པཎ་གྲུབ་ཀྱི་རྣམ་ཐར།

ནཱ་རོ་པ། ནཱ་རོ་པའི་མཚན་གྱི་རྣམ་གྲངས་ལ། ཀུན་ཏུ་བཟང་པོ། ནམ་མཁའི་སྙིང་པོ། སྙན་གྲགས་བཟང་པོ། ནཱ་རོ་པ། ཡེ་ཤེས་དངོས་གྲུབ། རྩ་བཤད་པ་རྣམས་མཚན་གྱི་རྣམ་གྲངས་ཡིན་ཞེས་གསལ་བ་སྟེ། རྒྱ་གར་ཤར་ཕྱོགས་བྷཾ་ག་ལ་ན། ཤི་ན་རའི་གྲོང་ཁྱེར་འཛམ་བུ་ན་རྒྱལ་པོ་དགེ་བའི་གོ་ཆ་དང༌། བཙུན་མོ་དཔལ་གྱི་བློ་གྲོས། བུ་མོ་དཔལ་གྱི་ཡེ་ཤེ་བྱ་བ་ལ་སྲས་ཀྱིས་དབེན་ནས་བླ་མ་དཀོན་མཆོག་ལ་མཆོད་པ་དང༌། བསྙེན་བཀུར་བྱས་ནས་སྲས་གཅིག་ཡོང་བའི་གསོལ་བ་བཏབ་པས། རྒྱལ་གྱི་ཟླ་བ་ལ་སྲས་གཅིག་བཙས་ནས་མཚན་མཁན་ལ་བསྟན་པས་མཚན་མཁན་གྱིས་འདི་ཟས་གཙང་སྲས་བཞིན་མ་འབྱུང་ཚེ། མིའི་བདག་པོར་འགྱུར་ཞེས་ལུང་བསྟན་མཚན་ལ་རྒྱལ་བུ་ཀུན་དགའ་བཟང་པོར་བཏགས། དེ་ནས་ཆེར་བསྐྱེད་ནས་རྒྱལ་བུ་ཆོས་ལ་འཇུག་པར་ཡབ་ཀྱིས་མ་གནང་ཡང་མ་གསན་པར་ཁ་ཆེར་ཕེབས་ནས། རིག་གནས་ལ་མཁས་པར་བསླབས་ནས་དགེ་བསྙེན་གྱི་སྡོམ་པ་བླངས་ནས། མཚན་ནམ་མཁའི་སྙིང་པོ་བྱ་བར་བཏགས། པཎྜི་ཏ་བཅུ་གསུམ་བཅུ་བཞི་ཁྲིད་ནས་ཕ་མ་ཅན་དུ་འོངས་པས། ཡབ་ཀྱིས་ཁྱོད་ཀྱིས་ཕ་མའི་ངག་བཅག་པས་དམ་ཆོས་མེད་དོ་ཟེར་ནས་མ་དགའ་འོ། །

ཀུན་མཁྱེན་པདྨ་དཀར་པོས་ (1527-1592) མཛད་པའི་ཆོས་འབྱུང་བསྟན་པའི་པདྨ་རྒྱས་པའི་ཉིན་བྱེད་ལས[1]། རྡོ་རྗེ་གདན་པ་ནི་དགེ་བསྙེན་རིག་གནས་དུ་མ། ལྷག་པར་སྒྲ་ཚད་ལ་མཁས་པ་ཞིག་འཁོར་རབ་ཏུ་བྱུང་བའི་པཎྜི་ཏ་འགའ་དང་བཅས་ཏེ་ཡུལ་དབུས་སུ་སླེབས་པ་ན། དེར་རྒྱལ་པོའི་བློན་པོ་ཆེན་པོས་བསྟན་པ་ལ་མི་མཛེས་སྙམ་ནས་ཅིའི་ཕྱིར་རབ་ཏུ་མི་འབྱིན་དྲིས་པས། མའི་འཚོ་བ་སྦྱར་བས་སོ་ཟེར། དེས་གསེར་སྲང་སུམ་ཅུ་དེ་ལ་གཏད་དེ། འདིས་མ་འཚོ་བར་གྱིས་ལ་ཅིས་ཀྱང་རབ་ཏུ་བྱུང་ཞིག །དེར་ཤཱནྟི་པ་ལ་རབ་ཏུ་བྱུང་བའི་མཚན་རཏྣ་ཨཱ་ཀ་ར་གུཔྟ། དེ་དང་ནཱ་རོ་པ། གནས་བརྟན་བྱང་ཆུབ་བཟང་པོ། མར་མེ་མཛད་བཟང་པོ་སོགས་ལ་རྟེན་ནས་སྡེ་སྣོད་གསུམ་རྒྱུད་སྡེ་བཞི་ལ་མཁས་པར་སྦྱངས་ཏེ། ཕྱིས་རྡོ་རྗེ་གདན་གྱི་བདག་མཛད་དེ་བཞུགས་པས་མཚན་རྡོ་རྗེ་གདན་པ་མངོན་ཤེས་ཅན་དུ་གྲགས།

