༄༅། །གྲུབ་ཆེན་བརྒྱད་ཅུ་རྩ་བཞིའི་ལོ་རྒྱུས་ལས་མེ་ཁ་ལའི་ལོ་རྒྱུས་བཞུགས་སོ།།

༄༅། །གྲུབ་ཆེན་བརྒྱད་ཅུ་རྩ་བཞིའི་ལོ་རྒྱུས་ལས་མེ་ཁ་ལའི་ལོ་རྒྱུས་བཞུགས་སོ།།

 

༄༅། །གུ་རུ་མེ་ཁ་ལའི་ལོ་རྒྱུས་ནི། ཡུལ་དེ་ཝི་ཀོ་ཌ་ན་ཁྱིམ་བདག་གཅིག་ལ་བུ་མོ་གཉིས་ཡོད་པ། དེད་དཔོན་ཞིག་ལ་ཡང་བུ་གཉིས་ཡོད་པ་གཉེན་དུ་བྱས་པ་དང༌། བུ་མོ་དེ་གཉིས་ལ་ཐམས་ཅད་ཁ་ཟེར་བར་བྱེད་ལ། དེ་གཉིས་ཀྱི་ངན་པ་བྱས་པ་མེད་དོ། །དེའི་ཚེ་ནུ་མོ་ན་རེ། རྒྱུ་མཚན་མེད་པར་ཁ་ཟེར་བ་འདི་འདྲ་ལ་གཞན་དུ་འཁྱམས་དགོས་ཟེར། ཕུ་མོ་ན་རེ་གང་དུ་ཕྱིན་ཀྱང་ཚོགས་མ་བསགས་པས་འདི་དང་ཁྱད་མི་འོང་བས།

འདི་ཉིད་རང་དུ་སྡད་(བསྡད)དགོས་ཟེར་བའི་ཚེ། བླ་མ་ཀཧྣ་པ་བྱ་བ་དེར་བྱོན་སྟེ་(ཏེ)། དེ་ནི་རྣལ་འབྱོར་ཕོ་མོ་བདུན་བརྒྱས་བསྐོར་བ། མ་རེག་པའི་གདུགས་དབུ་ལ་འཁོར་བ། ཌཱ་མ་རུའི་སྒྲ་མ་བཀྲོལ་བར་འཁྲོལ་བ་ལ་སོགས་པའི་ཡོན་ཏན་དཔག་ཏུ་མེད་པ་སྒྲོགས་པས། དཔུན་(སྤུན)གཉིས་ཀྱིས་འོ་སྐོལ་གཉིས་ལ་ཡུལ་མི་དང་ཁྱོ་ཡང་ཁ་ཟེར་བས། བླ་མ་འདི་ལ་གདམས་པ་ཞུས་ནས་སྒྲུབ་པ་བྱེད་དགོས་བྱས་དེའི་ཅན་དུ་ཕྱིན་ཏེ་སྔར་གྱི་ལོ་རྒྱུས་ཀྱང་བསྙད་ཅིང་གདམས་པ་ཞུས་པས། དེས་ཀྱང་གནང་སྟེ་དབང་བསྐུར་ནས། ལྟ་བ་སྒོམ་པ་སྤྱོད་པ་འབྲས་བུ་ཟུང་འཇུག་ཕག་མོའི་གདམས་པ་གནང་ངོ༌། །

དེ་གཉིས་ཀྱིས་བརྩོན་པས་བསྒྲུབས་པས་ལོ་བཅུ་གཉིས་ན་གྲུབ་པ་ཐོབ་སྟེ། བླ་མ་ཅན་དུ་ཕྱིན་ནས་ཕྱག་དང་མཆོད་པ་བྱས། བཀའ་དྲིན་གྱིས་ཁྱབ་པའི་གཏམ་བཏང་བས། ཁྱེད་གང་པ་ཡིན་ངས་མ་ཤེས་གསུངས་པས་སྔར་གྱི་ལོ་རྒྱུས་བསྙད་དོ། །འོ་ན་ང་ལ་ཡོན་འབུལ་དགོས་གསུངས་པས་བླ་མ་ཅི་བཞེད་པ་འབུལ་ལགས་ཞུས་པས། འོ་ན་ང་ལ་ཁྱེད་གཉིས་ཀྱི་མགོ་བོ་བྱིན་ཅིག་གསུངས་པས། དེས་ཀྱང་བླ་མ་བཞེད་ན་འབུལ་ཟེར། དེ་གཉིས་ཀྱིས་རང་རང་གི་ཁ་ནས་ཡེ་ཤེས་ཀྱི་རལ་གྲི་རྣོ་ངར་དང་ལྡན་པ་རེ་ཕྱུང་ནས་ཡན་ལག་གི་དང་པོ་མགོ་བོ་བཅད་ནས་ཕུལ་སྟེ་(ཏེ)།

