པཎ་གྲུབ་ཀྱི་རྣམ་ཐར།

བ༽ རྒྱ་ཆེན་གཞུང་ལ་བསླབས་ཏེ་ཉམས་རྟོགས་འཁྲུངས་ཚུལ།   དེ་ཡང་དབྱངས་ཅན་དགའ་བའི་བློ་གྲོས་ (1740-1827) ཀྱིས་མཛད་པའི་རྒྱལ་སྲས་བདག་ཉིད་ཆེན་པོ་སློབ་དཔོན་སེངྒེ་བཟང་པོ་ལ་བསྟོད་པ་བྱིན་རླབས་མྱུར་འཇུག་ལས[1]། རྣལ་འབྱོར་སྤྱོད་པའི་དབུ་མའི་སྲོལ་བཟང་པོ། ། འབྱེད་མཁས་སློབ་དཔོན་ཞི་འཚོའི་ཞབས་བསྟེན་ནས། ། དབུ་མའི་གཞུང་དང་གདམས་པའི་བདུད་རྩི་ཡིས། ། ཐུགས་རྒྱུད་གཏམས་པར་མཛད་ལ་གསོལ་བ་འདེབས། །

ཕ༽ ཚིག་དོན་གཉིས་ཀར་མཁས་པ་ཡིན་ཚུལ།   དེ་ཡང་རྗེ་བདག་ཉིད་ཆེན་པོས་ (1357-1419) མཛད་པའི་ལེགས་བཤད་གསེར་ཕྲེང་ལས[1]། རབ་གསལ་ཆེས་མྱུར་སྤོབས་པས་བསྒྲུབས་པའི་རིགས་པའི་གློག་ཕྲེང་དྲག་ཏུ་འཁྱུག །མི་ཤེས་ཚ་གདུང་ཀུན་ནས་བསིལ་བྱེད་ལེགས་བཤད་ཆུ་ཡི་ལྗིད་ཀྱིས་ནོན། །སྟོང་ཉིད་ང་རོ་རབ་ཏུ་བརྗིད་པའི་འབྲུག་སྒྲའི་དཔལ་གྱིས་ཉེར་མཛེས་པ། །སེང་བཟང་ཞེས་གྲགས་ཆུ་འཛིན་གང་དེ་ཐུབ་བསྟན་ནམ་མཁའི་རྒྱན་དུ་གྱུར། །

པ༽ ཨོ་ཏནྟ་པཱུ་རིའི་གཙུག་ལག་ཁང་ངོ་སྤྲོད།   དེ་ཡང་ཨོ་ཏནྟ་པཱུ་རི་ (Odantapuri) ཞེས་པ་ནི། ལེགས་སྦྱར་གྱི་སྐད་ཡིན་ཅིང་། བོད་སྐད་དུ་འཕུར་བྱེད་ཀྱི་གྲོང་ཁྱེར་ཞེས་པའི་དོན་ཡིན་པ་ནི། དབྱངས་ཅན་དགའ་བའི་བློ་གྲོས་ (1740-1827) ཀྱིས་མཛད་པའི་བྱང་ཆུབ་ལམ་གྱི་རིམ་པ་ཆེན་པོ་ལས་བྱུང་བའི་བརྡ་བཀྲོལ་ཉེར་མཁོ་བསྡུས་པ་ལས[1]། ཨོ་ཏནྟ་པཱུ་རི་ནི། འཕུར་བྱེད་ཀྱི་གྲོང་ཁྱེར་ཞེས་པ་སྟེ། ཨོ་ཏནྟ་འཕུར་བྱེད་དང་། པཱུ་ར་གྲོང་ཁྱེར་གྱི་མིང་ངོ་། །

ན༽ བྱམས་པས་ལུང་བསྟན་ནས་ཤེར་ཕྱིན་མཛད་ཚུལ།   དེ་ཡང་དབྱངས་ཅན་དགའ་བའི་བློ་གྲོས་ (1740-1827) ཀྱིས་མཛད་པའི་རྒྱལ་སྲས་བདག་ཉིད་ཆེན་པོ་སློབ་དཔོན་སེངྒེ་བཟང་པོ་ལ་བསྟོད་པ་བྱིན་རླབས་མྱུར་འཇུག་ལས[1]། དེ་ཚེ་མི་ཕམ་མགོན་པོ་མནལ་ལམ་དུ། ། ཞལ་བསྟན་གསུང་གིས་དབུགས་དབྱུང་ལུང་བསྟན་མཛད། ། རྒྱལ་པོ་དྷརྨ་པཱ་ལས་སྤྱན་དྲངས་ཚེ། ། བསྟན་འགྲོའི་དོན་དུ་བྱོན་ལ་གསོལ་བ་འདེབས། །