མཁའ་འགྲོ་མའི་བཀའ་ཆེན་གྱི་ཐིམ་ཡིག་དང་མཁའ་འགྲོ་མཚོ་རྒྱལ་གྱི་སྐྱེས་རབས་ལེའུ་བདུན་པ།

 

༄༅། །མཁའ་འགྲོ་མའི་བཀའ་ཆེན་གྱི་ཐིམ་ཡིག་དང་མཁའ་འགྲོ་མཚོ་རྒྱལ་གྱི་སྐྱེས་རབས་ལེའུ་བདུན་པ༔བཞུགས་སོ༔ ལེགས་སོ༔

 

ལྷུན་གྲུབ་མཁའ་འགྲོ་མ་ལ་ཕྱག་འཚལ་ལོ༔ མཁའ་འགྲོ་བཀའ་ཆེན་གྱི་ཐིམ་ཡིག་འདི་ལ༔ སྐབས་གསུམ་གྱིས་སྟོན་ཏེ༔ དང་པོ་ལོ་རྒྱུས་བསྟན་ཆེན་ནག་པོ་དང་ལྔ༔ མཁའ་རི་ལྕམ་སྲིང་གི་སྲོག་སྒྲུབ་ནག་པོ་དང་དྲུག་གོ༔ འདི་ལས་མང་ཉུང་ལྷག་ཆད་ཡོད་པས་སྤང་བར་བྱ༔ གསུམ་པ་ལུང་བསྟན་གཏད་རྒྱ་བསྟན་པ་ནི༔ དུས་ཀྱི་སྙིགས་མ་ལྔའི་ཚེ༔ ཆོས་དར་ལ་མ་སྨིན་པས་ཆོས་དཔོན་ལོག་པའི་འཁྲུག་དཔོན་འབྱུང༔

ཕ་སྤུན་དམེ་འཁྲུག་དཪ་བས་སད་དང་སེར་བ་མུ་གེ་འབྱུང༔ ཟོག་པོས་གྲོང་ཡུལ་ཁེངས་པས་ཁྱི་སྨྱོན་མི་སྨྱོན་འབྱུང༔ བདུད་སྤྲུལ་ནག་པོ་མང་བས་རེ་ཆོས་བྱེད་ཡི་མུག་སྐྱེས༔ དེ་འདྲའི་དུས་སུ་འགྲོ་ལ་སྐྱབས་མགོན་མེད༔ པདྨ་བདག་གིས་མ་ཕོད་ཐེབ་ཅིག་བཞག༔ སྒྱུ་རུ་སྒྲ་ཞེས་ཁང་དམར་སྐྱ་བོའི་སར༔ སྐྱེད་མང་འཛོམས་བཀྲ་ཤིས་ཞེས་པའི་ཕ་མ་དེ་ཡང་སླར་ཨུ་རྒྱན་གྱི་ཐུགས་ཀར་རྫོགས་ནས་ལྷག་མེད་དུ་གྲོལ་ལོ༔ གཞན་ཡང་ལྷག་མེད་དུ་རྫོགས་པ་བདུན་བརྒྱ་ཙམ་བྱུང༔ དེ་ནས་ཨུ་རྒྱན་སྲིན་པོ་འདུལ་བ་ལ་ལྷོ་ནུབ་རྔ་ཡབ་གླིང་དུ་བྱོན་ཁར་ཡི་གེར་བཏབ་ནས་གཏེར་དུ་སྦས༔ སངས་རྒྱས་ཡེ་ཤེས་ཀྱི་མཚན་སྨོན་ཏེ༔ ཆོས་བདག་ཏུ་སྨོན་ལམ་བཏབ༔ མིང་སྲིང་ལྕམ་སྲིང་ལ་གཉེར་ནས་རྒྱ་གསུམ་གྱིས་གདབ་བོ༔

༈ ༔ གཉིས་པ་ཐིམ་ཡིག་བསྟན་པ་ནི༔ བཀའ་ཆེན་ཐིམ་ཡིག་དང་གཅིག༔ དབང་ཆོག་སྨིན་གྲོལ་དང་གཉིས༔ གསང་སྒྲུབ་ཡང་ཁོལ་དང་གསུམ༔ ལས་བྱང་གཏེར་བུམ་དང་བཞི༔ གསང་ཁྲིད་ཡང་ཐིག་ཀློང་ལ་མོས་སྣང་ཙམ་དུ་དྲི་མེད་ཀུན་དགའ་ཞེས༔ སྔགས་འཆང་སངས་རྒྱས་ཡེ་ཤེས་མཆོག་སྤྲུལ་འཁྲུངས༔ དེས་ནི་འབྲེལ་ཚད་མཁའ་སྤྱོད་གནས་སུ་ཁྲིད༔ ཆོས་བདག་ཆེན་པོ་བླ་མེད་དོན་གྱི་སྤྱོད༔ ཁྱུ་མཆོག་དེ་དྲུང་ཆོས་འདི་འཁོལ་བའི་དབུས༔ འཁོར་གྱི་དྭངས་མ་རིགས་ལྡན་ལྔ་ཙམ་འབྱུང༔ བདུད་སྤྲུལ་རྟགས་རའི་ཤ་མཚན་ཅན༔ ལོག་པའི་གཅེས་དེའི་བསྐྲད་ཐབས་གཅེས༔ ཤར་ཕྱོགས་གནས་སུ་བདུད་སྤྲུལ་ཁ་ནོན་ལ༔ མཚན་ལྡན་རིག་མ་དབང་པོ་ཤ་མཚན་ཅན༔ འབྲེལ་ཚད་ཐམས་ཅད་ཟག་མེད་དགོད་པ་འབྱུང༔ དེའི་བྱིན་རླབས་ཆོས་འདི་དར་ཆ་ཡང༔ ཤར་ཕྱོགས་ཨུ་རྒྱན་གྱི་མཐིལ་དུ་འབྱུང་བའོ༔ གཞན་དང་མི་འདྲ་ཁྱད་པར་ཟབ་ཆོས་འདི༔ ཡང་དག་ལས་ཅན་དེ་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ ཨུ་རྒྱན་དྲི་མེད་ཀུན་དགའི་གཏེར་མའོ༔

 

༈ བདེ་ཆེན་ཀུན་ཏུ་བཟང་མོ་ལ་ཕྱག་འཚལ་ལོ༔ གཡུ་རུ་སྒྲགས་ཀྱི་གྲོང་མོ་ཆེ་ཞེས་བྱ་བ༔ རྒྱ་གར་གྱི་བྷེ་ཏ་དང་མཉམ་པ༔ ཡོན་ཏན་དུ་མས་བརྒྱན་པའི་གནས༔ ཕུན་སུམ་ཚོགས་པའི་གྲོང་ཁྱེར་དེའི་བྱང་ཕྱོགས་ནས༔ ཤིང་ཙན་དན་དཀར་དམར༔ ཨ་ཀ་རུའི་ནགས་ཀྱིས་བསྐོར་བའི་ར་བ་ན༔ རྩྭ་བྱང་ཆུབ་མྱུ་གུ་སྐྱེས་པའི་སྐྱེད་མོས་ཚལ༔ མེ་ཏོག་ཀུ་མུ་ཏ་དང༔ པུན་དྷ་རི་ཀ་ལ་སོགས་པའི་ལྗོངས་ཀྱི་དབུས་ན༔ ཡིད་འོང་དུ་མས་སྤྲས་པའི་ཕོ་བྲང་ལྗོངས་ཀྱི་མཚལ་ལུ་སྐོར་ཞེས་བྱ་བ་གཅིག་ཡོད་དོ༔

༈ ༔ དེ་ནས་ལོངས་སྤྱོད་ནི་སུམ་ཅུ་རྩ་གསུམ་གྱི་གནས་དང་མཉམ་པ༔ འདུ་འཚོགས་མའི་འཁོར་གཡོག་ནི་མཐའ་ལས་འདས་པ་ཞིག་འདུག་ནས༔ དེ་རྣམས་ཀྱི་རྒྱལ་པོ་ནི་བཙད་པོ་རྡོ་རྗེ་གདན་པ་ཞེས་བྱ་བ༔ བཙུན་མོ་ནི་གསལ་གྱི་དོན་འགྲུབ་ལྕམ་མེ་ཞེས་བྱ་བ༔ རིགས་བཙུན་ཞིང་མངའ་ཐང་དང་ལྡན་པར་བཞུགས་སོ༔ རྒྱལ་པོ་ཡབ་ཡུམ་རྣམ་གཉིས་དེ་ལ་སྲས་རྒྱལ་བུ་གཉིས་དང༔ ལྷ་ལྕམ་དང་གསུམ་ཡོད་པ་ལས༔ ཀུན་གྱིས་ཆུང་ངུ་ལྕམ་པདྨ་ལྕམ་ཞེས་བྱ་བ༔ ངང་རིང་ཞིང་རྒྱུད་དུལ་བ༔ སྤྱོད་པ་ལྷུན་ཞིང་ངག་སྙན་པ༔ ལྟ་ན་སྡུག་ཅིང་ཡིད་དུ་འོང་བ༔ སྐུ་གཟི་མདངས་དང་ལྡན་པ༔ གསུང་སྙན་ངག་ཏུ་སྨྲ་བ༔ ཐུགས་སྙིང་རྗེའི་ངང་རྒྱུད་དང་ལྡན་པ༔ མཚན་དང་དཔེ་བྱད་དུ་མས་སྤྲས་པ་གཅིག་ཡོད་དོ༔ ལྷ་ལྕམ་དེ་ནི་མཚན་དང་ལྡན་པའི་བུ་མོ་ཞིག་ཡོད་པ༔ ཕྱི་ལྟར་དུ་གཟུགས་སྤྲུལ་མཆོག་གི་མཁའ་འགྲོ༔ ནང་ལྟར་དུ་རྡོ་རྗེ་ཕག་མོའི་མཁའ་འགྲོ༔ གསང་བ་ལྟར་དུ་ཀུན་ཏུ་བཟང་མོ་རོལ་པའི་མཁའ་འགྲོ༔ ལྷུན་གྲུབ་སྐུ་གསུང་ཐུགས་དང་ལྡན་པའི་མཚན་ལྡན་གཞོན་ནུ་དེ༔ དགོངས་པ་ཆོས་ཉིད་ཀྱི་དབྱིངས་ན་བཞུགས་ནས་ཀྱང༔ གཟུགས་སྐུ་རྣམ་གཉིས་ཀྱིས་འགྲོ་བའི་དོན་མཛད་པ༔ རྒྱལ་བའི་ཐུགས་རྗེ་སྐུལ་བ་དང༔ ཐུགས་བསྐྱེད་སྨོན་ལམ་གྱི་དབང་གིས༔ ཡུམ་གྱི་བདེ་བའི་ལྷུམས་སུ་ཞུགས་ཏེ༔ ས་ཕོ་བྱི་བའི་ལོའི་དཔྱིད་ཟླ་ར་བའི་ཚེས་བཅུའི་སྔ་དྲོར་སྐུ་བལྟམས་ནས༔ མཛད་པའི་ཡོན་ཏན་གྱི་རྟགས་མང་དུ་གྲུབ་པས༔ ཐེ་ཚོམ་དང་བྲལ་ཏེ་མཚན་ཉིད་དང་ལྡན་པར་ཡིད་ཆེས་སོ༔ མཛད་པའི་རྣམ་ཐརམངོན་པར་དགའ་བ་འདི་ལྟ་བུ་ཉིད་དོ༔

ཡུམ་གྱི་ལྷུམས་སུ་ཞུགས་ནས་ཟླ་བ་གཅིག་གི་ངོ་ལོན་པའི་ཚེ་ན༔ ཡུམ་གྱི་སྣང་བ་ལ་ཉམས་སམ་དངོས་སུ་བུད་མེད་དཀར་མོའི་ཚོགས་མང་པོས་ཁྲུས་གསོལ་བ་དང༔ སྔོན་མོའི་ཚོགས་མང་པོས་མེ་ཏོག་འཐོར་བ་དང༔ སེར་མོའི་ཚོགས་མང་པོས་བདུད་རྩི་འདྲེན་པ་དང༔ དམར་མོའི་ཚོགས་མང་པོས་རྒྱན་འདོགས་པ་དང༔ ལྗང་མོའི་ཚོགས་མང་པོས་སྐོར་བ་བྱེད་པ་དང༔ གཞོན་ནུ་བཅུ་དྲུག་མ་ལང་ཚོ་རྒྱས་པས་ནུབ་སྲོད་ཀྱི་དུས་སུ༔ ཐུན་མི་བཅག་པར་གསོལ་འདེབས་ཀྱི་སྒྲ་སྒྲོགས་པ་བྱུང་ངོ༔ སྐུ་བཙས་ནས་ཟླ་བ་གཅིག་ལོན་པའི་ངོས་ན་སྐུ་ལ་འོད་འདོམ་གང་བ༔ གསུང་ལ་ཆོས་ཀྱི་རང་སྒྲ༔ ཐུགས་ཀྱང་འོད་གསལ་མཉམ་བཞག་དང་ལྡན༔ སྐུ་བཙས་ནས་ཟླ་བ་བརྒྱད་ལོན་པ་ན༔ ཉིན་གྱི་དུས་སུ་འཇའ་དང་འོད་ཀྱི་གུར་ནང་དུ་བཞུགས་པ་དང༔ ནུབ་ཀྱི་དུས་སུ་མཁའ་འགྲོ་མ་གཞོན་ནུའི་སྐུ་ཚོགས་མང་པོ་དང་རོལ་རྩེད་མཛད་དོ༔ ལོ་གཅིག་བཞེངས་པའི་དུས་ན༔ གཞོན་ནུ་ཕོ་མོ་འཁོར་མང་པོ་བསྡུས་ནས་འོག་མིན་གྱི་བཀོད་པ་ལ་སོགས་པ་དབང་བདེ་ཆེན་རོལ་པའི་སྤྱོད་པ་སྐྱོང་བར་མཛད་དོ༔

དགུང་ལོ་བརྒྱད་བཞེས་པའི་དུས་ན༔ མངོན་པར་ཤེས་པ་དང་རྫུ་འཕྲུལ་གྱི་རྟག་ཏུ་མ་ངེས་པས་དོན་སྟོན་པར་མཛད་དོ༔ དགུང་ལོ་བཅུ་གཅིག་བཞེས་པའི་དུས་ན༔ རྒྱུད་སྡེ་བླ་ན་མེད་པའི་ཆོས་མང་དུ་གསུང་བ་དང༔ ཡིད་སྤྱོད་བདེ་བའི་སྤྱོད་པ་མང་པོས་ཡུལ་གྱི་སྐྱེ་བོ་མང་པོ་དབང་དུ་བསྡུས་སོ༔ དགུང་ལོ་བཅུ་དྲུག་བཞེས་པའི་དུས་སུ༔ རྒྱ་གར་བྷི་རྱའི་རྒྱལ་བུས་བཙུན་མོ་བླང་དུ་བཏང་བའི་མི་བྱུང་སྟེ༔ དེ་ནས་ཡབ་རྒྱལ་པོ་བཙད་པོ་རྗེ་འབངས་རྣམས་ཚོགས་ནས༔ གྲོས་ཀྱི་སྣ་བསྟུན་པ་ལ་ཡབ་རྒྱལ་པོ་བཙད་པོའི་ཞལ་ནས༔

༈ ༔ ཀྱེེ་ལྷ་ལྕམ་པདྨ་ལྕམ་མ་འདི༔ ཡོན་ཏན་ལྡན་པའི་བུ་མོ་ཡིན༔ རྒྱལ་བུ་མིན་པས་བཞག་དབང་མེད༔ དེ་བས་རྒྱ་གར་ཡུལ་ཕྱོགས་དེར༔ བྷི་རྱའི་རྒྱལ་བུ་ལ༔ བཙུན་མོར་གཏང་ཞིག་བློས་ལོན་པས༔ རྫོངས་དང་བཅས་ནས་ཐོངས་ཤིག་གསུངས༔ ཕྱི་བློན་རྣམས་ཀྱིས་ཞལ་ན་རེ༔ བུ་མོ་དགའ་ཡང་ཕ་ཡུལ་བཟུང་བ་མེད༔ རྒྱ་གར་ཡུལ་ན་མི་ས་ཤིན་ཏུ་བཟང༔ ད་ལྟར་བློན་པོའི་ཚོགས་ཀྱིས་སྐྱེལ་ཐུང་བྱས་ནས་བཏང༔ རྒྱ་གར་ཡུལ་ན་ཕྱོགས་སྐྱོང་ཡུལ་ཁམས་སྲུང་བ་ལེགས༔ གལ་ཏེ་བཏང་སར་མི་འགྲོ་བུ་མོ་སྤྱུག་པར་འཐད༔ བློན་པོ་ཐམས་ཅད་ཁ་འདྲིལ་ཕྱོགས་གཅིག་མཐུན༔ ཞེས་ཟེར་རོ༔ ནང་བློན་རྣམས་ཀྱིས་ཞལ་ན་རེ༔ འདི་འདྲའི་ལྷ་ལྕམ་ངོ་མཚར་རྨད་བྱུང་མ༔ ཐག་རིང་སྤྱུག་པའི་སེམས་ཀྱིས་ཕོད་པ་ན༔ གལ་ཏེ་སྤྱུག་ན་ཡུལ་གྱི་བཅུད་རྣམས་ཉམས༔ ཐག་རིང་བསྙེན་པས་གྲོང་པའི་ཆོམ་རྐུན་དགའ༔ ཐག་རིང་མི་གཏང་རང་ཡུལ་བོད་དུ་བཟུང༔ ནང་བློན་དག་ལ་རྒྱལ་པོའི་བཀའ་གནང་ཞུས༔ ཞུས་ལ་མི་གསན་ཕྱི་བློན་གྲོས་བསྟུན་ནས༔ ལྷ་ལྕམ་མི་བཞུགས་རྒྱ་གར་བཏང་བ་ན༔ ནང་བློན་མི་སྡོད་འཁོར་དང་བཅས་པ་ཀུན༔ ཡུལ་ཁམས་བཏེག་ནས་ལྷ་ལྕམ་རྗེས་ཕྱིར་འབྲང༔ མིང་པོ་ཀུན་དང་ཡུམ་ལ་གྲོས་བསྒྲོས་ནས༔ བོད་འབངས་ཀུན་གྱི་ལྷ་ལྕམ་ཨེ་བཞུགས་ལྟ༔ མི་བཞུགས་པ་ན་ནང་བློན་གྲོས་སྣ་ཟད༔ ཅེས་ཕྱོགས་གཅིག་ཏུ་ཁ་མཐུན་ནོ༔ དེ་ནས་ཡུམ་དང་མིང་པོ་ལ་ཞུས་པས༔ ཡུམ་བཙུན་མོའི་ཞལ་ནས༔ བདག་གི་ལྷ་ལྕམ་ཡོན་ཏན་ཀུན་ལྡན་འདི༔ འབྲལ་བར་མི་ཕོད་རྒྱ་གར་ཡུལ་མི་བཏང༔ རང་ཡུལ་ཡིན་པས་བོད་ཀྱི་ཤིང་ཡུལ་བཟུང༔ རྒྱལ་བུ་བས་ཀྱང་རིགས་ལྡན་བུ་མོ་ལྷག༔ ཆོམ་རྐུན་འཇིགས་པའི་ཡུལ་དུ་མི་བཏང་ནས༔ ཕོ་བྲང་ནང་དུ་ལོ་ཤས་བཞུགས་སུ་ཆུག༔ གསོལ་བ་ཐོབ་དང་དགོས་འདོད་འབྱུང་བར་ངེས༔ ཞེས་གསུངས་སོ༔

མིང་པོ་སྐུ་མཆེད་རྒྱལ་བུ་རྣམ་གཉིས་ཀྱི་ཞལ་ནས༔ བདག་གི་སྲིང་མོ་ལྷ་ལྕམ་ཡིད་འོང་འདི༔ ཀུན་དང་མི་འདྲ་ངོ་མཚར་རྨད་བྱུང་ཡང༔ ཕ་ཡུལ་མི་ཟིན་གཉེན་ཡུལ་བཙལ་བར་འཐད༔ བོད་འབངས་ཡུལ་འདི་ས་ཞིང་བྱེ་མའི་ཁམས༔ ཡོན་ཏན་མི་མཐུན་རིགས་ངན་དབུལ་པོའི་གནས༔ དེ་བས་ཞིང་མཆོག་རྒྱ་གར་ཡུལ་ན་བཟང༔ སྐྱིད་པའི་འབྱུང་གནས་བང་མཛོད་ཁྲིམས་ལྡན་ཚོགས༔ ལོངས་སྤྱོད་ལྔ་ལྡན་འདོད་ཡོན་དགུ་དང་ལྡན༔ བྷི་རྱའི་རྒྱལ་བུ་ཤཱཀྱའི་གདུང་ལས་ཆད༔ དེ་ཡི་གྲོགས་ལ་ལྷ་ལྕམ་འདི་བཟང་ན༔ མྱུར་པོར་བསྐུལ་ལ་བློན་པོས་སྐྱེལ་ཐུང་གྱིས༔ རྫོངས་དང་བཅས་ནས་གཉེན་པོའི་ལག་ཏུ་སྤྲོད༔ ཅེས་གསུངས་སོ༔ གྲོང་ཡུལ་ཕོ་བྲང་གི་མི་རྣམས་ནི༔ ངུ་ཞིང་སྨྲེ་སྔགས་ཀྱི་སྡུག་བསྔལ་ཕྱོགས་གཅིག་ཏུ་བྱེད་དོ༔ རང་རེའི་ལྷ་ལྕམ་ཡོན་ཏན་ཀུན་གྱི་འབྱུང་གནས༔ དགོས་འདོད་འབྱུང་བའི་ནོར་བུ་འདི༔ བོད་དུ་མི་བཞུགས་རྒྱ་གར་བཏང་བ་ན༔ ཡུལ་ཁམས་ཀུན་གྱི་བཅུད་རྣམས་ཉམས་པར་འགྱུར༔ རྗེ་འབངས་ཀུན་ཀྱང་བཀྲེས་ནས་འཆི་བར་འགྱུར༔ བསོད་ནམས་ཐམས་ཅད་མཐའ་འཁོབ་ཕྱོགས་སུ་འབོ༔ ཡོན་ཏན་ཉམས་ནས་རྒྱལ་སྲིད་ག་ལ་ཟིན༔ དེ་བས་མགྲིན་གཅིག་གསོལ་བ་བཏབ་ལ་བཟུང༔ ཅིས་ཀྱང་མི་གསན་རྒྱ་གར་བཏང་བ་ན༔ རྨོངས་པའི་འབངས་རྣམས་ཡུལ་ཕྱོགས་དེ་རུ་འགྲོ༔ བློ་ཕྱོགས་གཅིག་ཏུ་ཐམས་ཅད་མགྲིན་པར་མཐུན༔ ཞེས་ཟེར་ནས་བློ་ཕྱོགས་གཅིག་ཏུ་མཐུན་ཀྱང༔

༈ ༔ ཡུམ་དང་ནང་བློན་འབངས་འཁོར་རྣམས་ནི་དབང་ཆུང་བས༔ ལྷ་ལྕམ་བོད་ཀྱི་ཡུལ་ཁམས་བཟུང་བའི་དབང་མ་ཐོབ༔ ཡབ་བཙད་པོ་དང་སྲས་རྒྱལ་བུ་སྐུ་མཆེད་གཉིས་དང་ཕྱི་བློན་རྣམས་དབང་ཆེ་བའི་སྟོབས་ཀྱིས༔ ལྷ་ལྕམ་རྒྱ་གར་དུ་བརྫང་པར་དམ་བཅས༔ རྒྱ་གར་བྷི་རྱའི་རྒྱལ་བུ་མངགས་པའི་སྙེའོ་རྟ་པ་བརྒྱ་ཙམ་གྱིས༔ གསེར་གྱི་དུང་ཙེ་ལྔ་བརྒྱ་ཙམ་བསྣམས་ཏེ༔ ལྷ་ལྕམ་གྱི་རིན་དུ་ཕུལ༔ ལྷ་ལྕམ་གྱིས་རྫོང་བསླངས་ནས་གླང་པོ་ཆེ་ལྔ་བརྒྱ་ལ་བཟའ་བ་དང་བཏུང་བའི་ཡོ་བྱད་རྣམས་བཀལ༔ གླང་པོ་ཆེ་ལྔ་བརྒྱ་ལ་གོས་དང་རྒྱན་རྣམས་བཀལ༔ གླང་པོ་ཆེ་ལྔ་བརྒྱ་ལ་རིན་པོ་ཆེ་ནོར་གྱི་དབྱིག་དང་མཆོད་གནས་ཀྱི་རྟེན་མཐའ་ཡས་པ་བཀལ་ནས་བརྫངས༔ གཞན་ཡང་རྒྱན་འདོགས་པའི་བུ་མོ་ལྔ་བརྒྱ༔ ཁྲུས་གསོལ་བའི་བུ་མོ་ལྔ་བརྒྱ༔ ཟས་གཡོ་བའི་བུ་མོ་ལྔ་བརྒྱ༔ སྐོམ་སྤྱད་ནོར་ལ་དབང་བའི་བུ་མོ་ལྔ་བརྒྱ༔ སྡོང་གྲོགས་ཀྱི་ཁྱེའུ་ལྔ་བརྒྱ་ཕྲག་གསུམ་དང་བཅས་ནས༔ ནེའུ་སིང་ནགས་མའི་ལྗོངས་ལ༔ ཤིང་མོ་ཡོས་ཀྱི་ལོ་དཔྱིད་ཟླ་ར་བའི་ཚེས་བཅོ་ལྔའི་ཉིན་པར་བརྫང་ངེས་པར་དམ་བཅས་པ་ལ༔ རྒྱ་གར་ནུབ་ཕྱོགས་ནས་སྤྲུལ་པའི་སློབ་དཔོན་སྤོར་ཐང་རྩིས་ལ་མཁས་པ་ཞིག་བྱུང་བ་ལ༔ དེ་ལ་སྙེ་བོས་ཁྱེའུ་ལྔ་བརྒྱའི་དུས་དང༔ སྐར་མའི་རྟེན་འབྲེལ་རྩིས་པས༔ ཞིང་ཁམས་དང་འབྱུང་བ་འཁྲུག་པས༔ རྒྱ་གར་དུ་འགྲོ་བའི་དུས་མ་བྱུང་བས༔ ལོ་ཤས་ཀྱི་དུས་སུ་འཐེན་པར་དམ་བཅས༔

༈ ༔ དེ་ནས་བཙད་པོའི་ཕོ་བྲང་ནས་ཤར་ཕྱོགས་སུ་ཉེ་བ་ན༔ ཆུ་འཕྲང་ཟུང་མོ་མཁར་ཞེས་བྱ་བ༔ ཤིང་ཡུལ་བྱེ་མའི་ཐང་ཆེན་པོ་དེ་ན༔ རྒྱལ་པོ་ཟླ་བ་འོད་འཇོམས་ཞེས་བྱ་བ་ལ༔ རྒྱལ་བུ་ནོར་བུ་དཀར་གསལ་ཞེས་བྱ་བ་གཅིག་ཡོད་དོ༔ དེས་ལྷ་ལྕམ་གྱི་སྐུ་ཆེ་བའི་ཡོན་ཏན་དང༔ སྙན་པ་ཐོས་ནས་འབངས་ཀྱི་བློན་པོ་ལྔ་བརྒྱ་ལ༔ ནོར་བུ་རིན་པོ་ཆེའི་བང་མཛོད་ལྔ་བརྒྱ་ཕྲག་གཉིས་བསྐུར་ནས༔ ལྷ་ལྕམ་གྱི་དྲུང་དུ་འཚམས་ཀྱི་གཉེ་བོ་དང་བཅས་པ༔ བློ་བཟང་བ་དང་ཤེས་རབ་ཆེ་བ་རྣམས་མངགས་ཏེ་བཏང་བ་དང༔ དེ་རྣམས་ཀྱིས་རྒྱལ་བུའི་བཀའ་བཞིན་སྒྲུབ་པར་དམ་བཅས་ནས་ལྷ་ལྕམ་གྱི་དྲུང་དུ་འདུག་པ་ལ༔ ལྷ་ལྕམ་གྱི་གསུངས་ནས༔

ཀྱེ་རྒྱལ་བུའི་བཀའ་བྱོན་རིན་ཆེན་བང་མཛོད་འདི༔ ཁོ་མོ་བདག་ལ་རིན་དུ་མི་འོས་ཀྱང༔ སྔོན་གྱི་ལས་ཀྱིས་སྨོན་ལམ་མཚམས་སྦྱར་ནས༔ རྣམ་དག་བསམ་པ་གཉེ་བོ་བཏང་བ་ལེགས༔ རྒྱལ་བུ་ཁྱེད་ལ་ལོག་སྣང་མི་མངའ་ཡང༔ ལྷ་ལྕམ་བདག་ནི་དམ་ཆོས་ཡིད་ལ་སྨོན༔ སོ་སོའི་རང་ནོར་བང་མཛོད་ནང་དུ་ཟློག༔ གཉེ་བོ་ཐམས་ཅད་ཁ་དམ་ལྟོ་འགྲང་པའི༔ བཟའ་བཏུང་ལོངས་སྤྱོད་རྨོངས་པ་མེད་པར་སྐྱོང༔ འོག་མིན་གནས་སུ་ཞལ་འཇལ་སྨོན་ལམ་འཚལ༔ ཞེས་པའི་བཀའ་ཤོག་སྒྲོམ་བུ་མངགས་ནས༔ གཉེ་བོ་རྣམས་རང་ཡུལ་དུ་བཟློག་གོ༔

༈ ༔ གཞན་ཡང་རྒྱ་གར་བྷི་རྱའི་རྒྱལ་བུས་མངགས་པའི་གཉེན་པོ་རྣམས་ཀྱིས་ནང་ནས་ཤེས་རབ་ཆེ་ཞིང་བློ་རྣོ་བ་རྣམས༔ ལྷ་ལྕམ་གྱི་ལོགས་སུ་བཏུད་ནས༔ འདོད་པའི་ནོར་རྫས་ཀྱིས་ཁེངས་པར་བྱིན་ཏེ༔ རྒྱལ་བུ་ལ་བཀའ་ཤོག་གི་སྒྲོམ་བུ་འདི་ལྟར་མངགས་ནས༔ བློན་པོ་རྣམས་རང་ཡུལ་དུ་བཟློག་གོ༔ ཀྱེ་རྒྱལ་བུ་ཆོས་ལྡན་ཤཱཀྱའི་གདུང་ལས་ཆད༔ བསོད་ནམས་གངས་རིར་བདུད་རྩིའི་འོ་རྒྱུན་འབབ༔ དཔེ་བྱད་སྐུ་དང་བལྟ་བས་ཆོག་མི་ཤེས༔ སྙན་པའི་བ་དན་ཞིང་ཁམས་མང་ཡུལ་ཁྱབ༔ གཞོན་ནུའི་གར་གྱིས་བཙུན་མོ་རོལ་བར་བྱེད༔ འཛུམ་པའི་འོད་ཀྱིས་འཁོར་འབངས་བདེ་བར་བཀོད༔ སེམས་དཔའ་ཁྱེད་ནི་གྲོགས་སུ་དགེ་ནའང༔ དགའ་བའི་སེམས་ཀྱིས་འབྲལ་བར་མི་འོས་ཀྱང༔ ལྷ་ལྕམ་བདག་ནི་དམ་ཆོས་ཡིད་ལ་སྨོན༔ གཅིག་པུར་མི་མེད་ལུང་སྟོང་བསམ་གཏན་སྒྲུབ༔ དམན་པའི་ས་བཟུང་ཧྲུལ་པོའི་གོས་གོན་ནས༔ བཅུད་མེད་ཟས་སུ་བསམ་གཏན་འཚོ་བ་བཟང༔ བཟའ་བཏུང་འཚོ་བ་ཡིད་ཀྱིས་སྨོན་རྒྱུ་མེད༔ བསམ་གཏན་མཁར་པོར་ཉམས་དྲོད་བདེ་བ་སྒྲུབ༔ ཕོ་བྲང་རྗེ་འབངས་རྨི་ལམ་སྒྱུ་མ་འདྲ༔ ངེས་པར་མི་རྟག་སྣང་བའི་དཔེ་ཆ་ཙམ༔ ཚེ་འདིར་གྲོགས་ཀྱི་ཚུལ་ལ་འབྲལ་མི་བྱ༔ ཕྱི་མའི་དུས་ན་འོག་མིན་ཞལ་མཇལ་སྨོན༔ ཞེས་བཀའ་ཤོག་སྒྲོམ་བུ་དང་བཅས་པས་ངོམས་པར་བྱས་སོ༔

༈ ༔ ཡུལ་ཕྱོགས་ཀྱི་འདོད་མི་རྣམས་ལ༔ ཕ་མིང་རྒྱལ་བློན་དང་བཅས་པས་སྟེར་བར་ཁས་བླངས་དམ་བཅས༔ རྫོངས་ཀྱི་ནོར་བུ་བང་མཛོད་དང་བཅས་པ་བྱིན་ཀྱང༔ ལྷ་ལྕམ་དམ་ཆོས་ཡིད་ལ་སྨོན་ནས༔ ཅིས་ཀྱང་རྒྱལ་པོའི་ཁབ་ཏུ་མི་འགྲོ་བར་ཡིད་ཐག་བཅད་དེ༔ བཙུན་མོ་བྱེད་པར་ཁས་མི་ལེན༔ ཕྱོགས་ཀྱི་གཉེ་བོ་རྣམས་ལྷ་ལྕམ་མ་ཐོབ་པར་ངོ་གནོང་ཞིང་ཡིད་ཕམ་པར་བྱེད༔ ཕ་མིང་རྒྱལ་བློན་རྗེ་འབངས་དང་བཅས་པ་ཀུན་ཀྱང༔ ཕྱོགས་གཅིག་ཏུ་ཡིད་མི་བདེ་སྟེ༔ གལ་ཏེ་ལྷ་ལྕམ་གཏོང་སར་མི་འགྲོ་ན་བཏང་བར་ཁས་ནི་བླངས༔ མངགས་པའི་རིན་ནོར་རྫས་ནི་ཟོས༔ སོ་སོའི་ཡུལ་ན་གཉའ་པོ་ནི་མངགས༔ རང་རང་ཡུལ་དང་བཅས་པ་འདུག་ངེས༔ ད་ནི་རྗེ་འབངས་ཡུལ་འཁོར་དང་བཅས་པ་གཉེན་པོའི་དམག་གིས་འཇོམས༔ བཅུད་ཆེ་བའི་ནོར་རྫས་ཀུན་ཀྱང་འཕྲོག༔ སྣང་དག་པའི་ཕོ་བྲང་ཀུན་ཀྱང་འཇིག༔ བློ་ཡོད་པའི་བློན་འབངས་རྣམས་ཀྱང་གསོད༔ རྒྱལ་པོ་སྲས་དང་བཅས་པ་ཡང་ཡུལ་ཕུད༔ ལྷ་ལྕམ་ཉིད་ཀྱང་དབང་མེད་དུ་ཕྲོགས་ཏེ་ཁྱེར་ནས་འགྲོ༔ དེའི་ཚེ་ཐམས་ཅད་གནོང་ཞིང་འགྱོད་པར་འགྱུར་བས༔ ད་རུང་ལྷ་ལྕམ་ལ་གྲོས་བཏབ་པར་རིགས་ཅེས་ཟེར་ནས༔ ཕྱོགས་གཅིག་ཏུ་བཀའ་གྲོས་པ་ལས༔ དེ་ནི་ཅིས་ཀྱང་འཐད་ངེས་སོ་ཟེར་ནས༔ རྒྱལ་པོ་དང་ཕྱི་བློན་རྣམས་གྲོས་བསྟན་པ་ལ༔ ཡབ་རྒྱལ་པོའི་གསུང་ནས༔

༈ ༔ ཀྱེ་བློན་པོ་རྣམས་ཀྱིས་སྔོན་སྤྱོད་སྟབས་མ་གཟོབ༔ མཆུ་ཟུང་ཚིག་སྦོམ་ཕྲ་མ་སྐྱོར་ལ་མཁས༔ རྩུབ་མོའི་ཚིག་གིས་ལྷ་ལྕམ་ཐུགས་དཀྲུགས་ནས༔ མི་འདོད་གཏམ་ཁ་བཅུད་ལོག་ངེས་མེད་སྟོན༔ བཏང་སར་མི་འགྲོ་ཕོ་བྲང་འཁྲས་ནས་སྡོད༔ ལེགས་ཉེས་བློན་ལ་ཐུག་པའི་གྲོས་ཐོབ་ཅིག༔ ཅེས་ཕྱི་བློན་རྣམས་ལ་བསྒོའོ༔ ཕྱི་བློན་རྣམས་ཀྱི་ཞལ་ནས༔ ཀྱེ་རྒྱལ་པོ་ཡབ་སྲས་ནོར་ལ་ནག་པ་ཡིན༔ རྫོངས་ཀྱིས་མ་བཏན་ནོར་རྫས་ངན་པས་ལན༔ ནོར་གྱིས་མ་གསོས་རྐང་མགྱོགས་འགྲོས་ལ་ངན༔ འདོད་རྫས་མ་སྦྱིན་བུ་ཡང་མགུ་མི་འགྱུར༔ སྐལ་བ་ཕམ་ན་གྲོགས་ཀྱང་འཁང་བར་བྱེད༔ ཟས་ནོར་མེད་ན་ལྷ་ལྕམ་ག་ལ་འགྲོ༔ འདོད་ཚད་སྦྱིན་ལ་རྒྱལ་པོ་གྲོས་ཐོབ་ཅིག༔ ཅེས་གསོལ་ཏེ༔ དེའི་སྐབས་སུ་ལྷ་ལྕམ་གྱི་ཐུགས་དགོངས་ལ༔ སྐད་ཅིག་དྲན་པའི་དུས་སུ་དམ་ཆོས་མ་བྱས་ན༔ ལེ་ལོའི་ངང་ལ་མི་ཚེ་སྟོང་ཟད་འགྲོ༔ དེ་བས་དཀའ་བ་ཆོས་ཕྱིར་སྤྱད་ན་འཐད༔ ཐབས་དང་གཡོ་ལ་མཁས་པ་བསྟེན་ནས་བསྒྲུབ༔ བདག་གིས་བདག་ཏུ་ཕ་མ་བཟང་བས་ན༔ ཅིས་ཀྱང་ཞུ་བ་ནན་ཆེར་བགྱིད་བསམས་ཏེ༔ ཡབ་ཡུམ་དྲུང་དུ་ནན་ཆེར་འདི་སྐད་ཞུས༔

༈ ༔ ཀྱེ་འཁོར་མེད་དྲིན་གྱིས་གཟོ་བ་བཀའ་དྲིན་ཅན༔ གདུང་བའི་སེམས་སྲོག་འཚོ་བའི་ཡོན་ཏན་རྒྱལ༔ དམ་ཆོས་རྗེས་ཕྱིར་གྲོགས་མཛད་མཆོག་གི་དྲིན༔ དགོངས་པ་འགལ་མེད་བདག་གིས་ངེས་སྒྲུབ་ན༔ དེ་ཚེ་ཡབ་ཡུམ་ཀུན་ཀྱང་སྣང་སེམས་བདེ༔ དམ་ཆོས་བགྱིད་ལ་མི་དགག་བཀའ་གནང་ཞུ༔ བདག་གིས་བསམ་གཏན་གནས་ལུགས་སྐྱོང་བ་ན༔ རྗེ་འབངས་ཀུན་ཀྱང་བཀྲ་ཤིས་བདེ་བ་འབྱུང༔ མི་མེད་ལུང་སྟོང་དཀའ་བ་སྤྱད་པར་ཞུ༔ ཞེས་ཞུས་པས༔ རྒྱལ་བློན་རྗེ་འབངས་ཐམས་ཅད་ཕྱོགས་གཅིག་ཏུ་བསྟུན་ནས༔ ཁྲོས་པའི་ངོས་བསྟན་ང་རྒྱལ་གྱི་ལག་ངར་བསྒྲངས་ཏེ༔ འཁང་པའི་ཚིག་རྩུབ་མོ་རིམ་གྱིས་འདི་སྐད་བསྒོ༔ ཡབ་རྒྱལ་པོའི་ཞལ་ནས༔

༈ ༔ ཀྱེ་རྨད་བྱུང་རིགས་ལྡན་ཡིད་འོང་ལྷ་ལྕམ་ཁྱོད༔ གཞོན་ནུའི་ལུས་ལ་དགའ་བའི་གཅེས་པར་གསོས༔ ལང་ཚོ་དར་རྒྱས་སྤྱོད་པ་བདེ་བའི་ཚེ༔ རང་དབང་ཐོབ་ཚེ་ཡབ་ཀྱི་བཀའ་བཅགས་ནས༔ བཏང་སར་མི་འགྲོ་བཞག་སར་ཁྱོད་མི་སྡོད༔ རྒྱ་གར་ཡུལ་ནི་མཛེས་པའི་གྲོང་ཁྱེར་ལ༔ ཡོན་ཏན་མི་མཐོང་ལྷ་ལྕམ་ཡི་རེ་མུག༔ རྒྱལ་བུ་རྗེ་འབངས་ནོར་བུའི་བང་མཛོད་ལ༔ ངེས་ཤེས་མི་སྐྱེ་ལྷ་ལྕམ་དྲན་པ་བརྟུལ༔ གཉེ་བོ་རྗེ་འབངས་དགའ་བ་སྤྱོད་ཚད་ལ༔ བསམ་བློ་མི་འཁྱུད་འགྲོས་ཀྱིས་མཐའ་རེ་རྡུགས༔ ལྷ་ལྕམ་ཁྱོད་ལ་ཕ་དྲིན་ཅི་ཡོད་ཀྱང༔ བཟང་གིས་མི་འཇལ་ངན་ལན་ཡི་རེ་མུག༔ བསམ་བློ་ཡོད་ན་ཡབ་ཀྱི་བཀའ་མ་བཅག༔ སྐྱིད་པའི་འབྱུང་གནས་རྒྱ་གར་ཡུལ་དུ་སོང༔ ཞེས་གསུངས་སོ༔ ཡུམ་བཙུན་མོའི་ཞལ་ནས༔

༈ ༔ ཀྱེ་ཤ་ལས་ཆད་པའི་ལྷ་ལྕམ་ཡིད་འོང་ཁྱོད༔ གྲོས་ལ་མ་ཆུང་ཡུམ་གྱི་བཀའ་མ་བཅག༔ བཏང་སར་མི་འགྲོ་ཚིག་རྗེས་དོན་ལ་གསོབ༔ རྒྱ་གར་ཡུལ་དུ་ས་ཐག་རིང་ནའང༔ ཟུང་མོ་མཁར་ནི་བདེ་སྐྱིད་འབྱུང་གནས་ཡིན༔ ཕོ་བྲང་ཡུལ་དེར་ནོར་བུའི་བང་མཛོད་ཡིན༔ སྐལ་བ་མི་ཕམ་ཁྱོད་ཀྱི་གྲོགས་སུ་བཟང༔ ཡུམ་གྱིས་བང་མཛོད་ནོར་སྐལ་ཁྱོད་ལ་སྦྱིན༔ ཕོ་བྲང་བཟུང་ན་བདེ་སྐྱིད་ཕུན་ཚོགས་འབྱུང༔ དམ་ཆོས་ཕལ་ཆེར་ཟིལ་གྱིས་ནོན་པར་བྱེད༔ དེ་བས་རྒྱལ་སྲིད་ཆོས་ཀྱིས་འཁོར་ལོ་ཡིན༔ བསམ་པས་མ་ཕམ་ཡུམ་གྱི་བཀའ་ལ་ཉོན༔ ཅེས་གསུངས་སོ༔ རྒྱལ་བུ་དང་ཕྱི་བློན་རྣམས་ཀྱི་ཞལ་ནས༔

༈ ༔ ཀྱེ་མ་རང་རྒྱལ་ལྟ་བ་མཐོ་བ་ཡི༔ རྨོངས་པར་གྱུར་པའི་ལྷ་ལྕམ་ཁྱོད་ཉོན་ཅིག༔ བཏང་སར་མི་འགྲོ་བསླབ་པའི་ཚིག་མི་ཉན༔ ཁྲེལ་མེད་རྗེ་འབངས་དགྲ་ཡི་ལག་ཏུ་གཏོད༔ དེ་བས་རྒྱལ་སྲིད་དང་དུ་མི་ལེན་པའི༔ འཁྲུལ་རྟོག་དོན་མེད་ལུང་སྟོང་འགྲིམ་སྐད་སྨྲ༔ གཅེས་ཁ་མ་ཆེ་རྒྱ་གར་ཡུལ་དུ་སོང༔ ཅིས་ཀྱང་མི་འགྲོ་ནག་གི་ཁྲིམས་ལ་གཏུག༔ བསམ་བློ་ཡོད་ན་རང་གྲོས་གཞིག་པ་ཐོང༔ བུ་མོ་མི་ཉན་ཕ་མིང་དུར་ས་ཡིན༔ གལ་ཏེ་ལྷ་ལྕམ་རྒྱ་གར་མི་འགྲོ་ན༔ ཕ་མིང་ཀུན་ཀྱང་གཉེ་བོའི་དམག་གིས་འཇོམས༔ ཡུལ་ཁམས་ཀུན་ཀྱང་མི་རིང་ཇག་པས་འཇོམས༔ གྲོགས་ཀྱི་གཉེན་ཡང་དགྲ་ཟླའི་རྒྱལ་པོར་འགྱུར༔ བསླབ་ཀྱིས་མི་ཉན་རྒྱལ་སྲིད་འཕུང་བའི་འདྲེ༔ བསམ་བློ་ཡོད་ན་ཟས་ནོར་འཕང་མེད་སྟེར༔ རྒྱལ་བློན་ཀུན་ཀྱང་ཁྱོད་ཀྱི་གྲོགས་སུ་བརྩོན༔ མཐུན་འབྲེལ་སྒྲུབ་པ་ལྷ་ལྕམ་མཛངས་མ་ཡིན༔ བསླབ་ལ་ཉན་ན་ཁྱོད་ཀྱིས་ཅི་དགའ་སྒྲུབ༔ ཅེས་གསུངས་སོ༔

