དཔལ་ནཱ་ལེནྡྲ། བྱོན་པ་ལེགས།
པཎ་གྲུབ་བསྟོད་ཆེན་གྱི་བཀའ་ཁྲིད།
(ཕྱི་ལོ་ ༢༠༡༩ ཟླ་ ༢ ཚེས་ ༡༩ ཉིན་བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་
ཁང་དུ་སྐྱེས་རབས་ཉིན་སྩལ་བའི་པཎ་གྲུབ་བསྟོད་ཆེན་བཀའ་ཁྲིད་བཞུགས་སོ།།)
འགྲོ་ལ་ཕན་བཞེད་ཐུགས་རྗེས་རབ་བསྐྲུན་པའི། །
སྤངས་རྟོགས་སྐྱོབ་པ་མཆོག་བརྙེས་ལྷ་ཡི་ལྷ། །
རྟེན་འབྱུང་གཏམ་གྱིས་འགྲོ་རྣམས་འདྲེན་མཛད་པའི། །
ཐུབ་དབང་སྨྲ་བའི་ཉི་མར་མགོས་ཕྱག་འཚལ། །
རྒྱལ་ཡུམ་དགོངས་དོན་མཐའ་བྲལ་དེ་ཉིད་དོན། །
རྟེན་འབྱུང་རིགས་ཚུལ་ཟབ་མོས་གསལ་མཁས་པའི། །
རྒྱལ་བའི་ལུང་བཞིན་ཐེག་མཆོག་དབུ་མའི་སྲོལ། །
འབྱེད་མཛད་ཀླུ་སྒྲུབ་ཞབས་ལ་གསོལ་བ་འདེབས། །
དེ་སྲས་ཐུ་བོ་མཁས་ཤིང་གྲུབ་པའི་མཆོག །
ཕྱི་ནང་གྲུབ་མཐའ་རྒྱ་མཚོའི་ཕ་མཐར་སོན། །
འཕགས་ལ་ལྷས་མཛད་པའི་དབུ་མ་བཞི་བརྒྱ་པར་བལྟས་ཚེ། དེའི་ཚེ་དེའི་དུས་ཀྱི་རྒྱ་གར་གྱི་གྲུབ་མཐའ་ཚང་མ་ཐུགས་སུ་ཆུད་པའི་ཐོག་ནས་དེ་དག་ལ་འགལ་འདུ་བསྒྲིགས་པ་ཞིག་ཡོང་གི་འདུག
ཀླུ་སྒྲུབ་གཞུང་འཛིན་ཀུན་གྱི་གཙུག་ནོར་དཔལ། །
རྒྱལ་སྲས་འཕགས་པ་ལྷ་ལ་གསོལ་བ་འདེབས། །
འཕགས་པའི་དགོངས་པ་རྟེན་འབྱུང་མཐར་ཐུག་དོན། །
བཏགས་ཡོད་མིང་རྐྱང་ཙམ་གྱི་ཟབ་མོའི་གནད། །
གསལ་མཛད་གྲུབ་པ་མཆོག་གི་སར་གཤེགས་པ། །
སངས་རྒྱས་བསྐྱངས་ཀྱི་ཞབས་ལ་གསོལ་བ་འདེབས། །
དབུ་མ་རྩ་བ་ཤེས་རབ་ལས[1]།
བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །
དངོས་པོ་གང་དག་གང་ན་ཡང་། །སྐྱེ་བ་ནམ་ཡང་ཡོད་མ་ཡིན། །
ཞེས་འགོག་རྒྱུའི་རིགས་གཙོ་བོར་མཛད་ནས་གསུངས་ཡོད། མ་གཞི་རབ་བྱེད་ཉི་ཤུ་པའི་ནང་དུ་རྟེན་འབྱུང་གི་སྐོར་གསུང་གི་ཡོད། འོན་ཀྱང་རབ་བྱེད་དང་པོ་དང་གཉིས་པ་སོགས་ཀྱིས་གཞན་ལུགས་དགག་པ་གཙོ་བོར་མཛད་ནས་གསུངས་ཡོད། བུདྡྷ་པཱ་ལི་ཏའི་རབ་བྱེད་དང་པོར[2]།
བདག་ལས་མ་ཡིན་གཞན་ལས་མིན། །
ཞེས་སོགས་ཀྱི་ཚིག་འགྲེལ་བསྐྱོན་སྐབས་སྐྱེ་བ་སྒྲུབ་པ་ཐ་སྙད་ཙམ་དུ་གཅོད་པ། མཐའ་བཞི་སྐྱེ་འགོག་གསུངས་ཟིན་མཚམས་ཀྱི་དོན་བསྡུར། སྐྱེ་བར་བརྗོད་པ་ནི་ཐ་སྙད་ཙམ་ཡིན་ནོ། །ཞེས་བསྡོམས་བསྐྱོན་པ་གནང་ཡོད།
བདེན་པའི་དངོས་པོ་སྐྱེ་སོགས་མཐའ་བཀག་ཅིང༌། །
ཚད་མ་མཐུན་སྣང་ཕྱི་དོན་བཞེད་པ་ཡི། །
གྲུབ་མཐའི་སྲོལ་གཏོད་ཡོངས་རྫོགས་པཎྜི་ཏ། །
སློབ་དཔོན་ལེགས་ལྡན་འབྱེད་ལ་གསོལ་བ་འདེབས། །
སློབ་དཔོན་ལེགས་ལྡན་འབྱེད་ཀྱིས་འགྲེལ་པ་ཤེས་རབ་སྒྲོན་མེ་མཛད་ནས། སངས་རྒྱས་བསྐྱངས་ཀྱིས་མཛད་པའི་བུདྡྷ་པཱ་ལི་ཏ་ལའི་ནང་དོན་འགའ་ཞིག་ལ་དོགས་སློང་གནང་བ་དེས། དཔལ་ལྡན་ཟླ་བ་གྲགས་པའི་དབུ་མ་ཚིག་གསལ་ནང་དུ་གསལ་བཤད་གནང་རྒྱུའི་གོ་སྐབས་བྱུང་ཡོད། དེ་བཞིན་དབུ་མ་ཐལ་རང་གི་ཁྱད་པར་ཏེ། ང་ཚོས་ཐལ་བཟློག་ཅེས་རྟགས་གསལ་མང་དུ་གཏོང་རྒྱུ་ཡོད་པ་དེ་དག་འདི་ལྟར་དུ་བྱུང་ཡོད། དེ་དག་ཧ་ཅང་བཀའ་དྲིན་ཆེན་པོ་རེད་འདུག
སློབ་དཔོན་ལེགས་ལྡན་འབྱེད་ཀྱིས་མཛད་པའི་དབུ་མ་སྙིང་པོ་རྩ་འགྲེལ་ཏེ། རང་འགྲེལ་རྟོག་གེ་འབར་བར་གཉིས་ཀ་ཧ་ཅང་གལ་གནད་ཆེན་པོ་རེད་འདུག །སང་ཉིན་གནངས་ཉིན་དབུ་མ་སྙིང་པོ་མཆན་འགྲེལ་གྱི་ཐོག་ནས་ཞུ་འཆར་ཡོད། དེ་ཡང་ཕྱོགས་གཅིག་ནས་སློབ་དཔོན་ལེགས་ལྡན་འབྱེད་ཧ་ཅང་གལ་གནད་ཆེན་པོ་རེད་འདུག་ཅིང་། ངོས་རང་ཆུང་ངུའི་སྐབས་སུ་སྐྱབས་རྗེ་གླིང་རིན་པོ་ཆེས་སློབ་དཔོན་ལེགས་ལྡན་འབྱེད་ལ་དམིགས་བསལ་ཐུགས་ཀྱི་ཚོར་བ་ཞིག་ཡོང་གི་འདུག་ཅེས་བཀའ་གནང་མྱོང་ཡོད། དེ་ལྟ་བུའི་ཐོག་ནས་ཤུགས་རྐྱེན་བྱུང་ཡོད་ལ། སློབ་དཔོན་ལེགས་ལྡན་འབྱེད་ལ་ཞེ་ས་མ་ཞུས་ན་སེམས་ཐག་ཉེ་པོ་ཞིག་ཆགས་ཡོང་གི་འདུག །
