དཔལ་ནཱ་ལེནྡྲ། བྱོན་པ་ལེགས།
༡༡༽ སློབ་དཔོན་དྷརྨ་མི་ཏྲའམ་རྣམ་པར་རྒྱལ་བའི་ལྷ།
དེ་ཡང་ས་སྐྱ་རྗེ་བཙུན་གྲགས་པ་རྒྱལ་མཚན་ (1147-1216) གྱིས་མཛད་པའི་རྒྱུད་སྡེའི་དུམ་བུ་བརྒྱ་བཅུ་གསུམ་པ་ལས[1]། བླ་མ་རྒྱ་གར་བའི་ལོ་རྒྱུས་ལས། བླ་མ་དམ་པའི་ཞབས་ལ་སྤྱི་བོས་ཕྱག་འཚལ་ལོ། །འདིའི་ལོ་རྒྱུས་ནི། རྣལ་འབྱོར་གྱི་དབང་ཕྱུག་བིརྺ་པ་ཞེས་བྱ་བ་འདི་རྒྱལ་པོའི་རིགས་རྒྱལ་སྲིད་སྤངས་པ་ཞིག་ཡིན་པ་ལ། དཔལ་ནཱ་ལེནྡྲ་ན་སྤྱིར་སྡེ་པ་བཞི་ཡོད་པ་ལས།
གཞི་ཐམས་ཅད་ཡོད་པར་སྨྲ་བའི་སྡེ་པའི་མཁན་པོ་དྷརྨ་མི་ཏྲ་ཞེས་བྱ་བའམ། རྣམ་པར་རྒྱལ་བའི་ལྷ་ཞེས་བྱ་བ་ལས་རབ་ཏུ་བྱུང་སྟེ། མཚན་ཡང་ཤྲཱི་དྷརྨ་པཱ་ལ་ཞེས་བྱ་བར་བཏགས། ཞེས་གསུངས་སོ།།
བྱོན་པའི་དུས་ནི། ཇོ་ནང་རྗེ་བཙུན་ཏཱ་ར་ནཱ་ཐས་ (1575-1634) མཛད་པའི་རྒྱ་གར་ཆོས་འབྱུང་ལས[2]། ཡོན་ཏན་འོད་ཀྱི་སློབ་མ་འཕགས་པ་ཟླ་བའི་ནོར་བུ་དང༌། ན་ལེནྡྲའི་མཁན་པོ་རྒྱལ་བའི་ལྷ་རྣམས་དུས་མཚུངས་སུ་བྱུང་ཞིང༌། ལྷོ་ཕྱོགས་སུ་སློབ་དཔོན་ཟླ་བ་གྲགས་པའང་བྱོན། སློབ་དཔོན་ཆོས་སྐྱོང་དང༌། སློབ་དཔོན་ཞི་བ་ལྷ་དང༌། གྲུབ་ཐོབ་བི་རཱུ་པའི་སྐུ་ཚེའི་སྟོད་ཀྱི་དུས་ཙམ་མོ། །ཞེས་གསལ་བའི་རྒྱལ་བའི་ལྷ་འདི་ཉིད་མིན་ནམ་སྙམ། དེ་ཡང་ཀོང་སྤྲུལ་ཡོན་ཏན་རྒྱ་མཚོས་ (1813-1899) མཛད་པའི་ཤེས་བྱ་ཀུན་ཁྱབ་ལས[3]།
བི་རཱུ་པཱཀྵ་མཚོ་སྐྱེས་ལ་ལི་ཏས། །
གཤེད་དམར་དགྱེས་རྡོར་རྟོག་པ་བདུན་སོགས་བླངས། །
སློབ་དཔོན་ལཱུ་ཡི་པའི་འོག་ཙམ་དུ་ནཱ་ལནྡའི་མཁན་པོ་རྒྱལ་བའི་ལྷའི་སློབ་མ་བི་རཱུ་པ་བྱུང་སྟེ། སློབ་དཔོན་ཀླུའི་བྱང་ཆུབ་ལས་གཤིན་རྗེ་གཤེད་ཀྱི་དབང་དང་གདམས་ངག་ཞུས་ཏེ་བསྒོམས་པས་གྲུབ། བདག་མེད་ལྷ་མོ་བཅོ་ལྔའི་དཀྱིལ་འཁོར་དངོས་སུ་བྱོན་ནས་དབང་བསྐུར་བས་རིམ་གྱིས་ས་དྲུག་པ་བརྙེས། ཝཱ་རཱ་ཎ་སཱིའི་མུ་སྟེགས་ཀྱི་རྒྱལ་པོ་སོགས་མུ་སྟེགས་བྱེད་མང་པོ་རྫུ་འཕྲུལ་གྱིས་བཏུལ། ཨུ་རྒྱན་ནས་གཤིན་རྗེ་གཤེད་དམར་པོའི་རྒྱུད་སྤྱན་དྲངས། དེའི་སྒྲུབ་ཐབས་སོགས་བརྩམས་ཏེ་འགྲོ་དོན་དང་བསྟན་པ་ལ་བྱ་བ་བླ་ལྷག་ཏུ་མཛད། ཅེས་གསལ་བ་འདི་ཉིད་སློབ་དཔོན་རྒྱལ་བའི་ལྷ་དང་གཅིག་མིན་དཔྱད་དགོས་ལ། ལེགས་སྦྱར་གྱི་མཚན་བྱང་ཐ་དད་དུ་བྱུང་ཞིང་། བླ་སློབ་ལྟར་ན་འདྲ་ཤས་ཆེ་ཡང་། དཔལ་ལྡན་སྐྱོང་གི་བླ་མ་ནཱ་ལེནྡྲའི་མཁན་པོ་དྷརྨ་མི་ཏྲ་སྟེ་རྣམ་པར་རྒྱལ་བའི་ལྷའི་རྣམ་ཐར་གྱི་དཔྱད་གཞི་མ་རྙེད་པས་ཞིབ་པ་འགོད་ཐབས་མ་འགྱུར་རོ།།
དཔྱད་གཞིའི་ལུང་ཁུངས་ཡིག་ཆ།
[1] ས་སྐྱ་བཀའ་འབུམ། གྲགས་རྒྱན་དང་པོ། པོད། ༼༢༽ འཕྲུལ་པར་དཔེ་རིང་། ཤོག་གྲངས་ ༨༦
[2] རྒྱ་གར་ཆོས་འབྱུང་། སི་ཁྲོན་མི་རིགས་དཔེ་སྐྲུན་ཁང་། ༡༩༨༦ ལོ། ཤོག་གྲངས་ ༡༨༡
[3] ཤེས་བྱ་ཀུན་ཁྱབ། ༼ཨོཾ༽ མི་རིགས་དཔེ་སྐྲུན་ཁང་། ༢༠༠༢ ལོ། ཤོག་གྲངས་ ༢༡༢
ཡོང་ཁུངས། དཔལ་ནཱ་ལེནྡྲའི་བྱུང་རབས་སྲིད་ཞིའི་མཛེས་རྒྱན། སྨད་ཆ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ཝ་ཤིང་ཀྲོན། ༢༠༢༣ ལོ། ཤོག་གྲངས་ ༡༤༤ ནས་ ༡༤༥ བར་གསལ་བ་ལས་བཏུས།