༣༽ ལོ་ཙཱ་བ་གཉན་དར་མ་གྲགས།

༣༽ ལོ་ཙཱ་བ་གཉན་དར་མ་གྲགས།

 

ལོ་ཙཱ་བ་དགེ་སློང་གཉན་དར་མ་གྲགས་སམ། མཚན་གཞན་ལ་སྣུར་དྷརྨ་གྲགས་ཀྱང་ཞུ་ཞིང་། ཕྱི་ལོའི་དུས་རབས་བཅུ་གཅིག་པའི་དུས་སྟོད་ཙམ་དུ་གཙང་ཤབ་ཏུ་སྐུ་འཁྲུངས་པའི་སྙན་གྲགས་ཅན་གྱི་ལོ་ཙཱ་བ་ཞིག་སྟེ། དེ་ཡང་ཡོངས་འཛིན་ཡེ་ཤེས་རྒྱལ་མཚན་ (1713-1793) གྱིས་མཛད་པའི་ལམ་རིམ་བླ་མ་བརྒྱུད་པའི་རྣམ་ཐར་ལས^[1]། རྔོག་ལོ་ཆེན་པོ་བློ་ལྡན་ཤེས་རབ་ལོ་བཅུ་བདུན་བཞེས་པའི་ཚེ་ཁ་ཆེར་སློབ་གཉེར་ལ་བརྫངས།

དེའི་ཚེ་རྭ་ལོ། གཉན་ལོ། ཁྱུང་པོ་ཆོས་བརྩོན། རྡོ་སྟོན། བཙན་ཁ་བོ་ཆེ་རྣམས་དང་འགྲོགས་ནས་བྱོན་པས། མངའ་བདག་རྩེ་ལྡེས་དབུས་གཙང་ཁམས་གསུམ་གྱི་སྡེ་སྣོད་འཛིན་པ་རགས་པ་རྣམས་སྤྱན་དྲངས་ནས་མེ་ཕོ་འབྲུག་གི་ལོའི་ཆོས་འཁོར་མཛད་པ་དང་ཐུག་ཅེས་གསུངས་ལ། ཐོག་མར་བོད་ནས་མདོ་སྔགས་རིག་གནས་དང་བཅས་པར་སྦྱངས་པ་དཔྱིས་ཕྱིན་པ་མཛད་ཅིང་། དེ་ནས་རབ་བྱུང་དང་པོའི་མེ་འབྲུག་ཕྱི་ལོ་ ༡༠༧༦ ལོར་ཁ་ཆེ་དང༌། བལ་ཡུལ་བརྒྱུད་རྒྱ་གར་དུ་ཕེབས་ཏེ་ལོ་བཅུ་གཉིས་རིང་པཎྜི་ཏ་ཏ་མ་ཏི་སོགས་ལ་བསྟེན་ནས་མདོ་སྔགས་གཉིས་ཀར་སློབ་གཉེར་ཕུལ་དུ་ཕྱིན་པ་མཛད་དེ། ལེགས་སྦྱར་གྱི་སྐད་ལ་ཡང་བྱང་ཞིང་ཆུབ་པ་མཛད་ནས་རྒྱ་གཞུང་གི་བསྟན་བཅོས་མང་པོ་བོད་ཡིག་ཏུ་བསྒྱུར་བར་མཛད། གཞན་ཡང་བོད་ཀྱི་ལོ་རྒྱུས་རགས་རིམ་གཡུ་ཡི་ཕྲེང་བ་དང༌། བོད་སིལ་བུའི་བྱུང་བ་བརྗོད་པ་ཤེལ་དཀར་ཕྲེང་བ། གངས་ལྗོངས་ལོ་རྒྱུས་ཐོག་གི་གྲགས་ཅན་མི་སྣ་བཅས་ཀྱི་ནང་ཕྱིས་རྭ་ལོ་དང་མཐུ་འགྲན་པས་གཉིས་ཀ་གཤེགས་སྐད་ཅེས་འཁོད་འདུག །^[2]