དེ་བཞིན་འགའ་ཞིག་གིས་གོ་ཐོས་བྱུང་ཡོད་ལས་ཆེ། གསེར་ཀོང་རྡོ་རྗེ་འཆང་ལ་གསང་ཡུམ་ཡོད་ཅིང་། དེ་ཡང་བླ་མ་རང་གི་ལུང་བསྟན་ཡོད་པ་དམིགས་བསལ་ཞིག་རེད་འདུག །ཁོང་མཁས་པ་ཆེན་པོ་ཞིག་ཀྱང་རེད་འདུག །གསེར་ཀོང་རྡོ་རྗེ་འཆང་གིས་གསུང་ཆོས་གནང་བའི་སྐབས་སུ། ཁྱེད་རང་ཚོས་ཆོས་རའི་ནང་དུ་སློབ་དཔོན་ལེགས་ལྡན་འབྱེད་ཀྱིས་བུདྡྷ་པཱ་ལི་ཏའི་དོན་དག་རྣམས་མ་དགོངས་པ་རེད་ཅེས་སྐྱོན་བརྗོད་ཤུགས་ཆེ་བྱེད་བཞིན་ཡོད། སློབ་དཔོན་ལེགས་ལྡན་འབྱེད་སྐུ་དངོས་ཕེབས་ཏེ་འགྲེལ་བཤད་བསྐྱོན་ན། ཁྱེད་རང་ཚོ་ཚང་མས་བཀའ་གནང་རང་རེད་ཅེས་བརྗོད་དགོས་པ་ཆགས་ངེས་རེད་ཅེས་བཀའ་གནང་མྱོང་ཡོད།
སློབ་དཔོན་ལེགས་ལྡན་འབྱེད་ནི། མཁས་པའི་དབང་པོ་རེད་འདུག །དེས་ན་དབུ་མའི་གཞུང་ཕལ་མོ་ཆེར་བཤད་ལུང་ཡོད་ཀྱང་། སློབ་དཔོན་ལེགས་ལྡན་འབྱེད་ཀྱིས་མཛད་པའི་དབུ་མ་སྙིང་པོར་བཤད་ལུང་མི་འདུག་པས། བཤད་ལུང་ཞིག་བྱུང་ན་སྙམ་ནས་མཁན་པོ་ཀུན་དགའ་དབང་ཕྱུག་མཆོག་ལ་དབུ་མ་སྙིང་པོར་མཆན་འགྲེལ་ཞིག་བརྩམས་རོགས་གནང་ཞེས་སྙན་གསེང་ཞུས་ཤིང་། དེ་ལྟའི་མཆན་འགྲེལ་མཛད་པའི་ཐོག་ནས་ངོས་ཀྱིས་བཤད་ལུང་ཞིག་ཞུས་པ་སོགས་སློབ་དཔོན་ལེགས་ལྡན་འབྱེད་ཀྱི་དབུ་མ་སྙིང་པོར་ཞབས་འདེགས་ཕྲན་བུ་བསྒྲུབས་ཡོད་སྙམ་པ་ཞིག་དྲན་གྱི་འདུག །
རྟེན་འབྲེལ་རྐྱེན་ཉིད་འདི་པ་ཙམ་ཉིད་ཀྱིས། །
མཐའ་གཉིས་སེལ་བའི་སྣང་སྟོང་དབུ་མའི་ཚུལ། །
ཟབ་རྒྱས་འདོམས་མཁས་
མདོ་ཕྱོགས་ཙམ་དུ་མ་ཟད། སྔགས་ཕྱོགས་ལའང་འགྲེལ་པ་སྒྲོལ་གསལ་སོགས་མཛད་པས་ན།
མདོ་སྔགས་ཡོངས་རྫོགས་ལམ། །
རྒྱས་མཛད་ཟླ་བ་གྲགས་པར་གསོལ་བ་འདེབས། །
ངོ་མཚར་རྨད་བྱུང་སྙིང་རྗེ་ཆེན་པོའི་ལམ། །
ཟབ་དང་རྒྱ་ཆེའི་རིགས་ཚུལ་རྣམ་མང་གིས། །
སྐལ་བཟང་གདུལ་བྱའི་ཚོགས་ལ་སྟོན་མཁས་པ། །
རྒྱལ་སྲས་ཞི་བ་ལྷ་ལ་གསོལ་བ་འདེབས། །
བར་སྐབས་དབུས་གཙང་གི་ཁུལ་དུ་སྤྱོད་འཇུག་གི་བཤད་པ་དར་སྲོལ་དེ་ཙམ་མེད་པ་ཆགས་འདུག་པས། ངོས་ཀྱི་ཁུ་ནུ་བླ་མ་རིན་པོ་ཆེ་བསྟན་འཛིན་རྒྱལ་མཚན་གྱི་དྲུང་ནས་དོན་གཉེར་ཆེན་པོ་བྱས་ཏེ་ཞུས་པ་ཡིན།
གདུལ་བྱའི་ཁམས་བཞིན་གཉིས་སྟོང་དབུ་མའི་ལམ། །
སྲོལ་གཏོད་དབུ་ཚད་རིགས་ཚུལ་འབྱེད་མཁས་ཤིང་། །
ཁ་བའི་ལྗོངས་སུ་རྒྱལ་བསྟན་སྤེལ་མཛད་པ། །
མཁན་ཆེན་ཞི་བ་འཚོ་ལ་གསོལ་བ་འདེབས། །
མཐའ་བྲལ་དབུ་མའི་ལྟ་དང་ཞི་ལྷག་ཟུང་། །
སྒོམ་རིམ་མདོ་རྒྱུད་བཞིན་དུ་ལེགས་བཀྲལ་ནས། །
གངས་ལྗོངས་རྒྱལ་བསྟན་འཁྲུལ་མེད་གསལ་མཛད་པ། །
པདྨའི་ངང་ཚུལ་ཞབས་ལ་གསོལ་བ་འདེབས། །
པདྨའི་ངང་ཚུལ་ཞབས་ཏེ། སློབ་དཔོན་ཀ་མ་ལ་ཤཱི་ལ་ཧ་ཅང་བཀའ་དྲིན་ཆེན་པོ་རེད་འདུག །བོད་ལ་ད་བར་དཔལ་ནཱ་ལེནྡྲའི་ཟབ་པ་དང་རྒྱ་ཆེ་བའི་གཞུང་ལུགས་རྣམས་འགྲེལ་བཤད་རྒྱག་རྒྱུ་ཡོད་པ་ཞིག་དང་། རྒྱུས་མངའ་ཡོད་པ་ནི་མཁན་ཆེན་ཞི་བ་འཚོ་དང་། སློབ་དཔོན་ཀ་མ་ལ་ཤཱི་ལའི་བཀའ་དྲིན་རེད།
དེང་སྐབས་འཛམ་གླིང་འདིའི་ཐོག་ཏུ་ནང་པའི་ཡུལ་གྲུ་མང་དུ་ཡོད་ལ། དེ་བཞིན་རྒྱ་ཧོར་བོད་གསུམ་ནི་ནཱ་ལེནྡྲའི་ཆོས་བརྒྱུད་འཛིན་མཁན་གཅིག་པ་ཆགས་ཡོད། འོན་ཀྱང་ལོ་ངོ་ཉི་ཤུ་སུམ་ཅུའི་རིང་རྩ་བ་བློ་ངོར་འཛིན་པ་དང་། འགྲེལ་པ་ཚིག་འབྲུ་རེ་རེ་བཞིན་འགྲེལ་བཤད་འཆད་ཉན་བྱས། རྒྱ་བོད་ཀྱི་འགྲེལ་པ་མང་དུ་ཡོད་རྣམས་ཀྱང་གུང་བསྒྲིགས་ཤིང་། ཚད་མའི་གཞུང་ལ་བརྟེན་ནས་རྟགས་གསལ་བཏང་སྟེ་སྒྲོ་འདོགས་བཅད་ནས་འགྲོ་སྲོལ་ཡོད་པ་ནི། བོད་གཅིག་པུ་ཡིན་པ་ལས་གཞན་སུའང་མེད། དེ་ལྟ་བུའི་མཁན་ཆེན་ཞི་བ་འཚོའི་ཐུགས་རྗེ་བཀའ་དྲིན་ལ་བརྟེན་ནས་གཞུང་ལུགས་དེ་དག་བོད་པས་ལེགས་སྦྱར་གྱི་གཞུང་ལ་ལྟ་མི་དགོས་པར། བོད་ཡིག་ནང་དུ་བསྒྱུར་དགོས་ཞེས་བཀའ་འགྱུར་པོ་ཏི་བརྒྱ་ལྷག་ཙམ་དང་། བསྟན་འགྱུར་པོ་ཏི་ཉིས་བརྒྱ་ལྷག་ཙམ་ཡོད་པ་རྣམས་ཞི་བ་འཚོའི་ལམ་སྟོན་གྱི་ཐོག་ནས་ཆོས་རྒྱལ་བཀའ་དྲིན་ཅན་རྣམས་ཀྱིས་ཀྱང་དགོངས་པ་བཞེས་པ་སྟེ། ཆོས་རྒྱལ་སྲོང་བཙན་སྒམ་པོའི་དགོངས་བཞེད་ལྟར། རྒྱ་གར་གྱི་ཡི་གེ་ལ་དཔེ་བླངས་ནས་བོད་པ་རང་ཉིད་ཀྱི་ཆེད་དུ་བོད་ཡིག་དམིགས་བསལ་ཞིག་སློབ་དཔོན་ཐོན་མིས་མཛད་ཡོད།
