པཎ་གྲུབ་བསྟོད་ཚོགས།

༄༅། །སྐུ་ཞབས་དྲུང་ཡིག་ཆེན་མོ་ཆོས་དར་ལགས་ནས་བཞེངས་པའི་སྟོན་པ་དང་རྒྱན་དྲུག་མཆོག་གཉིས་ཀྱི་སྐུ་ཐང་གི་ཞལ་བྱང་དུ་གནང་བ།[1] ༼རྡོ་སྦིས་དགེ་བཤེས་ཤེས་རབ་རྒྱ་མཚོ་ (1884-1968) མཛད་པ།༽   ཇོ་ནང་ཏཱ་ར་ནཱ་ཐས་རྒྱན་དྲུག་མ་གཏོགས་མཆོག་གཉིས་བོད་ཀྱི་རང་བཟོ་ཡིན་པར་བཤད་ཀྱང་རྗེ་རེད་མདའ་བ་སོགས་མཁས་པ་སྤྱིས་བཞེད་པ་མཁའ་མཉམ་མ་ལྟར་སྐུ་ཐང་དགུའི་མཚན་བྱང་བྱ་དཀའི་སྒྲ་རྒྱན་མཐའ་ཐོག་ཟུང་ལྡན་དུ་བསྒྲིགས་པ་ལས་སྟོན་པ་ལ། གཽ་ཏམ་རིགས་ལས་ཟས་གཙང་སྲས་སུ་བྱོན། །བྱོན་དང་འབྱོན་འགྱུར་རྣམ་འདྲེན་སྟོང་གི་གཙོ། །གཙོ་བོར་མི་མཇེད་ཞིང་འདི་འདུལ་བའི་མགོན། །མགོན་པོ་འགྲོ་བའི་རེ་སྐོང་ཤཱཀྱའི་ཏོག །

༄༅། །འཛམ་གླིང་མཛེས་བྱེད་རྒྱན་དྲུག་མཆོག་གཉིས་སོགས་འཕགས་བོད་ཀྱི་པཎ་གྲུབ་ཆེན་པོ་འགའ་ཞིག་ལ་གསོལ་བ་འདེབས་པའི་རིམ་པར་ཕྱེ་བ་ཕུལ་བྱུང་དོན་ལྡན་ཞེས་བྱ་བ་བཞུགས་སོ།།[1] ༼པཎ་ཆེན་སྐུ་ཕྲེང་དགུ་པ་བློ་བཟང་ཐུབ་བསྟན་ཆོས་ཀྱི་ཉི་མས་ (1883-1937)  མཛད་པ།༽   བགྲང་ཡས་བསྐལ་པར་ཚོགས་ཟུང་ས་བོན་རྩལ། །རླབས་ཆེན་སྤྱོད་མཆོག་དྲོད་གཤེར་གྱིས་བསྐྱངས་པས། །སྐུ་གསུམ་འབྲས་བཟང་གཡུར་དུ་ལེགས་སྨིན་པ། །ཐུབ་དབང་ལྷ་ཡི་བླ་མར་གསོལ་བ་འདེབས། །རྟེན་འབྱུང་མཐའ་བྲལ་ཟབ་དོན་ཐུགས་ཆུད་པས། །དབང་ཕྱུག་བརྒྱད་མཐར་སོན་ཅིང་མདོ་སྔགས་གཞུང་། །འཆད་ལ་རྒྱལ་བ་གཉིས་པར་རབ་གྲགས་པ། །འཕགས་མཆོག་ཀླུ་སྒྲུབ་ཞབས་ལ་གསོལ་བ་འདེབས། །

༄༅། །གསུང་རྩོམ་རྒྱན་དྲུག་མཆོག་གཉིས་ལ་སྦྱར་རྒྱུ།[1] ༼སྟག་བྲག་པཎྜི་ཏ་ངག་དབང་གསུང་རབ་མཐུ་སྟོབས་ (1874-1952) མཆོག་གིས་མཛད།༽   དང་པོར་རྙེད་དཀའ་བྱང་ཆུབ་མཆོག་སེམས་བསྐྱེད། །བར་དུ་དཔྱད་དཀའ་རླབས་ཆེན་ཚོགས་གཉིས་བསགས། །ཐ་མར་ཐོབ་དཀའ་སྐུ་གསུམ་གོ་འཕང་བརྙེས། །མཉམ་མེད་ཤཱཀྱ་སེངྒེར་མགོས་ཕྱག་འཚལ། །ཐུབ་པའི་བསྟན་ལ་ཐུབ་དབང་གཉིས་པ་ལྟར། །ཟླ་མེད་ཆོས་ཀྱི་སྒྲ་ཆེན་ལན་གསུམ་བསྒྲགས། །སྨྲ་ངན་དྲུངས་འབྱིན་ཐར་པའི་ལམ་སྟོན་པའི། །ཐེག་ཆེན་བསྟན་པའི་སྲོལ་འཛིན་ཀླུ་སྒྲུབ་ཞབས། །ཕུལ་བྱུང་བདག་གཞན་མཉམ་བརྗེས་ཐུགས་བརྒྱུད་ཕྱུག །ལྟ་ངན་ལོག་པའི་ལམ་བཞུགས་མུ་སྟེགས་ཅན། །རྣམ་དག་ཐར་པའི་ལམ་དུ་དཀྲི་མཁས་པ། །ས་བརྒྱད་བསྣོན་པ་ཨཱརྱ་དེ་བའི་ཞབས། །

༄༅། །བསྟན་པའི་མངའ་བདག་རྣམས་ལ་བསྟོད་ཅིང་གསོལ་བ་གདབ་ཚུལ་ཛམྦུ་ནཱ་དའི་ཕྲེང་མཛེས་ཞེས་བྱ་བ་བཞུགས་སོ།།[1] ༼ སོག་པོ་བློ་བཟང་རྟ་མགྲིན་གྱིས་ (1867-1937) མཛད་པ།༽   མཁའ་མཉམ་འགྲོ་ལ་མཁྱེན་བརྩེས་རབ་དགོངས་ནས། །གྲངས་མེད་གསུམ་དུ་ཚོགས་གཉིས་རབ་རྫོགས་ཤིང་། །སྟོང་གསུམ་མི་མཇེད་ཞིང་གི་དཔལ་གྱུར་པ། །འདྲེན་མཆོག་ཤཱཀྱའི་ཏོག་ལ་ཕྱག་འཚལ་ལོ། །ཟླ་མེད་སྟོན་པ་དེ་ཡི་སྲས་ཀྱི་མཆོག །རྒྱལ་བའི་མཛད་པ་ཀུན་གྱི་ཁུར་བསྣམས་ནས། །གྲངས་མེད་ཞིང་སྤྲུལ་པའི་རྣམ་རོལ་པ། །མི་ཕམ་འཇམ་པའི་དབྱངས་ལ་ཕྱག་འཚལ་ལོ། །མཐའ་བྲལ་ལྟ་བས་ཆོས་ཀུན་སྟོང་པར་གཟིགས། །