ཏ༽ གྲུབ་ཆེན་གྱ་བཞིའི་རྣམ་ཐར་རྩོམ་སྒྱུར།

ཏ༽ གྲུབ་ཆེན་གྱ་བཞིའི་རྣམ་ཐར་རྩོམ་སྒྱུར།

 

གྲུབ་ཆེན་གྱ་བཞིའི་རྣམ་ཐར་མཛད་དུས་ཀྱི་རྒྱ་གར་སྤྱི་ཚོགས་དང་། ནང་བསྟན་གནས་བབ་ལ་མཚོན་ན། སྤྱིར་པཱ་ལའི་རྒྱལ་རབས་ཀྱི་ལོ་ངོ་ ༤༠༠ ལྷག་གི་དུས་ཡུན་ནི། རྒྱ་གར་གྱི་མངའ་ཁོངས་གཅིག་གྱུར་ནས་ལྷོ་བྱང་སོ་སོར་རྒྱལ་ཕྲན་དུ་མར་གྱུར་ཏེ། ནང་དུ་ཆོས་སྲིད་གཉིས་ཐད་དམག་འཁྲུག་རྒྱུན་མ་ཆད་པར་བྱུང་བ་དང་། ཕྱི་ནས་དུ་རུ་ཀའི་བཙན་འཛུལ་བྱུང་ནས་རྒྱ་གར་བྱང་ཕྱོགས་ཡོངས་རྫོགས་ཤོར་བའི་དུས་རིམ་ཡིན།

དུས་སྐབས་དེའི་ནང་བསྟན་གྱི་གནས་བབ་ནི། ཕྱི་ནང་གཉིས་ཀའི་རྒྱུ་རྐྱེན་གྱིས་ནང་བསྟན་ཉམས་པ་ནས་ནུབ་པར་གྱུར་ཚུལ་ལ་ནང་གི་རྐྱེན་བཞི་སྟེ། ༡ ཡུལ་གྱི་ཆ་ནས་རྒྱ་གར་ཤར་ཕྱོགས་དང་ཡུལ་དབུས་ཙམ་ལས་སྤེལ་མ་ནུས་པ་དང་། ༢ དུས་ཀྱི་ཆ་ནས་ནང་བསྟན་འཕེལ་རིམ་བཞི་ལས། སྔགས་ཀྱི་དུས་རིམ་ལ་སླེབས་པས་བསྟན་པ་སྤྱིའི་ཆ་ནས་ཉམས་པར་གྱུར་པ། ༣ གྲུབ་མཐའི་ཆ་ནས་ཐེག་པ་ཆེ་ཆུང་གི་བར་འགལ་བ་ཤིན་ཏུ་ཆེ་བ། ༤ ལྟ་སྤྱོད་ཀྱི་ཆ་ནས་ནང་པས་འཚེ་བ་ཆོས་སུ་མི་སྨྲ་བ་ཡིན་པས་རང་སྲུང་གི་ནུས་པ་ཤོར་བ་བཅས་སོ། །ཕྱིའི་རྒྱུ་གསུམ་ནི། ༡ ཕྱི་ལོའི་དུས་རབས་ ༡༡ པ་ནས་ ༡༢ པའི་ནང་དུ་པཱ་ལའི་རྒྱལ་རབས་ཀྱང་ཕྱོགས་མང་པོ་ནས་ཉམས་པས་རྒྱབ་རྟེན་ཞན་པ་དང་།
༢ ཧིན་རྡུའི་ཆོས་ལུགས་བསྐྱར་དར་བྱུང་སྟེ་ལྷོ་བྱང་ཀུན་ཏུ་རྒྱ་ཆེར་དར་བའི་སྐབས་ལ་ཁེལ་བས་ནང་བསྟན་ཉམས་པར་གྱུར་པ། ༣ ཏུ་རུ་ཀའི་དམག་གིས་ཁ་ཆེའི་ཆོས་ལུགས་ལ་བཙན་སྒྱུར་བྱས་པས་ནང་བསྟན་ནུབ་པར་གྱུར་པ་བཅས་སོ།།

