སྨོན་ལམ་འཁོར་མཚོ་མའི་པར་བྱང་སྨོན་ཚིག

སྨོན་ལམ་འཁོར་མཚོ་མའི་པར་བྱང་སྨོན་ཚིག

 

དུང་དཀར་བློ་བཟང་འཕྲིན་ལས་ཀྱི་གསུང་འབུམ་པོད་ ༼ག༽ ལས[1]། དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་སྨོན་ལམ་འཁོར་མཚོ་མ་སོགས་སྔོན་བྱོན་དམ་པའི་ཞལ་གདམས་ཕྱོགས་བསྡུས་ཀྱི་དཔར་བྱང་།

སྨྲས་པ་ཐེག་མཆོག་ལམ་གྱི་སྙིང་པོ་བྱང་ཆུབ་སེམས། །

ཚེ་གཅིག་ཉམས་ལེན་སྟོབས་ལྔར་སྒྲིལ་བ་སྟེ། །

དེ་ཡི་སྔོན་འགྲོར་སྟོབས་བཞིའི་བཤགས་བསྡོམས་དང་། །

ཆོས་བརྒྱད་མགོ་སྙོམས་གཅེས་འཛིན་འདུལ་བ་མཆོག །

ཆོས་ལྟར་སྣང་ཡང་ཆོས་སུ་མ་སོང་བའི། །

འཁྲུལ་པ་སེལ་ནས་བློ་སྣ་ཆོས་ཕྱོགས་སུ། །

སྒྱུར་བྱེད་སྔོན་བྱོན་དམ་པའི་ཞལ་གྱི་མགུར། །

དེང་གི་དུས་ཀྱང་གྲོས་འདེབས་བསླབ་བྱའི་མཆོག །

ཟུང་འཇུག་སྐུ་བརྙེས་འཕགས་མཆོག་ཀླུ་སྒྲུབ་ཀྱིས། །

བདག་འདྲའི་སྙིགས་དུས་ཆོས་བྱེད་སྐལ་ལྡན་ལ། །

སྨོན་ལམ་ཚུལ་དུ་གདམས་པའི་བཀའ་སློབ་འདི། །

སྙིང་ལ་བཅངས་ན་དལ་འབྱོར་དོན་ལྡན་འབྱུང་། །

ལྔ་བདོའི་འགྲོ་བ་སྤྱི་དང་ཆོས་བྱེད་ཀྱི། །

སྐྱེ་བོ་ཡོངས་ལ་དམ་ཚིག་ཉམས་ཆགས་ལས། །

བྱུང་བའི་མི་གཙང་ཉེས་ཚོགས་ཅི་མཆིས་ཀུན། །

རྣམ་འཇོམས་ཡུལ་ཁྲུས་ལེགས་ཚོགས་སྤེལ་བར་སྨན། །

ཡུལ་སྡེ་འཁྲུགས་དང་ལས་འབྲས་སྙོག་པ་ཡིས། །

མཆོག་གསུམ་རྟེན་གྱི་རབ་གནས་ཉམས་པ་ཀུན། །

ལྷ་སྔགས་ཏིང་འཛིན་ཆོ་ག་ཚང་བ་ཡིས། །

རབ་གནས་ཡང་ཡང་བསྐྱར་བར་དམ་པས་གསུངས། །

དེ་སླད་འཇིག་རྟེན་གསུམ་མགོན་ཐ་མལ་ངོར། །

སྣང་བརྙན་ཚུལ་དུ་ཟློས་པའི་སྤྱན་སྔ་རུ། །

སྲི་ཞུར་ལེགས་བརྩོན་མདོ་སྔགས་རིམ་གཉིས་ལམ། །

མོས་ལྡན་ཆོས་དར་ཞེས་བྱས་ལྷག་བསམ་གྱིས། །

འཛད་མེད་ཆོས་སྦྱིན་དཔར་དུ་དྲངས་པའི་དགེས། །

བསྟན་འཛིན་ཞབས་བརྟན་དགེ་འདུན་ཆོས་སྤྱོད་འཕེལ། །

འཇིག་རྟེན་བདེ་ཞིང་འགྲོ་ཀུན་བླང་དོར་མིག །

རབ་གསལ་ཀུན་མཁྱེན་གོ་འཕང་མྱུར་ཐོབ་ཤོག །

ཅེས་པ་འདི་ཡང་དེང་དུས་ཆོས་བྱེད་ཡོངས་ལ་བླང་དོར་གསལ་པོར་སྟོན་པའི་ཞལ་གདམས་གཅེས་བསྡུས་འགའ་ཞིག་དང་། རྣམ་འཇོམས་བུམ་སྒྲུབ་རབ་གནས་རྟ་ཐོག་མ་བཅས་ཆོས་སྦྱིན་དཔར་དུ་བསྐྲུན་པར་མཛད་པ་པོ། འཕགས་མཆོག་འཇིག་རྟེན་དབང་ཕྱུག་གངས་ལྗོངས་སྐྱེ་འགྲོའི་བསོད་ནམས་ཀྱི་ཞིང་དུ་སྣང་བརྙན་ཚུལ་བསྟན་ལྷ་ཁང་ཆེན་པོའི་སྐུ་གཉེར་སྲི་ཞུར་བརྩོན་ཞིང་། མདོ་སྔགས་ལམ་གྱི་རིམ་པར་རྒྱུན་གྱི་རྣལ་འབྱོར་ལ་གཞོལ་བ་བློ་བཟང་ཆོས་དར་ལགས་ནས་དཔར་བྱང་སྨོན་ཚིག་ཞིག་དགོས་ཞེས་བསྐུལ་མ་གནང་བ་ངོ་མ་བཟློག་ཙམ་དུ། སྙིགས་དུས་ཀྱི་ཆོས་གཟུགས་གྲལ་དུ་སྙེགས་པ་གཡས་འཁྱིལ་མིང་ཅན་ནས་བྲིས་པའོ།། །།

[1] གྲུབ་མཐའི་རྣམ་བཤད། མི་རིགས་དཔེ་སྐྲུན་ཁང་། ༢༠༠༧ ལོ། ཤོག་གྲངས་ ༧༥༣