ཀ༽ མགོན་པོ་ཀླུ་སྒྲུབ་ཀྱི་རྣམ་ཐར།

ཀླུ་སྒྲུབ་ཀྱི་ལོ་རྒྱུས་དང་དེའི་རྒྱབ་ལྗོངས་ཕྲན་བུ། རྩོམ་པ་པོ། འབྲུག་ལྗང་ལོ། དབུ་མ་པའི་ཤིང་རྟའི་སྲོལ་འབྱེད་དཔལ་མགོན་འཕགས་པ་ཀླུ་སྒྲུབ། བྲམ་ཟེ་འབྱོར་ལྡན་གཉིས་ཀྱི་རིམ་གྲོ་ཡིས་བཏོན་པའི་ཁྱེད་ཀྱི་རྣམ་ཐར་གྱི་འགོ་མ་ནི། ལེགས་པར་མཇལ་ཚེ། རྣམ་ཐར་དེ་ནི་དངོས་སྟོབས་རིག་པ་ཡིས་སྒྲུབ་ནུས་པ་ཞིག་ཚོར་འོང་། འོན་ཏེ་ནཱ་ལེནྡྲའི་སྒོ་ཁ་རུ་འབྱོར་ཏེ་ས་ར་ཧས་དྲུང་དུ་གཤེགས་པ་ནི་ཧ་ཅང་ངོ་མཚར་བ་སྟེ།

ཡོངས་འཛིན་ཡེ་ཤེས་རྒྱལ་མཚན་ (1713-1793) གྱིས་མཛད་པའི་བཀྲ་ཤིས་བསམ་གཏན་གླིང་གི་བཀའ་བསྟན་རིན་པོ་ཆེའི་དཀར་ཆག་ཐུབ་བསྟན་གསལ་བྱེད་ལས[2]། དེ་ལྟར་རྒྱལ་བ་མྱ་ངན་ལས་འདས་པའི་ཚུལ་བསྟན་པའི་རྗེས་སུ་བསྡུ་བ་རིམ་པ་གསུམ་བྱུང་། དགྲ་བཅོམ་བདག་ཉིད་ཆེན་པོ་རྣམས་ཀྱིས་ཐུབ་པའི་བསྟན་པ་མ་ཉམས་པར་བཟུང་། དེ་ནས་རིམ་གྱིས་སེམས་ཅན་རྣམས་བསོད་ནམས་དམན་པས་ཆོས་མངོན་པ་ལ་དགྲ་ལན་གསུམ་བྱུང་བ་སོགས་ཐུབ་པའི་བསྟན་པ་ཉམས་དམས་པར་གྱུར།

༄༅། །ཡོངས་འཛིན་དམ་པ་རྗེ་བཙུན་བློ་བཟང་ཚུལ་ཁྲིམས་དཔལ་བཟང་པོའི་གསུང་ལས་རྒྱན་དྲུག་མཆོག་གཉིས་ཀྱི་རྣམ་ཐར་དང་གྲུབ་མཐའ་བཞི་སོ་སོའི་ལུགས་ཀྱི་གཞི་ལམ་འབྲས་གསུམ་གྱི་རྣམ་གཞག །ལེ་ཚན་ཆོས་འབྱུང་། རིགས་ལྡན་དྲག་པོ་འབྱོན་དུས། བྱ་སྤྱོད་གཉིས་ཀྱི་ལམ་རིམ་མདོར་བསྡུས། གཞུང་བསྒྱུར་ལེ་ཚན་བཅས་བཞུགས་སོ།།[1]   (མཛད་པ་པོ། འབྲོང་རྩེ་བློ་བཟང་ཚུལ་ཁྲིམས་ (1745-1800) གྱིས་མཛད།)

ཁ༽ མགོན་པོ་ཀླུ་སྒྲུབ་རྒྱལ་བའི་ལུང་གིས་ཟིན་ཚུལ།   དེ་ཡང་དབུ་མའི་ཤིང་རྟའི་སྲོལ་འབྱེད་དཔལ་མགོན་འཕགས་པ་ཀླུ་སྒྲུབ་ཞབས་ནི། ཡོན་ཏན་དང་མཛད་སྤྱོད་སོགས་ཀྱིས་ཡོངས་སུ་ཕྱུག་ཅིང་། མདོ་རྒྱུད་དུ་མ་ནས་རྒྱལ་བའི་ལུང་གིས་ཡང་ཡང་ཟིན་པའི་ཆེ་བ་དང་ལྡན་ཚུལ་ནི། ཀུན་སྤངས་ཆོས་གྲགས་དཔལ་ (1283-1363) གྱིས་མཛད་པའི་ཀུན་མཁྱེན་ཇོ་ནང་པ་ཆེན་པོའི་སྐྱེས་རབས་རྟོགས་བརྗོད་འཕགས་པ་ཀླུ་སྒྲུབ་ཏུ་སྐྱེས་པའི་རབས་ལས[1]།