པཎ་གྲུབ་བསྟོད་ཚོགས།

པཎ་གྲུབ་བཅུ་བདུན་གྱི་གསོལ་འདེབས་བསྡུས་པ།[1]   དབུ་མའི་ལམ་སྟོན་ཤིང་རྟ་ཆེ། ། རྒྱལ་བ་གཉིས་པ་ཀླུ་སྒྲུབ་ཞབས། །   ཀླུ་སྒྲུབ་ལུགས་འཛིན་གཙུག་གི་རྒྱན། ། མཁས་མཆོག་ཨཱརྱ་དེ་ཝའི་ཞབས། །   འགྲེལ་མཛད་ཐལ་འགྱུར་སྲོལ་ཕྱེ་བའི། ། གྲུབ་བརྙེས་སློབ་དཔོན་སངས་རྒྱས་བསྐྱངས། །

  ༄༅། །མཉམ་མེད་ཇོ་བོ་ཨ་ཏི་ཤ་རྗེས་སུ་དྲན་པའི་གདུང་ དབྱངས་དད་པའི་འོ་མཚོ་འཕེལ་བའི་ཟླ་ཟེར་ ཞེས་བྱ་བ་བཞུགས་སོ།།[1]   ༼ཨ་ལགས་ཚེ་ཏན་ཞབས་དྲུང་ (1910-1985) གིས་མཛད་པ།༽   ན་མོ་ཨ་མི་ཏ་བྷཱ་ཡ། ཤར་ཕྱོགས་བྷཾ་ག་ལ་རུ་སྐུ་འཁྲུངས་ཤིང་། །ཕྱི་ནང་གྲུབ་མཐའ་རྒྱ་མཚོའི་འཇིངས་ལས་བརྒལ། །འཕགས་བོད་ཡུལ་གྲུར་བསྟན་པའི་ཕྱག་རྗེས་ཅན། །དཱི་པཾ་ཀ་ར་ཤྲཱི་ཛྙཱ་ན་མཆོད། །མགོན་ཁྱོད་ཞིང་འདིའི་གདུལ་བྱ་རྫོགས་པ་ནས། །བགྲང་བྱ་དགུ་བརྒྱ་ལེགས་འདས་དུས་ཀྱི་མཐར། །ཁྱོད་དྲིན་དྲན་པའི་གདུང་དབྱངས་རྐང་དྲུག་གི །འདབ་གཤོག་བསྐྱོད་པའི་སིལ་སྙན་རང་སྒྲ་འཁྲོལ། །

  ༄༅། །མཉམ་མེད་ཇོ་བོ་ཆེན་པོའི་བླ་མའི་རྣལ་འབྱོར་བྱིན་རླབས་མཆོག་སྩོལ།[1]   ༼རྫོང་གསར་མཁྱེན་བརྩེ་འཇམ་དབྱངས་ཆོས་ཀྱི་བློ་གྲོས་ (1893-1959) ཀྱིས་མཛད་པ།༽   ན་མོ་གུ་རུ་དཱི་པཾ་ཀཱ་ར་ཡ། བྱང་ཆུབ་སེམས་དཔའ་སེམས་དཔའ་ཆེ། །མཚན་ཐོས་ཙམ་གྱིས་འཇིགས་ལས་སྒྲོལ། །བླ་མ་ནམ་མཁའ་དྲི་མ་མེད། །ཡིད་བཞིན་ནོར་བུར་གསོལ་བཏབ་ཚུལ། །ཉུང་ངུ་སྙིང་པོར་དྲིལ་བྱས་ཏེ། །རང་དང་སྐལ་བ་མཉམ་པ་ལ། །ཕན་ཕྱིར་འབྲི་ལ་སྐབས་དབྱེའོ། །དེ་ལ་འདིར་བྱང་ཆུབ་ཀྱི་སེམས་གཉིས་རྒྱུད་ལ་བསྐྱེད་པའི་ཕྱིར་མཉམ་མེད་ཇོ་བོ་ཆེན་པོའི་རྣལ་འབྱོར་བསྒོམ་པར་འདོད་པས།

  ༄༅། །མཉམ་མེད་ལྷ་གཅིག་དཱི་པཾ་ཀ་ར་ལ་བསྟོད་པ་ ཁུ་བྱུག་མགྲིན་པའི་གླུ་དབྱངས་ཞེས་ བྱ་བ་བཞུགས་སོ།།[1]   ༼རྫོང་གསར་མཁྱེན་བརྩེ་འཇམ་དབྱངས་ཆོས་ཀྱི་བློ་གྲོས་ (1893-1959) ཀྱིས་མཛད་པ།༽   ན་མོ་གུ་རུ་དཱི་པཾ་ཀཱ་རཱ་ཡ། ལྷ་བརྒྱའི་ཚོགས་ཀྱི་ཡུལ་ན་སེམས་དཔའ་ཆེ། །བྱམས་ཆེན་དགྱེས་པའི་སྲས་ཀྱི་ཐུ་བོ་མཆོག །རྒྱལ་སྲས་བཟང་པོ་སྐྱོང་ཞེས་མཚན་སྙན་ལྡན། །འཕགས་ཆེན་དབུས་ན་གཟི་བརྗིད་ལྷམ་མེར་བཞུགས། །གང་ཁྱོད་སྲིད་ཞིའི་སྤྲོས་པ་ལས་འདས་ཤིང་། །དེ་བཞིན་གཤེགས་པ་རྣམས་དང་རོ་མཉམ་པའི། །མི་ཟད་རྒྱན་འཁོར་ཉེར་ལྔར་དབང་འབྱོར་བས། །ངོ་མཚར་སྒྱུ་མའི་རོལ་རྩེད་ཅིར་ཡང་ངོམས། །