དཔལ་ནཱ་ལེནྡྲ། བྱོན་པ་ལེགས།
དཔལ་མགོན་འཕགས་པ་ཀླུ་སྒྲུབ། རྒྱ་གར་ལྷོ་ཕྱོགས་བེདབྷའི་ཡུལ་དུ་ཡབ་ཏྲིག་ཏྲམ་དང་ཡུམ་བྲམ་ཟེ་མོ་ཤྲཱི་ཧི་དྷི་གཉིས་ཀྱི་སྲས་སུ་ཕྱི་ལོ་དུས་རབས་དང་པོའི་ཙམ་ནས་སྐུ་འཁྲུངས། དགུང་ལོ་བདུན་ནམ་ཉེར་ལྔ་ཙམ་ནས་སྒྲ་གཅན་འཛིན་བཟང་པོའི་མདུན་ནས་རབ་ཏུ་བྱུང༌། དགུང་ལོ་ཆུང་དུས་ནས་ཐུན་མོང་གི་རིག་གནས་རྣམས་བྱངས་ཆུབ་པར་བྱས། དེ་ནས་རྒྱ་གར་གྱི་ས་ཕྱོགས་གཞན་གང་སར་སློབ་གཉེར་དུ་ཕེབས་ཏེ་ཐེག་ཆེན་གྱི་ཆོས་ལ་མཁས་པར་གྱུར།
མཐར་དགུང་ལོ་བརྒྱ་ལྷག་སོན་སྐབས་གཞོན་ནུ་ནུས་ལྡན་ལ་དབུ་བྱིན་པས་སམ། ཐེག་དམན་གྱི་ཕྱོགས་འཛིན་མཁན་གྱིས་དུག་དྲངས་ནས་སྐུ་ཞི་བར་གཤེགས། སློབ་དཔོན་འདིས་གསུང་རྩོམ་མང་དུ་མཛད་ཅིང་གཞུང་ལུགས་སྟོང་ཕྲག་སྨྲ་བའི་དབང་པོར་གྲགས། འདི་པའི་གསུང་ལ་ཁོང་གིས་མཛད་པར་རྩོད་མེད་དུ་གྱུར་པ་ <<དབུ་མ་རྩ་བ་ཤེས་རབ།>>དང་། <<རིགས་པ་དྲུག་ཅུ་པ།>> <<སྟོང་ཉིད་བདུན་ཅུ་པ།>> <<རྩོད་ཟློག>> <<ཞིབ་མོ་རྣམ་འཐག>> <<རིན་ཆེན་ཕྲེད་བ།>> <<བཤེས་སྤྲིངས།>> < <བསྟོད་པ་བཞི།>> སོགས་ཡིན་ལ། སློབ་མའི་གཙོ་བོར། སྲས་ཀྱི་ཐུ་བོ་བཞི་དང༌། ཉེ་བའི་ཐུགས་སྲས་གསུམ་སོགས་ཡོད།
སློབ་དཔོན་འཕགས་པ་ལྷ། ཁོང་ནི་མགོན་པོ་ཀླུ་སྒྲུབ་ཀྱི་ཐུགས་སྲས་ཀུན་གྱི་གཙོ་བོ་ཞིག་ཡིན། དུས་རབས་དང་པོའི་སྨད་ཙམ་ནས་སིངྒ་ལའི་ཡུལ་དུ་སྐུ་འཁྲུངས། སྐུ་ཚེའི་སྨད་ནས་ཀླུ་སྒྲུབ་བླ་མར་བསྟེན་ནས་ཐེག་པ་ཆེན་པོའི་ཆོས་ལ་མཁས་པར་གྱུར། ཕྱི་རོལ་པ་ཚར་བཅད་པ་དང༌། བུ་སློབ་སྐྱོང་བ། ཐེག་ཆེན་གྱི་གཞུང་རྩོམ་པ་སོགས་བསྟན་པ་ལ་སྨན་པའི་ཕྱག་ལས་རྒྱ་ཆེར་སྤེལ། མཐར་སློབ་དཔོན་སྐུ་རྐྱང་དུ་སྒོམ་ལ་བཞུགས་སྐབས་ཤིག །ཕྱི་རོལ་པའི་གཞོན་ནུ་ཞིག་གིས་གྲི་བསྣུན་ནས་ཞི་བར་གཤེགས། སློབ་དཔོན་འདིའི་གསུང་རྩོམ་ནི། <<དབུ་མ་བཞི་བརྒྱ་པ་>> དང་། <<དབུ་མ་ལག་པའི་ཚད།>> <<གཏན་ཚིགས་གྲུབ་པ།>> <<ཡེ་ཤེས་སྙིང་པོ་ཀུན་ལས་བཏུས།>> <<སྤྱོད་བསྡུས་སྒྲོན་མེ།>> <<སེམས་ཀྱི་སྒྲིབ་སྦྱོང༌།>> <<རྡོ་རྗེ་གདན་བཞིའི་སྒྲུབ་ཐབས་>> སོགས་ཡོད།
སློབ་དཔོན་སངས་རྒྱས་བསྐྱངས། དཔལ་མགོན་ཀླུ་སྒྲུབ་ཀྱི་སློབ་མ། རྒྱ་གར་ལྷོ་ཕྱོགས་སུ་དུས་རབས་གསུམ་པའི་ནང་སྐུ་འཁྲུངས། འཕགས་པ་འཇམ་དཔལ་གྱི་ཞལ་གཟིགས་ཏེ། གྲུབ་པའི་གོ་འཕང་ཆེན་པོར་གཤེགས། རྩ་ཤེས་ཀྱི་འགྲེལ་པ་བུདྡྷ་པཱ་ལི་ཏ་སོགས་མཛད་ནས་ཐལ་འགྱུར་པའི་གྲུབ་མཐའ་རྒྱ་ཆེར་སྤེལ།
སློབ་དཔོན་ལེགས་ལྡན་འབྱེད། ཁོང་ནི་རྒྱ་གར་ལྷོ་ཕྱོགས་མ་ལ་ཡ་ཞེས་པའི་གནས་སུ་དུས་རབས་དྲུག་པའི་ནང་རྒྱལ་རིགས་སུ་སྐུ་འཁྲུངས། བསྟན་བཅོས་ཤེས་རབ་སྒྲོན་མེ་སོགས་མཛད་དེ་དབུ་མ་རང་རྒྱུད་པའི་གྲུབ་མཐའ་རྒྱ་ཆེར་སྤེལ།
སློབ་དཔོན་ཟླ་བ་གྲགས་པ། ཁོང་ནི་དུས་རབས་བདུན་པའི་ནང་རྒྱ་གར་ལྷོ་ཕྱོགས་མན་ལྡ་ཞེས་པའི་ཡུལ་དུ་སྐུ་འཁྲུངས་གནས་དེར་རབ་ཏུ་བྱུང་ཞིང་ཕྱིས་སུ་ནཱལནྡྲར་ཕེབས་ཏེ་མཁན་པོ་མཛད། དབུ་མ་ཐར་འགྱུར་པའི་སྲོལ་ཕྱེས། གསུང་རྩོམ་ལ། <<ཚིག་གསལ་>> དང་ <<འཇུག་པ་རང་འགྲེལ།>> <<དབུ་མ་ཤེས་རབ་སྒྲོན་མ།>> <<དབུ་མ་འཇུག་པ།>> <<རབ་ལ་འཇུག་པ།>> <<རིགས་པ་དྲུག་ཅུ་པའི་འགྲེལ་པ།>> <<བཞི་བརྒྱ་པའི་འགྲེལ་པ།>> <<དབུ་མ་ཕུང་པོ་ལྔ་པ།>> <<གསང་འདུས་རྩ་རྒྱུད་ཀྱི་འགྲེལ་པ་སྒྲོན་གསལ།>> སོགས་ཡོད།
སློབ་དཔོན་ཞི་བ་ལྷ། རྒྱལ་སྲས་ཆེན་པོ་ཞི་བ་ལྷ་ནི། དུས་རབས་བརྒྱད་པ་ཙམ་ནས་འཁོར་མོ་བཟང་ཞེས་བྱ་བའི་ཡུལ་དུ་རྒྱལ་པོ་དགེ་བའི་གོ་ཆའི་སྲས་སུ་སྐུ་འཁྲུངས། ཡབ་འདས་རྗེས་སང་ཉིན་རྒྱལ་སྲིད་ལ་དབང་བསྐུར་ཞེས་པའི་ནུབ་མོར་བྲོས་ཏེ་ནཱལནྡྲར་ཕེབས་ནས་རྒྱལ་བའི་ལྷའི་མདུན་ནས་རབ་ཏུ་བྱུང༌། མཁན་པོའི་མདུན་ནས་སྡེ་སྣོད་གསུམ་ལ་མཐར་ཕྱིན་པར་སྦྱངས་ནས་ <<སྤྱོད་འཇུག་>> དང༌ <<བསླབ་བཏུས།>> བརྩམས། ཕྱིས་སུ་རྒྱ་གར་ལྷོ་ཕྱོགས་སུ་ཕེབས་ཤིང་གནས་དེར་སྐུ་ཞི་བར་གཤེགས།