དེང་སྐབས་འཛམ་གླིང་འདིའི་ཐོག་དངོས་ཡོད་གནས་ཚུལ་ལ་ནཱ་ལེནྡྲའི་ཟབ་པ་དང་རྒྱ་ཆེ་བའི་ལམ་གྱི་རིམ་པའི་སྐོར་ལ་འགྲེལ་བཤད་རྒྱག་དགོས་བྱུང་ཚེ་བོད་ཀྱི་སྐད་ཡིག་འདི་ཉིད་ཡག་ཤོས་ཆགས་ཡོད། འདི་ངོས་རང་གི་ཉམས་མྱོང་གི་ཐོག་ནས་བཤད་ཐུབ་པ་ཞིག་ཡིན། བོད་ཀྱི་སྐད་ཡིག་གི་ཐོག་ཏུ་ཕྱུག་པོ་ཡོད་པ་དེ་དག་ནི། ལེགས་སྦྱར་ནས་བོད་སྐད་དུ་སྒྲ་བསྒྱུར་གནང་སྐབས་བོད་སྐད་ཀྱི་ཐོག་ནས་མིང་ཚིག་མ་འདང་བའི་རིགས་རྣམས་སྐད་གཉིས་སྨྲ་བའི་ལོ་ཙཱ་བ་རྣམས་ཀྱིས་མིང་ཚིག་གསར་པ་བཟོ་བཞིན་དུ་སྒྲ་བསྒྱུར་གནང་བ་ཞིག་ཆགས་ཡོད། དེས་ན་བོད་ཀྱི་སྐད་ཡིག་ནི་ལེགས་སྦྱར་གྱི་སྐད་དང་ཏག་ཏག་འགྲོ་ཐུབ་པའི་སྐད་ཡིག་ཅིག་ཀྱང་ཡིན། ལེགས་སྦྱར་གྱི་སྐད་ཡིག་ནི། དེང་སྐབས་མཁས་དབང་འགའ་ཞིག་གིས་གསུངས་པ་ཙམ་ལས་བེད་སྤྱོད་རྒྱ་ཆེ་བ་མེད།
ད་ལྟ་འཛམ་གླིང་འདིའི་ཐོག་ཏུ་བེད་སྤྱོད་ཡོད་བཞིན་པའི་སྐད་ཡིག་གི་ནང་དུ་ནཱ་ལེནྡྲའི་མཁས་པའི་དབང་པོ་རྣམས་ཀྱི་གཞུང་ལུགས་འགྲེལ་བཤད་ཆ་ཚང་རྒྱག་ཐུབ་མཁན་ནི། ཕལ་ཆེར་བོད་ཀྱི་སྐད་ཡིག་ཁོ་ན་ཆགས་ཡོད། དེ་ལ་བསམ་བློ་གཏོང་སྐབས་དངོས་གནས་སྔོན་བྱོན་བོད་ཀྱི་ཆོས་རྒྱལ་ལོ་པཎ་དང་མཁས་གྲུབ་སྐྱེས་བུ་དམ་པ་རྣམས་ཀྱིས་རླབས་ཆེན་གྱི་དགོངས་པ་བཞེས་ཤིང་། སྐུ་ལས་ཤུགས་ཆེ་བསྐྱོན་འདུག་སྙམ་པ་ཞིག་ཡོང་གི་འདུག །དེང་སྐབས་བོད་ཀྱི་རིག་གཞུང་ཞེས་བརྗོད་སྐབས་དངོས་ཡོད་གནས་ཚུལ་ལ་འཛམ་གླིང་འདིའི་ཐོག་མགྲིན་པ་གཟེངས་སུ་བསྟོད་ནས་བྱ་རྒྱུ་ཡོད་པ་ཞིག་ཆགས་ཡོད། སྤྱིར་ཆོས་ཁས་ལེན་མཁན་དག་གི་ཁྲོད་དུ་ཚན་རིག་ཅེས་བརྗོད་སྐབས་བག་ཡོད་བསྟེན་དགོས་པ་ཞིག་ཆགས་ཀྱི་ཡོད། འོན་ཀྱང་དཔལ་ནཱ་ལེནྡྲའི་ཆོས་བརྒྱུད་ལ་རྒྱུས་མངའ་དང་གོམས་འདྲིས་ཡོད་པ་དག་གིས་ཚན་རིག་པ་དང་ཐུག་འཕྲད་བྱ་རྒྱུར་སྤོབས་པ་དང་སྤྲོ་སྣང་ཡོད་པ་ཞིག་ཡོང་གི་ཡོད།
སྔར་སྤྱི་ཁྱབ་མཁན་པོ་དགའ་བྲང་བློ་བཟང་རིག་འཛིན་གྱིས་དེ་རིང་མཇིང་པར་ཞག་ཚི་ཞིག་བྱུགས་ནས་མཇིང་པ་འགྲེང་དགོས་པ་མིན་ནམ། ཞེས་བརྗོད་བཤད་པ་ལྟར། དངོས་གནས་ནཱ་ལེནྡྲའི་གཞུང་ལུགས་རྣམས་རྒྱུས་མངའ་ཡོད་པ་ཞིག་ཡིན་ན། ཕྱི་ནང་གི་མཁས་པ་སུ་ཞིག་ཐུག་ཀྱང་སྤོབས་པ་དང་བཅས་པའི་ཐོག་ནས་འགྲེལ་བཤད་རྒྱག་ཐུབ་པ་དང་གོ་བསྡུ་བྱེད་ཐུབ་པ་ཞིག་ཡོང་གི་འདུག །དེ་ནི་སྔོན་གྱི་མཁན་སློབ་ཆོས་གསུམ་གདན་འཛོམས་ནས་མཁན་ཆེན་ཞི་འཚོ་ཡབ་སྲས་དེ་དག་གི་ཐུགས་རྗེ་བཀའ་དྲིན་དང་། བོད་གངས་ཅན་ལྗོངས་ཀྱི་རྒྱལ་བློན་བྱང་སེམས་དང། མཁས་གྲུབ་ལོ་པཎ་རྣམས་ཀྱི་ཐུགས་རྗེ་བཀའ་དྲིན་རེད་འདུག །དེས་ན་ང་ཚོ་བོད་ཀྱི་རིག་གཞུང་ཞེས་བརྗོད་སྐབས་མགྲིན་པ་གཟེངས་སུ་བསྟོད་ཅིང་སྤོབས་པ་བྱ་རྒྱུ་ཡོད་པ་ཞིག་ཆགས་ཡོད།
དེ་སྔ་ང་ཚོ་བོད་ལ་ཡོད་སྐབས། བོད་མི་ཤ་སྟག་གི་ནང་དུ་གནས་ཤིང་། ང་ཚོ་བཙན་བྱོལ་བ་ཆགས་པའི་རྐྱེན་གྱི་མི་མང་པོ་དང་རྒྱ་ཆེན་པོའི་འབྲེལ་བ་བྱ་རྒྱུའི་གོ་སྐབས་བྱུང་བ་དང་། རིམ་བཞིན་འབྲེལ་བ་བྱེད་སྐབས་དངོས་གནས་བོད་ཀྱི་གཞུང་ཆེན་གྱི་སློབ་གཉེར་དང་། ལྟ་གྲུབ་ཀྱི་སློབ་སྦྱོང་ཡོད་པ་དེ་དག་གཞན་དང་མི་འདྲ་བའི་བསམ་བློ་གཏོང་རྒྱུ་ཡོད་པ་ཞིག་དང་། རྒྱུ་མཚན་འགྲེལ་བཤད་བྱ་རྒྱུ་ཡོད་པ་ཞིག་མཐོང་སྐབས་གཞན་གྱིས་ཆ་འཇོག་བྱེད་ཀྱི་འདུག །འདི་ལྟར་བསམ་བློ་གཏོང་སྐབས། ང་ཚོ་བོད་ཤོར་ནས་བཙན་བྱོལ་བ་ཆགས་ཏེ་གནས་པ་ནི་རྐྱེན་ངན་གྲོགས་ལ་ཤར་བ་ལྟ་བུ་ཞིག་ཏུ་མཐོང་གི་འདུག །མདོར་ན། ང་ཚོ་བཙན་བྱོལ་བ་ཆགས་ཟིན་པས། ད་ནི་བཙན་བྱོལ་བ་ཆགས་པའི་དོན་གོ་ཆོད་པ་ཞིག་བྱས་ན་ཡག་པོ་ཡོད། གཞིས་ལུས་རྒྱ་ཆེའི་མི་མང་རྣམས་ཀྱི་བློ་གཏད་བཅོལ་ས་ཞིག་དང་། བཙན་བྱོལ་དུ་བོད་རིགས་རྣམས་སྲ་ཐག་ཐག་ཡོད་ལ། བོད་ཀྱི་ཆོས་དང་རིག་གཞུང་འཛམ་གླིང་འདིའི་ཐོག་ཏུ་སྟོན་རྒྱུ་ཡོད་པ་ཞིག་ཆགས་ནས་ཡོད་བསམ་པ་བཅས་གཞིས་ལུས་རྒྱ་ཆེའི་མི་མང་རྣམས་ཀྱི་སེམས་ནང་སྤྲོ་སྣང་སླེབས་པ་ཞིག་དང་། བོད་ཀྱི་སངས་རྒྱས་ཀྱི་བསྟན་པ་དང་། དེ་དང་འབྲེལ་བའི་བོད་ཀྱི་སྐད་ཡིག་དེ་དག་ནམ་ཡང་ནུབ་ས་མ་རེད་སྙམ་པའི་སྙིང་སྟོབས་སླེབས་ས་དང་། རེ་བ་བཅོལ་ས་ལ་ཞིག་ཆགས་ཡོང་གི་འདུག །