༈ ༔ དེ་ནས་ལྷ་ལྕམ་གྱི་ཐུགས་དགོངས་ལ༔ རྒྱལ་བློན་འབངས་དང་བཅས་པ་འདི་རྣམས་ཆོས་ལ་གནག་ཅིང་གདུག་སེམས་ཆེ་བས༔ རྩུབ་མོའི་ཚིག་སྨྲས་ན་ནི་མི་སྐྲག༔ ཞི་བའི་ངང་གིས་ཞུས་ན་ནི་མི་གསན༔ འདོད་པའི་ནོར་གྱི་སྒྱུ་ལུས་ཀྱི་རྒྱན་ཆ་རྣམས་བཀྲོལ་ནས༔ རྒྱལ་བློན་རྗེ་འབངས་རྣམས་ལ་སོ་སོར་བགོས་ནས་ཕུལ་ཏེ༔ ཐབས་མཁས་ཤིང་གཡོ་ཆེ་བའི་སྒོ་ནས༔ འཇམ་པའི་ཚིག་གིས་ནན་ཏན་ཡང་དང་ཡང་དུ་ཞུས་ནས༔ ལྷ་ལྕམ་ང་ཆོས་བྱེད་དུ་སྟེར་རམ༔ ཅིས་ཀྱང་མི་ལུས་རིན་པོ་ཆེ་འདི་ཐོབ་པ་ལ༔ ཆོས་བྱེད་པའི་སྐལ་བ་མ་བྱུང་ན་ཕོ་བྲང་གི་མཆོད་གནས་དྲུང་དུ་ལུས་སྲོག་ཕུལ་ནས༔ སྐྱེ་བ་འདིའི་འོག་རོལ་ཏུ་བྱང་ཆུབ་ཆོས་སྤྱོད་དབང་ཐོབ་པར་སྨོན་ལམ་འདེབས་སུ་རིགས༔ གལ་ཆེན་སྒྲུབ་ན་ངང་ཆེན་བསྲིང་བ་ཆེ་བའི་བློན་པོ་ཡིན་པས༔ ནན་ཆེར་ཞུ་བ་བགྱིད་དོ་བསམས་ནས༔ གསེར་གཡུའི་ལན་ཚར་དང༔ རྣ་ཆ་ནོར་བུའི་མཆོང་གཡུ་དང༔ མགུལ་རྒྱན་ནོར་བུ་མུ་ཏིག་ཕྲེང་གཡུ་དང༔ གཙུག་ཕུད་ནོར་བུ་འོད་འབར་དང་བཅས་པ་རྒྱལ་པོ་ལ་ཕུལ་ནས༔ ལག་སོར་གདུབ་བུ་དང༔ དངུལ་དཀར་གྱི་མེ་ལོང་དང་བཅས་པ་སྲས་རྒྱལ་བུ་རྣམ་གཉིས་ལ་ཕུལ༔ ན་བཟའ་གོས་ཀྱི་འཇམ་ཕྲུག་མུ་ཏིག་གིས་སྤྲས་པ་དང༔ ཟབ་དར་སྲུབ་མེད་གཡུ་འབྲས་བརྒྱན་པ་དང༔ སྐེ་རགས་མུ་ཏིག་གི་ལན་ཐག་ཅན་དང༔ ཕྱི་རས་ཉ་ཕྱིས་ཀྱི་མཐོན་མཐིང་ཅན་དང༔ སྐེ་རགས་གཡུ་ཕྲའི་རྒྱ་མདུད་ཅན་དང༔ གསེར་གྱི་དྲི་དང་ཐུར་མང་ནོར་བུའི་ཡུ་བ་ཅན་དང༔ ཞབས་ཀྱི་ལྷམ་བུ་ཆུང་གཡུ་ཕྲའི་འཛུམ་ཁྲིལ་མུ་ཁྱུད་ཅན་ཡུམ་བཙུན་མོ་ལ་ཕུལ༔ ནོར་བུའི་བང་མཛོད་གསེར་གཡུའི་ཐེམ་སྐས་ཅན་བདུན་ཡོད་པ་ཕྱི་བློན་རྣམས་ལ་ཕུལ༔ གསེར་གཡུའི་བང་མཛོད་མུ་ཏིག་གི་དྲ་བ་ཅན་བདུན་ཡོད་པ་ནང་བློན་དང་འབངས་རྣམས་ལ་ཕུལ༔ ཕྲན་ཚགས་ཀྱི་སྐོར་མཛོད་མང་དུ་ཡོད་པ་རྣམས༔ སྒོ་ཕྱི་ནས་ངན་སྤྲང་རིགས་ངན་གྱི་ཚོགས་བཀྲེས་ཤིང་སྐོམ་པ་དང༔ རིད་ཅིང་རྨོངས་པ་རྣམས་ལ་སོ་སོཪ་སྐལ་བས་མ་ཕམ་པ་བྱིན༔ བཟའ་བ་དང་བཏུང་བའི་ལོངས་སྤྱོད་ཀྱིས་བྱ་དང་ཁྱི་ལ་སོགས་པའི་དུད་འགྲོ་རྣམས་ཀྱང་ཚིམ་པར་བྱས༔ རྒྱལ་པོ་ཡབ་ཡུམ་དང༔ རྒྱལ་བུ་ཕྱི་བློན་དང༔ ནང་བློན་འབངས་འཁོར་དང་བཅས་པ་ཕྱོགས་གཅིག་ཏུ༔ བླ་ཤིང་པདྨ་ཟླུམ་པོ་འདྲ་གླ་བ་རྐང་བླ གཅིག་གི་དྲུང་དུ་ཆེ་བར་འདུས་ནས་ཞུ་བ་རིམ་གྱིས་གསལ་བར་ནན་ཆེར་ཡིད་ཕམ་པའི་སྨྲེ་སྔགས་དང་བཅས་ཏེ༔ མིག་ནས་མཆི་མ་ཁྲག་ཏུ་འཐིབ་ཅིང་བྱང་ཁོག་དབུགས་ཀྱིས་བརྒྱང་ནས་དྲན་མེད་དུ་བརྒྱལ་ཞིང་ཞུ་བ་མཛད༔

༈ ༔ དང་པོ་ཡབ་རྒྱལ་པོ་ལ་ཞུས་པ༔ ༔ཨེ་མ་ཡབ་རྒྱལ་པོས་གསུངས་པའི་བཀའ་ལ་མི་རྫི་ཡང༔ སེམས་འདོད་པས་མ་ཚིམ༔ རང་གནོང་ཞིང་ཡིད་ཀྱི་ལས༔ བཀའ་དམ་ཆོས་མེད་ན་མི་ཚེ་སྟོང་ཟད་ཡིན༔ ལས་འཁྲུལ་པའི་རྒྱུ་ནི་རང་སེམས་སྡུག་རེ་བསྔལ༔ ལུས་ངལ་དུབ་ཡིད་ཀྱི་འཁོར་བར་སྣང་བ་སྐྱོ༔ ལས་བྱ་བ་བྱེད་པ་ཆུ་གཉེར་རླབས་དང་འདྲ༔ ཚེ་འདི་ཕྱི་གཉིས་ལ་དགོས་པ་དམ་ཆོས་ཡིན༔ ལུས་སྐྱེ་བ་དམན་པའི་ལྷ་ལྕམ་གཞོན་ནུ་ང༔ ཡིད་སྣང་བའི་འགྲོ་ཕྱོགས་ཆོས་ཕྱིར་སྨོན་པ་ལ༔ སེམས་གདུང་བའི་ཤུགས་ཀྱིས་དཀའ་བ་ཆོས་ཕྱིར་སྤྱོད༔ འཁོར་ལོངས་སྤྱོད་ཆེ་ཡང་སྡུག་བསྔལ་དྲ་བའི་རྒྱུ༔ གྲོགས་རྒྱལ་བུ་མཛེས་ཀྱང་སྣང་བའི་བྲིད་ཕྱོགས་ཙམ༔ སྙན་གྲགས་པ་ཆེ་ཡང་མི་ཁའི་གཡབ་ཤིང་ཡིན༔ ལས་འཁོར་བའི་ཆོས་ལ་སྤྲོ་བ་མ་བྱུང་བས༔ ཡབ་རྒྱལ་པོས་གསན་ནས་རྒྱ་གར་མི་གཏོང་འཚལ༔ བདག་ཆོས་ཀྱིས་སྨིན་ན་ཡབ་ཀྱི་དྲིན་ལན་འཇལ༔ ཁྱོད་ཅིས་ཀྱང་བཀའ་ལ་ཆོས་ཕྱིར་མ་གནང་ན༔ བདག་སྲོག་ལ་མི་འཕང་ཕྱི་མར་ཞལ་མཇལ་སྨོན༔ ཞེས་གསུངས་སོ༔ ཡུམ་བཙུན་མོ་ལ་སྨྲས་པ༔

༈ ༔ ཨེ་མ་ཤ་དྲིན་གྱིས་གསོས་པའི་འབྲེལ་བ་ཅན༔ ལས་དབང་གིས་ཐོབ་པའི་ཨ་མ་ཁྱོད༔ སེམས་བརྩེ་བའི་ཤུགས་ཀྱིས་ཡུས་ཆེ་ཡང༔ བདག་ལྷ་ལྕམ་ང་ལ་ཕོད་མ་ཆེ༔ ཆོས་གྲོགས་སུ་མི་འགྲོ་ཕ་མ་ཡང༔ ཁོ་མོའི་བདུད་གྲོགས་ཡིན་པར་རྒྱལ་བས་གསུངས༔ དོན་དེ་ཕྱིར་ཡུམ་གྱི་བཀའ་བཙན་ཡང༔ བདག་ཆོས་ལ་ཡིད་སྨོན་བཀའ་གནང་ཞུ༔ རྫོང་ནོར་རྫས་ནམ་མཁའི་སྨིག་རྒྱུ་འདྲ༔ རྒྱན་གཡུ་གོས་སྦྲང་མའི་སྦྲང་རྩི་འདྲ༔ སུ་གང་ལ་ཆགས་པ་འཁྲུལ་པའི་རྒྱུ༔ ཞེན་ཆགས་གཟུང་འཛིན་སྤངས་ནས་དམ་ཆོས་བྱེད༔ ཡུམ་གྱིས་བདག་ལ་ཅིས་ཀྱང་མི་གནང་ན༔ ཚེ་འདི་ལ་འགྲོག་པའི་སྐབས་མེད་དེ༔ དུས་ཕྱི་མར་འོག་མིན་ཞལ་མཇལ་སྨོན༔ ཞེས་གསུངས་སོ༔ སྲས་རྒྱལ་བུ་གཉིས་དང་ཕྱི་བློན་རྣམས་ལ་སྨྲས་པ༔

༈ ༔ ཨེ་མ་ལས་ཀྱི་དབང་གིས་མཚམས་སྦྱར་བའི༔ གདུང་སེམས་ཡིད་ཀྱིས་འབྲེལ་པའི་ཡུལ༔ རྒྱལ་བུ་བློན་ཆེན་བཀའ་བཀྱོན་ཀྱང༔ ལྷ་ལྕམ་བདག་ལ་གནོང་འགྱོད་མེད༔ བསམ་མནོ་རང་སྣང་མི་གཅིག་པས༔ སོ་སོའི་མཐོང་སྣང་ལས་སུ་སྤྱོད༔ རྒྱ་གར་ཡུལ་ནི་ས་ཐག་རིང༔ བྷི་རྱའི་རྒྱལ་བུ་ང་རོ་ཆེ༔ འབངས་ཀྱི་འཁོར་གཡོག་འཁང་རྐྱེན་རགས༔ བང་མཛོད་ནོར་བུ་འཚོ་སྐྱོང་དཀའ༔ ཁྱིམ་མཚེས་འབངས་འཁོར་མགུ་ཁོངས་འཛོམས༔ བློན་འབངས་ཕྱི་ནང་སྡུག་ཡུས་ཆེ༔ དགྲ་ཟླའི་རྒྱལ་བློན་འདུལ་བ་དཀའ༔ ཆོས་ཀྱི་བསྟན་པ་དེ་ནས་ནུབ༔ སྡུག་བསྔལ་འཚོ་སྐྱོང་རྒྱལ་པོ་འདྲ༔ རྟ་བདུན་ཉི་ཟླའི་རྒྱལ་པོ་ཟླུམ༔ མུན་རུམ་འཁྲུལ་པའི་རྒྱལ་པོ་ཆེས༔ ཡུལ་ཕྱོགས་དེ་ན་མི་མཐུན་འཛོམས༔ དེ་འདྲའི་གནས་སུ་བདག་མི་འགྲོ༔ ལྷ་ལྕམ་མེ་ཏོག་སྐུ་འདྲ་འདི༔ བྱང་ཕྱོགས་དུད་འགྲོའི་ཡུལ་ཁམས་དེར༔ རིག་པའི་འོད་གསལ་ཐམས་ཅད་ཉམས༔ ཡབ་ཡུམ་བློན་དང་མི་འཕྲད་ནས༔ ཐག་རིང་ཡུལ་ན་སྣང་སེམས་སྐྱོ༔ སྐད་རིགས་མི་གཅིག་དུད་འགྲོའི་གྲོགས༔ ཉིན་བཞིན་མཚན་བསམ་ཕོ་བྲང་དྲན༔ དེ་ཚེ་སྡིག་བློན་སྡིག་པོ་ཆེ༔ ལྷ་ལྕམ་ཡིད་གནོང་སེམས་རེ་ཕམ༔ དེ་བས་རྒྱལ་བུ་བློན་དང་བཅས༔ དམ་ཆོས་བགྱིད་ལ་བཀའ་གནང་ཞུ༔ ཅིས་ཀྱང་ཆོས་ལ་བཏང་མི་སྟེར་ཞིང་༔ ཆོས་བྱས་བདག་ལ་ཁྲིམས་གཅོད་ན༔ ལྷ་ལྕམ་སྲོག་ལ་མི་འཕང་ཕྱིར༔ ལུས་ཀྱིས་བློན་འབངས་ངོམས་པར་བྱེད༔ སེམས་ཀྱིས་འོག་མིན་གནས་སུ་སྨོན༔ ཚེ་འདིར་འགྲོག་དབང་མ་མཆིས་པའི༔ ཕྱི་མ་སྐབས་ཀྱི་རྟེན་འབྲེལ་ལ༔ དུས་འཛོམས་ཐབས་ཀྱིས་ཞལ་མཇལ་སྨོན༔ ཞེས་གསུངས་སོ༔

རྒྱལ་པོ་ཡབ་ཡུམ་དང༔ སྲས་རྒྱལ་བུ་དང༔ གྲོས་ལ་དབང་བའི་བློན་ཆེ་བ་རྣམས་ཀྱིས་ཕྱོགས་གཅིག་ཏུ་འདུག་ནས༔ བཀའ་གྲོས་མཛད་པ་ལ༔ ལྷ་ལྕམ་རྒྱ་གར་གྱི་ཡུལ་དུ་ཅིས་ཀྱང་འགྲོ་བར་མི་མོས་ནས༔ ཟུང་མོ་མཁར་ཤིང་ཡུལ་གྱི་རྒྱལ་བུ་ལ་བཙུན་མོར་གཏོང་དགོས༔ དེ་རུ་རྫོངས་ཀྱི་ནོར་རྫས་ལ་མ་ཕམ་པར་བྱིན་ན་འགྲོ་ངེས༔ དེར་ཡང་མི་འགྲོ་ན་ཁྲིམས་ལ་གཏུག་ངེས༔ མགོ་དང་རྐང་ལག་བྲེག་པར་རིགས་ཏེ༔ ངོ་གྲགས་ཤིང་ཡིད་མཐུན་པ་རྣམས་ཀྱིས༔ ནན་ཆེར་བསླབ་བྱ་བྱེད་པར་འཐད་ཅེས་པས་བསམ་གྲོགས་ཕྱོགས་གཅིག་ཏུ་མཐུན་ནས༔ ལྷ་ལྕམ་དང་ཡིད་མཐུན་པའི་བུ་མོ་ལྔ་བརྒྱ་ལ་འཕྲིན་ངག་བཏང་སྟེ་ལྷ་ལྕམ་ལ་སྨྲས་པ༔

༈ ༔ ཀྱེ་འབྲས་ལེགས་ཡིད་གཙང་དང་བས་ཞན་པ་གསོ༔ གདུང་རིགས་རྒྱུད་ནི་གཙང་བས་གཞན་ཡིད་འཕྲོག༔ བསམ་ཤེས་བློ་ལྡན་གཞོན་ནུ་དཔེ་བྱད་ཅན༔ རིག་པ་ཡོད་པ་རྒྱལ་བུ་འབངས་ལ་གསོན༔ ལྷ་ལྕམ་དགའ་ཡང་རྒྱལ་པོའི་བཀའ་མི་ཆོག༔ བཀའ་ལ་གནག་པའི་བློན་པོའི་ནག་ཁྲིམས་ཕོག༔ དེ་བས་བདག་གི་གྲོས་ལ་ཅིས་མི་གསན༔ རྒྱ་གར་ཡུལ་དུ་ཅི་སྟེ་མི་བྱོན་ཀྱང༔ ཟུང་མོ་མཁར་དུ་མི་བྱོན་ཀ་ཐབས་མེད༔ དེ་བས་བདག་ལ་ཞུས་ལེན་གསལ་བར་སྐུར༔ ཞེས་སྨྲས་པ་ལས༔ གྲོས་གདབ་ཀྱི་བུ་མོ་ལྔ་བརྒྱ་ལ་ལྷ་ལྕམ་གྱིས་སྨྲས་པ༔

༈ ༔ ཀྱི་ཧུད་ཡིད་འོང་གྲོགས་ཀྱི་བུ་མོ་ལྔ་བརྒྱ་ཁྱོད༔ གདུང་བའི་སེམས་ཀྱིས་བདག་དྲུང་འདུག་ནས་ནི༔ ཕན་པའི་བསླབ་བྱ་མང་དུ་སྨྲ་ནའང༔ བདག་གི་སེམས་ལ་ཅུང་ཟད་འགལ་བའི་ཚེ༔ གྲོགས་སུ་མི་འགྱུར་དངོས་གྲུབ་བསླུ་བའི་བདུད༔ རྒྱལ་རྒྱུད་ཁྱིམ་ལ་ཡིད་ཀྱིས་མི་སྨོན་པར༔ རྒྱལ་བུ་ཕོ་བྲང་སྣང་བ་ཅི་བདེར་མཛོད༔ ཁོ་མོ་ལྷ་ལྕམ་གངས་ཀྱི་སྟོད་ཁྲོད་འགྲིམ༔ དམ་ཆོས་མེད་པས་ནག་གི་ཁྲིམས་གཏུག་འོས༔ ཡིད་ཀྱིས་ཐག་ཆོད་སེམས་ཀྱི་ཐེ་ཚོམ་མེད༔ རྒྱལ་བློན་འབངས་ལ་འཕྲིན་གྱི་མངགས་པ་མཛོད༔ ཅེས་གསུངས་སོ༔ དེ་ནས་གྲོས་འདེབས་ཀྱི་བུ་མོ་ལྔ་བརྒྱ༔ ལྷ་ལྕམ་གྱིས་སྨྲས་པའི་ཚིག་རྣམས་ལ་ལྷག་ཆད་མེད་པར༔ རྒྱལ་པོ་ཡབ་ཡུམ་བློན་འབངས་དང་བཅས་པ་རྣམས་ལ་སྨྲས་པས༔ ཐམས་ཅད་ངོ་ནག་ཅིང་ཧལ་བར་གྱུར་ཏོ༔

ཕྱི་བློན་ཆོས་ལ་གནག་པ་རྣམས་ཀྱི་ཞལ་ནས༔ རྒྱལ་པོའི་ཁྲིམས་ཀྱིས་ཡུལ་རྣམས་འཚོ་བ་ལ༔ བརྙས་ན་མཆན་གྱི་བུ་ཡང་གསོད་པར་འོས༔ ལྷ་ལྕམ་གཅེས་པར་གསོས་ནས་བཏང་སར་མི་འགྲོ་ན༔ མགོ་བྲག་ལྤགས་པ་བཤུ༔ ཡན་ལག་གཏུབ་པར་རིགས་པས༔ ཁྲིམས་གཅོད་ཟེར་ནས་རྒྱལ་པོ་ལ་ཞུས་པས༔ རྒྱལ་པོས་ཀྱང་བཀའ་གནང་ངོ༔ དེ་ནས་བློན་པོ་གདུག་པ་ཅན་རྣམས་ཚོགས་ནས་ལྷ་ལྕམ་བཟུང་སྟེ༔ ལྷ་ལྕམ་ལག་པ་ཕྱིར་རྒྱབ་ཏུ་བཀྱིག༔ གཅེར་བུར་སྐེ་ནས་ཐག་པས་དྲུད་དེ༔ ཚེར་མང་ཅན་གྱི་ལྕགས་ཀྱིས་བྲབ་ཅིང་ཕོ་བྲང་གི་ཕྱི་མཐའ་བསྐོར་བས༔ ཡུལ་འཁོར་གྱི་མི་རྣམས་ནི་ལྷ་ལྕམ་ལ་ལྟ་ཞིང་ངུ་བ་དང་སྨྲེ་སྔགས་ཀྱི་སྐད་ཆེན་པོ་འདོན་ནོ༔ དེ་འདྲའི་རྣམ་ཐར་མཐོང་བ་དང༔ ནང་བློན་རྣམས་ཀྱི་ནང་ནས་ཆོས་ལ་དཀར་བ་བློ་རྣོ་ཞིང་བསམ་པ་དཀར་བ༔ བློན་པོ་བྲེ་སྣ་ཀར་བྱ་བ་གཅིག་ཕོ་བྲང་གི་ནང་དུ་རྒྱལ་པོའི་དྲུང་དུ་ལྷགས་ནས་འདི་སྐད་ཞུས་པ༔

ཨེ་མ་རྒྱལ་པོ་ཁྱེད་ལ་ཐུགས་དགོངས་ཅི་མངའ་ན༔ ཤ་ལས་ཆད་པའི་ལྷ་ལྕམ་མི་ཕངས་ན༔ མ་དག་བློན་གྱིས་ཕྲ་མ་སྒྱུར་ཁ་སྐྱེན༔ ཐུགས་ཚོར་མེད་པས་ལྷ་ལྕམ་དགྲ་ལ་གཏད༔ ཤ་མི་ཚ་བའི་ལྷ་ལྕམ་གཅེར་བུར་བཀྱིག༔ ལོག་རྟོག་བློན་གྱིས་འཕངས་མེད་ཚེར་མང་བྲབ༔ མཐོང་ན་མི་བཟོད་ཡིད་ཀྱི་ཞན་པ་སྐྱུར༔ ཡུལ་མི་ཀུན་གྱིས་ལྷ་ལྕམ་ལྟ་ཞིང་ངུ༔ འདི་འདྲའི་ཁྲིམས་ཚབ་བདག་གིས་ཁུར་རོ་སྨྲས༔ བློ་ཡོད་ཐམས་ཅད་དྲན་མེད་བརྒྱལ་ནས་འབོགས༔ བྱ་དང་རི་དྭགས་གཅན་གཟན་ཀུན་ཀྱང་ངུ༔ གཟུགས་མེད་ཡུལ་ལ་ལྷ་འདྲེའི་སྐད་ངན་འདོན༔ འབྱུང་བའི་ཁམས་འཁྲུག་རླུང་དམར་ལུང་སྟོང་འཕྱོ༔ ས་གཡོས་འབྲུག་དང་ནམ་མཁའི་མེ་ཏོག་འཐུལ༔ འདི་འདྲའི་ལས་ནི་སུ་ཡིས་བཅོས་དྲན་ན༔ རྒྱལ་པོ་ཡབ་ཡུམ་ཐུགས་ལ་ཅི་བསམས་ཀྱང༔ ཡུལ་འབངས་མི་རྣམས་དྲན་མེད་སྙིང་རླུང་འཕྱོ༔ དགྲ་ཟླ་ཡིན་ཀྱང་ཅུང་ཟད་གྲགས་པ་ཙམ༔ ལྷ་ལྕམ་ལོད་ཀྱང་ཤ་ལས་ཆད་པའི་སྲས༔ འདི་འདྲ་མཐོང་ན་བློན་འབངས་བློ་མི་འཁེལ༔ ཐུགས་དགོངས་ཨེ་ཡོད་རྒྱལ་པོ་ངག་ལན་ཞུ༔ ཅིས་ཀྱང་ཡིན་ན་མཐའ་ཡུལ་སྤྱུག་པ་འཐད༔ ཅེས་ཞུས༔ རྒྱལ་པོས་གསུངས་པ༔

༈ ༔ ཀྱི་ཧུད་ནང་བློན་ཁྱེད་ཀྱིས་སྨྲས་པ་བདེན་ནམ་ཅི༔ རྫུན་དུ་མ་སྨྲ་ངེས་པར་རྟོག་ལ་ཤོད༔ ཐོས་པའི་གཏམ་ལ་ཕྱེད་བདེན་ཕྱེད་མི་བདེན༔ ཕོ་བྲང་ནང་དུ་ལྷ་ལྕམ་ཁྲིད་ལ་ཤོག༔ ཡིན་མིན་དྲིའོ་ཡིན་ན་ལྷ་ལྕམ་ཡུས༔ ནང་བློན་ཁྱོད་ཀྱི་ངོ་ལ་ཁྲིམས་ལས་སྤང༔ ལོ་ཤས་གཅིག་ཏུ་ཤིང་རོང་ནག་པོར་སྤྱུག༔ ཅེས་གསུངས་ནས་ནང་བློན་ལ་མངགས་པ་མཛད་བཀའ་བསྒོས་སོ༔ དེ་ནས་ནང་བློན་དེས་ཕོ་བྲང་གི་ཕྱིར་དུ་བལྟས་ཏེ༔ ཁྲིམས་ལ་དབང་བའི་ཕྱི་བློན་རྣམས་དང་ལྷ་ལྕམ་ལ་སྨྲས་པ༔

༈ ༔ ཀྱེ་རྣམ་དག་འཛུམ་ལྔ་སྤྲས་པའི་ལྷ་ལྕམ་ཁྱོད༔ ཡིད་འོང་གཞོན་ཤའི་ལུས་ལ་འོད་འཕྲོ་བ༔ ཨུཏྤལ་མཐོན་མཐིང་མདོག་ལྟར་རབ་ཏུ་མཛེས༔ བིམ་པ་ལྟར་ན་དཀར་དམར་འོད་ཀྱི་འཁྱིལ༔ ཀུ་མུ་ཏ་བཞིན་ངད་པའི་དྲི་ཡང་འཐུལ༔ ཟེ་འབྲུའི་མདོག་ལྟར་རྩི་འཇམ་ཐིག་ལེའི་འཛུམ༔ པུནྜ་རི་ཀའི་འཛུམ་འདྲའི་ཕྱག་ཞབས་ལ༔ གཞོན་ནུ་ངང་པ་མཚོ་བྱའི་སྐད་སྨྲ་ཞིང༔ སེམས་དཔའ་ཐུགས་ཀྱིས་འཚོ་བ་སྤངས་ནས་ཀྱང༔ རྣམ་དག་ནོར་བུའི་འཛུམ་གྱི་འོད་འདྲ་ཁྱོད༔ སྔན་ཆད་ཕན་ལ་མཐོང་ཡང་ཡིད་སྨོན་ཙམ༔ མཉེན་འཇམ་སྐུ་ལ་རེག་པར་མི་ནུས་ན༔ ད་ལྟའི་དུས་སུ་གདུབ་པ་བློན་ལག་ཚུད༔ མི་ཕངས་ཕོད་པས་ཐག་པས་མདུད་ཅིང་བསྡམ༔ རྩུབ་མོའི་ཚེར་མང་ལུས་ལ་བྲབ་པ་མཐོང༔ བསམས་ཤིང་སྐྱོ་ནས་བྱང་ཁོག་དབུགས་ཀྱིས་བརྒྱང༔ མཐུན་འཇུག་མ་ངེས་བློན་གྱིས་ཞེན་པ་དཀྲུགས༔ སྔོན་གྱི་ལས་དང་འཕྲལ་གྱི་རྐྱེན་ཡིན་ན༔ བློན་པོ་རྣམས་ཀྱིས་དགོངས་པ་སོ་སོར་ཐོང༔ འབངས་ཀྱི་རྗེ་བས་གདུང་གི་རུས་པས་ལྷག༔ ལྷ་ལྕམ་འདི་ལ་གནག་པའི་སེམས་མ་བྱེད༔ བཀྱིག་པ་ཁྲོལ་ལ་རྒྱན་དང་ན་བཟའ་གསོལ༔ རྒྱལ་པོའི་བཀའི་ཕོ་བྲང་ནང་དུ་གཤེགས༔ ཞེས་སྨྲས་པ་དང༔ ལྷ་ལྕམ་སྡིག་བློན་དང་བཅས་པ་ཕོ་བྲང་གི་ནང་དུ་བྱོན་ཏེ༔ ཡབ་རྒྱལ་པོའི་དྲུང་དུ་འདུག་པས༔ ཕོ་བྲང་གི་ཕྱི་ན་གནས་པའི་ཡིད་མཛའ་བ་དང༔ གྲོགས་ཀྱི་བུ་མོ་ལྔ་བརྒྱ་དང༔ ཡུལ་འཁོར་འབངས་ཀྱི་མི་རྣམས་ནི༔ ལྷ་ལྕམ་ཕོ་བྲང་གི་ནང་དུ་ཁྲིད་ནས་གསོད་ཀྱིས་དོགས་པས༔ སེམས་སྡུག་བསྔལ་གྱིས་བརྒྱལ་ཞིང་འབོགས༔ ལུས་རྡེབ་ཅིང་འགྱེལ༔ ངག་ངུ་འབོད་ཀྱི་ཆོ་ངེ་ཆེན་པོ་འདེབས་ཤིང་ཕོ་བྲང་ལ་སྐོར་བ་བསྐོར་ཏེ༔ རྒྱལ་པོ་ཡབ་ཡུམ་སྟངས་ཞན་ནོ༔ ལྷ་ལྕམ་འདི་འདྲ་བ་ལ་གནག་པའི་སེམས་ཕོད་པ་རེ་འཇིགས་ན་ཞེས་ཕྱོགས་གཅིག་ཏུ་སྨྲས་སོ༔ རྒྱལ་པོས་ལྷ་ལྕམ་ལ་སྨྲས་པ༔

༈ ༔ ཀྱི་ཧུད་ཡིད་འོང་ལྷ་ལྕམ་ཡུས་རེ་ཆེ༔ བཀྱིག་བཏག་བརྡུང་བཙོག་ཡིད་ཕམ་ཡང༔ བཏང་སར་མ་ཕྱིན་རང་གིས་ལན༔ བསད་པར་འོས་ཀྱང་ད་མི་གསོད༔ ཤ་ལས་ཆད་པའི་ལྷ་ལྕམ་ཁྱོད༔ རྒྱལ་པོའི་ཁྲིམས་ལ་སྤང་ཐབས་མེད༔ ལོ་ཤས་མི་མེད་ཡུལ་དུ་སྨྱུག༔ དེ་ནས་ལོ་འགའ་སོང་ནས་འཕྲད༔ ཁྲིམས་བློན་ཀུན་གྱིས་སྐྱེལ་ཐུང་གྱིས༔ ཞེས་བསྒོའོ༔ ལྷ་ལྕམ་གྱིས་ཡབ་རྒྱལ་པོ་ལ་ཞུས་པ༔

༈ ༔ ཀྱེ་རྒྱལ་པོ་ཆེན་པོས་བཀའ་བྱོན་ནས༔ འབངས་ཀྱིས་བློན་ལ་རང་དབང་མེད༔ རྒྱལ་པོ་ཡབ་ཡུམ་ཁྲེལ་ཆུང་བས༔ ཕངས་མེད་ལྷ་ལྕམ་ཁྲིམས་ལ་གཏུག༔ སྡིག་བློན་མ་རུང་ལག་ཏུ་གཏད༔ ཤ་མི་ཚ་བས་བཀྱིག་ཅིང་རྡུང༔ མི་བཟོད་སེམས་ལ་སྔངས་ཤིང་སྐྲག༔ ལུས་ལས་རྣག་ཁྲག་ཆུ་སེར་འབབ༔ མི་རྣམས་བདག་ལ་ལྟ་ཞིང་ངུ༔ བསམས་ཤིང་ཡིད་ཀྱི་ཡུལ་ནས་སྐྱོ༔ ཡབ་ཡུམ་རྒྱལ་པོས་ཕོད་པ་ལ༔ ལྷ་ལྕམ་བདག་གིས་ཅི་མི་བཟོད༔ དམ་ཆོས་བྱེད་དུ་མི་སྟེར་ན༔ ཤི་གསོན་ལས་ལ་གནོང་རྒྱུ་མེད༔ མི་མེད་ལུང་སྟོང་སྤྱུགས་ཀྱང་རུང༔ ཡབ་ཡུམ་རྒྱལ་པོའི་བཀའ་མི་གཅག༔ བདག་ནི་ལས་ངན་སྡིག་སྒྲིབ་ཆེ༔ མི་མེད་འདྲེ་ཡུལ་སྡོད་པའི་ཚེ༔ བཟའ་བཏུང་གོས་ཀྱི་སྐལ་བ་གང༔ སྟེར་ན་རྫོང་ཞིག་མི་སྟེར་སྲན༔ ཚེ་འདིར་འཕྲད་པའི་སྐལ་བ་མེད༔ ཕྱི་མ་དོན་ཡོད་གནས་སུ་མཇལ༔ ཞེས་ཞུས༔

༈ ༔ ཕྱི་བློན་རྣམས་ཀྱིས་སྨྲས་པ༔ ༔ཀྱེ་རྒྱལ་པོ་ཁྱེད་ལ་བསམ་བློ་མེད༔ བཏང་སར་མི་འགྲོ་བསླབ་མི་ཉན༔ དགོས་པ་ཅི་ཡོད་ལྷ་ལྕམ་འདི༔ གསོད་པར་རིགས་ཀྱང་གསོད་མི་ནུས༔ སྨྱུག་པར་མི་ཚད་ཁྲིམས་ཐོབ་སྟེ༔ ཅིས་ཀྱང་ཤིང་རོང་སྤྱུག་པ་ན༔ རྒྱལ་པོའི་བཀའ་ལ་བཅག་ཐབས་མེད༔ ཡུན་དུ་མི་འཇོག་མྱུར་དུ་རྫོངས༔ སྡུག་ཡུན་རིང་ན་སེམས་ཀྱང་ཚིམ༔ ཞེས་སྨྲས་སོ༔

༈ ༔ དེ་ནས་ལྷ་ལྕམ་གླང་པོ་ཆེ་ལ་བསྐྱོན་ཏེ༔ ཕོ་བྲང་གི་བྱང་ཕྱོགས་སུ་ཉེ་བ་ན༔ བདུད་ལུང་ཤིང་རོང་མུན་པ་ཅན་ཞེས་བྱ་བ་རུ་སྤྱུགས་སོ༔ གླང་པོ་ཆེ་ལྔ་བརྒྱ་ལ་བཟའ་བཏུང་གི་ལོངས་སྤྱོད་མང་དུ་བཀལ་ནས་བརྫངས༔ ཁྱེའུ་ཕོ་མོ་ལྔ་བརྒྱ་ཙམ་གྱིས་སྐྱེལ་ཐུང་ཉིན་ཞག་བཅུའི་བར་དུ་བྱས༔ སྐྱེ་ཤིང་བྲ་མ་ཅན་ཞེས་བྱ་བའི་ལུང་མདོ་ནས་སྐྱེལ་མི་རྣམས་ལོག་སྟེ༔ ཕོ་བྲང་དུ་ཁ་བལྟས་པ་ལ་ལྷ་ལྕམ་དང་འབྲལ་མ་ཕོད་ནས༔ ཕྱིར་མིག་རང་སར་ལྟ་ཞིང༔ ཡིད་འོང་ཁྱེད་ལྟ་བུའི་ལྷ་ལྕམ་དང་བྲལ་དགོས་པ་སྔོན་གྱི་སྨོན་ལམ་རེ་ངན་ན་ཞེས་ཟེར་ཞིང༔ སྨྲེ་སྔགས་ཀྱི་ངུ་འབོད་ཀྱི་ཆོ་ངེར་རང་རང་དུ་ལོག་གོ༔ སྐྱེལ་མི་རྣམས་ཀྱི་ནང་ནས༔ ཤེས་རབ་ཆེ་ཞིང་རིག་པ་རྣོ་བའི་ཁྱེའུ་གར་རྣ་ཆ་ཤེས་ཕོད་ཅན་ཞེས་བྱ་བ་གཅིག་ཡོད་པ་དེ༔ སྔོན་གཞོན་ནུའི་དུས་ན་ལྷ་ལྕམ་དང་ཡིད་མཛའ་བ་ལས༔ བྲལ་མ་ཕོད་ནས་ལྷ་ལྕམ་གྱི་ན་བཟའ་ལ་འཇུ་ཞིང་སྨྲས་པ༔

༈ ༔ བདེ་བའི་ལུས་ལ་སྙན་པའི་ངག་སྨྲས་པ༔ ཡིད་ཀྱི་སྤྱོད་ཡུལ་ཀུན་ལ་ཕན་སེམས་ཆེ༔ མཛའ་བའི་གྲོགས་ལ་བརྩེ་བས་སེམས་བྱེད་པ༔ གཞོན་ནུས་ལུས་ལ་བཅུ་དྲུག་ལང་ཚོ་རྒྱས༔ པུནྜ་རི་ཀའི་མེ་ཏོག་དང་འདྲའི་མདོག༔ དཀར་རྩི་དམར་ལྗང་པདྨའི་དྲི་བྲོ་བ༔ དབུ་སྐྲ་མཐོན་མཐིང་ལྕུག་མའི་ལོ་འབྲས་འདྲ༔ སྤྱན་གཉིས་ཨུཏྤལ་དུང་མོའི་མདོག་བཞིན་ལྟ༔ སྨིན་མ་རབ་རིབ་ནམ་མཁའི་སྨིག་རྒྱུ་འདྲ༔ སྙན་གཉིས་མེ་ཏོག་སེ་བ་སྟོང་ལྡན་མདོག༔ ཤངས་ཀྱི་རྩེ་ཟླུམ་ནོར་བུའི་རིས་ཁ་མདོག༔ ཞལ་གྱི་འོད་ཟེར་པདྨ་འཛུམ་འདྲའི་བཞད༔ ཚེམས་ཀྱི་ངང་མདོག་སྲིན་མེད་དུང་འདྲའི་མདོག༔ ལྗགས་ནི་མཉེན་འབོལ་པདྨའི་ལོ་འདབ་སྤྱོད༔ སྐུ་ཡི་རེག་བྱ་དཀར་འཇམ་འབོལ་ལས་སྣུམ༔ མགུལ་གྱི་མགྲིན་པ་དར་དཔྱངས་རྒྱལ་མཚན་འཛིན༔ སྐུ་སྐེད་མཉེན་ཕྲ་མི་ཡི་སྐང་འདྲ་འགུལ༔ ཞབས་ནི་ངང་སོར་གཞོན་ནུ་དལ་གྱིས་འགྲོ༔ འཁོར་ལོ་སྟོང་ལྡན་པདྨ་ཁྱུད་ཀྱིས་མཛེས༔ ནུབ་ནི་ཉལ་ཕྱི་ནངས་པར་ལང་བ་སྔ༔ སྤྱོད་ལམ་དལ་ལ་ངང་རྒྱུད་འགྲོག་པ་བདེ༔ ཞལ་གྱི་འཛུམ་མདངས་སྤྱན་གྱི་ཟུར་མིག་མཛེས༔ གང་ན་བཞུགས་ཀྱང་ཞལ་འོད་འདོམ་གང་འཁྱིལ༔ བལྟ་ན་སྡུག་ཅིང་ཡིད་འོང་མཛེས་འཛུམ་ཅན༔ པིངྐ་འཛུམ་འདྲ་པདྨའི་རྐང་ཟླུམ་འདྲ༔ ཡིད་འོང་མཛེས་མ་ལྷ་ལྕམ་གཞོན་ནུ་ཁྱོད༔ མཐོང་བས་ཡིད་འཕྲོག་དྲན་པས་སྣང་བ་གཡོ༔ གྲོགས་སུ་ཡོད་ན་སེམས་ཀྱི་ཞེན་པ་ཚིམས༔ སྔོན་ཆད་ཕན་དུ་སྨོན་ལམ་དབང་གིས་འབྲེལ༔ མཐོང་དུ་ཡོད་ཀྱང་འགྲོག་པའི་དབང་མ་ཐོབ༔ ཡིད་ཀྱིས་སྨོན་ནས་གྲོགས་སུ་བདེ་འམ་རེ༔ ད་ལྟའི་དུས་ན་བར་ཆད་རྐྱེན་གྱིས་བསྐུལ༔ སྡུག་སེམས་ཅན་གྱི་རྒྱལ་བློན་སྡིག་པ་ཅན༔ ཤ་ལས་ཆད་ཀྱང་ལྷ་ལྕམ་ཕངས་མེད་སྤྱུགས༔ མི་མེད་ཡུལ་དེར་ལྷ་འདྲེ་གདུག་རྩུབ་ཆེ༔ ཤིང་རོང་ནགས་ཀྱི་ལུང་པ་ཁ་དོག་ནག༔ སྣ་ཚོགས་བྱ་དེ་སྐད་ངན་སེམས་ལ་གཟན༔ རི་དྭགས་ཕོ་མོ་གྲོགས་སུ་བརྟེན་པ་སྐྱོ༔ དེ་འདྲའི་གནས་སུ་ལྷ་ལྕམ་གཏོང་མི་ཕོད༔ ཕོ་བྲང་འདི་མིན་ཞིང་ཁམས་གཞན་ནའང༔ དེ་འདྲའི་གནས་སུ་བྱོན་པར་འོས་ལགས་པ༔ རྒྱལ་བློན་མི་ཐོས་སྣང་སེམས་གཞན་ན་བདེ༔ བདག་གིས་གྲོགས་བགྱིད་ལྷན་དུ་མི་འཚལ་ལམ༔ ཞེས་གསུངས་སོ༔

༈ ༔ ལྷ་ལྕམ་གྱིས་ཁྱེའུ་ལ་སྨྲས་པ༔ ༔གཞོན་ནུ་ཁྱེའུ་ལང་ཚོ་དར་ལ་བབ༔ པདྨ་རྒྱས་འདྲ་ཟླུམ་པའི་ཞལ་རས་ཅན༔ རྣམ་སྣང་མཚན་དཔེ་སྤྲས་པའི་སྐུ་མངའ་བ༔ དོན་ཡོད་ཞགས་པ་ལྟ་བུ་དང་བའི་མདོག༔ རིན་ཆེན་ནོར་བུའི་དབྱིབས་མཛེས་དཔེ་བྱད་ཅན༔ གང་ན་ལྟ་ཞིང་མེ་ཏོག་ཟླུམ་པའི་དབྱིབས༔ སྨན་གྱི་དྲི་བྲོ་པདྨའི་སྡོང་པོ་འདྲ༔ ངག་གི་སྨྲ་མཁས་འཇམ་པའི་དོན་རྣམས་སྟོན༔ ངང་རིང་རྒྱུད་དུལ་སྤྱོད་ལམ་དལ་གྱིས་འགྲོས༔ ཨུ་དུམ་བ་འདྲ་ཀ་བིང་གཟུགས་ཀྱི་མདོག༔ འཛུམ་པའི་འོད་ཀྱིས་དང་བའི་ཡིད་འཕྲོག་པ༔ དཔེ་བྱད་རབ་མངའ་མཚུངས་མེད་ཁྱེའུ་ཁྱོད༔ གདུང་བའི་སེམས་ཀྱིས་ཕན་པར་སྨྲ་ནའང༔ ཡབ་ཀྱི་བཀའ་ཡིན་བདག་གིས་འགལ་མི་ནུས༔ སྔོན་གྱི་ལས་ཡིན་འཕྲལ་གྱིས་དག་མི་ནུས༔ མེད་ལུང་སྟོང་འདྲེ་ཡུལ་ནག་པོ་དེར༔ དཀའ་བ་ཅི་སྤྱོད་ཕྱི་མའི་དོན་དུ་བསྔོ༔ བྱ་བ་བྱས་པ་སེམས་ཀྱི་བློས་ལོང་ནས༔ མི་མེད་ཡུལ་དུ་སྤྱུགས་ཀྱང་གནོང་འགྱོད་ཆུང༔ ལོ་ཤས་བར་དུ་བདུད་ལུང་གནས་དེར་འགྲོ༔ དེ་བར་ཁྱེའུ་སྐུ་ཁམས་ཅི་བདེ་མཛོད༔ མྱུར་དུ་ཞལ་མཇལ་ཡིད་ཀྱིས་སྨོན་ལམ་འཚལ༔ ཞེས་སྨྲས་པ༔ ཡང་ཁྱེའུས་ལྷ་ལྕམ་ལ་སྨྲས་པ༔

༈ ༔ལས་ཀྱིས་འབྲེལ་ཞིང་ཡིད་ལ་མཛའ་བ་ཡི༔ གཞོན་ནུ་མཛེས་མའི་ལྷ་ལྕམ་མཛེས་མ་ཁྱེད༔ བདག་གིས་སྨྲས་པའི་ཚིག་ལ་མི་གསན་ཅིང༔ བདེ་སྐྱིད་ཞིང་ཁམས་ལོགས་སུ་མི་འགྲོ་བར༔ མི་མེད་འདྲེ་ཡུལ་ཤིང་རོང་འགྲིམ་ཞེས་སྨྲ༔ དེ་འདྲ་ཡིན་ན་བདག་ཀྱང་ཁྱེད་ཕྱིར་འགྲོ༔ ལྷ་ལྕམ་མ་མཐོང་བདག་གི་གློ་སྙིང་སྟོང༔ ཁྱེད་དང་བྲལ་ནས་བདག་གི་དྲན་པ་ཉམས༔ དུས་དང་འབྲལ་མེད་གཏན་དུ་སྨོན་ལམ་འཚལ༔ འཛུམ་མ་ཁྱོད་དང་ནམ་ཞིག་འབྲལ་སྲིད་ན༔ ཁྱེའུ་བདག་ནི་དྲན་མེད་སྣང་བ་སྐྱོ༔ བུ་གཅིག་ཤི་བའི་མ་ནི་སྡུག་བསྔལ་ལྟར༔ ཆ་ཆོད་སེམས་ཀྱིས་སྣང་བ་ལུང་སྟོང་འགྲིམ༔ སྐྱེད་མོས་ཚལ་ན་ལྡུམ་རའི་བསིལ་ཡབ་རྒྱས༔ ཨུ་དུམ་བ་འདྲ་པདྨའི་མྱུ་གུ་འཁྲུངས༔ ལོ་འདབ་སྙིང་པོ་མེ་ཏོག་རྩི་ཏོག་དང༔ རྐང་དྲུག་བུང་བས་དར་དིར་ངང་གིས་སྨྲ༔ དཔག་བསམ་ཡལ་ག་ལོ་འདབ་རླུང་གིས་སྐྱོད༔ ལྗོན་པའི་ཤིང་དེ་རྩི་མངར་དྲི་དང་ལྡན༔ ལྷ་ཡི་བུ་མོས་མེ་ཏོག་བདུད་རྩི་འཐུལ༔ དེ་འདྲའི་གནས་དེ་དལ་ངང་ཡིད་སྤྲོ་ཡང༔ ལྷ་ལྕམ་མེད་ན་མེ་ཏོག་སད་ཁྱེར་འདྲ༔ དེ་བས་མི་མེད་འདྲེ་ཡུལ་ཡིན་ཡང་རུང༔ ལྷ་ལྕམ་གར་གནས་དེ་ན་བདག་ཀྱང་དེ་ན་གནས༔ འབྲལ་མེད་བརྩེ་བས་གདུང་སེམས་བདག་ལ་འཚལ༔ ཞེས་སྨྲས་སོ༔ ཡང་ལྷ་ལྕམ་གྱིས་ཁྱེའུ་ལ་སྨྲས་པ༔

༈ ༔ གཞོན་ནུ་ཁྱོད་ཀྱིས་བདེན་པར་སྨྲ་ནའང༔ གཅིག་ཕྱིར་སྡུག་བསྔལ་གཉིས་ཀྱིས་བྱེད་དོན་མེད༔ ལྷ་ལྕམ་བདག་ནི་སྔོན་གྱི་ལས་ཡིན་པས༔ ཡབ་ཀྱིས་བཀའ་བྱོན་བློན་གྱིས་ཁྲིམས་ལ་གཏུགས༔ བྱོལ་ཐལ་མ་མཆིས་རང་གནོང་སེམས་ཀྱིས་ཁུར༔ མི་མེད་ཡུལ་དུ་ཁྱེའུ་ཅི་ལ་བྱོན༔ བདེ་བའི་འབྱུང་གནས་ཕོ་བྲང་ནང་དུ་གཤེགས༔ གསེར་གྱི་བང་མཛོད་ལོངས་སྤྱོད་ལྔ་དང་ལྡན༔ མཛའ་བའི་གྲོགས་ཀྱིས་ཡིད་འོང་བཀུར་སྟི་བྱེད༔ རྗེ་འབངས་འཁོར་དང་བསོད་ནམས་དེ་ན་འདུས༔ ཁྱེའུ་འཁོར་བཅས་དེ་ན་སྣང་སེམས་བདེ༔ བདག་ལ་སེམས་ཀྱིས་དང་བས་ཡིད་སྤྲོ་ན༔ འབྲལ་བར་མི་ཕོད་མཛའ་བའི་སེམས་ཡོད་ན༔ བདག་གི་སོར་གདུབ་ནོར་བུའི་ཕྲ་ཅན་འདི༔ མཛའ་བའི་སེམས་ཀྱིས་ཁྱེའུ་ཁྱེད་ལ་འབུལ༔ གླང་ཆེན་རྒྱབ་ཁལ་རྫས་ཀྱི་བང་མཛོད་འདི༔ ཁྱེད་ཀྱི་འཁོར་ལ་འབུལ་བས་སེམས་དང་ཕྲོལ༔ བདག་ནི་ཆགས་ཞེན་གང་དང་སུ་ལའང་མེད༔ ཆོས་མཐུན་སེམས་ནི་སྐྱིད་པའི་ལོངས་སྤྱོད་ཆེ༔ འཛིན་མེད་མ་ཆགས་ཆོས་དབྱིངས་ཞལ་མཇལ་འཚལ༔ ཞེས་གསུངས་པས༔ ཁྱེའུ་འཁོར་བཅས་ལ་ལྷ་ལྕམ་གྱིས་རྫོངས་སུ་བཏག་པའི༔ གླང་པོ་ཆེ་རྒྱབ་ཁལ་དང་བཅས་པ་ཐམས་ཅད་སོ་སོར་བགོས་ཤིང༔ ཕངས་པ་མེད་པར་བྱིན་ནས་ཚིག་གིས་བརྡ་བཀྲོལ་ཏེ་ཕོ་བྲང་གི་གནས་སུ་ལོག་གོ༔

