པཎ་གྲུབ་ཀྱི་རྣམ་ཐར།

ཞ༽ ཇོ་འབྲོམ་མཇལ་ཏེ་སྐྱིད་གྲོང་དུ་འགྲོ་དོན་མཛད་ཚུལ།   དེ་ཡང་རྗེ་བདག་ཉིད་ཆེན་པོས་ (1357-1419) མཛད་པའི་བྱང་ཆུབ་ལམ་གྱི་རིམ་པའི་ཟབ་མོ་ལྟ་བའི་བརྒྱུད་པ་ལ་གསོལ་བ་གདབ་པ་ལས[1]། རྟེན་འབྲེལ་ཟབ་མོ་ཇི་བཞིན་གཟིགས་པ་ཡིས། ། ཤིང་རྟ་ཆེན་པོའི་སྲོལ་འཛིན་མར་མེ་མཛད། ། ལམ་བཟང་གསལ་མཛད་སྟོན་པ་རིན་པོ་ཆེ། ། འཛམ་གླིང་རྒྱན་གྱུར་གཉིས་ལ་གསོལ་བ་འདེབས། །

ཝ༽ ཇོ་བོ་དང་ལོ་ཆེན་ལྷ་བླ་མ་བཅས་མཇལ་ཚུལ།   དེ་ཡང་༸རྒྱལ་བ་དགེ་འདུན་རྒྱ་མཚོས་ (1476-1542) མཛད་པའི་དཔལ་མར་མེ་མཛད་ཡེ་ཤེས་ཀྱི་རྣམ་པར་ཐར་པ་ལ་མདོ་ཙམ་དུ་བསྟོད་པ་ལས[1]། དེ་ཚེ་ཁ་བ་ཅན་གྱི་སྐྱེད་མོས་ཚལ། ། བསླབ་གསུམ་སྦྲང་རྩིས་གཏམས་པའི་ཆུ་སྐྱེས་ཀྱིས། ། ཡོངས་གང་འཕགས་ཡུལ་ཆོས་ཀྱི་དགའ་ཚལ་ཡང་། ། ཀུན་ཏུ་ཕམ་པར་མཛད་ལ་ཕྱག་འཚལ་ལོ། །

ཛ༽ ཇོ་བོ་བོད་དུ་བྱོན་ཅིང་བསུ་བ་ཞུས་ཚུལ།   དེ་ཡང་༸རྒྱལ་བ་དགེ་འདུན་རྒྱ་མཚོས་ (1476-1542) མཛད་པའི་དཔལ་མར་མེ་མཛད་ཡེ་ཤེས་ཀྱི་རྣམ་པར་ཐར་པ་ལ་མདོ་ཙམ་དུ་བསྟོད་པ་ལས[1]། གངས་ཅན་མགོན་པོ་རྒྱལ་བའི་འབྱུང་གནས་དང་། ། ལེགས་སྤྱད་སྨོན་ལམ་སྟོང་གི་མཚམས་སྦྱོར་ལས། ། སླར་ཡང་བོད་ཡུལ་མུན་པ་ཀུན་སེལ་བའི། ། མར་མེ་མཛད་དཔལ་དོན་མཐུན་ཁྱོད་ཕྱག་འཚལ། །

ཚ༽ ལྷ་དང་བླ་མའི་ལུང་བསྟན་རིམ་པར་བྱུང་ཚུལ།   དེ་ཡང་སྨྱོ་ཤུལ་མཁན་པོ་ངག་དབང་དཔལ་བཟང་ (1879-1940) གིས་མཛད་པའི་ཇོ་བོ་ཡབ་སྲས་ལ་གསོལ་བ་འདེབས་པ་ལས[1]། སྒྲོལ་མས་ལུང་བསྟན་རྒྱལ་བུ་དཀོན་མཆོག་འབངས། ། ཐུབ་བསྟན་ཡོངས་སུ་རྫོགས་པའི་མངའ་བདག་མཆོག ། ལྷ་ཆོས་བདུན་ལྡན་ཇོ་བོ་བཀའ་གདམས་པའི། ། རྒྱལ་བའི་འབྱུང་གནས་ཁྱེད་ལ་གསོལ་བ་འདེབས། །