ང་ཚོ་འདིར་བཙན་བྱོལ་ལ་ཡོད་པ་རྣམས་ལ་ཆ་མཚོན་ནའང་། གཞིས་ལུས་རྒྱ་ཆེའི་མི་མང་རྣམས་ཀྱི་སྙིང་སྟོབས་སྲོག་དང་བསྡོས་ཏེ་བཟུང་བ་མཐོང་སྐབས། ཨ་ཙི་ང་རང་ཚོ་རང་དབང་ལུང་པའི་ནང་དུ་སླེབས་ཡོད། ང་ཚོས་ཧུར་ཐག་འབད་ཐག་མ་བྱས་ན་མི་འགྲིག་སྙམ་པའི་སྙིང་སྟོབས་སླེབས་པ་ཞིག་ཡོད། ཡང་སྙིང་བོད་མི་ས་ཡ་དྲུག་ལྷག་ཙམ་ཡོད་པ་རྣམས་དུས་ཚོད་ཁག་པོའི་སྐབས་སུ་ང་ཚོ་ཚང་མ་རྡོག་ལ་བསྒྲིལ་བ་ཞིག་ཆགས་ཡོད། དེ་སྔ་ངོས་རང་སྐྱེས་སའི་ཟི་ལིང་གི་གྲོང་གསེབ་ལ་ཆ་མཚོན་ན། དགའ་ལྡན་ཕོ་བྲང་དེ་ཙམ་རྒྱུས་མེད་ཅིང་། ང་ཚོ་རྐྱེན་ངན་གྲོགས་སུ་ཤཪ་ནས་ཆོལ་གསུམ་བོད་རིགས་ཡོངས་རྫོགས་རྡོག་རྩ་གཅིག་ལ་བསྒྲིལ་བ་ཞིག་ཆགས་ཡོད། དེ་ནི་རྐྱེན་ངན་གྲོགས་ལ་ཤར་བ་རེད། མི་རིགས་ཀྱི་ལ་རྒྱ་དང་། མི་རིགས་ཀྱི་སྙིང་སྟོབས་ཧ་ལས་པ་ཞིག་རེད་འདུག།།
ང་ཚོ་མི་རིགས་ཀྱི་སྙིང་སྟོབས་དང་ལ་རྒྱ་དེ་ཡང་རང་རྒྱལ་གཞན་ཕམ་མིན་པར་རྒྱ་ཆེ་བའི་འགྲོ་བ་མི་མང་པོ་ཞིག་ལ་ཕན་ཐོགས་ཡོང་ཐུབ་ཐབས་ལ་བསམ་བློ་གཏོང་བཞིན་ཡོད། ཁ་ཡོད་ལག་ཡོད་རྒྱ་མི་རིགས་རྣམས་ང་ཚོས་བཙན་དབང་ཤོད་མཁན་ལྟ་བུ་ཆགས་ཡོད་ཀྱང་། སྤྱི་ཡོངས་ཀྱི་རྒྱ་མི་རིགས་དེ་བཞིན་དེ་སྔ་ཆོས་རྒྱལ་དག་གི་སྐུ་དུས་ནས་གྲོགས་པོ་བཟོས་པ་གནང་སྟེ་གྲོགས་པོ་ཆགས་ནས་བསྡད་ཡོད་ལ། དེང་སྐབས་ལ་ཆ་མཚོན་ནའང་། རྒྱ་རིགས་ནང་པ་ས་ཡ་བཞི་བརྒྱ་མ་ཟིན་ཙམ་ཡོད་པ་ཧ་ཅང་ཕོན་ཆེ་ཆགས་ཡོད། དེ་དག་གིས་དོ་སྣང་ཤུགས་ཆེ་བྱེད་བཞིན་འདུག །དེ་དག་ལ་ང་ཚོས་གཅིག་ཕན་གཅིག་གྲོགས་བྱེད་ཐུབ་པ་ཞིག་ཏན་ཏན་ཡོད།
དེ་ཡང་ཕྱི་ལོ་ ༡༩༧༤ ལོ་ནས་བཟུང་ང་ཚོས་བོད་རང་བཙན་མི་རྩོད་པར་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཅེས་པའི་ཚིག་འདིའི་འོག་ནས་ང་ཚོར་ཐོབ་ཐང་འདྲ་མཉམ་ཡོད་པ་ཞིག་བྱུང་ན་རྒྱལ་ཁབ་གཅིག་གྱུར་དེའི་ནང་བསྡད་ན་དགེ་མཚན་འདུག་ཅེས་བརྗོད་པའི་རྒྱུ་མཚན་འདི་ལྟར་རེད། ང་ཚོས་ཁ་ནས་སེམས་ཅན་ཐམས་ཅད་ཅེས་བརྗོད་བཞིན་ཡོད། ང་ཚོས་ཚད་མེད་བཞི་འདོན་སྐབས་སུའང་། སེམས་ཅན་ཐམས་ཅད་ཅེས་བརྗོད་ཀྱི་ཡོད་པ་ལས། བོད་པ་གཅིག་པུ་ཞེས་བརྗོད་ཀྱི་མེད་ལ། བོད་པའི་ནང་ནས་ཀྱང་ཁམས་གཅིག་པུ་དང་། ཨ་མདོ་གཅིག་པུ། དབུས་གཙང་གཅིག་པུ། དེའི་ནང་ནས་ཀྱང་སྟོད་པ་གཅིག་པུ་བརྗོད་པ་ལྟ་བུ་གཏན་ནས་མིན། ང་ཚོས་ཁ་ནས་སེམས་ཅན་ཐམས་ཅད་ཅེས་བརྗོད་པ་ནི་རྫུན་མིན་པར་ཁ་ཞེ་གཉིས་མེད་ཆགས་ཡོད། སེམས་ཅན་ཐམས་ཅད་ཅེས་བརྗོད་ན། སྐར་ཚོགས་མཐའ་ཡས་པ་ཞིག་ཡོད་ཅིང་། ཆོས་སྐད་ལྟར་ན། སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་བྱེ་བ་ཕྲག་བརྒྱ་ཞེས་བརྗོད་པ་རྣམས་ཀྱང་བདེན་པ་ཆགས་ཡོད། དེ་དག་ནས་ར་འཕྲོད་ཡོང་གི་ཡོད། དེ་ལྟར་སེམས་ཅན་ཐམས་ཅད་ཅེས་བརྗོད་ཀྱི་ཡོད་ཀྱང་། དེ་དག་ལ་ང་ཚོས་སྨོན་ལམ་འདེབས་པ་ཙམ་ལས་ཕན་གནོད་བྱ་རྒྱུ་གང་ཡང་མེད། ཕན་གནོད་བྱ་རྒྱུར་འབྲེལ་བ་ཡོད་པ་ནི། འཛམ་གླིང་འདིའི་ཐོག་གི་སེམས་ཅན་རྣམས་ཆགས་ཡོད། དེ་དག་ལས་དུད་འགྲོ་དང་སྲོག་ཆགས་འབུ་སྲིན་རྣམས་ལ་ང་ཚོས་སྨོན་འདེབས་རྒྱུ་ལས་གང་ཡང་བྱ་རྒྱུ་མེད། སྙིང་རྗེ། བྱ་རིགས་དྭགས་རྣམས་མཐོང་སྐབས་གང་དྲག་སྙམ་སྟེ་སྨོན་ལམ་འདེབས་པ་ལས་བྱ་རྒྱུ་གང་ཡང་མི་འདུག །ཐབས་ཤེས་བྱ་རྒྱུ་ཡོད་པ་ནི། འགྲོ་བ་མི་དུང་ཕྱུར་བདུན་ཅུ་ཙམ་ཡོད་པ་རྣམས་སྐད་རིགས་མི་འདྲ་བ་ཡོད་ཀྱང་། སྐད་རིགས་ཡོད་པ་དང་། མིའི་ཀླད་པ་གཅིག་མཚུངས་ཡིན་པར་བརྟེན་ཕན་ཚུན་འབྲེལ་བ་བྱེད་ཐུབ་པ་ཞིག་དང་། ཕན་ཐོགས་བྱེད་ཐུབ་པ་ཞིག་ཀྱང་ཡོད། དེས་ན་ཁ་ཡོད་ལག་ཡོད་ཀྱི་ཐོག་ནས་གཞན་ཕན་ཇི་ཙམ་སྒྲུབ་ཐུབ་པ་ཞིག་བྱུང་ཡང་། དེའི་ཐོག་ཏུ་བསམ་བློ་གཏོང་དགོས་པ་ཡིན། དེར་བརྟེན་རྒྱ་མི་རིགས་རྣམས་ལོ་རྒྱུས་ཀྱི་ཐོག་ནས་ནང་པ་ཡིན་ལ། བོད་དང་དམིགས་བསལ་འབྲེལ་བ་ཡོད་སྟབས། ཆབ་སྲིད་ཀྱི་རྒྱུ་མཚན་གྱི་ཐོག་ནས་ང་ཚོས་རང་ཕྱོགས་དང་གཞན་ཕྱོགས་ཞེས་ཤུགས་ཆེར་འཛིན་ཀྱང་རྒྱ་ཆེ་བའི་དགོས་པ་གང་ཡང་མེད། ང་ཚོ་གྲོགས་པ་གྲོགས་མཆེད་ཀྱི་ཐོག་ནས་ང་ཚོའི་སྡུག་བསྔལ་རྣམས་སེལ་ཐུབ་པ་ཞིག་དང་། བདེ་བ་སྒྲུབ་ཐུབ་པ་ཞིག །དེ་ཡང་གཉིས་ཕན་གྱི་ཐོག་ནས་སྒྲུབ་ཐུབ་པ་ཞིག་ལ་བསམ་བློ་གཏོང་བཞིན་ཡོད་ལ་ང་ཚོར་རྒྱུ་མཚན་ཡོད།
