མཁའ་འགྲོ་ཡེ་ཤེས་མཚོ་རྒྱལ་གྱི་སྐྱེས་རབས་རྣམ་ཐར་རྒྱས་པ།

༄༅། །མཁའ་འགྲོ་ཡེ་ཤེས་མཚོ་རྒྱལ་གྱི་སྐྱེས་རབས་རྣམ་ཐར་རྒྱས་པ་ཞེས་བྱ་བ་བཞུགས།།

 

(རྡོ་རྗེ་གླིང་པས་གཏེར་ནས་བཞེས།)

ཨེ་མ་ཧོ༔ དུས་གསུམ་རྣམ་དག་ཀ་དག་དུས་ཀྱི་ཚེ༔ བཀའ་བབ་བརྒྱུད་པའི་བྱིན་རླབས་གནས་ཀྱི་ཚེ༔ ཞག་སྟོད་དུས་གྲོ་ལྷོ་བྲག་མཁར་ཆུ་དང་༔ སྲིན་མོ་སྤར་ཟའི་དམྱལ་སྨད་དགེ་རི་བྲག༔ ཨུ་རྒྱན་པདྨའི་སྒྲུབ་ཕུག་བྱིན་རླབས་གནས༔ ཁོ་མོ་བདག་གི་སྙིང་གི་མདངས་ལ་གནས༔ ལས་ཅན་དོན་དུ་རི་བྲག་ལུང་པ་རྣམས༔ ཨུ་རྒྱན་ཁོ་མོ་གཉིས་ཀྱིས་བསྒྲུབས་ཕྱིར་ཡིན༔

མཁའ་འགྲོའི་སྐད་དུ༔ དྷཀྐི་ཛྙཱ་ན་ཀ་རི་ནི༔ བོད་སྐད་དུ༔ མཁའ་འགྲོ་ཡེ་ཤེས་མཚོ་རྒྱལ་གྱི༔ སྐྱེས་རབས་རྣམ་ཐར་རྒྱས་པ་ཞེས་ཀྱང་བྱ༔ བདེན་པ་རང་འབྱུང་དངོས་སྤྲུལ་སྐུ་ལྔ་འཆང་༔ སྣ་ཚོགས་སྤྲུལ་པའི་སེམས་ཅན་བདེ་ལ་བཀོད༔ ཕྱི་རྒྱུད་དག་པའི་མཁའ་འགྲོའི་བསྟན་པ་འཛིན༔ ནང་རྒྱུད་དག་པ་འགྲོ་བའི་དོན་མཛད་པ༔ གསང་རྒྱུད་དག་པ་བདེ་ཆེན་ཆོས་ཀྱི་དབྱིངས༔ འགྲན་གྱི་དོ་མེད་རྫུས་སྐྱེས་པདྨ་འབྱུང་༔ གསང་གསུམ་འཛིན་མཛད་ཁོ་མོ་མཚོ་རྒྱལ་ང་༔ དུས་གསུམ་རྒྱལ་བའི་ཁམས་ན་མཚུངས་མེད་རྗེ༔ རྒྱལ་བའི་བཀའ་ལས་མཚུངས་མེད་རྩོལ་མེད་རྗེ༔ ཡེ་གྲོལ་ཀློང་ཡངས་ཀ་དག་དུས་ཀྱི་ཚེ༔ གུ་རུའི་ཐུགས་སུ་ཆུད་པའི་ཁོ་མོ་བདག༔ མི་འདུལ་ལས་ཅན་ཁ་ལོ་རྣམ་བསྒྱུར་བ༔ མཁའ་འགྲོ་ལྔ་ནི་ཡོངས་སུ་གནས་པར་བྱ༔ བདག་རྒྱུད་འཆང་བའི་འགྲོ་བའི་དོན་མཛད་པ༔ བསྟན་གཉིས་ཡ་མ་ཟུང་གིས་རབ་སྤེལ་བྱེད༔ མདོ་སྔགས་ཐབས་ཀྱིས་ཤེས་རབ་སྙིང་པོའི་བཀའ༔ ཉེ་བར་བསྒྲུབས་པའི་གསང་སྔགས་བསྟན་པའི་བཀའ༔ ཀ་དག་དུས་ཚེ་འགྲོ་བའི་དོན་ལ་དགོངས༔ ཐབས་ཤེས་དབྱེར་མེད་བདེ་བ་ཆོས་ཀྱི་སྐུ༔ གཡོ་མེད་ཡེངས་མེད་ཚུལ་འཆོས་དྲི་མ་བྲལ༔ རྣམ་དག་རྒྱལ་བའི་ཆོས་ཀྱི་དབྱིངས་མེད་པ༔ གསལ་སྟོང་འཁོར་འདས་རང་བཞིན་གནས་པ་ལ༔ ཉི་མ་ཟླ་བའི་མིང་ཡང་མི་གྲགས་བཙལ་ཀྱང་མི་རྙེད་པ༔ ཏིང་འཛིན་ཟས་ཀྱི་རང་བཞིན་གསལ་བ་ལས༔ ཟས་ཞེས་བྱ་བའི་མིང་ཡང་མི་གྲགས་བཙལ་ཀྱང་མི་རྙེད་པ༔ སྐོམ་དུ་བདུད་རྩི་ཆུ་རྒྱུན་རང་བཞིན་ལ༔ སྐོམ་ཞེས་བྱ་བའི་མིང་ཡང་མི་གྲགས་བཙལ་ཀྱང་མི་རྙེད་པ༔ ཏིང་འཛིན་མཚོན་ཆའི་རང་བཞིན་གསལ་བ་ལ༔ འཐབ་ཅིང་རྩོད་པའི་མིང་ཡང་མི་གྲགས་བཙལ་ཀྱང་མི་རྙེད་པ༔ འགྲོ་བའི་དོན་ལ་གང་འདུལ་མཉེས་པའི་ཕྱིར༔ ཐབས་ཀྱིས་སྟོན་པའི་མཁའ་འགྲོ་དཔག་ཏུ་མེད༔ དང་པོ་ཡེ་གྲོལ་ཆོས་དབྱིངས་ཀུན་བཟང་མོ༔ འགྲོ་བའི་དོན་ལ་ཐུགས་རྗེས་མཉེས་མཛད་པ༔ བར་དུ་བདེ་གཤེགས་མཆོག་གི་ཡུམ་ཆེན་མོ༔ ཐ་མ་སྐྱེ་མེད་དགེ་སློང་ཀུན་དགའ་མོ༔ ལས་རབ་ཡེ་ཤེས་མཁའ་འགྲོ་དབང་མོ་ཆེ༔ ཐབས་ཀྱིས་འགྲོ་འདུལ་ལབ་ཀྱི་སྒྲོན་མ་ཞེས༔ དེ་ཚེ་བྱེ་བྲག་ཉི་ཟླའི་སྒྲོན་མ་དང་༔ མཁའ་འགྲོ་དག་པའི་སྐྱེ་བ་སྣ་ཚོགས་བཞེས༔ མ་དག་འགྲོ་བའི་སྐྱེ་བ་སྣ་ཚོགས་བཞེས༔ བར་མ་དོར་གནས་ལས་ཀྱི་རབ་མོང་མོ༔ བདེར་གཤེགས་མཆོག་བརྙེས་མཁའ་འགྲོ་ཨ་སུ་ལོ༔ གཉིས་མེད་མི་འགྱུར་མཁའ་འགྲོ་སུ་ཀ་སྨན༔ གཡེང་མེད་དུས་མཉམ་མཁའ་འགྲོ་འདར་མ་སི༔ མཉམ་མེད་རྣམ་དག་མཁའ་འགྲོ་དྷ་བ་ནི༔ མཚུངས་མེད་བྱང་ཆུབ་རྒྱལ་མཚན་ཞེས་བྱ་བ༔ དུས་གསུམ་དུས་མེད་མཁའ་འགྲོ་དུས་ཀྱི་ཚེ༔ མཁའ་འགྲོ་དབྱིངས་ཅན་བར་མ་དོར་ན་གནས༔ སྐབས་སྐབས་མཐུན་པའི་སྐྱེ་བ་དཔག་མེད་བཞེས༔ ཐོག་མཐའ་བར་མ་ལྷ་དང་འདུ་འབྲལ་མེད༔ སྤྲུལ་པ་འགྲོ་བའི་དོན་མཛད་མང་པོ་འགྱེད༔ གང་འདུལ་ཐབས་ཀྱིས་འགྲོ་ལ་བརྩེ་བར་དགོངས༔ དབྱངས་ཅན་ལས་སྤྲུལ་ཁོ་མོ་མཚོ་རྒྱལ་ང་༔ ངོ་མཚར་མཆོག་གིས་ཡ་མཚན་རྨད་དུ་བྱུང་༔ འགྲོ་ལ་ཁོ་མོ་བདག་གིས་ནི༔ དེ་ཚེ་བྱེ་བྲག་བགྲང་གིས་མི་ནུས་སོ༔ མཁར་ཡུལ་ས་ཁོག་དག་པའི་ས་ཡུལ་ནས༔ ཡང་ཡུལ་ལྷོ་སྒོ་འདྲ་བའི་གནས་ཡུལ་ནས༔ དྲིན་ཆེན་མཁར་ཆུ་ལས་རྣམས་ཆེ་བ་ནི༔ ཕ་ཡི་མིང་ལ་རྒྱལ་སྲས་མཁར་ཕུབ་མིང་༔ མ་ཡི་མིང་ལ་རྩང་ཟ་སྦས་སྒྲོན་ཞེས༔ ལས་ཅན་དེ་གཉིས་སྲས་པོ་དཔལ་དབང་ཕྱུག༔ ཁོ་མོ་མཚོ་རྒྱལ་བདག་ནི་ཡང་༔ ཤིང་བྱའི་བྱ་ཟླའི་ནམ་སོ་མངལ་དུ་ཞུགས༔ ཁོ་མོ་བསམ་པའི་གནས་བྱས་སྡུག་བསྔལ་ཆེ༔ སྦྲུལ་ཟླའི་རྒྱལ་ལ་བབ་པའི་མངལ་དུ་ལྷུང་༔ མཁར་ཕུབ་བསམ་པའི་བུད་མེད་རིགས་ཡིན་བསམ༔ སྦས་སྒྲོན་གྱིས་མཁར་ཕུབ་ལ་ཚིག་འདི་སྨྲས༔

ངའི་རྨི་ལམ་ནི༔ ལྷོ་ནུབ་ཕྱོགས་ནས་གསེར་གྱི་ཉི་མ་ཤར་ནས་འགྲོ་བ་ཡོངས་ལ་གསལ་བ་རྨིས༔ ཉི་ཟེར་ནི་མཁར་ཆུ་ལ་ཟུག་ནས་གསལ་བའི་འོད་མདངས་བ་རྨིས༔ ཅི་ཡིན་ནམ༔ མཁར་ཕུབ་ཀྱིས་ཚིག་འདི་སྨྲས་པ༔ ལུས་པ་ལ་གནས་པའི་བུ་མོ་འདི་འདྲ་བ་གཅིག་མཁའ་འགྲོ་མ་ཡིན་པར་འདུག༔ མིའི་རིགས་ཡིན་ན་སངས་རྒྱས་གཅིག་འདྲ༔ ངས་དུང་གི་ཟླ་བ་ཚེས་པ་རྨིས༔ ཞེས་སྨྲས་པ༔ ཞག་གསུམ་ནང་བར་ནས་བུ་མོ་བཞད་པ༔ སྦས་སྒྲོན་གྱིས་མཁར་ཕུབ་ལ་ཅི་བཏགས་ཟེར༔ དཔལ་གྱི་དབང་ཕྱུག་གིས༔ ཨ་མ་འདི་ལ་མིང་བཏགས་རན་པ་ཨེ་འདུག་ཟེར༔ མཁར་ཕུབ་ཀྱི་ཞལ་ནས༔ ནམ་སོ་བབས་པའི་མངལ་དུ་ཞུགས་པ༔ རྒྱལ་ལ་བབས་པའི་སད་པའི༔ དབུ་ལ་མིང་བཏགས་ནས༔ ཡེ་ཤེས་མཚོ་རྒྱལ་བཏགས༔ ཡེ་ཤེས་ནི་མཁའ་འགྲོ་མའི་རིགས་ཡིན༔ ནམ་མཚོ་ལ་མངལ་ཞུགས་ཀྱི་མཚོ༔ རྒྱལ་ལ་སད་པའི་རྒྱལ་བཏགས་པ་མིང་འགྲིག་ཟེར་བ༔ ཁོ་མོ་བསམས་ནས་མིང་བཏགས་པ་མཚར་བསམས་ནས་བཞད་པ༔ ད་ཡང་ཆོས་ལ་མོས་ཏེ་བྱེད་བསམས་ན་གང་དུ་བྱེད༔ འགྲོ་དགོས་ནས༔ ཨ་མ་ང་ཆོས་ལ་མོས་ད་ཆོས་བྱེད་ཟེར༔ སྒྲོན་མས་བུ་མོ་ཁྱོད་ཆོས་ལ་མོས་ནས་ཆོས་བྱེད་ཁོམ་སྟེ༔ ཆོས་བྱེད་པའི་ཆོས་མེད་ཟེར་བ༔ བོན་པོ་ཆོས་མང་ཡོད་འདུག༔ བུ་མོ་ཨ་མ་ངའི་ཆོས་སྐལ་ཡོངས་པའི་དོན་མ་མཆིས༔ སྐབས་སྐབས་བདག་གིས་གསོལ་བ་བཏབ་པས་ཞེ་བློ་བདེ་བ༔ ཞེས་སྨྲས་པ༔ མིང་པོ་དབང་ཕྱུག་ཞལ་ནས༔ བུད་མེད་ཆོས་མོས་པ་ཞག་གསུམ་ནས་གཏམ་བྱེད་པ༔ བུད་མེད་ཀྱི་རིགས་དེ་འདྲ་ཨེ་ཡིན་ནམ༔ ཞེས་གསུངས་པ༔ ཡེ་ཤེས་མཚོ་རྒྱལ་གྱིས་དགོངས་ནས༔ ངས་ཆོས་ལ་མོས་པས་ཆོས་གཅིག་བྱེད་བསམས་ན་ཉིན་དུས་རང་བསམ་པ་ནུབ་དུས་བསམས་ནས་ཆོས་བྱེད་བསམས་ནས་མགུར་འདི་ལྟར་བཞེངས་སོ༔

ཨེ་མ་ཧོ༔ གླིང་ཉམས་ཡུལ་ཉམས་སྐྱེས་པ་མི་སྲིད་དོ༔ རྩང་སྟོད་མཁར་ཆུ་ཡུལ་ནས་སྐྱེས་སྲིད་པ༔ མཁར་ཆུ་བུད་མེད་མཚོ་རྒྱལ་ང་༔ འདི་ལ་ཐོས་པས་དུས་མེད་གངས་བཅས་པ༔ ཆོས་ཤིག་བྱེད་བསམ་གང་དུ་ཆོས་སྐལ་ཡོད༔ མི་མོ་ཁོ་མོ་བདག་གིས་ཆོས་ཤིག་བྱས༔ དགེ་ལ་མོས་པ་དམ་པའི་ཆོས་བསམ་པ༔ རིགས་ནི་མ་མཆིས་མཁར་ཆུ་རྒྱུད་པའི་རིགས༔ ལུས་མ་མཆིས་པའི་བུ་མོ་བདག་གི་ལུས༔ སྐྱེས་པའི་ལུས་ཡིན་བདག་གིས་ཆོས་བྱེད་དམ༔ རང་དབང་འཚོ་བའི་བར་སྐབས་དུས་གནས་པ༔ ལྟ་བའི་མཐུན་འཇུག་གྲོགས་པོའི་གནས་པ་མེད༔ བུ་མོ་བདག་གིས་དམ་ཆོས་བྱེད་བསམས་ནས༔ སྐབས་ལ་བབ་པ་ཡོད་ན་བདག་གིས་བྱེད༔ མཁར་རྒྱུད་འདི་ལ་སྐྱེས་པའི་བཟང་ངམ་ཡོད༔ ཕ་ནི་རྒྱལ་སྲས་མཁར་ཕུབ་མཆིས་པ་མེད༔ མ་ནི་རྩང་ཟ་སྦས་སྒྲོན་དོན་མ་མཆིས༔ ནུ་བུ་མཚོ་སྒྲོན་གནས་པ་འཆི་མེད་པ༔ མིང་པོ་དཔལ་གྱི་དབང་ཕྱུག་དོན་མ་མཆིས༔ མཆིས་པའི་སྐབས་ཀྱི་དོན་གོ་ལས་སྔས་པ༔ བུ་མོ་བདག་གིས་ལུས་རྙེད་རབ་དགའ་བ༔ ཆོས་གཅིག་མི་བྱེད་བདག་གི་ཕུང་ཁམས་འདི༔ མི་ལུས་སྟོང་ཟད་བྱེད་པའི་དོན་ཆུང་བ༔ ཆོས་གཅིག་བྱས་པའི་ཡོན་ཏན་བགྲང་མི་ནུས༔ ཞེས་དེ་འདྲ་གསུངས་པ༔ མཁར་ཕུབ་ཀྱིས་ཆོས་བྱེད་པ་མི་ཤེས་པ༔ ཅི་བྱེད་དམ༔ བུད་མེད་དམ་པའི་ཆོས་ལོབ་ནི་མི་སྣང༔ ཁྱེད་དམ་ཆོས་བྱེད་ངེས་པ་ཅན་ཡིན་ནམ༔ ལས་བྱེད་པའི་དོན་འགྲུབ་བོ་གསུངས༔ མཚོ་རྒྱལ་གྱི་ཞལ་ནས༔ ངས་ཆོས་གཅིག་བྱེད་པའི་དུས་ལ་བབས་པའི་སྐབས་མཆིས་པ་ཡོད༔ ཅེས་སྨྲས་ནས་མགུར་འདི་ལྟར་གསུངས༔

ཨེ་མ་བདག་གི་ལས་དབང་ཡོད་དེ་ཆོས་བྱས་པ༔ རང་ལ་འཁོད་པའི་ལས་དབང་ཆོས་ལོབ་པ༔ མ་ལོབ་བདག་གི་ལུས་ཁང་ལས་མེད་པ༔ རིག་པ་དམན་ནམ་སྙིང་རུས་ཆེ༔ བསྒོམ་ཞེས་མེད་ན་བརྩོན་འགྲུས་ཆེ༔ ཤེས་རབ་མེད་ན་སྤྲོས་པ་ཆེ༔ བུ་མོ་རང་རིགས་ཆོས་བསླབ་པ༔ སྒྲ་བསྒྱུར་མེད་པའི་ཆོས་གཅིག་བསླབས༔ ལོབ་སྟེ་དོན་ནི་མཆིས་པ་མེད༔ ཅེས་གསུངས་པ༔  ཡུལ་པ་ཐམས་ཅད་ཀྱིས་བུ་མོ་འདི་སྐུ་མདོག་འཛུམ་པ་བྱུ་རུ་འདྲ༔ གཏམ་མཁས་པ་འདི་ངོ་མཚར་སྨྲས་པ༔ བུ་མོ་ནུབ་མོ་རྨི་ལམ་རྨིས་པ་ཉི་མ་དུང་ཤར་སྐར་ཚོགས་མང་པོ་རྒྱས་པ་གཅིག་རྨིས༔ དེ་ནང་པར་ཡེ་ཤེས་མཚོ་རྒྱལ་གྱི་ཞལ་ནས༔ ཨེ་མ་ངས་མདང་རྨི་ལམ་གཅིག་རྨིས་ནས་དུས་བཟང་བའི་སྐབས་ཅི་ཡིན་ནམ་དྲིས༔ མའི་རྨི་ལམ་རང་རྨིས་པ་དག་པའི་ལས་ཅི་ཡང་མེད་ཟེར༔ ཁོ་མོ་ཉིན་བསྒོམ་ནུབ་བསྒོམ་ནས་ཆོས་གཅིག་བྱེད་བསམ་པའི་མཁར་ཡུལ་ནམ་མཁའ་ནས་བལྟས་ནས་འདི་གསུངས་སོ༔

སྔ་རབས་དྲིན་ཅན་བླ་མ་མེད་པ་ནས༔ ད་ཡང་ཁོ་མོས་བསྒོམ་པས་པདྨ་འབྱུང་༔ ནུབ་དུས་རྨིས་པའི་དོན་གོ་གནས་ཀྱི་ཚེ༔ ཐུགས་རྗེས་བཟུང་བའི་སྐབས་ནས་ཨེ་མཆིས་སམ༔ ཆོས་གསུངས་པདྨའི་མདུན་དུ་ཡོད་ན་དགའ༔ པི་ཝང་རྒྱུན་ཐག་པདྨའི་གསུང་སྐད་དྲན༔ མཚན་མཆོག་ལྡན་པའི་པདྨ་འབྱུང་གནས་དྲན༔ གང་ལ་དྲན་ནས་པདྨ་མེད་ཐབས་མེད༔ ཆོས་གཅིག་བྱེད་ན་ཁོ་མོ་ཞེ་བློ་བདེ༔ འདི་ལ་ཐོས་ནས་དྲན་པའི་དུས་མཆིས་པ༔ པདྨ་མཐོང་བའི་ཞལ་གཅིག་ཨེ་གཟིགས་སམ༔ མ་འོངས་གྲོགས་བྱེད་ཡིན་ན་པདྨའི་ཞལ་གཟིགས་ཤོག༔ ཅེས་སྨྲས་ནས༔ ནམ་མཁའ་ནས་སྤྲིན་འཇའ་གཅིག་ཡོང་ནས་ཁོ་མོ་ཐོག་ནས་ཐོན་པའི་དུས༔ ཨུ་རྒྱན་ནམ་མཁའ་ནས་ཞལ་གཟིགས་ནས༔ རིགས་ཀྱི་བུ་མོ་བདག་ལ་འབོད་པ་ཅི་ཞིག་ཡིན༔ ཁྱོད་ལ་ཅི་བྱུང་ནས་ཐབས་གང་ལ་ཡང་མ་རག་པ༔ ང་ལ་འབོད་ནས་ཅི་བྱེད་དམ༔ ཞེས་གསུངས་པ༔ མཚོ་རྒྱལ་གྱི་ཞལ་ནས༔ བདག་གིས་ཆོས་གཅིག་རབ་བྱེད་བསམས་ནས༔ ཁྱོད་ནས་འབོད་པ༔ ང་ལ་རེག་ཅིང་དགེ་འདོད་པ༔ དཔའ་བོ་གཡུལ་ལས་རྒྱལ་གྱུར་པའི༔ ཆོས་ལ་མོས་པས་ཁོ་མོ་ཞེ་བློ་བདེ༔ ཁྱེད་མཐོང་ཙམ་ནས་བདག་ནི་རབ་གྲོལ་བ༔ བུ་མོ་བདག་གིས་རྟོགས་པས་ཞེ་བློ་བདེ༔ ཆོས་གསུངས་བུ་མོ་བདག་གིས་རབ་རྟོགས་ནས༔ ཁྱེད་ལ་འབོད་པ་བདག་གིས་བཀའ་མ་བདེ༔ རིགས་ཤིང་དབུལ་བའི་བདག་ལ་བཀའ་སྩལ་པ༔ ཐོས་ནས་དགའ་བའི་བདག་གིས་རིགས་རྟོགས་པ༔ ཞེས་ཞུས་པ༔ པདྨའི་ཞལ་ནས༔ མངོན་སྤྱོད་ལས་ཀྱིས་བཀའ་མི་མཐུན་པའི་ཆོས་མོས་པའི་རྒྱ་གར་སྐད་བསྒྱུར་བའི་ཐབས་ཡིན་ནམ༔ ཅི་བྱེད་པ༔ ཁོ་མོས་ཞུས་པ༔ ཚེ་གཅིག་ཏུ་སངས་རྒྱས་ཐབས་གཅིག་གནང་བར་ཞུ༔ ཨུ་རྒྱན་གྱི་ཞལ་ནས༔ ཚེ་གཅིག་ཏུ་སངས་རྒྱས་པའི་ཐབས༔ བདེ་ཆེན་ངེས་པར་སྐྱེ་བ་གཅིག་ཡིན་ནས༔ དྲན་པའི་གནས་སུ༔ ཨོཾ་ཨཱ༔ ཧཱུཾ༔ བཛྲ་གུ་རུ་པདྨ་སིདྡྷི་ཧཱུཾ༔ ཞེས་བཟླས་ནས༔ མཐོང་གྲོལ་རེག་གྲོལ་ཡིན་གསུངས༔ ཨུ་རྒྱན་ནམ་མཁའ་ནས་ཡལ་ནས༔ མཚོ་རྒྱལ་ཆོས་མང་པོ་ཉན་པར་མ་ཡོང་བ་བསམས་ནས་མགུར་འདི་ལྟར་དུ་བཞེངས་པ༔

ཀྱེ་མ་མི་རྟག་འཁོར་བའི་ཆོས༔ ལས་དབང་ཆེ་བས་ཆོས་མ་བཅས༔ སྣང་བ་རྫུན་པས་ཆོས་མ་ལོབ༔ ཆོས་ལ་མོས་པས་ཞེ་བློ་བདེ༔ ཁོ་མོ་སྙིང་རུས་ཆེ་བས་ཞེ་བློ་བདེ༔ བརྩོན་འགྲུས་ཆེ་བས་ཞེ་བློ་བདེ༔ བཟོད་དཀའ་ཐར་པས་ཞེ་བློ་བདེ༔ ནན་ཏན་ཆེ་བས་ཞེ་བློ་བདེ༔ གཞན་གྱི་བུད་མེད་ཁྱིམ་ཐབ་འདོད༔ ཁོ་མོས་ཁྱིམ་ཐབ་སྤངས་འདོད་ཞེ་བློ་བདེ༔ གཞན་གྱི་བུད་མེད་འཕྱོར་འདོད་པས༔ ཁོ་མོས་སྣང་བ་རྫུན་ཆེན་རང་ཐག་ཆོད༔ གཞན་གྱི་བུད་མེད་སྡིག་ལ་མོས༔ ཁོ་མོ་མཁར་ཟ་དགེ་ལ་དད༔ གཞན་གྱི་བུད་མེད་ཚུལ་འཆོལ་པ༔ ཁོ་མོ་བདག་གིས་ཚུལ་ཁྲིམས་བསྲུངས༔ དབུས་ཡུལ་རྩང་ཡུལ་བུ་མོ་རྣམས༔ བློ་མང་གཏམ་པའི་རྫུན་ཚིག་སྨྲས༔ ཁོ་མོ་ཚེ་གཅིག་ལུས་གཅིག་ཆོས་བྱེད་མོས༔ ཞེས་གསུངས༔ མཁར་ཕུབ་ལ་ཚིག་འདི་སྨྲས་ནས༔ ཨ་ཕ་ངས་ཆོས་གཅིག་བྱེད་འགྲོ༔ ད་རེས་ལུས་ཐོག་ཏུ་ཆོས་མ་བྱས་ན་བུད་མེད་ཀྱི་རིགས་ཡིན་ནམ༔ མི་ལུས་གཙང་མ་འདི་འདྲ་མི་ཐོབ༔ དུས་ད་རེས་ཚེ་གཅིག་ཏུ་སངས་རྒྱས་པའི་ཐབས་ཀྱིས་ཆོས་ཤིག་ཞུ༔ མཁར་ཕུབ་ཀྱི་ཆོས་ལ་མོས་ནས་ཆོས་ཨེ་ཤེས་མིན་པས་བྱེད༔ དེ་རབ་མཁར་ཆེན་ཟ་མང་དུ་ཡོད་དེ༔ ཆོས་མང་པོ་བྱེད་མི་སུ་ཡང་མེད༔ ཁྱོད་ཀྱིས་དེ་བསམས་ནས༔ བུ་མོ་ཁྱོད་རང་གིས་བསམ་བློ་བཏང་ཡག་གྱིས༔ ཞེས་གསུངས༔ མཚོ་རྒྱལ་གྱིས་ངས་ཆོས་ལ་མོས་ནས་ཆོས་བྱེད་འགྲོ་བསམ་པ་འདི་གསུངས་སོ༔

ཀྱེ་མ་ལས་དབང་ཆེ་བས་དམ་ཆོས་བསམ༔ བུ་མོ་སྣང་བ་རྫུན་པས་མ་ལོབ་ནས༔ བསམ་སྟེ་མོས་པའི་ངག་མི་སློབ༔  ཁོ་མོ་ཚེ་གཞན་གྱི་བུད་མེད་ཁ་ཡི་ཆོས་མོས་པ༔ ཁོ་མོ་སྙིང་གི་དཀྱིལ་ནས་དད་པ་ཡོད༔ གཞན་གྱི་བུད་མེད་མཆོར་ལ་དད་པ་ཡོད༔ ཁོ་མོ་དུས་གསུམ་ངོ་བོ་བཟང་ངན་མེད་ལ་མོས༔ རིག་པ་དམན་ནམ་སྙིང་རུས་ཆེ༔ གཞན་གྱི་བུད་མེད་ཡར་གཏམ་མར་གཏམ་བྱེད༔ ཕ་ཁུ་སྦྱིན་པའི་མི་ལ་འགྲོ་མི་མེད༔ ཆོས་ལ་མི་མོས་སྣང་བ་མཆོར་ལ་མོས༔ གཅིག་ཁ་གཏིང་མེད་པར་བསམ༔ སྐྱབས་གནས་བླ་མེད་ཐུགས་རྗེས་ཨེ་བཟུང་ངམ༔ ཁོ་མོ་ཁ་གཏིང་མེད་པའི་ཆོས་འདོད་པ༔ སྙིང་རུས་ཆེ་བས་ཆོས་ལོབ་པ༔ མ་ལོབ་ཁོ་མོ་ཁྲེལ་བ་མེད༔ བདག་བསམ་གཞན་གྱིས་ཨེ་སྤྱོད་དམ༔ གཞན་གྱི་བུད་མེད་མཐོ་བདམ་བྱེད༔ ཁོ་མོ་མཐོ་དམན་མེད་པའི་སེམས་སྐྱེད་བྱེད༔ ཆོས་རྣམས་རང་གྲོལ་བྱིན་གྱིས་རློབས༔ ཕ་བཀའ་རྒྱུད་བླ་མའི་བྱིན་གྱིས་རློབས༔ འགྲོ་བའི་དོན་དུ་རང་གྲོལ་ཤོག༔ མཁར་ཆུ་རྒྱུད་པའི་ཐར་ལམ་ཟིན་པར་ཤོག༔ ཅེས་གསུངས་པ༔ དཔལ་གྱི་དབང་ཕྱུག་ཞལ་ནས་ཆོས་ལ་མོས་ན་སུའི་མདུན་དུ་ཆོས་བྱེད་འགྲོ་གསུངས་པ༔ ཡེ་ཤེས་མཚོ་རྒྱལ་ཞལ་ནས་བདག་གི་ཆོས་སྐལ་ཡོད་པ་ན་འགྲོ༔ ཆོས་མོས་པའི་སྣང་བ་མ་རྫུན་ན་ཚེ་གཅིག་ཏུ་ཆོས་བྱེད་བསམ་པ་ཡོད་གསུངས༔ སྦས་སྒྲོན་གྱིས་མཚོ་རྒྱལ་ལ་ཚིག་འདི་སྨྲས་པ༔

ཁྱོད་ཆོས་ལ་བདེན་པའི་མོས་པ་ཨེ་ཡིན༔ གཞན་གྱི་མི་ལ་འགྲོ་བ་ཨེ་ཡོད་ཟེར་བ༔ མཚོ་རྒྱལ་གྱི་ཞལ་ནས༔ ཁོ་མོ་བདག་གིས་ཚེ་གཅིག་ཆོས་བསམ་པ༔ གཞན་གྱི་བུད་མེད་ཁྲིམས་གཏམ་བྱེད་པ་ཡིན༔ ཁོ་མོ་གནས་བཅས་ཐར་ལམ་ཟིན་འདོད་བསམ༔ རོགས་ངན་གླང་རྒན་གབ་བྱིང་ལྟ་བུ་ལ༔ འགྲོ་བའི་སྐྱབས་མེད་དུད་འགྲོ་གླེན་ལྐུགས་དུད་འགྲོའི་རིགས༔ དུག་སྦྲུལ་ཁོང་ཁྲོ་ཅན་ལ་འགྲོས་ནས་ཀྱང་༔ འཐབ་ཅིང་རྩོད་པའི་ལྷ་མིན་ཡུལ་ནང་ཡིན༔ མཆོར་དགའ་མི་ལ་འགྲོ་བའི་དོན་མེད་པ༔ དགེ་གྲོགས་མེད་པ་ལྷ་ཡི་དབྱིངས་ཡུལ་ཡིན༔ ལུས་ཡང་སེམས་ཡང་མི་ལ་འགྲོ་བའི་དུས༔ ཟས་དང་གླ་བྱེད་ཡི་དྭགས་གནས་ཡུལ་ཡིན༔ ཁོ་མོ་ཆོས་ལ་མོས་པས་ལས་བྱེད་པ༔ ཆོས་ལ་མོས་པའི་སྡིག་མ་བྱེད༔ ཚེ་གཅིག་ཐར་ལམ་ཟིན་པ་བདག་གིས་བསམ༔ ཁྱིམ་ཐབ་སྤངས་ནས་ཐར་ལམ་ཟིན་པ་ཡོད༔ ཐར་པའི་ལམ་ཟིན་བསམ་ནས་ཆོས་བྱས་པ༔ ངན་སོང་ལམ་བཀག་བསམས་ནས་ཆོས་ལ་མོས༔ སྐྱབས་གསུམ་བསླུ་བ་མེད་པ་དཀོན་མཆོག་གསུམ༔ སྦྱོར་གྲོལ་དངོས་གཞི་འཇུག་པའི་སམ་བྷ་ཝ༔ སྟོང་ཆགས་བདག་མེད་ཀ་དག་ཆོས་ཀྱི་སྐུ༔ ཁོ་མོ་སྙིང་རུས་ཅན་ལ་ཆོས་གྲོལ་མཛོད༔ བུད་མེད་ལུས་བླངས་བདག་གི་ཡིད་རེ་འགྱོད༔ དཀའ་བ་བརྩོན་འགྲུས་ཆེ་བས་ཞེ་བློ་བདེ༔ མཁར་ཆེན་རྒྱུད་པ་ཡིན་པས་ཞེ་བློ་བདེ༔ པདྨ་སམ་བྷ་འཕྲད་པས་ཞེ་བློ་བདེ༔ ལས་ཀྱི་དབང་ནི་ཆུང་བ་ཅུང་ཡོད་དམ༔ སྣང་བ་རྫུན་རེས་ཆེ་བའི་ཅུང་ཡོད་དམ༔ ཐོབ་དཀའ་ཐར་ལམ་ཟིན་པ་ཅུང་ཡོད་དམ༔ དབང་ཆེ་ཙམ་གྱིས་ཆོས་ཤིག་བྱས༔ སྣང་རིགས་ཆོད་པའི་ཆོས་ཤིག་བྱས༔ ཕ་བཀའ་རྒྱུད་བླ་མཪ་གསོལ་བ་བཏབ༔ རེ་ས་འགྲོ་བའི་སྐྱབས་མཆིས་པ༔ བསྒྲུབ་བརྒྱུད་བླ་མའི་ཐུགས་རྗེས་ཟུངས༔ ཁོ་མོ་ཡོན་ཏན་ཆེ་བའི་ཐུགས་རྗེས་ཟུངས༔ ཁོ་མོ་ཆོས་གཅིག་བསླབས་བསམ་གང་ནས་བསླབས༔ ཀ་དག་རྗེས་འཛིན་ཆོས་ཤིག་ཨེ་ལོབ་བམ༔ ཁོ་མོ་མཉམ་ཉིད་བསྒོམ་པའི་དོན་བྱེད་བསམ༔ སྣང་བ་ཕུག་སྟོང་ཙམ་གྱིས་ཨེ་ཡོང་ངམ༔ ལྷ་འདྲེ་འདུལ་བའི་བསྐྱེད་རིམ་བསླབས༔ སྐད་ཅིག་དྲན་རྫོགས་ཙམ་གྱིས་ཨེ་ཡོད་དམ༔ འགྲོ་བའི་དོན་དུ་ཁོ་མོས་སྤྲུལ་པ་བཀྱེས༔ སྐུ་མདོག་མི་འདྲ་ནམ་མཁའ་བཞི་སྤྲུལ་པ༔ ཁོ་མོ་ཇོ་མོ་བྱེད་བསམ་སྐྲ་ཕུད་བླངས༔ ཚུལ་ཁྲིམས་བསྲུང་བའི་ཐབས་ཀྱིས་ཨེ་ཡོང་ངམ༔ སྤྱིར་རེ་ས་དཀོན་མཆོག་གསུམ་ལ་བྱེད༔ རྒྱལ་བ་བཀའ་བརྒྱུད་ཐུགས་རྗེས་ཟུངས༔ ཞེས་གསུངས་པ༔ ནམ་མཁའ་ནས་མཁའ་འགྲོ་མ་གཅིག་ཡོང་ནས༔ ཨ་རིགས་ཀྱི་བུ་མོ་ཁྱོད་མགུར་མ་ཅི་ལ་བྱེད་པ་ཡིན༔ ཆོས་ལ་མོས་པ་ཡིན་ནམ༔ ཁྱིམ་ཐབ་ལ་མོས་པ་ཡིན་ནམ༔ ཅི་ཡིན་དྲིས་པས༔ མཚོ་རྒྱལ་གྱི་ཞལ་ནས་ཀྱང་༔

ཨེ་མ་གཞན་ཚོས་ཁྱིམ་ཐབ་སྔ་འཕྱི་བྱེད༔ ཁོ་མོ་བདག་ནི་ཁྱིམ་ཐབ་སྤངས་མཆིས་ཡོད༔ ཁོ་མོ་བཅུ་གསུམ་ལོན་པའི་ཆོས་གཅིག་བསམ༔ ཁོ་མོ་ཆོས་གཅིག་བྱེད་པའི་སྔ་འཕྱི་ཡོད༔ གཞན་གྱི་བུད་མེད་ཁྱིམ་ལ་མོས༔ ཁོ་མོ་རི་ཁྲོད་འགྲིམ་བསམ་ཡོད༔ དཀའ་བ་ཐུབ་ན་ཞེ་བློ་བདེ༔ གཞན་ཚོའི་བུད་མེད་ཟང་ཟིང་འཚོས༔ ཁོ་མོ་སྦྱིན་བསམ་ཡོད་པའི་ཞེ་བློ་བདེ༔ གཞན་གྱི་བུད་མེད་གསར་རྙིང་བྱེད༔ ཁོ་མོ་གནས་སུ་བསྟན་པ་ཞེ་བློ་བདེ༔ གཞན་གྱི་བུད་མེད་སྣ་ས་ངོ་ངོ་བྱེད༔ ཁོ་མོ་བཀའ་སྩལ་རྒྱལ་བའི་ཆོས་ལ་མོས༔ གཞན་གྱི་བུད་མེད་མཆོར་ལ་དགའ༔ དཀར་ཏིག་སྔོ་ཏིག་ཨ་ལོང་བརྒྱན༔ ཁོ་མོ་ཇོ་མོ་སྐྲ་ཕུད་བླངས༔ སྣང་བ་དམའ་བས་ཞེ་བློ་བདེ༔ གཞན་གྱི་བུད་མེད་ཆོས་མི་ཉན༔ དགེ་ཙམ་མེད་པ་སྡིག་ལ་མོས༔ བསད་དགའ་ཟས་ཞིམ་ཟ་བའི་དགེ་རྩ་མེད༔ ཁོ་མོ་དགེ་ལ་མོས་པས་ཞེ་བློ་བདེ༔ གཞན་གྱི་བུད་མེད་གཟུགས་ལ་བདམ༔ ཁོ་མོ་ལུས་དམན་སེམས་དམན་ཆོས་བྱེད་འདོད༔ ཕྱི་མ་ཐར་ལམ་བསམས་ནས་ཆོས་བྱས་པ༔ ཁོ་མོ་དད་པ་ཆེ་ལ་བརྩོན་འགྲུས་ཆེ༔ སྔ་རབས་མཁར་ཆེན་ཟ་ནི་མང་པོ་བྱུང་༔ ད་ལང་བདག་ནི་ཤེས་རབ་མཁར་ཆེན་ཟ༔ ད་ལང་དམ་པའི་ལྷ་ཆོས་བྱེད༔ ཁྱེད་ནམ་མཁའི་ཁམས་ཀྱི་མཁའ་འགྲོ་མ༔ བདག་གི་གྲོགས་བྱེད་ཡིན་ནམ་གེགས་བྱེད་ཡིན༔ ཞེས་གསུངས༔

ནམ་མཁའ་ནས་མཁའ་འགྲོ་མས་ཁྱོད་ལོ་བཅུ་གསུམ་ལོན་པའི་དུས༔ ཁྱོད་ཆོས་སྐལ་པདྨ་བསམ་ཡས་ན་ཡོད༔ དེར་འགྲོ་བའི་སྐབས་མཆིས༔ བདག་གིས་གྲོགས་བྱེད༔ དེར་སོང་དམ་ཆོས་མང་པོ་འགྲོ་བའི་དོན་རྒྱ་ཆེན་པོ་འབྱུང་༔ ཞེས་གསུངས༔ དེར་ནམ་མཁའ་ནས་ཡལ་སོང་༔ ཡེ་ཤེས་མཚོ་རྒྱལ་གྱི་ཕ་མ་གཉིས་ལ་ད་ང་ལོ་བཅུ་གསུམ་ལོན་པའི་པདྨ་བསམ་ཡས་ལ་ཡོད་པ་དེའི་མདུན་དུ་བདག་གིས་ཆོས་བྱེད་འགྲོ་བསམ་པ༔ ད་འགྲོ་གསུངས༔ ཕ་མ་གཉིས་ཀྱིས་ཁྱོད་སོང་སྟེ༔ ཟས་གོས་གཅིག་ཨེ་མི་དགོས༔ ཁྱོད་ཁུར་ནི་མི་ཁྱག༔ ཅི་བྱེད་ཟེར་བ༔ ཡེ་ཤེས་མཚོ་རྒྱལ་གྱི་ཞལ་ནས༔ གཞན་ཚོའི་བུད་མེད་འགྲོ་བ་མང་ཞན་པ༔ ཁོ་མོ་འབྲས་ཆང་འདི་དང་དར་ཆད་པ༔ འགྲོ་བའི་བུད་མེད་རྣམས་ལ་ཟང་ཟིང་ཞན༔ ཁོ་མོ་ཤིང་གིས་ཇ་དང་དར་ཆད་པ༔ ད་ཡང་མཁར་ཡུལ་ས་ནས་ཟས་མི་ཡོང་༔ ཁོ་མོའི་ཡོང་པ་མི་སྲིད་དོ༔ ཉོན་མོངས་ནད་འཇོམས་འབྲས་ཆང་འདི༔ བདག་གི་གྲོགས་བྱེད་རྒྱལ་བའི་སྐུ་ལ་འབུལ༔ བདེར་གཤེགས་འགྲོ་དོན་ཡོངས་ལ་མངའ་བརྙེས་ཤོག༔ གཞན་གྱི་བུད་མེད་རྒྱུ་རྔམ་ཟས་བཞིན་པ༔ ཕན་པ་ཐར་པའི་ལམ་འདྲེན་སེམས་ཙམ་མེད༔ ཡིད་མི་བདེ་བ་འཁྲུགས་ལོང་མང་པོ་འབྱུང་༔ ཁོ་མོ་སྟེར་ནས་ཐར་པའི་ལམ་འདྲེན་ཡོད༔ འབྲས་ཆང་སྔོན་མོ་བདག་གིས་འཐུང་སྲིད་པའི༔ བུད་མེད་ཆང་ལ་དགའ་བའི་ཡུལ་ཤོར་བ༔ ཁོ་མོ་འབྲས་ཆང་མངར་གྱི་ཟས་ཡིན་པས༔ འཐུང་བའི་གནས་སྲིད་དམ་པའི་ཆོས་གཅིག་བྱེད༔ ཁྱེད་མཁར་ཆེན་རྒྱུད་པ་རྣམས་ལ་ང་ཕན་ངེས༔ ཞེས་གསུངས་པ༔

དེར་ཕ་མ་རྣམས་ཀྱིས་ཁྱོད་ལ་ཟས་ནོར་དགོས་ན་སྦྱིན་ཟེར་བས་མཚོ་རྒྱལ་ཞལ་ནས༔ བདག་ལ་ཟང་ཟིང་ནོར་གྱིས་སྐབས་མ་མཆིས༔ ཟང་ཟིང་འདོད་ན་ཁྱིམ་ཐབས་སྤངས་པ་མེད༔ ཚེ་གཅིག་བྱང་ཆུབ་ཐོབ་པའི་གདམས་ངག་ཞུ༔ ཞེས་གསུངས༔ ཕ་མ་གཉིས་ཀྱི་ཨ་བུ་མོ་ཁྱོད་འདྲ་བ་ལ་ལན་མི་སྟེར་ན་སུ་ལ་སྟེར༔ ཁྱོད་རང་ཅི་མོས་པ་སྟེར༔ ཞེས་གསུངས༔ མཚོ་རྒྱལ་ཞལ་ནས༔ ང་ལ་ཟང་ཟིང་ནོར་གྱི་དགོས་མེད་པ༔ ཟས་ཞིམ་པའི་དོན་མ་མཆིས༔ ཀྱེ་མ་འཇིག་རྟེན་འཁོར་བའི་སྡིག་ལ་གཏད་བཅས་ནས༔ འགྲོ་དོན་ལམ་དུ་ཤོར་སྲིད་དེ༔ མཁར་ཆུ་འདི་ལ་མི་ཚེ་བཏང་བ་ན༔ བདག་གི་དོན་ཤོར་སྐྱབས་གནས་སུ་ཡང་མེད༔ ད་ཡང་བདག་ལ་ཟང་ཟིང་ནོར་རྟེན་མེད༔ ཟང་ཟིང་རྒྱུ་ལ་རྔམ་པ་ང་མ་ཡིན༔ གཞན་གྱི་བུད་མེད་ཟང་ཟིང་འཚོས༔ ཁོ་མོ་ཟང་ཟིང་ནོར་སྤངས་པ༔ པདྨའི་སྐུ་ལ་བསྟོད་པ་འབུལ༔ ཞེས་གསུངས༔ ང་འགྲོ་ན་སྒོ་ནས་ཐོན་ནས༔ ཕ་མ་གཉིས་ཕྱི་རུ་ཡོང་བ༔ སྦས་སྒྲོན་གྱིས་བསམས་ནས༔ ཨ་བདག་གི་བུ་མོ་སྐུ་མདོག་དབུ་སྐྲ་འདི་འདྲ་བ་མིད་ཚུག་པ་གར་འགྲོ་བ་ཡིན༔ མི་བཏང་བསམ་པ༔ ཡེ་ཤེས་མཚོ་རྒྱལ་ཁོ་མོ་བསམས་ནས་མཁར་ཆེན་ས་དང་མི་རྣམས་དངོས་མི་རྙེས་པ༔ ཐམས་ཅད་སྤངས་ནས་དངོས་པར་གང་ནས་འགྲོ་བསམས་ནས༔ ལན་གཅིག་ལ་བསམ་བློ་བཏང་༔ ཁོ་མོ་ལོ་ཆུང་བ་སེམས་ཙམ་དེ་འདྲ་བ་རེད་བསམ༔ ཕ་མ་གཉིས་ཀྱིས་ལམ་སུས་དང་བཞུགས་ཟེར་བ༔ ཁོ་མོ་གཞི་ནས་བདེ་མོ་རང་འདུག་ཨང་གསུངས༔ ལམ་དུ་ཡོང་༔ ཁོ་མོ་ཡིད་མུག་པའི་པདྨ་དྲན་ནས་གསོལ་བ་འདི་བཏབ་བོ༔

ཨེ་མ་ཧོ༔ ཨུ་རྒྱན་ཕྱོགས་བཅུའི་སངས་རྒྱས་འཁོར་གྱིས་བསྐོར༔ ཁོ་མོ་བསམ་པ་འགྲུབ་པར་བྱིན་གྱིས་རློབས༔ ཐུགས་རྗེས་འགྲོ་བའི་དོན་དུ་གཟིགས་པར་ཤོག༔ ཨུ་རྒྱན་བཀའ་བརྒྱུད་བླ་མའི་འཁོར་གྱིས་བསྐོར༔ ཁོ་མོའི་བསམ་པ་འགྲུབ་པར་བྱིན་གྱིས་རློབས༔ ཐུགས་རྗེས་འགྲོ་བའི་དོན་དུ་གཟིགས་པར་ཤོག༔ ཨུ་རྒྱན་ཡི་དམ་རྒྱལ་བའི་འཁོར་གྱིས་བསྐོར༔ ཁོ་མོའི་བསམ་པ་འགྲུབ་པར་བྱིན་གྱིས་རློབས༔ ཐུགས་རྗེས་འགྲོ་བའི་དོན་དུ་གཟིགས་པར་ཤོག༔ ཨུ་རྒྱན་མཁའ་འགྲོ་མང་པོའི་འཁོར་གྱིས་བསྐོར༔ ཁོ་མོའི་བསམ་པ་འགྲུབ་པར་བྱིན་གྱིས་རློབས༔ ཐུགས་རྗེས་འགྲོ་བའི་དོན་དུ་གཟིགས་པར་ཤོག༔ ཨུ་རྒྱན་ཆོས་སྐྱོང་གཉན་གྱིས་འཁོར་གྱིས་བསྐོར༔ ཁོ་མོའི་བསམ་པ་འགྲུབ་པར་བྱིན་གྱིས་རློབས༔ ཐུགས་རྗེས་འགྲོ་བའི་དོན་དུ་གཟིགས་པར་ཤོག༔ ཁོ་མོ་བརྩོན་འགྲུས་ཅན་ལ་ཐུགས་རྗེས་ཟུངས༔ དད་གུས་ཅན་ལ་བྱིན་གྱིས་རློབས༔ ཤེས་རབ་ཅན་ལ་ཐུགས་རྗེས་ཟུངས༔ ཞེས་གསུངས༔ ཡོང་ནས་ཉིན་གཅིག་ལ་ཡོང་ནས་བཟའ་བཏུང་མེད་པ་བུད་མེད་ཆུང་བ་འགྲོ་མ་མྱོང་སྟེ༔ འགྲོ་བསམས་ན་མི་ཐུབ་པ༔ འདུག་བསམས་ན་བཟའ་བཏུང་མེད་པ་ཅི་བྱེད་བསམ་པའི་ཡིད་མུག་པའི་ངང་ནས་འདི་གསུངས་སོ༔ ཀྱི་ཧུད་བདག་འདྲ་ཇོ་མོ་མཁར་ཆུ་ཟ༔ འདུག་པའི་ཟས་མེད་འགྲོ་བའི་དུས་མ་མཆིས༔ ཁོ་མོ་སྙིང་རུས་ཆེ་བསམ་བུད་མེད་ལུས༔ བརྩོན་འགྲུས་ཆེ་སྟེ་བུད་མེད་ལུས༔ བུ་མོ་བདག་ལུས་སྡིག་ལ་འདི་མོས་པ༔ པདྨ་དྲན་ཏེ་བུ་མོ་གང་དུ་འགྲོ༔ ཁོ་མོ་མཁར་ཟའི་འགྲོ་ལ་དྲིན་ཡོང་ནས༔ བཟའ་བཏུང་མེད་པའི་དབུས་དང་རྩང་བར་དུ༔ ཁོ་མོ་ཆུང་བས་ཅི་ཡང་ཤེས་པ་མེད༔ བདག་ནི་ཡིད་མུག་འདི་འདྲ་ཅི་ལ་ཡོང་༔ ཞེས་མང་པོ་བཤུམ༔ ལན་གཅིག་ལ་བསམ་བློ་བཏང་ནས་ཁོ་མོ་ཆུང་བས་སྙིང་རུས་མི་ཐུབ་པ་དང་ཡིན་བསམས་ནས་འདི་ལྟར་གསུངས༔ ཨེ་མ་ཁོ་མོ་སྙིང་རུས་ཆེ་བ་ཡོད་བསམས་ཏེ༔ སྙིང་རུས་ཆུང་ཞིང་དཀའ་བ་ཐུབ་མེད་པ༔ བུད་མེད་ལུས་འདི་བླངས་པ་ཡིད་རེ་འགྱོད༔ བུད་མེད་དགའ་སླ་མི་སླ་དགའ་སླ༔ སྒྲ་སྙན་བཟང་བ་ཚོར་ན་རབ་ཏུ་དགའ་དུས༔ སྒྲ་མི་སྙན་པ་ཐོས་ནས་སྙིང་ཆུང་བ༔ ཁོ་མོ་སྙིང་ཆུང་འདི་ལ་དག་དག་མེད༔ བུད་མེད་རིགས་ཡིན་སྙིང་རུས་མི་ཐུབ་དུས༔ དམ་པའི་ཆོས་བྱེད་བསམས་ནས་སྙིང་རུས་མེད༔ བུད་མེད་ལུས་བླངས་མོ་ལུས་ཞད་ཡོད་པ༔ སྐད་ཅིག་གཅིག་ཏུ་བཀྲེས་སྐོམ་མི་ཁྱག་པ༔ ཁོ་མོ་སྙིང་རུས་ཆེ་བ་མི་སྲིད་དེ༔ བུད་མེད་ཆོས་བྱེད་དཀའ་བ་མི་ཐུབ་བམ༔ འདི་འདྲ་སྦྱོང་བའི་མཐོང་ལམ་ཡང་དག་དངོས༔ སྡིག་གིས་བདག་ལུས་འགྱོད་པ་ཅི་ཡང་མེད༔ རིག་པའི་སྣང་བ་རང་ཐག་བཅད༔ སྣང་བའི་ལུས་ལ་བརྩོན་འགྲུས་བྱེད༔ ལ་ཆེན་ཆུ་ཆེན་མ་བརྒལ་ན༔ དམ་པའི་ཆོས་ནི་ཅི་ལ་ཡོང་༔ ཞེས་གསུངས༔ ཕྱོགས་ནས་འཇའ་ཤར་ནས་ཁོ་མོའི་སྐྲ་ལྕང་རྣམས་འཇའ་འོད་གྱུར་ནས༔ བདག་གི་ཅི་ཡིན་བསམས་ནས་དེ་འདྲའི་ངང་ནས་འདུག༔ བསམ་ཡས་ཕྱོགས་ནས་མི་གཅིག་ཡོང་ནས༔ ཁོ་མོའི་རྩར་ཐོན་པ་བུ་མོ་ཁྱོད་དབུ་སྐྲ་ཐམས་ཅད་འཇའ་འོད་གྱུར༔ གང་ནས་ཕེབས་ཟེར་བ༔ ཡེ་ཤེས་མཚོ་རྒྱལ་ཞལ་ནས༔ བསམ་ཡས་ནས་པདྨ་ལ་མཇལ་འགྲོ་གསུངས་པ༔ མི་དེའི་ཁོང་ལ་ཕྱག་དབང་འདུག་པ་སྨྲས་པ༔ ཁོ་མོ་བུད་མེད་ཕྱག་དབང་བཞག་པ་ཅི་ཡང་མི་གདའ༔ གསུངས་ལན་དུ་ཞུས་ནས༔ ཕྱག་དབང་བཞག་པ༔ ཁོ་མོས་སྨོན་ལམ་བཏབ་པ༔ སྐྱེས་པ་ཡ་རབས་ཁྱོད་ནི་ལས་ཅན་པ༔ མཐོང་ཐོས་ཙམ་གྱིས་ཁྱོད་ནི་བདག་གྲོལ་མཛོད༔ རྫུས་སྐྱེས་པདྨས་ཁྱོད་ལ་ཐུགས་རྗེས་ཟུངས༔ ཁོ་མོ་བདག་གིས་ཁྱོད་ལ་བྱིན་གྱིས་རློབས༔ ཁྱོད་ཀྱི་སྐྱེ་རྒྱུད་བདག་གི་ཞབས་དྲུང་སྐྱེས༔ ཞེས་གསུངས༔ མི་དེ་ལ་ཁྱོད་རྒྱུད་པ་གང་ཡིན་དྲིས་པ༔ ངའི་རྒྱུད་པ་རྩང་རྒྱུད་ཡིན་ཟེར༔ དེར་མི་དེ་རྩང་ནས་ཡོང་༔ ཡེ་ཤེས་མཚོ་རྒྱལ་བསམ་ཡས་ནས་ཐོན་པའི་དུས་སྐབས་འཆིམས་ཕུག་རྟོགས་པའི་ས་ནས་འདུག་པ་འདི་གསུངས་སོ༔ ཁོ་མོ་ཤིང་བྱི་ལོ་དང་མེ་བྱ་ལོ༔ ཁོ་མོ་སྐྱེས་པའི་དོན་མ་ཆུང་༔ རྫུས་སྐྱེས་པདྨ་མཇལ་བའི་དུས་མཆིས་པ༔ སྐབས་སྐབས་དེ་དང་མཐུན་པར་བྱས༔ ཞེས་གསུངས༔ ཡེ་ཤེས་མཚོ་རྒྱལ་བསམ་ཡས་ནས་བྱོན་ནས་རྒྱལ་པོ་ལུས་ལ་ནད་བྱུང་ནས་འདུག༔ ཨུ་རྒྱན་གྱི་མདུན་དུ་སོང་ནས་ཁོ་མོས་ཕྱག་འཚལ་ལ་འདུག་པ༔ དབང་ཆེན་གསེར་གླིང་མཎྜལ༔ དབང་པོ་ལྔ་ཡི་མཎྜལ༔ སྐུ་གསུམ་མཎྜལ་རྣམས་འབུལ༔ ཨུ་རྒྱན་གྱི་ཞལ་ནས་དེ་ཡང་ངོ་མཚར་དེ་གསང་བའི་མཎྜལ་འབུལ༔ གསུངས་པ༔ གསང་བའི་པདྨོ་མཎྜལ་གཅིག་འབུལ༔ པདྨའི་ཞལ་ནས་ཚད་ཚད་བྱས་པ༔ ཁྱོད་རིགས་གང་ཡིན༔ ཆོས་ཞུ་བ་ཡིན་ནམ༔ ཁྱིམ་ཐབ་སྤངས་པ་ཡིན་ནམ་གསུངས༔ མཚོ་རྒྱལ་གྱི་ཞལ་ནས༔ མཁར་ཆུ་རྒྱུད་པའི་རིགས་ཡིན༔ དོན་མ་མཆིས༔ ཉིན་མཚན་བསྒོམ་པའི་ཆོས་གཅིག་བྱེད་བསམ་ཡོད༔ ཁྱིམ་ནས་བྱུང་སྟེ་རབ་བྱུང་ཆོས་གཅིག་བྱེད༔ པདྨ་ཁྱེད་ནི་དྲན་པའི་ཆོས་གཅིག་ཞུ༔ འདི་ཕྱི་བདེ་བ་ཐོབ་པའི་ཆོས་གཅིག་ཞུ༔ ཞེས་ཞུས༔ པདྨའི་ཞལ་ནས༔ ཁྱོད་འདུག་པའི་ཆོས་གཅིག་བྱེད་ཡིན་ནམ༔ འགྲོ་བའི་ཆོས་གཅིག་བྱེད་པ་ཡིན༔ སུའི་གྲོགས་ནི་བྱེད་པ་ཡིན༔ ཞེས་གསུངས་པ༔ ཡེ་ཤེས་མཚོ་རྒྱལ་ཞལ་ནས་ཁོ་མོ་ཁྱོད་ཀྱི་གྲོགས་བྱེད་པ་ཡོད༔ ཁྱེད་རྫུས་སྐྱེས་པདྨའི་མཐུ་སྟོབས་ཆེ་བ་ཁོ་མོའི་ཆོས་བྱེད་པ་བུད་མེད་ཀྱི་རིགས་ཡིན་པ་ཕོ་ལུས་གཅིག་བསྒྱུར་བའི་ཐབས་ཨེ་མཆིས༔ ཞུས་པ༔ པདྨའི་ཞལ་ནས་ང་རྒྱ་གར་བླ་མ་ས་གསེར་ལ་བསྒྱུར་བ༔ བུད་མེད་སྐྱེས་པའི་ལུས་བསྒྱུར་ཐུབ་སྟེ༔ ཁྱོད་བདག་གི་གྲོགས་བྱེད་དགོས་པ་ཐབས་འདུ་འབྲལ་མེད་པར་གདའ༔ ཞེས་གསུངས༔ ཡེ་ཤེས་མཚོ་རྒྱལ་ཞུས་པ༔ ཁོ་མོ་ལུས་དང་སྲོག་བཅས་པ་ཁྱོད་ལ་འབུལ་བ་ཡིན་པ༔ བདག་ལ་ཐུགས་རྗེའི་མ་ཆུང་ཞིག༔ འདི་ཕྱི་འགྲོ་བའི་གང་ལ་ཡང་ཐུགས་རྗེས་གཟིགས་པར་བྱ༔ པདྨའི་ཞལ་ནས༔ མ་འོངས་དུས་མཐའ་ཁྱོད་གྲོགས་ཨེ་བྱེད་དམ༔ ཁྱོད་ཡེ་ཤེས་མཚོ་རྒྱལ་བདག་དང་འདུ་འབྲལ་མེད་པའི་འགྲོ་བའི་དོན་ཆོས་སྐོར་རྒྱ་ཆེན་པོ་མཛད་ཡོང་ནས༔ བཀའ་མི་བཅག་པར་གདའ༔ ཞེས་གསུངས༔ ཡེ་ཤེས་མཚོ་རྒྱལ་ཞལ་ནས༔ ཁྱོད་ཀྱི་གྲོགས་ཁོ་མོ་ཅི་ཐུབ་པ་བྱེད༔ གྲོགས་རྣམས་ཐམས་ཅད་བདག་གིས་བྱེད༔ ཁོ་མོ་རིགས་པ་ཡང་དམན་ཏེ་བརྩོན་འགྲུས་ཆེ༔ ཁྱོད་ཀྱི་གྲོགས་ངས་བྱེད་ཞུས༔ པདྨའི་ཞལ་ནས་ཁྱོད་མ་འོངས་རིག་འཛིན་གྱི་གྲོགས་ཨེ་བྱེད་དམ༔ གསུངས་པ༔ ཡེ་ཤེས་མཚོ་རྒྱལ་ཞུས་པ༔ མ་འོངས་དུས་ཀྱི་རིག་འཛིན་དང་༔ རྩ་རླུང་འོད་གསལ་དང་༔ མཁས་གྲུབ་ཁྱེད་ཀྱིས་སྒྲུབ་པའི་རིག་འཛིན་དེ་རྣམས་ཀྱི་གྲོགས་ངས་བྱེད་དོ་ཞུས༔ པདྨའི་ཞལ་ནས་ཁྱོད་སྤྲུལ་པའི་གྲོགས་བྱེད་དམ༔ ཁྱོད་གྲོགས་བྱེད་གསུངས༔ ཁོ་མོ་བདག་གིས་གང་འདུལ་སྤྲུལ་པའི་འགྲོ་བའི་ཐབས་དེའི་གྲོགས་བྱེད༔ བདག་གིས་དེའི་ཐབས་ཀྱིས་ལུང་བསྟན་ཞུས༔ ཁྱོད་མ་འོངས་ཀྱི་གྲོགས་བྱེད་པའི་ཐབས་སྟོན་པའི་ང་སྤྲུལ་པ་བྱེ་བ་ཕྲག་བརྒྱའི་ཁྱེད་ཀྱིས་སྤྲུལ་བ་བྱེ་བ་ཕྲག་བརྒྱས་གང་འདུལ་གྱིས་འགྲོ་བའི་དོན་བྱའམ༔ མཚོ་རྒྱལ་གྱི་ཞལ་ནས༔

ཨེ་མ་ཧོ༔ རྫུས་སྐྱེས་ཁྱེད་ཀྱིས་མ་འོངས་སྤྲུལ་བགྱིས་ནས༔ ཁོ་མོ་བདག་གིས་དེ་རྣམས་གྲོགས་བྱེད་དམ༔ རྩ་རླུང་འོད་གསལ་བདག་པོ་གྲོགས་པོ་བྱེད༔ རིག་འཛིན་རྣམས་ཀྱི་གྲོགས་ནི་ངས་བྱེད་དོ༔ ཁྱེད་སྤྲུལ་མཁའ་བསྒྲུབ་འགྲོ་དོན་བྱེད་པ་ནས༔ ཁོ་མོ་ཐུབ་ཙམ་བདག་གིས་གྲོགས་ལྟར་བགྱིས༔ ཞེས་ཞུས་པ༔ པདྨའི་ཞལ་ནས་ཁྱོད་སྤྲུལ་པ་ཅི་འདྲ་ལ་བགྱིས་གསུངས་པ༔ མཚོ་རྒྱལ་ཞལ་ནས༔ ཁོ་མོ་སྤྲུལ་པ་མི་འདྲ་རྣམ་པ་ལྔ༔ སྐུའི་སྤྲུལ་པ་སངས་རྒྱས་མཁའ་འགྲོ་ནི༔ ཕུང་པོ་གྲུ་བཞི་སྐུ་མདོག་མཐིང་ག་བ༔ འགྲོ་བ་ལྟ་བུར་གཏམ་པ་མང་འབྱུང་བ༔ དེའི་སྤྱི་བོར་ཐིག་ལེ་དམར་པོ་རྟགས༔ གསུང་གིས་སྤྲུལ་པ་རྡོ་རྗེ་མཁའ་འགྲོ་མ༔ སྐུ་མདོག་དཀར་བ་ལུས་ནི་ཅི་རིང་བ༔ གཏམ་མང་སྐད་ལྷང་བྱེད་པའི་ལས་བྱུང་བ༔ དེའི་རྟགས་སུ་ཐུགས་ཀར་ཐིག་ལེ་དཀར༔ ཐུགས་ཀྱི་སྤྲུལ་པ་རིན་ཆེན་མཁའ་འགྲོ་ནི༔ སྐུ་མདོག་སེར་ལ་ལུས་ཐུང་གཏམ་ཉུང་བ༔ ཁྲོ་འཛུམ་ཆེ་བའི་དེའི་རྟགས་སུ་ཐིག་ལེ་མགོ་ལ་ཡོད༔ ཡོན་ཏན་སྤྲུལ་པ་པདྨ་མཁའ་འགྲོ་ནི༔ ཤ་རྩ་དམར་བ་ཕུང་པོ་སོགས་དཀར་བ༔ གཏམ་མང་དེ་ཡི་རྟགས་སུ་རྒྱབ་ཏུ་ཐིག་ལེ་ཡོད༔ འཕྲིན་ལས་སྤྲུལ་པ་ཀརྨ་མཁའ་འགྲོ་ནི༔ སྐུ་མདོག་ལྗང་གུ་ཕུང་པོ་གྲུ་བཞི་འདྲ༔ གཏམ་པ་ཐམས་ཅད་འགྲོ་བའི་ལས་བྱེད་པ༔ དེ་ཡི་རྟགས་སུ་དབུ་སྐྲ་ཡ་བྲག་རི༔ ང་ཡི་སྤྲུལ་པ་དེ་འདྲ་མང་པོ་བགྱིས༔ ཞེས་ཞུས་པ༔ པདྨའི་ཞལ་ནས༔ ཐབས་ཀྱིས་སྤྲུལ་པ་བཀྱེས་ནས་མ་འོངས་ཀྱི་གྲོགས་བྱེད་པ་ཨེ་སྣང་༔ ཞེས་ཞུས་པ༔ མཚོ་རྒྱལ་གྱི་ཞལ་ནས༔ མ་འོངས་རིག་འཛིན་གྱི་གྲོགས་དེ་ལྟར་ཐབས་ཀྱིས་ངས་བྱེད་པ་ཅན་ཡིན་པའོ༔ སྤྲུལ་པའི་ཐབས་ཀྱིས་འགྲོ་ལ་དགོངས་ནས་དེ་ལྟར་སྐབས་མ་མཆིས་པའོ༔ མེ་མོ་བྱའི་ལོ་རྒྱལ་དང་ཉ་འཛོམས་པའི་དུས་པདྨ་དང་ཁོ་མོ་གཉིས་འཕྲད་པ༔ ཨུ་རྒྱན་གྱི་ཞལ་ནས༔ ངའི་སྤྲུལ་པ་སྐུའི་སྤྲུལ་པ་ནི་སྐུ་མདོག་མཐིང་ག་འཇིགས་སུ་རུང་བ་ཁྲོ་ཐབས་ཡིན་པ༔ གསུང་གི་སྤྲུལ་པ་རྒྱལ་རིགས་སུ་འཁྲུངས་ནས་སྐུ་མདོག་དཀར་པོ་ཞི་བའི་ཚུལ༔ ཐུགས་ཀྱི་སྤྲུལ་པ་སྐུ་མདོག་སེར་པོ་རྗེའུ་རིགས་སྐྱེས་ནས༔ ཁྲོ་བ་མེད་པ་ཞི་བའི་ཚུལ༔ ཡོན་ཏན་སྤྲུལ་པ་སྐུ་མདོག་དམར་པོ་དམངས་རིགས་ཁྲོ་བོའི་ཚུལ་སྟོན་པ༔ འཕྲིན་ལས་སྤྲུལ་པ་སྐུ་མདོག་ལྗང་གུ་གདོལ་རིགས་ཁྲོ་ཚུལ་བསྟན་པ་དེ་འདྲའོ༔ ཁྱེད་སྤྲུལ་པ་ལྔ་དེར་ངའི་སྤྲུལ་པ་ལྔ་དེ་ལྟར་ཐབས་སྟོན་པའི་མ་འོངས་ཀྱི་རིག་འཛིན་གྱི་འགྲོ་བའི་དོན་བྱའོ༔ ཡེ་ཤེས་མཚོ་རྒྱལ་གྱི་ཞལ་ནས༔ མ་འོངས་སྐབས་སྐབས་ལ་དེ་འདྲ་བྱས་ནས་བདག་གིས་ཞུས་པས༔ སྐབས་ཁྱེད་ཀྱི་ཐར་པར་དགོངས༔ ཞེས་ཞུས༔ པདྨའི་ཞལ་ནས༔ ངས་ཐབས་ཚུལ་བསྟན་པ་ཁྱོད་ཞུ་བ་པོ་བྱེད་དམ་ངས་མཛད་པའོ༔ ཞེས་གསུངས༔ ཡེ་ཤེས་མཚོ་རྒྱལ་རྨི་ལམ་རྨིས་རབས་བཤད་དོ༔ ཨེ་མ་ཕ་བཀའ་བརྒྱུད་བླ་མ་རིན་པོ་ཆེ༔ སྐྱབས་སངས་རྒྱས་ཆོས་དང་དགེ་འདུན་གསུམ༔ ཐུགས་རྗེ་བཟུང་བའི་ཐབས་གཅིག་སྟོན༔ རྫུས་སྐྱེས་པདྨའི་ལན་གསོན་ཅིག༔ ཁོ་མོ་བདག་གི་རྨི་ཚིག་ལ༔ ཤར་འདི་ན་ཉི་མ་ཤར་བ་རྨིས༔ ཉི་ཟེར་འགྲོ་ལ་ཁྱབ་པ་རྨིས༔ སེང་གེའི་གཡུ་རལ་རྒྱས་པ་རྨིས༔ ལྷོ་འདི་ན་གསེར་གདུང་ཀ་བཙུགས་རྨིས༔ ཁྱུང་དཀར་བྱ་ཚང་གཤོག་རྒྱས་རྨིས༔ ཁྱུང་ཕྲུག་ཚང་ནས་རྒྱས་པ་རྨིས༔ ཁྱུང་ཚང་ནང་དུ་རྩལ་རྫོགས་རྨིས༔ ནུབ་འདི་ནས་རྨ་བྱ་རྒྱས་པ་རྨིས༔ པི་ཝང་ལྟ་བུར་སྒྲོགས་པ་རྨིས༔ གསུང་སྐད་སྙན་པའི་སྒྲ་སྒྲོགས་རྨིས༔ བྱང་འདི་ནས་ཆུ་བོ་འབེབས་པ་རྨིས༔ གསེར་གྱི་ཆུ་བོ་འབབས་པ་རྨིས༔ དབུས་འདི་ན་མེ་ཏོག་བབ་པ་རྨིས༔ ས་གཞི་མེ་ཏོག་བརྒྱན་པ་རྨིས༔ པདྨའི་ལུང་ལ་བཤད་པར་ཞུས༔ ཡེ་ཤེས་མཚོ་རྒྱལ་ཞལ་ནས༔ བདག་གིས་དེ་འདྲ་བ་གཅིག་རྨིས་ནས་ཅི་ཡིན་ཞུས༔ པདྨའི་ཞལ་ནས༔ ཤར་འདི་ན་ཉི་མ་ཤར་བ་རྨིས༔ རྫུས་སྐྱེས་ཀུན་འདུས་པདྨ་ང་ཡིན་ནོ༔ ཉི་ཟེར་འགྲོ་ལ་ཁྱབ་པ་རྨིས༔ བུ་རིག་འཛིན་མ་འོངས་འགྲོ་དོན་ཡིན༔ སེང་གེའི་གཡུ་རལ་རྒྱས་པ་ནི༔ ང་པད་འབྱུང་བརྒྱ་བྱིན་མཚོ་རྒྱལ་ཡིན༔ ལྷོ་འདི་ནས་གསེར་གདུང་ཀ་བཙུགས་འདི༔ མ་འོངས་བུ་ཆེན་རིག་འཛིན་ཡིན༔ ཁྱུང་གར་བྱ་ཚང་རྨིས་པ་འདི༔ ང་རྫུས་སྐྱེས་མདངས་ལྡན་འཁྲུངས་པ་ཡིན༔ ཁྱུང་ཕྲུག་ཚང་རྒྱས་རྨིས་པ་འདི༔ ཡེ་ཤེས་མཚོ་རྒྱལ་ཁྱོད་ཡིན་ནོ༔ ཁྱུང་ཚང་ནང་དུ་རྩལ་རྫོགས་ནས༔ མ་འོངས་བུ་རྣམས་རྩལ་རྫོགས་ཡིན༔ ནུབ་ནས་རྨ་བྱ་རྒྱས་རྨིས་འདི༔ རྨ་བྱ་གསུང་སྐད་སྙན་པ་དེ་ཡིན་ནོ༔ པི་ཝང་སྐད་ནི་ཁོ་མོ་ཁྱོད་ཀྱི་སྐད༔ བྱང་ནས་ཆུ་བོ་རྨིས་པ་དེ༔ འགྲོ་བ་ཡོངས་ལ་དམ་ཆོས་འབབས་པའི་བརྡ༔ དབུས་ན་མེ་ཏོག་བབས་རྨིས་དེ༔ མ་འོངས་ཐོགས་མཐའ་བུ་ཆེན་ཡིན༔ འགྲོ་བའི་དོན་དུ་ཞལ་གཟིགས་བརྡ༔ མཚོ་རྒྱལ་རྨི་ལམ་བཟང་བར་ཡོད༔ བདག་གིས་རྨིས་པའི་དཔྱོད་པ་མེད༔ ཁོ་མོ་པདྨའི་རྨི་ལམ་བཟང་བར་གསུངས༔ མཚོ་རྒྱལ་ཤིན་ཏུ་དགའ་ནས༔ ཡང་རྨིས་ཚིག་འདི༔ མ་འོངས་སེམས་ཅན་འགྲོ་བའི་དོན་ལ་བཟང་བའི་སྐབས་མ་མཆིས་པ་མེད་གསུངས་མཚོ་རྒྱལ་ཞལ་ནས་བསྟོད་པ་ཕུལ་བ༔

ན་མོ་གུ་རུ༔ འགྱུར་མེད་དང་པོ་ཆོས་སྐུ་ཀུན་ཏུ་བཟང་༔ གདོད་ནས་རྣམ་དག་རྒྱལ་བ་འོད་དཔག་མེད༔ དྲི་མེད་རྣམ་དག་རྒྱལ་བ་ཤཱཀྱ་ཐུབ༔ གང་འདུལ་ཐབས་ཀྱིས་འཕགས་པ་སྤྱན་རས་གཟིགས༔ འགྲོ་དོན་སྐུ་སྤྲུལ་རྗེ་བཙུན་པདྨའི་སྐུ༔ ཁྱེད་ཀྱི་སྐུ་ལ་བགྲེས་རྒུད་མེད་པའི་ཕྱིར༔ ལོ་བརྒྱད་མདངས་ལྡན་གཞོན་ནུའི་ཆ་ལུགས་ཅན༔ ཁོ་མོ་བཅུ་གསུམ་འགྲོ་བའི་ཐུགས་རྗེས་ཅན༔ ཉོན་མོངས་འཁོར་བའི་སྐྱོན་གྱིས་མ་གོས་པ༔ སྐུ་མདོག་དཀར་ལ་ཅུང་ཟད་དམར་མདངས་ཅན༔ འགྲོ་བ་མ་ལུས་ཐུགས་རྗེས་རབ་འཛིན་པ༔ ཞལ་འཛུམ་མཛེས་པའི་སྤྱན་གྱིས་འགྲོ་ལ་གཟིགས༔ དོན་དམ་ཆོས་ཚུལ་འགྲོ་ལ་མཉེས་མཛད་པ༔ ཤངས་དཀྱུས་རིངས་ཤིང་ཤངས་སྣེ་ཅི་རིང་བ༔ འགྲོ་བ་བར་དོ་འཕྲང་ལ་རང་གྲོལ་བ༔ ཕྱག་གཡས་གསེར་གྱི་རྡོ་རྗེ་ཐུགས་ཀར་འཛིན༔ བདག་གཞན་གཉིས་ལ་མཆོག་ཐུན་དངོས་གྲུབ་སྩོལ༔ ཕྱག་གཡོན་བདུད་རྩི་ཐོད་བུམ་བཀང་བ་འཛིན༔ བདག་གཞན་གཉིས་ལ་འཆི་བ་མེད་པ་གནང་༔ ཡུམ་ཚུལ་ཁ་ཊཾ་མཚན་ཁུང་གཡོན་བཟུང་ནས༔ ཐབས་ཤེས་བདེ་སྟོང་ཆོས་ཀྱི་དབྱིངས་ཉིད་དུ༔ དབུ་ལ་པད་ཞྭ་རྒོད་སྒྲོ་དར་སྣས་བརྒྱན༔ ཁམས་གསུམ་དབང་སྡུད་སྲིད་གསུམ་ཟིལ་གྱིས་གནོན༔ དར་སྣ་ལྔ་ཡི་ཟ་འོག་བེར་ཆེན་གསོལ༔ འགྲོ་རྣམས་མ་ལུས་བདེ་ལ་བཀོད་པའི་ཕྱིར༔ ཞབས་གཉིས་རྡོ་རྗེ་སྐྱིལ་ཀྲུང་ལྟ་བུ་བསྒྲད༔ འགྲོ་དོན་ཐུགས་ཀྱི་བུ་ཆེན་གནས་སུ་སྐྱོང་༔ གཅན་གཟན་གཡུ་རལ་ལྤགས་པའི་ཟ་འོག་བཅས༔ འགྲོ་རྣམས་ཆོས་ཀྱི་མཐའ་ནི་རྒྱས་པའི་ཕྱིར༔ འགྲན་གྱིས་དོ་མེད་པདྨ་ཧེ་རུ་ཀ༔ པདྨ་ཧེ་རུ་ཀ་ལ་ཕྱག་འཚལ་བསྟོད༔ ཁོ་མོ་བདག་ལ་ཐུགས་རྗེས་བཟུང་དུ་གསོལ༔ བདག་ལ་ཐུགས་རྗེས་ཟུངས་ལ་བྱིན་རླབས་གནོངས༔ མ་འོངས་ཐུགས་ཀྱི་བུ་ལ་བྱིན་གྱིས་རློབས༔ སྐུ་མདོག་གཟི་བརྗིད་མཚན་མཆོག་འདི་འདྲ་བ༔ བླ་མ་ཁྱེད་དང་འདི་འབྲལ་མེད་པར་ཤོག༔ བདག་རྒྱུད་གྲོལ་བར་བྱིན་གྱིས་རློབས༔ གཞན་རྒྱུད་སྨིན་པར་བྱིན་གྱིས་རློབས༔ བདག་ལ་ཐུགས་རྗེའི་མ་ཆུང་ཞིག༔ བུ་དད་ལྡན་རྣམས་ལ་ཐུགས་རྗེས་ཟུངས༔ ཁོ་མོ་བདག་ལ་ཐུགས་རྗེས་ཡང་ཡང་ཟུངས༔ ཁོ་མོ་ཤེས་རབ་དམན་ན་སྤྲོས་པ་ཆེ༔ ཁོ་མོ་རིག་པ་དམན་ན་བརྩོན་འགྲུས་ཆེ༔ ཁོ་མོ་ཟོད་དཀའ་མེད་ན་ནན་ཏན་ཆེ༔ ཁོ་མོ་བདག་ལ་ཐུགས་རྗེའི་མ་ཆུང་ཞིག༔ དད་པ་ཅན་འཆང་ལ་དངོས་གྲུབ་གནོངས༔ སྙིང་རུས་ཅན་ལ་ཆོས་གཅིག་གནོངས༔ བདག་གིས་དྲིན་ཆེན་བླ་མ་དྲན༔ ཤོ་ཨ་ཙམ་བླ་མ་དྲིན་གནང་བ༔ བསམ་ཞིང་ཁོ་མོ་ཡིད་ལ་འཆང་༔ མི་བརྗེད་ཐབས་གཅིག་གནང་བར་གྱིས༔ ཁོ་མོ་སྙིང་དམན་ཅན་ལ་ཆོས་གཅིག་གནོངས༔ བདག་གིས་དྲིན་ཅན་བླ་མ་དྲན༔ ཤོ་ཨ་ཙམ་བླ་མའི་དྲིན་གནང་བ༔ བསམ་ཞིང་ཁོ་མོ་ཡིད་ལ་མི་བརྗེད་ཐོབ་པའི་བཀའ་གཅིག་གནོངས༔ ཁོ་མོ་སྤྱོད་པ་དམན་པ་ཐབས་གཅིག་སྟོན༔ ཁོ་མོ་ལུས་བམ་ཆུང་བས་པག་མ་བསད༔ ཁོ་མོ་བདག་ལ་ཐུགས་རྗེའི་མ་ཆུང་ཞིག༔ ཉིན་མཚན་བསྒོམ་པ་ཁོ་མོ་བདག་གིས་ནི༔ རྫུས་སྐྱེས་པདྨ་བསྒོམ་པའི་དྲིན་ཆུང་བ༔ མཁར་ཟ་བདག་གིས་དྲིན་ཅན་བླ་མ་དྲན༔ ཤོ་ཨ་ཙམ་བླ་མའི་བཀའ་གནང་གྱིས༔ བསམ་ཞིང་ཁོ་མོ་ཡིད་ལ་དྲན༔ མི་བརྗེད་ཐོབ་པའི་གཟུངས་ཤིག་གནོངས༔ རིག་པ་ཆེ་བའི་བཀའ་གཅིག་སྩོལ༔ སྔར་ཡང་ཁོ་མོ་དད་གུས་ཆེ༔ ད་ཡང་ཁོ་མོ་ཆོས་ལ་མོས༔ མོས་པ་ཙམ་གྱིས་གྲོལ་བར་གནང་༔ ཁོ་མོ་བདག་གི་ཞེ་བློ་བདེ༔ མི་བརྗེད་པ་ཡི་ལུང་གཅིག་གནོངས༔ ཞེས་ཞུས་པ༔ པདྨའི་ཞལ་ནས༔ བདག་གི་གྲོགས་ཁྱོད་བྱེད་པ་ཙམ་ཐབས་གནང་བའི་སྐབས་དབྱེ་བ༔ ཁྱོད་བརྩོན་འགྲུས་ཆེ་བས་སྙིང་རུས་ཆེ་བ་གཅིག་ལ་བདག་གིས་བཀའ་གནང་བ་མི་བརྗེད་པར་བྱ༔ འདི་གསུངས་སོ༔

ཨེ་མ་ཧོ༔ བདག་ནི་ངོ་མཚར་རྨད་བྱུང་མཆོག་གི་གནས༔ གཞོན་ནུ་ལོ་བརྒྱད་ལོན་པའི་ཆ་ལུགས་ཅན༔ ཕོ་ཚོས་དུང་བས་དཀར་བའི་ཞལ་མངའ་བ༔ ཡེ་ཤེས་མཚོ་རྒྱལ་རང་ལོ་བཅུ་གསུམ་དུས༔ མཉམ་མེད་ཆོས་དབྱིངས་འདུལ་འབྲལ་མེད་པར་བྱེད༔ ཆོས་གསུངས་ཙམ་གྱིས་ཡིད་ལ་ཞོག༔ ཅེས་གསུངས༔ ཁྱོད་ལ་གང་གིས་བྱེ་བྲག་ཞིང་རྡུལ་སྙེད་ཀྱི་གུས་པ༔ བུད་མེད་ཀྱི་རིགས་བློ་མང་བས་ཐབས་མ་མཆིས་སམ༔ དྲི་མ་མེད་པའི་ཐབས་མ་གནང་བའི་བཀའ་སྩལ་བར་བགྱིས༔ ཞེས་གསུངས་པ༔ ཐབས་ཤེས་ཟུང་འཇུག་གིས་ངང་ནས་ཡབ་ཡུམ་གསང་སྦྱོར་བཅས་ནས༔ ཨུ་རྒྱན་པདྨ་སྐུ་མདོག་དཀར་ལ་ཅུང་ཟད་དམར་བ༔ ཡེ་ཤེས་མཚོ་རྒྱལ་སྐུ་མདོག་དམར་བ༔ ཕོ་ཚོས་དུང་བས་དཀར་བ༔ དབུ་སྐྲ་ལྟུང་ལོ་འཁྱིལ་བ༔ རིག་པ་ཆེ་བ་མི་བརྗེད་པའི་གཟུངས་ཐོབ་པ༔ ཨུ་རྒྱན་པདྨའི་ཅི་གསུངས་དོན་ལ་འཆང་བ༔ ཡབ་ཡུམ་གཉིས་ཀ་མིག་གིས་བལྟ་མི་བཟོད་པ་འདུག༔ ཡེ་ཤེས་མཚོ་རྒྱལ་གྱི་ཞལ་ནས༔

ཐབས་ཤེས་དབྱེར་མེད་བྱང་སེམས་བདེ་བའི་རྒྱུན༔ འདུ་བྱེད་རྩལ་རྫོགས་བྱང་ཆུབ་བདེ་བ་ཐོབ༔ ཁོ་མོ་ལུས་ཆུང་དབང་པོ་རབ་དྭངས་བ༔ སེམས་ཡང་དམན་པའི་ཁོ་མོ་རིག་རྩལ་ཆེ༔ ཞེས་ཞུས་པ༔ ཨུ་རྒྱན་པདྨའི་ཞལ་ནས༔ ཨ་རིགས་ཀྱི་བུ་མོ་ཁྱོད་མ་འོངས་ཀྱི་དོན་ལ་ཐབས་དགོངས་པ་ཁྱེད་གྲོགས་ཨེ་བྱེད༔ ཡེ་ཤེས་མཚོ་རྒྱལ་གྱི་ཞལ་ནས༔ མ་འོངས་དུས་སུ་ངས་གྲོགས་བྱེད༔ པདྨའི་ཞལ་ནས༔ ཁྱོད་ཆོས་ལ་མོས་ནས་བཀའ་སྩལ་པ༔ རིག་པ་དྭངས་བ་ཤེས་རབ་ཆེ་བ་ཨེ་འདུག་གསུངས༔ ཡེ་ཤེས་མཚོ་རྒྱལ་གྱི་ཞལ་ནས༔ རིག་པ་ཆེ་བ་འདུག༔ གསུངས་ནས་མགུར་འདི་བཞེངས་སོ༔

ཨེ་མ་ཧོ༔ མ་བཅོས་སྤྲོས་མེད་བདེ་ཆེན་ཆོས་ཀྱི་སྐུ༔ སྟོང་གསལ་བདེ་སྦྱོར་སྤྲུལ་སྐུ་གྲུབ་པ་ཐོབ༔ ཁོ་མོ་ང་ཡང་གྲུབ་ཆེན་ཐོབ༔ རིག་པ་ཆེ་བ་ངོ་མཚར་དུས༔ བདག་ནི་ཇོ་མོ་ཤེས་རབ་མཁར་ཆེན་ཟ༔ ཡོངས་སྙིང་འདི་ལ་རབ་ཏུ་བརྩོན༔ ཁོ་མོ་བདག་ལ་ཆོས་གཅིག་གནོངས༔ ཁོ་མོ་སྤྲོས་པ་ཆེ་བ་ཞེ་བློ་བདེ༔ ཤེས་རབ་དམན་པའི་ལས་བྱས་པ༔ ཁོ་མོ་བདག་གིས་ཆོས་གཅིག་ཞུ༔ ནན་ཏན་ཆེ་བས་བཀའ་བློ་བདེ༔ ཤེས་རབ་བརྩོན་འགྲུས་ཆེ་བ་ཞེ་བློ་བདེ༔ ཁོ་མོ་བདག་ལ་ཆོས་གཅིག་མ་གནང་ན༔ སྐྱབས་རེ་ས་བདག་གིས་སུ་ལ་བྱེད༔ བུ་མོ་བརྩོན་འགྲུས་ཆེ་བས་ཆོས་སྦྱངས་པ༔ ཁོ་མོ་ཤེས་རབ་ཆེ་བར་ཆོས་སྤྱོད་པ༔ ནམ་འཆི་ཆ་མེད་ཁོ་མོ་ཆོས་གཅིག་བྱེད༔ སྐྱེས་པ་ཡིན་ཀྱང་མི་ལུས་དོན་སྒོ་ཆུང་༔ ཁོ་མོ་སྡིག་ལ་མི་འགྲོ་ལུས་ཐོག་འདི་ལ་ཡང་༔ མི་ལུས་འདི་འདྲ་ཐོབ་པ་ག་ལ་འོང་༔ ཞེས་ཞུས་པ༔ ཡེ་ཤེས་མཚོ་རྒྱལ་ཞལ་ནས༔ ཨུ་རྒྱན་ལ་འདི་ཞུས༔ ཁྱོད་ཕ་མ་ཡོད་པ་ཡིན་ནམ༔ ཨུ་རྒྱན་ཞལ་ནས༔ ཕ་མེད་མ་མེད་མཚོ་ཆེན་སྡོང་ལ་བརྟེན༔ འཁོར་བ་མཐའ་གནས་པདྨ་འབྱུང་གནས་ང་༔ གསོལ་བ་ལན་གཅིག་བཏབ་པའི་བདེ་བ་ཐོབ༔ ཅེས་གསུངས༔ ཁྱོད་ཆོས་ལ་མོས་པའི་ཐབས་དལ་འབྱོར་མི་ལུས་འདི་ཐོབ་དཀའ་བ་འཇིག་རྟེན་འདི་ལ་དཔེ་བཞག་ན་མི་ལུས་ཐོབ་པའི་དུས་མེད༔ ནམ་འཆི་ཆ་མེད་གློ་བུར་རྐྱེན་གྱིས་འཇིག་པའི༔ འཆི་ན་ངེས་པ་མེད་པ་ངན་འགྲོར་ལྟུང་བ་མངལ་དུ་ཞུགས་ནས༔ དང་པོ་ཞུགས་ས་མི་རྙེད་པའི་སྡུག་བསྔལ༔ བར་དུ་མངལ་དུ་ལྟུང་མི་ཐུབ་པའི་སྡུག་བསྔལ་ཐ་མ་སྐྱེས་པའི་སྡུག་བསྔལ༔ ན་བའི་སྡུག་བསྔལ་རྒས་པའི་སྡུག་བསྔལ་འཆི་བའི་སྡུག་བསྔལ༔ སྣང་བ་ལས་དབང་འཁྱམས་པའི་སྡུག་བསྔལ༔ འཇིག་རྟེན་གྱི་དཔེ་ལྟ་བུར་ལ་དེ་འདྲ་བའི་སྡུག་བསྔལ་ཡོད༔ ཆོས་ལ་མོས་པའི་མཐོ་རིས་གནས་སུ་སྐྱེས༔ སྡིག་ལ་དད་པའི་ངན་སོང་གནས་སུ་ལྟུང་༔ གསོལ་བ་གཅིག་བཏབ་བདེ་ཆེན་ངེས་པར་སྐྱེས༔ ཁ་ན་མ་ཐོ་ངན་སོང་ཐར་མེད་དོ༔ དེ་འདྲ་བ་ཁྱོད་འགྲན་ན་དེ་རིང་སངས་རྒྱས་ཐོབ༔ ཅེས་གསུངས༔

