ཁ༽ སློབ་དཔོན་ཀ་མ་ལ་ཤཱི་ལའི་སྐུ་ཡི་ཆ་ལུགས།

ཁ༽ སློབ་དཔོན་ཀ་མ་ལ་ཤཱི་ལའི་སྐུ་ཡི་ཆ་ལུགས།

 

དེ་ཡང་རྨད་བྱུང་ལེགས་བཤད་ཀྱིས་འོད་ཟེར་ལས་ལོག་སྨྲའི་སྨག་རུམ་ཕ་མཐར་སྤྲོད་མཛད་སློབ་དཔོན་ཀ་མ་ལ་ཤཱི་ལ་སྟེ་པདྨའི་ངང་ཚུལ་ཞབས་ཀྱི་སྐུ་ཡི་ཆ་ལུགས་ནི། གཉན་དགོན་སྤྲུལ་སྐུ་གསུང་རབ་མདོ་སྔགས་ཆོས་ཀྱི་རྒྱ་མཚོས་ (1903-1957) མཛད་པའི་མཁན་ཆེན་བོ་དྷི་ས་ཏྭ་ལ་བརྟེན་པའི་བླ་མའི་རྣལ་འབྱོར་ཐུབ་བསྟན་ཉིན་བྱེད་འདྲེན་པའི་སྐྱ་རེངས་ལས^[1]།

གཡོན་གྱི་སེང་ཁྲིར་བོད་ཀྱི་རྒྱལ་ཚབ་ཆེ། །དབུ་ཚད་བཀའ་བབས་པདྨའི་ངང་ཚུལ་མཆོག །

རྩོད་པའི་ཉམས་ཅན་དབུ་ལ་པཎ་ཞུ་དང་། །སྐུ་ལ་ཆོས་གོས་གསུམ་གསོལ་ཕྱེད་སྐྱིལ་བཞུགས། །

ཞེས་གསུངས་པ་ལྟར་བོད་ལུགས་ཀྱི་འབྲི་ཐང་བཞེངས་སྲོལ་ལ་སྐུ་མདོག་དཀར་ལ་དམར་བའི་མདངས་དང་ལྡན་ཞིང་། རྟེན་དགེ་སློང་གི་རྣམ་ཅན་ཡིན་པས་སྐུ་ལ་ཆོས་གོས་རྣམ་གསུམ་ལེགས་པར་གསོལ་བ། རྒྱའི་ཧྭ་ཤང་མ་ཧཱ་ཡ་ན་ལུང་རིགས་གཉིས་ཀྱི་རྩོད་པས་ཚར་བཅད་པའི་མཚོན་དོན་དུ་ཕྱག་གཡས་ནམ་མཁར་འཕྱར་ལ། ཕྱག་ཕྲེང་དབུ་ཐོད་དུ་སྐོར་ཏེ་རྩོད་པའི་ཉམས་དང་ལྡན་པ་སྟེ། དེ་ཡང་ཆོས་འབྱུང་གི་ཡི་གེ་ཞིབ་མོ་ལས^[2]། ཀ་མ་ལ་ཤཱི་ལ་རླུང་ཚུགས་སུ་བྱོན་ཞེས་ཕོ་ཉ་བ་བྱུང་བ་དང་། རྗེ་བློན་ཡོངས་ཆབ་ཁར་བསུ་བ་ལ་ཕྱིན་པ་དང་། ཧྭ་ཤང་འཁོར་དང་བཅས་པ་ཡང་ཆབ་ཁར་བྱོན། ཀ་མ་ལ་ཤཱི་ལས་ཆབ་ཕར་ཁ་ནས་རྒྱའི་པཎྜི་ཏ་ལ་སྒྲ་ཚད་དྲི་གསུང་ནས་ཆགས་ཤིང་དབུ་ལ་ལན་གསུམ་བསྐོར་བས། ཧྭ་ཤང་ཆབ་ཚུ་ཁ་ནས་བེར་གྱི་ཐུ་བ་ནས་བཟུང་ནས་སྤྲུག །དེས་ལན་བཏབ། འཇིགས་པོ་ཞིག་འདུག་གོ་གསུངས་ནས་བྱང་ཆུབ་གླིང་དུ་སེངྒེའི་ཁྲི་བཅས་ཏེ་བཙན་པོ་གུང་ལ་བཞུགས་ནས་སྟོན་རྩེན་གཉིས་ཤགས་གདབ་པར་བྱས། ཞེས་པའི་མཛད་འཕྲིན་གྱི་མཚོན་དོན་དུ་ཕྱག་ཕྲེང་དབུ་ཐོད་དུ་བསྐོར་བའི་རྣམ་པ་དང་། གནས་ལྔ་རིག་པ་སྤྱི་དང་། ལྷག་པར་སྡེ་སྣོད་གསུམ་ལ་མཁས་པའི་མཆོག་ཏུ་གྱུར་པས་དབུ་ལ་པཎ་ཞྭ་དམར་པོ་སྐེད་འཆིང་གསུམ་ལྡན་མཛེས་པར་མནབས་པ། མཛད་པའི་ནང་ནས་མཆོག་ཏུ་གྱུར་པ་གསུང་གི་མཛད་པ་ལས་དབུ་མ་སྣང་བ་དང་། སྒོམ་རིམ་ཐོག་མཐའ་བར་གསུམ་སོགས་གསུང་རྩོམ་བཅུ་ཕྲག་གཉིས་ལྗགས་རྩོམ་མཛད་པའི་བརྡར་ཕྱག་གཡོན་དུ་ཆོས་ཀྱི་གླེགས་བམ་བསྣམས་ཤིང་། ཞབས་གཉིས་སྐྱིལ་ཀྲུང་ངམ་སྐྱིལ་ཀྲུང་ཕྱེད་པ་མཛད་པའི་ཚུལ་དུ་བཞུགས་གདན་འབོལ་རྩེག་གི་གདིང་བའི་སྟན་ལ་བཞུགས་པའི་རྣམ་པ་ཅན་ནོ།།  །།

 

དཔྱད་གཞིའི་ལུང་ཁུངས་ཡིག་ཆ།

^[1]  གཉན་དགོན་སྤྲུལ་སྐུའི་གསུང་འབུམ། པོད་གཉིས་པ། སི་ཁྲོན་མི་རིགས་དཔེ་སྐྲུན་ཁང་། ༢༠༠༦ ལོ། ཤོག་ ༣༨༠

^[2]  རྦ་བཞེད་ཕྱོགས་བསྒྲིགས། མི་རིགས་དཔེ་སྐྲུན་ཁང་། ༢༠༠༩ ལོ། ཤོག་གྲངས་ ༢༠༧

 

ཡོང་ཁུངས། པཎ་གྲུབ་བཅུ་བདུན་གྱི་རྣམ་ཐར་འཛམ་གླིང་མཛེས་རྒྱན། ༼ག༽ རྩོམ་པ་པོ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༣༥༡ ནས་ ༣༥༢ བར་གསལ་བ་ལས་བཏུས།