༈ ༔ ལྷ་ལྕམ་ནི་སྐུ་ལ་ཤིང་ལོ་དཀྲིས་ནས་བདུད་ལུང་ཤིང་རོང་ནག་པོར་བྱོན་ཏེ༔ གླ་བ་ཤིང་རོང་ནག་པོ་བྱ་བའི་གནས་སུ་ཤིང་སེ་བའི་འབྲས་བུ་བཏུས་ཤིང་ཟས་སུ་གསོལ༔ ཤིང་སེ་བའི་ལོ་མ་སྟན་དུ་བཏིང་ཞིང་གོས་སུ་གོན༔ ཤིང་སེ་བའི་ལོ་མ་མེ་ཏོག་ཚོད་མར་བཙོས་ནས་ཁུ་བ་སྐོམ་དུ་འཐུང༔ རི་དྭགས་ཕོ་མོ་དང་ནགས་གསེབ་ཀྱི་སྤྲེའུ་བྲག་སྲིན་ལ་སོགས༔ གཅན་གཟན་ཕོ་མོ་རྣམས་ཀྱང་གྲོགས་སུ་འགྲོགས་ཤིང༔ རྩེ་འཇོ་དང་སྤྲོ་དགའི་བཞིན་མཛེས་པར་སྟོན་ཏེ༔ ཤིང་ཐོག་ལ་ལོངས་སྤྱོད་ཆེན་པོ་སྐྱོང་ཞིང་མ་དང་བུའི་རྣམ་པར་འཁོར་ཞིང་བསྡད་དོ༔ ཤིང་གཉེན་གྱི་སྟེང་ན་བྱ་སྐད་སྙན་མཛེས་པ་ཀུན་ཀྱང༔ སྙན་པའི་སྒྲ་སྒྲོགས་ཤིང་ལྷ་ལྕམ་ལ་དགའ་བའི་རྣམ་འགྱུར་སྟོན་ཏོ༔ ལྗོན་ཤིང་གི་ཡལ་ག་དང་ལོ་འདབ་རྣམས་ཀྱང༔ ལྷ་ལྕམ་གྱི་ཕྱོགས་སུ་ཡོ་བར་བྱེད་དོ༔ ལུང་ཕྲན་གྱི་ཆུ་ཕྲན་རྣམས་ཀྱང༔ ལྷ་ལྕམ་གྱི་ཕྱོགས་སུ་འཁྱིལ་ལོ༔ ནེའུ་སིང་མའི་ལྗོངས་རྣམས་ལ་འང༔ སྔར་མེད་པའི་མེ་ཏོག་ཁ་དོག་མཛེས་ཤིང་དྲི་ཞིམ་པ་མང་དུ་སྐྱེས་སོ༔ ནམ་མཁའི་མཐོངས་ནས་གཟུགས་མེད་པའི་སྒྲ་མང་པོ་སྙན་པར་སྒྲོགས་སོ༔ མི་མ་ཡིན་གྱི་ལྷ་འདྲེ་རྣམས་ཀྱང་མང་དུ་འཚོགས་ནས༔ ཕྱག་དང་སྐོར་བ་བྱེད་དོ༔ མེ་ཏོག་སྣ་ཚོགས་པའི་ཆར་ཆེན་པོ་ཡང་རྒྱུན་དུ་འབེབས་སོ༔ ལྷ་ལྕམ་གྱི་བདུད་ལུང་ནག་པོ་དེ་རུ་སླེབས་ནས་ཟླ་བ་འགའ་ཡར་ལོན་པ་ནས༔ ཟུང་མོ་མཁར་གྱི་རྒྱལ་བུས་ལྷ་ལྕམ་བདུད་ལུང་ནག་པོ་དེ་རུ་སྤྱུགས་འདུག་གོ་ཟེར་བ་ཐོས་པས༔ རྒྱལ་བུ་ཐུགས་སྐྱོ་བར་གྱུར་ནས༔ གྲོགས་ཡོང་བའི་བློན་པོ་བཅུ་དྲུག་བཏུས་ནས་རྒྱན་དང་ཆ་ལུགས་མཛེས་པར་བཀོད་དེ༔ ལོངས་སྤྱོད་ཀྱི་སྟོན་མོ་ཆེན་པོ་བཤམས་ནས༔ རྒྱལ་བུས་གྲོས་དྲིས་པ༔ བློན་པོ་ཆེན་པོ་ཁྱེད་རྣམས་བློ་ཆེ་བ་དང་གྲོས་ལ་མཁས་པ་ཡིན་པས༔ བསམ་མནོ་ཐོངས་ཤིག༔ ལྗོངས་ཀྱི་ཡུལ་གྱི་བྱེ་མ་ཅན་གྱིས་རྒྱལ་པོའི་ལྷ་ལྕམ་དེ༔ བདུད་ལུང་ནག་པོ་ཤིང་རོང་ཅན་དུ་སྤྱུགས་པ་ཡོད་པར་འདུག་གོ༔ དེ་ཐབས་མཁས་པའི་སྒོ་ནས་རྒྱལ་པོ་བློན་པོ་དང་བཅས་པ་ལ་སློང་བ་འཐད་དམ༔ དམག་གི་དཔུང་ཆེན་པོ་བསྐྱེད་དེ་འཕྲོག་པར་འཐད་དམ༔ ལྷ་ལྕམ་རང་ལ་རྒྱན་དང་ཆས་ལ་སོགས་མང་དུ་བྱིན་ནས་མགོ་བསྐོར་ཞིང་བྲིད་མཁས་པ་བྱས་ཏེ་ཕོ་བྲང་དུ་བཀུག་པར་འཐད་དམ༔ འདི་རྣམས་གང་ལ་དོན་གྲུབ་ན་བསྒྲུབ་སྟེ་འོང་ན་གྲོས་གྱིས་ཤིག༔ ཅེས་སྨྲས་པ༔

༈ ༔ དེ་ན་བློན་པོ་རྣམས་ཀྱིས་གྲོས་བགྱིས་པ་ལ༔ ལྷ་ལྕམ་འདི་སྔོན་ཡང་རྒྱ་གར་བྷི་རྱའི་རྒྱལ་བུས་བླངས་པ་ལ༔ ཡབ་རྒྱལ་བློན་གྱིས་ཁས་བླངས་ཀྱང་ལྷ་ལྕམ་མ་ཉན༔ དེའི་དོན་ལ་ལྷ་ལྕམ་བདུད་ལུང་དུ་སྤྱུགས་པ་ཡིན༔ ད་རུང་ཡང་རྒྱལ་པོ་ཡབ་ཡུམ་གྱིས་བཀའ་གནང་ཡང༔ ལྷ་ལྕམ་ཉན་དུ་མི་འདོད་ནས༔ རྩོད་པའི་གཞི་ཆེན་པོ་འོང་བས༔ རྒྱལ་བུ་རང་གི་འཁོར་དང་ལོངས་སྤྱོད་མང་དུ་བྱས་ནས༔ ལྷ་ལྕམ་གར་འདུག་སར་བྱོན་ཏེ༔ གྲོས་ནན་ཆེར་བཏབ་ན་ཉན་དེ་འོང༔ ཞེས་པས་བློན་པོ་རྣམས་གྲོས་མཐུན་པར་གྱུར་ཏེ༔ རྒྱལ་བུ་ལ་ལོ་རྒྱུས་རྣམས་ཞིབ་ཏུ་ཞུས་སོ༔

༈ ༔ དེ་ནས་རྒྱལ་བུས་བློན་པོ་བཅུ་དྲུག་ལ༔ ནོར་བུའི་བང་མཛོད་མང་དུ་བསྐུར་ནས༔ ལྷ་ལྕམ་ཡབ་ཡུམ་རྒྱལ་པོ་བཙུན་མོ་དང༔ བློན་འབངས་རྣམས་ལ་ལྷ་ལྕམ་སློང་དུ་བཏང་ནས༔ རྒྱལ་པོ་བློན་པོ་དང་བཅས་པའི་ཞལ་ནས༔

༈ ༔ ལྷ་ལྕམ་འདི་ནི་ཡིད་འོང་རབ་ཏུ་མཛེས༔ ཁྱེད་ཀྱི་རྒྱལ་བུའི་བཙུན་མོར་ཤིན་ཏུ་འོས༔ ངེད་ལ་མི་ཕངས་རྒྱལ་བུའི་བཙུན་མོར་སྟེར༔ ངེད་ཀྱིས་བསླབས་ཀྱང་ལྷ་ལྕམ་མི་ཉན་པས༔ རྒྱལ་བུས་གྲོས་བཏབ་ལྷ་ལྕམ་ཅིས་མི་ཉན༔ སྟེར་བས་ཁས་ལེན་ཕོ་བྲང་ནང་དུ་ཁྲིད༔ ཅེས་པའི་ལན་གསལ་བར་བྱུང་ངོ༔ དེ་ནས་རྒྱལ་བུས་ཁྱེའུ་ལྔ་བརྒྱའི་འཁོར་དང་བཅས༔ གླང་པོ་ཆེ་ལྔ་བརྒྱ་ལ་བཟའ་བ་དང་བཏུང་བའི་ལོངས་སྤྱོད་བཀལ་ནས༔ བདུད་ལུང་ནག་པོ་ཤིང་རོང་ཅན་དུ་ཉེ་བར་མྱུར་དུ་བསྒྲོད་ནས་ཕྱིན་པ་ལ༔ བདུད་ལུང་གི་སྟག་དང་དོམ་དྲེད་གཅན་གཟན་རྣམས་ཁྲོས་ཏེ༔ ངར་ཞིང་ཟུག་ནས་ལམ་བཀག་ནས་མ་བཏང་ངོ༔ ཁ་ཆར་དང་རླུང་དམར་ཀྱང་འཚུབ་སྟེ༔ ནགས་ཀྱི་ཁྲོད་ཐམས་ཅད་འགག་གོ༔ དེ་ནས་འཁོར་དང་ལོངས་སྤྱོད་ཚན་ཆེ་བ་རྣམས༔ ནགས་གསེབ་ན་ཤིང་གི་ར་བས་བསྐོར་ནས༔ ཡལ་ག་དང་ལོ་མའི་ཐོག་ཕུབ་ནས་བསྡད༔ རྒྱལ་བུ་འཁོར་དང་བཅས་པ་ཐབས་ཀྱིས་ཕྱིན་པས་བསྒྲོད༔ ཤིང་རོང་གི་ལྗོངས་སུ་སླེབས་པའི་ཚེ༔ ལྷ་ལྕམ་གར་བཞུགས་མ་རྙེད་ནས༔ སེམས་སྡུག་བསྔལ་དང་ལྡན་ནོ༔ ཉིན་གཅིག་ཉི་མ་རྩེ་ཤར་ལ་སྤྲེའུ་དང་བྲག་སྲིན་མང་པོས་ཤིང་ཐོག་ཁུར་ནས་དགའ་བའི་འཛུམ་དང་ལྡན་ཏེ་ལུང་པའི་ཕུ་ལ་བལྟས་ནས་སོང་ངོ༔ དེའི་རྗེས་བཅད་ནས་རྒྱལ་བུ་འཁོར་བཅས་དེར་ཕྱིན་པས༔ པདྨའི་ནགས་ཀྱིས་ར་བས་བསྐོར་བ༔ རྩྭ་དང་མེ་ཏོག་གི་ལྗོངས་ཆེན་པོ༔ ཤིང་སེ་བའི་སིལ་ཡབ་ལོ་འདབ་རླུང་གིས་བསྐྱོད་པ༔ ཆུ་སྒྲ་ཕྲ་བུའི་སྒྲ་སྒྲོགས་ཤིང༔ ལྗོན་ཤིང་གི་ཡལ་ག་རྣམས་ལ་མཛེས་པའི་བྱ་སྣ་ཚོགས་ཀྱིས་སྐད་ལྷང་ལྷང་སྒྲོགས་པ༔ ས་ཞག་དང༔ སྔོ་ཞག་དང༔ དྲི་མངར་བ་དང་བཟང་པོ་འཁྱིལ་པའི་ལུང་བ་ཆེན་པོ་གཅིག་འདུག་གོ༔ དེ་ནས་ཤིང་སེ་བ་ལྗོན་ཤིང་རྐང་ཟླུམ་གྱི་དྲུང་ན༔ ཡལ་ག་དང་ལོ་འདབ་ཀྱི་བསིལ་གྲིབ་ལ༔ ལྷ་ལྕམ་ནི་ལྟ་ན་སྡུག་ཅིང་ཡིད་དུ་འོང་བར་པུཎྜ་རི་ཀའི་མདོག་བཞིན་དུ༔ ངང་ལ་དཀར་བའི་མདངས་དང་ལྡན་པར་བཞུགས༔ དེའི་དྲུང་དུ་སྤྲེའུ་དང་བྲག་སྲིན་བྱ་དང་རི་དྭགས་གཞོན་ནུ་ཕོ་མོ་མང་པོ་འཁོར་ནས༔ སྤྲོ་བའི་དགའ་འཛུམ་དང་བཅས་ཏེ་རྩེ་འཇོ་སྣ་ཚོགས་ཀྱིས་སྤྱོད་པ་སྐྱོང་ངོ༔ རྒྱལ་བུ་ལྷ་ལྕམ་གྱི་དྲུང་དུ་ཉེ་བར་འདུག་སྟེ༔ མིག་གིས་མཐོང་བ་ཙམ་ན་དྲང་པོར་ལྟ་ཞིང་སྨྲས་པ༔ མཐོང་བས་ཡིད་འཕྲོག་གཞོན་ནུ་དགའ་འཛུམ་མ༔ ཁྱེད་ལ་བལྟ་ཞིང་བདག་ནི་སྣང་བ་འགུལ༔ ཐོས་པའི་ཚིག་གིས་ངེས་འབྱུང་དྲན་པ་སྐུལ༔ ནམ་ཡང་བསམ་ཞིང་ཁྱོད་དྲན་སྣང་བ་སྐྱོ༔ མི་བརྗེད་ཡིད་ཀྱི་ཡུལ་ནས་ཡང་ཡིད་གསལ༔ དང་བའི་སེམས་ཀྱིས་ལྟོ་དང་གོས་མི་དྲན༔ གཞོན་ནུ་མ་ཁྱོད་སེམས་ཤིང་དྲན་པ་གཡོ༔ ལུས་ཀྱི་དགའ་བདེ་རྩ་དང་རླུང་ཐིག་འབར༔ དྲན་པའི་ཚེ་ན་བག་ཆགས་ཡིད་ལ་བཅག༔ ཐོས་པའི་ཚེ་ན་རྨི་ལམ་སྒྱུ་མ་འདྲ༔ མཐོང་བའི་ཚེ་ན་ཡིད་ཀྱི་བག་ཆགས་ངོམ༔ སེམས་ཀྱི་བློ་ཐག་འདོད་པའི་ཞེ་བློ་ཚིམ༔ ཁྱོད་དང་ཞལ་མཇལ་གཏམ་གྱི་གླེང་མོ་འཚལ༔ ཞེས་སྨྲས་སོ༔ ལྷ་ལྕམ་གྱིས་རྒྱལ་བུ་ལ་བལྟ་ཞིང་སྨྲས་པ༔

༈ ༔ མཛེས་པའི་གཞོན་ནུ་པདྨ་མྱུ་གུ་འདྲ༔ སྐད་སྙན་ཚིག་གཙང་དུང་སོའི་མདངས་ལྡན་པ༔ བལྟ་ན་མཛེས་པའི་ཉེ་བར་སྨྲ་ནའང༔ མི་མེད་ལུང་སྟོང་འདྲེའི་ཡུལ་འདི་རུ༔ གཞོན་ནུ་ཁྱོད་འདྲ་མི་ཡི་བུ་མ་ཡིན༔ ལྷ་འདྲེའི་ཆོ་འཕྲུལ་མགོ་སྐོར་ཐབས་ལ་མཁས༔ བདག་ནི་རིགས་ངན་མི་མེད་ལུང་སྟོང་འགྲིམས༔ ཞལ་མཇལ་གཏམ་གྱི་ཚིག་ལ་དོན་མི་ཤེས༔ གཞོན་ནུ་ཅི་ཟེར་རང་ཡུལ་གནས་སུ་བྱོན༔ འདྲེ་ཡུལ་འདི་ན་མི་བུ་དོན་མ་མཆིས༔ དབུལ་མོ་བདག་ནི་བྲག་སྲིན་བྱ་དང་འགྲོགས༔ རི་དྭགས་བུ་འདྲ་མི་གཙང་གྲོགས་ལ་འཛེམ༔ བདག་དང་གཞོན་ནུ་ཕར་ཚུར་སོ་སོར་འཚལ༔ ཞེས་སྨྲས༔ རྒྱལ་བུས་ལྷ་ལྕམ་ལ་སྨྲས་པ༔ གཞོན་ནུ་ཡིད་འོང་དགའ་བའི་ལུས་འཛུམ་ཅན༔ ངང་དཀར་སྣུམ་འབོལ་མེ་ཏོག་གཟུགས་འདྲ་མ༔ མངར་བའི་དྲི་བྲོ་དལ་བའི་སྤྱོད་ལམ་ཅན༔ སྙན་པའི་སྐད་འབྱིན་ཕ་རོལ་ཡིད་འཕྲོག་མ༔ ལྷ་ལྕམ་ཁྱོད་ནི་མི་བརྗེད་དྲན་པ་བསྐུལ༔ གཞོན་ནུ་བདག་ནི་ལྷ་ལྕམ་ཡིད་ལ་བཅག༔ ཟུང་མོ་མཁར་ན་མྱུར་དུ་འགྲོ་གྱིས་བྱོན༔ མཛའ་བ་སེམས་ཀྱིས་རིང་པོའི་ལམ་ལ་བསྒྲོད༔ སྲོག་ལ་མི་ཕངས་གཅན་གཟན་ཚོགས་ལ་ལྟོས༔ ལ་དང་ལུང་བསྒྲོད་ལྷ་ལྕམ་དྲུང་དུ་འོང༔ མིའི་བུ་ཡིན་འདྲེའི་ཆོ་འཕྲུལ་མིན༔ མི་གཙང་སྐྱོན་བྲལ་སྨན་གྱི་དྲི་དང་འགྲོགས༔ སྐྱེད་མོས་ཚལ་གྱི་མེ་ཏོག་རྩི་འདྲ་ན༔ ལྷ་ལྕམ་ཁྱོད་དང་བདག་ནི་ཅི་མི་འགྲོག༔ ཡིད་ལ་བཅག་པས་དགའ་བའི་གཏམ་གླེང་སྨྲ༔ མཛའ་བའི་ཡིད་ཀྱིས་ཞལ་མཇལ་མྱུར་དུ་འཚལ༔ པདྨའི་འཛུམ་འདྲ་བཞད་པའི་འཛུམ་མདངས་ཅན༔ གཞོན་ནུ་མ་ཁྱོད་བདག་གི་གྲོགས་སུ་གཅག༔ མི་མེད་ལུང་སྟོང་འདི་འདྲའི་གནས་སྤངས་ནས༔ ལོངས་སྤྱོད་ལྡན་པའི་ཕོ་བྲང་ནང་དུ་གཤེགས༔ གཞོན་ནུ་བདག་དང་སྣང་བ་ཅི་དགའ་སྤྱོད༔ ཅེས་སྨྲས་པས༔ ཡང་ལྷ་ལྕམ་གྱིས་རྒྱལ་བུ་ལ་སྨྲས་པ༔

༈ ༔ གཞོན་ནུ་ཁྱོད་ཀྱིས་ཕན་པར་སྨྲ་ནའང༔ ལྷ་ལྕམ་བདག་ནི་འདི་ནས་གཞན་མི་འགྲོ༔ མི་གོ་མ་ཆོད་ཕོ་བྲང་ནང་ནས་སྤྱུགས༔ སེམས་ལ་མི་གཅེས་མི་མེད་ཡུལ་དུ་བརྫངས༔ ཁྱོད་ནི་རིགས་གཙང་རྒྱལ་པོའི་སྲས་ཡིན་ཀྱང༔ སེམས་ཀྱི་འདུན་པ་རི་དྭགས་གྲོགས་ལ་སྤྲོ༔ ཕོ་བྲང་གནས་དེར་ལོངས་སྤྱོད་ཅི་ཆེ་ཡང༔ བསམ་གཏན་གནས་དེ་མི་མེད་ལུང་སྟོང་དབེན༔ འཁོར་དང་འབངས་གཡོག་བྱ་བ་ཅི་མཐོང་ཡང༔ གནས་ལུགས་གྲོགས་དེ་སྤྲེའུ་བྲག་སྲིན་བཟང༔ རྒྱན་དང་ཆ་ལུགས་གསེར་གཡུ་མདོག་བཙུན་ཡང༔ ཤིང་གི་ལོ་འདབ་སྡིག་པའི་རྣམ་སྨིན་ཆུང༔ ཤ་ཆང་ཟས་དང་ཁ་མངར་འཛོམས་ན་ཡང༔ ཤིང་གི་འབྲས་བུ་བདེ་དྲོད་ལུས་ལ་སྨན༔ རྐང་བཞི་རྟ་དེ་འགྲོས་ལ་མགྱོགས་ན་ཡང༔ རླུང་གི་འདྲེན་ཁུག་བདེ་བའི་ས་ལ་སྙེགས༔ རུས་ཀྱི་ཆེ་བ་ཕ་མིང་གྲགས་ན་ཡང༔ དངོས་གྲུབ་གྲོགས་སུ་རྣལ་འབྱོར་ཆོས་བྱེད་བཟང༔ རིགས་ཀྱི་བཙུན་པ་རྒྱལ་སྲིད་མཐོ་ན་ཡང༔ དམའ་བའི་ས་ནི་རང་སེམས་གནས་ལུགས་བདེ༔ འཁོར་བའི་ཆོས་ལ་ཡིད་ཀྱི་སྤྲོ་བ་མེད༔ གཞོན་ནུ་ཁྱོད་ཀྱང་དམ་ཆོས་ལོངས་སྤྱོད་གྱིས༔ ཞེས་སྨྲས་སོ༔ རྒྱལ་བུས་ལྷ་ལྕམ་ལ་སྨྲས་པ༔ ༔ཡིད་འོང་མཛེས་པའི་ལྷ་ལྕམ་གཞོན་ནུ་ཁྱོད༔ བདག་གིས་སྨྲས་པའི་ཚིག་ལ་མཛའ་བས་ཉོན༔ ཅིས་ཀྱང་ཆོས་ལ་ལྷ་ལྕམ་ཡིད་སྨོན་ན༔ ཕོ་བྲང་ནང་དུ་ཆོས་ལ་འགལ་མི་འགྱུར༔ རྒྱལ་སྲིད་རྗེ་ལ་མོས་གུས་སྐུ་རེ་འཚལ༔ འབངས་གཡོག་འཁོར་ལ་སྐྱོང་བྲན་མཉམ་ཉིད་འཚལ༔ ལག་གིས་ལྕོག་ན་བཟའ་བཏུང་སྦྱིན་པར་འཚལ༔ ལུས་ཀྱིས་ལྕོག་ན་མཆོད་གནས་སྐོར་བར་འཚལ༔ ངག་གིས་ལྕོག་ན་མཐུན་རྐྱེན་བསླབ་བྱ་འཚལ༔ སེམས་ཀྱིས་ལྕོག་ན་སྙིང་རྗེ་ཕན་སེམས་འཚལ༔ ཤེས་པར་གྱུར་ན་དམ་ཆོས་ཅི་མཛད་ཡོད༔ བདག་གིས་སྨྲ་ལ་ཕན་སེམས་བདེ་བ་ཡོད༔ ཡིད་འོང་མ་ཁྱོད་ཕོ་བྲང་མི་གཤེགས་ན༔ དགེ་རྩ་བས་ཀྱང་སྡིག་པའི་ས་བོན་ཆེ༔ མཛའ་བའི་སེམས་ཀྱིས་བདག་ལ་ཅི་གསན་འཚལ༔ ཞེས་སྨྲས་སོ༔ ༔ཡང་ལྷ་ལྕམ་གྱིས་རྒྱལ་བུ་ལ་སྨྲས་པ༔

༈ ༔ གཞོན་ནུ་ཁྱོད་ཀྱི་སྨྲ་བ་ལེགས་ན་ཡང༔ ཕོ་བྲང་ཆོས་དེ་བཟང་ཡང་བདག་མི་བྱེད༔ གཞོན་ནུ་ཁྱོད་ལ་བདག་གིས་སྨྲ་ཡི་ཉོན༔ རྒྱ་མཚོའི་འགྲམ་ན་དྭངས་ཤིང་སྤྲོ་བའི་གནས༔ ཆགས་མེད་སྐྱོན་བྲལ་རིན་ཆེན་ཆགས་པའི་གླིང༔ ནེའུ་སིང་ལྗོངས་མ་མེ་ཏོག་སྨན་གྱི་ཚལ༔ ཁ་མངར་བདུད་རྩི་དང་བཅུད་དྲི་མངར་ལྡན༔ བུང་བའི་ཚོགས་ཀྱི་རྐང་དྲུག་བདེ་བའི་འགྲོས༔ དར་ཤོག་ལྷབ་ལྷུབ་རླུང་གིས་བསྐྱོད་ཅིང་གཡབ༔ སྙན་པའི་སྒྲ་འབྱིན་དར་དིར་མཁའ་ལ་ལྡིང༔ དྭངས་ཤིང་རྙོགས་མེད་ཆབ་ཀྱི་ཟིལ་པ་འབབ༔ ཟིལ་མོའི་སྦྲང་ཆར་མེ་ཏོག་མཁའ་ལ་འཐུལ༔ སྐྱེད་མོས་གནས་དེ་ཨ་མོ་ལྗོན་པའི་གནས༔ ལྷུན་པོའི་ར་བ་ཡིད་འོང་གནས་དེ་རུ༔ གཞོན་ནུ་ཁྱོད་དང་ལྷན་ཅིག་འགྲོག་ནའང༔ དགའ་བའི་སེམས་ཀྱི་འདོད་པ་ཚིམ་ཚིམ་འདྲ༔ འོན་ཀྱང་སེམས་ཀྱི་ལྟད་མོ་མ་མཐོང་ན༔ བདེ་བ་མི་ཐོབ་སྡུག་བསྔལ་རྒྱུ་ཡིན་པས༔ མི་ཆགས་མི་ཞན་མི་མེད་ལུང་སྟོང་འགྲིམ༔ ལྷ་ལྕམ་བདག་ལ་གཞོན་ནུ་ཁྱེད་མ་འཁང༔ མྱུར་དུ་ཞལ་མཇལ་ཕོ་བྲང་ནང་དུ་གཤེགས༔ རིགས་ངན་བདག་དང་ལྷན་གཅིག་འགྲོག་མི་བདེ༔ རྒྱལ་པོ་རྒྱུ་ནི་རང་སར་བཙུན་པ་ཡིན༔ ཕོ་བྲང་བརྟེན་ནས་འབངས་འཁོར་འདོད་པ་ཚིམ༔ ཆོས་མཐུན་དད་པས་རྒྱལ་སྲིད་ཆོས་ཀྱིས་སྐྱོངས༔ བདག་གི་ཚིག་འདི་ཁྱེད་ཀྱིས་ཅིས་མི་གསན༔ སྙིང་གཏམ་གྲོས་ཚིག་ཤ་ཚའི་ཕན་པ་ཡོད༔ ཅེས་སྨྲས༔ ཡང་རྒྱལ་བུས་ལྷ་ལྕམ་ལ་སྨྲས་པ༔ ༔མཛེས་མ་ཁྱོད་ཀྱིས་སྨྲས་པ་ཤ་རེ་ཚ༔ གཞོན་ནུ་བདག་ནི་སེམས་ལ་རབ་ཏུ་བཅག༔ བདེ་བའི་སེམས་ཀྱི་རང་འདོད་མ་ཚིམ་ན༔ མཁས་པའི་གཟོ་ནི་མི་ཤེས་བླུན་པོ་འདྲ༔ གཞོན་ནུ་མ་ཁྱོད་གྲོགས་སུ་མི་འོས་ན༔ བདག་གིས་ཅི་སྨྲ་བྲག་ཁའི་ཆུ་དང་འདྲ༔ ད་རུང་གསོན་དང་མཛེས་མ་སེམས་ལ་ཞོགས༔ ལུང་པ་ཚལ་ནས་གངས་ཀྱི་སྟོད་ཁྲོད་ཆགས༔ རྫ་དང་གཡའ་མ་བྲག་ཆ་སྣང་བ་སྐྱོ༔ ཚང་ཚིང་ནགས་ཀྱི་མཐོང་ཁུང་ར་བ་རུ༔ ལྗོན་པའི་ཤིང་ནི་ཡལ་ག་ལོ་འདབ་རྒྱས༔ སྙིང་པོ་མེ་ཏོག་ཁ་མངར་དྲི་དང་ལྡན༔ ཁ་དོག་རྩི་ནི་རྐང་དྲུག་བུང་བས་ལེན༔ བསིལ་གཡབ་སྐྱིབས་ན་འཇོལ་ཆུང་རང་སྐད་སྒྲོག༔ ཀ་ལ་པིངྐ་ཅ་ཅོ་སྙན་པའི་སྒྲ༔ ཁུ་བྱུག་ནེ་ཙོ་འབྲས་བུ་གཟན་མང་འཐུ༔ ལྡང་ལྡིང་ཆུ་མིག་དྭངས་ལ་རྙོགས་མེད་འཁྱིལ༔ ཙན་དན་སེ་བ་རྐང་ཟླུམ་དྲུང་ནས་ནི༔ སྤྲེའུ་བྲག་སྲིན་རི་དྭགས་གཞོན་ནུའི་བྱ༔ སྐྱོ་ཞིང་སྣང་བ་མི་མེད་ལུང་སྟོང་འདི༔ བསམ་གཏན་སྒོམ་པའི་རིགས་ངན་གནས་པའི་ས༔ མ་ཁྱོད་ཀྱི་གནས་པའི་ས་འདི་མིན༔ ཡིད་འོང་མ་ཁྱོད་ཕོ་བྲང་ནང་ནས་བཙུན༔ ཞི་དལ་སྨྲ་བའི་ཚིག་ལ་བསམ་བློ་ཡོད༔ བདག་ལ་མི་ཕོད་བརྩེ་བའི་སེམས་ཀྱིས་སྤྱོད༔ ལྷན་ཅིག་ཏུ་ནི་ཕོ་བྲང་ནང་དུ་གཤེགས༔ ཕོད་པ་མ་ཆེ་ཨུ་ཚུགས་གཏམ་མ་སྨྲ༔ གཞོན་ནུ་མ་ཁྱོད་ཕོ་བྲང་མེ་ཏོག་འདྲ༔ བདག་ཀྱང་མངར་རྩི་བསིལ་ཡབ་དྭངས་མ་འདྲ༔ ལྷན་གཅིག་ཏུ་ཡང་འབྲལ་མེད་ཅིས་མི་འགྲོགས༔ དགེ་བའི་ལས་ལ་བདག་གིས་གེགས་མི་བྱེད༔ ཅི་ན་ཡང་ནི་མྱུར་དུ་བསྒྲོད་ལ་གཤེགས༔ ཞེས་སྨྲ་ཞིང༔ ལྷ་ལྕམ་ལ་དྲང་བར་བལྟས་ནས༔ མིག་མཆི་མས་གང་ཆགས་པ་ལྡན་པར་བྱེད༔ དབུགས་སྟོད་ན་བརྒྱང་ཞིང་བདེ་བའི་སྐད་འབྱིན་ནོ༔ རྒྱལ་བུའི་འཁོར་བློན་པོ་གཉིས་ཀྱིས༔ རྒྱལ་བུ་དང་ལྷ་ལྕམ་གཉིས་ལ་བལྟས་པས༔ སེམས་སྐྱོ་བར་བྱུང་ནས་གྲོས་བསྟུན་པས༔ ལྷ་ལྕམ་ཕོ་བྲང་དུ་མི་གཤེགས་ན་རྒྱལ་བུ་ངོ་གནོང་པར་གྱུར་ཏེ༔ ཚེའི་དུས་བྱེད་པར་ངེས༔  དེ་བས་ད་ལྟ་ལྷ་ལྕམ་ཨུ་ཚུགས་སུ་ཁྲིད་པས་འཐད་བསམས་ནས༔ བློན་པོ་གཉིས་ཀྱིས་ལྷ་ལྕམ་གྱི་ཕྱག་གཡས་གཡོན་ལ་འཇུས་ཏེ་སྨྲས་པ༔

༈ ༔ སྨོན་ལམ་ཤུགས་ཀྱིས་མཚམས་སྦྱར་ནས༔ ལྷན་གཅིག་ཏུའང་འདུག་ཅེས་པ༔ མེ་ཏོག་རྩི་དང་ལྡན་པ་བཞིན༔ རྒྱལ་བུ་དང་ནི་ལྷ་ལྕམ་གཉིས༔ འདུ་འབྲལ་མེད་པ་གྲོགས་ཀྱི་མཆོག༔ ཅི་བདེ་བར་དུ་ལྷན་གཅིག་ཏུ༔ ཕོ་བྲང་ནང་དུ་གཤེགས་པར་འཚལ༔ ཞེས་སྨྲ་ཞིང་ལུང་པའི་མདོ་ལ་དྲུད་དེ་མྱུར་དུ་ཕྱིན་པས༔ གནས་དེའི་སྤྲེའུ་དང་བྲག་སྲིན་བྱ་དང་རི་དྭགས་ལ་སོགས་པས༔ གཞི་བདག་གི་སེམས་ཅན་རྣམས་མ་དགའ་ནས༔ ངུ་བའི་སྐད་ཆེན་པོ་འདོན༔ ལ་ལ་ནི་བརྒྱལ་ཞིང་རེངས༔ ལ་ལ་ནི་ངུ་ཞིང་འགྱེལ༔ ལ་ལ་ནི་ཕྱི་ལ་འབྲང༔ གནས་ཀྱི་མེ་ཏོག་རྣམས་ཀྱང་ཁ་ཟླུམ༔ ལྗོན་ཤིང་གི་ཡལ་ག་རྣམས་ཀྱང་ཆག༔ ལུང་པའི་སྔོ་ཞགས་རྣམས་ཀྱང་ཡལ་ལོ༔

༈ ༔ དེ་ནས་ལྷ་ལྕམ་གྱིས་བློན་པོ་གཉིས་ལ་སྨྲས་པ༔ ༈ ༔ ལས་ཀྱིས་བསྐོས་པའི་བློན་ཆེན་གཉིས༔ མི་རྒོད་བཞིན་དུ་ཤུགས་དང་ལྡན༔ ཆོམ་རྐུན་བཞིན་དུ་གནོད་སེམས་ཆེ༔ ཕན་གྲོགས་ཆོས་ལ་མི་བྱེད་པར༔ རིགས་ངན་བློན་པོ་སྡིག་པོ་ཆེ༔ གཞན་ལ་གནོད་འཚེ་རང་ལ་སྨིན༔ དེ་ཕྱིར་སྡུག་བསྔལ་ལས་ཀྱི་རྒྱུ༔ དེ་བས་བདག་ལ་གནོད་མ་བྱེད༔ མི་མེད་ཡུལ་དུ་གནས་པར་འཚལ༔ ཞེས་སྨྲ་ཞིང་ལག་པ་ལྗོན་ཤིང་ལ་འཕྱང༔ རྐང་པ་བྲག་རྡོ་ལ་གཏད༔ མཆི་མས་མཚུབ་ཁུང་ཞིང་བདེ་བའི་སྐད་སྙན་པོར་འབྱིན་ནོ༔ དེ་ནས་བློན་པོ་གཉིས་ཀྱིས་ཤིང་ཚེར་མང་ཅན་གྱི་ལྕག་ཚན་ལྷ་ལྕམ་ལ་བྲབ་ཅིང་སྨྲས་པ༔

༈ ༔ ཡིད་དུ་འོང་བའི་མཛེས་མ་ཁྱོད༔ ལྷ་ལྕམ་ཡིན་པས་བཀའ་གཉན་ཡང༔ རྒྱལ་བུ་ལ་ཡང་མི་གསན་ཅིང༔ ཕོ་བྲང་ནང་དུ་མི་གཤེགས་པར༔ ཁ་སྤྱང་མཁས་པས་ཚིག་གིས་བསླད༔ མྱུར་དུ་འང་ནི་བསྒྲོད་པར་བྱ༔ ཞེས་སྨྲ་ཞིང༔ ལ་དང་ལུང་རྣམས་ལ་མགྱོགས་པར་ཁྲིད་ནས༔ ལམ་ཁར་ལུས་པའི་བློན་པོ་ཀུན་གྱིས་ཀྱང་བསུ་བ་བགྱིད་པ་ལ༔ ལྷ་ལྕམ་དང་ཞལ་མཇལ་བའི་ཚེ༔ བློན་པོ་རྣམས་ཀྱིས་བློ་ཕྱོགས་གཅིག་ཏུ་ལྷ་ལྕམ་ལ་བསྟོད་པ༔ ཡིད་འོང་རབ་སྤྲས་འཛུམ་པའི་མདངས༔ གཞོན་ནུའི་སྐུ་ལ་ལང་ཚོ་རྒྱས༔ ངང་ལ་སྣུམ་པ་དཀར་བའི་མདོག༔ ལུས་ཀྱི་དྲི་དང་ངག་གི་གདངས༔ དལ་བུའི་སྤྱོད་ལམ་ངོ་རེ་མཚར༔ བིམ་པ་ལྟ་བུའི་མེ་ཏོག་བཞིན༔ ཆགས་མེད་སྐྱོན་དང་བྲལ་འདྲ་མ༔ མཐོང་བས་དབུལ་ཕོངས་སྡུག་བསྔལ་སེལ༔ མཐོང་བས་སེམས་ལ་བདེ་བ་འབྱིན༔ དྲན་ནས་སྣང་བ་ངོམས་ཤིང་ཚིམ༔ རིགས་ངན་བདག་ཅག་བློན་འབངས་ལ༔ རྒྱལ་བུ་བཙུན་མོ་དྲིན་རེ་ཆེ༔ ཕོ་བྲང་བྱོན་པ་ངོ་རེ་མཚར༔ ཞེས་སྨྲ་ཞིང༔ རྒྱན་འདོགས་པ་དང་ན་བཟའ་མང་དུ་གསོལ་ལོ༔ དེ་ནས་ལྷ་ལྕམ་གྱིས་ཡན་ལག་བཞི་ལྕགས་སྒྲོག་གིས་བཅིངས༔ གླང་པོ་ཆེའི་ཁལ་ལ་བསྐྱོན༔ རྒྱལ་བུ་དང་བློན་འབངས་རྣམས་ཀྱང་ཅང་ཤེས་རྟ་ལ་བཞོན་ཏེ་ལྷ་ལྕམ་ལ་བསྐོར་ནས་མྱུར་དུ་ལ་དང་ལུང་ལ་བསྒྲོད་ཕོ་བྲང་གི་ཕྱོགས་སུ་འོང་ངོ༔ ཟུང་མོ་མཁར་གྱི་ཕོ་བྲང་དུ་ཉིན་གཅིག་སླེབས་པའི་སར༔ ནུབ་གཅིག་ཤིང་གི་ར་བས་བསྐོར་ཏེ་བསྡད་དེ༔ དེ་རུ་བསུ་བའི་བློན་འབངས་ཁྱེའུ་ཕོ་མོ་རྒྱན་དང་ཆ་ལུགས་རྣམ་པ་མང་པོ་ཡང་སླེབས༔ འཁོར་འབངས་རྣམས་ཀྱིས་ལྷ་ལྕམ་འདི་འདྲ་བ་རྒྱལ་བུའི་བཙུན་མོར་གདན་འདྲོང་བ་རེ་དགའ་བསམས་ནས༔ ཤ་ཆང་ལ་ལོངས་སྤྱོད་ཅིང་བློ་བདེ་བར་སོ་སོར་ནས་ཉལ་ལོ༔ ལྷ་ལྕམ་གདན་འདྲེན་ལ་མངགས་པའི་བློན་པོ་ཁྱེའུ་རྣམས་ཀྱང་ཐག་རིང་གི་ས་ནས་ལྷ་ལྕམ་ནི་ཁུགས༔ བློན་འབངས་བསུ་བས་སླེབས༔ ད་ནི་བསམ་པའི་དོན་གྲུབ་སེམས་བདེ་བསམས་ནས༔ ཟས་སུ་ཤ་ཟ་ཞིང་སྐོམ་དུ་ཆང་འཐུངས་ཏེ༔ སོ་སོར་ར་རོ་ཞིང་བློ་ཕེབས་པར་ཉལ་ལོ༔ རྒྱལ་བུ་ནི་རིང་པོའི་ས་ནས༔ ལྷ་ལྕམ་ནི་གདན་དྲོངས༔ བློན་འབངས་རྣམས་ནི་མོས་ཤིང་ཚིམ༔ ཉེ་བར་ཕོ་བྲང་དུ་སླེབས་པ་འདི་ངོ་རེ་མཚར༔ ལྷ་ལྕམ་ཡིད་འོང་འདི་འདྲ་བ་དང་ལྷན་གཅིག་ཏུ་འགྲོག་དབང་ཡོད་པས༔ བདག་གི་བསམ་པའི་དོན་གྲུབ་བསམས་ནས༔ ཟ་འོག་གི་གུར་ཆེན་ནང་ན་བློ་ཕེབས་ནས་ཉལ་ལོ༔ དེའི་ནུབ་མོ་ནམ་ཐོ་རངས་ཁར་སླེབས་པའི་དུས་ན༔ ལྷ་ལྕམ་ནི་ཤིན་ཏུ་དྲན་པ་གསལ་བར་བྱུང་སྟེ༔ རང་གིས་རང་ལ་ལྟ་ཞིང་བསམས་ནས༔ ལས་ངན་པའི་ལུས་འདི་འདྲ་བ་སྐྱེ་བ་དམན་ལ་དབང་པོ་རྟུལ་བ་ཤེས་རབ་ཆུང་བ་རྐྱེན་མང་བ༔ ཆོས་དྲན་ཀྱང་བྱེད་དབང་མེད་པ་འདི་འདྲ་བ༔ ལྷ་ལྕམ་བདག་ལ་འོང་དགོས་པ་སེམས་རེ་ཕམ་བསམས་ནས༔ བླ་མ་མཁའ་འགྲོ་ལ་ཐུགས་རྗེ་ཡོད་ན༔ བདག་ནི་བསམ་པ་འདི་ལ་ཡོན་ཏན་གྱི་འབྲས་བུ་གཅིག་འོང་རེ་ཐང་བ་ལ་བསམས་ནས༔ སྨྲེ་སྔགས་དང་བཅས་པའི་སྐད་འབྱིན་ཅིང་གསོལ་བ་འདི་ལྟར་བཏབ་པས༔

ཧྲཱི༔ གདོད་མའི་རྒྱལ་བ་ཐུགས་རྗེ་ཅན༔ བྱམས་མགོན་སྤྱན་གྱིས་གཟིགས་མི་གཟིགས༔ མ་རིག་ལས་ངན་བདག་འདྲ་མ༔ མུན་རུབ་འཁོར་བའི་གནས་ན་འཁྱམས༔ དུག་གསུམ་གཅོང་ནད་ཟིན་མི་ཟིན༔ འཇིགས་པའི་འཕྲང་ལ་འགྲོ་མི་འགྲོ༔ གྲོགས་ངན་རྐྱེན་དང་འཕྲད་མི་འཕྲད༔ སྐྱབས་མེད་མ་ལ་བསྐྱབ་ཏུ་གསོལ༔ བྱམས་མགོན་ཐུགས་རྗེ་མ་ཆུང་ཞིག༔ མ་རིག་འཁོར་བའི་གནས་ནས་དྲོངས༔ མྱུར་དུ་བདེ་བའི་མཆོག་ལ་ཁོད༔ ཅེས་གསུངས་སོ༔ གསོལ་བ་སྙན་པའི་ངག་གིས་འདེབས་ཤིང༔ གདུང་བའི་སེམས་དང་ལྡན་པའི་ཚེ༔ ཁྱེའུ་དཀར་པོ་ཤེལ་གྱི་ཐོར་ཚུགས་ཅན༔ གཡུའི་བུམ་པ་བསྣམས་པ་གཅིག་བྱུང་ནས་འདི་སྐད་སྨྲས༔

༈ སྔོན་གྱི་ལས་བསགས་སྐལ་ལྡན་མ༔ དགེ་སེམས་དད་པའི་མཆོག་གྱུར་མ༔ དྲན་དང་བྱེད་པ་དད་པའི་གཞི༔ ལམ་དུ་སྐྱོལ་བ་དད་པའི་གྲོགས༔ སྟོང་ཉིད་སྙིང་རྗེ་ཟུང་དུ་འབྲེལ༔ སྣང་བ་སྒྱུ་མ་རྨི་ལམ་འདྲ༔ སེམས་ཉིད་དངོས་མེད་ནམ་མཁར་ཐིམ༔ མ་ཕམ་དངོས་གྲུབ་སྐལ་བ་ཡོད༔ རྐྱེན་ངན་གྲོགས་སུ་ཤར་བར་སྒོམས༔ ཞེས་གསུངས༔ ལྷ་ལྕམ་གྱི་བསམ་པ་ལ༔ འདི་འདྲའི་ཁྱེའུ་མིའི་བུ་མ་ཡིན་རྒྱལ་བའི་རྣམ་འཕྲུལ་གཅིག་ཡིན་ནམ༔ ངོ་མཚར་བསམས་ནས་འདི་སྐད་སྨྲས་པ༔

༈ ༔ ཁྱེད་ལྟ་བུའི་ཁྱེའུ་སྔོན་དུ་མ་མཐོང་བ་ལ༔ འདི་མིའི་བུ་ནི་མ་ཡིན༔ ཞིང་ཁམས་གང་ནས་འོང༔ རིགས་ནི་གང་དུ་གཏོགས༔ མིང་ཅི་ཟེར༔ འདིར་ཅི་བྱེད་པ་ལ་འོང༔ ཞེས་དྲིས་པས༔ ཁྱེའུ་དེའི་ཞལ་ནས༔ བདག་ཨོ་རྒྱན་གྱི་ཡུལ་མཁའ་འགྲོ་རྒྱ་མཚོའི་གླིང་ཞེས་བྱ་བ་ནས་འོངས༔ རིགས་ནི་ཀུན་ཏུ་བཟང་པོའི་རིགས་སུ་གཏོགས༔ མིང་ནི་པདྨ་འབྱུང་གནས་ཞེས་སུ་གྲགས༔ གདུལ་བྱ་ནི་རྒྱ་གར་ནུབ་ཀྱི་ཡུལ་ན་དར༔ བདག་གི་འདོད་པའི་དོན་ལྷ་ལྕམ་ཁྱོད་ཀྱི་གྲོགས་བྱེད་དུ་འོངས༔ བོད་འབངས་ཀྱི་ཡུལ་བསམ་ཡས་འཆིང་ཕུ་ཞེས་བྱ་བ་རུ༔ བདག་ནི་སླེབས་ནས་ལོ་གསུམ་སོང༔ ཁྱོད་ཀྱིས་མ་ཐོས་སམ་ཟེར༔ ལྷ་ལྕམ་གྱིས་ཞུས་པ༔ ཁྱོད་ཨོ་རྒྱན་གྱི་རྒྱལ་པོ་པདྨ་འབྱུང་གནས་ཡིན་ན་ནི༔ ལྷ་ལྕམ་ཁོ་མོ་བདག་ཆོས་བགྱིད་པའི་གྲོགས་སུ་ཐུགས་རྗེས་བཟུང་ན་ཅི་མ་རུང་ཨཾ༔ ལྷ་ལྕམ་ལྕགས་སྒྲོག་བཙོན་དོང་འདི་ལས་ཐར་བའི་ཐབས་ཤིག་ཞུ་ཞུས་པས༔

༈ ༔ ཨོ་རྒྱན་གྱི་ཞལ་ནས༔ ལྷ་ལྕམ་ཁྱོད་ཀྱིས་ཆོས་བྱེད་ན་བདག་གིས་གྲོགས་བགྱིད༔ རིན་པོ་ཆེའི་སོར་གདུབ་འདི་ལག་པ་གཡོན་པའི་སྲིན་མཐེབ་ལ་གོན་ལ༔ རྣལ་འབྱོར་པ་བདག་སྤྱི་བོར་སྒོམས་ཤིག༔ བདག་གར་འགྲོ་བའི་རྗེས་སུ་ཐེ་མ་ཚོམ་པར་ཤོག་ཅིག༔ ཅེས་གསུངས༔ རྒྱལ་བུ་འཁོར་འབངས་དང་བཅས་པས་མཐོང་བར་མི་རིག་ཅེས་གསུངས༔ ལྷ་ལྕམ་གྱིས་སོར་གདུབ་གོན་པ་དང༔ ཡན་ལག་བཞི་བཅིངས་པའི་ལྕགས་སྒྲོག་རང་སར་གྲོལ་ལོ༔ ལུས་ཀྱང་ཡང་རྩལ་དང་ལྡན་པར་གྱུར་ནས༔ ཨུ་རྒྱན་གྱི་རྗེས་སུ་འབྲངས་པས་བསམ་ཡས་འཆིང་ཕུ་ཞེས་པར་སྐད་ཅིག་ལ་སླེབས་སོ༔ ལྷ་ལྕམ་དང་ཨུ་རྒྱན་བསམ་ཡས་འཆིང་ཕུར་བྱོན་པའི་དུས་ན༔

