དཔལ་ནཱ་ལེནྡྲ། བྱོན་པ་ལེགས།
སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་གསོལ་འདེབས།
ཕྱོགས་དུས་རྒྱལ་བ་སྲས་དང་བཅས་རྣམས་ཀྱིས།།
བདག་ཅག་སྙིགས་དུས་འགྲོ་བ་མགོན་མེད་ལ།།
སྐལ་མཉམ་གཟུགས་སུ་སྤྲུལ་ནས་དོན་མཛད་པ།།
བླ་མ་སངས་རྒྱས་རྣམས་ལ་གསོལ་བ་འདེབས།།
སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་གསོལ་འདེབས།
ཀུན་བཟང་རྡོར་སེམས་དགའ་རབ་ཤྲཱི་སིང༌།།
པདྨ་ཀ་ར་རྗེ་འབངས་ཉེར་ལྔ་དང༌།།
སོ་ཟུར་གནུབས་གཉགས་གཏེར་སྟོན་བརྒྱ་རྩ་སོགས།།
སྔ་འགྱུར་རིག་འཛིན་རྣམས་ལ་གསོལ་བ་འདེབས།།
དཔལ་ལྡན་མར་མེ་མཛད་དང་ཁུ་རྔོག་འབྲོམ།།
སྐུ་མཆེད་རྣམ་གསུམ་འཇམ་དབྱངས་ཙོང་ཁ་པ།།
བཀའ་གདམས་གསར་རྙིང་རིང་ལུགས་འཛིན་མཛད་པའི།།
དགེ་བའི་བཤེས་གཉེན་རྣམས་གསོལ་བ་འདེབས།།
དཔལ་ལྡན་ཆོས་སྐྱོང་ས་སྐྱའི་གོང་མ་ལྔ།།
ངོར་ཆེན་རྫོང་པ་ཚར་ཆེན་ཡབ་སྲས་ཀྱི།།
བརྒྱུད་འཛིན་མཁས་དང་གྲུབ་པ་རིམ་བྱོན་སོགས།།
ལམ་འབྲས་བརྒྱུད་པ་རྣམས་ལ་གསོལ་བ་འདེབས།།
རྡོ་རྗེ་འཆང་ཆེན་ཏཻ་ལོ་ནཱ་རོ་དང༌།།
མར་པ་མི་ལ་རྗེ་བཙུན་སྒམ་པོ་པ།།
ཆེ་བཞི་ཆུང་བརྒྱད་གྲུབ་ཐོབ་གྲངས་འདས་པ།།
དྭགས་པོ་བཀའ་བརྒྱུད་རྣམས་ལ་གསོལ་བ་འདེབས།།
ཡེ་ཤེས་མཁའ་འགྲོ་ཁྱུང་པོ་རྣལ་འབྱོར་སོགས།།
རིན་ཆེན་བདུན་བརྒྱུད་ཕྲེང་བ་རྣམ་པ་གཉིས།།
ཐང་རྒྱལ་ལ་སོགས་ཉེ་བརྒྱུད་ལས་བྱོན་པའི།།
ཤངས་པ་བཀའ་བརྒྱུད་རྣམས་ལ་གསོལ་བ་འདེབས།།
དམ་པ་སངས་རྒྱས་མ་གཅིག་ལབ་ཀྱི་སྒྲོན།།
རྨ་སོ་ཀཾ་གསུམ་སྒོ་བའི་རྣལ་འབྱོར་བཞི།།
བཀའ་བབས་སྔ་ཕྱི་བར་གསུམ་ལ་སོགས་པ།།
ཞི་གཅོད་བརྒྱུད་པ་རྣམས་ལ་གསོལ་བ་འདེབས།།
ཆོས་རྒྱལ་རིགས་ལྡན་དུས་ཞབས་ཆེ་ཆུང་དང༌།།
རྭ་འབྲོ་ཙ་མི་རང་བྱུང་དོལ་པོ་བ།།
མཁས་མཆོག་བུ་སྟོན་ཡབ་སྲས་གཙོར་གྱུར་པ།།