ཡེ་ཤེས་མཚོ་རྒྱལ་ཞུས་པ༔ དེ་འདྲ་བ་ཅི་ཡང་མ་བྱེད་ན་ཁྱོད་ཐུགས་རྗེས་ཀྱི་མཐོ་རིས་གནས་སུ་སྐྱེས་པའི་ཐབས་ཡོད་པ་ལགས༔ པདྨའི་ཞལ་ནས༔ ཐབས་ཡོད་དེ་སྐྱབས་ཡུལ་ལྷ་བསྐྱེད་པ་འདི་ཐབས་མཆིས་པ༔ ཁྱོད་ལྷ་སྒོམ་གསུངས་ནས་ཁོ་མོ་པདྨའི་ཞལ་ནས་ལྟ་བ་ཙམ་གྱིས་ཤིན་ཏུ་གྲོལ་བ༔ ལགས་ཨུ་རྒྱན་རིན་པོ་ཆེ༔ མ་འོངས་སེམས་ཅན་འདི་དུག་གི་སྡོང་པོ་ལོ་མ་འདྲ་བ་འདི་ལ་ཁྱེད་ཐུགས་དགོངས་ཞུས༔ ཁོ་མོ་སྒོམ་གཅིག་གྲོལ་བར་བྱ་བའི་ཐབས་གནོངས་ཞུས༔ ཨུ་རྒྱན་གྱི་ཞལ་ནས༔ རིགས་ཀྱི་བུ་མོ་ཁྱོད་རིག་པ་བཅོས་སླད་མ་བརྒྱབ་པ་འགྲོ་ཐོག་འདུག་ཐོག་རིག་པ་རང་ཐོག་ཏུ་ཆོད་དེ༔ ཆགས་ཞེན་མ་བྱེད་གསུངས༔ ཁོ་མོས་ཞུས་པ༔ ཀྱེ་ཀྱེ་ཨུ་རྒྱན་རིན་པོ་ཆེ༔ སངས་རྒྱས་ཀུན་གྱི་ངོ་བོ་ཉིད༔ གཉིས་མེད་རྣམ་དག་ཆོས་ཀྱི་སྐུ༔ བདག་ནི་ཤེས་རབ་མཁར་ཆེན་བཟའ༔ རང་རིག་སྣང་བའི་ལམ་དུ་ལྟ༔ ཕྱི་རུ་འགྲོ་བའི་སྣང་ཐག་ཆོད༔ ཉེ་བར་འདུག་པའི་རིག་ཐག་བཅད༔ ནང་དུ་འདུག་པའི་གཞི་ཐག་བཅད༔ ཚོགས་དྲུག་སྣང་བ་མ་འཁྱམ་དོན་གཅིག་སྒོམས༔ མ་རྒྱུད་ཆོས་གཅིག་བདག་གིས་གྲོལ༔ ཆོས་དབྱིངས་བཟང་ངན་མེད་པ་ཀུན་བཟང་མོ༔ གསལ་སྟོང་གཅིག་འདྲེས་དངོས་དོན་རིག་ལས་གྲུབ༔ བར་དུ་ཆོས་སྐུ་རྒྱལ་བ་ཡུམ་ཆེན་མོ༔ ཀ་དག་གཞི་ལས་གྲོལ་བའི་ལམ་དག་པ༔ ཐ་མ་ཡེ་ཤེས་མཁའ་འགྲོ་ཀུན་དགའ་མོ༔ འགྲོ་ལ་བརྩེ་ཕྱིར་སེམས་ཉིད་ཆོས་ཀྱི་སྐུ༔ སྐྱེ་མེད་མ་གཅིག་ལབ་ཀྱི་སྒྲོན་མ་ཞེས༔ གང་འདུལ་ཉི་ཟླ་སྒྲོལ་མ་དོན་གོ་བ༔ ཕག་མོ་གྲུབ་པ་གྲུབ་པའི་རྒྱལ་མོ་གཉིས༔ དེ་བཅས་མ་རྒྱུད་མ་ཧཱ་ཡོ་གའི་གཉིས་མེད་དུས་ཀྱིས་སྡོམ་པ༔ བདག་འདྲ་ཇོ་མོ་མཁར་ཆུ་བཟའ༔ ཚོགས་དྲུག་དངོས་རྟེན་མ་བྱེད་སྒོམ་གཅིག་བྱེད༔ སྟོང་གསལ་བཟང་ངན་མ་བྱེད་སྒོམ་གཅིག་བྱེད༔ འཁོར་འདས་ཡ་བྲལ་མི་བྱེད་སྒོམ་གཅིག་བྱེད༔ སྔོན་བསུ་རྗེས་འབྲང་མི་བྱེད་བདག་གིས་བསྒོམ༔ རིག་པ་རང་འོད་གསལ་བའི་ལས་ལ་བལྟ༔ དུག་ལྔ་མི་སྤངས་རྒྱན་བཀོད་རང་ས་ཞུ༔ ཡེ་ཤེས་ལྔ་ནི་འབྲས་བུ་རབ་རྟོགས་པ༔ ཉིད་ལ་ཉོན་མོངས་མངའ་བ་མི་བྱེད་དེ༔ མོ་དེ་ལྟར་བསྒོམས་ནས་ཨེ་ཡོང་ངམ༔ བསམ་ཞིང་བླ་མའི་ཡིད་ལ་དཔྱོད༔ ཤོ་ཨ་ཙམ་བླ་མའི་གནང་བཅས་པ༔ ཁོ་མོ་བསམ་ཞིང་དོན་ལ་འཆང་༔ མ་རྒྱུད་གཉིས་སུ་མེད་པ་རྩ་བསྐྱེད་བྱེ༔ ཡབ་ཡུམ་ཟུང་འཇུག་བྱེད་པའི་གྲུབ་པ་ཐོབ༔ མ་རིག་མུན་ཁུང་གསལ་བ་འོད་ལ་སྦྱངས༔ དྲིན་ཅན་བླ་མའི་ཡིད་ལ་དཔྱོད༔ ཁོ་མོ་བསམ་ཞིང་ཡིད་ལ་དྲན༔ ཞེས་ཞུས་པ༔

ཨུ་རྒྱན་གྱི་ཞལ་ནས༔ དེ་ལྟར་བསྒོམ་པ་དེ་འདྲ་བ་མཚར་ཏེ༔ རྩ་རླུང་ཐོབ་པ་གྲུབ་པ་ཐོབ་པ༔ སྟོང་གསལ་བདེ་སྦྱོར་གྱི་གསང་སྦྱོར་གཅིག་བཅས་ནས༔ གྲུབ་པ་ཐོབ་ཅིང་གསུངས་ནས༔ ཡབ་ཡུམ་གཉིས་ཀ་འོད་གསལ་ཐབས་ཤེས་བྱ་བ་བྱེད་ནས༔ ཡབ་ཡུམ་གཉིས་ཀ་རིག་པ་ཕྱི་གསལ་ནང་གསལ་དུ་རྟོགས་པ༔ ཡེ་ཤེས་མཚོ་རྒྱལ་གྱིས་མི་བརྗེད་པ་དང་རིག་པ་ཤེས་རབ་མེ་འབར་བ་གཅིག་ཡོང་པ༔ ཁོ་མོ་འཕུར་ལ་ཁད་པ་པདྨའི་ཆོས་གསུངས་པ་དང་༔ དེ་རྣམས་མི་བརྗེད་པའི་གཟུངས་ཐོབ་པ༔ རིགས་ཀྱི་བུ་མོ་རིག་པ་དང་ཤེས་རབ་ཆེ་བ་ཉམས་སུ་བླངས་ཨེ་ཐུབ་གསུངས༔ ཁོ་མོས་སྤྲོས་པ་དང་རིག་པ་ཆེ་བ་ཉམས་སུ་ལོན༔ ཁྱོད་ལ་བདག་གིས་ཞུ་བ་ཐར་བར་བྱ༔ ཁོ་མོ་འདྲ་བ་ཆོས་མོས་པ་བློས་བདེ་བ་ཁྱེད་ཀྱིས་གྲོགས་ལྟར་དུ་བགྱིས་པ༔ ཐབས་ལ་མཁས་ན་བདག་ལ་ཚང་བ་སྩོལ་ཞུས༔ ཞེས་ཞུས་པ༔ པདྨའི་ཞལ་ནས༔ ཀུན་ཏུ་བཟང་པོ་ཆོས་སྐུའི་ཚུལ་འཛིན་པ༔ སྣང་བ་མཐའ་ཡས་སྟོང་གསལ་གྱི་ཆ་འཛིན་པ༔ བཅོམ་ལྡན་འདས་འདུལ་བའི་ཐབས༔ སྤྱན་རས་གཟིགས་རིག་པ་འཛིན་པ༔ ང་སྤྲུལ་སྐུ་ཆ་འཛིན་པའི་ཐབས་ཡིན་པ༔ ཕ་རྒྱུད་མ་རྒྱུད་གཉིས་མེད་ཀྱི་རྒྱུད་དེ་ལྟར་ཡིན༔ ཁྱེད་འགྲོ་བ་ཡོངས་ལ་སྙིང་རྗེ་ཕན་སེམས་བསྐྱེད་པ་མཆོག་གི་དངོས་གྲུབ་གནང་ནས༔ འགྲོ་ལ་དགོངས་མང་གསུངས༔ མཚོ་རྒྱལ་གྱིས་ཁོ་མོ་འགྲོ་ལ་ཕན་པའི་ཐབས༔ མཆོག་གི་དངོས་གྲུབ་གནང་༔ ཞེས་བྱེད་ལགས་ཞུས༔ ཆང་དང་མཁར་བང་གཅིག་ཡོན་བདག་གཅིག་ཏུ་འཚོ་བ་སྤངས་ནས༔ ཡེ་ཤེས་མཚོ་རྒྱལ་གྱིས་ཨུ་རྒྱན་ལ་ཞུས་པ༔ ཡོན་བདག་དང་དད་པ་ཅན་གྱི་འཚོ་བ་འདི་གསོལ་ནས༔ འདི་ལ་ཕན་པའི་ཆོས་གཅིག་གསུངས་ཞུས༔ ཨུ་རྒྱན་པདྨའི་སྡིག་པོ་ཆེ་བཙན་ཐབས་གཅིག་གནང་༔ ཞེས་གསུངས༔

ཡེ་ཤེས་མཚོ་རྒྱལ་གྱིས་སློབ་དཔོན་འདི་རྣམས་མ་འོངས་སེམས་ཅན་ཐམས་ཅད་སྙིང་རྗེ་བསམ་པ་འདི་རྣམས་ལ་ཆོས་གཅིག་གསུངས་ཞུས༔ ཨུ་རྒྱན་གྱིས་ཁོ་མོ་ཉོན་དང་གསུངས་ནས༔ རབ་མི་མང་བ་གཅིག་གསུངས་ནས་ཤོག་སེར་ལ་རྒྱབ་པ༔ ཡེ་ཤེས་མཚོ་རྒྱལ་གྱིས་ཞུས་པ༔ བདག་ལ་བསྐྱེད་རིམ་འོད་ཕུང་ཟུང་འཇུག་གཅིག་གནོངས༔ པདྨའི་ཞལ་ནས༔ ལུས་ལྷ་བསྒོམ་པ༔ ངག་སྔགས་ཡིད་ཆོས་ཉིད་བསྒོམ་པ༔ བདག་ཉིད་རྣམ་པར་ཤེས་པ་སྟོང་གསལ་ངང་ནས་འཇིགས་བྱེད་རྡོ་རྗེ་འཆང་བསྒོམ༔ ཕྱི་ལྟར་རྡོ་རྗེ་འཆང་༔ ནང་ལྟར་ན་རྡོ་རྗེ་སེམས་དཔའ༔ གསང་བ་ལྟར་ན་ཀུན་ཏུ་བཟང་པོ་སྤྱི་བོར་རྒྱལ་བ་རིགས་ལྔ༔ ཕྱི་ལྟར་ན་རིགས་ལྔ༔ ནང་ལྟར་ན་སྐུ་ལྔ༔ ཁོ་ན་ཉིད་ལྟར་ན་ཡེ་ཤེས་ལྔ༔ དབུས་སུ་རྣམ་པར་སྣང་མཛད༔ རྒྱལ་བ་རིགས་ལྔའི་དབུ་རྒྱན༔ དུང་ཁང་ཡ་མནྡ༔ མགྲིན་པ་སྤྱན་རས་གཟིགས༔ ཐུགས་ཀར་ཕྱག་ན་རྡོ་རྗེ༔ དེ་དང་དུས་མཉམ་དུ་རིགས་ལྔ་ལ་རིགས་ལྔའི་དབུ་བརྒྱན་ནས༔ ལྷག་པའི་ལྷ་དགུ་ཉིད་རེ་རེ་བསྒོམ༔ མི་བརྗེད་པ་དེ་ལྟར་དུ་ཉམས་སུ་ལོངས་གསུངས༔ ཡེ་ཤེས་མཚོ་རྒྱལ་མགུར་འདི་ཕུལ་ལོ༔

ཨེ་མ་ཧོ༔ རྣམ་དག་ཆོས་ཀྱི་དབྱིངས་ལས་མ་གཡོས་ཀྱང་༔ ཤེས་བྱ་རྣམ་འཕྲུལ་ཐུགས་རྗེ་རང་བཞིན་ལ༔ རྒྱ་གར་སྔགས་འཆང་གྲུབ་ཆེན་པདྨ་འབྱུང་༔ སྐྱེ་འཆི་གཉིས་སུ་མེད་པའི་སྐུ་ལ་བསྟོད༔ མཐའ་འཁོབ་བོད་ཡུལ་ཁ་བ་ཅན་ཡུལ་དུ༔ མ་རིག་མུན་ཁུང་ནང་དུ་ཉི་མ་ཤར༔ ལས་ཅན་རྣམས་ལ་ཐུགས་རྗེས་ཆར་ལྟར་འབེབས༔ ཆོས་རྒྱལ་བོད་འབངས་རྗེ་འབངས་སྨིན་ཕྱིར་དུ༔ ཚ་གདུང་ནད་སེལ་ཁྱོད་ལ་ཕྱག་འཚལ་བསྟོད༔ ཁ་བ་ཅན་གྱི་མི་མིན་འདྲེ་ཡུལ་དུ༔ སྲིན་པོ་གདུག་པ་འདྲེ་བགེགས་དམ་ལ་བཏགས༔ ཁམས་གསུམ་དབང་སྡུད་ཆེ་མཆོག་ཧེ་རུ་ཀ༔ པདྨ་ཧེ་རུ་ཀ་ལ་ཕྱག་འཚལ་བསྟོད༔ སྤྱིར་བོད་ཁམས་ལ་ཐུགས་རྗེའི་མ་ཆུང་ཞིག༔ སྒོས་ཁོ་མོ་བདག་ལ་ཐུགས་རྗེས་གཟིགས༔ ལར་བོད་འབངས་ཡོངས་ལ་བཀའ་དྲིན་ཆེ༔ སྒོས་ཁོ་མོ་བདག་ལ་ཐུགས་རྗེས་གཟིགས༔ དད་གུས་ཅན་ལ་བྱིན་རླབས་གནོངས༔ སྙིང་རུས་ཅན་ལ་ཆོས་གཅིག་གནོངས༔ བཀའ་དྲིན་ཅན་ལ་སྐྱབས་སུ་མཆི༔ ཁོ་མོ་རྐྱེན་ངན་གྲོགས་སུ་འཆར་བར་ཤོག༔ བར་ཆད་ཞི་བར་བྱིན་གྱིས་རློབས༔ འདི་ཕྱི་གང་ལ་ཐུགས་རྗེས་ཟུངས༔ ཞེས་ཞུས༔

མ་འོངས་དུས་སུ་ཆོས་གཅིག་གསུངས་པའི་ཐབས་དགོས༔ ཨུ་རྒྱན་པདྨའི་ཞལ་ནས༔ ཁོ་མོ་ཉམས་སུ་ལོངས་བརྡ་ཡིག་ཕོབ་ཅིག༔ ངས་འདོན་པའི་ཐབས་བྱ༔ བཀའ་བབས་ཆོས་ཀྱི་རྒྱལ་མཚོས་གསུངས་པ༔ ཡེ་ཤེས་མཚོ་རྒྱལ་ཞུས༔ དེའི་ཆོས་བདག་བསྐལ་པ་ཅི་འདྲ་གཅིག་ལ་ཡོང་ཞུས༔ པདྨའི་ཞལ་ནས་བསྐལ་པ་ལྔ་བརྒྱའི་བར་སྐབས་སུ་དུས་འཁྲུགས་དར་བའི་ས་ནས༔ མུན་སྐབས་ནམ་མཁའི་སྙིང་པོ་སྤྲུལ་པ་སངས་རྒྱས་བླ་མ་ཞེས་བྱ་བ་ང་དང་མཚུངས་པའི་སྐྱེས་བུ་ཞི་བ་དུལ་བ་གཅིག་ཡོང་ནས་དེའི་བདག་པོ་བྱེད་གསུངས༔

གཞོན་ནུ་མཛེས་ཚུལ་ཟླ་མཛེས་མཚོ་རྒྱལ་མ༔

མི་བརྗེད་ཉམས་ལོངས་མ་འོངས་འགྲོ་བའི་དོན༔

ཐོགས་མཐའ་གྲོགས་བྱེད་ཁྱོད་ཀྱི་ཆོས་སྐལ་མཛད༔

སྤྲུལ་པ་དཔག་མེད་འགྲོ་བ་འདྲེན་པར་ཤོག༔

ཅེས་གསུངས༔ རྒྱལ་པོ་པེ་ཀར་ཡོང་ནས་ཁྱོད་ཅི་ལ་སྐྲག༔ ཞུས༔ ཨུ་རྒྱན་པདྨའི་ཞལ་ནས༔ སྣང་སྲིད་ཆོས་སྐུ་འཁོར་འདས་ཀློང་ནས་ཅི་ལ་མི་སྐྲག༔ འཇིག་རྟེན་མིའི་སྡིག་པ་ལ་སེན་ཙམ་སྐྲག་གསུངས༔ ཁོ་གོ་ལོག་ཏུ་སོང་བའི་ཉི་ཤུའི་ནུབ་མོ་སྡིག་པ་ལ་སྤྲུལ་ནས༔ བསམ་ཡས་ཧས་པོ་རི་དྲྭ་བར་དུ་བཟུང་བས༔ ཨུ་རྒྱན་གྱིས་སྡིག་པ་ལ་སྤྲུལ་ནས་ཕྱག་གཡས་གསེར་གྱི་རྡོ་རྗེ་གསོར་བ་གཡོན་པས་སྡིག་པའི་སྐེ་ནས་བཟུང་བ༔ ཧེ་ཧེ་དྷ་ན་རཱ་ཛྭ་ཙིདྷ་ཕྱུང་ཕྱུང་༔ ཞེས་གསུངས་པ༔ སྡིག་པ་ཚར་བཅད་པར་བསྒོམ༔ ཡེ་ཤེས་མཚོ་རྒྱལ་གྱིས་ཞུས་ནས༔ འདི་མ་འོངས་པའི་ཐབས་གང་སྟོན་ལགས༔ དྷ་ན་རཱ་ཛཱ་ཅི་ཟེར་བ་འདི་ཡི་བསྐྱེད་རིམ་དེ་ང་ལ་གསུངས་ཞུས༔ ཧེ་ཧེ་ནི་དམ་ཉམས་ཚུར་ཤོག་ཤོག༔ དྷ་ན་ནི་སཾསྐྲྀ་ཏའི་སྐད་ཟུང་ཟུང་༔ རཱ་ཛ་ནི་རྒྱལ་པོ་ཡིན་པའི་ཙིཏྟ་ནི་སྙིང་ཕྱུང་ཟེར་བ་ཡིན༔ རྒྱུད་ཆོས་ཀྱི་ཆོས་དབྱིངས་སྐྱེ་བ་མེད་པ་ནས༔ ཆོས་སྐུ་ཀུན་ཏུ་བཟང་པོ་སྣང་བ་མཐའ་ཡས༔ ལོངས་སྐུ་ཐུགས་རྗེས་ཆེན་པོ་པདྨ་ང་༔ དབང་དྲག་ཏུ་སྐུར་བཞེངས་ནས༔ སྣང་སྲིད་དབང་དུ་བསྡུ་བའི་ཐབས་ཞལ་གཡས་དཀར་བ༔ སྲིད་གསུམ་ཟིལ་གྱིས་གནོན་པའི་ཞལ་གཡོན་སྔོ་བ༔ སྡེ་བརྒྱད་ཐལ་བར་བརླག་པའི་ཕྱིར་དུ༔ དབུས་དམར་ནག་གནོད་བྱེད་གཞོབ་ཏུ་བསྲེག་པའི་ཕྱིར་དུ་སྤྱན་དགུ་དང་རྡོ་རྗེ་ཕག་མོ་བསྒོམ༔ བདག་ནི་ཞི་བའི་ཚུལ་གྱིས་ཨུ་རྒྱན་པདྨ་དེའི་སྤྱི་བོར་བྱ་ཁྱུང་བསྒོམ་པ་དང་པོ་མི་མངོན་པའི་གནས་ནས་དེའི་ཡོན་ཏན་སྤྲུལ་པ༔ དྲྭ་བར་ན་སྐུ་ཡི་དངོས་བཅས་སྣང་བ་མཐའ་ཡས༔ དཔྲལ་བར་ནས་དབང་དྲག་བཞེངས་པའི་སྐུ་སྤྲུལ་འཇམ་དཔལ༔ མགྲིན་པར་གསུང་སྤྲུལ་དབང་ཆེན་རྟ་མགྲིན༔ ཐུགས་ཀར་རྡོ་རྗེ་གཏུམ་པོ༔ ལྟེ་བ་མཁའ་འགྲོ་སྡེ་ལྔ༔ གསང་གནས་ཡཀྴ་མེ་དབལ༔ ཏིང་ངེ་འཛིན་སྟོང་གསལ་ངང་ནས་རིག་པ་ལ་གྲུབ་པ་དེ་ལྟར་བསྒོམ༔ ཨ་ཙིག་ཤིན་ཏུ་ཁྲོས་པའི་ཁྲོ་བོ་རྒྱལ་པོ་ནམ་མཁའ་གང་བར་བསྒོམ༔ ནེརྩིག་ནི་ངེས་པར་འཁྲོས་པའི་ཁྲོ་བོ་རྒྱལ་པོ་ནམ་མཁའ་གང་བར་བསྒོམ༔ ནེརྩིག་ནས་ངེས་པར་འཁྲོས་པའི་ཁྲོ་བོ་རྒྱལ་པོ་ས་གཞི་གང་བར༔ ན་མོ་འདྲེ་བགེགས་མ་ནུས་པར་མདུན་དུ་ཕྱག་འཚལ་བ༔ བྷ་ག་ཝ་ཏེ་བཅོམ་ལྡན་འདས་ལྟ་བུའི་ཏིང་ངེ་འཛིན་ངང་ནས་བསྐྱེད་པར་བྱ༔ ཧཱུཾ་སྐྱེ་མེད་ངང་ནས་བསྡུ་བ༔ ཕཊཱ་འགགས་མེད་ངང་ནས་བསྒྲལ་བ༔ ལྷ་ཡེ་ཤེས་སེམས་དཔའ་དབང་དྲག་པདྨ་སྤྱི་བོར་བསྐྱེད་པ༔ དེའི་ཐུགས་ཀར་སྔགས་འཁོར་བ༔ བདག་ཉིད་ལུས་དམ་ཚིག་སེམས་དཔའི་ལྗགས་ཀྱི་སྟེང་ནས་ཧཱུྃ་ལ་སྔགས་ཀྱིས་བསྐོར་བ༔ ཐུགས་ཀར་ཡེ་ཤེས་སེམས་དཔའ་ཚོན་གང་བ་དབང་དྲག་པདྨ་གཅིག་སྐྱེས་པ་ཡེ་ཤེས་སེམས་དཔའ་དེ་ལྟར་བསྒོམ་གསུངས༔ ཁོ་མོ་བརྡ་ཡིག་ཕབ་ནས་ཞུས་པ༔ ཀྱེ་ཀྱེ་ཨུ་རྒྱན་རིན་པོ་ཆེ་ལགས༔ འདིའི་ཆོས་ནམ་དུ་དར༔ ཞུས༔

ཨུ་རྒྱན་ཞལ་ནས༔ ལྔ་བཅུ་ཁ་རལ་ནས་སྐྱེས་བུ་སྔགས་འཆང་རྒྱལ་རིགས་དང་ལྡན་པ༔ རྩིབ་ཅིང་འབྱུང་བའི་ཞིང་ཁམས་འདིའི་ལྷོ་ཕྱོགས་ནས་རཏྣའི་མིང་ཅན་འབྱུང་༔ དེའི་ཆོས་བདག་དེ་བྱེད་གསུངས༔ ཡེ་ཤེས་མཚོ་རྒྱལ་ཁྱོད་ཀྱིས་ཅི་རྨིས་ཤོད་དང་ངས་བཤད་པར་བྱ་གསུངས༔ ཡེ་ཤེས་མཚོ་རྒྱལ་ཞལ་ནས༔ ཁོ་མོ་རྨི་ལམ་རྨིས་ཏེ༔ ཐུགས་ཁྲེལ་རྒྱ་ཆེན་པོ་མི་གནང་ཨང་ལགས་ཞུས༔ པདྨའི་ཞལ་ནས༔ ཁྱོད་དད་གུས་དང་ལྡན་པ་ཅི་རྨིས་པ་སྨྲས་ཏེ༔ ཐུགས་ཞིབ་མོ་ཨ་རང་འདུག་གསུངས༔ མཚོ་རྒྱལ་ཞལ་ནས༔ ནུབ་འདི་ནས་རྨ་བྱ་གཅིག་ལ་བྱ་ཕྲུག་མངལ་དུ་ཞུགས་ནས་རྩལ་རྫོགས་པ༔ མངལ་དུ་ལྷུང་ནས་ནམ་འཕང་གཅོད་པ༔ གཤོག་པ་འགྲོ་བ་ཁེབ་པ་རྨིས་ཞུས༔ པདྨའི་ཞལ་ནས་འགྲོ་བའི་དོན་དུ་ཕན་ཐོགས་རྒྱ་ཆེན་པོ་མཛད་ཡོང་བའི་རྟེན་འབྲེལ་ཐབས་གནང་༔ དེ་རིང་ཉིན་པར་ནས་ཤིང་དང་ཆུ་གཅིག་བླངས་ནས་འཚོ་བ་བྱེད་ཅིག་གསུངས༔ ཁོ་མོ་ཤིང་བཏུ་སོང་ནས༔ ཤིང་མེའི་རི་ཡིན་པས་ཤིང་མ་ཚུད༔ ཅི་བྱེད་བསམ་པ༔ བསམ་ཡས་གཙུག་ལག་ཁང་སྒོ་ནས་སོང་༔ དེ་ཤིང་གཅིག་ཡོང་ནས་ཆུ་གཅིག་བླངས་ནས་ཁོ་མོས་ཞུས་པ༔ འཚོ་བ་ནི་ཅི་མེད་ལགས་ཞུས༔ ཨུ་རྒྱན་གྱི་ངས་འདིའི་འཚོ་བ་མི་ཐུབ་ན་རྒྱ་གར་བླ་མ་རྫུས་སྐྱེས་ཡིན་པ་མི་ཕན་གསུངས་ནས༔ རྡོ་དཀར་གཅིག་འཕང་ནས་འཚོ་བ་བྱེད༔ ཡེ་ཤེས་མཚོ་རྒྱལ་ཞལ་ནས༔ ཡང་ཅིག་བསམ་པ་རྗེས་འཛིན་པ༔ ཁོ་མོ་བདག་ལ་ཐུགས་རྗེས་གཟིགས༔ བཀའ་དྲིན་ཅན་ལ་སྐྱབས་སུ་མཆི༔ སྐྱབས་གསུམ་བསླུ་བ་མེད་པ་ཆོས་ཀྱི་སྐུ༔ ཁོ་མོ་ཤེས་རབ་དམན་ཏེ་དད་པ་ཆེ༔ བཟོད་དཀའ་མེད་ན་སྙིང་རུས་ཆེ༔ ཁོ་མོ་བུད་མེད་རིགས་ཡིན་ཆོས་ལ་མོས༔ ཁོ་མོ་ཆོས་ལ་དད་པ་རྗེས་སུ་འཇུག༔ སྐུ་མདོག་དུང་ལྡན་རྫུས་སྐྱེས་སྐུ་ལ་བསྟོད༔ སྤྱིར་འགྲོ་བ་ཡོངས་ལ་ཐུགས་རྗེས་ཆེ༔ ལར་ཁོ་མོ་བདག་ལ་བཀའ་དྲིན་ཆེ༔ མཁར་ཆུ་རྒྱུད་ལ་ཐུགས་རྗེའི་མ་ཆུང་ཞིག༔ སྐྱིད་སྡུག་ལས་དབང་རྣམ་སྨིན་དེ་ལྟར་འཁོད༔ ཕྱི་མ་བདེ་བའི་ཐུགས་རྗེས་ཟུངས༔ ཁོ་མོ་སྙིང་རུས་ཅན་ལ་ཆོས་གཅིག་གནོངས༔ བརྩོན་འགྲུས་ཅན་ལ་གདམས་ངག་གནོངས༔ མོས་པ་ཅན་ལ་སེམས་མཆོག་བསྐྱེད༔ ཤེས་རབ་ཅན་ལ་བློ་སེམས་བསྐྱེད༔ ཁོ་མོ་བདག་ལ་ཐུགས་རྗེས་ཡང་ཡང་གཟིགས༔ ཞེས་ཞུས༔

པདྨའི་ཞལ་ནས༔ མཁར་ཟ་ཡེ་ཤེས་མཚོ་རྒྱལ་ལན་གསོན་གཅིག༔ བདག་ལ་ཐབས་ཤེས་བདེ་བས་ཆུ༔ སེམས་ཉིད་མི་བསྒོམ་གྲོལ་བའི་གདམས་ངག་ཡོད༔ ཇོ་མོ་མཁར་ཟ་ཁྱོད་ལ་གནང་༔ མི་བརྗེད་ཉམས་ལོངས་མ་འོངས་འགྲོ་བའི་དོན༔ བསྐྱེད་རིམ་ཟུང་འཇུག་ཨ་ཏི་བཀོད་པ་ཡོད༔ ཁོ་མོ་མི་བརྗེད་ཉམས་ཡོངས་འགྲོ་བའི་དོན༔ ཐིག་ལེ་འབར་བཅས་ཉག་ཅིག་གདམས་ངག་འདི༔ ཁོ་མོ་མི་བརྗེད་ཉམས་ཡོང་འགྲོ་བའི་དོན༔ མ་འོངས་དུས་ཀྱི་གྲོགས་བྱེད་ཁྱོད་ཀྱིས་ཡོང་༔ སྙིང་གི་གཏམ་པའི་དྭངས་མ་འདི༔ བུ་རིག་རྩལ་ཅན་ལ་སྟེར་བའོ༔ ཞེས་གསུངས༔

ཡེ་ཤེས་མཚོ་རྒྱལ་ཞལ་ནས༔ མ་འོངས་འགྲོ་བའི་དོན་དུ་ཐབས་དགོངས༔ ཇོ་མོ་མཁར་ཆུ་ཟ་ཉོན༔ ལྷ་ཤེས་པ་གང་ལ་འདུ་འབྲལ་མེད་པ༔ ངག་གིས་སྔགས་བཟླས་པ༔ ལྗགས་དམར་པོ་པདྨ་འདབ་མ་བརྒྱད་པའི་སྟེང་ནས༔ ཧཱུཾ་ས་བོན་ཅི་བསྐྱེད་པ་སྔགས་ཀྱིས་བསྐོར་བར་བསྒོམ༔ དེ་ལ་འོད་ཟེར་འཕྲོ་འདུས་བྱས༔ བདག་གིས་ལྗགས་གསུམ་སྟེང་ན་མེ་འབར་བ་གནོད་བྱེད་བསྲེགས་པར་བསྒོམ༔ ཡིད་ཏིང་ངེ་འཛིན་ཆོས་ཉིད་ངང་འདུ་འབྲལ་མེད་པ༔ ཆོས་སྐྱེ་བ་མེད་པའི་ངང་ནས་ཉིད་འགགས་པ་མེད་པ༔ ཏིང་ནི་རྡོ་རྗེ་ལྟ་བུའི་ངོ་བོ་ཉིད་ལ་གཡོ་སྒྲིབ་མེད་པ༔ ངེ་ནི་དོན་དམ་སྣང་བ་ལམ་དུ་འགྲོ་བ་གཞི་རུ་འདུག་པ༔ འཛིན་པ་ནི་སྟོང་གསལ་ཟུང་འཇུག་ངང་ནས་ལྷ་དང་འདྲེ་བགེགས་ཤན་དབྱེ་བ་ཏིང་ངེ་འཛིན་རྣམ་པ་རྒྱུའི་ཏིང་ངེ་འཛིན༔ ཀུན་སྣང་ཏིང་ངེ་འཛིན༔ སེམས་ཉིད་ཏིང་ངེ་འཛིན༔ བདེ་གཤེགས་སྙིང་པོ་འགྲོ་ཀུན་ཡོངས་ལ་ཁྱབ་པའི་ཏིང་ངེ་འཛིན༔ ཀུན་ཏུ་མཐའ་དག་བྲལ་བའི་སྣ་ཚོགས་ཀླུང་ཐིམ་དུ་འདུག་བཅས་ཏིང་ངེ་འཛིན༔ ཁོ་མོ་ཉིད་ལ་ཉོན་མོངས་མི་མངའ་བའི་ཏིང་ངེ་འཛིན༔ བཀོད་པ་ཆེན་པོ་མ་ནོར་བ་རྩ་བའི་སྔགས༔ ལུ་གུ་རྒྱུའི་བསྐོར་བའི་བསྐྱེད་པའི་སྔགས༔ འགྲོ་ལ་ཞིང་གི་རྡུལ་སྙེད་བྱེ་བྲག་ཏུ་ཁྱབ་པའི་བསྐུར་བ་ལས་འཕྲོ་སྔགས༔ དེ་དང་མཉམ་དུ་མི་བརྗེད་པའི་མཁར་ཟའི་ཉམས་སུ་ལོང་གསུངས༔ མཁར་ཆུ་ཟ་ཁྱོད་འདྲ་བ་འཇིག་རྟེན་བུད་མེད་རིག་པ་ཆེ་བ༔ ཤེས་རབ་དང་སྙིང་རུས་བརྩོན་འགྲུས་ཆེ་བ་ཆོས་ལ་མོས་པ་ཀུན་ཁྱོད་འདྲ་བ་ཨུ་ཡིན་གསུངས༔

ཡེ་ཤེས་མཚོ་རྒྱལ་ཞལ་ནས་འདི་ཞུས༔ ཨེ་མ་ཧོ༔ མཁའ་ལྟར་མཉམ་པའི་འགྲོ་བའི་དོན་མཛད་པ༔ རྒྱ་གར་ཡུལ་ནས་མནྡྷ་ར་བ་ཞེས༔ བོད་ཀྱི་ཡུལ་ནས་མཁར་ཟ་མཚོ་རྒྱལ་ང་༔ དེ་མིན་རིག་པ་བཟང་བ་ལོ་ཡོད་པ༔ འཇིག་རྟེན་བུད་མེད་རིག་རྩལ་ཆེ༔ ཆོས་ལ་མོས་པ་ཅི་ཡང་མེད༔ བུད་མེད་ཁྱིམ་པ་ཟང་ཟིང་མོས༔ སྙིང་རུས་བརྩོན་འགྲུས་དད་གུས་མེད༔ ང་དང་སྤྱོད་པ་མཐུན་པ་རྣམས༔ བུད་མེད་ཞན་མོ་གཅིག་མི་གོས༔ བོད་ཁམས་སྲིན་ཡུལ་ས་འདི་ལ༔ ཁྱེད་ཀྱི་གྲོགས་བྱེད་ང་བས་མེད༔ དང་པོ་གསལ་སྟོང་ཀུན་ཏུ་བཟང་མོ་ང་༔ བར་དུ་ཆོས་སྐུ་རྒྱལ་བ་ཡུམ་ཆེན་ང་༔ ཐ་མ་མཁའ་འགྲོ་ལས་ཀྱི་དབང་མོ་ཆེ༔ མ་ཅིག་ལབ་སྒྲོན་བར་མ་དོར་ན་གནས༔ ཉི་ཟླའི་སྒྲོན་མ་མ་ཅིག་སྒྲུབ་པའི་རྒྱལ༔ དབྱིངས་ཅན་ཕག་མོ་གྲུབ་པ་མཚོ་རྒྱལ་ང་༔ འདིའི་རྒྱུད་པ་བོད་འབངས་བུ་མོ་མེད༔ བར་མ་དོར་ན་གནས་པ་ལོ་ཡོད་པ༔ མཁར་ཟ་ཡེ་ཤེས་མཚོ་རྒྱལ་ང་འདྲ་ན༔ བོད་འབངས་བུ་མོ་མི་ཁོམ་གནས་བརྒྱད་ལྡན༔ ཁོ་མོ་མི་ཁོམ་སྤངས་ནས་འབྱོར་པ་ལྡན༔ ཁོ་མོ་མཁར་ཟ་ང་ལྟར་ལས་མེད་པ༔ བོད་འབངས་རྗེ་ཕྱིར་བུ་མོ་ལོ་ཡོད་པ༔ ཁྱོད་ཀྱི་གྲོགས་བྱེད་མཁར་ཟ་ང་ཡིན་ནས༔ གྲོགས་ལྟར་ཐུབ་པའི་མ་འོངས་བུད་མེད་མེད༔ མ་འོངས་བུ་མོ་གཟི་བརྗིད་ཆེ་བ་ཡོད༔ ཤེས་རབ་ཆེ་ན་ཆོས་ལ་དད་མི་མེད༔ བརྩོན་འགྲུས་ནན་ཏན་མི་ལོབ་གནས་ལ་བཏང་༔ ཁོ་མོ་མི་ཁོམ་གནས་ལ་བཏང་བ་མེད༔ འབྱོར་པ་ལྡན་པའི་ཁོ་མོ་ཞེ་བློ་བདེ༔ འདི་ཕྱི་གང་འཛོམས་བླ་མའི་ཆགས་ཕྱི་བྱེད༔ ཆགས་ཕྱི་བྱེད་དམ་བདག་གི་ཞེ་བློ་བདེ༔ པདྨའི་ཅི་གསུངས་ཁོ་མོ་བདག་གིས་བསྒྲུབ༔ མཁར་ཟའི་བསྒྲུབ་པའི་ཁོ་མོ་ཞེ་བློ་བདེ༔ ཞེ་བློ་བདེ་བའི་ཁོ་མོ་སེམས་དྭངས་བ༔ འགྲོ་བ་བུད་མེད་གཏམ་པའི་དུས་བདེན་མེད༔ ཁོ་མོ་མཁར་ཆུ་ཟ་ཡི་གཏམ་བློ་བརྟེན༔ ཁོ་མོ་བདག་གིས་བསྟོད་པའི་གནས་མཆི་མེད༔ བདག་ནི་ཤེས་རབ་ཆེ་བ་འདི་ལྟར་བསྒྲུབས༔ ལར་འགྲོ་བ་ཡོངས་ལ་ཐུགས་རྗེ་ཟུངས༔ ཁོ་མོ་བདག་ལ་བྱིན་རླབས་ཐུགས་རྗེའི་མ་ཆུང་ཞིག༔ ཁོ་མོ་སྒོམ་པ་བྱེད་པ་འདི་ལྟར་སྒོམ༔ རང་ཐག་བཅད་པ་རིག་པ་དྲི་མེད་ལྟ༔ སྣང་ལམ་དངོས་བསྟེན་མ་བྱེད་བདག་གིས་འཚོས༔ འཕགས་ལམ་ཡང་དག་ཉིད་ལ་བདག་གིས་ལྟོས༔ ངོ་བོ་དྲི་མ་མེད་པའི་གནས་སུ་སྐྱོང་༔ ང་རང་སེམས་ཉིད་ཁོ་མོ་རང་གིས་འཚོས༔ རྫུས་སྐྱེས་བླ་མའི་ཐུགས་རྗེས་གཟིགས་ལ་དཔྱོད༔ རྗེ་བཙུན་བླ་མ་དྲན་ཞིང་ཡིད་ལ་བསྒོམ༔ ཕ་བླ་མས་གསུངས་དང་ཁོ་མོས་ཡིད་ལ་འཆང་༔ བསམ་ཞིང་ཁོ་མོས་དྲན་པར་བྱ༔ དྲིན་ཅན་བླ་མའི་འགྲོ་ལ་ཐུགས་རྗེས་ཟུངས༔ ཞེས་ཞུས༔ ཁྱེད་འདྲ་བ་འཇིག་རྟེན་ཁམས་ན་འཇའ་ལུས་ཐོབ་པར་འབྱུང་བཞི་ལ་རང་དབང་ཐོབ་པ་ཨེ་ཡོད་ལགས༔ ཞེས་ཞུས༔

ཨུ་རྒྱན་གྱི་ཞལ་ནས་ང་འདྲ་བ་ལྷག་པོ་ཡོད་དེ་འབྱུང་བཞི་ལ་རང་དབང་ཐོབ༔ ལར་ཆོས་སྐུ་སྐྱེ་མེད་ཀུན་ཏུ་བཟང་༔ དགོངས་པ་རྒྱ་མཚོ་འོད་དཔག་མེད༔ གཉིས་མེད་རྣམ་དག་ཤཱཀྱ་ཐུབ༔ ཀུན་འདུས་སྲས་བཅས་པདྨ་ང་༔ སྣང་སྲིད་འཁོར་འདས་ཆེན་པོ་ལ༔ ཕ་རྒྱུད་སྟོང་པ་རིག་པ་ཆོས་ཀྱི་སྐུ༔ ང་དབང་སྡུད་པདྨ་འབྱུང་གནས་ཡིན༔ ལར་མ་བསྒོམ་སངས་རྒྱས་གདམས་ངག་ཡོད༔ དུས་གསུམ་ཀུན་འདུས་རྫུས་སྐྱེས་པདྨ་ང་༔ སྐྱེས་བུ་དད་ལྡན་ཅན་ལ་ཐུགས་རྗེས་ཟུངས༔ ཡེ་ཤེས་མཚོ་རྒྱལ་ཁྱོད་ལ་ཐུགས་རྗེས་ཡང་ཡང་ཟུངས༔ ཞེས་གསུངས༔ ཕ་རྒྱུད་སྟོང་པ་ཆོས་སྐུ་ལ་གྲུབ་པའི་ཀུན་ཏུ་བཟང་པོ་ཁ་ཏོག་མི་འདྲ་བ་འཕྲོས་པའི་པདྨའི་ཞིང་དུ་ཕོག་ནས་སྣང་བ་མཐའ་ཡས༔ དེའི་རྒྱུད་པའི་ཕ་རྒྱུད་བཅོམ་ལྡན་འདས་དེས་ཆོས་གསུངས་པ་མ་རྒྱུད་ཡིན་པའི་ཆོས་དབྱིངས་ཀུན་ཏུ་བཟང་མོ༔ རྒྱལ་བ་ཡུམ་ཆེན་མོ༔ མ་ཅིག་ལབ་སྒྲོན་མ༔ མཁར་ཟ་ཁྱོད་དེ་རྣམས་ཀྱི་མ་རྒྱུད་ཡིན༔ སྲས་དར་མ་མདོ་སྡེ་སྲས་རྒྱུད༔ རྡོ་རྗེ་འཆང་གི་ངོ་བོ་སྤྲུལ་པ་དམ་པ་རྒྱ་གར་དུས་ཀྱི་རྒྱུད༔ ཀུན་ཏུ་བཟང་པོའི་རྒྱུད་པ་བཀའ་རྒྱུད༔ ང་པདྨའི་གཏེར་རྒྱུད་དེ་འདྲ་ཁྱོད་ཉམས་སུ་ལོངས་གསུངས༔ ཁྱོད་མཁར་ཆུ་ཟའི་རིགས་རྒྱུད་འདི་ཡང་ཚེ་འཕོས་མ་ཐག་ནས་ང་དང་གྲོགས་མཐུན་པ་འདུ་འབྲལ་མེད་པར་བྱ༔ ང་སྐྱེས་བུ་གུས་པ་ཅན་སྔགས་འཆང་ནུས་པ་ཅན་ཞི་ཞིང་དུལ་བ་གཅིག་ལ༔ ཁྱོད་བུ་མོ་གུས་པ་ཅན་བརྩོན་འགྲུས་དང་ཤེས་རབ་ཆེ་བ་ནན་ཏན་དང་སྤྲོས་པ་ཆེ་བ་བཀའ་བློ་བདེ་བ༔ ཆོས་ལ་མོས་པའི་སྐྱེས་བུ་མིའི་གཟུགས་དང་ལྡན་པ་གུས་པ་ཅན་གཅིག་མོས་ནས༔ ང་སྐྱེས་བུ་སྔགས་འཆང་དང་ལྡན་པའི་གྲོགས་སུ་འཆར་བའི་ཐབས་བགྱིས༔ མ་འོངས་སྙིང་སྟོབས་ཅན་གྱིས་གྲོགས་ཁྱོད་བྱེད་པའི་ཐབས་བགྱིས་སམ༔ ང་སྤྱོད་པའི་མཐུན་པ༔ དེ་རྣམས་ཐབས་གང་འདུལ་གྱིས་སྐྱེས་བུ་དེ་དང་མཐུན་པར་བྱའོ༔ ཞེས་གསུངས༔ མཁར་ཆུའི་ཞལ་ནས༔ ང་གྲོགས་འདི་ལྟར་གུས་པ་ཅན་གཅིག་བྱས་ནས༔ ངའི་ཐབས་གང་འདུལ་འདུ་འབྲལ་མེད་པ་མ་འོངས་དུས་སྐབས་ངའི་ཅི་ཞུས་པ་ཐམས་ཅད་ཐར་རམ་ལགས༔ ཁྱོད་སྔགས་འཆང་ཏིང་ངེ་འཛིན་དང་ལྡན་པ་བདག་ལ་རྒྱུད་དང་ལྡན་ནས༔ བཤད་རྒྱུད་ཨ་ཏི་ཡོ་གའི་ཆོས་གཅིག་བཀའ་གནང་བར་ཞུ༔ ཨུ་རྒྱན་གྱི་ཞལ་ནས༔ མཁར་ཆུ་ཟ་ཡེ་ཤེས་མཚོ་རྒྱལ་ཉོན༔ རྒྱ་ཤོག་རྒྱ་ནག་རྒྱ་སྙུགས་པའི་སྒྲོམ་གཏེར༔ དེ་རྣམས་ལ་ནན་ཏན་བགྱིས༔ བདག་གི་བཀའ་སྩལ་པའི་ཐབས་གཅིག་གནོངས་གསུངས༔ ཁོ་མོ་བདག་གིས་ཞུས་པ༔ ཨུ་རྒྱན་རིན་པོ་ཆེ་ལགས༔ ནན་ཏན་ཆེ་བས་ཆོས་ལ་དད་མོས་པ༔ ཞེ་བློ་བདེ་བས་བཀའ་མི་བཅག༔ སྤྲོས་པ་ཆེ་བས་བཟོད་ཁྱག་པ༔ ཁོ་མོ་བཀའ་བློ་བདེ་གནང་ཞེས་མོས་པ༔ ཆོས་སྐུ་ཀུན་ཏུ་བཟང་བཀའ་བརྒྱུད་ཆོས་ཀྱི་སྐུ༔ ལོངས་སྐུ་འགགས་མེད་རྒྱལ་བ་རིགས་ལྔ་ཞེས༔ སྤྲུལ་སྐུ་གང་འདུལ་ཁྱོད་ལ་ཕྱག་འཚལ་བསྟོད༔ སྐྱེ་མེད་ཡ་མཚན་ནུབ་ཕྱོགས་འོ་མའི་མཚོ༔ དྷ་ན་ཀོ་ཤའི་མཚོ་སྟེང་འོད་དཔག་མེད༔ འགྲོ་ལ་ཞལ་མངའ་སུའི་རྒྱུད་བཅས་པ༔ མཉམ་བཞག་ཚེ་བུམ་འཛིན་ལ་ཕྱག་འཚལ་བསྟོད༔ བཀའ་བརྒྱུད་རབ་མང་ཞལ་འཛུམ་སྤྱན་མངའ་བ༔ ཏིང་འཛིན་ལྡན་པའི་གཡུལ་ལས་རབ་རྒྱལ་བ༔ སྤྱན་སྔར་འཁོད་དེ་དེ་དག་བཀའ་སྩལ་ན༔ ཐུབ་པའི་སྐུ་ཡི་མཚན་མཆོག་ཁྱེད་ལ་བསྟོད༔ ཕ་རྒྱུད་མ་རྒྱུད་གཉིས་མེད་དུས་ཀྱི་རྒྱུད༔ འགྲོ་བའི་དོན་དུ་བོད་འབངས་བུ་ལྟར་སྐྱོང་༔ དྲིན་ཆེན་ཁོ་མོ་བདག་ལ་ཡང་ཡང་གཟིགས༔ རྫུས་སྐྱེས་པདྨ་ཁྱེད་ལ་ཕྱག་འཚལ་བསྟོད༔ མདོ་སྔགས་ཐབས་ཀྱིས་ཉེ་བར་བསྒྲུབས་པའི་གནས༔ ཁོ་མོ་བདག་ལ་དྲིན་མ་ཆུང་༔ ཞེས་ཞུས༔

བྷོ་དྷི་ས་ཏྭའི་ཞལ་ནས༔ བུད་མེད་ཀྱི་རིགས་ཁྱོད་དུས་གསུམ་སངས་རྒྱས་ཀུན་མི་མངའ་བའི་དོན་ལ་བརྩེ་ཕྱིར་བསྐལ་པ་ཐོག་མཐའ་ལ་འགྲོ་བའི་དོན་དུ་ཁྱོད་ཐུགས་རྗེས་གཟིགས་སོང་༔ ཁོ་མོ་ཞུས་ནས༔ མ་འོངས་ཀྱི་དུས་ངན་འགྲོ་ལ་དགོངས་ནས་ཁྱེད་རྣམས་ཀྱིས་གྲོགས་བགྱིས༔ ཞེས་ཞུས༔ གྲོགས་བགྱིས་གསུངས༔ རྒྱལ་པོ་ལུས་ཀྱི་ནད་འདི་ལ་ཕན་ཐབས་ཨེ་ཡོད་ཞུས༔ པདྨའི་ཡོད་དགོངས་ནས༔ ཡེ་ཤེས་མཚོ་རྒྱལ་དང་༔ ཨུ་རྒྱན་ཁྲི་སྲོང་ལྡེའུ་བཙན་དེ་གསུམ་འཆིམས་ཕུག་ནས་བྱོན་ནས༔ གསང་བདག་འཆི་མེད་བསྒྲུབས་པ༔ བདུན་གཅིག་ནས་རྒྱལ་པོའི་ནད་སོས༔ རྒྱན་དང་ཁོ་མོ་གཉིས་འཆིམས་ཕུག་བཞུགས་པ༔ ཁོ་མོས་ཞུས་པ༔ ཨུ་རྒྱན་ཆེན་པོ་ལགས༔ གསང་བའི་བདག་པོ་འདིའི་རྒྱུད་དེ་བདག་ལ་གསུངས༔ འགྲོ་བའི་དོན་ལ་མ་འོངས་པའི་དུས་སུ་འགྲོ་བའི་དོན་ལ་དགོངས༔ ཨུ་རྒྱན་པདྨའི་ཞལ་ནས་ཀུན་ཏུ་བཟང་པོ་ངོ་བོ་རྡོ་རྗེ་འཆང་ལ་རྒྱུད་པའི་ཕྱི་ནང་གསང་གསུམ་གྱི་བདག་པོ་འདིའི་ཕྱི་ལྟར་ཁྲོ་ཚོགས༔ ནང་ལྟར་ཁྱུང་ཆེན༔ དེ་ཁོ་ན་ཉིད་ལྟར་ན་གསང་བའི་བདག་པོ༔ འདི་བརྒྱུད་པའི་མཚོན་ཆ་ཁྲོ་ཚོགས་ཡིན༔ ཨོཾ་བཛྲ་པཱ་ཎི་ཚིནྡྷ་མ་ཧཱ་རོ་ཥ་ན་ཧཱུྃ་ཕཊ༔ ཨོཾ་ཡེ་ཤེས་ལྔ་ཡི་རང་བཞིན༔ བཛྲ་པཱ་ཎི་རྡོ་རྗེ་གཏུམ་པོ་ཞལ་གཅིག་ཕྱག་གཉིས་གཡས་རྡོ་རྗེ་གཡོན་སྡིགས་འཛུབ་བསྣམས་པ༔ སྐུ་སྟོད་སེང་གེའི་གཡང་གཞི་སྐུ་སྨད་སྟག་ལྤགས༔ མི་མགོ་སེ་རོལ་དགའ་བོ་འཇོག་པོའི་ཐོད་བཅིངས་པ་གཅིག་གསལ༔ ཚིནྡྷ་ནི་ཁྲོ་བོ་འཇིགས་ཚུལ༔ མ་ཧཱ་ནི་ཆེན་པོ་གསལ་བ༔ རོ་ཥ་ནི་སྡེ་བརྒྱུད་གནོད་བྱེད་ཐམས་ཅད་རྦད་རྦད་བཅད་པར་དམིགས༔ དེ་དང་མི་བརྗེད་པ་གཅིག་གསུངས་ནས་ཤོག་སེར་ཕོབ་ཅིག༔ མཁར་ཆུ་ཟ་མ་འོངས་པའི་དུས་སུ་ཉམས་སུ་ལོངས་གསུངས༔

ཁོ་མོས་ཞུས་པ༔ དེ་དང་བདག་གིས་ཉམས་སུ་བླངས་ཏེ༔ མ་འོངས་གང་གིས་ཆོས་བདག་ཡོང་ཞུས༔ པདྨའི་ཞལ་ནས་རྒྱལ་བ་བླ་ན་མེད་པ་སྐྱེས་པ་བུ་བཞི་ཁ་ཤོར་བཞེངས་པའི་རྒྱལ་པོ་གསོལ་བའི་ནང་ནས་འབུ་གཅིག་ཤི་ནས༔ དེ་ཐབས་ཀྱིས་རྒྱལ་པོ་སྲས་མོ་འཁྲུངས་པ༔ པདྨ་གསལ་གྱི་སྐྱེ་བ་ལྔ་བརྒྱའི་མཐའ་ནས་བུམ་ཐང་ནས༔ ང་དང་མཐུན་པའི་སྐྱེས་བུ་ཞི་ཞིང་དུལ་བ་གཅིག་ཡོང་ནས༔ པདྨའི་མིང་ཅན་གཅིག་འབྱུང་༔ དུག་ལྔ་འབྱུང་བས་སེལ་ཐབས་དེའི་འདུལ་གསུངས༔ ཨུ་རྒྱན་གྱི་ཞལ་ནས༔ ཁྱོད་ཁྱིམ་དུ་འབྱུང་ན་ཆོས་ལ་མོས་པ༔ བོད་སྲིན་པོའི་བུ་མོ་རྣམས་དེ་ལྟར་བྱེད་མི་སུ་ཡང་མི་འདུག་པ་ཅི་ཡིན་གསུངས༔ ཡེ་ཤེས་མཚོ་རྒྱལ་གྱིས་ཞུས་པ༔ ང་ཆོས་ལ་མོས་པ་སྐྱེས་བུ་གུས་པ་ཅན་ཁྱོད་ལ་ང་ཞི་དུལ་མོས་པ༔ མ་འོངས་བུད་མེད་ཁྱིམ་པ་དང་ལྡན་པ་བྲལ་བ་མེད་པ་ཡིན༔ མ་འོངས་ཀྱི་གྲོགས་ངས་བྱེད་ན༔ རྒྱ་གར་ལོ་ཙཱ་བཏང་བ་རྣམས་གང་གི་སྤྲུལ་པ་ཡིན༔ མ་འོངས་དུས་ལ་དེ་འདྲ་འབྱུང་བ་ཨེ་ཡིན་ལགས་ཞུས༔ ཨུ་རྒྱན་ཞལ་ནས༔ རིགས་ཀྱི་བུ་མོ་མཁར་ཆེ་ཟ་ཉོན་དང་༔ དང་པོ་ཀུན་ཏུ་བཟང་པོ་འཁྲུངས་པའི་ནང་ནས༔ སྤྲུལ་པ་གང་འདུལ་གྱིས་སངས་རྒྱས་སྟོང་རྩ་གཉིས་ཕེབས་པའི་རིང་༔ རྣམ་པར་སྣང་མཛད་སྤྲུལ་པ་སྐུ་གསུང་ཐུགས་ཡོན་ཏན་འཕྲིན་ལས་ལྔའི་སྤྲུལ་པ་ཀུན་དགའ་མིང་ཆེན་ནོར་འཛིན་གང་པོ་འོད་སྲུངས་དེ་དང་དུས་མཉམ་དུ་རྡོ་རྗེ་སེམས་དཔའི་སྤྲུལ་པ་ལྔ་འདི་ནས༔ བྱམས་པ་མཐོང་བ་དོན་ཡོད་ངན་སོང་ཀུན་འདྲེན༔ དེ་དང་དུས་མཉམ་དུ་རིན་ཆེན་འབྱུང་ལྡན་སྤྲུལ་པ་ལྔ་འདི་ནས་མྱ་ངན་དང་མུན་པ་ཐམས་ཅད་ངེས་པར་འཇོམས་པའི་བློ་གྲོས་སྤོས་ཀྱི་གླང་པོ་དཔལ་བར་འགྲོས༔ དེ་དང་དུས་མཉམ་དུ་སྣང་བ་མཐའ་ཡས་ཀྱི་སྤྲུལ་པ་ལྔ་ནས༔ ནམ་མཁའ་མཛོད་ཡེ་ཤེས་ཏོག༔ འོད་དཔག་མེད༔ ཟླ་འོད༔ བཟང་སྐྱོང་༔ དེ་དང་དུས་མཉམ་དུ་དོན་ཡོད་གྲུབ་པའི་སྤྲུལ་པ་ལྔ་ནི༔ དྲ་བ་ཅན་རྡོ་རྗེ་སྙིང་པོ༔ བློ་གྲོས་མི་བཟད་པ༔ སྤོབས་པ་བརྩེགས་པ༔ དེ་དང་དུས་མཉམ་དུ་ཀུན་དགའ་བོ་སྤྲུལ་པ༔ སྐྱེ་བ་བདུན་རྒྱུད་ཀྱིས་མཐའ༔ བཻ་རོ་ཙ་ན༔ ཤུད་པོ་དཔལ་སེང་༔ ལང་གྲོ༔ སྣ་ནམ་ཡེ་ཤེས༔ འོ་བྲན་དབང་ཕྱུག༔ གང་འདུལ་གྱིས་རྩང་ལེགས་གྲུབ༔ རྡོར་སེམས་སྤྲུལ་པ་རྒྱལ་པའི་བློ་གྲོས༔ ཁྱེའུ་ཆུང་ལེགས་པ༔ སོག་པོ་ལྷ་དཔལ༔ དཔལ་གྱི་ཡེ་ཤེས༔ སྣ་ནམ་བདུད་འཇོམས༔ རིན་ཆེན་འབྱུང་ལྡན་གྱིས་སྤྲུལ་པ༔ སངས་རྒྱས་ཡེ་ཤེས༔ དྷརྨ་དཔལ་གྱི་དབང་ཕྱུག༔ རྨ་ཐོགས་རིན་ཆེན༔ དྲན་པ་ནམ་མཁའ༔ སྣང་བ་མཐའ་ཡས་སྤྲུལ་པ༔ གནུབ་ནམ་མཁའི་སྙིང་པོ༔ རྒྱལ་བ་མཆོག་དབྱངས༔ རྒྱལ་བའི་དབང་ཕྱུག༔ སྣ་ནམ་བདུད་འཇོམས༔ དོན་ཡོད་གྲུབ་པའི་སྤྲུལ་པ་ནི༔ ཀ་བ་དཔལ་བརྩེགས༔ ཅོག་རོ་རྒྱལ་མཚན༔ རྒྱལ་བའི་ཡེ་ཤེས༔ འཇམ་དཔལ་སྤྲུལ་པ་ཁྲི་སྲོང་ཡིན༔ རྡོ་རྗེ་བདུད་འཇོམས༔ དབྱིངས་ཅན་དེ་རྣམས་ཀྱི་སྤྲུལ་པའི་གྲོགས་དམ་པ་མཁར་ཆུ་ཟ་ཁྱོད་ཡིན་པས་མ་འོངས་ཀྱི་ཆོས་བདག་ལོ་ཙཱ་བ་བརྒྱ་དང་རྩ་བརྒྱད་དེ་འབྱུང་བའི་ཐབས་གདའ༔ དེ་དང་མི་བརྗེད་པའི་ཐབས་བྱ༔ ཞེས་གསུངས༔

མཚོ་རྒྱལ་ཞལ་ནས༔ ཨུ་རྒྱན་ཆེན་པོ་ལགས༔ ངས་མ་འོངས་པའི་འགྲོ་བའི་དོན་སྐབས་ལ་དགོངས་ནས༔ ང་མཁར་ཟ་བློ་མི་དམན་པ་བླ་མའི་བཀའ་གནང་བ༔ དེ་འདྲ་བ་སངས་རྒྱས་གང་འདུལ་གྱི་སྤྲུལ་པ་ངོ་མཚར་མཆོག་གིས་གནས༔ ཨེ་མ་ཧོ༔ ཁོ་མོ་ཞེས་ཕྱིར་བདག་གིས་བཀའ་བློ་བདེ༔ ང་དད་གུས་ཆེ་ནས་འགྱོད་མི་གདོང་༔ བདག་འཛིན་མེད་པས་ཞེ་བློ་བདེ༔ བློ་དམན་མེད་པའི་སྙིང་རུས་ཆེ༔ ཁོ་མོ་སྙིང་རུས་ཆེ་ཡང་ཞེ་བློ་བདེ༔ བླ་མ་དྲན་ཏེ་གསོལ་བ་འདེབས༔ འགྱོད་སེམས་ངང་ནས་བཤགས་པ་བྱ༔ གདུང་བའི་ངང་ནས་གསོལ་བ་འདེབས༔ བུ་མོ་སྤྲོས་པ་ཆེ་བས་ཞེ་བློ་བདེ༔ བླ་མ་ཆོས་དང་ནམ་མཁའ་འདྲ༔ འགྲོ་ལ་ཁྱབ་པའི་ཆོས་གཅིག་གསུངས༔ ཁོ་མོ་བདག་གིས་སེམས་ལ་འཆང་༔ བསམ་ཞིང་རྗེ་བཙུན་དྲན་པར་བྱ༔ ཤོ་ཨ་ཙམ་པདྨའི་དྲན་པར་བྱ༔ ཁོ་མོས་བསམ་ཞིང་ཡིད་ལ་འཆང་༔ ཁོ་མོ་རིག་པ་དམན་ན་བརྩོན་འགྲུས་ཆེ༔ བརྩོན་འགྲུས་ཅན་གྱིས་བྲག་བཀའ་བ༔ བླ་མའི་ཆོས་དང་ཉི་ཟླ་འདྲ༔ འགྲོ་ལ་གསལ་བའི་ཆོས་གཅིག་གསུངས༔ ཁོ་མོས་བསམ་ཞིང་ཡིད་ལ་འཆང་༔ བསམ་ཤིང་རྗེ་བཙུན་དྲན་པར་བྱ༔ ཤོ་ཨ་ཙམ་བླ་མ་དྲན་པར་གྱིས༔ ཁོ་མོ་ཤེས་རབ་དམན་ནམ་སྙིང་རུས་ཡོད༔ སྙིང་རུས་ཅན་གྱིས་འགྲོ་དོན་ཡོང་༔ བླ་མ་ཆོས་དང་རྒྱ་མཚོ་འདྲ༔ ཁ་གཏིང་མེད་པའི་ཆོས་ཤིག་གསུངས༔ ཁོ་མོས་བསམ་ཞིང་ཡིད་ལ་འཆང་༔ ཤོ་ཨ་ཙམ་བླ་མ་དྲན་པར་བྱ༔ བསམ་ཞིང་ཁོ་མོ་དྲན་པར་བྱེད༔ ཁོ་མོ་སྤྱོད་པ་དམན་ནམ་བཟོད་པ་ཁྱག༔ བཟོད་པ་ཁྱག་པའི་འགྲོ་དོན་ཡོང་༔ བླ་མའི་ཆོས་དང་རང་གསལ་བ༔ མ་རིག་མུན་ཁུང་གསལ་བའི་ཆོས་གཅིག་ཞུས༔ ཁོ་མོས་བསམ་ཞིང་ཡིད་ལ་འཆང་༔ ཤོ་ཨ་ཙམ་བླ་མ་དྲན་པར་བྱ༔ བསམ་ཞིང་རྗེ་བཙུན་ཡིད་ལ་དྲན༔ ཤོ་ཨ་ཙམ་བླ་མ་དྲན་བྱ་བ༔ ཁོ་མོ་གཏོང་ཕོད་མེད་ན་དད་པ་ཆེ༔ དད་པ་ཅན་གྱིས་འགྲོ་དོན་ཡོང་༔ བླ་མ་ཆོས་དང་སྨན་མཆོག་འདྲ༔ སྨན་མཆོག་ནད་སེལ་ཆོས་ཤིག་གསུངས༔ ཁོ་མོས་བསམ་ཞིང་ཡིད་ལ་དྲན༔ ཤོ་ཨ་ཙམ་བླ་མ་དྲན་པར་གྱིས༔ བསམ་ཞིང་རྗེ་བཙུན་ཡིད་ལ་དྲན༔ ཁོ་མོ་བློ་སྟོབས་མེད་ན་ནན་ཏན་ཆེ༔ ནན་ཏན་ཅན་གྱིས་འགྲོ་དོན་བྱེད༔ བླ་མའི་ཆོས་ནི་མཚོན་ཆ་འདྲ༔ དགྲ་བགེགས་བཅོམ་པའི་ཆོས་གཅིག་ཞུས༔ ཁོ་མོས་བསམ་ཞིང་ཡིད་ལ་འཆང་༔ ཤོ་ཨ་ཙམ་བླ་མ་དྲན་བྱ་བ༔ བསམ་ཞིང་རྗེ་བཙུན་ཡིད་ལ་འཆང་༔ ཁོ་མོ་མཐུ་སྟོབས་ཡོད་ན་བླ་མའི་དྲིན༔ ཁོ་མོ་ཤེས་རབ་ཆེ་ན་བླ་མའི་དྲིན༔ ཁོ་མོ་ཡོན་ཏན་ཡོད་ན་བླ་མའི་དྲིན༔ ཁོ་མོ་ཐུགས་རྗེ་ཆེ་ན་བླ་མའི་དྲིན༔ བྱིན་རླབས་ཡོད་ན་བླ་མའི་དྲིན༔ ཕ་བཀའ་བརྒྱུད་ཀྱི་བླ་མ་རིན་པོ་ཆེ༔ འདྲེན་མཆོག་དེད་དཔོན་ཪིན་པོ་ཆེ༔ སྔཪ་ཡང་ཐུགས་རྗེ་ཤིན་ཏུ་བཟུང་༔ ད་ཡང་ཐུགས་རྗེས་བསྐྱབ་ཏུ་གསོལ༔ ཁོ་མོས་བསམ་ཞིང་བླ་མ་བསྒོམ༔ ཨ་ཙམ་བླ་མའི་དྲན་གསུངས་པ༔ ཁོ་མོ་བདག་གིས་ཡིད་ལ་འཆང་༔ བསམ་ནས་མཁར་ཟའི་དོན་དུ་འཆང་༔ མི་བརྗེད་གཟུངས་མཆོག་ཐོབ་པ་བླ་མའི་དྲིན༔ སྐུ་འགྱུར་བ་མེད་པ་བླ་མའི་སྐུ༔ ཁོ་མོ་བདག་གི་ལུས་ལ་བྱིན་རླབས་འཇུག༔ གསུང་འགགས་པ་མེད་པ་བླ་མའི་གསུང་༔ ཁོ་མོ་བདག་གི་ངག་ལ་བྱིན་རླབས་ཐིམ༔ ཐུགས་འཁྲུལ་པ་མེད་པར་བླ་མའི་ཐུགས༔ ཁོ་མོ་བདག་གི་ཐུགས་ལ་བྱིན་རླབས་ཐིམ༔ མི་བརྗེད་ཐོབ་པ་བླ་མའི་དྲིན༔ དྲིན་ཅན་བླ་མའི་ཐུགས་རྗེས་ཟུངས༔ ལར་འགྲོ་བ་ཡོངས་ལ་ཐུགས་རྗེས་ཟུངས༔ སྒོས་ཁོ་མོ་བདག་ལ་བྱིན་གྱིས་རློབས༔ བུ་དད་ལྡན་སྣོད་རུང་རྣམས་ལ་ཆོས་གསུངས་ཤིག༔ བུ་མོ་ཆོས་ལ་མོས་པ་ཞེ་བློ་བདེ༔ དྲིན་ཅན་བླ་མ་མཆོག་གི་ཐུགས་རྗེས་ཟུངས༔ ཞེས་ཞུས༔

ཀྱཻ་ཨུ་རྒྱན་ཆེན་པོ་མ་འོངས་པའི་འཇིག་རྟེན་འདི་མཚོན་ཆའི་གཟིངས་བ་འདི་སྙིང་རྗེ་བ་ཐབས་སྟོན་ལགས༔ རིགས་ཀྱི་བུ་མོ་ཉོན་དང་༔ ཆོས་འདིའི་འབྱུང་ཁུང་ཀུན་ཏུ་བཟང་མོའི་རྒྱུད༔ བྱ་བ་དང་སྤྱོད་པ་རྣལ་འབྱོར་གྱི་རྒྱུད༔ གཞིའི་ལམ་གྱིས་རྫོགས་སངས་རྒྱས༔ སྐད་ཅིག་དྲན་རྫོགས་གཅིག་གིས་བྱེ་བ་ཕྲག༔ དཔག་མེད་བགྲང་གིས་ནུས་པ་མི་མངའོ༔ ང་རྒྱ་གར་ཡུལ་ན་ཡོད་པ་འཇམ་དཔལ་བཤེས་གཉེན༔ ཤྲཱི་སེང་ཧ༔ ཧཱུཾ་ཆེན་ཀ་ར༔ བྷི་མ་ལ༔ རམ་བུ་གུཧྱ༔ ཤིནྟཾ་གརྦྷ༔ དགའ་རབ་རྡོ་རྗེ༔ ཆོས་རྒྱུད་ཆུ་བོ་སྔགས་འཆང་པདྨ་འབྱུང་གནས༔ མཆོད་རྟེན་བདེ་བྱེད་བརྩེགས་པའི་རབ་དྲུང་ནས༔ ནམ་ཟླ་དུས་བཞི་ལ༔ ཐོག་དང་སེར་བ་ཡོང་བའི་དུས༔ ངེད་རིག་འཛིན་ཧཱུཾ་ཀ་རའི་གསུངས་ནས༔ བོད་ཕུང་བ་དང་ངོམ་པ་དེ་འདྲ་ཆོས་གཅིག་འདུག་གསུངས་པ༔ རིག་འཛིན་བརྒྱད་ཀྱི་དགོངས་པ་གཟིགས་ནས༔ ལྷ་སྲིན་སྡེ་བརྒྱད་ཀུན་ལ་གཏད་ནས༔ བསྒྲུབ་པ་བཀའ་བརྒྱད་འདིའི་ཆོས་འདི་ནི་དང་པོ་ཐོགས་མ་མེད་པའི་ཀློང་ནས་ཀུན་ཏུ་བཟང་པོས་གསུངས་པ༔ རྒྱལ་བ་རིགས་ལྔ་གཏེར་དུ་སྦས་ནས༔ རིག་འཛིན་བརྒྱད་ཀྱིས་གཏེར་དུ་ཕུད་པ༔ རིགས་ཀྱི་བུ་མོ་ཉོན་དང་ངས་བཤད་དོ༔ ཆོས་ཐམས་ཅད་ནས་ཡང་སྙིང་གི་ཉེ་བར་སྙིང་པོ༔ ལྟ་བའི་གཞི་རྩ་ཀུན་ཏུ་བཟང་པོའི་རྒྱུད༔ སྒོམ་པ་ཞི་བ་བཞི་བཅུའི་རྒྱུད༔ སྤྱོད་པ་ཁྲག་འཐུང་ལྔ་བཅུའི་རྒྱུད༔ དེ་ཉིད་མཆོག་དཔལ་དགུ་རྒྱུད༔ དེ་རྣམས་ཀྱི་ཐབས་གྲོལ་བ་བཀའ་འདུས་པ༔ དང་པོ་ཆོས་སྐུ་ཀུན་ཏུ་བཟང་པོ་འཁྲུངས་པའི་སྤྲུལ་པ་འགྱེད་ནས་ཞི་བ་བཞི་བཅུ་འབྱུང་བ༔ ཀུན་ཏུ་བཟང་པོ་ཁྲོས་པའི་ཚུལ༔ མཆོག་ཏུ་སྐུར་བཞེངས་ནས༔ རྒྱལ་བ་རིགས་ལྔ་ཁྲག་འཐུང་ཡབ་ཡུམ་བཅུ་གཉིས་འབྱུང་བ༔ དེ་ལ་འཕྲོས་པའི་ལྔ་བཅུ་རྩ་བརྒྱད་ཆགས་པ༔ ཞི་ཁྲོ་དཔལ་དགུ་ནི་ཡོངས་རྫོགས་དུས་ཆེ་མཆོག་ཁྲོས་ཚུལ་དུ་གཟིགས་ནས་སྤྲུལ་པའི་ཐབས༔ ཨོཾ་བྷོ་དྷི་ཙིཏྟ་མ་ཧཱ་སུ་ཀ་ཛྙཱ་ན་ཧཱུྃ༔ ༀ་ཀུན་བཟང་ཡབ་ཡུམ་རིག་ལྔ་ཡབ་ཡུམ་བཅུ་གནས་པ༔ བྷོ་དྷི་བྱང་ཆུབ་སེམས་དཔའ་ཡབ་ཡུམ་བཅུ་དྲུག༔ ཙིཏྟ་ཐུགས་དང་ཁྲོ་ཆེན་ཡབ་ཡུམ་བརྒྱད༔ མ་ཧཱ་ཆེན་པོ་དང་ཐུབ་པ་དྲུག༔ སུ་ཀ་ཛྙཱ་ན་དབྱིངས་ཡེ་ཤེས༔ ཧཱུཾ་སྐྱེ་མེད་འགགས་མེད༔ ༀ་རུ་ལུ་རུ་ལུ་ཧཱུྃ་བྷྱོ༔ ་ཧཱུཾ༔ ཨོཾ་ཁྲག་འཐུང་ཡབ་ཡུམ་བཅུ་གཉིས༔ རུ་ལུ་སེང་ཧ་མ་བརྒྱད༔ རུ་ལུ་ཀེའུ་རི་མ་བརྒྱད༔ ཧཱུཾ་ནང་གི་སྒོ་བ་བཞི༔ བྷོ་དབང་ཕྱུག་རྩ་བརྒྱད༔ ཧཱུཾ་ཕྱིའི་སྒོ་བ་བཞི༔ ཨོཾ་བཛྲ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུཾ་ཕཊ༔ ཨཱོ་ཀུན་འདུས་པ༔ བཛྲ་རྡོ་རྗེ༔ ཀྲོ་ཏ་ཁྲོ་བོ༔ མ་ཧཱ་ཆེན་པོ༔ ཤྲྀ་འཇིགས་ཚུལ༔ ཧེ་རུ་ཀ་འགྲན་གྱི་དོ་མེད༔ ཅེས་མི་བརྗེད་པའི་ཉམས་སུ་ལོངས་དང༔ བརྡ་ཡིག་ལ་ཕོབ་དང་མཁར་ཆུ་ཟ་མི་བརྗེད་པར་བྱ༔ ཡེ་ཤེས་མཚོ་རྒྱལ་གྱིས་ཞུས་པ༔ ཨུ་རྒྱན་རིན་པོ་ཆེ་འདིའི་ཆོས་གང་དུ་དར་བའི་སྐབས་ནི་དུས་ཅི་འདྲ་འབྱུང་ཞུས༔ ཨུ་རྒྱན་གྱི་ཞལ་ནས༔ དེ་དུས་འཁྲུགས་ནད་ཡམས་དར་བའི་ས༔ ང་དང་མཐུན་པའི་སྐྱེས་བུ་གུས་པ་ཅན་གཅིག་ཆོས་དང་མཐུན་པ༔ ཨུ་རྒྱན་རིག་འཛིན་གཅིག་འབྱུང་༔ དེའི་བདག་པོ་བྱེད་གསུངས༔ མཚོ་རྒྱལ་གྱིས་ཞུས་པ༔ ཨུ་རྒྱན་ལགས༔ ཁོ་མོ་སྐྱེ་རྒ་ན་འཆི་བཞིའི་སྡུག་བསྔལ་འདི་ལ་ཁྱེད་ཐུགས་རྗེས་ཟུངས་མཁར་ཆུ་རྒྱུད་པ་ཅན་བསྐལ་པའི་སྙིགས་མ་ལ་ཁྱེད་ཐུགས་རྗེས་ཟུངས་ཞུས༔ ཨུ་རྒྱན་གྱི་ཞལ་ནས༔ ཁྱོད་མཁར་ཆུ་རྒྱུད་པ་འགྲོ་བ་ཡོངས་ལ་ཕན་ཐོགས་ཡོང་སྟེ༔ དེ་ཕན་ཚུན་འགྲོ་བའི་དོན་བྱེད་པ་ཐར་ལམ་ཟིན་པར་གདའ༔ ཞེས་གསུངས༔ ཨུ་རྒྱན་གྱི་ཞལ་ནས༔ ང་རྒྱ་གར་ཡུལ་ན་གཅིག་འགྲོ་དགོས༔ ནམ་མཁའ་ནས་ཡལ༔ ཡེ་ཤེས་མཚོ་རྒྱལ་གྱིས་ཅི་བྱེད་བསམ་ནས་མགུར་འདི་བཞེངས་སོ༔ ཀྱེ་མ་ཀྱེ་ཧུད་མཁར་ཟ་མཚོ་རྒྱལ་ང་༔ སྤྲུལ་སྐུ་ས་ཡུལ་གང་དུ་ཕེབས་པ་ཡིན༔ བུ་མོ་མཁར་ཟ་ཅི་ལ་བསྟེན་ནས་འདུག༔ འགྲོ་བ་བུད་མེད་ཕ་མིང་གནས་ལ་བརྟེན༔ ཁོ་མོའི་བླ་མ་ནམ་མཁའ་གང་དུ་ཡལ༔ བུ་མོ་མཁར་ཆུ་ཟ་འདི་ཤུལ་དུ་བསྐྱུར་བ་ཅུང་བདེན་ནམ༔ ཐུགས་རྗེའི་མ་ཆུང་ཅི་ལ་དྲན་ཀྱང་མེད་ཐབས་མེད༔ ཅེས་མགུར་བཞེངས་ནས༔ མིག་ཆུ་ས་ལ་འཁྱིལ་ནས་འདུག་པ༔ ཨུ་རྒྱན་འཇའ་འོད་ནང་དུ་ཕེབས་ནས༔ ཨ་བུ་མོ་མཁར་ཟ་ཡེ་ཤེས་མཚོ་རྒྱལ་ཅི་ལ་མྱ་ངན་བྱེད༔ ང་རྒྱ་གར་ཡུལ་ལ་སོང་ནས་སྲིན་པོ་གཅིག་གིས་མི་ཟ་བ་སྣང་༔ དེ་ངེད་ཀྱི་འདུལ་བའི་སྐབས་ལ་དགོངས་པ་ཡིན༔ ཁྱོད་མྱ་ངན་མ་བྱེད་དམ༔ ཆོས་མཛད་པ་མི་བརྗེད་པ་གྱིས༔ བུད་མེད་ཀྱི་རིགས་འདི་སྙིང་ཆུང་ལ་བཟོད་དཀའ་མེད་པ༔ དེ་འདྲ་བ་ཞིབ་ཏུ་མ་བྱེད་གསུངས༔ ཡེ་ཤེས་མཚོ་རྒྱལ་ཞལ་ནས༔ ང་བུད་མེད་རིགས་བཟོད་དཀའ་ཁྱག་པ་ཅི་ལ་ཁྱེད་ལྟ་བུའི་མིག་དང་༔ ཁོ་མོ་རེ་ས་སུ་ལ་མ་བྱེད་པ༔ སྤྱིར་འགྲོ་བ་ཡོངས་ལ་རེ་ས་ཡོད་པ༔ ཁོ་མོ་བདག་ལ་རེ་ས་མེད་པ་ཅི་ལ་བསྟེན༔ བུད་མེད་ཀྱི་བཟོད་དཀའ་མི་ཁྱག་ཞུས༔ ཨུ་རྒྱན་གྱིས་དགོངས་ནས༔ བདེན་པའི་ཐབས་ཡོད་དེ་འགྲོ་བའི་རེ་ས་ཡོད་དགོངས༔ ཁོང་བདག་ལ་མིན་པའི་རེ་ས་མེད་དགོངས༔ ལན་གཅིག་གསོན་དང་མཚོ་རྒྱལ་ཉོན༔ ལུས་བཅས་བུ་མོ་གཉེན་ལ་འཛེམ༔ གཉེན་འཛོམས་མཛེས་ཚུལ་མཚོ་རྒྱལ་གཉེན་ལ་འཛོམས༔ འཇིག་རྟེན་འདི་ཡི་དགོངས་པ་གཏམ་མི་བདེན༔ ཁོ་མོ་འདི་འདྲ་གཏམ་པའི་རྫུན་ཚིག་མེད༔ འདི་འདྲའི་གཞོན་ནུ་དུང་ལྡན་ངོ་མཚར་དུས༔ སྲིན་པོ་ས་ནས་འདི་འདྲ་མེད་དགོངས་ཏེ༔ འདི་འདྲ་ཡོད་པའི་བོད་ཁམས་ལས་ཅན་འདུག༔ མ་འོངས་འཇིག་རྟེན་སངས་རྒྱས་ཐབས་སྟོན་ཡོད༔ བོད་ཁམས་བཟང་བའི་མ་འོངས་ལས་ཅན་དོན༔ ཁོ་མོ་བསམ་པ་མི་བརྗེད་ཡིད་ལ་འཆང་༔ བསམ་ཞིང་རྗེ་བཙུན་ང་འདྲ་ཡི༔ བོད་ཁམས་འདི་ལ་ཐུགས་རྗེས་གཟིགས་པའི་བརྡ༔ ལས་ཅན་མཁར་ཆུ་སྲས་མོ་འདི་འདྲ་བ༔ མཚོ་རྒྱལ་འདི་འདྲ་འགྲོ་དོན་ཡོང་བའི་བརྡ༔ ལས་ཅན་བོད་འབངས་འགྲོ་དོན་ཐོབ་པར་ཤོག༔ རྒྱལ་སྲས་རྗེ་འབངས་འབྲས་བུ་སྨིན་པར་ཤོག༔ ལས་ཅན་མཁར་ཆུ་རྒྱུད་པ་ཐར་ལམ་ཟིན༔ ཇོ་མོ་མཚོ་རྒྱལ་འགྲོ་བའི་དོན་བྱའོ༔ ཞེས་གསུངས་པ༔ མཁར་ཟ་ཁྱོད་བསྒོམ་ལ་ནན་ཏན་བརྒྱབ་ནས༔ འགྲོ་བའི་དོན་བྱ་བ་བདག་ལ་སྨྲོས་ཤིག༔

ཡེ་ཤེས་མཚོ་རྒྱལ་ཞལ་ནས༔ ང་བསྒོམ་པ་མེད་ན་བསྒོམ་སྙིང་ཡོད༔ རོ་གཅིག་མེད་ན་རོ་སྙོམས་ཡོད༔ འོག་འགྱུ་དབང་དུ་ཁོ་མོ་བཏང་བ་མེད༔ བདེ་གསལ་གོང་དུ་མ་བཏང་རང་རིག་འཚོས༔ ཚོགས་དྲུག་དངོས་རྟེན་མ་བྱེད་རང་ཐག་བཅད༔ སྐུ་གསུམ་བཟང་ངན་མི་བྱེད་རིག་པའི་དོན༔ བདུད་བཞི་དབང་དུ་མ་བཏང་སྐུ་བཞི་གྲོལ༔ བཟང་ངན་མི་བྱེད་རིག་པ་ཤེལ་ལྟར་བསྒོམ༔ སྟོང་གསལ་བཟང་ངན་མི་བྱེད་རིག་པ་འཚོས༔ ཕྱོགས་རིས་མཐའ་དབུས་མེད་པ་རིག་ཐག་བཅད༔ གཡོ་བ་ཡེངས་པ་མེད་པའི་བསྒོམ་ཞིག་བྱེད༔ ཁ་གཏིང་མེད་པའི་སྒོམ་ཞིག་བྱེད༔ ཁོ་མོ་མོ་ལུས་ཐོབ་ཀྱང་རིག་ཐག་བཅད༔ ཁོ་མོ་མོ་སེམས་ཡིན་ཏེ་རང་རིག་འཚོས༔ མོ་ལུས་གཟུགས་སྣང་དགའ་སྟེ་ཚོགས་དྲུག་དག༔ མོ་ལུས་ཐོབ་པའི་དོན་སྒོ་ཆུང་མ་བྱེད༔ མོ་རིགས་ཡིན་ཏེ་ཁོ་མོ་ཆོས་ལ་དད༔ ཆོས་ལ་དད་པས་བླ་མའི་དྲིན་གྱིས་གྲོལ༔ མོ་ལུས་འདྲེ་སེམས་བསྐྱེད་དེ་ཚོར་མ་མྱོང་༔ ཁོ་མོ་སྒོམ་སྙིང་འདོད་དེ་བླ་མའི་དྲིན༔ ཁོ་མོ་སྒོམ་པ་རང་རིག་གྲོལ༔ སྒོམ་པ་མེད་པའི་དོན་མ་མཆིས༔ སྐྱིད་ན་བླ་མའི་བཀའ་དྲིན་ཆེ༔ སྡིག་ན་ཁོ་མོ་ལས་ཀྱི་དབང་༔ ཆོས་ལོབ་ཙམ་གྱིས་བླ་མའི་དྲིན༔ མ་གྲོལ་ཙམ་གྱིས་སེམས་ཅན་ལས་ཀྱི་ངན༔ ཁོ་མོ་སྒོམ་སྙིང་ཆུང་བ་བུད་མེད་རིགས༔ སྒྲོམ་གྲོལ་ཙམ་གྱིས་བླ་མའི་དྲིན༔ མ་གྲོལ་ཙམ་གྱིས་གྲོལ་བ་ལས་རེ་རན༔ ཁོ་མོ་རིག་པ་ཆེ་བ་བླ་མའི་དྲིན༔ སྙིང་རུས་མེད་ན་བུད་མེད་ལུས༔ ཁོ་མོ་ཤེས་རབ་ཆེ་བ་བླ་མའི་དྲིན༔ ནན་ཏན་མེད་པ་བུད་མེད་ལུས༔ ཁོ་མོ་མི་བརྗེད་ཐོབ་པ་བླ་མའི་དྲིན༔ བརྩོན་འགྲུས་མེད་པ་བུད་མེད་ལུས༔ ཁོ་མོ་ཡོན་ཏན་ཡོད་ན་བླ་མའི་དྲིན༔ ལྟ་བ་མེད་ན་བུད་མེད་ལུས༔ ཁོ་མོ་བཟོད་དཀའ་ཡོད་ན་བླ་མའི་དྲིན༔ ཁ་གཏིང་མེད་པ་ཁོ་མོའི་ལུས༔ ཁོ་མོ་སྒོམ་པ་འདོད་པ་བདག་གི་ལས༔ རང་རིག་དམན་པའི་བུད་མེད་ལུས༔ ཁོ་མོ་སྒོམ་པ་མེད་པ་སྒོམ་སྙིང་འདོད༔ ཁོ་མོ་བླ་མ་དྲན་པ་བདག་གི་ལུས༔ དམ་ཆོས་གསུངས་པ་བླ་མའི་དྲིན༔ མི་བརྗེད་ཐོབ་པ་མ་འོངས་དོན༔ མ་འོངས་ལས་ཅན་བོད་འབངས་བུ་ལྟར་སྐྱོང་༔ ཁོ་མོ་བསམ་ཞིང་ཡིད་ལ་དྲན༔ ཕ་བཀའ་རྒྱུད་བླ་མ་རིན་པོ་ཆེ༔ བདག་གི་ཡིད་དྲན་དུས་གསུམ་པདྨ་འབྱུང་༔ སྐྱབས་རེ་ས་ཨུ་རྒྱན་རིན་པོ་ཆེ༔ ཁོ་མོ་བདག་ལ་ཐུགས་རྗེའི་མ་ཆུང་ཞིག༔ འགྲོ་བའི་དོན་དུ་ཆོས་གཅིག་གསུངས༔ ཁོ་མོ་མོ་ལུས་ཐོབ་སྟེ་ཆོས་ལ་མོས༔ མོས་པ་ཙམ་གྱིས་བདག་གྲོལ་བ༔ གྲོལ་བ་བླ་མ་ཁྱེད་ཀྱི་དྲིན༔ ཁོ་མོ་ཏིང་འཛིན་བསྟན་པའི་ཆོས་གཅིག་ཞུས༔ ཁོ་མོ་ནན་ཏན་མེད་ན་ཤེས་རབ་ཆེ༔ ཤེས་རབ་ཅན་ལ་ཆོས་གཅིག་གནོངས༔ མ་འོངས་སེམས་ཅན་འགྲོ་བའི་དོན༔ ཁོ་མོ་ཆོས་ལ་སྤྲོས་པ་ཆེ༔ ཆོས་ལ་གཏོང་ཕོད་ཆེ་བ་ཁོ་མོ་ལུས༔ རྫུས་སྐྱེས་ཁྱེད་དང་འཕྲད་པ་འགྲོ་བའི་དོན༔ འགྲོ་ལ་ཐུགས་རྗེའི་མ་ཆུང་ཞིག༔ བོད་འབངས་ལས་ཅན་སྨིན་པར་གྱིས༔ ཁོ་མོ་དད་པ་ཅན་ལ་བྱིན་རླབས་མ་ཆུང་ཞིག༔ ཅེས་གསུངས་ནས༔ ཨུ་རྒྱན་ལ་ཕྱག་འཚལ༔ ང་བུ་མོ་ཞུས་ནན་ཕོད་པའི་ཁྱེད་ལ་ཞུས་པ་ཡིན༔ ཐུགས་རྗེ་འགྲོ་ལ་མ་ཆུང་ཞིག༔ མཁར་ཆུ་བདག་ལ་ཐུགས་རྗེའི་མ་ཆུང་ཞིག༔ མ་རིག་མུན་པའི་ཁུང་ནང་དུ༔ ཐུགས་རྗེའི་འོད་ཀྱིས་མ་རིག་སྨག་རྣམས་གསལ༔ ཁོ་མོ་བདག་གི་ལྟ་བའི་མིག༔ རྟེན་པའི་བེམ་པོ་བསམ་པའི་སྙིང་བླ་མ་ཁྱེད་ཡིན་པས་ཐུགས་རྗེའི་མ་ཆུང་ཞིག༔ ཅེས་ཞུས༔