༈ ༔ རྒྱལ་བུ་ནི་ནམ་ལངས་ནས་ལྷ་ལྕམ་ལ་བལྟས་པས་མ་རྙེད༔ ནམ་མཁའི་མཐོངས་ལ་མཁའ་འགྲོ་ཕོ་མོ་གཉིས་རྒྱ་གར་གྱི་ཕྱོགས་སུ་སོང་བར་མཐོང༔ མ་དག་པའི་བློན་པོ་རྣམས་ཀྱིས་རྒྱ་ཁྲས་བྱ་ནག་གི་ཕུག་རོན་སྨུག་ཅུང་གཅིག་ཁ་རུ་ཐོགས་ནས་ནམ་མཁའི་མཐོངས་ལ་འཕུར་ཏེ་རྒྱ་གར་ཕྱོགས་སུ་སོང་བར་མཐོང༔ བསུ་བ་ལ་འོངས་པའི་འཁོར་འབངས་རྣམས་ཀྱིས་རྡོ་རྗེ་དང་དྲིལ་བུ་ཟུང་གཅིག་བསམ་ཡས་ཀྱི་ལུང་པར་བབས་པར་མཐོང༔ རྒྱལ་བུ་འཁོར་བཅས་ཀུན་གྱིས་ལྷ་ལྕམ་ཤིང་གི་ར་བ་རྣམས་སུ་བཙལ་ཀྱང་མ་རྙེད་ནས༔ རྒྱལ་བུ་ནི་ངོ་གནག་ཅིང་སེམས་ཕམ་པར་གྱུར༔ བློན་པོ་རྣམས་ནི་རྒྱལ་བུ་ལ་ལྟ་ཞིང་ངུ་འབོད་ཆེན་པོ་འདོན༔ འཁོར་འབངས་རྣམས་ནི་བརྒྱལ་ཞིང་འགྱེལ་ལོ༔ ཐམས་ཅད་དྲན་པ་སོས་ནས་ཕྱོགས་གཅིག་ཏུ་འདི་སྐད་སྨྲས་སོ༔

༈ ༔ དཀའ་ལས་བྱས་པའི་ལྷ་ལྕམ་དེ་ཡང་ན་ཕ་མའི་སར་བྲོས༔ ཡང་ན་རྒྱ་གར་བྷི་རྱའི་རྒྱལ་བུས་ཕྲོགས༔ ད་ནི་སྔོན་གྱི་ལས་ཡིན་པས་ཐམས་ཅད་ཕོ་བྲང་དུ་འབྱོན་པར་འཐད་ཟེར་ནས་རང་རང་གི་ས་རུ་ལོག་གོ༔ སྒྲག་འཚལ་ལུ་སྐོར་གྱི་ཕོ་བྲང་ན༔ རྒྱལ་བློན་རྗེ་འབངས་འཁོར་དང་བཅས་པ་རྣམས་ཀྱིས་གཏམ་ཕར་གླེང་ཚུར་གླེང་གླེང་མོ་ཐོས་པ་ལ༔ ཟུང་མོ་མཁར་གྱི་ཕོ་བྲང་དུ་ལྷ་ལྕམ་རྒྱལ་བུས་ཁྲིད་ནས་སོང་ཟེར་བ་ཐོས་པས༔ སེམས་དགའ་ཞིང་སྤྲོ་ནས༔ ཟུང་མོ་མཁར་གྱི་ཕོ་བྲང་དུ་བྱོན་པ་དང༔ ཟུང་མོ་མཁར་གྱི་རྒྱལ་བུས་ནི་ལྷ་ལྕམ་ཕ་མིང་གིས་ཕྲོགས་པ་ཡིན་སྙམ་ནས་སྔོན་དུ་རིན་ཟོས་པས་རྒྱལ་པོ་བློན་འབངས་ཞེ་རེ་ཁྲེལ༔ ད་ཡིན་ན་དེ་རིང་གི་ལྷ་ལྕམ་བཏང་དགོས་ཟེར་བས་འཕྲིན་ཐོགས་པའི་རྐང་མགྱོགས་པ་མངགས་པའི་རྟ་པ་ལྔ་བརྒྱ་ཙམ༔ མཚལ་ལུ་སྐོར་གྱི་ཕོ་བྲང་དུ་བཏང་བ་གཉིས་ལམ་ཁར་འཕྲད་དེ༔ ལྷ་ལྕམ་བྲོས་ནས་མ་རྙེད་པའི་གཏམ་རྒྱུད་གླེང་བས༔ གཅིག་གིས་གཅིག་ལ་འཁོན་པའི་ཚིག་སྨྲ་ཞིང་ཁྲོས་པའི་ཚུལ་ངོ་གནག་པར་བསྟན་ཏེ༔ རང་རང་གི་ས་རུ་ལོག་གོ༔ ཟུང་མོ་མཁར་གྱི་རྒྱལ་བུས་དམག་མང་དུ་བསགས་ཏེ༔ ཞེ་སྡང་གི་ང་རོ་ཆེན་པོ་བགྱིད་ཅིང༔ མཚོ་ལུང་སྐོར་གྱི་ཕོ་བྲང་རྒྱལ་བློན་དང་བཅས་པ་འབངས་འཁོར་རྣམས་ཐམས་ཅད་རླག་པར་བྱེད་དོ༔ ཞེས་སྨྲ༔

༈ ༔ མཚོ་ལུང་སྐོར་གྱི་རྒྱལ་བློན་རྣམས་ཀྱིས་ཀྱང་དམག་མང་དུ་བསགས་ཏེ༔ ཞེ་སྡང་གི་ང་རོ་བྱེད་ཅིང༔ ཟུང་མོ་མཁར་གྱི་ཕོ་བྲང་རྒྱལ་བློན་འབངས་དང་བཅས་པ་རླག་པར་བྱེད་དོ༔ ཞེས་སྨྲས༔ དེའི་སྐབས་སུ་སེམས་ཅན་གྱི་སྲོག་གཅོད་ཅིང་མི་དགེ་བའི་ལས་བྱེད་པར་ཨོ་རྒྱན་གྱིས་མཁྱེན་ནས༔ སྙིང་རྗེ་ཆེན་པོས་གཟིགས་ཏེ༔ མཚན་ཉིད་དང་ལྡན་པའི་ལྷ་ལྕམ་གཉིས་སུ་སྤྲུལ་ནས༔ གཅིག་ནི་མཚོ་ལུང་སྐོར་གྱི་ཕོ་བྲང་དུ་སྤྲུལ་པས༔ རྒྱལ་བློན་ཐམས་ཅད་དགྱེས་པར་བྱེད༔ ས་ཕྱོགས་དེར་བཀྲ་ཤིས་པ་དང་ཆོས་བྱེད་པ་བྱུང་ངོ༔ གཅིག་ནི་ཟུང་མོ་མཁར་གྱི་ཕོ་བྲང་དུ་སྤྲུལ་ནས་རྒྱལ་བུ་འབངས་དང་བཅས་པ་དགྱེས་པར་བྱས༔ ས་ཕྱོགས་དེར་བཀྲ་ཤིས་པ་དང་ཆོས་འབྱུང་བ་ཡུན་རིང་དུ་གནས་སོ༔ དེ་ནས་ལྷ་ལྕམ་དང་ཨུ་རྒྱན་གཉིས་ནི་བསམ་ཡས་འཆིང་ཕུ་ཞེས་བྱ་བ༔ རྒྱ་གར་གྱི་དུར་ཁྲོད་བསིལ་བའི་ཚལ་དང་མཉམ་པ་དེ་རུ༔ འདུ་འབྲལ་སྐད་ཅིག་ཀྱང་མེད་པར་སྤྱོད་པ་ལ་བཞུགས་སོ༔ ལྷ་ལྕམ་གྱི་སྐུ་འཁྲུངས་ཚུལ་བསྟན་པའི་ལེའུ་སྟེ་དང་པོའོ༔ ས་མ་ཡ༔ རྒྱ་རྒྱ་རྒྱ༔ རྒྱ་རྒྱ་རྒྱ༔

 

༈ ༔ དེ་ནས་ཨོ་རྒྱན་གྱི་དྲུང་དུ༔ ལྷ་ལྕམ་གྱིས་དངུལ་དཀར་གྱི་མེ་ལོང་གི་སྟེང་དུ༔ གཙུག་གཡུ་ནོར་བུ་འོད་འབར་བ་ཞེས་བྱ་བ་ཚོམ་བུར་བཀོད་དེ་ཕུལ་ནས་ཞུས་པ༔ སློབ་དཔོན་ཆེན་པོ་ལགས༔ བདག་འདྲ་བའི་བུད་མེད་སྐྱེ་བ་དམན་ལ་རང་འདོད་ཆེ་བ༔ ཚོགས་བསགས་ལ་མ་བསགས་པ༔ ཚོགས་བསགས་པ་ཡིན་བྱས་ན༔ རྒྱལ་པོ་སྡིག་སེམས་དང་ལྡན་པའི་བུ་མོར་སྐྱེས༔ ཚོགས་མ་བསགས་པ་ཡིན་བྱས་ན༔ བླ་མ་དུས་གསུམ་སངས་རྒྱས་ཁྱེད་དང་འདྲ་བ་དང་མཇལ༔ ལར་ནི་བདག་ཅག་བུད་མེད་ཀྱི་རིགས་འདྲ་བ་ཤེས་རབ་ཆུང་ཞིང་རྒྱུད་ལ་ངན་པས་དད་པ་དང་སྙིང་རུས་མེད་པའི་ལས་ངན་མ་བདག་ལ་ཚེགས་ཆུང་ལ་དོན་ཆེ་བ་མྱུར་དུ་སངས་རྒྱ་བའི་གདམས་ངག་ཅིག་ཞུ་ཞུས་པས༔ ཨོ་རྒྱན་པདྨའི་ཞལ་ནས༔ ལྷ་ལྕམ་ཡིད་འོང་བུ་མོ་ཁྱོད་ཉོན་ཅིག༔ ཁྱོད་བུད་མེད་ཀྱི་ལུས་འདི་ཐོབ་པས་ཚོགས་མ་བསགས་པ་ཡིན་པས༔ མྱུར་དུ་སངས་རྒྱས་པ་དཀའོ༔ མཛེ་ཕོའི་སྐྱེ་འབྲས་དང༔ བུད་མེད་ཀྱི་སྙིང་རུས་གཉིས་ལ་ལེགས་བྱས་ཀྱང་སྐྱོན་ཅིག་ཡོད༔ འོན་ཀྱང་དད་པ་དང་བརྩོན་འགྲུས་ཡོད་ན་སྐྱེ་བ་དམན་ཡང་སངས་རྒྱས་སྒྲུབ་པའི་སྐལ་བ་ཡོད་པས༔ ལྷ་ལྕམ་ཁྱོད་ཀྱང་ཚེ་འདི་བློས་ཐོང་ལ༔ ལུས་སྲོག་ལ་ཕངས་པ་མེད་པར་དོན་དམ་པའི་གདམས་ངག་ཉམས་སུ་ལོངས་ཤིག༔ བསམ་ཡས་འཆིང་ཕུའི་དུར་ཁྲོད་འདི༔ མ་དང་མཁའ་འགྲོ་དངོས་སུ་འདུས་པའི་གནས་ཡིན་པས༔ ས་འདི་རུ་མི་ལོ་བཅུ་གཉིས་ཀྱི་བར་དུ་གདམས་པ་འདི་ལ་སྒྲུབ་པ་གྱིས་ཤིག༔ ཁོ་བོ་རྒྱ་གར་གྱི་ཡུལ་དུ་ཐེངས་ཤིག་འགྲོ༔ རིགས་ངན་བོད་དུ་མྱུར་དུ་སླེབས་ནས་འོང༔ དེའི་དུས་སུ་ལྷ་ལྕམ་ཁྱོད་ཀྱིས་སྒྲུབ་པ་ཐོབ་པ་གཅིག་གྱིས་ཨང་གསུངས་ནས༔ རྫོགས་པ་ཆེན་པོ་ཟག་མེད་ཀྱི་སྐོར་གནང་ནས༔ ཨོ་རྒྱན་རྒྱ་གར་གྱི་ཡུལ་དུ་འཁོར་མཁའ་འགྲོ་མ་བཞི་དང་བཅས་ནས་ནམ་མཁའ་ལ་བཞུད་དོ༔ ལྷ་ལྕམ་བདག་ནི་འཆིང་ཕུའི་དུར་ཁྲོད་གསང་བ་ཡེ་ཤེས་ཀྱི་བྲག་ཕུག་ཏུ༔ དུར་ཁྲོད་ཀྱི་རྩྭ་ཟླུམ་པ་རྣམས་གདན་དུ་བཏིང་ཞིང༔ ཤིང་ཐོག་བཅུད་དང་ལྡན་པ་རྣམས་བསྡུས་ནས་བསམ་གཏན་གྱི་འཚོ་བ་བྱས་ཤིང་སྐོམ་དུ་ཆུ་འཐུང༔ ལུས་སྲོག་ལ་ཕངས་པ་མེད་པར་སྒྲུབ་པ་བགྱིད་དེ༔ ཕྱིར་མི་ལོག་པར་དམ་བཅས་ནས་བསྡད་དོ༔ ཟླ་བ་གཅིག་ཙམ་སོང་བའི་དུས་ན༔ ཉི་མ་སྔ་དྲོ་གཅིག་ལ་བྲག་ཕུག་གི་སྒོ་མདུན་དུ་བུད་མེད་དཀར་མོ་གཅིག་བྱུང་ནས༔ ཤེལ་གྱི་འཁར་བས་སྒོ་རྡུང་ཞིང་ལྷ་ལྕམ་སྒོ་འདི་ཕྱེས་དང་ཟེར༔ སྒོ་ཕྱེས་ནས་བལྟས་པས༔ བུད་མེད་དེས་གསུངས་ནས༔ ལྷ་ལྕམ་ཁྱོད་འདི་ན་ཅི་བྱེད་ཅིང་ཡོད་ཟེར་ནས༔ བདག་ཏིང་ངེ་འཛིན་སྒྲུབ་ཅིང་ཡོད་ཞུས་པས༔ ཁྱོད་ལ་ཏིང་ངེ་འཛིན་སྒྲུབ་པའི་དད་པ་ཡོད་དམ་གསུངས༔ དད་པ་ཡོད་ཞུས་པས༔ ཁྱོད་ཀྱིས་དད་པ་དེ་ཡང་དག་པའི་དད་པ་མ་ཡིན༔ དད་པ་ཡང་དག་པ་ཟེར་བ་དེ་ངེད་ཀྱི་ཡུལ་ན་ཡོད་པ་ཡིན་གསུངས༔ ལྷ་ལྕམ་གྱི་ཐུགས་དགོངས་ལ༔ ཨོ་རྒྱན་ལ་སངས་རྒྱས་དངོས་སུ་མཐོང་བའི་དད་པ་འདི་བས་ལྷག་པའི་དད་པ་ཡོད་ཐབས་མེད་བསམས་ནས་ལོག་ལྟ་ཆེན་པོ་སྐྱེས་པས༔ དེ་ནི་བུད་མེད་དེའི་ཐུགས་ཀྱིས་མཁྱེན་ནས༔ ལྷ་ལྕམ་ཁྱེད་བདག་གི་རྗེས་སུ་འདོང་ངོ་དད་པའི་མཚན་ཉིད་བསྟན་ནོ་གསུངས་ནས༔ ལྷ་ལྕམ་གྱི་ཕྱག་ནས་ཁྲིད་དེ་ལུང་པ་གཅིག་ན་ཕྱིན་ནས༔ ཡུལ་ཁ་དོག་དཀར་བ་གཅིག་ན་རིན་པོ་ཆེའི་ཕ་གུ་བརྩིགས་པ༔ གསེར་གཡུ་དང་མུ་ཏིག་གི་ཕྲས་བརྒྱན་པ༔ ཅོད་པན་དར་གྱི་ལྷབ་ལྷུབ་འཕུར་བ༔ མཛེས་ཤིང་ཡིད་དུ་འོང་བའི་གདུགས་ཀྱི་ཏོག་ལ་ནོར་བུ་གཡེར་ཁའི་དྲ་བ་འཕྱང་བ༔ འཇའ་དང་འོད་ཀྱི་གུར་ཕུབ་པའི་ཕོ་བྲང་ཡོད་པ༔ དེའི་མཐའ་མ་ལ༔ ལོངས་སྤྱོད་དང་ལྡན་པའི་གྲོང་ཁྱེར་མང་པོས་བསྐོར་བ༔ པདྨ་དང་ཙན་དན་གྱི་ལྗོན་ཤིང་དྲི་དང་འབྲས་བུ་ཁ་མངར་དང་ལྡན་པ་མང་དུ་སྐྱེས༔ མེ་ཏོག་དང་སྨན་གྱི་ལྗོངས་ཆེན་པོ་དྭངས་པའི་སྐྱེད་མོས་ཚལ་དང་ལྡན་པ༔ དེ་ལྟ་བུའི་ཡུལ་ཡ་མཚན་པ་གཅིག་ཏུ་སླེབས་སོ༔ དེ་ནས་ཉིན་གཅིག་སྟོན་མོ་ཆེན་པོ་བྱས་པ་ལ༔ མིའི་ཁྲོམ་མཐའ་ཡས་པ་མང་པོ་ཚོགས་ཏེ༔ དེའི་དཀྱིལ་ན་གསེར་གྱི་ཁྲི་ཆེན་པོའི་སྟེང་དུ་གཡུའི་ཀ་བ་དང་ཐོག་ཕུབ་པ༔ པདྨའི་གདན་བཏིང་ཞིང༔ ཉི་མ་དང་ཟླ་བའི་གཅལ་བཀྲམ་པ༔ དེ་ལྟ་བུའི་ཁྲི་སྟེང་དེ་ན་རྒྱལ་པོ་ཆེན་པོ་མདོག་དཀར་ཞིང་ཡིད་དུ་འོང་བ༔ ན་སོ་གཞོན་ཞིང་ལུས་ཀྱི་རྒྱན་དང་ལྡན་པ་གཅིག་བཞུགས་ནས༔ ཁྲོམ་དུ་འཚོགས་པའི་མི་རྣམས་ཀྱང༔ རྒྱལ་པོ་ལ་ལྟ་ཞིང་གུས་པས་ལུས་ས་ལ་རྡབ་ཅིང་ཕྱག་འཚལ༔ ལུས་ཀྱི་རྒྱན་རྣམས་བཀྲོལ་ཞིང་རྒྱལ་པོ་ལ་ཕུལ༔ ཕ་མ་རྣམས་ཀྱིས་བུ་ཕོ་མོ་རྣམས་བཟུང་ཞིང་རྒྱལ་པོ་ལ་ཕུལ༔ བུ་ཕོ་མོ་རྣམས་ཀྱིས་ཕ་མ་རྣམས་བཟུང་ནས་རྒྱལ་པོ་ལ་ཕུལ༔ བཀུར་སྟིའི་བྱ་བ་ལ་མཁས་ཤིང་དབུལ་བས་ནོར་རྫས་ལ་ཕངས་པ་མེད་པར་ཕུལ་བར་འདུག་གོ༔ ལྷ་ལྕམ་གྱི་ཐུགས་དགོངས་ལ༔ རྒྱལ་པོ་འདི་ལ་ཆོས་ནི་མེད༔ དོན་མེད་དུ་མོས་གུས་དང་བཅས་པ་འདིར་གོལ་ནས་ནོར་རྫས་ཕངས་པ་མེད་པར་འབུལ་བ་འདི་བསོད་ནམས་ནི་མི་ཐོབ༔ མི་འདི་རྣམས་ནི་ཅི་བྱེད་པ་ཡིན་བསམས་ནས༔ ལྷ་ལྕམ་རང་དང་འགྲོགས་པའི་བུད་མེད་དེ་ལ་དྲིས་པ༔ ཡུལ་ཁམས་འདི་ལ་ཅི་ཟེར༔ ཕོ་བྲང་འདིའི་མིང་གང་ཡིན༔ རྒྱལ་པོ་འདི་ལ་མིང་ཅི་སྐད་སྨྲ༔ གྲོང་ཁྱེར་འདིའི་མི་རྣམས་ཀྱིས་ཅི་བྱེད་པ་ཡིན༔ ཞེས་དྲིས་པས༔ བུད་མེད་དེའི་ཞལ་ནས༔ ལྷ་ལྕམ་རང་ཉོན་ཅིག༔ ཡུལ་ཁམས་འདི་ལ་པདྨ་བཀོད་པ་ཟེར་བ་ཡིན༔ ཕོ་བྲང་འདི་ལ་བདེ་ཆེན་འཁྱིལ་བ་ཡིན་ཟེར༔ རྒྱལ་པོ་འདི་ལ་རིག་འཛིན་གཞོན་ནུ་ཟེར་བ་ཡིན༔ གྲོང་ཁྱེར་གྱི་མི་འདི་རྣམས་ནི་རྒྱལ་པོ་འདི་ལ་དད་གུས་དང་ལྡན་པས་མཉེས་པར་བྱ་བའི་ཆེད་དུ་མཆོད་པ་འབུལ་བ་ཡིན་གསུངས༔ ལྷ་ལྕམ་གྱིས་བུད་མེད་དེ་ལ་ཞུས་པ༔ རྒྱལ་པོ་འདི་ལ་ཆོས་ཡོད་པ་ལགས་སམ༔ མཆོད་པ་འབུལ་བར་བསོད་ནམས་ཅི་ཡོད༔ རྒྱལ་པོ་འདི་མིའི་རྒྱལ་པོ་ཡིན་ནམ༔ ཞེ་སྡང་གི་དབང་ཆེན་པོ་དང་ལྡན་པས༔ ནོར་རྫས་རྣམས་སྡུད་པ་མ་ཡིན་ནམ་ཞུས༔ བུད་མེད་དེའི་ཞལ་ནས༔ ལྷ་ལྕམ་ཁྱོད་ལ་དད་པ་མི་འདུག༔ རྒྱལ་པོ་འདི་ལ་ཆོས་ལོས་ཡོད༔ གྲོང་ཁྱེར་གྱི་མི་རྣམས་ལ་དད་པ་ཡོད་པས་ཆོས་ཀྱི་རྒྱལ་པོར་མཐོང་བ་ཡིན༔ རྒྱལ་པོ་མཉེས་པར་གྱུར་ན་གྲོང་ཁྱེར་གྱི་མི་རྣམས་ནི་སྲོག་ལ་ཡང་ཕངས་པ་མེད༔ རང་གི་བསམ་པ་རྣམ་པར་དག་ན༔ རྒྱལ་པོའི་ཐུགས་རྗེ་ལ་ཕྱོགས་རིས་མེད་དོ༔

ཡང་ཉིན་གཅིག་གྲོང་ཁྱེར་གྱི་མི་རྣམས་ཁྲོམ་དུ་འཚོགས་ཏེ༔ རྒྱལ་པོས་མི་མང་པོ་བསད་ཅིང་ཤ་ཟ་བ་དང༔ ཁྲག་འཐུང་བ་དང༔ རུས་པ་མུར་བ་དང༔ ལྤགས་པ་གོན་པར་བྱེད་དོ༔ གྲོང་ཁྱེར་གྱི་མི་རྣམས་རྒྱལ་པོ་ལ་ལྟ་ཞིང་མོས་གུས་དང་ལྡན་པར་གསོལ་བ་འདེབས་སོ༔ ལྷ་ལྕམ་གྱིས་བུད་མེད་དེ་ལ་ཞུས་པ༔ གྲོང་ཁྱེར་གྱི་མི་འདི་རྣམས་རྒྱལ་པོས་མི་བསད་པ་དང་དད་གུས་བྱེད་པ་འདི་ཅི་ལགས་ཞུས་པས༔ བུད་མེད་དེའི་ཞལ་ནས༔ རྒྱལ་པོས་ཅི་མཛད་ཐམས་ཅད་གྲོང་ཁྱེར་གྱི་མི་རྣམས་ཀྱིས་ལེགས་པར་མཐོང་བ་ཡིན་གསུངས༔ ཡང་ཉིན་གཅིག་གྲོང་ཁྱེར་གྱི་མི་རྣམས་ཁྲོམ་དུ་འཚོགས་ཏེ༔ རྒྱལ་པོས་རྡོ་ཐམས་ཅད་ཟས་ཡིན་ནོ་ཟེར་ནས་སྒྲ་ཆེན་པོ་བསྒྲགས་སོ༔ གྲོང་ཁྱེར་གྱི་མི་རྣམས་ཀྱང་ཁ་ནང་གི་སོ་ཐམས་ཅད་གྲུམ་ཡང་སྙིང་རུས་དང་བཅས་ནས༔ རྡོ་ཟ་བ་ལ་ནན་ཆགས་བྱེད་དོ༔ ལྷ་ལྕམ་གྱིས་བུད་མེད་དེ་ལ་ཞུས་པ༔ གྲོང་ཁྱེར་གྱི་མི་རྣམས་ཀྱིས་སོ་ཆག་ཆག་རྡོ་ཟ་བ་ཅི་ལགས༔ རྒྱལ་པོ་ལ་དབང་མ་བྱུང་བ་ཡིན་ནམ་ཞུས་པས༔ བུད་མེད་དེའི་ཞལ་ནས༔ ལྷ་ལྕམ་ལ་དད་པ་མི་འདུག༔ གྲོང་ཁྱེར་གྱི་མི་རྣམས་ནི་རྒྱལ་པོས་ཅི་གསུངས་ཐམས་ཅད་བདེན་པར་གོ་བ་ཡིན་གསུངས༔

ཡང་ཉིན་གཅིག་གྲོང་ཁྱེར་གྱི་མི་རྣམས་ཁྲོམ་དུ་འཚོགས་ཏེ༔ རྒྱལ་པོས་དུག་ཆུ་བྲེ་རེ་རེ་མི་རྣམས་ལ་བྱིན་ནས༔ འདི་མྱུར་དུ་འཐུངས་ཤིག་ཟེར་རོ༔ གྲོང་ཁྱེར་གྱི་མི་རྣམས་ནི་ལུས་གས་ཤིང་འགྱེལ་ཀྱང༔ སྙིང་རུས་པ་དང་བཅས་ནས་དུག་འཐུང་ངོ༔ ལྷ་ལྕམ་གྱིས་བུད་མེད་དེ་ལ་ཞུས་པ༔ གྲོང་ཁྱེར་གྱི་མི་རྣམས་ནི་བརྒྱལ་ཞིང་འགྱེལ་ཀྱང་དུག་ཆུ་འཐུང་བ་ཅི་ལགས་ཞུས་པས༔ བུད་མེད་དེའི་ཞལ་ནས༔ ལྷ་ལྕམ་ཁྱོད་ཉོན་དང༔ གྲོང་ཁྱེར་གྱི་མི་རྣམས་ནི་རྒྱལ་པོས་ཅི་བྱིན་ཐམས་ཅད་ཟ་ནུས་པ་ཡིན་གསུངས༔ ཡང་ཉིན་གཅིག་གྲོང་ཁྱེར་གྱི་མི་རྣམས་ནི་ཁྲོམ་དུ་འཚོགས་ཏེ༔ རྒྱལ་པོ་དེའི་ཞལ་ནས༔ མེ་མ་མུར་གྱི་ཐལ་བ་ལ་ལག་པ་ཁྲུས་དང༔ རྒྱ་མཚོའི་གཏིང་ནས་རྡོ་སྨུག་ཆུང་ཁུར་ལ་ཤོག་ཅིག་གསུངས༔ གྲོང་ཁྱེར་གྱི་མི་རྣམས་ནི་ལུས་ལ་ཆུ་བུར་རམ་རམ་རྡོལ་ཀྱང༔ མེ་མ་མུར་གྱི་ཐལ་བ་ལ་བྱད་དང་ཡན་ལག་བཞི་ལ་ཁྲུས་བྱེད་དོ༔ རྒྱ་མཚོའི་གཏིང་དུ་མཆོངས་ཤིང་སྲོག་ལ་ཕངས་པ་མི་བྱེད་པར་རྡོ་སྨུག་ཆུང་ཅི་ལོན་བྱེད་དོ༔ ལྷ་ལྕམ་གྱིས་བུད་མེད་དེ་ལ་ཞུས་པ༔ གྲོང་ཁྱེར་གྱི་མི་རྣམས་ནི་སྲོག་ལ་མི་ཕངས་པར་མེ་མ་མུར་ལ་ཡན་ལག་བཀྲུས་པ༔ རྒྱ་མཚོའི་གཏིང་དུ་མཆོངས་ཤིང་རྡོ་བ་སྨུག་ཆུང་ཅི་ལོན་བྱེད་པ་ཅི་ལགས་ཞུས་པས༔ བུད་མེད་དེའི་ཞལ་ནས༔ ལྷ་ལྕམ་ཁྱོད་ཉོན་དང༔ གྲོང་ཁྱེར་གྱི་མི་རྣམས་ནི་རྒྱལ་པོས་ཅི་བཅོལ་བ་ཐམས་ཅད་བྱེད་ནུས་པ་ཡིན༔

ཡང་གྲོང་ཁྱེར་གྱི་མི་རྣམས་ནི་ཁྲོམ་དུ་འཚོགས་ཏེ༔ རྒྱལ་པོ་དེའི་ཞལ་ནས༔ དེ་རིང་ཉི་མ་སྔ་དྲོ་འདི་ལ་ལོངས་སྤྱོད་ཀྱི་ཚོགས་འདུ་བ་ཆེན་པོ་ནམ་མཁའ་ནས་མེ་ཏོག་གི་ཆར་བཞིན་བབས་ནས་དགའ་བ་ལ་ཟེར༔ གྲོང་ཁྱེར་གྱི་མི་རྣམས་ནི་ལོངས་སྤྱོད་ཡོད་པ་རྣམས་ཀྱིས་གསེར་གྱི་རྟ་ཕོ་ལ་གཡུའི་ཕྲ་བཀོད་པ༔ ནོར་བུ་རིན་པོ་ཆེའི་བང་མཛོད་རྐང་པ་བཞི་དང་ལྡན་པ༔ གཡུའི་གླང་པོ་ཆེ་ལ་བདུད་རྩི་མངར་བཅུད་དང་ལྡན་པ་བཀལ་ནས༔ རང་རང་ཕ་མ་བུ་ཚ་དང་བཅས་པས་ལུས་ཀྱི་རྒྱན་བཀོད་དེ༔ ལུས་ངག་ཡིད་གསུམ་རྒྱལ་པོ་ལ་ཕུལ་ལོ༔ ལོངས་སྤྱོད་ཆུང་བ་རྣམས་ནི་ལུས་གཅེར་བུ་ལ་དུར་ཁྲོད་ཀྱི་རས་དཀྲིས་ནས༔ དེ་ལ་ཙན་དན་གྱི་ནགས་ལ་བཙུགས་ཏེ༔ མེ་སྤར་ནས་རྒྱལ་པོ་ལ་འབུལ་ལོ༔ ལྷ་ལྕམ་གྱིས་བུད་མེད་དེ་ལ་ཞུས་པ༔ གྲོང་ཁྱེར་གྱི་མི་རྣམས་ནི་རང་རང་གི་སྲོག་དང་ནོར་རྫས་མི་ཕངས་པར་ཐམས་ཅད་རྒྱལ་པོ་ལ་ཅི་ཡོད་འབུལ་ནུས་པ་ཅི་ཡིན་ཞུས་པས༔ བུད་མེད་དེའི་ཞལ་ནས༔ ལྷ་ལྕམ་ཉོན་ཅིག༔ ཅི་ཡོད་འབུལ་ནུས་པ་ཡིན་གསུངས༔ གྲོང་ཁྱེར་གྱི་མི་རྣམས་ནི་རྒྱལ་པོ་ལ་བླ་མ་དང་བུད་མེད་དེས་ལྷ་ལྕམ་གྱི་ཕྱག་ནས་འཇུས་ཏེ་རྒྱལ་པོའི་དྲུང་དུ་ཁྲིད་ནས༔ རྒྱལ་པོ་ཆེན་པོ་ལགས༔ ལྷ་ལྕམ་འདི་མྱུར་དུ་ངན་སོང་ནས་ཐར་བའི་བྱིན་རླབས་ཤིག་ཞུ་ཞུས་པས༔ རྒྱལ་པོ་དེའི་ཞལ་ནས༔ ལྷ་ལྕམ་ལ་དད་པ་མཚན་ཉིད་དང་ལྡན་པ་ཡོད་དམ༔ དད་པ་ཡོད་ན་བདག་གིས་བྱིན་རླབས་བྱེད་པར་ནུས་གསུངས་སོ༔ ལྷ་ལྕམ་གྱིས་བདག་ལ་དད་པ་མཚན་ཉིད་དང་ལྡན་པ་ཡོད་ཞུས་པས༔ རྒྱལ་པོ་དེས་གསུངས་ནས༔ ལྷ་ལྕམ་ཁྱོད་ཀྱི་སེམས་ལ་ཅི་ཡོད་ངས་ཤེས༔ ཁྱོད་ཀྱི་དད་པ་དེ་མཚན་ཉིད་དང་ལྡན་པ་མ་ཡིན༔ རྒྱལ་པོའི་རྣམ་ཐར་ལ་ཕྱོགས་རིས་འདུག་པས༔ དད་པ་མཚན་ཉིད་དང་ལྡན་པ་དེ་ཅི་མཛད་ཐམས་ཅད་ལེགས་པར་མཐོང་བ༔ ཅི་གསུངས་ཐམས་ཅད་བདེན་པར་གོ་བ༔ ཅི་སྦྱིན་ཐམས་ཅད་ཟ་ནུས་པ༔ ཅི་བཅོལ་ཐམས་ཅད་བྱེད་ནུས་པ༔ ཅི་ཡོད་ཐམས་ཅད་འབུལ་ནུས་པ༔ གྲོང་ཁྱེར་གྱི་མི་འདི་རྣམས་འདྲ་བ་གཅིག་དགོས་པ་ཡིན་གསུངས༔ ལྷ་ལྕམ་གྱི་ཐུགས་དགོངས་ལ༔ རང་གི་དད་པ་སྐྱེ་སྒྲིབ་ཅན་འདི་ལ་ཞེ་རེ་ཁྲེལ༔ གྲོང་ཁྱེར་འདི་ན་མི་ཆེ་ཆུང་མེད་པ་ཀུན་ལ༔ དད་པ་མཚན་ཉིད་དང་ལྡན་པ་འདི་འདྲ་ཡོད་པ་ངོ་རེ་མཚར་བསམས་སོ༔ རྒྱལ་པོ་འདི་རིགས་ལྡན་གྱི་རྒྱལ་པོ་གཅིག་ཡིན་པར་ངེས༔ འདི་ལ་མྱུར་དུ་སངས་རྒྱ་བའི་གདམས་ངག་གཅིག་ཞུ་དགོས་བསམས་ནས༔ ཕྱག་གསུམ་འཚལ་བ་དང༔ རྒྱལ་པོ་འཁོར་བཅས་ཕོ་བྲང་གི་ནང་དུ་ནམ་མཁའི་མཐོངས་ལ་འོད་ཟེར་ལྔའི་རྟ་ལ་བཅིབས་ནས་བཞུད༔ ལྷ་ལྕམ་དང་འགྲོགས་པའི་བུད་མེད་དེའི་ཞལ་ནས༔ ལྷ་ལྕམ་ཉོན་དང༔ ཁྱོད་ཀྱི་དད་པ་ཚོད་དུ་མ་སློང་བས༔ རྒྱལ་པོ་དང་ཞལ་མཇལ་དུ་མེད་པ་འདི་ལ་ལྟོས་དང་གསུངས༔

དེ་ནས་འདི་བས་ཀྱང་ཡ་མཚན་པ་ལུང་པ་ཕ་གིའི་ནང་ན་ཡོད་གསུངས་ནས༔ ལུང་པ་སེར་སྟོང་ངེ་བ་གཅིག་ཏུ་ལྷ་ལྕམ་གྱི་ལག་པ་ནས་བུད་མེད་དེས་འཇུས་ནས་ཕྱིན་ཏོ༔ ལུང་པ་དེའི་དཀྱིལ་ནས༔ གསེར་གྱི་ཕ་གུ་བརྩིགས་པའི་ཕོ་བྲང་གཡུའི་གདུགས་ཕུབ་པ༔ མུ་ཏིག་དང་ནོར་བུའི་གཡེར་ཁའི་དྲ་བ་འཕྱང་བ༔ ཡིད་དུ་འོང་ཞིང་ལྟ་ན་སྡུག་པ༔ གྲོང་ཁྱེར་དང་ལྕགས་རི་མུ་ཁྱུད་མང་པོས་བསྐོར་བ་གཅིག་འདུག་གོ༔ ཕོ་བྲང་དེའི་ལྷོ་ཕྱོགས་ན་ཁྲུས་ཀྱི་རྫིང་བུ་འོད་ཟེར་ལྔའི་ཁ་དོག་དང་ལྡན་པ༔ དྭངས་ཤིང་མེ་ཏོག་གིས་མཐའ་བསྐོར་བ༔ མངར་ཁའི་དྲི་བྲོ་བ༔ དེ་ལྟ་བུའི་རྫིང་བུའི་འགྲམ་ན༔ མཛེས་པའི་བུ་མོ་གཞོན་ནུ་མང་པོ་དང༔ ཁྱེའུ་གཞོན་ནུའི་ཚོགས་མང་པོ་འདུས་ནས་མགོ་དང་ཡན་ལག་བཞི་ཁྲུས་བྱེད་ཅིང༔ བཟའ་བཏུང་གི་ལོངས་སྤྱོད་ཆེན་པོ་བྱེད་དོ༔ དེ་རྣམས་ཀྱི་གསེབ་ནས་ཀུན་ལས་ལྷག་པའི་བུ་མོ་ལང་ཚོ་དར་ལ་བབ་པ་གཅིག་འདུག་གོ༔ དེའི་ལག་པས་ཆད་པ་མེད་པར་སྦྱིན་པ་གཏོང༔ ངག་ཡེང་བ་མེད་པར་རིག་འཛིན་བླ་མ་ལ་གསོལ་བ་ཐོབ་ཅིག་ཟེར༔ མིག་གིས་དབུལ་ཕོངས་གི་རིགས་ངན་ལ་ལྟ་ཞིང་མཆི་མ་ཁྲག་ཏུ་བབ༔ རྐང་པ་གཉིས་ཀྱིས་མ་དལ་བར་རྫིང་བུའི་མཐར་སྐོར་བ་བསྐོར་ཞིང་ལུས་ལ་གོས་མེད་པར་གཅེར་བུར་འགྲོ་བ་གཅིག་མཐོང༔ ལྷ་ལྕམ་གྱིས་བུད་མེད་དེ་ལ་ཞུས་པས༔ གྲོང་ཁྱེར་འདིའི་ནང་ན་འདུས་པའི་ཁྱེའུ་ཕོ་མོ་འདི་རྣམས་རྫིང་བུ་འདིའི་འགྲམ་ན་འཚོགས་ནས་ཅི་བྱེད༔ ཁྱད་པར་དུ་འདི་རྣམས་ཀྱི་ནང་ནས་བུ་མོ་གཅེར་བུར་རྒྱུག་པ་འདི་སྤྱོད་ལམ་དལ་དུ་མི་བྱེད་པ་ཅི་ཡིན་ཞུས་པས༔ བུད་མེད་དེའི་ཞལ་ནས༔ ལྷ་ལྕམ་ཁྱོད་དྲན་པ་གསོས་དང༔ ཁྱེའུ་ཕོ་མོ་འདི་རྣམས་རྫིང་བུ་འདིའི་འགྲམ་དུ༔ གཙང་མའི་ཁྲུས་བྱས་པས་ལུས་ངག་ཡིད་གསུམ་གྱི་སྒྲིབ་པ་འདག་པར་ཤེས་པ་ཡིན༔ བུ་མོ་གཅེར་བུར་རྒྱུག་པ་འདི༔ འཆི་བ་དྲན་པས༔ ལག་གིས་སྦྱིན་པ་མྱུར་དུ་མ་བཏང་ན༔ སྦྱིན་པ་ལ་གཏོང་ལོང་མི་བྱུང་གིས་དོགས་པས་བྲེད་པ་ཡིན༔ ངག་ནས་གསོལ་བ་ཡེང་མེད་བཏབ་པ་ནི༔ ངན་སོང་གསུམ་གྱི་སྐྱབས་གནས་མཚན་ཉིད་དང་ལྡན་པའི་བླ་མ་ཡིན་པས༔ དེ་ལ་གསོལ་བ་འདེབས་ལོང་མ་བྱུང་གིས་དོགས་ནས་བྱེད་པ་ཡིན༔ མིག་གིས་རིགས་ངན་ལ་ལྟ་ཞིང་མཆི་མ་ཁྲག་ཏུ་འབབ་པ་འདི་ཁོ་རང་ཡང་རིགས་ངན་འདི་འདྲ་སྐྱེས་ཀྱིས་དོགས་ནས་བྱེད་པ་ཡིན༔ རྐང་པ་གཉིས་ཀྱིས་མི་དལ་བར་སྐོར་བ་བསྐོར་བ་འདི༔ རྫིང་བུའི་འོད་ཟེར་དང་བཅས་པ་ཡོན་ཏན་ཆེན་པོ་འབྱུང་བའི་གནས་ཡིན་པས༔ དངོས་གྲུབ་མྱུར་དུ་མི་ལོན་གྱིས་དོགས་པས་སྐོར་བར་བསྐོར་བ་ཡིན༔ གཅེར་བུར་བུད་ནས་རྒྱུག་པ་འདི༔ བསོད་ནམས་ཀྱི་ཚོགས་བསག་པ་ལ་ལུས་ལ་གོས་གོན་ནས་བསྡད་ན་ཤི་བས་སླེབས་ཏེ༔ ཚོགས་གསོག་ལོང་མ་བྱུང་གི་དོགས་པས་བྲེད་པ་ཡིན་གསུངས༔

ལྷ་ལྕམ་གྱིས་བུད་མེད་དེ་ལ་ཞུས་པ༔ ཕོ་བྲང་འདིའི་ནང་ན་ཅི་ཡོད་ཞུས་པས༔ བུད་མེད་དེས་གསུངས་ནས༔ ཕོ་བྲང་འདིའི་ནང་ན་ཡ་མཚན་ཆེ་བའི་རྣམ་པར་ཐར་པ་མང་དུ་ཡོད༔ ལྟ་བ་ལ་འདོང་ངོ་གསུངས༔ ཕོ་བྲང་ནང་དུ་ཕྱིན་པས་ཁྱམས་ཆེན་པོའི་དབུས་སུ་གསེར་དང་གཡུའི་ཕོ་བྲང་ཆེན་པོ་འདུག་པ་ལ༔ དེའི་འགྲམ་ན་ཁྱེའུ་མཛེས་ཤིང་ཡིད་དུ་འོང་བ་གཅིག་རིན་པོ་ཆེ་བརྩེགས་པའི་ཁྲི་ལ་བཞུགས་ནས༔ འཁོར་དུ་ལུས་ཆེ་ཞིང་མགྲིན་པ་ཕྲ་བ༔ རིད་ཅིང་རྨོངས་པ་སྣ་ཚོགས་ཀྱིས་བསྐོར་བར་མཐོང༔ རྒྱལ་པོ་ཁྱེའུའི་ཆ་ལུགས་ཅན་དེས་རྐང་པ་གཡས་གཡོན་ནས་བཞོག་ཅིང་རིགས་ངན་རྣམས་ལ་སྟེར༔ རེ་འགའ་ནི་གཡུའི་ཕུང་པོ་བཅད་ཅིང་རིགས་ངན་རྣམས་ལ་སྟེར༔ རེ་འགའ་ནི་ལྟ་སྟངས་ངང་ལ་བཞུགས་ནས་མཉམ་པར་བཞག་གོ༔ མིག་གིས་ལྷ་ལྕམ་དང་བུད་མེད་གཉིས་ལ་ལྟ་ཞིང་ངག་ནས་འདི་སྨྲས༔ ཁྱེད་གཉིས་འདིར་ཅི་བྱེད་པ་ལ་འོང༔ ཚེ་ལ་ལོང་ཡོད་དམ༔ མིའི་བུ་མ་ཡིན་ནམ༔ སྐྱེ་བ་དང་འཆི་བ་མི་འབྱུང་ངམ་ཟེར༔ ལྷ་ལྕམ་གྱིས་རྒྱལ་པོ་དེ་ལ་ལན་བཏབ་པ༔ བདག་ནི་མིའི་བུ་ཡིན༔ སྐྱེ་དང་འཆི་བ་ཡང་ཡོད༔ ཚེ་ལ་ལོང་མེད་པར་ཡང་ཤེས༔ ཕོ་བྲང་འདིར་རྒྱལ་པོ་ཁྱེད་ལ་ལྟ་བ་ལ་འོང་བ་ཡིན་སྨྲས་པས༔ རྒྱལ་པོ་དེས་ལྷ་ལྕམ་དང་བུད་མེད་གཉིས་ལ་འདི་སྐད་ཟེར༔ ཁྱེད་གཉིས་ཚེ་ལ་ལོང་མེད་པར་ཤེས་ན༔ འདིར་ངེད་ལ་ལྟ་ཞིང་ཕོ་བྲང་དུ་འོང་ལོང་ཡོད་པ་ཞེ་རེ་ཁྲེལ༔ ངེད་ལ་བལྟ་རྒྱུ་ཅི་ཡོད༔ འཆི་བ་འདིར་འོང་བ་མི་ཤེས་སམ༔ ངེད་ལ་འཆི་བ་ནམ་འོང་མི་ཤེས་པས་བྲེད་པ་ཡིན༔ བཟའ་བ་བཏུང་བ་མ་ཁོམ་ནས་ཡུན་རིང་དུ་སོང༔ ནོར་གྱི་བང་མཛོད་སྦྱིན་པ་ལ་གཏོང་ལུང་མ་བྱུང་གི་དོགས་པས༔ ལུས་ཀྱི་ཤ་རྣམས་བཞོག་ཅིང་སྟེར་དགོས་པ་བྱུང༔ ལུས་ཀྱི་ཤ་ཡང་སྟེར་བའི་ལོང་མ་བྱུང་གི་དོགས་པས༔ སེམས་ལ་ལྟ་ཞིང་མཉམ་པར་བཞག་ནས་འཆི་བའི་གྲབས་བྱེད་དགོས་བྱུང༔ ལར་ནི་ཁྱེད་གཉིས་ལ་གཏམ་བྱེད་ལོང་མེད་པས་ངེད་ནམ་འཆི་མི་ཤེས་པས༔ བར་ཆོད་མ་བྱེད་ཕོ་བྲང་གི་ཕྱིར་སོང་ཟེར༔ བུད་མེད་དེའི་ཞལ་ནས༔ ལྷ་ལྕམ་ཁྱོད་ཀྱི་རྣམ་ཐར་འདི་མི་འོང༔ རྫིང་བུའི་འགྲམ་གྱི་བུ་མོ་དང༔ ཕོ་བྲང་གི་རྒྱལ་པོ་ལ་ལྟོས་དང༔ ཁྱོད་ཀྱི་མི་ཚེ་འདི་ལེ་ལོའི་ངང་དུ་སངས་རྒྱས་པ་མི་འོང་གསུངས༔ ལྷ་ལྕམ་ནི་རང་གི་བརྩོན་འགྲུས་ལ་སྐྱོ་ཞིང་སེམས་ཕམ་པར་གྱུར་ནས་བརྒྱལ་ཞིང་འགྱེལ་ལོ༔ བརྒྱལ་སངས་ནས་དྲན་པ་རྙེད་དེ་རྒྱལ་པོ་ལ་བལྟས་པས༔ རྒྱལ་པོ་ལུས་འོད་ཕུང་དུ་ཞུ་ནས༔ མངོན་པར་སངས་རྒྱས་པར་མཐོང་ངོ༔ ཕོ་བྲང་གི་ཕྱིར་ཐོན་ནས་རྫིང་བུའི་འགྲམ་དུ་ཕྱིན་ནས༔ གཅེར་བུར་རྒྱུག་པའི་བུ་མོ་དེ་ཡང༔ རྡོ་རྗེ་དྲིལ་བུ་ཕྱག་ཏུ་བསྣམས་ནས་འོད་ཟེར་གྱི་སྟེང་ན་བཞུགས་ཏེ༔ ནམ་མཁའི་མཐོངས་ལ་བྱོན་པར་མཐོང་ངོ༔ དེ་ནས་ལྷ་ལྕམ་ལ་བུད་མེད་དེས་འདི་ལ་འདོང་དང་གསུངས་ནས༔ ལུང་པ་སྔོ་ལྗང་ངེ་བ་གཅིག་གི་ནང་དུ་ཕྱིན་པས༔ ལུང་པ་དེའི་མདའ་ན་རྒྱ་མཚོའི་འགྲམ་ན་པདྨ་དང་མེ་ཏོག་གི་གླིང་ལ་མཚལ་ཆགས་པ་གཅིག་འདུག༔ རི་དེའི་མཐའ་རྣམས་ནི་གྲོང་ཁྱེར་གྱིས་བསྐོར་བ༔ ཕྱོགས་བཞི་ན་ཆུ་བོ་ཆེན་པོ་བཞི་འབབ་པ༔ མཚམས་བཞི་ན་དྲི་དང་རོ་མཆོག་བརྒྱད་དང་ལྡན་པའི་འབྲུ་མང་པོ་སྐྱེས་པ༔ རྩེ་མོ་ན་ནོར་བུ་རིན་པོ་ཆེའི་ཕུང་པོ་སྤུངས་པ༔ གང་ནས་བལྟས་ཀྱང་ཡིད་དུ་འོང་བ༔ མདངས་ཆགས་པའི་གནས་གཅིག་འདུག༔ རི་བོ་དེའི་ལྷོ་ཕྱོགས་ན་གྲོང་ཁྱེར་གཅིག་སྣང༔ གྲོང་ཁྱེར་དེ་ནི་མདོག་སྔོ་ཞིང་ཕ་གུ་བརྩིགས་ནས༔ གསེར་གྱི་མུ་ཁྱུད་གཏམས་པ་དེའི་དབུས་ན༔ གཡུའི་གདུགས་ཕུབ་པའི་ཕོ་བྲང་མཐོ་བ་དཔག་ཚད་གཅིག༔ ཞེང་དུ་རྒྱང་གྲགས་གཅིག་ཡོད་པ་ཞིག་འདུག༔ ཕོ་བྲང་དེའི་དྲུང་དུ་ཕྱིན་པས༔ བུད་མེད་ཆེན་མོ་གཉིས་ཀྱིས་སྒོ་བཅད་ནས༔ བཏང་དུ་མ་ཉན་ཁྱེད་གཉིས་གར་འགྲོ་ཅི་བྱེད་ཟེར་བས༔ ལྕགས་ཀྱི་བུམ་པ་ཆེན་པོ་རེ་རེ་ཁུར་ནས༔ པང་དུ་མི་རོ་རེ་རེ་ཐོགས་ཏེ༔ ཨམ་གཙིགས་བཞིན་གཉེར་ཞིང༔ མིག་འབུར་ཚུགས་སུ་ལྟའོ༔

