01 ཀླུ་སྒྲུབ་ཀྱི་གསུང་འབུམ་དཀར་ཆག

ཐ༽ ཀླུ་སྒྲུབ་ཀྱིས་མཛད་པའི་དངོས་གྲུབ་འབྱུང་བ་སོགས།   དེ་ཡང་༸རྒྱལ་དབང་ལྔ་པ་ཆེན་པོ་ངག་དབང་བློ་བཟང་རྒྱ་མཚོའི་ (1617-1682) གསུང་དམ་པའི་ཆོས་ཀྱི་གསན་ཡིག་གངྒཱའི་ཆུ་རྒྱུན་ལས[1]། བླ་ཆེན་དང་བ་རི་ཐུན་མོང་ནས་བརྒྱུད་པ་ཀླུ་སྒྲུབ་ཀྱིས་མཛད་པའི་དངོས་གྲུབ་འབྱུང་བ། ཞེས་གསལ་ཞིང་། དེ་བཞིན་དཔེ་ཝར་མཆོག་སྤྲུལ་འཇམ་དབྱངས་བསོད་ནམས་དབང་པོའི་གསན་ཡིག་འདོད་རྒུའི་བང་མཛོད་ལས་ཀྱང་[2]། གཅིག་མཚུངས་སུ་བྱུང་བ་ལྟར། མགོན་པོ་ཀླུ་སྒྲུབ་ཀྱིས་མཛད་པའི་དངོས་གྲུབ་འབྱུང་བ་ཞེས་པའི་བསྟན་བཅོས་དེ་ཉིད་ཀྱི་དབང་ལུང་ཁྲིད་གསུམ་གྱི་རྒྱུན་ཡང་ཡོད་པར་གསུངས་སོ།།

ཏ༽ བྱ་རོག་མ་བསྟན་བསྲུང་གི་སྐོར་གྱི་ཆོས་ཚན་མ་རྙེད་པ།   དེ་ཡང་ཀུན་མཁྱེན་པདྨ་དཀར་པོས་ (1527-1592) མཛད་པའི་བྱ་རོག་མ་བསྟན་བསྲུང་གི་སྐོར་གྱི་ཆོས་ཚན་ཐོ་ཡིག་གསེར་གྱི་ཐུར་མ་ལས[1]། ༡) ནག་པོ་ཆེན་པོ་བྱ་རོག་ཅན་གྱི་ཕྱག་བཞི་པའི་སྒྲུབ་ཐབས་ཞེས་བྱ་བ་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་འདི་མགོན་པོའི་མན་ངག་ཐམས་ཅད་ཀྱི་ཐོག་མར་བྱུང་བའི་ཡི་གེ་ཡིན། ཞེས་དང་། དེ་ཉིད་ལས[2]། ༢) སྒྲོལ་བྱེད་མ་གསུམ་གྱི་སྒེར་སྒྲུབ་ཀྱི་གཞུང་གསུམ་ཀླུ་སྒྲུབ་ཀྱིས་མཛད་པ།

ཉ༽ གསུང་བཟང་མ་རྙེད་པའི་རིགས།   ༡༽ བྱང་ཆུབ་ཀྱི་སེམས་འཛིན་པ་དང་བྲལ་བ། ༢༽ ཐེག་ཆེན་ཉི་ཤུ་པ། ༣༽ ཚིགས་སུ་བཅད་པ་དྲུག་ཅུ་པ།   གུང་ལོ་ཙཱ་བ་མགོན་པོ་སྐྱབས་ཀྱིས་མཛད་པའི་རྒྱ་ནག་ཆོས་འབྱུང་ལས[1]། ཀ་མ་ལ་ཤཱི་ལས་མཛད་པའི་བྱང་ཆུབ་སེམས་འགྲེལ་བམ་བཞི་སློབ་དཔོན་བཤད་མ་ཐག་ (སྦྱིན་སྲུང་) པའི་འགྱུར། ༡༽ བྱང་ཆུབ་ཀྱི་སེམས་འཛིན་པ་དང་བྲལ་བ་ཞེས་བྱ་བ་ཀླུ་སྒྲུབ་ཀྱིས་མཛད་པ་འགྱུར་གོང་དང་འདྲ། ༢༽ དེས་མཛད་པའི་ཐེག་ཆེན་ཉི་ཤུ་པ་འགྱུར་གོང་འདྲ།

༢༽ རྒྱའི་སྐད་ནས་བོད་བསྒྱུར་ཞུ་རྒྱུ།   དེ་ཡང་རྒྱ་ནག་གི་སྐད་ཡིག་ཐོག་བཞུགས་ཀྱང་བོད་ཡིག་ཏུ་མ་བསྒྱུར་བའི་དཔལ་མགོན་འཕགས་པ་ཀླུ་སྒྲུབ་ཞབས་ཀྱི་གསུང་གི་རིགས་ནི། ༡༽ གུང་ལོ་ཙཱ་བ་མགོན་པོ་སྐྱབས་ (དུས་རབས་18པ།) ཀྱིས་མཛད་པའི་རྒྱ་ནག་ཆོས་འབྱུང་ལས[1]། ཤེས་རབ་ཀྱི་ཕ་རོལ་ཏུ་ཕྱིན་པའི་རྒྱ་ཆེར་འགྲེལ་བ་བམ་པོ་བརྒྱ་པ་མགོན་པོ་ཀླུ་སྒྲུབ་ཀྱིས་མཛད་པ་རིག་འཛིན་ཀུ་མཱ་ར་ཤྲཱིའི་ (ཕྱི་ལོ་ ༤༠༥ ལོར་ལོ་ཙཱ་བ་གཞོན་ནུ་སྲོག་གིས་བསྒྱུར་བ།) འགྱུར།