ཨུ་རྒྱན་གྱི་ཞལ་ནས༔ ཁྱོད་ལ་ཐུགས་རྗེས་མི་གཟིགས་པའི་ཐབས་མེད་པ་འགྲོ་བའི་དོན་མཛད་པ༔ ཕན་པ་རྒྱ་ཆེན་པོ་མཛད༔ དད་པ་ཅན་ལ་བྱིན་རླབས་འཇུག༔ མཁར་ཆུ་ཟ་ཉོན་དང་༔ དཔེར་ན་གངས་རི་འདི་ལ་ཉི་མ་ཤར་ནས༔ བྱིན་རླབས་ཆུ་རྒྱུན་མེ་འབེབས༔ དཔེ་དེ་འདྲ་བ༔ དད་པ་ཅན་ལ་བྱིན་རླབས་ཤིན་ཏུ་འཇུག༔ དེ་མིན་པའི་བྱིན་རླབས་རིང་ཐུང་མེད་ལ་འཇུག༔ དད་པ་ཅན་ལ་སྒོ་ཉལ་དུ་ཡོད་ཅེས་གསུངས༔ ཡེ་ཤེས་མཚོ་རྒྱལ་ཤིན་ཏུ་མཉེས་ནས་ལགས་ཨུ་རྒྱན་རིན་པོ་ཆེ༔ འཇིག་རྟེན་མི་ཚེ་སྡོང་རུལ་མེ་ཚིག་ལྟ་བུ༔ སྡིག་ལ་ནམ་ཚ་བཏང་བ་འདི་ལ་ཕན་པའི་ཐབས་ཨེ་མཆིས༔ ཞུས༔ ཨུ་རྒྱན་གྱི་ཞལ་ནས༔ འདི་ལ་ལས་རྒྱུ་འབྲས་བཤད་པའི་དོན་དེ་བས་ན་ཐེག་པ་ཆེན་པོ་རྒྱུ་ཀུན་རྫོབ་བདེན་པ་དང་ཆོས་ལ་ཨེ་འཇུག་གམ༔ བདེན་གྲོལ་ངེས་པ་ཅན་འཇུག་གམ༔ འཇུག་ནས་ཡང་དག་ཉིད་དུ་སླར་མི་ལོག་པ་དྲན་པ་རྙེད་ལ་རྨི་ལམ་རྨིས་པ་བཞིན་དུ་བདག་ཉིད་ཀྱི་མངོན་སུམ་མཐོང་ངོ་༔ སྡིག་པའི་ལས་མི་བགྱིད་དོ༔ དེ་ལྟ་བུས་སྣོད་དུ་རུང་བས༔ སློབ་དཔོན་བཅུད་དང་ལྡན་པའི་དེ་གཉིས་ཐེག་མཆོག་ཡང་དག་ཉིད་ལ་འཇུག་ནས་དོན་གྱི་འབྲས་བུའོ༔ རིན་པོ་ཆེ་རྒྱུ་མ་ནོར་དོན༔ སེམས་དང་ལྡན་པའི་འདི་ལ་འཇུག་པའི་ཆོས་རྒྱ་ཆེན་པོ་གསུངས༔ ཨེ་མ་མཁར་ཟ་ཡེ་ཤེས་མཚོ་རྒྱལ་སྒོམ་པ་ཆེ༔ དེ་འདྲ་བུད་མེད་ལུས་བླངས་པ༔ ཐོས་པ་མེད་པ་བཀའ་མྱོང་བ༔ རིག་པ་ཆེ་བ་ངོ་མཚར་དུས༔ བདག་ལ་གནས་སུ་མ་བཏང་སྒོམ་སྙིང་བ༔ ཚོགས་དྲུག་དངོས་རྟེན་མ་བྱེད་སྒོམ་སྙིང་བ༔ སྒོམ་པ་འདོད་པའི་མཁར་ཟ་ལས༔ སྒོམ་སྙིང་ཆུང་བ་མོ་ལུས་ཐོབ༔ མོ་ལུས་ཐོབ་སྟེ་དོན་ཆུང་མེད༔ ནན་ཏན་མེད་པ་ཤེས་རབ་ཆེ༔ ཤེས་རབ་ཆེ་བའི་མཁའ་འགྲོ་ལས༔ ནན་ཏན་མེད་པ་བུད་མེད་ལུས༔ སྤྲོས་པ་ཆེ་བའི་མཁར་ཟའི་ལས༔ སྙིང་རུས་མེད་པ་བུད་མེད་ལུས༔ རྫུས་སྐྱེས་རང་དབང་ཐོབ་པའི་པདྨ་ང་༔ སྦྱོར་སྒྲོལ་དངོས་གཞི་འཇུག་པའི་པདྨ་ང་༔ ལས་ཅན་སྲས་མོ་ཡེ་ཤེས་མཚོ་རྒྱལ་ཁྱེད༔ མ་འོངས་མི་རྣམས་མཚོན་ཆའི་གཟིང་བ་འདྲ༔ དཀར་པོ་སེམས་མེད་སྡིག་སྤྱོད་སེམས་མང་ཐུགས༔ མ་འོངས་དུས་ཀྱི་འགྲོ་དོན་མ་བྱེད་ན༔ མི་ལུས་གཅིག་པུར་བྱང་ཆུབ་ཐོབ་སླ་བ༔ སྒོམ་སྙིང་བྱེད་ན་བྱང་ཆུབ་སངས་རྒྱས་ཐོབ༔ མ་འོངས་བསྐལ་པའི་འགྲོ་ལ་འདས་དགོངས་སོ༔ ལན་གཅིག་བསྐལ་པ་ཟད་པའི་དུས་མཐའ་ལ༔ གང་གིས་བྱེ་བྲག་ང་ཡི་སྤྲུལ་པ་འགྱེད༔ དཔག་མེད་བགྲང་གིས་མི་ནུས་འགྲོ་བའི་དོན༔ མ་འོངས་བོད་ཁམས་རྣམས་ལ་རྒྱུན་མི་ཆད་པར་དགོངས༔ མ་འོངས་དུས་ཀྱི་འགྲོ་དོན་མ་བྱེད་ན༔ རྒྱ་གར་ཡུལ་ན་ཞག་སྟོད་ཏིལ་གྲོ་ཡོང་༔ དམྱལ་སྨད་ས་ཡུལ་སྲིན་པོ་མི་རྣམས་འབྱུང་༔ ང་ཡི་སྤྲུལ་པ་དེ་ཚེ་དཔག་ཏུ་མེད༔ མ་འོངས་འགྲོ་དོན་མཁར་ཟའི་ཡིད་ལ་ཆོངས་༔ ཐོག་མཐའ་བར་སྐབས་ལས་རྣམས་ལ༔ ཐུགས་རྗེས་རིང་ཐུང་མེད་པའི་འགྲོ་ལ་གཟིགས༔ བྱིན་རླབས་ཉེ་རིང་མེད་པའི་འགྲོ་ལ་འཇུག༔ ཕྱོགས་རིས་མེད་པའི་འགྲོ་བའི་བར་ཆད་བསལ༔ མཁར་ཆེན་མཚོ་རྒྱལ་སྨོན་ལམ་ཤུགས་ཀྱིས་མཐུས༔ མཁར་ཆུ་མཐའ་མ་རྒྱུད་པའི་འགྲོ་བ་འདྲེན༔ བྱང་ཆུབ་ཐོབ་པའི་སེམས་ཅན་ཐར་ལམ་ཟིན༔ མཚོ་རྒྱལ་རྒྱུད་པའི་གདུང་རྒྱུད་མ་སྟོང་བར༔ དུས་སུ་རྒྱུན་ཆད་མེད་པར་ཐུགས་རྗེས་གཟིགས༔ སྨོན་ལམ་ཤུགས་ཀྱིས་འབྲེལ་བ་འདི་ཡི་མཐུས༔ ཡེ་ཤེས་མཚོ་རྒྱལ་ཐུགས་རྗེ་བྱིན་རླབས་ཀྱིས༔ མཁར་ཆུ་རྒྱུད་པའི་མཐོང་ཐོས་སངས་རྒྱས་ཐོབ་པར་ཤོག༔ འདི་ཡི་མཐུ་དང་ནུས་པའི་བྱིན་རླབས་ཀྱིས༔ རྒྱལ་སྲས་ཚུལ་འཛིན་རྣམས་ཀྱི་བྱིན་གྱིས་རློབས་༔ བདག་གིས་སྨོན་ལམ་བཏབ་པའི་འགྲོ་དྲུག་རྣམས༔ ང་ཉིད་འདུ་འབྲལ་མེད་པའི་འགྲོ་དོན་ཤོག༔ འགྲོ་བ་ཡོངས་ལ་ཐུགས་རྗེས་གཟིགས་པར་བྱ༔ དད་པ་ཅན་ལ་བྱིན་རླབས་སྒོ་ཉལ་ཡོད༔ མོས་གུས་ཅན་ལ་ཐུགས་རྗེའི་ཞལ་གཟིགས་ཡོད༔ བརྩོན་འགྲུས་ཅན་ལ་དམ་ཆོས་རང་གྲོལ་ཡོད༔ ནན་ཏན་ཅན་ལ་སྒོམ་པ་རང་གྲོལ་ཡིན༔ རྫོགས་པ་ཆེན་པོ་རྟོགས་པའི་སངས་རྒྱས་ཐོབ༔ གསོལ་བ་བཏབ་པའི་འགྲོ་བའི་དོན་སྐྱོང་བ༔ གསོལ་བ་བཏབ་པ་ཙམ་གྱིས་འགྲོ་བ་འདྲེན༔ ཨུ་རྒྱན་ང་ལ་གསོལ་བ་གཅིག་བཏབ་ནས༔ བདུན་གཅིག་བར་དུ་ངའི་བར་ཆད་བསལ༔ ཉིན་མཚན་དུས་གསུམ་གསོལ་བ་གང་བཏབ་ན༔ རྒྱུན་ཆད་མེད་པར་གསོལ་བ་བཏབ་ཙམ་གྱིས༔ ཨུ་རྒྱན་ང་དང་མཇལ་བའི་སྐབས་ཡོད་པ༔ གསོལ་བ་གཅིག་བཏབ་བདག་དང་འདུ་འབྲལ་མེད༔ མ་འོངས་སེམས་ཅན་རྣམས་ཀྱི་ཐུགས་ལ་ཞོག༔ ཡེ་ཤེས་མཚོ་རྒྱལ་འདྲ་བའི་བློན་དམན་པ༔ ཤེས་རབ་གཏོང་ཕོད་བརྩོན་འགྲུས་རབ་ཆེ་བ༔ མཚོ་རྒྱལ་འདི་འདྲ་ལས་ཅན་ཡོད་དཀའ་བ༔ ཁོ་མོ་མ་གཏོགས་རྒྱུད་པའི་རང་ཐུག་པ༔ རྒྱུད་པ་ཅན་ཏེ་སངས་རྒྱས་བྱང་ཆུབ་ཐོབ༔ དད་པ་ཅན་ལ་བྱིན་རླབས་སྒོ་ཉལ་ཡོད༔ ཨུ་རྒྱན་བདག་ལ་གསོལ་བ་ཐོབ༔ སྙིང་རུས་གཏོང་ཕོད་ཆེ་བའི་མཚོ་རྒྱལ་ཉོན༔ ཁྱེད་ལ་བདག་གིས་བཀའ་གདམས་པ༔ མ་འོངས་བུ་ལ་ཐུགས་རྗེས་ཟུངས༔ མ་འོངས་དུས་ཀྱི་མཐའ་སྐྱོང་བ༔ པདྨ་ང་ཉིད་བོད་ཡོང་འགྲོ་བའི་དོན༔ མཚོ་རྒྱལ་ཁྱོད་ལ་ཐུགས་རྗེ་ཆུང་བ་མེད༔ སྔར་ཡང་ཆུང་བ་ད་ཡང་ཆུང་བ་མེད༔ འགྲོ་བ་ཡོངས་ལ་ཕན་པ་རྒྱ་ཆེན་ཤོག༔ ཅེས་གསུངས༔

མཚོ་རྒྱལ་ཁྱོད་ཉོན་དང་ངས་བཤད་དོ༔ ཁྱེད་མཁར་ཆུ་བུ་མོ་ཡུལ་འགྲོ་མོས་ཅན་ཨེ་ཡོད༔ ད་ཡང་སྒོམ་བྱེད་དམ༔ རྒྱ་གར་གྱི་ཆོས་སྦྱངས་ན༔ སློབ་གཉེར་སྦྱངས་ཅི་བྱེད་དམ༔ འཚོ་བ་མེད་པའི་སྟེང་ནས་རྒྱལ་པོ་འཚོ་བ་ཡོངས་པ་མི་བླངས་བར་བྱ༔ བཙུན་མོ་དམར་རྒྱན་དུག་གཡོ་བ༔ ང་ལ་དུག་མི་མངའ་སྟེ་ཤིན་ཏུ་མ་མྱོང་༔ ཞེས་གསུངས༔ ཡེ་ཤེས་མཚོ་རྒྱལ་ཞུས་པ༔ སེམས་ཅན་ཐམས་ཅད་ཀྱི་དོན་རྒྱ་ཆེན་པོ་འདི་མིན་པའི་སློབ་གཉེར་བྱེད་མི་ཐུབ་དེ་ད་བྱེད་དོ༔ སྒོམ་བྱེད་དམ་ཁྱེད་ཀྱི་ཐུགས་རྗེས་ཨེ་མི་བཟུང་༔ རྒྱ་གར་སྐད་ཀྱང་འགྲོ་བའི་དོན་དུ་བྱེད༔ དེ་ནང་འཚོ་བ་ཡོང་བ་ཨུ་རྒྱན་ཡབ་ཡུམ་གཉིས་ཀྱིས་མ་གཡོས༔ ཨུ་རྒྱན་ཆེན་པོ་ལགས༔ སློབ་གཉེར་བྱེད་དམ༔ ང་ལང་བདག་ལུང་ཉུང་བ་ཅི་གསུངས་པའི་བཀའ་བསྒྲུབ་ལགས༔ མདོ་སྔགས་ཐབས་དང་ཤེས་རབ་སྙིང་པོའི་བཀའ༔ ཉེ་བར་བསྒྲུབས་གནས་གསང་སྔགས་བསྒྲུབ་པའི་ལུང་༔ དེ་གཉིས་གསུངས་ལགས་ཞུས༔ ཐབས་སྟོན་པའི་མདོ་དང་༔ སྔགས་གསུམ་དང་ལྡན་པའི་ཕྱི་མདོ་རྒྱུད་སྔགས༔ རིག་པ་ཆེ་བ་ཉེ་བར་གྱི་སྙིང་པོ༔ དེ་ལྟར་དུ་རིག་ཐག་ཆོད་དང་དེ་ནང་དུ་གསལ་གསུངས༔ ཁམས་རིགས་མི་འདྲ་བ༔ རིགས་པ་ཉམས་ཆོད་ཀྱི་ཐོད་རྒལ་བ་གཅིག་ཏུ་འཆར་བ༔ རིམ་དུས་ཀྱེ་པ༔ འགྲོ་བའི་དོན་ལ་ཁྱོད་ཤེས་རབ་ཆེ་བས་ཉམས་སུ་བླངས་པའི་ཐབས་བྱ༔ ས་དང་པོ་རབ་ཏུ་དགའ་བའི་ས་ལ་བརྩོན་ནས༔ སྟོང་གསལ་ཟུང་འཇུག་འོད་དཔུང་གི་ནང་ནས་རིག་པ་དྲི་མེད་ཐིག་ལེ་ཉག་ཙམ་པ་རང་འཆར་གཅིག་ཏུ་གྲོལ་བ་ས་ལ་རབ་ཏུ་བརྩོན་པར་བྱ༔

ཁྱོད་བུད་མེད་རིགས་འདི་གཏམ་མང་བ་བློ་སྣ་བསྒྱུར་བ༔ སྙིང་རུས་བཟོད་དཀའ་མེད་པ་ཡིན་འདུག་སྟེ༔ གཞན་གྱི་བུད་མེད་དང་ཁྱོད་འདྲ་བ་ཡང་མེད་པ༔ གཏམ་ཉུང་ནས་ཆོས་ལ་མོས་པ༔ བློ་བརྟན་པ༔ རིག་པ་ཆེ་བ༔ སྙིང་རུས་བཟོད་དཀའ་ཡོད་པ༔ ཁྱོད་དེ་འདྲ་བ་ཤིན་ཏུ་བཟང་བའི་གནས༔ ང་སྐྱེས་བུ་དད་གུས་ནུས་མཐུ་དང་ལྡན་པ་གང་གི་ཡང་རེག་མ་ནུས་པ་ཐབས་ཀྱིས་འདུལ་བ༔ བློ་སྣ་ཐམས་ཅད་ཆོས་ལ་བཅས་པ༔ སྣང་སྲིད་གཅིག་འདྲེས་ཀྱི་ངང་ནས་གདུག་པ་ཅན་འདུལ་ཐབས་གདའ༔ ཁྱོད་འགྲོ་བའི་དོན་ལ་གང་འདུལ་དྲི་མ་མེད་པའི་ཆོས་བཅས་པ་འདི་ལ་སྐྱབས་བླ་ན་མེད་པ་སྐྱེས་བུ་དད་པ་ཅན་ལ་ནན་ཏན་མཛོད༔ ཅེས་གསུངས༔

ཡེ་ཤེས་མཚོ་རྒྱལ་ཞུས་པ༔ ངའི་གཞན་གྱི་ཁྱིམ་ཐབ་སྤངས་ནས་རབ་བྱུང་མཛད་པ༔ ཁྱེད་ལ་མོས་པ་དང་༔ དད་པ་ཡོད་པ༔ ཁྱེད་རང་ཅི་གསུངས་ཐམས་ཅད་དོན་དུ་འཆང་བ༔ ལོ་ཉུང་བ་ཐུགས་རྗེས་ཡང་དུ༔ ལོ་ཉུང་བ་ཐུགས་རྗེས་ཡང་དུ་གཟིགས་ཏེ་སློབ་གཉེར་དང་ཅི་གསུངས་པའི་བཀའ་བསྒྲུབ༔ དེ་མིན་པའི་ཐབས་སྣ་ཚོགས་མང་བ་ངས་མི་བྱའོ༔ ལགས་ཨུ་རྒྱན༔ ང་ཁམས་གསུམ་ཀུན་ལ་སེམས་བསྐྱེད་པ༔ ང་སྙིང་རྗེ་བསམ་པ་ཁྱེད་ཀྱིས་འགྲོ་བ་ཡོངས་ལ་ཐུགས་རྗེས་གཟིགས༔ ང་རང་ཤ་ཁྲག་བེམ་པོ་ཅི་སྐྱོལ་བ་ཁྱེད་ཀྱི་ཆགས་ཕྱི་རྒྱ་ཆེན་པོ་མཛད༔ ཅེས་ཞུས༔ ཨུ་རྒྱན་ཞལ་ནས༔ རིགས་ཀྱི་བུ་མོ་ཁྱེད་ཐེག་པའི་ཆོས་ལ་དད་པ༔ རིགས་པའི་རྗེས་སུ་འཛིན་མཐོང་ལམ་སྦྱོར་ལམ་དུ་གནས༔ ཤེས་རབ་ཆེ་ལ་ལུས་དམན་པ༔ རིགས་བཟང་ལ་མདོག་དམན་དུ་འདུག་པ༔ སྤྲོས་པ་ཆོས་ཏེ་དཀའ་བློ་ཡང་༔ ཐུགས་ཞུན་མར་ལྟ་བུ་ཤིན་ཏུ་ཡང་ངོ་མཚར༔ ཞེས་གསུངས༔ ཡེ་ཤེས་མཚོ་རྒྱལ་ཞུས་པ༔ པདྨ་རིན་པོ་ཆེ་ལགས༔ མ་འོངས་དུས་ལ་ཐབས་དགོངས་ཏེ༔ བཀའ་རྫོགས་པ་ཆེན་པོ་དོན་ཨ་ཏིའི་ཡོ་ཀ་ཐེག་པ་རིམ་པ་དགུ་གསུངས་ཏེ༔ ཁོ་མོས་ཡིད་ལ་དྲན་པ་ཙམ་གྱིས་འཆང་༔ ཨེ་ཐུབ་གཅིག་སོང་ལགས༔ ཨུ་རྒྱན་གྱི་ཞལ་ནས༔ ཆོས་སྐུ་བྱེད་པ་རིམ་པ་ཨ་ནུ་ཡོ་ཀ༔ ཆོས་སྐུ་ཆོས་སྐུའི་རྫོགས་རྒྱུད་ཨ་ཏི་ཡོ་ཀ༔ ཆོས་སྐུ་སྟོང་པ་སྐུ་མཆོག་མ་ཧཱ་ཡོ་ཀ༔ ཀུན་ཏུ་བཟང་པོ་རྫོགས་རྒྱུད༔ ལོངས་སྐུ་གསུང་མཆོག་སྔགས་རིམ་ཀྲི་ཡ་ཡོ་ཀ༔ ལོངས་སྐུ་གསུང་རྒྱུད་གསལ་འགྲུབ་ཨུ་པ་ལ༔ ལོངས་སྐུ་རང་གསལ་བ་འདི་གཏེར་དུ་སྦས་ནས་ནམ་དུ་དར་ཞུས༔ པདྨའི་ཞལ་ནས༔ མ་འོངས་དུས་ནས་སྐྱེས་བུ་ཁྲོ་གཏུམ་དང་ལྡན་པ༔ ནང་འཁྲུགས་དར་བའི་དུས༔ རིག་འཛིན་མིང་ཅན་འབྱུང་༔ དེའི་དར་གསུངས༔

ཁོ་མོས་ཞུས་པ༔ ཨུ་རྒྱན་རིན་པོ་ཆེ་རྒྱུད་ལྡན་སྔགས་རིམ་དང་ལྡན་པ༔ ཐེག་པ་ཆེན་པོ་བླ་ན་མ་མཆིས་པ་གཅིག་ཏུ་གྲོལ་བའི་ཐབས་གཅིག་གནོངས་ལགས་ཞུས༔ ཇོ་མོ་མཁར་ཆུ་ཟ་ཉོན་དང་༔ གཅིག་ཏུ་གྲོལ་བ་བསྐྱེད་རིམ་དྲན་རྫོགས་ནས་བསྐྱེད་པ་སྣང་སྲིད་དབང་དུ་འདུས་པ༔ སྐད་ཅིག་གཅིག་གིས་བྱེ་བྲག་རྫོགས་སངས་རྒྱས༔ ཞིང་གི་རྡུལ་སྙེད་དཔག་མེད་བགྲང་མི་ནུས༔ དེ་ཚེ་ཡོན་ཏན་དཔག་མེད་བརྗོད་མི་ལང་༔ ཞེས་གསུངས༔ མཚོ་རྒྱལ་ཞལ་ནས་སློབ་དཔོན་ལ་འདི་ཞུས༔ ཨེ་མ་ཧོ༔ མཁར་ལྟར་མཉམ་པའི་འགྲོ་བ་འདྲེན་མཛད་པ༔ ཐུགས་རྗེའི་ཞལ་གཟིགས་བོད་ཀྱི་ཞིང་ཁམས་སུ༔ བོད་འབངས་ལས་ཅན་རྟག་ཏུ་ཐུགས་རྗེས་གཟིགས༔ ཨུ་རྒྱན་རིན་པོ་ཆེ་ལ་ཕྱག་འཚལ་བསྟོད༔ ཁོ་མོ་སྐྱེས་པ་རིགས་དཀའ་མཁའ་འགྲོའི་རིགས༔ འཛམ་གླིང་སྐྱེས་པར་གླིང་འདིར་མ་མཆིས་པ༔ ཡུལ་ནས་མ་མཆིས་མཁར་ཆུ་དཔལ་གྱི་ས༔ རིགས་ནི་མ་མཆིས་མཁར་ཆེན་མི་ཡི་རིགས༔ ལུས་ནི་མ་མཆིས་བུ་མོ་བདག་གི་ལུས༔ བླ་མ་མ་མཆིས་ཨུ་རྒྱན་པདྨ་འབྱུང་༔ གྲོགས་ནི་མ་མཆིས་དཔའ་བོ་མཁའ་འགྲོའི་གྲོགས༔ བརྡ་ནི་མ་མཆིས་རྫུས་སྐྱེས་གསུང་གི་བརྡ༔ པདྨའི་གསུང་གིས་ངོ་མཚར་བདག་གིས་ནི༔ མི་བརྗེད་གཟུངས་མཆོག་མཁར་ཆུ་མཚོ་རྒྱལ་ང་༔ འགྲོ་བའི་དོན་ལ་རྫུས་སྐྱེས་པདྨ་དགོངས༔ ཁོ་མོ་དྲིན་གྱིས་རབ་ཏུ་ཆེ་བའོ༔ རྫུས་སྐྱེས་པདྨའི་སྐུ་ལ་ཕྱག་འཚལ་བསྟོད༔ བདག་ནི་རབ་ཅེས་ཨུ་རྒྱན་ཆག་ཕྱིས་མཛད༔ པདྨའི་ཅི་གསུངས་ཁོ་མོ་དོན་དུ་འཆང་༔ མ་འོངས་བོད་འབངས་རྗེས་ཕྱིར་བསྟན་སྐྱོང་རྣམས༔ ཐུགས་རྗེས་བཟུང་བའི་ཐབས་རྣམས་ངས་བསྟན་ཏོ༔ ཞེས་ཞུས༔ ཨུ་རྒྱན་ཞལ་ནས༔ ཚེ་གཅིག་ཏུ་བསམ་ཡས་འདི་ན་འདུག་གམ༔ ཅི་བྱེད་དམ༔ ཁོ་མོས་ཞུས་པ༔ ཚེ་གཅིག་ཏུ་འདུག་གམ་ཁྱེད་ཀྱིས་དགོངས་སམ༔ བདག་བུད་མེད་ཀྱི་རིགས་བློ་ཁ་ཡང་༔ ཅི་འདྲ་བ་མོད་ལགས༔ ཨུ་རྒྱན་ཞལ་ནས༔ ཁོ་མོ་ཏི་ཡིན་པ༔ ཁྱེད་སེམས་ཅན་འགྲོ་བའི་དོན་ཐབས་གང་འདུལ་གྱི་སྒོ་ནས་འདྲེན་སྟོན་མཛད༔ ཐབས་མཁས་པ་ལ་ཚངས་པ་སྩལ་ཏམ༔ དྲིན་ཆེ་བ་ལ་དུས་རྟག་ཏུ་གཟིགས༔ བཀའ་བབས་ཡང་རྩེ་ཆོས་ཀྱི་མཐར་ཕྱིན་པ༔ ཁྱོད་ཅི་འདྲ་བའི་སེམས་ཅན་ཐམས་ཅད་གཞི་ལམ་དུ་བཀོད་པར་བྱ༔ ཞེས་གསུངས༔ ཡེ་ཤེས་མཚོ་རྒྱལ་ཞུས་པ༔ ངས་གཏམ་གྱི་ཕ་སྐལ་དམ་པའི་ཆོས་ལ་བྱེད༔ མིའི་ཚེ་རྣམས་འགྲོ་དོན་བཏང་བསམ་ཡོད༔ ཁོ་མོ་ལས་ཀྱི་དབང་ཆེ་ཤུགས་འབྱུང་བ༔ ཨུ་རྒྱན་པདྨ་འགྲོ་བའི་དོན་ལ་དགོངས༔ གང་འདུལ་སྤྲུལ་པ་བྱེ་བ་ཕྲག་བརྒྱ་འགྱེད༔ ཁོ་མོ་སྦྱིན་དགའ་རྒྱུ་ཡི་སྦྱིན་པ་མེད༔ བསོད་ནམས་འབྲས་བུ་སྦྱིན་པ་ཁོ་མོས་བཏང་༔ ཁོ་མོ་ཚུལ་ཁྲིམས་བསྲུངས་པའི་གོ་ཆ་བརྟན༔ རབ་བྱུང་ཚུལ་མཛད་ཁོ་མོས་བྱེད༔ ཁོ་མོས་བཟོད་པ བསྒོམས་པས་ཁོང་ཁྲོ་སྤངས༔ ཁོ་མོ་བརྩོན་འགྲུས་ཆེ་བས་རང་དོན་བསྒྲུབས༔ བསམ་ གཏན་བསྒོམས་པའི་ཐུན་སྐྱོང་བ༔ ཤེས་རབ་བསྒོམས་པས་ས་ལམ་རྫོགས༔ ཁོ་མོ་བརྩོན་འགྲུས་ཆེ་བ་བླ་མའི་དྲིན༔ མཆོག་གི་དངོས་གྲུབ་བདག་ལ་སྩོལ༔ ཅེས་ཞུས༔ ཨུ་རྒྱན་པདྨ་ལགས༔ གཞི་ལམ༔ ས་ལམ༔ སྟོང་ལམ༔ མཐོང་ལམ༔ བསྒོམ་པའི་ལམ༔ བླ་ན་མེད་པའི་ལམ༔ རྫོགས་ལམ༔ བརྒྱད་རྣམ་པ་ཁོ་མོ་ལ་གསུངས་ཞུ༔

ཨུ་རྒྱན་ཞལ་ནས༔ མ་བཅོས་ཀློང་ཡངས་ནས་མཐའ་བྲལ་སྐད་ཅིག་འགྲོ་བ་གཞིའི་ལམ༔ བདེ་བར་གཤེགས་པའི་སེམས་ཉིད་ངོ་བོ་རྒྱལ་ས་ཟིན་པ་ལ་རབ་ཏུ་བརྩོན་པ་ས་ལམ༔ སྟོང་པའི་སིང་ངེ་གསལ་སྟོང་ངང་ནས་རིག་པ་དྲི་མེད་ཀྱི་ངོ་བོ་རྟོགས་པ་སྟོང་ལམ༔ མ་བཅོས་བཅོས་མེད་ཤེལ་གྱི་ནང་དུ་གཟུགས་བརྙན་ཤར་བ་ནི་མཐོང་ལམ༔ རྣམ་རྟོག་གློ་བུར་གང་གིས་འཇིགས་ཀྱིས་མི་ནུས་བསྒོམ་ལམ༔ མཐའ་དབུས་གཡོ་འགུལ་ཕྱོགས་རིས་མེད་པ༔ རྒྱ་མ་ཆད་པ་དྲི་མ་མེད་པ་དྲི་མ་དང་བྲལ་བ་ནི༔ བླ་ན་མེད་པའི་ལམ༔ རབ་ཏུ་གནས་པ་དོན་རྫོགས་པ་ཆེན་པོ་ཉིད་ཀྱི་ཉོན་མོངས་པ་འཇོམས་པ་དོན་བཀོད་པ་ཆེན་པོ་རྫོགས་པའི་ལམ༔ དེ་རྣམས་ཁྱེད་མཁར་ཆུ་ཟའི་ཉམས་སུ་གནས༔ ཡང་དག་དོན་འབྲས་བུ་ཉིད་ཨ་ཏི་ཡོ་གའི་ཆོས་སྐོར་མ་ལུས་པ་དེ་དང་མཐུན་པའི་སྐབས་དང་སྦྱར༔ མི་མངོན་ཆོས་ཀྱི་དབྱིངས་མི་མཉམ་པ་མཉམ་པ་ཆེན་པོ་བྱས་སོ༔ མཐའ་དང་བྲལ་བ་གནས་པ་མེད་པ་གནས་པའི་དོན་རྫོགས་པས་ལམ་ཡོངས་སུ་གནས༔ ཁྱེད་བུད་མེད་སྙིང་རུས་དང་བརྩོན་འགྲུས་སྤྲོས་པ་ཆེ་བ་བྱེད་དེ་འགྲོ་བའི་དོན་རྒྱ་ཆེན་པོ་འབྱུང་༔ ཞེས་གསུངས༔

ཡེ་ཤེས་མཚོ་རྒྱལ་ཞུས༔ ལགས་སློབ་དཔོན་རིན་པོ་ཆེ་འདིར་ས་བཟང་བའི་སྐབས་ཨེ་མཆིས་ལགས༔ འདི་བྲག་ཕུག་རབ་ཏུ་གནས་པའི་མ་འོངས་ཀྱིས་དད་བྱེད་པ༔ ལས་ཅན་བརྩོན་འགྲུས་ཤེས་བཞིན་དང་ལྡན་པ༔ དེ་རྣམས་ལ་དངོས་གྲུབ་ཞུ་བ་གནང་བའི་དུས་སྐབས་བྱ༔ ཞེས་ཞུས༔ སློབ་དཔོན་ཞལ་ནས༔ འདི་རབ་ཏུ་བརྩོན་པའི་ས༔ བསྐལ་པ་མཐའ་མ་འདི་ལ་དད་པ་གང་བྱེད་རྣམས་སངས་རྒྱས་པའི་ཐབས་ཡོད༔ འཆིང་ཕུག་བྲེ་གུ་གཙུག་ལག་འདིར༔ གང་དུ་ཐོན་པ་བདེ་བའི་སྐབས་གདའ༔ ང་རྒྱ་གར་རིག་འཛིན་བོད་ཁམས་འགྲོ་བའི་དོན་ལ་ཡོང་སྟེ༔ རྒྱ་གར་བུ་མོ་མནྡྷ་ར་བའི་སྐབས་ང་དང་འདུ་འབྲལ་མེད་པ་ཡིན༔ ཁྱོད་བོད་ཁམས་མ་རུང་བ་ཐམས་ཅད་འདུལ་ཐབས་ཁྱེད་མཁར་ཟ་མཚོ་རྒྱལ་འདུལ་འབྲལ་མེད་པའི་སྐབས་བྱ༔ ཞེས་གསུངས་ནས༔ རྒམ་ཁྲོལ་ཁྲོལ་བྱ་བ༔ ཡེ་ཤེས་མཚོ་རྒྱལ་གྱིས་ཅི་ཡིན་ཞུས༔ མནྡྷ་ར་བ་ཡོང་པ་ཡིན་གསུངས༔ ཡེ་ཤེས་མཚོ་རྒྱལ་ངས་གཅིག་རྟོགས་ནས་རྒྱ་གར་བུ་མོ་ཅི་འདྲ་ཡིན་ལྟ་ཞུས༔

ཨུ་རྒྱན་ཞལ་ནས༔ ཁྱོད་ལྟ་བའི་ལུས་མེད་པ་འཇའ་ལུས་ཡིན་པའི་རྟོགས་མེད་འདུག་གསུངས༔ ཡེ་ཤེས་མཚོ་རྒྱལ་གྱིས་དགོངས་ནས༔ འཇའ་ལུས་ཐོབ་པ་ཁོ་མོ་བས་ལྷག་པ་རེད་དགོངས༔ ཕག་གི་ཟླ་བའི་ཚེས་བཅུ་ཉིན་པར་ཡེ་ཤེས་མཚོ་རྒྱལ་མནྡྷ་ར་བའི་དངོས་སུ་བསྟེན་པ་ཡི་དམ་ལྷ་ཚོགས་ཕྱོགས་བཅུའི་སངས་རྒྱས་རྣམས་ཀྱི་ཞལ་ནམ་མཁའ་ལ་གཟིགས་པ༔ ཡབ་ཡུམ་གསུམ་གྱིས་ཚེས་བཅུ་བྱེད་པ༔ ཀུན་གཞི་ཡངས་པའི་གཏོར་གཞོང་བཅས༔ ཤ་ཁྲག་དམར་གྱི་གཏོར་མ་བཅས༔ འཇའ་ཀད་ཕུད་ཀྱིས་དྲི་ཆབ་བྲན༔ སྐྱེ་བ་མེད་པའི་གཏོར་གཞོང་བཅས༔ རང་ལུས་རྣམ་དག་གཏོར་མས་བརྒྱན༔ མང་ས་ཤ་ཡི་མཆོད་པ་བཞེས༔ ཡིད་ཀྱི་དངོས་པོ་གཏོར་གཞོང་དུ༔ རྩ་ཆེན་རྣམས་ཀྱི་གཏོར་མས་བརྒྱན༔ རྩ་བྲན་མཆོག་གི་མཆོད་པ་བཞེས༔ སྟོང་པ་ཉིད་ཀྱི་གཏོར་གཞོང་དུ༔ སྣང་བ་དཀར་དམར་གཏོར་མས་བཀང་༔ གསལ་བ་མཆོག་གི་རྒྱན་དུ་བཀོད༔ རིག་པ་དྲི་མེད་མཆོད་པ་བཞེས༔ གསང་བ་པདྨོའི་གཏོར་གཞོང་དུ༔ གསང་བའི་མཚན་གྱི་གཏོར་མས་བཀང་༔ རིག་པ་བྱང་སེམས་དཀར་དམར་མཆོད་པ་བཞེས༔ ཕྱི་སྣོད་འཇིག་རྟེན་གཏོར་གཞོང་དུ༔ ནང་བཅུད་སེམས་ཅན་གཏོར་མས་བཀང་༔ རྩི་བཅུད་བརྒྱན་པའི་མཆོད་པ་བཞེས༔ རྒྱལ་བ་རྣམས་ཀྱིས་ཞལ་ནམ་མཁའ་ནས་གཟིགས་པ༔ མན་དྷ་ར་བ་ཡེ་ཤེས་མཚོ་རྒྱལ་གཉིས་ཀྱིས་ཕྱག་འཚལ་རེས་བྱེད་ནས་དབུ་ཐུག་བྱེད་པ༔ ཨུ་རྒྱན་པདྨའི་ཞལ་ནས༔ རྒྱ་གར་ལ་བདེ་མོ་རང་ཨེ་འདུག་གསུངས༔ མན་དྷ་ར་བས་ཞུས་པ༔ བདེ་མོ་རང་འདུག༔ མཁར་ཟ་ཡེ་ཤེས་མཚོ་རྒྱལ་འགྲོ་བའི་དོན་ལ་རྒྱ་ཆེན་པོ་ཨེ་ཡོང་༔ བོད་ཁམས་སྲིན་པོ་ཆོས་ལ་ཨེ་འཛུད་ཞུས༔ ཨུ་རྒྱན་ཞལ་ནས་བོད་མ་རུང་པ་ཐམས་ཅད་ཆོས་ལ་འཛུད༔ མཁར་ཆེན་ཟ་ཡེ་ཤེས་མཚོ་རྒྱལ་རིག་པ་དང་ཤེས་རབ་ཆེ་བ་སྤྲོས་པ་ཆེ་བ༔ བརྩོན་འགྲུས་ཆེ་བ་མ་འོངས་དཔག་མེད་ཀྱི་འགྲོ་དོན་ཡོང་གསུངས༔ ཁྱོད་རྒྱ་གར་གང་འདྲ་ནས་འདུག༔ ལན་ཅིག་གང་འདྲ་ཐོན་གསུངས༔ མན་དྷ་ར་བའི་ཞལ་ནས༔ རྒྱ་གར་གྱི་ཇོ་མོ་ང་ལན་རེ་དུས་མཉམ་དུ་ཁྱེད་དང་འདུ་འབྲལ་མེད་པ༔ ལན་རེ་ཟ་ཧོར་ཡུལ་ནས་འགྲོ་དོན་བྱས༔ ལན་རེ་མ་དག་པ་ཐམས་ཅད་དག་པར་བྱེད་པ་ཡིན་ལགས་ཞུས༔ ཨུ་རྒྱན་ཞལ་ནས༔ དེ་འདྲ་བའི་དུས་མཉམ་དུས་བཟུང་༔ ཐེག་པ་ཆེན་པོ་ངེས་དོན་དང་དྲང་དོན་རྒྱ་ཆེན་པོ་ཡོང་ནས༔ འདི་ལ་སྣོད་དུ་རུང་བ་མ་འོངས་བུད་མེད་སྐྱེས་པའི་གཟུགས་བཟང་ཆོས་ལ་མོས་པའི་གཏིང་ཁུ་སྣང་༔ ཞེས་གསུངས༔

ཡེ་ཤེས་མཚོ་རྒྱལ་གསེར་སྲང་གང་སྔར་མཁར་ཆུ་ན་ཡོད་པ་དེ་ཡོང་ནས༔ སྲང་ཕྱེད་དམ་དེ་མན་དྷ་ར་བ་ལ་ཕུལ༔ ཡེ་ཤེས་མཚོ་རྒྱལ་ཞལ་ནས༔ ཁྱེད་རྒྱ་གར་མཁའ་འགྲོ་མ་དངོས་མེད་འཇའ་ལུས་ཐོབ་པ་རིག་པ་དང་སྐུ་གདུང་དང་ལྡན་པ་ཁྱེད་ལ་བདག་གིས་ཕུལ༔ ངེས་པ་ཅན་འདུ་འབྲལ་མེད་པའི་ཐབས་གདའ༔ གང་འདུལ་སྟོན་པའི་ཐབས་མི་མང་བ༔ བོད་ཁམས་འདི་མ་རུང་པ་མི་མིན་འདྲེ་ཡུལ་བྱ་རོག་གདོང་དེར་སྲིན་པོ་དགེ་མེད་སྡིག་ལ་དད་པ་མི་ཤ་ཟ་བའི་ས་འདིར་ཨུ་རྒྱན་པདྨའི་འདུལ་བའི་དུས་ལ་བབས་ལགས༔ ཁྱེད་རྒྱ་གར་ནས་མནྡྷ་ར་བའི་ཆོས་རྒྱ་ཆེན་པོ་འབྱུང་༔ ཁྱེད་དབུ་སྐྲ་གཅིག་བོད་དེར་བར་བཞག་ནས་བོད་དང་སྐྱེས་པ༔ བདག་གིས་ཀྱང་རྒྱ་གར་ནས་མཁའ་འགྲོ་མ་འདི་འདྲ་བ་སྣང་༔ ཞེས་གསུངས༔ མན་དྷ་ར་བའི་ཞལ་ནས༔ ཁྱེད་དབུ་སྐྲ་ཡང་བདག་ལ་སྟེར་ཏེ༔ བོད་ལ་མཁའ་འགྲོ་མ་འདི་འདྲ་བའི་དོན་བྱེད་པ་སྣང་བ་འདུག་ཞུས༔ ལུས་གཅིག་ལ་ཡ་བྲག་གཉིས་ཡིན་པས༔ རྒྱ་གར་དང་བོད་མིན་པའི་དེ་སྣང་བ་མིན་པའི་ཁྱད་མི་འདུག༔ ཀུན་དགའ་བོ་སྤྲུལ་པ་རང་འདུག༔ ཁྱོད་བོད་ཀྱིས་འགྲོ་དོན་བྱེད་ངས་གྲོགས་བྱེད་གསུངས༔ ལགས་ཞུས༔ དབུ་སྐྲ་གཉིས་ཡར་རྗེ་མར་རྗེ་བྱེད་པ༔ མན་དྷ་ར་བ་འཇའ་འོད་དུ་ཡལ་ནས་སོང་ཡེ་ཤེས་མཚོ་རྒྱལ་ལ་སློབ་དཔོན་གྱིས་ཚིག་གསུངས་པ༔ རྒྱ་གར་བུ་མོ་དང་ཁྱེད་མཁར་ཟ་གཉིས་གང་དུ་ལྷག༔ གཡོ་བ་མེད་པ་ཏིང་ལྷན་དུ་ཁྱེད་དབུ་སྐྲ་རྗེས་པའི་དུས་སྐབས་མཆིས་པ༔ སུ་ལྷག་པོ་སྣང་གསུངས༔

ཡེ་ཤེས་མཚོ་རྒྱལ་ཞུས་པ༔ ཁྱེད་སློབ་དཔོན་གྱི་གང་ལྷགས་སུ་ཤེས༔ རྒྱ་གར་གྱི་བུ་མོ་དག་པའི་ས༔ རིགས་ནི་རྒྱལ་རིགས་དངོས་བཅས་འཇའ་ལུས་ཐོབ་པ༔ ང་བོད་ཀྱི་ཡུལ་ས་ངན་པ་སྲིན་པོ་གདོང་དམར༔ དགེ་མེད་སྡིག་ལ་དད་པའི་ས་ནས༔ ཚོ་བྱེད་མཁར་ཆུ་ཟའི་རིགས་དམན་པ༔ སྤྲོས་པ་ཆུང་བ༔ ནན་ཏན་མེད་པ༔ ང་བས་རྒྱ་གར་བུ་མོ་ལྷག་པོ་འདུག༔ བདག་མཁར་ཆུ་ཟ་རིགས་དམན་པ༔ བོད་ཁམས་མི་མིན་འདྲེ་ཡུལ་བྱ་རོག་གདོང་འདིར་ཁྱེད་ཐུགས་རྗེའི་མ་ཆུང་༔ བདག་གི་མདངས་ཞག་ཏུ་ཉི་མ་ཤར་བའི་བདག་ཕྱོགས་ལ་རྒྱལ་བ༔ ཁྱེད་འདུལ་བའི་དུས་སྐབས་མན་དྷ་ར་བའི་པི་ཝང་སྒྲོག་པ་རྨིས༔ བོད་མ་རུང་ལོག་ལྟ་ཅན་ཁྱེད་ཀྱིས་འདུལ་བ༔ ལས་ཅན་རྒྱལ་པོ་རྗེ་འབངས་སྨིན་པ༔ འགྲོ་བ་སེམས་ཅན་ཐམས་ཅད་བྱང་ཆུབ་ཏུ་བཀོད་པ༔ མཁར་ཆུ་རྒྱུད་པའི་ཐར་ལམ་ཟིན་པ༔ ཇོ་མོ་བདག་ལ་ཐུགས་རྗེའི་མ་ཆུང་ཞིག༔ ཅེས་ཞུས༔

ཨུ་རྒྱན་གྱི་ཞལ་ནས༔ ཡེ་ཤེས་མཚོ་རྒྱལ་རྨི་ལམ་ཤིན་ཏུ་བཟང་སྟེ༔ ངས་འགྲོ་བ་ཡོངས་ལ་ཐུགས་རྗེས་གཟིགས་ནས༔ ཁྱོད་གྲོགས་བྱེད་པའི་སྐབས༔ དེ་རིང་ནས་བསམ་ཡས་ཕོ་བྲང་ནས་སོང་སྟེ་གཏོར་མ་བྱ་བའི་རྫས་ཁྱེར་ཤོག༔ ཟེར་རམ་ཡོང་མི་ཡོང་སྟེ༔ ལར་གཅིག་སོང་གསུངས༔ ཡེ་ཤེས་མཚོ་རྒྱལ་སོང་ནས༔ གཞལ་ཡས་ཁང་རྩར་ཐོན་པ༔ སྟག་ར་ཀླུ་གོང་གཞལ་ཡས་ཁང་སྟེང་ན་ཡོད་འདུག༔ བདག་གི་ཁྱིམ་དུ་འགྲོ་བསམ་བུད་མེད་འདྲེ་མོའི་རྩར་མི་འགྲོ་བསམ༔ སྒོ་ན་བོས་ཏེ་གཅིག་ལྟ་སོང་༔ དེ་སྐབས་སློབ་དཔོན་གྱི་ གཏོར་མ་བྱ་ཀ་རྣམས་རྒྱལ་པོ་ཁྱེར་ཤོག་གསུངས༔ དེ་མིན་ཅི་ཡང་མ་ལྟ་བ་དེ་ཁ་ལང་བདག་འདུག༔ རྒྱལ་པོ་ཁྱེར་གསུངས་ནས༔ བཙུན་མོ་ལ་དབང་མ་ཡོད༔ སྟག་ར་ཀླུ་གོང་གི་འདི་སྨྲས་པ༔ དགེ་སློང་རི་ཁྲོད་འགྲིམ་པ་འདི་ལ་བྱ་ཀ་ཅི་ལ་ཁྱེར༔ བྱ་ཀ་བྱེད་ནས་ངེད་དབོན་པོ་འབོད་འགྲོ་བ་དེ་བྱ་སྨྲས༔ ཡེ་ཤེས་མཚོ་རྒྱལ་ལ་སྒོ་དྲུང་ནས་དུག་ཡོང་སྟེ༔ མ་འཐུང་ལ་འདི་གསུངས༔ ཁོ་མོ་སྤྲང་ལུང་ལྟ་བུ་ཅུང་མིན་པ༔ འདྲེ་མོ་དམར་རྒྱན་སྐྲ་ཁུ་ངས་མི་འཐུང་༔ དུག་ནག་ཟས་ཀྱི་ཞེ་སྡང་ངས་མི་ཟ༔ སྲིན་མོ་དམར་རྒྱན་འདི་པའི་འདིར་བཞག་ནས༔ རྒྱལ་པོ་ཕུང་པ་མིན་པའི་ཡོང་པ་མེད༔ རྒྱལ་པོ་ཁྲི་སྲོང་ལྡེའུ་བཙན་ཁྱེད༔ བསམ་ཡས་གཙུག་ལག་འགྲུབ་པ་པདྨའི་དྲིན༔ རྒྱལ་པོའི་བར་ཆད་བསལ་བ་པདྨའི་དྲིན༔ མ་འོངས་དོན་དུ་ལྷུན་པོ་འདི་བཀོད་དེ༔ བུད་མེད་སྲིན་མོའི་འདྲེ་ཟས་ངས་མི་ཟ༔ ནུབ་ཀྱི་རིང་ལ་འགྲོ་བའི་སྲོག་ལ་འབགས༔ ཨུ་རྒྱན་པདྨའི་མཐུ་སྟོབས་ཡིན་པའི་དུས༔ དེ་མིན་རྒྱལ་པོ་ཚེ་ལ་ཁྱོད་གེགས་བྱེད༔ བུད་མེད་འདྲེ་མོ་འདི་བསྐོར་ན༔ འདི་ཕྱི་གང་ལ་བདེ་མི་འགྱུར༔ རྒྱལ་པོ་འབངས་འདི་འདྲེ་མོར་ཤོར༔ ཤོར་བ་ཙམ་གྱིས་ངན་སོང་ལྟུང་༔ འཆིངས་ཕུག་པདྨའི་བཞུགས་ན་ཡང་༔ རྒྱལ་པོ་བར་ཆད་མང་པོ་བསལ༔ འདྲེ་སྲིན་ཁ་ལ་ཉན་རག་ནས༔ རྒྱལ་པོ་ཚེ་ཡི་རིང་མི་སྐྱོལ༔ བུད་མེད་འདྲེ་མོ་དམར་རྒྱན་མ༔ གློ་ཟ་རྒྱུད་པའི་ཁྱོད་སྲིན་མོ༔ ཁྱོད་དང་ང་གཉིས་འདྲ་བ་མེད༔ ཁྱེད་ཀྱིས་འདྲེ་མོའི་ཐན་སྐད་སྨྲས༔ བདག་གི་དུས་གསུམ་བཀའ་འཚོ་བ༔ ཁྱེད་ཀྱིས་མི་ཡི་ལུས་སྲོག་བཅད༔ ཁོ་མོ་མི་ཡིས་ལུས་སྲོག་ཕྱུག༔ ཁྱོད་ཀྱིས་སངས་རྒྱས་སྐུར་བ་བཏབ༔ ཁོ་མོས་དཀོན་མཆོག་བསྟན་བཟང་འཛིན༔ ཁྱེད་ཀྱིས་རྒྱལ་པོ་དབང་མེད་བྱེད༔ བདག་གིས་སློབ་དཔོན་བཀའ་བགྱིའོ༔ ཁྱོད་ཀྱིས་མི་ལ་ཆེན་གཏམ་བྱེད༔ ཁོ་མོ་མཁའ་འགྲོ་ཀུན་ལ་མོས༔ ཁྱོད་ཀྱིས་ཤ་ཁྲག་ཟས་ལ་རྔམ༔ ཁོ་མོས་ཤ་ཁྲག་སྤངས་བྱས་ནས༔ རྒྱལ་བའི་ཆོས་ཀྱི་བསྟན་པ་བཟུང༔ ཁྱོད་ཀྱིས་ཉིན་བསམ་དུག་ལྔ་བསམ༔ ཁོ་མོས་ཉིན་སྒོམ་རང་རིག་འཚོས༔ ཁྱོད་ཀྱིས་མ་འོངས་སྲོག་གཅོད་འབྱུང་༔ ཁོ་མོ་མ་འོངས་འགྲོ་དོན་བྱེད༔ ཁྱོད་ནི་སྲིན་པོ་གདོང་དམར་མ༔ ཁོ་མོ་མཁའ་འགྲོ་དུང་ལྡན་མ༔ ཁྱོད་ནི་གཏམ་སྐལ་ཞེ་སྡང་སྨྲས༔ ཁོ་མོ་དམ་པའི་ཆོས་སྨྲ་བ༔ ཁྱོད་ཀྱི་མིང་པོ་སྟག་ར་བཅས༔ ཕྱི་མ་འགྲོ་ལ་གདུག་པ་ཡོང་༔ བདག་གི་མིང་པོ་དཔལ་དབང་ཕྱུག༔ མ་འོངས་འགྲོ་བའི་དོན་ཡོང་ངོ་༔ ཁྱོད་ལ་བཙུན་མོ་དམར་རྒྱན་མིང་༔ ཁོ་མོ་ཡེ་ཤེས་མཚོ་རྒྱལ་ཞེས༔ རྒྱལ་པོར་དབང་མེད་བཙུན་མོ་ཁྱོད་ཀྱི་དབང་༔ སྲིན་མོ་མངོན་རྒྱུག་ཁྱོད་དང་ང་མི་འགྲན༔ ཆེ་འདོད་གཙོ་བོ་ཁྱེད་དང་ང་མི་འགྲན༔ མཆོར་འདོད་བག་མ་ཁྱེད་དང་ང་མི་འགྲན༔ ཨ་ལོང་མེ་ལོང་དཀར་ཐིག་བརྒྱན༔ ཁོ་མོ་བདག་གིས་ཇོ་མོ་བྱེད༔ ཟ་འདོད་སྲིན་མོ་ཁྱོད་དང་ང་མི་འགྲན༔ ཁྱོད་ཀྱི་སྒོ་དྲུང་ང་ཡོང་བ༔ ཁོ་མོ་ཐོན་པའི་ཡོང་མི་སྲིད༔ རྫུས་སྐྱེས་པདྨའི་བཀའ་གནང་བ༔ མཁར་ཟ་བདག་གི་འགྲོ་དོན་ཡིན༔ ཁྱད་པར་མུན་པའི་གླིང་འདས་དགོངས༔ རློམ་པ་ཐམས་ཅད་དམར་རྒྱན་ཆེ༔ ཁོ་མོ་མཁའ་འགྲོ་མང་པོས་བསྐོར༔ དམར་རྒྱན་འདྲེ་རིགས་སྟོང་གིས་བསྐོར༔ ཁྱོད་དང་མཚོ་རྒྱལ་ང་མི་འདྲ༔ བདག་གི་དབུ་སྐྲར་མཁའ་འགྲོ་རེ༔ ཁྱོད་ཀྱི་སྐྲ་ལ་སྲིན་མོ་རེའི༔ ཁྲག་གི་ཐིག་ལེ་མདོ་ཙམ་འདུག༔ ཡ་མཆུ་མ་མཆུ་དམར་བརྒྱན་འདྲེ༔ འདི་ཕྱི་བདེ་བ་མེད་པ་བྱེད༔ བསམ་ཡས་གཙུག་ལག་ཁང་ནང་དུ༔ བཙུན་མོ་དམར་བརྒྱན་འདི་བཞག་ན༔ ལས་ཀྱི་རྣམ་སྨིན་བདེ་མི་འགྱུར༔ ཁོ་མོ་བདག་ནི་ཕྱིར་དུ་འགྲོ༔ ཐན་ཟས་མནའ་སྡིག་ཟས་མི་ཟ༔ རྒྱལ་པོ་དབང་མེད་བཙུན་མོ་དབང་ཤོར་བ༔ འདི་ཕྱི་བདེ་བ་མེད་པར་འགྱུར༔ ཞེས་གསུངས༔ བུད་མེད་དམར་བརྒྱན་ངོ་ལ་ཁྲག་གིས་ཐིག་ལེ་བྱས་པ༔ བདག་གིས་འདི་འདྲ་སྨྲས་ནས༔ ཕྱིར་དུ་ཡོང་བ་ཨུ་རྒྱན་མདུན་ནས་ཡོང་པ༔ རྒྱལ་པོ་དབང་མེད་པ་དམར་བརྒྱན་གྱིས་དབང་གཏོར་མ་སྦྱིན་པ་མ་ཉན་པ༔ འདྲེ་མོ་དང་ང་གཉིས་ཁ་འཁྲོག་ཡོང་པ༔ ཅི་ལ་ཡང་མེད་པ་ང་ལ་དུག་གི་ཟ་མ་སྦྱིན་ཡོང་པ་བདག་གིས་མ་ཟོས་པ༔ ཨུ་རྒྱན་གྱི་ཞལ་ནས༔ ལར་བུད་མེད་འདྲེ་མོ་འདི་རྣམས་གཏམ་སྐལ་སྡིག་ལ་དད་པ༔ འདི་སོ་གཏོར་མ་བཏང་བ་མ་སྟེར་ན་ལུས་ཤ་ཁྲག་ཡིན་པ༔ ཕྱིའི་རི་བོ་ཐམས་ཅད་གཏོར་མ༔ ནང་གི་རྩ་ཁྲག་དང་དོན་སྙིང་རྣམས་གཏོར་མ༔ ཕྱིའི་དབང་པོ་རྣམ་ལྔ་གཏོར་མ་ཡིན༔ གཏོར་མ་ལ་ཤེས་པ་གསུམ་ཡོད་པ༔ དང་པོ་རང་ལུས་བསྐྱེད་པར་ཤེས་པ༔ བར་དུ་ལྷ་ལ་ཤེས་ནས་བསྐྱེད་པ་ཐ་མ་དབང་པོ་རྣམ་ལྔ་ཤེས་པ༔ དང་པོ་ལྷ་ལ་ཤེས་པ༔ མཆོད་རྫས་ལ་ཤེས་པ༔ འཕེན་པའི་དུས་མཚོན་ཆ་ལ་ཤེས་པ༔ ཟོར་འཕེན་པའི་དུས་སུ་ཁྲོ་བོ༔ ཁྲོ་མོ་ལ་ཤེས་པ་དེ་སྐབས་བྱས༔ བུད་མེད་དམར་བརྒྱན་གྱི་སྟེང་ན་བྱ་བའི་སྐབས་མ་མཆིས༔ ཁྱོད་དང་བཟའ་བཏུང་མ་བྱེད་པ་བཟང་༔ དེང་ནས་བཟའ་བཏུང་བྱེད་གསུངས༔ བཟའ་བུ་རམ་བཟའ་བ་ཟུང་འཇུག་ཏུ་བྱས་ནས༔ ཡབ་ཡུམ་ཟས་གསོལ་མི་དགོས་པའི་དུས་མཆིས༔ དང་པོ་རང་ལུས་ལྷ་བསྐྱེད་པ༔ ཐ་མ་རིག་པའི་ངོ་བོ་དྲན་པ་ཙམ་གྱིས་གནོད་བྱེད་དབང་དུ་འདུ་བ༔ རྫོགས་པ་ཙམ་གྱིས་ཚར་གཅོད་པ༔ སྐད་ཅིག་དྲན་རྫོགས་ངང་ནས་དེ་ལྟར་བྱེད༔ ལུས་ལྷ་ལ་ཤེས་པ༔ ངག་སྔགས་ལ་ཤེས་པ༔ ཡིད་ཏིང་ངེ་འཛིན་ཤེས་པ༔ བ་སྤུ་ཁྲོ་བོ་ཁྲོ་མོ་ཤེས་པ༔ རྩ་ཐམས་ཅད་མཚོན་ཆ་ལ་ཤེས་པ༔ རླུང་ཐམས་ཅད་མེ་རི་ལ་ཤེས་པ༔ ཐིག་ལེ་དཀར་ཆ་ཐམས་ཅད་གནམ་ལྕགས་ར་གུར་ལ་ཤེས་པ༔ གནམ་ས་ཁ་བཟློག་ཏུ་བྱེད་པ༔ བར་སྣང་དུ་གུར་ཕུབ་པ༔ ས་གཞི་སྔར་བསྐྱེད་པ༔ ནམ་མཁའ་ལ་ངར་བླུད་པ༔ དྲན་པ་རང་རྒྱལ་གྱི་ཐོག་ཏུ་དགྲ་བཅོམ་པ་དེ་དང་མཐུན་པ་གཙོ་བར་བྱའོ༔ མཁར་ཆུ་ཟ་མི་བརྗེད་པ་དེ་དང་ཉམས་སུ་ལོངས༔ ཞེས་གསུངས༔ ཨུ་རྒྱན་རིན་པོ་ཆེ་ལགས༔ འགྲོ་བ་ཡོངས་ལ་བཀའ་དྲིན་ཆེ༔ ཨེ་མ་ཧོ༔ ཀྱེ་ཀྱེ་སངས་རྒྱས་ཐམས་ཅད་འདུས་པའི་སྐུ༔ འགྲོ་བ་ཀུན་ལ་གཉེན་གཅིག་པོ༔ མགོན་མེད་འགྲོ་བ་སེམས་ཅན་ཀུན༔ ཁོ་མོའི་མགོན་ནི་པདྨ་འབྱུང་༔ མགོན་མེད་འགྲོ་ལ་ཐུགས་རྗེས་ཟུངས༔ ཁོ་མོ་བདག་ལ་བྱིན་གྱིས་རློབས༔ བླ་མ་དུས་གསུམ་སངས་རྒྱས་སྐུ༔ འགྲོ་ལ་རེ་ས་གཞན་ན་མེད༔ སྡུག་བསྔལ་གནས་ནས་རབ་ཏུ་དྲངས༔ ཁོ་མོ་སྐྱིད་སྡུག་ཁྱོད་ལ་ལྟ༔ རྫུས་སྐྱེས་ཨུ་རྒྱན་པདྨ་འབྱུང་༔ ཁྱོད་ལ་བདག་ལུས་བྲན་དུ་འབུལ༔ ཁོ་མོ་བདག་ལ་ཐུགས་རྗེས་ཟུངས༔ འགྲོ་བའི་རེ་ས་སྐྱབས་མཆིས་མེད༔ རྫུས་སྐྱེས་ཁྱེད་ཀྱིས་ཐུགས་རྗེས་ཟུངས༔ བླ་མ་སྐུ་ཡི་བྱིན་རླབས་ཆེ༔ བྱིན་རླབས་ཆེ་བས་ཁོ་མོ་ལུས་ལ་ཐིམ༔ ལུས་ལ་ཐིམ་ཙམ་ཁོ་མོ་བརྩོན་འགྲུས་ཆེ༔ བླ་མའི་གསུང་གི་བྱིན་རླབས་ཆེ༔ ཁོ་མོ་བདག་གི་ངག་ལ་ཐིམ༔ ངག་ལ་ཐིམ་ཙམ་ཤེས་རབ་ཆེ༔ སྒྲ་བསྒྱུར་མཆོག་གི་ཆོས་ལ་མཁས༔ བླ་མའི་ཐུགས་ནི་བྱིན་རླབས་ཆེ༔ ཁོ་མོ་བདག་གི་ཡིད་ལ་ཐིམ༔ ཡིད་ལ་ཐིམ་ཙམ་མི་བརྗེད་ཐོབ༔ བླ་མའི་མཐུ་སྟོབས་ཡོན་ཏན་ཆེ༔ ཡོན་ཏན་བདག་གི་ལུས་ལ་ཐིམ༔ ལུས་ལ་ཐིམ་ཙམ་ཡོན་ཏན་ཆེ༔ བླ་མའི་འཕྲིན་ལས་སྐར་ཚོགས་འདྲ༔ ཁོ་མོའི་ལུས་ངག་ཀུན་ལ་ཐིམ༔ ཐིམ་ཙམ་མཁའ་འགྲོ་གྲངས་མེད་འགྱེད༔ གྲངས་མེད་འགྲོ་བའི་དོན་ལ་དགོངས༔ བླ་མའི་སྤྱི་བོར་བྱང་ཆུབ་སེམས༔ ཁོ་མོ་བདག་གི་གསང་བར་ཐིམ༔ འཚེ་བ་མེད་པར་བྱིན་གྱིས་རློབས༔ རྒྱུན་ཆད་མེད་པའི་དངོས་གྲུབ་ཐོབ༔ ཐོག་མཐའ་མེད་པའི་ཐུགས་རྗེས་གཟིགས༔ ཁོ་མོ་སྐུ་མདོག་མཚན་ལྡན་དུང་དང་ལྡན༔ འདིའི་སྐུ་མདོག་དུང་མདོག་ར་གའི་མདོག༔ བདག་གི་བླ་མ་ངོ་མཚར་སྤྲུལ་པའི་མཆོག༔ རྒྱ་གར་ཡུལ་དུ་སྐུ་འཁྲུངས་ཐོས་བསམ་བསྒོམ༔ བོད་ཡུལ་དུས་འདིར་འགྲོ་ལ་ཐུགས་རྗེས་གཟིགས༔ ཨུ་རྒྱན་ཡུལ་དུ་འགྲོ་བའི་དོན་མཛད་པ༔ སྔགས་འཆང་པདྨའི་སྐུ་ལ་ཕྱག་འཚལ་བསྟོད༔ ངོ་མཚར་མཆོག་གི་རྫུས་སྐྱེས་པདྨ་འདི༔ བཙལ་ལ་མི་དགོས་ཁོ་མོ་བདག་གིས་རྙེད༔ རྙེད་པ་ཙམ་གྱིས་མ་འོངས་འགྲོ་བའི་དོན༔ བོད་ཁམས་ས་འདིར་ཕེབས་པ་འགྲོ་བའི་དོན༔ མཁར་ཆུ་ལས་ཅན་འདྲ་བ་ཡོད་པ་མེད༔ ཁོ་མོ་མཚོ་རྒྱལ་འདྲ་བ་ལས་རེ་ཆེ༔ རྫུས་སྐྱེས་འདི་འདྲ་རྙེད་པ་ག་ལ་འབྱུང་༔ མཁར་ཆུ་སྲས་མོ་རྣམས་ཀྱི་ཁྱིམ་པ་མོས༔ མོས་པ་ཙམ་གྱིས་ངན་སོང་གནས་སུ་ལྟུང་༔ ཁོ་མོ་ང་འདྲ་འགྲོ་བའི་དོན་ཡོང་ངོ་༔ རྒྱ་གར་གྲུབ་ཆེན་འདི་འདྲ་ཕེབས་པ་ཙམ༔ མཐའ་འཁོབ་སྲིན་པོ་ལས་ཅན་འདུག༔ ཁོ་མོ་མཚོ་རྒྱལ་ང་འདྲ་ལས་ཅན་ཆེ༔ འདི་འདྲ་དུས་གསུམ་བཙལ་ལ་ཡོད་པ་མེད༔ ཁོ་མོ་ང་འདྲ་རྙེད་པ་ལས་སྔོན་ཆེ༔ སྣང་བ་རྫུན་འདུག་ཆེ་བ་མ་རེད་དམ༔ ཁོ་མོ་བསོད་ནམས་ཆུང་བ་མ་རེད་དམ༔ ཁོ་མོ་ལས་ཅན་འགྲོ་བའི་དོན་ཡོང་བ༔ ལན་གཅིག་རྟོགས་པའི་བསྐལ་པ་མཐའ་མ་སྐྱིད༔ ཤིན་ཏུ་ཉོན་མོངས་ཚ་གདུང་རབ་བསལ་ལོ༔ ཁོ་མོ་སྣང་བ་བདེན་པའི་འདི་འདྲ་རྙེད༔ འདི་འདྲ་རྙེད་པའི་པདྨའི་སྐུ་ལ་བསྟོད༔ གཞན་ཚོའི་བུད་མེད་ཟང་ཟིང་ནོར་ཡོད་ན༔ འགྲོ་བ་ཡོངས་ཀྱིས་བསོད་ནམས་ཆེ་ཟེར་བ༔ འདི་ཕྱི་མེད་པའི་བསོད་ནམས་ག་ལ་ཆེ༔ གཟུགས་ཡག་སྣང་བའི་ལས་ལ་ཐོན་ཙམ་ན༔ བསོད་ནམས་ཆེ་བ་འདི་ཕྱི་ཡོད་བསམ་སྟེ༔ འདི་ཕྱི་གང་ལ་བདེ་བ་སྐད་ཅིག་མེད༔ ཁོ་མོ་སྐད་ཅིག་ཁོ་མོ་བསྒོམ་པ་བྱེ་བ་རྫོགས་སངས་རྒྱས༔ ཁོ་མོ་པདྨ་སམ་བྷའི་བཀའ་སྒྲུབ་པ༔ འདི་ཕྱི་བདེ་བའི་སྐབས་ལ་འདི་ཡོང་ངོ་༔ ཁོ་མོ་ལས་དབང་ཆེ་བའི་རྗེ་དང་མཇལ༔ ཁོ་མོ་ཤིང་བྱའི་ལོ་ལ་སྐྱེས་པའི་དུས༔ སྐྱེས་པ་ཙམ་གྱིས་ཁོ་མོ་ལུས་མ་མཆིས༔ མེ་མོ་བྱ་ཡི་ལོ་ལ་རྗེ་དང་མཇལ༔ མཇལ་བ་ཙམ་གྱིས་བདག་གི་དོན་མ་མཆིས༔ བཅུ་དྲུག་རང་ལུས་ཆུང་བ་དེ༔ ཆུང་བ་ཙམ་གྱིས་ཁོ་མོ་པག་མ་བསད༔ དོན་མ་མཆིས་པའི་སྐབས་མ་མཆིས༔ རྫུས་སྐྱེས་པདྨའི་སྐུ་ལ་ཕྱག་འཚལ་བསྟོད༔ མ་བཅོས་སྤྲོས་དང་བྲལ་བ་རིན་པོ་ཆེ༔ བདེ་ཆེན་འབྲལ་བ་མེད་པ་རིན་པོ་ཆེ༔ ལས་འཕྲོ་ཁོ་མོ་དོན་དུ་རབ་དགོངས་པ༔ སྐུ་གསུམ་ཕྱི་ནང་གསང་གསུམ་བསྟན་པ་བཟུང་༔ གྲུབ་ཆེན་སྔགས་འཆང་པདྨའི་སྐུ་ལ་བསྟོད༔ ཁོ་མོའི་གྲོགས་པོ་མཚན་ལྡན་ཟླ་མཛེས་ནི༔ མེ་ཏོག་བཀོད་པའི་རབ་དྲུང་སྐུ་ལ་བསྟོད༔ ཅེས་བསྟོད་པ་ཕུལ༔

ཨུ་རྒྱན་གྱི་ཞལ་ནས་ཨང་ཁོ་མོ་བརྩོན་འགྲུས་རབ་ཆེ་བ་འདི་འདྲ་བ་བསམ་ནས་ཤིན་ཏུ་བཞད་པ༔ མཁའ་ལྟར་མཉམ་པའི་བྱང་ཆུབ་ཐུགས་མངའ་བ༔ འདི་འདྲ་མཐོང་ལམ་རྟོགས་པའི་མཁར་ཆུ་ཟ༔ གནས་མེད་ཀ་དག་ཆོས་ཀྱི་ཕོ་བྲང་ནས༔ རྒྱལ་བ་ཆོས་སྐུ་ཀུན་ཏུ་བཟང་པོ་ང་༔ སྐྱེ་མེད་ཆོས་དབྱིངས་ཀུན་ཏུ་བཟང་མོ་ཁྱོད༔ སྟོང་གསལ་འགྲོ་དོན་བྱེད་ལ་ཕྱག་འཚལ་བསྟོད༔ བར་དུ་དབྱིངས་མེད་བདེར་གཤེགས་འོད་དཔག་མེད༔ བཀའ་བབ་དམ་ཆོས་ཆོས་སྐུ་མ་ཆེན་མོ༔ རྒྱལ་བ་མ་མོའི་སྐུ་ལ་ཕྱག་འཚལ་བསྟོད༔ མཐའ་མ་དགེ་སློང་ལས་རབ་ཀུན་དགའ་མོ༔ རྫུས་སྐྱེས་དབང་ཞུ་འགྲོ་བ་འདྲེན་ལ་བསྟོད༔ དེ་སྐབས་མ་གཅིག་ལས་རབ་སྒྲོལ་མ་ཞེས༔ གྲུབ་ཐོབ་སྤྲུལ་པ་གྲོགས་བྱེད་དམ་པ་ཞེས༔ འགྲོ་བ་འདྲེན་མཛད་སྐུ་ལ་ཕྱག་འཚལ་བསྟོད༔ མ་རྒྱུད་ཡུམ་ཆེན་གཉིས་མེད་ཕ་རོལ་ཕྱིན༔ མ་ཆེན་བརྒྱུད་པའི་སྐུ་ལ་ཕྱག་འཚལ་བསྟོད༔ ང་ཉིད་རྒྱལ་བ་ཐུབ་པའི་ཕ་རྒྱུད་བཅས༔ དར་མ་མདོ་ཡི་རྒྱུད་པ་སྲས་རྒྱུད་བཅས༔ པདྨ་ང་ཡི་རྒྱུད་པ་གཏེར་རྒྱུད་བཅས༔ གྲུབ་ཐོབ་གཏེར་རྒྱུད་རྣམས་ལ་ཕྱག་འཚལ་བསྟོད༔ པདྨ་ང་ཉིད་འཇིག་རྟེན་དབང་ཕྱུག་ནི༔ ཉི་སྒྲོན་ཟླ་སྒྲོན་གྲོགས་བྱེད་འགྲོ་དོན་བྱེད༔ རྒྱལ་བའི་དགོངས་འདུས་མཐར་ཕྱིན་རྣམས་ལ་བསྟོད༔ ང་ཉིད་དབང་དྲག་སྐུར་བཞེངས་རབ་མང་པོ༔ མ་གཅིག་ཡུམ་ཆེན་ཕག་མོ་གྲུབ་པའི་དངོས་གྲུབ་བྱས༔ ཡབ་ཡུམ་གཉིས་མེད་སྐུ་ལ་ཕྱག་འཚལ་བསྟོད༔ རྒྱ་གར་སྔགས་འཆང་རིག་འཛིན་རྣམ་པ་བརྒྱད༔ དགའ་རབ་ཤྲཱྀ་སེང་འཇམ་དཔལ་ལ་སོགས་པ༔ ཧཱུཾ་ཆེན་བྷི་མ་བྷོ་དྷི་ས་ཏྭ་དང་༔ པདྨ་མཁའ་མཉམ་གྲུབ་ཆེན་རྣམ་པ་བརྒྱད༔ བོད་ཀྱི་ཡུལ་གྱི་ཐུགས་རྗེ་སྤྲོས་བྲལ་བ༔ ཐུགས་རྗེའི་གདུལ་བྱ་བོད་ཀྱི་ཞིང་ཁམས་སུ༔ སྒྲ་བསྒྱུར་རིག་འཛིན་མཆོག་གི་སྐུ་ལ་བསྟོད༔ དབྱིངས་ཅན་ཐབས་འདུལ་སྤྲུལ་པའི་མཁར་ཆུ་ཟ༔ འགྲོ་ལ་བརྩེ་དགོངས་རྫུས་སྐྱེས་པདྨ་ང༔ འདུ་འབྲལ་མེད་པའི་འགྲོ་དོན་སྐུ་ལ་བསྟོད༔ རང་བྱུང་མཚོ་སྐྱེས་རྡོ་རྗེའི་སྐུ་ལ་བསྟོད༔ མཐར་ཆེན་ཐབས་ཀྱིས་ཡེ་ཤེས་མཚོ་རྒྱལ་དོན༔ འགྲོ་བའི་དོན་དུ་ཐུགས་རྗེས་གཟིགས་པར་ཤོག༔ ཅེས་གསུངས༔

མཁར་ཆེན་ཟ་ཁྱོད་ཉོན་དང་༔ ང་གང་འདུལ་དང་པོ་ཀུན་ཏུ་བཟང་༔ སངས་རྒྱས་སྟོང་ནང་ནས་པདྨ་མེ་ཏོག་ཕྲེང་བ་གཞོན་ནུ་དུང་ལྡན་མ༔ འོད་དཔག་མེད་ཐབས་འདུལ་བ༔ ང་སྤྲུལ་པ་འཁོར་ལོས་བསྒྱུར་བ་ཤཱཀྱ་ཐུབ་པ༔ ཤ་རིའི་བུ་དེ་དང་ཆ་མཐུན་པའི་སྐྱེས་བུ་བློ་ལྡན་སྔགས་འཆང་ངའི་སྤྲུལ་པ་འགྲོ་ལ་ཁྱབ་པ༔ དེའི་དོན་ཐབས་འདུལ་བ་གང་སྟོན་པ་འདིའི་ལོ་བརྒྱ་དང་ལྔ་བཅུའི་མཐའ་ནས༔ ཐུབ་པའི་རིང་ཉན་ཐོས་ཚུལ་རྟ་ཐུལ༔ དེའི་སྤྲུལ་པ་མ་འོངས་དུས་ཀྱི་སྐྱེས་བུ་ང་དང་ཆ་མཚུངས་པ༔ ཐུབ་པའི་སྤྱན་སྔར་མེ་ཏོག་ཟླ་མཛེས་པདྨ་ངའི་བླ་མ༔ གཞོན་བུ་མིང་འབྱུང་བ་ཐུབ་པའི་བསྟན་པའི་དུས་འགྲོ་དོན་བྱས་སོ༔ ཁྱོད་ཇོ་མོ་མཁར་ཆུ་ཟ་མ་འོངས་དུས་སུ་འགྲོ་ལ་ཕན་པའི་ཐབས་བྱ༔ ཡེ་ཤེས་མཚོ་རྒྱལ་ཞུས་པ༔ ཀྱེ་སློབ་དཔོན་རིན་པོ་ཆེ་མ་འོངས་དེ་དང་དུས་མཚུངས་དུས་འགྲོ་བ་ཡོངས་ལ་ཕན་པའི་དུས་གནོད་ལགས༔

ༀ་ཨཱ་ཧཱུྃ༔ རྒྱ་མཚོ་འཁྲུངས་ཚུལ་དྲི་མེད་པདྨའི་ཁར༔ རྒྱལ་པོའི་སྤྱན་དྲངས་ཁམས་གསུམ་དབང་དུ་བསྡུས༔ སྲིད་གསུམ་ཟིལ་གནོན་རྒྱལ་ས་མང་བཅུད་པ༔ པདྨ་རྒྱལ་པོ་ཁྱོད་ལ་ཕྱག་འཚལ་བསྟོད༔ རྒྱ་གར་རྡོ་རྗེ་གདན་དུ་རབ་བྱུང་མཛད༔ ཀུན་དགའ་སྡོམ་ཚུལ་མིང་ནི་རབ་ཏུ་བརྒྱན༔ རྒྱལ་ས་རབ་སྤངས་ཆོས་གོས་ཤམ་ཐབས་ལྡན༔ དགེ་སློང་ཚུལ་འཛིན་ཤཱཀྱའི་མཐར་ཕྱིན་པ༔ ཤཱཀྱ་སེང་གེ་ཁྱེད་ལ་ཕྱག་འཚལ་བསྟོད༔ འགྲོ་བའི་དོན་ལ་གང་འདུལ་སྐུར་བཞེངས་པ༔ རབ་བྱུང་མཛད་ཚུལ་སེམས་ཅན་ཆོས་ལ་བཙུད༔ མཁའ་མཉམ་བདེ་སྦྱོར་མན་དྷ་ར་བ་བཞེད༔ པདྨ་སམ་བྷ་ཁྱེད་ལ་ཕྱག་འཚལ་བསྟོད༔ མུ་སྟེགས་སྲིན་པོ་བཏུལ་བའི་དངོས་གྲུབ་བརྙེས༔ སྙན་མཛད་པི་ཝང་སྒྲ་སྙན་ལྟ་བུས་ཁྱབ༔ གདུང་དམར་སྲིན་པོ་ཐམས་ཅད་ཆོས་ལ་བཙུད༔ རྡོ་རྗེ་ཁྲོ་བོ་ལོད་ལ་ཕྱག་འཚལ་བསྟོད༔ ཡངས་པའི་གནས་སུ་སོ་སོའི་མཐར་ཕྱིན་པ༔ ཐ་དད་མོས་པས་ཕྱོགས་འཛིན་ནམ་མཁའ་བརྡལ༔ པདྨ་ཐོད་འཕྲེང་རྩལ་ལ་ཕྱག་འཚལ་བསྟོད༔ ཁ་ཆེ་གནས་སུ་སེང་གེ་ལྟ་བུའི་ཐབས༔ བྱམས་སེམས་འགྲོ་བ་ཕ་མ་བུ་ལྟར་མཛད༔ བློ་ལྡན་མཆོག་སྲེད་སྐུ་ལ་ཕྱག་འཚལ་བསྟོད༔ ལི་ཡུལ་ལྗང་ར་སྨུག་པོའི་གནས་མཆོག་ནས༔ མངོན་ཤེས་མཁའ་ལ་ཁྱབ་པའི་འགྲོ་དོན་བྱེད༔ གཞན་གྱི་དོན་དུ་འབྲས་བུ་རབ་སྨིན་མཛད༔ ཉི་མའི་འོད་ཟེར་ཁྱོད་ལ་ཕྱག་འཚལ་བསྟོད༔ བལ་ཡུལ་ཡང་ལེ་བྲག་གི་གནས་མཆོག་ནས༔ ལྷ་སྲིན་སྡེ་བརྒྱད་ཐམས་ཅད་དམ་ལ་བཏགས༔ ཁམས་གསུམ་སྲིད་གསུམ་ཐམས་ཅད་དབང་དུ་བསྡུས༔ སེང་གེ་སྒྲ་སྒྲོགས་ཁྱེད་ལ་ཕྱག་འཚལ་བསྟོད༔ བོད་ཀྱི་ཡུལ་དབུས་སྟག་ཚང་སེང་ཡུལ་དུ༔ ཁ་བའི་ལ་ཐོག་བརྟན་མ་དམ་ལ་བཏགས༔ དངོས་སྤྲུལ་འོད་དཔག་མེད་པའི་ཚུལ་འཛིན་དུས༔ བདེ་བ་རིན་པོ་ཆེ་ལ་ཕྱག་འཚལ་བསྟོད༔ སྲིན་ཡུལ་བསམ་ཡས་གླིང་དུ་བྱོན་པའི་དུས༔ བོད་ཡུལ་འདྲེ་བགེགས་གདུག་རྩུབ་དམ་ལ་བཏགས༔ ཁམས་གསུམ་ཆེ་མཆོག་པདྨ་ཧེ་རུ་ཀ༔ འགྲོ་བའི་དོན་མཛད་མཆོག་གི་དངོས་གྲུབ་བརྙེས༔ དབང་དྲག་ཧེ་རུ་ཀ་ལ་ཕྱག་འཚལ་བསྟོད༔ འཕྲིན་ལས་བཞི་མཛད་རྡོ་རྗེ་དྲག་རྩལ་བཞི༔ ཁམས་གསུམ་དབང་སྡུད་སྲིད་གསུམ་ཟིལ་གྱིས་གནོན༔ ཕྲིན་ལས་རིགས་བཞི་སྐུ་ལ་ཕྱག་འཚལ་བསྟོད༔ འཆིངས་ཕུག་གནས་བྱོན་བྲེ་ཀུ་གཙུག་ལག་ཏུ༔ ཡབ་ཡུམ་གཉིས་མེད་བདེ་བའི་དངོས་གྲུབ་བརྙེས༔ འགྲོ་བའི་དོན་དུ་རང་བྱུང་ཆོས་ཀྱི་སྐུ༔ སྦྱོར་སྒྲོལ་མཆོག་གིས་ཐབས་ཤེས་གང་འདུལ་བ༔ སྔགས་འཆང་ཚུལ་གྱིས་འགྲོ་བའི་དོན་མཛད་པ༔ སྔགས་འཆང་ཧེ་རུ་ཀ་ལ་ཕྱག་འཚལ་བསྟོད༔ ཁོ་མོ་བདག་ལ་ཐུགས་རྗེའི་མ་ཆུང་ཞིག༔ སྐུ་སྤྲུལ་ལྷ་སྲིན་འདུལ་ཐབས་ཕྲག་བརྒྱ་འགྱེད༔ གསུང་སྤྲུལ་འགྲོ་བའི་དོན་མཛད་ཕྲག་བརྒྱ་འགྱེད༔ ཐུགས་སྤྲུལ་གྲངས་མེད་འགྱེད་པའི་མཐུ་སྟོབས་ཆེ༔ སྔགས་འཆང་སྤྲུལ་པ་ཅན་ལ་ཕྱག་འཚལ་བསྟོད༔ མ་རུང་ལོག་ལྟ་སྣོད་མེད་ཆོས་ལ་བཙུད༔ ལྷ་སྲིན་སྡེ་བརྒྱད་ཐམས་ཅད་དམ་ལ་བཏགས༔ དགྲ་བགེགས་བསྟན་དགྲ་ལུས་སེམས་ཐལ་བར་བརློགས༔ རྩལ་ཆེན་དགྲ་འདུལ་ཅན་ལ་ཕྱག་འཚལ་བསྟོད༔ འགྲོ་བའི་དོན་དུ་རང་བྱུང་འོད་དཔག་མེད༔ བཀྲ་ཤིས་ཡེ་ཤེས་ཚོགས་ཀྱི་སྤྱན་རས་གཟིགས༔ དངོས་གྲུབ་ཆེན་པོ་འབྱུང་བའི་པདྨ་འབྱུང་༔ དུས་གསུམ་སངས་རྒྱས་ཁྱེད་ལ་ཕྱག་འཚལ་བསྟོད༔ ཁོ་མོ་ཆོས་གཅིག་བྱེད་བསམ་ལས་ཀྱི་ཤུགས༔ རྫུས་སྐྱེས་པདྨའི་བདག་ལ་ཆོས་གཅིག་གསུངས༔ ཁོ་མོ་ལུས་ནི་རབ་ཆུང་གཙུག་ལག་ཏུ༔ རྫུས་སྐྱེས་པདྨ་མཇལ་བའི་དོན་མ་མཆིས༔ བྱའི་ལོ་ལ་སྐུ་གསུམ་ཁྱེད་དང་མཇལ༔ ཕག་གི་ལོ་འདིར་ཁོ་མོ་བཅུ་དྲུག་དུས༔ པདྨ་ཁྱེད་དང་མཇལ་བ་ལོ་གསུམ་འདུག༔ ཁོ་མོ་བདག་ལ་དམ་པའི་ཆོས་ཤིག་གནོངས༔ དཀའ་བ་བརྩོན་འགྲུས་ཐུབ་ན་ཁོ་མོ་ཡིས༔ མ་ཐུབ་ཙམ་གྱིས་མ་འོངས་ལས་ངན་རིགས༔ ཁོ་མོ་རང་ལུས་བཅུ་དྲུག་རིག་པ་ཆེ༔ ཨུ་རྒྱན་པདྨ་འབྱུང་གནས་མཐུ་སྟོབས་ཆེ༔ ཁོ་མོ་བདག་གི་ལུས་འདི་སྙིང་རུས་ཆེ༔ ཁོ་མོ་རིག་པ་ཤེས་རབ་མེ་འབར་ཆེ༔ ད་ལོ་ཁོ་མོ་ཆུང་བའི་ཆོས་གཅིག་བྱས༔ དྲང་དོན་ཕྱི་མ་འགྲོ་བའི་ཆོས་གཅིག་བྱས༔ མ་འོངས་ལས་ཅན་གྲོལ་བའི་ཐབས་ཤེས་བསྒོམ༔ ངེས་དོན་སློབ་གཉེར་བདག་གིས་དམ་ཆོས་བྱེད༔ མ་འོངས་སེམས་ཅན་ཐམས་ཅད་དོན་ཡིན་ཏེ༔ ལས་ཅན་གྲོལ་བའི་ཐབས་ཀྱིས་བརྡ་ཡིག་ཕབ༔ མ་འོངས་བུ་རྣམས་དོན་དུ་སྔགས་རིམ་བསླབ༔ སྐད་ཅིག་དྲན་རྫོགས་ཙམ་གྱིས་སྔགས་སྦྱངས་བ༔ རྩལ་ཆེན་མདའ་འཕང་ལྟ་བུ་རིག་པ་བསྐྱེད༔ སྔགས་འཆང་སྔགས་དང་ལྡན་པའི་སྔགས་མཛོད་ཅིག༔ ཁོ་མོ་ནན་ཏན་ཆེ་བ་འགྲོ་བའི་དོན༔ རྫུས་སྐྱེས་པདྨའི་ཐུགས་ཀྱིས་ཁྲེལ་མ་གནང་༔ ཁོ་མོ་བསྐྱེད་རིམ་བསླབ་པའི་ཐབས་མཁས་མེད༔ མ་འོངས་འགྲོ་བའི་བུ་རྣམས་དོན་བསམ་ཡིན༔ ཁོ་མོ་སྒོམ་པ་མི་དགོས་ཁྱེད་ཀྱི་དྲིན༔ བདག་གིས་སྒོམ་པ་ཙམ་གྱིས་བུ་རྣམས་དོན༔ ཁོ་མོ་དམ་ཆོས་སློབ་གཉེར་མི་དགོས་ཏེ༔ སློབ་གཉེར་བྱེད་པ་ཙམ་གྱིས་མ་འོངས་དོན༔ གངས་སྟོད་སེང་གེའི་གཡུ་རལ་བརྒྱན༔ སེང་གེ་གཡུ་རལ་རྒྱས་པའི་རྩལ་དྲག་ཆེ༔ བྲག་སྟོད་བྱ་རྒྱལ་གཤོག་པ་འཕུར་འདྲ་ན༔ གཤོག་པ་རྒྱས་ནས་འཕུར་སྟོབས་ཆེ༔ ནགས་སྟོད་སྟག་མོ་སྡེར་མོས་བརྒྱན༔ སྡེར་མོ་ཡོད་པས་མཆོང་རྩལ་ཆེ༔ སྔགས་འཆང་པད་ཞུ་དབུ་ཡི་རྒྱན༔ ཁོ་མོ་ཞུ་བ་བུ་ཡོད་སློབ་དཔོན་མཛད༔ མཛད་པ་ཙམ་གྱིས་འགྲོ་བའི་དོན༔ ཁོ་མོ་བདག་གི་རྫུས་སྐྱེས་བརྒྱན༔ རྫུས་སྐྱེས་མི་མིན་འདྲེ་ཡུལ་འདི་ཕེབས་པ༔ ཁོ་མོ་བདག་གི་གྲོགས་བྱེད་དེ༔ སྔར་གྱི་ལས་རྣམས་ཁོ་མོ་བདག་གི་ལུས༔ འགྲོ་ལ་ཉི་མ་ཤར་བའི་བརྡ༔ ཉི་ཟེར་ལས་ཅན་རྣམས་ལ་ཕོག་པས་བརྡ༔ བྱིན་རླབས་སེམས་ཅན་རྣམས་ལ་འཇུག་པའི་བརྡ༔ མ་འོངས་ལས་ཅན་འགྲོ་བའི་དོན༔ རྫུས་སྐྱེས་བྱིན་རླབས་མ་ཆུང་ཞིག༔ རྫོགས་པ་དོན་གྱི་འབྲས་བུ་མཆོག་ཆེན་པོ༔ སྦྱོར་སྒྲོལ་དངོས་གཞི་འཇུག་པའི་པདྨ་འབྱུང་༔ སྟོང་གསལ་ཀ་དག་ཁོ་མོ་མཚོ་རྒྱལ་ང་༔ ལས་ཅན་འགྲོ་བའི་དོན་དུ་པདྨའི་གསུངས༔ མ་འོངས་སེམས་ཅན་རྣམས་ལ་ཐུགས་རྗེས་ཟུངས༔ ཁོ་མོ་བདག་ལ་བྱིན་རླབས་མ་ཆུང་ཞིག༔ ཁོ་མོ་བདག་གི་རེ་ས་པདྨ་འབྱུང་༔ སྐྱབས་གནས་དཀོན་མཆོག་གསུམ་ལ་བགྱིས༔ འགྲོ་དོན་ལས་ལ་དོན་དུ་འཆང་༔ ཁོ་མོ་བསམ་ཞིང་ཡིད་ལ་འཆང་༔ དྲིན་ཅན་བླ་མའི་ཐུགས་རྗེས་ཟུངས༔ བདག་གི་རེ་ས་ཁྱེད་ལ་བགྱིས༔ ཁྱེད་ཀྱིས་ཐུགས་རྗེའི་མ་ཆུང་ཞིག༔ ཁོ་མོ་བཟོད་དཀའ་ཅན་ལ་ཆོས་གཅིག་གནོངས༔ དད་གུས་ཅན་ལ་བྱིན་རླབས་གནོངས༔ ཐུགས་རྗེའི་མ་ཆུང་རིན་པོ་ཆེ༔ བདག་གིས་གསོལ་བ་བཏབ་པ་ཁྱེད༔ ཁྱེད་ཀྱིས་ཐུགས་རྗེའི་མ་ཆུང་ཞིག༔ ཅེས་ཞུས༔