གྲུབ་ཆེན་གྱ་བཞིའི་རྣམ་ཐར་བསྒྱུར་དུས་ཀྱི་བོད་ཀྱི་སྤྱི་ཚོགས་དང་ནང་བསྟན་གནས་བབ་ནི། བོད་ལ་མཚོན་ན། ཕྱི་ལོའི་དུས་རབས་ ༡༡ པ་ནས་ ༡༢ པའི་བར་ནི་ཏག་ཏག་བསྟན་པ་ཕྱི་དར་གྱི་དུས་འགོར་ཁེལ་ཡོད། ཆབ་སྲིད་ནི་གཅིག་གྱུར་ནས་སིལ་བུར་ཐོར་ཀྱང་། ཤེས་རིག་ནི་གཅིག་གྱུར་གྱི་སྐབས་ལས་ཀྱང་བླ་ལྷག་ཏུ་དར་བའི་དུས་ཡིན། དེ་ཡང་། ༡ ཐོག་མར་འདུལ་བསྟན་སླར་གསོ་ནས་རིམ་གྱིས་འཆད་ཉན་ཚུགས་པ་དང་། ༢ དང་ཐོག་ལྷ་ཁང་བཞེངས་པ་ནས་ཕྱིས་སུ་དགོན་སྡེ་གསར་འདེབས་དང་། ༣ དང་ཐོག་ལོ་ཙཱ་སློབ་པ་ནས་ཕྱིས་སུ་སློབ་ཚོགས་སྐྱོང་བ་དང་། ༤ དང་ཐོག་ཆོས་རྒྱུན་སྤེལ་བ་ནས་རིམ་གྱིས་གྲུབ་མཐའ་འཛུགས་པ་དང་། ༥ དང་ཐོག་དགོན་པ་སྐྱོང་བ་ནས་རིམ་གྱིས་ཆོས་སྲིད་ཟུང་འབྲེལ་ལ་ཕྱོགས་པར་གྱུར་པ་ལྟ་བུས་མཚོན་ནོ།།

མདོར་ན། ༡ བོད་ཀྱི་ལོ་རྒྱུས་ལས་ཤེས་རིག་བསྐྱར་སྐྲུན་གྱི་དུས་རིམ་ཡིན། བན་བོན་གཉིས་ཀྱིས་གནས་གཞི་གསར་འདེབས་དང་། མི་སྣ་གསོ་སྐྱོང་། གཞུང་ལུགས་འཐུས་ཚང་དུ་བཏང་སྟེ་བསྟན་པ་སླར་གསོ་བྱས་པ་དང་། ༢ གཉིས་ནས་བོད་བརྒྱུད་ནང་བསྟན་གྱི་མ་ལག་འགྲུབ་པའི་དུས་རིམ་ཡིན། (དགེ་ལུགས་མ་གཏོགས་པའི་གྲུབ་མཐའ་གཞན་རྣམས་བྱུང་།) ༣ གསུམ་ནས་སྤྱི་ཚོགས་ལམ་ལུགས་ཀྱི་ཁ་ཕྱོགས་འགྱུར་བའི་དུས་རིམ་ཡིན། (བཙན་པོའི་སྐབས་སུ་སྤྱི་ཚོགས་ཧྲིལ་པོ་གཙོ་བོ་ཆབ་སྲིད་ལ་བློ་ཕྱོགས་པ་ནས་ཕྱི་དར་གྱི་སྐབས་སུ་གཙོ་བོ་ཆོས་ལུགས་ལ་བློ་ཕྱོགས་པར་གྱུར་པ་སྟེ། བཙན་པོའི་དམག་དོན་རྒྱལ་ཁབ་ཅེས་པ་ནས་བོད་གངས་ཅན་ཆོས་ལྡན་ཞིང་ཁམས་ཞེས་པར་གྱུར་ཅིང་། ཆོས་སྲིད་ཟུང་འབྲེལ་གྱི་མྱུ་གུ་ཡང་དུས་འདི་ནས་འབུས་ཏེ་ཕྱིས་མི་ལོ་ ༧༠༠ ཙམ་གྱི་རིང་དུ་གནས་པར་གྱུར།) དེ་གསུམ་ལས་ཀྱང་དུས་རབས་ཀྱི་ཁྱད་ཆོས་མངོན་པར་མཚོན་ནུས་པ་ནི་ཕྱི་མ་གཉིས་ཡིན་ནོ།།^[1]  །།

(https://atworldsorigins.com/2022/07/03/ajanta-caves-information-travel-guide-forest-hiking-path-must-see-caves-and-how-to-get-there/)

 

དཔྱད་གཞིའི་ལུང་ཁུངས་ཡིག་ཆ།

^[1] མཚོ་སྔོན་མི་རིགས་སློབ་ཆེན་བོད་རིག་པའི་སློབ་གླིང་། འགྱུར་མེད་རྡོ་རྗེ། ༢༠༢༠ ལོའི་སྤྱི་ཟླ་ ༥ པའི་ཚེས་ ༨ ཉིན།

 

ཡོང་ཁུངས། པཎ་གྲུབ་བཅུ་བདུན་གྱི་རྣམ་ཐར་དང་འབྲེལ་བའི་དཔྱད་རྩོམ་ལུང་རིགས་མཛེས་རྒྱན།། ༼ཇ༽ རྩོམ་པ་པོ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༡༩༣ ནས་ ༡༩༥ བར་གསལ་བ་ལས་བཏུས་པའོ།།