མཁན་ཆེན་ཞི་བ་འཚོ། ཁོང་ནི་དུས་རབས་བརྒྱད་པའི་ནང་རྒྱ་གར་ཤར་ཕྱོགས་ཀྱི་ཡུལ་ཟ་ཧོར་གྱི་གྲོང་དུ་ཡབ་རྒྱལ་པོ་གཙུག་ལག་འཛིན་པའི་སྲས་ཉིས་ཚིགས་སུ་སྐུ་འཁྲུངས། ནར་སོན་པ་ནས་ནཱལནྡཱར་ཕེབས་ཏེ་གནས་དེ་དང་བི་ཀ་མ་ཤཱི་ལ་སོགས་ནས་སློབ་གཉེར་གནང་སྟེ་ནཱལནྡྲའི་མཁན་པོ་མཛད། ཕྱི་ལོ་༧༦༡ ལོར་བོད་དུ་གདན་དྲངས་ཤིང༌། སྐབས་དེར་རྐྱེན་སྣ་ཚོགས་པར་བརྟེན་ནས་དུས་ཡུན་རིང་པོར་མ་བཞུགས་པར་བལ་ཡུལ་དུ་ཕེབས། དེ་རྗེས་ཨོ་རྒྱན་ཆེན་པོ་དང་ལྷན་དུ་གདན་དྲངས་ཤིང་བོད་ཀྱི་སད་མི་མི་བདུན་སོགས་རབ་ཏུ་བྱུང་བའི་མཁན་པོ་མཛད་པ་སོགས་འགྲོ་དོན་རྒྱ་ཆེར་སྤེལ་མཐར་རྟས་ཕྲ་བརྒྱབ་སྟེ་བོད་དུ་སྐུ་གཤེགས།
པདྨའི་ངང་ཚུལ། ཁོང་ནི་མཁན་ཆེན་ཞི་འཚོའི་དངོས་སློབ་ཅིག་ཡིན་ལ། རྒྱ་གར་ནཱལནྡཱ་དང་བི་ཀྲ་མ་ཤཱི་ལ་སོགས་ནས་བསྟན་པའི་བྱ་བ་རྒྱ་ཆེར་མཛད་མཐར་བལ་ཡུལ་དུ་བསྟན་པ་སྤེལ་དུ་ཕེབས་སྐབས་བོད་དུ་གདན་འདྲེན་ཞུས། བོད་ཀྱི་བཙན་པོས་ཇི་ལྟར་གསོལ་བ་བཏབ་པ་ལྟར་བོད་དུ་ཕེབས་ནས་ཧ་ཤང་རྣམས་ཕམ་པར་བྱས། ཆོས་རྒྱལ་གྱི་དྲིས་ལན་གྱི་ཚུལ་དུ་སྒོམ་རིམ་ཐོག་མཐའ་བར་གསུམ་སོགས་མཛད་ནས་བོད་དུ་སྐུ་གཤེགས་སྐད་ཀྱང་ཡོད།
འཕགས་པ་ཐོགས་མེད། ཁོང་ནི་གནའ་རབས་རྒྱ་གར་གྱི་མངའ་ཁོངས་དང་དེང་སྐབས་པ་ཀི་སི་ཐན་གྱི་ས་ཆ་གནྡྷ་རའམ་པིས་ཤ་ཝར་ཟེར་བའི་ཡུལ་དུ་དུས་རབས་བཞི་པའི་སྨད་ཙམ་ནས་རྒྱལ་རིགས་སུ་ཡུམ་གསལ་བའི་ངང་ཚུལ་མའི་སྲས་སུ་སྐུ་འཁྲུངས། རྗེ་བཙུན་བྱམས་པ་སོགས་བླ་མ་མང་དུ་བསྟེན་ནས་སློབ་གཉེར་དང་སྒོམ་སྒྲུབ་རྒྱ་ཆེར་མཛད་པས་ས་ལམ་གྱི་གོ་འཕང་ཆེས་ཆེར་ཐོབ། སེམས་ཙམ་པའི་ཤིང་རྟའི་སྲོལ་ཕྱེས། སྐུ་ཚེའི་སྨད་ལ་ནཱལནྡཱའི་མཁན་པོར་མི་ལོ་བཅུ་གཉིས་ཙམ་བཞུགས། སློབ་མའི་གཙོ་བོ་སློབ་དཔོན་དབྱིག་གཉེན་སོགས་མང་དུ་མཆིས་ལ། གསུང་རྩོམ་ནི། <<ཉི་ཁྲི་དེ་ཉིད་རྣམ་ངེས་>> དང་ << ས་སྡེ་ལྔ།>> <<ཆོས་མངོན་པ་ཀུན་བཏུས་>> སོགས་ཡོད།
སློབ་དཔོན་དབྱིག་གཉེན། ཁོང་ནི་ག་དྷཱ་རའི་ཡུལ་དུ་དུས་རབས་བཞི་པའི་སྨད་ཙམ་ནས་ཡུམ་གསལ་བའི་ངང་ཚུལ་མར་བྲམ་ཟེའི་རིགས་སུ་སྐུ་འཁྲུངས། ཆུང་དུས་ནས་ཁ་ཆེ་འདུས་བཟང་གི་མདུན་ནས་གྲུབ་མཐའ་རིགས་མི་འདྲ་བ་བཅོ་བརྒྱད་དང༌། ཕྱི་རོལ་བའི་ལྟ་བ་མི་འདྲ་བ་དྲུག་གི་རིག་པའི་གཞུང་ལུགས་རྣམས་ཁོང་དུ་ཆུད་པར་བྱས། དེ་ནས་སློབ་དཔོན་ཐོགས་མེད་ཀྱི་མདུན་ནས་ཐེག་ཆེན་གྱི་ཆོས་ཚུལ་མཐའ་དག་གསན་ནས་མཁས་པར་བྱས་ཤིང་ཐེག་པ་ཆེན་པོའི་ཆོས་གཞི་བརྒྱ་དང་བརྒྱད་ཙམ་གསར་དུ་བཙུགས། སློབ་མ་མཁས་པ་སྟོང་ཕྲག་དུ་མ་བསྐྱངས། རང་མཁས་ཀྱི་སློབ་མ་བཞི་སོགས་ཡོད་པའང་བཤད་སྲོལ་ཡོད། མཐར་དགེ་སློང་གི་ཆ་བྱད་མ་བོར་བར་ཞིང་རྨོད་བཞིན་པ་སོགས་མཐོང་བས་རྐྱེན་བྱས་ཏེ་རྒྱ་གར་ཡུལ་དབུས་ནས་སྐུ་གཤེགས། ཁོང་གི་གསུང་རྩོམ་ནི། <<ཆོས་བཞི་པའི་མདོའི་རྣམ་པར་བཤད་པ་>> དང་ <<ག་ཡ་གོ་རིའི་མདོའི་རྣམ་པར་བཤད་པ།>> <<ས་བཅུ་པའི་མདོའི་རྣམ་པར་བཤད་པ།>> <<བློ་གྲོས་མི་ཟད་པའི་བསྟན་པའི་མདོའི་རྣམ་པར་བཤད་པ།>> <<བཟང་སྤྱོད་སྨོན་ལམ་གྱི་མདོའི་འགྲེལ་པ།>> <<མདོ་སྡེ་རྒྱན་གྱི་འགྲེལ་པ།>> <<དབུས་མཐའ་རྣམ་འབྱེད་ཀྱི་འགྲེལ་པ།>> <<ཆོས་ཉིད་རྣམ་འབྱེད་ཀྱི་འགྲེལ་པ།>> <<སུམ་ཅུ་པའི་ཚིག་ལེའུ་བྱས་པ།>> <<ཉི་ཤུ་པའི་ཚིག་ལེའུ་བྱས་པ།>> <<ཉི་ཤུ་པའི་རང་འགྲེལ།>> <<ཕུང་པོ་ལྔའི་རབ་ཏུ་བྱེད་པ།>> <<རྣམ་བཤད་རིགས་པ།>> <<ལས་གྲུབ་པའི་རབ་བྱེད།>> <<ཆོས་མངོན་པ་མཛོད།>> <<མཛོད་རང་འགྲེལ།>> སོགས་ཡོད།