ལགས་ཨུ་རྒྱན་རིན་པོ་ཆེ༔ ཤཱཀྱ་རྒྱལ་པོའི་རྒྱུད་སྡེ་དྲུག་གསུངས་པ་ཁྱེད་ཀྱིས་འགྲོ་བའི་དོན་དུ་གང་འདུལ་གསུངས་ཞུས༔ པདྨའི་ཞལ་ནས༔ ཆོས་སྐུ་རྒྱུད༔ ལོངས་སྐུ་རྒྱུད༔ སྤྲུལ་སྐུའི་རྒྱུད༔ བླ་ན་མེད་པའི་རྒྱུད༔ བྱ་བའི་རྒྱུད༔ སྤྱོད་པའི་རྒྱུད༔ རྒྱུད་དྲུག༔ ཆེད་དུ་བརྗོད་པའི་སྡེ༔ མདོ་སྡེ་ལུང་དུ་བསྟན་པའི་སྡེ༔ ཚིགས་སུ་བཅད་པའི་སྡེ༔ རྣལ་འབྱོར་གྱི་སྡེ༔ སྔགས་རིམ་གྱི་སྡེ༔ སྡེ་དྲུག་དེ་གསུངས་པ༔ ངའི་བླ་ན་མ་མཆིས་པ༔ གོ་ཆ་དང་ལྡན་པ༔ གོང་ན་མཆིས་པ་སྔགས་དང་ལྡན་པ༔ དོན་མ་མཆིས་པ་རྫོགས་པ་ཆེན་པོའི་ཕ་རྒྱུད་དུ་གྲུབ་པའི་ཆོས་སྐུ་ཀུན་ཏུ་བཟང་པོ་ལ་རྒྱུད་པ༔ སྟོང་པ་ལ་ཆགས་པའི་ཕ་རྒྱུད༔ ཆོས་དབྱིངས་ཀུན་ཏུ་བཟང་མོ༔ གསལ་བ་ལ་རྒྱུད་པའི་མ་རྒྱུད༔ རིག་པ་དྲི་མ་མེད་པ་ལ་རྒྱུད་པའི་གཉིས་མེད་དོན་གྱི་རྫོགས་རྒྱུད༔ རྡོ་རྗེ་སེམས་དཔའི་རྒྱུད་པ་དང་༔ བཅོམ་ལྡན་འདས་རྒྱུད་པ་ང་༔ པདྨའི་གཏེར་ནས་བཏོན་མ་དེ་རྣམས་རྫོགས་པ་ཆེན་པོ་སྤྱོད་པའི་ལས་ཡིན་པ༔ ཁྱོད་མཁར་ཆུ་ཟས་ཉམས་སུ་ལོངས་ཤིག༔ ང་སྔགས་འཆང་གུས་པ་ཅན་ལ་ཁྱོད་བརྩོན་འགྲུས་ཆེ་བ༔ འགྲོ་བའི་དོན་ཡོང་ན་དེ་དང་ཐབས་རྟེན༔ རིགས་ཀྱི་བུ་མོ་དེ་དང་མཚུངས་པའི་སྐབས་དང་མཐུན་ནས༔ མི་བརྗེད་པ་གྱིས༔ ངའི་བྱ་བའི་ཆོས་དང་བྱེད་པའི་ཆོས༔ ཡིད་ཀྱི་ཆོས༔ རྣམ་པར་དག་པའི་ཆོས་ཡོད་པ༔ བྱ་བའི་ཆོས་ནི་ཉོན་མོངས་པ་ཐམས་ཅད་རབ་ཏུ་སྤོངས་ནས༔ བྱ་བའི་ཆོས༔ ཕུང་པོ་ཐམས་ཅད་སྣང་བ་དཀར་དམར་གཟུགས་མེད་པ་ནས་བྱེད་པའི་ཆོས༔ ཡིད་ཏོག་རང་རིག་པའི་དོན་ནི་ཡིད་ཀྱིས་ཆོས་དོན་དུ་འཆང་བ༔ སྣང་བའི་རྣམ་པ་ཐམས་ཅད་ལམ་དུ་དག་པ༔ འབྲས་བུ་ཉིད་གཞི་ཐོག་ཏུ་རྟོགས་པ་དང་༔ རྣམ་པར་དག་པའི་ཆོས་ཡིན་པ་དེ་བདག་ལ་དེ་དང་ལྡན་པ༔ སྤྱིར་འགྲོ་བ་ཡོངས་ལ་ཡོད་ན་དགའ་སྟེ༔ ཀུན་ལ་མི་མངའ༔ ཁྱོད་ཡེ་ཤེས་མཚོ་རྒྱལ་ལ་མངའ་ནས་དགའ་སྟེ་འགྲོ་བའི་དོན་ཡོང་༔ དེ་དང་མཚུངས་པའི་ཁྱོད་ཉམས་སུ་ལོངས་༔ བསྐྱེད་པའི་སྔགས་འགྲོ་བའི་དོན་དུ་ཁྱོད་ལ་སྟེར་བ༔ སྣང་བའི་ལམ་གྱིས་གནོད་བྱེད་བསྡུ་བ༔ ཉེ་བར་གྱི་ལྷ་བསྐྱེད་པ༔ རིག་རྟོགས་ན་མཚོན་ཆ་བསྐྱེད་པར་བྱའོ༔

སྐད་ཅིག་གཅིག་ནས་ནམ་མཁའ་ཐམས་ཅད་ཁྲོ་བོའི་རང་བཞིན་ས་གཞི་ཐམས་ཅད་ཁྲོ་མོའི་རང་བཞིན་བར་སྣང་ཐམས་ཅད་མཚོན་ཆའི་རང་བཞིན༔ ཕྱོགས་མཚམས་ཐམས་ཅད་མེའི་རང་བཞིན༔ རང་ལུས་ལྷའི་རང་བཞིན་ངག་སྔགས་ལ་མེ་འབར་བའི་རང་བཞིན་ཡིད་ཆོས་སྐུ་སྣ་ཚོགས་དྲན་རིགས་གཅིག་ཏུ༔ ཉེ་བར་དུ་འདུས་འདུག་པའི་གནོད་བྱེད་ཚར་བཅད་པ༔ སྣང་སྲིད་ཆོས་སྐུའི་ཀློང་ནས་ནམ་མཁའི་ཀློང་དུ་བཞག་པ༔ ལྷ་དང་འདྲེ་གཉིས་སྣང་རིག་བཅད་པ༔ དྲན་རྫོགས་སྐྱེ་མེད་ཀྱི་ངང་དུ་བཞག་པར་བྱའོ༔ དེ་དང་མི་བརྗེད་པའི་མཁར་ཆུ་ཟ་ཡིས་ཉམས་སུ་ལོངས་ཤིག༔ གསུངས༔ མ་འོངས་འགྲོ་བའི་དོན་ཡོང་པ༔ སྣང་སྲིད་གདོད་མ་ཆོས་སྐུ་ཞི་བའི་ཚུལ་བསྟན་པ༔ ལོངས་སྐུ་ཞི་མ་ཁྲོ་ཚུལ་བསྟན་ནས་གཤིན་རྗེའི་གཟུགས་སུ་གོལ་པ༔ རང་ཉིད་མདོག་དམར་ལྷ་གང་དུ་བསྐྱེད་ནས་སྐད་ཅིག་གཅིག༔ ཐུགས་ཀར་མཆོད་རྟེན་བུམ་པའི་དབུས་ནས༔ གསེར་གྱི་རྡོ་རྗེ་རྩེ་དགུ་པ་ཚོན་གང་བ་དེའི་ལྟེ་བར་ཉི་ཟླ་ཁ་སྦྱོར་བྱེད་པ༔ ཞི་བའི་ཚུལ་དུ་ཉི་མའི་ཐོག་ཟླ་བའི་ཞབས༔ བར་དུ་ལྟེ་བར་གོང་གི་གནས་ནས་ཧཱུྃ་སྤུས་བྲིས་པ་ཙམ༔ ཞི་ཁྲོ་ཙམ་གྱིས་ལྟེ་བར་དཀྱིལ་ནས༔ ཁྲོ་བོའི་ཚུལ་གྱིས་ཉི་མའི་ཞབས༔ ཟླ་བའི་ཐོག༔ ལྟེ་སྨད་ནས་ཧཱུཾ་སྤུས་བྲིས་པ་ཙམ་དཀྱིལ་ནས༔ འོད་ཤ་ར་ར་འཕྲོས་ནས༔ རྒྱུ་མ་ནོར་བ་རྩ་བའི་སྔགས༔ སྔགས་ཀྱིས་བསྐོར་བ་དེ་ལ་འོད་དག་པ་ཡར་འཕྲོས་མར་འཕྲོས་བྱེད་པ་ཙམ་གྱིས་གནོད་བྱེད་བསྲེག་པ༔ རྒྱུའི་ཏིང་ངེ་འཛིན་ཧཱུྃ་ཡིན་པས་གནས་པ་ལ་རྒྱུ་མ་ནོར་བའི་སྔགས་འོད་ཟེར་འཕྲོས་པ་ཀུན་སྣང་སྣ་ཚོགས་ཡིན་པ་ཀུན་སྣང་ཏིང་ངེ་འཛིན༔ མི་མཉམ་པ་དང་མཉམ་པར་བྱེད་པ་འོད་ཟེར་འཕྲོས་པ་དང་༔ གང་དུ་གཅོད་པ་མཉམ་པ་ཉིད་ཀྱི་ཏིང་ངེ་འཛིན་ཡིན༔ དེ་དང་མི་བརྗེད་པའི་མཁར་ཆུ་ཟ་ཡིས་ཉམས་སུ་ལོངས༔ གནས་པ་མཉམ་པ་དྲང་དོན་ཆོས་ལ་འཇུག་པ་ཅན་ཡིན་ནམ༔ གཞི་ཆོས་སྐུའི་རིག་ཀློང་ནས༔ ལམ་སྟོང་གསལ་འོད་དཔུང་འདྲེས་པ༔ འབྲས་བུ་རེ་དོགས་པ༔ སྟོང་གསལ་ཁྱབ་བདལ་གྱི་ཀློང་ནས༔ རིག་པ་རྒྱ་མ་ཆད་པ་མཐའ་དང་བྲལ་བའི་རེ་དོགས་གང་མི་བྱེད་པ་མཉམ་པར་བཞག་པ་དེ་དང་མཚུངས་པའི་རིག་ཐོག་ཏུ་གྲོལ་བར་བྱེད་ནས༔ དེར་ཁྱོད་གྲོལ་ལམ༔ ཁྱོད་བུད་མེད་རིགས་འདི་སྣང་བ་ལམ་དུ་བསམ་པ་མང་པོ་བྱེད་པ༔ དེ་འདྲ་མ་བཟོ་བ་སྔོན་བསུ་རྗེས་འབྲང་མ་བྱེད་པ་ཉེ་བར་དུ་རིག་ཐག་བཅད་པ༔ ཕྱི་རུ་འགྲོ་བའི་སྣང་ཐག་བཅད་པ༔ སེམས་ཉིད་དུ་འདུག་པའི་དྲི་མ་དང་བྲལ་བ་དེ་དང་ཉམས་སུ་ལོངས༔ བུད་མེད་ལུས་ཉུང་བ་ཏ་ལང་དེ་འདྲ་བྱེད་དམ་ཤིན་ཏུ་ཡང་གྲོལ་བར་ངེས༔ ཐབས་མི་མང་བར་བྱ༔ དེ་དང་ཉམས་སུ་ལོངས༔ མི་མཐུན་པར་མོས་པ་དད་པ༔ དེ་དང་མཚུངས་པའི་ཐབས༔ རིགས་མ་ལུས་པ་ཉེ་བར་དེ་དང་མཐུན་པར་བྱའོ༔ ཞེས་གསུངས༔

ཡེ་ཤེས་མཚོ་རྒྱལ་ཞུས་པ༔ ཨུ་རྒྱན་རིན་པོ་ཆེ་ལགས༔ ཐབས་སྣ་ཚོགས་དེ་དང་གསུངས་པ་མི་འདུལ་བའི་ལས་ཅན་ཁ་ལོ་བསྒྱུར་བ་དེ་དང་ངས་ཉམས་སུ་བླངས་ཏེ༔ མ་འོངས་སྡིག་པོ་ཆེ་སངས་རྒྱས་ཐབས༔ ཚིག་ཉུང་ལ་དོན་མང་བ་གཅིག་གསུངས༔ ཞེས་ཞུས༔ ཨུ་རྒྱན་ཞལ་ནས༔ མཁར་ཆུ་ཟ་ཉོན་དང་༔ ཚིག་ཉུང་ལ་དོན་མང་བ་འདི་དག་བཀའ་སྩལ་ཏེ༔ ཨོཾ་ཨཱ་ཧཱུཾ༔ དུས་གསུམ་རྣམ་དག་སངས་རྒྱས་ཀུན་གྱི་སྐུ༔ སྐུ་གསུམ་རྣམ་དག་སངས་རྒྱས་ཀུན་གྱི་དོན༔ རྩ་གསུམ་རྣམ་དག་སངས་རྒྱས་ཀུན་གྱི་ཐུགས༔ སྐྱེ་མེད་རྣམ་དག་རྒྱལ་བའི་ལྷར་གསལ་བ༔ ལུས་ནི་མི་འགུལ་རྣམ་གསུམ་གཞི་མ་བྱས༔ སྤྱི་བོར་ཨོཾ་ལ་གནས་བཅས་པ༔ ཆོས་སྐུ་ཀུན་ཏུ་བཟང་མོ་དང་༔ རྒྱལ་བ་རིགས་ལྔའི་གནས་བཅས་པའི༔ མགྲིན་པའི་ཨཱ་ལ་སྤྱན་རས་གཟིགས༔ ཐུགས་ཀར་ཧཱུཾ་ལས་པདྨ་ང་༔ སྟོང་གསལ་ཆོས་སྐུ་གཅིག་ཏུ་འདྲེས༔ བཛྲ་ཐུགས་ཀར་མཆོད་རྟེན་དབུ༔ རྡོ་རྗེ་རྩེ་ལྔ་ཡོད་པར་གནས༔ གུ་རུ་བླ་མ་ང་ཉིད་ཡང་༔ རྡོ་རྗེ་ལྟེ་བར་གནས་བྱས་པ༔ པད་འདབ་བཞིའི་སྟེང་པདྨ་ནི༔ ཕྱོགས་བཅུའི་སངས་རྒྱས་བྱིན་རླབས་ནི༔ སིདྡྷི་ཧཱུྃ་གིས་བྱིན་རླབས་ཐིམ༔ སྤྱི་བོར་ཨོཾ་ལས་ཕྱོགས་བཅུའི་སངས་རྒྱས་བསྐོར༔ སྟོང་པའི་ངང་ལས་མགྲིན་པའི་ཨཱ་ལ་ཐིམ༔ ཐུགས་ཀར་ཨཱ༔ ལས་བྱིན་རླབས་གསལ་བ་བབས་པ་ནས༔ ཐུགས་ཀའི་ཧཱུཾ་ལ་ཐིམ་པར་བསམ༔ ཧཱུྃ་ལ་སིདྡྷིས་བསྐོར་བར་བསམ༔ དེ་དང་མི་བརྗེད་ཉམས་སུ་ལོངས༔ མཁར་ཆུ་ཟ་ཡིས་ཉམས་སུ་སྐྱོང་༔ ཨོཾ་ཨཱ༔ ཧཱུྃ་བཛྲ་གུ་རུ་པདྨ་སིདྡྷི་ཧཱུཾ༔

བདག་ཉིད་སྤྱི་གཙུག་འདབ་བཞིའི་སྟེང་༔ ཟེའུ་འབྲུའི་ཨོཾ་ལ་འོད་གནས་པ༔ གུ་རུ་རྣམ་པར་རྒྱལ་བ་ནི༔ ཕྱག་གཉིས་ཡཱཾ་དཀར་རེ་རེ་བསྣམས༔ ཨ་ནི་ཤར་གྱི་འདབ་གནས་ནས༔ གུ་རུ་རྣམ་པར་གནོན་ཞེས་བྱ༔ ཧཱུཾ་ལས་ལྟེ་བའི་འདབ་སྟེང་ནས༔ གུ་རུ་ཤཱཀྱ་སེང་གེ་ཞེས༔ བཛྲ་ནུབ་ཀྱི་པདྨ་གནས༔ གུ་རུ་དམ་ལྡན་ཞེས་བྱ་བ༔ བྱང་སྟེང་གུ་རུ་གནས་པ་ལས༔ གུ་རུ་སྣང་བྱེད་ཅེས་བྱ་བ༔ མཚམས་ནས་པདྨ་གནས་པ་ལ༔ གུ་རུ་ཆོས་ཀྱི་རྒྱལ་པོ་ཞེས༔ འོད་དྲུག་འཕྲོས་པས་རིགས་དྲུག་ཚ་གྲང་བསལ༔ སིདྡྷི་བྱིན་རླབས་བདག་གཞན་རྣམས་ལ་ཐིམ༔ མི་བརྗེད་ཉམས་ལོངས་མཁར་ཆུ་ཟ༔ ལན་རེ་ཤུབ་བུར་ཤུབ་བུར་བཟླས༔ ༀ་ཨཱ༔ ཧཱུྃ༔ བཛྲ་གུ་རུ་པདྨ་སིདྡྷི་ཧཱུཾ༔ མགྲིན་པ་འདབ་བཞིའི་དབུ་སྟེང་ན༔ གུ་རུ་དྲུག་ནི་དེ་སྤྲུལ་པ༔ ལན་རེ་རྡོ་རེ་རྡོ་རེ་བཟླས༔ མི་བརྗེད་ཉམས་ལོངས་མཁར་ཆུ་ཟ༔ ཨོཾ་ཨཱ་ཧཱུྃ༔ བཛྲ་གུ་རུ་པདྨ་སིདྡྷི་ཧཱུྃ༔ ཐུགས་ཀར་པདྨ་འདབ་མ་དབུ༔ གུ་རུ་དྲུག་ནི་དེ་སྤྲུལ་པ༔ དེ་དང་མཚུངས་པའི་ཉམས་སུ་ལོངས༔ ཡིད་ལ་ཆོངས་ཤིག་མཁར་ཆུ་ཟ༔ ཨོཾ་ཨཱ༔ཧཱུྃ༔ བཛྲ་གུ་རུ་པདྨ་སིདྡྷི་ཧཱུཾ༔ བདག་གི་ཚངས་དབུགས་ཨོཾ་ལ་ཡང་༔ རྣམ་པར་རྒྱལ་བ་དབྱིངས་ལམ་བཅད༔ ལྟག་རྩ་ཨཱ༔ ལ་གུ་རུ་རྣམ་པར་གནོན༔ འཐབ་ཅིང་རྩོད་པའི་སྒོ་བཅད་པ༔ སྲོག་རྩ་ཧཾ་གནས་ཤཱཀྱ་སེང་གེ༔ བཀྲེས་ཕུང་ཚ་གྲང་རབ་གསལ་བ༔ ལྟེ་རྩ་བཛྲ་དམ་བརྟན་ནས༔ གླེན་རྨོངས་ཚ་གྲང་རབ་གསལ་བ༔ གསང་གནས་གུ་རུ་སྣང་བྱེད་དོ༔ བཀྲེས་སྐོམ་རབ་གསལ་བྱང་ཆུབ་ཐོབ༔ རྐང་མཐིལ་པདྨ་སྲིད་ཐུབ་འཛིན༔ ཚ་གྲང་རིགས་དྲུག་ཡི་གེ་དྲུག༔ རབ་བསྲེག་བྱང་ཆུབ་ས་ཐོབ་པ༔ དེ་བསྒོམ་བཛྲ་གུ་རུ་བཟླས༔ མ་འོངས་འགྲོ་བའི་བུ་སློབ་དོན༔ མི་བརྗེད་ཉམས་ལོངས་མཁར་ཆུ་ཟ༔ ཨོཾ་ཨཱ༔ཧཱུྃ༔ བཛྲ་གུ་རུ་པདྨ་སིདྡྷི་ཧཱུྃ༔

ཨོཾ་ནི་རང་ལ་གནས་པའི་ལྷ༔ ཨཱ༔ ནི་ངག་ལ་གནས་བྱས་པ༔ ཧཱུྃ་ནི་ཡིད་ལ་གནས་པའི་རྒྱུད༔ བཛྲ་སྤྱི་བོར་ཡེ་ཤེས་སེམས༔ གུ་རུ་སྐྱབས་ཡུལ་ཞིང་ཁམས་གནས༔ པདྨ་འོད་ཟེར་འཕྲོས་པ་བྱེད༔ སིདྡྷི་བྱིན་རླབས་མཆོག་གི་དངོས༔ མི་བརྗེད་ཉམས་ལོངས་མཁར་ཆུ་ཟ༔ དེ་ཕྱིར་གུ་རུ་སིདྡྷི་སྒྲོངས༔ ཨོཾ་ཨཱ༔ ཧཱུཾ༔ བཛྲ་གུ་རུ་པདྨ་སིདྡྷི་ཧཱུཾ༔ ཨོཾ་ནི་པད་མ་རྒྱལ་པོའི་སྐུ༔ ཨཱ་ནི་ཤཱཀྱ་སེང་གེ་ཞེས༔ ཧཱུཾ་ནི་པདྨ་སམ་བྷ་ཝ༔ བཛྲ་རྡོ་རྗེ་གྲོ་ལོད་ཅེས༔ གུ་རུ་པདྨ་ཐོད་འཕྲེང་རྩལ༔ པདྨ་བློ་ལྡན་མཆོག་གི་སྲས༔ སིད་ནི་ཉི་མའི་འོད་ཟེར་ཞེས༔ དྷི་ནི་སེང་གེ་སྒྲ་སྒྲོགས་ལྡན༔ ཧཱུཾ་ནི་སྔགས་འཆང་པདྨ་འབྱུང་༔ གུ་རུ་མཚན་གྱི་གནོད་བྱེད་སྒྲལ༔ ཉམས་སུ་ལོངས་ཤིག་མཁར་ཆུ་ཟ༔ ཨོཾ་ཨཱ༔ ཧཱུཾ༔ བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ནི་གནས་པ་ཆོས་ཀྱི་སྐུ༔ ཨཱ༔ ནི་འགྱུ་བ་སྣ་ཚོགས་ལྡན༔ ཧཱུཾ་ནི་རིགས་པའི་ངོ་བོ་ལྡན༔ བཛྲ་མིག་གི་གཟུགས་ལམ་བཅད༔ གུ་རུ་རྣ་བའི་སྒྲ་ལམ་དག༔ པདྨ་སྣ་ཡི་དྲི་ལམ་དག༔ སིད་ནི་ལྕེ་ཡི་རོ་ལམ་དག༔ དྷི་ནི་ལུས་ཀྱི་ཡུལ་དག་པ༔ ཧཱུཾ་ནི་ཡིད་དགའ་སྙན་པ་དག༔ མ་འོངས་བུ་སློབ་རྣམས་ཀྱི་དོན༔ ཡེ་ཤེས་མཚོ་རྒྱལ་ཐུགས་ལ་ཞོགས༔ ཨོཾ་ཨཱ༔ཧཱུྃ༔ བཛྲ་གུ་རུ་པདྨ་སིདྡྷི་ཧཱུཾ༔

ཨོཾ་ནི་ཆོས་སྐུ་སྟོན་པའི་གཞིའི་ལམ༔ ཨཱ༔ ནི་ལོངས་སྐུ་གསལ་བ་ལམ་གྱི་གནས༔ ཧཱུཾ་སྤྲུལ་སྐུ་འབྲས་བུ་ཉིད་ཀྱི་སྐུ༔ བཛྲ་ཆོས་ཀྱི་དབྱིངས་ཡེ་ཤེས༔ གུ་རུ་མེ་ལོང་དབྱིངས་ཡེ་ཤེས༔ པདྨ་མཉམ་ཉིད་དབྱིངས་ཡེ་ཤེས༔ སིད་ནི་སོར་རྟོགས་དབྱིངས་ཡེ་ཤེས༔ དྷི་ནི་བྱ་གྲུབ་དབྱིངས་ཡེ་ཤེས༔ ཧཱུཾ་གིས་ཉོན་མོངས་དུག་ལྔ་བསྲེགས༔ དེ་ཕྱིར་གུ་རུ་སིདྡྷི་ལྡན༔ རིག་པ་དབྱིངས་རྣམས་གསལ་བའི་གནས༔ རྒྱ་གར་སྐད་ཀྱི་སུ་གྷ་ཞེས༔ ཛྙཱ་ན་ཞེས་བྱ་དོན་ཚང་བ༔ བོད་རྣམས་སྐད་ཀྱི་དབྱིངས་ཡེ་ཤེས༔ སཾསྐྲྀ་སྐད་ཀྱི་དྷི་དྷོ་སྨྲས༔ མཚོ་རྒྱལ་ཐུགས་ཞོག་བུ་རྣམས་དོན༔ ཨོཾ་ཨཱ༔ཧཱུྃ༔ བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ནི་ཐ་མལ་ཤེས་པ་རང་རིག་དངོས༔ ཨཱ༔ ནི་ཉེ་བར་ཤེས་པ་དངོས༔ ཧཱུཾ་ནི་ཅིག་ཅར་ཤེས་པ་དངོས༔ བཛྲ་ཆོས་སྐུ་གྲོལ་བའི་གནས༔ གུ་རུ་ལོངས་སྐུ་གྲོལ་བའི་གནས༔ པདྨ་སྤྲུལ་སྐུ་གྲོལ་བའི་གནས༔ སིད་ནི་འབྲས་བུ་ཉིད་གྲོལ་བ༔ དྷི་ནི་བདུད་བཞི་རིགས་བཀབ་པ༔ ཧཱུཾ་ནི་བདུད་རྟོགས་སྐུ་འགྱུར་བ༔ མི་བརྗེད་ཉམས་ལོངས་མཁར་ཆུ་ཟ༔ ཨོཾ་ཨཱ༔ ཧཱུཾ༔ བཛྲ་གུ་རུ་པདྨ་སིདྡྷི་ཧྰུྃ༔

ཨོཾ་ནི་སྤྲོས་བྲལ་ཆོས་ཀྱི་སྐུ༔ ཨཱ༔ ནི་སྤྲོས་བྲལ་དང་འབྲིང་བ༔ ཧཱུཾ་ནི་སྤྲོས་བྲལ་ཆུང་ངུ་ཞེས༔ ཨ་ནི་བཟང་བའི་སྤྲོས་པ་ཆེ༔ ཨ་ཆུང་ལྟ་བ་ཉམས་ཀྱི་བདུད༔ ན་རོ་རྫོགས་པ་རིག་པའི་བདུད༔ ཟླ་ཚེ་ཉོན་མོངས་མངའ་བའི་བདུད༔ ཐིག་ལེ་ཉག་གཅིག་ཆོས་ཀྱི་སྐུ༔ བཛྲ་རོ་གཅིག་དང་པོ་ཨ་ཀ་རུ་ལུ༔ གུ་རུ་རོ་གཅིག་འབྲིང་པོ་གཟུགས་བརྙན་ལྟར༔ པདྨ་རོ་གཅིག་ཆུང་ངུ་ཕྱོགས་རིས་མེད༔ སིད་ནི་སྒོམ་པ་དང་པོ་པ༔ དྷི་ནི་སྒོམ་མེད་འབྲིང་པོ་ཞེས༔ ཧཱུཾ་ནི་སྒོམ་མེད་མཐའ་མ་མེད༔ སྣང་བ་ཐིག་ལེ་ཉག་གཅིག་འདུས༔ ཐིག་ལེ་གསེར་གྱི་རྡོ་རྗེ་ལྟར༔ བརྟན་པ་ཐོབ་པའི་དོན་མངའ་བ༔ མི་བརྗེད་ཉམས་ལོངས་མཁར་ཆུ་ཟ༔ དེ་ཕྱིར་གུ་རུ་སིདྡྷི་སྒྲོངས༔ ཨོཾ་ཨཱ༔ཧཱུྃ༔ བཛྲ་གུ་རུ་པདྨ་སིདྡྷི་ཧཱྃ༔ ཨོཾ་ནི་སྟོང་ར་རྩ་སྦྱང་བ༔ ཨཱ༔ ནི་རྩ་རྣམས་གསལ་འདེབས་འཕང་༔ ཧཱུཾ་གིས་འབེབས་སྦྱངས་རྩ་སྦྱང་བ༔ བཛྲ་རྡོ་རྗེ་རྩེ་གཅིག་བཅས༔ གུ་རུ་རིགས་དྲུག་ལུས་སྦྱངས་བྱས༔ པདྨ་ཧཱུྃ་རིང་ཧཱུཾ་ཐུང་སྦྱངས༔ སིད་ནི་ཉི་མའི་ཟེར་ལ་ལྟ༔ དྷི་ནི་མུན་ཁུང་འོད་གསལ་བ༔ ཧཱུྃ་ནི་ནམ་མཁའི་མཐའ་བཅད་པ༔ དེ་དང་བྱིན་རླབས་དེ་ལྟར་བ༔ མ་འོངས་འགྲོ་བ་བུ་སློབ་དོན༔ མི་བརྗེད་ཉམས་ལོངས་མཁར་ཆུ་ཟ༔ དེ་ཕྱིར་གུ་རུ་སིདྡྷི་སྒྲོངས༔ ཨོཾ་ཨཱ༔ཧཱུྃ༔ བཛྲ་གུ་རུ་པདྨ་སིདྡྷི་ཧཱུཾ༔ ཨཱོཾཿནི་ཆོས་སྐུ་ཀུན་ཏུ་བཟང་༔ འ་ཆུང་ཆོས་དབྱིངས་ཀུན་ཏུ་བཟང་༔ ན་རོ་རིགས་ལྔའི་དབུ་ལ་བརྒྱན༔ ཟླ་ཚེ་ཁྲག་འཐུང་ཧེ་རུ་ཀ༔ ཐིག་ལེ་མཆོག་གི་འགྲོ་ལ་དགོངས༔ འ་ཆུང་མིག་གི་ལམ་ཆོད་པ༔ ན་རོ་རྣ་བའི་སྒྲ་ལམ་དག༔ ཟླ་ཚེ་སྣ་ཡི་དྲི་ལམ་དག༔ ཐིག་ལེ་ལྕེ་ཡི་རོ་ལམ་དག༔ ཨ་ཆེན་ལུས་དང་ཡིད་དག་པ༔ ཀུན་ཏུ་བཟང་པོ་གཞི་སངས་རྒྱས༔ རྒྱལ་བ་རིགས་ལྔ་ལམ་སངས་རྒྱས༔ ཚོགས་དྲུག་རང་དག་ཉིད་སངས་རྒྱས༔ དུག་ལྔ་རྒྱན་བཀོད་སྐུ་ལྔ་རྫོགས༔ མ་རྟོགས་ཀུན་བཟང་ལམ་དུ་འཁྲུལ༔ ཡིད་ལ་ཟུངས་ཤིག་མཚོ་རྒྱལ་ཉོན༔ ཨ་ནི་ལོངས་སྐུ་སྤྱན་རས་གཟིགས༔ གཅིག་པོ་འགྲོ་བའི་དོན་མངའ་བ༔ སྐྱོན་གྱིས་མ་གོས་ཨ་ཞེས་བྱ༔ ཉམས་སུ་ལོངས་ཤིག་མཁར་ཆུ་ཟ༔ ཨོཾ་ཨཱ༔ཧཱུྃ༔ བཛྲ་གུ་རུ་པདྨ་སིདྡྷི་ཧཱུཾ༔

ཧཱུཾ་ནི་སྔགས་འཆང་པདྨ་ང་༔ ཞབས་སུ་པདྨ་སྡོང་པོའི་དབུ༔ དབུས་སུ་ང་ཡོད་སྣང་མཐའ་ཡས༔ གཉིས་མེད་རྣམ་དག་མཁར་ཆུ་ཟ༔ བཛྲ་མཚོ་སྐྱེས་རྡོ་རྗེ་དང་༔ གུ་རུ་གྲོགས་བྱེད་མཚོ་རྒྱལ་ཁྱེད༔ པདྨའི་སྐུ་སྤྲུལ་མ་འོངས་འགྲོ་བའི་དོན༔ སིད་ནི་གཏེར་ཁ་དཔག་མེད་སྦས་ཙམ་ནས༔ དྷི་ནི་མ་འོངས་བུ་སློབ་འགྲོ་བའི་བརྡ༔ ཧཱུྃ་ནི་སྔགས་འཆང་འགྲོ་བའི་དོན་མཛད་པ༔ ཉམས་སུ་ལོངས་ཤིག་མཁར་ཆུ་ཟ༔ ཨཱ༔ ཧཱུྃ༔ བཛྲ་གུ་རུ་པདྨ་སིདྡྷི་ཧཱུཾ༔ ཨོཾ་ནི་གཏེར་མ་བླ་མ་ཉིད༔ ཨཱ་ནི་ཡི་དམ་ཆོས་ཀྱི་གཏེར༔ ཧཱུཾ་ནི་མཁའ་འགྲོ་ཆོས་སྐྱོང་སྟེ༔ བཛྲ་བདག་ཉིད་ལྷ་བསྐྱེད་པ༔ གུ་རུ་འདྲེ་བགེགས་མཚམས་བསྐྲད་པ༔ པདྨ་རྗེས་ཀྱི་དབང་བཅས་པ༔ སི་ནི་མཆོད་པའི་རྗེས་བཅས་པ༔ དྷི་ནི་འགྲོ་བའི་དབང་བསྐུར་བ༔ ཧཱུཾ་ནི་གཏོར་མ་རྗེས་ཕྱིར་སྤངས༔ རང་ལུས་སྙིང་གི་བུམ་བྱེད་པ༔ ཕུང་པོ་ལུས་ཀྱི་ལྷ་དབང་བསྐུར༔ དེ་དང་ཉམས་ལོངས་མཁར་ཆུ་ཟ༔ ༀ་ཨཱ༔ ཧཱུྃ༔ བཛྲ་གུ་རུ་པདྨ་སིདྡྷི་ཧཱུཾ༔ མཁར་ཆུ་ཟ་ཡེ་ཤེས་མཚོ་རྒྱལ་ཉོན༔ སྐྱེ་མེད་ངང་དུ་རང་རིག་སྒོམས༔ འགགས་མེད་ངང་དུ་སྔགས་བསྐྱེད་པ༔ གཉིས་མེད་ངང་དུ་སིདྡྷི་སྒྲོངས༔ འདི་ཡི་བྱིན་རླབས་བསམ་མི་ཁྱབ༔ བདག་གིས་བསྐུལ་བ་ཤང་བྲག་གསུངས་པར་དམིགས༔ པདྨ་ང་ཡི་ཐུགས་ཀྱི་ཟབ་མོ་བཅུད༔ མ་འོངས་འགྲོ་བའི་དོན་དུ་མཁར་ཟ་ཁྱོད་ལ་གནང༔ འདི་ནི་གཅིག་གསུངས་ཙམ་གྱིས་བྱང་ཆུབ་ཐོབ༔ འདི་ནི་ཐོབ་པའི་བྱང་ཆུབ་ཐོབ༔ འདི་ཡི་ཡོན་ཏན་བགྲང་མི་ནུས༔

ༀ་ཨཱ༔ ཧཱུྃ༔ གསུམ་གནས་པ་ལ༔ སྔགས་གསུམ་ལྷ་གསུམ་དེ་བྱས་པ༔ གོ་ཆ་ལྷ་ལྔ་དེ་བྱས་པ༔ ལྷ་དགུ་ལུས་ཚང་སིདྡྷི་བཟླས༔ མི་བརྗེད་ཉམས་ལོངས་ཇོ་མོ་མཁར་ཆུ་ཟ༔ ང་ལ་ཡོད་དེ་འགྲོ་ལ་མེད༔ མ་འོངས་འདུ་བྱེད་ང་རེ་དགའ༔ མཁར་ཟའི་མི་བརྗེད་བླངས་ནས་རབ་ཏུ་དགའ༔ བཅུ་དྲུག་ལོ་ཆུང་བུད་མེད་སེམས་མ་ཡང་༔ ཉམས་སུ་ལོངས་ཤིག་མ་འོངས་བུ་ལ་སྤེལ༔ འགྲོ་བའི་དོན་དུ་བདག་གི་སྙིང་གི་བཅུད༔ མཁར་ཟའི་སྙིང་གི་དྭངས་མ་ཁྲག་ལྟར་གཅེས༔ བདག་གི་ལུས་ལ་གཅེས་པའི་སྙིང་ཡིན་པ༔ སྙིང་གི་དྭངས་མ་ཁྲག་འདྲ་འདི༔ མཁར་ཆུ་བུད་མེད་ཁྱོད་ལ་གནང་༔ ཁྱོད་ཀྱིས་སྙིང་གི་དཀྱིལ་དུ་འཆོང་༔ སྙིང་གི་ཁྲག་འདྲ་ལས་ཅན་དོན༔ མ་འོངས་བུ་སློབ་རྣམས་ལ་སྤེལ་བར་བྱ༔ མ་འོངས་ཐོག་མཐའི་བུ་སློབ་འདི༔ བརྩོན་འགྲུས་ཆེ་བ་ཨེ་ཡོང་ངམ༔ སྤྲོས་པ་ནན་ཏན་ཆེ་བ་ཨེ་ཡོང་ངམ༔ འགྲོ་བའི་དོན་ལ་ཆོས་སྤེལ་ཨེ་ཡོང་ངམ༔ བཛྲ་གུ་རུ་བགྲང་བ་ཨེ་ཡོང་ངམ༔ དེ་འདྲ་ཡོང་ན་པདྨ་ང་ཉིད་དགའ༔ ང་ཡི་རྒྱུད་འཛིན་ཆོས་ལ་ཨེ་མོས་ན༔ དེ་འདྲ་ཡོང་ན་ང་འདྲ་རབ་ཏུ་དགའ༔ སྒྲུབ་པ་ནན་ཏན་བྱེད་མི་ཨེ་ཡོང་ངམ༔ ཕ་བཀའ་རྒྱུད་བསྟན་པ་བཟུང་བ་ཨེ་ཡོང་ངམ༔ སྒྲུབ་རྒྱུད་གང་ཟག་ཕྱི་འཆད་ཨེ་ཡོང་ངམ༔ རིག་འཛིན་ཆོས་སྤྱོད་འཛིན་པའི་མཐའ་སྐྱོངས་ཤོག༔ དེ་འདྲ་བདག་གི་སྙིང་གཏམ་ཨེ་བླང་ངམ༔ པདྨ་ང་ཡི་ཐུགས་ཀྱི་ཟབ་མོ་འདི༔ མ་འོངས་ཟོལ་ཟོག་མཁན་ལ་སྤེལ་མི་ཉན༔ གདམས་ངག་ཟས་སུ་འཇུག་པར་མི་ཉན་པ༔ སྙིང་འདྲ་དྭངས་མ་མི་ལ་སྟེར་མ་ཡིན༔ བདག་གི་མཁར་ཟ་ཁྱོད་ལ་སྙིང་གཏམ་ཡིན༔ དེ་འདྲ་རིན་ཆེན་མཆོག་གི་དངོས་གྲུབ་སྩོལ༔ མཁར་ཆུ་ཟ་ནི་ཤེས་རབ་སྤྲོས་པ་ཆེ༔ སྒོམ་ཉིད་འདོད་པའི་སྒོམ་པ་གྲོལ༔ ནན་ཏན་ཆེ་བས་ས་རྣམས་ཐོབ༔ བརྩོན་འགྲུས་ཆེ་བས་འགྲོ་དོན་ཡོང་༔ ཤེས་རབ་ཆེ་བས་ཆོས་མཐར་ཕྱིན༔ བཟོད་དཀའ་ཁྱག་པས་ཆོས་སྐུ་ཐོབ༔ འདི་འདྲ་ངོ་མཚར་བོད་འབངས་རྣམས་ལ་མེད༔ འགྲོ་བ་རྣམས་ལ་པདྨ་ང་ཡི་བཀའ་དྲིན་ཆེ༔ མཁར་ཟ་ཡེ་ཤེས་མཚོ་རྒྱལ་འགྲོ་དོན་ཆེ༔ འདི་འདྲ་མ་འོངས་བོད་འབངས་ལས་ཅན་རྣམས༔ པདྨ་མཁར་ཟ་ལན་དྲན་བདེ་བ་ཐོབ༔ དེ་ཕྱིར་སྐལ་ལྡན་ལས་ཅན་རྣམས༔ འགྲོ་བའི་དོན་ལ་གང་འདུལ་མཛོད༔ ཡེ་ཤེས་མཚོ་རྒྱལ་བུད་མེད་ལུས་བླངས་པ༔ ཤིན་ཏུ་ཉོན་མོངས་བཀྲེས་སྐོམ་རབ་འཇོམས་པ༔ ལྟོག་སྐོམ་ཚ་གྲང་སྡུག་བསྔལ་འབྱུང་བ་མེད༔ མ་འོངས་ལས་ཅན་བོད་འབངས་སེམས་ཅན་རྣམས༔ ཕྱི་མ་ཕ་མ་ངེད་གཉིས་མཐོང་བར་ཤོག༔ བསམ་ཡས་འཆིངས་ཕུབ་བྲེ་ཀུ་གཙུག་ལག་ཏུ༔ སློབ་དཔོན་ཆེན་པོ་པདྨ་འབྱུང་གནས་ང་༔ སློབ་མ་དམ་པ་མཁར་ཟ་མཚོ་རྒྱལ་ཁྱེད༔ མ་འོངས་འགྲོ་བའི་དོན་ལ་རབ་དགོངས་པས༔ ཐུགས་རྗེས་མཆོག་གི་བདག་གི་ཚངས་པ་སྩོལ༔ སྡིག་པོ་བཙན་ཐབས་སངས་རྒྱས་ཐབས་སྟོན་འདི༔ སིདྡྷི་འདི་རྣམས་ཡོན་ཏན་བགྲང་མི་ནུས༔ ཅི་འདོད་བསམ་པའི་རེ་བའི་བསྒྲུབས་པ་ཡིན༔ མི་བརྗེད་ཉམས་སུ་ལོངས་ཤིག་མཚོ་རྒྱལ་མ༔ ཞེས་གསུངས༔ ཁྱེད་མི་བརྗེད་པ་དེ་དང་ཉམས་སུ་ལོངས༔ ཁྱེད་ལུས་ཆུང་བའི་དུས་སྐབས་མ་མཆིས༔ གནས་འདིར་འགྲོ་བའི་དོན་དུ་ཉམས་སུ་ལོངས་ཤིག༔ ཅེས་གསུངས༔

ཁོ་མོ་བདག་གིས་ཞུས་པ༔ ལགས་སློབ་དཔོན་རིན་པོ་ཆེ་ཤིན་ཏུ་ཡང་བཀའ་དྲིན་ཆེ༔ འགྲོ་བ་སེམས་ཅན་ཐམས་ཅད་སད་ནས་སངས་རྒྱས་པར་ཤོག༔ བསྐལ་པ་ནས་བསྐལ་པའི་བར་དུ་ཁྱེད་ཐུགས་རྗེས་བོད་ཁམས་མུན་པ་ཅན་འདིར་གཟིགས༔ ཁོ་མོ་བདག་ལ་ཐུགས་རྗེའི་མ་ཆུང་ཞིག༔ བདག་གིས་རེ་ས་ཉིན་བསྒོམ་པ་མཚན་བསྒོམ་པ༔ ཁྱེད་མ་འོངས་སེམས་ཅན་ཐམས་ཅད་ཁྱེད་བསྒོམ་པ་དང་༔ དྲན་པ་ཁྱོད་ཐུགས་རྗེའི་མ་ཆུང་ཞིག༔ བུ་དད་པ་ཆེ་བ་རྣམས་ལ་ཆོས་གནོངས་ཤིག༔ རྒྱུ་རིན་པོ་ཆེ་མོས་གུས་དད་པའི་བགེགས་དགའ་བ་དང་༔ བརྩོན་འགྲུས་ཆེ་བ་ནན་ཏན་ཆེ་བ་ཞེ་བློ་བདེ༔ ལགས་སློབ་དཔོན་རིན་པོ་ཆེ༔ འཇིག་རྟེན་འདིའི་དགོངས་པ་དང་༔ ཅི་ཐམས་ཅད་མི་ཁོམ་པའི་གནས་ལ་གཏང་བ༔ བདག་གིས་ཁ་གཏིང་མེད་པ་ཁྱེད་ལ་མོས་པའི་སྒོས་ཅི་གསུངས་བདག་གི་དོན་དུ་འཆང་བ་ཡིན༔ བསྟོད་པ་ཕུལ་བའོ༔

ཨེ་མ་ཧོ༔ རྒྱ་གར་སྔགས་འཆང་གྲུབ་ཆེན་པདྨ་འབྱུང་༔ འདི་ཡི་སྐུ་མདོག་ཞལ་འཛུམ་མཛེས་ལྡན་མ༔ དྲི་མ་མེད་པའི་སྐུ་ལ་ཕྱག་འཚལ་བསྟོད༔ རྟོགས་པ་ཙམ་གྱིས་ཁོ་མོ་རང་གྲོལ་ཡོང་༔ འདི་ཡི་སྐད་ནི་སཾསྐྲྀ་ཏ་ཡི་སྐད༔ པི་ཝཾ་ཀ་ལ་ལྟ་བུའི་སྐད་ནི་སྒྲོགས༔ ཚངས་པའི་གསུང་སྒྲ་སྒྲོག་པའི་སྐུ་ལ་བསྟོད༔ སྐད་ཐོས་ཙམ་གྱིས་ཁོ་མོ་ཞེ་རེ་མུག༔ ཐོས་པ་ཙམ་གྱི་ཁོ་མོ་ཡིད་ལ་འཆང་༔ ཁོ་མོ་བདག་གྲོལ་མཐོང་ཐོས་དྲན་ཐོབ་པ༔ རྫུས་སྐྱེས་སྔགས་འཆང་པདྨའི་གསུང་ལ་བསྟོད༔ སྤྱན་གཉིས་མ་ཡེངས་འགྲོ་ལ་ཐུགས་རྗེས་གཟིགས༔ ཤངས་དཀྱུས་རིང་ཞིང་མཚན་བཟང་དུང་གིས་བརྒྱན༔ སྐད་ཅིག་གཅིག་ནས་གཞོན་ནུ་ལོ་བརྒྱད་པ༔ ཡ་མཚན་རྨད་བྱུང་མཆོག་གི་འདི་འདྲ་བ༔ ལན་གཅིག་རེ་ན་གཞོན་ནུ་བཅུ་དྲུག་ཚོད༔ གཟིགས་ལེགས་ཡ་མཚན་ངོ་མཚར་མཆོག་གི་སྐུ༔ བྱེ་བྲག་གཅིག་ནས་ཞིང་གི་རྡུལ་སྙེད་རེས༔ བྱེ་བ་གཅིག་ནས་དཔག་བསམ་རི་རབ་ཙམ༔ བྱེད་ཚེ་གཅིག་ནས་ཁྱེའུ་ལོ་ལྔ་ཙམ༔ དད་ལྡན་འགྲོ་བའི་ཐབས་ཀྱིས་སྨིན་མཛད་པ༔ འདི་འདྲ་ངོ་མཚར་སྤྲུལ་པ་གྲངས་མེད་འགྱེད༔ འགྲོ་བ་ཡོངས་ལ་བཀའ་དྲིན་འདི་ཆེ་བ༔ ལས་ཅན་རྣམས་ཀྱིས་བླ་མ་སྤྲུལ་པ་ཆེ༔ ཁོ་མོ་བདག་གི་བླ་མ་ངོ་མཚར་ཆེ༔ ངོ་མཚར་ཆེ་བའི་བླ་མ་འདི་འདྲ་བ༔ ལས་ཅན་ཚུལ་ཅན་ཁོ་མོ་བདག་གི་ལུས༔ མི་བརྗེད་བསམ་ཞིང་ཡིད་ལ་འཆང་༔ དྲིན་ཅན་བླ་མའི་སྐུ་ལ་ཕྱག་འཚལ་བསྟོད༔ ཅེས་ཞུས༔

ཨུ་རྒྱན་རིན་པོ་ཆེ་ལགས༔ ང་ལ་ཀུན་རྫོབ་དང་༔ རྒྱུའི་དོན་དང་ཐབས་སྣ་ཚོགས་དོན་མི་འཆང་བ༔ ངེས་དོན་ཡོངས་རྫོགས་གཅིག་གནང་༔ ཐབས་ལ་གནས་ཚད་ང་ལ་རག་མ་ལུས་པ་ཐབས་འདུལ་ལགས༔ ལར་ཁམས་སུ་འགྲོ་བའི་དོན་མཛད་པ༔ སྒོམ་པ་མེད་ན་སྒོམ་སྙིང་འདོད༔ ངའི་ཁྱེད་ཀྱི་བཀའ་མི་བཅག་པ་ངེས་པར་དོན་མངའ་བར་བྱའོ༔ ལགས་ཨུ་རྒྱན་རིན་པོ་ཆེ༔ མ་འོངས་བུད་མེད་ཆོས་ལ་བསྒྱུར་བ་གྲོལ་བའི་ཐབས་ཨེ་ཡོད་ལགས༔ ཞུས༔ པདྨའི་ཞལ་ནས༔ འཇིག་རྟེན་བུད་མེད་ཁྱོད་དང་མི་འདྲ་བ༔ གྲོལ་མི་ཐུབ་པ༔ འཇིག་རྟེན་གྱི་གཉེན་ལ་མོས་པ་སྣང་བའི་གཟུགས་ལ་དགའ་བ༔ དེ་དང་དུས་མི་མཚུངས་པ་ཁྱོད་དང་འདྲ་བ་མེད་པའོ༔ ལར་འགྲོ་བ་སེམས་ཅན་དུག་གི་སྡོང་པོ་དང་འདྲ༔ ཕན་ཚུན་འཐབ་རྩོད་ཀྱིས་སྲོག་གཅོད་པ་འདི་ཨ་ཙ་མ༔ འཆི་ན་ཐར་ལམ་མེད་པ༔ གསོན་ཏེ་སྡིག་སྤྱོད་ཆེ་བ་འདི་འདྲ་ཤིན་ཏུ་སྐྲག༔ ཡེ་ཤེས་མཚོ་རྒྱལ་རྒྱུད་པའི་དོན་མ་མཆིས༔ ཉེ་བར་སྔགས་དང་བར་དུ་རང་བཞིན་ཤུགས་ཀྱིས་དྲངས་པའི་ཐབས༔ དེ་དང་དུས་མཉམ་པའི་དུས༔ འོད་དཀར་སེར་དམར་ལྗང་དེ་དང་མཚུངས༔ སྣང་བའི་ལམ་ཐག་བཅད་པ༔ ཁྱོད་བུད་མེད་འགྲོ་བ་གཏམ་པ་ཉུང་བ་བྱེད་པ༔ སྣང་བའི་ལམ་དུ་གནས་པར་བྱ༔ བུད་མེད་འགྲོ་བའི་དུས་སུ་ཏ་ལེ་འགྲོ་བ་ཏ་ལེར་འདུག་པ༔ མིག་གྲུ་གང་སྣ་རྩེ་ལྟ་བ་གཏམ་ནས་ཏ་ལེ་བྱེད་དགོས་པ་ཡིན་ཏེ་ཁྱོད་རང་མཁར་ཆུ་ཟའི་དལ་ཤེས་པར་འདུག༔ དེ་མིན་པའི་འགྲོ་བའི་དོན་བྱས༔ གཞན་གྱི་བུད་མེད་དེ་འདྲ་མི་བྱེད་པ༔ ཤིན་ཏུ་ཡང་མཐོ་རིས་ལྷ་གནས་མེད་གསུངས༔

ཁོ་མོས་ཞུས་པ༔ ལགས་ཨུ་རྒྱན་རིན་པོ་ཆེ༔ བདག་ལ་དབང་བསྟན་དགྲ་བསྒྲལ་བའི་ཐབས་གཅིག་གནོངས་༔ བོད་འབངས་ལས་ཅན་འབྲས་བུ་ཟོལ་ཟོག་ཅན་གྱིས་བཟུངས༔ བོད་འབངས་ལས་འཕྲོ་ཆོས་རྣམས་གཡོ་སྒྱུ་མཁན་གྱིས་བཟུངས༔ ལྟ་བ་ཁ་ཁྱེར་བ་བྱ་ལྟར་རྒྱུག་ནས་སྟོད་མི་རུང་བ་དེ་རྣམས་ཐབས་སྟོན་ལགས་ཞུས༔ ཨུ་རྒྱན་རིན་པོ་ཆེའི་ཞལ་ནས༔ ཉོན་ཅིག་ཡེ་ཤེས་མཚོ་རྒྱལ༔ དང་པོ་ལུས་བཅས་གཤིན་རྗེ་འཇིག་རྟེན་སྐྲ་ལ་བསྒྱུར་བ༔ གནམ་ས་ཁ་བཟློག་བྱ་བ༔ ས་གཞི་གདན་དུ་སྤྲུགས་པ༔ བྱད་མ་གཤིན་རྗེ་འཇིག་རྟེན་དམར་ནག༔ དམར་གྲི་སྤྱང་མོ་ཁྲག་ལ་ངར་བླུད་པ༔ སེར་གྲི་འཕར་སྤྱང་ཁྲག་གིས་ངར་བླུད་པ༔ ལྕགས་གྲི་གྲི་ངར་བླུད༔ བསྲུང་བའི་འཁོར་ལོ་མི་བྱེད་གཡོན་དུ་བྲི༔ བར་བར་མིང་དང་མཁན་ལ་སྤེལ༔ བར་སྐབས་རླུང་དང་ཆུ་ལ་བསྐོར༔ ལན་རེ་མེ་ལ་བསྐོར༔ འཇིགས་བྱེད་སེམས་གཉིས་བྱེད་པའི་ཐབས་མི་གདའ༔ མ་འོངས་བུ་སློབ་ཀུན་ལ་འཁུ་བ་ཉམས་སུ་ལོངས་ཤིག་གསུངས༔ དེ་དང་དུས་མཉམ་དུ་འོད་རྟོགས་པར་བྱ༔ མཚོ་རྒྱལ་ཞུས་པ༔ ལགས་སློབ་དཔོན་རིན་པོ་ཆེ༔ ང་མཁར་ཟ་ཤེས་རབ་ཆུང་དེ་ནན་ཏན་ཆེ༔ དང་པོ་ཡེ་མེད་པའི་དུས༔ རྒྱལ་བ་རྣམ་པ་ཐམས་ཅད་མཁྱེན་པ༔ ཡང་དག་དོན་གྱིས་མཆོག་ཆེན་པོ༔ ཐབས་ཤེས་གང་འདུལ་བརྩོན་པ་དང་༔ གོ་ཆ་ལྷ་ལྔའི་རྒྱུད་གང་ཡིན་པ་བདག་ལ་ཅི་གསུངས་ནས༔ འགྲོ་བའི་དོན་ལགས༔ ཨུ་རྒྱན་གྱི་ཞལ་ནས༔ འབྱུང་བ་བཞིའི་དང་པོ་ཀུན་ཏུ་བཟང་པོ་འཁྲུངས་པ༔ དེའི་ཐུགས་ལ་རྒྱལ་བ་རིགས་ལྔ་འཕྲོས་ནས་དེ་རྣམས་འོད་འཕྲོས་ནས༔ པདྨོ་བཀོད་པའི་ཞིང་ཁམས་ནས༔ སངས་རྒྱས་དཔག་ཏུ་མེད་པ་སྟོང་རྩ་གཉིས་རྡོ་རྗེ་འཆང་གིས་སྤྲུལ་པ་འཕགས་པ་འཇམ་དཔལ༔ སངས་རྒྱས་དཔལ་གྱི་ཏོག་ཅེས་སྤྲུལ་པ་རྟ་མགྲིན་རུ་དྲ་འདུལ་བའི་སྐབས༔ སངས་རྒྱས་སྟོང་གི་ནང་དུ་མ་ཚང་བ་ཕྱག་ན་རྡོ་རྗེ་སངས་རྒྱས་དུས་མཉམ་དུ་ཡོད་པ༔ ཀུན་བཟང་ཡུམ་ཆེན་དང་རྒྱུད་པའི་མཁའ་འགྲོ་དེ་དང་དུས་མཉམ༔ འཇམ་དཔལ་འཕྲིན་ལས་སྤྲུལ་པ་ཡཀྴ་མེ་དབལ་ལ་ལྷ་མཆོག་གི་སྤྲུལ་པ་དབང་དྲག་པདྨའི་སྐུར་བཞེངས་ནས༔ དེ་སྐུ་ལྔ་ཡོངས་རྫོགས་གོ་ཆ་ལྷ་ལྔ་འཕྲོས༔ སྲ་བའི་གོ་ཆ་ཡིན་པ་དང་༔ རྣོ་བའི་མཚོན་ཆ་ཡིན་པ་ཁོང་གི་སྙིང་འདྲ་བ་གོ་ཆ་ལྷ་ལྔ་འདི་མ་ཡོད་པའི་ཐབས་སྣང་སྲིད་དབང་དུ་མི་འདུའོ༔ མི་བརྗེད་པ་མཚོ་རྒྱལ་ཉམས་སུ་ལོངས༔ ཞེས་གསུངས༔

མཚོ་རྒྱལ་ཞུས་ནས༔ དེ་རྒྱུད་པ་དང་ཐབས་སྣ་ཚོགས་དེ་དང་མཐུན་པ་ལགས༔ འབྱུང་བཞི་མ་ཆགས་པའི་སྔོན་རོལ་ནས༔ སངས་རྒྱས་ཀུན་ཏུ་བཟང་པོ་འཁྲུངས་པ་ལྟར་གསུངས༔ ཨུ་རྒྱན་གྱི་ཞལ་ནས༔ སྟོང་པ་ལ་གྲུབ་པའི་དྲོད་སྐྱེས་པ༔ གསལ་བ་དེ་གཉིས་ལ་རིག་པ་ཀུན་ཏུ་བཟང་པོ་གཉིས་གྲུབ་པ༔ སེམས་ཅན་ལམ་དུ་འཁྲུལ་པ༔ ཀུན་ཏུ་བཟང་པོ་དབུགས་ལ་རླུང་ཆགས༔ ཐུགས་ལ་ཨེ་འཕྲོས་པ་ནམ་མཁའ་ཆགས༔ ཤ་ལ་གྲུབ་པའི་ས༔ ཁྲག་ལ་གྲུབ་པའི་ཆུ༔ དྲོད་ལ་གྲུབ་པའི་མེ་ཆགས་པ༔ ལྗོན་ཤིང་ལྷུང་བཟེད་ནས་གླིང་བཞི་འཁྲུངས་པ༔ ཐུགས་ཀ་ནས་རིགས་ལྔ་སྐུའི་ཞིང་ཚུལ་རྡོ་རྗེ་འཆང་སྐུར་བཞེངས་པ༔ དེ་ནས་འོད་ཟེར་མི་འདྲ་བ་འཕྲོས་ནས༔ སངས་རྒྱས་དཀར་སེར་དམར་ལྗང་རིགས་མི་འདྲ་བ་ནུབ་ཕྱོགས་པད་མོ་བཀོད་པའི་ཞིང་མི་འདྲ་བ་བཞུགས་པ༔ དེ་རྣམས་ལས་འོད་འཕྲོས་ནས༔ སྣང་མཐའ་འོ་མ་ཅན་འཁྲུངས་པ་འོད་སྲུངས་བསྟན་པའི་དུས༔ འཁོར་ལོས་བསྒྱུར་རྒྱལ་འཁྲུངས་པ༔ འོད་སྲུང་བསྟན་པ་ནུབ་ཀ་ནས་ང་རྒྱལ་བ་ཤཱཀྱ་ཐུབ་པ་འཁྲུངས་པ༔ དེར་མྱ་ངན་ལས་འདས་ནས་ང་སྐྱེས་བུ་འཁྲུངས་པ༔ ཞི་བའི་ཚུལ་ནང་ལྟར་ཀུན་ཏུ་བཟང་པོ༔ ཁྲོ་ཚུལ་ན་ཕྱི་ལྟར་ཆེ་མཆོག་ཧེ་རུ་ཀ༔ དེ་ཁོ་ན་ཉིད་ཁྲོ་ཚུལ་གསང་བ་ལྟར་གཤིན་རྗེ་ཆོས་ཀྱི་རྒྱལ་པོ་ཡིན༔ སངས་རྒྱས་སྟོང་རྩ་གཉིས་མ་རྫོགས་པར་དུ་ངའི་སྤྲུལ་པ་རིག་འཛིན་གཅིག་གིས་འགྲོ་དོན་དུས་མཉམ་དུ་བྱེད་དགོས་པ་ཡིན༔ ཁྱོད་དེ་ལྟར་ཞིབ་ཏུ་ཁྱེད་ལ་སྟེར་བ་ཁྱེད་ཉམས་སུ་ལོངས་ཤིག༔ ང་སྐྱེས་བུ་མདངས་ལྡན་འཁྲུངས་པ༔ རྒྱ་གར་ཡུལ་ནས་ཆོས་མང་པོ་གསུངས་པ༔ བཀའ་འདི་ཆོས་ཀྱི་རྒྱ་མཚོ་ཨིནྡྲ་བྷོ་དྷིའི་ཡུལ་ནས་གསུངས་པ༔ ལོ་ཙཱ་བཏང་ནས༔ མ་འོངས་དོན་དུ་ལྷོ་གཏེར་འདི་ནས་སྦས༔ བསྐལ་པ་སྙིགས་མའི་དུས་ན་དེ་བསྟན་འཛུག༔ ཁྱོད་དེ་ལྟར་ཉམས་སུ་ལོངས་ཤིག༔ ཅེས་གསུངས༔

ཡེ་ཤེས་མཚོ་རྒྱལ་ཞུས༔ ལགས་ཨུ་རྒྱན་རིན་པོ་ཆེ༔ རྒྱུད་དང་ཀུན་རྫོབ༔ དོན་དམ་དེ་རྣམས་སྙིང་པོ་གང་ཡིན་ལགས༔ པདྨའི་ཞལ་ནས༔ རྒྱུའི་སྦྱིན་པ་དགེ་བའི་སྟོབས༔ འདུལ་ཁྲིམས་བསྲུངས་པ་ཚུལ་ཁྲིམས་སྟོབས༔ ཁོང་ཁྲོ་མེད་པ་བཟོད་པའི་སྟོབས༔ ནན་ཏན་བྱེད་པའི་བརྩོན་འགྲུས་སྟོབས༔ གཡེང་བ་མེད་པ་བསམ་གཏན་སྟོབས༔ ས་བཅུ་ཐོབ་པ་ཤེས་རབ་སྟོབས༔ ཀུན་རྫོབ་དམ་པའི་ཆོས་ཀྱིས་ནན་ཏན་བྱེད་ནས་ཀུན་རྫོབ༔ དོན་སེམས་ཉིད་ཆོས་སྐུ་ནི་དོན་དམ་ཡིན་པའི་དེ་དང་ཉམས་སུ་ཆོས་ཀྱི་སྒོ་མཐར་ཕྱིན་པ༔ ལོངས༔ ཞེས་གསུངས༔

མཚོ་རྒྱལ་ཞུས་པ༔ ལགས་སློབ་དཔོན་རིན་པོ་ཆེ༔ ཆོས་སྐུ་རྒྱུད་ཆོས་ཀྱི་ཚུལ་བསྟན་པ༔ ལོངས་སྐུ་རྒྱུད་ཆོས་ཀྱི་སྒོ་འབྱེད་པ༔ སྤྲུལ་སྐུ་ཚུལ་ཆོས་ཀྱི་མཐའ་སྐྱོང་བ༔ དེ་ཅི་ལྟར་དུ་ཕུལ་དུ་བྱོན་ལགས༔ པདྨའི་ཞལ་ནས༔ ཆོས་སྐུ་ཀུན་ཏུ་བཟང་པོ་རྒྱུད་སྟོང་པ་ཉིད་ཀྱི་རྫོགས་རིམ་གྱི་ཁྲིད༔ ལོངས་སྐུ་རྒྱལ་བ་རིགས་ལྔ་གསལ་བའི་དབུ་བ་སྤུ་མཁའ་འགྲོ་གྲངས་མེད་ཡོད༔ བདག་ལ་གསུངས་ཏེ་མ་འོངས་པའི་འགྲོ་བའི་དོན༔ སྲིན་པོ་དེ་བས་མ་འོངས་བསྐལ་པའི་མཐའ༔ ཨུ་རྒྱན་ཁོ་མོ་གཉིས་ལ་རེ་ས་གནས༔ ཐུགས་ངལ་མ་མཛད་རྫུས་སྐྱེས་པདྨ་འབྱུང་༔ སྐུ་ཆགས་ཆེ་སྟེ་རྒྱ་གར་གྲུབ་ཆེན་པ༔ བཀའ་དྲིན་ཆེ་སྟེ་བོད་ཀྱི་སྔགས་འཆང་བ༔ ཐུགས་ནི་ཁྲོ་མེད་ཐུགས་ནི་ཞིབ་མོ་མཛོད༔ ཁོ་མོ་རེ་ས་རྫུས་སྐྱེས་པདྨ་འབྱུང་༔ ཡུན་རིང་དུས་གཅིག་སྐྱེ་བ་མི་སྲིད་དམ༔ མི་ཚེ་རིང་ཞིང་གང་ཡང་ཆ་མི་ཆོད༔ མ་འོངས་བུ་སློབ་སེམས་ཅན་སྙིང་རེ་རྗེ༔ ཐུགས་ངལ་མ་མཛད་རྫུས་སྐྱེས་པདྨ་འབྱུང་༔ བདག་ལུས་ཕུལ་བའི་སྐྱིད་སྡུག་ཁྱེད་ཤེས་ཀྱིས༔ ཐུགས་རྗེས་གདུལ་བྱ་བོད་ཀྱི་ཞིང་ཁམས་སུ༔ ཀུན་ཏུ་བཟང་པོ་སྣང་མཐའ་ཤཱཀྱ་ཐུབ༔ སྤྱན་གཟིགས་སྔགས་འཆང་རྫུས་སྐྱེས་པདྨ་འབྱུང་༔ འགྲོ་བའི་རེ་ས་ཀུན་འདུས་པདྨ་ཁྱེད༔ ཁོ་མོ་བདག་ལ་གསུངས་ཏེ་དྲངས་དུས་མེད༔ རྫུས་སྐྱེས་སྐུ་ལུས་བ་སྤུ་གྲངས་མེད་ལ༔ རྒྱལ་སྲས་ཚད་འཛིན་དེ་སོས་བྱེ་བ་ཕྲག༔ ཁྱབ་ཀྱི་ཁྱི་རྫུ་བུ་ཡིས་སྨོན་ལམ་བཏབ༔ མཆོད་རྟེན་འདི་ལ་བུམ་པ་ངས་བཏགས་ནས༔ མགོ་ནག་ཡོངས་ཀྱི་རྒྱལ་པོ་ང་གྱུར་ནས༔ སུ་ཡང་འགྲན་བཙུགས་མེད་པར་ཤོག༔ ཅེས་གསུངས་ནས༔ ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་ཡིན༔ དེའི་དུས་སུ་སྦྲུལ་བསད་པ༔ བཙུན་མོ་དམར་བརྒྱན་ཡིན་པས་ད་ལྟ་དབང་ཤོར་བ་དེའི་ལན་ཆགས༔ འབྲུ་ཟས་ཟབ་དུས་བསད་པ༔ ཕག་རྫི་བུ་ངས་སྨོན་ལམ་བཏབ་པ༔ མཆོད་རྟེན་འདི་ལ་བུམ་པ་ངས་བཏགས་ནས༔ རྫུས་སྐྱེས་ལྷ་འདྲེ་མི་གསུམ་འདུལ་བར་ཤོག༔ དེར་ང་པདྨ་འབྱུང་གནས་ཡིན་པས༔ དེའི་དུས་གྲོག་མ་གཅིག་བསད་ནས༔ སྟག་ར་ཀླུ་གོང་ཡིན་པས་འདི་སྐབས་འདུལ་དགོངས་པའི་དོན༔ བྱ་རྫི་བུས་སྨོན་ལམ་བཏབ་པས༔ མཆོད་རྟེན་འདི་ལ་བུམ་པ་ངས་བཏགས་ནས༔ མཁན་དུ་གྱུར་ནས་མཁན་སློབ་ང་ལས་ལྷག་པོ་མེད་པའི་སྨོན་ལམ་བཏབ་པ་ཡིན༔ རྐང་ཞབས་དུ་འབུ་ནག་གཅིག་ཤི་ནས༔ བཙུན་མོ་དམར་རྒྱན་ཡོད་པའི་ས་ནས༔ ཕྱག་འཚལ་དགོས་པའི་ལས་རྟ་རྫུ་བུས་སྨོན་ལམ་བཏབ་ནས༔ དེ་དུས་འཕྲིན་བློན་བྱེད་པའི་སྨོན་ལམ་བཏབ་ནས༔ དེའི་དུས་གླང་དུ་རྡོ་བརྒྱབ་ནས་རྣམ་སྨིན་རྩིབས་མ་གཡས་ན་ཡོད༔ གླང་དེས་བསྟན་པ་བསྣུབ་པའི་སྨོན་ལམ་བཏབ་ནས༔ ཅི་ཡང་མི་མ་ཡིན་པའི་ཐབས༔ ཕོ་རོག་ཐོག་ཏུ་ངའི་འདུལ་བའི་སྨོན་ལམ་བཏབ༔ དུས་སྐབས་དུད་འགྲོ་སྤྲུལ་པ་རྒྱབ་ན་ཤ་མཚན་དམར་པོ་འདུག༔ དམར་བརྒྱན་སྤྲུལ་པ་ངོ་ལ་ཁྲག་ཐིག་འདུག་པ༔ སྟག་རས་སྤྲུལ་པ་སྐེ་ན་ནག་མཚན་འདུག༔ དེ་འདྲ་བ་ཡིན་ཏེ་ཉམས་སུ་ལོངས༔

ཨུ་རྒྱན་གྱི་ཞལ་ནས༔ དང་པོ་གདོད་མ་རྣམ་པར་དག་མཛད་པ༔ མི་མིན་འདྲེ་ཡུལ་ཆོས་ལ་ཉན་པར་མེད༔ མཚོ་རྒྱལ་ཚེ་གཅིག་བྱང་ཆུབ་ཐོབ་སླད་དུ༔ ད་ཡང་དམ་པའི་ཆོས་ཕྱིར་ཐུབ་མི་སྲིད༔ ཡུན་རིང་བུ་མོ་ཆོས་རྣམས་རང་གྲོལ་ནས༔ རི་ཁྲོད་གནས་འགྲིམས་ཞི་བའི་ལས་རྣམས་མེད༔ ཁོ་མོ་རྗེས་ཕྱིར་སྤོངས་དང་ཆོས་མེད་པ༔ བདག་འདྲ་ཡེ་ཤེས་མཚོ་རྒྱལ་ང་ལ་གསོན༔ ཐུགས་དམ་དགོངས་འཕེལ་རི་ཁྲོད་གནས་སུ་འདུག༔ ཀུན་གཞི་བརྟན་པའི་མོ་ལུས་འདི་ཐོབ་པ༔ ཆོས་ཀྱི་འཁོར་ལོ་བསྐོར་བའི་ཐབས་མི་དགོངས༔ རྗེ་ཕྱིར་ཆོས་རྣམས་ཉན་པར་ལས་མི་མེད༔ རི་ཁྲོད་གནས་སུ་ད་འགྲོ་མགོན་རྩལ་མཛད༔ དེ་འདྲ་ཆོས་སྤྱོད་མི་ཐུབ་སེམས་ཉིད་བསྒོམ༔ ཞེས་གསུངས༔ མཚོ་རྒྱལ་ཞུས་པ་ལགས༔ སློབ་དཔོན་ཆེན་པོ་འཇིག་རྟེན་འདི་རྣམས་མ་ཉན་པ་མེད་པས༔ མ་འོངས་སེམས་ཅན་ཐམས་ཅད་ཀྱི་དུས་ཚེ་རབས་སུ་དམ་པའི་ཆོས་རྒྱུད་ལ་འཛིན་ནས༔ ཁོ་མོ་མི་བརྗེད་ཐོབ་པའི་འགྲོ་ལ་སྤེལ༔ གསུངས་ནས༔

འདི་གསོལ་ཏེ༔ ཀྱེཿཨུ་རྒྱན་ཆེན་པོ་པདྨ་འབྱུང་༔ མི་རྣམས་སྲིན་པོ་ཆོས་ལ་མོས་པ་མེད༔ མི་མིན་འདྲེ་ཡུལ་བྱ་རོག་གདོང་ཅན་འདིར༔ སྲིན་པོ་དགེ་མེད་སྡིག་ལ་མོས་པ་ཡོད༔ ཆོས་རབ་ཉན་པའི་སྲིན་པོ་སྣོད་མི་ལྡན༔ བཀའ་བློ་བསྟན་པའི་ཁོ་མོ་ང་འདྲ་བ༔ བདག་ལ་གསུངས་ཏེ་གཟིགས་པོ་དོན་མ་ཡིན༔ རང་ལུས་ལྷ་རྣམས་བརྒྱ་སྟོང་དཔག་མེད་རྣམས༔ བརྒྱན་པ་ཆོས་ཀྱི་སྒོ༔ གང་འདུལ་རིག་པ་དྲི་མ་མེད་པ་ལ་དོན་མཐར་ཕྱིན་པ་དང་ཉམས་སུ་ལོངས་ཞེས་གསུངས༔ ཁྱེད་བུད་མེད་བརྩོན་འགྲུས་ཆེ་བ་དེ་སྐབས་ནས༔ ཆོས་མོས་པ་དགེ་བ་ལ་འཇུག་པ་བསྐུལ་མཆོག་ཡང་དག་དོན༔ འདི་ལྟར་གཅེས་པའི་ཉམས་སུ་ལོངས༔ ཡེ་ཤེས་མཚོ་རྒྱལ་ཞུས་པ༔ ཨུ་རྒྱན་རིན་པོ་ཆེ་ལགས༔ ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་འདི་དང་ཁྱེད་སྔ་རབས་གང་འདུལ་གྱི་ཐབས་ཨེ་ཡིན་ལགས༔ པདྨའི་ཞལ་ནས༔ རིགས་ཀྱི་བུ་མོ་ཉོན་དང་༔ བལ་པོ་ཡུལ་ཕའི་མིང་བ་རྒོད་ཀྱི༔ དེའི་བུ་བཞི་ལ་ཁྱི་རྫི་ལ་ཁྱི་དར་སྐྱབས་མིང་༔ ཕག་དར༔ བྱ་ལོ༔ རྟ་ཕྱུགས༔ དེ་དཔོན་པོ་ཁ་གདུང་མིང་སྲིད༔ དེ་བཞི་ངེད་བཞི་བལ་ཡུལ་དེར་མཆོད་རྟེན་གཅིག་བཞེངས་ཟེར་བ༔ དཔོན་པོ་ཁྱེད་མཆོད་རྟེན་བཞེངས་ནས་མི་རྣམས་ཅི་ཡང་ཟེར་བ༔ བཞེངས་ནས༔ ཕན་མེད་སྨྲས༔ གླ་དཔོན་པོ་སྦྱིན་པ་མཆོད་རྟེན་བཞེངས་ནས༔ ཁྱི་དར་འཆང་བ་ཙམ་གྱིས་འགྲོ་བའི་དོན༔ བླ་མའི་སྐུ་ནི་ནམ་མཁའ་འདྲ༔ གཡོ་བ་མེད་པ་ཆོས་ཀྱི་སྐུ༔ བླ་མའི་གསུང་ནི་ཚངས་པའི་དབྱངས༔ ཀ་ལ་པིང་ཀ་ལྟ་བུའི་ཆོས་གཅིག་གསུངས༔ ཁོ་མོ་རྣ་ལམ་ཐོས་ཏེ་ཡིད་ལ་འཆང་༔ བླ་མའི་ཐུགས་ནི་ཉི་ཟླ་འདྲ༔ ཁོང་གི་སྙིང་འདྲ་བདག་ལ་གསུངས༔ བདག་གིས་ཡིད་འཆང་འགྲོ་ལ་གསལ༔ ཁོ་མོ་དྲན་ཞིང་ཁྱོད་བསམ་མོ༔ ཨ་ཙམ་བླ་མ་དྲན་པར་བྱ༔ ཁོ་མོ་བདག་ལ་ཐུགས་རྗེའི་མ་ཆུང་ཞིག༔ མ་འོངས་བུ་རྣམས་དོན་དུ་ཐུགས་ངལ་མ་མཛད་ཅིག༔ ཁོ་མོ་བདག་ལ་ཐུགས་ངལ་མཛད་ཙམ་ན༔ ཁོ་མོ་བདག་གི་ཞེ་བློ་བདེ༔ བླ་མའི་ཅི་གསུང་དམ་པའི་ཆོས༔ ཐུགས་ངལ་མཛད་པའི་ཁོ་མོ་རྣ་ལ་སྙན༔ ཆོས་རྔ་ཆེན་པོ་ལྟ་བུར་ཕེབས་པར་ཤོག༔ སྐུ་མདོག་མཚན་དང་ལྡན་པའི་ལྷ་མེ་བ༔ ཉི་སྟོང་གཟི་བརྗིད་རི་རྒྱལ་བརྗིད་ཆེ་བ༔ ཁོ་མོ་བདག་གིས་ལན་ལྟས་མཐའ་ཡིད་སྐྱིད༔ མོ་བདག་ལ་ཐུགས་ངལ་མཛད་པར་ཞུས༔ འགྲོ་ལ་བརྩེ་བའི་ཐུགས་རྗེས་ཟུངས༔ ཁོ་མོའི་ཞུ་ཕོད་བྱས་པའི་དོན་མ་གསུངས༔ གནས་པའི་ཉམས་ལ་དག་པའི་ཞུས༔ སྣང་བའི་རིག་པ་ཉམས་པ་སྣང་བའི་གཞི༔ ཞི་བ་ཙམ་གྱིས་རིག་པ་གྲོལ༔ སངས་རྒྱས་སྐུ་ལ་དྲག་པོ་ཞུས༔ ཞུ་བ་ཙམ་གྱིས་དམ་ཆོས་མཛད༔ བརྩོན་འགྲུས་ཙམ་གྱིས་བྲག་བཀའ་བ༔ ཆད་ཉམས་པ་མེད་པའི་ཆོས་ཤིག་གསུངས༔ རྫུས་སྐྱེས་ལོ་བརྒྱད་ཆུང་བ་བདག་གིས་ཞུས༔ སྐུ་མདོག་ཞལ་འཛུམ་མདངས་པའི་ཞུས་ཕོད་ཡིན༔ ཁྱེའུ་ཆུང་བའི་བུ་ཆུང་གཞོན་ནུ་ལུས༔ ཁོ་མོ་ན་ཆུང་འདྲ་བའི་ཞུ་བ་ཕུལ༔ ཐུགས་ངལ་མ་མཛད་སྤྲུལ་སྐུ་རིན་པོ་ཆེ༔ ཁོ་མོ་བདག་ལ་ཐུགས་རྗེའི་མ་ཆུང་ཞིག༔ ཅེས་ཞུས༔

མ་འོངས་འགྲོ་བའི་བུ་སློབ་རྣམས༔ ཆོས་ཀྱི་མཐར་ཕྱིན་བསྟན་པ་ཨེ་བཟུང་ངམ༔ རྫུས་སྐྱེས་བཀའ་དྲིན་ཆེ་བ་ཨེ་གསུངས་ནས༔ ཁོ་མོ་དྲིན་ཅན་བསམ་པ་ཨེ་གསུངས་ནས༔ བོད་འབངས་དོན་དུ་པདྨའི་བཀའ་ཆེ་བ༔ ཁོ་མོ་བདག་ནི་དྲིན་ཆེ་བ༔ གསོལ་བ་བཏབ་པ་དྲིན་ནི་ཨེ་ཡོད་དམ༔ དྲན་པ་ཙམ་གྱིས་མཐོ་རིས་ཐར་ལམ་ཟིན༔ མ་འོངས་བུ་སློབ་རྗེས་ཕྱིར་ཨེ་སྐྱོང་ངམ༔ ལྷུན་པོ་རབ་དྲུང་རི་བྲག་གཅིག་བཀོད་དེ༔ དེ་བཀོད་འགྲོ་དྲུག་སེམས་ཅན་ཐམས་ཅད་རྣམས༔ རྫུས་སྐྱེས་པདྨའི་ཐུགས་རྗེས་བཟུང་བར་ཞུས༔ སྔགས་འཆང་པདྨའི་སྐུ་ལ་ཕྱག་འཚལ་བསྟོད༔ ཁོ་མོ་སྙིང་རུས་ཅན་ལ་ཆོས་གཅིག་གསུངས༔ ཁོ་མོ་མི་བརྗེད་ཐོབ་པ་བླ་མའི་དྲིན༔ ཤེས་རབ་ཆེ་བ་བླ་མའི་དྲིན༔ སྤྲོས་པ་ཆེ་བ་བླ་མའི་དྲིན༔ ནན་ཏན་ཆེ་བ་བདག་གི་ལུས༔ བརྩོན་འགྲུས་ཆེ་བ་བདག་གི་ལུས༔ གཏོང་ཕོད་ཆེ་བ་བདག་གི་ཡིད༔ ཁོ་མོ་རྗེས་ཕྱིར་སྐྱོང་བར་བཞེས༔ བཟོད་དཀའ་ཁྱག་པ་ཁོ་མོའི་ལུས༔ ཁོ་མོ་བདག་ལུས་སྙིང་རུས་ཆེ༔ སྙིང་རུས་ཆེ་བ་རྗེ་བཙུན་འདི་དང་མཇལ༔ འཆི་ན་འགྱོད་ཀྱིས་ལས་དབང་མེད༔ གསོན་ཏེ་རྫུས་སྐྱེས་བཀའ་བསྒྲུབ་བོ༔ བདག་གི་བླ་མ་ངོ་མཚར་འདི་སྤྲུལ་ཆེ༔ གཞོན་ནུ་ལོ་བརྒྱད་ན་ཚོད་མཚར་རེ་ཆེ༔ ཁོ་མོ་བདག་གི་རྟོགས་པ་དངོས་འདྲ་བ༔ ཁོ་མོས་ཞུས་པས་རྫུས་སྐྱེས་པདྨའི་གསུངས༔ ལན་གཅིག་བལྟས་ན་བསྐལ་པ་མཐའ་མ་སྐྱིད༔ འདི་འདྲ་ཁོ་མོ་ཞེ་བློ་བདེ༔ འདི་འདྲའི་ཁོ་མོ་ཅི་བསམ་འགྲུབ༔ སྤྱོད་པ་དམན་པའི་ལས་ལ་ཤོར་བ་མེད༔ མ་འོངས་འགྲོ་བའི་དོན་དུ་རྫུས་སྐྱེས་དགོངས༔ ཐུགས་རྗེའི་མ་ཆུང་པདྨ་འབྱུང་༔ བྱིན་རླབས་མཆོག་དེ་ཁོ་མོ་བདག་ལ་གནོངས༔ རང་བཞིན་ཤུགས་ལས་འགྲུབ་པའི་བདག་གིས་ཉན༔ བདག་ལ་ཐུགས་རྗེས་གཟིགས་སུ་གསོལ༔ སྐུ་མདོག་དུང་ལྡན་མཚན་བཟང་ཤངས་དཀྱུས་དང་༔ ཨ་ཙར་ལྟ་བུ་བཅུ་དྲུག་ཚོད༔ པད་ཞུ་རྒོད་སྒྲོ་ཉི་ཟླས་བརྒྱན༔ དར་སྣ་ལྔ་ཡི་ཟ་འོག་བེར་ཆེན་མནབས༔ ཁོ་མོ་བདག་ལ་ཆོས་མཛོད་ཅིག༔ དུས་གསུམ་སངས་རྒྱས་ཀུན་གྱི་ངོ་བོ་ཉིད༔ འགྲོ་དོན་པདྨ་འབྱུང་གནས་སྤྲུལ་པའི་སྐུ༔ ཁོ་མོ་སྤྲུལ་པའི་བླ་མ་ངོ་མཚར་ཆེ༔ གནས་པའི་ཆོས་ཀྱི་ཆོས་སྤྱོད་མཛད༔ ཁོ་མོ་བདག་ལ་ཐུགས་རྗེས་ཡང་ཡང་གཟིགས༔ འཇིག་རྟེན་སོ་ནམ་ས་ཞིང་བྱེད༔ ཁོ་མོ་བསོད་ནམས་ཆོས་ལ་བྱེད༔ གཞན་ཚོའི་བུད་མེད་ཕ་ཞིང་ནམ༔ སྣ་ས་ཕ་མིང་ནམ་ཚ་བཏང་༔ དགེ་བའི་ཏིལ་མེད་སྡིག་པ་རབ་སྤོང་ངོ་༔ ཁོ་མོ་རྒྱབ་བརྟེན་དམ་པའི་ཆོས༔ རེ་ས་སྐྱབས་གནས་དཀོན་མཆོག་གསུམ༔ སྣ་ས་ཕ་མིང་གནས་སྤངས་པ༔ ཁོ་མོ་རེ་ས་པདྨ་ཁྱེད༔ ཐུགས་རྗེ་མཆོག་གི་གནས་སུ་བཟུངས༔ འགྲོ་ལ་ཐུགས་རྗེ་མཉེས་པར་ཞུ༔ ཞེས་ཞུས༔ པདྨའི་ཞལ་ནས་ཀྱང་འདི་ལྟར་གསུངས༔