༈ ༔ ལྷ་ལྕམ་གྱིས་སྨྲས་པ༔ ངེད་ནི་འཆིང་ཕུ་དུར་ཁྲོད་ཅེས་པ་ནས་འོངས་པ་ཡིན༔ ཕོ་བྲང་ལ་ལྟད་མོ་ལྟ་བ་ལ་འགྲོ༔ ལམ་མ་བཀག་པར་བདེ་མོར་གཏོང་འཚལ་སྨྲས་པས༔ བུད་མེད་དེ་གཉིས་ཀྱིས་ན་རེ༔ ཁྱེད་གཉིས་ཕོ་བྲང་དུ་འགྲོ་ན༔ ཁུར་འདི་ཐེག་གམ༔ སྤྱོད་ལམ་འདི་ལ་ཞུགས་སམ་ཟེར་ནས༔ ལྕགས་ཀྱི་བུམ་པ་ཆེན་པོ་མི་རོ་བརྒྱས་བཀང་བ་གཅིག་རྒྱབ་ཏུ་གཏད་ནས་བྱུང་ངོ༔ ལྷ་ལྕམ་གྱིས་སྨྲས་པ༔ འདི་འདྲ་ངེད་ཀྱིས་མི་ཐེག༔ ཁུར་འདི་མ་ཁུར་ན་ཕོ་བྲང་ནང་དུ་འགྲོ་བའི་ཐབས་མེད་དམ༔ འདི་ཁུར་ནས་ཅི་བྱེད་སྨྲས་པས༔ བུད་མེད་དེ་གཉིས་ཀྱིས་ན་རེ་འདི་སྐད་ཟེར༔ ཁུར་འདི་མ་ཁུར་ན་ཕོ་བྲང་ནང་དུ་འགྲོ་བའི་ཐབས་མེད༔ ལྕགས་ཀྱི་བུམ་པ་འདི་ལ་དངོས་གྲུབ་མཛད་པའི་སྣོད་བྱེད་པ་ཡིན༔ ནང་གི་མི་རོ་འདི་ལ་དངོས་གྲུབ་ཞུ་བའི་ཚོགས་འཁོར་བྱེད་པ་ཡིན༔ ཟེར་ནས་བུད་མེད་དེ་གཉིས་ཕོ་བྲང་གི་ནང་དུ་སོང༔ སྒོ་ལ་གསེར་གྱི་ལུ་གུ་རྒྱུད་དམ་པར་སྒྲོགས་ཏེ༔ སུ་ཡང་མི་ཐར་བར་བཅད་དོ༔ ལྷ་ལྕམ་གྱིས་གྲོགས་ཀྱི་བུད་མེད་དེ་ལ་ཞུས་པ༔ ངེད་རང་གཉིས་ཕོ་བྲང་གི་ནང་དུ་སོང་ནས་ཐར་བའི་ཐབས་ཁྱེད་ལ་ཡོད་དམ་ཞུས་པས༔ བུད་མེད་དེས་གསུངས་ནས༔ ཕོ་བྲང་ནང་དུ་ཐར་བའི་ཐབས་མི་འོང༔ ཚོང་དུས་སུ་ལྟད་མོ་ལ་འདོང་ངོ་གསུངས༔ དེ་ནས་ཚོང་དུས་སུ་ལྟད་མོ་ལྟ་རུ་ཕྱིན་པས༔ མི་མང་པོས་གསེར་གྱི་ཕ་བོང་རང་ལུས་དང་མཉམ་པ་ཁུར་ནས༔ འགུལ་ཞིང་མགྱོགས་པའི་ཡན་ལག་བཞི་དང༔ རུས་པའི་ཚིགས་ཐམས་ཅད་གྲུམ་ནས༔ སྐད་ངན་ལྷང་ལྷང་འདོན་ཞིང་འདུག་པ་ལ༔ ལྷ་ལྕམ་གྱིས་སྨྲས་པ༔ ཁྱེད་རྣམས་ཀྱིས་རུས་པ་གྲུམ་ཡང༔ གསེར་གྱི་ཕ་བོང་འདི་འདྲ་ཁུར་ནས་ཅི་བྱེད་སྨྲས་པས༔ མི་དེ་རྣམས་ཀྱིས་འདི་སྐད་ཟེར༔ ངེད་ཕོ་བྲང་དུ་རྒྱལ་པོ་ཡབ་ཡུམ་ལ་འབུལ་བ་བྱས་ནས་དངོས་གྲུབ་འདོད་པ་ལ་འགྲོ་ཟེར༔ དངོས་གྲུབ་ཅི་འདོད་བྱས་པས༔ དེ་རིང་གི་གྲོ་འདོད་པ་ཡིན༔ དེ་རིང་གྲོ་གཅིག་པོ་ལ་གསེར་གྱི་ཕ་འོང་འདི་འདྲ་ཙམ་ཁུར་ནས་འགྲོ་དགོས་སམ་བྱས་པས༔ འདི་ཙམ་མ་ཁུར་ན་རྒྱལ་པོ་ཡབ་ཡུམ་གྱིས་ཐུགས་ཁྲེལ་ནས༔ དེ་རིང་འདོད་པའི་དངོས་གྲུབ་སྟེར་མི་ཉན་ཟེར༔ ལྷ་ལྕམ་གྱི་ཐུགས་དགོངས་ལ༔ མི་འདི་ཀུན་གྱིས་ཉིན་རེའི་ལྟོ་གོས་ཀྱི་ཕྱོགས་སུ་སྙིང་རུས་འདི་ཙམ་ནུས་པར་འདུག༔ བདག་གིས་ཆོས་བྱེད་པའི་སྙིང་རུས་འདི་སེམས་རེ་སྐྱོ་བསམ་པ་བྱུང་ངོ༔

དེ་ནས་བུད་མེད་དེ་དང་འགྲོགས་ནས༔ ཕོ་བྲང་གི་སྒོ་དྲུང་དུ་སླར་ལོག་ནས་ཕྱིན་པས༔ བུད་མེད་དེའི་ཞལ་ནས༔ རྣལ་འབྱོར་མ་ཆེན་མོ་འདི་སྒོ་ཕྱེས་དང་གསུངས༔ སྔོན་གྱི་བུད་མེད་དེ་མ་ཡིན་པའི་བུད་མེད་ཆེན་མོ་གཟུགས་རིང་བ༔ མདོག་སྔོ་བ༔ མིག་དམར་བ༔ སྐྲ་གཟེངས་པ༔ གཅེར་བུ་གཟི་བརྗིད་དང་ལྡན་པ་གཅིག་བྱུང་ནས་སྒོ་ཕྱེས་ཏེ༔ ཕོ་བྲང་གི་ནང་དུ་ཕྱིན་ནས༔ ཐོག་འོག་མའི་སྟེང་ནས་བུད་མེད་ཀྱི་ཚོགས་མང་པོ་འདུས་ནས༔ བུད་མེད་ཆེ་བ་རྣམས་ནི༔ ཤ་ཟ་ཞིང་ཁྲག་འཐུང་བའོ༔ ཆུང་བ་རྣམས་ནི་རྐང་པའི་མཐིལ་ནས༔ ལྤགས་པ་བཤུ་ཞིང་རང་གི་ཤ་རང་གིས་ཟ་བར་འདུག༔ ལྷ་ལྕམ་བྲེད་ནས་གྲོགས་ཀྱི་བུད་མེད་དེ་ལ་ཞུས་པ༔ འདི་འདྲ་བའི་རྣམ་ཐར་ཅི་ལགས་ཞུས་པས༔ འདི་མཁའ་འགྲོ་མའི་གནས་ཡིན་པས༔ གཙོ་མོ་ཆེ་བ་རྣམས་ཀྱིས་ཤ་ཟ་བ་དང་ཁྲག་འཐུང་བ་ནི་དབང་ཆེ་བ་ཡིན༔ བྲན་གཡོག་རྣམས་ནི་རང་ཤ་རང་གིས་སྤྱོད་པ་ནི་གཙོ་མོའི་གྲལ་དུ་རེ་བ་ཡིན༔ ཁྱོད་ཀྱིས་གོ་འམ་གསུངས༔ ལྷ་ལྕམ་གྱི་ཐུགས་དགོངས་ལ༔ སྙིང་རུས་འདི་ལྟ་བུ་ཡོད་ན་ཡོན་ཏན་སྣ་རེ་ལོན་པ་ལ༔ བདག་འདྲ་བའི་ལས་ངན་མ༔ ཆོས་དྲན་ཡང་མི་ནུས་པ་ནི་སྐྱོན་རེ་ཆེ་ན་བསམས་པ་བྱུང༔

དེ་ནས་ཕོ་བྲང་གི་བར་ཁང་དུ་ཕྱིན་པས༔ གསེར་གྱི་ཁྲི་ཆེན་པོ་གཡུའི་ཕྲ་བཀོད་པ༔ ནོར་བུ་བཞིའི་རྐང་པ་བཞི་དང་ལྡན་པ་གཅིག་གི་སྟེང་ན༔ རྒྱལ་པོ་ཆེན་པོ་གཟི་བརྗིད་དང་ལྡན་པ་གཅིག་བཞུགས༔ དེ་ནི་གཟུགས་ཆེ་ཞིང་མདོག་སྔོ་བ༔ སྐྲ་སྤྱི་བོའི་གཙུག་ཏུ་བཅིངས་པ༔ ལུས་ལ་མི་ལྤགས་ཀྱི་གོས་གོན་པ༔ ཀེང་རུས་ཕྲག་ལ་བཀལ་བ༔ ལག་པ་ན་ཉི་མ་དང་ཟླ་བ་བཟུང་བ༔ མིག་གསུམ་འབྲུ་ཚུགས་སུ་ལྟ་བ༔ བཀྲག་དང་འོད་འཁྱིལ་བ་གཅིག་འདུག༔ རྒྱལ་པོ་དེའི་དྲུང་དུ་བུད་མེད་ན་ཚོད་གཞོན་ཞིང་མིག་གསུམ་ཡོད་པ༔ ཐུགས་ཀ་ནས་པདྨ་དམར་པོ་འདབ་མ་ལྔ་ཤར་བ༔ ཤིན་ཏུ་ནས་ཀྱང་བྱིན་རླབས་དང་ལྡན་པ་གཅིག་འདུག་གོ༔ བུད་མེད་དེས་རྒྱལ་པོ་དེའི་ཞལ་ནས་རུ་ལུ་རེ་རེ་འཐུས་ནས་མི་མང་པོ་ལ་བྱིན་པས༔ དེ་རྣམས་ལུས་འོད་ཕུང་དུ་ཞུ་ནས་ནམ་མཁའ་ལ་ལྡིང་བ་མཐོང་ངོ༔ བཙུན་ལྷ་ལྕམ་གྱི་ཐུགས་དགོངས་ལ༔ རུ་ལུ་འདི་ཁོང་དུ་སོང་ནས་ཆོས་བྱེད་མི་དགོས་པར་སངས་རྒྱས་པ་ཡིན་པར་འདུག༔ བདག་ཀྱང་རུ་ལུ་གཅིག་ཞུ་དགོས་བསམས་ནས༔ མོ་དེ་ལ་བདག་ལའང་རུ་ལུ་གཅིག་ཞུ་ཞུས་པས༔ བཙུན་མོ་དེས་འདི་སྐད་གསུངས༔ ཁྱོད་ཀྱིས་ལྕགས་ཀྱི་བུམ་པ་རོས་བཀང་བ་དེ་ཁུར་མ་ནུས་པ་ཡིན་པས༔ རུ་ལུ་འདི་སྟེར་བའི་དབང་མེད༔ སྙིང་ལ་རུས་པ་ཡོད་པ་རྣམས་ཀྱིས་ཐོབ་པ་ཡིན་གསུངས༔ ལྷ་ལྕམ་ནི་ཐུགས་མུག་ཅིང་གནོང་བར་གྱུར་ཏོ༔

དེ་ནས་ལྷ་ལྕམ་དང་གྲོགས་ཀྱི་བུད་མེད་གཉིས་བསྡེབས་ནས༔ ཕོ་བྲང་གི་སྟེང་དུ་ཕྱིན་པས༔ ཕོ་བྲང་དེའི་རྩེ་མོ་ལ་ཕྱོགས་བཞིར་མི་རོའི་རྒྱལ་མཚན་ཕྱར་ནས༔ ཟུར་བཞིར་སྙིང་གི་ཏོག་འཚེར་བ༔ ཐོད་པ་སྐམ་པོའི་པད་ལ་བཀལ་བ༔ ཕྱི་རིན་པོ་ཆེ་ལ་ནང་དུ་དུར་ཁྲོད་ཀྱི་རྒྱན་ཡོད་པ༔ བག་དྲོ་ཞིང་བྱིན་ཆེ་བ་གཅིག་འདུག༔ དེ་ན་བུད་མེད་ཀྱི་ཚོགས་མང་པོ་འདུས་ནས་འདུག་པ་ལ༔ ལྷ་ལྕམ་དང་འགྲོགས་པའི་བུད་མེད་དེ་ལ་ལྟ་ཞིང་ཕྱག་འཚལ༔ ཕྱོགས་གཅིག་ཏུ་ཞབས་ལ་འཇུས་ཤིང་རང་རེ་རྣམས་ཀྱི་གཙོ་མོ་ཞི་བ་མཚོ་བོད་འབངས་ཀྱི་དུར་ཁྲོད་རྣམས་བསྐོར་ནས་ཆགས་ཕེབས་ནས་ཡོད་དོ་ཟེར་ཞིང་དགའ་བ་དང་སྤྲོ་བ་ཆེན་པོ་བྱེད་དོ༔ དེ་ནས་ལྷ་ལྕམ་དང་འགྲོགས་པའི་བུད་མེད་དེས་གསུངས་ནས༔ ངེད་སྡོད་པའི་གནས་འདི་ཡིན༔ ད་ཁྱོད་རང་ལུང་པ་ཕ་གི་ན་སོང་དང༔ ཡ་མཚན་པའི་དངོས་གྲུབ་ཆེན་པོ་ཡོད་དོ༔ གསུངས་ནས༔ ཕོ་བྲང་གི་རྩེ་ནས་མཛུབ་གུ་བཙུགས་ཏེ་བསྟན་ཏོ༔

ལྷ་ལྕམ་གྱིས་ཞུས་པ༔ བདག་ལུང་པ་ཕ་གི་ན་འགྲོ་བ་ལ་མགོ་མི་ཐོན་གྲོགས་མཛད་པར་ཞུ་ཞུས་པས༔ བུད་མེད་དེའི་ཞལ་ནས༔ ངེད་ལ་ཁྱོད་ཀྱི་གྲོགས་བྱེད་པའི་ལོང་མེད༔ དམ་ཚིག་ལ་གནས་པའི་རྣལ་འབྱོར་པ་རྣམས་སྲོག་སྐྱོབ་པ་ལ་སྡོད་དགོས་པ་ཡིན༔ ཁྱོད་རང་སྙིང་ལ་རུས་པ་གྱིས་ལ་སོང༔ སྔོན་དུ་ཡང་སྙིང་ལ་རུས་པ་མེད་པས་སྐྱོན་བྱུང༔ ཟག་མེད་རུ་ལུ་མ་ཐོབ་པ་དེ་རྒྱུས་མེད་དམ༔ ཐེ་ཚོམ་མེད་པར་སོང་གསུངས༔ དེ་ནས་ལྷ་ལྕམ་ཕོ་བྲང་གི་ཕྱི་སྒོ་ལ་བྱོན་ནས་ནུབ་ཕྱོགས་སུ་ཕྱིན་པ་ནས༔ ལུང་པ་ཡངས་ཤིང་རྒྱ་ཆེ་བ༔ ཁ་དོག་དམར་ཞིང་འཇའ་འོད་ལྔའི་གུར་ཕུབ་པ༔ ཆུ་ཐམས་ཅད་ཀྱང་ཁྲག་ཏུ་འབབ་པ༔ རི་ཐམས་ཅད་ཤ་དང་གློ་སྙིང༔ ས་གཞི་ཐམས་ཅད་ཀེང་རུས་ཀྱི་གྲམ་པ༔ རི་བོ་རྣམས་ཀྱི་རྩེ་ལ་མེ་འབར་བ༔ ཉི་མ་ཟླ་བའི་ཆར་འབབ་པ༔ རིན་པོ་ཆེ་སྣ་ལྔ་བརྩིགས་པའི་གྲོང་ཁྱེར་ཆེན་པོ་ཡོད་པ༔ དེའི་དབུས་སུ་ཕོ་བྲང་ཆེན་པོ་རིགས་ལྔའི་ཚུལ་དུ་ཕྱོགས་བཞི་དབུས་དང་ལྔ་ཡོད་པ༔ ཤར་གྱི་ཕོ་བྲང་ནི་དྭངས་ཤིང་དཀར་བའོ༔ ལྷོའི་ཕོ་བྲང་ནི་སེར་ཞིང་བཀྲག་པའོ༔ ནུབ་ཀྱི་ཕོ་བྲང་ནི་དམར་ཞིང་སྣུམ་པ༔ བྱང་གི་ཕོ་བྲང་ནི་ལྗང་ཞིང་དྭངས་པ༔ དབུས་ཀྱི་ཕོ་བྲང་ནི་འོད་ཟེར་ལྔའི་མདངས་འཚེར་བ༔ དེ་རྣམས་ཀྱང་ཡངས་དང་ཞེང་ལ་མིག་རྒྱང་རེ་ཡོད་པ༔ ཕྱི་རྣམས་ལ་ནོར་བུ་དང་གཡེར་ཁའི་དྲ་བ་འཕྱང་བ༔ སྟེང་ན་གདུགས་དང་འཁོར་ལོ་རྒྱན་ཆ་མཛེས་པ༔ དེའི་ཕྱི་ལ་ཤིང་ཙན་དན་དང་པདྨས་བསྐོར་བ༔ མེ་ཏོག་རིགས་ལྔས་ས་གཞི་གང་བ༔ རྡོ་རྗེ་རྩིག་པའི་ལྕགས་རི་དང་མུ་ཁྱུད་ཀྱིས་བསྐོར་བ༔ དེ་ལ་ཕྱོགས་བཞི་ན་སྒོ་ཆེན་པོ་བཞི་བཙུགས་པ་གཅིག་འདུག༔ མི་རྣམས་ཀྱང་ཁ་དོག་རིགས་ལྔ་གནས་པའི་འོད་འཕྲོ་བ༔ ལ་ལ་ནི་འཇིགས་ཤིང་ཁྲོ་ཚིག་གེ་བ་ཡང་འདུག༔ ལ་ལ་ནི་མཛེས་ཤིང་ཡིད་དུ་འོང་བ་ཡང་འདུག༔ ལྷ་ལྕམ་གྱིས་ཤར་སྒོ་དེའི་དྲུང་དུ་ཕྱིན་ནས༔ བུད་མེད་གཟུགས་རིང་ཞིང་ངོ་ནག་པ་མིག་ཆེ་ལ་མདོག་སྔོ་བ་མང་པོ་བྱུང་ནས༔ ཁྱོད་འདིར་ཅི་བྱེད་པ་ལ་འོངས༔ འདི་སོད་ཟེར་ནས་ལག་པ་གཉིས་ལ་འཇུས་ཏེ༔ ཡར་བླངས་ཤིང་མར་བརྡབས་པས༔ ན་བ་དང་ཚ་བའི་ཟུག་གཟེར་གྱི་དྲན་པ་མེད་པར་བརྒྱལ་ལོ༔ བརྒྱལ་སངས་ནས་དྲན་པ་རྙེད་ཙ་ན་བུད་མེད་དེ་ཧེར་དེར་གྱི་གད་མོ་ཆེན་པོ་དགོད་དེ༔ ལྷ་ལྕམ་ལ་ཕར་བསྒྲིལ་ཚུར་བསྒྲིལ་བྱེད་དོ༔ ལྷ་ལྕམ་གྱིས་སྨྲས་པ༔ བདག་ནི་བསམ་ཡས་འཆིང་ཕུའི་དུར་ཁྲོད་ཅེས་བྱ་བ་ནས་འོངས་པ་ཡིན༔ ཕོ་བྲང་འདི་དངོས་གྲུབ་འོང་བའི་གནས་ཡིན་ཟེར་བས༔ ངེད་ཀྱང་དངོས་གྲུབ་འདོད་པ་ལ་འོངས་བ་ཡིན་སྨྲས་པས༔ བུད་མེད་གཅིག་གིས་ན་རེ༔ ཁྱོད་ལ་གནས་འདི་སུས་བཤད་པ་ཡིན་ཟེར༔ ལྷ་ལྕམ་གྱིས་སྨྲས་པ༔ ངེད་བོད་ཀྱི་ཡུལ་ན་ཨོ་རྒྱན་པདྨ་འབྱུང་གནས་ཞེས་བྱ་བའི་རྣལ་འབྱོར་པ་བཟང་པོ་གཅིག་བཞུགས༔ དེས་གསུངས་ནས་དུར་ཁྲོད་འདི་རུ་ལོ་བཅུ་གཉིས་སྒོམས་ཤིག་གསུངས་ནས་བཞག་པ་ལ༔ ངེད་ཀྱང་གནས་དེ་ན་སྒྲུབ་པ་ལ་བསྡད་པའི་ཚེ༔ བུད་མེད་དཀར་མོ་གཅིག་བྱུང་ནས་དབང་མེད་དུ་ཁྲིད་དེ༔ ཞིང་ཁམས་འདིར་སོང་ཟེར་བ་ཡིན་སྨྲས་པས༔ སྒོ་དྲུང་གི་རྣལ་འབྱོར་མ་ཆེན་མོ་གཅིག་གིས་ན་རེ༔ ཁྱོད་ཕོ་བྲང་གི་ནང་དུ་འདོང་ངོ༔ ངེད་ལ་རྔན་པ་ཅིག་སྟེར་ཟེར་ནས་ལག་པ་ལ་འཇུས་སོ༔ ལྷ་ལྕམ་གྱིས་སྨྲས་པ༔ ངེད་ལ་སྟེར་བའི་བསམ་པ་ཡོད་དེ་ནོར་རྫས་མེད༔ ཡན་ལག་གི་ཤ་འདོད་ན་བྲེགས་ནས་སྟེར་རོ་སྨྲས་པས༔ ཡན་ལག་གི་ཤ་མི་འདོད་ནགས་གསེབ་ཀྱི་སྟག་མོ་མ་བུ་བསད་པས་ཤ་སྟེར་དགོས་ཟེར༔ ལྷ་ལྕམ་གྱིས་དགོངས་པ་ལ༔ བདག་ནགས་གསེབ་ཏུ་ཕྱིན་ནས་སྟག་མོ་བསད་པར་གྱུར་ན༔ སྡིག་པ་རྣམ་སྨིན་ཆེན་པོ་བྱུང་ནས་དངོས་གྲུབ་མི་ཐོབ་པའི་སྟེང་དུ་ལས་ངན་པ་གསོག་པར་འདུག༔ སྟག་མོའི་ཤ་སྟེར་རྒྱུ་མེད་ན་ནི༔ ཕྱོགས་སྐྱོང་གི་རྣལ་འབྱོར་མ་འདི་རྣམས་ཀྱིས༔ སྒོ་སྲུང་སྟེ་ཕོ་བྲང་ནང་དུ་མི་གཏོང་བར་འདུག༔ ཅི་ཙུག་བྱས་ཀྱང་དངོས་གྲུབ་མི་ལོན་པ་ཅིག་འོང་བ་འདྲ་བསམས་ནས༔ ཐུགས་སྐྱོ་ཞིང་གནོང་བར་གྱུར་ཏོ༔ ལྷ་ལྕམ་གྱིས་ཉིན་བཞིན་མཚན་བསམ་པ་ལ༔ ནགས་གསེབ་ཏུ་སྟག་མོའི་ཕྲུ་གུ་ཤི་བའི་རོ་ཡོད་དམ་བསམས་ནས༔ ཙན་དན་དང་པདྨའི་ནགས་གསེབ་ཏུ་ཕྱིན་ནས༔ ལུང་པའི་ཁྲོད་ནས་བཙལ་བས༔ སྟག་མོ་ཕྲུ་གུ་བཅོ་བརྒྱད་ལ་མ་གཅིག་གིས་བཀབ་ནས་འདུག་པ་མཐོང་ངོ༔ དེའི་དྲུང་དུ་ཕྱིན་པས༔ ཕྲུ་གུ་རྣམས་མའི་ནུ་མ་ཟད་ནས༔ འཐུང་རྒྱུ་མེད་པར་ཤི་ལ་ཁད་པ་ཞེས་ཤ་སྟག་ཏུ་འདུག༔ མ་ནི་ཤ་ཟད་རུས་ཟད་ལ་སོང་ནས་ཤི་ལ་ཁད་པ་མཐོང་ནས༔ ལྷ་ལྕམ་དེ་རྣམས་ལ་སྙིང་རྗེས་མ་བཟོད་ནས༔ ཤ་ཁྲག་གི་ལུས་འདི་སྦྱིན་པ་ལ་གཏོང་ངོ་བསམས་ནས༔ སྟག་མོའི་དྲུང་དུ་སྨོན་ལམ་བཏབ་པ་འདི་སྐད་དོ༔ ༔

༈ དུས་གསུམ་རྒྱལ་བ་རྣམས་ཀྱིས་དཔང་མཛོད་ཅིག༔

བདག་གི་ལུས་འདི་སྦྱིན་པ་བཏང་བ་ཡི༔

ཕ་རོལ་སྟག་མོ་སྲོག་ལ་རྒྱལ་གྱུར་ཅིག༔

བདག་གི་བསམ་པ་སྔོན་དུ་རྫོགས་གྱུར་ཅིག༔

དམིགས་པས་གང་ཁྱབ་འཁོར་བ་དོང་སྤྲུགས་ཤོག༔ ༔

༈ ཅེས་སྨྲ་ཞིང་སྟག་མོའི་དྲུང་དུ་གན་རྐྱལ་དུ་ཉལ་ཀྱང་ཟ་མ་འདོད་ནས་སྟག་མོ་མ་བུ་རྣམས་འཛུམ་འཛུམ་བྱེད་དོ༔ དེ་ནས་ལྷ་ལྕམ་གྱིས་ཙན་དན་གྱི་ཡལ་ག་བཅད་ནས༔ རང་གི་ཤ་བཞར་ཞིང་དུམ་བུར་གཏུབས་ཤིང་སྟག་མོ་མ་བུ་རྣམས་ལ་སྦྱིན་པས་རང་ཉམས་སོ༔ ལྷ་ལྕམ་ནི་ཀེང་རུས་ཕྱིར་གསལ་ཏེ༔ ཚེའི་དུས་བྱེད་པའི་དུས་ལ་སླེབས་སོ༔ སྟག་མོས་ལྷ་ལྕམ་ནི་རིགས་ལྡན་མར་ཤེས་ནས༔ ཙན་དན་གྱི་ཐང་ཆུ་དང་མེ་ཏོག་རྩི་རྣམས་བཏུས་ནས༔ ཤ་བཞར་བའི་རྨ་རྣམས་ལ་བྱུགས་ཤིང༔ ལྷ་ལྕམ་ལ་དྲང་བར་བལྟས་ཏེ་མིག་ནས་མཆི་མ་ཆར་བཞིན་འབབ་བོ༔ དེ་ནས་ལྷ་ལྕམ་གྱིས་དྲན་པ་སྐད་ཅིག་ཙམ་རྙེད་པའི་དུས་སུ༔ སྟག་མོས་མྱ་ངན་ཆེན་པོ་བྱེད་པ་མཐོང་བས༔ དུད་འགྲོ་འདི་ལྟ་བུས་དྲིན་གཟོ་ཞིང༔ བྱམས་པས་མི་ལ་སེམས་ཉེ་ཞིང་ཕན་པའི་དོན་གཉེར་བར་ངོ་མཚར་ནས༔ གལ་ཏེ་བདག་ཤི་བར་གྱུར་ན་སྟག་མོ་མ་བུ་མྱ་ངན་གྱིས་ནོན་ནས༔ ཚེའི་དུས་བྱེད་པར་ངེས་བསམས་ནས་སྙིང་རྗེ་ཆེན་པོ་སྐྱེས་སོ༔ ཁམས་ཀྱི་ཟོ་མཁའ་བར་བྱས་ཏེ་ཡན་ལག་བཞི་ས་ལ་བཙུགས་ནས༔ ཙན་དན་གྱི་ཡལ་ག་ལ་འཇུས་ཏེ་སྟག་མོ་ལ་སྨྲས་པ༔ ༔

༈ ཙན་དན་པདྨ་དྲི་ངད་ལྗོན་པའི་ཤིང༔ ཚང་ཚིངས་ནགས་ཀྱི་ཁྲོད་དུ་འགྱུ་མི་འགྱུ༔ སྟོབས་དང་ལྡན་པའི་སྟག་མོ་མ་བུ་ཁྱོད༔ ལས་ཀྱི་དབང་གིས་བདག་དང་དུས་གཅིག་འཛོམས༔ ཕན་པའི་སེམས་ཀྱིས་སྙིང་རྗེ་མ་བཟོད་ནས༔ སྲོག་ལ་མི་ཕངས་ཤ་ལ་བཅད་ནས་བྱིན༔ བདག་ལ་འགྱོད་མེད་ཁྱོད་ཀྱི་སྲོག་ནི་འཚོ༔ སྟག་མོ་མ་བུ་སེམས་ལ་ལས་བྱེད་ན༔ བདེན་པས་མི་བསླུ་བདག་ནི་འཆི་མི་སྲིད༔ ཅེས་སྨྲས་པས༔ ཅུང་ཟད་ཙམ་དུ་སྨྲས་པ་རྣམས་གོ་བ་ལྟར་བྱུང་སྟེ༔ སྟག་མོ་ནི་ངོ་དཀར་བར་བསྟན་ཏོ༔

དེ་ནས་ཞག་བར་ལོན་ཙམ་ན༔ ཤ་བཞར་བའི་རྨ་རྣམས་ཀྱང་སོས༔ སྔར་ལྟར་མདོག་ལེགས་ཤིང་དྲི་དངར་དང་ལྡན་ཏེ༔ ལྷ་ལྕམ་ནི་སྔར་ཤུལ་དུ་ཚུད་དོ༔ དེ་ནས་སྟག་མོས་དྲིན་གཟོ་བའི་ཆེད་དུ༔ སྟག་མོའི་རོགས་གཅིག་ཤི་བའི་རོ་མཐོང་སྟེ༔ ལྷ་ལྕམ་གྱི་དྲུང་དུ་འོང་ཞིང་རྐང་ལག་གིས་བརྡ་མང་དུ་བྱེད་དོ༔ ལྷ་ལྕམ་ནི་སྟག་མོའི་རྗེས་ཕྱིར་ཕྱིན་ནས༔ ལུང་པའི་ཚལ་ཅིག་ན་སྟག་མོ་ཤི་བའི་རོ་གཅིག་འདུག་པར་མཐོང༔ ད་ང་ལ་དངོས་གྲུབ་ཐོབ་པར་འདུག༔ སྟག་མོའི་ཤ་ཐོགས་ནས་ཕོ་བྲང་གི་སྒོ་དྲུང་དུ་འགྲོ་བསམས་ཏེ་སྒོ་དྲུང་གི་རྣལ་འབྱོར་རྣམས་ལ་བྱིན་ནས༔ ཕོ་བྲང་ནང་དུ་དངོས་གྲུབ་ལེན་ལ་འགྲོ་དགོས་བསམས་ནས་སྤྲོ་བ་ཆེན་པོ་སྐྱེས་སོ༔ དེ་ནས་ལྷ་ལྕམ་གྱིས་སྟག་མོ་ཤི་བའི་རོ་ལས་མགོ་བྲེགས་ཏེ༔ ཙན་དན་གྱིས་བཤུས་པའི་ཐག་པ་བྱས་ཏེ༔ རྒྱབ་ཏུ་ཁུར་ནས་སྒོ་དྲུང་དུ་ཕྱིན་ནས༔ སྟག་མོའི་མགོ་ཤར་སྒོ་སྲུང་གི་རྣལ་འབྱོར་མ་རྣམས་ལ་བྱིན་ནས་སྨྲས་པ༔ ཁྱེད་ལ་དགོས་པའི་སྟག་མོའི་ཤ་ནི་ཡོད་དོ༔ བདག་ཕོ་བྲང་ནང་དུ་ཐོངས་ཞེས་སྨྲས་པས༔ རྣལ་འབྱོར་མ་ཆེན་མོ་གཅིག་ན་རེ༔ ཁྱོད་ཕོ་བྲང་གི་ནང་དུ་འགྲོ་ན་བདག་གིས་ལམ་སྣ་བྱེད་དོ༔ སྟག་མོའི་མགོ་ཤ་ལོན་པ་དེ་ལེགས་སོ་ཟེར༔ དེ་ནས་རྣལ་འབྱོར་མ་དེས་སྒོ་ཕྱེས་ནས་ཚོང་དུས་ཆེན་མོ་གཅིག་ཏུ་བསྐྱལ་ལོ༔ ཁྱོད་རང་འདིར་སྡོད་ཅིག༔ ངེད་སྒོ་སྲུང་བ་ལ་འགྲོ་ཟེར་ནས༔ རྣལ་འབྱོར་མ་དེ་སྒོ་སྲུང་དུ་སོང་ངོ༔ ལྷ་ལྕམ་གྱིས་ཚོང་དུས་ཀྱི་ཁྲོད་དུ་ལྟད་མོ་ལ་ཕྱིན་པས༔ ཚོང་དུས་ཀྱི་མི་རྣམས་ལྷ་ལྕམ་ལ་ལྟ་ཞིང༔ འདི་འདྲ་བའི་བུ་མོ་གཞོན་ནུ་མ་ཡིད་དུ་འོང་བ༔ སྔར་མེད་པ་ལ་འདིར་འོང་བ་ཅི་ཡིན་ཟེར་ནས་གད་མོ་ཆེན་པོ་དགོད་དོ༔ ལྷ་ལྕམ་གྱིས་ཚོང་དུས་ཀྱི་མི་རྣམས་ལ་སྨྲས་པ༔ ཕོ་བྲང་ཆེན་པོ་རིགས་ལྔའི་ཚུལ་དུ་མཛེས་པ༔ ལྕགས་རི་མུ་ཁྱུད་རྡོ་རྗེའི་ར་བས་བསྐོར་བ༔ གྲོང་ཁྱེར་ཆེན་པོ་མེ་ཏོག་རིགས་ལྔ་འཁྲིགས་པ༔ འདི་འདྲ་བའི་གནས་ནི་ངོ་མཚར་ཆེ་ཞིང་ངེས་ཤེས་སྐྱེས་སོ༔ རྒྱལ་པོ་རྣམས་ལ་མཇལ་དུ་ཡོད་དམ་མེད༔ དགེ་སེམས་ཅན་གྱིས་བདག་གི་ལམ་སྣ་སྟོན༔ ཞེས་སྨྲས༔ ༔

ཚོང་དུས་ཀྱི་ནང་གི་ཁྲོད་ནས་བུད་མེད་དམར་མོ་གཅིག་བྱུང་ནས་ངེད་ཀྱིས་ལམ་སྣ་སྟོན་ནོ་ཟེར༔ དེ་དང་འགྲོགས་ནས་ཕྱིན་པས༔ ཕོ་བྲང་གི་བར་ཁྱམས་ལ་སླེབས་ནས་བྱུང༔ ལ་ལ་ནི་སྐྱེ་ཞིང་དགའ་བར་འདུག༔ ལ་ལ་ནི་འཆི་ཞིང་ངུ་བར་འདུག༔ ལ་ལ་ནི་མི་རྣམས་གཅིག་གིས་གཅིག་ཁུར་ནས་ནམ་མཁའི་མཐོངས་ལ་འཕུར་བར་འདུག་གོ༔ ལ་ལ་ནི་མི་རྣམས་མགོ་མཇུག་བཟློག་ནས་འགྲོ་བར་འདུག༔ ལ་ལ་ནི་ལོངས་སྤྱོད་ཆེན་པོ་བཟའ་བཏུང་གི་ཚོགས་ལ་རོལ་པར་འདུག༔ ལ་ལ་ནི་མིའི་ལུས་ལ་དུད་འགྲོའི་མགོ་བརྙན་ཡོད་པར་འདུག༔ ལ་ལ་ནི་འཐབ་རྩོད་དམག་ཚོགས་ཆེན་པོ་ཡོད་པར་འདུག༔ དེ་རྣམས་མཐོང་བས་ལྷ་ལྕམ་ནི་སྐྱོ་ཞིང་ཐུགས་མི་བདེ་བར་གྱུར༔ ལྷ་ལྕམ་གྱིས་བུད་མེད་དམར་མོ་དེ་ལ་སྨྲས་པ༔ འདི་ལྟ་བུའི་སྤྱོད་པ་ཡ་མ་ཟུང་སྣ་ཚོགས་སུ་བྱེད་པ་ཅི་ལགས་ཞུས་པས༔ བུད་མེད་དེས་གསུངས་ནས༔ ཁྱེད་རང་གི་རྩ་དང་རླུང་འཁྲུགས་པ་ཡིན༔ རང་རྒྱུད་མ་དག་པར་འདུག་པས༔ ད་རུང་དྲན་པ་ལེགས་པོར་ཟུང༔ ཕོ་བྲང་འདི་དཔའ་བོ་མཁའ་འགྲོའི་རང་བཞིན་དུ་འདུས་པ་ཡིན་གསུངས༔ ལྷ་ལྕམ་གྱིས་ཞུས་པ༔ བདག་གི་རྩ་དང་རླུང་འཁྲུགས་པ་ཁྱེད་ཀྱིས་མཁྱེན་པ་ལགས་སམ༔ མངོན་པར་ཤེས་པ་དང་ལྡན་ནམ་ཞུས་པས༔ བུད་མེད་དེས་གསུངས་ནས༔ བདག་གི་རྩ་དང་རླུང་འཁྲུགས་པར་ཤེས༔ མངོན་པར་ཤེས་པ་དང་ཡང་ལྡན༔ ཁྱོད་རང་ཉོན་དང་ངས་བཤད་དོ༔ སྔོན་བསྐལ་པ་དང་པོའི་དུས་ན༔ སངས་རྒྱས་སྣང་བ་མཐའ་ཡས་ཀྱི་ཞིང་ཁམས་པདྨ་ཅན་ཞེས་བྱ་བ་ཡོན་ཏན་མང་པོ་འབྱུང་བའི་གཏེར་ཁ་མང་པོ་གནས་པ༔ འོག་མིན་གྱི་བཀོད་པ་དང་འདྲ་བ་གཅིག་ཡོད་དོ༔ དེ་ན་རྒྱལ་པོ་ཕུན་སུམ་ཚོགས་པ་ནོར་བུ་འདོད་འབྱུང་བྱ་བ་ཡོད༔ དེ་ལ་བུ་ཕོ་མོ་སྟོང་དང་བཞི་བརྒྱ་ཡོད་པ་ལ༔ བུ་མོ་ཀུན་གྱི་ཆུང་ཤོས་ལྷ་ཅིག་མེ་འོད་མ་ཞེས་བྱ་བ༔ ཆོས་ལ་དཀར་ཞིང་སྙིང་རྗེ་ཆེ་ཞིང་སྦྱིན་པ་ལ་བརྩོན་པར་བྱེད་པ༔ བརྩོན་འགྲུས་དང་དད་པའི་མཆོག་ཏུ་གྱུར་པ༔ ཤེས་རབ་ཀྱི་རྩ་ཁ་བྱེ་བ་གཅིག་ཡོད་པ་ལ༔ བུ་མོ་དེའི་མཆོད་གནས་ཀྱི་སྟོན་པ་སེང་གེ་རྣམ་པར་འགྱིང་བ་ཞེས་བྱ་བ་གཅིག་ཡོད་པ་ལ་དཔྱིད་ཟླ་ར་བ་བྱུང་ངོ༔ མཆོག་གི་ཚེས་བརྒྱད་དང༔ ཉ་དང་གནམ་སྟོང་གི་དུས་སུ་མཆོད་པ་ཆེན་པོ་དང་གླུ་དང་གར་གྱི་མཆོད་པ་ཕྱོགས་མ་འགགས་པར་བྱེད་དོ༔ མཆོད་གནས་དེ་ནི་ཙན་དན་ཟིལ་པ་ཆུའི་དྲི་དང་རོ་མཆོག་ལ་མཉེས་པས༔ བུ་མོ་དེས་ཀྱང་ཙན་དན་གྱི་ཟིལ་པ་བཞར་ཏེ་བྱིན་པས༔ ཙན་དན་གྱི་ཡལ་ག་རྣམས་ལ་ཟིལ་པའི་ཆུ་མེད་དེ༔ མཚོན་རྣོན་པོས་ཙན་དན་སྡོང་པོའི་རྩ་བ་ནས་བཅད་པས༔ ཙན་དན་གྱི་སྙིང་པོ་ལ་མཛེས་པའི་ལྷ་མོ་དཀར་མོ་ཕྱག་ན་མེ་ཏོག་དཀར་པོའི་བུམ་པ་བདུད་རྩིས་བཀང་བ་བསྣམས་པ་གཅིག་བྱོན་ཏེ༔ ལྷ་མོ་དེའི་ཞལ་ནས༔ ཁྱོད་ཙན་དན་གྱི་སྡོང་པོ་འདི་བཅད་ནས་ཅི་བྱེད༔ འདོད་པ་ཅི་ཡོད་ཕྱོགས་གང་ནས་འོངས་གསུངས༔ བུ་མོ་དེས་ཀྱང་ཞུས་པ༔ བདག་ནི་རྒྱལ་པོ་ནོར་བུ་འདོད་འབྱུང་ཞེས་བྱ་བའི་བུ་མོ་ཡིན༔ ངེད་ལ་མཆོད་གནས་སེང་གེ་རྣམ་པར་འགྱིང་བ་ཞེས་བྱ་བའི་སངས་རྒྱས་གཅིག་མཆིས་སོ༔ དེ་ལ་མཆོད་པ་ཆེན་པོ་དུས་བཟང་ནས་བྱེད་པ་ལ་ཙན་དན་གྱི་ཟིལ་པའི་ཆུ༔ རོ་མཆོག་དང་དྲི་བཟང་པོ་ཁོ་ན་ལ་མཉེས་པ་གཅིག་ཡོད་དེ༔ དེའི་དོན་གྱིས་འདིར་ཙན་དན་གྱི་ཟིལ་པའི་ཆུ་བླངས་ནས༔ དུས་སུ་མཆོད་གནས་ལ་བསྙེན་ཅིང་བཀུར་བར་བྱེད་དོ༔ ཟིལ་པའི་ཆུ་གང་དུ་བཙལ་ཀྱང་ཙན་དན་གྱི་ཡལ་ག་དང་ལོ་འདབ་རྣམས་ལས་ཆུ་མ་རྙེད་པས༔ སྡོང་པོ་འདི་བཅད་པ་ཡིན་ཞུས་སོ༔

ལྷ་མོ་དེའི་ཐུགས་ཀ་ནས་འོད་ཟེར་རྣམ་པ་ལྔ་འཕྲོས་ཏེ༔ སྟེང་ཕྱོགས་ཀྱི་ནམ་མཁའ་ལ་ཁྱབ་པར་བྱེད༔ འོད་ཟེར་གྱིས་གར་ཁྱབ་ན་ལྷ་མོ་དང༔ སྣང་བ་མཐའ་ཡས་ཀྱི་སྤྲུལ་པས་ཁྱབ་པར་གྱུར་ཏོ༔ སྤྲུལ་པ་རྣམས་ཀྱིས་ཞལ་ནས་ཕྱོགས་གཅིག་ཏུ་འདི་སྐད་སྒྲ་སྒྲོགས་སོ༔ བུ་མོ་གཞོན་ནུ་མ་ཁྱོད་ཀྱིས་མཆོད་གནས་ལ་བསྙེན་ཅིང་བཀུར་བར་བྱེད་པ་བདེན་པས༔ སྨོན་ལམ་ནི་གང་ལྟར་བཏབ་པ་བཞིན་དུ་འགྲུབ་པས༔ རྒྱ་མི་ཆུང་བར་སྨོན་ལམ་ཐོབ་ལ་སེམས་ཅན་གྱི་དོན་གྱིས་ཤིག༔ ཅེས་པའི་སྒྲ་ཆེན་པོ་སྒྲོག་པ་ལ༔ བུ་མོ་དེས་ཀྱང་འདི་སྐད་སྨོན་ལམ་བཏབ་བོ༔ ཆོས་དབྱིངས་མཐའ་དབུས་བྲལ་བའི་བདེན་པ་དང༔ སངས་རྒྱས་མཐའ་ཡས་ཐུགས་རྗེའི་དཔག་ཆེན་གྱིས༔ བདག་གིས་མཆོད་པ་རྣམ་དག་བརྩམས་པ་འདིས༔ དགེ་བ་ཟག་མེད་ས་བོན་རབ་གྱུར་ནས༔ སེམས་ཅན་མ་ལུས་ཀུན་གྱི་དོན་བྱེད་ཅིང༔ བདག་དང་ལྷན་གཅིག་ཏུའང་སྐྱེ་འགྲོ་རྣམས༔ བླ་མེད་བདེ་བའི་ལྷུམས་སུ་བསྒྲོད་པར་ཤོག༔ ༔