མཁས་དབང་དུང་དཀར་བློ་བཟང་འཕྲིན་ལས་ (1927-1997) མཆོག་གིས་མཛད་པའི་དུང་དཀར་ཚིག་མཛོད་ཆེན་མོ་ལས^[3]། གཉན་ལོ་དར་མ་གྲགས། འདི་ཉིད་རྒྱ་གར་དུ་ལོ་བཅུ་གཉིས་བཞུགས། པཎྜི་ཏ་མ་ཏི་བསྟེན། པཎྜི་ཏ་པུཎྱེ་ཤྲཱི་གདན་དྲངས་ཏེ་སྤྱོད་འཇུག་འགྲེལ་ཆེན་དང་། སྒྲོལ་མ། ཆོས་སྐྱོང་ལ་སོགས་ཆོས་མང་དུ་བསྒྱུར། ཁྱད་པར་དུ་མགོན་པོ་ཞལ་བཞི་པ་སྤྱན་དྲངས། ཕྱིས་རྭ་ལོ་དང་མཐུ་འགྲན་པས་གཉིས་ཀ་གཤེགས་སྐད། ཅེས་གསལ་ལོ།།

དཔལ་མགོན་ཞལ་བཞི་པ་དཀར་པོ་ཚེ་འཕེལ་གྱི་སྒོ་ནས་འཆི་མེད་སྒྲུབ་པའི་གདམས་ངག་ཟླ་བའི་བདུད་རྩི་ལས^[4]། མགོན་པོའི་གདོང་བཞི་པའི་བླ་བརྒྱུད་ལས།