ཨེ་མ་ཉོན་ཅིག་སྐལ་ལྡན་མོ༔ ཞི་བའི་ལྷ་ཡི་མཛད་པ་པོ༔ ཁྱོད་འདྲ་བུད་མེད་སྙིང་སྟོབས་ཆེ༔ དམ་ཆོས་བཀའ་སྩལ་ང་ཡི་གསུངས༔ བུད་མེད་སྙིང་སྟོབས་ཡིད་ལ་འཆོང༔ བསམ་ཞིང་རྗེ་བཙུན་ང་དྲན་གྱིས༔ བླ་མའི་བཀའ་ཡི་ཚིག་དམ་གྱིས༔ མི་བརྗེད་གཟུངས་མཆོག་སྙིང་རུས་ཅན༔ ཉན་པ་ཙམ་གྱིས་བདག་གིས་གསུངས༔ ཁོ་མོ་དྲན་པ་ཤིན་ཏུ་མཚར༔ བདག་འདྲ་གྲོགས་པོ་མཚོ་རྒྱལ་དང་༔ ངེས་པའི་དོན་ལ་བཀའ་འཆང་བ༔ བརྩོན་འགྲུས་ཆེ་བས་བཀའ་སྩལ་པ༔ དེང་ནས་གནས་པའི་ཕྱིན་ཆད་ལ༔ འཁོར་འདས་སྟོན་པ་རབ་གྲོལ་བ༔ པདྨ་ང་ཉིད་གསང་བའི་བདག༔ བུད་མེད་མཚོ་རྒྱལ་ཁྱོད་ལ་ཆོས་གཅིག་གསུངས༔ དབང་ཐོབ་ཙམ་གྱིས་བདག་པོར་གྱུར༔ ལུང་ཐོབ་ཙམ་གྱིས་བདག་པོར་གྱུར༔ ཞེས་གསུངས༔ མཚོ་རྒྱལ་ཉོན་དང་༔ རང་ལུས་ཞིང་ཁམས་འདུ་ཤེས༔ སྤྱི་བོར་བླ་མའི་འདུ་ཤེས༔ མགྲིན་པ་ཡི་དམ་འདུ་ཤེས༔ སེམས་ཉིད་སྐུ་གསུམ་གྱི་འདུ་ཤེས༔ རྩ་རྣམས་ལམ་གྱི་འདུ་ཤེས༔ སྤྱིར་ལྷ་བསྒོམ་པ་རང་ལུས་དཀྱིལ་འཁོར་གཉིས་མེད་ལྷར་ཤེས་པ་མདུན་གྱི་སྐྱབས་ཡུལ་བསྒོམ༔ སྐྱབས་གནས་དཀྱིལ་འཁོར་དང་པོ་ལྷར་བཞེངས་པ༔ ས་གཞི་རི་བོ་གཏོར་མ༔ རྡོ་རྣམས་བཤམས༔ ཆུ་རྣམས་བདུད་རྩི་བསྒོམས་ནས་ཞིང་ཁམས་ཀྱིས་གཏོར༔ དཀྱིལ་འཁོར་དང་གཏོར་མ་བྱ་བའི་དམིགས་རྟེན་དངོས་བཅས་རྣམས་རྟེན་གྱི་དཀྱིལ་འཁོར་བུམ་པ་རང་ལུས་ལྷར་ཤེས་པ༔ སྟོང་ཉིད་ནང་ནས་རིགས་པ་བརྒྱན་པ་ཆོས་སྐུ་བུམ་པ༔ རྩ་རྣམས་ནང་རླུང་བརྒྱན་པ༔ ལོངས་སྐུ་བུམ་པ༔ གསང་བའི་ལས་ཀྱི་བརྡ་ནི་མཁའ་འགྲོ་གསང་བའི་བུམ་པ༔ ཀུན་གཞི་ནང་དུ་སྣང་བའི་བརྒྱན་ན་སྤྲུལ་སྐུ་བུམ་པ༔ ཕྱི་སྣོད་འཇིག་རྟེན་ནང་བཅུད་བརྒྱན་པ་ཕྱིའི་བུམ་པ༔ རང་ལུས་ནང་དུ་ཁྲག་རྣམས་བཀང་བ་ནང་གི་བུམ་པ༔ དབང་པོ་ལྔ་རབ་ཏུ་གནས་དོན་གྱི་བུམ་པ༔ བྱ་བའི་རྗེས་ཀྱི་དངོས་བཅས་རྣམ་རྒྱལ་བུམ་པ༔ མཆུ་འཕྱངས་པ་ཆོས་སྐུ༔ ཁ་ཡེལ་བ་ལོངས་སྐུ༔ མགྲིན་པ་ཕྲ་བ་སྤྲུལ་སྐུ༔ ནང་དུ་ཆུ་སྣ་ཚོགས་ཀྱིས་བཀང་བ་ཁོ་ན་ཉིད་ཀྱི་བུམ་པ༔ བླ་མ་ལ་ཤེས་པ་བཞི་ཡོད་པ༔ རང་རིག་ཆོས་སྐུ་ལྡན་པ་དོན་གྱི་བླ་མ༔ བསྐྱེད་རིམ་སྔགས་དང་ལྡན་པ་གཉིས་མེད་བླ་མ༔ མདོ་རྒྱུད་ཆོས་ལ་གནས་པ་ཕྱིའི་བླ་མ༔ བཀའ་རྒྱུད་ཆོས་ཀྱི་རྗེས་འཛིན་དོན་གྱི་བླ་མ༔ དབང་བསྐུར་ལུགས་མང་སྟེ༔ རིག་པ་ཆོས་སྐུ་སྤྲད་པ་ནང་གི་དབང་༔ ལྷ་རྣམས་སྤྱི་བོ བཞག་པ་ཕྱིའི་དབང་༔ གསང་བའི་དབྱིངས་དོན་སྤྲད་པ་གསང་བའི་དབང་༔ རང་ལུས་ལྷ་གནས་སྤྲད་པ་སྤྲུལ་སྐུའི་དབང་༔ མགྲིན་པར་རིག་འཛིན་སྤྲད་པ་ལོངས་སྐུའི་དབང་༔ དུང་ཁང་ཁྲག་འཐུང་བཤད་པ་ཆོས་སྐུའི་དབང་༔ མཐོང་ལམ་སྦྱོར་ལམ་དང་༔ མཐོང་གྲོལ་ཆོས་སྐུ་རྟོགས་པ་སྣང་བའི་རབ་ཐག་བཅད༔ གསང་སྦྱོར་སྟོང་གསལ་འབྲེལ་པ་སྦྱོར་བའི་ལམ༔ དེ་དང་ཉམས་སུ་ལོངས༔ ཞེས་གསུངས༔

མཚོ་རྒྱལ་ཞུས་པ༔ ཨུ་རྒྱན་རིན་པོ་ཆེ༔ དབང་དང་བསྐྱེད་རྫོགས་གང་གིས་ཆེ་བ་ལགས༔ ཞུས༔ ཨུ་རྒྱན་གྱི་ཞལ་ནས༔ དབང་ནི་ཤེས་བཞིན་དང་ལྡན་པ་གཅིག་གིས་དགོས་པ༔ བསྐྱེད་རྫོགས་ཟུང་འཇུག་འོད་དཔུང་ཆེན་པོ་མཆོག་གི་གོ་འཕང་བྱ༔ ཁྱོད་དེ་དང་ཉམས་སུ་ལོངས་ཤིག༔ ཁྱོད་བུད་མེད་རིགས་འདི་རྣམས་ཞིབ་ཏུ་མི་མོས་པ༔ སྣང་སྲིད་འཁོར་འདས་ཁྱོད་ཉམས་སུ་ལོངས་ཤིག༔ སྣང་བའི་རང་ཐག་བཅད༔ ཟུང་འཇུག་འོད་དཔུང་གི་དོན་མ་ནོར་བ་བྱ༔ ང་དང་སྤྱོད་པ་མཐུན་པ་ལན་རེས་ལོ་བཅུ་དྲུག་ན་ཚོད༔ ལོ་ལྔའི་ན་ཚོད་དེ་འདྲ་བ་བྱེད་པ༔ ཁྱོད་བུད་མེད་མཁར་ཆུ་ཟ་ཆུང་ནས་བློ་སེམས་སྤྲོས་པ༔ དེ་དང་དུས་མཉམ་དུ་འོད་མི་མངོན་པ་རང་འདུག༔ སྔགས་རིམ་ཡོན་ཏན་གང་ཟག་མོས་པ་ཅན༔ བློ་སྟོབས་ཆེ་བ་ཁྱེད་མི་མངོན་པར་བྱའོ༔ རྒྱལ་པོ་ཁྲི་སྲོང་ལྡེའུ་བཙན་འདི་བཙུན་མོས་བསླུ་བའི་ཐབས་སྣ་ཚོགས་འདུལ་བའི་སྐབས་ནས་ཁྱོད་ལ་དུག་དྲངས་ནས༔ ཁྱེད་མ་འཐུང་བ་ངོ་མཚར་ཆེ༔ དུས་བདུན་དུ་ངས་གསོན་སྲེག་བྱེད་པ༔ དེ་རིང་ཁྱོད་གར་ཡོད་དམ༔ དེ་རིང་ང་ཨིནྡྲ་བྷོ་དྷི་ཡུལ་ནས་ཡང་ང་འདུག་གཡོང་བའི་ཡང་གསོན་སྲེག་བྱེད་པ་དེ་རིང་ཁྱོད་གར་འདུག་གམ༔ མན་དྷ་ར་བ་ལས་ཀྱི་དོན༔ གསོན་བསྲེག་ལན་གཉིས་བྱེད་པ༔ ཁྱོད་བུ་མོ་མཁར་ཟ་ཁྱོད་ལས་དོན་ཅི་ཡང་མ་ཡོད་པ༔ ཁྱོད་ང་རང་མདུན་དུ་ཡོང་པ༔ ཁྱོད་ལས་དག་པ་རིག་པ་གཞོན་ནུ་དུང་ལྡན་མ༔ ཁྱིམ་ཐབ་བྱེད་སྤངས་ནས་ཇོ་མོ་བྱེད་པ་དེ་རིང་ཁྱོད་འགྲོ་དོན་བྱེད་པའི་མཆོག་ཡོང་༔ བདག་འདྲ་ཡེ་ཤེས་མཚོ་རྒྱལ་འགྲོ་བའི་དོན་དུ་སེམས་ཅན་ཐམས་ཅད་སངས་རྒྱས་ཕྱིར་དུ་འགྲོ་དོན་ཆེན་པོ་ཡོང་༔ གང་འདུལ་ཐབས་སྟོན་པ་མཁར་ཆུ་ཟ་ཁྱོད་འདྲ་བའི་བུད་མེད་རིགས་སད་པ་ལས་དག་པ༔ མི་བརྗོད་པ་ཤིན་ཏུ་ཡང་མཚར༔ ཁྱོད་འགྲོ་དོན་མཆོག་གི་རྒྱ་ཆེན་པོ་འབྱུང་༔ ཞེས་གསུངས༔

ཡེ་ཤེས་མཚོ་རྒྱལ་ཞུས་པ༔ ལགས་སློབ་དཔོན་རིན་པོ་ཆེ༔ ཁྱོད་ཟ་ཧོར་ན་ཡོད་པའི་དུས་དུར་ཁྲོད་བསིལ་བའི་ཚལ་ནས་མཁའ་འགྲོ་གླིང་ནས་ཡོད་པ༔ ཁྱོད་ཨིནྡྲ་བྷོ་དྷི་ཡུལ་ན་ཡོད་པ༔ ང་བསིལ་བ་ཚལ་ནས་ཡོད་པ༔ ཁྱོད་མཁའ་འགྲོའི་ཚོགས་དཔོན་མཛད་པའི་དུས་ང་དེར་ཡོད་པ༔ དེ་ཡང་མཁར་ཆུ་ཡུལ་ནས་ཡོང་པས༔ བདག་ལ་ད་ཡང་ཐུགས་རྗེའི་མ་ཆུང་ཞིག༔ ང་རང་སྔོན་ལས་སད་རིགས་སད་པ་གཅིག་ཡང་ཁྱེད་མཐོང་བ་ཙམ་གྱིས་བདག་གྲོལ་བ་དེ་ཤིན་ཏུ་ཡང་བཀའ་དྲིན་ཆེ་སྟེ༔ སྒོས་ཁྱད་པར་ཅན་གྱི་མུན་པའི་གླིང་དུ་ཐུགས་རྗེ་ཁྱེད་ཀྱིས་མཛོད༔ འགྲོ་ལ་བརྩེ་ཕྱིར་དུ་མ་འོངས་སེམས་ཅན་ཐམས་ཅད་ཀྱི་དོན་དུ་ཁྱོད་གང་འདུལ་གྱི་སྤྲུལ་པ་དཔག་མེད་འགྱེད་པའི་དུས་འགྲོ་དོན་བྱ་བ་གཅིག་ཞུས་ལགས༔ ཨུ་རྒྱན་གྱི་ཞལ་ནས་ང་འགྲོ་བའི་དོན་ལ་ཐབས་གང་འདུལ་སྟོན་པ་མི་མངོན་རྣམ་དག་ངས་བརྗེད་མི་བྱ་བ་ཐབས་བྱ༔ ད་ཡང་ཁྱོད་བགྲང་བའི་སྐབས་འདིར༔ ཨོཾ་ཨཱ༔ ཧཱུཾ༔ གུ་རུ་དྷེ་ཝ་དྷཱཀྐི་ནི་སརྦ་སིདྡྷི་ཧཱུཾ༔ ཁྱོད་སྤྱི་བོར་ཨོཾ་བསྐྱེད་ལ་གུ་རུ་བླ་མས་བསྐོར་བ༔ མགྲིན་པ་ཨ་ལས་དྷེ་བ་ཡི་དམ་གྱིས་བསྐོར་བ༔ ཐུགས་ཀ་ནས་ཧཱུཾ་ལས་དྷཱཀྐི་མཁའ་འགྲོས་བསྐོར་བ༔ བྱིན་རླབས་ཐམས་ཅད་མཐུན་པར་སྦྱོར་ལ་དེ་དང་ཉམས་སུ་ལོངས་ཤིག༔ ཅེས་གསུངས༔ ཡེ་ཤེས་མཚོ་རྒྱལ་གྱིས་ཞུས་པ༔ ལགས་ཨུ་རྒྱན་ཆེན་པོ་ཐབས་མི་འདུལ་བའི་ཐབས༔ སྐད་ཅིག་དྲན་རྫོགས་གཅིག་གི་གནོད་བྱེད་དབང་གིས་བསྡུད་པ༔ བགྲང་པ་ཙམ་གྱིས་གནོད་བྱེད་སྲེག་པ་གཅིག་གནོངས་ནས༔ གནོད་བྱེད་བསྒྲལ་ཐབས་གནང་༔ ཞེས་ཞུས༔

ཨུ་རྒྱན་ཞལ་ནས༔ རིགས་ཀྱི་བུ་མོ་ཉོན་དང་ངས་བཤད་དོ༔ བདག་ཉིད་མ་བཅོས་རྫོགས་པའི་ཁྲོལ་ཆེན་པོ་བསྐྱེད་ནས༔ ཐུགས་ཀར་རྡོ་རྗེ་ལྟེ་བར་ཧཱུཾ་དམར་ནག་བསྒོམས་ནས༔ བཛྲ་ཧཱུཾ་བརྗོད་པ༔ རཀྴ་ཧཱུྃ་ཤེས་བརྗོད་པ༔ རྒྱུ་མ་ནོར་བའི་ཧཱུྃ་ལ་ཧཱུཾ་འཕྲོས་ནས༔ གདོན་སྡིག་པ་ཅན་ལུས་སེམས་ཐལ་བར་དབང་དུ་བསྡུས༔ ཡཀྴ་ཧཱུཾ་ཞེས་བརྗོད་པའི༔ ཐུགས་ཀ་ནས་ཧཱུཾ་ལས་འོད་ཟེར་འཕྲོས་པ༔ ཡཀྴ་མེ་དབལ་སྐུ་གྲངས་མེད་པར་གྱུར་ནས༔ སྣང་སྲིད་སྡེ་བརྒྱད་ཐམས་ཅད་ཚར་བཅད་པར་བསྒོམ༔ དེ་དང་ཉམས་སུ་ལོངས་དང་༔ སྣང་སྲིད་སྡེ་བརྒྱད་ཐལ་བར་བརླག་ངེས་པ་ཅན་ཐེ་ཚོམ་མི་བྱའོ༔ དེ་དང་མཚུངས་པ་མི་བརྗེད་བར་བྱའོ༔ དེས་དང་བགྲངས་ནས༔ ལུས་དབང་དྲག་ཏུ་ཤེས་པ་ངག་སྔགས་སུ་ཤེས་དག་ནས་མེ་འཕྲོས་པ༔ ཡིད་ཏིང་ངེ་འཛིན་དང་ལྡན་པ་འོད་དག་པར་བསྒོམ༔ ཞེས་གསུངས༔ ཡེ་ཤེས་མཚོ་རྒྱལ་ཞུས་པ༔ ཨུ་རྒྱན་པདྨ་ལགས༔ མ་འོངས་དོན་བཀའ་རྒྱུད་ཆོས་ཀྱི་རྒྱ་མཚོ་རྗེས་འཛིན་དོན་བྱ་བའི་ཆོས་གཅིག་གསུངས་ནས༔ འགྲོ་བའི་དོན་དུ་ཁོ་མོ་ཡིད་ལ་འཆང་༔ ཞེས་ཞུས་ནས༔ པདྨའི་ཞལ་ནི་ཐེག་མཆོག་ཡང་དག་ཉིད་ཀྱི་ཡང་དག་ལ་ལྟ་བ་མཐོང་ནས༔ རྣམ་པར་གྲོལ་བའི་མཐར་ཕྱིན་པ་མེད་པ་མ་ཐོག་པ་ཐོགས་པ་མེད་པ་དེ་དང་ཆ་མཚུངས་པའི་དོན་རྒྱ་ཆེན་པོ་བྱའོ༔ ཞེས་གསུངས༔ མཚོ་རྒྱལ་ཞལ་ནས༔ འདི་ཞུས་སོ༔

ཨེ་མ་ཧོ༔ མུན་པའི་གླིང་དུ་ཐུགས་རྗེའི་ཉི་མ་ཤར༔ གང་འདུལ་ཐབས་སྟོན་འགྲོ་བའི་དོན་མཛད་པ༔ ཐུགས་རྗེ་ཕྱོགས་ལྷུང་བོད་ཀྱི་ཞིང་ཁམས་སུ༔ མཁས་གྲུབ་ཚུལ་འཛིན་གྲུབ་ཆེན་པདྨ་འབྱུང་༔ འགྲོ་བའི་དོན་ལ་མཉེས་པའི་ཞལ་འཛུམ་པ༔ ཟ་འོག་ཆོས་ཀྱི་མཐའ་རྣམས་རྒྱས་པའི་ཕྱིར༔ དར་སྣའི་ཅོད་པཎ་དར་སྣས་བརྒྱན༔ པདྨ་ཧེ་རུ་ཀ་ལ་ཕྱག་འཚལ་ལོ༔ ཞེས་བསྟོད༔ ང་ལ་ཆོས་དང་རབ་ཤེས་བཞིན་དུ་མཐའ་མཉེས་པའི་དོན་མཛད་པ༔ དེ་ལྟར་ཁྱོད་མ་འོངས་ཀྱི་དོན་དུ་ཆོས་གཅིག་གསུངས་ཞུས༔ ཐུགས་རྗེས་གང་འདུལ་དུ་གཟིགས༔ གཏེར་ཤོག་བདག་ཏུ་ཕེབས་པ༔ དེ་ནས་ཡབ་ཡུམ་གཉིས་ཀ་ལྷོ་བྲག་ཏུ་བྱོན༔ དེ་སྒྲུབ་ཕུག་ནང་ནས་བླ་མེད་འདུས་པ་བསྒྲུབ༔ དེར་ཨུ་རྒྱན་གྱི་ཞལ་ནས༔ མཁར་ཆུ་ཟ་འདི་མ་འོངས་འགྲོ་བའི་དོན་དུ་གཏེར་སྦས་དགོས་པ༔ ཁྱོད་མི་བརྗེད་པ་ཉམས་སུ་ལོངས་གསུངས༔ ཨུ་རྒྱན་དབུ་རྒྱལ་པོ་པེ་དཀར་བྱ་ལ་ཞོན་ནས་ནམ་མཁའ་ནས་འགྲོ་བའི་རྡེའུ་འཕངས་ནས༔ ལ་ཕོག་པ་ལྷེབ་ཀྱིས་བཏང་བ༔ ཨུ་རྒྱན་གྱི་ཞལ་ནས༔ འདའ་ན་ཁ་འདར་འདར༔ རྦད་རྦད༔ ཅེས་གསུངས༔ རྒྱལ་པོ་ས་ལ་འཕངས་ནས་ཁས་བླངས་པས༔ ཕྱིན་ཆད་གནོད་པ་མི་བྱེད་པར་དམ་བཅའ༔ ཡེ་ཤེས་མཚོ་རྒྱལ་གྱིས་ཞུས་པ༔ ཨུ་རྒྱན་ཆེན་པོ་ལགས༔ འདི་བྲག་ཕུག་མཁར་ཆུ་འདི་ལ་མ་འོངས་པའི་སེམས་ཅན་དང་དུ་ཆུང་བ་གཅིག་གིས་ཐབས་བསྟན་ནས༔ ཁོ་མོ་བདག་ལ་ཕན་ཆེ་སྟེ་འགྲོ་བའི་དོན་ཞུས༔ ཨུ་རྒྱན་གྱི་ཞལ་ནས༔ རིགས་ཀྱི་བུ་མོ་ཞུ་བ་མཛད་པ་གཉིས་ཀྱི་ཞལ་གནས་པ་འདིར་ངེས་ཞབས་དང་ཕྱག་དང་དབུ་རྗེས་ཀུན་བཞག་པ་མོས་པ་ཅན་གཅིག་ཡིན་ན༔ སླ་གསུངས་པ༔ དེར་ཕྱག་གི་རྗེས་ནམ་བཞག་པ༔ ཨུ་རྒྱན་གྱིས་དགོངས་ནས༔ བདག་རྒྱ་གར་ཡུལ་དུ་འགྲོ་དགོས་ཏེ་ཁོ་མོ་ཅི་བྱེད་དམ༔ བདེན་ནམ་མི་བདེན་དགོངས་ནས༔ ཡེ་ཤེས་མཚོ་རྒྱལ་ཁྱོད་རང་འདིར་འདུག་གམ༔ ང་རྒྱ་གར་བླ་མ་ད་རྒྱ་གར་ན་འགྲོ་དགོས་པ་སྣང་༔ གསུངས༔ དེ་འཇའ་འོད་དུ་ཡལ་བ་ལྟ་བུ་བྱེད་ནས༔ ཡེ་ཤེས་མཚོ་རྒྱལ་སྤྱན་གཟིགས་ནས་ཞུས་པ༔ ཡེ་ཤེས་མཚོ་རྒྱལ་ལན་གཅིག་རིགས་པ་མ་ཡོང་པ་སྙིང་ཆད་པ༔ དེའི་ལམ་དུ་འདི་བཞེངས་སོ༔

ཀྱེ་ཧུད་བདག་འདྲ་ལས་ངན་སྙིང་རེ་རྗེ༔ ལྟ་བའི་རྟོགས་པ་ཁ་ཏ་སུ་ལ་བྱེད༔ ཁོ་མོའི་བསྒོམ་པའི་སེམས་འདི་གར་བོར་རམ༔ རྗེ་བཙུན་རྒྱལ་པོ་བཞུགས་པ་གང་དུ་ཕེབས༔ ཁོ་མོ་བདག་གི་འདི་འདྲ་ཅང་ཡིན་བསམ༔ མཚོ་རྒྱལ་ཤུལ་ཏུ་བསྐྱུར་ན་ཅང་སྲིད་དམ༔ དད་གུས་ཅན་གྱི་ང་འདྲ་སྙིང་རེ་རྗེ༔ རྗེ་ཕྱིར་ལྟ་བའི་དུས་སུ་སུ་ལ་རེ༔ ཀྱི་ཧུད་ཀྱི་ཧུད་བདག་འདྲ་སྙིང་རེ་རྗེ༔ ལྷོ་བྲག་མཁར་ཆུ་འདིར་ཕེབ་འདིར་དགའ་དུས༔ རྗེ་བཙུན་བླ་མ་རྒྱ་གར་ཕེབ་པ་ཅུང་བདེན་ནམ༔ མཁར་ཟ་ལྟ་བའི་དུས་སུ་སུ་ལ་རེ༔ མཁར་ཟ་ཐམས་ཅད་བརྟག་པའི་ཕ་ཞིང་བརྟེན༔ ཁོལ་མོ་བསྟེན་པས་བླ་མ་གང་དུ་བོར༔ ཁོལ་མོ་ཤུལ་དུ་བསྐྱུར་བ་ཅང་སྲིད་དམ༔ མཁར་ཟ་མཚོ་རྒྱལ་ང་འདྲ་ལས་ངན་མོ༔ འཇིག་རྟེན་ས་ཡུལ་རྒྱལ་བློན་ཚུལ་རྟེན་ཡོད༔ བདག་འདྲ་འགྲོ་བ་ལ་ཅི་བཤད་དམ༔ བླ་མ་འཇའ་འོད་ལྟ་བུ་ནམ་མཁར་ཡལ༔ ཁོ་མོ་ཤུལ་དུ་བསྐྱུར་བ་ཅང་སྲིད་དམ༔ གཞོན་ནུ་ལོ་བརྒྱད་ན་ཚོད་མཚན་ལྡན་པ༔ འདི་འདྲ་འཇའ་འོད་ཡལ་བ་ཅང་སྲིད་དམ༔ མཁར་ཆུ་སྲས་མོ་འདི་ནི་སུ་ལ་སྐྱབས༔ ཀྱི་ཧུད་ཀྱི་ཧུད་ཅི་འདྲ་བྱེད༔ ཤི་བའི་ལུས་སྲོག་བྲལ་བ་བདག་གི་ཐོས༔ གསོན་ཏེ་བསྐྱུར་བ་ངེས་པ་ཅང་བདེན་ནམ༔ འདི་འདྲ་བདེན་པའི་བོད་འབངས་ཅི་ལ་བསྟེན༔ ཁྱད་པར་ཅན་གྱི་བུ་མོ་ཅི་ལ་བསྟེན༔ ནམ་ཡང་ཐུགས་རྗེས་བཟུང་བ་ཨེ་ཡོད་དམ༔ མཆི་མ་ཆུ་བོ་ལྟ་བུར་འབེབས་པ་ནས༔ ཨུ་རྒྱན་གྱི་ཞལ་ནས་དགོངས་ནས༔ ཁོ་མོ་འདི་འདྲ་ཡིད་མུག་པ་སྙིང་རྗེས་དགོངས་ནས༔ རིགས་ཀྱི་བུ་མོ་ང་འདི་ན་ཡོད༔ ཁྱོད་མྱ་ངན་ཅི་ལ་བྱས་པ་ཡིན༔ ཞེས་གསུངས༔ མཚོ་རྒྱལ་གྱི་ཞལ་ནས༔ ལགས་ཨུ་རྒྱན་རིན་པོ་ཆེ༔ འཇིག་རྟེན་གྱི་བུད་མེད་ཁྱིམ་པ་དང་༔ ཟང་ཟིང་ལ་སོགས་རེ་བས་ས་ཡོད་པས༔ ཁོ་མོ་ཁྱོད་བས་རེ་ས་མེད༔ བདག་གི་ཡིད་མུག་པ༔ འདི་འདྲ་བ་ཡིན་ཞུས༔ མཁར་ཆུ་ནས་མི་གཅིག་གིས་འཚོ་བ་དང་གསེར་ཕུལ་ནས༔ མཚོ་རྒྱལ་གྱིས་སློབ་དཔོན་ལ་མ་འོངས་བུ་སློབ་དོན་དུ་གསེར་ཕུལ་ནས་ཞུས༔ ཨུ་རྒྱན་རིན་པོ་ཆེ༔ ཁོ་མོ་དེ་ཁྱེད་སྐུ་དྲིན་ལ་གྲོལ་གྲོལ་ཏེ༔ མ་འོངས་བུ་སློབ་རིག་པ་དམན་ནས་ཆོས་མ་གོ་བ་དོན་སླ་བྱའི་ཆོས་ཤིག་གསུངས་ཞུས༔

ཨེ་མ་ཧོ༔ ཁོ་མོ་རེ་ས་རྫུས་སྐྱེས་པདྨ་འབྱུང་༔ རྣམ་དག་ཆོས་དབྱིངས་རང་བཞིན་དག་པ་ལ༔ ཤེས་བྱ་རྣམ་དག་ཨུ་རྒྱན་པདྨ་འབྱུང་༔ ཁོ་མོ་མ་རིག་དབང་གིས་རིག་སྤྲུལ་པའི༔ པདྨའི་སྐུ་ལ་འགལ་བ་ཅི་སོང་བ༔ སོ་སོར་བཤགས་སོ་འགྱོད་སེམས་གདུང་བའི་ངང་༔ རང་རིག་བུད་མེད་ལུས་བླངས་སྣང་བ་མཐོ་བྱས་པ༔ མ་རིག་ལོག་ཚིག་སྨྲས་པ་མཐོལ་ལོ་བཤགས༔ རང་གནོང་འགྱོད་པའི་བདག་གིས་ཞུ་ཕོད་མཐོལ་ལོ་བཤགས༔ ཀྱེ་མ་ཀྱེ་མ་དགོངས་ཤིག་ཨུ་རྒྱན་རིན་པོ་ཚེ༔ འགྲོ་ལ་བརྩེ་ཕྱིར་ཐུགས་རྗེའི་ཞལ་མངའ་བ༔ ཁོ་མོ་བདག་གི་ལུས་རྩིབ་འཁྲོ་འཛུམ་བྱས༔ མ་རིག་དབང་གི་དུག་ལྔ་ལས་སོང་ནས༔ མཐོལ་ལོ་བཤགས་སོ་རང་གནོང་འགྱོད་སེམས་ངང་༔ མ་བཅོས་སྤྲོས་མེད་རྫུས་སྐྱེས་པདྨ་འབྱུང་༔ གདོད་མའི་རང་འབྱུང་པདྨའི་རྒྱལ་ས་ཟིན༔ བདེ་བའི་མཆོག་གི་དངོས་གྲུབ་ཁོ་མོ་ཟིན༔ འགྲོ་མགོན་རྫུས་སྐྱེས་པདྨའི་ཞལ་མངའ་བ༔ ཐུགས་རྗེས་མཉེས་ཕྱིར་གང་འདུལ་སོ་སོར་སྟོན༔ ཐུགས་རྗེས་ཉེར་མངའ་རྫུས་སྐྱེས་ཁྱེད་ལ་ཡང་༔ བཟོད་པར་བཞེས་ལ་བདག་ལ་དངོས་གྲུབ་སྩོལ༔ རྫུས་སྐྱེས་པདྨའི་བཀའ་དྲིན་རབ་ཏུ་ཆེ༔ ཁོ་མོ་བདག་གི་ལུས་འདི་བརྩོན་འགྲུས་ཆེ༔ རྫུས་སྐྱེས་པདྨའི་སྐུ་ལུས་གཟི་མདངས་ཆེ༔ ཁོ་མོ་བདག་གི་ལུས་འདི་བཀོད་པ་ཆེ༔ གྲུབ་ཆེན་རྫུས་སྐྱེས་པདྨའི་བྱིན་རླབས་ཆེ༔ མཁར་ཟ་ཡེ་ཤེས་མཚོ་རྒྱལ་སྙིང་རུས་ཆེ༔ མ་ཚོགས་མཁའ་འགྲོ་ཐུགས་རྗེས་འོད་ཟེར་ཆེ༔ མ་འོངས་བུ་སློབ་ལས་རེ་ཆེ༔ མཁར་ཆུ་མཁར་ཕུག་དྲག་པ་འོད་བསྡུས་ཆེ༔ རྩང་ཟ་སྦས་དཀར་སྒྲོན་མ་གནས་རེ་ཆེ༔ ཁོ་མོའི་རྙེད་པའི་པདྨ་རིན་པོ་ཆེ༔ མ་འོངས་བུ་སློབ་དོན་དུ་ཆོས་ཤིག་གསུངས༔ ཁོ་མོས་ཐོས་པ་ཙམ་གྱིས་ཡིད་ལ་འཆང་༔ སྐད་ཅིག་མཐོང་གྲོལ་རིག་གྲོལ་ཙམ་གྱི་གདམས་ངག་དེར༔ ཁོ་མོ་བདག་ལ་གནང་སྟེ་འགྲོ་མགོན་བྱ༔ ངོ་བོ་རྣམ་དག་སྤྲུལ་སྐུ་པདྨ་འབྱུང་༔ འོད་གསལ་གནས་བྱས་གསལ་བའི་ཁོ་མོ་ང་༔ རིག་པ་བུ་ཆེན་བདག་ལ་གནང་བ་ན༔ འགྲོ་བའི་དོན་དུ་ང་ཡིད་འཆང་༔ བསམ་ཤིང་བཀའ་རྒྱུད་བླ་མ་དྲན༔ ཡིད་མོས་པའི་ཐབས་ཀྱིས་པདྨས་གནང་༔ གནང་བ་ཙམ་གྱིས་ཁོ་མོ་ང་ཡིད་འཆང་༔ བསམ་ཤིང་རྫུས་སྐྱེས་བླ་མ་དྲན༔ ཡང་དག་སྤྲུལ་སྐུ་བླ་མ་རིན་པོ་ཆེ༔ མ་འོངས་བུ་སློབ་དོན་དུ་ཆོས་གཅིག་གསུངས༔ འགྲོ་བ་འདྲེན་པས་ཐབས་ཀྱིས་ཆོས་གཅིག་གསུངས༔ འགྲོ་བའི་གསོལ་བ་བཏབ་པས་ཆོས་གཅིག་གསུངས༔ སྣང་སྲིད་སྡེ་བརྒྱད་བརླག་པའི་བཀའ་གཅིག་གནོངས༔ ཉོན་མོངས་ཚ་གདུང་སེལ་བའི་བྱིན་རླབས་གནོངས༔ བསྟན་པའི་སྤྱི་དགྲ་བསྒྲལ་བའི་ཐུགས་ཡིད་གནོངས༔ སེམས་ཅན་ཐམས་ཅད་འདུལ་དཀའ་ལས་འཁྱམས་ནས༔ ཐབས་ཀྱིས་འདུལ་བའི་བཀའ་གནང་མ་འོངས་དོན༔ ཁོ་མོ་སྐྱེས་པར་ཆུང་བས་ཆོས་གཅིག་སྦྱོངས༔ ཤེས་རབ་ཆེ་བས་ཐབས་ཀྱིས་འགྲོ་དོན་བྱེད༔ ཁོ་མོ་ཤ་ཁྲག་ལུས་བླངས་སྒྱུ་མའི་དཔེ༔ ལུས་འདི་བོར་ཙམ་དེ་ཡང་འགྱོད་སེམས་བསྐྱེད༔ སེམས་འདི་མི་རྟོགས་དབང་སོང་འགྱོད་ཙམ་སྐྱེས༔ བུ་མོ་ལུས་འདི་ནམ་ཞིག་བོར་ཙམ་ན༔ རྫུས་སྐྱེས་ཐུགས་རྗེའི་བྱིན་རླབས་ཨེ་ཡོང་ན༔ ད་ལྟ་གསོན་པའི་དུས་སུ་འགྲོ་ལ་དགོངས༔ རང་སེམས་ཆོས་སྐུ་འཆི་བ་ཨེ་སྲིད་དམ༔ ཤ་ཁྲག་འབྱུང་བཞི་གཡར་པོ་ནམ་དུ་ཞིག༔ ཁོ་མོ་བདེན་གྲོལ་བྱས་ཀྱང་རྫུན་མ་བྱས༔ ཚུལ་ཁྲིམས་བསྲུངས་ཏེ་བདག་གིས་གསང་སྤྱོད་པ༔ བུད་མེད་སྡོམ་བསྲུངས་ཚུལ་ཁྲིམས་ཡང་དག་མེད༔ ཁོ་མོ་རྫུས་སྐྱེས་མེད་པ་གཙང་མའི་ལུས༔ བདེན་པ་བསྒྲངས་ཏེ་ཚོར་གཏམ་མ་ཚོར་མ་བྱེད་དམ༔ འགྲོ་བའི་བུད་མེད་ཟོལ་ཟོག་རྫུན་གཡོ་སྒྱུ༔ ཁོ་མོ་གཡོ་སྒྱུ་མེད་པ་པདྨའི་བཀའ་སྒྲུབ་པ༔ འདི་འདྲ་བུད་མེད་སྐྱེ་བ་ལུས་བླངས་ཏེ༔ ཚུལ་ཁྲིམས་གཙང་མ་བསྲུངས་པའི་ཐབས་འདི་འདྲ༔ མ་བསྲུངས་ཙམ་གྱིས་རྫུས་སྐྱེས་ཐུགས་ཁྲེལ་གནང་༔ རྒྱུ་ཡི་སྦྱིན་སྟོབས་མེད་པའི་གྲོགས་ལ་བྱམས༔ ཁྲོ་འཛུམ་མི་མངའ་ཁོ་མོ་བཟོད་ཁྱག་པ༔ ལེ་ལོ་མ་བྱས་བརྩོན་འགྲུས་ནན་ཏན་བྱས༔ གཡེང་བ་མ་བྱེད་རང་རིག་དྲི་མེད་འཚོས༔ འཆལ་བ་མ་བྱས་བསྟན་མ་ཉམས་རིམ་རྫོགས༔ འདི་མཐོང་བ་ཙམ་གྱིས་བདེ་བ་ཐོབ༔ མ་མཐོང་ངན་སོང་གནས་སུ་འཁྲུལ༔ སྣང་སྤྲུལ་གཟིགས་ཡུལ་དག་ལ་དགའ་མ་སྐྱེས༔ སྣང་བ་ཕུག་སྟོང་ཡིན་པའི་རང་སེམས་བཅད༔ ངོ་བོ་བདེན་པ་ཆོས་སྐུ་ཀ་དག་ཡིན༔ ཀ་དག་ཀུན་གཞིའི་ངང་དུ་རང་རིག་འཚོས༔ རང་རིག་སྣང་ཡུལ་ངང་གིས་རིག་ཐག་བཅད༔ དོན་དམ་ངོ་བོ་བདག་གིས་རྟེན་པ་ནས༔ ཐབས་ལམ་ཡང་དག་དོན་གྱི་འབྲས་ཁུང་ལ༔ སྟོང་གསལ་མར་མེ་རང་རིག་ཆོས་སྐུ་གྲུབ༔ ཁོ་མོ་མཚོ་རྒྱལ་ངོས་གཏན་བྱེད་པ་མེད༔ སྣང་བ་རྫུན་ཆེན་བདག་གིས་ཕུག་ཐག་བཅད༔ བུད་མེད་ལུས་བླངས་བདག་གིས་ལུས་དམན་བྱས༔ བུད་མེད་བདེན་པ་མེད་པའི་རང་ཡུལ་བྱེད༔ མཐོ་བའི་ལུས་སེམས་བྱས་པའི་ཆོས་ཅི་བྱེད༔ ཡང་དེ་རྫུས་སྐྱེས་པདྨའི་དགོངས་ཁྲེལ་གནོངས༔ བུད་མེད་མཆོར་དགའ་སྣང་བ་བདག་གིས་བྱང་༔ ཡོད་དེ་མེད་དེ་བདག་གིས་སྣང་བ་འཚོས༔ སྔགས་འཆང་པདྨའི་ཐུགས་ལ་རབ་དགོངས་སོ༔ ཁོ་མོ་ལས་ཀྱི་ཤུགས་དབང་འདི་ཆེ་བ༔ འདི་ཆེ་བ་ཙམ་གྱིས་ལས་དག་པ༔ ཁོ་མོ་དམ་པའི་ཆོས་ཀྱི་རྗེས་འཛིན་པ༔ བདག་གིས་ཆོས་བྱེད་འགྲོ་བའི་དོན་ལ་དགོངས༔ འགྲོ་བའི་དོན་དུ་རྫུས་སྐྱེས་པདྨའི་གསུངས༔ ཡ་མཚན་རྨད་བྱུང་ཇོ་མོ་མཁར་ཆུ་ཟ༔ རྙེད་པ་མཆོག་གི་རྫུས་སྐྱེས་འདི་འདྲ་རྙེད༔ མ་བཙལ་རྙེད་པ་ཡིད་བཞིན་ནོར་བུ་རྙེད༔ འདི་འདྲ་མཆོག་གི་བླ་མ་རིན་པོ་ཆེ༔ མཐོང་ཐོས་ཙམ་གྱིས་འགྲོ་བ་ཀུན་གྲོལ་བ༔ བསམ་པ་ཙམ་གྱིས་མཐའ་མ་བདེ་བ་ཐོབ༔ མཐོང་ལམ་ཡང་དག་སྦྱོར་བའི་བླ་མ་དང་༔ སྦྱོར་སྒྲོལ་ཏ་ན་གྷ་ན་ཁོ་མོ་ང་༔ འགྲོ་བའི་དོན་ལ་མཛད་པ་ཆོས་གཅིག་ཞུ༔ ཞེས་ཞུས༔

ཨུ་རྒྱན་རིན་པོ་ཆེ་འགྲོ་བའི་དོན་ལ་ཆོས་གཅིག་གནོངས༔ ཨུ་རྒྱན་གྱི་ཞལ་ནས༔ མཁར་ཆུ་ཉོན་ཙམ་བདག་གིས་བཀྲོལ་ནས་འགྲོ་བའི་དོན་དུ་བཤད་པར་བྱ༔ ཨེ་མ་ཧོ༔ དུས་གསུམ་རྣམ་དག་ཆོས་ཀྱི་ཕོ་བྲང་ནས༔ མཐོང་ལམ་ཡང་དག་ཉིད་ལ་ཡང་དག་ལྟ༔ ཡང་དག་མཐོང་ནས་མཆོག་བྲན་མཆོག་ཆེན་པོ༔ འགྲོ་བའི་དོན་དུ་ཐུགས་རྗེས་རབ་གཟིགས་པ༔ དམ་ཆོས་ཆར་ལྟར་འབེབས་པའི་འགྲོ་བའི་དོན༔ མཁར་ཆུ་ཟ་ཡི་ཐུགས་ལ་ཞོག༔ མ་འོངས་བུ་སློབ་རྣམས་ཀྱི་འགྲོ་བའི་དོན་དུ་ཉམས་སུ་ལོངས༔ གནས་དགའ་འགྱུར་སྡུག་འོག་འགྱུར་གནས་མ་བཏང་༔ བདེ་གསལ་དགའ་བྱེད་མཆོག་དྲུག་གནས་མ་བརྟེན༔ སྟོང་གསལ་ཡ་བྲག་མ་བྱས་རིག་དོན་འཚོས༔ མཐོང་ལམ་ཡང་དག་མཆོག་གི་ངོ་བོ་ཉིད༔ བྱིན་རླབས་རྣམ་དག་སྟོང་གསལ་ངང་ལ་འབྱུང་༔ རིག་མཐོང་རྗེས་སུ་འཇུག་ལ་རྣམ་པར་དག༔ སྦྱོར་ལམ་ཡང་དག་ངོ་བོ་དང་༔ མ་བསྒོམ་སེམས་ཉིད་གྲོལ་བའི་ཐུགས་རྗེ་དང་༔ མ་བསླབ་དམ་ཆོས་གྲོལ་བའི་གདམས་ངག་འདི༔ སྔགས་འཆང་ང་ལ་ཡོད་དེ་གཞན་ལ་མེད༔ ཀུན་ལ་ཡོད་ན་དགའ་བ་ལ༔ མཁར་ཟ་ཡེ་ཤེས་མཚོ་རྒྱལ་ཤེས་ན་སྐྱིད་པ་ལ༔ ཤེས་པ་ཙམ་གྱིས་བུ་སློབ་དོན༔ སྐད་ཅིག་དྲན་པའི་གནས་སུ་སྐྱོངས་བྱས་པ༔ སྣང་སྲིད་དབང་དུ་བསྡུ་བའི་གདམས་ངག་འདི༔ སྔགས་འཆང་ང་ལ་ཡོད་དེ་གཞན་ལ་མེད༔ མ་འོངས་བུ་སློབ་ཤེས་ན་དགའ་བ་ལ༔ མཁར་ཟ་ཡེ་ཤེས་མཚོ་རྒྱལ་ཤེས་ན་སྐྱིད་པ་ལ༔ ཤེས་ན་མ་འོངས་བུ་སློབ་དོན༔ དམ་ཆོས་མ་བསླབས་ཡི་གེ་རང་གྲོལ་འདི༔ གདམས་ངག་འདི་རྣམས་བདག་ལ་ཡོད་པ་དེ༔ གཞན་ལ་མི་མང་ཤེས་ན་དགའ་བ་ལ༔ ཁྱད་པར་མཁར་ཆུ་ཟ་ཡི་ཤེས་ན་སྐྱིད༔ ཤེས་པ་ཙམ་གྱིས་འགྲོ་བའི་དོན༔ མ་འོངས་བུ་སློབ་རྣམས་ཀྱིས་རྗེས་སུ་ཟུངས༔ གང་ཞིག་གུས་པའི་བསམ་ཡིད་ཕུལ་བ༔ བདག་ཉིད་གྲོལ་བའི་གདམས་ངག་འདི༔ ཡེ་ཤེས་མཚོ་རྒྱལ་གནང་སྟེ་འགྲོ་བའི་དོན༔ ཉམས་སུ་ལོངས་ཤིག་འགྲོ་བའི་དོན༔

ༀ་ཨཱ༔ ཧཱུྃ༔ མཆོག་གསུམ་རྩ་གསུམ་སྐུ་གསུམ་ངོ་བོ་ཉིད༔ ཡིད་དྲན་པ་ཙམ་གྱིས་འགྲོ་མགོན་ཡོང་༔ ངག་བཟླས་པ་ཙམ་གྱིས་བྱང་ཆུབ་ཐོབ༔ དེ་ཕྱིར་དེ་རྣམས་རབ་ཏུ་བཟླས༔ བསམས་ཤིང་པདྨ་ང་དྲན་གྱིས༔ བླ་མེད་མཆོག་གི་དངོས་གྲུབ་ཐོབ༔ ཅེས་གསུངས༔ ཡེ་ཤེས་མཚོ་རྒྱལ་གྱི་ཞལ་ནས༔ ལགས་པདྨ་རིན་པོ་ཆེ༔ ཁོ་མོ་ང་ཡི་རིག་དོན་འཚོ་བ་འདི༔ སྐྱོན་ཡོད་དམ༔ ཡོན་ཏན་ཡོད་དམ༔ པདྨ་དགོངས་དང་བདག་གིས་ཞུས༔ ཀྱེ མ་དགོངས་ཤིག་ཨོ་རྒྱན་རིན་པོ་ཆེ༔ ལན་གཅིག་གསོན་ཏེ་བདག་གི་ཆོས༔ འདུས་མ་བྱས་པའི་ཆོས་ཀྱི་དབྱིངས་གསལ་བ༔ གནས་པ་དང་པོ་ཆགས་པའི་དོན་གོ་འདི༔ འདི་བཟང་བ་མེད་པའི་སྐྱོན་དུ་འགྱུར༔ འགྱུ་བྱེད་སྡང་བའི་འཇིག་རྟེན་སྐྱོན༔ འདི་གཉིས་དོན་གོ་མེད་པས་སེམས་དོན་དུ༔ འདི་བཟང་སྟེ་ངན་ཏེ་ཅི་མི་ཤེས༔ སློབ་དཔོན་ཆེན་པོ་ཐུགས་ལ་དགོངས༔ བདེ་ལ་ཆགས་པ་ལྷ་ཡི་གེགས༔ གསལ་ལ་འཛིན་པ་ཉམས་ཀྱི་གེགས༔ མི་རྟོག་བློ་གཏད་རིག་པའི་གེགས༔ འདི་བཟང་ངན་མ་བྱེད་རིག་པ་འཚོས༔ གསལ་འཛིན་མ་བྱས་རང་ཐོག་བཞག༔ རིག་བཅོས་མ་བཅོས་དེ་ངང་ལྟ༔ འདི་བཟང་བ་ཡིན་ཏེ་ཐུགས་ལ་དཔྱོད༔ ཁོ་མོ་བསམ་ཤིང་ཁྱེད་དྲན་ནོ༔ ཁོ་མོ་རིག་པས་དེ་ལྟར་འཚོས༔ མིག་ཡུལ་གཟུགས་ལ་དང་པོ་ཆགས༔ བར་དུ་ཁྱད་མེད་འདྲ་བ་རིག༔ ཐ་མ་རིག་པ་གཅིག་ཏུ་རྟོགས༔ སྟོང་པ་ཉིད་ལ་དམིགས་མེད་པ༔ མིག་ནི་རིག་པ་ཤེས་རབ་ཡིན༔ སྟོང་པ་ཉིད་ལ་རྣ་བ་སྣ་ལྕེ་མེད༔ སྣང་བ་བཅད་ན་རྣ་བ་ཡིན༔ ཡ་བྲག་དངོས་རྟེན་མ་བྱས་དེ་ལྟར་འཚོས༔ སྤང་བླངས་མེད་པའི་རིག་པའི་དོན་འཆོལ་བ༔ དེ་ལྟར་ཡོང་ཙམ་རྫུས་སྐྱེས་རིག་དངོས་སྤྲོད༔ མ་རྟོག་ཙམ་གྱིས་ཁོ་མོ་བདག་ལ་སློབ༔ སྟོང་པ་ཆགས་པ་མ་བྱས་ཆོས་ཀྱི་སྐུ༔ གསལ་བ་འཛིན་པ་མ་བྱས་ལོངས་སྤྱོད་རྫོགས༔ འབྲས་བུ་རེ་དོགས་མ་བྱེད་རིག་པ་འཚོས༔ རྫུས་སྐྱེས་སྐུ་ལ་ཆགས་པ་ངས་མ་བྱས༔ ཁོ་མོ་ལུས་ལ་འཛིན་པ་མ་བྱས་སོ༔ གསུང་བའི་བརྡ་དོན་རིག་པ་ངོས་མ་ཞེན༔ འཕགས་ལམ་ཡང་དག་སྦྱོར་བ་བདག་གིས་འཚོས༔ ཕྱལ་ཆད་གསལ་ཆད་རིག་ཆད་མ་བྱས་སད༔ སྣང་བ་སྟོང་པ་ཡིན་པའི་རང་ཐག་བཅད༔ གསལ་བ་ཤུག་འབྱུང་གྲུབ་པའི་སྣང་ལམ་འཚོས༔ རིག་པ་གཅིག་འདུས་ཡིན་པའི་རང་རིག་སྐྱོངས༔ ཉོན་མོངས་དུག་གསུམ་རང་སར་ཞུ༔ ཆགས་འཛིན་ཞེན་པའི་མཐའ་ནས་དག༔ སྐུ་གསུམ་ལོ་འདབ་འབྲས་བུ་རྒྱས༔ ལན་རེ་འགྲོ་བའི་འདུག་རེ་བསྒོམ༔ ཟ་ཞིང་ཞལ་ཞིང་རིག་པ་འཚོས༔ ཆོས་སྐུ་གསང་བའི་ལྟ་བ་བཅད༔ ལོངས་སྐུ་གསང་བའི་སྒོམ་པ་སྦྱོངས༔ སྤྲུལ་སྐུ་གསང་བའི་རིག་དོན་འཚོས༔ སྔགས་འཆང་པདྨའི་སྤྱོད་པ་སྦྱོངས༔ ཆགས་འཛིན་བདུད་བཅོམ་སྐུ་ལྔ་གྲོལ༔ ཆགས་འཛིན་མ་བཅོས་རང་རིག་འཚོས༔ དེ་ལྟར་འདྲ་བའི་སེམས་ཉིད་ཨེ་ཡོང་ངམ༔ རྫུས་སྐྱེས་པདྨའི་ཐུགས་ལ་དཔྱོད༔ ཁོ་མོས་བསམས་ཤིང་ཁྱེད་དྲན་ནོ༔ ཁོ་མོ་རིག་པས་དེ་ལྟར་འཚོས༔ མིག་ཡུལ་གཟུགས་ལ་དང་པོ་ཆགས༔ བར་དུ་ཁྱད་མེད་འདྲ་བ་རིག༔ ཐ་མ་རིག་པ་གཅིག་ཏུ་རྟོགས༔ སྟོང་པ་ཉིད་ལ་དམིགས་མེད་པ༔ མིག་ནི་རིག་པ་ཤེས་རབ་ཡིན༔ སྟོང་པ་ཉིད་ལ་རྣ་བ་སྣ་ལྕེ་མེད༔ སྣང་བ་བཅད་ན་རྣ་བ་ཡིན༔ ཡ་བྲག་དངོས་རྟེན་མ་བྱས་དེ་ལྟར་འཚོས༔ སྤང་བླང་མེད་པའི་རིག་པའི་དོན་འཆོལ་བ༔ དེ་ལྟར་ཡོང་ཙམ་རྫུས་སྐྱེས་རིག་དངོས་སྤྲོད༔ མ་རྟོག་ཙམ་གྱིས་ཁོ་མོ་བདག་ལ་སློབ༔ སྟོང་པ་ཆགས་པ་མ་བྱས་ཆོས་ཀྱི་སྐུ༔ གསལ་བ་འཛིན་པ་མ་བྱས་ལོངས་སྤྱོད་རྫོགས༔ འབྲས་བུ་རེ་དོགས་མ་བྱེད་རིག་པ་འཚོས༔ རྫུས་སྐྱེས་སྐུ་ལ་ཆགས་པ་ངས་མ་བྱས༔ ཁོ་མོ་ལུས་ལ་འཛིན་པ་མ་བྱས་སོ༔ གསུང་བའི་བརྡ་དོན་རིག་པ་ངོས་མ་ཞེན༔ འཕགས་ལམ་ཡང་དག་སྦྱོར་བ་བདག་གིས་འཚོས༔ ཕྱལ་ཆད་གསལ་ཆད་རིག་ཆད་མ་བྱས་སད༔ སྣང་བ་སྟོང་པ་ཡིན་པའི་རང་ཐག་བཅད༔ གསལ་བ་ཤུག་འབྱུང་གྲུབ་པའི་སྣང་ལམ་འཚོས༔ རིག་པ་གཅིག་འདུས་ཡིན་པའི་རང་རིག་སྐྱོངས༔ ཉོན་མོངས་དུག་གསུམ་རང་སར་ཞུ༔ ཆགས་འཛིན་ཞེན་པའི་མཐའ་ནས་དག༔ སྐུ་གསུམ་ལོ་འདབ་འབྲས་བུ་རྒྱས༔ ལན་རེ་འགྲོ་བའི་འདུག་རེ་བསྒོམ༔ ཟ་ཞིང་ཞལ་ཞིང་རིག་པ་འཚོས༔ ཆོས་སྐུ་གསང་བའི་ལྟ་བ་བཅད༔ ལོངས་སྐུ་གསང་བའི་སྒོམ་པ་སྦྱོངས༔ སྤྲུལ་སྐུ་གསང་བའི་རིག་དོན་འཚོས༔ སྔགས་འཆང་པདྨའི་སྤྱོད་པ་སྦྱོངས༔ ཆགས་འཛིན་བདུད་བཅོམ་སྐུ་ལྔ་གྲོལ༔ ཆགས་འཛིན་མ་བཅོས་རང་རིག་འཚོས༔ དེ་ལྟར་འདྲ་བའི་སེམས་ཉིད་ཨེ་ཡོང་ངམ༔ རྫུས་སྐྱེས་པདྨའི་ཐུགས་ལ་དཔྱོད༔ ཁོ་མོ་བསམ་ཞིང་རྫུས་སྐྱེས་དྲན༔ ཤོ་ཨ་ཙམ་བླ་མ་དྲན་བྱས་པ༔ སེམས་ཉིད་ཡིན་ནམ་བླ་མེད་ཡོན་ཏན་བརྗོད༔ སྐྱོན་སེལ་བསམས་ཤིང་ཁོ་མོ་ཡིད་ལ་འཆང་༔ རིག་པའི་ལྷག་པར་ལྷག་པ་མཐོང༔ སྤྲིན་གྱི་གསེབ་ནས་ཉི་མ་བུད༔ རིག་པ་དྲི་མེད་ཤེལ་ལྟར་རྟོགས༔ སྣང་རིག་ཆོད་རིག་བཟང་ངན་མེད༔ རིག་ཐག་ཆོད་ཅིག་ཕྱོགས་རིས་མེད༔ བརྟན་པ་ཐོབ་གཅིག་གཡོ་འགུལ་མེད༔ རྣམ་རྟོགས་སྤུས་བྲིས་ཙམ་ཤར་ནས༔ རིགས་དབང་ཐོབ་ཅིག་གཡའ་དག་སྟེ༔ ཁོ་མོ་རྟོགས་པ་དེ་འདྲ་ཨེ་ཡོད་དེ༔ ཁོ་མོ་བདག་གི་བསམ་པའི་གནས༔ རྟོགས་པ་ཙམ་གྱིས་བླ་མའི་དྲིན༔ མ་རྟོགས་ཙམ་གྱིས་བུད་མེད་བདག་གི་ལས༔ ཁྱི་དང་བུད་མེད་སྣང་གཏམ་དག་པ་མེད༔ ཝ་དང་ཁྭ་ཏ་ཚོགས་ནས་དག་པ་མེད༔ ཁོ་མོ་བསྒོམ་པ་འདོད་ཀྱང་བསྒོམ་སྙིང་ཆུང་༔ དྲིན་ཅན་བླ་མའི་དྲིན་གྱིས་བདག་གྲོལ་ལོ༔ མཐོང་ལམ་ཡང་དག་འཚོ་བའི་མཆོག་ཆེན་པོ༔ མ་རིག་ཙམ་གྱིས་བུད་མེད་ལ༔ བུད་མེད་གཏམ་དང་ཕོ་རོག་གཏམ་མང་བ༔ འདི་ལ་དག་པའི་ལས་འབྲས་ཅི་ཡང་མེད༔ ཁོ་མོ་བསམ་ཞིང་རྫུས་སྐྱེས་དྲན༔ མཐོང་གྲོལ་ཙམ་གྱིས་བླ་མའི་དྲིན༔ ཁོ་མོ་བདག་གི་དྲིན་ཡང་འདི་འདྲ་ཚེ༔ འགྲོ་བ་རྣམས་ལ་བྱིན་རླབས་འདི་ལྟར་ཆེ༔ མུན་པའི་གླིང་དུ་ཐུགས་རྗེ་ཤིན་ཏུ་ཆེ༔ མོས་གུས་གདུང་བས་གསོལ་བ་བཏབ་ཙམ་ན༔ ཁོ་མོ་བདག་ནི་གྲོལ་བའི་ཐབས་སྣ་ཚོགས༔ ཁོ་མོས་སྒོམ་པ་དེ་ལྟར་ཨེ་ཡིན་ནམ༔ ངས་སྒོམ་པ་འདོད་ཀྱང་ཤེས་རབ་ཆུང་༔ ཤེས་རབ་ཆུང་སྟེ་བླ་མས་གདམས་ངག་གནང་༔ ང་སྒོམ་པ་འདོད་ཀྱང་སྒོམ་སྙིང་ཆུང་༔ ཆུང་སྟེ་བླ་མས་གདམས་ངག་གནང་༔ ང་ཐོབ་ཅེས་གནས་ཏེ་ནན་ཏན་ཆུང་༔ ཆུང་སྟེ་བླ་མས་གདམས་ངག་གནང་༔ ཆོས་བྱས་བསམ་སྟེ་བརྩོན་འགྲུས་ཆུང་༔ ཆུང་སྟེ་བླ་མའི་དྲིན་གྱིས་གདམས་ངག་གནང་༔ ཆོས་བྱས་བསམ་སྟེ་སྤྲོ་བ་ཆུང་༔ ཆུང་སྟེ་བླ་མས་གདམས་ངག་གནང་༔ ང་སྤྱོད་པ་དམན་ཏེ་ཐོས་བསམ་ནས༔ དམན་ཏེ་བླ་མས་གདམས་ངག་གནང་༔ སློབ་གཉེར་བསམ་སྟེ་གོ་དབང་མེད༔ མེད་དེ་བླ་མས་གདམས་ངག་གནང་༔ སྦྱིན་པ་བཏང་བསམ་མོས་གུས་མེད༔ ལྟོ་གོས་བསམ་སྟེ་རི་ཁྲོད་གནས༔ མོས་གུས་མེད་དེ་བླ་མའི་དྲིན༔ བསོད་ནམས་སྦྱིན་པས་ཚོགས་མི་ལྡན༔ བླ་མའི་དྲིན་གྱིས་གདམས་ངག་གནང་༔ འབྲས་བུ་མཆོག་གི་སྦྱིན་བཏང་བ༔ ཁོ་མོ་ང་ཡི་ཞེ་བློ་བདེ༔ ཚུལ་ཁྲིམས་བསྲུངས་ཏེ་བུད་མེད་ལུས༔ བུད་མེད་ཁྱི་ལ་ཚུལ་ཁྲིམས་མེད༔ འདུལ་བ་བསྲུང་སེམས་ཁོ་མོ་ལས༔ སྔགས་འཆང་པདྨའི་གྲོགས་ལྟར་འདུག༔ འདུལ་བ་བསྲུང་ཐུབ་བདག་གི་གནས༔ རབ་བྱུང་སྡོམ་པ་བསྲུང་བའི་ཚུལ་ཁྲིམས་ལྡན༔ འཆལ་བའི་དབང་དུ་མ་བཏང་ཚུལ་ཁྲིམས་བསྲུངས༔ གཞན་ཕྱིར་སྙིང་དང་ཐུགས་མེད་ཚུལ་ཁྲིམས་བསྲུང༔ ལུས་འདི་ཤ་ཁྲག་བེམ་པོ་སྡོམ་མ་ཉམས༔ གསང་བའི་སྟོང་གསལ་འོད་ཀྱི་བསྲུང་གནས་པ༔ ཚུལ་ཁྲིམས་བསྲུངས་ཏེ་འཆལ་ལ་མ་བཏང་བ༔ ལུས་གནས་དཔའ་བོ་མཁའ་འགྲོ་ཐུགས་གནས་པ༔ སྡོམ་པའི་ཚུལ་ཁྲིམས་ལྟ་བུ་ཉམས་པ་མེད༔ སྟོང་གསལ་ཆོས་སྐུ་ཟུང་འཇུག་ཐབས་སྟོན་པ༔ དེ་བཅས་ཚུལ་ཁྲིམས་གཙང་མ་བསྲུངས༔ བདག་གིས་བསྲུངས་ཏེ་ཁྲིམས་ཀྱིས་བསྲུངས༔ རྒྱལ་པོ་ཡུལ་འཁོར་བསྲུང་བ་དང་༔ རྩང་དང་སྣ་ནམ་དབུ་དཀྱིལ་གྱི༔ ཁྲིམས་དང་རྒྱལ་པོ་མི་བསྲུང་ངོ་༔ བདག་པོ་བསྲུང་བའི་ཁོ་མོ་དང་༔ ཡུལ་འཁོར་བསྲུང་བའི་ཅི་ཡང་མེད༔ ཁོ་མོ་བདག་གི་བསྲུང་བའི་ལས༔ མ་འོངས་ཚུལ་ཁྲིམས་བསྲུང་ཟེར་ཁྱི་དང་བུད་མེད་འདྲ༔ དམ་ཚིག་གཙང་མ་བསྲུང་ཟེར་ཅི་མི་མེད༔ བན་རྣམས་དགེ་སློང་ཤ་ཁྲག་རྣམས་ལ་གཅན་ལྟར་རྔམ༔ དེ་ལྟར་མ་བྱས་མ་འོངས་ཚུལ་ཁྲིམས་བསྲུང༔ རྫུས་སྐྱེས་པདྨའི་མན་ངག་གནང་༔ ཁོ་མོ་བདག་གི་ཞེ་བློ་བདེ༔ ངས་བཟོད་པ་བསྒོམ་བསམ་རི་ཁྲོད་འདུག༔ ཁོང་ཁྲོ་མ་བྱེད་བཟོད་དཀའ་ཁྱག༔ བུད་མེད་ལུས་བླངས་བཟོད་པ་ཁྱག་མི་འདྲ༔ སྔར་ཡང་བཙུན་མོ་དེ་ལ་ཁོང་ཁྲོ་ཤོར༔ དེ་ལྟར་བྱས་པའི་སེམས་རེ་འཁྲུགས༔ བུད་མེད་ལུས་བླངས་ཞེ་སྡང་ཚེ༔ བུད་མེད་བཟོད་དཀའ་ཁྱག་པ་ཨེ་ཡོད་དམ༔ མ་མཐོང་ཐོས་པའི་བུད་མེད་གཏམ་མང་བ༔ སྣང་བ་མཐོ་བས་བཟོད་པ་སྒོམ་པ་མེད༔ ང་རྒྱལ་ཆེ་བས་དཀར་ཐིག་ཨ་ལོང་བརྒྱན༔ ཁོང་དུ་འཆང་བའི་བཟོད་པ་ཁྱག་མི་མེད༔ རྩང་དབུས་འདི་རྣམས་བུད་མེད་མོང་མར་མང་༔ བཟོད་པ་སྒོམ་པ་མེད་པ་ཁོང་ཁྲོ་བ༔ ཁོ་མོ་བཟོད་དཀའ་ཡོད་པ་ཨེ་རྫུན་ནམ༔ དེ་ལྟར་བཟོད་པ་འདི་ཡང་ཡན་ཆད་བསྒོམ༔ དེ་ཡང་དེ་ལྟར་མི་རྣམས་ཨེ་སྐྱོང་ངམ༔ བུད་མེད་གཏམ་རྣམས་དེ་ལྟར་ཨེ་རྫུན་ནམ༔ ཁོ་མོ་བཟོད་དཀའ་མེད་པའི་ཁོང་ཁྲོས་ནས༔ བླ་མའི་གདམས་ངག་བཅངས་པའི་ཁོང་ཁྲོས་ཞུས༔ ཁོ་མོ་བདག་གི་ཞེ་བློ་བདེ༔ ཁོ་མོ་བརྩོན་འགྲུས་ཆེ་བ་མེད་པ་དེར༔ བླ་མའི་བཀའ་གནང་བརྩོན་འགྲུས་ཆེ༔ བུད་མེད་བརྩོན་འགྲུས་སོ་ནམ་དེ་ལ་བྱས༔ བུ་ཆུང་རྒྱུག་དམག་སྣ་ས་བརྩོན་འགྲུས་བཅད༔ རིང་ཐུང་མེད་པ་འགྲོ་བའི་བརྩོན་འགྲུས་བཅད༔ ཁོ་མོ་སོ་ནམ་བརྩོན་འགྲུས་ཆོས་ལ་བྱས༔ ལ་ཆེན་ཆུ་ཆེན་བགོམས་པས་བརྩོན་འགྲུས་ཆེ༔ ཆོས་འདས་བརྩོན་འགྲུས་བྱེད་པ་འགྲོ་བའི་དོན༔ སྔར་ཡང་བརྩོན་འགྲུས་ཆེ་བ་མི་འདུག་སྟེ༔ ཆེ་བ་ཙམ་གྱིས་བླ་མའི་བཀའ་གནང་བ༔ ཁོ་མོ་བདག་གི་ཞེ་བློ་བདེ༔ ཐུན་བཞི་བསྒོམ་པའི་བསམ་གཏན་ཉམས་སྐྱོང་བ༔ ས་ལམ་རྫོགས་པའི་མཆོག་ཆེན་པོ༔ བླ་མའི་གདམས་ངག་གནང་བ་དྲིན་ཆེ་བ༔ འདི་འདྲ་དྲན་རྣམས་ཡང་ཡང་ཆེ་བ་ཡི༔ ཁོ་མོ་བདག་གི་ཞེ་བློ་བདེ༔ ཁོ་མོ་སྐུ་མདོག་དམར་བའི་དབུ་སྐྲ་ནག༔ རྫུས་སྐྱེས་དངོས་གྲུབ་གནང་བའི་སྐུ་མདོག་དཀར༔ དབུ་སྐྲ་ལྕང་ལོ་འཁྱིལ་པ་བླ་མའི་དྲིན༔ བླ་མའི་དྲིན་གྱི་ཁོ་མོས་ཞེ་བློ་བདེ༔ སྔར་ཡང་ཅི་གསུང་རྗེད་པ་བུད་མེད་རིགས༔ རྫུས་སྐྱེས་བཀའ་དྲིན་ཆེ་སྟེ་མི་བརྗེད་ཐོབ༔ སྔར་ཡང་དྲིན་ཆེ་ད་ཡང་བཀའ་དྲིན་ཆེ༔ རང་བཞིན་ཤུགས་ལ་གྲུབ་པའི་དྲན་བྱ་བ༔ མི་བརྗེད་གཟུངས་མཆོག་འདི་འདྲ་ཐོབ་པ་མཚར༔ ཕ་བཀའ་རྒྱུད་བླ་མ་ཀུན་ཏུ་བཟང་༔ མ་རྒྱུད་པ་ཆོས་དབྱིངས་ཀུན་བཟང་མོ༔ ཐབས་ཤེས་དབྱེར་མེད་བདེ་ཆེན་ཆོས་ཀྱི་སྐུ༔ ཐབས་ལམ་ཡང་དག་བླ་མ་ཁྱེད་འདྲ་བ༔ འདི་ཡི་སྐུ་སྟོད་སེང་གེ་འཕྲག་འདྲ་བ༔ མཚན་བཟང་ཟླ་མཛེས་གཞོན་ནུ་དུང་དང་ལྡན༔ འདི་ཡི་སྐུ་སྨད་དུང་གི་འཁྱིལ་འདྲ་བ༔ དཔེ་བྱད་བཟང་པོ་ལྡན་པའི་ཟླ་མཛེས་པ༔ མིག་གཉིས་ཉི་ཟླ་སྐར་ལྟར་འགྲོ་ལ་གཟིགས༔ ཤངས་དཀྱུས་རིང་ཞིང་ཚེམས་ཐག་གསེར་འཇོམས་པ༔ སྨིན་མ་མིག་ལྟར་གཅིག་ལ་འོད་འབར་ནས༔ རྣ་བ་མཚན་དང་ལྡན་པའི་གསེར་མདོག་པ༔ སྐུ་མདོག་དྲི་མ་མེད་པའི་དུང་ལྟར་དེ༔ དམར་ལ་འཛུམ་པ་དུང་ལས་གྲུབ་པ་ནི༔ གསང་བའི་ཡོངས་རྫོགས་བདེ་བ་འདྲེས་པའི་ཕྱིར༔ ལག་པ་རྒོད་ཀྱི་གཤོག་ལྟར་བརྐྱངས་བྱས་པ༔ དབུ་ལ་པད་ཞུ་རྒོད་སྒྲོ་འདི་ལྟར་བརྒྱན༔ མནྡྷ་ར་བ་འདྲ་བའི་གཟི་མདངས་འབར༔ ཟ་ཧོར་རྒྱལ་བཅས་མནབས་པའི་སཾ་བྷ་ཝ༔ ཁམས་གསུམ་དབང་དུ་བསྡུ་བའི་གཙོ་བོ་རྒྱལ༔ སྲིད་གསུམ་ཟིལ་གྱིས་གནོན་པའི་ཆེ་བའི་དཔོན༔ འདྲེ་བགེགས་ཐལ་བར་བརླག་པའི་མཐུ་སྟོབས་ཆེ༔ མ་རུངས་འདུལ་མཛད་མཐུ་ཆེན་རྒྱལ་པོའོ༔ ཏིང་འཛིན་དྲན་པའི་བླ་མ་ཀུན་ཏུ་བཟང་༔ འཆི་མེད་ཐོབ་པའི་རྒྱལ་བ་འོད་དཔག་མེད༔ མདོ་སྡེ་འདུལ་ཁྲིམས་བསྲུངས་པའི་བཅོམ་ལྡན་འདས༔ དབུ་རྒྱན་བསླབ་བྱས་མི་དགེ་སྤྱན་རས་གཟིགས༔ ཕ་མེད་མ་མེད་རང་བྱུང་པདྨ་འབྱུང་༔ ཏིང་འཛིན་སྔགས་དང་ལྡན་པའི་སྔགས་འཆང་བ༔ ཨ་ཙ་ར་བཅུ་དྲུག་ན་ཚོད་པཎྜི་ཏ༔ གཞོན་ནུ་ལོ་བརྒྱད་ལོན་པའི་སྐྱེས་བུ་ཁྱེད༔ ལོ་ལྔ་ན་ཚོད་བྱེད་པའི་བུ་ཆུང་ཁྱོད༔ ཞིང་གི་རྡུལ་སྙེད་ལྡན་པའི་འཕྲོས་འདུས་ཁྱེད༔ སྐུ་མདོག་མི་འདྲ་ལྡན་པའི་འཇིགས་བྱེད་ཁྱེད༔ མ་འོངས་དོན་བྱེད་བྱམས་སྙིང་ཁྱེད་འདྲ་བ༔ མཚོ་རྒྱལ་ང་རྟེན་འགྲོ་བའི་གཞོན་ནུ་ལྡན༔ འདི་འདྲ་མཐོང་ལམ་སྦྱོར་བའི་ངོ་མཚར་ཆེ༔ འགྲོ་བ་འདྲེན་མཛད་བླ་མ་རིན་པོ་ཆེ༔ ཐབས་ཤེས་འགྲོ་བ་འདྲེན་མཛད་གཉེན་གཅིག་པོ༔ བདག་གི་རེ་ས་བླ་མ་རིན་པོ་ཆེ༔ བྱམས་མགོན་མེད་པའི་འགྲོ་ལ་ཐུགས་རྗེས་གཟིགས༔ བདག་ལ་སྔར་ཡང་དྲིན་ཆེ་བ༔ ད་ཡང་དྲིན་ཆེན་བླ་མེད་མཆོག་གི་བཀའ༔

ཀྱེ་ཀྱེ་ཨུ་རྒྱན་རིན་པོ་ཆེ༔ སངས་རྒྱས་ཐམས་ཅད་འདུས་པའི་སྐུ༔ སྐྱབས་གནས་བླ་མ་འདུས་པའི་གསུང་༔ འགྲོ་ཀུན་རྣམ་དག་འདུས་པའི་ཐུགས༔ བདག་གི་སྐྱིད་སྡུག་ཁྱེད་ཤེས་ཀྱིས༔ འགྲོ་བའི་རེ་ས་ཁྱེད་ལ་བྱེད༔ ཀྱེ་ཧུད་ཀྱི་ཧུད་ཨུ་རྒྱན་རིན་པོ་ཆེ༔ འཇིག་རྟེན་སེམས་ཅན་འདི་རྣམས་སྙིང་རེ་རྗེ༔ དལ་འབྱོར་ལུས་འདི་མི་ཐོབ་སྡུག་བསྔལ་ཆེ༔ ཤིན་ཏུ་རྙེད་པར་དཀའ་བའི་དལ་འབྱོར་ལུས༔ འགྲོ་བ་རིགས་དྲུག་མ་གཏོགས་མི་ལུས་ཐོབ་དུས་མེད༔ ལན་གཅིག་རྙེད་པ་མི་རྟག་འཆི༔ ཅི་དང་གང་ལ་སྐྱེས་ན་མི་རྟག་འཆི༔ དགེ་བ་བཅུ་བྱེད་མཐོ་རིས་གནས་སུ་ལྷུང༔ སྡིག་ལ་གང་མོས་མནར་མེད་གནས་སུ་ལྷུང་༔ དམྱལ་བ་ཡི་དྭགས་ཚ་གྲང་བཀྲེས་སྐོམ་ཆེ༔ བྱོལ་སོང་ལྷ་མིན་གླེན་ལྐུགས་འཐབ་རྩོད་ཆེ༔ ལྷ་གཡེང་ལེ་ལོ་སྡུག་བསྔལ་དཔག་ཏུ་མེད༔ འདི་ལ་པདྨའི་ཐུགས་རྗེ་སྤྱན་གྱིས་གཟིགས༔ འགྲོ་བའི་ཐུགས་རྗེ་མཉེས་པའི་ཕྱིར༔ ཁོ་མོ་ཤ་ཁྲག་ལུས་བླངས་འཆི་བའི་རྒྱུ༔ འཆི་ནས་རྫུས་སྐྱེས་ཐུགས་རྗེས་བཟུང་བ་ཡོད༔ ལུས་རྣམས་ཆོས་སྐུ་གཅིག་པའི་དོན་ཆེ་བ༔ ངག་རྣམས་ཡི་གེ་མཐུན་པའི་རྗེ་ཆེའོ༔ ཡིད་རྣམས་སེམས་ཉིད་གཅིག་པའི་བརྟན་ཆེའོ༔ སྟོང་གསལ་ཆོས་སྐུ་མཐུན་པའི་གྲོགས་ཆེ་བ༔ རིག་པ་སྤྲུལ་སྐུ་མཐུན་པའི་ཆེ་ཆེ་བསམ༔ གསང་བ་དོན་གྱི་མཐུན་པའི་གྲགས་པ་ཆེ༔ ཁོ་མོ་བདག་ལ་ཐུགས་རྗེས་བཟུང་བ་དེ༔ འགྲོ་བའི་དོན་ལ་ཁྱེད་ཀྱི་ཐུགས་རྗེས་གཟིགས༔ མ་འོངས་བུ་སློབ་ལས་ཅན་དོན་དུ་གསུངས༔ འགྲོ་བ་མངལ་དུ་མི་ཚུད་སྡུག་བསྔལ་ཆེ༔ མི་ལུས་ཐོབ་སྟེ་དམ་ཆོས་བྱེད་པ་དེ༔ གསོལ་བ་བཏབ་པའི་རྫུས་སྐྱེས་ཆོས་གཅིག་གསུངས༔ འགྲོ་བའི་དོན་དུ་སྔགས་འཆང་པདྨ་ཁྱེད༔ བཀྲ་ཤིས་འབྱོར་ཚོགས་གྲོགས་པོ་མཚོ་རྒྱལ་དང་༔ དངོས་གྲུབ་ཆེན་པོ་འབྱུང་བའི་པདྨ་འབྱུང་༔ སྤྲུལ་པའི་ཐབས་ཀྱིས་འགྲོ་བ་འདྲེན་སྟོན་བྱེད༔ གང་འདུལ་ཐུགས་རྗེས་འགྲོ་ལ་གཟིགས་པར་ཞུ༔ ཁྱད་པར་མཐའ་འཁོབ་དམྱལ་སྨད་དགེ་རི་བྲག༔ ཁྱེད་ཀྱི་མངའ་ཞིང་འདི་ལ་ཐུགས་རྗེས་གཟིགས༔ ཆོས་ཀྱི་རྒྱལ་པོ་མངའ་འོག་བྱིན་གྱིས་རློབས༔ རྫུས་སྐྱེས་སྐུ་ལུས་བཀོད་པ་རབ་ཏུ་བརྒྱན༔ གསུང་སྐད་ཚངས་དབྱངས་སྒྲ་སྒྲོག་ཐུགས་རྗེའི་ཆེ༔ ཁོ་མོ་ལས་མེད་ལས་ཅན་འདི་འདྲ་ཐོབ༔ བུད་མེད་ལུས་བླངས་དམ་ཆོས་མི་གོ་སྟེ༔ པདྨའི་དྲིན་གྱིས་དམ་ཆོས་འདི་འདྲ་ལོབ༔ བུད་མེད་སྤྱོད་པ་དམན་པའི་མི་སེམས་ཏེ༔ པདྨའི་དྲིན་གྱིས་ཁུང་དུ་འདི་འདྲ་ཞག༔ ཁོ་མོ་བདག་ལ་བཀའ་དྲིན་ཡང་ཡང་ཆེ༔ འགྲོ་བའི་དོན་དུ་ཐུགས་རྗེས་ཡང་ཡང་གཟིགས༔ བུ་སློབ་དོན་དུ་ཐུགས་རྗེས་ཤུགས་ཀྱིས་སྤྱོད༔ འགྲོ་བ་འདྲེན་པའི་ཐུགས་རྗེས་བཟུང་དུ་གསོལ༔ འགྲོ་བའི་གསོལ་བ་འདེབས་པའི་ཆོས་གཅིག་གནོངས༔ རི་ཁྲོད་གནས་སུ་འདུག་པའི་གནས་མལ་སྐྱིད༔ འཇིག་རྟེན་ཆགས་ཞེན་སྤངས་པའི་ལས་འདི་སྐྱིད༔ མ་འོངས་འགྲོ་དོན་བྱེད་པའི་རང་སེམས་སྐྱིད༔ རྫུས་སྐྱེས་པདྨའི་སྐུ་ལ་འདི་ལྟར་ཞུས༔ ཞེས་ཞུས་ནས་ལགས་ཨུ་རྒྱན་རིན་པོ་ཆེ༔ མ་འོངས་མི་རྣམས་ཚེ་ཐུང་བ་ནད་མང་བ༔ རིགས་དམན་པ༔ ཆོས་ལ་གོ་བ་དང་༔ གསོལ་བ་འདེབས་པའི་ཆོས་གཅིག་གནོངས༔ ཞེས་ཞུས༔

ཨུ་རྒྱན་རིན་པོ་ཆེའི་ཞལ་ནས༔ མ་འོངས་པའི་གསོལ་བ་འདེབས་པའི་ཆོས་གཅིག་གནང་ནས༔ ཁྱོད་དོན་དུ་འཆོངས་དང་༔ ངས་འདི་ལྟར་གསུངས༔ ཁྱོད་བསྒོམས་པ་དང་སྒོམ་དེ་ལྟར་སྐྱོན་མི་མངའ་བ་ཡོན་ཏན་དུ་འགྱུར་བ་བཟང་༔ དེ་ལྟར་ཁྱོད་བསྒོམས་པ་ངོ་མཚར་ཏེ༔ བུད་མེད་ལུས་བླངས་པ་སེམས་ཆུང་བ་དེ་ལྟར་སྐྱོན་དུ་འདུག༔ ཁྱོད་རིགས་དམན་པ་མ་ཡིན༔ ཇོ་མོ་ཤེས་རབ་ཆེ་བའི་མཁར་ཆུ་ཟ་ཉོན་དང་༔ ངས་ཁྱོད་ལ་འདི་ལྟར་དུ་གསུངས༔ ཀྱེ་མ་དུས་གསུམ་དུས་མེད་ཀ་དག་དུས་ཀྱི་ཚེ༔ ཤེས་བྱའི་དཔེ་སྟོན་རྒྱལ་བ་མ་ལུས་འདུས༔ དོན་དམ་མཆོག་གི་རང་རིག་ཆོས་སྐུ་འདི༔ འཚོ་སྐྱོང་མི་ཐུབ་སྡུག་བསྔལ་མང་ཆེ་སྟེ༔ འཚོ་སྐྱོང་ཐུབ་ཙམ་སངས་རྒྱས་བཙལ་བ་མེད༔ ཡེ་ཤེས་མཚོ་རྒྱལ་སྒོམ་པ་བཟང་འདུག་པ༔ ངོ་མཚར་རྨད་མཆོག་ཇོ་མོ་མཁར་ཆུ་ཟ༔ བསྒོམ་པ་འདོད་པའི་ལས་རེ་ཆེ༔ ལུས་མི་ཐོབ་སྡུག་བསྔལ་ཆེ༔ གློ་བུར་རྐྱེན་གྱིས་འཇིགས་པ་མི་རྟག་ངེས༔ སེམས་ཅན་ཐམས་ཅད་འཆི་བའི་རང་བཞིན་ཡིན༔ འགྲོ་བ་འདྲེན་མཛད་ཆོས་དབྱིངས་ཡེ་ཤེས་ཤར༔ མ་རིག་མུན་ཁུང་ནང་ལ་སྤྱན་གྱིས་གཟིགས༔ ང་སངས་རྒྱས་པདྨ་འབྱུང་གནས་ཡིན༔ དུས་གསུམ་རྣམ་དག་ཆོས་ཀྱི་ཕ་རོལ་ཕྱིན༔ དམ་པའི་རྗེས་འཛིན་དཀོན་མཆོག་རྣམ་བཟུང་ནས༔ ང་དམ་ཆོས་པདྨ་སཾ་བྷ་ཝ༔ དོན་དམ་སེམས་ཉིད་ཁོང་འཆང་ནས༔ མ་བསྒོམ་གྲོལ་བའི་གདམས་ངག་ལ༔ ང་དགེ་འདུན་པདྨ་སཾ་བྷ་ཝ༔ གཞོན་ནུ་དུང་དང་མཛེས་པའི་མཚོ་རྒྱལ་གྲོགས༔ སྐྱེས་པའི་ཆ་འཛིན་སྔགས་འཆང་པདྨ་ང་༔ འགྲོ་བའི་དོན་དུ་མ་འོངས་བུ་སློབ་དགོངས༔ ངའི་དམ་ཆོས་རྗེས་འཛིན་བྱེད་པར་གྱིས༔ མཁར་ཆུ་ཟའི་ཉམས་ལོངས་ཐུགས་རྒྱུད་གཅེས༔ མ་འོངས་རིག་འཛིན་རྣམས་ཀྱི་དོན་དུ་མཛད༔ མཁར་ཆུ་ཟ་ཡིས་ཉམས་སུ་ལོངས༔ གསོལ་བ་བཏབ་པའི་ཆོས་འདི་ལྟར༔ ཨེ་མ་ཧོ༔ ཆོས་ཉིད་རྣམ་དག་ཆོས་དབྱིངས་ཕོ་བྲང་ནས༔ མི་འགྱུར་སྐྱེ་འགགས་མེད་པའི་ངང་ཉིད་ནས༔ བྱ་བྲལ་ལྷུན་རྫོགས་པ་ཡི་སྐུར་སྟོན་པ༔ ཐུགས་རྗེའི་རྒྱུན་ཆད་མེད་པ་རྒྱལ་བའི་སྐུ༔ ཆོས་སྐུ་ཀུན་བཟང་ཡབ་ཡུམ་ལ་གསོལ་བ་འདེབས༔ བདེ་ཆེན་འདུ་འབྲལ་གཉིས་མེད་ཆོས་ཀྱི་ངང་༔ ཆོས་དབྱིངས་ཡེ་ཤེས་ལྟ་བུར་སྐུར་སྟོན་པ༔ བླ་མ་ལོངས་སྤྱོད་རྫོགས་པའི་སྐུར་གནས་པ༔ ལོངས་སྐུ་གསལ་བ་རིགས་ལྔ་ལ་གསོལ་བ་འདེབས༔ མ་རིག་མུན་ཁུང་འཇིག་རྟེན་ཞིང་ཁམས་སུ༔ གང་འདུལ་ཐུགས་རྗེའི་འགྲོ་བའི་དོན་ལ་བྱོན༔ ཐུགས་རྗེ་སྤྱན་གྱིས་གཟིགས་ལ་གསོལ་བ་འདེབས༔ ཆོས་སྐུ་སྣང་བ་མཐའ་ཡས་ལ་གསོལ་བ་འདེབས༔ ལོངས་སྐུ་ཐུགས་རྗེ་ཆེན་པོ་ལ་གསོལ་བ་འདེབས༔ སྤྲུལ་སྐུ་པདྨ་འབྱུང་གནས་ལ་གསོལ་བ་འདེབས༔ མཁའ་འགྲོ་ཡེ་ཤེས་མཚོ་རྒྱལ་ལ་གསོལ་བ་འདེབས༔ སྐབས་སྐབས་ང་དང་མཐུན་པར་སྦྱོར༔ བསམ་པ་རྣམ་དག་འགྲུབ་པར་བྱིན་གྱིས་རློབས༔ ཅི་བསམ་ཆོས་སྐུ་འགྲུབ་པར་ཤོག༔ བླ་མེད་མཆོག་གི་དངོས་གྲུབ་སྩོལ༔ ༀ་ཨཱ༔ ཧཱུྃ༔ བཛྲ་གུ་རུ་པདྨ་སིདྡྷི་ཧཱུྃ༔

ཨེ་མ་ཧོ༔ བསྟན་པ་རྨད་བྱུང་ཁྱད་འཕགས་རྣམས་སུ་འབྱུང་༔ ཤཱཀྱ་ཐུབ་པའི་ཞིང་ཁམས་ནས༔ གསང་སྔགས་ཐེག་པའི་ཆོས་ཀྱི་འཁོར་ལོ་བསྐོར༔ རྒྱལ་བ་རིན་པོ་ཆེ་ལ་གསོལ་བ་འདེབས༔ འོག་མིན་རྣམ་དག་ལྷུན་གྲུབ་ཕོ་བྲང་ནས༔ དུས་གསུམ་བདེ་བར་གཤེགས་པ་ཆོས་ཀྱི་སྐུ༔ མ་ཊཾ་རུ་དྲ་བཏུལ་བའི་ཕྱག་རྡོར་སྐུ༔ གདུལ་བྱ་ཁྱད་འཕགས་ཅན་ལ་གསོལ་བ་འདེབས༔ དུག་ལྔ་རྣམ་དག་ཡེ་ཤེས་ལྔ་ལྡན་པ༔ འཆི་མེད་རྣམ་དག་ཚེ་ཡི་འཁོར་གྱིས་བསྐོར༔ སྐུ་ལྔ་དང་ལྡན་རྒྱལ་བ་ཆོས་ཀྱི་སྐུ༔ རིགས་ལྔ་རྣམ་དག་སྐུ་ལ་གསོལ་བ་འདེབས༔ སྟེང་འོག་ཕྱོགས་མཚམས་འབར་བའི་གནས་མཆོག་ནས༔ ལྷ་དབང་བརྒྱ་བྱིན་སྤྱན་རས་གཟིགས་ལ་སོགས༔ ཕྱག་རྡོར་མཐུ་ཆེན་མངའ་དབང་སྟོབས་ཆེ་བ༔ རྒྱ་གར་རིག་འཛིན་ཨུ་རྒྱན་པདྨ་འབྱུང་༔ རིག་འཛིན་དྷཱཀི་རྒྱ་མཚོའི་འཁོར་གྱིས་བསྐོར༔ གཡས་ན་དཔའ་བོ་རྒྱ་མཚོ་ཀད་དེ་ཀད༔ གཡོན་ན་དཔའ་མོ་རྒྱ་མཚོ་དགའ་བའི་དབྱངས༔ མདུན་ན་ཡི་དམ་མཆོག་གི་དངོས་གྲུབ་སྟེར༔ རྒྱབ་ན་ཆོས་སྐྱོང་མཆོག་གི་བར་ཆད་སོལ༔ སྐུ་གསུམ་རྣམ་དག་ཆོས་དབྱིངས་ཞིང་ཁམས་སུ༔ སྐབས་སྐབས་ང་དང་མཐུན་པར་བྱས༔ བསམ་པ་རྣམ་དག་འགྲུབ་པར་ཤོག༔ ཅི་བསམ་ཆོས་སུ་འགྲུབ་པར་ཤོག༔ བླ་མེད་མཆོག་གི་དངོས་གྲུབ་སྩོལ༔ ཨོཾ་ཨཱ༔ ཧཱུྃ་བཛྲ་གུ་རུ་པདྨ་སིདྡྷི་ཧཱུཾ༔