སློབ་དཔོན་ཕྱོགས་ཀྱི་གླང་པོ། ཁོང་ནི་དུས་རབས་དྲུག་པའི་ནང་བྱོན་པའི་སློབ་དཔོན་ཞིག་ཡིན། གསུང་རྩོམ་ལ། <<ཚད་མ་ཀུན་བཏུས་>> དང༌ <<ཀུན་བཏུས་རང་འགྲེལ།>> <<དམིགས་པ་བརྟག་པ།>> <<དམིགས་བརྟག་རང་འགྲེལ།>> <<དུས་གསུམ་བརྟག་པ།>> <<ཚད་མའི་བསྟན་བཅོས་རིགས་པ་ལ་འཇུག་པ།>> <<ཕྱོགས་ཆོས་འཁོར་ལོ་དགུ་པ།>> <<གནད་ཀྱི་སྒྲོན་མེ།>> <<ཡོན་ཏན་མཐའ་ཡས་པ་བསྟོད་པའི་འགྲེལ་པ།>> སོགས་ཡོད།
སློབ་དཔོན་ཆོས་ཀྱི་གྲགས་པ། ཁོང་ནི་དུས་རབས་བདུན་པའི་ནང་དུ་བྲམ་ཟེའི་རིགས་ཕྱི་རོལ་པའི་ཆོས་བྱེད་མཁན་ཞིག་གི་ཁྱིམ་དུ་འཁྲུངས། ཆུང་དུས་ནས་རིག་གནས་ལྔ་དང་ཕྱི་རོལ་པའི་ཆོས་ལ་མཁས་པར་བྱས། རྗེས་སུ་སངས་རྒྱས་པའི་གྲུབ་མཐར་ཞུགས་ཏེ་སློབ་དཔོན་དབང་ཕྱུག་སྡེ་སོགས་བླ་མར་བསྟེན་ཏེ་ཚད་མ་ཀུན་བཏུས་སོགས་ལ་སློབ་གཉེར་མཐར་ཕྱིན་མཛད་དེ་རྒྱ་གར་ཡུལ་གང་སར་ཕེབས་ནས་ཕྱི་རོལ་པ་དང་རྩོད་པས་ཕྱི་རོལ་པ་གང་མང་ཕམ་པར་བྱས་ཤིང༌། སངས་རྒྱས་པའི་ཆོས་གཞི་དང་ལྷ་ཁང་བརྒྱ་ལྷག་གསར་བསྐྲུན་གནང༌། གསུང་རྩོམ་ལ། <<གཏན་ཚིགས་ཐིགས་པ།>> དང་ <<འགྲེལ་པ་བརྟག་པ།>> <<རྒྱུད་གཞན་སྒྲུབ་པ།>> <<རྩོད་པའི་རིགས་པ།>> <<རྣམ་འགྲེལ།>> <<རྣམ་ངེས།>> <<རིགས་པའི་ཐིགས་པ།>> སོགས་ཡོད།
འཕགས་པ་རྣམ་གྲོལ་སྡེ། ཁོང་ནི་དུས་རབས་བཞི་པའི་ནང་བྱོན་པའི་སློབ་དཔོན་དབྱིག་གཉེན་གྱི་སློབ་མ་ཕར་ཕྱིན་ལ་ཤིན་ཏུ་མཁས་པ་ཞིག་ཡིན། གསུང་རྩོམ་ལ། ཉི་ཁྲི་སྣང་བ་སོགས་ཡོད།
སློབ་དཔོན་སེངྒེ་བཟང་པོ། ཁོང་ནི་སློབ་དཔོན་ཞི་བ་འཚོའི་སློབ་མ་ཤེར་ཕྱིན་ལ་ཤིན་ཏུ་མཁས་པ་ཞིག་ཡིན། དུས་རབས་བརྒྱད་པའི་ནང་རྒྱལ་རིགས་སུ་སྐུ་འཁྲུངས། རྨི་ལམ་དུ་རྒྱལ་བ་བྱམས་པས་རྒྱན་གྱི་དགོངས་པ་བཀྲལ་བར་བསྐུལ་བ་ལྟར། <<འགྲེལ་ཆུང་དོན་གསལ།>> དང་ <<ཉི་ཁྲི་ལེ་བརྒྱད་མ།>> <<འགྲེལ་ཆེན་རྒྱན་སྣང་།>> སོགས་བསྟན་བཅོས་མང་དུ་མཛད།