དྲི་མེད་སྦས་པ་རིན་ཆེན་རྣམ་པ་གཉིས། །

བསོད་སྙོམས་པ་དང་གཉན་ལོ་དར་མ་གྲགས། །

ཞེས་གསུངས་པ་ལྟར། གཉན་ལོ་ཙཱ་བ་དར་མ་གྲགས་ཀྱི་རྣམ་ཐར་རྒྱས་པ་ནི། དཔལ་མགོན་གདོང་བཞི་པའི་སྒྲུབ་ཐབས་ཀྱི་རྒྱ་གཞུང་ཏ་ཐཱ་ག་ཏ་རཀྵི་ཏས་མཛད་པ་ལས^[5]། གཉན་ལོ་ཙཱ་བ་ཆེན་པོ་དེ་ཉིད་ཀྱིས་རྒྱ་གར་དུ་ཆོས་སློབ་ཏུ་བྱོན་ནས། བླ་མ་སནྡྷེ་པ་ཆེན་པོ་རཏྣ་ཀིརྟི་དང་རྡོ་རྗེ་གདན་པ་སོགས་ལས་ཆོས་མང་དུ་གསན། རིག་པའི་གནས་ལྔ་ལ་མཁས་པར་མཁྱེན་ནས་བོད་ལ་ལོག་འབྱོན་ཁར། བླ་མ་སནྡྷེ་པ་ལས་གསང་བ་འདུས་པ་ཡེ་ཤེས་ཞབས་ལུགས་ཀྱི་དབང་ཞུས་པས། ངས་མི་འོང་། ཁ་སརྤ་ཎིའི་ལྷོ་ཕྱོགས་ཀྱི་རི་སུལ་གྱི་ནགས་གསེབ་ཅིག་ན་ང་ཡི་མཆེད་མོ་རྣལ་འབྱོར་མ་ཀུ་སཱ་ལི་བ་བྱ་བ་ཞིག་གསང་བ་འདུས་པའི་སྒྲུབ་པ་མཛད་ཅིང་ཡོད་པས་དེར་སོང་ལ་ཞུས་ཤིག །ཁྱེད་དང་ལས་ཀྱི་འབྲེལ་བ་ཡོད་པས་དབང་དང་གདམས་ངག་གནང་བར་འདུག་གི་གསུངས། ཁ་སརྤཱ་ཎིའི་ལྷོ་ཕྱོགས་ཟེར་བའི་རྒྱུ་མཚན་ཡང་དགེ་བསྙེན་ཞི་བའི་གོ་ཆས་རི་བོ་པོ་ཏ་ལ་ནས་འཕགས་པ་སྤྱན་རས་གཟིགས་ཁ་སརྤཱ་ཎི་དངོས་སུ་སྤྱན་དྲངས་ནས་དེ་ཝི་ཀོ་ཊ་ནང་བཞུགས་ཤིང་། དེའི་ལྷོ་ཕྱོགས་ཀྱི་རི་སུལ་ན་ཡོད་པས་དེ་སྐད་བྱ་བ་ཡིན་ནོ། །གོང་ལྟར་བླ་མ་སནྡྷེ་པའི་བཀའ་བཞིན་མཛད་ནས་གཉན་ལོ་བྱོན་པས། ཇི་ལྟར་གསུངས་པ་བཞིན་རི་སུལ་གྱི་ནགས་གསེབ་ན་ཤིང་སྡོང་པོ་ཆེན་པོ་ཞིག་གི་ཁོག་པ་ན་རྣལ་འབྱོར་མ་དཔོན་གཡོག་བཞི་གདའ་སྐད། དེའི་ནང་ནས་གཡོག་མོ་གསུམ་རེས་མོས་ཀྱིས་གྲོང་འདབས་ན་ཕར་ཕྱིན་ཏེ་འཚོ་བ་བཙལ་ནས་སྒྲུབ་པ་མཛད་ཀྱིན་འདུག་པ་ལ། ལོ་ཙཱ་བས་བླ་མས་ལུང་བསྟན་པའི་རྣལ་འབྱོར་མ་ཡིན་མིན་བརྟག་པའི་ཕྱིར་གཡོག་མོ་རྣམས་ལ་ཁྱེད་རྣམས་རྣལ་འབྱོར་མ་ཡིན་ན་ནུས་གཅིག་སྟོན་དང་གསུངས་པས། གཅིག་གིས་བྲང་གཤགས་ནས་ཁོག་པའི་ནང་ནས་བླ་མ་གསང་འདུས་ཀྱི་ལྷ་གྲངས་དང་མཉམ་པའི་མར་མེ་བསྟན་པས་ངེས་ཤེས་སྐྱེས་ནས་གཙོ་མོ་ལ་ཕྱག་དང་མཎྜལ་ཕུལ་ཏེ་གསང་བ་འདུས་པའི་དབང་བསྐུར་ཞུས་པས་ཁྱོད་ལ་སུས་ལུང་བསྟན་གསུངས། ང་ལ་བླ་མ་སནྡྷེ་པས་ལུང་བསྟན་ཞུས་པས། ངས་འཇམ་པའི་རྡོ་རྗེ་ལས་གནང་བ་མ་ཐོབ་པས་ཁྱོད་རང་སྡོད་ཁོམ་ན་ལོ་གཅིག་ནས་དབང་བསྐུར་བྱ་གསུངས། དེ་བཞིན་བགྱི་ཞུས་པས། འོ་ན་ཁྱོད་ལ་མཐའ་འཁོབ་ཀྱི་མི་ངན་དང་། གཅན་གཟན་དང་། དུག་སྦྲུལ་ལ་སོགས་པའི་འཚེ་བ་འབྱུང་དགོས་ཡོད་པས་གྲོང་འདབས་ཕ་ཀི་ན་བྲམ་ཟེ་མདོག་སྔོ་བ། མི་རྐང་གི་གླིང་བུ་ཐོགས་པ་ཅིག་ཡོད་པས་དེ་དང་འགྲོགས་ལ་ཅི་ཟ་ཅི་འཐུང་གི་ཕུད་ནས་བྱིན། ཅི་འབྱོར་བའི་མཆོད་པ་དང་བསྙེན་བཀུར་གྱིས་ཤིག་ངས་བར་ཆད་མི་འབྱུང་བར་བྱིན་གྱིས་བརླབ་གསུངས། དེ་བཞིན་བྱས་པས་ལོ་གཅིག་སོང་ནས་ད་ངས་ལྷ་ལ་གནང་བ་ཐོབ་པས་དབང་བྱ་ཡི། ཚོགས་ཀྱི་ཡོ་བྱད་ཚོལ་ཅིག་གསུངས་ནས་གསེར་ཞོ་གསུམ་ལ་ཞོ་གང་ལ་འབྲས་ཁལ་བཅུ་གསུམ་བླངས་ནས་ཆང་བྱས། ཞོ་གང་ལ་ཤ་དང་། ཞོ་གང་ལ་སྤོས་ལ་སོགས་པ་གཞན་དགོས་པའི་ཡོ་བྱད་རྣམས་བསྒྲུབས་ནས་ཁྱེར་ཏེ། རྣལ་འབྱོར་མའི་དྲུང་དུ་ཕྱིན་ནས་ཚོགས་རྫས་རྣམས་ཕུལ། གདན་མང་པོ་བཤམས་ཚར་བ་དང་། རྣལ་འབྱོར་མའི་ཞལ་ནས་མགྲོན་སྤྱན་དྲོངས་ཤིག་གསུང་བ་ལ་བདག་གིས་མི་རྙེད་ཞུས་པས། འོ་ན་ཁ་སང་གི་གྲོགས་པོ་བྲམ་ཟེ་དེ་བོས་གསུངས་ནས། བྲམ་ཟེ་བོས་པ་དེས་བྲག་གསེབ་ནས་མི་རྐང་གི་གླིང་བུ་ཕྱུང་སྟེ་བུས་མ་ཐག་ཕྱོགས་བཞི་མཚམས་བརྒྱད་ནས་དཔའ་བོ་མཁའ་འགྲོ་རྣལ་འབྱོར་ཕོ་མོ་རྒྱན་ཆ་ལུགས་མི་འདྲ་བ་དུ་མ་དང་། ཞིང་སྐྱོང་བཀའ་སྡོད་བསམ་གྱིས་མི་ཁྱབ་པ་འདུས་ནས་གྲལ་ལ་འཁོད་ཅིང་། ཚོགས་ཀྱིས་ཚིམ་པར་བྱས་པས་མཉེས་ཏེ་དབང་ཡོངས་སུ་རྫོགས་པར་གནང་། དེ་ནས་གདམས་པ་རྒྱ་མཚོ་ལྟར་གསན་ཅིང་། སྤྱིར་ཐུན་མོང་མ་ཡིན་པའི་གདམས་པ། ཐུགས་དམ་གསང་བ་འདུས་པ་དང་། ཨུཥྞིཥ། སྦྱོར་བ་ཡན་ལག་དྲུག་པ། སྒྲོལ་མའི་སྒྲུབ་ཐབས། ཆོས་སྐྱོང་གི་གདམས་པ་དང་ལྔ་གནང་ངོ་། །ཁྱད་པར་དུ་ཆོས་སྐྱོང་འདི་དངོས་སུ་གནང་སྟེ། དབང་གི་དུས་སུ་བྲམ་ཟེ་དེ་ལ་ཁྱོད་ཀྱིས་འདིའི་གཡོག་གྱིས། འགལ་རྐྱེན་སྤོངས་ལ་མཐུན་རྐྱེན་སྒྲུབས་ཤིག་ཅེས་བཀའ་བསྒོས་ནས་མི་ལ་མི་ངོ་སྤྲོད་པ་བཞིན་དུ་དངོས་སུ་གནང་བ་ནི་ཆོས་སྐྱོང་ཡིད་བཞིན་གྱི་ནོར་བུ་ལྟ་བུ་འདི་ཡིན་པས་བྱིན་རླབས་ཀྱི་བརྒྱུད་པ་བར་མ་ཆད་པས་སྒྲུབ་ཐག་ཉེ་བའི་གདམས་པ་ཤིན་ཏུ་ཐུགས་རྩིས་ཆེ་བ་ཡིན་ནོ།།