ཨེ་མ་ཧོ༔ སྤྲོས་བྲལ་བདེ་ཆེན་ཆོས་སྐུ་ཀུན་ཏུ་བཟང་༔ རིགས་ལྔ་རྣམ་དག་དྲུག་པ་རྡོ་རྗེ་འཆང་༔ རྡོ་རྗེ་སེམས་དཔའ་དགའ་རབ་རྡོ་རྗེ་དང་༔ སློབ་དཔོན་ཆེན་པོ་འཇམ་དཔལ་བཤེས་གཉེན་སོགས༔ ཤྲྀ་སེང་བྱིན་རླབས་ཁྱད་པར་ཅན༔ དབང་གི་པདྨ་འབྱུང་གནས་ལ༔ གསོལ་བ་འདེབས་སོ་ཕྱི་ནང་བར་ཆད་སེལ༔ འདི་ལྟར་ཚོགས་དྲུག་སྣང་བ་ཡི༔ ཁྱད་མེད་རིགས་མཁན་གཅོད་པའི་རང་གྲོལ་བ༔ གནས་འགྱུ་མ་བཅོས་རང་སར་ཆོས་སྐུ་གྲོལ༔ སྐབས་སྐབས་ང་དང་མཐུན་པར་གྱིས༔ བསམ་པ་རྣམ་དག་འགྲུབ་པར་བྱིན་གྱིས་རློབས༔ ཅི་བསམ་ཆོས་སྐུ་འགྲུབ་པར་ཤོག༔ བླ་མེད་མཆོག་གི་དངོས་གྲུབ་སྩོལ༔ ཨོཾ་ཨཱ༔ཧཱུྃ༔ བཛྲ་གུ་རུ་པདྨ་སིདྡྷི་ཧཱྃ༔

ཨེ་མ་ཧོ༔ གནས་ཆེན་རྡོ་རྗེ་གདན་གྱི་ནུབ་ཕྱོགས་སུ༔ ཀླུ་རྒྱལ་ཁང་སྟེང་པདྨ་འབར༔ རང་བྱུང་མཚོ་སྐྱེས་རྡོ་རྗེ་ལ༔ ཕ་མེད་མ་མེད་མཚོ་ཆེན་ཤུགས་ལས་གྲུབ༔ རྒྱལ་པོ་ཐོར་ཅོག་ཅན་གྱིས་སྤྱན་དྲངས་པ༔ དད་པས་མངའ་གསོལ་རྒྱལ་པོ་ཚིམ་པར་མཛོད༔ བསིལ་ཚལ་གླིང་དུ་རྒྱལ་སྲས་རབ་སྤང་བ༔ ཕྱོགས་བཞི་མཁའ་འགྲོ་རྣམས་ཀྱིས་བྱིན་གྱིས་རློབས༔ རྡོ་རྗེ་ཞལ་མཐོང་དངོས་གྲུབ་ཐོབ༔ འཇིགས་བྱེད་རྡོ་རྗེ་སྩལ་རྣམས་ལ༔ གསོལ་བ་འདེབས་སོ་ཕྱི་ནང་བར་ཆད་སེལ༔ པྲ་ཆེན་ཧ་སྟེ་གནས་སུ་རབ་བྱུང་ནས༔ མཚན་ནི་གུ་རུ་ཤཱཀྱ་སེང་གེ་ཞེས༔ རྒྱ་གར་གྲུབ་ཐོབ་རིག་འཛིན་མདུན་དྲུང་བྱོན༔ བྲག་ཕུག་མ་ར་དུ་ཀའི་འཆི་མེད་བསྒྲུབ༔ ཟ་ཧོར་རྒྱལ་ཁམས་མ་རིག་ཆོས་ལ་བཙུད༔ རྒྱལ་ཁམས་མི་ཡི་གཤེགས་ཙམ་ནས༔ ཡུམ་ཆེན་མནྡྷ་ར་བའི་དངོས་གྲུབ་བརྙེས༔ མེ་དཔུང་མཚོ་ལ་བསྒྱུར་བའི་རྫུ་འཕྲུལ་སྟོབས༔ ངན་སྔགས་བདག་པོ་སྲིན་པོ་ཐོག་གིས་བསྒྲལ༔ ཡང་ཤེད་བདེར་གཤེགས་སྙིང་པོ་སྒྲུབ་པ་མཛད༔ བར་ཆད་བགེགས་རྣམས་ཕུར་བུ་མཆོག་གིས་བསྒྲལ༔ བྱང་ཕྱོགས་གདོང་དམར་བོད་ཀྱི་དོན་ལ་བྱོན༔ བོད་ཀྱི་ལྷ་འདྲེ་ཐམས་ཅད་དམ་བཏགས་ནས༔ བསམ་ཡས་མངའ་གསོལ་རྒྱལ་པོས་ཅི་གསུངས་བསྒྲུབ༔ ཚ་གདུང་ནད་སེལ་ཆོས་ཀྱིས་གང་བར་ཤོག༔ བསམ་ཡས་འཆིངས་ཕུག་བཀའ་བརྒྱད་དཀྱིལ་འཁོར་བཞེངས༔ རྒྱལ་པོ་ཁྲི་སྲོང་འབངས་རྣམས་འབྲས་བུར་སྨིན༔ གསང་སྔགས་རྒྱལ་བའི་ཆོས་ཀྱི་བསྟན་པ་རྒྱས༔ སྔགས་འཆང་པད་མ་འབྱུང་གནས་འགྲོ་དོན་བྱས༔ འགྲོ་ལ་དྲིན་ཆེ་བསམ་ཡས་རིན་པོ་ཆེ༔ རིག་བྲག་ལུང་པ་ཞབས་དང་ཕྱག་གི་གདན༔ བདག་ཉིད་བསྒྲུབ་ཕྱིར་ཐུགས་རྗེ་བྱིན་རླབས་ནས༔ དྲིན་ཅན་སྤྲུལ་པའི་སྐུ་ལ་གསོལ་བ་འདེབས༔ སྐབས་སྐབས་ང་དང་མཐུན་པར་གྱིས༔ བསམ་པ་རྣམ་དག་འགྲུབ་པར་བྱིན་གྱིས་རློབས༔ ཅི་བསམ་ཆོས་སྐུ་འགྲུབ་པར་ཤོག༔ བླ་མེད་མཆོག་གི་དངོས་གྲུབ་སྩོལ༔ ཨོཾ་ཨཱ༔ཧཱུྃ༔ བཛྲ་གུ་རུ་པདྨ་སིདྡྷི་ཧཱུྃ༔

ཨེ་མ་ཧོ༔ འདི་ནས་བོད་དུ་འདུག་པ་བརྒྱ་དང་ལྷག༔ ལྷོ་ནུབ་རྔ་ཡབ་གླིང་ཕྲན་སྲིན་པོའི་ཡུལ༔ ཟངས་མདོག་དཔལ་གྱི་རི་བོ་ཙིཏྟའི་དབྱིབས༔ རྩ་བ་ཀླུ་གནས་རྐེད་པ་ལྷུན་བརྗིད་པ༔ རི་རྒྱལ་ཁྱད་དུ་འཕགས་པའི་བྱིན་རླབས་ཀྱིས༔ ཕྱོགས་བཞི་དཀར་སེར་དམར་ལྗང་མདོག་འདྲ་བ༔ ཕྱི་ནང་གཉིས་མེད་ཕོ་བྲང་གཞལ་ཡས་ཁང་༔ རིན་ཆེན་ཟུར་བརྒྱད་མ་ཆགས་པདྨའི་གདན༔ ཉི་སྟོང་གཟི་བརྗིད་རི་རྒྱལ་ང་འདྲ་འདུག༔ ཞིང་གི་རྡུལ་སྙེད་ལྟ་བུ་རྗེ་འབངས་འཁོད༔ དཔག་མེད་ཡོན་ཏན་གནས་ལ་གསོལ་བ་འདེབས༔ སྐབས་སྐབས་ང་དང་མཐུན་པར་སྦྱོར༔ བསམ་པ་རྣམ་དག་འགྲུབ་པར་བྱིན་གྱིས་རློབས༔ ཅི་བསམ་ཆོས་སྐུ་འགྲུབ་པར་ཤོག༔ བླ་མེད་མཆོག་གི་དངོས་གྲུབ་སྩོལ༔ ༀ་ཨཱ༔ ཧཱུྃ༔ བཛྲ་གུ་རུ་པདྨ་སིདྡྷི་ཧཱུྃ༔

ཨེ་མ་ཧོ༔ ནུབ་ཕྱོགས་པདྨོ་བཀོད་གནས་སྣང་མཐའི་དགོངས༔ སྤྲུལ་སྐུ་པདྨ་འབྱུང་གནས་ཐུགས་ཀྱི་བུ༔ འཛམ་བུའི་གླིང་དུ་སེམས་ཅན་དོན་ལ་བྱོན༔ སངས་རྒྱས་ཐམས་ཅད་འདུས་པའི་སྐུ༔ ཀུན་ཏུ་བཟང་པོ་འདུས་པའི་གསུང༔ སྣང་བ་མཐའ་ཡས་འདུས་པའི་ཐུགས༔ རྒྱལ་བ་གསུང་གི་ཀུན་འདུས་པ༔ གསོལ་བ་འདེབས་སོ་ཐུགས་རྗེ་བྱིན་གྱིས་རློབས༔ སྐབས་སྐབས་ང་དང་མཐུན་པར་སྦྱོར༔ བསམ་པ་རྣམ་དག་འགྲུབ་པར་བྱིན་གྱིས་རློབས༔ ཅི་བསམ་ཆོས་སྐུ་འགྲུབ་པར་ཤོག༔ བླ་མེད་མཆོག་གི་དངོས་གྲུབ་སྩོལ༔ ༀ་ཨཱ༔ ཧཱུཾ༔ བཛྲ་གུ་རུཔདྨ་སིདྡྷི་ཧཱུྃ༔ ཨེ་མ་ཧོ༔ ཆོས་སྐུ་སྣང་བ་མཐའ་ཡས་བྱིན་རླབས་གཡོས༔ ཆོས་ཀྱི་རྒྱལ་པོའི་གདུང་རྒྱུད་མ་སྟོང་བར༔ ང་ཉིད་སྨན་གྱི་ལྷ་རྣམས་དབྱེར་མེད་པ༔ ཅི་གནས་ཆོས་ཀྱི་སྐྱབས་ཡུལ་གཉིས་སུ་མེད༔ སྡིག་ཅན་ཡིན་ཀྱང་ཐར་ལམ་གནས་སུ་ཟིན༔ སྐབས་སྐབས་ང་དང་མཐུན་པར་སྦྱོར༔ བསམ་པ་རྣམ་དག་འགྲུབ་པར་བྱིན་གྱིས་རློབས༔ ཅི་བསམ་ཆོས་སྐུ་འགྲུབ་པར་ཤོག༔ བླ་མེད་མཆོག་གི་དངོས་གྲུབ་སྩོལ༔ ཨོཾ་ཨཱ༔ཧཱུྃ༔ བཛྲ་གུ་རུ་པདྨ་སིདྡྷི་ཧཱུྃ༔

ཡེ་ཤེས་མཚོ་རྒྱལ་ཐུགས་ལ་ཞོག༔ གསོལ་བ་འདི་ལྟར་བཏབ་པར་གྱིས༔ བསམས་ཤིང་རྗེ་བཙུན་ང་དྲན་གྱིས༔ མི་བརྗེད་ཉམས་ལོངས་ཐུགས་ལ་ཆོངས༔ བུད་མེད་མཚོ་རྒྱལ་གྲོགས་པོ་མཁར་ཆུ་ཟ༔ སྡིག་བྱས་མེད་པའི་དགེ་བ་འདི་ལྟར་བྱས༔ ཆོས་ལ་མོས་པ་བུད་མེད་ཁྱོད་འདྲ་བ༔ མ་འོངས་དོན་དུ་ཁྱོད་ཀྱིས་ཐུགས་ལ་ཆོངས༔ བུ་སློབ་ཡང་སློབ་དོན་དུ་འཛིན༔ ཉོན་ཅིག་ཤེས་རབ་མཁར་ཆེན་ཟ༔ འགྲོ་བ་མཆོག་གིས་འདྲེན་མཛད་མ༔ གང་འདུལ་ཐབས་སྟོན་པདྨ་ང་༔ འདི་འདྲ་གཞོན་ནུ་དུང་ལྡན་མ༔ བསམས་ཤིང་རྗེ་བཙུན་ང་དྲན་གྱིས༔ བར་སྐབས་རིག་པའི་དོན་འཚོ་བ༔ ཕྱི་ཡི་སྣང་བའི་རིག་ཐག་བཅད༔ བར་གྱི་གཉིས་འཛིན་རང་ཐག་བཅད༔ སེམས་ཉིད་གཅིག་འདུས་དོན་འཚོ་བ༔ སྐབས་སྐབས་དེ་ལྟར་ཐུན་བཞི་སྐྱོངས༔ མཁར་ཟ་ཡེ་ཤེས་རང་བཞིན་ཉན༔ ཟ་བའི་ཚོགས་འཁོར་འགྲོ་བའི་སྐོར་བའི་རིགས༔ བསམས་ཤིང་ཏིང་ངེ་འཛིན་རང་བཞིན་ཡིན༔ འགྲོ་བའི་དོན་དུ་དེ་ལྟར་ཐུགས་ལ་ཆོངས༔ བུ་མོ་དད་ལྡན་འགྲོ་བ་འདྲེན་མཛད་པ༔ ཆོས་སྒོར་འཇུག་པའི་མཁར་ཆུ་ཟ༔ སྒོམ་ལ་གྲོལ་བའི་མི་བརྗེད་ཐོབ༔ འགྲོ་བའི་དོན་དུ་གང་འདུལ་མཛད༔ ཐབས་ཤེས་དབྱེར་མེད་ཆོས་ཀྱི་དབྱིངས༔ དོན་གཉིས་དུས་གཅིག་མི་སྲིད་དམ༔ ང་དང་སྤྱོད་མཐུན་ཆོས་ཀྱི་རྗེ༔ འགྲོ་བ་རིགས་དྲུག་མི་རྟག་པ༔ ས་ཆུ་འབྱུང་བ་བཞི་མི་རྟག༔ ཆོས་རྣམས་གྱིས་ཤིག་བུ་སློབ་རྣམས༔ རང་རིག་དྲི་མ་མེད་པ་འདི་འཚོ་བ༔ འབྲས་བུ་སྦྱིན་པ་བཏང་བའི་སྟོབས་ཆེ་བ༔ སངས་རྒྱས་ཡང་དག་འཕགས་པའི་མཆོག༔ ཚུལ་ཁྲིམས་སྲུང་བའི་སྟོབས་ཆེ་བ༔ སངས་རྒྱས་དགེ་བ་བླང་བ་ཡང་དག་ཉིད༔ བཟོད་པ་ཁྱག་པའི་སྟོབས་ཆེ་བ༔ སྟོབས་བཅུ་ཆོས་ཀྱི་ཡང་དག་ལམ༔ བརྩོན་འགྲུས་སྟོབས་ཀྱིས་སངས་རྒྱས་སྟོབས་མངའ་བ༔ བསམ་གཏན་སྟོབས་ཆེན་སངས་རྒྱས་རིན་པོ་ཆེ༔ ཤེས་རབ་མཐར་ཕྱིན་མཆོག་གི་དོན་དགོངས་པ༔ མཐོང་ལམ་ཡང་དག་འཚོ་བའི་དོན་སྒོམ་པ༔ བསྒོམ་དང་བསྐྱེད་པ་སྔགས་དང་ཅི་ནུས་བཟླས༔ དེ་ལྟར་གསལ་བའི་འོད་ཟེར་འཕྲོས་བསྡུས་བྱེད༔ མཁར་ཆུ་ཟ་ཡིས་ཉམས་སུ་ལོངས༔ མི་བརྗེད་ཐོབ་གཅིག་ཁོང་དུ་འཆོངས༔ ཡིད་ལ་ཟུངས་ཤིག་བྲི་བར་གྱིས༔ ཁོང་དུ་ཆུད་པར་གྱིས་ཤིག་སྐལ་ལྡན་མོ༔ མཁར་ཆུ་རྒྱུད་པའི་ཕྱི་མ་ཐར་ལམ་ཟིན༔ ཡེ་ཤེས་མཚོ་རྒྱལ་ལོངས་སྐུ་གསལ་ཐོབ་པ༔ རྗེ་འབངས་འབྲས་བུ་སྨིན་པའི་འགྲོ་དོན་བྱ༔ ཆོས་སྐུ་ལྟ་བའི་ཉམས་གཅིག་སྐྱོངས༔ ལོངས་སྐུ་གསལ་བ་དོན་གཅིག་བསྒོམ༔ སྤྲུལ་སྐུ་སྤྱོད་པ་རིག་པ་བསྒོམ༔ དུག་གསུམ་མ་སྤངས་གྲོགས་སུ་འཆར༔ དུག་ལྔ་མ་སྤངས་ཡུམ་ཆེན་ལྔ༔ བདུད་བཞི་མ་སྤངས་རྒྱན་དུ་བཀོད༔ རང་རིག་དོན་གྱི་སྙིང་པོ་སྒོམས༔ སྔར་སོང་རྒྱབ་འོང་རྗེས་ཕྱིར་མ་འབྲང་ཞིག༔ དག་པའི་རང་རིག་འདི་ལ་འཚོ་བར་བྱས༔ སྣང་བའི་ལམ་གྱི་དངོས་མ་རྟེན༔ རང་རིག་དྲི་མ་མེད་པའི་སྐུ༔ འདི་ལ་བཟང་ངན་གཉིས་མེད་དམ༔ སྒོམ་ཡིན་ནོར་སྒོམ་གླེན་མ་བྱེད༔ རིག་པ་སྒྲུབ་པའི་དོན་མ་བཙལ༔ རིག་པ་སྣང་བའི་མགོ་མ་སྐོར༔ སྣང་བ་རིག་པའི་རྫུན་མ་བཟུང་༔ རང་ཐོག་ཏ་ལེ་གཏན་དུ་ཕོབ༔ འདི་སྒོམ་མེད་པ་ཡེང་མེད་པ༔ རིག་པ་དྲི་མའི་དོན་སྐྱེད་པ༔ ལན་གཅིག་མཐའ་ལྡོག་དབང་མ་བྱེད༔ ཨ་འཐས་སྤྱོད་པའི་གནས་མ་སྐྱོངས༔ སྣང་བའི་དངོས་རྟེན་རང་རིག་དག༔ དེ་ལྟར་གྱིས་ཤིག་མཁར་ཆུ་ཟ༔ བསམས་ཤིང་རྗེ་བཙུན་ང་དྲན་གྱིས༔ ཡིད་ལ་ཟུངས་ཤིག་འགྲོ་བའི་དོན༔ བྱང་བར་ཀློག་གམ་བྲི་བར་བྱ༔ ཐུགས་ཡིད་གཅིག་ཏུ་འདྲེས་པར་གྱིས༔ དེ་ལྟར་གྱིས་ཤིག་གྲོགས་པོ་མཁར་ཆུ་ཟ༔ སྐྱེ་བ་མེད་ལ་སྐྱེ་བའི་ཆོ་འཕྲུལ་སྟོན༔ འགགས་པ་མེད་པའི་གཟུགས་སྐུ་རྣམ་གཉིས་འབྱུང་༔ ཡ་མཚན་རྨད་བྱུང་འབྲས་བུ་མཆོག་གི་སྐུ༔ རིག་པ་དོན་ཆུང་སྤྲུལ་པའི་གནས༔ སྟོང་པ་རྣམ་དག་ཆོས་ཀྱི་སྐུ༔ གསལ་བ་རྣམ་དག་ཆོས་ཀྱི་གསུང་༔ མ་འགགས་རྣམ་དག་ཆོས་ཀྱི་ཐུགས༔ ཆོས་ཀྱི་སྐུ་ལ་གཉིས་སུ་མེད༔ བདེར་གཤེགས་འཕྲིན་ལས་ལྷུན་གྱིས་གྲུབ༔ དེ་ལྟར་མཛོད་ཅིག་ཤེས་རབ་མཁར་ཆུ་ཟ༔ མ་འོངས་སེམས་ཅན་འགྲོ་བའི་དོན༔ སྐྱིད་སྡུག་རེས་ལྟོས་ངེས་ཤེས་ཀྱི༔ འཇིག་རྟེན་འདི་ན་ང་ཡི་དངོས་འཛིན་པ༔ ང་བའི་རྫུས་སྐྱེས་ཁམས་འདིར་ཡོང་མི་སྲིད༔ མ་འོངས་ང་ཡི་སྤྲུལ་པ་ཆོས་འཛིན་པ༔ དེ་ལྟར་དཔག་མེད་བགྲང་གིས་ནུས་པ་མེད༔ མ་འོངས་གྲོགས་བྱེད་བུད་མེད་མཁར་ཆུ་ཟ༔ མཐོང་ལམ་ཡང་དག་སྦྱོར་བའི་ངོ་མཚར་དུ༔ ཉོན་ཅིག་ཡེ་ཤེས་མཚོ་རྒྱལ་ཞེས༔ ང་ནི་མདངས་ལྡན་སྐུ་འཁྲུངས་པ༔ ཁམས་གསུམ་སྲིད་གསུམ་དབང་བསྡུས་ཟིལ་གྱིས་གནོན༔ དེ་ལྟར་པདྨ་རྒྱལ་པོ་ང་༔ ཏིང་ངེ་འཛིན་ངང་གིས་མུ་སྟེགས་ཚོགས་བཅོམ་པ༔ རྡོ་རྗེ་གདན་བྱོན་ཚེ་ཡི་དུས༔ བདུད་བཞི་བཅོམ་པའི་དགེ་ཚུལ་རྣམ་སྟོན་པ༔ དེ་ལྟར་ཤཱཀྱ་སེང་གེ་ང་༔ རང་བྱུང་མཆོག་གི་དངོས་གྲུབ་བརྙེས༔ ཟ་ཧོར་མ་ཀ་ཏ་ཡུལ་དུ༔ བསིལ་ཚལ་བམ་རོའི་བསྒྲུབས་པ་མཛད༔ ཐུགས་ཀྱི་སྡེ་སྣོད་བཅུ་གཉིས་གསལ༔ སྐུ་གསུམ་རྣམ་པར་དག་པའི་སྡེ༔ ལུང་དང་ཚིགས་སུ་ཆེད་དུ་བརྗོད༔ བཀའ་སྩལ་མདོ་སྡེ་དོན་བྱས་པ༔ གཞོན་ནུ་སྔགས་འཆང་ཚུལ་གྱིས་འགྲོ་བ་འདྲེན༔ ཡུམ་ཆེན་མནྡྷ་ར་བ་མོ༔ དེ་ལྟར་པདྨ་སཾ་བྷ་ང་༔ མུ་སྟེགས་གནས་སུ་ང་བྱོན་པ༔ དགའ་ཚལ་གནས་ཀྱི་ཕོ་བྲང་དུ༔ སྙན་པ་ཧཱུྃ་ཕཊཿསྒྲ་ཡི་ཕྱོགས་རྣམས་ཁྱབ༔ གནོད་བྱེད་འདུལ་བའི་དངོས་གྲུབ་བརྙེས༔ དེ་ལྟར་རྡོར་རྗེ་གྲོ་ལོད་ངས༔ ལི་ཡི་གནས་སུ་ང་བྱོན་པ༔ ལྗང་ར་སྨུག་པོའི་གནས་མཆོག་ནས༔ ཤེལ་སྒོ་མངོན་ཤེས་མཆོག་གི་དངོས་གྲུབ་བརྙེས༔ དེ་ལྟ་ཉི་མ་འོད་ཟེར་ང་༔ བལ་པོའི་ཡུལ་དུ་ང་བྱོན་པའི༔ ཡང་ལེ་ཤོད་ཀྱི་གནོད་སྦྱིན་རྫོངས༔ ལྷ་སྲིན་སྡེ་བརྒྱད་དམ་ལ་བཏགས༔ སེང་གེ་སྒྲ་ཡི་ནམ་མཁའ་ཀུན་ཁྱབ་ང་༔ བོད་ཀྱི་ཡུལ་གྱི་དབུས་ཕྱོགས་ནས༔ སྟག་ཚང་སེང་ཕུག་གནས་ཡུལ་དུ༔ སྣང་བ་མཐའ་ཡས་སྤྲུལ་པའི་འགྲོ་མགོན་ང་༔ མཁའ་འགྲོ་བཞི་རྣམས་ཚོགས་ཀྱི་རོལ་གནས་པ༔ བདེ་བ་མཆོག་གི་སྐྱེ་མེད་པདྨ་ང་༔ བོད་ཡུལ་བསམ་ཡས་གླིང་དུ་བྱོན་པའི་དུས༔ ཡུམ་ཆེན་མཚོ་རྒྱལ་མཆོག་གི་དངོས་གྲུབ་བརྙེས༔ མཚན་ལྡན་སྐྱེས་བུའི་ཆ་ལུགས་འཛིན༔ ཁམས་གསུམ་མངའ་བདག་ཆོས་ཀྱི་རྒྱལ་པོ་ཞེས༔ བྱང་སེམས་མཆོག་གི་ཆུ་རྒྱུན་འབེབས༔ གཉིས་མེད་གཉིས་སུ་མེད་པའི་མཁའ་དབྱིངས་སུ༔ མ་འགགས་ཐབས་ཤེས་སྐྱིན་སྦྱར་བ༔ ལྷོ་བྲག་གླིང་དུ་བྱོན་པའི་དུས༔ གནོད་བྱེད་གཉན་ནོན་སྔགས་འཆང་ནུས་མཐུ་ང་༔ བོད་ཀྱི་དོན་དུ་ང་ཉིད་ལྷ་རྗེར་སྤྲུལ༔ གང་འདུལ་ཐབས་ཀྱིས་འགྲོ་ལ་ལེགས་པར་དགོངས༔ མཁར་ཆུ་ས་དེར་གཏེར་ཤོག་དཔག་མེད་སྦས༔ སྦས་པ་ཙམ་གྱིས་མ་འོངས་ང་སྤྲུལ་རེ༔ མཁར་ཆུ་ཟ་ཡི་ཐུགས་ལ་ཞོག༔ མ་འོངས་དོན་དུ་ཡིད་ལ་འཆོངས༔ མི་བརྗེད་ཉམས་སུ་ལོངས་ཤིག་མཁར་ཆུ་ཟ༔ འགྲོ་བའི་དོན་དུ་ཐུགས་རྗེས་ཡང་ཡང་གཟིགས༔ ཞེས་གསུངས་པ༔

མཁར་ཆུ་ཟ་དེ་ཉམས་སུ་ལོངས༔ ད་ལྟ་ཁྱོད་མཁར་གདུང་འདི་ནས་སོང་སྟེ་ཟས་ཆང་སློངས་གསུངས༔ ཁོ་མོ་གདུང་ནས་སོང་སྟེ་མི་རྣམས་ལ་དགོས་ཟེར་ཏེ༔ མི་རྣམས་ཀྱི་གསེར་དང་དེ་རྣམས་སྦྱིན༔ ཨོ་རྒྱན་གྱི་མདུན་ནས་ཡོང་སྟེ་ཚེས་བཅུ་བྱེད་པ༔ དེ་ཉིན་ནས་སྤྱན་རས་གཟིགས་ཀྱི་ནམ་མཁའ་ནས་ཞལ་གཟིགས་ནས༔ ལགས་རིན་པོ་ཆེ་འདི་འགྲོ་བའི་དོན་དུ་ངས་མཛད་པ༔ སྔར་རྒྱ་གར་ཀ་མ་ལའི་གནས་ནང་དུ་ཆུ་ནང་ནས་ཙནྡན་སྡོང་པོ་འཁྲུངས་ནས༔ དེའི་ནང་དུ་ང་བཅུ་གཅིག་ཞལ་ཡོད་ནས༔ ང་གང་འདུལ་སྤྲུལ་པ་ཀ་ན་ཆེན་པོའི་སྡོང་པོ་བཀས་པ་ཙམ་གྱིས་ང་སྤྱན་རས་གཟིགས་དེའི་དུས་སུ་དེར་འཁྲུངས་པ༔ རྒྱ་གར་ཡུལ་ཝ་ར་ན་སིར་འཇིག་རྟེན་དབང་ཕྱུག༔ འདིར་དབུས་ནས་ང་སྲོང་བཙན་སྒམ་པོ་ཞེས་བྱ་བ༔ ཁྱེད་རྫུས་སྐྱེས་པདྨ་དང་ང་གང་འདུལ་ངོ་བོ་དེ་བྱ་བ་དོན་མཚུངས་པའི་ཆོས་འདི་མཁར་ཆུ་ཟས་ཐོས་ཏེ་འགྲོ་བའི་དོན༔ ༀ་ཨཱ༔ཧཱུཾ༔ རྣམ་དག་ཆོས་སྐུ་རྒྱལ་བ་འོད་དཔག་མེད༔ འགགས་མེད་ཐུགས་རྗེ་ཆེན་པོ་སྤྱན་རས་གཟིགས༔ སྤྲུལ་སྐུ་འགྲོ་བ་འདྲེན་པའི་པདྨ་འབྱུང་༔ ངོ་བོ་གཅིག་ལ་སྤྲུལ་པ་བརྒྱ་ཕྲག་འགྱེད༔ གང་འདུལ་རྣམ་སྤྲུལ་མཆོག་ལ་ཕྱག་འཚལ་བསྟོད༔ ༀ་ཨཱ་ཧཱུཾ༔ འདས་དང་མ་བྱོན་ད་ལྟ་དུས་གསུམ་ནས༔ བླ་མ་སངས་རྒྱས་ཕྱོགས་བཅུ་ཡི་དམ་ལྷ༔ དངོས་སུ་འབྱོར་དང་ཡིད་ཀྱི་རྣམ་སྤྲུལ་འབུལ༔ མོས་བློ་རྩ་གསུམ་སྐུ་གསུམ་ལྷ་ལ་འབུལ༔ འགྲོ་བ་སེམས་ཅན་ཐམས་ཅད་མ་ལུས་པ༔ སྲོག་གཅོད་མ་བྱིན་ལེན་དང་མི་ཚངས་སྤྱོད༔ རྫུན་ཚིག་ཕྲ་མ་ཚིག་རྩུབ་ངག་འཁྱལ་དབྱེན༔ བརྣབ་སེམས་གནོད་སེམས་ལོག་ལྟ་ལ་སོགས་ཏེ༔ མི་དགེ་བཅུ་པོ་བགྱིས་རྣམས་མཐོལ་ལོ་བཤགས༔ ཆོས་སྐུ་ལོངས་སྐུ་སྤྲུལ་པ་སྐུ་ཡི་མཆོག༔ རྫུས་སྐྱེས་པདྨའི་སྐུ་ལ་ཕྱག་འཚལ་བསྟོད༔ འགྲོ་བ་སེམས་ཅན་རྣམས་ཀྱི་དོན་ཆེད་དུ༔ ཐེག་མཆོག་ཡང་དག་དོན་གྱི་དངོས་གྲུབ་སྩོལ༔ དབུས་ཕྱོགས་རྣམ་པར་སྣང་མཛད་ཆོས་ཀྱི་སྐུ༔ གསལ་འཚེར་ཆོས་དབྱིངས་རྣམ་དག་བཀྲ་ཤིས་དེར༔ འགྲོ་མགོན་འགྲོ་བ་འདྲེན་པའི་བཀྲ་ཤིས་ཤོག༔ ཤར་ནས་རྡོ་རྗེ་སེམས་དཔའ་ཆོས་ཀྱི་སྐུ༔ གསལ་ལ་མེ་ལོང་ཡེ་ཤེས་བཀྲ་ཤིས་གང་༔ འགྲོ་མགོན་འགྲོ་བ་འདྲེན་པའི་བཀྲ་ཤིས་ཤོག༔ ལྷོ་ཕྱོགས་རིན་ཆེན་འབྱུང་ལྡན་ཆོས་ཀྱི་སྐུ༔ གསལ་མདང་མཉམ་ཉིད་ཡེ་ཤེས་བཀྲ་ཤིས་གང་༔ འགྲོ་མགོན་འགྲོ་བ་འདྲེན་པའི་བཀྲ་ཤིས་ཤོག༔ ནུབ་ནས་སྣང་བ་མཐའ་ཡས་ཆོས་ཀྱི་སྐུ༔ གསལ་འཚེར་སོར་རྟོག་ཡེ་ཤེས་བཀྲ་ཤིས་གང་༔ འགྲོ་མགོན་འགྲོ་བ་འདྲེན་པའི་བཀྲ་ཤིས་ཤོག༔ བྱང་ནས་དོན་ཡོད་གྲུབ་པ་ཆོས་ཀྱི་སྐུ༔ གསལ་འཚེར་རང་ལྡན་བྱ་གྲུབ་ཡེ་ཤེས་ཀྱིས༔ འགྲོ་མགོན་འགྲོ་བ་འདྲེན་པའི་བཀྲ་ཤིས་ཤོག༔ སྐྱབས་ཡུལ་སངས་རྒྱས་བཀའ་རྒྱུད་བླ་མ་དང་༔ དཔའ་བོ་མཁའ་འགྲོ་བསྒྲུབ་པའི་དངོས་གྲུབ་གནང་༔ ཐུགས་རྗེ་ཤུགས་ཀྱིས་འགྲོ་བ་འདྲེན་མཛད་པ༔ འགྲོ་མགོན་འགྲོ་བ་འདྲེན་པའི་བཀྲ་ཤིས་ཤོག༔ ཐུགས་རྗེ་སྨན་མཆོག་འགྲོ་བའི་དོན་དགོངས་ཏེ༔ ཐབས་ལམ་ཡང་དག་སྦྱོར་བའི་སྤྱན་རས་གཟིགས༔ འགྲོ་མགོན་འགྲོ་བ་འདྲེན་པའི་བཀྲ་ཤིས་ཤོག༔ ཡི་དམ་མཉེས་པའི་ཚོགས་ཀྱི་འབྱོར་ཚོགས་ལྡན༔ མཁའ་འགྲོ་མཉེས་པའི་ཚོགས་དང་རོལ་མོ་བྱས༔ ཆོས་སྐྱོང་མཉེས་པའི་བསྐང་གཏོར་འདི་ལྟར་མཉེས༔ མ་མོ་མཁའ་འགྲོའི་བྱིན་རླབས་འགྲོ་ལ་ཐིམ༔ དེ་རིང་དབང་མཆོག་འགྲོ་དོན་དགོངས༔ སྔགས་འཆང་རྫུས་སྐྱེས་པདྨ་འབྱུང་༔ འགྲོ་བ་འདྲེན་པའི་ཐབས་བཀའ་སྩོལ༔ ཐུགས་རྗེ་འགྲོ་དོན་བྱེད་ལ་ཕྱག་འཚལ་བསྟོད༔ ཐུགས་རྗེ་ཐབས་མཁས་ཚངས་པ་དངོས་གྲུབ་སྩོལ༔ བདག་རེ་སྔགས་འཆང་པདྨ་ཁྱེད་མ་འོངས་བུ་སློབ་དོན་དུ་མཛད་པར་ཞུས༔ ཞེས་གསུངས༔ པདྨའི་ཞལ་ནས༔ ཨེ་མ་ཧོ༔ དུས་གསུམ་བདེར་གཤེགས་སངས་རྒྱས་རིན་པོ་ཆེ༔ ཕྱོགས་བཅུ་རྣམ་དག་བདེ་ཆེན་ལོངས་སྤྱོད་རྫོགས༔ སྟོན་པ་སྤྱན་རས་གཟིགས་ལ་ཕྱག་འཚལ་བསྟོད༔ ཐབས་ལམ་ཡང་དག་སྤྱོད་པའི་མཐོང་ལམ་དང་༔ ཡང་དག་རྫོགས་པའི་སངས་རྒྱས་རིན་པོ་ཆེ༔ སྐྱོན་གྱིས་མ་གོས་རྒྱལ་བ་ཀུན་གྱི་དངོས༔ འཕགས་པ་སྤྱན་རས་གཟིགས་ལ་ཕྱག་འཚལ་བསྟོད༔ འགྲོ་བའི་དོན་དུ་ཐུགས་རྗེས་གཟིགས་པར་ཞུ༔ ཞེས་གསུངས༔ ཕྱོགས་བཅུ་སངས་རྒྱས་ཐམས་ཅད་ནམ་མཁའ་ལ་ཡལ༔ ཨུ་རྒྱན་པདྨའི་ཞལ་ནས་རིགས་ཀྱི་བུ་མོ་མཁར་ཆུ་ཟ་ཉོན་དང་༔ སྤྱན་རས་གཟིགས་ཀྱི་ཆོས་སྐོར་འདི་འགྲོ་བའི་དོན་དུ་དགོས་ནས་འདི་ཁྱོད་རྣམས་ཉམས་སུ་ལོངས་ཤིག༔ ཅེས་གསུངས་ནས༔ པདྨའི་དགོངས་ནས༔ ཁོ་མོ་བདག་གིས་བཀྲོལ༔ གཏེར་ཤོག་ཕབ་ནས་འགྲོ་བའི་དོན་དུ་མཛད་ནས་ལར་མང་པོ་སྦས༔ ཁོ་མོས་ཞུས་ནས༔ ལགས་ཨུ་རྒྱན་རིན་པོ་ཆེ༔ འདི་མ་འོངས་པའི་དུས་སུ་ཅི་འདྲ་བ་འབྱུང་༔ ཞུས༔ སྤྱན་རས་གཟིགས་ཀྱི་ཆོས་སྐོར་འདི་རྣམས་གང་དུ་འབྱུང་ཞུས༔ ཨུ་རྒྱན་གྱི་ཞལ་ནས༔ ཡེ་ཤེས་མཚོ་རྒྱལ་ཉོན་དང་༔ འདི་མ་འོངས་དུས་སུ་རིག་འཛིན་ཀུན་ལ་འདི་ལྟར་ཡོད་པའི་ཐབས་ངེས་པ་ཅན་གཅིག་འདུག་ཁྱོད་རང་ལུས་ལྷ་ངོ་སྟོན་པ་འདིའི་དབང་ཐོབ་པར་ཡིན༔ ཞེས་གསུངས༔ ཡེ་ཤེས་མཚོ་རྒྱལ་གྱིས་རྨི་ལམ་རྨིས་པ་བཤད་ནས༔ ཨུ་རྒྱན་རིན་པོ་ཆེ་ལགས༔ ང་མཁར་ཆུ་ན་གཅིག་ཐོན་ཏེ༔ མཁར་ཕུབ་ཤི་ནས་འདུག་པ་རྨིས༔ ཞེས་ཞུས༔ ཨུ་རྒྱན་ཞལ་ནས༔ འཆི་བའི་ནད་གཅོད་བེམ་རིག་བྲལ་ནས་ཅི་བྱེད་པའི་ཐབས་མེད་གསུངས༔ དེར་ཙམ་མཁར་ཆུ་ནས༔ ཡེ་ཤེས་མཚོ་རྒྱལ་བདག་གིས་རི་མིང་བུ་གཉིས་གསེར་རྣམས་བཟུང་ནས༔ ཨུ་རྒྱན་མདུན་དུ་ཐོན་པ༔ ཡེ་ཤེས་མཚོ་རྒྱལ་ཁྱེད་གཉིས་ཅི་ལ་ཡོང་པ་ཡིན༔ གསུངས༔ མཁའ་འགྲོ་གནས་དང་ཆུ་སྐྱབས་གཉིས་ཁྱེད་ཡབ་འདས་ནས༔ ཨུ་རྒྱན་ལ་གསེར་ཕུལ་ཡོང་པ་ཡིན་ཞུས༔ ཡེ་ཤེས་མཚོ་རྒྱལ་ཨུ་རྒྱན་གྱིས་མ་རིག་པར་དུས་མྱ་ངན་མང་པོ་བྱེད་མཐོང་ནས་མི་བྱེད་པ༔ གསེར་རྣམས་ཡེ་ཤེས་མཚོ་རྒྱལ་གྱིས་སློབ་དཔོན་ལ་ཕུལ་ནས༔ སློབ་དཔོན་གྱིས་མདུན་གྱི་སངས་རྒྱས་ལ་ཕུལ་བ༔ མི་གཉིས་ལ་འཚོ་བ་གཅིག་སྦྱིན་ནས་ཕྱིར་སོང་ངོ་༔ མཚོ་རྒྱལ་གྱིས་སློབ་དཔོན་ལ་འདི་ལྟར་ཞུས་པ༔ བདག་གི་ཡབ་འདིའི་སྐྱེ་བ་བཅད་ནས་སངས་རྒྱས་པའི་ཐབས་གཅིག་དགོངས་ཞུས༔ ཨུ་རྒྱན་གྱི་ཞལ་ནས་ཁྱོད་ཡབ་འདས་པའི་ཁྱོད་རང་ཨི་སྡུག་པ་འདུག་གསུངས༔ མཚོ་རྒྱལ་གྱི་སྡུག་ངས་ཅི་བྱེད་ཞུས་ནས་མིག་གཉིས་ནས་མཆི་མ་ས་ལ་ཐིགས་པ་གཅིག་ཡོང་༔ ཨུ་རྒྱན་གྱི་ཞལ་ནས༔ ཁྱོད་འཇིག་རྟེན་ཐམས་ཅད་སྤྲང་ཟེར་ནས་མྱ་ངན་ཅི་ལ་བྱེད་པ་ཡིན་གསུངས༔

ཡེ་ཤེས་མཚོ་རྒྱལ་གྱིས་ཞུས་པ༔ ཀྱེ་མ་ཨུ་རྒྱན་རིན་པོ་ཆེ༔ སྐྱབས་མགོན་འགྲོ་བའི་རེ་ས་ཁྱེད༔ ཁྱད་པར་ཅན་གྱི་༔ ཁོ་མོ་བདག་གི་མགོན༔ མཁར་ཆུ་དམ་པ་ཀུན་གྱི་སྐྱབས་པ་ལས༔ མཁར་ཆུ་རྣམས་ལ་ཐུགས་རྗེའི་མ་ཆུང་ཞིག༔ བདག་གི་ཡབ་ཀྱི་སྐྱེ་བ་ཆོད༔ སངས་རྒྱས་བྱང་ཆུབ་ཐོབ་པའི་ཐུགས་དགོངས་ཐུགས༔ དྲིན་ཅན་མཁར་ཕུབ་བུ་མོ་ང་༔ སྔོན་དེ་ལྟར་མཇལ་དགོས་ཏེ༔ ས་ཡུལ་རིང་བས་དུས་འདིར་ཐུགས་སྐབས་མེད༔ དྲིན་ཅན་རྒྱལ་སྲས་མཁར་ཕུབ་བུ་མོ་ང་༔ སྐྱིད་འདོད་ལས་ཀྱི་བླ་མའི་གྲོགས༔ ཐུགས་རྗེའི་མ་ཆུང་སྔགས་འཆང་པདྨ་འབྱུང་༔ སྤྱིར་འགྲོ་བ་ཡོངས་ལ་ཐུགས་རྗེས་གཟིགས༔ ཁྱད་པར་མཁར་ཆུ་རྣམས་ལ་ཞལ་གྱིས་གཟིགས༔ ཕྱི་མ་བླ་མའི་དྲིན་གྱིས་མཁར་ཕུབ་ལས་དག་ནས༔ ཐུགས་རྗེ་ཤུགས་འབྱུང་སྟོབས་ཀྱིས་ཁྱད་འཕགས་པ༔ སྡིག་བྱས་མཁར་ཆུ་བུ་མོ་མཚོ་རྒྱལ་ང་༔ སྐྱིད་འདོད་བླ་མའི་ཕྱག་ཕྱིས་མཛད༔ མཁར་ཕུབ་འདི་ཡི་སྐྱེ་བ་མ་བཅད་ནས༔ ཁོ་མོ་རིག་དམན་བླ་མའི་ཞབས་ཏོག་མཛད༔ རིག་དམན་བདག་ལ་ཐུགས་རྗེས་བཟུང་དུ་གསོལ༔ བདག་གི་ཡབ་ཀྱི་སྐྱེ་བ་འདི་བཅད་ནས༔ སྔར་ཡང་དྲིན་ཆེ་ད་ཡང་ཐུགས་རྗེ་ཆེ༔ མཁར་ཕུབ་བུ་མོ་ཡེ་ཤེས་མཚོ་རྒྱལ་ང་༔ ལས་ཅན་བླ་མའི་ཞབས་ཏོག་འདི་བྱས་པ༔ འདི་ཡི་མཐུ་དང་ཐུགས་རྗེ་བཟུང་བར་ཞུ༔ ཕ་བཀའ་རྒྱུད་བླ་མ་རིན་པོ་ཆེ༔ སྐྱབས་རེ་ས་སངས་རྒྱས་དཀོན་མཆོག་གསུམ༔ སྒོས་བསམ་པའི་སྐྱབས་གནས་རྩ་བ་གསུམ༔ སྐད་ཅིག་ཡིད་ལ་དྲན་པ་པདྨ་འབྱུང་༔ འགྲོ་བའི་རེ་ས་བླ་མ་རིན་པོ་ཆེ༔ མཁར་ཆུའི་སྐྱབས་ས་པདྨ་རིན་པོ་ཆེ༔ ཁོ་མོ་བསྟེན་ས་སྔགས་འཆང་པདྨ་འབྱུང་༔ ཡིད་ལ་དྲན་པ་མཐོང་ཐོས་ཐར་ལམ་ཟིན༔ གངས་སྟོད་སེང་གེ་དཀར་མོ་ལ༔ གཅན་གཟན་རྣམས་ནི་དེ་བརྟེན་པ༔ བྲག་སྟོད་ཁྱུང་ཆེན་རྩལ་དྲག་ལ༔ བྱ་ཕྲུག་རྣམས་ནི་དེ་ལ་བརྟེན༔ ནགས་སྟོད་སྟག་མོ་ཁྲ་བོ་ལ༔ གཅན་གཟན་རྣམས་ནི་དེ་ལ་བརྟེན༔ ཡུལ་མི་གཙོ་བོ་དཔོན་ལ་བརྟེན༔ ཡང་འཁོར་ཁྱི་གཡོག་ཟས་གོས་བརྟེན༔ དགོན་ནང་བརྙེ་བླ་མ་བསྟེན༔ ཁོ་མོ་རེ་ས་པདྨ་འབྱུང་༔ རྟེན་ལ་རྫུས་སྐྱེས་པདྨ་འབྱུང་༔ འགྲོ་ལ་བརྩེ་ཕྱིར་ཐུགས་རྗེ་ཞལ་གྱིས་གཟིགས༔ མུན་པའི་གླིང་དུ་ཐུགས་རྗེས་གཟིགས༔ ཁོ་མོ་ཕ་ནི་མཁར་ཕུབ་འཆི་བའི་ལས༔ ཐུགས་རྗེ་ལྕགས་ཀྱུས་ཟིན་པར་ཞུ༔ བུད་མེད་གཏམ་ཡང་ཞུ་ཕོད་མང་པོ་བཅས༔ མ་རིག་ལོག་ཚིག་སོང་ན་མཐོལ་ལོ་བཤགས༔ བུད་མེད་ལུས་བླངས་སྣང་བ་མཐོ་བྱས་སོ༔ མ་རྟོག་འགལ་བ་ཅི་མཆིས་མཐོལ་ལོ་བཤགས༔ བུད་མེད་ལུས་བླངས་ཞུ་ཕོད་བྱས་པ་འདི༔ ཁྲོ་མེད་སྔགས་འཆང་གཞོན་ནུའི་ཆ་ལུགས་ལྡན༔ ཁོ་མོ་དེ་ཕྱིར་བསམ་པའི་ཞུ་ཕོད་ཡིན༔ དེ་ཕྱིར་མ་གཏོགས་དྲིན་ཅན་ཕ་མ་ཤི༔ ཕྱི་རབས་ལུས་འདི་ཁ་དོག་རྗེས་ཨེ་དགོས༔ རྫུས་སྐྱེས་པདྨའི་ཐུགས་རྗེ་ཆེན་པོ་ཡོད༔ ཏ་ལང་རྒྱལ་སྲས་མཁར་ཕུབ་འདི་ལ་ཐུགས་རྗེས་ཟུངས༔ སྐྱབས་རེ་ས་བླ་མ་རིན་པོ་ཆེ༔ སངས་རྒྱས་ཀུན་གྱི་ངོ་བོ་ཉིད༔ མཁའ་འགྲོ་ཀུན་གྱི་མངའ་བདག་ཉིད༔ ཡི་དམ་ཀུན་གྱི་གྲངས་ཚད་འཛིན༔ ཆོས་སྐྱོང་སྲུང་མ་བྲན་འཁོར་བ༔ ཁོ་མོ་སྐྱིད་འདོད་བླ་མའི་དྲིན༔ ཞབས་ཏོག་མཛད་པའི་ཐུགས་རྗེའི་ཤིན་ཏུ་ཆེ༔ རྫུས་སྐྱེས་ཐུགས་ལ་འགལ་སོང་མཐོལ་ལོ་བཤགས༔ བུད་མེད་སེམས་དང་འདི་ཡི་དྲིན་རྩིས་མིན༔ རྫུས་སྐྱེས་དྲིན་རྩིས་མེད་པར་ཐུགས་རྗེས་གཟིགས༔ ཁོ་མོ་གཏམ་མང་ལས་ཀྱི་ཤུགས་དབང་འདིར༔ སྔགས་འཆང་པདྨའི་ཐུགས་རྗེས་གཟིགས་སུ་གསོལ༔ ཁོ་མོ་སྐྱིད་སྐྱིད་འདྲ་བ་བླ་མའི་དྲིན༔ སྡིག་པ་ཙམ་གྱི་མཁར་ཟ་བདག་གི་ལས༔ དེ་ཕྱིར་སྡིག་ལ་མ་མྱོང་བླ་མའི་དྲིན༔ འདི་འདྲ་དྲིན་ཆེ་གང་ལ་ཡོད་པ་མེད༔ རྙེད་པ་མཆོག་གི་པདྨ་འབྱུང་གནས་རྙེད༔ དྲེག་ཅིང་དྲག་འདོད་དཔའ་བོ་གཡུལ་ལས་རྒྱལ༔ ཁོ་མོ་བདག་གིས་ཞུ་བ་བཀའ་གནང་བགྱིས༔ བདག་ལ་ཕྱོགས་རིས་ཡོད་པ་མ་ཡིན་ཏེ༔ མཁར་ཕུབ་དེ་ལ་ཐུགས་རྗེས་གཟིགས་པར་ཞུ༔ ལགས་དེ་ལྟ་བུ་ཆོས་ཐམས་ཅད་ང་ཡབ་འདས་པ་འདི་ལ་ཐུགས་རྗེས་ཟུངས༔ བདག་རེ་ས་ཁྱེད་རིན་པོ་ཆེ༔ ཨུ་རྒྱན་གྱི་ཞལ་ནས༔ འདི་ལྟར་གསུངས་པའོ༔

ཨེ་མ་ཉོན་ཅིག་མཁར་ཆུ་ཟ༔ འཇིག་རྟེན་མི་རྟག་དྲི་ཟའི་གྲོང་ཁྱེར་འདྲ༔ རྨི་ལམ་སྨིག་རྒྱུ་བྲག་ཆ་ཆུ་ཟླ་འདྲ༔ སེམས་ཅན་ཐམས་ཅད་དེ་ཡང་མི་རྟག་གོ༔ འཆི་བའི་ནད་གཅོད་བེམ་རིག་བྲལ་ཁད་པ༔ འགྲོ་དྲུག་དེ་འདྲ་སྙིང་རྗེ་ཨ་ཙ་མ༔ ཁྱོད་ཀྱི་ཡབ་ནི་མྱ་ངན་འདས་ནས་ཀྱང་༔ ང་ཡི་ཐུགས་རྗེས་བཟུང་བ་ལོས་ཡོད་དེ༔ ཡེ་ཤེས་མཚོ་རྒྱལ་ཁྱེད་ཀྱི་ཐུགས་རྗེའི་ཡོད༔ ཁྱོད་ཀྱི་ཡབ་ཀྱི་སྐྱེ་བ་བླང་མི་དགོས༔ མཁར་ཆུ་རྒྱུད་པ་ཁྱེད་ཀྱི་དྲང་ཐུབ་སྟེ༔ ཐུབ་ཙམ་མིན་པ་འགྲོ་བའི་དོན་ཡོང་ངོ་༔ སྨོན་ལམ་རྣམ་དག་འདི་ཡི་འབྲེལ་བའི་མཐུས༔ མཁར་ཆུ་ལས་ཅན་རྒྱུད་པའི་མཚོ་རྒྱལ་འདི༔ འདི་ནི་རྒྱུད་པའི་མཐའ་མ་བྱང་ཆུབ་བཀོད༔ སྔགས་འཆང་ང་ཉིད་མི་དགོས་ཁྱེད་ཐུབ་ངེས༔ བདག་དང་འདྲ་བའི་ཡེ་ཤེས་མཚོ་རྒྱལ་བཀོད༔ འདི་ཡི་འབྲེལ་པའི་ཤུགས་ཀྱིས་མཐུ་དང་སྟོབས༔ ཕྱིར་མི་ལྡོག་པའི་གནས་སུ་སྐྱེ་བར་ངེས༔ ཁྱེད་ལ་བཀའ་དྲིན་འདི་ལྟར་མ་ཆེ་ན༔ མི་མིན་འདྲེ་ཡུལ་བུད་མེད་གནམ་སྐར་མ༔ ང་ཡི་གྲོགས་བྱེད་གཅིག་ཀྱང་མ་ངེས་པར༔ ཁྱོད་ལ་ཐུགས་རྗེའི་ཡོད་པ་དེ་ཕྱིར་རོ༔ ང་ཡི་གྲོགས་བྱེད་ཐུགས་རྗེའི་ལོ་ཡོད་ནས༔ ཁྱོད་ཀྱི་རྟོགས་པ་ཙམ་གྱིས་སངས་རྒྱས་ཐོབ༔ བསམ་པ་ཙམ་གྱིས་བྱང་ཆུབ་གནས་སུ་བཀོད༔ ཐར་པའི་ལམ་འདྲེན་བུད་མེད་མཁར་ཆུ་ཟ༔ རྫུས་སྐྱེས་ང་རྣམས་མི་དགོས་ཁྱོད་འགྲོ་དོན༔ མཁར་ཆུ་རྒྱུད་པ་ཁྱེད་ཀྱི་ཅི་བྱེད་ཡོད༔ ཁྱོད་ཀྱི་ཤུགས་ཀྱིས་འབྲེལ་པ་དེ་ཡི་མཐུས༔ བདེ་ཆེན་གནས་སུ་འགྲོ་བའི་བཀོད་གནས་ཤོག༔ ཅེས་གསུངས༔ ཡེ་ཤེས་མཚོ་རྒྱལ་གྱིས་ཞུས་པ༔ ལགས་ཨུ་རྒྱན་རིན་པོ་ཆེ༔ དེ་ལྟར་གསུངས་པ་ཤིན་ཏུ་དགའ༔ དེ་ཕྱིར་འདི་བྱས་སོ༔

ན་མོ་གུ་རུ༔ རྗེ་བཙུན་བླ་མ་རྣམས་ལ་ཕྱག་འཚལ་བསྟོད༔ ཁྱད་པར་བཀའ་དྲིན་ཅན་ལ་སྐྱབས་སུ་མཆི༔ དཀོན་མཆོག་གསུམ་ལ་རྗེས་ཡི་རངས༔ སྤངས་ལམ་ཡང་དག་ཐོབ་ཕྱིར་ལྡན་པ་དང་༔ དྲན་པ་གཉིད་ལོག་མངོན་ཤེས་ཟིན་པ་དང་༔ ཐ་མལ་ཤེས་པ་རང་ངོ་མཐོང་བར་ཞུས༔ ཆོས་སྐུ་ལྟ་བུའི་ཉམས་གཞི་བརྟན༔ ལོངས་སྐུ་རྟོགས་པའི་འགྲོ་དོན་བྱེད༔ སྤྲུལ་སྐུ་རིག་པ་ཉམས་བསྐྱང་བ༔ བཀའ་དྲིན་རྩ་བའི་བླ་མ་རིན་པོ་ཆེ༔ བདག་གི་སྤྱི་བོ་པདྨ་ཟླ་གདན་སྟེང་༔ བདག་དང་འདུ་འབྲལ་མེད་པར་བྱིན་གྱིས་རློབས༔ ཞེས་ཞུས༔ ལགས་ཨུ་རྒྱན་རིན་པོ་ཆེ༔ འགྲོ་བ་མ་རིག་པ་དང་མུན་པ་འཐིབ་ནས་ཆོས་ལ་ཉན་པ་མེད་པ་ཚེ་ཐུང་བ་བདེ་བའི་སྐབས་ཀྱི་བཀའ་གནང་བ༔ བར་ཆད་ཡོད་ན་བསལ་བའི་དོན༔ འདི་ཕྱི་གང་ལ་གསོལ་བ་བཏབ་པའི་དོན་ཚིག་གཅིག་གནང་ཞུས༔ ཨུ་རྒྱན་རིན་པོ་ཆེའི་ཞལ་ནས༔ རིགས་ཀྱི་བུ་མོ་ཉོན་དང་༔ ངས་འགྲོ་ལ་བརྩེ་ཕྱིར་གྱིས་ཐུགས་རྗེ་ཐབས་གཅིག་གནང་ངོ་༔ ཞེས་གསུངས་ནས༔ ན་མོ་གུ་རུ༔ དང་པོ་ཆོས་སྐུ་བཟང་པོ་དང་༔ བར་དུ་སྔགས་འཆང་པདྨ་འབྱུང་༔ ཐ་མ་འགྲོ་བའི་དོན་མཛད་པ༔ སྐྱབས་རེ་ས་གསོལ་བ་ང་ལ་ཐོབ༔ སྐབས་སྐབས་གུ་རུ་སིདྡྷི་བཟློས༔ ཉིན་དུས་བཞི་ལ་ང་དྲན་ན༔ གསོལ་བ་བཏབ་པའི་བྱང་ཆུབ་ཐོབ༔ དལ་འབྱོར་མི་ལུས་ཐོབ་ཆེད་དུ༔ སྙིང་གི་དཀྱིལ་ནས་གསོལ་བ་ཐོབ༔ སྐབས་སྐབས་པདྨ་ང་དྲན་གྱིས༔ མི་ལུས་ཐོབ་པའི་ལུས་གཅིག་ཐོབ༔ དམ་པའི་ཆོས་ལ་དད་གུས་གྱིས༔ སྐབས་སྐབས་པདྨ་ང་དྲན་གྱིས༔ དགེ་བཅུ་དང་བླངས་རིན་ཆེན་རང་སྲོག་འདྲ༔ འཆི་ནས་འགྱོད་པའི་ངག་མི་སླེབས༔ མི་འཆི་འདོད་ཀྱང་རང་དབང་མེད༔ སྐྱེ་རྒ་ན་འཆིའི་རྦ་ཀློང་འཁྲུགས༔ འཆི་བདག་མི་འདོད་ཚུར་ཚུར་ཡོང་༔ ནམ་འཆི་ཆ་མེད་རྐྱེན་གྱིས་འཇིགས༔ སྐབས་སྐབས་པདྨ་ང་དྲན་གྱིས༔ དད་གུས་ཅན་གྱི་མཁར་ཆེན་ཟ༔ མཁར་ཆེན་བུ་མོས་ཉམས་སུ་ལོངས༔ ཨོཾ་ཨཱ༔ཧཱུཾ༔ དབང་ཆེན་སྤྲེའུ་ཟླའི་ཚེས་བཅུ་ཉིན་པར་དུས༔ སྐྱོན་གྱིས་མ་གོས་པདྨའི་ཁ་ནས་འབྱོན༔ སྐྱེ་འཆི་གཉིས་སྤང་རྡོ་རྗེ་རང་བཞིན་ལ༔ ཁམས་གསུམ་དབང་བསྡུད་པདྨ་རྒྱལ་པོ་ང་༔ སྐབས་སྐབས་པདྨ་ང་དྲན་གྱིས༔ མཁར་ཆེན་ཟ་ཡི་ཡིད་ལ་འཆོངས༔ མ་འོངས་བུ་སློབ་ཉམས་སུ་ལོངས༔ བྱ་ཡི་ཟླ་བའི་ཚེས་བཅུ་ཉིན་པར་དུས༔ གང་གའི་ཆུ་ཀླུང་སྟེང་དུ་གར་གར་བྲོས་ནས༔ དགེ་སློང་ཚུལ་འཛིན་བདེར་གཤེགས་འགྲོ་ལ་དགོངས༔ རབ་བྱུང་མཛད་ཚུལ་དགེ་སློང་སྡོམ་པ་བླངས༔ མཚན་ཅན་རྫུས་སྐྱེས་ཤཱཀྱ་སེང་གེ་ལ༔ སྐབས་སྐབས་པདྨ་ང་དྲན་གྱིས༔ མཁར་ཆུ་ཟ་ཡི་ཐུགས་ལ་འཆོངས༔ མ་འོངས་བུ་སློབ་ཉམས་སུ་ལོངས༔ ཁྱི་ཡི་ཟླ་བའི་ཚེས་བཅུ་ཉིན་པར་དུས༔ མུ་སྟེགས་ཡུལ་བྱོན་སྲིན་པོ་ཐམས་ཅད་བཏུལ༔ འདྲེ་བགེགས་དབང་སྡུད་སྐུ་མདོག་གཟི་བརྗིད་ལྡན༔ དུག་ལྔ་གྲོལ་ནས་སྐུ་ལྔ་རྒྱན་དུ་བཀོད༔ མཚན་མཆོག་ལྡན་པའི་མཚོ་སྐྱེས་རྡོ་རྗེ་ལ༔ སྐབས་སྐབས་པདྨ་ང་དྲན་གྱིས༔ མཁར་ཆེན་ཟ་ཡིས་ཡིད་ལ་འཆོངས༔ མ་འོངས་བུ་སློབ་ཉམས་སུ་ལོངས༔ ཕག་གི་ཟླ་བའི་ཚེས་བཅུ་ཉིན་པར་དུས༔ ཡང་ཤེད་འཆི་མེད་ཚེ་ཡི་དཀྱིལ་འཁོར་དུས༔ ཡི་དམ་འགྲོ་ལ་ཞལ་གཟིགས་པ༔ གུ་རུ་མཆོག་གི་དངོས་གྲུབ་བརྙེས༔ མཚན་ལྡན་རྫུས་སྐྱེས་པདྨ་ལ༔ སྐབས་སྐབས་པདྨ་ང་དྲན་གྱིས༔ མཁར་ཆུ་ཟ་ཡིས་ཐུགས་ལ་འཆོངས༔ མ་འོངས་བུ་སློབ་ཉམས་སུ་ལོངས༔ བྱི་བ་ཟླ་བའི་ཚེས་བཅུ་ཉིན་པར་དུས༔ བོད་ཀྱི་གདོང་དམར་སྲིན་པོ་དམ་ལ་བཏགས༔ བདེ་བ་མཆོག་གི་དངོས་གྲུབ་བརྙེས༔ ཡ་མཚན་མཆོག་གི་རྒྱན་དུ་བཀོད༔ མཚན་ནི་གུ་རུ་པདྨ་ཞེས༔ སྐབས་སྐབས་པདྨ་ང་དྲན་གྱིས༔ མཁར་ཆུ་ཟ་ཡི་ཐུགས་ལ་ཞོག༔ མ་འོངས་བུ་སློབ་དོན་དུ་ཉམས་སུ་ལོངས༔ གླང་གི་ཟླ་བའི་ཚེས་བཅུ་ཉིན་པར་དུས༔ བོད་འབངས་ལས་ཅན་རྗེ་འབངས་སྨིན་མཛད་པ༔ རྫུས་སྐྱེས་ང་ཉིད་ཆོས་ཀྱི་བསྟན་པ་ཞེས༔ མཚན་མཆོག་ལྡན་པའི་དངོས་གྲུབ་བརྙེས༔ མཚན་ནི་བཛྲ་གུ་རུ་ཞེས༔ སྐབས་སྐབས་པདྨ་ང་དྲན་གྱིས༔ མཁར་ཆུ་ཟ་ཡི་ཐུགས་ལ་ཞོག༔ མ་འོངས་བུ་སློབ་ཉམས་སུ་ལོངས༔ ཕག་གི་ཟླ་བའི་ཚེས་བཅུ་ཉིན་པར་དུས༔ ཡཀྴ་ནག་པོ་རྡུལ་དུ་རློག༔ འགྲན་གྱི་དོན་མེད་བགེགས་ཀྱི་གཤེད༔ མཚན་ནི་རྡོ་རྗེ་ཁྲོ་བོ་ལོད༔ སྐབས་སྐབས་པདྨ་ང་དྲན་གྱིས༔ མཁར་ཆུ་ཟ་ཡི་ཐུགས་ལ་ཞོག༔ མ་འོངས་བུ་སློབ་ཉམས་སུ་ལོངས༔ འབྲུག་གི་ཟླ་བའི་ཚེས་བཅུ་ཉིན་པར་དུས༔ བསིལ་ཚལ་གནས་ནས་མཁའ་འགྲོའི་ཚོགས་དཔོན་མཛད༔ ཐར་ལམ་མཆོག་གི་དངོས་གྲུབ་བརྙེས༔ དྷཱཀི་གཙོ་མཛད་པདྨ་ཆེན་པོ་ལ༔ སྐབས་སྐབས་པདྨ་ང་དྲན་གྱིས༔ མཁར་ཆུ་ཟ་ཡི་ཐུགས་ལ་ཞོག༔ མ་འོངས་བུ་སློབ་ཉམས་སུ་ལོངས༔ སྦྲུལ་གྱི་ཟླ་བའི་ཚེས་བཅུ་ཉིན་པར་དུས༔ ཟ་ཧོར་ཡུལ་དུ་བྱོན་མཛད་པ༔ མནྡྷ་ར་བའི་དངོས་གྲུབ་བརྙེས༔ མེ་དཔུང་དམར་ནག་མཚོ་རུ་བསྒྱུར༔ མཚན་ནི་ཤཱཀྱ་འོད་ཅེས་ལ༔ སྐབས་སྐབས་པདྨ་ང་དྲན་གྱིས༔ མཁར་ཆུ་ཟ་ཡི་ཐུགས་ལ་ཞོག༔ མ་འོངས་བུ་སློབ་ཉམས་སུ་ལོངས༔ རྟ་ཡི་ཟླ་བའི་ཚེས་བཅུ་ཉིན་པར་དུས༔ ཨུ་རྒྱན་ཡུལ་དུ་ཆད་མཛད་པ༔ བར་ཆད་མེད་པའི་དངོས་གྲུབ་བརྙེས༔ མཚན་ནི་པདྨ་གུ་རུ་ཞེས༔ སྐབས་སྐབས་པདྨ་ང་དྲན་གྱིས༔ མཁར་ཆུ་ཟ་ཡི་ཐུགས་ལ་ཞོག༔ མ་འོངས་བུ་སློབ་ཉམས་སུ་ལོངས༔ ལུག་གི་ཟླ་བའི་ཚེས་བཅུ་ཉིན་པར་དུས༔ མུ་སྟེགས་སྲིན་པོ་འདུལ་མཛད་པ༔ ཆོས་ཀྱི་འཁོར་ལོ་ལེགས་བསྐོར་བ༔ མཚན་ནི་སེང་གེ་སྒྲ་སྒྲོག་ཅེས༔ སྐབས་སྐབས་པདྨ་ང་དྲན་གྱིས༔ མཁར་ཆུ་ཟ་ཡི་ཐུགས་ལ་ཞོག༔ མ་འོངས་བུ་སློབ་ཉམས་སུ་ལོངས༔ བྱིན་རླབས་མཆོག་གི་དངོས་གྲུབ་སྩོལ༔ ཅེས་གསུངས༔

ཨུ་རྒྱན་གྱི་ཞལ་ནས༔ ཡེ་ཤེས་མཚོ་རྒྱལ་འདི་ཁྱོད་ཉམས་སུ་ལོངས༔ བསྐྱེད་པའི་སྔགས་ཀྱིས་སྣང་སྲིད་དབང་བསྡུད་ཀྱི་ཟིལ་གནོན་འཕང་བ༔ སྐུལ་བ་སྔགས་ཀྱི་འོད་ཟེར་ཀུན་འཕྲོ་བ༔ རྩ་བའི་སྔགས་ཀྱི་འོད་ཟེར་འཕྲོས་ནས་གནོད་བྱེད་དུམ་བུ་བཅད༔ ཅེས་གསུངས༔ ཡེ་ཤེས་མཚོ་རྒྱལ་གྱིས་ཞུས་པ༔ ལགས་ཨུ་རྒྱན་རིན་པོ་ཆེ་དབང་དང་བསྐྱེད་རྫོགས་གང་གི་ཆེ་བ༔ ཨུ་རྒྱན་གྱི་ཞལ་ནས༔ དང་པོ་མ་སྨིན་པའི་དབང་༔ སྨིན་པ་གྲོལ་བར་བྱེད་པའི་དབང་༔ དབང་སྐུར་བའི་འབྲས་བུ་ཁ་མངར་ལྟར༔ དབང་ཐོབ་པའི་ཡོན་ཏན་ནི་འབྲས་བུ་མངར་བའི་ས་བོན་རྟག་ཏུ་སྨིན༔ དབང་མ་ཐོབ་པའི་ཉེས་པ་འབྲས་བུ་བང་བ་རིལ་པས་ས་བོན་སྨིན་མི་འགྱུར༔ ལུང་ཐོབ་དབང་ཐོབ་མེད་པའི་བསྐུར་ཙམ་ན༔ དབང་བསྐུར་ཉན་མི་གཉིས་ཀ་ངན་སོང་ལྟུང་༔ བླ་མའི་བཀའ་ལ་བརྟེན་ནས་ལུང་ཐོབ་བྱེད༔ ལུང་ཐོབ་ན་དབང་ཐོབ་དོན་ཚང་བར་བྱ༔ སྐྱེད་པ་ནི་སྣང་སྲིད་གཅིག་ཏུ་བསྡུས་ནས་ཐལ་བར་བརླག་པ༔ རྫོགས་པ་ནི་སྣང་སྲིད་ཆོས་སྐུ་མཐོང་བ༔ རྗེ་དབང་དང་༔ བསྐྱེད་རྫོགས་ཟུང་འཇུག་གི་ཐབས་སྣ་ཚོགས་བྱ༔ ཞེས་གསུངས༔

མཚོ་རྒྱལ་གྱིས་ཞུས་པ༔ ལགས་ཨུ་རྒྱན་རིན་པོ་ཆེ༔ བདག་གིས་མ་འོངས་དོན་དུ་དེ་ལྟར་ཞུས་པ༔ ཐུགས་ཁྲེལ་མ་གནང་བ་ལགས༔ བདག་བུད་མེད་ཀྱི་རིགས་སྙིང་རུས་ཆུང་བ་སེམས་དང་བློ་ཁ་ཡངས་པ༔ གཏམ་མང་བ་དེ་ལྟར་ཞུས་པ༔ ཁྱོད་ཀྱི་སྐུ་གསུང་ཐུགས་ལ་འགྱུར་བ་མི་མངའ་དེས༔ བདག་ལ་བཀའ་བཀྱོན་མ་གནང་བར་ཞུ༔ ལར་འགྲོ་བ་སེམས་ཅན་ཐམས་ཅད་འདི་མཚོན་ཆའི་གཟིང་བ་དང་འདྲ་བ༔ འདི་ལ་ཐབས་སྣ་ཚོགས་མི་མངའ་སྙིང་རྗེ་བསམ་པ་དེ་ལྟར་མ་འོངས་ཀྱི་དོན་དུ་སྙིང་རྗེ་ལགས༔ ཨུ་རྒྱན་གྱི་ཞལ་ནས༔ རིགས་ཀྱི་བུ་མོ་ཁྱོད་ཅི་ཞུས་པ་ཐམས་ཅད་འགྲོ་བའི་དོན་ཡིན་པས༔ བློ་ཁ་མང་ནས་གཏམ་ཉུང་བ་ཁྱོད་ཅི་བྱེད་ན༔ ང་སྣང་སྲིད་འཁོར་འདས་ཆོས་ཀྱི་དབྱིངས་ནས་ཤེས་བྱ་སྐུར་སྟོན་པ་འགྱུར་བ་མི་མངའ་བ༔ ཁྱོད་རང་གི་འགྲོ་བའི་དོན་དུ་ཅི་བསམ་པ་བདག་ལ་ཞུས༔ ཞེས་གསུངས༔

མཚོ་རྒྱལ་གྱི་ཞལ་ནས༔ ཨུ་རྒྱན་རིན་པོ་ཆེ༔ སྨིན་བྱེད་རྒྱུའི་དབང་༔ གྲོལ་བྱེད་ལམ་གྱི་དབང་༔ ཕུན་སུམ་ཚོགས་པའི་དབང་དང་དེ་རྣམས་ཞུས༔ པདྨའི་ཞལ་ནས༔ སྨིན་བྱེད་རྒྱུའི་དབང་ནི༔ དོན་དམ་པ་ཆོས་ཀྱི་དབང་དང་༔ སེམས་ཉིད་དོན་གྱི་དབང་ཡིན༔ གྲོལ་བྱེད་ལམ་གྱི་དབང་ནི༔ བདེར་གཤེགས་སྙིང་པོ་འགྲོ་ཀུན་ཡོངས་ལ་ཁྱབ་པའི་དབང་ཡིན༔ ཆོས་སྐུ་ཡེ་ནས་ཀློང་ཡངས་སུ༔ གཟུགས་སྐུ་རྣམ་དག་ལོངས་སྐུ་ཀ་དག་པ༔ སྤྲུལ་སྐུ་རྣམ་དག་སྣ་ཚོགས་སྐུར་བཞེངས་པ༔ ཡང་དག་དོན་གྱི་མཆོག་ཆེན་པོ༔ མི་བརྗེད་ཉམས་སུ་ལོངས་ཤིག་མཁར་ཆུ་ཟ༔ ཡེ་ཤེས་མཚོ་རྒྱལ་ཞལ་ནས༔ འདས་པའི་དུས་ན་མ་འོངས་པ་འགྲོ་བའི་དོན་ལ་དགོངས༔ ལགས་ཨུ་རྒྱན་རིན་པོ་ཆེ༔ ལར་དེང་སང་འདིར་ཁྱེད་ང་སྤྱོད་པ་མཐུན་པ༔ འགྲོ་ལ་དེ་ལྟར་ཨེ་ཡོད་དམ༔ སྐུ་ཏ་ལེར་བཞུགས་པ༔ གསུང་ལྷང་ངེ་འདེབས་པ༔ ཐུགས་ཏ་ལེ་གཏད་པ་འདི་བདག་ལ་ཁྱེད་དྲིན་ཆེ༔ ད་ཡང་དྲིན་ཆེ་བ་འགྲོ་ལ་བཛྲ་གུ་རུ་གཅིག་ཐབས་བསྟན་ནས་བཀའ་དྲིན་ཆེ༔ ཞེས་ཞུས༔

ཨུ་རྒྱན་གྱི་ཞལ་ནས༔ མཁར་ཆུ་ཟ་ཉོན་དང་ངའི་ཚིག་འདི་ལྟར་དུ༔ ཨོཾ་ཨཱ༔ཧཱུྃ༔ འགྲོ་བའི་དོན་དུ་རང་བྱུང་པདྨ་འབྱུང་༔ མཆོག་གསུམ་རྩ་གསུམ་སྐུ་གསུམ་ངོ་བོ་ཉིད༔ རྩ་བའི་བླ་མ་པདྨ་ང་ཉིད་དང་༔ དབྱེར་མེད་ཀུན་དུ་ཨུ་རྒྱན་རང་བཞིན་གྱི༔ སྐུ་མདོག་དཀར་ལ་ཅུང་ཟད་དམར་བའི་མདངས༔ སྐུ་མཆོག་འགྱུར་བ་མེད་པའི་དངོས་གྲུབ་ཞུ༔ གསུང་མཆོག་འགགས་པ་མེད་པའི་དངོས་གྲུབ་ཞུ༔ ཐུགས་མཆོག་འཁྲུལ་པ་མེད་པའི་དངོས་གྲུབ་ཞུ༔ ཡོན་ཏན་བརྗོད་མེད་ལྟ་བུའི་དངོས་གྲུབ་ཞུ༔ འཕྲིན་ལས་ལྷུན་གྱིས་གྲུབ་པའི་དངོས་གྲུབ་ཞུ༔ ཉོན་མོངས་ནད་ལས་ཐར་བའི་དངོས་གྲུབ་ཞུ༔ ཡོན་ཏན་ལོ་འདབ་རྒྱས་པའི་དངོས་གྲུབ་ཞུ༔ འཆི་མེད་པདྨ་ལྟ་བུའི་དངོས་གྲུབ་ཞུ༔ བདུད་བཞི་གཡུལ་ལས་རྒྱལ་བའི་དངོས་གྲུབ་ཞུ༔ རང་བཞིན་ཤུགས་ལ་དྲངས་པའི་དངོས་གྲུབ་ཞུ༔ བྱིན་རླབས་ཆར་ལྟར་འབེབས་པར་ཤོག༔ བླ་མ་མཆོག་གིས་ཐུགས་རྗེས་གཟིགས༔ ཡི་དམ་མཆོག་གིས་བྱིན་རླབས་སྩོལ༔ མཁའ་འགྲོའི་མཆོག་གིས་དངོས་གྲུབ་སྩོལ༔ ཆོས་སྐྱོང་མཆོག་གིས་བར་ཆད་སེལ༔ གུ་རུ་ང་རང་ལྟ་བུར་བྱིན་གྱིས་རློབས༔ ཨོཾ་ཨཱ༔ཧཱུྃ༔ བཛྲ་གུ་རུ་པདྨ་སིདྡྷི་ཧཱུྃ༔ འགྲོ་བ་སེམས་ཅན་ཐམས་ཅད་ཀུན༔ དལ་འབྱོར་མི་ལུས་ཐོབ་དཀའ་བ༔ ཐུབ་པ་འདྲ་བའི་སྐྱེ་སྟོང་བཞེས༔ དེ་ཕྱིར་མི་ལུས་དོན་སྒོ་ཆུང་༔ མི་རྟག་ནམ་འཆི་ཆ་མེད་པ༔ འཆི་ན་ངེས་པར་ལས་དབང་འཁྱམས༔ དམྱལ་ཁམས་གནས་སུ་ལྷུང་སྲིད་པ༔ དེ་ཕྱིར་རང་རིག་དྲི་མེད་འཚོས༔ ༀ་ཨཱ༔ཧཱུྃ༔ བཛྲ་གུ་རུ་པདྨ་སིདྡྷི་ཧཱུཾ༔ འདི་ལ་ང་དྲན་ངག་གིས་འདི་བཏབ་ནས༔ དམྱལ་བའི་གནས་ཡུལ་ཡོད་ཀྱང་ཚ་གྲང་ཞི༔ སྐྱེ་བ་བདུན་གྱི་བར་དུ་བྱང་ཆུབ་ཐོབ༔ མི་བརྗེད་ཐུགས་ལ་ཞོག་ཅིག་མཁར་ཆུ་ཟ༔ མ་འོངས་བུ་སློབ་ཉམས་སུ་ལོངས༔ བསམས་ཤིང་རྗེ་བཙུན་ང་དྲན་གྱིས༔ ཞེས་གསུངས༔ ཡེ་ཤེས་མཚོ་རྒྱལ་ཞལ་ནས༔ ཨེ་མ་ཧོ༔ སློབ་དཔོན་ཆེན་པོ་པདྨ་འབྱུང་གནས་ལ༔ དད་གུས་ཅན་གྱི་མཚོ་རྒྱལ་སློབ་མ་ང་༔ མ་རིག་རང་ཁར་བཟུང་བ་ཅི་ཡོད་དམ༔ བྱམས་མགོན་པདྨ་འབྱུང་ལ་མཐོལ་ལོ་བཤགས༔ བུད་མེད་གཏམ་མང་བློ་ཁ་བསྒྱུར་སླད་ནས༔ མ་རིག་དབང་གིས་ལོག་ཚིག་ཅི་སོང་ནས༔ སྐྱབས་མགོན་པདྨ་འབྱུང་ལ་མཐོལ་ལོ་བཤགས༔ འཁོར་བའི་འདམ་རྫབ་ཀླུང་དུ་ལྟུང་བ་ན༔ རྫུས་སྐྱེས་པདྨའི་བཀའ་དྲིན་ཡང་ཡང་ཆེ༔ ཁོ་མོ་བདག་ལ་ཐུགས་རྗེ་ཤིན་ཏུ་བཟུང་༔ བྱམས་མགོན་ཐུགས་རྗེ་ཅན་ལ་ན་ལ་སྐྱབས་མཆི༔ འགྲོ་མགོན་པདྨ་འབྱུང་གནས་མདུན་དྲུང་ནས༔ སྔགས་འཆང་གྲོགས་བྱེད་ཇོ་མོ་མཁར་ཆུ་ཟ༔ མ་རིག་ལས་དབང་འགལ་བ་ཅི་སོང་ནས༔ མཐོལ་ལོ་བཤགས་སོ་ཚངས་པའི་དངོས་གྲུབ་སྩོལ༔ ཅེས་ཞུས༔

ཨུ་རྒྱན་གྱི་ཞལ་ནས༔ ཁྱོད་བུད་མེད་མཁར་ཆུ་ཟ་ཁྱིམ་ཐབ་བྱེད་ནས༔ འགྲོ་བ་མི་ལ་དགའ་བ་ཨེ་ཡོད་དམ༔ ཁྱིམ་པ་རབ་ཏུ་བྱུང་ནས་མཐོང་ལམ་ཡང་དག་སྦྱོར་བ་ལ་ཨེ་དགའམ༔ ལས་ཀྱི་ཤུགས་ཀྱིས་འདིར་མོས་པ་ཡིན་ནམ༔ རབ་ཏུ་བྱུང་ནས་འདི་འདྲ་བ་ངོ་མཚར་རམ༔ ཞེས་གསུངས༔ ཡེ་ཤེས་མཚོ་རྒྱལ་ཞལ་ནས༔ ང་ཆོས་ལ་མོས་པ་ཁྱིམ་ཐབ་སྤངས་ནས་ཁྱེད་གྲོགས་བྱེད་པ་ཡིན༔ ཚེ་གཅིག་ལུས་གཅིག་ཏུ་ཁྱིམ་པ་ལ་མི་མོས་པ་ང་རང་ལ་བཀའ་བཀྱོན་པ་ཨེ་ཡིན་ལགས༔ ཨེ་མ་ཧོ༔ གླིང་མ་ཉམས་པའི་འཛམ་བུ་གླིང་འདིར་སྐྱེས༔ ཡུལ་མ་ཉམས་པའི་རྒྱལ་བའི་ལུང་བསྟན་འདུག༔ རིགས་མ་ཉམས་པའི་མཁར་ཡུལ་ས་ནས་སྐྱེས༔ ངན་ལོང་ལྐུགས་མཐའི་རིགས་ལ་མ་སྐྱེས་ཀྱང་༔ དབང་པོ་ཚང་བ་བུད་མེད་བདག་གི་ལུས༔ སྡུག་ལ་འགྲོ་བའི་གླིང་དུ་མ་སྐྱེས་ཀྱང་༔ སྡིག་ལས་མི་མོས་ཁོ་མོ་བདག་གི་ལུས༔ གནས་ལ་མི་མོས་ཁྱིམ་ཐབ་སྤངས་ལ་མོས༔ རོགས་ངན་གླང་རྒན་ག་བཅིངས་ལྟ་བུ་ལ༔ འགྲོ་བའི་སྐྱབས་མཆིས་སུ་ལ་རེ་བ་འདུག༔ ཤན་པ་རོགས་ངན་འདི་ལ་ཅི་ལ་འགྲོས༔ མི་མིན་འདྲེ་ཡུལ་བྱ་རོག་གདོང་ཅན་འདི༔ འགྲོ་བའི་སྐྱབས་མེད་སྲིན་པོ་མི་ལ་ཡང་༔ འགྲོ་བའི་དུག་ལྔ་ཁོང་ཁྲོ་ལས་དབང་འཁྱམས༔ འགྲོ་རོགས་འཆི་རོགས་མེད་པའི་སྡིག་ལ་འགྲོས༔ ཁོ་མོ་བདག་གིས་ཚེ་གཅིག་རི་ཁྲོད་བསམ༔ རི་ཁྲོད་གནས་སུ་འདུག་པའི་ང་འདྲ་སྐྱིད༔ སྔར་ཡང་ཁྱིམ་ཐབ་སྤངས་ནས་ཆོས་ལ་མོས༔ ད་ཡང་རབ་བྱུང་མཛད་ནས་དགེ་དང་ལྡན༔ སྐྱབས་སུ་བསླུ་བ་མེད་པའི་དཀོན་མཆོག་གསུམ༔ རེ་ས་སྔགས་འཆང་པདྨ་འབྱུང་༔ བདག་ཡིད་མུག་པའི་གསོལ་བ་འདི་ལྟར་བཏབ༔ བདག་རྒྱུད་གྲོལ་བར་བྱིན་གྱིས་རློབས༔ སྨིན་གྲོལ་མཆོག་གི་དངོས་གྲུབ་སྩོལ༔ ནན་ཏན་ཅན་ལ་ཆོས་གཅིག་གནོངས༔ ཤེས་རབ་ཅན་ལ་བཀའ་གཅིག་གནོངས༔ ཁོ་མོ་བདག་ལ་ཐུགས་རྗེའི་མ་ཆུང་ཞིག༔ ད་ལྟར་ཏིང་འཛིན་ཟས་བཅས་པ༔ བླ་མའི་བཀའ་གནང་བསྙེན་གནས་བསྲུངས༔ ཕྱི་མ་ཐུགས་རྗེས་བཟུང་དུ་གསོལ༔ གཙང་གི་ཡུལ་ནས་བསམ་ཡས་གླིང་དུ་ཐོན༔ རྫུས་སྐྱེས་པདྨ་དྲན་པའི་ཡིད་དེ་ཙམ༔ ཁོ་མོ་བདག་དང་འདུ་འབྲལ་མེད་པར་ཤོག༔ བླ་མའི་བྱིན་རླབས་སེམས་ལ་འཇུག་པར་ཤོག༔ ནན་ཏན་བརྩོན་འགྲུས་ཆེ་བར་བྱིན་གྱིས་རློབས༔ བདག་རྒྱུད་གྲོལ་བར་བྱིན་གྱིས་རློབས༔ གཞན་རྒྱུད་སྨིན་པར་བྱིན་གྱིས་རློབས༔ སྨིན་གྲོལ་ལམ་མཆོག་མཐའ་རུ་བྱིན་གྱིས་རློབས༔ ཅི་བསམ་ཆོས་སུ་འགྲུབ་པར་བྱིན་གྱིས་རློབས༔ ནད་གདོན་འགལ་རྐྱེན་ཞི་བར་བྱིན་གྱིས་རློབས༔ ཕ་བླ་མའི་བཀའ་དྲིན་ཤིན་ཏུ་ཆེ༔ ཤི་ནས་འགྱོད་པའི་ལས་བྱས་མེད༔ རྗེ་བཙུན་བསམ་པའི་ཡིད་དྲན་ནས༔ འདི་འདྲའི་ཐུགས་རྗེས་རབ་ཏུ་བཟུང་༔ གསོན་ན་དགའ་སྟེ་བླ་མའི་ཞབས་ཏོག་བྱེད༔ འདི་འདྲ་དུས་གསུམ་སངས་རྒྱས་རིན་པོ་ཆེ༔ ཁོ་མོ་ལུས་འདི་ནམ་ཞིག་བོར་གྱུར་ནས༔ ཐུགས་རྗེའི་ཤུགས་ཀྱིས་དྲངས་པ་ཨེ་ཡོད་དམ༔ ཁོ་མོ་ཡེ་ཤེས་མཚོ་རྒྱལ་ང་འདྲ་ན༔ རང་རིག་དོན་གྱི་སྙིང་པོ་སྒོམ་པ་འདི༔ བཀའ་རྒྱུད་བླ་མའི་དྲིན་ཡིན་པ༔ བསྒྲུབ་རྒྱུད་བླ་མའི་ཐུགས་རྗེས་བཟུང་༔ བླ་མའི་ཐུགས་རྗེས་གཟིགས་པར་ཞུ༔ ཞེས་ཞུས་པ༔ རྗེ་མི་མངའ་བ༔ ཨུ་རྒྱན་གྱི་ཞལ་ནས༔ ཁྱེད་ལ་ཐུགས་རྗེས་མི་བཟུང་ན༔ གཞན་སུ་ལ་ཡང་ཐུགས་ཞེས་གསུངས༔