༈ ཅེས་སྨྲས་པས་སྨོན་ལམ་གྱི་བདེན་པས༔ སྐྱེ་བ་མཐའ་དག་ཏུ་གྲངས་མེད་པར་བསོད་ནམས་ཀྱི་ཚོགས་བསགས་ནས༔ ད་ལྟ་ཡང་ལྷ་ལྕམ་ཁྱོད་དུ་སྐྱེ་བ་བླངས་པ་ཡིན༔ སྔོན་ལོངས་སྤྱོད་ཆེ་བའི་བག་ཆགས་ཀྱིས༔ ད་ལྟར་ཡང་རྒྱལ་པོའི་ལྷ་ལྕམ་དུ་སྐྱེ་བ་བླངས་པ་ཡིན༔ སྔོན་མཆོད་གནས་བསྙེན་ཅིང་བཀུར་བའི་བག་ཆགས་ཀྱིས༔ ད་ལྟར་དུ་འང་ཨོ་རྒྱན་གྱི་མཁན་པོ་པདྨ་འབྱུང་གནས་ལ་གུས་པ་དང་བཀུར་སྟིའི་མཆོད་པ་ཆེན་པོ་འགྲུབ་བོ༔ སྔོན་སྨོན་ལམ་གྱི་བག་ཆགས་ཀྱིས༔ ད་ལྟ་མཁྱེན་པའི་ཐུགས་རྗེ་མངའ་བས་སེམས་ཅན་གྱི་དོན་དུ་ཐུན་མོང་མ་ཡིན་པ་བྱེད་དོ༔ འོན་ཀྱང་མངལ་ཁྲག་གི་སྒྲིབ་པ་ལ་བརྟེན་ནས༔ རིགས་དྲུག་གི་སྤྱོད་པ་མ་འགགས་པར་མཁྱེན་ནས༔ རྩ་དང་རླུང་ཐིག་ལེའི་རྐྱེན་གྱིས་གཡོ་ཞིང་འཁྲུལ་འཁོར་དུ་ཡོད་པ་ཡིན༔ དེ་ནས་རྩ་དབུ་མའི་ནང་དུ་རླུང་བུམ་པ་ཅན་སྒོམས་ཤིག༔ རིག་པ་སྟེང་དུ་མ་གཏད་པར་ལྟེ་བའི་ཐད་ཀར་ཕོབ་ལ་དམིགས་མེད་ཀྱི་ངང་དུ་ཞོག་ཅིག་གསུངས༔ བུད་མེད་དེས་ཇི་ལྟར་གསུངས་བཞིན་དུ༔ ལྷ་ལྕམ་གྱིས་རླུང་བསྒོམས་པས༔ ཡ་མ་ཟུང་དུ་མཐོང་བའི་གསལ་སྣང་ཐམས་ཅད་ཅུང་ཟད་ཙམ་གཏན་ལ་ཕེབས༔ དག་པའི་སྣང་བ་རྒྱུད་ལ་སྐྱེས་ཏེ༔ དཔའ་བོ་དང་མཁའ་འགྲོ་འདུས་འཚོགས་མང་པོ་ཕོ་བྲང་གི་བར་ཁྱམས་ན་འདུག་པ་ཡང་ཐོ་རེ་བ་མཐོང་ངོ༔ དེ་ནས་བུད་མེད་དེའི་གསུང་ནས༔ ལྷ་ལྕམ་ཁྱོད་ཀྱི་རྩ་ཐིག་རླུང་གསུམ་གཏན་ལ་ཕེབས་སམ༔ ཕེབས་པར་གྱུར་ན༔ འོད་གསལ་མ་བུ་སྣོད་དུ་རུང་བ་ཡིན་པས༔ ངེད་རང་གཉིས་ཕོ་བྲང་གི་ཤར་སྒོར་འདོང་གསུངས་ནས་ཕྱིན་པས༔ ཤར་ཕྱོགས་ཀྱི་ཕོ་བྲང་དུ་སླེབས༔ དེ་ནས་མཁའ་འགྲོ་ཕོ་མོའི་ཚོགས་མང་དུ་འདུས་ཏེ༔ མདོག་ཐམས་ཅད་དཀར་ཞིང་དྭངས་པ་ཤ་སྟག་ཏུ་གནས་སོ༔ དེ་རྣམས་ཀྱི་དབུས་ན་དཀྱིལ་འཁོར་ཆེན་པོ་ཞི་ཁྲོའི་ལྷ་ཚོགས་བཀྲ་ལམ་གྱིས་འདུག་པ་འོད་ཟེར་ལྔའི་གུར་ཕུབ་པ་གཅིག་འདུག༔ དཀྱིལ་འཁོར་དེའི་འགྲམ་ན་ས་ལ་གནས་པའི་རིག་འཛིན་ཡིན་ཟེར་བ་མདོག་དཀར་ཞིང་འཛུམ་པའི་མདངས་དང་ལྡན་པ་གཅིག་འདུག༔ རིག་འཛིན་དེས་ལྷ་ལྕམ་དང་བུད་མེད་དེ་གཉིས་ལ་ལྷན་གཅིག་ཞི་ཁྲོ་བུམ་པའི་དབང་བསྐུར་ཉི་ཤུ་རྩ་གཅིག་རྫོགས་པར་བསྐུར་རོ༔ གསང་མཚན་ཡང་རྡོ་རྗེ་བདུད་འདུལ་མ་བཏགས་སོ༔ ༔

དེ་ནས་བུད་མེད་དེ་དང་འགྲོགས་ནས་ཕོ་བྲང་གི་ལྷོ་སྒོའི་ནང་དུ་ཕྱིན་ཏོ༔ ཕོ་བྲང་དེའི་ནང་ན་མཁའ་འགྲོ་ཕོ་མོ་འདུས་པ་ཐམས་ཅད་ཁ་དོག་སེར་ཞིང་དྭངས་པ་ཞེས་ཤ་སྟག་ཏུ་འདུག་གོ༔ ཕོ་བྲང་དེའི་དབུས་ན་དཀྱིལ་འཁོར་ཆེན་པོ་རིན་པོ་ཆེས་སྤྲས་པ་གཅིག་འདུག་གོ༔ དལ་དེའི་འགྲམ་ན་ཚེ་ལ་དབང་བའི་རིག་འཛིན་ཡིན་ཟེར་བ་སྐུ་མདོག་སེར་ཞིང་མཛེས་པའི་དཔེ་བྱད་དང་ལྡན་པ་གཅིག་འདུག༔ རིག་འཛིན་དེས་བུད་མེད་དང་ལྷ་ལྕམ་གཉིས་ལ་ལྷན་གཅིག་ཏུ་ཚེ་དཔག་མེད་བདུད་རྩིའི་དབང་བུམ་པ་བཅུ་གཅིག་པ་བསྐུར་རོ༔ ༔

དེ་ནས་ལྷ་ལྕམ་དང་བུད་མེད་གཉིས་ཀྱིས་ནུབ་ཕྱོགས་ཀྱི་ཕོ་བྲང་ནང་དུ་ཕྱིན་ཏོ༔ ཕོ་བྲང་དེའི་ནང་ན་མཁའ་འགྲོ་ཕོ་མོ་འདུས་པ་ཐམས་ཅད༔ མདོག་དམར་ཞིང་མདངས་དང་ལྡན་པ་ཤ་སྟག་ཏུ་འདུག་གོ༔ ཕོ་བྲང་དེའི་དབུས་ན་དཀྱིལ་འཁོར་ཆེན་པོ་ཐིག་ལེ་ཐིག་ཕྲན་གྱི་སྐར་ཚོགས་འཁྲིགས་པ་གཅིག་འདུག༔ དལ་དེའི་འགྲམ་ན་ཕྱག་རྒྱ་ཆེན་པོའི་རིག་འཛིན་ཡིན་ཟེར་བ་སྐུ་མདོག་དམར་ཞིང་མཛེས་པའི་འཛུམ་མདངས་དང་ལྡན་པ་གཅིག་འདུག༔ རིག་འཛིན་དེས་ལྷ་ལྕམ་དང་བུད་མེད་གཉིས་ལ་ལྷན་གཅིག་ཏུ་མཁའ་འགྲོ་དྲ་བ་སྡོམ་པའི་དབང་སྒྱུ་འཕྲུལ་ཆེན་མོ་བསྐུར་རོ༔ ༔

དེ་ནས་ལྷ་ལྕམ་དང་བུད་མེད་གཉིས་བྱང་ཕྱོགས་ཀྱི་ཕོ་བྲང་ནང་ན་འདུས་པའི མཁའ་འགྲོ་ཕོ་མོ་ཐམས་ཅད་མདོག་ལྗང་ཁུ་དང་ལྡན་པ་ཁྲོ་ཚུལ་བསྟན་པ་ཤ་སྟག་ཏུ་འདུག་གོ༔ ཕོ་བྲང་དེའི་དབུས་ན་དལ་ཆེན་པོ་ཚོན་གྱི་དྲ་བས་གཡོགས་པ་འོད་ཟེར་ལྔའི་དྲྭ་བ་དང་དྲྭ་ཕྱེད་པ༔ པདྨ་ཁ་དོག་རིགས་ལྔས་མཐའ་བསྐོར་བ་གཅིག་འདུག༔ དལ་དེའི་འགྲམ་ན་ལྷུན་གྱིས་གྲུབ་པའི་རིག་འཛིན་ཡིན་ཟེར་བ༔ སྐུ་མདོག་སྔོ་ཞིང་ཁྲོ་བའི་ལྟ་སྟངས་དང་ལྡན་པ་གཅིག་འདུག༔ རིག་འཛིན་དེས་ལྷ་ལྕམ་དང་བུད་མེད་གཉིས་ལ་ལྷན་གཅིག་ཏུ་རིག་འཛིན་གྱི་དབང་བདེ་ཆེན་དགའ་བ་བཞི་བསྐུར་རོ༔ དེ་ནས་ལྷ་ལྕམ་དང་བུད་མེད་དེ་གཉིས་ནི་དབུས་ཀྱི་ཕོ་བྲང་དུ་ཕྱིན་ཏོ༔ ཕོ་བྲང་དེའི་ནང་ན་འདུས་པའི་མཁའ་འགྲོ་ཕོ་མོ་ཐམས་ཅད་པན་ཙ་ར་གའི་མདོག་ཕྱོགས་གཅིག་ཏུ་ལྡན་པ་བལྟ་ན་སྡུག་པ་ཡིད་དུ་འོང་བ༔ ཞི་དང་ཁྲོ་བོའི་སྤྱོད་པ་གང་ཡང་སྒྱུར་བ་འདུག༔ ཕོ་བྲང་དེའི་དབུས་ན་དལ་ཆེན་པོ་ཕྱི་བལྟས་ན་ནང་གསལ༔ ནང་བལྟས་ན་ཕྱི་གསལ༔ དུར་ཁྲོད་ཀྱི་རྒྱན་སྣ་ཚོགས་ཀྱིས་སྒོ་མ་འགགས་པར་ཆ་ཚང་བ་རེ་མིག་དང་མུན་པ་དེའི་བར་མཚམས་ཐམས་ཅད་རིག་འཛིན་ཕོ་མོ་སྤྲིན་གཏིབས་པ་བཞིན་དུ༔ མངོན་སུམ་དུ་བདུད་རྩི་ལས་ལོངས་སྤྱོད་པ་འདུག་གོ༔ གྲི་གུག་དང་དལ་དེའི་དབུས་ན་རིག་འཛིན་བླ་ན་མེད་པ་གར་དབང་གི་རྒྱལ་པོ་ཡིན་ཟེར་བ༔ སྐུ་མདོག་འོད་ལྔའི་མདངས་དང་ལྡན་པ༔ ཡུམ་མཁའ་འགྲོ་དམར་མོ་དང་འཁྲིལ་བ༔ ཐོད་ཁྲག་གི་གར་མཛད་ཅིང་ལྟ་སྟངས་དང་ཕྱག་རྒྱ་ནམ་མཁའ་ན་མཛད་པ་གཅིག་འདུག༔ རིག་འཛིན་དེས་ལྷ་ལྕམ་དང་བུད་མེད་གཉིས་ལ་ལྷན་གཅིག་ཏུ་རིག་འཛིན་བླ་ན་མེད་པའི་དབང་ལྷ་མོ་བདེ་བ་བཞི་བསྐུར་རོ༔ དེ་ནས་བུད་མེད་དེའི་གསུང་ནས༔ ལྷ་ལྕམ་ཉོན་ཅིག༔ ཁྱོད་སྔོན་གྱི་དུས་ན་སྨོན་ལམ་ལ་བརྩོན་པ་ཡིན་པས༔ ད་ལྟ་བདེན་པའི་འབྲས་བུ་སྨིན་ནས༔ དོན་གཉིས་ལ་དབང་ཐོབ་པ་ཡིན་ནོ༔ ཁྱོད་ཀྱི་སྐྱེ་བ་མ་ལུས་པར་སྲོག་ལ་མི་ཕངས་པར་ཆོས་ཕྱིར་དཀའ་བ་སྤྱད་པ་ཡིན་པས༔ པདྨ་བཀོད་པའི་གནས་འདི་རུ༔ དམ་ཚིག་ལ་དྲི་མ་མེད་པར་སླེབས་པ་ཡིན༔ གནས་འདི་ནི་ཁྱོད་ཀྱིས་ངོ་མ་ཤེས་ན༔ ངས་བཤད་དོ་ཉོན་ཅིག༔ ཁྱོད་ཀྱིས་དུར་ཁྲོད་འཆིང་ཕུ་ནས་འདིར་སླེབས་ཕན་ཆད་ལ༔ མི་ཡུལ་གྱི་ཟླ་བཅུ་གཅིག་ལས་མ་སོང༔ གནས་འདི་རྒྱལ་བས་བྱིན་གྱིས་བརླབས་པའི་གནས་ཡིན་པས༔ ནུབ་ཕྱོགས་བདེ་ཆེན་གྱི་གླིང་ཞེས་བྱ་བ་ཟེར༔ འདིར་ཕོ་སྐྱེས་པ་ཐམས་ཅད་དཔའ་བོ་ཡིན༔ མོ་སྐྱེས་མ་ཐམས་ཅད་དཔའ་མོ་ཡིན༔ ཟས་ནི་དམ་རྫས་ཀྱི་ཚོགས་ཟ་བ་ཡིན༔ སྐོམ་ནི་བདུད་རྩིའི་ཆུ་ལ་འཐུང་བ་ཡིན༔ སྤྱོད་པ་ནི་ཏིང་ངེ་འཛིན་གྱི་རྣལ་འབྱོར་གྱི་བརྟུལ་ཞུགས་ལ་བྱེད་པ་ཡིན༔ འོན་ཀྱང་བོད་མིའི་ཡུལ་ན་ཨོ་རྒྱན་གྱི་མཁན་པོ་པདྨ་འབྱུང་གནས་ཞེས་བྱ་བ་དེ་བཞུགས་པ་ཡིན་པས༔ ཁྱོད་རང་གིས་དངོས་གྲུབ་སྐལ་བ་གནས་དེ་ན་ཡོད་པ་ཡིན་པས་སོང་ཞིག༔ ཐོད་པ་འདི་ལ་བཟའ་བ་དང་བཏུང་བའི་ལོངས་སྤྱོད་མང་དུ་འོང་བ་ཡིན་པས༔ ཐེ་མ་ཚོམ་པར་ལག་ཏུ་ཆོངས་ལ༔ འཆིང་ཕུ་ནགས་ཀྱི་དུར་ཁྲོད་དྲན་པར་གྱིས་ཤིག༔ གསུངས་ནས་ཀ་པ་ལ་མཚན་ཉིད་དང་ལྡན་པ་ལ་དར་ལྗང་ཁུས་དྲིལ་བ་གཅིག་ལག་ཏུ་གཏད་ནས་བྱུང་ངོ༔ ལྷ་ལྕམ་གྱིས་མལ་ནས་བུད་མེད་དེ་ལ་ཞུས་པས༔ ཁྱེད་ལྟ་བུའི་རྣལ་འབྱོར་མ་དང་འཕྲད་ནས༔ ཕོ་བྲང་གི་རིག་འཛིན་རྣམས་ལ་སོ་སོར་དབང་རྫོགས་པར་ཐོབ་པས་བཀའ་དྲིན་རེ་ཆེ༔ གནས་ཕུན་སུམ་ཚོགས་པ་འདི་རུ་བདག་གིས་བསྡད་ན་རུང་ངམ༔ བོད་འབངས་ཡུལ་ན་ཡང་རྐྱེན་ངན་པ་དེ་མང་བར་གདའ་ཞུས་པས༔ བུད་མེད་དེའི་གསུང་ནས༔ ཨོ་རྒྱན་གྱི་བཀའ་ལ་བཅག་ཐབས་མེད་པས༔ འདིར་བསྡད་ན་ཉེས་པ་ཕོག༔ བོད་ཡུལ་དུ་སོང༔ མྱུར་དུ་རང་རེ་གཉིས་འཕྲད་ནས་འོང༔ མཁའ་སྤྱོད་དག་པའི་ཞིང་ཁམས་འདིར་ཡང་ཁྱོད་ཀྱིས་དབང་བྱེད་པར་འགྱུར་རོ་གསུངས་པས༔ ལྷ་ལྕམ་གྱིས་ཐོད་པ་ལག་ཏུ་བསྣམས་ནས༔ འཆིང་ཕུ་ནགས་ཀྱི་དུར་ཁྲོད་དྲན་པར་བྱས་ནས༔ སྐད་ཅིག་ལ་འཆིང་ཕུའི་འི་བྲག་ཕུག་མཚམས་ཁང་དུ་སླེབས་སོ༔ ༔

༈ དེ་ནས་ལོ་གཅིག་ཙམ་ལོན་པ་ནས༔ ཆོམ་རྐུན་གྱི་ཇག་པ་མི་བདུན་བྱུང་ནས༔ ལྷ་ལྕམ་གྱི་བསམ་གཏན་གྱི་འཚོ་བ་འབྲས་ཕྱེ་བྲེ་གསུམ་ཡོད་པ་དེ༔ ཆོམ་རྐུན་གྱིས་ཕྲོགས་ནས༔ ལྷ་ལྕམ་ལ་འདི་སྐད་སྨྲས༔ གཞོན་ནུ་མ་ཁྱོད་འདི་རུ་ཅི་བྱེད༔ ཁྱོད་ཀྱི་རིགས་གང་ཡིན༔ བཟའ་བ་བཏུང་བའི་ལོངས་སྤྱོད་མེད་པ་ཅིས་ལན༔ ཁྱོད་སྐྱེ་འབྲས་ནི་ལེགས༔ སྤྱོད་ལམ་ནི་དལ༔ ངང་རྒྱུད་ནི་རིང༔ ཁྱིམ་སྤྱད་ཀྱི་བྱ་བ་དང༔ གཟོ་བའི་སྤྱོད་པ་ལ་མཁས༔ བལྟ་ན་སྡུག་ཅིང་ཡིད་དུ་འོང་བ་གཅིག་འདུག་པ་ལ༔ མི་མེད་ལུང་སྟོང་འདི་རུ་བསྡད་པ་ཕངས་པས༔ ངེད་རྣམས་ཀྱི་རྗེས་སུ་འདོང་ངོ༔ ཟས་དང་སྐོམ་གྱིས་ཉོན་མི་མོངས་པར་བྱེད་དོ་ཟེར༔ དེའི་དུས་སུ་ལྷ་ལྕམ་གྱིས་ཨོ་རྒྱན་གྱི་མཁན་པོ་པདྨ་འབྱུང་གནས་སྤྱི་བོའི་གཙུག་ཏུ་བསྒོམས་ཤིང༔ ལུས་ངག་ཡིད་གསུམ་རྩེ་གཅིག་ཏུ་སྙིང་རྗེ་མ་རུང་པ་ལ་གཏད་དེ༔ བྱང་ཆུབ་ཀྱི་སེམས་བསྒོམ་པ་ལ༔ བར་དུ་གཅོད་པ་འདི་འདྲ་བྱུང་བས༔ ཟློག་པའི་ཐབས་གཅིག་རྒྱལ་བའི་ཐུགས་རྗེས་སྩལ་ཏུ་གསོལ་བསམས་ནས༔ ཆོམ་རྐུན་རྣམས་ལ་སྨྲས་པ༔ ངེད་ཀྱི་རིགས་བསམ་གཏན་སྒོམ་པའི་གཉོམ་ཆུང་གི་རིགས་ཡིན༔ བདག་གི་ཕ་མ་ནི་རིགས་ངན་གྱི་རིགས་ཡིན༔ བཟའ་བ་དང་བཏུང་བ་མེད་པས་ཤིང་ཐོག་གི་བཅུད་ཟ་བ་ཡིན༔ བདག་རིགས་ངན་གྱི་བུ་མོ་ཡིན་པས༔ ཁྱེད་རྣམས་དང་འགྲོག་པར་མི་འོས༔ ཁྱེད་རྣམས་དང་ངེད་རྣམས་བསམ་པའི་བློ་མི་མཐུན་པས༔ བདག་གི་ཟས་སྐལ་འབྲས་ཕྱེ་འདི་ལ་ཆགས་པའི་སེམས་མེད་དོ༔ དངོས་པོ་ཐམས་ཅད་རྨི་ལམ་གྱི་ལོངས་སྤྱོད་དང་འདྲ་བས༔ དེའི་མཚན་ཉིད་བཤད་དོ༔ ཁྱེད་རྣམས་ཉོན་ཅིག༔ ༔

སྟོང་ཉིད་ཡུམ་གྱི་ཁམས་དང་མི་ལྡན་ན༔ འཇིག་རྟེན་ཁམས་འདི་རྨི་ལམ་ཞིང་ཁམས་འདྲ༔ བསམ་གཏན་ནོར་གྱི་རྫས་དང་མི་ལྡན་ན༔ ཟག་པའི་བང་མཛོད་རྩྭ་ཡི་ཟིལ་པ་འདྲ༔ སྣང་བ་ཡེ་ཤེས་སེམས་དང་མ་འདྲེས་ན༔ ཆགས་པའི་གྲོགས་ནི་མེ་ཏོག་སད་ཁྱེར་འདྲ༔ གསལ་སྟོང་ཟུང་འཇུག་དབྱིངས་སུ་མི་ལྡན་ན༔ ལོག་པའི་ཤེས་རབ་འཁོར་བའི་ས་བོན་ཡིན༔ དྲིན་ཆེན་རྩ་བའི་བླ་མའི་སྐྱབས་དང་མི་ལྡན་ན༔ དབང་ཆེན་དཔུང་དྲག་སྙིང་རྗེ་གསོད་པའི་བདུད༔ སྐྱེ་བ་འདི་ལ་ཏིང་འཛིན་མ་ཐོབ་ན༔ འདུས་བྱས་ཐམས་ཅད་ནམ་མཁའི་སྨིག་རྒྱུ་འདྲ༔ ཆོམ་རྐུན་ཇག་པ་ཆོས་ཕྱིར་མ་དཀའ་ན༔ ལུང་སྟོང་འགྲིམ་ན་གཅན་གཟན་འདྲེ་ཚོགས་འདྲ༔ ཆོས་མེད་འགྲོ་བ་མི་ཚེ་སྟོང་པར་ཟད༔ སྦྱངས་པ་དོན་མེད་ཆོམ་རྐུན་སྙིང་རེ་རྗེ༔ སྐྱེ་དང་འཆི་བ་མིག་གིས་མ་མཐོང་ངམ༔ ན་དང་ཚ་བ་སེམས་ཀྱིས་བཟོད་དམ་ཅི༔ རང་ལ་དཔེ་འཚལ་གཞན་ལ་གནོད་མ་བྱེད༔ བདག་ནི་སྲོག་ལ་བབ་ཀྱང་ཆོས་ཕྱིར་དཀའ་བ་སྤྱོད༔ འདོད་ན་མི་ཕངས་ཤ་དང་ཁྲལ་ལ་ཟོ༔ ཞེས་སྨྲས་པས༔ ༔

༈ ཆོམ་རྐུན་ཐམས་ཅད་གནོང་ཞིང་འགྱོད་པར་གྱུར༔ ལུས་ངག་གདབ་ཅིང་མིག་ནས་མཆི་མ་ཁྲག་ཏུ་འདུག༔ ངུ་འབོད་ཆེན་པོ་འདོན་ཅིང༔ སྔོན་བྱས་ཀྱི་སྡིག་པ་ལ་གནོང་ཞིང་འགྱོད༔ ཕྱིས་མི་བྱེད་པར་དམ་བཅས༔ དགེ་བ་བླ་ན་མེད་པ་ལ་རྗེས་སུ་ཡི་རང་བར་སྨོན༔ འཁོར་བའི་བྱ་བྱེད་ཐམས་ཅད་བློས་བཏང་ནས༔ བདུད་རྩིའི་རུ་ལུ་ལ་དཀའ་ཐུབ་བྱེད༔ ལོ་བདུན་བདུན་གྱི་དམ་བཅས་ནས༔ འཆིང་ཕུ་ནགས་ཀྱི་དུར་ཁྲོད་དུ་རྫོགས་པ་ཆེན་པོ་ཟག་མེད་ཀྱི་སྐོར་སྒོམ་ཞིང་སྒྲུབ་པ་ལ་བརྩོན་ནོ༔ དེ་ནས་ཟླ་བ་བདུན་ལོན་པའི་དུས་སུ༔ ཉིག་གཅིག་ཚེས་བཅུའི་སྔ་དྲོར་བུད་མེད་ཀྱི་ཚོགས་མང་པོ་འདུས་ནས༔ ལྷ་ལྕམ་དང་འོད་ཕུང་སྒོམ་པ་ལ་ངེས་ཤེས་ཐོབ་པའི་ཆོམ་རྐུན་བདུན་དང་བཅས་པ་ལ༔ ནུབ་ཕྱོགས་ཨོ་རྒྱན་གྱི་ཡུལ་དུ་ཚེས་བཅུ་ལ་འགྲོ་འམ་ཟེར༔ ལྷ་ལྕམ་གྱིས་ངེད་རྣམས་ལ་སྒྲུབ་པའི་དམ་བཅའ་ཡོད་པ་ལ༔ མི་འགྲོ་བྱས་པས༔ བུད་མེད་རྣམས་ན་རེ༔ འོན་ཀྱང་གདན་འདིའི་སྟེང་དུ་བཞུགས་དང་ཟེར་ནས༔ དར་ཡུག་དཀར་པོ་གཅིག་ས་ལ་བཏང་ངོ༔ དེའི་སྟེང་དུ་ལྷ་ལྕམ་བཞུགས་པས༔ ཆོམ་རྐུན་མི་བདུན་ཡང་གདན་འདི་ལ་འདུག་དགོས་ཟེར་བས༔ ཇག་པ་མི་བདུན་ཡང་སྒྲུབ་ཁང་ནས་ཐོན་ནས་འདུག་གོ༔ དེ་ནས་བུད་མེད་རྣམས་ཀྱིས་དར་ཡུག་གི་སྣེ་ལ་བཟུང་ནས༔ ནམ་མཁའི་དབྱིངས་ན་གཏད་ནས་ཕྱིན་པས༔ ཨོ་རྒྱན་གྱི་ཡུལ་འཛའ་གད་ཀྱི་གླིང་ཞེས་བྱ་བར་སླེབས༔ དེ་ནས་རིག་འཛིན་ཐོར་ཅོག་ཅན་ཞེས་བྱ་བ་སྔགས་པའི་ཆ་བྱད་ཅན༔ སྐུ་ཆེ་ལ་གཟི་བརྗིད་དང་ལྡན་པ་གཅིག་བཞུགས༔ དེའི་དྲུང་ན་མཁའ་འགྲོ་མའི་ཚོགས་མང་པོ་འདུས་ནས་ཚོགས་ཀྱི་འཁོར་ལོ་ཆེན་པོ་བསྐོར་རོ༔ ལྷ་ལྕམ་དང་ཆོམ་རྐུན་རྣམས་ལ༔ རིག་འཛིན་དེའི་ཞལ་ནས༔ ཁྱེད་རྣམས་འདིར་ཤོག་དང་གཏམ་དྲི་བ་ཡོད་དོ་གསུངས༔

ལྷ་ལྕམ་ཆོམ་རྐུན་དང་བཅས་པ་རྣམས་ཀྱིས༔ རིག་འཛིན་དེའི་དྲུང་དུ་ཕྱིན་ནས༔ རིག་འཛིན་གྱིས་ཕྱག་སོར་བརྒྱད་ཀྱིས་ཐུགས་ཁ་ཕྱེས་ནས༔ ལྷུན་གྲུབ་ཞི་ཁྲོའི་དཀྱིལ་འཁོར་དང༔ རིག་འཛིན་རིགས་ལྔ་ལྡན་བརྒྱད་ཀྱི་དཀྱིལ་འཁོར་དང༔ མཁའ་འགྲོ་བདེ་ཆེན་རྒྱ་མཚོའི་དཀྱིལ་འཁོར་རྣམས་ཞལ་ཕྱེས་ནས༔ ལྷ་ཡོངས་སུ་རྫོགས་པའི་དབང་བསྐུར་རོ༔ ལྷ་ལྕམ་ལ་གསང་མཚན་མཁར་ཆེན་ཟ་རུ་བཏགས་སོ༔ ཇག་པ་བདུན་ཡང་འོད་ཕུང་དུ་ཞུ་ནས་རིག་འཛིན་གྱི་ཐུགས་ཀར་ཐིམ་མོ༔ ལྷ་ལྕམ་དང་རིག་འཛིན་དེ་གཉིས་ཞག་གཅིག་གི་བར་དུ་བདེ་བར་རོལ་ལོ༔ དེ་ནས་རིག་འཛིན་དེས་ཉིན་ཞིག་ཡུལ་དེའི་མཁའ་འགྲོ་མ་རྣམས་བསྡུས་ནས༔ ལྷ་ལྕམ་པང་དུ་བསྣམས་ཏེ༔ མཁའ་འགྲོ་ཐམས་ཅད་ཀྱི་འདི་ལ་ཕྱག་གྱིས་ཤིག༔ འདི་ནི་ཨོ་རྒྱན་རྒྱལ་པོ་པདྨའི་བཙུན་མོ་ཡིན་པར་འདུག་གོ་གསུངས༔ མཁའ་འགྲོ་མ་ཐམས་ཅད་ཀྱིས་ཀྱང་ཕྱག་འཚལ་ཞིང་མེ་ཏོག་དོར་རོ༔ དེ་ནས་རིག་འཛིན་དེས་གསུངས་ནས༔ ལྷ་ལྕམ་ཁྱེད་དུས་གསུམ་གྱི་རྒྱལ་བ་ཐམས་ཅད་ཀྱིས་རབ་ཏུ་གནས་པ་ཡིན་པས༔ སེམས་ཅན་གྱི་དོན་འབྱུང་བར་ངེས་སོ༔ ཐོད་པ་མཚན་ཉིད་དང་ལྡན་པ་འདི་ཐོགས་ལ༔ ཁྱེད་རང་གི་སྡོད་པའི་གནས་དྲན་པར་གྱིས་ཤིག་གསུངས་ནས༔ ཐོད་པ་དཀར་པོ་གཅིག་བསྐུར་རོ༔ ལྷ་ལྕམ་གྱིས་ཐོད་པ་དེ་བསྣམས་ནས༔ འཆིང་ཕུའི་དུར་ཁྲོད་ཡིད་ལ་དྲན་པར་བྱས་ནས༔ སྐད་ཅིག་ལ་བོད་ཡུལ་འཆིང་ཕུར་སླེབས་སོ༔ ཉིན་ཞག་ཕྲུག་གཅིག་ལ་ལྷ་ལྕམ་གྱིས་ཨོ་རྒྱན་འཛའ་གད་ཀྱི་གླིང་ཡང་འཁོར་རོ༔ དེ་ནས་ཡང་སྒྲུབ་པ་ལ་ཞུགས་ཏེ༔ འོད་གསལ་གྱི་ངང་ནས་རིགས་དྲུག་གི་ཁམས་ཐམས་ཅད་གཟིགས་པས༔ སྙིང་རྗེ་དང་སྐྱོ་ཤས་དྲག་པོའི་སྨོན་ལམ་གྱིས་བདེན་པ་མང་དུ་བརྗོད་དོ༔ ལྷ་ལྕམ་གྱིས་ཨོ་རྒྱན་གྱི་ཡུལ་རྣམས་བསྐོར་བའི་ལེའུ་སྟེ་གཉིས་པའོ༔ ས་མ་ཡ༔ རྒྱ་རྒྱ་རྒྱ༔ ༔

 

༈ དེ་ནས་ལོ་ངོ་བཅུ་གཉིས་ལོན་པའི་ཚེ༔ ཨོ་རྒྱན་པདྨ་འབྱུང་གནས་རྒྱ་གར་གྱི་ཡུལ་ནས་བོད་ཡུལ་དུ་ཆགས་ཕེབས༔ ལྷ་ལྕམ་དང་ལྷན་གཅིག་ཏུ་བཞུགས་སོ༔ ལྷ་ལྕམ་གྱིས་ཨོ་རྒྱན་ལ་ཕྱག་འཚལ་ནས་ཞུས་པ༔ སློབ་དཔོན་ཆེན་པོ་ལགས༔ ཁྱེད་ཀྱི་བཀའ་ལ་མ་འདས་པར༔ མི་ལོ་བཅུ་གཉིས་བར་དུ་རྫོགས་པ་ཆེན་པོའི་སྒྲུབ་པ་ལ་བསྡད་པའི་ཚེ༔ ཨོ་རྒྱན་གྱི་ཞིང་ཁམས་ཡང་མང་དུ་འཁོར༔ ཉམས་དང་རྟོགས་པ་རྩལ་ཁ་ཡང་ཆེ༔ འགྲོ་བ་ཁམས་གསུམ་གྱི་སེམས་ཅན་ལ་སྙིང་རྗེ་ཆེན་པོའི་རྩལ་དང་ཡང་ལྡན༔ བླ་ན་མེད་པའི་ཐེག་པ་ལ་ངེས་ཤེས་ཆེན་པོ་ཡང་ཐོབ༔ ད་ནི་གསང་སྔགས་ཐེག་པ་ཆེན་པོའི་ཆོས་ཐམས་ཅད་ཁོང་དུ་ཆུད་པ་ལགས་གཅིག་ཞུས་པས༔ ཨོ་རྒྱན་གྱིས་གསུངས་ནས༔ ལྷ་ལྕམ་ཉོན་ཅིག༔ ད་རུང་གསང་སྔགས་ཀྱི་གཏན་ལ་མ་ཕེབས༔ གསང་སྔགས་ཁོང་དུ་ཆུད་ན༔ རྟོགས་པ་དང་མཁྱེན་པ་ཟུང་འཇུག་ཏུ་འོང་བ་ཡིན་ནོ༔ ཁྱོད་ལ་ད་རུང་མཁྱེན་པ་དང་རྟོགས་པ་གོ་བ་ཙམ་བས་མེད༔ ངས་གསལ་བར་བཤད་དོ༔ ཉམས་ཀྱི་གླུ་འདི་ལ་ཉོན་ཅིག་གསུངས༔ ༔

༈ དོན་འདི་ལ་དགོངས་ཤིག་པདྨ་ལྕམ༔ འཆི་བ་ལ་བསམས་ན་སྒྲུབ་པ་རན༔ མི་ཚད་ཕྱིས་པ་ཙམ་ཡང་མེད༔ སྨྲ་བའི་ཚིག་ལ་སྙིང་གཏམ་ཡོད༔ མཚན་ལྡན་བུ་མོ་གཞིག་པ་ཐོང༔ དད་ལྡན་མ་ཁྱོད་འདི་ལྟར་མཛོད༔ ༔

༈ དང་པོ་འཁོར་བའི་རྒྱུ་འདི་ལ༔ འདོད་ཆགས་ཉོན་མོངས་སྡུག་རེ་བསྔལ༔ གཏི་མུག་རོ་ཡི་བྲག་ཚང་ལ༔ ཞེ་སྡང་ལོག་པའི་ཁྱེའུ་ཆགས༔ ང་རྒྱལ་རོ་ཡི་ཆགས་སྡང་འཛིན༔ ཕྲག་དོག་རླུང་གི་སྤྱོད་རླུང་ཞོན༔ འདོད་ཆགས་མ་དང་ལྷན་གཅིག་འགྲོགས༔ འཛིན་པའི་སེམས་ཀྱི་བུ་དང་ལྡན༔ གཟུགས་དང་སྣང་བའི་དགྲ་བོ་རྙེད༔ མེད་པ་གཅིག་ལ་ཡོད་བཏགས་ནས༔ རིགས་དྲུག་འཁོར་བའི་ཁམས་སུ་འབྱུང༔ ཤེས་ན་འདི་ཡང་གཅིག་གི་རྩལ༔ མ་ཤེས་སྡུག་བསྔལ་སོ་སོར་ཐོབ༔ གནས་སྐབས་བར་དོའི་ཞིང་ཁམས་ཉུལ༔ འཁྲུལ་པ་རྐྱེན་དང་འཕྲད་ཙམ་ན༔ སྐྱེ་དང་རྒས་པ་ཟུང་དུ་འབྱུང༔ ན་དང་ཚ་བ་ལས་ཀྱི་ཁུར༔ འཆི་དང་འཕོ་བ་མྱ་ངན་འཚོ༔ འདི་འདྲའི་སྐྱེ་བོ་སྡུག་བསྔལ་ཅན༔ དམུ་རྒོད་སེམས་འདི་མ་མཐོང་ངམ༔ དད་པའི་ཆོས་རྣམས་མ་དྲེད་ཅིག༔ ཡིད་ལོང་མེད་དོ་པདྨ་ལྕམ༔ ཆོས་དབྱིངས་བརྟན་པ་མ་འཛིན་ན༔ རྣམ་ཤེས་སེམས་འདི་རླུང་དམར་འདྲ༔ ལས་ཀྱི་བག་ཆགས་ཐང་ཡངས་སོ༔ བདུད་ཀྱི་གྲོགས་འདི་རྐྱེན་ཁ་བཙན༔ སྣང་བའི་ཡུལ་འདི་བྲིད་རེ་མཁས༔ བརྩོན་འགྲུས་བསྐྱེད་དམ་པདྨ་ལྕམ༔ འཁོར་བའི་རྒྱ་འདི་གཏིང་མཐའ་རིང༔ ཉོན་མོངས་དུག་ལྔ་རྦ་རླབས་ཆེ༔ ཁོས་ཆུང་སེམས་འདི་སྐྱེ་རེ་ཞན༔ བདེ་བའི་ལུས་དང་བྲལ་ཉེས་ཆེ༔ ངན་སོང་གསུམ་འདི་གཡང་ས་གཟར༔ ལྟ་བའི་རྣལ་འབྱོར་ལྷུང་ཉེན་ཡོད༔ བརྩོན་འགྲུས་དད་པའི་ལེ་ལོ་འདི༔ སངས་རྒྱས་འཐོབ་པའི་རྒྱུ་མི་འདྲ༔ སེམས་ལྕག་བྲོབས་དང་པདྨ་ལྕམ༔ ལྟ་སྤྱོད་ཡ་བྲལ་རྣལ་འབྱོར་འདི༔ དོག་མོའི་འཕྲང་ལ་ལྷུང་ས་ཡོད༔ ནེ་ཙོ་ཁ་ཡི་ཆོས་བཤད་འདི༔ ཁ་ཡང་སེམས་དང་ཆོས་མི་འདྲེས༔ ལྟོས་དང་སེམས་ཀྱི་རྩ་བ་ཆོད༔ ད་རུང་ཉམས་ལེན་འབྲེལ་ཐབས་མེད༔ ནན་ཆགས་སྒྲུབས་ཤིག་པདྨ་ལྕམ༔ གསུངས༔ ལྷ་ལྕམ་བརྒྱལ་ཞིང་མགོ་སར་བརྡབས་སོ༔ བརྒྱལ་སངས་ནས་ཨོ་རྒྱན་ལ་ཞུས་པ༔ སློབ་དཔོན་ཆེན་པོ་ལགས༔ འཁོར་བའི་གནས་འདི་ནས་མྱུར་དུ་ཐར་བའི་ཐབས་ཤིག་ཞུ་ཞུས་པས༔ བདག་ནི་འཇིགས་པའི་འཕྲང་ལས་སྒྲོལ་ཞིང༔ ཏིང་ངེ་འཛིན་འདི་ལ་བོགས་ཐོན་ནས༔ གསང་སྔགས་ཀྱི་དོན་མ་ལུས་པ་རྫོགས་པར་བྱེད་ན༔ ཉམས་ལེན་ཅི་འདྲ་བ་ཞིག་འཐད་ཞུས་པས༔ ཨོ་རྒྱན་གྱིས་གསུངས་ནས༔ ༔

༈ ཚུར་ལ་ཉོན་དང་པདྨ་ལྕམ༔ མཚན་ལྡན་བུ་མོ་རིགས་བཟང་མོ༔ འཁོར་བའི་འདམ་ནས་བྲོས་ཐོན་ནས༔ དབེན་ས་རི་ཁྲོད་འབྲལ་མེད་བརྟེན༔ མཚན་ལྡན་བླ་མའི་རྣམ་ཐར་སྐྱོངས༔ དད་པ་ཆོས་ཀྱི་ཞིང་ས་ཡིན༔ འཕོ་འགྱུར་མེད་པར་གཏན་ལ་ཕོབ༔ དམ་ཚིག་དངོས་གྲུབ་སྲོག་ཤིང་ཡིན༔ མངོན་ལྐོག་མེད་པར་གཏན་ལ་ཕོབ༔ སྙིང་རྗེ་སྐྱེ་འགྲོའི་ཕ་མ་ཡིན༔ བྲི་གང་མེད་པ་གཏན་ལ་ཕོབ༔ བཟོད་པ་ལུས་ཀྱི་མཚོན་ཆ་ཡིན༔ འབྲལ་མེད་དོན་གྱིས་གཏན་ལ་ཕོབ༔ བརྩོན་འགྲུས་ལེ་ལོའི་ཁ་གནོན་ཡིན༔ ཕྱི་བཤོལ་མེད་པར་གཏན་ལ་ཕོབ༔ སྙིང་རུས་མི་འགྱུར་ཟབ་པ་ཡིན༔ བསམ་གཏན་དོན་གྱིས་གཏན་ལ་ཕོབ༔ འོད་གསལ་གཞི་ཡི་ས་བོན་ཡིན༔ ཐུན་སྒོམ་བློ་བྲལ་གཏན་ལ་ཕོབ༔ ཞི་གནས་ལམ་གྱི་སྟེགས་བུ་ཡིན༔ བརྗེ་ཤེས་ཡེངས་མེད་གཏན་ལ་ཕོབ༔ ལྷག་མཐོང་དོན་གྱི་རྩེ་མོ་ཡིན༔ ཐེ་ཚོམ་གཉིས་མེད་གཏན་ལ་ཕོབ༔ ཚོགས་དྲུག་སྣང་བའི་རང་རྩལ་ཡིན༔ སེམས་ཉིད་སྐྱེ་མེད་གཏན་ལ་ཕོབ༔ དུག་ལྔ་ཡེ་ཤེས་སྐུ་ལྔའི་རྩལ༔ འགག་མེད་ཆགས་བྲལ་གཏན་ལ་ཕོབ༔ ལས་ཀྱི་རྣམ་ཤེས་རིག་པའི་རྩལ༔ བློ་ཟད་ཆོས་དབྱིངས་གཏན་ལ་ཕོབ༔ དབྱིངས་དང་ཡེ་ཤེས་ཐ་མི་དད༔ རྒྱུ་གཅིག་རྐྱེན་གྲོལ་གསལ་ལ་སྟོང༔ སྐད་ཅིག་རིག་པ་གཏན་ལ་ཕོབ༔ གསུངས༔ ༔

༈ ཡང་ལྷ་ལྕམ་གྱིས་ཞུས་པ༔ ཨོ་རྒྱན་ཆེན་པོ་ལགས༔ སྣང་བ་དང་སེམས་གཉིས་ཐ་མི་དད་པའི་རིག་པ་གཏན་ལ་ཕེབས་ན༔ ཐེག་པའི་འཇུག་སྒོ་གང་ལགས་ཞུས་པས༔ ཨོ་རྒྱན་གྱིས་གསུངས་ནས༔ ༈ ༔ མཚན་ལྡན་བུ་མོ་པདྨ་ལྕམ༔ དད་ལྡན་མ་ཁྱོད་ཚུར་ཉོན་དང༔ བློ་དང་ལྡན་པའི་སློབ་བུ་ཡིས༔ གནས་ལུགས་ངོ་བོ་གཏན་ཕེབས་ནས༔ བླ་མེད་ཐེག་པའི་རྫོགས་ཆེན་སྒོམས༔ ལམ་གྱི་འཇུག་སྒོ་ནོར་མི་སྲིད༔ འོན་ཀྱང་སྒྲུབ་པའི་གང་ཟག་དང༔ དམ་ཆོས་རྫོགས་པ་ཆེན་པོ་གཉིས༔ ལྟ་སྤྱོད་ཡ་བྲལ་དོན་མི་མཐུན༔ དེ་འདྲ་ལམ་གྱི་འཇུག་སྒོ་ནོར༔ ཆོས་དང་གང་ཟག་མཐུན་པ་ན༔ རྫོགས་པ་ཆེན་པོ་ཐེག་པའི་མཆོག༔ ཚིག་རྩོད་རྟོག་པའི་སྤྱོད་ཡུལ་མིན༔ སྔོན་གྱི་ལས་ཅན་དམ་ཚིག་ཅན༔ ཡང་ན་ཚེ་འདིར་སྒྲུབ་སྙིང་ཅན༔ དམ་ཚིག་ལྡན་པ་དེ་ཉིད་ཀྱིས༔ ཐེག་མཆོག་རྫོགས་ཆེན་བསྒོམ་པའི་ཡུལ༔ དཔེ་དང་དོན་གྱིས་གཏན་ལ་འབེབས༔ བརྡ་དོན་ཆོས་ཉིད་ངོ་བོ་གཅིག༔ ཀ་དག་སྟོང་དབྱིངས་ནམ་མཁའི་ངོས༔ ལྷུན་གྲུབ་སྟོང་གསལ་ཉི་ཟླའི་འོད༔ འགག་མེད་རང་རྩལ་ཅིར་ཡང་རྒྱུ༔ ཁྲེག་ཆོད་ཐོད་རྒལ་ཟུང་དུ་ཚུད༔ བར་དོའི་སྣང་བ་དབྱིངས་སུ་རྫོགས༔ ན་རཀ་འཁོར་བ་དོང་ནས་སྤྲུགས༔ བདེ་བ་ཀུན་བཟང་ཟབ་མོའི་མཛོད༔ དམ་ཆོས་འདི་དང་སུ་འཕྲད་པ༔ དམ་ཚིག་ཅན་དེ་སྐལ་བ་ཆེ༔ གསུངས༔ ༔

༈ ཡང་ལྷ་ལྕམ་གྱིས་ཞུས་པ༔ ཨོ་རྒྱན་ཆེན་པོ་ལགས༔ བཀའ་རྫོགས་པ་ཆེན་པོ་བླ་མེད་ཟབ་མོའི་མཛོད་འདི་ཉམས་སུ་ལེན་པ་ལ༔ ཐེག་པའི་མཆོག་ཡིན་ན༔ སྒྲུབ་པའི་གནས༔ ཡུལ་དང༔ དུར་ཁྲོད་དང༔ རྫ་ཁྲོད་དང༔ གངས་ཁྲོད་དང༔ གཡའ་ཁྲོད་དང༔ སྤང་རི་ངོས་རྣམས་ཉམས་གང་དུ་འཕེལ༔ རྟོགས་པ་སྐྱེ་བའི་ས་ཕྱོགས་གང་ལགས་ཞུས་པས༔ ཨོ་རྒྱན་གྱིས་གསུངས་ནས༔ ༈ ༔ མཚན་ལྡན་བུ་མོ་པདྨ་ལྕམ༔ དགེ་སེམས་མ་ཁྱོད་བདག་ལ་ཉོན༔ ཐེག་མཆོག་རྫོགས་པ་ཆེན་པོ་འདི༔ སྐལ་ལྡན་བུ་ཡིས་ཉམས་ལེན་ན༔ དག་པའི་གནས་ནི་གངས་ཁྲོད་ཡིན༔ གཡའ་མའི་ཁྲོད་དུ་སྒོམ་ཡང་རུང༔ མདོར་ན་སྐྱོ་ཤས་སྐྱེ་བའི་གནས༔ སུ་མེད་གངས་ཀྱི་སྟོད་ཁྲོད་དེར༔ རྫ་དང་གཡའ་མ་རང་མདོག་སྔོ༔ སྡུག་བསྔལ་རྡུལ་ཕྲན་ནམ་མཁའ་དྭངས་པའི་ཡུལ༔ སྤྲིན་དང་ཁུ་རླུང་དབྱིངས་སུ་དག༔ དབྱར་མ་དགུན་གྱི་སྟོན་སེར་དུ༔ ཉི་མ་ཤར་དང་རྒས་པའི་ཟེར༔ ཆོས་ཉིད་མིག་གིས་དེ་དུས་བསྒོམ༔ དབེན་པའི་གནས་སུ་གནས་ལུགས་ཐོབ༔ སྟོང་དབྱིངས་ཀ་དག་གཏན་ལ་ཕོབ༔ སྟོང་མདངས་འོད་ལྔའི་རིག་རྩལ་རྫོགས༔ ལས་རླུང་དབྱིངས་སུ་འགྱུ་བ་ཟད༔ བར་དོ་ལྔ་ལ་འོད་གསལ་མཐོང༔ ཞི་གནས་སྒྲོག་གི་ཐེག་པ་བཅད༔ ལྷག་མཐོང་ང་རོའི་མདུང་རྩེ་བསྙིལ༔ ཡིད་དཔྱོད་ལྟ་བའི་དགྲ་བོ་ཆོམ༔ མངོན་སུམ་ཆོས་ཉིད་གཏན་ལ་ཕོབ༔ སྣང་སེམས་དྲི་མེད་གཡའ་དང་བྲལ༔ གསལ་ལ་སྟོང་པ་སྐལ་བ་ཆེ༔ གསུངས༔

