གསུང་འབུམ་དཀར་ཆག

ཉ༽ སློབ་དཔོན་ཆོས་གྲགས་ཀྱི་གསུང་བཟང་མ་རྙེད་པ།   དེ་ཡང་ཇོ་ནང་རྗེ་བཙུན་ཏཱ་ར་ནཱ་ཐས་ (1575-1634) མཛད་པའི་རྒྱ་གར་ཆོས་འབྱུང་ལས[1]། ༡༽ སློབ་དཔོན་འདིས་དཔལ་འཁོར་ལོ་སྡོམ་པའི་སྒྲུབ་ཐབས་གཅིག་ཀྱང་མཛད་ཡོད་གསུང་ཞིང༌། ༢༽ རྡོ་རྗེ་སེམས་དཔའི་སྒྲུབ་ཐབས་ལཱུ་ཡི་པས་མཛད་པར་གྲགས་པ་འདི་ཡང་སློབ་དཔོན་འདིས་མཛད་པ་ཡིན་གསུང༌། ཞེས་བྱུང་བ་ལྟར།

ཇ༽ རྒྱའི་སྐད་ནས་བོད་བསྒྱུར་ཞུ་བསྡད།   ༡༽ གུང་ལོ་ཙཱ་བ་མགོན་པོ་སྐྱབས་ཀྱིས་མཛད་པའི་རྒྱ་ནག་ཆོས་འབྱུང་ལས[1]། རྡོ་རྗེའི་མྱུང་བུ་ (སྙུང་བུ་མིན་ནམ་སྙམ།) ཞེས་བྱ་བའི་བསྟན་བཅོས་དཔལ་ལྡན་ཆོས་གྲགས་ཀྱིས་མཛད་པ་དྷ་རྨ་དེ་ཝའི་འགྱུར། (འདི་གཏན་ཚིགས་རྡོ་རྗེ་ཟེགས་མའམ་རྡོ་རྗེ་ཚེར་མ་ཡིན་མིན་བརྟག །བོད་ལ་མེད་གསུངས།)  ཞེས་དང་། ༢༽ དེ་བཞིན་གུང་ལོ་ཙཱ་བ་མགོན་པོ་སྐྱབས་ཀྱིས་མཛད་པའི་རྒྱ་ནག་ཆོས་འབྱུང་ལས[2]།

ཆ༽ ལེགས་སྦྱར་ནས་བོད་བསྒྱུར་ཞུ་བསྡད།   ༡༽ ལེགས་སྦྱར་ཐོག་ཡོད་ལ་བོད་འགྱུར་མེད་པའི་བརྡ་སྤྲོད་ཀྱི་གཞུང་། དཔལ་ལྡན་ཆོས་གྲགས་ཀྱིས་མཛད་པའི་སྒྲ་གཞུང་གཟུགས་ལ་འཇུག་པ་ཞེས་པ་མིང་གི་ལེའུའི་སྐོར་མཛད་ཚུལ་གསུངས་པ་དང་། གཞུང་དེ་ཉིད་དེང་སྐབས་ཡོད་ཚུལ་གསུངས་པ་ལྟར་གཟུགས་ལ་འཇུག་པའི་སྒྲ་གཞུང་དེ་ཉིད་ད་ལྟ་ལེགས་སྦྱར་དུ་བཞུགས་ཡོད་ཀྱང་། བོད་གངས་ཅན་པའི་སྐད་ཡིག་ཏུ་བསྒྱུར་རྒྱུར་ལུས་ཡོད་འདུག །

ཅ༽ ཆོས་ཀྱི་གྲགས་པའི་གསུང་གི་དོགས་དཔྱོད།   དེ་ཡང་སྡེ་དགེ་བསྟན་འགྱུར་དཀར་ཆག་ལས[1]། ཚད་མ་ཅེ་པ་ལ། རྟོག་གེ་ ༼མ་བྱུང༌།༽ རབ་ཏུ་བྱེད་པ་སྡེ་བདུན། ཞེས་སྡེ་དགེ་བསྟན་འགྱུར་དུ་མ་བྱུང་བར་གསུངས་མོད། འོན་ཀྱང་རབ་ཏུ་བྱེད་པ་སྡེ་བདུན་ནི། ཚད་མ་སྡེ་བདུན་ལ་ཟེར་བ་ནི། བུ་སྟོན་ཆོས་འབྱུང་ལས[2]། རབ་ཏུ་བྱེད་པ་སྡེ་བདུན་བརྩམས་ཏེ། མཇུག་ཏུ་རྣམ་འགྲེལ་གྱི་ལེའུ་དང་པོའི་རང་འགྲེལ་མཛད་དོ། །