ཨོཾ་ཨཱ༔ཧཱུྃ༔ ཨེ་མ་ཧོ༔ འོག་མིན་རྣམ་དག་ཆོས་དབྱིངས་ཕོ་བྲང་ནས༔ རང་རིག་སྟོང་གསལ་ཆོས་སྐུའི་ཀློང་དཀྱིལ་ནས༔ ལོངས་སྐུ་རིག་པ་དྲི་མ་མེད་པའི་སྐུ༔ ཆོས་ཀྱི་སྐུ་ལ་དྲི་མ་མེད༔ བྲག་སྟོང་བྱ་རྒྱལ་ཁྱུང་གིས་བརྒྱན་བཀོད་པ༔ བདག་གི་གྲོགས་བྱེད་ཡེ་ཤེས་མཚོ་རྒྱལ་ཁྱེད༔ མ་རིག་མུན་ཁུང་ཚ་གདུང་ནད་སེལ་དུ༔ འགྲོ་དོན་མཛད་ཕྱིར་སྔགས་འཆང་གཞོན་ནུ་ལྡན༔ མཚན་ཁུང་ལྡན་པའི་ཉོན་མོངས་ནད་རྣམས་སེལ༔ མཐུན་པའི་ཀ་བཞི་ཆོས་ཀྱི་གནས་བྱས་པ༔ ས་ལམ་འབྲས་བུ་ཆོས་ཀྱི་དབྱིངས་ཉིད་དུ༔ ཐུགས་རྗེ་གདུལ་བྱ་བོད་ཀྱི་ཞིང་ཁམས་སུ༔ རྒྱ་གར་གྲུབ་ཆེན་སྔགས་འཆང་པདྨ་འབྱུང་༔ འགྲོ་བའི་དོན་དུ་ཐུགས་རྗེ་མཉེས་མཛད་པ༔ གང་འདུལ་ཐབས་ཀྱིས་འགྲོ་ལ་དགོངས་པ་ཡིན༔ ཇོ་མོ་མཁར་ཆུ་ཟ་ཡིས་ཉམས་སུ་ལོངས༔ ཞེས་གསུངས༔ མཚོ་རྒྱལ་གྱིས་ཞུས་པ༔ ཨེ་མ་ཧོ༔ རྣམ་དག་ཆོས་ཀྱི་དབྱིངས་ལས་མ་གཡོས་ཀྱང་༔ ཤེས་བྱའི་སྒྱུ་མའི་དཔེ་བྱེད་སྟོན་པ་ལ༔ རང་བྱུང་མཚོ་སྐྱེས་པདྨ་སཾ་བྷ་ཝ༔ ཁོ་མོ་ནན་ཏན་ཆེ་བའི་བཀའ་བློ་བདེ༔ དལ་འབྱོར་རྙེད་པར་དཀའ་བའི་ཆོས་གསུང་འདོད༔ འཆི་བ་མི་རྟག་སྒོམ་པའི་ཆོས་གཅིག་འདོད༔ ལས་དཀར་ནག་རྒྱུ་འབྲས་དོན་གྱི་ཆོས་གཅིག་འདོད༔ འཁོར་བ་ཉེས་པ་ཤེས་པའི་ཆོས་གཅིག་འདོད༔ ཐར་པའི་ཕན་ཡོན་གནས་པའི་ཆོས་གཅིག་འདོད༔ ཐབས་ལམ་བླ་མ་སྒོམ་པའི་ཆོས་གཅིག་འདོད༔ དོན་དེ་སེམས་ཉིད་སྒོམ་པའི་ཆོས་གཅིག་འདོད༔ རྩ་རླུང་གནས་པ་དོན་གྱི་ཆོས་གཅིག་འདོད༔ འོད་གསལ་སྙིང་པོ་སྒོམ་པའི་ཆོས་གཅིག་འདོད༔ བསྐྱེད་རིམ་དོན་གྱི་སྙིང་པོ་ཆོས་གཅིག་འདོད༔ ཐབས་ལམ་ཡང་དག་ལྡན་པའི་ངོ་བོ་ཉིད༔ ཁོ་མོ་འདོད་པ་ཆེ་བ་མ་ཡིན་ཏེ༔ འགྲོ་བའི་དོན་དུ་ཁོ་མོ་བདག་གིས་བསམ༔ གཞོན་ནུའི་མཛེས་ཚུལ་སྔགས་འཆང་ཁྱེད་འདྲ་བ༔ ཁོ་མོ་བདག་ལ་ཆོས་གཅིག་འདོད༔ ང་སྒོམ་པ་མེད་ན་སྒོམ་སྙིང་འདོད༔ བུད་མེད་བསྒོམས་བྱས་བྱས་པ་མ་ཚོར་ཏེ༔ ཁོ་མོ་བླ་མའི་དྲིན་གྱིས་འདི་ལྟར་མོས༔ མོས་ཙམ་བདག་གི་ཞེ་བློ་བདེ༔ དྲིན་ཅན་མཆོག་གི་བླ་མ་རིན་པོ་ཆེ༔ བདག་ལ་ཆོས་གསུང་འགྲོ་བའི་དོན༔ གངས་སྟོད་སེང་གེ་གཡུ་རལ་དེ་ལ་ཡང་༔ གཅན་གཟན་འཁོར་བའི་ལས་བཅས་རྩལ་མང་བ༔ སེང་ཕྲུག་སྐྱིད་ན་སེང་གེ་དྲན༔ མ་སྐྱིད་ཙམ་གྱིས་སེང་ཕྲུག་སྡུག༔ བྲག་སྟོད་བྱ་རྒྱལ་ཁྱུང་ཆེན་དེ་དང་འདྲ༔ ནགས་སྟོད་སྟག་མོ་འཛུམ་དྲུག་དེ་དང་འདྲ༔ སྔགས་འཆང་ཆེན་པོ་མཚོ་སྐྱེས་རྡོ་རྗེ་ལ༔ མཁར་ཟ་མཚོ་རྒྱལ་ང་འདྲ་བསྟེན་པ་ན༔ སྐྱིད་འདོད་བྱས་ནས་བླ་མའི་ཞབས་ཏོག་བྱས༔ མོས་གུས་ཟང་ཟིང་ཡོད་པ་མ་ཡིན་ཏེ༔ བདག་གི་ཕུང་པོ་ཁམས་དང་སྐྱེ་མཆེད་འདི༔ སྔགས་འཆང་ཆེན་པོ་པདྨ་དེ་ལ་ཕུལ༔ ཤ་ཁྲག་ཕུང་པོ་ཅི་སྐྱོལ་ཞབས་ཏོག་བྱས༔ མཐོ་བ་ཙམ་གྱིས་བླ་མའི་དྲིན༔ མ་མཐོ་ཙམ་གྱིས་ཁོ་མོ་ལས༔ སློབ་དཔོན་ཅི་གསུང་བཀའ་འདི་བདག་གིས་བསྒྲུབ༔ བདག་གིས་བསྒྲུབ་ཙམ་ཞེ་བློ་བདེ༔ མཐོང་ལམ་ཡང་དག་ལྡན་པ་རིན་པོ་ཆེ༔ ཁོ་མོ་བདག་ལ་ཐུགས་རྗེའི་མ་ཆུང་ཞིག༔ འགྲོ་བ་འདུལ་མཛད་དབང་དྲག་སྐུར་བཞེངས་པ༔ འཇིག་བྱེད་དམར་ནག་གནོད་བྱེད་དམ་ལ་བཏགས༔ དེ་འདྲར་སྤྲུལ་པ་མཆོག་གི་རིན་པོ་ཆེ༔ གཞོན་ནུ་ལོ་བརྒྱད་ལོན་པའི་ཆ་ལུགས་བཟུང་༔ སྐུ་མདོག་དྲི་མ་མེད་པའི་འོད་ཟེར་འབར༔ ཁོ་མོ་དེ་ལྟར་རྟོག་པ་ཤིན་ཏུ་དཀའ༔ བསམ་ཞིང་རྗེ་བཙུན་ཁྱོད་དྲན་ནོ༔ མཐོང་ལམ་ཡང་དག་སྦྱོར་བའི་བླ་མ་དང་༔ འོད་དཔུང་ཟུང་འཇུག་མཆོག་གི་རིན་པོ་ཆེ༔ ཁམས་གསུམ་དབང་བསྡུས་སྲིད་གསུམ་ཟིལ་གྱིས་གནོན༔ སྔགས་འཆང་པདྨའི་སྐུ་ལ་ཕྱག་འཚལ་བསྟོད༔ ཁོ་མོ་བདག་ལ་ཡོད་པའི་གསེར་ཕྱེ་འདི༔ རྫུས་སྐྱེས་ཁྱེད་ལ་འབུལ་ལོ་འགྲོ་ལ་དགོངས༔ འགྲོ་བའི་དོན་དུ་དམ་བཅས་ཞལ་བཞེས་དགོངས༔ མ་རིག་མུན་པའི་མི་ལ་ཆོས་གཅིག་གནོངས༔ ཁོ་མོ་ཞུ་ཕོད་བྱས་པའི་དེ་ལྟར་བྱས༔ རྫུས་སྐྱེས་པདྨའི་སྐུ་ལ་དེ་ལྟར་ཞུས༔ ཨུ་རྒྱན་གྱི་ཞལ་ནས༔ ཀྱེ་མ་ཉོན་ཅིག་མཚོ་རྒྱལ་ཁྱོད༔ བཛྲ་གུ་རུ་ཡོན་ཏན་བགྲང་མི་ནུས༔ བདག་གིས་དགེ་བའི་བསྐུལ་མ་བྱེད་མཛད་པ༔ ས་རྡོ་རི་བྲག་བསྒྲངས་པའི་རིག་བསྐྱེད་པ༔ ཕྱི་སྣོད་ཟངས་མདོག་དཔལ་གྱི་རི་བོར་གྱུར༔ ནང་བཅུད་གུ་རུ་སིདྡྷི་སྒྲ་སྒྲོག་བསྒོམ༔ གསང་བ་ལྷ་དང་ལྷ་མོའི་རང་བཞིན་གྱུར༔ སྐབས་སྐབས་པདྨ་ང་དྲན་གྱིས༔ ཆོས་སྐུ་སྟོང་པ་ཁྱབ་བདལ་ཀློང་༔ ལོངས་སྐུ་གསལ་བ་ཡི་གེ་གྱུར༔ སྤྲུལ་སྐུ་ཀུན་ཁྱབ་སིདྡྷི་བཟློས༔ ཡོན་ཏན་དཔག་མེད་བགྲང་གིས་ནུས་པ་མེད༔ སྐབས་སྐབས་ང་དང་མཐུན་པར་བྱས༔ མི་བརྗེད་ཉམས་སུ་ལོངས་ཤིག་མཁར་ཆུ་ཟ༔ དེ་ལྟར་གསལ་བའི་ངང་ནས་འོད་འཕྲོས་པ༔ སྣང་བ་ཚད་མ་ཐམས་ཅད་ལྷ་ཡི་སྐུ༔ གྲགས་པ་ཐམས་ཅད་གུ་རུ་སིདྡྷི་གསུངས༔ དྲན་པ་ཐམས་ཅད་རང་རིག་ཆོས་ཀྱི་སྐུ༔ མི་བརྗེད་ཐུགས་ལ་ཞོག་ཅིག་མཁར་ཆུ་ཟ༔ མ་འོངས་བུ་སློབ་རྣམས་ཀྱིས་ཉམས་སུ་ལོངས༔ གདོད་མའི་བཙན་ས་ཟིན་པ་ཐེ་ཚོམ་མེད༔ ཅེས་གསུངས༔

ཡེ་ཤེས་མཚོ་རྒྱལ་ཞུས་པ༔ རྗེ་བཙུན་བླ་མ་མཆོག་གི་རིན་པོ་ཆེ༔ བཀའ་དྲིན་འཁོར་མེད་རྩ་བའི་བླ་མ་ཁྱེད༔ བདག་གི་མོས་པའི་སྙིང་གི་དཀྱིལ་འདྲ་བ༔ ཐུགས་རྗེ་ཡང་ཡང་འདི་འདྲ་རབ་ཏུ་ཆེན་པོ་འབྱུང་༔ སངས་རྒྱས་ཀུན་གྱི་ངོ་བོ་ཉིད༔ བྱིན་རླབས་རྣམ་དག་ཨུ་རྒྱན་ཆོས་ཀྱི་རྗེ༔ འགྲོ་མགོན་སྔགས་འཆང་པདྨ་སྤྲུལ་པའི་སྐུ༔ དྲིན་ཅན་རྣམ་དག་བླ་མའི་ཞབས་ལ་འདུད༔ བཀའ་དྲིན་འཁོར་མེད་བླ་མ་རིན་པོ་ཆེ༔ རྗེས་སུ་ཡི་རངས་ཁོ་མོས་གསོལ་བ་འདེབས༔ འདྲེན་པའི་བླ་མ་རིན་པོ་ཆེ༔ སྤྱིར་འགྲོ་བའི་དོན་ལ་གང་འདུལ་ཐུགས་རྗེས་གཟིགས༔ ཁྱད་པར་ཅན་གྱི་མུན་པའི་གླིང་འདི་ལ༔ ཐུགས་རྗེས་ཟུངས་ཤིག་ཨུ་རྒྱན་སྤྲུལ་པའི་སྐུ༔ བྱིན་རླབས་རྣམ་དག་འགྲོ་བ་འདྲེན་མཛད་པ༔ ཐུགས་རྗེ་ཆེ་མངའ་རྗེ་བཙུན་པདྨ་ལ༔ གསོལ་བ་འདེབས་སོ་ཁོ་མོའི་བསམ་པ་འགྲུབ༔ དུས་གསུམ་མཁྱེན་པའི་རྗེ་བཙུན་པདྨ་འབྱུང་༔ ཕྱི་རྒྱུད་དག་པ་སྤྲུལ་སྐུ་རིན་པོ་ཆེ༔ ནང་རྒྱུད་དག་པ་ལོངས་སྐུ་རིན་པོ་ཆེ༔ གསང་རྒྱུད་དག་པའི་བྱང་སེམས་དཀར་དམར་བརྒྱན༔ འགྲོ་བ་འདྲེན་མཛད་སྐུ་མདོག་དཀར་ལ་དམར༔ གཅོང་རོང་དྲག་པོ་མཚོན་ཆའི་ཡུལ་དེར་ལ༔ ཐུགས་རྗེས་ཟུངས་ཤིག་ཨུ་རྒྱན་རིན་པོ་ཆེ༔ ཐུགས་རྗེ་མངའ་བདག་རྗེ་བཙུན་པདྨ་འབྱུང་༔ གསོལ་བ་འདེབས་སོ་ཁོ་མོའི་བསམ་པ་འགྲུབ༔ ཁམས་གསུམ་དབང་སྡུད་པདྨ་ཧེ་རུ་ཀ༔ སྲིད་གསུམ་ཟིལ་གནོན་པདྨ་རྒྱལ་པོ་ལ༔ དུག་ཁང་མུན་གླིང་དེ་ལ་ཐུགས་རྗེས་གཟིགས༔ བྱིན་གྱིས་རློབས་ཤིག་ཨུ་རྒྱན་སྤྲུལ་པའི་སྐུ༔ ཐུགས་རྗེ་ཆེ་མངའ་རྗེ་བཙུན་པདྨ་ལ༔ གསོལ་བ་འདེབས་སོ་ཁོ་མོའི་བསམ་པ་འགྲུབ༔ དུས་གསུམ་དུས་མེད་ཀ་དག་དུས་ཀྱི་ཚེ༔ ཐབས་ཤེས་རྒྱུ་ལྡན་སྨན་པའི་ཆོས་འཇུག་པ༔ ཕྱག་གཡས་རྡོ་རྗེ་རྩེ་ལྔ་ཐུགས་ཀར་འཛིན༔ ནད་རྣམས་སེལ་མཛད་རྫུས་སྐྱེས་པདྨ་འབྱུང་༔ མུན་པའི་གླིང་དུ་ཐུགས་རྗེས་གཟིགས་པར་ཞུ༔ ཐུགས་རྗེ་ཆེ་མངའ་རྗེ་བཙུན་པདྨ་ལ༔ གསོལ་བ་འདེབས་སོ་ཁོ་མོའི་བསམ་པ་འགྲུབ༔ མ་བཅོས་ཀློང་ཡང་རྣམ་དག་ཆོས་ཀྱི་སྐུ༔ བདེ་ཆེན་འདུ་འབྲལ་ལྷ་དང་གཉིས་སུ་མེད༔ བ་སྤུ་སྤྲུལ་ཕྱེས་ངོ་བོ་ཉིད༔ སྡིག་ཅན་བདེ་བ་དྲངས་མཛད་པདྨ་འབྱུང་༔ ཁྱད་པར་མུན་པའི་གླིང་དུ་ཐུགས་རྗེས་གཟིགས༔ བྱིན་གྱིས་རློབས་ཤིག་ཨུ་རྒྱན་སྤྲུལ་པའི་སྐུ༔ ཐུགས་རྗེ་མངའ་དབང་རྫུས་སྐྱེས་པདྨ་ལ༔ གསོལ་བ་འདེབས་སོ་ཁོ་མོའི་བསམ་པ་འགྲུབ༔ རྣམ་དག་ཆོས་ཀྱི་དབྱིངས་ལས་མ་གཡོས་ཀྱང་༔ ཤེས་བྱ་རྒྱུ་མའི་དཔེ་བྱེད་སྟོན་པ་ལ༔ ཕྱག་གཡོན་ཐོད་བུམ་བཀང་བ་འཛིན༔ བར་ཆད་སེལ་མཛད་རྫུས་སྐྱེས་པདྨ་འབྱུང་༔ བྱིན་གྱིས་རློབས་ཤིག་ཨུ་རྒྱན་སྤྲུལ་པའི་སྐུ༔ ཐུགས་རྗེ་ཆེ་མངའ་རྗེ་བཙུན་པདྨ་ལ༔ གསོལ་བ་འདེབས་སོ་ཁོ་མོའི་བསམ་པ་འགྲུབ༔ འོག་མིན་རྣམ་དག་བདེ་བ་ཅན་གྱི་ཞིང་༔ རང་དབང་ཐོབ་པའི་ཆོས་སྐུའི་གདེངས་དང་ལྡན༔ དུས་གསུམ་འཛིན་མཛད་བླ་མ་པདྨ་འབྱུང་༔ ཐུགས་རྗེ་ཆེ་མངའ་མཚོ་སྐྱེས་རྡོ་རྗེ་ལ༔ གསོལ་བ་འདེབས་སོ་ཁོ་མོའི་བསམ་པ་འགྲུབ༔ རྒྱལ་བ་རྣམ་དག་ཆོས་སྐུའི་ཀློང་ཡངས་ནས༔ སྐུ་མདོག་སྐུ་དང་ལྡན་པའི་ལྷ་བཟོ་བ༔ བྱིན་གྱིས་རློབས་ཤིག་ཨུ་རྒྱན་སྤྲུལ་པའི་སྐུ༔ ཐུགས་རྗེ་ཆེ་མངའ་ཨུ་རྒྱན་པདྨ་ལ༔ གསོལ་བ་འདེབས་སོ་ཁོ་མོའི་བསམ་པ་འགྲུབ༔ བདེར་གཤེགས་རང་བཞིན་རྣམ་དག་སྤྲོས་དང་བྲལ༔ བདེ་ཆེན་ཆོས་དབྱིངས་འོད་གསལ་རང་བཞིན་ལ༔ ཁྱད་པར་མུན་པའི་གླིང་དུ་ཐུགས་རྗེས་གཟིགས༔ བྱིན་གྱིས་རློབས་ཤིག་ཨུ་རྒྱན་སྤྲུལ་པའི་སྐུ༔ ཐུགས་རྗེ་ཆེ་མངའ་རྗེ་བཙུན་པདྨ་ལ༔ གསོལ་བ་འདེབས་སོ་ཁོ་མོའི་བསམ་པ་འགྲུབ༔ བདེན་པ་རང་བྱུང་སངས་རྒྱས་སྐུ་ལྔ་འཆང་༔ མ་བཅོས་རིག་པའི་གནས་ལྔ་ཐབས་ལ་མཁས༔ ཐུགས་རྗེ་ཆེ་མངའ་མཚོ་སྐྱེས་རྡོ་རྗེ་ལ༔ གསོལ་བ་འདེབས་སོ་ཁོ་མོའི་བསམ་པ་འགྲུབ༔ བྱིན་རླབས་རྣམ་དག་ཆོས་ཀྱི་དབྱིངས་ཉིད་དུ༔ ཁྱེའུ་ཆུང་ལོ་ལྔ་ན་ཚོད་བརྩེ་བ་མཛད༔ བུ་ཆུང་ཚུལ་གྱིས་འགྲོ་བ་འདྲེན་མཛད་པ༔ བྱིན་གྱིས་རློབས་ཤིག་ཨུ་རྒྱན་སྤྲུལ་པའི་སྐུ༔ ཐུགས་རྗེ་ཆེ་མངའ་རྫུས་སྐྱེས་པདྨ་ལ༔ གསོལ་བ་འདེབས་སོ་ཁོ་མོའི་བསམ་པ་འགྲུབ༔ ཐབས་ལམ་ཡང་དག་ལྡན་པའི་ངོ་བོ་ཉིད༔ དགོང་ལོ་བཅུ་དྲུག་ཨ་ཙར་ཚུལ་མཛད་པ༔ བྱིན་གྱིས་རློབས་ཤིག་ཨུ་རྒྱན་སྤྲུལ་པའི་སྐུ༔ ཐུགས་རྗེ་ཆེ་མངའ་རྗེ་བཙུན་པདྨ་ལ༔ གསོལ་བ་འདེབས་སོ་ཁོ་མོའི་བསམ་པ་འགྲུབ༔ རྣམ་དག་སྣང་བའི་ལུས་ལ་དར་ཕྲུག་བརྒྱན༔ སྨན་བཙུན་ཚུལ་གྱིས་འགྲོ་བའི་དོན་མཛད་པ༔ ཐུགས་རྗེས་ཟུངས་ཤིག་དུས་གསུམ་ཆོས་ཀྱི་རྗེ༔ བྱིན་གྱིས་རློབས་ཤིག་ཨུ་རྒྱན་སྤྲུལ་པའི་སྐུ༔ ཐུགས་རྗེ་མངའ་བདག་མཚོ་སྐྱེས་རྡོ་རྗེ་ལ༔ གསོལ་བ་འདེབས་སོ་ཁོ་མོའི་བསམ་པ་འགྲུབ༔ ཤེས་བྱའི་རང་བཞིན་དཔེ་བྱད་སྟོན་པ་ལ༔ གཞོན་ནུ་ལོ་བརྒྱད་ལོན་པ་ཡ་མཚན་འབར༔ ཁོ་མོའི་བརྟན་པའི་གཞོན་ནུ་འགྲོ་དོན་བྱེད༔ བྱིན་གྱིས་རློབས་ཤིག་ཨུ་རྒྱན་སྤྲུལ་པའི་སྐུ༔ ཐུགས་རྗེ་ཆེ་མངའ་སྔགས་འཆང་པདྨ་འབྱུང་༔ གསོལ་བ་འདེབས་སོ་ཁོ་མོའི་བསམ་པ་འགྲུབ༔

སྣང་སྲིད་རྣམ་དག་འཁོར་འདས་ཀློང་ཡངས་ནས༔ སྐད་གཅིག་དྲན་རྫོགས་ཆེན་པོ་དོན་བཀོད་པ༔ སྔགས་འཆང་ཚུལ་གྱིས་འགྲོ་བ་འདྲེན་མཛད་པ༔ བྱིན་གྱིས་རློབས་ཤིག་ཨུ་རྒྱན་སྤྲུལ་པའི་སྐུ༔ ཐུགས་རྗེ་ཆེ་མངའ་རྫུས་སྐྱེས་པདྨ་ལ༔ གསོལ་བ་འདེབས་སོ་ཁོ་མོའི་བསམ་པ་འགྲུབ༔ ཡང་དག་དོན་གྱི་བླ་མ་ཆོག་ཆེན་པོ༔ ངོ་མཚར་བྱུང་བའི་སྐུ་ལུས་གཟི་མདངས་འབར༔ ཁྱད་པར་མུན་པའི་གླིང་དུ་ཐུགས་རྗེས་གཟིགས༔ བྱིན་གྱིས་རློབས་ཤིག་ཨུ་རྒྱན་སྤྲུལ་པའི་སྐུ༔ ཐུགས་རྗེ་མངའ་བདག་མཚོ་སྐྱེས་རྡོ་རྗེ་ལ༔ གསོལ་བ་འདེབས་སོ་ཁོ་མོའི་བསམ་པ་འགྲུབ༔ འཆི་མེད་ཚེ་ཡི་དངོས་གྲུབ་ཞུ༔ ཆུ་ཆེན་རྒྱ་མཚོ་ཆེན་པོ་པདྨ་ལ༔ རྩང་ཆུ་ལྟ་བུ་ཁོ་མོ་བསྟེན་ས་བྱེད༔ ཡོན་ཏན་ལོ་འདབ་རྒྱས་པའི་དངོས་གྲུབ་ཞུ༔ ཁྱུང་ཆེན་གཤོག་རྒྱས་ལྟ་བུའི་པདྨ་ལ༔ རྩལ་དྲག་གཤོག་པ་ལྟ་བུ་ཁོ་མོ་བསྟེན༔ འཁོར་འདས་རླབས་ཀྱིས་ཆོད་པའི་དངོས་གྲུབ་ཞུ༔ ཉི་མ་ཟླ་བ་ལྟ་བུའི་གུ་རུ་ལ༔ སྐར་ཕྲན་ལྟ་བུ་ཁོ་མོ་བསྟེན་ས་བྱེད༔ མ་རིག་མུན་པ་སེལ་བའི་དངོས་གྲུབ་ཞུ༔ དཔག་བསམ་ལྗོན་ཤིང་ལྟ་བུའི་པདྨ་ལ༔ ལོ་འདབ་འབྲས་བུ་བཞིན་དུ་ཁོ་མོ་བསྟེན༔ འཁོར་འདས་ཆོས་སྐུ་རྟོགས་པའི་དངོས་གྲུབ་ཞུ༔ སྨན་མཆོག་རྣམ་རྒྱལ་ལྟ་བུའི་པདྨ་ལ༔ རྣམ་མཆོག་ཨ་དཀར་ལྟ་བུ་ཁོ་མོ་བསྟེན༔ ཉོན་མོངས་ནད་རྣམས་སེལ་བའི་དངོས་གྲུབ་ཞུ༔ ཆོས་སྐུ་ནམ་མཁའ་ལྟ་བུའི་པདྨ་ལ༔ ལོངས་སྐུ་ཉི་ཟེར་ལྟ་བུ་ཁོ་མོ་བསྟེན༔ རིག་པ་བུ་ཆུང་ལྟ་བུའི་དངོས་གྲུབ་ཞུ༔ སེང་གེ་གཡུ་རལ་ལྟ་བུའི་པདྨ་ལ༔ རྩལ་མཆོག་ལྟ་བུ་ཁོ་མོ་དེ་བསྟེན་ནོ༔ རྩལ་དྲག་གཡུལ་ལས་རྒྱལ་བའི་དངོས་གྲུབ་ཞུ༔ སངས་རྒྱས་རྣམ་དག་པདྨ་འབྱུང་གནས་ལ༔ དམ་ཆོས་ཁོ་མོ་བདག་ནི་བསྟེན༔ ཆོས་རྔ་ཆུ་བོ་ལྟ་བུའི་དངོས་གྲུབ་ཞུ༔ དམ་ཆོས་རྒྱལ་བ་པདྨ་འབྱུང་གནས་ལ༔ པི་ཝང་ངག་སྐད་ལྟ་བུའི་ཁོ་མོ་བསྟེན༔ ཀ་ལ་པིང་སྐད་ལྟ་བུའི་དངོས་གྲུབ་ཞུ༔ དགེ་འདུན་དུས་གསུམ་པདྨ་འབྱུང་གནས་ལ༔ སེམས་ཉིད་རྣམ་དག་ཁོ་མོ་བདག་ནི་བསྟེན༔ འཁོར་འདས་ཆོས་སྐུ་རྟོགས་པའི་དངོས་གྲུབ་ཞུ༔ སེམས་ཉིད་རྣམ་དག་ཨུ་རྒྱན་པདྨ་འབྱུང་༔ འཁོར་བ་ཡར་ཞུ་ལྟ་བུ་ཁོ་མོ་བསྟེན༔ རྡོ་རྗེ་ལྟ་བུ་བསྟེན་པའི་དངོས་གྲུབ་ཞུ༔ མ་ནོར་རྩ་སྔགས་ལྟ་བུའི་པདྨ་ལ༔ ཉེ་བར་སྙིང་པོ་ལྟ་བུ་ཁོ་མོ་བསྟེན༔ བྱིན་རླབས་འོད་ཟེར་ཐིམ་པའི་དངོས་གྲུབ་ཞུ༔ གནས་པ་ཆོས་སྐུ་ལྟ་བུའི་གུ་རུ་ལ༔ འགྱུ་བ་ལོངས་སྐུ་ལྟ་བུ་ཁོ་མོ་བསྟེན༔ རིག་པ་དོན་གྱི་སྙིང་པོ་དངོས་གྲུབ་ཞུ༔ སྣང་བ་རིག་པ་ལྟ་བུའི་པདྨ་ལ༔ ཉེ་བར་ལམ་དུ་འདུས་པའི་ཁོ་མོ་བསྟེན༔ ཚོགས་དྲུག་སྣང་བ་ལྟ་བུའི་དངོས་གྲུབ་ཞུ༔ སྐྱེ་མེད་ཆོས་སྐུ་ལྟ་བུའི་པདྨ་ལ༔ འགགས་མེད་ལོངས་སྐུ་ལྟ་བུ་ཁོ་མོ་བསྟེན༔ སྐྱེ་འགགས་གཉིས་མེད་འབྲས་བུ་དངོས་གྲུབ་ཞུ༔ སྐུ་ལྔ་ཡེ་ཤེས་ལྟ་བུའི་པདྨ་ལ༔ གསུང་ལྔ་རྣམ་དག་ལྟ་བུ་ཁོ་མོ་བསྟེན༔ ཐུགས་ལྔ་རྒྱ་མཚོ་ལྟ་བུའི་དངོས་གྲུབ་ཞུ༔ སྣང་བ་ཉི་ཟླ་ལྟ་བུའི་གུ་རུ་ལ༔ རིག་པ་བུ་ཆུང་ལྟ་བུ་ཁོ་མོ་བསྟེན༔ སྟོང་གསལ་གཅིག་འདྲེས་ལྟ་བུའི་དངོས་གྲུབ་ཞུ༔ ཐུག་ས་ཆུ་བོ་ལྟ་བུའི་གུ་རུ་ལ༔ ཕྲད་པ་ཆུ་བྲན་ལྟ་བུའི་ཁོ་མོ་བསྟེན༔ སྐོར་བའི་འགྲོ་དོན་བྱེད་པའི་དངོས་གྲུབ་ཞུ༔ ཐ་མལ་ཤེས་པ་ཉི་མ་ལྟ་བུའི་གུ་རུ་ལ༔ ཉེ་བར་ཤེས་པ་ཉི་ཟེར་ལྟ་བུའི་ཁོ་མོ་བསྟེན༔ ཅིག་ཅར་ཤེས་པ་ལྟ་བུའི་དངོས་གྲུབ་ཞུ༔ སྐུ་བཞི་འབྲས་བུ་ལྟ་བུའི་གུ་རུ་ཨུ་རྒྱན་ལ༔ རིག་རྟོགས་རྒྱན་བཀོད་ལྟ་བུ་ཁོ་མོ་བསྟེན༔ བདུད་བཞི་དབང་དུ་བཅོམ་པའི་དངོས་གྲུབ་ཞུ༔ མེ་ལོང་གཟུགས་བརྙན་ལྟ་བུའི་གུ་རུ་ལ༔ ཤེལ་གྱི་གཟུགས་བརྙན་ལྟ་བུའི་ཁོ་མོ་བསྟེན༔ རྣམ་རྟོག་རྟོགས་སུ་འཆར་བའི་དངོས་གྲུབ་ཞུ༔ ནམ་མཁའ་གཡའ་དག་ལྟ་བུའི་ཨུ་རྒྱན་ལ༔ ཕྱོགས་རིས་མེད་པ་ཉི་ཟླ་ལྟ་བུ་ཁོ་མོ་བསྟེན༔ འགྲོ་ལ་ཕྱོགས་རིས་མེད་པའི་དངོས་གྲུབ་ཞུ༔ རྡོ་རྗེ་ལྟ་བུའི་ཨུ་རྒྱན་པདྨ་ལ༔ འགྱུར་བ་མེད་པ་ལྟ་བུ་ཁོ་མོ་བསྟེན༔ སྣང་སྲིད་ཆོས་སྐུ་རྟོག་པའི་དངོས་གྲུབ་ཞུ༔ རྡོ་རྗེ་ལྟ་བུའི་ཏིང་འཛིན་པདྨ་ལ༔ མཉམ་ཉིད་ཏིང་འཛིན་ལྟ་བུ་ཁོ་མོ་བསྟེན༔ ཀུན་སྣང་འདྲེ་བགེགས་བརླག་པའི་དངོས་གྲུབ་ཞུ༔ ཤཱཀྱ་སེང་གེ་ལྟ་བུའི་སྡོམ་ཚུལ་ལ༔ འདུལ་བའི་གྲོགས་འཆར་ལྟ་བུ་ཁོ་མོ་བསྟེན༔ ཡང་དག་ཆོས་སྐུ་ལྟ་བུའི་དངོས་གྲུབ་ཞུ༔ བླ་མ་ཀུན་འདུས་ཨུ་རྒྱན་པདྨ་ལ༔ མཁའ་འགྲོ་ཡེ་ཤེས་མཚོ་རྒྱལ་ང་འདྲ་བསྟེན༔ འགྲོ་ལ་ཐུགས་རྗེས་གཟིགས་པའི་དངོས་གྲུབ་ཞུ༔ ཡི་དམ་དབང་དྲག་ལྟ་བུའི་ཨུ་རྒྱན་ལ༔ རྡོ་རྗེ་ཕག་མོ་ལྟ་བུ་ཁོ་མོ་བསྟེན༔ བྱིན་རླབས་འོད་ཟེར་ཐིམ་པའི་དངོས་གྲུབ་ཞུ༔ མཁའ་འགྲོ་ཀུན་འདུས་ལྟ་བུའི་ཨུ་རྒྱན་ལ༔ བ་སྤུ་རྩ་གནས་ལྟ་བུ་ཁོ་མོ་བསྟེན༔ ཐུགས་རྗེས་རྗེས་སུ་བཟུང་བའི་དངོས་གྲུབ་ཞུ༔ ཆོས་སྐུ་ཀུན་བཟང་ལྟ་བུའི་གུ་རུ་ལ༔ ཀུན་ཏུ་བཟང་མོ་ལྟ་བུ་ཁོ་མོ་བསྟེན༔ རྫོགས་པའི་སངས་རྒྱས་ཐོབ་པའི་དངོས་གྲུབ་ཞུ༔ རྒྱལ་བ་རིགས་ལྔ་ལྟ་བུའི་གུ་རུ་ལ༔ དབྱིངས་ཕྱུག་ཡུམ་ལྔ་ལྟ་བུ་ཁོ་མོ་བསྟེན༔ འགྲོ་ལ་ཐུགས་རྗེས་གཟིགས་པའི་དངོས་གྲུབ་ཞུ༔ ཆེ་མཆོག་ཡོན་ཏན་ལྟ་བུའི་གུ་རུ་ལ༔ ཀྲི་ཏི་ཤྭ་རི་ལྟ་བུ་ཁོ་མོ་བསྟེན༔ གནོད་བྱེད་ཐལ་བར་བརླག་པའི་དངོས་གྲུབ་ཞུ༔ ནུབ་ཕྱོགས་པདྨ་ལྟ་བུའི་ཨུ་རྒྱན་ལ༔ སངས་རྒྱས་སྟོང་རྩ་ལྟ་བུ་ཁོ་མོ་བསྟེན༔ འགྲོ་ལ་བྱིན་གྱིས་རློབས་པའི་དངོས་གྲུབ་ཞུ༔ རི་བོ་མཆོག་རབ་ལྟ་བུའི་ཨུ་རྒྱན་ལ༔ གླིང་བཞི་ལྟ་བུ་ཁོ་མོ་བདག་ནི་བསྟེན༔ འགྲོ་བའི་འབྲས་བུ་སྨིན་པའི་དངོས་གྲུབ་ཞུ༔ འོད་དཔག་མེད་པ་མཆོག་གི་པདྨ་ལ༔ མཚོ་ཆེན་པདྨ་ལྟ་བུ་ཁོ་མོ་བསྟེན༔ འཆི་བ་མེད་པ་ཚེ་ཡི་དངོས་གྲུབ་ཞུ༔ རྒྱལ་བ་ཐུབ་པ་མཆོག་གི་པདྨ་ལ༔ མཚན་བཟང་དཔེ་བྱད་ལྟ་བུ་ཁོ་མོ་བསྟེན༔ ཏིང་འཛིན་རྒྱུད་ལ་ལྡན་པའི་དངོས་གྲུབ་ཞུ༔ ཨརྱ་པཱ་ལོ་ལྟ་བུའི་གུ་རུ་ལ༔ སྒྲོལ་མ་དཀར་ལྗང་ལྟ་བུ་ཁོ་མོ་བསྟེན༔ སེམས་ཅན་ཐར་ལམ་བཀོད་པའི་དངོས་གྲུབ་ཞུ༔ གཞོན་ནུ་ལོ་བརྒྱད་ན་ཚོད་ཙམ་པ་ལ༔ ཁོ་མོ་བཅུ་གསུམ་ན་ཚོད་ཙམ་པ་བསྟེན༔ ཐུགས་རྗེས་གཟིགས་པའི་དངོས་གྲུབ་ཞུ༔ མཚོ་སྐྱེས་རྡོ་རྗེ་གཞོན་ནུ་མདངས་ལྡན་ལ༔ ཁོ་མོ་དུང་ལྡན་བདག་ནི་དེ་བསྟེན་པ༔ མ་འོངས་བུ་སློབ་སྨིན་པའི་དངོས་གྲུབ་ཞུ༔ འགྲོ་ལ་བདེ་བ་ཐབས་མཆོག་ལྟ་བུའི་གུ་རུ་ལ༔ ཤེས་རབ་ཟུང་འཇུག་ལྟ་བུ་ཁོ་མོ་བསྟེན༔ བྱང་སེམས་གཅིག་ཏུ་འདྲེས་པའི་དངོས་གྲུབ་ཞུ༔ སྔགས་འཆང་རྫུས་སྐྱེས་པདྨ་འབྱུང་གནས་ལ༔ མཁར་ཟ་ཡེ་ཤེས་མཚོ་རྒྱལ་ང་བསྟེན་པ༔ མ་འོངས་བོད་འབངས་བུ་སློབ་སྨིན་པར་ཤོག༔ བསྟན་པའི་མི་ནུབ་པའི་དངོས་གྲུབ་ཞུ༔ ཆོས་སྐྱོང་འཁོར་གྱིས་བསྐོར་བའི་པདྨ་ལ༔ མཁའ་འགྲོ་འཁོར་གྱིས་བསྐོར་བའི་ཁོ་མོ་བསྟེན༔ མ་འོངས་བསྟན་དགྲ་བསྒྲལ་བའི་དངོས་གྲུབ་ཞུ༔ ཡང་དག་མཆོག་གི་བླ་མ་པདྨ་ལ༔ དམིགས་མེད་རྣམ་དག་ཁོ་མོ་མཚོ་རྒྱལ་བསྟེན༔ རང་རིག་ཆོས་སྐུ་རྟོགས་པའི་དངོས་གྲུབ་ཞུ༔ བུམ་པ་ཆོས་སྐུ་ལྟ་བུའི་ཨུ་རྒྱན་ལ༔ བུམ་ཆུ་ལོངས་སྐུ་ལྟ་བུ་ཁོ་མོ་བསྟེན༔ སྤྲུལ་སྐུ་འགྲོ་ལ་ཐིམ་པའི་དངོས་གྲུབ་ཞུ༔ བྱ་བའི་མཐུན་འཇུག་རིན་པོ་ཆེ་ལྟ་བུ༔ མཐིང་ཤོག་རྒྱན་བཀོད་ལྟ་བུ་ཁོ་མོ་བསྟེན༔ འགྲོ་བ་སེམས་ཅན་འདྲེན་པའི་དངོས་གྲུབ་ཞུ༔ སློབ་དཔོན་བཅུད་ལྡན་རྫུས་སྐྱེས་པདྨ་ལ༔ སློབ་མ་སྣོད་ལྡན་ཁོ་མོ་མཚོ་རྒྱལ་བསྟེན༔ དམ་ཆོས་ཁུང་དུ་ཞག་པའི་དངོས་གྲུབ་ཞུ༔ བྱིན་རླབས་ཐུགས་རྗེ་ཆེ་བའི་པདྨ་ལ༔ དད་གུས་བརྩོན་འགྲུས་ཆེ་བའི་ཁོ་མོ་བསྟེན༔ འགྲོ་དོན་བུ་སློབ་རྒྱས་པའི་དངོས་གྲུབ་ཞུ༔ ཡོན་ཏན་ཆེ་བའི་སྔགས་འཆང་པདྨ་ལ༔ སྙིང་རུས་ཤེས་རབ་ཆེ་བའི་ཁོ་མོ་བསྟེན༔ སངས་རྒྱས་བསྟན་པ་རྒྱས་པའི་དངོས་གྲུབ་ཞུ༔ མཐུ་སྟོབས་རྩལ་དང་ལྡན་པའི་པདྨ་ལ༔ ནན་ཏན་ཆེ་བའི་ཁོ་མོ་བདག་འདྲ་བསྟེན༔ དཀར་པོ་དགེ་བ་རྒྱས་པའི་དངོས་གྲུབ་ཞུ༔ སྤྲུལ་པ་གྲངས་མེད་འགྱེད་པའི་པདྨ་ལ༔ ལུས་ངག་བརྟན་པ་ཁོ་མོ་མཚོ་རྒྱལ་བསྟེན༔ ནག་པོ་བདུད་རྣམས་འཇོམས་པའི་དངོས་གྲུབ་ཞུ༔ ལས་ཅན་རྗེ་འབངས་སྨིན་པའི་དངོས་གྲུབ་ཞུ༔ ཐེག་ཆེན་ཆོས་འཁོར་བསྐོར་བའི་དངོས་གྲུབ་ཞུ༔ སྔགས་འཆང་བསྟན་པ་རྒྱས་པའི་དངོས་གྲུབ་ཞུ༔ འགྲོ་རྣམས་ཆོས་ལ་འཁོད་པའི་དངོས་གྲུབ་ཞུ༔ རྫུས་སྐྱེས་པདྨའི་སྐུ་ལ་གསོལ་བ་འདེབས༔ ཁོ་མོ་ཞུ་ཕོད་བྱས་པའི་དོན་ཚིག་ལྡན༔ མ་རིག་སོ་སོར་བདག་འཛིན་ཅི་བཟུང་བ༔ མཐོལ་ལོ་བཤགས་སོ་རང་གནོང་འགྱོད་པའི་བཤགས༔ ཞེས་ཞུས༔ ཨུ་རྒྱན་གྱི་ཞལ་ནས༔ ཨེ་མ་ཧོ༔ ངོ་མཚར་མཆོག་གི་རྫུས་སྐྱེས་ང་འདྲ་བ༔ བླ་མའི་སྐུ་ལུས་བཀོད་པ་བྱིན་རླབས་ཡིན༔ གསུང་གིས་ངག་སྐད་སྒྲོག་པ་བྱིན་རླབས་ཡིན༔ ཐུགས་ཀྱི་སེམས་ཉིད་འདྲེས་པ་བྱིན་རླབས་ཡིན༔ བྱང་སེམས་གཉིས་མེད་འདྲེས་པ་བྱིན་རླབས་ཡིན༔ བྱིན་རླབས་བདག་ལ་ཡོད་པ་ཁྱོད་ལ་གནང་༔ འགྲོ་བ་བུ་སློབ་རྣམས་ཀྱི་དོན༔ མཚོ་རྒྱལ་དད་གུས་ཅན་ལ་བདག་གིས་སྟེར༔ སྙིང་རུས་དད་གུས་ཅན་ལ་བདག་གིས་སྟེར༔ བརྩོན་འགྲུས་ནན་ཏན་ཅན་ལ་ང་ཡིས་སྟེར༔ མཚོ་རྒྱལ་ཁྱོད་ལ་མི་སྟེར་སུ་ལ་སྟེར༔ བུ་མོ་དད་ལྡན་འགྲོ་བ་འདྲེན་མཛད་པ༔ སྐྱེ་མེད་རྣམ་དག་རིག་པ་ཆོས་ཀྱི་སྐུ༔ ཤེས་རབ་སྙིང་རུས་ཆེ་བ་ཤུགས་ཀྱིས་ལས༔ རང་བཞིན་ལས་དབང་ཤུགས་ཀྱིས་འགྲོ་དོན་བྱས༔ མི་མིན་འདྲེ་ཡུལ་བྱ་རོག་གདོང་དར་ནས༔ འདི་འདྲ་མཁའ་འགྲོ་རིགས་ཅན་ཁྱད་དུ་འཕགས༔ འདི་འདྲ་ཡོད་པ་མ་འོངས་སེམས་ཅན་རྣམས༔ ལས་ཅན་དགེ་བའི་ཐར་ལམ་ཟིན་པའི་བརྡ༔ བུ་མོ་སྙིང་རུས་ཆེ་བས་འདི་ལྟར་བྱས༔ མཁར་ཆུ་ས་བཟང་ཡིན་པས་ལུང་བསྟན་པ༔ མཁར་ཆུ་རུས་ཅན་བུ་མོ་འདི་ལྟར་འདུག༔ མཁར་ཟ་ཡེ་ཤེས་མཚོ་རྒྱལ་ལས་ཀྱིས་ཤུགས༔ བུད་མེད་རིགས་ཅན་སྣང་བ་རྫུན་ཆེ་སྟེ༔ འདི་འདྲ་སྣང་བ་རྫུན་པ་མི་འདུག་དུས༔ བུད་མེད་མཐོང་ཚོར་མེད་པའི་གཏམ་མང་བ༔ མཚོ་རྒྱལ་གཏམ་མི་མང་བས་ཆོས་རྗེས་འཛིན༔ བྱིན་རླབས་ཡོད་པ་ཁོ་མོ་ཁྱོད་ལ་གནང་༔ མ་འོངས་བུ་སློབ་དོན་དུ་གནས་པར་བྱ༔ ཉོན་ཅིག་མཁར་ཆུ་ཟ་ཡིས་ཉམས་སུ་ལོངས༔ མ་འོངས་བུ་སློབ་རྗེས་སུ་འཛིན་པར་བྱ༔ མཁས་ཤིང་དག་པའི་སེམས་བསྐྱེད་ཅིང་༔ ཆོས་ཡིད་ལ་ཟུངས་ཤིག་མ་འོངས་དོན༔ ཀློག་ཅིག་བྲིས་ཤིག་མ་འོངས་དོན༔ རྗེ་འབངས་ལྔ་ལ་ཁྱེད་ཀྱིས་བསྟོད་པ་ཕུལ༔ ཞེས་གསུངས༔ ཡབ་ཡུམ་གཉིས་བྱང་སེམས་ཐབས་ཤེས་ཟུང་འཇུག་བྱས་པ༔ བྱིན་རླབས་ཐིམ་པ༔ ཡེ་ཤེས་མཚོ་རྒྱལ་ཞལ་ནས༔

ཨེ་མ་ཧོ༔ གསང་སྔགས་ཆོས་ཀྱི་བསྟན་པ་མཐའ་རྒྱས་པ༔ གྲུབ་ཆེན་སྔགས་འཆང་པདྨའི་སྐུ་ལ་བསྟོད༔ དད་གུས་ཞི་ཞིང་ལྡན་པའི་བྱམས་སྙིང་མཛད༔ ནམ་མཁའི་སྙིང་པོའི་སྐུ་ལ་ཕྱག་འཚལ་བསྟོད༔ བསམ་ཡས་དབུ་རྩེ་རིགས་གསུམ་ཆོས་འཁོར་བསྐོར༔ མངའ་བདག་བསྲུངས་མ་གཉིས་ཀྱི་བཀའ་བགྱིས་པ༔ ཆོས་ཀྱི་རྒྱལ་པོའི་སྐུ་ལ་ཕྱག་འཚལ་བསྟོད༔ སངས་རྒྱས་དཔའ་བོ་འཇིག་རྟེན་རབ་འབྱམས་ནས༔ ཕྱོགས་བཅུ་བདེར་གཤེགས་ཉིད་ཀྱིས་བཀའ་གནང་བ༔ སངས་རྒྱས་ཡེ་ཤེས་ཚོགས་ལ་ཕྱག་འཚལ་བསྟོད༔ མཁའ་ལྟར་མཉམ་པའི་ཐུགས་རྗེ་རབ་མངའ་བ༔ བདེར་གཤེགས་རྨད་བྱུང་མཆོག་གི་སྲས་མཛད་པ༔ རྒྱལ་བ་མཆོག་དབྱངས་ཚོགས་ལ་ཕྱག་འཚལ་བསྟོད༔ རྫོགས་ཆེན་བཀའ་བབས་མཐུ་སྟོབས་སྤྱན་དང་ལྡན༔ མངའ་བའི་སྟོབས་ཆེན་བྷེ་རོ་ཙ་ནའི་སྐུ་ལ་བསྟོད༔ རང་རིག་དོན་གྱི་སྙིང་པོ་རབ་བསྒོམ་པ༔ དཀའ་བ་མཛད་ཕྱིར་དཔལ་གྱི་དབང་ཕྱུག་ཞེས༔ སྒྲ་བསྒྱུར་མཆོག་སྲས་ཉིད་ཀྱི་སྐུ་ལ་བསྟོད༔ འདུལ་མཛད་ཐུགས་རྗེ་རབ་མཆོག་སོག་པོ་དཔལ༔ མིང་མཆོག་རྒྱལ་བའི་ཞབས་ལ་ཕྱག་འཚལ་བསྟོད༔ དུས་གསུམ་རྣམ་དག་བྱེད་ཚེ་དེ་བཞིན་གཤེགས༔ ཐུགས་ཀྱི་འཛིན་མཛད་དྲན་ནས་ནམ་མཁའི་ཚོགས༔ མཆོག་གི་སྤྲུལ་པའི་སྐུ་ལ་ཕྱག་འཚལ་བསྟོད༔ ཤེས་བྱའི་རང་བཞིན་ཆོས་སྐུ་དག་པ་ལ༔ ཆུ་བོ་གྱེན་དུ་བཟློག་ཕྱིར་ཤུད་པོ་དཔལ༔ མཆོག་གི་སྲས་བཅས་ཉིད་ལ་ཕྱག་འཚལ་བསྟོད༔ འདུ་བྱེད་མ་ལུས་ཡང་དག་རྫོགས་མཛད་པ༔ གཡག་རྒོད་ཕྱག་བཀུག་མཐུ་སྟོབས་དྲན་པ་ཙམ༔ རྫུ་འཕྲུལ་སྟོབས་དང་ལྡན་ལ་ཕྱག་འཚལ་བསྟོད༔ ཐུགས་རྗེ་མངའ་བའི་སྟོབས་དང་ལྡན་མཛད་པ༔ མཐུ་སྟོབས་ཁྱེའུ་ཆུང་ནམ་མཁའི་བྱ་རྣམས་ཟིན༔ ཡང་དག་དོན་ལྡན་མཆོག་ལ་ཕྱག་འཚལ་བསྟོད༔ རྟོགས་པའི་དོན་ལྡན་འབྲས་བུ་ཉིད་ཀྱི་སྐུ༔ འཕགས་ལམ་ཆོས་སྐུ་རྟོགས་པའི་གཡུ་སྒྲ་སྙིང༔ རྒྱལ་བ་རྟོགས་བྱས་སྐུ་ལ་ཕྱག་འཚལ་བསྟོད༔ རྩལ་དྲག་ཉ་མོ་ལྟ་བུ་སྟོབས་དང་ལྡན༔ འོ་བྲན་དབང་ཕྱུག་ཞལ་མངའ་དག་མཛད་པ༔ གང་འདུལ་སྤྲུལ་པའི་སྐུ་ལ་ཕྱག་འཚལ་བསྟོད༔ མཁྱེན་གཉིས་རབ་རྒྱས་བརྩེ་བའི་ཐུགས་རྗེ་མཛད༔ དཀའ་བ་དཔལ་བརྩེགས་འགྲོ་བའི་མགོན་མཛད་པ༔ ཐུགས་རྗེ་ཞལ་ཉིད་མངའ་ལ་ཕྱག་འཚལ་བསྟོད༔ རྣམ་དག་ཤེས་བྱ་རང་བཞིན་དག་པ་ལ༔ རྡོ་རྗེ་བདུད་འདུལ་ཚུལ་ཁྲིམས་ཐོགས་མེད་པ༔ མཁའ་ལྟར་མཉམ་པའི་སྐུ་ལ་ཕྱག་འཚལ་བསྟོད༔ མཐུ་སྟོབས་གསེར་རྣམས་རོ་ལང་གསེར་དུ་བསྒྱུར༔ རྒྱལ་བའི་བློ་གྲོས་ཐོགས་པ་མེད་མཛད་པ༔ ཕུན་སུམ་ཚོགས་ལྡན་སྐུ་ལ་ཕྱག་འཚལ་བསྟོད༔ མཐུ་དང་རྩལ་དྲག་བྱང་ཆུབ་ཐོབ་མཛད་པ༔ རྒྱལ་བའི་དབང་ཕྱུག་མཁའ་ལ་སྐྱིལ་ཀྲུང་བཅའ༔ ཆོས་ཀྱི་བསྟན་པའི་སྐུ་ལ་ཕྱག་འཚལ་བསྟོད༔ ཐོས་ཕྱིཪ་ལྡན་པའི་འགྲོ་བ་འདུལ༔ མ་མོ་མཁའ་འགྲོ་བྲན་དུ་བཀོད༔ དཔལ་གྱི་ཡེ་ཤེས་ཚོགས་ལ་ཕྱག་འཚལ་བསྟོད༔ མི་བརྗེད་ཆོས་ཀྱི་དབྱིངས་ཉིད་དུ༔ དྷ་མང་ཆོས་ཀྱི་བཀའ་བབས་བཅས་པ༔ རྒྱལ་བ་མ་མོའི་ཚོགས་ལ་ཕྱག་འཚལ་བསྟོད༔ དུས་ཚད་མ་མོ་ཡེ་ཤེས་དཔལ་ལྡན་མོ༔ དཔལ་གྱི་རྡོ་རྗེ་མཐུ་སྟོབས་ཞལ་མངའ་བ༔ ཐེག་དགུ་ཡང་དག་ཉིད་ལ་ཕྱག་འཚལ་བསྟོད༔ འགྲོ་བའི་དོན་ལ་གང་འདུལ་མཉེས་མཛད་པ༔ རྒྱལ་བའི་བདུད་བཅོམ་དཔལ་མཆོག་ཡང་དག་ཉིད༔ དམིགས་མེད་ཆོས་ཀྱི་སྐུ་ལ་ཕྱག་འཚལ་བསྟོད༔ བདེ་ཆེན་རྣམ་དག་ཆོས་ཀྱི་སྟོབས་དང་ལྡན༔ རྨ་ཐོག་རིན་ཆེན་ཕ་འོང་ཟན་ལྟར་གསོལ༔ ཐེག་མཆོག་ཡང་དག་ཉིད་ལ་ཕྱག་འཚལ་བསྟོད༔ ཐོས་བསམ་ལྡན་པའི་བསྟན་དགྲ་འདུལ་མཛད་པ༔ ལང་གྲོ་ལོ་ཙཱས་ཐོག་རྒོད་མདའ་ལྟར་འཕེན༔ མཐུ་སྟོབས་རྩལ་མངའ་ཅན་ལ་ཕྱག་འཚལ་བསྟོད༔ སྐུའི་སྤྲུལ་པ་ཐོད་ཕྲེང་རིགས་ལྔ་དང་༔ གུ་རུ་མཚན་བརྒྱད་གང་འདུལ་ཐབས་སྟོན་མཛད༔ གསུང་གི་ཡང་སྤྲུལ་རྗེ་འབངས་ཉི་ཤུ་ལྔ༔ ཐུགས་ཀྱི་སྤྲུལ་པ་བྱེ་བྲག་དཔག་ཏུ་མེད༔ ཡོན་ཏན་སྤྲུལ་པ་གང་འདུལ་ཐབས་སྟོན་པ༔ འཕྲིན་ལས་སྤྲུལ་པ་བྱེ་བ་ཕྲག་བརྒྱ་འགྱེད༔ རྫུས་སྐྱེས་ཡོན་ཏན་ཅན་ལ་ཕྱག་འཚལ་བསྟོད༔ སྐུ་ནི་འགྱུར་བ་མེད་པའི་ཡོན་ཏན་སྐུ༔ ཁོ་མོ་བདག་ལ་ཐུགས་རྗེས་ཟུངས༔ སྐལ་ལྡན་དོན་གྱི་ཕྱི་རབས་འགྲོ་བའི་དོན༔ ཁོ་མོ་བདག་ལ་གནང་ནས་ཡིད་དུ་འཆང་༔ ཐབས་དང་ལྡན་པའི་མཐུ་སྟོབས་དཔག་ཏུ་མེད༔ དེ་ཚེ་དཔག་མེད་བགྲང་གིས་ནུས་པ་མེད༔ གུ་རུ་རིན་པོ་ཆེའི་མདུན་དྲུང་དུ༔ ཁོ་མོ་ཡེ་ཤེས་མཚོ་རྒྱལ་བདག་གིས་ཞུས༔ མ་འོངས་བུ་སློབ་དོན་དུ་ཆོས་གཅིག་གསུངས༔ པདྨའི་སྔགས་དང་ལྡན་པའི་ཆོས་གཅིག་གསུངས༔ དང་པོ་ཞགས་པ་ཟིལ་གནོན་འཕང་༔ བར་དུ་བསྐྱེད་པ་དོན་གྱི་གསལ་བའི་སྔགས་གཅིག་གནང་༔ ཐ་མ་ལུས་བསྲུང་གོ་བགོ་བྱེད་པའི་གདམས་ངག་གནང་༔ ཞེས་ཞུས༔

ཨུ་རྒྱན་གྱི་ཞལ་ནས༔ རིགས་ཀྱི་བུ་མོ་མཁར་ཆུ་ཟ་ཉོན་དང་༔ དང་པོ་ཟིལ་གནོན་འཕང་བ༔ བདག་ལྷ་གང་དམིགས་པ་ཕཊ༔ ཅེས་སྨྲས་པ༔ ཐུགས་ཀ་ལ་ཧཱུྃ་འཕྲོས་པ་རྣམ་པར་ཤེས་པའི་ངོ་བོ༔ མགྲིན་པའི་སྟེང་ནས་ཕཊ༔ འཕྲོས་པས༔ གནས་ཁང་དེ་ཉིད་ལ་ཕོག་པའི་ཧཱུཾ་མེ་རིའི་གུར་ཁང་གྱུར༔ ཕཊ༔ཀྱིས་འདྲེ་བགེགས་སྣང་སྲིད་ཐམས་ཅད་བཀུག་པ༔ ཧཱུྃ་ལས་འོད་ཟེར་འཕྲོས་པའི་ཛ༔ཧཱུྃ་བཾ་ཧོ་བཞི་འཕྲོས་ནས་ཞགས་པས་བཅིངས་ནས་འགྲོ་བ་མེད་པ་གཅིག་བསྒོམ༔ བདག་ཉིད་རྣམ་པར་ཤེས་པ་རྡོ་རྗེ་རྩེ་དགུ་པ་གཅིག་ཏུ་གྱུར་ནས་ལྟེ་བ་ལ་ཧཱུཾ༔ཕྱི་རྩེ་ལ་ཕཊ༔དམིགས་ནས་ནང་དུ་བཛྲ་ཧཱུཾ་ཕཊ༔དམིགས་ཞེས་བརྗོད་པ་ཤ་ར་ར་འཕྲོས་པ་གནས་ཁང་དེ་ཉིད་ནས་འདུག་པར་བསྒོམ༔ ལྷ་ཡེ་ཤེས་སེམས་དཔའ་སྐྱབས་ཡུལ་དང་༔ རང་གི་སྤྱི་བོར་སྒོམ་པ་བདག་ལྷ་རུ་བསྐྱེད་པ་དམ་ཚིག་སེམས་དཔའི་ཐུགས་ཀའི་སེམས་ཉིད་དང་སྔགས་ཀྱིས་བསྐོར་བ༔ ཐུགས་ཀའི་ཡེ་ཤེས་སེམས་དཔའི་ཚོན་གང་བ་ལྷ་གཅིག་འདྲ་བ་བསྐྱེད་པ༔ དེ་གསུམ་ཐུགས་ཀའི་སྔགས་ཀྱིས་བསྐོར་བ༔ བདག་གི་སྤྱི་བོ་ནས་ཧཱུྃ་རྣམ་པར་ངོ་བོ་ལ་ཧཱུྃ་དང་རྡོ་རྗེ་མར་བབས་ནས་ལུས་ཐམས་ཅད་རྡོ་རྗེ་གོ་ཁྲབ༔ རྩ་ཐམས་ཅད་ཁྲོ་ཆུང་ནས་འབྲུ་ཙམ་བསྒོམ༔ མཛུབ་མོ་གཉིས་ཀྱིས་ཡར་ཁྲིད་ནས་ཐུགས་ཀར་མི་དམིགས་པའི་ངང་ནས་རྒྱས་གདབ༔ དེས་དང་ཉམས་སུ་ལོངས༔

མ་མཁར་ཆུ་ཟ་ནི་ཡེ་ཤེས་མཚོ་རྒྱལ་ཉོན༔ དེ་དང་ཉམས་སུ་ལོངས་ཤིག་མ་འོངས་དོན༔ བདག་གཞན་བུ་སློབ་འགྲོ་ལ་ལེགས་པར་དགོངས༔ སྨིན་བྱེད་རྒྱུ་ཡི་དབང་འཇུག་བྱེད༔ གྲོལ་བྱེད་ལམ་གྱི་དབང་ནི་གཞན་འཇུག་བྱ༔ འབྲས་བུ་དབང་ནི་མཆོག་ཐུན་གཉིས་ཀ་ཐོན༔ དེ་ཕྱིར་ཉོན་ཅིག་མཁར་ཆུ་ཟ༔ མ་འོངས་བུ་སློབ་རྣམས་ཀྱིས་ཉམས་སུ་ལོངས༔ སྐྱེ་མེད་རྣམ་དག་ཆོས་སྐུའི་རང་བཞིན་ལ༔ འགགས་པ་མེད་པ་གཟུགས་སྐུ་རྣམ་པ་གཉིས༔ བདེ་ཆེན་འདུ་འབྲལ་མེད་པའི་ཀློང་དཀྱིལ་ནས༔ ཡ་མཚན་རྨད་བྱུང་ཇོ་མོ་མཁར་ཆུ་ཟ༔ ཐུགས་ལ་ཆོངས་ཤིག་སྐལ་ལྡན་བུ་སློབ་ཀུན༔ མ་འོངས་འགྲོ་བའི་དོན་དུ་ངེས་མཛད་པ༔ སྟེང་སྒོ་གཏི་མུག་མེ་དྲོད་གདམས་ངག་དང་༔ འོག་སྒོ་ཐིག་ལེ་དབབ་བཟློག་གདམས་ངག་གཉིས༔ བདག་ལ་ཡོད་དེ་བུ་སློབ་དོན༔ ཁོ་མོ་ཁྱོད་ལ་སྟེར་ཏེ་ཡིད་ལ་འཆོངས༔ རང་ལ་ཡོད་པའི་ཡིད་བཞིན་ནོར་བུ་ཡིན༔ ཐིག་ལེ་འབར་བཅས་དབབ་བཟློག་ཡུལ་རྟེན་པ༔ གྲུབ་ཆེན་ཐིག་ལེ་འདྲེན་པའི་རབ་བྱུང་བཅས༔ རྫུས་སྐྱེས་ཆེན་པོ་སྔགས་འཆང་པདྨ་ང་༔ སྟོང་གསལ་ཟུང་འཇུག་བདེ་སྟོང་འབྲས་བུ་རྙེད༔ གྲུབ་ཆེན་ཚུལ་གྱིས་འགྲོ་བའི་དོན་མཛད་པ༔ མ་བསྒོམ་སངས་རྒྱས་གྲོལ་བའི་གདམས་ངག་འདི༔ རྗེ་བཙུན་ང་ལ་ཡོད་དེ་ཁྱེད་ལ་སྟེར༔ ཡིད་ལ་ཟུངས་ཤིག་མ་འོངས་བུ་སློབ་དོན༔ མ་བསླབ་དམ་ཆོས་གྲོལ་བའི་གདམས་ངག་འདི༔ རྗེ་བཙུན་ང་ལ་ཡོད་དེ་ཁྱེད་ལ་སྟེར༔ ཡིད་ལ་ཟུངས་ཤིག་མ་འོངས་བུ་སློབ་དོན༔ མ་གནང་སྔགས་དང་ལྡན་པའི་གདམས་ངག་འདི༔ རྗེ་བཙུན་ང་ལ་ཡོད་དེ་ཁྱེད་ལ་སྟེར༔ ཡིད་ལ་ཟུངས་ཤིག་མ་འོངས་བུ་སློབ་དོན༔ མ་སྦྱངས་སློབ་གཉེར་གྲོལ་བའི་གདམས་ངག་འདི༔ རྗེ་བཙུན་ང་ལ་ཡོད་དེ་ཁྱེད་ལ་སྟེར༔ ཡིད་ལ་ཟུངས་ཤིག་མ་འོངས་བུ་སློབ་དོན༔ མ་བལྟས་ལྷ་དང་མཇལ་བའི་གདམས་ངག་འདི༔ རྗེ་བཙུན་ང་ལ་ཡོད་དེ་ཁྱེད་ལ་སྟེར༔ མི་བརྗེད་གཟུངས་མཆོག་ཐོབ་པའི་གདམས་ངག་འདི༔ རྗེ་བཙུན་ང་ལ་ཡོད་པ་ཁྱེད་ལ་སྟེར༔ ཡིད་ལ་ཟུངས་ཤིག་མ་འོངས་བུ་སློབ་དོན༔ ཚོགས་བརྒྱད་ཡིད་ཀྱི་བརྡ་རྣམས་དང་༔ ཨ་གཅིག་གྲོལ་བའི་ཐབས་ཀྱིས་གདམས་ངག་འདི༔ སྔགས་འཆང་ང་ལ་ཡོད་པ་ཁྱེད་ལ་སྟེར༔ ཡིད་ལ་ཟུངས་ཤིག་མ་འོངས་བུ་སློབ་དོན༔ ཁྱོད་ཀྱི་གྲོལ་བའི་ཐབས་ནི་ཁྱོད་གྲོགས་བྱེད༔ མ་བལྟས་མངོན་ཤེས་ཁྱབ་པའི་གདམས་ངག་འདི༔ སྔགས་འཆང་ང་ལ་ཡོད་པ་ཁྱོད་ལ་སྟེར༔ ཡིད་ལ་ཟུངས་ཤིག་མ་འོངས་བུ་སློབ་དོན༔ སྣང་སྲིད་དབང་དུ་འདུ་བའི་གདམས་ངག་འདི༔ རྗེ་བཙུན་ང་ལ་ཡོད་པ་ཁྱེད་ལ་སྟེར༔ ཡིད་ལ་ཟུངས་ཤིག་མ་འོངས་བུ་སློབ་དོན༔ སྤྲུལ་པ་དཔག་མེད་འགྱེད་པའི་གདམས་ངག་འདི༔ ང་ལ་ཡོད་པ་མཁར་ཟ་ཁྱོད་ལ་ཡོད༔ སྤྲུལ་པ་གྱིས་ཤིག་མ་འོངས་སེམས་ཅན་ཀུན༔ ཐོག་མཐའ་བར་གསུམ་གྲོལ་བའི་གདམས་ངག་འདི༔ རྗེ་བཙུན་ང་ལ་ཡོད་པ་ཁྱེད་ལ་སྟེར༔ ཡིད་ལ་ཟུངས་ཤིག་མ་འོངས་བུ་སློབ་དོན༔ གདམས་ངག་སྙིང་གི་དཀྱིལ་དུ་འཆང་བར་གྱིས༔ བསྟན་པའི་སྤྱི་དགྲ་བསྒྲལ་བའི་གདམས་ངག་འདི༔ མཐུ་ཆེན་ང་ལ་ཡོད་པ་ཁྱེད་ལ་སྟེར༔ ཡིད་ལ་ཟུངས་ཤིག་མ་འོངས་བུ་སློབ་དོན༔ སྐྱེ་མེད་མིག་གི་མི་རྟོག་གདམས་ངག་འདི༔ ང་ལ་ཡོད་པ་ཁྱོད་ལ་སྟེར༔ ཡིད་ལ་ཟུངས་ཤིག་མ་འོངས་བུ་སློབ་དོན༔ ཐབས་ལམ་ཆོས་སྐུ་ལྡན་པའི་གདམས་ངག་འདི༔ སྔགས་འཆང་ང་ལ་ཡོད་པ་ཁྱོད་ལ་སྟེར༔ ཡིད་ལ་ཟུངས་ཤིག་མ་འོངས་བུ་སློབ་དོན༔ མཐུ་སྟོབས་རྩལ་དང་ལྡན་པའི་གདམས་ངག་འདི༔ རྗེ་བཙུན་ང་ལ་ཡོད་དེ་ཁྱེད་ལ་སྟེར༔ ཡིད་ལ་ཟུངས་ཤིག་མ་འོངས་བུ་སློབ་དོན༔ བར་སྣང་རླུང་ཁམས་ཁུགས་པའི་གདམས་ངག་འདི༔ སྔགས་འཆང་ང་ལ་ཡོད་པ་ཁྱེད་ལ་སྟེར༔ ཡིད་ལ་ཟུགས་ཤིག་མ་འོངས་བུ་སློབ་དོན༔ མི་འཆི་འབྱུང་བའི་རང་དབང་ཐོབ་པ་འདི༔ རྫུས་སྐྱེས་ང་ལ་མིན་པ་མི་མངའོ༔ མཚོ་རྒྱལ་འདྲ་བ་མི་འཆི་ཚེ་ཐོབ་ཐུབ༔ ཐུབ་སྟེ་མ་འོངས་གོ་སྟོན་བྱེད་པའི་བརྡ༔ བེམ་རིག་བྲལ་བའི་ང་དང་འདུ་འབྲལ་མེད༔ ཁོ་མོ་ཡེ་ཤེས་མཚོ་རྒྱལ་ཐུགས་ལ་ཞོག༔ བདག་ནི་འགྲོ་དོན་བོད་ཀྱི་ཞིང་ཁམས་སུ༔ གདུལ་བྱ་གཟིགས་པའི་འགྲོ་བའི་དོན་མཛད་པ༔ བདག་གི་ཡིག་རིས་སུམ་བརྒྱ་དྲུག་ཅུའི་གདམས་ངག་འདི༔ རྫུས་སྐྱེས་ང་ལ་ཡོད་པ་ཁྱེད་ལ་སྟེར༔ ཉོན་ཅིག་ཤེས་རབ་མཁར་ཆུ་ཟ༔ མི་མིན་འདྲེ་ཡུལ་བྱ་རོག་གདོང་ཡུལ་འདིར༔ བདག་ནི་འགྲོ་ལ་དགོངས་འདས་བྱོན་པ་ལ༔ བདག་གིས་གྲོགས་བྱེད་ཁོ་མོ་མཚོ་རྒྱལ་ལོ༔ མཁར་ཆུ་ས་ནས་ས་ཡུལ་བསམ་ཡས་བྱོན༔ བུ་མོ་ལོ་ཆུང་བཅུ་གསུམ་ངོ་མཚར་དུས༔ བདག་གི་གྲོགས་བྱེད་ཞབས་ཏོག་འདི་འདྲ་བྱེད༔ འདི་འདྲ་དྲིན་ཆེན་ཡེ་ཤེས་མཚོ་རྒྱལ་ནི༔ འགྲོ་བའི་དོན་དུ་ཐོག་མཐའ་བར་མ་གསུམ༔ འདི་འདྲ་དྲིན་ཡང་ཆེ་སྟེ་ཆགས་ཆེ༔ བདག་གི་གྲོགས་བྱེད་ཁོ་མོ་འདི་འདྲ་མེད༔ མཁར་ཆུ་སྲས་མོ་ལན་གཅིག་འདི་འདྲ་ཡོད༔ མཁར་ཆུ་སྐྱེ་བ་སྐྱེ་རྒྱུད་ཐམས་ཅད་དུ༔ འགྲོ་བའི་དོན་དུ་བྱ་བའི་དྲུང་དུ་སྐྱེ༔ བྱང་ཆུབ་མཆོག་གི་ཐར་ལམ་ཟིན་པར་ཤོག༔ མཁར་ཆུ་ཕོ་རྒྱུད་མོ་རྒྱུད་བྱིན་རླབས་ཆེ༔ ཁོ་མོ་འདི་འདྲ་ཙམ་གྱིས་བྱང་ཆུབ་ཐོབ༔ སྙིང་རུས་བརྩོན་འགྲུས་ཆེ་བའི་བུད་མེད་དང་༔ ནན་ཏན་བཟོད་དཀའ་ཁྱག་པའི་མཁར་ཆུ་ཟ༔ ཤེས་རབ་གཏོང་ཕོད་ཆེ་བའི་བུད་མེད་ལུས༔ འདི་འདྲ་ལུས་བླངས་ངོ་མཚར་མཆོག་གི་སྐུ༔ མ་འོངས་དུས་ཀྱི་བུད་མེད་སེམས་ཅན་རྣམས༔ མཁར་ཟ་མཚོ་རྒྱལ་འདི་ལ་གསོལ་བ་ཐོབ༔ མ་འོངས་སྐྱེས་པ་སེམས་ཅན་ཀུན༔ རྫུས་སྐྱེས་སྔགས་འཆང་ང་ལ་གསོལ་བ་ཐོབ༔ དད་གུས་ཅན་ལ་བྱིན་རླབས་དྲུང་ཉལ་ཡོད༔ དུས་སོ་ཚེས་བཅུ་མར་ཚེ་ཉི་ཤུ་ལྔ༔ འགྲོ་བའི་དོན་དུ་བོད་ལ་ང་ཡོད་དོ༔ རྒྱུན་ཆད་མེད་པའི་ལས་ཅན་རྟག་རྣམས་ཡོད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ བཟོད་དཀའ་ཁྱག་པའི་བུད་མེད་འདི་འདྲ་བ༔ བོད་འབངས་འགྲོ་བའི་དོན་དུ་འདི་ལྟར་གྱིས༔ མ་འོངས་བུ་སློབ་རྣམས་ལ་ལུང་བསྟན་མཛོད༔ ཡེ་ཤེས་མཚོ་རྒྱལ་ཐུགས་ལ་ཞོག༔ ཐུགས་ལ་མི་བརྗེད་ཉམས་ལོངས་ལས་ཅན་དོན༔ ལས་ཅན་འགྲོ་བའི་དོན་དུ་ཡིན་པར་དགོངས༔ མི་བརྗེད་ཉམས་སུ་ལོངས་ཤིག་མཁར་ཆུ་ཟ༔ འཇིག་རྟེན་བུད་མེད་ཟང་ཟིང་ཁྱིམ་ཐབ་མོས༔ རློམ་པ་འཕྱོར་ཤེས་བཞིན་པའི་ཚུལ་ལ་མོས༔ མཁར་ཟ་མཚོ་རྒྱལ་ཁ་གཏིང་ཆོས་མོས་སྣང༔ ཆེ་བ་རི་རབ་ལྟ་བུ་རློམ་པ་མེད༔ འཕྱོར་ཤེས་སྣང་བ་ཡིན་པའི་རང་ཐག་བཅད༔ འདི་འདྲ་མཁར་ཟ་ཞབས་ཏོག་ཆེ༔ ཆོས་ལ་མོས་པའི་སེམས་ཅན་དོན་བྱ་བ༔ མཚོ་རྒྱལ་ཐུགས་སེལ་ཞོག་ཅིག་བུ་སློབ་དོན༔ ཞེས་གསུངས༔ ཡེ་ཤེས་མཚོ་རྒྱལ་ཤིན་ཏུ་མཉེས་ནས་འདི་ལྟར་ཞུས་སོ༔

ༀ་ཨཱ་ཧཱུྃ༔ ཨེ་མ་ཧོ༔ དད་ལྡན་མཆོག་གི་འགྲོ་བ་འདྲེན་པའི་དཔལ༔ བཀའ་དྲིན་རྩ་བའི་བླ་མ་པདྨ་འབྱུང་༔ ཐོས་ཕྱིར་ལྡན་པའི་འགྲོ་བ་འདྲེན་མཛད་པ༔ དུས་གསུམ་རྒྱལ་བ་ཐམས་ཅད་དགོངས་མཛད་པ༔ རྫུས་སྐྱེས་པདྨ་མཚོ་ཆེན་སྡོང་ལས་བསྟེན༔ བླ་མའི་བཀའ་བསྒྲུབ་ཁོ་མོ་ཞེ་བློ་བདེ༔ ཆོས་རྣམས་སློབ་དཔོན་གསུངས་པའི་ཞེ་བློ་བདེ༔ བླ་མའི་ཞབས་ཏོག་བྱེད་པའི་ཁོ་མོ་ཞེ་བློ་བདེ༔ ཁོ་མོ་མོས་གུས་མེད་པའི་རང་ལུས་བཅས༔ རི་ཁྲོད་གནས་སུ་མ་འོངས་དོན་ལ་དགོངས༔ ཐུགས་རྗེ་སྔགས་འཆང་པདྨའི་ཡང་ཡང་ཆེ༔ མ་ཚོགས་མཁའ་འགྲོ་བྱིན་རླབས་ཡང་ཡང་ཆེ༔ ཁོ་མོ་བདག་གི་ལུས་འདི་བརྩོན་འགྲུས་ཆེ༔ སྔགས་འཆང་ཧེ་རུ་ཀ་ལ་ཕྱག་འཚལ་བསྟོད༔ སྣང་སྲིད་འདུལ་ཕྱིར་སྔགས་འཆང་ལྷ་དང་ལྡན༔ གནོད་བྱེད་བརླག་ཕྱིར་ལྷ་དགུ་རྒྱན་དུ་བཀོད༔ འགྲོ་བ་འདྲེན་མཛད་ཁོ་མོ་གྲོགས་སུ་འཆར༔ འདི་འདྲ་གཞོན་ནུ་སྐུ་མཆོག་མཛེས་ཚུལ་ལྡན༔ འགྲོ་བའི་དོན་ལ་གང་འདུལ་ཆོས་ཤིག་གསུངས༔ ཁོ་མོ་ཞུ་ཕོད་བྱས་པའི་བཀའ་མ་བཀྱོན༔ རྫུས་སྐྱེས་ཐུགས་ལ་འགལ་བ་ཅི་སོང་ནས༔ མཐོལ་ལོ་བཤགས་སོ་བདག་གིས་འགྱོད་པ་བཤགས༔ དཀའ་བ་མེད་པའི་སྤྱོད་མཛད་པ༔ ལྷ་ལ་རྫུས་སྐྱེས་ཆོས་ཀྱི་སྐུ༔ འགྲོ་ལ་ཆོས་གཅིག་གསུངས་ཤིག་ཁོ་མོ་ཡིད་ལ་འཆང་༔ བསམས་ཤིང་རྗེ་བཙུན་པདྨ་དྲན༔ ཁོ་མོ་བདག་གིས་ཆོས་བྱེད་འདི་ཐོས་པས༔ འགྲོ་བའི་དེད་དཔོན་སློབ་དཔོན་པདྨ་འབྱུང་༔ སློབ་མ་དམ་པ་ཡེ་ཤེས་མཚོ་རྒྱལ་ལ༔ འགྲོ་བ་མཆོག་གི་ཐར་པའི་ལམ་བཀོད་དོ༔ ཡང་དག་དོན་ལྡན་བླ་མ་རིན་པོ་ཆེ༔ འགྲོ་བ་ཡོངས་ལ་ཐུགས་རྗེ་འདི་ལྟར་ཆེ༔ ཁྱད་པར་ཁོ་མོ་བདག་ལ་བཀའ་དྲིན་འདི་ལྟར་ཆེ༔ སྣང་སྲིད་ཆོས་སྐུ་རྟོགས་པ་བླ་མའི་དྲིན༔ མཐོང་ལམ་ཡང་དག་རྟོགས་པ་བླ་མའི་དྲིན༔ རྫུས་སྐྱེས་པདྨའི་སྐུ་ལ་ཞུ་བ་ཕུལ༔ འགྲོ་བའི་དོན་དུ་ཆོས་ཤིག་གནང་བར་ཞུ༔ ལགས་ཨུ་རྒྱན་རིན་པོ་ཆེ༔ ཐབས་ལམ་གྱི་དབང་བསྐུར་བ་ཞིག་གནང་ཞུས༔ པདྨའི་ཞལ་ནས༔ སྣང་སྲིད་ཆོས་སྐུ་ནི་བླ་མ་བྱེད་པ༔ རྩ་གནས་དཔའ་བོ་མཁའ་འགྲོ་དཀྱིལ་འཁོར་བྱེད་པ༔ རྒྱུའི་ལུས་འདི་རྟེན་བྱེད་ཀྱི་བུམ་པ་བྱེད་པ༔ རྩ་ཐམས་ཅད་དཔའ་བོ་རླུང་ཐམས་ཅད་དཔའ་མོ་དབང་གི་ལྷ་བཅས་པ༔ དབང་པོ་རྣམ་ལྔ་དབང་རྫས་བྱེད་པ༔ དེའི་དབང་བསྐུར་བའི་ཐབས་བསམ་གྱིས་མི་ཁྱབ༔ དད་པ་གང་བྱས་རྣམ་དག་ཞིང་དུ་སྐྱེ༔ ཞེས་གསུངས༔

ཡེ་ཤེས་མཚོ་རྒྱལ་གྱིས་ཞུས་པ༔ རང་གི་ལུས་བཅས་འདི་རྣམ་པར་ཤེས་པ་ཤ་ཁྲག་སྲེག་པ་ཨེ་ཐུབ་ལགས༔ ཨུ་རྒྱན་གྱི་ཞལ་ནས༔ རང་གི་རོ་ཁུར་དང་༔ རོ་སྲེག་དང་རོ་ཟས་ཟ་བ༔ དེ་བཅས་པའི་དགོས་པའི་ཐབས༔ རང་གི་རྣམ་པར་ཤེས་པ་དང་པོ་བླ་མ་བྱེད་པ༔ ཉོན་མོངས་པ་ཐམས་ཅད་དག་པའི་ལས་ཀྱི་བཀྲུ་བ༔ བར་དུ་རང་གི་རོ་སྲེག་བྱེད་པ༔ ཡེ་ཤེས་ལྔ་ཡི་སྒོ་ནས་མེ་འབར་ནས་དུག་ལྔ་སྲེག་པ༔ ཐ་མ་རོ་ཟན་རང་གི་ཟ་བ་ནི༔ ཚོགས་དྲུག་དག་པ་ཡེ་ཤེས་ལྔའི་ཟས་ཟ་བ༔ དེ་ཕྱིར་རོ་ཁུར་ནས་སྣང་བ་མ་དག་པ་ཐམས་ཅད་སེམས་ཉིད་གཅིག་གིས་དག་པའི་ཁུར༔ བར་དུ་སྲེག་པ་ལུས་གཏུམ་མོ་ངང་ནས་བསྲེག༔ སྣང་སྲིད་ཆོས་སྐུ་རྟོགས་པའི་ཅི་བྱས་རང་དབང་ཡོད་པ་འོག་མིན་བདེ་ཆེན་གར་སོང་རིག་པའི་དབང་༔ དེ་ཕྱིར་ཐུགས་ལ་ཞོག་ཅིག་མཁར་ཆུ་ཟ༔ མ་འོངས་བུ་སློབ་རྣམས་ཀྱི་དོན༔ མི་བརྗེད་ཉམས་ལོངས་དེ་དང་མཐུན་པར་བྱས༔ ཞེས་གསུངས༔ ཡེ་ཤེས་མཚོ་རྒྱལ་ཞུས་པ༔ ལགས་ཨུ་རྒྱན་རིན་པོ་ཆེ༔ ཐབས་ཀྱིས་གནས་ནས་ཤེས་རབ་བཅས༔ འགྲོ་བའི་དོན་ལ་གསོལ་བའི་ཆོས་གཅིག་གནང་༔ ཞུས༔

ཨུ་རྒྱན་གྱི་ཞལ་ནས༔ ཨེ་མ་ཧོ༔ ནུབ་ཕྱོགས་བདེ་བ་ཆེན་པོའི་ཞིང་ཁམས་ནས༔ རང་བྱུང་སྤྲོས་མེད་གསལ་བ་འོད་དཔག་མེད༔ ཐུགས་རྒྱུད་འཛམ་གླིང་འགྲོ་བའི་དོན་མཛད་པ༔ ཨུ་རྒྱན་པདྨ་འབྱུང་གནས་བྱིན་རླབས་ཅན༔ ཐུགས་རྗེ་ཁྱད་པར་ཅན་ལ་གསོལ་བ་འདེབས༔ འགྲོ་བའི་དོན་དུ་མཚོ་སྐྱེས་རྡོ་རྗེ་སྐུ༔ བཀྲ་ཤིས་ཡེ་ཤེས་ཚོགས་ཀྱི་དངོས་གྲུབ་འབྱུང་༔ བྱིན་རླབས་མཆོག་གི་ངོ་མཚར་རྨད་དུ་བྱུང་༔ དུས་གསུམ་སངས་རྒྱས་རྣམས་ལ་གསོལ་བ་འདེབས༔ བསམ་པ་རྣམ་པར་དག་པར་བྱིན་གྱིས་རློབས༔ བདག་རྒྱུད་གྲོལ་བར་བྱིན་གྱིས་རློབས༔ གཞན་རྒྱུད་སྨིན་པར་བྱིན་གྱིས་རློབས༔ ཅི་བསམ་ཆོས་སུ་འགྲུབ་པར་བྱིན་གྱིས་རློབས༔ ཡེ་ཤེས་མཚོ་རྒྱལ་ཐུགས་སུ་འཆོངས༔ མ་འོངས་བུ་སློབ་ཉམས་སུ་ལོངས༔ དེ་ཕྱིར་ང་དང་ཆོས་མཐུན་གྱི༔ མི་བརྗེད་ཡིད་ལ་ཟུངས་ཤིག་མཁར་ཆུ་ཟ༔ པདྨ་ང་ཡིས་ཐུགས་ཀྱི་ཟབ་མོ་གནང་༔ ཡེ་ཤེས་མཚོ་རྒྱལ་ཁྱོད་ལ་སྟེར་བ་ཡིན༔ ཁྱོད་ཀྱི་སྙིང་ལ་ཟུངས་ཤིག་སྙིང་གི་དྭངས་མ་གྱིས༔ མ་འོངས་ལས་ཅན་རྣམས་ལ་གཏད་པར་གྱིས༔ ལས་ཅན་འགྲོ་བའི་དོན་ལ་ལེགས་པར་དགོངས༔ བསམས་ཤིང་རྗེ་བཙུན་ང་དྲན་གྱིས༔ ཤོ་ཨ་ཙམ་བླ་མའི་ང་ཡི་དྲན༔ བཀའ་རྒྱུད་ཀྱི་བླ་མ་རིན་པོ་ཆེ༔ སྨན་གྱི་ལྷ་དང་ང་ཉིད་དབྱེར་མེད་ཡིན༔ མཁའ་འགྲོ་ལྷ་དང་ང་ཉིད་དབྱེར་མེད་པ༔ ཆོས་སྐྱོང་གཞི་བདག་ལྷ་དང་དབྱེར་མེད་པ༔ དབྱེར་མེད་བདེ་བའི་མཁར་ཟ་ཁྱོད་ལ་གནང་༔ མ་འོངས་བུ་སློབ་དོན་དུ་གནང་༔ ཞེས་གསུངས་པ༔ ཡེ་ཤེས་མཚོ་རྒྱལ་ཞལ་ནས༔ ཧྲཱི༔ དྲི་མེད་པདྨའི་སྡོང་པོ་ཁར་དབུས་ན༔ ངོ་མཚར་བྱུང་བའི་བླ་མ་རིན་པོ་ཆེ༔ བདག་གི་དྲིན་ཆེན་སྔགས་འཆང་རིན་པོ་ཆེ༔ མཆོག་གི་དངོས་གྲུབ་བདག་ལ་གནང་༔ བདག་ལ་གནང་སྟེ་ཁོ་མོ་ཡིད་ལ་འཆང་༔ རྣམ་དག་ཆོས་ཀྱི་དབྱིངས་ལས་མ་གཡོས་ཀྱང་༔ ཤེས་བྱ་རྣམ་འཕྲུལ་སྒྱུ་མའི་དཔེ་སྟོན་པ༔ ཐབས་ལམ་ཡང་དག་མཆོག་གི་རིན་པོ་ཆེ༔ ཀུན་གཞི་ཀ་དག་བདེ་བ་ཆོས་ཀྱི་སྐུ༔ གསལ་འཚེར་མདངས་ལྡན་ཆོས་དབྱིངས་ཡེ་ཤེས་གསལ༔ མ་འགགས་ཐབས་ཀྱིས་རིག་པ་དྲི་མ་མེད༔ ཡང་དག་མཆོག་གི་བླ་མ་རིན་པོ་ཆེ༔ མཐོང་ཐོས་འགྲོ་བ་འདྲེན་པའི་པདྨ་འབྱུང་༔ ཆོས་སྐུ་རྣམ་དག་ཆོས་ཀྱི་ངང་ཉིད་ནས༔ ལོངས་སྐུ་རྣམ་དག་སོ་སོར་ཅི་ཡང་སྟོན༔ སྤྲུལ་སྐུ་རྣམ་དག་སྔགས་འཆང་པདྨ་འབྱུང་༔ མཐོང་ལམ་ཡང་དག་མཆོག་གི་ཁྱེའུ་ཆུང་༔ ལྟ་མི་བཟོད་པ་སངས་རྒྱས་འདི་འདྲ་བ༔ མ་རྙེད་རྙེད་མཆོག་སངས་རྒྱས་རིན་པོ་ཆེ༔ ཁོ་མོ་མཁར་ཟ་ལས་རྣམས་འདི་འདྲ་ཆེ༔ ལུས་འདི་བརྩོན་འགྲུས་ཆེ་བས་ཆོས་སྒྲུབ་པ༔ སེམས་ཉིད་སྙིང་རུས་ཆེ་བ་དཀའ་བ་མཚར༔ ལས་འདི་ཆེ་བ་ཙམ་གྱིས་ནན་ཏན་བྱས༔ རྫུས་སྐྱེས་རྟོག་ཙམ་ཆོས་ལ་གཏོང་ཕོད་ཆེ༔ སྔགས་འཆང་པདྨའི་ཆོས་རྣམས་བྱིན་རླབས་ཆེ༔ ཁོ་མོ་བདག་གི་དབང་རྣམས་ལས་འདི་བཟང་༔ ཆོས་རྣམས་བསམ་པ་ཙམ་གྱིས་ཡིད་ལ་ཤར༔ ཤར་ཙམ་བཅུ་གསུམ་ལོ་ཐོག་རྫུས་སྐྱེས་རྙེད༔ བསམ་པ་འདི་འདྲ་བསྒྲུབ་པའི་ལས་རེ་དཀའ༔ ཆོས་གཅིག་བསམ་པའི་རྫུས་སྐྱེས་བྱིན་རླབས་གང་༔ གནང་བ་ཙམ་གྱིས་ཁོ་མོ་ང་འདྲ་གྲོལ༔ སྒོམ་གཅིག་བྱེད་བསམ་རྫུས་སྐྱེས་བཀའ་གཅིག་གནང་༔ གནང་བ་ཙམ་གྱིས་ཁོ་མོ་རང་རིག་གྲོལ༔ མི་བརྗེད་ཡིད་ལ་འཆང་བའི་དུས་གཅིག་བསམ༔ རྫུས་སྐྱེས་བྱང་སེམས་གསང་བའི་མི་བརྗེད་ཐོབ༔ ཁོ་མོ་མན་ངག་ཞུས་བསམ་དོན་འཆང་བ༔ རྫུས་སྐྱེས་པདྨའི་སྙིང་གི་མན་ངག་གནང༔ ཁོ་མོ་ཏིང་འཛིན་འཚོ་བ་གཅིག་བྱེད་བསམ༔ སྔགས་འཆང་པདྨའི་སྟོང་གསལ་ཟུང་འཇུག་བྱས༔ བྱས་པ་ཙམ་གྱིས་ཁོ་མོ་བསྙེན་བསྲུང་བ༔ ཁོ་མོ་འགྲོ་ལ་དགོངས་པའི་དོན་བྱེད་བསམ༔ བསམ་པ་ཙམ་གྱིས་རྫུས་སྐྱེས་དམ་ཆོས་གནང་༔ གནང་བ་ཙམ་གྱིས་ཁོ་མོ་བརྡ་ཡིག་ཕབ༔ འགྲོ་བའི་དོན་དུ་པདྨའི་སྐུ་ཆགས་ཆེ༔ སྔགས་འཆང་ཐུགས་ཞུས་ཡིན་པའི་ཞུས་ཕོད་བྱས༔ ལན་གཅིག་བྱས་ན་བསྐལ་པ་མཐའ་མ་སྐྱིད༔ འདི་འདྲ་ཡིད་བཞིན་ནོར་བུ་གང་དུ་རྙེད༔ རྙེད་པ་མཆོག་གི་བླ་མ་རིན་པོ་ཆེ༔ འདི་འདྲ་བདག་གི་དོན་རྣམས་འདི་འདྲ་འགྲུབ༔ བསམ་དོན་འདི་འདྲ་འགྲུབ་པའི་ལས་ཅན་ཡོད་པར་ངེས༔ འདི་ལྟར་བསམ་དོན་འགྲུབ་པའི་དོན་ཡོད་པའི༔ སངས་རྒྱས་འདི་འདྲ་གང་དུ་རྙེད་པ་ངོ་མཚར་ཆེ༔ མ་རྙེད་རྙེད་པ་བླ་མ་རིན་པོ་ཆེ༔ འདི་འདྲའི་བསམ་དོན་བདག་གི་འགྲུབ་རེ་དཀའ༔

