པཎ་གྲུབ་བསྟོད་ཚོགས།

  ༄༅། །མཁན་ཆེན་བོ་དྷི་ས་ཏྭ་ལ་བརྟེན་པའི་བླ་མའི་རྣལ་འབྱོར་ ཐུབ་བསྟན་ཉིན་བྱེད་འདྲེན་པའི་སྐྱ་རེངས་ ཞེས་བྱ་བ་བཞུགས་སོ།།[1] ༼གཉན་དགོན་སྤྲུལ་སྐུ་མདོ་སྔགས་ཆོས་ཀྱི་རྒྱ་མཚོས་ (1903-1957) མཛད་པ།༽   ན་མོ་གུ་རུ། འདིར་མཁན་ཆེན་བྱང་ཆུབ་སེམས་དཔའ་ལ་བརྟེན་པའི་བླ་མའི་རྣལ་འབྱོར་བྱེད་པར་སྤྲོ་བས། སྐྱབས་སེམས་སོགས་སྦྱོར་བའི་ཆོས་རྣམས་སྔོན་དུ་བཏང་ནས། དངོས་གཞི་བསྐྱེད་པ་ནི། མདུན་གྱི་ནམ་མཁར་ཀུན་བཟང་མཆོད་སྤྲིན་དབུས། །སྣ་ཚོགས་པདྨ་འདབ་མ་སྟོང་ལྡན་གྱི། །ཟེའུ་འབྲུར་སེང་ཁྲིར་པད་ཟླའི་གདན་གསུམ་ལ། །དབུས་མའི་སྟེང་དུ་རང་གི་བླ་མ་ནི། །

  ༄༅། །མཁན་ཆེན་ཆོས་ཀྱི་རྒྱལ་པོ་བོ་དྷི་ས་ཏྭ་ལ་བསྟོད་པ་བྱིན་རླབས་དྲི་བསུང་འཕྲོ་བའི་མེ་ཏོག་ཅེས་བྱ་བ་བཞུགས་སོ། །[1]   ༼གཉན་དགོན་སྤྲུལ་སྐུ་མདོ་སྔགས་ཆོས་ཀྱི་རྒྱ་མཚོས་ (1903-1957) མཛད་པ།༽   ཐུབ་བསྟན་བེེཌཱུར་ས་གཞིའི་ཁྱོན་ཡངས་པོར། །བཤད་སྒྲུབ་གསེར་གྱི་རེ་ཁ་བརྒྱ་བྲིས་ཏེ། །མཛེས་པར་བྱེད་པའི་མཁས་མཆོག་ལྷའི་བཟོ་བོ། །དྭངས་པའི་སེམས་ཀྱི་རྫིང་བུར་ཡང་ཡང་ཤར། །ངག་གི་དབང་ཕྱུག་རལ་པའི་ཅོད་པན་ཟུར་ཕུད་ལྔས་མཛེས་འཕགས་པའི་ཞབས། །ཐུན་མོང་ཉིད་དུ་སྤྱི་བོས་མཆོད་པའི་བཀའ་ལུང་བདུད་རྩིས་གཏམས་པ་ཡི། །

  ༄༅། །མཁན་ཆེན་གསོལ་འདེབས་བྱང་ཆུབ་ལྗོན་ཤིང་ཞེས་བྱ་བ།[1]   ༼རྫོང་གསར་མཁྱེན་བརྩེ་འཇམ་དབྱངས་ཆོས་ཀྱི་བློ་གྲོས་ (1893-1959) ཀྱིས་མཛད་པ།༽   མགོན་པོ་འཇམ་དཔལ་དབྱངས་ལ་གུས་པས་ཕྱག་འཚལ་ལོ། །རྒྱལ་རིགས་སཱ་ལ་ལྟ་བུའི་རྒྱུད་འཁྲུངས་ཤིང་། །རིག་པའི་གནས་ལྔ་མཐར་ཕྱིན་འཇམ་དབྱངས་ཀྱི། །ཞབས་ཀྱི་པདྨོའི་ཟེའུ་འབྲུ་སྤྱི་བོས་བསྟེན། །མཁན་ཆེན་བྱང་ཆུབ་སེམས་དཔར་གསོལ་བ་འདེབས། །བསྐལ་མང་གོང་ནས་གཞན་ཕན་ཐུགས་བསྐྱེད་ཀྱི། །རྩ་བ་གསེར་སྦྲམ་ལྟ་བུ་རབ་བརྟན་པས། །རྩོད་དུས་བསྟན་དང་འགྲོ་བའི་གཉེན་གཅིག་པུ། །མཁན་ཆེན་ཞི་བ་འཚོ་ལ་གསོལ་བ་འདེབས། །

  མཁན་ཆེན་ཞི་བ་འཚོའི་བསྟོད་པ།[1] ༼རྡོ་གྲུབ་འཇིགས་མེད་བསྟན་པའི་ཉི་མས་ (1865-1926) མཛད་པ།༽ འཕགས་ཡུལ་ཆོས་ཀྱི་འདུན་ཁང་ན་ལེནྡྲའི། །ཁྲི་འཕང་ཞབས་པད་འདབ་མས་གནོན་བཟོད་པ། །ཟ་ཧོར་མཁན་པོའི་གྲགས་སྙན་སུམ་རྩེན་རྔ། །དབྱུ་གུས་བསྐུལ་བ་མེད་ཀྱང་སྲིད་ན་ལྡིར། །མང་ཐོས་ཤ་ཚུགས་རྒྱས་པའི་མཁས་མང་ཡང་། །གུས་བཅས་འཛུམ་པའི་མིག་གིས་ཁྱོད་བལྟས་ཏེ། །དཔྱད་གསུམ་ལམ་ནས་དྲང་བའི་ལེགས་བཤད་དབྱངས། །ཉན་ལ་རིང་བའི་ཡིད་ཀྱིས་ཁྱོད་དྲུང་འདུ། །