བདག་གཉིས་པོ་བླ་མའི་བཀའ་དྲིན་གྱི། །བསྐྱེད་རྫོགས་ཟུང་འཇུག་འཁོར་འདས་སྤྲོས་པ་བཅད། །

ལྟ་སྤྱོད་ཟུང་འཇུག་སྤང་བླང་སྤྲོས་པ་བཅད། །དབྱིངས་རིག་ཟུང་འཇུག་བདག་གཞན་སྤྲོས་པ་བཅད། །

སྤྲོས་མེད་བརྡ་ཡི་ཚུལ་དུ་འདི་འབུལ་ལོ། །

ཅེས་(ཞེས)གསུང་བཞིན་དབུ་བཅད་དེ་གར་མཛད་པས། ཀཧྣ་པའི་ཞལ་ནས།

ཨེ་མ་རྣལ་འབྱོར་ཆེན་མོ་གཉིས། །ཡོན་ཏན་མཆོག་ཐོབ་དགེ་བ་སྟེ། །

རང་ཉིད་ཞི་བདེ་དམན་པས་ན། །འགྲོ་བའི་དོན་ཕྱིར་གནས་པར་མཛོད། །

ཅེས་གསུངས་པས་མགོ་བོ་སླར་སོས་ཏེ་རྨ་མེད་པར་གྱུར་པས། ཐམས་ཅད་ངོ་མཚར་སྐྱེས་ནས་དབུ་བཅད་མ་དཔུང་(སྤུན)གཉིས་སུ་གྲགས་ཏེ་ཀཧྣ་པའི་ཞབས་འབྲིང་བྱས་ནས། ཕྱག་རྒྱ་ཆེན་པོའི་དངོས་གྲུབ་ཐོབ་སྟེ་ལོ་མང་དུ་འགྲོ་དོན་མཛད་ནས་རྟོགས་པ་བརྗོད་པ་ལ་སོགས་པ་མཛད་དེ་མཁའ་སྤྱོད་དུ་གཤེགས་སོ། །ཕུ་མོ་སྟེ་གུ་རུ་མེ་ཁ་ལའི་ལོ་རྒྱུས་རྫོགས་སོ།།[1] །།[2]

 

[1] གྲུབ་ཐོབ་བརྒྱད་ཅུ་རྩ་བཞིའི་ལོ་རྒྱུས། རྒྱ་གར་ཙམ་པ་རྞའི་བླ་མ་ཆེན་པོ་མི་འཇིགས་པ་སྦྱིན་པ་དཔལ་གྱིས་ཞལ་ནས་གསུངས་པ་ལྟར་དགེ་སློང་སྨོན་འགྲུབ་ཤེས་རབ་ཀྱིས་ལེགས་པར་འགྱུར། བསྟན་འགྱུར་དཔེ་བསྡུར་མ། རྒྱུད། ༼གེ༽ དེབ་ཨང་ ༩༤ པ། ཀྲུང་གོའི་བོད་ཀྱི་ཤེས་རིག་དཔེ་སྐྲུན་ཁང་། ༡༩༩༩ ལོ། ཤོག་གྲངས་ ༥༢༩ ནས་ ༥༣༠ བར་བཞུགས་པ་ལས་བཏུས་པའོ།།

[2] གུ་རུ་ཀ་ན་ཁ་ལའི་ལོ་རྒྱུས་ནི། གྲུབ་ཆེན་ཀཧྣ་པ་སྟེ་ནག་པོ་སྤྱོད་པའི་ཞབས་ཀྱིས་རྗེས་སུ་བཟུང་བ་བརྗོད་མ་ཐག་པའི་དབུ་བཅད་མ་སྤུན་གཉིས་ཀྱི་ནུ་མོ་དེ་ཡིན་ལ། རྣམ་ཐར་གོང་གིས་རྟོགས་ཤིང༌། མཚན་རྣལ་འབྱོར་མ་ཀ་ན་ཁ་ལ་ཞེས་གྲགས་སོ། །གུ་རུ་ཀན་ཁ་ལའི་ལོ་རྒྱུས་རྫོགས་སོ།།