པཎ་གྲུབ་བསྟོད་ཚོགས།

༄༅། །ཇོ་བོ་ཆེན་པོ་སྨྲི་ཏི་ཛྙཱ་ན་ལ་བསྟོད་པ་ཡེ་ཤེས་རབ་གསལ་ཞེས་བྱ་བ་བཞུགས་སོ།།   ན་མོ་གུ་རུ་ཛྙཱ་ན་ཀཱ་ཡ་ཡེ། ཡེ་ཤེས་སྐུ་མཆོག་ཉིན་མོར་བྱེད་པའི་གཟིས། ། ས་གསུམ་རྨོངས་པའི་མུན་པ་ཀུན་སེལ་བ། ། བླ་མ་འཇམ་དབྱངས་དྲན་པ་ཡེ་ཤེས་ནི། ། མི་འབྲལ་སྤྱི་བོའི་རྒྱན་དུ་རྟག་པར་མཆོད། ། འཕགས་པའི་ཡུལ་གྱི་པཎྜི་ཏ་ཆེན་པོ། ། ཀུན་གྱི་གཙུག་ན་མངོན་པར་མཐོ་བ་ཡི། ། ངོ་མཚར་ཇོ་བོ་ཆེན་པོ་དེ་ཉིད་ནི། ། ཕྱོགས་ལས་རྣམ་པར་རྒྱལ་བའི་གྲགས་སྙན་འབར། །

༄༅། །མ་ཧཱ་པཎྜི་ཏ་ཙནྡྲ་གོ་མི་ལ་བསྟོད་པ་བྱིན་རླབས་མྱུར་འཇུག་ཅེས་བྱ་བ་བཞུགས།   འཇམ་པའི་དབྱངས་ལ་ཕྱག་འཚལ་ལོ། ། གཟོད་ནས་ཞི་བ་ཆོས་ཀྱི་དབྱིངས། ། རྣམ་པར་གྲོལ་བ་བྱང་ཆུབ་ཀྱང་། ། མཁྱེན་བརྩེ་ཡེ་ཤེས་ཆེན་པོའི་སྐུ། ། སླར་ཡང་ཞིང་འདིར་སྣང་བར་གྱུར། ༡ ། མཚན་དཔེའི་དཀྱིལ་འཁོར་རབ་རྒྱས་ཤིང་། ། གསུང་དབྱངས་དྲུག་ཅུའི་ཉམས་ལྡན་པ། ། ཕ་རོལ་ཕྱིན་ཐུགས་བདག་ཉིད་ཅན། ། འཇམ་དབྱངས་བླ་མ་ཁྱེད་ལ་འདུད། ༢ །

༄༅། །ཇོ་བོ་ཨ་ཏི་ཤའི་གསོལ་འདེབས།   སངས་རྒྱས་སྣང་བ་མཐའ་ཡས་ཐུགས་ལས་སྤྲུལ། ། པདྨ་འབྱུང་གནས་དངོས་སྣང་ཨ་ཏི་ཤ། ། གངས་ཅན་བོད་ལ་བཀའ་དྲིན་མཚུངས་པ་མེད། ། དཱི་པཾ་ཀ་རའི་ཞབས་ལ་གསོལ་བ་འདེབས། །

༄༅། །རྒྱལ་སྲས་ཞི་བ་ལྷ་དང་ཀཿཐོག་པ་དམ་གཙང་བྱམས་གསུམ་གྱི་གསོལ་འདེབས།   ཚེ་རབས་ཀུན་ཏུ་མགོན་པོ་འཇམ་དཔལ་དབྱངས། ། རིགས་ཀྱི་བདག་པོར་ཐོབ་ནས་འགྲོ་ཀུན་ལ། ། བྱང་ཆུབ་སྤྱོད་པའི་ལམ་བཟང་གསལ་མཛད་པ། ། རྒྱལ་སྲས་ཞི་བ་ལྷ་ལ་ཕྱག་འཚལ་ལོ། །