བོད་ཀྱི་ལོ་ཙཱ་བ།

མ༽ བཀའ་བསྟན་བོད་སྐད་དུ་བསྒྱུར་ཚུལ།   དེ་ཡང་བཀའ་བསྟན་བོད་སྐད་དུ་བསྒྱུར་ཚུལ་ཐད། ༸གོང་ས་མཆོག་གིས་ཆེད་དུ་སྩལ་པའི་སྔོན་གླེང་ལས[1]། གངས་ལྗོངས་པུར་རྒྱལ་བོད་ཀྱི་རྒྱལ་ཁམས་ནི་ས་ཁད་མཐོ་ཞིང་། འགྲུལ་ལམ་དཀའ་བས་རྒྱལ་ཁམས་གཞན་དང་འབྲེལ་མེད་གུད་དུ་ཡུན་རིང་གནས་པ་དང་། ཕྱི་ལོ་བརྒྱ་ཕྲག་ལྔ་པའི་ནང་ལྷ་ཐོ་ཐོ་རི་གཉན་བཙན་གྱི་སྐབས་གསུང་རབ་ཀྱི་གླེགས་བམ་འབྱོར་བ་ནས་བཟུང་དམ་པའི་ཆོས་ཀྱི་དབུ་བརྙེས་པར་བརྩིས།

བ༽ ཁུངས་བཙན་པའི་ནང་ཆོས་ཀྱི་ཁྱད་ཆོས།   དེ་ཡང་། འཇམ་མགོན་ས་སྐྱ་པཎྜི་ཏ་ཀུན་དགའ་རྒྱལ་མཚན་ (1182-1251) གྱིས་མཛད་པའི་ཐུབ་པ་དགོངས་གསལ་ལས[1]། མདོར་ན་སངས་རྒྱས་ཀྱིས་གསུངས། སྡུད་པ་པོས་བསྡུས། གྲུབ་ཐོབ་རྣམས་ཀྱིས་བསྒོམས། པཎྜི་ཏས་བཤད། ལོ་ཙཱ་བས་བསྒྱུར། མཁས་པ་རྣམས་ལ་གྲགས་པ་གཅིག་སངས་རྒྱས་ཀྱི་བསྟན་པ་ཡིན་པས། དེ་ལ་ཉན་བཤད་སྒོམ་སྒྲུབ་བྱེད་དགོས་སོ། །ཞེས་གསུངས་པ་ལྟར། ནང་བསྟན་འདི་ཉིད་ནི་ཐོག་མར་བཞི་བཅོམ་དྲུག་ལྡན་གྱི་སྟོན་པ་མཉམ་མེད་ཤཱཀྱ་སེངྒེས་གསུངས་ཤིང་།

ཕ༽ སྒྲ་སྒྱུར་གྱི་གལ་གནད་དང་། མ་འོངས་པའི་དགོས་མཁོ།   བོད་གངས་ཅན་ལྗོངས་ཀྱི་སྒྲ་སྒྱུར་ལོ་ཙཱ་བའི་ལོ་རྒྱུས་ནི། བོད་ཀྱི་བྱུང་རབས་ལོ་རྒྱུས་འཕེལ་རིམ་གྱི་ཁྲོད་དང་། ལྷག་པར་རིག་གནས་འཕེལ་རྒྱས་འགྲོ་བའི་བརྒྱུད་རིམ་ནང་གལ་ཆེའི་གནས་བབ་བཟུང་ཡོད་པར་མ་ཟད། མི་རིགས་དང་རྒྱལ་ཁབ་གང་ཞིག་ལ་ཆ་མཚོན་ནའང་། སྒྲ་སྒྱུར་གྱི་ལས་གཞི་དེ་ཤིན་ཏུ་གལ་ཆེན་པོ་ཆགས་ཡོད། བོད་མི་རིགས་ལ་མཚོན་ན་སྒྲ་སྒྱུར་གྱི་ལོ་རྒྱུས་ཤིན་ཏུ་རིང་བ་དང་། སྒྲ་སྒྱུར་གྱི་ཁྱབ་ཁོངས་གཞི་རྒྱ་ཆེ་བ། བརྗོད་དོན་ཕུན་སུམ་ཚོགས་པ།

པ༽ སྒྲ་སྒྱུར་གྱི་གྲངས་འབོར་དང་། བཀའ་བསྟན་གླེགས་བམ།   དེ་ལྟར་བོད་ཀྱི་སྐད་གཉིས་སྨྲ་བའི་ལོ་ཙཱ་བ་རྣམས་བསྒྱུར་བྱ་སྒྱུར་བྱེད་སྐད་ཡིག་གཉིས་ཀར་བྱང་ཆ་ལྡན་ཞིང་། མིང་དོན་མཚུངས་པའི་འཇིག་རྟེན་མིག་འབྱེད་ཤ་སྟག་བྱོན་པས། བོད་མི་ས་ཡ་དྲུག་ལས་མེད་པར་མ་ཟད། བོད་ཡིག་བྱུང་ནས་ཀྱང་ལོ་ངོ་ ༡༣༠༠ ལྷག་ཙམ་ལས་ཕྱིན་མེད་ཀྱང་། དུས་ཐུང་ནང་ལོ་ཙཱ་བའི་ཞལ་གྲངས་ཤིན་ཏུ་མང་ཞིང་། འགྱུར་གྱི་སྤུས་ཚད་མཐོ་བ། བསྒྱུར་བའི་ཆོས་ཚན་དང་གླེགས་བམ་གྲངས་འབོར་མང་བ་སོགས་ནི་འཛམ་གླིང་གི་སྒྲ་སྒྱུར་ལོ་རྒྱུས་ཐོག་ཤིན་ཏུ་མཐོང་དཀོན་པ་ཞིག་ཡིན་ལ།