ཡང་ལྷ་ལྕམ་གྱིས་ཞུས་པ༔ ཨོ་རྒྱན་ཆེན་པོ་ལགས༔ བཀའ་རྫོགས་པ་ཆེན་པོ་ཉམས་སུ་ལེན་ན༔ རིག་པ་ཐེར་ལ་སྟོན་པའི་བླ་མ་ཅི་འདྲ་བ་ཞིག་བསྟེན་ན་ལེགས་ཞུས་པས༔ ཨོ་རྒྱན་གྱིས་གསུངས་ནས༔ ༔ ༈ ལྷ་ལྕམ་རིགས་བཟང་པདྨ་ལྕམ༔ མཚན་ལྡན་བུ་མོ་བདག་ལ་ཉོན༔ ཐེག་མཆོག་རྫོགས་པ་ཆེན་པོ་བསྒོམ་པ་ན༔ འབྲལ་མེད་བླ་མ་བསྟེན་ན་ལེགས༔ བོགས་འདོན་གེགས་སེལ་དུས་སུ་གཅེས༔ དེ་ན་བླ་མའི་མཚན་ཉིད་ནི༔ རྒྱུད་པའི་བྱིན་རླབས་ཐུགས་རྗེ་ཆེ༔ ལྷ་དང་ཞལ་མཇལ་དངོས་གྲུབ་རྙེད༔ མཁའ་འགྲོས་ལུང་བསྟན་བྱིན་རླབས་ལྡན༔ སྨིན་བྱེད་དབང་གི་དོན་ལ་མཁས༔ གྲོལ་བྱེད་ཁྲིད་ཀྱི་ལག་ལེན་གསལ༔ ཐོས་པས་མཁྱེན་པའི་ཡོན་ཏན་རྫོགས༔ རྟོགས་པས་ཐེ་ཚོམ་བློ་དང་བྲལ༔ ཆོས་མཐུན་བུ་ནི་ཐབས་ཀྱིས་སྐྱོང༔ སྟོང་ཉིད་སྙིང་རྗེ་ཟུང་དུ་འབྲེལ༔ ཆགས་སེམས་ཆུང་ལ་ཐེག་བློ་མཐོ༔ མཚན་ཉིད་དེ་དང་ལྡན་པ་གང༔ བཅུད་ཆེན་བླ་མ་དེ་དང་འགྲོག༔ རྩོལ་མེད་ལྷུན་གྲུབ་ཉམས་མྱོང་སྐྱེ༔ རིག་པ་རྡོ་རྗེ་ལུ་གུ་རྒྱུད༔ ཆོས་དབྱིངས་སྒྲོན་མའི་དབྱིངས་སུ་འཕེལ༔ རྫོགས་ཆེན་ལྟ་བའི་དོན་དང་ལྡན༔ གསུངས༔ ༔

༈ ཡང་ལྷ་ལྕམ་གྱིས་ཞུས་པ༔ ཨོ་རྒྱན་ཆེན་པོ་ལགས༔ བཀའ་རྫོགས་པ་ཆེན་པོ་ཉམས་སུ་ལེན་པ་ན༔ གྲོགས་མཚན་ཉིད་དང་ལྡན་པ་ཅི་ལྟ་བུ་ཞིག་བརྟེན་ན་ལེགས་ཞུས་པས༔ ཨོ་རྒྱན་གྱིས་གསུངས་ནས༔ ༔ ༈ མཚན་ལྡན་བུ་མོ་པདྨ་ལྕམ༔ དད་ལྡན་མ་ཁྱོད་ཚུར་ཉོན་དང༔ གྲོགས་ཀྱི་མཚན་ཉིད་འདི་ལྟར་ལགས༔ དད་པ་སྡུག་བསྲན་སྙིང་རྗེ་ཆེ༔ དམ་ཚིག་གཙང་ཞིང་བློ་སྣ་ཐོང༔ མོས་གུས་ལྡན་ལ་གསང་སྒོ་ཐུབ༔ ཚེ་འདིར་སྣང་ཤས་ཞེན་པ་ཆུང༔ རྣམ་སྨིན་ལས་འཛེམ་མིག་བཞིན་དུ༔ སྒྲུབ་བློ་བརྟེན་ཅིང་དམན་ས་འཛིན༔ དགེ་སྡིག་ལས་ནི་འཛེམ་པ་དང༔ བློ་ཆེ་ཁོག་ཡངས་ངང་རྒྱུད་རིང༔ སྐབས་ཀྱི་རྟེན་འབྲེལ་མཁས་པ་དང༔ ཐེག་པའི་བྱེ་བྲག་ཕྱེད་པ་དང༔ ཉམས་རྟོགས་མཚང་གི་འཇུག་པ་དང༔ འགྲོ་བའི་དོན་ལ་སྨོན་པ་དང༔ ཚིག་རྩོད་ཐ་སྙད་ཕྱིར་མི་འབྲང༔ བྱ་བ་བྱེད་པ་བློ་སྣ་ཉུང༔ ཁྱད་སོད་ཐེ་ཚོམ་མི་བྱེད་ཅིང༔ ངོས་དགས་སྣང་བ་ཆུང་བ་དང༔ རིགས་གཅིག་ལ་ནི་འདུན་པ་དང༔ གཡེང་བ་ཆེ་ལ་མི་དགའ་ཞིང༔ དབེན་པའི་གནས་ལ་བརྟེན་པ་དང༔ ཁྲོ་གཏུམ་ང་རྒྱལ་ཆུང་བ་དང༔ གྲོགས་པོ་དེ་འདྲར་བརྟེན་པ་ན༔ ཡོན་ཏན་མ་ལུས་འབྱུང་བའི་ཞིང༔ འབྲལ་མེད་གཏན་དུ་འགྲོགས་ནས་ཀྱང༔ ཡོན་ཏན་བདེ་བའི་དོན་ལ་འཚོ༔ བསམ་གཏན་བླ་མ་གཉིས་པ་ཡིན༔ གསུངས༔ ༔

༈ ཡང་ལྷ་ལྕམ་གྱིས་ཞུས་པ༔ ཨོ་རྒྱན་ཆེན་པོ་ལགས༔ བཀའ་རྫོགས་པ་ཆེན་པོ་ཉམས་སུ་ལེན་ན༔ སྤྱོད་ལམ་གྱི་རྣལ་འབྱོར་ཇི་ལྟར་བྱས་ན་ལེགས་ཞུས་པས༔ ཨོ་རྒྱན་གྱིས་གསུངས་ནས༔ ༈ ༔ རིགས་ལྡན་བུ་མོ་པདྨ་ལྕམ༔ དད་ལྡན་མ་ཁྱོད་བདག་ལ་ཉོན༔ རྫོགས་པ་ཆེན་པོ་སྒོམ་པ་ནི༔ སྤྱོད་ལམ་ཆེན་པོ་འདི་འདྲ་ཡིན༔ རང་ལུས་རྩ་ཡི་དཀྱིལ་འཁོར་འདིར༔ ཐིག་ལེ་འོད་ཀྱི་ཞིང་ཁམས་སུ༔ ལྷུན་གྲུབ་མཁའ་འགྲོ་ཡབ་ཡུམ་བསྒོམ༔ ཀླད་པ་དུང་ཁང་འཁྱིལ་བ་ན༔ ཁྲོ་བོ་ཁྲག་འཐུང་ལྔ་བཅུ་བརྒྱད༔ ཆེ་མཆོག་ཡབ་ཡུམ་གཉིས་ལ་འདུད༔ བདུད་རྩི་ཚོགས་ཀྱིས་མཉེས་པར་བྱ༔ ཙིཏྟ་སྙིང་གི་གཞལ་ཡས་ན༔ ཞི་ཡིས་སངས་རྒྱས་སུམ་ཅུ་དྲུག༔ རྩ་འཁོར་དྲུག་གི་ཐིག་ལེ་ན༔ འགྲོ་འདུལ་སྤྲུལ་པའི་རྣལ་འབྱོར་དྲུག༔ འཚོ་བ་ཟས་ཀྱིས་མཉེས་པར་བྱ༔ ལྟ་སྟངས་གསུམ་དང་ལྡན་པ་ནི༔ ནམ་མཁའ་རྐྱེན་བྲལ་དྭངས་པ་ལ༔ རང་མདངས་སྟོང་གསལ་མདངས་ལྔ་ནི༔ གཅིག་ཆོད་ཆེན་པོ་ཐིག་ལེའི་སྐུ༔ རིག་པ་ལུ་གུ་རྒྱུད་ཅན་བསྒོམ༔ ཆོས་ཉིད་མངོན་སུམ་གཏན་ལ་ཕོབ༔ ཐུན་བཞི་ཉམས་ཀྱི་རྣལ་འབྱོར་ནི༔ ཚོགས་འཁོར་བཞིའི་ལོངས་སྤྱོད་བྱ༔ ལྷ་དང་ཆོས་ཉིད་ཟུང་འཇུག་ལ༔ སྔགས་ཀྱི་རང་བཞིན་ཏིང་འཛིན་བསྒོམ༔ སྤྱོད་ལམ་བཞི་ཡི་རྣལ་འབྱོར་གྱི༔ སྣང་བ་སེམས་གཉིས་ཐ་མི་དད༔ གཞི་ཡི་ངོ་བོ་གཏན་ལ་ཕེབ༔ སྣང་བ་བཞི་ཡི་མཐར་ཚད་ཀྱིས༔ ཟད་པ་མེད་པ་དབྱིངས་སུ་སྐྱོལ༔ མ་འགགས་རིག་པའི་ཤར་སྒོ་ལ༔ བཟོ་མེད་གནས་ལུགས་ངང་དུ་བཞུགས༔ དུག་གསུམ་རྟོག་པ་དབྱིངས་ནས་བསྲེ༔ བཟོ་མེད་ངང་དུ་ལྷོད་ཀྱིས་གློད༔ ཏི་ལ་ཉག་གཅིག་སེམས་ཉིད་འདི༔ གློ་བུར་མ་ཡིན་གདོད་ནས་གྲུབ༔ བཅོས་མ་མ་ཡིན་རང་བྱུང་ཤར༔ སྟོང་ལ་སྟོང་མདངས་རང་བཞིན་གསལ༔ ས་ལེ་སང་ངེ་རྙོགས་པ་མེད༔ སྣང་བ་གཞི་ཡི་ངོ་བོ་གཅིག༔ རྐྱེན་གྱིས་མ་གོས་རྒྱུ་མི་གཡོ༔ འདི་དོན་རིག་པས་གདན་ས་ཟིན༔ སྤྱོད་དང་ལྟ་བ་ཟུང་དུ་འབྲེལ༔ རྫོགས་པ་ཆེན་པོ་ལམ་དུ་གྱུར༔ གསུངས༔ ༔

༈ ཡང་ལྷ་ལྕམ་གྱིས་ཞུས་པ༔ ཨོ་རྒྱན་ཆེན་པོ་ལགས༔ བཀའ་རྫོགས་པ་ཆེན་པོ་ཉམས་སུ་ལེན་ན༔ བོགས་ཐོན་པའི་ཐབས་ཅི་འདྲ་ཞིག་བྱེད་ན་ལེགས་ཞུས་པས༔ ཨོ་རྒྱན་གྱིས་གསུངས་ནས༔ ༈ ༔ ལྷ་ལྕམ་རིགས་ལྡན་བུ་མོ་ཉོན༔ རིགས་ལྡན་རྫོགས་ཆེན་བསྒོམ་པ་ན༔ རྩ་ཐིག་རླུང་གི་རྣལ་འབྱོར་བསྒོམ༔ བསྐྲོད་པ་ཐབས་ཀྱིས་ཁྱེར་བ་ཡིན༔ ཟབ་མོའི་སྤྱོད་ཡུལ་འདི་ལྟར་ཡིན༔ སྤྲུལ་པ་རྩ་ཡི་ལྷ་མོ་ལ༔ ལོངས་སྤྱོད་ཐིག་ལེ་སྒྲིམ་བཟློག་གིས༔ ཆོས་སྐུ་རླུང་ཟད་དབྱིངས་སུ་སྐྱིལ༔ སྐུ་གསུམ་དབྱེར་མེད་བདེ་བ་ཆེ༔ ཟག་པ་མེད་པའི་ཡེ་ཤེས་ཀྱིས༔ ཀ་དག་སྟོང་ཁམས་དབྱིངས་དང་འདྲེས༔ ངོ་བོ་བདེ་ཆེན་འཁྱིལ་བར་རོལ༔ གཞན་ཡང་གཞོན་ནུ་མཛེས་པའི་ལུས༔ བཅུ་དྲུག་རྩ་ལྔ་ལས་མི་བརྒལ༔ བདེ་བའི་ལུས་ལ་མདངས་ཤ་ཅན༔ བདེ་བའི་སྐད་འབྱིན་བདེ་བ་གཡོ༔ དཀར་རྩི་དམར་ལྗང་དྭངས་པའི་མདངས༔ དད་པ་ཤེས་རབ་སྙིང་རྗེ་ཆེ༔ གསང་སྒོ་ཐུབ་ཅིང་བློ་སྒོ་ཡངས༔ ཐེ་ཚོམ་མི་བྱ་སྤྱོད་ལམ་དལ༔ བདག་ཏུ་མ་བཟུང་མཚན་ལྡན་དེས༔ སྒྲུབ་པའི་གྲོགས་སུ་བརྟེན་བྱས་ནས༔ རྩ་ཡི་འཁྲུལ་འཁོར་རྣམ་པ་ལྔ༔ ཟག་པ་རྒྱུ་ཡི་འཛིན་སྒོ་སྤྱད༔ ཐིག་ལེ་གཉིས་ཀྱི་ཕན་འཇུག་ལ༔ འདོད་ཆགས་སྡུག་བསྔལ་བདེ་བ་བསྡུས༔ རླུང་གི་འདྲེན་ཁུག་རྣམས་གསུམ་གྱིས༔ མ་དག་སེམས་ཀྱི་འགྱུ་བ་བཅད༔ ཡེ་ཤེས་སྐུ་ལྔ་བདེ་དྲོད་འབར༔ ཆོས་རྣམས་ཐམས་ཅད་བཅུད་དོན་བསྡུས༔ བདེ་ཆེན་ངོ་བོ་གཏན་ལ་ཕོབ༔ སྒྲུབ་པ་ཕལ་རྣམས་ཟིལ་གྱིས་གནོན༔ ལྷ་དང་སྔགས་རྣམས་ཤུགས་ཀྱིས་རྫོགས༔ འབྱུང་བ་ལྔ་ལ་ཐོགས་མེད་འགྱུ༔ སྤྱན་དང་མངོན་ཤེས་རོལ་པའི་རྩལ༔ སྣང་རིག་གཉིས་པོ་འོད་གསལ་འཁྱིལ༔ གཅིག་ཆོད་ཆེན་པོ་གཏན་ཚད་ཕེབས༔ རྩ་ཐིག་རླུང་གསུམ་འཁྲུལ་འཁོར་འདི༔ སྒྲོན་མ་གཞི་དང་ཉམས་ལེན་བསྲེ༔ བོགས་འདོན་ཐབས་ཀྱི་ཡང་རྩེ་ཡིན༔ གསུངས༔ ༔

༈ ཡང་ལྷ་ལྕམ་གྱིས་ཞུས་པ༔ ཨོ་རྒྱན་ཆེན་པོ་ལགས༔ བཀའ་རྫོགས་པ་ཆེན་པོ་འདི་ཉམས་ལེན་མཐའ་རུ་ཕྱིན་ན༔ རྟགས་དང་ཚད་རྣམས་ཇི་ལྟར་འབྱུང་བ་ལགས་པ་ཞུས་པས༔ ཨོ་རྒྱན་གྱིས་གསུངས་ནས༔ ༈ ༔ ལྷ་ལྕམ་བུ་མོ་རིགས་བཟང་མ༔ བདེ་བའི་སྐད་འབྱིན་མ་ཁྱོད་ཉོན༔ བཀའ་ཆེན་རྫོགས་པ་ཆེན་པོ་འདི༔ སྐལ་ལྡན་བུ་ཡིས་ཉམས་ལེན་འཚལ༔ ངོ་བོ་བརྟན་པ་ཐོབ་པའི་རྟགས༔ འོད་གསལ་བདེ་བའི་ཉིན་ཞག་འདྲེས༔ རང་བཞིན་དབྱིངས་སུ་ཆུད་པའི་རྟགས༔ རིག་སྟོང་འགྱུར་མེད་རྟེན་ས་ཟིན༔ སྐལ་ལྡན་བུ་ཡིས་ ཉམས་ལེན་ཚེ༔ སྣང་སྲིད་སྒྱུ་མའི་གྲོགས་སུ་གོ༔ སྒྲོན་མ་བཞི་པོ་ཀློང་འགྱུ་ན༔ ལྷུན་གྲུབ་ཞིང་ཁམས་གཏན་ལ་ཕེབས༔ སྣང་སེམས་ཟུང་དུ་ཚུད་པ་ན༔ རྒྱུ་རྐྱེན་རྟེན་འབྲེལ་ཀུན་ལ་མཁས༔ ཆོས་ཉིད་མངོན་སུམ་རྫོགས་པ་ན༔ གོང་འཕེལ་སྣོད་དུ་ཕྱིན་པ་ཡིན༔ རིག་པ་ཚད་ལ་ཕེབས་ཙམ་ན༔ ཆོས་ཉིད་ཟད་པའི་བདེ་བ་ཐོབ༔ སྣང་ཚད་བཞི་པོ་ཀློང་གྱུར་ན༔ བར་དོ་ལྔ་ཡི་རང་མཚང་བསྟན༔ ཞིང་ཁམས་སྐུ་དང་འོད་ཟེར་ཐོབ༔ རྡུལ་བྲལ་ཕྱི་ཡི་ནམ་མཁའ་འདི༔ སྲོག་རླུང་དབུ་མའི་བུམ་པར་ཟད༔ ལས་རླུང་འགྱུ་བྱེད་ལྔ་པོ་འདི༔ རང་དག་ཙིཏྟའི་དབྱིངས་སུ་གྲོལ༔ འཇིག་རྟེན་འབྱུང་བ་ལྔ་དང་བཅས༔ ཤ་ཁྲག་དབུགས་ཀྱི་འོད་ཟེར་རྙེད༔ འཁོར་ལོ་རྩ་ཡི་ས་བོན་མཐོང༔ འོད་གསལ་མ་བུ་ནུས་པ་མཉམ༔ ཕུང་པོ་ཟག་མེད་འོད་ཕུང་ཞུ༔ དུས་གསུམ་ལས་ནི་མ་འགགས་མཁྱེན༔ སྤྲུལ་པ་མཐའ་ཡས་སྣང་ཚུལ་སྟོན༔ ཆོས་རྣམས་ཐེག་པ་རིམ་གྱིས་དབྱེ༔ འགག་མེད་ཀློང་གིས་ཉམས་སྤྱོད་ལྡན༔ གསལ་སྟོང་ཆོས་ཉིད་ལས་མི་འདའ༔ ཡུངས་འབྲུ་ཙམ་ནས་སྐུ་ལྔར་ཡང༔ སོ་སོར་གསལ་ཞིང་སྣང་གཉིས་ཟད༔ བདེ་བ་ཆེ་དང་བདེ་ཉམས་འགྱུར༔ ཉམས་ལེན་རྟགས་ཚད་དོན་གྱིས་ཤེས༔ གསུངས༔

༈ ཡང་ལྷ་ལྕམ་གྱིས་ཞུས་པ༔ ཨོ་རྒྱན་ཆེན་པོ་ལགས༔ བཀའ་རྫོགས་པ་ཆེན་པོ་འདི་ཡང་ཉམས་སུ་བླང་བའི་བུ་ལ༔ དབུགས་གྲོལ་བ་དང་བར་དོའི་དག་ཚུལ་ཅི་ལྟ་བུ་ཞིག་འོང་བ་ལགས་ཞུས་པས༔ ཨོ་རྒྱན་གྱིས་གསུངས་ནས༔ ༔ ༈ ལྷ་ལྕམ་རིགས་ལྡན་བུ་མོ་ཉོན༔ བདག་འདྲས་བཤད་ཀྱིས་གོའམ་ཉོན༔ དབྱིངས་རིག་ཀློང་དུ་མ་གྱུར་ན༔ ཐམས་ཅད་སྐྱེ་ཤི་འགྱུར་བ་ཡིན༔ རྫོགས་ཆེན་སྐལ་བ་སུ་ལྡན་དེ༔ ཚེ་འདིའི་དབུགས་དེ་གྲོལ་བའི་ཚེ༔ ཧྲིལ་གྱིས་འདུས་པ་ཕྱི་ཡི་དབུགས༔ ཐིབས་ཀྱིས་འགག་པ་དམ་པོའི་སྒོ༔ རྒྱངས་ཀྱིས་འཕྲོ་བ་ནང་གི་རླུང༔ ལམ་གྱིས་མཐོང་བ་སྣང་བའི་ཡུལ༔ ཧད་ཀྱིས་སྣང་བ་སྲོག་གི་སེམས༔ ཧྲིག་གེར་རིག་པ་འོད་གསལ་བུ༔ ལྷང་གིས་ཤར་བ་རིག་པའི་མདངས༔ ལྷན་གྱིས་ཞི་བ་སྟོང་དབྱིངས་ལ༔ སིང་ངེ་འཛིན་མེད་དོན་གྱི་རྩལ༔ ས་ལེར་མཁྱེན་པ་སྤྱོད་པའི་ཤུགས༔ ལྷང་ངེར་གནས་པ་བསྒོམ་པའི་བོགས༔ མི་གཡོ་བརྟེན་པ་ལྟ་བའི་གདིང༔ ཀུན་ལས་འདས་པ་ཆོས་སྐུའི་འགྲོས༔ སྟོང་ཁམས་བདེ་བ་ལོངས་སྐུའི་གཤིས༔ ཅིར་ཡང་སྤྲུལ་པ་གཞན་སྣང་ཡུལ༔ ཟབ་མོའི་དོན་ལ་བརྗོད་པ་མེད༔ བཀའ་ཆེན་རྫོགས་པ་ཆེན་པོ་འདི༔ མཆོག་གསང་ཐེག་པའི་རྒྱལ་པོ་ཡིན༔ བློ་དམན་རྣམས་ཀྱི་སྤྱོད་ཡུལ་མིན༔ སྐལ་བ་ཆེ་དང་བཅུད་མཚུངས་ཏེ༔ རྒྱལ་བ་ཀུན་གྱི་ཐུགས་བཅུད་ཡིན༔ ཕལ་པ་རྣམས་དང་འདི་མི་འདྲ༔ མཐོང་ཐོས་དྲན་རེག་བདེ་བ་ཆེ༔ ཐ་མ་ལ་ཡང་བར་དོ་དག༔ འབྲིང་ལ་བར་དོ་ཆོས་ཉིད་སྟོན༔ རབ་ལ་བར་དོ་ཡེ་མ་གྲུབ༔ མཐོང་དང་གྲོལ་བ་དུས་མཉམ་ཡིན༔ གསུངས༔

༈ ༔ ཡང་ལྷ་ལྕམ་གྱིས་ཞུས་པ༔ ཨོ་རྒྱན་ཆེན་པོ་ལགས༔ བཀའ་རྫོགས་པ་ཆེན་པོ་འདི་ཉམས་ལེན་གྱི་མཐར་ཐུགས་ཡིན་ཀྱང༔ སྒོམ་མ་ཤེས་ན་གེགས་འབྱུང་ངམ་མི་འབྱུང༔ དབང་པོ་ལ་རབ་འབྲིང་ཡོད་དམ་མེད༔ སྣང་བ་སེམས་ཀྱི་མཚན་ཉིད་གཅིག་གམ་མི་གཅིག༔ དངོས་གྲུབ་རིང་ཐུང་ཡོད་དམ་མེད་ལགས་ཞུས་པས༔ ཨོ་རྒྱན་གྱིས་གསུངས་ནས༔ ༔ ༈ སྔགས་ཀྱི་སྣོད་ལྡན་ལྷ་ལྕམ་ཁྱོད༔ པདྨས་བཤད་དོ་ཡེངས་མེད་ཉོན༔ རྫོགས་པ་ཆེན་པོ་ཐེག་པའི་མཆོག༔ འདི་དང་གདམས་ངག་འདྲེས་པ་ན༔ ཉམས་ལེན་གཞུང་དང་མཐུན་པ་ཡིན༔ རྫོགས་པ་ཆེན་པོའི་མཚན་འདི་འཛིན་ཡིན༔ ལུས་ནི་མི་འགུལ་ལྟ་སྟངས་འཛིན༔ མི་སྨྲེ་ངག་གིས་བརྗོད་པ་མེད༔ འདོད་པའི་སེམས་ཀྱིས་བྱར་མེད་འཛིན༔ མི་འཛིན་རླུང་ནི་རང་སོར་སར་གནས༔ དབྱིངས་རིག་ཐད་ཉེར་ལ་བརྟེན་བཏོན་ནས་བསྒོམ༔ ཉམས་ལེན་འདི་དང་སུ་མཐུན་པ༔ དེ་ལ་གེགས་ཀྱི་བརྗོད་པ་མེད༔ འདི་ཉིད་མཐོང་བས་དོན་ཡོད་ཅེས༔ དབང་པོའི་བྱེ་བྲག་ཅིར་ཡང་རུང༔ འོན་ཀྱང་དབུགས་གྲོལ་ཟག་མེད་འགྱུར༔ སྣང་བ་སེམས་ཉིད་ཐ་མི་དད༔ སེམས་ཉིད་གློ་བུར་བཟུང་བའི་རྐྱེན༔ དེ་ཡང་རང་རྩལ་སྣང་བའི་ཡུལ༔ གློ་བུར་སེམས་དག་སྣང་བ་དག༔ ཡེ་ཤེས་བྱ་བ་སྟོང་པའི་མདངས༔ དེ་ཉིད་བརྟན་པ་སངས་རྒྱས་ཡིན༔ འོན་ཀྱང་སྣང་བའི་ཡུལ་དང་བསྟུན༔ ཐབས་ཀྱིས་འདུལ་བ་ཐུགས་རྗེ་ཆེ༔ དབྱིངས་རིག་ཟུང་དུ་ཉམས་ལེན་པས༔ སྐལ་བ་ཅན་དེ་སུ་ཡིན་པ༔ དེ་ལ་དངོས་གྲུབ་རིང་ཐུང་མེད༔ དམ་ཚིག་མོས་པ་གང་ཡིན་ན༔ དངོས་གྲུབ་གཏེར་གྱི་བུམ་པ་ཡོད༔ ལྷག་པར་རྫོགས་ཆེན་སུས་བསྒོམ་པ༔ དངོས་གྲུབ་གཉིས་ཀྱི་བདག་ཏུ་འགྱུར༔ མདོར་ན་རྫོགས་ཆེན་ཡང་བཅུད་འདི༔ ཆོས་རྣམས་ཀུན་གྱི་དབང་པོ་སྟེ༔ རྒྱས་པར་བསྟན་ན་བྱེ་བྲག་ཆེ༔ ཉུང་བར་བསྡུས་ན་ཉམས་ལེན་བདེ༔ ཚིག་ཉུང་དོན་ཆེ་གོ་བར་སླ༔ འདི་མཐོང་གཞན་ལ་ཡེང་མ་ཤོར༔ ལྷ་ལྕམ་ཁྱོད་ཀྱི་ཉམས་ལེན་ཆོས༔ དད་པ་བརྩོན་འགྲུས་མ་བྱེད་པར༔ ཟག་མེད་བདེ་བ་ཆེན་པོ་བསྒོམ༔ གསུངས༔ ལྷ་ལྕམ་ནི་དེ་མ་ཐག་ཏུ་ཡིད་དཔྱོད་ཀྱི་ལྟ་བ་དང་བྲལ་ཏེ༔ བླུན་སྒོམ་གྱི་མུན་པ་ལས་སངས་སོ༔ ངེས་ཤེས་རྫོགས་པ་ཆེན་པོ་ལ་ཐོབ་སྟེ༔ ཟག་པ་མེད་པའི་ས་ཟིན༔ སྐྱེ་འཆི་མེད་པ་ཚེའི་དངོས་གྲུབ་བརྙེས་སོ༔ ལྷ་ལྕམ་གྱིས་ཨོ་རྒྱན་ལ་གདམས་པ་གླུའི་ཚིགས་སུ་བཅད་པ་ཞུས་པའི་ལེའུ་སྟེ་གསུམ་པའོ༔ ས་མ་ཡ༔ རྒྱ་རྒྱ་རྒྱ༔ ༔

 

༈ དེ་ནས་ཡང་འཆིང་ཕུའི་དགེ་གོང་གི་ཕུག་པ་རུ་ཨོ་རྒྱན་ཆེན་པོ་ལ༔ ལྷ་ལྕམ་གྱིས་བཀའ་རྫོགས་པ་ཆེན་པོ་མཐའ་དག་ཞུས༔ གཡའ་མ་བྲག་ཏུ་བྱམས་མགོན་ཐུགས་རྗེ་ཆེན་པོའི་སྐོར་མཐའ་དག་མ་ལུས་པ་ཞུས༔ མཁའ་འགྲོ་བདེ་བའི་དུར་ཁྲོད་དུ་མཁའ་འགྲོ་རྒྱ་མཚོའི་ཆོས་སྐོར་མ་ལུས་པ་ཞུས༔ གསང་བ་ཡེ་ཤེས་ཀྱི་བྲག་ཕུག་ཏུ༔ ཞི་ཁྲོ་བདེ་ཆེན་འདུས་པའི་ཆོས་སྐོར་མཐའ་དག་མ་ལུས་པར་ཞུས༔ བློན་པོ་མགུལ་གྱི་རྫ་ཁྲོད་དུ༔ བསྟན་པ་སྤྱིའི་ལུང་བསྟན༔ གང་ཟག་དགོས་ཀྱི་ལུང་བསྟན༔ ཐེག་པ་བྱེ་བྲག་གི་སྐོར་མདོ་དང་བཅས་པ་མཐའ་དག་ཞུས༔ བསམ་ཡས་དབུ་རྩེའི་ཁྲུས་ཁང་གླིང་དུ་འདུལ་བ་བླ་མ་དང༔ འདུལ་བ་འོད་ལྡན་དང༔ འདུལ་བ་ལུང་ཡོད་པར་བསྟན་པ་དང༔ འདུལ་བ་བཞི་བརྒྱ་པར་བསྟན་པ་དང༔ དེ་དག་ལ་སོགས་ཏེ་ཉན་ཐོས་ཀྱི་ཆོས་མཐའ་དག་ཞུས༔ འཇམ་དཔལ་གླིང་ཏུ་རྟེན་འབྲེལ་བཅུ་གཉིས་ཀྱི་ཆོས་རྣམས་མཐའ་དག་ལ་སོགས་པ་རང་རྒྱལ་གྱི་ཆོས་མཐའ་དག་ཞུས༔ བྱམས་པའི་གླིང་དུ་སངས་རྒྱས་ཕལ་པོ་ཆེའི་འབུམ་དང༔ དཀོན་མཆོག་བརྩེགས་པའི་འབུམ་དང༔ མྱ་ངན་འདས་པའི་འབུམ་དང༔ ལང་ཀར་གཤེགས་པའི་འབུམ་དང༔ སྟོང་ཕྲག་བརྒྱ་པའི་འབུམ་དང༔ དེ་དག་ལ་སོགས་པའི་བྱང་ཆུབ་སེམས་དཔའི་ཆོས་མཐའ་དག་མ་ལུས་པ་ཞུས༔ བསམ་གཏན་གླིང་དུ༔ སུ་སི་ཏི་ཀ་རའི་རྒྱུད་དང༔ དཔུང་བཟང་གི་རྒྱུད་དང༔ རིག་པ་མཆོག་གི་རྒྱུད་དང༔ དཔུང་བཟང་རོལ་པའི་རྒྱུད་དང༔ ཕྱག་ན་རྡོ་རྗེ་དབང་བསྐུར་གྱི་རྒྱུད་ལ་སོགས༔ ཀྲྀ་ཡའི་ཆོས་མཐའ་དག་མ་ལུས་པ་ཞུས༔ དབུ་རྩེའི་བར་ཁང་ཆེན་མོར༔ རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་དང༔ ཉི་མ་གཟི་བརྗིད་ཀྱི་རྒྱུད་དང༔ རིག་འཛིན་སྡེ་སྣོད་ཀྱི་རྒྱུད་དང༔ ཁམས་གསུམ་རྣམ་པར་རྒྱལ་བའི་རྒྱུད་ལ་སོགས་པ་ཨུ་པ་ཡའི་ཆོས་མཐའ་དག་ཞུས༔ དབུ་རྩེའི་རྩང་ཁང་དུ༔ དེ་བཞིན་གཤེགས་པ་འདུས་པ་ཆེན་པོའི་རྒྱུད་སང་ཀྲི་ཏ་དང༔ དེ་བཞིན་གཤེགས་པ་གཟི་བརྗིད་ཀྱི་རྒྱུད་དང༔ ངན་སོང་སྦྱོང་བའི་རྒྱུད་དང༔ དཔལ་མཆོག་དང་པོ་པ་ར་མི་ཏའི་རྒྱུད་དང༔ འཁོར་ལོ་རྣམ་པར་རྒྱལ་བའི་རྒྱུད་ལ་སོགས་པ་ཡོ་གའི་ཆོས་མཐའ་དག་ཞུས༔ དབུ་རྩེ་ཇོ་བོའི་དྲུང་དུ༔ སྐུའི་སྦྱོར་བ་སངས་རྒྱས་མཉམ་སྦྱོར་དང༔ གསུང་གི་སྦྱོར་བ་ཟླ་གསང་ཐིག་ལེ་དང༔ ཐུགས་ཀྱི་སྦྱོར་བ་གསང་བ་འདུས་པ་དང༔ སྒྱུ་འཕྲུལ་དྲྭ་བ་དང༔ སྒྱུ་འཕྲུལ་ལྷ་མོ་དང༔ གཙུག་ལག་རྡོ་རྗེ་གདན་བཞི་དང༔ བསྐལ་པ་མེ་ལྟར་འབར་བའི་རྒྱུད་དང༔ ཁྲོ་བོ་པུན་དྷ་ཀ་རི་ཀའི་རྒྱུད་དང༔ རིན་ཆེན་མ་གོལ་བའི་རྒྱུད་དང༔ རྟ་མཆོག་རོལ་པའི་རྒྱུད་དང༔ ལྷ་མོ་མ་གོལ་བའི་རྒྱུད་དང༔ ཧེ་རུ་ཀ་འདུས་པའི་རྒྱུད་དང༔ ཡ་མ་རཱ་ཙའི་རྒྱུད་དང༔ སྲིད་པའི་རྒྱུད་ལུང་དང༔ བམ་པོ་བརྒྱད་པ་ལ་སོགས་པའི་མ་ཧཱ་ཡོ་ཀའི་ཆོས་མཐའ་དག་ཞུས༔ ཧ་སྤུ་རིའི་རྩེ་ལ༔ སྒྱུ་འཕྲུལ་གསང་བའི་སྙིང་པོ་དང༔ སྒྱུ་འཕྲུལ་ལེའུ་ལ་སོགས་དང༔ ཐབས་ཀྱི་ཞགས་པ་པདྨའི་ཕྲེང་བ་ལ་སོགས་ཨ་ནུ་ཡོ་ཀའི་ཆོས་མཐའ་དག་ཞུས༔ བྱང་ཆུབ་སྨོན་རིང་གི་རྩེ་མོ་ན༔ ལྟ་བ་ནམ་མཁའ་ཆེ་དང༔ བྱང་ཆུབ་སེམས་དཔའི་བསྒོམ་དང༔ རིག་པ་ཁུ་བྱུག་དང༔ བདེ་བ་ཆེན་པོའི་དོན་སྟོན་པ་དང༔ ཡུལ་ཀུན་ལ་འཇུག་པ་དང༔ དེ་དག་ལ་སོགས་པའི་ཨ་ཏི་ཡོ་ཀའི་ཆོས་མཐའ་དག་མ་ལུས་པ་ཞུས༔ ཐེག་པ་རིམ་དགུ་ཆུང་ངུ་ཡན་གྱི་ཆོས་རྣམས་མོས་པ་སྣང་ངོ་ཙམ་དུ༔ བསམ་ཡས་ཀྱི་སྐོར་ལ་རྫོགས་པར་ཞུས༔ འཆིང་ཕུ་དགེ་གོང་གི་སྐོར་ལ༔ ཡང་གསང་བླ་ན་མེད་པའི་ཆོས་ཐེག་པ་ཆེན་པོའི་དོན་ཐམས་ཅད་མ་ལུས་པར་ཞུས༔ ཁྱད་པར་དུ་བླ་མ་རང་གི་ཆོས་སྐོར་ནོར་བུ་ཆེན་པོའི་མཛོད་དང༔ ཡི་དམ་གྱི་ཆོས་སྐོར་ཡེ་ཤེས་འོད་ཁྱད་པར་མཆོག་གི་མཛོད་དང༔ མཁའ་འགྲོའི་ཆོས་སྐོར་གསང་དབང་བདེ་བ་ཆེན་པོའི་མཛོད༔ གཞན་ཡང་རིག་འཛིན་གྱི་སྒྲུབ་སྐོར་མང་དུ་བཅས་ཏེ༔ འཆིང་ཕུ་རྫའི་དུར་ཁྲོད་དུ་ཞུས༔ གཏིང་སྒྲོམ་ཏི་སྒྲོ་བྲག་དཀར་ལ་སོགས་ཏེ༔ ཙ་རི་གཡའ་གོང་གི་ཁྲོད༔ ཤ་འུབ་སྟག་སྒོ་དང༔ ཁུང་ཐང་གངས་ར་དང༔ སྟག་ཚང་སེངྒེའི་རྫོང་དང༔ ཡངས་ལེན་ཤོད་དང༔ དགའ་བ་ཚལ་དང༔ བསིལ་བའི་ཚལ་དང༔ བྷེ་ཏ་རྫ་ཕུག་དང༔ པདྨ་སྟེང་ཕུག་ལ་སོགས་གནས་ན་གནས་ཕྲན་རྣམས་ལ༔ ཐེག་པ་ཆེན་པོའི་གདམས་པ་མན་ངག་དང་བཅས་པ་ཡིད་ཚིམ་པར་ཞུས༔ ༔ ཨོ་རྒྱན་ཉིད་ཀྱི་སྤྲུལ་པས་གང་དུ་ཁྱབ་པ་དེར༔ ལྷ་ལྕམ་བདག་ཀྱང་ཞུ་བ་པོའི་འཁོར་དུ་ཁྱབ་པར་བྱས༔ ཨོ་རྒྱན་ཆེན་པོ་པདྨས་གང་གསུངས་པ་དེ་ཉིད༔ ལྷ་ལྕམ་བདག་གིས་ཁོང་དུ་ཆུད་པར་བླངས༔ ཐེག་པ་སོ་སོའི་ཆེ་བ་དང་སྤྱིར་ལྡན་ཡང༔ དབྱིངས་རིག་གི་ངེས་ཤེས་རྫོགས་པ་ཆེན་པོ་ལ་ཐོབ་ནས༔ སྣང་སེམས་ཆོས་ཉིད་ཀྱི་སྐུ་རུ་འཕྲད་དོ༔ དུས་གསུམ་མཁྱེན་པའི་མངའ་བདག༔ ཨོ་རྒྱན་གྱི་མཁན་པོ་པདྨ་འབྱུང་གནས་དེ་ཉིད་ཀྱིས་ཐེག་པ་རིམ་དགུའི་ཆོས་ཐམས་ཅད་རྫོགས་པར་གནང་ནས༔ གནས་ལུགས་ཀྱི་རང་མཚང་གཏན་ལ་ཕེབས་ནས༔ འོད་གསལ་མ་བུ་འཕྲད་པར་གྱུར༔ ལྷ་ལྕམ་གྱིས་ཨོ་རྒྱན་གྱི་དྲུང་དུ༔ ཐེག་པ་རིམ་པ་དགུའི་རྒྱུད་ལུང་ཞུས་པའི་ལེའུ་སྟེ་བཞི་པའོ༔ ས་མ་ཡ༔ རྒྱ་རྒྱ་རྒྱ༔ ༔

 

༈ དེ་ནས་འཆིང་ཕུའི་དགེ་གོང་གསང་བའི་ཕུག་ཏུ༔ ནུབ་གཅིག་ཚོགས་ཀྱི་འཁོར་ལོ་བསྐོར་བའི་གྲལ་ལ་ལྷ་ལྕམ་བདག་དང༔ བསམ་ཡས་རྒྱལ་པོའི་ལྷ་ལྕམ་ཁྲོམ་པ་རྒྱན་དང༔ པདྨ་གསལ་དང༔ ནུས་འབྱིན་གསལ་ལེ་དང༔ ལེགས་སྨིན་བཟང་མོ་དང༔ ཨོ་རྒྱན་ཉིད་ཀྱི་ཇོ་མོ་ཤེལ་དཀར་བཟའ་རྡོ་རྗེ་མཚོ་དང༔ ཅོག་རོ་མཆོག་གནས་མ་དང༔ འབྲོམ་ཟ་ཏི་པང་མ་དང༔ ཅོག་རོ་རི་ནེ་བཙུན་དང༔ རི་ནེ་གསལ་ལེ་འོད་དང༔ རུ་ཡུང་ཟ་མ་གདིང་མ་དང༔ གཞན་ཡང་མཚན་ཉིད་དང་ལྡན་པའི་བུ་མོ་མང་དུ་འདུས་ནས༔ གསེར་གྱི་མཎྜལ་བདུན་ལ་གཡུའི་ཚོམ་བུ་བཀོད་ནས༔ ཨོ་རྒྱན་གྱི་ཕྱག་ཏུ་ཕུལ་ནས་མགྲིན་གཅིག་ཏུ་ཞུས་ནས༔ ཨོ་རྒྱན་ཆེན་པོ་ལགས༔ བདག་འདྲའི་བུད་མེད་རྣམས༔ སྐྱེ་བ་དམན་ལ་རང་མཐོང་ཆེ་རྒྱུད་ངན་ཅིང༔ ཤེས་རབ་ཆུང་བ་ལགས་པས༔ ཚིག་ཉུང་ལ་དོན་ཆེ་བ༔ མྱུར་དུ་སངས་རྒྱ་བའི་གདམས་ངག་གཅིག་ཐུགས་རྗེས་འཛིན་པར་ཞུ་ཞུས་པས༔ ཨོ་རྒྱན་གྱིས་གསུངས་ནས༔ དད་ལྡན་དགེ་སེམས་མ་རྣམས་ཉོན༔ མྱུར་དུ་སངས་རྒྱས་པ་ལ༔ གསང་སྔགས་རྡོ་རྗེ་ཐེག་པ་ཆེན་པོའི་སྒོར་ཞུགས་ནས༔ དམ་ཚིག་ལ་ཉམས་ཆག་མེད་པ༔ དབྱིངས་རིག་གི་དོན་ལ་བརྟན་པ་བཟུང་ནས༔ ཟག་མེད་ཀྱི་ལུས་ཐོབ་ནས༔ སྟོང་གསལ་འོད་ལྔའི་དབྱིངས་སུ་སངས་རྒྱས་པར་འགྱུར་རོ༔ གསུངས་ནས༔ རྫོགས་པ་ཆེན་པོ་ཀློང་གསལ་སྤྱོད་དེ་བཀོད་པ་ཆེན་མོ་ཞེ་བྱ་བའི་དལ་ཉི་ཤུ་རྩ་ལྔ་ཞལ་ཕྱེས་ནས༔ དབང་བསྐུར་དོན་ཁྲིད་དུ་བསྟན་ནས་ཉམས་སུ་བླངས་ནས༔ ཟླ་རེ་རེ་ནས་ལྷུན་གྲུབ་ཀྱི་ཞིང་ཁམས་ལྔ་ལྔ་གཟིགས་ནས༔ སྐྱེ་དམན་གྱི་གྲུབ་པ་ཐོབ་པ་ཉི་ཤུ་རྩ་ལྔ་བྱུང༔ སངས་རྒྱས་བན་དྷེ་ཡེ་ཤེས་དང༔ གནུབས་ནམ་མཁའི་སྙིང་པོ་དང༔ ངན་ལམ་རྒྱལ་བ་མཆོག་དང༔ ཨ་ཙར་ཡེ་ཤེས་དཔལ་སྦྱོང་དང༔ བཱེ་རོ་ཙ་ན་དང༔ དཀའ་བ་དཔལ་བརྩེགས་དང༔ ཅོག་རོ་ཀླུའི་རྒྱལ་མཚན་དང༔ མུ་ཏིག་བཙད་པོ་དང༔ མཆོག་གྲུབ་རྩལ་དང༔ སྤྲོལ་འུ་ཆུང་ལ་སོགས་ཏེ༔ སྐྱེ་རྒྱལ་གྱི་གྲུབ་པ་ཐོབ་པ་བརྒྱད་ཅུ་རྩ་གཅིག་བྱུང༔ ཁྱད་པར་ལྷ་ལྕམ་གྱིས་ཉམས་སུ་བླངས་ནས༔ ཞག་བདུན་སོང་བའི་ནུབ་མོར་སྒྲུབ་ཁང་གི་མདུན་དུ༔ ཁྲོ་བོ་སྐུ་མདོག་སྔོན་པོ༔ ཕྱག་ན་གྲི་གུག་དང་ཐོད་ཁྲག་བསྣམས་པ༔ གཟུགས་མཁར་དང་མཉམ་པ་གཅིག་བྱུང་ནས༔ ལྷ་ལྕམ་ཁྱོད་ནི་རང་དོན་ཀློང་དུ་གྱུར་པ་གཅིག་འདུག་པས༔ གཞན་དོན་བྱེད་ནུས་སམ་གསུངས་ནས༔ ལྷ་ལྕམ་གྱིས་ཞུས་པ༔ གཞན་གྱི་དོན་བྱེད་ནུས༔ ཞིང་ཁམས་གང་དུ་འདུལ༔ ལུང་བསྟན་ཏུ་གསོལ་ཞུས་པས༔ ཁྲོ་བོ་དེའི་ཞལ་ནས༔ ལྷ་ལྕམ་ཁྱོད་ཀྱིས་གཞན་གྱི་དོན་བྱེད་ནུས་ན༔ དམྱལ་བའི་ཁམས་སུ་སོང་ལ༔ སྔོན་གྱི་དུས་ནས༔ ལྷ་ལྕམ་ཁྱོད་ཀྱིས་བྱང་ཆུབ་སྒྲུབ་པ་ལ༔ བར་དུ་གཅོད་པར་བྱེད་པའི་སྡིག་བློན་ཤ་ཏ་ཞེས་བྱ་བ་ཡོད་དེ༔ དེ་ནི་དམྱལ་བའི་ཁམས་མནར་མེད་པ་ཞེས་བྱ་བ་ན༔ ལས་ཀྱི་དབང་གིས་སྡུག་བསྔལ་བར་ཡོད་པས༔ དེ་ལ་ལྷ་ལྕམ་ཁྱོད་ཀྱིས་བསྐྱབས་ནས༔ སྡུག་བསྔལ་ལས་སྐྱོབ་པ་ཡོད་པས༔ འདི་ནས་སོང་ཞིག་གསུངས་ནས༔ བུག་པ་ནང་སྟོང་ངེ་བ་ཞིག་གི་ནང་ནས༔ སྐས་དཀར་པོ་གཅིག་བཙུགས་འདུག་པས༔ དེ་ལ་སྡིགས་མཛུབ་གཏད་ནས་བྱུང༔ དེ་ནས་ལྷ་ལྕམ་གྱིས་བུག་པའི་ནང་གི་སྐས་ལ་མར་མར་འཛེགས་ནས་ཕྱིན་པས༔ ལྕགས་ཀྱི་རི་བོ་གཅིག་གི་ཞོལ་ནས༔ འདྲེ་དམག་སྟོང་ཕྲག་མང་པོ་ཚོགས་ཏེ་འདུག༔ དེ་རྣམས་ཀྱི་ཁྲོད་ནས་མི་མང་པོའི་སྐེ་ལ་གསོར་འཕེན་ཅིང༔ རྐང་པ་ལ་ལྕགས་ཀྱི་འཛེར་མ་མང་པོ་བརྒྱབ་ནས༔ མགོ་ལ་ཐོ་ལོག་གིས་གཟེར་ནས༔ ཁྱེད་རྣམས་ཀྱིས་བྱས་པ་ཡོད་པས༔ ད་རུང་གནག་གཅོད་དོ་ཟེར༔ མི་དེ་རྣམས་ནི་ཆོ་ངེས་རིང་རིང་འདེབས་སོ༔

