པཎ་གྲུབ་བསྟོད་ཚོགས།

༄༅། །མཉམ་མེད་ཤཱཀྱའི་རྒྱལ་པོ་དང་འཛམ་གླིང་མཛེས་ བྱེད་རྒྱན་དྲུག་མཆོག་གཉིས་ཀྱི་རྟོགས་པ་བརྗོད་ པ་ལྷའི་དཔག་བསམ་ལྗོན་ཤིང་ཞེས་ བྱ་བ་བཞུགས་ སོ།།[1] ༼རྒྱལ་མཁན་པོ་གྲགས་པ་རྒྱལ་མཚན་ (1762-1835/1837) གྱིས་མཛད་པ།༽   གང་གིས་བསམ་དང་སྦྱོར་བས་ཚུལ་བཞིན་དུ། །རྩེ་གཅིག་དད་པས་གཙུག་ཏུ་ཉེར་བསྟེན་ན། །ཚེ་འདིར་སངས་རྒྱས་སྟེར་བའི་བཀའ་དྲིན་ཅན། །མཚུངས་མེད་བླ་མའི་ཞབས་ལ་སྙིང་ནས་འདུད། །བསོད་ནམས་ཡེ་ཤེས་གཏིང་མཐའ་མི་མངོན་ཞིང་། །སྤངས་རྟོགས་ཡོན་ཏན་ནོར་བུའི་ཚོགས་ཀྱིས་གང་། །རྒྱ་ཆེན་འཕྲིན་ལས་རླབས་འཕྲེང་གཡོ་བ་ཡི། །ཐུབ་དབང་རིན་ཆེན་འབྱུང་གནས་ལ་ཕྱག་འཚལ། །

༄༅། །འཛམ་གླིང་མཛེས་བྱེད་རྒྱན་དྲུག་མཆོག་གཉིས་ཀྱི་བསྟོད་པ།[1] ༼དཀོན་མཆོག་འཇིགས་མེད་དབང་པོས་ (1728-1791) མཛད་པ།༽ བསྐལ་བཟང་རྣམ་འདྲེན་གཞན་གྱིས་ཡོངས་སྤངས་པའི། །གདུལ་དཀའི་ཞིང་འདི་བཟུང་ཚེ་མགོན་པོ་ཁྱོད། །རྒྱལ་བ་ཀུན་གྱིས་པད་དཀར་ལྟར་བསྔགས་པ། །བཅོམ་ལྡན་ཤཱཀྱ་སེངྒེར་གུས་པས་འདུད། །མཁས་པའི་མཐར་སོན་ཤེར་ཕྱིན་སྤྱན་དྲངས་ཏེ། །དབུ་མའི་སྲོལ་ཕྱེ་ཆོས་སྒྲ་གསུམ་བསྒྲགས་པས། །འཛམ་གླིང་འདི་ན་སངས་རྒྱས་གཉིས་པར་གྲགས། །འཕགས་མཆོག་ཀླུ་སྒྲུབ་ཞབས་ལ་ཕྱག་འཚལ་ལོ། །

༄༅། །རྒྱན་དྲུག་མཆོག་གཉིས་ལ་བསྔགས་པ།[1] ༼བཙུན་པ་དཀོན་མཆོག་འཇིགས་མེད་དབང་པོས་ (1728-1791) མཛད་པ།༽   དཔལ་ལྡན་ཚོགས་གཉིས་རིན་ཆེན་ཁམས་ལས་གྲུབ། །ལྷུན་གྲུབ་སྐུ་བཞིའི་བང་རིམ་མངོན་པར་བཀྲ། །རྒྱལ་སྲས་གསེར་རིའི་དབུས་ན་ལྷང་ངེ་བ། །རྣམ་འདྲེན་ཤཱཀྱ་སེང་གེར་གུས་ཕྱག་འཚལ། །ཐེག་མཆོག་བསྟན་པ་རྒྱ་མཚོའི་མཐར་སོན་ཏེ། །ཤེར་ཕྱིན་སྤྱན་དྲངས་དབུ་མའི་སྲོལ་ཕྱེ་ཤིང་། །ཆོས་གྲྭ་ཆེན་པོའི་རྒོལ་བ་ཀུན་འཇོམས་པ། །ཀླུ་སྒྲུབ་ཀླུ་ཡི་དབང་པོར་ཕྱག་འཚལ་ལོ། །ཆུ་སྐྱེས་དབུས་འཁྲུངས་རིག་པའི་གནས་ཀུན་ལ། །སྤོབས་པ་མཆོག་བརྙེས་མུ་སྟེགས་རྒོལ་བ་ཀུན། །ཡང་དག་ལྟ་བའི་ལམ་དུ་འཇུག་མཛད་པ། །ཨཱརྱ་དེ་བའི་ཞབས་ལ་ཕྱག་འཚལ་ལོ། །

༄༅། །འཛམ་གླིང་མཛེས་བྱེད་རྒྱན་དྲུག་མཆོག་གཉིས་ལ་གསོལ་འདེབས་ཕན་བདེའི་དཔག་བསམ་ལྗོན་པ་ཞེས་བྱ་བ། ༼དཀོན་མཆོག་འཇིགས་མེད་དབང་པོས་ (1728-1791) མཛད་པ།[1]༽   ན་མོ་གུ་རུ་མུ་ནེ་ཨིནྡྲ་ཡ། ཚོགས་གཉིས་ཡོངས་སྨིན་རིན་ཆེན་གསེར་སྒོང་ལས། །ཉེར་འཁྲུངས་སྐུ་བཞིའི་ཞལ་བཟང་ཆེར་འཛུམ་ཞིང་། །འཕྲིན་ལས་འོད་སྟོང་ལྡན་པའི་སྟེང་གནས་པ། །ཐུབ་དབང་མི་མཇེད་བདག་པོས་དགེ་ལེགས་སྩོལ། །ཟབ་རྒྱས་དབུ་མའི་སྤྲིན་གྱི་གླང་པོར་ཞོན། །ཕྲ་ཞིབ་རིགས་ཚོགས་རྡོ་རྗེ་རྩེ་བརྒྱ་པས། །ལོག་འཁྲུལ་དྲ་བའི་རི་རྐང་གཅོག་མཛད་པ། །ཀླུ་སྒྲུབ་ཚིག་མདའི་གཙོ་བོར་གསོལ་བ་འདེབས། །