སྦྱོར་དྲུག་བརྒྱུད་པ་རྣམས་ལ་གསོལ་བ་འདེབས།།
རྡོ་རྗེ་བཙུན་མོ་མཁས་གྲུབ་ཨོ་རྒྱན་པ།།
རང་བྱུང་རྡོ་རྗེ་མཁར་ཆུ་སྤུ་ཏྲ་པ།།
ནེ་རིང་པ་སོགས་རྣལ་འབྱོར་དྲུག་པ་ཡི།།
བསྙེན་སྒྲུབ་བརྒྱུད་པ་རྣམས་ལ་གསོལ་བ་འདེབས།།
སྤྱན་རས་གཟིགས་དབང་མི་ཏྲ་ཛོ་ཀིའི་ཞབས།།
ཤ་རི་པུ་ཏྲ་གྲགས་པ་རིན་ཆེན་དང༌།།
བྱམས་པ་དགའ་སོགས་སྙན་བརྒྱུད་ཁྲིད་དྲུག་དང༌།།
ངལ་གསོའི་བརྒྱུད་པ་རྣམས་ལ་གསོལ་བ་འདེབས།།
ཚེམ་བུ་པ་དང་བོ་དོང་འཇིགས་བྲལ་ཆེ།།
རོང་སྟོན་ཆེན་པོ་སྒྲོལ་བའི་མགོན་པོ་སོགས།།
ཐུན་མོང་ཁྱད་པར་བླ་ན་མེད་པ་ཡི།།
ཁྲིད་བརྒྱུད་འཛིན་མཛད་རྣམས་ལ་གསོལ་བ་འདེབས།།
སྔོན་སྦྱངས་སྟོབས་ཀྱིས་མཁྱེན་གཉིས་རྩལ་ཆེན་རྫོགས།།
ངོ་མཚར་བཀའ་བབས་ཆེན་པོ་བདུན་དང་ལྡན།།
སྙིགས་མའི་འགྲོ་འདུལ་བླ་མེད་ཆོས་ཀྱི་རྗེ།།
འཇམ་དབྱངས་མཁྱེན་བརྩེའི་དབང་པོར་གསོལ་བ་འདེབས།།
སྐྱེས་རབས་དུ་མར་གོམས་པའི་མཁྱེན་རྟོགས་ཀྱིས།།
ངོ་མཚར་མཛོད་ཆེན་རྣམ་ལྔའི་ཤིང་རྟ་དྲངས།།
ཡོངས་རྫོགས་བསྟན་པའི་མེ་རོ་རྨིངས་ནས་བསླངས།།
བློ་གྲོས་མཐའ་ཡས་ཞབས་ལ་གསོལ་བ་འདེབས།།
འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས།།
དུས་གསུམ་སངས་རྒྱས་ཀུན་གྱི་ངོ་བོ་ཉིད།།
རང་སེམས་ཆོས་སྐུ་མངོན་སུམ་སྟོན་མཛད་པ།།
རྩ་བའི་བླ་མའི་ཞབས་ལ་གསོལ་བ་འདེབས།།
དཀོན་མཆོག་རིན་ཆེན་རྒྱལ་བ་སྲས་དང་བཅས།།
ཡི་དམ་དཀྱིལ་འཁོར་དཔའ་བོ་རྣལ་འབྱོར་མ།།
ཡེ་ཤེས་སྤྱན་ལྡན་ཆོས་སྐྱོང་སྲུང་མ་ལ།།
གསོལ་བ་འདེབས་སོ་བྱིན་གྱིས་བརླབ་ཏུ་གསོལ།།
འཇམ་མགོན་ཀོང་སྤྲུལ་བློ་གྲོས་མཐའ་ཡས་ཀྱིས་མཛད་པའི་སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀུན་འདུས་ཀྱི་བླ་མ་མཆོད་པའི་ཆོ་ག་ལས་ཁོལ་དུ་ཕྱུང་བའོ།། །།