དེ་ནས་བླ་མ་གཉན་ལོ་ཙཱ་བས་རྒྱ་གར་ནས་བོད་ལ་འབྱོན་དུས་བལ་ཡུལ་ཕན་ཆད་དུ་དངོས་སུ་འགྲོགས་པ་ལ། བོད་ཀྱི་སྣེ་ཟིན་ནས་དངོས་སུ་མ་བྱུང་། དགོས་སྐབས་ཆེ་དུས་དངོས་སུ་ཡོང་ཞེས་གྲགས། བླ་མ་གཉན་ལོ་ཙཱ་བ་ཆེན་པོ་ཁ་ཆེ་ཁྲི་སྟན་ནས་པུ་ཧྲང་ལ་བྱོན་པས་མངའ་བདག་རྩེ་ལྡེའི་བསམ་པ་ལ་ང་རྒྱལ་པོ་ཡིན། མངའ་རིས་སྟོད་ན་ང་ལས་གྲགས་ཆེ་བ་དང་དབང་སྟོབས་ཆེ་བ་མེད་པས་ལོ་ཙཱ་བ་ང་མཇལ་དུ་ཡོང་ནས་ཕྱག་འཚལ་སྙམ་པ་ལ། བླ་མ་གཉན་གྱི་ཐུགས་དགོངས་ལ། ང་རྒྱ་གར་གྱི་པཎ་གྲུབ་རྣམས་ཀྱི་སློབ་མ་ལོ་ཙཱ་བ་ཆེན་པོ་ཡིན། ཁྱད་པར་དུ་རྡོ་རྗེ་གདན་པ་དང་། བླ་མ་སནྡྷེ་པ་རིན་ཆེན་གྲགས་པ། མར་མེ་མཛད་བཟང་པོ་རྣམས་ཀྱི་ཆོས་བརྒྱུད་འཛིན་པ་ཡིན་པས་བཙད་པོས་ང་ལ་ཕྱག་དང་སྣེ་ལེན་སོགས་བྱེད་དམ་སྙམ་ནས་བླ་མ་ཚོང་པ་མང་པོ་དང་འགྲོགས་ནས་བྱོན་དུས་མངའ་བདག་ལ་རྒྱ་གར་ནས་ཕྲ་མ་བྱུང་སྟེ། གཉན་ལོ་ཟེར་བ་འདིས་རྒྱ་གར་གྱི་ངན་སྔགས་ཐམས་ཅད་བསླབས་ནས་སོང་བས་དེར་གཤའ་མ་མི་བྱེད་ཟེར་བ་དང་། རྒྱལ་པོ་ཡང་ངན་ཆགས་ཆེ་བས་འཁྲུལ་ནས་བདེན་སྙམ། བློན་པོ་དཔའ་རྩལ་དང་ལྡན་པའི་རྟ་པ་སུམ་ཅུ་བླ་མ་བགྲོང་དུ་བཏང་བས། བླ་མའི་མནལ་ལམ་དུ་རྒྱལ་པོས་བརྫངས་པའི་བློན་པོ་གདུག་པ་ཅན་རྣམས་མཁྱེན་ཏེ་ཚོང་པ་རྣམས་ལ་ཕྱེ་ཕུད་སྤུས་ཤིག །ངེད་རང་ཚོ་ལ་བར་ཆད་ཅིག་ཡོང་བར་འདུག་པས་ཆོས་སྐྱོང་རྣམས་ལ་གཏོར་མ་ཆེན་པོ་གཏོང་དགོས་པར་འདུག་གསུངས་ནས། གཏོར་མའི་རྒྱུ་ལ་སྤོད་འབྲུ་སྨན་སོགས་བཏབ་ནས་ཕུལ། ཞིང་སྐྱོང་ཆེན་པོ་ཙཏུརྨུཁ་འདི་ལ་གསོལ་བ་བཏབ་ཅེས་སྔགས་བཟླས་པ་ཙམ་གྱིས་ཚོང་པ་རྣམས་ཀྱི་མཐོང་སྣང་ལ་མོན་པ་སྔོན་པོ་ལྔ་གར་བྱེད་པ། བྲོ་བྱེད་པ་གཉིས། གྲི་སྐོར་བྱེད་པ་གཉིས། ཇོ་མོ་ཞྭ་ཐེབས་ཅན་གཅིག་བྱ་བ་ནས་ཕྱིར་ལོག་ནས་ཡོང་བས་བླ་མ་དཔོན་སློབ་རྣམས་ཕེབས་གྲུབ་འདུག་པ་དང་། ལོ་རྒྱུས་རྣམས་རྒྱལ་པོ་ལ་ཞིབ་པར་ཞུས་པས་མངའ་བདག་རྒྱལ་པོའི་བསམ་པ་ལ། བླ་མ་འདི་ཆོས་སྐྱོང་བྲན་དུ་ཁོལ་ནུས་པ་ཞིག་འདུག་སྙམ་པས་སླར་འགྱོད་པ་སྐྱེས་ནས་བཤགས་པ་ཕུལ། ཞབས་སྤྱི་བོར་བླངས་པས་རྒྱལ་པོ་རང་མ་གྲོངས་ཙམ་བྱུང་ཡང་། བློན་པོ་ལ་ལ་ཁ་ནས་ཁྲག་སྐྱུགས་ནས་ཤི །ལ་ལ་བརྒྱལ། ལ་ལ་སྨྱོ། ལ་ལ་རེངས། ལ་ལ་འབོགས་ཏེ་ཐམས་ཅད་ཤི་བས་ཆོས་སྐྱོང་གི་ནུས་མཐུ་ཡིན་པར་གྲགས་སོ།།

