པཎ་གྲུབ་བསྟོད་ཚོགས།

  ༄༅། །རྨད་དུ་བྱུང་བའི་སློབ་དཔོན་ཆེན་པོ་ཟླ་བའི་ཞབས་ཀྱི་རྟོགས་པ་བརྗོད་པ་དབྱངས་ཀྱི་ཡན་ལག་བརྒྱ་ལྡན་ཞེས་བྱ་བ་བཞུགས་སོ།།[1] ༼འཇམ་མགོན་བློ་གྲོས་མཐའ་ཡས་ (1813-1899) ཀྱིས་མཛད་པ།༽ ཨོཾ་སྭ་སྟི་སིདྡྷཾ། དངོས་ཀུན་ཁྱབ་ཅིང་རྟག་པའི་སྐུ་ནི་མཁའ་ཁྱབ་མཚན་དཔེས་སྤྲས། །ཟླ་བ་ཉིད་ཀྱང་ཞི་བསིལ་ཆོས་ཀྱི་བདུད་རྩིའི་འོད་སྣང་སྤྲོ། །མཚུངས་པ་མེད་པ་རྣམ་གྲོལ་ལམ་གྱི་ས་མཁན་མཆོག་གཅིག་པུ། །གྲུབ་པ་བྱེ་བའི་གཙུག་རྒྱན་གང་དེར་བདག་ནི་སྙིང་ནས་དད། ། ༡ དེ་བས་གདུང་ཤུགས་མི་ཕྱེད་པའི། །རླན་གྱིས་བྲན་པའི་ལག་པད་ནི། །ཁྱོད་ཞབས་ཟླ་བའི་མེ་ལོང་དུ། །ཁེངས་པ་བསྙིལ་ནས་ཟུམ་པར་བགྱི། །

  ༄༅། །བསྙེངས་བྲལ་ཟླ་བ་གྲགས་པའི་ཞབས་ཀྱི་རྟོགས་པ་བརྗོད་ནས་ ཞུ་བའི་ཕྲིན་ཡིག་བདེན་བརྫུན་གྱི་ཤན་རྣམ་པར་འབྱེད་པ་ ངེས་དོན་གཏམ་གྱི་རོལ་མོ་འདྲེན་པའི་ ངག་གི་ཤིང་རྟ་ཞེས་བྱ་བ[1]།   ༼པཎ་ཆེན་ཤཱཀྱ་མཆོག་ལྡན་ (1428-1507) གྱིས་མཛད་པ།༽   དོན་དམ་གཟིགས་པའི་ཆ་ཤས་མ་ཉམས་ཤིང་། །ཀུན་རྫོབ་གྲགས་པའི་འོད་དཀར་མ་འགྲིབས་པར། །རྟེན་འབྲེལ་ནམ་མཁའི་ལམ་ལ་ལྷམ་མེ་བ། །ཟླ་བ་གྲགས་པའི་ཞབས་ལ་ཕྱག་འཚལ་ལོ། །ཀུན་རྫོབ་ཆོས་ལུགས་འཇིག་རྟེན་གཞུང་བཞིན་དུ། །ཞལ་གྱིས་བཞེས་ནས་བསོད་ནམས་ཚོགས་མང་པོས། །འགྲོ་ཀུན་ཕན་བདེའི་ལམ་དུ་འདྲེན་བརྩོན་པའི། །ཤིང་རྟའི་སྲོལ་འབྱེད་ཁྱོད་ལ་ཕྱག་བགྱིའོ། །

  ༄༅། །དཔལ་ལྡན་ཟླ་བ་གྲགས་པ་ལ་བསྟོད་པ་བུང་བའི་སྒྲ་དབྱངས་གཡོ་བ་ཞེས་བྱ་བ་བཞུགས་སོ།།[1] ༼བོ་དོང་ཕྱོགས་ལས་རྣམ་རྒྱལ་ (1375-1450) གྱིས་མཛད་པ།༽   ལྷག་པའི་ལྷ་མོ་དབྱངས་ཅན་མ་ལ་ཕྱག་འཚལ་ལོ། །ཚོགས་གཉིས་ཤར་རིའི་རྩེ་མོར་རབ་སོན་ཅིང་། །བརྩེ་བའི་དཀྱིལ་འཁོར་མ་ལུས་ཡོངས་སུ་རྫོགས། །མཁྱེན་པའི་དཀྱིལ་འཁོར་ཀུན་ཏུ་ཁྱབ་མཛད་པ། །དཔལ་ལྡན་ཟླ་བ་གྲགས་པའི་ཞབས་ལ་འདུད། །ཁྱོད་ཉིད་འཁྲུངས་ཚེ་ས་ཡང་རྣམ་དྲུག་གཡོས། །མཁའ་ལ་མེ་ཏོག་ཆར་ཆེན་ཅི་ཡང་བབས། །གནམ་ལ་རོལ་མོ་སིལ་སྙན་ཀུན་གྱིས་གང་། །

  ༄༅། །སློབ་དཔོན་ཨཱརྱ་དེ་བ་ལ་བསྟོད་པ་འཕགས་པ་དགྱེས་པའི་གླུ་དབྱངས་ཞེས་བྱ་བ་བཞུགས་སོ།།[1] ༼མཛད་པ་པོ། ཆོས་རྗེ་བློ་བཟང་ཆོས་འཛིན་དཔལ་བཟང་པོ།༽   ཨོཾ་བདེ་ལེགས་སུ་གྱུར་ཅིག །སྡེ་སྣོད་རིན་ཆེན་སྐས་ལ་འཛེག །སྲིད་ཞིའི་གཡང་ལས་རིང་དུ་འཕགས། །ས་བརྒྱད་སེང་ཁྲིར་ངལ་བསོས་པ། །ལྷ་ཆེན་གདོང་བཞིའི་ཞབས་ལ་འདུད། །ཚུལ་ཁྲིམས་རིན་ཆེན་ཕོ་བྲང་དུ། །ཡེ་ཤེས་རྡོ་རྗེ་རྩེ་བརྒྱ་ཡིས། །བདེན་འཛིན་སྦྱིན་སྐྱེས་བུ་བཅོམ་པ། །འཕགས་པ་ལྷ་དབང་རྒྱལ་པོར་འདུད། །ཀླུ་སྒྲུབ་སྲས་ཀྱི་ཐུ་བོ་མཆོག །ཐེག་མཆོག་བསྟན་པ་རྒྱས་མཛད་དེ། །ཚེ་འདིར་ཟུང་འཇུག་མངོན་གྱུར་པ། །ཨཱརྱ་དེ་ཝའི་ཞབས་ལ་འདུད། །