པཎ་གྲུབ་བསྟོད་ཚོགས།

 རྟེན་འབྱུང་གཏམ་གྱིས་འགྲོ་བ་རྣམས། །འདྲེན་མཛད་ཐུབ་དབང་ཉི་མ་ཆེ། ། དབུ་མའི་ལམ་སྟོན་ཤིང་རྟ་ཆེ། །རྒྱལ་བ་གཉིས་པ་ཀླུ་སྒྲུབ་ཞབས། ། ཀླུ་སྒྲུབ་ལུགས་འཛིན་གཙུག་གི་རྒྱན། །མཁས་མཆོག་ཨཱརྱ་དེ་ཝའི་ཞབས། ། འགྲེལ་མཛད་ཐལ་འགྱུར་སྲོལ་ཕྱེ་བའི། །གྲུབ་བརྙེས་སློབ་དཔོན་སངས་རྒྱས་བསྐྱངས། ། ཐ་སྙད་རང་མཚན་མི་འགོག་པའི། །རང་རྒྱུད་གསལ་མཛད་ལེགས་ལྡན་འབྱེད། ། ཀླུ་སྒྲུབ་བཞེད་གཞུང་ཐུན་མིན་ལམ། །གསལ་བར་སྟོན་མཛད་ཟླ་བ་གྲགས། །

༄༅། །དཔལ་མཉམ་མེད་ཇོ་བོ་ཨ་ཏི་ཤའི་བསྟོད་པ་ཟ་མ་ཏོག་བཀོད་པ་ཞེས་བྱ་བ་བཞུགས་སོ།།   ༼མངའ་རིས་རི་སྐྱ་ལྷ་འོད་བསྟན་འཛིན་འཇམ་དབྱངས་ལྷུན་གྲུབ་ཀྱིས་མཛད།༽   གང་ཞིག་སྐལ་ལྡན་འགྲོ་བའི་ཡིད་ཀྱི་མཁར། །རྟེན་འབྱུང་གཏམ་གྱི་དབྱར་སྐྱེས་རྔ་གསང་ཆེ། །ཆེར་སྒྲོག་མ་རིག་གཉིད་ཐུན་ཟློག་མཛད་པ། །ཤཱཀྱའི་རྒྱལ་པོས་དེང་འདིར་དགེ་ལེགས་སྩོལ། །འགྲོ་བའི་བླ་མ་དཔལ་ལྡན་མར་མེ་མཛད། །གང་ལ་ཕྱག་འཚལ་རྣམ་པར་ཐར་པའི་སྤྲིན། །སྐལ་བཟང་སྐྱེ་བོའི་མཁའ་ལ་རབ་དཀྲིགས་ཏེ། །དངོས་གྲུབ་འདོད་རྒུའི་གྲུ་ཆར་འདི་ན་ཕབ། །ཐུབ་པའི་སྤྱན་སྔར་རྒྱལ་སྲས་བཟང་པོ་སྐྱོང་། །རྡོ་རྗེ་གདན་དུ་དཔལ་ལྡན་མར་མེ་མཛད། །

༄༅། །འཕགས་པ་གྲོལ་སྡེའི་བསྟོད་པ། ༼༸གོང་ས་༸སྐྱབས་མགོན་ཆེན་པོ་མཆོག་གིས་མཛད།༽   ཐོགས་མེད་སྐུ་མཆེད་ལས་འོང་ཤེར་ཕྱིན་དོན། ། ཡོད་མེད་མཐའ་བྲལ་དབུ་མའི་སྲོལ་བཞིན་དུ། ། རྒྱན་གྱི་གཞུང་དོན་སྣང་བའི་སྒྲོན་མེ་སྦར། ། འཕགས་པ་གྲོལ་སྡེའི་ཞབས་ལ་གསོལ་བ་འདེབས། ། རིང་ནས་བྱང་ཆུབ་མཆོག་ཏུ་ཐུགས་བསྐྱེད་ཅིང་། ། དམ་ཆོས་འཛིན་པའི་སྨོན་ལམ་དཔག་ཡས་པས། ། མདོ་རྒྱན་སྦྱར་བའི་གདམས་པ་སྲོལ་བཏོད་དེ། ། སྦས་དོན་རིམ་པ་གསལ་མཛད་འཕགས་པའི་ཞབས། །

༄༅། །མགོན་པོ་ཞི་བ་ལྷ་ལ་བརྟེན་པའི་བླ་མའི་རྣལ་འབྱོར་དངོས་གྲུབ་ཀུན་འབྱུང་བཞུགས་སོ།།[1]   ༼ཡོངས་འཛིན་ཡེ་ཤེས་རྒྱལ་མཚན་ (1713-1793) གྱིས་མཛད།༽   ༄༅། །ན་མོ་གུ་རུ་མཉྫུ་གྷོ་ཥཱ་ཡ། དེ་ལ་འདིར་དལ་བའི་རྟེན་ལ་སྙིང་པོ་བླང་བའི་ཕྱིར་མགོན་པོ་ཞི་བ་ལྷ་དང་རྩ་བའི་བླ་མ་དབྱེར་མེད་དུ་བྱས་པའི་བླ་མའི་རྣལ་འབྱོར་སྒོམ་པར་འདོད་པས། མགོན་པོ་ཞི་བ་ལྷ་ནི་རྗེ་བཙུན་འཇམ་དབྱངས་ཀྱི་རྣམ་སྤྲུལ་ཡིན་པས་རྗེ་བཙུན་འཇམ་པའི་དབྱངས་ཀྱི་རྣམ་པར་བསྒོམས་ན་ཕན་ཡོན་ཆེ་བས།