དེ་ནས་རིམ་གྱིས་བྱོན་ཏེ་དཔལ་ས་སྐྱའི་ཕུ་གནམ་ཁའུ་སྐྱེད་ལྷས་སུ་ཕེབས། མགོན་པོ་བཞུགས་པའི་གཙུག་ལག་ཁང་བཞེངས་ནས་ཕྱག་ནས་མཛད། ཆོས་སྐྱོང་འདི་ལ་བཀའ་གཏད་མཛད་དུས་གཙུག་ལག་ཁང་ལ་མེ་འབར་བས་མེ་འབར་གྱི་གཙུག་ལག་ཁང་ཞེས་གྲགས་སོ། །གཉན་ལོ་ཙཱ་བ་ཆེན་པོས་བླ་མ་གནམ་ཁའུ་པ་ཆོས་ཀྱི་རྒྱལ་མཚན་ལ་ཆོས་སྐྱོང་འདིའི་རྗེས་གནང་སོགས་གདམས་པ་རྫོགས་པར་གནང༌། འདིའི་ལས་ཚོགས་ལ་བརྟེན་ནས་ཁའུའི་མདུན་རི་ལ་བོན་པོའི་གྲོང་མང་དུ་ཡོད་པ་དང་འགྲས་པ་ལ། ལོ་གཅིག་གི་ནང་དུ་བོན་པོ་ཕོ་མོ་བརྒྱ་ཙམ་ཤི་ནས་གྲོང་ཁྱེར་བརླག་པར་མཛད་པ་ནི་ཆོས་སྐྱོང་འདིའི་ནུས་མཐུའི་སྒོ་ནས་ཡིན་པས་ནུས་མཐུ་མྱུར་ཞིང་ཚ་བར་གྲགས་སོ།།