སློབ་དཔོན་ཡོན་ཏན་འོད། སློབ་དཔོན་ཁོང་ནི་འཕགས་མཆོག་དབྱིག་གཉེན་གྱི་སློབ་མ་དང༌། ཆོས་འདུལ་བའི་ཕྱོགས་ལ་ཧ་ཅང་མཁས་པ་ཞིག་ཡིན། ཁོང་དུས་རབས་ལྔ་པའི་སྟོད་ཙམ་དུ་འཁྲུངས་ཤིང་སྐབས་དེའི་དགེ་འདུན་པའི་སྤྱོད་ལམ་གྱི་ཕྱོགས་ལ་བྱས་པ་ཆེ་ཞེས་གླེང༌། གསུང་རྩོམ་ནི། <<འདུལ་བ་མདོ་རྩ།>> དང༌། <<མདོ་རྩ་རང་འགྲེལ།>> སོགས་མང་ཙམ་མཆིས།
སློབ་དཔོན་ཤཱཀྱ་འོད། ཁོང་ནི་སློབ་དཔོན་གྲགས་པ་དང་ཞི་བའི་འོད་གཉིས་ཀྱི་སློབ་མ་ཆོས་འདུལ་བ་ལ་ཤིན་ཏུ་མཁས་པ་ཞིག་ཡིན། བོད་འགྱུར་གསུང་རྩོམ་ནི། <<འདུལ་བ་སུམ་བརྒྱ་པ།>> དང༌ <<འདུལ་བ་སུམ་བརྒྱ་པའི་རང་འགྲེལ།>> ཡིན།
ཇོ་བོ་ཨ་ཏི་ཤ།།ཁོང་ནི་བྷང་གྷ་ལའི་ཡུལ་དུ་མཁན་ཆེན་ཞི་འཚོ་དང་གདུང་རྒྱུད་གཅིག་པའི་རྒྱལ་རིགས་སུ་ཕྱི་ལོ་ ༩༨༢ ལོར་སྐུ་འཁྲུངས། དགུང་ལོ་བཅུའི་བར་ཡི་གེའི་སྦྱོར་ཀློག་དང་ཐུན་མོང་རིག་གནས་ཀྱི་རྨང་གཞི་རྣམས་བསླབས། དེ་ནས་དགུང་གྲངས་ཉི་ཤུའི་བར་ཕྱི་ནང་གི་སྒྲ་ཚད་སོགས་དཔྱིས་ཕྱིན་པར་བསླབས། དེ་ནས་དགུང་ལོ་ཉེར་དགུའི་ཐོག་ཤྲཱི་ལ་རཀྵ་ཏའི་མདུན་ནས་རབ་ཏུ་བྱུང་ཞིང་མཚན་ལ་དཱི་པཾ་ཀ་ཤྲཱི་ཛྙཱ་ན་ཞེས་གསོལ། རབ་ཏུ་བྱུང་རྗེས་ཀྱང་གསེར་གླིང་པ་ཆོས་ཀྱི་གྲགས་པ་སོགས་བླ་མར་བསྟེན་ནས་ནང་བསྟན་མཚན་ཉིད་རིག་པས་གཙོས་གཞུང་ལུགས་རྣམས་རྒྱ་ཆེར་སྦྱངས། མཐར་བི་ཀྲ་མ་ཤཱི་ལར་ཕེབས་ནས་མཁན་པོ་དང་གནས་བརྟན་གྱི་བྱ་བ་ཡུན་རིང་མཛད། དགུང་གྲངས་ང་དགུ་པ་རབ་བྱུང་དང་པོའི་ལྕགས་འབྲུག་ལོར་བལ་ཡུལ་བརྒྱུད་ནས་མངའ་རིས་སུ་ཕེབས། དེ་ནས་བོད་དབུས་གཙང་གཉིས་སུ་འགྲོ་དོན་རྒྱ་ཆེར་མཛད་མཐར་ ༡༠༥༤ ལོར་སྙེ་ཐང་དུ་སྐུ་གཤེགས་པ་བཅས་སོ།།
གཞན་ནས་བཏུས།