སློབ་དཔོན་ཆོས་ཀྱི་བཤེས་གཉེན་གྱི་རྣམ་ཐར།  སློབ་དཔོན་ཆོས་ཀྱི་བཤེས་གཉེན་ནི། བུ་སྟོན་ཐམས་ཅད་མཁྱེན་པས་ (1290-1364) མཛད་པའི་བུ་སྟོན་ཆོས་འབྱུང་ལས[1]། སློབ་དཔོན་ཆོས་ཀྱི་བཤེས་གཉེན་ནི། ལོ་བཅུ་བདུན་དུ་དགེ་བའི་བཤེས་གཉེན་མཉེས་པར་བྱས་པས། རྨི་ལམ་དུ་བྱམས་པས་རྗེས་སུ་བཟུང་ཞེས་བཤད་ཀྱང༌། སློབ་དཔོན་ཉིད་ཀྱིས་མཁས་པའི་འགྲེལ་པ་བཞི་ལས་རྙེད་ཅིང༌། ཁྱད་པར་འཕགས་པ་གཉིས་ཀྱི་འགྲེལ་པ་ལ་བརྟེན་པར་བཤད་དེ། འགྲེལ་ཆེན་དུ། འདི་ནི་འཕགས་པ་ཐོགས་མེད་ལ་སོགས་པ་རྣམས་ཀྱིས་བཤད་པ་བྲིས་པ་ཡིན་པའི་ཕྱིར་ཚད་མར་བྱའོ། །ཞེས་པ་དང༌། འཕགས་པ་རྣམ་པར་གྲོལ་སྡེ་ཡི། །མཐུ་ཡི་དོན་མཐོང་སྒོ་ནས་ནི། །

སློབ་དཔོན་ཐམས་ཅད་མཁྱེན་པའི་བཤེས་གཉེན་གྱི་རྣམ་ཐར། སློབ་དཔོན་ཐམས་ཅད་མཁྱེན་པའི་བཤེས་གཉེན(དུས་རབས་11/12པ།)། ཐམས་ཅད་མཁྱེན་པའི་བཤེས་གཉེན་ནི། ཇོ་ནང་རྗེ་བཙུན་ཏཱ་ར་ནཱ་ཐས་ (1575-1634) མཛད་པའི་རྒྱ་གར་ཆོས་འབྱུང་ལས[1]། ཁ་ཆེའི་ཡུལ་གྱི་རྒྱལ་པོ་ཞིག་གི་ཟུར་བུ་ཞེས་བྱ་བ། ཆུང་ངུའི་སྐབས་ཁང་སྟེང་དུ་བསྙལ་ནས། མ་མེ་ཏོག་འཐུར་སོང་བ་ལས། བུ་ཆུང་བྱ་རྒོད་ཀྱིས་ཁྱེར་ཏེ། ཡུལ་དབུས་དཔལ་ནཱ་ལེནྡྲའི་གནྡྷོ་ལ་ཞིག་གི་རྩེ་མོར་བཞག་གོ །པཎྜི་ཏ་རྣམས་ཀྱིས་དེ་བླངས་ཏེ་གསོས་ནས་ཆེར་བསྐྱེད་པ་ན་བློ་རྣོ་བར་གྱུར་ཏེ། དགེ་སློང་སྡེ་སྣོད་འཛིན་པའི་བར་དུ་གྱུར། རྗེ་བཙུན་མ་འཕགས་མ་སྒྲོལ་མ་བསྒྲུབས་པས་དངོས་སུ་ཞལ་གཟིགས་ཤིང༌། ལོངས་སྤྱོད་ཟད་མི་ཤེས་པ་བྱུང་བ་ལས། ཐམས་ཅད་སྦྱིན་པར་བཏང་བ་ན། ནམ་ཞིག་ན་ཡོ་བྱད་སྦྱིན་རྒྱུ་ཅུང་ཟད་ཀྱང་མེད་དེ། ཕྱོགས་འདིར་བསྡད་ན་སློང་བ་པོ་མང་པོས་རྐང་སྟོང་སྐྱེལ་བར་གྱུར་སྙམ་སྟེ། ལྷོ་ཕྱོགས་ཀྱི་རྒྱུད་ཐག་རིང་པོར་བྱོན་ཏོ། །