དེ་ནས་དུས་རེ་ཞིག་ལོན་པ་ན་བླ་མ་གཉན་ལོ་སྐུ་མྱ་ངན་ལས་འདའ་ཁར་ཆོས་སྐྱོང་གི་རྣམ་འཕྲུལ་བན་ཆུང་དེ་ལ་ང་མྱ་ངན་ལས་འདའ་བར་འདུག་པས་ཁའུ་བྲག་རྫོང་ན་ངེད་ཀྱི་བུའི་མཆོག་གནམ་ཁའུ་པ་ཆོས་ཀྱི་རྒྱལ་མཚན་ཞེས་བྱ་བ་ཡོད་པས། དེའི་དྲུང་དུ་སོང་ལ་ང་ལ་ཇི་ལྟར་བྱེད་པ་བཞིན་ཁོང་གི་གཡོག་ཚུལ་བཞིན་དུ་གྱིས་ལ་ཁོང་མྱ་ངན་ལས་འདས་པ་དང་རྒྱ་གར་འཕགས་པའི་ཡུལ་དུ་གཤེགས་ཤིག །ཅེས་བཀའ་གནང་བ་དང་བཀའ་བཞིན་དུ་གནམ་ཁའུ་རུ་བྱོན་ནས་བླ་མ་གནམ་གྱི་ཉེ་གནས་མཛད་དོ། །བྱུང་བ་ལྟར་རོ།།

