པཎ་གྲུབ་བསྟོད་ཚོགས།

༄༅། །འཛམ་གླིང་རྒྱན་དྲུག་གི་བསྟོད་པ་ཐར་པའི་ཐེམ་སྐས་ཞེས་བྱ་བ།[1] ༼རོང་སྟོན་ཤཱཀྱ་རྒྱལ་མཚན་ (1367-1449) གྱིས་མཛད་པ།༽ བླ་མ་དང་ལྷག་པའི་ལྷ་ལ་ཕྱག་འཚལ་ལོ། །ཡང་དག་ལྟ་བའི་ཟེར་གྱིས་སྲིད་པའི་མུན་པ་འཇོམས། །རིག་པའི་ང་རོས་ལོག་སྨྲའི་རི་དྭགས་སྐྲག་པར་མཛད། །འཛམ་གླིང་མཁས་པ་ཀུན་གྱི་གཙུག་གི་རྒྱན་གྱུར་པ། །སྨྲ་བའི་ཉི་མ་ཀླུ་སྒྲུབ་ཞབས་ཀྱི་པདྨོར་འདུད། །ཟབ་མོའི་དོན་རྟོགས་ཡང་དག་རིག་པ་ཡིས། །ལོག་ལྟ་ཟློག་ནས་ཡང་དག་ལྟ་བ་ལ། །ཕ་རོལ་འགོད་མཛད་འཕྲིན་ལས་རྨད་བྱུང་བ། །འཕགས་པ་ལྷ་ཞེས་གྲགས་པ་ལ་ཕྱག་འཚལ། །

༄༅། །རྒྱན་དྲུག་མཆོག་གཉིས་ལ་ཕྱག་འཚལ་བ།[1] ༼རྗེ་ཙོང་ཁ་པ་བློ་བཟང་གྲགས་པས་ (1357-1419) མཛད་པ།༽   མཐའ་བྲལ་ལྟ་བས་ཆོས་ཀུན་སྟོང་པར་གཟིགས། །ཡང་དག་རིགས་པས་རྒོལ་ངན་དྲེགས་པ་འཇོམས། །དམིགས་མེད་ཐུགས་རྗེས་འགྲོ་ལ་བུ་ལྟར་བརྩེ། །འཕགས་མཆོག་ཀླུ་སྒྲུབ་ཡབ་སྲས་ལ་ཕྱག་འཚལ། །རྣམ་བཀྲའི་གཟུགས་ལ་མིག་གིས་ལྟ་བ་བཞིན། །རྣམ་མང་རྒྱལ་བའི་གསུང་རབ་ཇི་སྙེད་ལ། །རྣམ་དག་མཁྱེན་པ་ཐོགས་པ་མེད་འཇུག་པ། །ཐོགས་མེད་སྐུ་མཆེད་ཞབས་ལ་ཕྱག་འཚལ་ལོ། །གནས་གསུམ་གཞལ་བྱའི་དེ་ཉིད་མ་ལུས་པ། །

༄༅། །རེད་མདའ་བས་མཛད་པའི་བསྟོད་ཚོགས།[1] ༼རེད་མདའ་བ་གཞོན་ནུ་བློ་གྲོས་ (1349-1412) ཀྱིས་མཛད་པ།༽   ཁམས་གསུམ་ཆབ་སྲིད་སྐྱོང་བའི་རྒྱལ་ཐབས་མཁས། །བདེ་བཤེགས་སྲས་ཀྱི་གཙོ་བོར་དབང་བསྐུར་བརྙེས། །སྲིད་དང་ཞི་བའི་དགྲ་ལས་རྣམ་རྒྱལ་བ། །མི་ཕམ་མགོན་པོའི་ཞབས་ལ་རྟག་ཕྱག་འཚལ། །ཤེས་རབ་ (མངོན་བཏུས་ཀྱི་རྣམ་བཤད་དུའོ། །) ཆེན་པོས་སྲིད་པའི་ཕ་མཐར་སོན། །སྙིང་རྗེ་ཆེན་པོས་ཞི་བའི་མཐའ་ལས་བརྒལ། །སྲིད་དང་ཞི་བའི་དགྲ་ལས་རྣམ་རྒྱལ་བའི། །མི་ཕམ་རྒྱལ་བའི་སྲས་ལ་བདག་ཕྱག་འཚལ། །བྱམས་(ཡུམ་གྱི་རྣམ་བཤད་དུ་འབྱུང་བའོ།།)པའི་ཆུ་བོ་སྙིང་རྗེའི་རྩ་བ་ཅན། །དགའ་བའི་མེ་ཏོག་བཏང་སྙོམས་ཟེའུ་འབྲུས་མཛེས། །རྩོལ་མེད་འཕྲིན་ལས་བཟང་པོའི་དྲི་བསུང་ཅན། །མི་ཕམ་ཡང་དག་ཞུགས་པ་བདག་ལ་སྩོལ། །

༄༅། །འཛམ་གླིང་མཁས་པའི་རྒྱན་དྲུག་ལ་བསྟོད་པ།[1] ༼རྗེ་བཙུན་རེད་མདའ་བ་གཞོན་ནུ་བློ་གྲོས་ (1349-1412) ཀྱིས་མཛད་པ།༽   ན་མོ་ལོ་ཀེ་ཤྭ་ར་ཡ། མཁའ་མཉམ་འགྲོ་ལ་མཁྱེན་བརྩེས་རབ་དགོངས་ནས། །[2]གྲངས་མེད་གསུམ་དུ་ཚོགས་གཉིས་རབ་རྫོགས་ཏེ། །སྟོང་གསུམ་མི་མཇེད་ཞིང་གི་དཔལ་གྱུར་པ། །འདྲེན་མཆོག་ཤཱཀྱའི་ཏོག་ལ་ཕྱག་འཚལ་ལོ། ། ཤེས་རབ་ཆེན་པོས་དེ་ཉིད་ལེགས་རྟོགས་ཤིང་། །བརྩོན་པ་ཆེན་པོས་གོ་འཕང་མཆོག་བརྙེས་པས། །བསྟན་པ་འདི་ལ་སྟོན་པ་གཉིས་པར་གྱུར། །འཕགས་མཆོག་ཀླུ་སྒྲུབ་ཞབས་ལ་ཕྱག་འཚལ་ལོ། །དེ་སྲས་ཐུ་བོ་དགེ་ལེགས་དཔལ་ཡོན་ཅན། །