པཎ་གྲུབ་ཀྱི་རྣམ་ཐར།

ཤ༽ པཎ་གྲུབ་གསོལ་འདེབས་ཀྱི་ཚིག་འགྲེལ།   དེ་ཡང་རྣལ་འབྱོར་སྤྱོད་པའི་དབུ་མ་རང་རྒྱུད་པའི་སྲོལ་བཟང་བཏོད་ཅིང་། བོད་གངས་ཅན་ཞིང་ཁམས་སུ་རྒྱལ་བསྟན་ཐོག་མར་སྤེལ་བར་མཛད་པའི་བཀའ་དྲིན་དྲན་པའི་སྒོ་ནས་མཁན་ཆེན་ཞི་བ་འཚོ་ལ་གསོལ་བ་འདེབས་པ་ནི། ༸གོང་ས་༸སྐྱབས་མགོན་༸རྒྱལ་དབང་ཐམས་ཅད་མཁྱེན་པས་མཛད་པའི་དཔལ་ནཱ་ལེནྡྲའི་པཎ་ཆེན་བཅུ་བདུན་གྱི་གསོལ་འདེབས་དད་གསུམ་གསལ་བྱེད་ལས[1]།

ལ༽ མཁན་ཆེན་ཞི་འཚོའི་གསུང་གི་སྐོར།   དེ་ཡང་རྗེ་ཙོང་ཁ་པ་ཆེན་པོས་ (1357-1419) མཛད་པའི་དབུ་མ་རྒྱན་གྱི་ཟིན་བྲིས་རྗེ་རང་གིས་གནང་བ་ལས[1]། འཇམ་དཔལ་དབྱངས་ཀྱིས་རྗེས་གཟུང་བས། །རང་གཞན་གྲུབ་མཐའི་ཕ་རོལ་སོན། །ཟབ་མོའི་དོན་ལ་མངའ་བརྙེས་པ། །དཔལ་ལྡན་ཞི་བ་འཚོ་ལ་འདུད། །མགོན་དེས་གངས་ཅན་ཁྲོད་འདིར་རྒྱལ་བའི་བསྟན། །ཐོག་མར་ལེགས་པར་བཙུགས་ཚེ་ཀླུ་སྒྲུབ་ལུགས། །

ར༽ རྗེས་འཇུག་གི་སློབ་མ་གྲགས་ཅན། དེ་ཡང་འབའ་གཞུང་རིན་ཆེན་ཚེ་རིང་གིས་བརྩམས་པའི་དབུ་མའི་སྤྱི་དོན་ཟབ་དོན་གསལ་བྱེད་འཕྲུལ་གྱི་མེ་ལོང་ལས[1]། བོདྷི་ས་ཏྭའམ་མཁན་པོ་ཞི་བ་འཚོ་ནི་ཤར་བྷང་ག་ལའི་ཟ་ཧོར་རྒྱལ་པོའི་སྲས་སུ་འཁྲུངས་ཏེ་ཡེ་ཤེས་སྙིང་པོ་ལས་རབ་ཏུ་བྱུང་། ཆོས་རྒྱལ་ཁྲི་སྲོང་ལྡེ་བཙན་གྱིས་བོད་ཡུལ་དུ་སྤྱན་དྲངས་ཏེ། བཻ་རོ་ཙ་ན་དང་། ངན་ལམ་རྒྱལ་བ་མཆོག་དབྱངས། གཙང་ལེགས་གྲུབ་སོགས་རབ་ཏུ་བྱུང་བས་སད་མི་མི་བདུན་དུ་གྲགས།

༢༽ ཆོས་རྒྱལ་ཁྲི་སྲོང་ལྡེའུ་བཙན་གྱི་མཛད་ཆེན།   དེ་ཡང་མཁན་སློབ་ཆོས་གསུམ་གྱི་གསོལ་འདེབས་ལས[1]། རྒྱལ་ཀུན་མཁྱེན་རབ་ཡེ་ཤེས་འཇམ་དཔལ་དབྱངས། །ཞིང་འདིར་བསམ་བཞིན་ཆོས་སྐྱོང་རྒྱལ་པོའི་ཚུལ། ། གངས་ཅན་བསྟན་པའི་ཤིང་རྟ་བཀའ་དྲིན་ཅན། །མངའ་བདག་ཁྲི་སྲོང་ལྡེའུ་བཙན་ལ་གསོལ་བ་འདེབས། ། ཞེས་བསྔགས་པ་ཆོས་རྒྱལ་ཁྲི་སྲོང་ལྡེའུ་བཙན་ནི། གནའ་རབས་བོད་དུ་ཆོས་སྲིད་གཉིས་ཀར་མཛད་རྗེས་ཆེ་བའི་བཙན་པོ་ཆོས་རྒྱལ་མེས་དབོན་རྣམ་གསུམ་ཞེས་གྲགས་པའི་ནང་ཚན་ཡིན་ལ།