སྒྱུར་རྩོམ་གཙོ་གྲས་ནི། བཀའ་འགྱུར་ལས། དཔལ་དུས་ཀྱི་འཁོར་ལོའི་རྒྱུད་ཕྱི་མ་རྒྱུད་ཀྱི་སྙིང་པོ་དང༌། བསྟན་འགྱུར་ལས། དཔལ་མགོན་པོ་ནག་པོའི་སྒྲུབ་ཐབས་ཀྱི་རིམ་པ་སློབ་དཔོན་ཀླུ་སྒྲུབ་ཀྱིས་མཛད་པ་དང་། སྟོང་ཉིད་བདུན་ཅུ་པའི་རྒྱ་ཆེར་འགྲེལ་པ་སློབ་དཔོན་ཟླ་བ་གྲགས་པས་མཛད་པ། ལྷག་པར་སློབ་དཔོན་ཆེན་པོ་དྷརྨ་ཀཱིརྟིའི་ཞལ་སྔ་ནས་ཀྱིས་མཛད་པའི་རྩོད་པའི་རིགས་པ་ཞེས་བྱ་བའི་རབ་ཏུ་བྱེད་པ་ལོ་ཙཱ་བ་འདི་ཉིད་ཀྱིས་ཕྱི་འགྱུར་མཛད་པ་སོགས་ཆོས་ཚན་བཅུ་བཞི་ཙམ་བཞུགས་སོ།།  །།

དཔྱད་གཞིའི་ལུང་ཁུངས་ཡིག་ཆ།

^[1] ལམ་རིམ་བླ་མ་བརྒྱུད་པའི་རྣམ་ཐར། ཐེ་ཝན་པར་མ། ༢༠༠༧ ལོ། ཤོག་གྲངས་ ༡༧༨

^[2] བོད་ཀྱི་སྒྲ་སྒྱུར་ལོ་རྒྱུས་དང་ལོ་ཙཱ་བ་རིམ་བྱོན་གྱི་མཛད་རྣམ། མི་རིགས་དཔེ་སྐྲུན་ཁང་། ༢༠༠༡ ལོ། ཤོག་ ༢༣༥

^[3] དུང་དཀར་ཚིག་མཛོད་ཆེན་མོ། ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༠༢ ལོ། ཤོག་གྲངས་ ༩༣༤

^[4] སྒྲུབ་ཐབས་ཀུན་བཏུས། པོད། ༼ཏ༽ ཤིང་དཔར། དཔེ་རིང་། ཤོག་གྲངས་ ༢བ༣

^[5] སྒྲུབ་ཐབས་ཀུན་བཏུས། པོད། ༼ཏ༽ ཤིང་དཔར། དཔེ་རིང་། ཤོག་གྲངས་ ༣བ༤

 

ཡོང་ཁུངས། པཎ་གྲུབ་བཅུ་བདུན་གྱི་གསུང་འབུམ་དཀར་ཆག་བསྟན་པའི་མཛེས་རྒྱན། བར་ཆ། རྩོམ་པ་པོ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༤༢༧ ནས་ ༤༣༤ བར་གསལ་བ་ལས་བཏུས་པའོ།།