དེང་སྐབས་རྒྱ་མི་རིགས་མང་པོ་ཞིག་གིས་དོ་སྣང་གསར་པ་ཞིག་སླེབས་བཞིན་ཡོད། ང་ཚོས་མཐའ་གཅིག་ཏུ་རང་རྒྱལ་གཞན་ཕམ་གྱི་སྐད་ཆ་ཤོད་ཀྱི་མེད། དེ་དག་ལ་བསམ་བློ་གཏོང་སྐབས། ང་ཚོ་བོད་མི་རིགས་འདི་ཉིད་འཕགས་པ་སྤྱན་རས་གཟིགས་ཀྱི་གདུལ་བྱ་ཞེས་བརྗོད་ཀྱི་ཡོད་ལ། དེ་ལྟར་བརྗོད་པ་ལྟར་སྔོན་གྱི་བོད་ཀྱི་རྒྱལ་བློན་བྱང་ཆུབ་སེམས་དཔའི་ཚོགས་རྣམས་ཀྱིས་བོད་མི་རིགས་དེ་ཉིད་འབུར་ཐོན་ཞིག་བཟོས་པ་གནང་འདུག །ད་ལྟ་ང་ཚོའི་མི་རབས་འདི་དག་གིས་དཀའ་སྡུག་མང་པོ་ཞིག་མྱངས་ན་ཡང་། ང་ཚོ་བོད་ཀྱི་གཏམ་དཔེར།
མཆོད་རྟེན་མགོ་མཇུག་ལོགས་ཀྱང་། །བང་རིམ་སྐེད་པར་གནས་ཡོད། །
ང་ཚོ་འཛམ་གླིང་ཐོག་མགྲིན་པ་གཟེངས་སུ་བསྟེགས་ནས་བསྡད་ཡོད། རྒྱ་མི་རིགས་ཤིག་ཡིན་ནའང་། བློ་གཟུ་བོར་གནས་པ་རྣམས་ཡིད་སྨོན་སྐྱེ་དགོས་པ་ཞིག་ཆགས་ཡོད། དེས་ན་ད་ལྟ་ཕན་ཆད་ང་ཚོའི་སྒྲིག་འཛུགས་ཀྱི་ཐོག་ནས་བཤད་ནའང་། ཚང་མས་ཧུར་ཐག་འབད་ཐག་གནང་ནས་མི་རབས་འགའ་ཞིག་ཕྱིན་པ་རེད། སྔོན་མ་ཀུན་བདེ་གླིང་ཛ་སག་དང་། དབང་རྡོར་ལགས། ཚེ་དབང་རྟ་མགྲིན་ལགས་ཁོང་རྣམ་པས་ཧུར་ཐག་འབད་ཐག་བྱས་སོང་། དེ་ནས་མི་རབས་འགའ་ཞིག་ཕྱིན་ནའང་ཚང་མས་ཧུར་འབད་བྱས་པའི་གྲུབ་འབྲས་ལ་བཙན་བྱོལ་བའི་སྒྲིག་འཛུགས་དང་བཅས་པ་བཙན་བྱོལ་བ་འདྲ་འདྲའི་ནང་ནས་མི་འདྲ་བའི་གོང་བུའི་ནུས་པ་ཞིག་དང་། དེ་ཡང་ཆབ་སྲིད་གཅིག་པུའི་ཐོག་ནས་མིན་པར་ཆོས་དང་རིག་གཞུང་། རྒྱ་ཆེ་སའི་ཐོག་ནས་འཛམ་གླིང་སྤྱི་ལ་ཕན་ཐོགས་གང་འཚམ་བྱེད་ཐུབ་པ་ཞིག་གི་མཚམས་སུ་སླེབས་ཡོད།
ངོས་ནས་རྟག་ཏུ་བརྗོད་བཞིན་པ་ཞིག་ལ། འཕགས་པ་སྤྱན་རས་གཟིགས་ཀྱི་གདུལ་ཞིང་དང་བཅས་ཏེ་ཐུན་མོང་མ་ཡིན་པའི་འབྲེལ་བ་ཡོད་པ་ཞིག་རེད། ད་ལྟའི་ང་ཚོའི་མི་རབས་འདིས་མི་གོ་བཅད་ཡོད་ཅེས་བརྗོད་ཀྱི་ཡོད་ལ། རྟག་ཏུ་འདི་ལྟར་དྲན་གྱི་འདུག །དེ་རིང་འདི་གར་བཀའ་བློན་རྣམས་དང་། གྲོས་ཚོགས་ཀྱི་འཐུས་མི་བཅས་འཛོམས་ནས་ཡོད། ང་ཚོའི་མི་རབས་ནས་མི་རབས་བར་དཀའ་ལས་བརྒྱབ་ནས་རང་ཉིད་ཀྱི་བདེན་དོན་དེ་ཉིད་མཐའ་འཁྱོངས་པ་ཞིག་ད་བར་བྱས་པ་རེད་ལ། མ་འོངས་པར་བདེན་པའི་མཐའ་ཏན་ཏན་གསལ་ངེས་རེད། ཐུགས་རྗེ་ཆེ་ཞེས་བརྗོད་ཀྱི་ཡིན། ད་དུང་ཡང་ཚང་མས་སེམས་ཤུགས་བསྐྱེད་ནས་ཧུར་ཐག་གནང་ཤོག །བློ་རྒྱ་བསྐྱེད་ནས་བྱ་རྒྱུ་དེ་གལ་གནད་ཆེན་པོ་རེད་འདུག །གཅིག་ཁོ་ནར་བསམས་ནས་བསམ་བློ་གུ་དོག་མི་གཏོང་བར་བློ་རྒྱ་བསྐྱེད་ནས་བསམ་བློ་བཏང་ན། ཏན་ཏན་བདེན་མཐའ་གསལ་ལ་ཉེ་བ་ཞིག་གི་མཚམས་སུ་འགྲོ་བཞིན་ཡོད།
གཙོ་ཆེ་ཤོས་དཔལ་ལྡན་ནཱ་ལེནྡྲའི་ཆོས་བརྒྱུད་འཛིན་མཁན་ནི། གཞུང་ཆེན་སློབ་གཉེར་བྱེད་མཁན་རྣམས་ཡིན་ཅིང་། ས་དགེ་བཀའ་རྙིང་རིས་སུ་མ་ཆད་པའི་གཞུང་ཆེན་བཅུ་གསུམ་གྱི་རིགས་རྣམས་ལྟ་མཁན་དེ་རྣམས་ནཱ་ལེནྡྲའི་ཆོས་བརྒྱུད་འཛིན་མཁན་ཆགས་ཡོད། ཚིག་གི་འདོན་པ་ཁོ་ན་བཏོན་པ་དེས་ནཱ་ལེནྡྲའི་ཆོས་བརྒྱུད་འཛིན་གྱི་མེད། དཔེར་ན། བསམ་བློ་ཞིག་ཐོངས་དང་། ནཱ་ལེནྡྲའི་པཎ་གྲུབ་བཅུ་བདུན་ལས་མགོན་པོ་ཀླུ་སྒྲུབ་ཡར་ཙམ་དེར་བཞུགས་ཤིང་། སློབ་དཔོན་ཨཱརྱ་དེ་བས་ཉེ་འཁྲིས་སུ་མཛོ་སྐད་བརྒྱབ་ནས་བཞུགས་པ་ལྟ་བུ་ཞིག་ཕལ་ཆེར་མེད། དེ་དག་གིས་གཞུང་ཆེན་སློབ་སྦྱོང་གནང་སྟེ། མགོན་པོ་ཀླུ་སྒྲུབ་ཀྱིས་འགྲེལ་བཤད་བསྐྱོན་ནས་འཁྲིད་པ་དང་། པཎ་གྲུབ་གཞན་རྣམས་ཀྱིས་གསན་བཞིན་དུ་ཟིན་བྲིས་བསྐྱོན་པ་དང་། ཁོང་རྣམས་ནས་ཀྱང་སློབ་བརྒྱུད་སྤེལ་བ་སོགས་ཀྱི་ཐོག་ནས་ཕྱིན་འདུག །དེས་ན་པཎ་གྲུབ་བཅུ་བདུན་གྱི་གཞུང་ཆ་ཚང་ལྟ་མཁན་སྔ་མོ་ས་སྐྱར་ཧ་ཅང་ཡག་པོ་ཡོད་ཅིང་། བར་སྐབས་དེ་དག་ཉམས་དམས་སུ་ཕྱིན་པ་དང་། ས་སྐྱར་མཚོན་ན། ཆོས་རྗེ་ས་པཎ་རང་ཉིད་ཀྱིས་ཀྱང་ཚད་མ་རིགས་གཏེར་ལྗགས་རྩོམ་མཛད་ཡོད། དེ་ལྟར་ཚད་མའི་གཞུང་ལ་ཐུགས་སྣང་ཆེན་པོ་གནང་ཡོད། ཕྱིས་སུ་རི་བོ་དགེ་ལྡན་པ་རྣམས་ཡག་ཤོས་ཆགས་ཡོད། ང་ཚོ་བཙན་བྱོལ་ཆགས་རྗེས་ཀྱང་གདན་ས་གསུམ་གཙོ་བོར་གྱུར་པའི་གཞུང་ཆེན་སློབ་གཉེར་བྱེད་མཁན་གྱི་དགོན་སྡེ་རྣམས་ནཱ་ལེནྡྲའི་ཆོས་བརྒྱུད་འཛིན་མཁན་བཏགས་དོན་བཙལ་དགོས་བྱུང་ན། གདན་ས་ཁག་དེ་དག་རེད། ད་བར་ཧུར་ཐག་བྱས་པ་རེད། ད་དུང་ཡང་ཚང་མས་ཧུར་འབད་བྱེད་དགོས། གཞུང་ལུགས་དེ་དག་སྦྱངས་ནས་རང་ཉིད་ལ་མཚོན་ནའང་འདི་ཕྱི་གཉིས་ཡོད་ཡོང་བ་ཞིག་ཆགས་ཡོད། གཞན་དང་ཐུག་འཕྲད་བྱུང་ཡང་སྤོབས་པ་ཆེན་པོའི་ཐོག་ནས་བཤད་རྒྱུ་ཡོད་པ་བཅས་བསྟན་པའི་ཞབས་འདེགས་སྒྲུབ་ཐུབ་པ་ཞིག་ཆགས་ཀྱི་ཡོད།
