པཎ་གྲུབ་ཀྱི་རྣམ་ཐར།

བ༽ དབྱིག་གཉེན་གྱིས་སེམས་ཙམ་བཀྲོལ་ཚུལ།   དེ་ཡང་ཀུན་མཁྱེན་རིག་པ་འཛིན་པ་ཆེན་པོ་འབྲི་གུང་པ་ཆོས་ཀྱི་གྲགས་པས་ (1595-1659) མཛད་པའི་འཕགས་པ་རྒྱན་དྲུག་མཆོག་གཉིས་ལ་བསྟོད་པ་ལས[1]། དབྱིག་གི་མཆོག་གྱུར་ཐེག་པ་ཆེའི། །ནོར་བུ་དམན་པའི་འདམ་དྲི་མས། ། སྦགས་པ་གསལ་མཛད་བསྟན་པའི་བཤེས། །གཉེན་གྱུར་ཁྱོད་ལ་ཕྱག་འཚལ་ལོ། །

ཕ༽ མུ་སྟེགས་པའི་བྲམ་ཟེ་དང་རྩོད་པ་མཛད་ཚུལ།   དེ་ཡང་འགྲོ་མགོན་ཆོས་རྒྱལ་འཕགས་པས་ (1235-1280) མཛད་པའི་རྒྱན་དྲུག་མཆོག་གཉིས་ཀྱི་བསྟོད་པ་གཞུང་ལུགས་མ་ལས[1]། མང་དུ་སྦྱངས་པས་མཁྱེན་པའི་དཀྱིལ་འཁོར་རྒྱས། ། སྤོབས་པ་ཤེས་བྱའི་མཁའ་ལ་ཐོགས་མེད་རྒྱུ། ། རིགས་པའི་ཟེར་གྱིས་གཞན་གཞུང་ཚང་ཚིང་སྲེག ། དབྱིག་གཉེན་ཆོས་ཀྱི་ཉི་མ་ལ་ཕྱག་འཚལ། །

པ༽ རྒྱའི་ཡིག་ཆར་གསལ་བའི་དབྱིག་གཉེན་གྱི་རྣམ་ཐར།   དེ་ཡང་འཕགས་པ་ཐོགས་མེད་དང་དབྱིག་གཉེན་གཉིས་ཀྱི་བྱུང་བ་བརྗོད་པ་ལས[1]། ཁོང་ཉིད་ཐོག་མར་ཐེག་དམན་ལ་མོས་ཤིང་། གཞུང་ལུགས་འབུམ་སྡེ་བཅོ་བརྒྱད་ལ་མཁས། ཐོགས་མེད་དགུང་ལོ་མཐོན་པོར་སོན་སྐབས་གཅུང་གི་གསུང་རྩོམ་རྣམས་གཟིགས་པས་འདི་ཤེས་རབ་ཤིན་ཏུ་ཆེ་བར་འདུག་ཅིང་། ཐེག་ཆེན་ལ་མི་མོས་པས་འདི་མ་བཏུལ་ན་ཁོ་བོ་གཤེགས་རྗེས་འདིའི་རྩོད་ཟླར་ཡོང་བ་དཀའ་བས་ཐེག་ཆེན་ལ་གནོད་པ་འོང་དགོངས།

ན༽ ཐོགས་མེད་མཇལ་ནས་ཐེག་ཆེན་དུ་ཞུགས་ཚུལ།   དེ་ཡང་ཀུན་དགའ་འཇམ་དབྱངས་མཁྱེན་རབ་རྒྱ་མཚོས་ (1901-1959) མཛད་པའི་འཛམ་གླིང་རྒྱན་དྲུག་མཆོག་གཉིས་རྣམས་ཀྱི་རྟོགས་བརྗོད་ངོ་མཚར་སྙན་ངག་གསེར་གྱི་ཉག་ཐག་ལ་བསྟར་བའི་བསྟོད་པ་རྨད་བྱུང་ནོར་བུའི་འཕྱང་འཕྲུལ་བློ་གསལ་མགུལ་རྒྱན་ལས[1]། གང་གི་གཅེན་པོ་འཕགས་པ་ཐོགས་མེད་ལས། ། ཐེག་ཆེན་མདོ་རྣམས་ལན་གཅིག་གསན་པས་ཀྱང་། ། མ་ལུས་ཐུགས་སུ་ཆུད་ཅེས་གྲགས་དཀར་གྱི། ། སྙན་པའི་བ་དན་སྲིད་པའི་ཁོང་ན་ཁྱབ། །