཇམ་དཔལ་གྲགས་པ་གཉིས་ལ་མང་དུ་ཐོས་པ་ཅན་ཞེས་ཀྱང་གྲགས་སོ། །དེ་ནི་རྩོམ་པ་པོའི་གང་ཟག་གོ །ཞེས་གསལ་བ་ལྟར། སློབ་དཔོན་བྷ་ཝི་ལྷ་ཡང་ནཱ་ལེནྡྲ་ནས་རབ་ཏུ་བྱུང་ཞིང་པཎྜི་ཏ་ཆེན་པོར་གྱུར་པ་ཞིག་གོ།
དཔྱད་གཞིའི་ལུང་ཁུངས་ཡིག་ཆ།
[1] ས་སྐྱ་བཀའ་འབུམ། གྲགས་རྒྱན་དང་པོ། པོད། ༼ཆ༽ འཕྲུལ་པར་དཔེ་རིང་། ཤོག་གྲངས་ ༢བ༤
ཡོང་ཁུངས། དཔལ་ནཱ་ལེནྡྲའི་བྱུང་རབས་སྲིད་ཞིའི་མཛེས་རྒྱན། སྨད་ཆ། རྩོམ་པ་པོ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༤༣༡ ནས་ ༤༣༣ བར་གསལ་བ་ལས་བཏུས།