བྱམས་པས་རྗེས་བཟུང་ཐེག་ཆེན་སྡེ་སྣོད་ཀུན། །
ལེགས་པར་སྤེལ་མཁས་རྒྱ་ཆེན་ལམ་སྟོན་ཞིང་། །
རྒྱལ་བའི་ལུང་བཞིན་རྣམ་རིག་ཤིང་རྟའི་སྲོལ། །
འབྱེད་མཛད་ཐོགས་མེད་ཞབས་ལ་གསོལ་བ་འདེབས། །
ཆོས་མངོན་སྡེ་བདུན་གཉིས་སྟོང་སྲོལ་བཟུང་ནས། །
བྱེ་མདོ་རྣམ་རིག་གྲུབ་མཐའ་གསལ་མཛད་པ། །
ཀུན་མཁྱེན་གཉིས་པར་གྲགས་པའི་མཁས་པའི་མཆོག །
སློབ་དཔོན་དབྱིག་གཉེན་ཞབས་ལ་གསོལ་བ་འདེབས། །
ཐུབ་པའི་གཞུང་ལུགས་དངོས་སྟོབས་རིགས་པ་ཡིས། །
སྟོན་ཕྱིར་ཚད་མའི་སྒོ་བརྒྱ་ལེགས་ཕྱེ་ནས། །
རྣམ་དཔྱོད་བློ་མིག་སྦྱིན་མཛད་ཚད་མ་པ། །
ཕྱོགས་ཀྱི་གླང་པོའི་ཞབས་ལ་གསོལ་བ་འདེབས། །
ཕྱོགས་གླང་ཆོས་གྲགས་རྣམ་གཉིས་ཧ་ཅང་བཀའ་དྲིན་ཆེན་པོ་རེད་འདུག །ཚད་མ་ཀུན་བཏུས་ཀྱི་མཆོད་བརྗོད་གཅིག་པུར་མཚོན་ནའང་། ཚད་མ་རྣམ་འགྲེལ་གྱི་ལེའུ་གཉིས་པའི་ནང་འགྲེལ་བཤད་བསྐྱོན་སྐབས་ཧ་ལས་པ་ཞིག་རེད་འདུག །
ངོས་ནས་རྟག་ཏུ་ཞུ་མུས་ལྟར། ཐའེ་ལན་ཌིའི་མཁས་དབང་གང་འཚམ་ཞིག་དང་ང་ཚོ་ཐུག་འཕྲད་བྱུང་སྟེ། བདེན་བཞི་མི་རྟག་སོགས་བཅུ་དྲུག་དང་། བྱང་ཕྱོགས་སོ་བདུན་སོགས་ཀྱི་སྐོར་ལ་གོ་བསྡུར་ཧ་ཅང་ཡག་པོ་ཞིག་བྱུང་ཞིང་། མཇུག་ཏུ་ངོས་ནས། ཁྱེད་རང་ཚོས་བདེན་བཞི་སོགས་འགྲེལ་བཤད་བསྐྱོན་སྐབས་ལུང་ཙམ་ལ་བརྟེན་ནས་འགྲེལ་བཤད་བསྐྱོན་གྱི་ཡོད་དམ། རིགས་པས་སྒྲུབ་ཀྱི་ཡོད་དམ། ཞེས་བཀའ་འདྲི་ཞུས་པར། ལུང་ཙམ་ལ་བརྟེན་ནས་འགྲེལ་བཤད་བསྐྱོན་གྱི་ཡོད་ཅེས་གསུངས་བྱུང་། ངོས་རང་དེ་མ་ཐག་ཏུ་སློབ་དཔོན་ཕྱོགས་གླང་ཆོས་གྲགས་རྣམ་གཉིས་དྲན་བྱུང་། བདེན་བཞི་མི་རྟག་སོགས་བཅུ་དྲུག་རྣམས་ནི། ཚད་མ་རྣམ་འགྲེལ་ལས[3]།
དེ་ཕྱིར་མི་རྟག་ལས་སྡུག་བསྔལ། །སྡུག་བསྔལ་ལས་ནི་བདག་མེད་གསུངས། །
ཞེས་རིགས་པའི་ལམ་ནས་བསྒྲུབས་པ་གནང་བས་ཧ་ཅང་རྩ་ཆེན་པོ་རེད་འདུག །
ཕྱི་ནང་ཚད་མའི་གནད་ཀུན་ལེགས་དགོངས་ཤིང་། །
མདོ་སེམས་ཟབ་རྒྱས་ལམ་ཀུན་རིགས་ལམ་ནས། །
ངེས་སྟེར་རྨད་བྱུང་ཆོས་ཚུལ་འདོམས་མཁས་པའི། །
ཆོས་ཀྱི་གྲགས་པའི་ཞབས་ལ་གསོལ་བ་འདེབས། །
ཐོགས་མེད་སྐུ་མཆེད་ལས་འོངས་ཤེར་ཕྱིན་དོན། །
ཡོད་མེད་མཐའ་བྲལ་དབུ་མའི་སྲོལ་བཞིན་དུ། །
རྒྱན་གྱི་གཞུང་དོན་སྣང་བའི་སྒྲོན་མེ་སྦར། །
འཕགས་པ་གྲོལ་སྡེའི་ཞབས་ལ་གསོལ་བ་འདེབས། །
ཡུམ་དོན་འབྱེད་ལ་རྒྱལ་བའི་ལུང་བསྟན་ཐོབ། །
མི་ཕམ་མགོན་པོའི་མན་ངག་ཇི་བཞིན་དུ། །
ཡུམ་གསུམ་ཤེར་ཕྱིན་གཞུང་མཆོག་གསལ་མཛད་པའི། །
སློབ་དཔོན་སེང་གེ་བཟང་པོར་གསོལ་བ་འདེབས། །
འདུལ་བ་འབུམ་སྡེའི་དགོངས་དོན་ལེགས་བསྡུས་ནས། །
ཐམས་ཅད་ཡོད་སྨྲའི་ལུགས་བཞིན་སོ་སོ་ཐར། །
མ་ནོར་ལེགས་འདོམས་བརྟན་མཁས་མཆོག་གྱུར་པ། །
ཡོན་ཏན་འོད་ཀྱི་ཞབས་ལ་གསོལ་བ་འདེབས། །
ང་ཚོའི་འདུལ་བའི་ཉམས་ལེན་རྣམས་སློབ་དཔོན་ཡོན་ཏན་འོད་དང་། ཤཱཀྱ་འོད་རྣམ་གཉིས་ཀྱིས་མཛད་པའི་འདུལ་གཞུང་རྣམས་ཀྱི་ཁྲོད་ནས། དཔེར་ན། འདུལ་བ་མདོ་རྩ་བ་ལྟ་བུ་བློ་ངོར་འཛིན་པ་སོགས་ཀྱི་ཐོག་ནས་དཔེ་ཆ་ལྟ་བ་དང་། ཀུན་མཁྱེན་མཚོ་སྣ་བས་མཛད་པའི་མཚོ་ཊཱིཀ་དང་། ཐམས་ཅད་མཁྱེན་པ་རྗེ་དགེ་འདུན་གྲུབ་པས་མཛད་པའི་དམ་པའི་ཆོས་འདུལ་བ་མཐའ་དག་གི་སྙིང་པོའི་དོན་ལེགས་པར་བཤད་པ་རིན་པོ་ཆེའི་ཕྲེང་བ་སོགས་ང་ཚོས་ལྟ་བཞིན་ཡོད།
