པཎ་གྲུབ་བསྟོད་ཚོགས།

  ༄༅། །མགོན་པོ་ཀླུ་སྒྲུབ་ཞབས་ལ་བསྟོད་པ་དབུ་མའི་སྣང་བ་ཞེས་བྱ་བ་བཞུགས་སོ།།[1]   ༼བཙུན་པ་དཀོན་མཆོག་བསྟན་པའི་སྒྲོན་མེས་ (1762-1823) མཛད།༽   རྒྱལ་བས་ཆོས་ཚུལ་གང་བསྟན་པ། །འགྲོ་བ་མུན་པས་ཁེབས་པ་ལ། །འོད་གསལ་བ་ཡི་ཕྱིར་ཡིན་པས། །སྒྲོན་མ་ཀླུ་སྒྲུབ་རྒྱལ་གྱུར་ཅིག །དམིགས་ལས་དམིགས་པ་རྣམ་མང་བས། །འགྲོ་བ་དུབ་པར་གྱུར་པ་རྣམས། །དམིགས་པ་མེད་པ་ཞི་བའི་བདེར། །འཁྲིད་པ་ཁྱོད་ནི་དེད་དཔོན་ལགས། །ཤེས་རབ་ཕར་ཕྱིན་ཤེས་རབ་བསླབ། །ཤེས་རབ་མདོ་སྡེའི་མཆོག་གྱུར་ཕྱིར། །ཤེས་རབ་གཞུང་མཆོག་མཛད་པ་ཁྱོད། །བསྟན་འཛིན་ཀུན་ལས་བླ་མར་གྱུར། །

  ༄༅། །དཔལ་མགོན་འཕགས་པ་ཀླུ་སྒྲུབ་ལ་བསྟོད་པ་དཔག་བསམ་ལྗོན་ཤིང་ཞེས་བྱ་བ་བཞུགས་སོ།།[1]   ༼མཛད་པ་པོ། རྒྱལ་མཁན་པོ་གྲགས་པ་རྒྱལ་མཚན་ (1762-1835/1837) །༽   ཐུབ་དབང་ཀུན་གསལ་ནོར་བུ་ནུབ་རིའི་རྩེར། །འོད་གསལ་གོས་དམར་གྱིས་གཟིམ་མ་བཟོད་ནས། །བཞི་བརྒྱའི་ལོ་གྲངས་ཤར་རིའི་ཅོད་པན་ལས། །ཀླུ་སྒྲུབ་སྨྲ་བའི་ཟླ་བ་ཤར་འདི་མཚར། །དེ་བཞིན་གཤེགས་པ་ཀླུ་རིགས་སྒྲོན་མེའི་དུས། །རྒྱལ་པོ་བརྩོན་འགྲུས་ཀླུ་རུ་གྱུར་པའི་ཚེ། །ཤཱཀྱའི་བསྟན་ལ་ཆོས་ཀྱི་སྒྲ་ཆེན་གསུམ། །སྒྲོགས་པའི་སྨོན་ལམ་མཛད་ལ་གསོལ་བ་འདེབས། །

༄༅། །འཕགས་ཡུལ་གྱི་པཎ་གྲུབ་ཀུན་གྱི་གཙུག་རྒྱན་དཔལ་འཕགས་པ་ ཀླུ་སྒྲུབ་ལ་རྟེན་འབྲེལ་གྱི་སྒོ་ནས་རྟོགས་པ་བརྗོད་པ་ལྟ་བའི་ འདོད་འཇོ་དད་པའི་སྙེ་མ་བཞུགས་སོ།།[1] ༼མང་ཐོས་ཀླུ་སྒྲུབ་རྒྱ་མཚོས་ (1523-1596) མཛད་པ།༽   དཔལ་འཕགས་པ་ཀླུ་སྒྲུབ་ལ་ཕྱག་འཚལ་ཞིང་སྐྱབས་སུ་མཆིའོ་རྗེས་སུ་གཟུང་དུ་གསོལ། རབ་དགའི་སར་ཞུགས་དབུ་མའི་ལམ་སྟོན་མཁན། །ཀླུ་མཆོག་ལྟོ་འགྲོའི་གདེངས་ཀ་གྲིབ་བསིལ་མཛད། །བཤད་སྒྲུབ་བསྟན་ལ་སྲོལ་འབྱེད་དང་པོར་གྲགས། །འཕགས་མཆོག་ཀླུ་སྒྲུབ་སྙིང་པོས་བདག་ལ་སྲུངས། །བསྟན་རྩ་ཐ་སྙད་དོན་དམ་དགེ་སྦྱོང་ཚུལ། །ཟག་བཅས་ཟག་མེད་ཁྲིམས་ལྡན་ངུར་སྨྲིག་འཛིན། །འདུལ་འཛིན་གཙང་མའི་སྒོ་འབྱེད་ཀླུ་སྒྲུབ་ཞབས། །

༄༅། །སངས་རྒྱས་གཉིས་པ་ཀླུ་སྒྲུབ་ཞབས་ལ་བསྟོད་པ་མཆོག་ཏུ་དད་པའི་སྒྲ་དབྱངས་ཞེས་བྱ་བ།[1] ༼༸རྒྱལ་བ་དགེ་འདུན་རྒྱ་མཚོས་ (1476-1542) མཛད་པ།༽   མགོན་པོ་དེ་ཉིད་ཀྱི་པདྨོ་ལ་དུས་ཐམས་ཅད་དུ་ཕྱག་འཚལ་ལོ། །ཉི་མའི་གཉེན་གྱི་ལྗགས་ཡངས་པདྨོ་མཚོར། །ལུང་བསྟན་བུང་བའི་དར་དིར་འབུམ་འཁྲིགས་པས། །དྲི་ཟའི་ཕང་འགྲོ་ལྟ་བུར་ཁྱོད་བསྔགས་ན། །བདག་ལྟས་ཅུང་ཞིག་བསྟོད་ལ་ཅི་ཞིག་བལྟོས། །འོན་ཀྱང་རྙེད་དཀའི་ལུས་འདི་རོ་འཛིན་བཅས། །སྙིང་པོར་བགྱི་སླད་མགོན་ཁྱོད་ཡོན་ཏན་གྱི། །རྒྱ་མཚོ་ཆེ་ལས་སྤོབས་པའི་རྔ་ཡབ་རྩེས། །ཕྲ་མོའི་ཆུ་ཐིགས་བླངས་ཏེ་གར་བགྱིད་དོ། །