ཀ༽ མགོན་པོ་ཀླུ་སྒྲུབ་ཀྱི་རྣམ་ཐར།

༄༅། །བཙུན་པ་དཀོན་མཆོག་བསྟན་པའི་སྒྲོན་མེའི་གསུང་དཔལ་མགོན་ཀླུ་སྒྲུབ་ཞབས་ལ་བསྟོད་པ་དབུ་མའི་སྣང་བ་ཞེས་བྱ་བར་མཆན་བཞུགས་སོ།།[1]   ༼ཛེ་སྨད་བློ་བཟང་དཔལ་ལྡན་བསྟན་འཛིན་ཡར་རྒྱས་ (1927-1996) ཀྱིས་མཛད།༽   རྒྱལ་བས་ཆོས་ཚུལ་གང་བསྟན་པ། །འགྲོ་བ་མུན་པས་ཁེབས་པ་ལ། །འོད་གསལ་བ་ཡི་ཕྱིར་ཡིན་པས། །སྒྲོན་མ་ཀླུ་སྒྲུབ་རྒྱལ་གྱུར་ཅིག །(ངར་)དམིགས་(པ་)ལས་(ང་ཡིར་)དམིགས་པ་(སོགས་བདེན་པར་དམིགས་པའི་འཛིན་པ་)རྣམ་(གྲངས་)མང་བས། །འགྲོ་བ་དུབ་པར་གྱུར་པ་རྣམས། །(བདེན་པར་)དམིགས་པ་མེད་པ་ཞི་བའི་བདེར། །འཁྲིད་པ་ཁྱོད་ནི་དེད་དཔོན་ལགས། །

༄༅། །དཔལ་མགོན་འཕགས་པ་ཀླུ་སྒྲུབ་ལ་བསྟོད་པའི་དོན་རྣམ་པར་བཤད་པ་དབུ་མའི་སྣང་བ་གསལ་བ་ཞེས་བྱ་བ་བཞུགས་སོ།།[1]   ༼བླ་ཁོ་འཇིགས་མེད་འཕྲིན་ལས་རྒྱ་མཚོས་ (1866-1948) མཛད།༽   ༄༅། །ན་མོ་དྷརྨ་ཀཱ་ཡ་ཡ། སྟོང་ཉིད་ཟབ་མོའི་ང་རོ་ཡིས། །སྨྲ་ངན་རི་སྐྱེས་འདེགས་བྱེད་པ། །བཅོམ་ལྡན་སྨྲ་བའི་སེང་ཆེན་གྱིས། །དགེ་ལེགས་སྣང་བ་དམ་པས་སྐྱོངས། །ཉོན་མོངས་རྩུབ་རེག་དང་བྲལ་བས། །འཇམ་པའི་དཔལ་ཞེས་རབ་གྲགས་པ། །གསུང་གི་དབང་ཕྱུག་སྨྲ་བ་ཆེས། །ཤེས་རབ་སྣང་བའི་མཆོག་སྦྱིན་མཛོད། །ལྟ་ངན་བུད་ཤིང་ཀུན་བསྲེགས་ཤིང་། །འཁོར་བའི་དགྲ་སྡེ་ལས་རྒྱལ་བ། །ཟབ་མོའི་མཛོད་ལྡན་ཀླུའི་དབང་པོ། །སངས་རྒྱས་གཉིས་པ་དེ་ལ་འདུད། །

འཛམ་གླིང་རྒྱན་དྲུག་མཆོག་གཉིས་སོགས། སྤྱིར་བསྟན།   ༄༅། །འཕགས་ཡུལ་དུ་འཛམ་གླིང་རྒྱན་དྲུག་དང༌། ཆེན་པོ་བཞི། རྨད་བྱུང་གཉིས་ཏེ་བཅུ་གཉིས་ཞེས་གྲགས་པ་རྣམས་ནི། སློབ་དཔོན་ཀླུ་སྒྲུབ། འཕགས་པ་ཐོགས་མེད། སློབ་དཔོན་ཕྱོགས་གླང་གསུམ་ནི་གཞུང་བྱེད་པ་པོ་དང༌། ཨརྱ་དེ་བ། དབྱིག་གཉེན། ཆོས་ཀྱི་གྲགས་པ་གསུམ་ནི་འགྲེལ་པ་བྱེད་པ་པོ་སྟེ་རྒྱན་དྲུག་དང༌། དཔའ་བོ། སྒྲ་གཅན་འཛིན་བཟང་པོ། ཡོན་ཏན་འོད། ཆོས་སྐྱོང་སྟེ་སློབ་དཔོན་ཆེན་པོ་བཞི། ཡང་ཞི་བ་ལྷ་དང་། ཙནྡྲ་གོ་མི་སྟེ་རྨད་དུ་བྱུང་བའི་སློབ་དཔོན་གཉིས་བཅས་སོ།།

ཆ༽ ལམ་རིམ་བླ་མ་བརྒྱུད་པའི་རྣམ་ཐར་ལས་ཇི་ལྟར་བྱུང་བ། ༡༽ རྒྱལ་བའི་བསྟན་པར་ཐུགས་བསྐྱེད་མཛད་ཚུལ།   ཡོངས་འཛིན་ཡེ་ཤེས་རྒྱལ་མཚན་ (1713-1793) གྱིས་མཛད་པའི་ལམ་རིམ་བླ་མ་བརྒྱུད་པའི་རྣམ་ཐར་ལས[1]། ཟབ་མོའི་དོན་གཟིགས་འཕགས་མཆོག་ཀླུ་སྒྲུབ་ཞབས། །ཞེས་བསྔགས་པ། དཔལ་མགོན་འཕགས་པ་ཀླུ་སྒྲུབ་ནི། སྔོན་བསྐལ་པ་གྲངས་མེད་མུ་མེད་པའི་དུས་ནས་ཐུགས་བསྐྱེད། བསྐལ་ཆེན་གྲངས་མེད་མང་པོར་ཚོགས་གཉིས་བར་མ་ཆད་དུ་བསགས།