སྔར་ངོས་རང་ཐའེ་ལན་ཌིའི་མཁས་དབང་འགའ་ཞིག་དང་མཇལ་འཕྲད་བྱུང་བས། ང་ཚོ་ཚང་མ་སྟོན་པའི་རྗེས་འབྲང་གཅིག་གྱུར་རེད། མི་འདྲ་བ་ཅུང་ཟད་རེ་ཡོད་ཅེས་བརྗོད་ཅིང་། དེ་རྗེས་ངོས་ནས་འདུལ་བའི་ཉམས་ལེན་སྐོར་དང་། རྩ་བའི་སྡེ་པ་བཞི་གསུངས་པའི་ནང་ནས་ང་ཚོ་གཞི་ཐམས་ཅད་ཡོད་པར་སྨྲ་བའི་སྡེ་པ་དང་། ཁྱེད་རང་ཚོ་ཐའེ་ལན་ཌི་སོགས་འཕགས་པ་གནས་བརྟན་པའི་སྡེ་པ་ཡིན་པས། སྡེ་པ་མི་འདྲ་བ་ཆགས་ཡོད་པས་ཁྱེད་རང་ཚོའི་པྲ་ཏི་མོ་ཀྵཿསྟེ་སོ་སོར་ཐར་པའི་མདོ་རྣམས་པཱ་ལིའི་སྐད་ཡིག་ཐོག་ཏུ་ཡོད་ཅིང་། ང་ཚོའི་འདུལ་བའི་གཞུང་ལུགས་རྣམས་ལེགས་སྦྱར་གྱི་སྐད་ཡིག་ཐོག་བཞུགས་ཡོད། འོན་ཀྱང་འདུལ་ཁྲིམས་དངོས་གཞི་གསུང་སྐབས་ཕམ་པ་བཞི་དང་། ལྷག་མ་བཅུ་གསུམ། སྤང་ལྟུང་སུམ་ཅུ། འབའ་ཞིག་པ་དགུ་བཅུ་བཅས་ལས། ཁོང་རྣམ་པར་འབའ་ཞིག་པར་གོ་གཉིས་དང་། ཉེས་བྱས་ལའང་ཁྱད་པར་ཅུང་ཟད་ཡོད་པ་སྟེ། ཁོང་རྣམ་པར་དོན་ལྔ་དང་། ང་ཚོར་ཉེས་བྱས་བརྒྱ་དང་ཉི་ཤུ་བཅས་ཁྱད་པར་ཅུང་ཟད་ཡོད་པ་རྣམས་ངོ་སྤྲོད་ཞུས་པར། ཁོང་གིས་ཧ་ལས་ལས་ལྟ་བུས་ཁྱེད་རང་ཚོར་འདུལ་བའི་ཉམས་ལེན་ཞིབ་ཚགས་དེ་ལྟར་ཡོད་དམ། ཞེས་གསུང་གི་འདུག །དེས་ན་ཕྱི་རྒྱལ་བ་བོད་ཀྱི་ལོ་རྒྱུས་འབྲི་མཁན་དེ་རིགས་ཀྱིས་བོད་ཀྱི་ཆོས་དེ་བླ་མའི་ཆོས་ལུགས་རེད་ཅེས་སྡོམ་པ་ཡང་དེ་ཙམ་མེད་པར་ཁྲི་མཐོན་པོའི་ཐོག་ཏུ་བཞུགས་པ་ལྟ་བུའི་ཆོས་ལུགས་ཤིག་ལ་མཐོང་གི་ཡོད། དེས་ན་འདུལ་བའི་གཞུང་ལུགས་རྣམས་ཧ་ཅང་གལ་གནད་ཆེན་པོར་རེད་འདུག །
དེ་ལྟར་བར་སྐབས་ཤྲཱི་ལངྒའི་མཁས་དབང་དང་ང་ཚོའི་བར་འབྲེལ་བ་ཡོང་བཞིན་ཡོད་ལ། ང་ཚོས་ཐེག་དམན་ཞེས་ཕར་མི་འཇོག་པར། པཱ་ལིའི་ཆོས་བརྒྱུད་འཛིན་མཁན་དང་འདུལ་བའི་ཉམས་ལེན་གྱི་ཐོག་ལ་རིམ་བཞིན་བགྲོ་གླེང་བྱེད་པ་དང་། ཁོང་རྣམ་པའི་སྐད་ཡིག་ཐོག་ཡོད་ཀྱང་བོད་སྐད་དུ་མ་བསྒྱུར་བའི་གཞུང་ལུགས་ཡོད་སྲིད་པས་དེ་རིགས་བསྒྱུར་རྒྱུ་དང་། ཡང་བོད་ཡིག་ཐོག་ཡོད་པའི་འདུལ་གཞུང་ཕར་སྒྲ་སྒྱུར་བྱ་རྒྱུ་ལྟ་བུ་ང་ཚོས་བྱེད་ཐུབ་ན། ཐེག་པ་ཆེ་ཆུང་ཡོངས་རྫོགས་གཅིག་གྱུར་ཞིག་གི་ཐོག་ཏུ་འགྲོ་བ་ནི། ཚུལ་ཁྲིམས་ཀྱི་བསླབ་པའི་སྟེང་ནས་འགྲོ་བཞིན་ཡོད། དེ་བཞིན་ཏིང་ངེ་འཛིན་གྱི་བསླབ་པའི་ཐོག་ནས་ཀྱང་འགྲོ་བཞིན་ཡོད། ཤེས་རབ་ཀྱི་བསླབ་པའི་ཐོག་ནས་མངོན་པའི་སྡེ་སྣོད་ལ་ཐུན་མོང་མ་ཡིན་པའི་མངོན་པ་ཞེས་བརྗོད་སྐབས་ཤེར་ཕྱིན་གྱི་གཞུང་ལུགས་རྣམས་ཆགས་ཡོད། དེ་དག་མི་འདྲ་བ་ཆགས་ཡོད་པ་ལས། དེ་མིན་འདུལ་བའི་གཞུང་རྣམས་ང་ཚོ་ཚང་མའི་ཐུན་མོང་གི་རྨང་གཞི་གཅིག་གྱུར་ཞིག་ཆགས་ཡོད། དེས་ན་འདུལ་བའི་གཞུང་ནི་ཐུན་མོང་གི་ཉམས་ལེན་བྱེད་པ་དང་། ཐུན་མོང་ལ་གོ་རྟོགས་སྤེལ་བ་འདིའི་ཐོག་ནས་འགྲོ་དགོས་པ་ཡིན། དེ་རིགས་ལ་ང་ཚོས་ལས་འགུལ་མང་ཙམ་སྤེལ་ཐུབ་ན་སྙམ།
བསླབ་གསུམ་ཡོན་ཏན་ནོར་བུའི་མཛོད་ལ་དབང་། །
འདུལ་བསྟན་དྲི་མེད་རིང་དུ་སྤེལ་བའི་སླད། །
རྒྱ་ཆེན་གཞུང་དོན་ལེགས་བཀྲལ་འདུལ་འཛིན་མཆོག །
ཤཱཀྱ་འོད་ཀྱི་ཞབས་ལ་གསོལ་བ་འདེབས། །
ཐུབ་གསུང་ཟབ་རྒྱས་བཀའ་སྲོལ་མ་ལུས་པ། །
སྐྱེས་བུ་གསུམ་གྱི་ལམ་དུ་འདོམས་མཛད་དེ། །
གངས་ལྗོངས་ཐུབ་བསྟན་སྤེལ་བའི་དྲིན་ཅན་རྗེ། །
ཇོ་བོ་ཨ་ཏི་ཤ་ལ་གསོལ་བ་འདེབས། །
དེ་ལྟར་འཛམ་གླིང་རྒྱན་གྱུར་མཁས་པའི་ཕུལ། །
ངོ་མཚར་ལེགས་བཤད་འབྱུང་གནས་མཆོག་རྣམས་ལ། །
མི་ཕྱེད་དང་བའི་ཡིད་ཀྱིས་གསོལ་བཏབ་པས། །
བདག་རྒྱུད་སྨིན་ཅིང་གྲོལ་བར་བྱིན་གྱིས་རློབས། །
བདག་རྒྱུད་སྨིན་ཅིང་གྲོལ་བ་ཇི་ལྟར་བྱེད་དགོས་སམ་ཞེ་ན།
གཞི་ཡི་གནས་ཚུལ་བདེན་གཉིས་དོན་ཤེས་པས།
བདེན་བཞིས་འཁོར་བ་འཇུག་ལྡོག་ཇི་བཞིན་ངེས། །
ཚད་མས་དྲངས་པའི་སྐྱབས་གསུམ་དད་པ་བརྟན། །
ཐར་ལམ་རྩ་བ་ཚུགས་པར་བྱིན་གྱིས་རློབས། །
སྡུག་ཀུན་ཉེར་ཞིའི་ཐར་པ་དོན་གཉེར་བའི། །
ངེས་འབྱུང་བློ་དང་འགྲོ་རྣམས་སྐྱོབ་འདོད་པའི། །
ཕྱོགས་མཐས་གཏུགས་པའི་སྙིང་རྗེའི་རྩ་བ་ཅན། །
བཅོས་མིན་བྱང་སེམས་འབྱོངས་པར་བྱིན་གྱིས་རློབས། །
ཤིང་རྟ་ཆེན་པོའི་གཞུང་གི་དོན་རྣམས་ལ། །
ཐོས་བསམ་སྒོམ་པས་ཕ་རོལ་ཕྱིན་པ་དང་། །
རྡོ་རྗེ་ཐེག་པའི་ཟབ་གནད་ལམ་ཀུན་ལ། །
ངེས་པ་བདེ་བླག་རྙེད་པར་བྱིན་གྱིས་རློབས། །