ལྷ་ལྕམ་གྱིས་འདྲེ་དམག་རྣམས་ལ་སྨྲས་པ༔ མི་འདི་རྣམས་ཀྱིས་ཅི་བྱས་པ་ཡིན༔ འདི་ན་སྡིག་བློན་ཤ་ཏ་ཞེས་བྱ་བ་ཡོད་དམ་བྱས་པས༔ འདྲེ་དེ་རྣམས་ཀྱི་ནང་ནས་གཟུགས་ཐུང་ཞིང་སྟོད་སྒུར་བ༔ མི་དམར་བ་གཅིག་བྱུང་ནས༔ མི་འདི་རྣམས་ཀྱིས་མི་ལུས་ཐོབ་པའི་དུས་སུ༔ སེམས་ཅན་རེ་རེ་ཙམ་ལུག་རེ་ཙམ་བསད་པའི་རྣམ་པར་སྨིན་པ་ཡིན༔ སྡིག་བློན་ཤ་ཏ་ཞེས་བྱ་བ་འདི་ན་མེད༔ འདིའི་འོག་ཏུ་ངུ་འབོད་ཅེས་བྱ་བ་ཡོད༔ དེ་ནས་འོག་དེར་སོང་ཞིག་ཟེར༔ ལྷ་ལྕམ་གྱིས་མར་མར་ཕྱིན་ནས༔ རི་བོ་ཆེན་པོ་མདོག་དམར་བ་གསུམ་གྱི་སྟེང་ན༔ ཟངས་མོ་ཆེ་རྫིང་བུ་དང་མཉམ་པའི་ཆུས་མེར་གྱིས་ཁེངས་པ༔ འོག་ནས་མེ་འབར་བ༔ ཆུ་བོ་རྦ་འཚུབ་ཏུ་ལོང་ལོང་ཁོལ་བའི་ནང་ན་མི་མང་པོའི་ལུས་ལ་ཆུ་བུར་རམ་རམ་མཚེད་དོ༔ དེ་རྣམས་ཀྱང་ངེད་ཅག་ཅི་ཙུག་བྱེད་ཟེར་ནས༔ ཆོ་ངེ་རིང་རིང་སྐད་ཆེན་པོ་འདོན་ནོ༔ དེ་རྣམས་ལ་འདྲེ་དམག་སྟོང་ཕྲག་སྟོང་ཚོ་ཙམ་གྱིས་བསྐོར་ནས༔ ལག་ཏུ་ལྕགས་ཀྱི་སྤུ་གྲི་ཐོགས་ནས༔ ཟངས་ནང་གི་མི་རྣམས་ཀྱི་མགོ་བོ་གཅོད་ཟེར་ཞིང་ཁྱེད་རྣམས་ངུས་ཀྱང་མི་ཕན༔ རང་གིས་བྱས་པའི་ལས་ཡིན་པས་ཞེ་རེ་ཚིམ༔ ད་རུང་རྒྱོབ་ཅིག་ཟེར་རོ༔

ལྷ་ལྕམ་གྱིས་འདྲེ་དམག་རྣམས་ལ་སྨྲས་པ༔ མི་འདི་རྣམས་ཀྱིས་ཅི་བྱས་པ་ཡིན༔ འདི་རྣམས་ཀྱིས་ནང་ན་སྡིག་བློན་ཤ་ཏ་ཞེས་བྱ་བ་ཡོད་དམ་བྱས་པས༔ འདྲེ་དེ་རྣམས་ཀྱི་དཔོན་གླང་གི་མགོ་བོ་ཡོད་པ༔ ཁྲམ་ཤིང་གི་ཨོག་མཁར་བཙུགས་པ་གཅིག་བྱུང་ནས༔ མི་འདི་རྣམས་ཀྱིས་མི་ལུས་བླངས་པའི་དུས་སུ༔ དགེ་འདུན་གྱི་ནོར་རྫས་ཟ་ཞིང་སེམས་ཅན་ཐམས་ཅད་རྡུང་ཞིང་བཙོག་པ་དང༔ ངན་སེམས་ཀྱིས་ཁྲག་ཕྱུང་བའི་རྣམ་པར་སྨིན་པ་ཡིན༔ འདི་ན་སྡིག་བློན་ཤ་ཏ་ཞེས་བྱ་བ་མེད༔ འདིའི་འོག་རོལ་ན་མེ་མ་མུར་ཞེས་བྱ་བ་ཡོད་དེ༔

༈ ༔ དེ་ན་ཡང་སོང་དང་ཟེར་ནས༔ ལྷ་ལྕམ་གྱིས་མར་མར་ཕྱིན་པ་ནས༔ ལྕགས་ཕྱེ་དམར་པོའི་ཐང་ཚ་ངར་ལྡན་པ་གཅིག་གི་དཀྱིལ་ན་མི་མང་པོས་རྔོས་ཤིང་དཀྲུག་པ༔ ལུས་རྒྱ་གྲམ་དུ་ཚག་ཚག་གས་པ་དང༔ ཡན་ལག་གཞོབ་ཏུ་ཐུལ་ཐུལ་ཚིག་པ་དང༔ ཀེང་རུས་རྣམས་སོལ་བར་ནག་རོག་རོག་འགྲོ་བར་འདུག༔ ཨ་ཙ་མ་ངེད་ཚོ་རེ་སྡུག་ན་ཟེར་ཞིང་ཆོ་ངེ་རིང་རིང་བར་འདུག་གོ༔ ཐ་མ་ལ་འདྲེ་དམག་སྟོང་ཕྲག་ཙམ་གྱིས་བསྐོར་ནས༔ ཁྱོད་རང་གིས་ཉོས་པའི་ལས་ཡིན་པས་ཁུར་ཅིག་ཟེར་ནས༔ སྤུ་གྲི་ངར་མས་ལུས་ཀྱི་ལྤགས་པ་ཟིལ་ཟིལ་བཤུས་པར་འདུག༔ ལྷ་ལྕམ་གྱིས་འདྲེ་དམག་རྣམས་ལ་སྨྲས་པས༔ མི་འདི་རྣམས་ཀྱིས་ཅི་བྱས་པ་ཡིན༔ འདི་ན་སྡིག་བློན་ཤ་ཏ་ཞེས་བྱ་བ་ཡོད་དམ་བྱས་པ་ལ༔ འདྲེ་དམག་རྣམས་ཀྱི་ནང་ནས་གཟུགས་བཟང་བ༔ མདོག་ནག་པ་སྟག་གི་མགོ་བོ་ཅན་ཡོད་པ་གཅིག་གིས་མདུང་རྩེ་གསུམ་པ་ཐོགས་ཏེ་བྱུང་ནས༔ འདི་རྣམས་ཀྱིས་མི་ལུས་ཐོབ་པའི་དུས་སུ་སེམས་ཅན་ལོག་ལྟ་དང་ལྡན་ཞིང་སྐུའི་དམ་ཚིག་ཉམས་པའི་རྣམ་པར་སྨིན་པ་ཡིན་པས༔ འདི་ན་སྡིག་བློན་ཤ་ཏ་ཞེས་བྱ་བ་མེད༔ འདིའི་འོག་ན་མནར་མེད་པའི་གནས་ཞེས་བྱ་བ་ཡོད༔ དེ་ན་ཡོད་ཁྱོད་རང་སོང་དང་ཟེར་བས༔ དེ་ནས་ལྷ་ལྕམ་གྱིས་མར་མར་ཕྱིན་ནས༔ ས་གཞི་ཐམས་ཅད་མེ་འབར་བ༔ དེའི་དབུས་ན་ལྕགས་ཀྱི་ཁང་པ་སྒོ་མེད་པ༔ ཚ་ངར་དང་ལྡན་པ་གཅིག་འདུག༔ དེའི་ནང་ན་རེ་སྡུག་ན་ཟེར་ནས་ཀུ་ཅོ་རིང་རིང་འདེབས་སོ༔ ཁང་པ་དེའི་མཐའ་ལ་འདྲེ་དམག་འབུམ་ཕྲག་མང་པོས་བསྐོར་ནས༔ མི་མང་པོ་ཁྲིད་ཅིང་གྲོད་པ་ལ་མདུང་རྩེ་གསུམ་པ་བསོར་ཞིང་རྡེག༔ མགོ་ལ་ཐོ་བས་གཟེར་ཞིང་རྡུང༔ ལུས་ཐིག་བཏབ་ཅིང་གྲས༔ མིག་ཐུར་མས་འབྲུ་ཞིང་ཁྲག་འཐུང་ཞིང་འོག་ནས་མེ་འབུད༔ སྟེང་ནས་ལྕགས་ཁུ་ཁོལ་མ་བླུག༔ རལ་གྲི་དང་གསོར་འཕེན་ཞིང་ཡན་ལག་རྣམས་ཕྱོགས་བཅུར་འཐེན་ནོ༔ ལྕགས་ཀྱི་ཁང་པ་དེའི་ཕྱོགས་བཞི་ལ་བུག་པ་འདོམ་གང་བ་ཙམ་བཏོན་ནས༔ དེའི་ནང་ནས་མི་རེ་རེ་ཚུར་འཐེན་ནས་ལུས་དུམ་བུར་གཏུབས་ཏེ༔ ཤ་ཁྲག་ཉི་ཁྲི་བྱེད༔ རྐང་མཐིལ་ནས་ལྤགས་པ་བཤུས་ཤིང༔ དེའི་ཤུལ་ཏུ་གནམ་ལྕགས་དམར་པོས་གསུར་ཏེ༔ རྐང་གི་ལྷ་བ་རྣམས་འདོན་ཞིང་འཐུང་བ་དང༔ ལུས་ཀྱི་ཡན་ལག་རེ་རེའི་སྟེང་དུ་ལྕགས་ཀྱི་འཛེར་འགོ་བརྒྱ་བརྒྱ་གདབས་ནས་རྡུང་ངོ༔ མི་དེ་རྣམས་ནི་འདི་འདྲ་བའི་ལས་འོང་བ་རེད་ཟེར་ནས་ཆོ་ངེ་རིང་རིང་འདོན་ནོ༔ འདྲེ་དམག་དེ་རྣམས་ལག་ན་མདུང་རྩེ་གསུམ་པ་རྩེ་དགུ་པ་ཐོགས་ནས་ལུས་ཀྱི་རྒྱབ་མདུན་ལ་བཙུགས་ཤིང་ཞེ་རེ་ཚིམ༔ ད་རུང་རྒྱོབ་ཅིག་ཟེར་རོ༔

ལྷ་ལྕམ་གྱིས་འདྲེ་དམག་རྣམས་ལ་སྨྲས་པ༔ མི་འདི་རྣམས་ཀྱིས་ཅི་བྱས་པ་ཡིན༔ འདི་ན་སྡིག་བློན་ཤ་ཏ་ཞེས་བྱ་བ་ཡོད་དམ་བྱས་པས༔ འདྲེ་དེ་རྣམས་ཀྱིས་ནང་ནས་སེངྒེའི་གདོང་པ་ཅན༔ ལག་ཏུ་མདུང་གསོར་ཐོགས་པ་གཅིག་བྱུང་ནས༔ མི་འདི་རྣམས་ཀྱིས་མི་ལུས་ཐོབ་པའི་དུས་སུ༔ དཀོན་མཆོག་གསུམ་དང༔ གནས་ལུགས་རྟོགས་པའི་རྣལ་འབྱོར་པ་ལ༔ ལོག་པར་ལྟ་ཞིང་དགེ་བ་ལ་བར་དུ་གཅོད་པའི་རྣམ་པར་སྨིན་པ་ཡིན༔ འདི་ན་སྡིག་བློན་ཤ་ཏ་ཞེས་བྱ་བ་ཨེ་འདུག་བལྟའོ་ཟེར་ནས༔ ལྕགས་ཀྱི་ཁང་པའི་ནང་དུ་སོང༔ དེ་ནས་འདྲེ་དེ་ཚུར་ལོག་ནས་བྱུང་སྟེ༔ སྡིག་བློན་ཤ་ཏ་ཞེས་བྱ་བ་འདི་ན་འདུག༔ ཁྱེད་ཀྱིས་ཅི་བྱེད་ཟེར་ནས༔ ལྷ་ལྕམ་གྱིས་སྨྲས་པས༔ ཁོ་སྡིག་བློན་མི་ལུས་ཐོབ་པའི་དུས་སུ༔ སྡིག་པའི་ལས་ཚན་ཆེ་བས༔ སྙིང་རྗེས་མ་བཟོད་པ་ཡིན༔ དེའི་སྡུག་བསྔལ་བསྐལ་པ་དེ་བདག་གིས་ཁུར༔ སྡིག་བློན་བདེ་བའི་གནས་སུ་འདྲེན་དུ་འོང་བ་ཡིན༔ ཁྱོད་ཀྱིས་སྡིག་བློན་ཤ་ཏ་ཐོན་ལ་དེའི་ཚབ་ཏུ་བདག་བཞུགས་སོ༔ གྲོས་གྱིས་ཤིག་བྱས་པས༔ འདྲེ་དེས་ན་རེ༔ ངེད་ལ་དེ་འདྲའི་དབང་མེད༔ རྒྱལ་པོའི་དྲུང་དུ་ཞུ་བ་ལ་འགྲོ་དགོས་ཟེར༔ དེ་ནས་ལྷ་ལྕམ་གྱིས་འདྲེ་དེ་ཁྲིད་ནས༔ ལས་ཀྱི་རྒྱལ་པོ་ཡིན་ཟེར་བ་གཅིག་གི་རྩར་ཕྱིན་པས༔ རྒྱལ་པོ་དེ་ནི་མདོག་ནག་ཅིང་གཟུགས་ཆེ་བ༔ གླང་གི་མགོ་བོ་ཅན༔ ཁྲམ་ཤིང་དང་མདུང་རྩེ་གསུམ་ཐོགས་པ༔ མིག་འབྲུ་ཚུགས་སུ་ཧ་རེ་ལྟ་བ་གཅིག་འདུག༔

རྒྱལ་པོ་དེས་ན་རེ༔ ལྷ་ལྕམ་ཁྱོད་འདི་རུ་ཅི་བྱེད་པ་ཡིན༔ ངན་སོང་གི་གནས་ན་སྡུག་བསྔལ་འབའ་ཞིག་ཡོད་པ་ལ༔ བག་ཆགས་ངན་པ་བྱུང་བ་ཡིན་ཟེར༔ ལྷ་ལྕམ་གྱིས་ལན་བཏབ་པ༔ རྒྱལ་པོ་ཆེན་པོ་ཁྱོད་ཉོན་དང༔ བསྐལ་པའི་བར་དུ་སྡིག་པའི་ལས་འབའ་ཞིག་བྱས་པའི་སྡིག་བློན་ཤ་ཏ་ཞེས་བྱ་བ་གཅིག་མིའི་ཡུལ་ནས་དམྱལ་བའི་ཁམས་སུ་སོང་ཟེར་བ་ཐོས་པས༔ དེའི་སྡུག་བསྔལ་གྱི་སྐལ་བ་དེ་བདག་གིས་ཁུར་ནས་སྡིག་བློན་དེ་བདེ་བའི་གནས་སུ་འདྲེན་དུ་འོངས་པ་ཡིན་པས༔ ཤ་ཏ་མི་ཡུལ་དུ་ཅི་ནས་ཀྱང་གཏོང་བར་ཞུ་ཞུས་པས༔ རྒྱལ་པོ་དེས་ན་རེ༔ ཁྱོད་དེ་སྐད་ཟེར་བ་དེ་ལེགས་ཏེ༔ ཁོ་རང་གིས་བསགས་པའི་ལས་ཡིན་པས༔ ཕན་པ་བྱས་ཚད་གནོད་པར་འགྱུར་གྱིས་འདུག༔ ངེད་ལ་གནོད་པའི་སེམས་མེད་དེ༔ ཁྱེད་ཀྱིས་སྡུག་བསྔལ་ཁུར་བས་སྡིག་ཅན་ཁོ་ལ་གནོད་དུ་འགྲོ༔ དེ་བས་ཞི་ཁྲོ་ན་རཀ་དོང་སྤྲུགས་ཤེས་ན་ཕན་སྟོབས་ཆེ་ཟེར༔ དེ་ནས་ལྷ་ལྕམ་གྱིས་ཏིང་ངེ་འཛིན་ཟས་སུ་གསོལ་ཞིང་བཞུགས་ནས༔ ལྕགས་ཀྱི་ཁང་པ་དེའི་སྒོ་དྲུང་དུ༔ ཞི་ཁྲོའི་དཀྱིལ་འཁོར་བརྒྱ་དང་བཞི་བཅུ་བཞེངས་པས༔ ལྕགས་ཀྱི་ཁང་པ་ཚལ་བར་ཞིག༔ ཚ་བ་དང་ལྡན་པའི་མེ་དང་མཚོན་ཆ་རྣམས་ཀྱང་དངོས་མེད་དུ་བརླགས༔ ཐམས་ཅད་བསིལ་དྲོད་དུ་བསྙམས་ཤིང་ལུས་ངག་ཡིད་གསུམ་བདེ་བ་དང་ལྡན་པར་གྱུར༔ ལས་ཀྱི་འདྲེ་དམག་རྣམས་ཀྱང་ཞི་བའི་འཛུམ་སྟོན་ཅིང༔ ཕན་པའི་གྲོགས་བྱེད་དེ༔ སྡིག་བློན་ཤ་ཏ་ལ་སོགས་དམྱལ་བའི་ཁམས་ཀྱི་མི་འབུམ་ཕྲག་ཁྲི་ཚོ་བཅུ་གཅིག༔ བཅོམ་ལྡན་འདས་ཞི་ཁྲོ་རབ་འབྱམས་སྐྱབས་སུ་སོང་ནས་བདེ་བའི་ཞིང་ཁམས་སུ་བཀོད་དོ༔ དམྱལ་བའི་དཔོན་གྱི་རྒྱལ་པོ་དེས་ཀྱང༔ ལྷ་ལྕམ་ལ་ཕྱག་བྱས་ཏེ་འདི་སྐད་ཟེར༔ ༈ ༔ ཁྱོད་ནི་རྒྱལ་བ་ཀུན་ལས་ཀྱང༔ ཐུགས་རྗེ་ཆེ་བའི་སེམས་མ་ཁྱོད༔ མི་ཡི་ཡུལ་དུ་བསྡད་པའི་ཚེ༔

༈ ཞི་ཁྲོ་རབ་འབྱམས་ཀྱི་དཀྱིལ་འཁོར་མང་དུ་ཞལ་ཕྱེས་ཤིག་ཟེར་ནས༔ དེ་ནས་ལྷ་ལྕམ་གྱིས་སྨོན་ལམ་དང༔ ཐུགས་བསྐྱེད་ཆེན་པོ་བསྐྱེད་ནས༔ ཡར་ཡར་བྱོན་པས་འཆིང་ཕུའི་སྒྲིབ་ཁང་སྒོ་དྲུང་དུ་ཆགས་ཕེབས་པའི་ཚེ༔ སྔོན་དུ་ལུང་བསྟན་པའི་ཁྲོ་བོ་དེ་ཡང་སྒོ་དྲུང་དུ་གྲོང་ངེ་བཞུགས་ནས༔ ཁྲོ་བོ་དེས་གསུངས་ནས༔ ལྷ་ལྕམ་ཁྱོད་ཀྱིས་སྡིག་བློན་ཤ་ཏ་དམྱལ་བའི་ཁམས་ནས་ཐོན་ནམ་གསུངས༔ ལྷ་ལྕམ་གྱིས་ཞུས་པ༔ སྡིག་བློན་ཤ་ཏ་ལ་སོགས་ཏེ༔ དམྱལ་བའི་མི་མང་པོ་བདེ་བ་ལ་བཀོད་ནས་ཡོད་ཞུས་པས༔ ཁྲོ་བོ་ཆེན་པོ་དེའི་གསུང་ནས༔ ཁྱོད་ནི་རྟོགས་པ་ཀློང་དུ་གྱུར་ནས༔ ཆོས་ཉིད་མཁའ་ལ་རིག་པ་ཡེ་ཤེས་ཤུགས་ཀྱིས་འགྲོ༔ ཐུགས་རྗེས་འགྲོ་བ་སྣ་ཚོགས་འཚོ་ཞིང༔ སྡུག་བསྔལ་ཀུན་ལས་རྒྱལ་བར་གྱུར་པ་ཡིན་པས༔ བདག་ཉིད་ཧེ་རུ་ཀ་ལ་སོགས་ཏེ༔ ཞི་ཁྲོ་རྒྱལ་བ་ཀུན་ལས་ཐུགས་རྗེའི་དཔུང་ཆེ་བ་ཡིན་པས༔ མཚན་ཡང་མཁའ་འགྲོ་ཡེ་ཤེས་མཚོ་རྒྱལ་ཞེས་སུ་གསོལ་གསུངས་ནས༔ ཁྲོ་བོ་དེ་ཉིད་མི་དམིགས་པར་མཚོ་རྒྱལ་གྱི་ཐུགས་ཀར་ཐིམས་སོ༔

༈ ༔ ཨོ་རྒྱན་ཆེན་པོས་ཀྱང་མཚོ་རྒྱལ་ལ་བསྟོད་པ་མཛད་པ༔ ༈ ༔ མཚན་ཉིད་ལྡན་པའི་མཁའ་འགྲོ་ཁྱོད༔ རྒྱལ་བ་ཀུན་རྣམས་བསྐྱེད་པའི་ཡུམ༔ བདེ་གཤེགས་ཀུན་གྱི་དཔུང་ཆེ་བའི༔ འགྲོ་དྲུག་ཀུན་གྱི་བྱམས་མགོན་ཡུམ༔ བདག་འདྲ་པདྨའི་ཡོན་ཏན་ཡང༔ ང་ལ་མ་བྱུང་ཁྱེད་ལ་བྱུང༔ ཁྱེད་ནི་ཡོན་ཏན་ཀུན་འབྱུང་མ༔ བདེ་བར་སྟེར་རོ་དངོས་གྲུབ་མཛོད༔ ལྷུན་གྲུབ་ཚེ་ཡི་རིག་འཛིན་རྙེད༔ ཚེ་གཅིག་འདི་ལ་ཟག་མེད་རྫོགས༔ འཁོར་བ་དོང་ནས་མ་སྤྲུགས་པར༔ སྤྲུལ་པའི་ཞིང་ཁམས་རྒྱུན་མི་ཆད༔ མཛད་པའི་ཐུགས་རྗེས་ཅིར་ཡང་སྤྲུལ༔ ཀུན་བཟང་མ་ཡི་རིགས་མཆོག་ཁྱོད༔ བདེ་ཆེན་ལྷུན་གྲུབ་འཁྱིལ་བ་མོ༔ མཚུངས་མེད་མཁའ་འགྲོ་ཁྱོད་ལ་བསྟོད༔ ཅེས་བསྟོད་དོ༔ ལྷ་ལྕམ་གྱིས་དམྱལ་བའི་ཁམས་ནས་འགྲོ་བ་བཏོན་པའི་ལེའུ་སྟེ་ལྔ་པའོ༔ ས་མ་ཡ༔ རྒྱ་རྒྱ་རྒྱ༔

 

༈ ༔ དེ་ནས་མཚོ་རྒྱལ་ལ༔ ཨོ་རྒྱན་ཆེན་པོས་ལུང་བསྟན་པས༔ མཁའ་འགྲོ་ཡེ་ཤེས་མཚོ་རྒྱལ་ཁྱོད༔ རང་སྣང་ཙམ་དུ་ཚེ་གཅིག་འདི་ལ༔ དཔལ་ཀུན་ཏུ་བཟང་མོ་དང་གོ་འཕང་མཉམ་ནས༔ གཞན་སྣང་གང་ལ་གང་འདུལ་དུ་སྤྲུལ་པ་ཅི་སྙེད་ཅིག་མཛད་ནས༔ ཁྱོད་ཀྱི་སྤྲུལ་པ་བསམ་གྱིས་མི་ཁྱབ་པ་གཅིག་འབྱུང༔ འཛམ་གླིང་བྱེ་བ་ཕྲག་བརྒྱ་ན༔ སེམས་ཅན་རེ་རེའི་མདུན་དུ་སྤྲུལ་པ་རེ་རེར་སྤྲུལ་ནས༔ གང་ལ་གང་འདུལ་དུ་སྟོན་ཅིང༔ འབྲེལ་ཚད་ཆོས་ཉིད་ཟད་པའི་ས་ལ་འགོད་པར་འགྱུར༔ མདོར་ན་འཁོར་བ་དོང་ནས་སྤྲུགས་མ་ཐུབ་ཀྱི་བར་དུ༔ ཁྱེད་ཀྱི་སྤྲུལ་པ་འཛད་པ་མེད་དོ༔ ཁྱད་པར་དུ་ཐུབ་པའི་བསྟན་ཞབས་སྙིགས་མ་ལྔ་བདོ་བའི་དུས་སུ༔ ཁྱོད་ཀྱི་སྐུའི་སྤྲུལ་པ་རིགས་ལྔ་རྟག་ཏུ་མངའ་གསོལ་ནས༔ འབྲེལ་ཚད་དོན་དང་ལྡན་པ་གཅིག༔ གངས་ཅན་བོད་ཀྱི་དབུས་སུ་འབྱུང༔ གསུང་གི་སྤྲུལ་པ་བླ་མ་མཁའ་འགྲོ་མངའ་གསོལ་བས༔ འབྲེལ་ཚད་དོན་དང་ལྡན་པ་གཅིག༔ ནུབ་ཕྱོགས་རྩང་གི་དབུས་སུ་འབྱུང༔ ཐུགས་ཀྱི་སྤྲུལ་པ་དཀོན་མཆོག་གསུམ་གྱི་མངའ་གསོལ་བས༔ འབྲེལ་ཚད་མཁའ་སྤྱོད་དུ་ཁྲིད་པ་གཅིག༔ ཤར་ཕྱོགས་ཀོང་པོའི་ཡུལ་དུ་བྱོན༔ ཁྱོད་ཀྱི་ཡོན་ཏན་གྱི་སྤྲུལ་པ་མཐོང་བ་དོན་ཡོད་མ༔ དཔའ་བོ་རིགས་ལྔས་མངའ་གསོལ་བའི་ངང་རྒྱུད་ཅན་གཅིག༔ ལྷོ་ནུབ་ཀྱི་མཚམས་སུ་འབྱུང༔ ཁྱོད་ཀྱི་འཕྲིན་ལས་ཀྱི་སྤྲུལ་པ་དོན་ཡོད་མ༔ དཀོན་མཆོག་གསུམ་གྱི་མངའ་གསོལ་བས༔ ངང་ཚུལ་མཛེས་འོད་མཚན་དང་དཔེ་བྱད་ལྡན་མ་གཅིག༔ བྱང་ཕྱོགས་ཁ་བའི་ཡུལ་ཞེས་བྱ་བ་ན་འབྱུང༔ མཚོ་རྒྱལ་ཁྱོད་ཀྱིས་ཞུས་པའི་གདམས་པ་ཟབ་ཆོས་རྣམས༔ དཀར་ཆག་ཏུ་བཏབ་ནས་གཏེར་དུ་སྦས་ནས་སྨོན་ལམ་བཏབ་ལ༔ ཁྱོད་ཀྱི་སྤྲུལ་པ་རྣམས་དང་དུས་མཚུངས་ནས་སེམས་ཅན་གྱི་དོན་བྱེད་པར་འགྱུར་རོ༔ བདག་འདྲ་པདྨ་འབྱུང་གནས་ཀྱི་སྤྲུལ་པ་ཡང་མང་དུ་འབྱུང༔ གསང་སྔགས་ཐེག་པ་ཆེན་པོའི་ཆོས་རྣམས་ཀྱང་དར་ཆ་ཡུད་ཙམ་འབྱུང༔ ཉམས་ལེན་ལ་མོས་པ་ཡང་ཡུད་ཙམ་འབྱུང༔ ལར་ཡང་བོད་འབངས་འདི་ལ་ཁྱོད་ཀྱི་དྲིན་ཡོད་དོ༔ སྐལ་ལྡན་མིན་པ་ལོག་ལྟ་ཅན་རྣམས་ཀྱིས་མི་གོ༔ ཁྱོད་ཀྱིས་པདྨ་ངའི་བཀའ་ལ་མངོན་ལྐོག་མེད་པར་ཟབ་ཆོས་ཀྱི་གདམས་པ་ཐམས་ཅད་ཉམས་སུ་བླངས་པས༔ ཚེ་འདིར་ཟག་པའི་སྒྲིབ་པ་ཟད་ནས༔ ཟག་མེད་ཚེའི་དངོས་གྲུབ་བརྙེས་པས༔ མི་ལོ་དྲུག་ཅུའི་བར་དུ་གཞོན་ནུའི་ལུས་དང་ལྡན་ནས༔ སྤྲུལ་པའི་གཟུགས་སུ་ཞིང་ཁམས་དེར་བཞུགས༔ དེ་ནས་ཟག་མེད་བདེ་བ་ཆེན་པོའི་དབྱིངས་སུ་འབྱུང༔ ལྷ་ལྕམ་གྱི་ལུང་བསྟན་ཐོབ་པའི་ལེའུ་སྟེ་དྲུག་པའོ༔ ས་ཡ་ཡ༔ རྒྱ་རྒྱ་རྒྱ༔

 

༈ ༔ དེ་ནས་མཚོ་རྒྱལ་ལ༔ ཨོ་རྒྱན་གྱིས་རྗེས་སུ་གནང་བའི་བཀའ་དྲིན་ལུང་བསྟན་ཏེ༔ དེ་རྣམས་ཀྱི་རྒྱབ་ཆོས་ཞུས་པ༔ ཨོ་རྒྱན་ཆེན་པོ་ལགས༔ བདག་གི་སྤྲུལ་པ་དང༔ ཁྱེད་ཀྱིས་གནང་བའི་གདམས་པ་རྣམས༔ དུས་གཅིག་ལ་འཛོམས་ཏེ༔ སྟོན་པ་དང་བསྟན་པའི་ཚུལ་གྱིས༔ མ་འོངས་པའི་སེམས་ཅན་རྣམས་སྨིན་གྲོལ་ལ་འཁོད་ནས༔ ཐམས་ཅད་དཀར་ཆག་ཏུ་བཏབ་སྟེ་ཟབ་མོའི་གཏེར་དུ་སྦས་ན་རུང་ལགས༔ གདམས་པ་འདི་རྣམས་ཀྱིས་ཕན་ཐོགས་པའི་དུས་སུ༔ བསྟན་པའི་འཕོ་འཆུག་ཅི་འདྲ་འོང༔ ཆོས་བདག་བཟང་ངན་ཅི་འདྲ་འོང༔ མཐར་སེམས་ཅན་བདེ་བར་ཅི་ཙམ་འཁོད༔ བཀའ་གནང་བར་ཞུ་ཞུས་པས༔ ཨོ་རྒྱན་གྱིས་གསུངས་ནས༔ མཁའ་འགྲོ་མཚོ་རྒྱལ་ཁྱོད་ཉོན་ཅིག༔

༈ ༔ བདག་འདྲ་པདྨས་གནང་བའི་ཟབ་ཆོས་རྣམས་དང༔ སྒོམ་ཆེན་སངས་རྒྱས་ཡེ་ཤེས་ཀྱིས་ཁྱོད་རང་ལ་ཞུས་པའི་རྣམ་ཐར་རྣམས་དང༔ བསྟན་པ་སྤྱིའི་ལུང་བསྟན༔ གཏེར་གྱི་ཁ་བྱང་ལྡེ་མིག༔ གང་ཟག་སྒོས་ཀྱི་ལུང་བསྟན་དང་བཅས་པ་དཀར་ཆག་ལ་ཐོབ་ལ་བཀའ་རྒྱ་དང་བཅས་པས་ཐོབ་ལ་གཏེར་དུ་སྦས་ནས་སྨོན་ལམ་བཏབ་པས༔ མ་འོངས་པའི་སྐལ་ལྡན་རྣམས་ལ་ཤིན་ཏུ་དྲིན་ཆེ་བས༔ དམ་ཆོས་འདི་རྣམས་ཀྱིས་འགྲོ་བ་སྨིན་པའི་དུས་སུ༔ སངས་རྒྱས་ཀྱི་བསྟན་པ་ཉམས་པས༔ རྒྱལ་ཁྲིམས་གསེར་གྱི་གཉའ་ཤིང་ཡང་ཆག༔ ཆོས་ཁྲིམས་དར་གྱི་མདུད་པ་ཡང་ཞིག༔ བློན་པོ་ཁྲིམས་ཀྱི་སྒྲོ་བ་ཡང་རལ༔ མི་ཆོས་སོག་མའི་ཕོན་ཐག་ཀྱང་ཆད༔ དཀོན་མཆོག་བསྟན་པའི་འོད་ཟེར་ཀྱང་ནུབ༔ ཉན་ཐོས་ཚུལ་ཁྲིམས་ཀྱི་མཁར་པོ་ཡང་ཞིག༔ བྱམས་སེམས་བསླབ་པའི་སྡོང་པོ་འགྱེལ༔ གསང་སྔགས་དམ་ཆོས་ཀྱི་རྫིང་བུ་ཡང་བསྐམ༔ ཕས་ཟེར་བུས་མི་ཉན༔ རྗེས་ཟེར་འབངས་ཀྱིས་མི་ཉན༔ དཔོན་ཟེར་གཡོག་གིས་མི་ཉན༔ ལྟ་བ་སྐྱེ་དམན་མཐོ༔ ཆོས་སྐད་སྐྱེ་བོས་གཏོང༔ ཟས་སུ་མནའ་ཟ༔ སྐོམ་དུ་དུག་འཐུང༔ གོས་སུ་ཁྲབ་གོན༔ གྲོགས་སུ་ཟོག་པོ་བརྟེན༔ ནོར་དུ་སྡིག་པ་གསོག༔ སློབ་དཔོན་གྱིས་དམག་དཔོན་བྱེད༔ སློབ་བུ་དགྲ་རུ་ལྡང༔ མཁན་པོས་ཁྲལ་དཔོན་བྱེད༔ དགེ་སློང་གིས་མཚོན་ཆ་འཛིན༔ གྲུབ་ཐོབ་གྲོང་ཡུལ་འགྲིམ༔ ཟོག་པོ་ཀུན་ཏུ་འགྲིམ༔ ཆོས་བྱེད་བདུད་ཀྱིས་བསླུ༔ བཟང་ལན་ངན་གྱིས་འཇལ༔ བཀའ་ལ་ར་ཆོད་བྱེད༔ རྟེན་རྣམས་མགོ་མཇུག་ཟློག༔ གཙུག་ལག་ཁང་ལ་འཐབ་རས་བསྐོར༔ མིང་སྲིང་ངོ་ཚ་ཤོར༔ ཕ་སྤུན་དམེ་འཁྲུག་དར༔ མི་སྨྱོན་དང་ཁྱི་སྨྱོན་འོང༔ ནད་རིམས་ཀྱི་ཆར་པ་འབབ༔ སད་སེར་གྱི་མཚོན་རླུང་རྡོལ༔ ལྟས་ངན་དང་མུ་གེའི་སྐར་ཚོགས་འཁྲུགས༔ མི་རྣམས་ནི་མི་དྲན་དགུ་དྲན་འབྱུང༔ མི་བྱེད་དགུ་བྱེད་འབྱུང༔ མི་སྡུག་པ་སྣ་ཚོགས་འབྱུང༔ མི་རུང་བ་སྣ་ཚོགས་འབྱུང༔ སེམས་ཅན་རྣམས་ངན་ལྟོས་མང༔ ལོག་པའི་བདུད་སྤྲུལ་རྣམས་ཁ་རྒྱལ་བར་འགྱུར༔ དེའི་དུས་སུ་སེམས་ཅན་རྣམས་ལ་སྐྱབས་མེད་པས༔ མཚོ་རྒྱལ་གྱི་སྤྲུལ་པ་དང༔ པདྨའི་སྤྲུལ་པས་འགྲོ་བ་ཡོངས་སུ་སྐྱོབ་ཅིང༔ སྨིན་གྲོལ་ལ་འགོད་པ་འབྱུང་ངོ༔ ཁྱད་པར་པདྨའི་ཟབ་ཆོས་སྤྱོད་པའི༔ ཁྱོད་ཀྱི་རྣམ་ཐར་འཛིན་པའི༔ འབྲེལ་ཚད་དོན་དང་ལྡན་པ་ལྔ་ཙམ་འོང་སྟེ་བོད་གངས་ཅན་ཁྲོད་དུ་འབྱུང༔ ད་ལྟའི་ཆོས་རྒྱལ་ཁྲི་སྲོང་ལྡེའུ་བཙན་འདི༔ སྐྱེ་བ་མང་དུ་སྤྱོད་པའི་མཐའ་མར༔ ལྷོ་མོན་གྱི་མཚམས་ཆོས་ཀྱི་དབང་ཕྱུག་ཅེས་པར་གྲགས༔ སེམས་ཅན་གྱི་དོན་བྱེད་པར་འགྱུར༔ དེ་ནི་སྐྱེ་མཐའི་སངས་རྒྱས་ཡིན༔ ད་ལྟའི་སྔགས་འཆང་མཆོག་གྲུབ་རྩལ་ནི༔ སྐྱེ་བ་མང་དུ་སྤྱོད་པའི་མཐའ་མར༔ གྲ་བོང་བ་པར་ཞེས་པའི་ལུང་པ་རུ༔ ཨོ་རྒྱན་གླིང་པ་ཞེས་པར་གྲགས༔ སེམས་ཅན་གྱི་དོན་བྱེད་པར་འགྱུར༔ དེའང་སྐྱེ་མཐའི་སངས་རྒྱས་ཡིན༔ ད་ལྟའི་ལྷ་ལྕམ་གསལ་ལེ་འདི༔ སྐྱེ་བ་མང་དུ་སྤྱོད་པའི་མཐར༔ མོན་པ་བུམ་པའི་ཐང་ཞེས་པའི་སར༔ དྲི་མེད་འོད་ཟེར་ཞེས་བྱ་བར་གྲགས་ཏེ༔ སེམས་ཅན་གྱི་དོན་བྱེད་པ་འགྱུར༔ དེ་ཡང་སྐྱེ་མཐའི་སངས་རྒྱས་ཡིན༔ ད་ལྟའི་ལེགས་སྨན་བཟང་མོ་འདི༔ སྐྱེ་བ་མང་དུ་སྤྱོད་པའི་མཐར༔ བཀྲ་ཤིས་གཤོང་ལུང་ཞེས་པའི་ཡུལ་དུ༔ པདྨ་བཛྲ་ཞེས་སུ་གྲགས་ཏེ༔ སེམས་ཅན་གྱི་དོན་བྱེད་པ་འབྱུང༔ དེ་ཡང་སྐྱེ་མཐའི་སངས་རྒྱས་ཡིན༔ ད་ལྟའི་སྒོམ་ཆེན་སངས་རྒྱས་ཡེ་ཤེས་འདི༔ ཨོ་རྒྱན་ངའི་ཐུགས་ཀར་ཐིམ་སྟེ་ཟག་མེད་དུ་སངས་རྒྱས་ཀྱང་གཞན་སྣང་ཡང་མོས་པའི་ཡུལ་དུ༔ གྲ་མདའ་ཁང་དམར་ཞེས་པའི་སར༔ དྲི་མེད་ཀུན་དགའི་སྙིང་པོ་ཞེས་སུ་གྲགས་ཏེ༔ སེམས་ཅན་མང་པོའི་དོན་བྱེད་དོ༔ ཁྱད་པར་མཚོ་རྒྱལ་ཁྱོད་ཀྱི་ཐུགས་བཅུད་ལོངས་སྤྱོད་ནས༔ སྐྱེ་འགྲོ་འབུམ་ཕྲག་མཐའ་ཡས་པ༔ ལྷུན་གྲུབ་རིག་འཛིན་གྱི་ས་ལ་འགོད་པར་འགྱུར་རོ༔ གསུངས༔

༈ ༔ དེ་ནས་ཨོ་རྒྱན་ཆེན་པོ་དང༔ མཚོ་རྒྱལ་གཉིས་དབྱེར་མེད་དེ་ལོ་དྲུག་ཅུའི་བར་དུ་སྤྲུལ་པ་སྐུའི་ཞིང་ཁམས་ཉུལ༔ དེ་ནས་ཨོ་རྒྱན་ལྷོ་ནུབ་ཏུ་མ་བྱོན་བར་དུ༔ གང་ལ་གང་འདུལ་གྱིས་སྤྲུལ་ནས༔ བླ་ན་མེད་པའི་འཁོར་ལོ་བསྐོར༔ དེ་ནས་ས་ཕོ་སྤྲེལ་ལོའི་ཟླ་བ་ཚེས་བཅུའི་སྔ་དྲོའི་ཉིན་པར་ཉི་ཟེར་གྱི་རྟ་ལ་བཅིབས་ནས༔ ལྷོ་ནུབ་རྔ་ཡབ་གླིང་ཕྲན་དུ་བྱོན་ནས༔ ཡོངས་སུ་ཨོ་རྒྱན་གྱི་རྒྱ་གར་ནུབ་ཏུ་མི་ལོ་སུམ་སྟོང་བཞུགས་སོ༔

༈ ༔ བོད་དུ་མི་ལོ་བརྒྱ་དང་བཅུ་གཅིག་གི་བར་དུ་བཞུགས༔ མཚོ་རྒྱལ་གྱིས་ཨོ་རྒྱན་བོད་ཡུལ་དུ་ཆགས་ཕེབས་ནས༔ མི་ལོ་གསུམ་སོང་ནས༔ ཆགས་ཕྱིར་བསྙེགས་ཏེ༔ ལྷོ་ནུབ་ཏུ་མ་བྱོན་བར་དུ་ཞབས་ཏོག་མཛད་དོ༔ གཞོན་ནུའི་དུས་སུ་ལོག་རྟོག་གི་བདུད་བཏུལ༔ ལང་ཚོ་དར་བའི་གོང་ལ་བདེ་སྟོང་དུ་མཉམ་པར་བཞག༔ མཐར་ཐུག་མཁའ་འགྲོ་ཀུན་ཏུ་བཟང་མོ་དང་གཉིས་སུ་མེད་པར་སངས་རྒྱས་སོ༔ ལྷ་ལྕམ་གྱི་བསྟན་པ་མཆོག་ཏུ་རྒྱས་པའི་ལེའུ་སྟེ་བདུན་པའོ༔ ས་མ་ཡ༔ རྒྱ་རྒྱ་རྒྱ༔

 

༈ ༔ ཨེ་མ་མཚོ་རྒྱལ་ང་ཡི་རྣམ་ཐར་འདི༔ སྒོམ་ཆེན་སངས་རྒྱས་ཤེས་ཀྱིས༔ མོས་པར་ཞུས་པའི་ངོས་མ་བཟློག༔ སྐལ་ལྡན་དོན་དུ་ཡི་གེར་བཏབ༔ ཕྱི་རབས་དོན་དུ་གཏེར་ལ་སྦས༔ སྣོད་མེད་རྣམས་ལ་གསང་བར་བྱ༔ ཅལ་ཅོལ་སྨྲ་ན་དམ་ཚིག་ཉམས༔ མཁའ་འགྲོ་སྡེ་བཞིས་ཐུབ་པར་སྲུངས༔ ཁྱུ་མཆོག་དེ་ལ་དུས་སུ་གཏོད༔ གཏད་དོ་གཉེར་རོ་ས་མ་ཡ༔ གཏད་རྒྱ༔ སྦས་རྒྱ༔ གཏེར་རྒྱ༔ ཟབ་རྒྱ༔ ཁ་ཐཾ༔ མཁའ་འགྲོ་མཚོ་རྒྱལ་གྱི་རྣམ་ཐར༔ ཨོ་རྒྱན་དྲི་མེད་ཀུན་དགས་གཏེར་ནས་བཏོན་པའོ།། །།

 

༈ འཁོར་བའི་མུན་ནག་གླིང་རུམ་ན། །མཚོ་རྒྱལ་སྐུ་གསུམ་ཉི་མ་ཤར། །ཁམས་གསུམ་སེམས་ཅན་མུན་སྨག་རྣམས། །འོད་ཟེར་གཅིག་གིས་གསལ་བར་བྱས། །འོན་ཀྱང་སྐལ་མེད་ཆོས་ཅན་རེ། །གསལ་བའི་ནང་ནས་མུན་པ་ཉུལ། །ཉི་མ་ཤར་ཚེ་སྙིང་མེད་སྡུག །དེ་བཞིན་ཆེ་འགྱིང་ཟུར་ཟ་ཅན། །ཆོས་མེད་འཆི་ཁ་ནངས་པར་སྡུག །མི་ལུས་རིན་ཆེན་ཐོབ་པའི་དུས། །འཛམ་གླིང་སྟོང་སྐོར་མ་བྱས་ནས། །དམ་ཆོས་མཛད་ན་ལེགས་པར་སེམས། །ཅི་འགལ་འཁྲུལ་བྱུང་ན་བཟོད་པར་གསོལ། །མངྒ་ལཾ། བྷ་ཝནྟུ། ཤུ་བྷཾ། རྫོགས་སོ།། །།

༈ ཀྱེ་འཕྲིན་ལས་རྣམ་དག་སྐུ་གསུང་ཐུགས། །ཡོན་ཏན་མ་ལུས་རྒྱ་ཆེ་བ། །རྟེན་བཞེངས་པ་རྣམས་ལ་བྱིན་གྱིས་རློབས། །རྟེན་མཆོག་ཏུ་གྱུར་པའི་བཀྲ་ཤིས་ཤོག །མི་འགྱུར་ལྷུན་པོ་སྐུ་ཡི་བཀྲ་ཤིས་ཤོག །ཡན་ལག་དྲུག་ཅུའི་གསུང་གི་བཀྲ་ཤིས་ཤོག །མཐའ་བྲལ་དྲི་མེད་ཐུགས་ཀྱི་བཀྲ་ཤིས་ཤོག །རྒྱལ་བའི་སྐུ་གསུང་ཐུགས་ཀྱི་བཀྲ་ཤིས་ཤོག །རྒྱ་གར་པཎ་ཆེན་བོད་ལ་བཀའ་དྲིན་ཆེ། །པདྨ་ལས་འཁྲུངས་སྐུ་ལ་འདས་འཁྲུངས་མེད། །ད་ལྟ་ལྷོ་ནུབ་སྲིན་པོའི་ཁ་གནོན་མཛད། །ཨུ་རྒྱན་རིན་པོ་ཆེ་ཡི་བཀྲ་ཤིས་ཤོག །ཡེ་ཤེས་མཁའ་འགྲོ་བོད་ལ་བཀའ་དྲིན་ཅན། །ཀུན་ཏུ་བཟང་མོའི་དངོས་སྤྲུལ་རྒྱལ་བའི་ཡུམ། །གསང་སྔགས་བསྟན་པ་དར་རྒྱས་མཛད་པའི་མ། །ཡུམ་མཆོག་མཁའ་འགྲོ་མཚོ་རྒྱལ་གྱི་བཀྲ་ཤིས་ཤོག །

༈ དམ་ཆོས་འདི་བཞེངས་དགེ་བ་ཡི། །སྦྱིན་བདག་བྲིས་པ་ཐལ་མགོས་ཀྱི། །ཕ་མ་བུ་སྨད་ཁ་ལག་འབྲེལ་ཚད་དང་། །འོག་རྟ་བཀལ་མཛོ་བཞོན་མ་སེམས་ཅན་རྣམས། །གནས་མཆོག་པདྨ་འོད་ཀྱི་གཞལ་ཡས་ན། །རྒྱལ་དབང་པདྨ་འབྱུང་གནས་ཡབ་ཡུམ་གྱི། །ཞལ་མཇལ་གསུང་ཐོས་སངས་རྒྱས་མྱུར་ཐོབ་ཤོག །བཀྲ་ཤིས་དཔལ་འབྱོར་ཕུན་སུམ་འཚོགས་པར་ཤོག །དགེའོ། །དགེའོ། །དགེའོ། །

གསུང་རབ་འདི་ཡི་གཞུང་ལ་ཆད་པ་མང་པོ་ཡོད་པས་གཟབ་གཟབ་ཆོས་ནས་ཡོད་དོ། །ཐུགས་མཉེས་པར་མཛོད།