གསུང་འབུམ་དཀར་ཆག

ན༽ གསུང་བཟང་བསྟན་འགྱུར་དུ་མ་འཁོད་པ། ༡༽ སྨན་དཔྱད་ཟླ་བའི་རྒྱལ་པོ།   དེ་ཡང་བློན་པོ་བཀའི་ཐང་ཡིག་ལས[1]། ཀླུ་སྒྲུབ་མཛད་པས་སོ་མ་རཱ་ཛ་དང་། ། བདུད་རྩིའི་ཐིགས་པ་བདུད་རྩི་བུམ་པ་དང་། ། ཞེས་གསལ་བ་ལྟར་སོ་མ་རཱ་ཛ་སྟེ་སྨན་དཔྱད་ཟླ་བའི་རྒྱལ་པོ་དང་། བདུད་རྩིའི་ཐིགས་པ[2]། བདུད་རྩིའི་བུམ་པ་[3]ཞེས་པ་གསུམ་ཡང་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པར་གསུངས་ཤིང་། སྔ་མ་མཇལ་དུ་ཡོད་ཀྱང་ཕྱི་མ་གཉིས་ཀྱི་མ་ཡིག་མ་རྙེད་ལ། སྔ་མ་སྨན་དཔྱད་ཟླ་བའི་རྒྱལ་པོ་ཀླུ་སྒྲུབ་ཀྱིས་མཛད་མིན་དོགས་གཞི་ཆེ་བས་དཔྱད་རྩོམ་རྒྱས་པ་ཟུར་དུ་ཡོད་པ་དེར་གཟིགས་པར་འཚལ་ལོ།།  །།

ད༽ གསོ་རིག་གི་བསྟན་བཅོས་མ་རྙེད་པ།   དེ་ཡང་མང་ཐོས་ཀླུ་སྒྲུབ་རྒྱ་མཚོས་ (1523-1596) མཛད་པའི་འཕགས་ཡུལ་གྱི་པཎ་གྲུབ་ཀུན་གྱི་གཙུག་རྒྱན་དཔལ་འཕགས་པ་ཀླུ་སྒྲུབ་ལ་རྟེན་འབྲེལ་གྱི་སྒོ་ནས་རྟོགས་པ་བརྗོད་པ་ལྟ་བའི་འདོད་འཇོ་དད་པའི་སྙེ་མ་ལས[1]། ཆོས་ཕུང་བརྒྱད་ཁྲིའི་རྩ་བ་བདེན་བཞིའི་གཏམ། ། དཀར་ནག་ལས་འབྲས་བསླུ་མེད་སྟོན་པའི་འཕྲིན། ། ཚུ་རོལ་མཛེས་པའི་སྙིང་ལ་ཐུར་མ་མཁན། ། ཀླུ་སྒྲུབ་གསོ་རིག་དབང་པོས་བདག་ཅག་སྐྱོངས། །

ཐ༽ ཀླུ་སྒྲུབ་ཀྱིས་མཛད་པའི་དངོས་གྲུབ་འབྱུང་བ་སོགས།   དེ་ཡང་༸རྒྱལ་དབང་ལྔ་པ་ཆེན་པོ་ངག་དབང་བློ་བཟང་རྒྱ་མཚོའི་ (1617-1682) གསུང་དམ་པའི་ཆོས་ཀྱི་གསན་ཡིག་གངྒཱའི་ཆུ་རྒྱུན་ལས[1]། བླ་ཆེན་དང་བ་རི་ཐུན་མོང་ནས་བརྒྱུད་པ་ཀླུ་སྒྲུབ་ཀྱིས་མཛད་པའི་དངོས་གྲུབ་འབྱུང་བ། ཞེས་གསལ་ཞིང་། དེ་བཞིན་དཔེ་ཝར་མཆོག་སྤྲུལ་འཇམ་དབྱངས་བསོད་ནམས་དབང་པོའི་གསན་ཡིག་འདོད་རྒུའི་བང་མཛོད་ལས་ཀྱང་[2]། གཅིག་མཚུངས་སུ་བྱུང་བ་ལྟར། མགོན་པོ་ཀླུ་སྒྲུབ་ཀྱིས་མཛད་པའི་དངོས་གྲུབ་འབྱུང་བ་ཞེས་པའི་བསྟན་བཅོས་དེ་ཉིད་ཀྱི་དབང་ལུང་ཁྲིད་གསུམ་གྱི་རྒྱུན་ཡང་ཡོད་པར་གསུངས་སོ།།

ཏ༽ བྱ་རོག་མ་བསྟན་བསྲུང་གི་སྐོར་གྱི་ཆོས་ཚན་མ་རྙེད་པ།   དེ་ཡང་ཀུན་མཁྱེན་པདྨ་དཀར་པོས་ (1527-1592) མཛད་པའི་བྱ་རོག་མ་བསྟན་བསྲུང་གི་སྐོར་གྱི་ཆོས་ཚན་ཐོ་ཡིག་གསེར་གྱི་ཐུར་མ་ལས[1]། ༡) ནག་པོ་ཆེན་པོ་བྱ་རོག་ཅན་གྱི་ཕྱག་བཞི་པའི་སྒྲུབ་ཐབས་ཞེས་བྱ་བ་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་འདི་མགོན་པོའི་མན་ངག་ཐམས་ཅད་ཀྱི་ཐོག་མར་བྱུང་བའི་ཡི་གེ་ཡིན། ཞེས་དང་། དེ་ཉིད་ལས[2]། ༢) སྒྲོལ་བྱེད་མ་གསུམ་གྱི་སྒེར་སྒྲུབ་ཀྱི་གཞུང་གསུམ་ཀླུ་སྒྲུབ་ཀྱིས་མཛད་པ།