པཎ་གྲུབ་བསྟོད་ཚོགས།

༄༅། །དཔལ་བདག་ཉིད་ཆེན་པོ་འཕགས་པ་ཀླུ་སྒྲུབ་ཞབས་ཀྱི་རྟོགས་པ་བརྗོད་པ་ངེས་དོན་ཉིན་མོར་བྱེད་པའི་སྣང་བས་སྙིང་གི་མུན་པ་སངས་བྱེད་ཅེས་བྱ་བ།།[1] ༼པཎ་ཆེན་ཤཱཀྱ་མཆོག་ལྡན་ (1428-1507) གྱིས་མཛད་པ།༽   ན་མོ་མཉྫུ་ཤྲཱི་ཡེ། ཆོས་དབྱིངས་ཞི་བའི་ནགས་སུ་རྟག་བཞུགས་ནས། །འགྲོ་ཀུན་མཚན་མའི་ལམ་ལས་བསྲུང་བྱའི་ཕྱིར། །རྟེན་འབྲེལ་སྒྱུ་མར་འཆར་བའི་གསུང་དབྱངས་ཀྱིས། །ཐུབ་བསྟན་ཉི་མོར་མཛད་ལ་ཕྱག་བགྱིའོ། །བྱིས་བློས་བཏགས་པའི་བདེན་དོན་རྣམ་གཉིས་པོ། །ཐད་སོར་བཞག་ནས་བླང་དོར་སྤྱོད་པའི་ཆོས། །སྨོན་ལམ་མཐར་ཕྱིན་གཞན་དོན་སྐུ་གཉིས་པོའི། །ལམ་སྟོན་མཛད་པ་དེ་ལ་ཕྱག་འཚལ་ལོ། །

༄༅། །སློབ་དཔོན་ཆེན་པོ་འཕགས་པ་ལ་བསྟོད་པ་ནོར་བུ་རིན་པོ་ཆེའི་ཕྲེང་བ།།[1] ༼ཐམས་ཅད་མཁྱེན་པ་འབྲི་གུང་སྤྱན་སྔ་གྲགས་པ་འབྱུང་གནས་ (1175-1255) ཀྱིས་མཛད།༽   ཨོཾ་སྭ་སྟི། དུས་གསུམ་རྒྱལ་བའི་ངོ་བོ་ཆོས་ཀྱི་རྗེ། །ལྷུན་གྲུབ་འདུས་མ་བྱས་པའི་འཕྲིན་ལས་ཀྱིས། །བརྩེ་བ་ཆེན་པོས་འགྲོ་རྣམས་འདྲེན་མཛད་པ། །ཐུབ་མཆོག་འཕགས་པ་དེ་ལ་གུས་ཕྱག་འཚལ། །ཡང་དག་ཡེ་ཤེས་དམ་པ་ཆོས་ཀྱི་སྐུ། །གཟུང་འཛིན་འཁོར་བའི་སྡུག་བསྔལ་མ་ལུས་རྣམས། །ངོ་བོ་དབྱེར་མེད་ནམ་མཁའ་ལྟ་བུར་བསྟན། །འཁོར་འདས་མཉམ་ཉིད་ཆོས་སྐུ་ཁྱོད་ཕྱག་འཚལ། །

༄༅། །འཕགས་པ་ཀླུ་སྒྲུབ་ཡབ་སྲས་ཀྱི་བསྟོད་པ།[1] ༼ཁྲོ་ཕུ་ལོ་ཙཱ་བ་བྱམས་པའི་དཔལ་ (1173-1236) གྱིས་མཛད་པ།༽   ན་མོ་མཉྫུ་ཐཱ་ཡཱ། ཤེས་བྱའི་མཁའ་ལ་རྣམ་དག་མཁྱེན་པའི་དཔལ། །བདེན་གཉིས་རྣམ་འབྱེད་ཉི་ཟླའི་འོད་ཤར་བས། །མི་ཤེས་མུན་སེལ་བསྟན་པའི་སྒྲོན་གྱུར་པ། །སློབ་དཔོན་ཀླུ་སྒྲུབ་ཞབས་ལ་ཕྱག་འཚལ་ལོ། །སྔོན་ཚེ་ཐུབ་སྲས་ཐུ་བོ་ལིད་ཙ་བྱི། །ལྔ་བྱའི་ཐོག་མར་རྨ་བྱའི་རིག་འཛིན་རྒྱུར། །མ་འོངས་སངས་རྒྱས་ཡེ་ཤེས་བླ་མའི་འོད། །འགྲོ་བའི་གཉེན་གཅིག་ཁྱོད་ལ་ཕྱག་འཚལ་ལོ། །

འཕགས་ཡུལ་རྒྱན་དྲུག་མཆོག་གཉིས།[1] ༼ དཔལ་ཡུལ་དགོན་དུ་བཞུགས་པའི་དཔེ་རྙིང་།༽   འདུལ་བའི་གཞུང་འབྱེད་ཡོན་ཏན་འོད། །དེ་ཡི་འགྲེལ་མཛད་ཤཱཀྱ་འོད། །ཚད་མའི་གཞུང་འབྱེད་ཕྱོགས་གླང་པོ། །དེ་ཡི་འགྲེལ་མཛད་ཆོས་ཀྱི་གྲགས། །ཟབ་མོའི་གཞུང་འབྱེད་ཀླུ་སྒྲུབ་ཞབས། །དེ་ཡི་འགྲེལ་མཛད་འཕགས་པ་ལྷ། །མངོན་པའི་སྲོལ་འབྱེད་ཐོགས་མེད་ཞབས། །དེ་ཡི་འགྲེལ་མཛད་དབྱིག་གཉེན་ཏེ། །ཀླུ་ཐོགས་གཉིས་ལ་མཆོག་གཉིས་དང་། །གཞན་དྲུག་འཛམ་གླིང་རྒྱན་དུ་གྲགས། །བསྟན་པའི་གཏད་རབས་རྣམ་བདུན་ནི། །གནས་བརྟན་འོད་སྲུང་ཀུན་དགའ་བོ། །ཤ་ནའི་གོས་ཅན་ཉེར་སྦས་དང་། །དྷི་དྷི་ཀ་དང་ནག་པོ་དང་། །ལེགས་མཐོང་བཅས་ཏེ་བདུན་ཡིན་ནོ།།  །།