སྐྱེ་ཞིང་སྐྱེ་བར་བསླབ་གསུམ་ལྡན་པའི་རྟེན། །
ལེགས་ཐོབ་བཤད་དང་སྒྲུབ་པས་ལུང་རྟོགས་བསྟན། །
འཛིན་ཅིང་སྤེལ་ལ་ཤིང་རྟ་ཆེ་རྣམས་དང་། །
མཚུངས་པར་བསྟན་ལ་བྱ་བ་བྱེད་པར་ཤོག །
འདུས་སྡེ་ཀུན་ཏུ་ཐོས་བསམ་བཤད་སྒྲུབ་ཀྱི། །
བྱ་བས་དུས་འདའ་ལོག་འཚོ་ཡོངས་སྤངས་པའི། །
དམ་པའི་མཁས་གྲུབ་རབ་ཏུ་འཕེལ་བ་ཡིས། །
འཛམ་གླིང་ས་ཆེན་རྟག་ཏུ་མཛེས་གྱུར་ཅིག །
དེ་མཐུས་མདོ་སྔགས་ཡོངས་རྫོགས་ས་ལམ་བགྲོད། །
དོན་གཉིས་ལྷུན་གྲུབ་རྣམ་མཁྱེན་རྒྱལ་བ་ཡི། །
གོ་འཕང་མྱུར་བ་ཉིད་དུ་ཐོབ་གྱུར་ནས། །
ནམ་མཁའ་ཇི་སྲིད་འགྲོ་བའི་དོན་བྱེད་ཤོག །
ཅེས་པ་འདི་བཞིན། སངས་རྒྱས་བཅོམ་ལྡན་འདས་ཀྱིས་ལེགས་པར་བསྟན་པའི་ཟབ་པ་དང་རྒྱ་ཆེ་བའི་ཆོས་ཚུལ་འདི་དག་ལ་རྒྱ་གར་འཕགས་པའི་ཡུལ་གྱི་མཁས་པའི་དབང་པོ་གོང་སྨོས་དེ་དག་གིས་རྣམ་དཔྱོད་ལྡན་པའི་སྐྱེས་བུའི་བློ་མིག་རྣམ་པར་འབྱེད་པའི་ལེགས་བཤད་རྨད་དུ་བྱུང་བ་ཇི་སྙེད་ཅིག་མཛད་དེ་མི་ལོ་ཉིས་སྟོང་ལྔ་བརྒྱ་ལྔ་བཅུར་ཉེ་བའི་དུས་ད་ལྟ་བར་ཐོས་བསམ་སྒོམ་པའི་གཞུང་དུ་ཉམས་པ་མེད་པར་གནས་ཡོད་པས་མཁས་པའི་དབང་པོ་དེ་དག་གི་བཀའ་དྲིན་རྗེས་སུ་དྲན་པ་དང་། མི་ཕྱེད་དད་པས་དེ་དག་གི་རྗེས་སུ་སློབ་པར་སྨོན་ཅིང་། དེང་དུས་འཛམ་གླིང་ཁྱོན་འདིར་ཚན་རིག་དང་། འཕྲུལ་ཆས་དངོས་པོ་ཡར་རྒྱས་ཚད་མཐོར་ཕྱིན་ཏེ་འདི་སྣང་འདུ་འཛིའི་རྣམ་གཡེང་འཁྲུག་ཆེའི་སྐབས་འདིར། རང་རེ་སངས་རྒྱས་ཀྱི་རྗེས་འཇུག་པ་རྣམས་སངས་རྒྱས་ཀྱི་ཆོས་ཚུལ་ལ་ཤེས་ནས་དད་པ་ཐོབ་པ་ཞིག་དགོས་གལ་ཤིན་ཏུ་ཆེ་བས། གཟུ་བོའི་བློས། ངའི་ཆོས་ལུགས་ཡིན་ཞེས། མིག་བཙུམས་ནས་རྨོངས་དད་བྱས་པ་ལྟ་བུ་དང་། དེ་ཆོས་ལུགས་གཞན་རེད་ཅེས་ཕར་འཇོག་པ་ལྟ་བུ་མིན་པར་གཉིས་ཀར་བློ་གཟུ་བོར་གནས་པའི་ཐོག་ནས་བརྟག་དཔྱད་བྱེད་དགོས། གཟུ་བོའི་བློས་ཞེས་པ་འདི་ཉིད་ཧ་ཅང་གལ་གནད་ཆེན་པོ་ཡིན། དེའི་ཐོག་ཏུ་ཐེ་ཚོམ་དགོས་ཤིང་། ལམ་སེང་བཀའ་གནང་རང་ཞེས་པ་ལྟ་བུ་མིན་པར། གང་ཡིན་ནམ་ཞེས་དྲི་བ་སླེབས་དགོས་པ་ཡིན།
ཐེ་ཚོམ་གྱི་སྒོ་ནས་ཞིབ་མོར་བརྟགས་ཤིང་། དཔྱད་དེ་རྒྱུ་མཚན་མཚོལ་བ་དང་། རྒྱུ་མཚན་མཐོང་ནས་ཤེས་རབ་ཀྱི་གྲོགས་དང་བཅས་པའི་དད་པ་སྐྱེ་བ་ལ། ཡོངས་གྲགས་རྒྱན་དྲུག་མཆོག་གཉིས་དང་། སངས་རྒྱས་བསྐྱངས། འཕགས་པ་གྲོལ་སྡེ་ལ་སོགས་པའི་ཟབ་རྒྱས་ཀྱི་གཞུང་ཕུལ་དུ་ཕྱིན་པ་དེ་དག་མེད་མི་རུང་དུ་མཐོང་ནས་རྒྱན་དྲུག་མཆོག་གཉིས་ཀྱི་སྐུ་ཐང་བྲིས་སྲོལ་སྔར་ནས་ཡོད་མུས་ཐོག་ཟབ་རྒྱས་ཀྱི་བླ་བརྒྱུད་གཞན་དགུ་བསྣན་ཏེ་ནཱ་ལེནྡྲའི་པཎ་གྲུབ་བཅུ་བདུན་གྱི་བྲིས་སྐུ་གསར་བཞེངས་དང་འབྲེལ། མཁས་པའི་སྐྱེས་མཆོག་དེ་དག་ལ་སྙིང་ནས་གུས་པའི་གསོལ་འདེབས་འདི་འདྲ་ཞིག་འབྲི་འདོད་བྱུང་བ་དང་། དོན་གཉེར་ཅན་ཆོས་གྲོགས་འགའ་ཞིག་ནས་ཀྱང་སྐུལ་མ་བྱུང་བར་བརྟེན། དཔལ་ནཱ་ལེནྡྲའི་པཎ་ཆེན་བཅུ་བདུན་གྱི་གསོལ་འདེབས་དད་གསུམ་གསལ་བྱེད་ཅེས་པ་འདི་དག་མཁས་པའི་དབང་པོ་དེ་དག་གི་ལེགས་བཤད་ལ་བཅོས་མིན་ཡིད་ཆེས་ཀྱི་དད་པ་ཐོབ་ཅིང་། མཁས་པ་དེ་དག་གིས་ལེགས་བཤད་སློབ་གཉེར་མཁན་གྱི་གྲལ་མཐར་འཁོད་པ། ཤཱཀྱའི་དགེ་སློང་བསྟན་འཛིན་རྒྱ་མཚོས། གནས་བརྟན་སྡེ་པའི་ལུགས་ཀྱི་སྟོན་པ་བདེ་བར་གཤེགས་ནས་ལོ་གྲངས་ ༢༥༤༥ བོད་རབ་བྱུང་བཅུ་བདུན་པའི་ལྕགས་སྦྲུལ་ཟླ་བ་ ༡༡ ཚེས་ ༡ ཕྱི་ལོ་ ༢༠༠༡ ཟླ་བ་ ༡༢ ཚེས་ ༡༥ ཉིན། རྒྱ་གར་ཧི་མ་ཅལ་མངའ་སྡེའི་ཀང་ར་རྫོང་ཁོངས། དྷ་རམ་ས་ལ་ཐེག་ཆེན་ཆོས་གླིང་དུ་གྲུབ་པར་བགྱིས་པ་དགེ་བར་གྱུར་ཅིག། །།
འདི་ནི་པཎ་གྲུབ་བཅུ་བདུན་གྱི་གསོལ་འདེབས་དང་། པཎ་གྲུབ་བཅུ་བདུན་ངོ་སྤྲོད་ལྟ་བུ་ཞིག་ཀྱང་ཡིན། ཞེས་བཀའ་སྩལ་ཏོ།། །།
[1] བསྟན་འགྱུར་དཔེ་བསྡུར། དབུ་མ། ༼ཙ༽ དེབ་ཨང་ ༥༧ པ། ༢༠༠༨ ལོ། ཤོག་གྲངས་ ༣
[2] བསྟན་འགྱུར་དཔེ་བསྡུར་མ། དབུ་མ། ༼ཙ༽ དེབ་ཨང་ ༥༧ པ། ༢༠༠༠ ལོ། ཤོག་གྲངས་ ༤༥༡
[3] བསྟན་འགྱུར་དཔེ་བསྡུར་མ། ཚད་མ། ༼ཅེ༽ དེབ་ཨང་ ༩༧ པ། ༢༠༠༨ ལོ། ཤོག་གྲངས་ ༥༢༣