ཀྱེ་མ་ཨུ་རྒྱན་ཆེན་པོ་པདྨ་འབྱུང་༔ རྙེད་པའི་དོན་ཆེན་འགྲུབ་པའི་རིན་པོ་ཆེ༔ འདི་འདྲ་མཐོང་ལམ་སྦྱོར་བའི་སཾ་བྷ་ཝ༔ ངོ་མཚར་མཆོག་གི་བླ་མ་རིན་པོ་ཆེ༔ ཁོ་མོ་བསྟེན་པའི་རྫུས་སྐྱེས་པདྨ་འབྱུང་༔ ཁོ་མོ་ལས་རྣམས་ཆེ་བའི་འདི་རྙེད་པ༔ མཁར་ཆུ་ཡུལ་ནས་བསམ་ཡས་གླིང་དུ་སོང་༔ རྫུས་སྐྱེས་དྲན་པ་ཙམ་གྱིས་བརྩོན་འགྲུས་བྱས༔ ལ་ཆེན་ཆུ་ཆེན་དྲིན་ཅན་ཤུལ་དུ་སྐྱུར༔ ཁོ་མོ་ལོ་ཉུང་བཅུ་གསུམ་དུས་ཚད་དུ༔ ས་ཐག་རིང་བས་ཁོ་ས་ཁོ་མོ་སྡུག་བསྔལ་ཆེ༔ སྡུག་བསྔལ་ཆེ་བས་ད་ཡང་འདི་ལྟར་སྐྱིད༔ འགྲོ་བའི་དོན་དུ་རྫུས་སྐྱེས་ཆོས་གཅིག་གསུངས༔ ཁོ་མོ་ཐོས་ཕྱིར་ལྡན་པའི་བརྩོན་འགྲུས་ཆེ༔ རྫུས་སྐྱེས་པདྨ་བདག་ལ་དྲིན་ཆེ་བ༔ སྔར་ཡང་དྲིན་ཅན་ད་ཡང་དྲིན་ཆེ་བ༔ ཁོ་མོ་བསྟེན་པའི་སྐྱབས་མཆིས་པདྨ་འབྱུང་༔ ཁོ་མོ་བདག་ལ་ཐུགས་རྗེས་གནང་བར་ཞུ༔ འགྲོ་བའི་དོན་ལ་དམ་པའི་ཆོས་གཅིག་གསུངས༔ ཞེས་ཞུས༔

ཨུ་རྒྱན་པདྨའི་ཞལ་ནས༔ རིགས་ཀྱི་བུ་མོ་ཉོན་དང་༔ ངས་ཁྱེད་ལ་ཚིག་འདི་ལྟར་ཐོས༔ ཨེ་མ་བདག་སོགས་འགྲོ་བ་སེམས་ཅན་མ་ལུས་པ༔ བྱང་ཆུབ་མཆོག་གི་སངས་རྒྱས་པདྨ་ང་༔ ཡོན་ཏན་ཀུན་འབྱུང་སྙིང་པོ་བཅུད་ལ་སྤྲུལ༔ འཁོར་བ་མཐར་གནས་པདྨ་འབྱུང་གནས་ང་༔ མཚོ་ཆེན་པདྨའི་སྡོང་ལས་དངོས་སུ་བསྟེན༔ མཁར་ཆུ་བུ་མོ་ཡེ་ཤེས་མཚོ་རྒྱལ་ཁྱེད༔ རྫུས་སྐྱེས་པདྨ་བདག་ལ་དངོས་སུ་བསྟེན༔ སྐྱབས་འགྲོ་སུ་བསླུ་བ་མེད་པའི་ཐུགས་རྗེ་གནང་༔ ཆུ་བོ་ལྟ་བུ་བྱིན་རླབས་ཆར་ལྟར་འབེབས༔ ཁྱེད་ལ་ཐུགས་འདི་གཏད་པའི་ཞལ་མངའ་བ༔ གྲོགས་པོ་རབ་བྱེད་བུད་མེད་མཁར་ཆུ་ཟ༔ ཤེས་རབ་སྤྲོས་པ་ཆེ་བའི་ཐབས་སྣ་ཚོགས༔ སྐྱེ་མེད་རྣམ་དག་ཆོས་སྐུའི་ཀློང་ཡངས་ནས༔ འགགས་མེད་རྣམ་དག་རྫུས་སྐྱེས་པདྨ་ང་༔ ངོ་མཚར་རྨད་བྱུང་ཇོ་མོ་མཁར་ཆུ་ཟ༔ འགྲོ་བའི་དོན་དུ་ཁྱོད་ཀྱི་གྲོགས་བྱེད་དོ༔ ཐུགས་ལ་ཆོངས་ཤིག་མི་བརྗེད་ཉམས་སུ་ལོངས༔

ༀ་ཨཱ༔ཧཱུཾ༔ དལ་འབྱོར་མི་ལུས་ཤིན་ཏུ་རྙེད་པར་དཀའ༔ ཅི་དང་གང་ལ་སྐྱེས་ཀྱང་མི་རྟག་འཆི༔ དགེ་བའི་ཆོས་བྱས་མཐོ་རིས་གནས་སུ་སྐྱེས༔ སྡིག་པའི་ལས་བྱས་ངན་སོང་གནས་སུ་ལྟུང་༔ དམྱལ་བ་ཚ་གྲང་ཡི་དྭགས་བཀྲེས་སྐོམ་དང་༔ བྱོལ་སོང་གླེན་རྨུག་ལྷ་མིན་འཐབ་རྩོད་བྱས༔ གཡེང་བའི་ཚ་གྲང་ལེ་ལོ་དཔག་ཏུ་མེད༔ མདུན་གྱི་ནམ་མཁའ་རྒྱལ་བ་འོད་དཔག་མེད༔ ཕྱོགས་བཅུའི་སངས་རྒྱས་བྱང་སེམས་རྣམས་ཀྱིས་བསྐོར༔ བདག་སོགས་གུས་པའི་སེམས་ཀྱི་སྐྱབས་སུ་མཆི༔ དགེ་རྩས་འདི་བྱས་འགྲོ་བ་ཀུན་ལ་བསྔོ༔ འགྲོ་བའི་དོན་དུ་བྱང་ཆུབ་སེམས་བསྐྱེད་དོ༔ མདུན་གྱི་ནམ་མཁའ་ཕྱོགས་བཅུའི་སངས་རྒྱས་ལ༔ དངོས་འབྱོར་ཡིད་ཀྱིས་སྤྲུལ་པའི་མཎྜལ་འབུལ༔ རང་གི་སྤྱི་བོར་ཡི་དམ་འོད་ཟེར་འཕྲོས༔ སྐུ་མདོག་དཀར་པོ་གཡས་གཡོན་རྡོར་དྲིལ་འཛིན༔ སྐུ་ལ་བདུད་རྩི་ཆུ་རྒྱུན་ལྟེམ་གྱིས་གང་༔ མཐར་ནི་རྡོ་རྗེ་སེམས་དཔའ་རང་ལ་ཐིམ༔ རང་ཉིད་རྡོར་སེམས་སྐུ་མདོག་དཀར༔ ཐུགས་ལས་འོད་འཕྲོས་སེམས་ཅན་བྱང་ཆུབ་ཐོབ༔ བདག་གི་སྤྱི་གཙུག་ཕྱོགས་བཅུའི་སངས་རྒྱས་ལ༔ བྱང་ཆུབ་སེམས་དཔའ་རྣམས་ཀྱིས་བསྐོར་ནས་བཞུགས༔ རང་གི་མོས་པའི་རྩེ་གཅིག་གསོལ་བ་ཐོབ༔ ཨེ་བླ་མ་མཁྱེན་ནོ༔ དྲིན་ཅན་བླ་མའི་སྐུ་ལ་འོད་ཟེར་ལྔ་འཕྲོས་བདག་གི་ལུས་ངག་ཡིད་གསུམ་ལ་ཐིམ༔ སྐུ་གསུང་ཐུགས་ཀྱི་དངོས་གྲུབ་སྩོལ༔

ཨོཾ་ཨཱ༔ཧཱུྃ༔ བཛྲ་གུ་རུ་པདྨ་སིདྡྷི་ཧཱུྃ༔ བླ་མེད་མཆོག་གི་དངོས་གྲུབ་སྩོལ༔ དཔལ་ལྡན་བླ་མ་སྐུ་ཁམས་བཟང་བ་དང་༔ ཕྲིན་ལས་རྣམ་དག་ལྷུན་གྱིས་གྲུབ་པ་དང་༔ དར་ཞིང་རྒྱས་པ་འདུ་འབྲལ་མེད་པར་ཤོག༔ མཁར་ཆུ་ཟ་ཡི་ཐུགས་ལ་ཞོག༔ མ་འོངས་བུ་སློབ་ཡིད་ལ་འཆོངས༔ པདྨ་ཆེན་པོ་ང་ལ་གསོལ་བ་ཐོབ༔ དེ་ཕྱིར་སྙིང་གི་གནས་སུ་གཅེས༔ ཞེས་གསུངས༔ ཡེ་ཤེས་མཚོ་རྒྱལ་ཞུས་པ༔ ལགས་ཨུ་རྒྱན་རིན་པོ་ཆེ༔ འཇིག་རྟེན་འདི་ནས་མི་རྟག་ལས་འོང་བ༔ ཐབས་བཀའ་སྩལ་པ༔ ཆོས་འདིའི་བརྒྱུད་པ་དང་༔ ཁྱེད་ཕ་རྒྱུད་ཀྱི་བླ་མ་འདི་ལྟར་གང་ཡིན་གསུངས༔ བདག་མཁར་ཆུ་ཟས་ཉམས་སུ་ལོངས་དང་༔ བླངས་ནས་འགྲོ་བའི་དོན་བྱའོ༔ ཞེས་ཞུས༔ ཨུ་རྒྱན་གྱི་ཞལ་ནས༔ ཕ་རྒྱུད་གཉིས་མེད་ཆོས་ཀྱི་སྐུ༔ ཀུན་ཏུ་བཟང་པོ་རྒྱལ་བ་རིགས་ལྔ༔ ཆོས་སྐུ་སྣང་བ་མཐའ་ཡས༔ ལོངས་སྐུ་སྤྱན་རས་གཟིགས༔ རྒྱལ་བ་ཤཱཀྱ་ཐུབ་པ༔ སྤྲུལ་སྐུ་པདྨ་འབྱུང་གནས་དེ་རྣམས་བརྒྱུད༔ རྡོ་རྗེ་སེམས་དཔའ་ནི་རིག་འཛིན་རྣམ་པ་བརྒྱད་ཀྱི་བཀའ་སྩལ་པའི་ཐབས་ཅི་ལྟར་ཡིན༔ ཞེས་གསུངས༔ ཡེ་ཤེས་མཚོ་རྒྱལ་ཞལ་ནས༔ ལགས་ཨུ་རྒྱན་རིན་པོ་ཆེ༔ མ་འོངས་ཀྱི་དུས་ན་ཐབས་མི་མང་བ་དོན་མང་ལ་ཚིག་ཉུང་བ་གཅིག་གནང་ཞུས༔ ཨུ་རྒྱན་གྱི་ཞལ་ནས༔ འདིར་ཆོས་ཐམས་ཅད་ཀྱི་བཅུད་ༀ་གུ་རུ་བྷུདྡྷ་དྷརྨཱ་སརྦ་ཧཱུཾ༔ ཞེས་བརྗོད་པའི་དོན་སྐབས་མཆིས༔ དེར་དོན་མང་བའི་ཆོས་ཡིན་ནམ༔ ཐབས་བྱའོ༔ ཞེས་གསུངས༔ ཡེ་ཤེས་མཚོ་རྒྱལ་ཞལ་ནས༔ ཨེ་མ་ཧོ་མཁའ་ལྟར་དག་པ་བྱང་ཆུབ་ཆོས་ཀྱི་སྐུ༔ དམིགས་པ་མེད་པ་ཆོས་ཀྱི་དབྱིངས་ཉིད་དུ༔ དོན་དམ་སྤྲོས་བྲལ་གཉིས་མེད་ཆོས་ཀྱི་རྗེ༔ རྫུས་སྐྱེས་པདྨའི་སྐུ་ལ་ཕྱག་འཚལ་བསྟོད༔ ན་མོ་གུ་རུ༔ རྗེ་བླ་མ་རྣམས་ལ་ཕྱག་འཚལ་བསྟོད༔ སྒོས་བཀའ་དྲིན་རྩ་བའི་ཞབས་ལ་འདུད༔ ཚེ་འདིར་བདག་གིས་ཆོས་ལ་མོས༔ མོས་བློས་རྩ་བ་མཆོག་གི་སྐུ༔ དྲིན་ཅན་སྤྲུལ་པའི་སྐུ་ལ་འདུས༔ བཀའ་རྒྱུད་བླ་མ་རིན་པོ་ཆེ༔ བསྒྲུབ་རྒྱུད་བླ་མ་ཆོས་ཀྱི་རྗེ༔ ཁོ་མོ་བདག་ལ་ཐུགས་རྗེས་ཟུངས༔ ནན་ཏན་ཅན་ལ་ཆོས་གསུངས་ཤིག༔ ང་ལ་རེག་ཅིང་དཔའ་བོ་ཁྱོད༔ སྐད་གཉིས་སྨྲ་བའི་དམ་པའི་ཆོས་འཛིན་པ༔ འགྲོ་བའི་དོན་ལ་གང་འདུལ་མཉེས་མཛད་པ༔ སྔགས་འཆང་པདྨའི་སྤྱན་སྔར་མདུན་དག་ཏུ༔ ཁོ་མོ་ཞེ་བློ་བདེ་བའི་བཀའ་འདི་བགྱིས༔ སྔགས་འཆང་རིག་འཛིན་ཆེན་པོས་བཀའ་སྩལ་པ༔ ཚིགས་སུ་ཐོས་པའི་དམ་ཆོས་དངོས་འདི་འཆང་༔ དམ་ཚིག་རྗེས་སུ་བཟུང་བའི་ཐབས་ཤེས་ལྡན༔ བཀའ་བབས་རྒྱུད་བཅས་སྔགས་འཆང་ཆེན་པོ་རྣམས༔ ཁོ་མོ་བདག་ལ་དྲིན་ཆེན་འདི་ལྟར་བཀའ༔ ཆོས་སྐྱོང་རྒྱལ་པོ་ཁམས་གསུམ་དབང་དུ་བསྡུས༔ མ་ལུས་འདུལ་ཕྱིར་མཚོ་སྐྱེས་རྡོ་རྗེ་ལ༔ ཁོ་མོ་བདག་གིས་དད་གུས་གསོལ་བ་བཏབ༔ འགྲོ་བའི་དོན་ལ་ཐུགས་རྗེས་གཟིགས་པར་ཞུ༔ ཞེས་ཞུས༔ ཀྱཻ་སློབ་དཔོན་ཆེན་པོ་ལགས༔ ང་མཁར་ཆུ་ཟ་འདི་བློ་དམན་ལ་ཁྱེད་ཐུགས་རྗེ་གནང་བ་འདི་ལྟར་ཤེས་རབ་ཆེ་བ་གཅིག་ཡོང་ལགས༔ མ་འོངས་འགྲོ་བའི་དོན་ལ་ཕན་པ་གཟིགས༔ རྫུས་སྐྱེས་པདྨའི་བདག་ལ་བཀའ་དྲིན་ཆེ༔ འགྲོ་ལ་བརྩེ་བའི་ཐུགས་རྗེས་དགོངས་སུ་གསོལ༔ བདག་ལ་ཞུ་ཚུལ་གུ་རུའི་དངོས་གྲུབ་སྩོལ༔ རྒྱས་ཚུལ་རཏྣ་དྲག་པོའི་དངོས་གྲུབ་སྩོལ༔ དབང་ཚུལ་གུ་རུ་མཆོག་གི་དངོས་གྲུབ་སྩོལ༔ དྲག་པོའི་ཚུལ་གྱིས་ཕྲིན་ལས་དངོས་གྲུབ་སྩོལ༔ ཁོ་མོ་རེ་ས་རྫུས་སྐྱེས་པདྨ་འབྱུང་༔ སྣང་སྲིད་རྣམ་དག་ཆོས་སྐུའི་ཀློང་ཡངས་ནས༔ ཟབ་གཏེར་མངའ་བདག་ཨུ་རྒྱན་པདྨ་འབྱུང་༔ སྙིགས་དུས་འགྲོ་མགོན་བུ་རྣམས་དོན་ཆེད་དུ༔ དཀའ་བ་ཆོས་ཀྱི་བསྟན་པའི་རྗེས་སུ་སྐྱོངས༔ བདག་ལ་ཐུགས་རྗེས་ཟུངས་ཤིག་ཞུ་བ་ཕུལ༔ ཞེས་ཞུས༔ པདྨའི་ཞལ་ནས༔ རིགས་ཀྱི་བུ་མོ་རྡོ་རྗེ་ཐོད་ཕྲེང་རྩལ་བཞིའི་དངོས་གྲུབ་གནང་༔ གསུངས་ནས༔ ལུས་ཐམས་ཅད་རྡོ་རྗེ་ཐོད་ཕྲེང་རྩལ་བཞིའི་སྐུར་སྟོན་ནས༔ ཐབས་ཤེས་ཟུངས་འཇུག་གི་རྒྱས་པའི་ཐབས་མི་དམིགས༔ དེ་ལྟར་དངོས་གྲུབ་གནང་༔ ཁྱོད་ལ་དངོས་གྲུབ་གནང་བ་ལས་ཅན་དོན༔ ཞེས་གསུངས་ནས༔ ཡེ་ཤེས་མཚོ་རྒྱལ་ལན་རེ་གཟུགས་དང་ལྡན་པ་དེ་ལྟར་གྱི་ཐབས་བྱའོ༔

ཨུ་རྒྱན་གྱི་ཞལ་ནས༔ ཨེ་མ་མ་བསྒོམ་བྱིན་རླབས་ཡོད་པའི་གདམས་ངག་འདི༔ སྔགས་འཆང་ང་ལ་ཡོད་དེ་ཁྱོད་ལ་གནང་༔ གནང་བ་ཙམ་གྱིས་མ་འོངས་འགྲོ་བའི་དོན༔ རབ་ཏུ་བྱུང་མཛད་ཐུགས་རྗེའི་གདམས་ངག་འདི༔ སྔགས་འཆང་ང་ལ་ཡོད་དེ་ཁྱོད་ལ་སྟེར༔ སྟེར་བ་ཙམ་གྱིས་ཡིད་ལ་ཆོངས་༔ མི་བརྗེད་ཉམས་སུ་བླངས་བར་བྱ༔ ཡེ་ཤེས་མཚོ་རྒྱལ་ཐུགས་ལ་ཞོག༔ ཅེས་གསུངས༔ མཚོ་རྒྱལ་ཞལ་ནས༔ ལགས་ཨུ་རྒྱན་རིན་པོ་ཆེ༔ མ་འོངས་བུ་སློབ་དོན་དུ་ཆོས་གཅིག་གསུངས༔ ཞེས་ཞུས༔ ཨེ་མ་ཧོ༔ མཁའ་ལྟར་དག་པའི་བྱང་ཆུབ་ཆོས་ཀྱི་སྐུ༔ རྒྱ་གར་སྔགས་འཆང་གྲུབ་ཆེན་པདྨ་འབྱུང་༔ ཁོ་མོ་མཚོ་རྒྱལ་བདག་གིས་ཞུ་རྟེན་ཕུལ༔ གནས་པ་ཆོས་སྐུ་རྣམ་དག་ཨུ་རྒྱན་ལ༔ འགྱུ་བ་ལོངས་སྐུ་ལྟ་བུའི་ཞུ་རྟེན་ཕུལ༔ རིག་པ་དྲི་མེད་ལྟ་བུའི་འགྲོ་ལ་དགོངས༔ བདེ་བ་ཆོས་ཀྱི་སྐུ་ཡི་བླ་མ་ལ༔ གསལ་བ་ལོངས་སྤྱོད་རྫོགས་པའི་ཞུ་རྟེན་ཕུལ༔ མི་རྟག་ཆོས་སྐུ་གྲོལ་བའི་འགྲོ་ལ་དགོངས༔ གཞི་རྫོགས་སངས་རྒྱས་ལྟ་བུའི་བླ་མ་ལ༔ ལར་དམ་པ་ཆོས་ཉིད་ལྟ་བུའི་ཞུ་རྟེན་ཕུལ༔ འབྲས་བུ་རེ་དོགས་མེད་པའི་འགྲོ་ལ་དགོངས༔ སྣང་བྱེད་ཆོས་སྐུ་ལྟ་བུའི་བླ་མ་ལ༔ ཉེ་བར་རང་ས་ཞུ་བའི་ཞུ་རྟེན་ཕུལ༔ སེམས་ཉིད་གཅིག་ཏུ་འདུས་པའི་འགྲོ་ལ་དགོངས༔ ཆོས་སྐུ་སྟོང་པ་ལྟ་བུའི་བླ་མ་ལ༔ གསལ་བ་ལོངས་སྤྱོད་རྫོགས་པའི་ཞུ་རྟེན་ཕུལ༔ སྤྲུལ་སྐུ་ཀ་དག་གྲོལ་བའི་འགྲོ་ལ་དགོངས༔ ཆོས་སྐུ་ནམ་མཁའ་ལྟ་བུའི་བླ་མ་ལ༔ རྗེ་ཤུལ་སྐར་རྗེན་ལྟ་བུའི་ཞུ་རྟེན་ཕུལ༔ སྐྱེ་འགགས་གཉིས་མེད་ལྟ་བུའི་འགྲོ་ལ་དགོངས༔ དབྱིངས་ཆེན་ཀ་དག་ལྟ་བུའི་བླ་མ་ལ༔ ཡེ་ཤེས་ཐབས་ཀྱིས་སྤྱོད་པའི་ཞུ་རྟེན་ཕུལ༔ རྣམ་དག་ཆོས་ཀྱི་དབྱིངས་ཀྱི་འགྲོ་ལ་དགོངས༔ ཐབས་ཤེས་ནམ་མཁའ་ལྟ་བུའི་བླ་མ་ལ༔ ཤེས་རབ་ཡུམ་ཆེན་ལྟ་བུའི་ཞུ་རྟེན་ཕུལ༔ གཉིས་མེད་རྣམ་དག་ཆོས་སྐུ་འགྲོ་ལ་དགོངས༔ ཆོས་དབྱིངས་ནམ་མཁའ་ལྟ་བུའི་བླ་མ་ལ༔ མེ་ལོང་ཡེ་ཤེས་ལྟ་བུའི་ཞུ་རྟེན་ཕུལ༔ མཉམ་ཉིད་ཡེ་ཤེས་ལྟ་བུའི་འགྲོ་ལ་དགོངས༔ སོར་རྟོགས་ཡེ་ཤེས་ལྟ་བུའི་འགྲོ་དོན་གྱིས༔ བྱ་གྲུབ་ཡེ་ཤེས་ལྟ་བུའི་གནས་ལུགས་བྱེད༔ དུག་ལྔ་རང་སར་ཞུ་བའི་འགྲོ་ལ་དགོངས༔ སྣང་བ་ཆོས་ཀྱི་སྐུ་ཡི་བླ་མ་ལ༔ རིག་པ་དྲི་མེད་ལྟ་བུའི་ཞུ་རྟེན་ཕུལ༔ སྟོང་གསལ་འཁོར་འདས་ལྟ་བུའི་འགྲོ་ལ་དགོངས༔ རྣམ་དག་ཆོས་སྐུ་ལྟ་བུའི་བླ་མ་ལ༔ ཆུ་བོ་ལྟ་བུའི་ཞུ་རྟེན་ཕུལ༔ ཆུ་སྐོར་ལྟ་བུའི་འགྲོ་ལ་ཐུགས་རྗེས་གཟིགས༔ ཉི་མ་ལྟ་བུའི་བླ་མ་ལ༔ ཉི་ཟེར་ལྟ་བུའི་ཞུ་རྟེན་ཕུལ༔ ཕྱོགས་རིས་མེད་པར་འགྲོ་ལ་དགོངས༔ ཆོས་སྐུའི་ལྟ་བུའི་བླ་མ་ལ༔ ལོངས་སྐུ་ལྟ་བུའི་ཞུ་རྟེན་ཕུལ༔ སྤྲུལ་སྐུ་ལྟ་བུའི་འགྲོ་ལ་དགོངས༔ འབྲས་བུ་ལྟ་བུའི་བུ་སློབ་སྐྱོངས༔ རང་རིག་ཆོས་སྐུ་བླ་མ་ལ༔ སྣང་བ་དཀར་དམར་ཞུ་རྟེན་ཕུལ༔ སྣང་སེམས་འདྲེས་པའི་འགྲོ་ལ་དགོངས༔ མེ་ལོང་ལྟ་བུའི་བླ་མ་ལ༔ གཟུགས་བརྙན་ལྟ་བུའི་ཞུ་རྟེན་ཕུལ༔ སྤྲོས་དང་བྲལ་བའི་འགྲོ་ལ་དགོངས༔ ནམ་མཁའི་ལྟ་བུའི་བླ་མ་ལ༔ ཉི་ཟླ་ལྟ་བུའི་ཞུ་རྟེན་ཕུལ༔ ཕྱོགས་རིས་མེད་པའི་འགྲོ་ལ་དགོངས༔ རྣམ་རྒྱལ་ལྟ་བུའི་བླ་མ་ལ༔ བུ་རམ་ལྟ་བུའི་ཞུ་རྟེན་ཕུལ༔ སྙེམས་ཐག་ཆོད་པའི་འགྲོ་ལ་དགོངས༔ རྡོ་རྗེ་ལྟ་བུའི་བླ་མ་ལ༔ འཕོ་འགྱུར་མེད་པའི་ཞུ་རྟེན་ཕུལ༔ རང་འོད་གསལ་བའི་འགྲོ་ལ་དགོངས༔ ཆུ་བོ་ལྟ་བུའི་བླ་མ་ལ༔ ཆུ་བྲན་ལྟ་བུའི་ཞུ་རྟེན་ཕུལ༔ དགོངས༔ གངས་དཀར་ལྟ་བུའི་བླ་མ་ལ༔ རྩི་ཤིང་ལྟ་བུའི་ཞུ་རྟེན་ཕུལ༔ སེང་གེ་ལྟ་བུའི་འགྲོ་ལ་དགོངས༔ གཞོན་ནུ་ལོ་བརྒྱད་མདངས་ལྡན་པ༔ ཁོ་མོའི་ལུས་འདི་ཞུ་རྟེན་ཕུལ༔ ཆོས་གཅིག་གསུངས་པའི་འགྲོ་ལ་དགོངས༔ ཁྱེའུ་ཆུང་ལོ་ལྔའི་གཟི་བརྗིད་ལ༔ དར་དཀར་འདི་ལ་ཞུ་རྟེན་ཕུལ༔ འགྲོ་ལ་བརྩེ་བའི་ཐུགས་རྗེས་དགོངས༔ རྒྱ་གར་པཎྜི་ཨ་ཙ་ར༔ གསེཪ་སྲང་འདི་ཡི་ཞུ་རྟེན་ཕུལ༔ མུན་པ་སེལ་བའི་འགྲོ་ལ་དགོངས༔ རྫུས་སྐྱེས་ཆེན་པོ་པདྨ་ལ༔ དབང་པོ་རྣམ་ལྔ་ཞུ་རྟེན་ཕུལ༔ ཚ་གདུང་ནད་སེལ་འགྲོ་ལ་དགོངས༔ སྨན་མཆོག་ལྟ་བུའི་ཨུ་རྒྱན་ལ༔ སྨན་ཡོན་ལྟ་བུའི་ཞུ་རྟེན་ཕུལ༔ ནད་དུ་སེལ་བའི་འགྲོ་ལ་དགོངས༔ རྫུས་སྐྱེས་སྔགས་འཆང་པདྨ་ལ༔ ཡེ་ཤེས་མཚོ་རྒྱལ་ཞུ་རྟེན་ཕུལ༔ འགྲོ་ལ་ཆོས་རྣམས་གསུངས་པར་དགོངས༔ སྤྲུལ་སྐུ་ཆེན་པོ་མཚོ་སྐྱེས་རྡོ་རྗེ་ལ༔ མཁར་ཟ་ཡེ་ཤེས་མཚོ་རྒྱལ་ཞུ་རྟེན་ཕུལ༔ མ་འོངས་བུ་སློབ་དོན་དུ་འགྲོ་ལ་དགོངས༔ ཕྱི་ནང་གསང་གསུམ་དག་གིས་ཞུ་རྟེན་ཕུལ༔ ཁོ་མོ་ལུས་ལ་གཅེས་པ་སྙིང་ཡིན་པའི༔ སྙིང་གི་དྭངས་མའི་ཞུ་རྟེན་ཕུལ༔ འགྲོ་བའི་དོན་དུ་ཆོས་གཅིག་གསུངས༔ རྫུས་སྐྱེས་པདྨའི་སྐུ་ལ་དེ་ལྟར་ཞུ༔ ཞེས་ཞུས༔

པདྨའི་ཞལ་ནས༔ ཉོན་ཅིག་སྐལ་ལྡན་མཁར་ཆུ་ཟ༔ དམ་པའི་ཆོས་ཀྱི་དབུ་འཛུགས་པ༔ མ་འོངས་བུ་སློབ་མཐའ་སྐྱོང་བ༔ ཆོས་རིགས་མི་འདྲ་ཆོས་སྐོར་བརྒྱ་སྟོང་ཁྲི༔ ཡེ་ཤེས་མཚོ་རྒྱལ་ཐུགས་ལ་ཞོག༔ ཆོས་རྣམས་མ་ལུས་འགྲོ་བའི་དོན་དུ་མཛད༔ རྒྱལ་བ་ཀུན་ཏུ་བཟང་པོ་གཞི་བྱ་བ༔ བསྟན་པ་མཆོག་གི་ངོ་མཚར་རྨད་དུ་བྱུང་༔ འཇིག་རྟེན་འདི་ན་མྱུར་དུ་སངས་རྒྱས་ཐོབ༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ ཁྱོད་ཀྱི་སྙིང་འདྲ་བདག་ལ་ཕུལ་ཙམ་ན༔ བདག་གི་སྙིང་འདྲ་གོ་ཆ་ལྷ་ལྔ་ནི༔ ལུས་ལ་གཅེས་པའི་ཁྱེད་ལ་གནང་༔ མ་འོངས་བུ་སློབ་དོན་དུ་འཆོངས༔ དེ་ལྟར་ཉམས་ལོངས་མཁར་ཆུ་མཚོ་རྒྱལ་ཉོན༔ ཞེས་གསུངས༔ ཤོག་དྲིལ་ཕེབས་པ༔ རྒྱ་ཤོག་གསང་ཤོག་རྒྱ་ཡིག་དག་ལ་བྱས༔ རྒྱ་སྨུག་རྒྱ་སྣག་ལན་ཙ་དག་ལས་བྱས༔ བཀའ་ཤོག་གསང་ཤོག་བཀའ་ཡིག་དག་ལ་བྱས༔ གསང་སྒྲོམ་ལྕགས་སྒྲོམ་མི་མིན་ས་ཡི་སྒྲོམ༔ རྒྱ་ཤོག་དག་ལ་རྒྱ་སྣག་བརྒྱན་པའི་གནས༔ གསང་ཤོག་དག་ལ་རྒྱ་སྣག་དེ་ཡིས་བྲིས༔ བཀའ་གཏེར་གསང་གཏེར་འདི་བྱས་འགྲོ་བའི་དོན༔ བཀའ་ཡིག་གསང་ཡིག་རྒྱ་ཡིག་མང་པོ་བྱས༔ བཀའ་དྲིལ་ཤོག་དྲིལ་གསང་དྲིལ་རྒྱ་དྲིལ་བྱས༔ རྒྱ་ཡིག་ལན་ཙ་གསང་བའི་སྦས་སུ་བྱས༔ བཀའ་ཤོག་སྦས་ཤོག་གསང་ཤོག་གནས་ཤོག་བྱས༔ ཞིང་ལྤགས་བོད་ཤོག་ཁམས་ཤོག་རྒྱ་ཤོག་བྱས༔ བཀའ་དྲིལ་གསང་དྲིལ་གནས་དྲིལ་རྒྱ་སྣག་བྱས༔ བཀའ་ཤོག་ལན་ཙ་ཆུ་ཡི་སྙིང་པོ་བྱས༔ གསེར་སྒྲོམ་དངུལ་སྒྲོམ་ར་གན་ལྕགས་ཀྱི་སྒྲོམ༔ མུ་མེན་བྱི་རུ་དུང་དང་ས་ཡི་སྒྲོམ༔ སྒྲོམ་བུ་མི་རིགས་མི་འདྲ་རྣམ་པ་བརྒྱ༔ སྐུ་གཏེར་གསུང་གཏེར་ཐུགས་གཏེར་ནོར་གྱི་གཏེར༔ གཏེར་སྒྲོམ་མཛད་པའི་བརྡ་ཕྱིར་ལས་ཅན་དོན༔ གཏེར་སྒྲོམ་མི་འདྲ་རྣམ་མང་ལས་བྱས་པ༔ ཆོས་སྐོར་མི་འདྲ་འབུམ་འབུམ་གནས་པར་འགྱུར༔ ཚོགས་བརྒྱད་ཡིད་ཀྱི་བརྡ་རྣམས་ལྔ་ལ་གནས༔ མ་འོངས་བུ་སློབ་དོན་དུ་བརྡ་ཕྱིར་བཀོད༔ ཡེ་ཤེས་མཚོ་རྒྱལ་ཉམས་སུ་ལོངས་ཞེས་གསུངས༔ ཡེ་ཤེས་མཚོ་རྒྱལ་ཞལ་ནས༔ འདི་རྣམས་གང་དུ་སྦས་པ་ཡིན༔ ཆོས་འདི་གང་ལ་སྦས་པ་ཡིན༔ ཆོས་བདག་གང་ལ་གཏད་པ་ཡིན་ལགས་ཞུས༔

ཨུ་རྒྱན་ཞལ་ནས༔ ཉོན་ཅིག་སྐལ་ལྡན་མཁར་ཆུ་ཟ༔ ལྷོ་བྲག་མཁར་ཆུ་གསང་རྫོགས་སྦས༔ འཆིངས་ཕུག་སྔས་སུ་བཀའ་རྫོགས་སྦས༔ ཐུགས་རྗེས་འགྲོ་བ་འདྲེན་མཛད་པ༔ ཏིལ་གནས་ཁམས་གསུམ་ངན་སྔགས་སྦས༔ དབུལ་ཕུང་སེལ་འདོད་བྲག་སྟོད་ནོར་གཏེར་སྦས༔ ཞག་སྟོད་ཏི་གྲོ་ལྷོ་བྲག་མཁར་ཡུལ་གནས༔ ལྷོ་བྲག་གནས་ལུང་བར་ཡུལ་གནས་ཚངས་ནས༔ སྲིན་མོ་སྦར་ཟའི་དམྱལ་སྨད་དགེ་རི་བྲག༔ མི་མིན་བྱ་རོག་ཁ་གདུང་གནས་ཡུལ་དུ༔ དེ་ལྟར་ཆོས་གཏེར་ནོར་གཏེར་སྦས༔ སྐུ་གཏེར་ངན་སྔགས་ཐམས་ཅད་དེ་ལ་སྦས༔ ལྷོ་གཏེར་ནུབ་གཏེར་བྱང་གཏེར་ཐམས་ཅད་སྦས༔ ཕྱོགས་མཚམས་གནས་བཅས་ཐམས་ཅད་གཏེར་དུ་སྦས༔ ཚ་བ་སེལ་བྱེད་བོད་ཀྱི་ཞིང་ཁམས་སུ༔ རི་བྲག་གནས་སུ་ང་ཡི་གཏེར་ཁ་རེ༔ གཏེར་ཁ་དཔག་མེད་བྱེ་བྲག་དཔག་མེད་སྦས་པ་གྱིས༔ ལྷ་སྲིན་སྡེ་བརྒྱད་རྣམས་ལ་བཀའ་བསྲུང་གཏད༔ དམ་ཆོས་རྒྱལ་བ་བཀའ་འདུས་འབྲས་གཞོང་སྦས༔ ཆོས་གཏེར་སྐུ་གཏེར་ནོར་གཏེར་བྲམ་ཟེ་ཤ༔ གཏེར་ཁ་མི་འདྲ་དཔག་མེད་གཏེར་དུ་སྦས༔ དབང་བསྡུས་ཟིལ་གནོན་འཕང་བས་སྡེ་བརྒྱད་བཀུག༔ རང་ས་གནས་སུ་བཀའ་སྲུང་རྣམས་ལ་གཏད༔ མཁར་ཟ་ཡེ་ཤེས་མཚོ་རྒྱལ་ཉོན༔ ཡིད་ལ་ཟུངས་ཤིག་མ་འོངས་བུ་སློབ་དོན༔ ཞེས་གསུངས༔ ཡེ་ཤེས་མཚོ་རྒྱལ་མཎྜལ་ཕུལ་ནས་ཞུས༔ ལགས་ཨུ་རྒྱན་རིན་པོ་ཆེ༔ གཏེར་འདི་རྣམས་ནམ་དུ་དར༔ ཆོས་བདག་གང་དུ་ཡོད༔ དུས་ཚད་ཅི་འདྲ་ཡོང་སྲིད་ལགས་ཞུས༔ ཨུ་རྒྱན་གྱི་ཞལ་ནས༔ ཉོན་ཅིག་སྐལ་ལྡན་མཁར་ཆུ་ཟ༔ ནད་ཡམས་དུས་རྣམས་འབྱུང་བའི་ས་གནས་ན༔ ཞོག་ཏིལ་གནས་ན་སྐྱེས་བུ་སྙིང་སྟོབས་ཅན༔ ང་དང་མཐུན་པའི་སྐྱེས་བུ་གུས་པ་ཅན༔ དགེ་སློང་ནམ་མཁའི་སྙིང་པོའི་སྤྲུལ་པ་ནི༔ སྔགས་འཆང་སངས་རྒྱས་བླ་མ་ཞེས་བྱ་བ༔ ལྷོ་ཕྱོགས་གནས་ན་གཏེར་ཁ་བརྒྱ་ལྔ་བཅུ༔ དྲུག་བཅུ་གཅིག་གི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཐུགས་ལ་ཞོག༔ དུག་དང་ཚ་བའི་ནད་རྣམས་འབྱུང་བའི་དུས༔ སྨད་ཚངས་གནས་ན་སྐྱེས་བུ་སྙིང་སྟོབས་ཅན༔ ང་དང་མཚུངས་པའི་སྐྱེས་བུ་སྔགས་དང་ལྡན༔ སངས་རྒྱས་ཡེ་ཤེས་སྤྲུལ་པ་ནི༔ སྔགས་འཆང་བདེ་ཆེན་ཞེས་ནི་བྱ་བ་འབྱུང་༔ བར་གཏེར་དབང་བའི་གཏེར་ཁ་ལྔ་བཅུ་གནས༔ ལྔ་བཅུ་ང་ལྔའི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཐུགས་ལ་ཞོག༔ ཁྲུ་བྱེད་དཔོན་པོ་བླ་ས་བཙུད་པའི་དུས༔ ནུབ་གླིང་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་སྔགས་འཆང་གུས་པ་ཅན༔ ཆོས་རྒྱལ་སྤྲུལ་པ་བུམ་བྱེད་ཅེས་བྱ་བ༔ འབྲས་ཚུལ་གནས་ན་གཏེར་ཁ་ཉི་ཤུ་དབང་༔ བཞི་བཅུ་ལྔ་ཡི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ སྟོད་ཧོར་ནང་འཁྲུག་མང་བྱེད་དུས༔ རྐོང་སྨད་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་སྐྱེས་བུ་སྔགས་དང་ལྡན༔ བྷེ་བུ་སྤྲུལ་པ་མངའ་བྱེད་ཅེས་བྱ་བ༔ རྐོང་གནས་གཏེར་ཁ་ལྔ་བཅུ་མཐའ་ལ་གནས༔ བདུན་བཅུའི་བར་དུ་ཚེ་ཡི་དུས་བྱེད་དོ༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ ཇག་དཔོན་གནས་མལ་བཤིག་པའི་དུས་འབྱུང་དུས༔ རྐོང་ཡུལ་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ རྒྱལ་བ་མཆོག་དབྱངས་གུ་རུ་ཞེས་བྱ་འབྱུང་༔ ཕྱི་བྲག་གནས་ནས་གཏེར་ཁ་སུམ་ཅུ་དབང་༔ སུམ་ཅུ་དྲུག་གི་བར་དུ་ཚེས་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ དུས་རྣམས་སྤྱོད་གནས་སྤྱི་དཔོན་བྱེད་པའི་དུས༔ ཞོག་སྟོད་གནས་ནས་སྐལ་ལྡན་སྙིང་སྟོབས་ཅན༔ ང་དང་དུས་མཚུངས་གཞོན་ནུ་སྔགས་དང་ལྡན༔ རྒྱལ་བའི་བློ་གྲོས་སྤྲུལ་པ་དབང་མཆོག་ཅེས༔ ཞོག་སྟོད་གནས་ན་གཏེར་ཁ་ཉེར་ལྔ་དབང་༔ ལྔ་བཅུ་རྩ་དྲུག་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ ནད་མུག་མུ་སྟེགས་སྲིན་པོ་དར་བའི་དུས༔ ཏིལ་སྨན་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ རྒྱལ་བའི་དབང་ཕྱུག་སྤྲུལ་པ་བསམ་གཏན་ཞེས༔ ཏིལ་སྨན་གཏེར་ཁ་དྲུག་ཅུ་རྩ་ལྔ་དབང་༔ བརྒྱ་ཅུ་རྩ་ལྔའི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཐུགས་ལ་ཞོག༔ མཐའ་དམག་ཤིན་ཏུ་དར་བའི་གནས་ཚངས་ནས༔ ཞོག་སྨན་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ དཔལ་གྱི་དབང་ཕྱུག་སྤྲུལ་པ་ནི༔ སྔགས་འཆང་རིག་འཛིན་ཆེན་པོ་ཞེས་བྱ་འབྱུང་༔ ཞོག་སྟོད་གནས་ནས་གཏེར་ཁ་བཅོ་ལྔ་དབང་༔ སུམ་ཅུའི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ དུག་རྣམས་དགྲ་བཅོམ་གནས་པའི་ས་རྣམས་ནི༔ ཏིལ་སྟོད་གནས་སུ་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ སོག་པོ་ལྷ་དཔལ་སྤྲུལ་པ་བྱང་ཆུབ་གླིང་༔ ཏིལ་སྟོད་གནས་ནས་གཏེར་ཁ་བཅོ་བརྒྱད་དབང་༔ ཉི་ཤུ་ལྔ་ཡི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ མངའ་བདག་དགྲ་བཅོམ་དམག་རྒོད་དར་བའི་དུས༔ ཞོག་ཏིལ་གནས་སུ་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ ཁྱེའུ་ཆུང་སྤྲུལ་པ་བསོད་ནམ་གླིང་པ་ཞེས༔ ཞོག་ཏིལ་གནས་ནས་གཏེར་ཁ་བཅུ་ལ་དབང་༔ ཉི་ཤུ་བཞིའི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཐུགས་ལ་ཞོག༔ ཡར་སྐྱོད་ལྡེམ་གྱི་ས་མཁན་བྱེད་པའི་དུས༔ གནས་ལུང་དུས་ན་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ དགའ་བ་དཔལ་གྱི་སྐྱེ་བ་བསམ་འགྲུབ་གླིང་༔ གནས་ལུང་ཕྱོགས་ནས་གཏེར་ཁ་བཅོ་ལྔ་དབང་༔ སུམ་ཅུ་ལྔ་ཡི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ མི་དུག་ཁྱི་ཤ་དུག་དགྲ་ལང་བའི་དུས༔ རྐོང་སྨད་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ འོ་བྲན་སྤྲུལ་པ་རྒྱལ་གླིང་ཞེས་བྱ་བ༔ རྐོང་སྨད་གནས་ན་གཏེར་ཁ་བཅུ་བཞི་དབང་༔ བཅུ་དགུའི་དུས་སུ་ཚེ་ཡི་དུས་བྱེད་དོ༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ དགྲ་རྣམས་བཅོམ་མཛད་མཐུ་ཁ་བཀྱེ་བའི་དུས༔ དྭགས་སྟོད་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ དཔལ་གྱི་ཡེ་ཤེས་སྤྲུལ་པ་གནས་བཅས་པ༔ བྱང་ཆུབ་ཐུགས་རྗེས་ཞེས་ནི་བྱ་བ་འབྱུང་༔ དྭགས་སྟོད་གནས་སུ་གཏེར་ཁ་བཞི་བཅུ་དབང་༔ བཞི་བཅུའི་གནས་སུ་ཚེ་ཡི་དུས་བྱེད་དོ༔ མཁའ་ཟ་ཡེ་ཤེས་མཚོ་རྒྱལ་ཉམས་སུ་ལོངས༔

མཁར་ཁང་ས་བང་གནས་ནི་བརྩིགས་པའི་དུས༔ ནུབ་གླིང་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ དཔལ་གྱི་བསོད་ནམས་སྤྲུལ་པ་ཞེས་བྱ་བ༔ ཨུ་རྒྱན་བསྟན་པ་ཆོས་སྤྱོད་ཅེས་བྱ་བ༔ ནུབ་གཏེར་གནས་ནས་གཏེར་ཁ་ཉེར་ལྔ་དབང་༔ སུམ་ཅུ་དྲུག་གི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ མཐའ་དམག་ལྷ་ཁང་སྐུ་གདུང་བཅོམ་པའི་དུས༔ དྭགས་སྨན་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ སྣ་ནམ་ཡེ་ཤེས་སྤྲུལ་པ་ཞེས་བྱ་ནི༔ དུང་དང་ལྡན་པའི་གཞོན་ནུ་ཞེས་བྱ་འབྱུང་༔ དྭགས་སྨན་གནས་སུ་གཏེར་ཁ་ཉི་ཤུ་དབང་༔ བཞི་བཅུ་དྲུག་གི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ ཕ་དང་ཁུ་རྣམས་དུག་གིས་བཅོམ་པའི་དུས༔ གནས་ལུང་ཡུལ་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ རྒྱལ་བའི་དབང་ཕྱུག་སྤྲུལ་པ་ཞེས་བྱ་ནི༔ སྔགས་འཆང་དྲག་རྩལ་ཆེན་པོ་ཞེས་བྱ་འབྱུང་༔ གནས་ཕྱོགས་ཀློང་ནས་གཏེར་ཁ་བཅྭ་བརྒྱད་དབང་༔ དྲུག་ཅུ་ལྔ་ཡི་བར་དུ་ཚེ་དུས་བྱས༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ གཙུག་ལག་བླ་མའི་སྤྱི་དཔོན་བྱེད་པའི་དུས༔ ཡར་ལུང་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ སྔགས་དང་ལྡན༔ རྡོ་རྗེ་བདུད་འཇོམས་སྤྲུལ་པ་ཞེས་བྱ་བ༔ སྔགས་འཆང་དཔལ་མཆོག་ཞེས་ནི་བྱ་བ་འབྱུང་༔ ཡར་གནས་ཕྱོགས་ནས་གཏེར་ཁ་སོ་ལྔ་དབང་༔ ཚེ་ཡི་དུས་བྱེད་སུམ་ཅུ་རྩ་གཅིག་གོ༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ དུས་རྣམས་ཐམས་ཅད་དཔོན་ས་བཟུང་བའི་དུས༔ གངས་སྟོད་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ དྷན་མང་སྐྱེ་མཐའ་ཆེ་མཆོག་གླིང་ཞེས་བྱ༔ ཉང་སྟོད་གནས་ནས་གཏེར་ཁ་ལྔ་བཅུ་དབང་༔ བཞི་བཅུ་གཉིས་ཀྱི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་ཐུགས་ལ་ཞོག༔ མངའ་བདག་རྒྱལ་པོ་བསྟན་པ་དུག་གིས་བསྣུབས༔ མངའ་རིས་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ དཔལ་གྱི་རྡོ་རྗེ་སྤྲུལ་པ་ཞེས་བྱ་བ༔ སྔགས་འཆང་ཉི་མ་དབང་ཕྱུག་ཅེས་བྱ་འབྱུང་༔ མངའ་རིས་གནས་ནས་གཏེར་ཁ་ཞེ་བཞི་དབང་༔ ཚེ་ཡི་དུས་བྱེད་སུམ་ཅུ་སོ་ལྔའོ༔ མཁར་ཟ་ཡེ་ཤེས་མཚོ་རྒྱལ་ཐུགས་ལ་ཞོག༔ སྲིན་པོ་རྣམས་ཀྱིས་མི་ཤ་ཟ་བའི་དུས༔ འབྲས་གཞོང་ནང་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ འཕྲིན་ལས་སྤྲུལ་པ་མཁའ་འགྲོ་གླིང་ཞེས་བྱ༔ འབྲས་གཞོང་ནང་ནས་གཏེར་ཁ་བཅུ་དྲུག་དབང་༔ བདུན་ཅུ་ལྔ་ཡི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ མཐུ་ཁ་དཔག་མེད་རབ་གྲངས་ཚང་བའི་དུས༔ དབུས་ཡུལ་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ གླང་དཔལ་སེང་གེ་སྐྱེ་མཐའ་ཞེས་བྱ་བ༔ བདེར་གཤེགས་གླིང་ཞེས་བྱ་བ་ཞེས་ནི་འབྱུང་༔ དབུས་ཡུལ་གནས་ནས་གཏེར་ཁ་བཅུ་ལ་དབང་༔ ལྔ་བཅུའི་བར་དུ་ཚེ་ཡི་དུས་བྱེད་དོ༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ དཔོན་ས་ལས་རྩོད་དུས་འཁྲུག་བཏང་བའི་དུས༔ གཙང་ཡུལ་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ དྷ་མང་ལོ་ཙཱའི་སྤྲུལ་པ་སྔགས་མཆོག་གླིང་༔ གཙང་ཡུལ་གནས་ནས་གཏེར་ཁ་བཅུ་གཅིག་དབང་༔ བཅོ་ལྔ་མཐའ་སྐྱོང་ཚེ་ཡི་དུས་བྱེད་དོ༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ ལྷ་ཁང་སྐུ་གདུང་ཁྲག་གིས་དུས་བཀང་དུས༔ བསམ་ཡས་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ དྲིན་ཆེན་ལོ་ཙཱ་སྤྲུལ་པ་བདེ་ཆེན་གླིང་༔ བསམ་ཡས་གླིང་ན་གཏེར་ཁ་བཅུ་གཉིས་དབང་༔ ལྔ་བཅུ་གཅིག་གི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཐུགས་ལ་འཆོངས༔ ངན་སྔགས་ཕུགས་སུ་སྦས་པའི་དུས་མཐའ་དུས༔ ལྷ་ས་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ ལོ་ཙཱ་ལྷ་ལུང་སྤྲུལ་པ་ཆོས་ཀྱི་གླིང་༔ ནུབ་ཕྱོགས་གཏེར་ཁ་ལྔ་བཅུ་མཐའ་སྐྱོང་བ༔ ལྔ་བཅུ་དགུ་ཡི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཐུགས་ལ་ཞོག༔ དང་པོ་གཙུག་ལག་ཁྲག་འཁོར་བསྐོར་བའི་དུས༔ བྲག་ཚངས་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ རྦ་ལོ་ཙཱ་སྤྲུལ་པ་ཡོན་ཏན་གླིང་༔ གནས་བྱེད་ཡུལ་ནས་གཏེར་ཁ་ཉེར་བཞི་དབང་༔ སུམ་ཅུ་བཞི་ཡི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཡིད་ལ་ཞོག༔ ལྔ་བཅུ་དམག་འཁྲུག་ནང་དམེ་དར་བའི་དུས༔ མཁར་ཆུ་ཕྱོགས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ དཔལ་མཆོག་ལོ་ཙཱའི་སྤྲུལ་པ་སངས་རྒྱས་གླིང་༔ དག་པའི་གནས་ནས་གཏེར་པ་བརྒྱ་དང་ལྔ༔ དྲུག་ཅུ་དགུ་ཡི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཐུགས་ལ་ཞོག༔ མཐུ་ཟོར་བྱེད་རྣམས་དུས་དམག་འབྱུང་བའི་དུས༔ རྐང་ས་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ དེ་ལྟར་གནས་ནས་གཏེར་ཁ་ལྔ་བཅུ་དབང་༔ ལང་མཆོག་ལོ་ཙཱའི་སྤྲུལ་པ་ཨུ་རྒྱན་གླིང་༔ དྲུག་ཅུ་ལྔ་ཡི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཡིད་ལ་ཞོག༔ མཐུ་རྣམས་སྡེ་བརྒྱད་དམག་རྣམས་བྱེད་པའི་དུས༔ ཤུད་པོ་དཔལ་གྱི་སྤྲུལ་པ་རཏྣ་གླིང་༔ ལྷོ་བྲག་གནས་སུ་གཏེར་ཁ་དགུ་བཅུ་དབང་༔ དྲུག་ཅུ་ལྔ་ཡི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཐུགས་ལ་ཞོག༔ བསྙེན་གནས་བླ་མཆོད་ཁྱི་ལྟར་རྒྱུག་པའི་དུས༔ དྭགས་སྨད་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ གནས་མཆོག་ལོ་ཙཱ་སྤྲུལ་པ་ཀརྨ་གླིང་༔ དྭགས་ཕྱོགས་གནས་ནས་གཏེར་ཁ་ལྔ་བཅུ་དབང་༔ དྲུག་ཅུ་དྲུག་གི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཐུགས་ལ་ཞོག༔ མི་རྣམས་དམ་སྲི་སྤུན་དགུ་ལང་བའི་དུས༔ བུམ་ཐང་ཕྱོགས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ པདྨ་གསལ་གྱི་སྐྱེ་མཐའ་པདྨ་གླིང་༔ བུམ་ཐང་གནས་སུ་གཏེར་ཁ་བཞི་བཅུ་དབང་༔ ལྔ་བཅུ་མཐའ་སྐྱོང་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཐུགས་ལ་ཞོག༔

ས་འཇིག་མི་རྣམས་གཅིག་བསད་ངེས་པའི་དུས༔ བར་སྐབས་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ ལང་འགྲོས་སྤྲུལ་པ་དུང་མཚོ་རས་པ་ཞེས༔ མཚོ་སྔོན་གནས་ནས་གཏེར་ཁ་སོ་བཞི་དབང་༔ བཞི་བཅུ་ཞེ་ལྔའི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ སྒྱོགས་རྣམས་ནང་འཁྲུགས་གཏམ་པའི་དུས་རྣམས་དུས༔ ཅོག་རོ་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ རྨ་ཐོག་སྤྲུལ་པ་བསམ་གཏན་ཞེས་བྱ་འབྱུང་༔ ཅོག་གནས་གཏེར་ཁ་ཉི་ཤུ་རྩ་ལྔ་དབང་༔ ལྔ་བཅུ་བཞི་ཡི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ ནད་རྣམས་མུག་ཤི་འབྱུང་བའི་དུས་རྣམས་དུས༔ བར་ཡུལ་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ གཡུ་སྒྲོ་སྐྱེ་བ་རྡོ་རྗེ་གླིང་ཞེས་བྱ༔ བར་གནས་གཏེར་ཁ་བཞི་བཅུ་གནས་ལ་དབང་༔ ལྔ་བཅུ་མཐའ་ཡི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ བསམ་ཡས་རྒྱལ་པོ་གནས་པའི་དམ་ཉམས་དུས༔ ཕྱོགས་གནས་དུས་ན་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ ཅོག་རོ་རྒྱལ་མཚན་སྤྲུལ་པ་དཔལ་གླིང་ཞེས༔ གནས་མཆོག་དུས་ན་གཏེར་ཁ་ཉི་ཤུ་དབང་༔ སུམ་ཅུ་ལྔ་ཡི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ སྟོད་ཧོར་དམག་རྣམས་བོད་དུ་འབྱུང་བའི་དུས༔ སྨན་གནས་ཡུལ་ན་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ ལོ་ཆེན་བཟང་པོའི་སྤྲུལ་པ་བྱང་ཆུབ་གླིང་༔ དེར་གནས་མུན་པའི་གླིང་སྐབས་གཏེར་ཁ་བཅུ༔ ལྔ་བཅུ་དྲུག་གི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ གནས་མིན་ལུང་གི་བཀའ་གནས་ཉམས་པའི་དུས༔ སྤར་ཟའི་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ འགྲོ་བྱེད་ལོ་ཙཱའི་སྤྲུལ་པ་གུ་རུ་ཆོས༔ མུན་གླིང་དུས་ན་གཏེར་ཁ་ཉེར་ལྔ་དབང་༔ ལྔ་བཅུ་གསུམ་གྱི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ དུག་ཁང་མ་ལ་ཡ་ཀའི་གནས་མཆོག་ནས༔ བ་མཆོག་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ བྷེ་རོའི་སྤྲུལ་པ་མ་ཏི་རཏྣ་ཞེས༔ གཏེར་ཁ་ཉི་ཤུ་རྩ་ལྔ་དག་ལ་དབང་༔ བཞི་བཅུ་ལྔ་ཡི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ བལ་བུ་མུ་སྟེགས་དམག་འཁྲུག་དར་བའི་དུས༔ རྒོད་ཚངས་གནས་སུ་སྤྲུལ་སྐུ་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ དྷ་མང་ལོ་ཙཱའི་སྤྲུལ་པ་རྒོད་ཀྱི་མིང་༔ གོང་ཡུལ་གནས་སུ་གཏེར་ཁ་ལྔ་བཅུ་དབང་༔ སུམ་ཅུ་དྲུག་གི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ ཨོ་ཡན་འཇིག་པའི་རྗེ་ཤུལ་སྟོང་བའི་དུས༔ དྷ་མའི་ལོ་ཙཱ་རྒྱལ་སྲས་མཛད་ཙམ་ན༔ ཁྱོང་སྟོང་དུས་ན་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ རྒྱལ་སྲས་སྤྲུལ་པ་མྱང་བན་ཞེས་བྱ་བ༔ དུས་བྱེད་གནས་ནས་གཏེར་ཁ་ཉེར་བཞི་དབང་༔ ལྔ་བཅུ་གཅིག་གི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ མཐའ་ རྣམས་དུག་རྣམས་ནང་དམེ་འདྲེ་ཡི་བཅུད༔ དྭགས་པོའི་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ འབྲུ་མཆོག་ལོ་ཙཱའི་སྤྲུལ་པ་ཞེས་བྱ་བ༔ སྔགས་འཆང་ཧཱུྃ་ནག་མེ་འབར་ཞེས་བྱ་འབྱུང་༔ དྭགས་གནས་གཏེར་ཁ་ཉི་ཤུ་རྩ་ལྔ་དབང་༔ བདུན་ཅུ་ལྔ་ཡི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཐུགས་ལ་ཞོག༔ དུ་ཡ་འཁྲུག་པའི་ཐབས་ཀྱིས་གནས་ལུང་དུ༔ བོད་ཁམས་སྤུ་བྱེད་གནས་ནས་སྐལ་ལྡན་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ བར་སྐོར་གནས་ནས་གཏེར་ཁ་བཅུ་ལ་དབང་༔ འགྲོ་བན་ལོ་ཙཱའི་སྤྲུལ་པ་བདུད་འདུལ་མིང་༔ བཞི་བཅུ་ལྔ་ཡི་བར་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཐུགས་ལ་ཞོག༔ གཙུག་ལག་ཁང་གི་རྒྱལ་ས་བླ་མའི་བཅུད༔ མཐུ་དང་དུག་ནས་ནང་འཁྲུག་དར་བའི་དུས༔ ངམ་གྱི་ཕུལ་ནས་སྐྱེས་བུ་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ ཤུད་པོ་གཡུ་སྒྲ་སྤྲུལ་པ་མི་འགྱུར་ཞེས༔ ཁམས་ཀྱི་ཡུལ་ན་གཏེར་ཁ་བརྒྱ་ལ་དབང་༔ ཉི་ཤུ་གཅིག་གི་དུ་ཚེ་དུས་བྱེད༔ མཁར་ཟ་ཡེ་ཤེས་མཚོ་རྒྱལ་ཡིད་ལ་ཞོག༔ སོ་ནམ་བྱེད་ཟེར་ས་མཐོ་ཁང་མཁར་བྱེད༔ གཙུག་ལག་ཁང་ནང་ནང་དུ་ཁྲག་འཁོར་བསྐོར༔ སྲིན་མོ་སྤར་ཟའི་གཏམ་མེད་ས་ཡུལ་ནས༔ དུ་ཡ་འཁྲུགས་ཏེ་ཆོས་ཀྱི་མཚོན་གདན་བྱེད༔ ཁྲག་གིས་འཁོར་ལོ་བསྐོར་བའི་དུས་རྣམས་ནས༔ མི་འགྱུར་སྐྱེ་བ་རྡོ་རྗེ་གླིང་ཞེས་བྱ༔ ཤར་ཁའི་ཁམས་ནས་སྐྱེས་བུ་སྙིང་སྟོབས་ཅན༔ ང་དང་མཚུངས་པའི་གཞོན་ནུ་སྔགས་དང་ལྡན༔ གཏེར་རྔ་སྐྱང་བའི་བརྒྱ་ལ་དབང་ཞེས་བྱ༔ ཚེ་ཡི་དུས་ནི་ཉི་ཤུ་རྩ་ལྔའོ༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ ལོ་ཙཱ་བརྒྱ་དང་བརྒྱད་ཀྱི་སྤྲུལ་བཅས་པ༔ གཏེར་ཆེན་བརྒྱ་དང་བརྒྱད་ནི་འབྱུང་བར་འགྱུར༔ སངས་རྒྱས་བླ་མ་མན་ཆད་བར་སྐབས་དང་༔ མི་འགྱུར་རྡོ་རྗེ་ཡན་ཆད་བརྒྱ་རྩ་བརྒྱད༔ དེ་རྣམས་བར་སྐབས་གཏེར་སྟོན་མང་བར་འགྱུར༔ དེ་ཡན་ཆད་དཔག་མེད་མང་པོ་མཐའ༔ གཏེར་ཕྲན་དཔག་ཏུ་མེད་པ་འབྱུང་བར་འགྱུར༔ བྲག་ཆེན་ཡང་དབེན་ཁ་པ་ཉི་མ་ཞེས༔ གཏེར་ཁ་བཅུ་ལ་དབང་བའི་དུས་འབྱུང་བ༔ འགྲོ་དོན་ཚུལ་མཛད་བྱང་ཆུབ་མིང་ཅན་འབྱུང་༔ གཏེར་ཁ་བཅོ་ལྔ་མཐའ་སྐྱོང་ཞེས་བྱ་བ༔ འཇིགས་བྱེད་སྔགས་ཀྱི་མིང་ཅན་ཞེས་བྱ་བ༔ གཏེར་ཁ་བཅུ་ལ་དབང་བའི་དུས་མཚུངས་པ༔ སྐྱེས་བུ་སྙིང་སྟོབས་ཆོས་རྒྱལ་ཞེས་བྱ་བ༔ གཏེར་ཁ་བརྒྱད་ལ་དབང་བའི་དོན་བཅས་པ༔ རྒྱལ་མོ་རུང་དུ་གླིང་ཙ་མིང་ཅན་འབྱུང་༔ གཏེར་ཁ་ལས་རྣམས་བཅོ་ལྔ་དབང་བར་འགྱུར༔ འབྲས་བཅས་ཁམས་ལ་རྣམ་གླིང་མིང་ཅན་འབྱུང་༔ བྷེ་རོ་སྤྲུལ་པ་གཏེར་ཁ་བཅུ་ལ་དབང་༔ རིག་འཛིན་མིང་ཅན་ལྷ་ཡུལ་གནས་བཅས་འབྱུང་༔ རྒོད་གནས་སྤྲུལ་པ་གཏེར་ཁ་གསུམ་ལ་དབང་༔ བྱང་ཕྱོགས་ནགས་ཚལ་དུར་ཁྲོད་གནས་ཡུལ་ནས༔ གོང་ལུང་བྱང་ཆུབ་ཅེས་བྱ་གཏེར་ཁ་གཉིས༔ རབ་དྲུང་བདེ་བའི་གནས་ཡོང་དྲག་ཅེས་བྱ༔ མི་མིན་གནས་སུ་གཏེར་ཁ་གཅིག་ལ་དབང་༔ དམྱལ་སྨན་གནས་སུ་ཚེ་དབང་རིག་འཛིན་ཞེས༔ དམྱལ་གནས་གཏེར་ཁ་ལྔ་ལ་རབ་དབང་བ༔ ལྷོ་ཡི་གླིང་གནས་རྣམ་མཆོག་དབང་ཕྱུག་ཅེས༔ མཚུངས་པ་མེད་པ་གཏེར་ཁ་བཞི་ལ་དབང་༔ མཐའ་སྐྱོང་གནས་བཅས་ཆོས་ཀྱི་རྗེ་འཇུག་དུས༔ གངས་སྨད་གནས་སུ་མུན་གླིང་ཞེས་བྱ་བ༔ གཏེར་ཁ་བཞི་ལ་རབ་ཏུ་གནས་པར་བྱ༔ ངམ་ཡུལ་བྱང་ཆུབ་རིག་འཛིན་ཞེས་བྱ་བ༔ གཏེར་ཁ་དགུ་ལ་རབ་ཏུ་གནས་པར་བྱ༔ མཁར་ཟ་ཡེ་ཤེས་མཚོ་རྒྱལ་ཉམས་སུ་ལོངས༔ མ་འོངས་བསྐལ་པ་སྙིགས་མའི་མཐའ་སྐྱོང་བ༔ རྗེ་འབངས་ཉེར་ལྔའི་སྤྲུལ་པ་གནས་བཅས་པ༔ འབྲས་མོ་གཞོང་དུ་ཆོས་ཀྱི་རྒྱ་མཚོ་འབྱེད༔ ཐུབ་པའི་བསྟན་པ་གནས་སྐྱོང་ང་ཞེས་བྱ༔ བསྐལ་པ་མཐའ་མ་ཤཱཀ་ཐུབ་བསྟན་པ་རུ༔ ང་ཡི་གཏེར་སྟོན་དཔག་མེད་བགྲང་མི་ནུས༔ དེ་རྣམས་བགྲང་ནས་དཔག་མེད་བགྲང་བ་མེད༔ རྒྱལ་བའི་སྐུ་གདུང་བརྒྱ་དང་བཅུ་ལྷག་ནས༔ གཏེར་ཆེན་བརྒྱ་ལ་གཏེར་འབྲིང་བརྒྱ༔ དེ་ཡི་ཆུང་བའི་མཐའ་སྐྱོང་བརྒྱ༔ བརྒྱ་རྣམས་དཔག་ཏུ་མེད་པའི་སྤྲུལ་པ་བགྱིས༔ དེ་སྐབས་ས་ཁོག་གཏེར་གྱི་རྩ་བ་ནས༔ གཏེར་སྟོན་སྤྲུལ་པ་ཐབས་རྣམས་དེ་འདྲ་བ༔ མ་འོངས་གྲོགས་བྱས་མཚོ་རྒྱལ་དམ་བཅས་ཡིན༔ རིག་འཛིན་རྣམས་ཀྱི་རྩ་ནས་ཁྱེད་སྤྲུལ་འགྱེད༔ ཁྱེད་ཀྱི་བརྡ་ཡིག་ཕབ་པའི་ཁྱོད་སྤྲུལ་བྱས༔ ཁྱོད་སྤྲུལ་མ་བྱས་བརྡ་ཡིག་མི་མངོན་པ༔ མ་འོངས་དཔག་མེད་གཏེར་སྟོན་བགྲང་མི་ནུས༔ རི་བོ་གཅིག་ལ་རྩ་ཤིང་བརྒྱ་ཕྲག་རེ༔ ལྗོན་ཤིང་གཅིག་ལ་ལོ་འདབ་བརྒྱ་ཕྲག་ཙམ༔ ང་ཡི་སྤྲུལ་པ་དེ་ཙམ་བགྲང་མི་ནུས༔ མཁར་ཟ་ཡེ་ཤེས་མཚོ་རྒྱལ་ཐུགས་ལ་ཞོག༔ ཅེས་གསུངས༔

མཚོ་རྒྱལ་གྱི་ཞལ་ནས༔ ཨུ་རྒྱན་རིན་པོ་ཆེ༔ བཀའ་དྲིན་ཤིན་ཏུ་ཆེ༔ ཞུས་ནས༔ གསེར་ཕུལ་བའོ༔ པདྨའི་མཚོ་རྒྱལ་ཉོན་དང་མ་འོངས་དོན༔ མ་འོངས་གཏེར་སྟོན་སྣང་བའི་གཟུགས་ཡག་བྱས༔ རློམས་པ་འཕྱོར་ཤེས་བྱེད་པའི་ཚུལ་སྟོན་པ༔ སྒྲོམ་བུ་ཤོག་སེར་ཡིན་སྨྲས་མི་རུ་བཟུང་༔ ཆེ་འདོད་གཙོ་བོ་ལྟ་བུ་ང་རྒྱལ་བཟུང་༔ དུག་སྦྲུལ་ནག་པོས་ཁོང་ཁྲོ་བཟུང་༔ འཕྱོར་འདོད་བག་མ་ལྟ་བུ་གཟུགས་ལ་དགའ༔ བྲག་ཆེན་རྒལ་ནས་འགྲོ་བྱེད་སྣང་བ་བསྒྱུར༔ ཁྲོམ་གཏེར་ཕུད་ཟེར་ས་རྡོ་རི་བྲག་གཤེགས༔ རྫུས་སྐྱེས་ང་གླང་ལུང་བསྟན་ཡོད་སྨྲས་པ༔ འདམ་བུ་མཆོར་དགའ་ལྟ་བུ་ས་མཐའ་བསྐོར༔ མངོན་ཤེས་མཛད་ཚུལ་གསོལ་བཅས་ལྟར་དུ་བྱས༔ རྒྱུ་ཡོད་ཕྱུག་པོ་གཏེར་སྟོན་ཡིན་སྨྲས་པ༔ ཆེ་བཙན་དཔོན་པོ་གཏེར་སྟོན་ཡིན་སྨྲས་པ༔ སྣང་བའི་གཟུགས་ཡག་གཏེར་སྟོན་ཡིན་སྨྲས་པ༔ ཁྱི་ལྷ་མོ་ལྟར་དུ་གྲོང་བར་འགྲིམ་པའི་ཉུག༔ སྣང་བ་རང་ཐག་མ་བཅད་གཟུགས་ལ་མོས༔ གཏེར་ཡིག་ཡིན་ཟེར་ཁྲག་གིས་ལན་ཙ་བསྒྱུར༔ མཐུ་སྟོབས་ཆེ་ཟེར་བར་སྣང་ཁམས་ན་འདུག༔ དར་དཔྱངས་འཕང་ཟེར་དར་གོས་ཕྲུག་གསུམ་བརྒྱན༔ སྔགས་དང་ལྡན་ཟེར་ལྷ་འདྲེ་མགོ་སྐོར་བྱེད༔ སེམས་ཉིད་རྟོག་ཟེར་ལྟ་བ་ཁ་ལ་འཇོམས༔ གང་མཐོང་མ་མོ་མཁའ་འགྲོ་བཀའ་ལུང་སྨྲ༔ ས་མཐའ་ཉུག་པའི་རི་རབ་མགོ་སྐོར་བྱས༔ མཐོང་འདྲེ་ཚུལ་གྱིས་རིག་པ་སྨྱོན་ལྟར་བྱས༔ མ་འོངས་སེམས་ཅན་རྣམས་ཀྱི་དོན་མི་ཆེད༔ དོན་ལ་མི་དཔྱད་སྣང་བ་ཀུན་རྫོབ་ལྟ༔ རྒྱུ་ལྡན་མི་རྣམས་ལྟ་བྱེད་ཅི་ཡང་མེད༔ གཏེར་སྟོན་ལུང་བསྟན་མེད་པ་གཏེར་སྙིད་བྱེད༔ འཁྲོ་ཚུལ་མདོག་ལྡན་ཟང་ཟིང་ནོར་རྟེན་བྱེད༔ སྐབས་སྐབས་དེ་དང་མཚུངས་པའི་ཐུན་མི་འབྱུང་༔ གཏེར་མིན་གཏེར་གཉིས་གཏེར་རྫུན་འབྱུང་སྲིད་པ༔ ང་ཡི་གཏེར་སྟོན་འཕྲད་པ་དེ་འདྲ་མེད༔ ལྟ་བའི་སེམས་ཀྱི་སྣང་བ་ཕུག་ཐག་ཆོད༔ བསྐྱེད་རིམ་ཀུན་རྫོབ་ཆོས་ཀྱི་ཕུག་ཐག་ཆོད༔ གཏེར་གྱི་ཆོས་དང་ཕུག་ཐག་ཆོད༔ གཏེར་སྟོན་མང་པོ་དེ་འདྲ་ཡོང་རྒྱུ་ཡིན༔ ཡེ་ཤེས་མཚོ་རྒྱལ་ཡིད་ལ་འཆོངས༔ མ་འོངས་བུ་སློབ་འགྲོ་ལ་དགོངས༔ བདེ་ཆེན་གནས་སུ་འགྲུབ་པའི་ཆོས་གཏེར་ཡོད༔ དབུལ་ཕོངས་སེལ་ཕྱིར་ནོར་གྱི་གཏེར་རྣམས་ཡོད༔ བདེ་བ་ཐོབ་ཕྱིར་སྐུ་ཡི་གཏེར་རྣམས་ཡོད༔ ལས་འཕྲོ་ང་ཡི་གཏེར་དང་འཕྲད་པའི་ཚེ༔ ཆོས་གཏེར་ཡོད་ན་ནོར་གཏེར་སྐལ་བ་མེད༔ ནོར་གཏེར་ཡོད་ན་ཆོས་གཏེར་སྐལ་བ་མེད༔ ལྷ་འདྲེ་མི་གསུམ་འཛོམས་དང་རྩེ་བ་གཉིས༔ རྒྱ་བོད་སྣང་སྲིད་ལྷ་འདྲེ་ཐམས་ཅད་འཚོགས༔ ལེགས་པའི་ལྷར་བཅས་ཉེས་པ་ཐམས་ཅད་སྡང་༔ དཀར་པོ་ལྷ་ཟབ་ནག་པོ་བདུད་ཀྱང་ཟབ༔ མི་མཐུན་གནས་བཅས་རྟེན་འབྲེལ་མ་འཛོམས་ན༔ རིག་པའི་ལྕགས་ཁུ་ཁ་བའི་མཚང་མ་འཐུང་༔ རང་གི་རང་ཕུང་མ་འཇུག་གཏེར་སྟོན་རྣམས༔ རྩ་དྲུང་དུང་ཆོས་བཤོལ་བསྒྲུབ་ཆོས་པ་ཡི༔ ཉེ་དུ་འབྲེལ་པ་ཐམས་ཅད་འགལ་རྐྱེན་ཡིན༔ ཡུལ་མ་བསྡད་ཕྱོགས་མེད་གནས་སུ་སོང་༔ འགལ་རྐྱེན་མེད་པའི་གནས་སུ་སྒྲུབ་པ་གྱིས༔ འགལ་རྐྱེན་རྣམས་དང་འབྲེལ་པ་བཙན་ཐབས་ཆོད༔ བདེ་ཞིང་སྐྱིད་པ་མི་འདོད་གཅིག་ཀྱང་མེད༔ རང་བཞིན་མ་གྱུར་སྔགས་འཆང་ནང་ལ་ཡོང་༔ མ་ཡེངས་གཞན་དོན་བོར་ལ་རང་དོན་ཚོལ༔ བློངས་ནས་སྡོང་པོ་ལྟ་བའི་ཤོང་ཡོང་སྐྱིད༔ སྣ་ཚོགས་ཚ་བྱེད་སེམས་ཉིད་ཚད་ལ་ཕེབ༔ རི་རབ་ལྟ་བུ་བློ་བརྟན་སྒོམ་པ་གྱིས༔ བརྟན་པ་ཐོབ་ཅིང་འོད་གསལ་གཡོ་འགུལ་མེད༔ སུ་འགྲོགས་ཡོན་ཏན་མི་འབྱུང་གཅིག་པུར་འདུག༔ མི་ལ་སྙིང་གི་གཏམ་སྣང་མ་བྱེད་ཅིག༔ ལྟོ་གོས་གཡོག་བཅས་ཕུང་བ་ཞིག་མ་བཞག༔ དོན་གཉིས་དུས་གཅིག་འབྱུང་བ་མི་སྲིད་དེ༔ ཟོལ་ཟོག་གཏམ་པའི་ཁ་ལ་ཉན་མེད་སྙིང་གཏམ་ཡིན༔ དམ་ཚིག་མེད་པའི་མི་ལ་མ་སྤེལ་ཅིག༔ མི་ཚེ་རིང་ཞིང་གང་ཡང་ཆ་མི་ཆོད༔ གཏེར་འཚོ་མ་ཤེས་འཕྲལ་རྐྱེན་ངན་དགུ་འོང་༔ མི་སེམས་འདྲེ་བའི་སྤྱང་སྟེ་ཚོར་བའི་བདག༔ གཏེར་སྟོན་བཙན་གཉན་རྣམས་ལ་མི་དགའ་སྙིང་གཏམ་ཡིན༔ གྱོང་གཅིག་ཡོང་སྟེ་མཐོ་ཕྱིས་ལྡེམ་དགོངས་མེད༔ སངས་རྒྱས་བཀའ་ནི་བསླུ་བ་ཅང་སྲིད་དམ༔ ངན་པ་བསྟེན་ན་གཞན་མི་འཕྲོག་ཡོང་༔ དྲོད་རྟགས་མ་ཐོན་བར་དུ་སྒྲུབ་པ་གྱིས༔ རིམ་བཞིན་སྒྲུབ་པ་རྒྱོབ་ཅིག་སྙིང་གཏམ་ཡིན༔ གཟའ་མི་ངེས་ཤེས་གཏམ་ཚུལ་བྱེད་པ་འབྱུང་༔ ཕྱི་མཚམས་ནང་མཚམས་སྒྲུབ་རྒྱོབ་སྙིང་གཏམ་ཡིན༔ ཆོས་པ་ཡིན་ཟེར་སྐད་ལོག་བཏོན་མ་ཡོང་༔ རློམ་པ་འཕྱོར་ཤེས་བཞིན་པའི་ཚུལ་ངན་ཡོང་༔ དམ་ཚིག་མ་བསྲུངས་དམ་ཉམས་བློ་མ་བསྲེས༔ མེད་དང་མེད་ཤེས་ཀུན་མེད་ཚིག་གསུམ་པོ༔ སྐོར་ལོག་མ་བཅས་སྨྲ་བའི་སྙིང་གཏམ་ཡིན༔ རློམ་པ་འཕྱོར་ཤེས་རིག་ཏོག་མ་ཡང་ཞིག༔ གཏེར་སྟོན་ལུས་སེམས་མ་ཡང་གཏན་དུ་ཕོབ༔ ཚོགས་ཏིར་སྣང་བའི་ལས་ལ་འགྲོ་བྱས་པ༔ སྣང་རིག་ཡིན་པའི་དེ་ལྟར་མ་བྱེད་སྙིང་གཏམ་ཡིན༔ སྔགས་འཆང་ཆོས་སྐྱོང་སྒྲུབ་པའི་མཐུ་སྟོབས་ཅན༔ སྒྲུབ་པ་བསྒྲུབ་བསམ་ཡང་སེམས་མ་བྱེད་ཅིག༔ མི་རྣམས་ཁྱིམ་ལ་མ་འགྲོ་རང་ས་འདུག༔ མི་བཞག་པའི་ལས་རྣམས་ཡོད་པ་ན༔ པདྨ་ང་ལ་གསོལ་བ་བཏབ་ཅིང་ཕྱོགས་མེད་འགྲུབ༔ དང་པོ་སྔགས་འཆང་ལུང་བསྟན་མ་ཡོད་ནས༔ མ་འོངས་གཏེར་སྟོན་ཚུལ་ངན་སྙིང་རྗེའམ༔ ཀི་སྒྲ་ཏིར་ཏིར་ཧབ་ཤ་བྱེད་པ་འབྱུང་༔ མེད་ན་མེད་ཙམ་ཡོད་ན་ཡོད་ཚད་བསྟེན༔ ཞིམ་པོ་མི་ལ་སྟེར་ཏེ་སྐྱུགས་ཏེ་འོང་༔ འཕྲོ་ངན་མི་ལ་སྟེར་ཏེ་ཐུགས་ཁྲེལ་གནང་༔ སྙིང་གཏམ་མི་ལ་བྱེད་དེ་ཞེ་ཁྲེལ་བཏང་༔ གོས་ཟས་མི་ལ་བྱིན་ཏེ་གཙང་རྟོག་བྱེད༔ གདམས་ངག་ཟས་སུ་མ་འཇུག་སྙིང་གཏམ་ཡིན༔ བསྐྱེད་རིམ་མི་ལ་བསླབ་སྟེ་ཐུགས་ཁྲེལ་གནང་༔ དམ་ཆོས་མི་ལ་གསུངས་ཏེ་ཧབ་ཤ་བྱེད༔ སྒྲོམ་བུ་མི་ལ་བསྟན་ཏེ་ཀི་ཏིར་བྱེད༔ དམ་རྫས་མི་ལ་སྟེར་ཏེ་སེམས་འཁྲུག་ཟ༔ རང་ལ་ཡོད་ན་ཡིད་བཞིན་ནོར་བུ་འདི༔ ཀུན་ལ་སྟེར་བའི་རྫུས་སྐྱེས་ང་ལ་བསྐུར་པ་བཏབ༔ ཆོས་ཟས་སུ་མ་འཇུག་སྙིང་གཏམ་ཡིན༔ དད་པ་དུར་དུར་མི་བྱེད་ངར་སྒྲ་ཏིར་ཏིར་འབྱུང་༔ རྫུས་སྐྱེས་ང་ལ་འབར་ཤ་སྐུར་འདེབས་སོ༔ གསོལ་བ་ལྷང་ལྷང་མི་འདེབས་མངོན་ལྐོག་ཤབ་ཤུབ་འབྱུང་༔ གཏེར་སྟོན་ལྟ་བ་ཁ་ལ་མ་འཛེམ་གྱིས༔ ལྟ་སྤྱོད་མ་རྗེ་སེམས་ནོན༔ རྫུས་སྐྱེས་པདྨ་ང་དྲན་གྱིས༔ ལྟ་སྤྱོད་རྩིང་ན་ཆོས་ལ་བར་ཆད་ཡོང་༔ མཆོར་དགའ་སྙིང་གཏམ་བྱེད་ཟེར་བློ་སོགས་གནས༔ དེ་ལ་མ་ཉན་ལྟ་བའི་ཁ་ཏ་ཡིན༔ སྔོན་ལས་རང་སྨིན་གོ་ཆ་རྩིས་སུ་གྱིས༔ བློ་གཏད་བླ་མ་བྱེད་པའི་རྒྱུད་པ་འཛིན༔ གཏེར་ཤོག་འདི་རྣམས་ཤིན་ཏུ་གཉན་པ་དེ༔ དཔེར་ན་དུག་སྦྲུལ་ཁའི་ནོར་བུ་འདྲ༔ ཐབས་ལ་མཁས་ན་ནོར་བུ་ལོན་པའི་འཚིང་༔ ཐབས་མ་མཁས་ན་དུག་སྦྲུལ་འཆི་བར་བྱེད༔ ཤོག་དྲིལ་བཀའ་རྒྱ་བསྡམས་པའི་སྙིང་གཏམ་ཡིན༔ ང་ལ་སྟོན་ཟེར་མི་རྣམས་མང་བཞིན་ཡོང་༔ བར་ཆད་ཡོང་སྲིད་མི་བསྟན་སྙིང་གཏམ་ཡིན༔ ཡང་དང་ཡང་དུ་དམ་པའི་ཆོས་གཅིག་སྒྲུབས༔ ཟོལ་ཟོག་གཡོ་སྒྱུ་ཅན་ལ་མ་སྤེལ་སྙིང་གཏམ་ཡིན༔ ཟས་ནོར་ཡོད་པའི་དེས་ཆ་སྤེལ་ཙམ་ན༔ རང་གི་བསྒྲུབ་པ་མ་གཏོགས་མ་སྤེལ་ཅིག༔ ཟང་ཟིང་རློམ་པའི་འཕྱོར་དགའ་མ་བྱེད་ཅིག༔ སྒྲུབ་པ་ནན་ཏན་མཛོད་ཅིག་དེ་སྤེལ་ཏེ༔ དམ་རྫས་རང་རིག་ཉམས་སུ་བླང་བར་བྱས༔ དེ་སྐབས་མ་བབས་རང་ས་མྱུར་དུ་འདུག༔ ང་ཡི་བོད་འབངས་གཏེར་གྱིས་བཀངས་ནས་ཡོད༔ དངོས་གྲུབ་འདོད་ན་གཏེར་ནས་བླང་བར་བྱས༔ སྤྲུལ་པ་མཆོག་གྱུར་འགྲོ་མགོན་པདྨ་ང་༔ བདག་གིས་བོད་ཡུལ་མཐའ་འཁོབ་ཁ་བ་ཅན༔ གཅོང་རོང་དྲག་པོ་མཚོན་ཆ་གཟིང་བ་འདྲ༔ དཀར་པོ་སེམས་མེད་སྡིག་སྤྱོད་སེམས་ལ་ཐུགས༔ མ་འོངས་དུས་གཅིག་གཏེར་སྟོན་མ་འབྱུང་ནས༔ སློབ་མའི་ཡིད་ཆེས་བཀུར་གནས་ག་ལ་བགྱི༔ ལས་འཕྲོ་དོན་དུ་རི་བྲག་ལུང་པ་རྣམས༔ ཨུ་རྒྱན་ཉིད་ཀྱི་བསྒྲུབ་ཕྱིར་བྱིན་གྱིས་རློབས༔ ཐུགས་རྗེས་བཟུང་བས་བར་ཆད་མི་འབྱུང་ངོ་༔ མཁར་ཟ་ཡེ་ཤེས་མཚོ་རྒྱལ་ཐུགས་ལ་ཞོག༔ མ་འོངས་གཏེར་སྟོན་རྣམས་ཀྱིས་ཡིད་ལ་ཆོངས༔ མཁར་ཟ་ཡེ་ཤེས་མཚོ་རྒྱལ་ལན་གཅིག་ཉོན༔ མ་འོངས་བུ་སློབ་དོན་དུ་ལས་འཕྲོ་ཅན༔ ཉི་ཤུ་ཁ་རལ་དུས་སུ་ནད་མུག་མང་༔ མཚོན་སྐལ་ཁྲག་གིས་ཆར་པ་མང་པོ་འདེབས༔ དུག་རྣམས་ནང་འཁྲུག་ཆོས་རྣམས་མཚོན་གདན་བྱེད༔ སྲིན་པོ་གདུག་བྱེད་མང་པོ་འབྱུང་བའོ༔ རྒྱལ་ས་བླ་མའི་བཅུད་འདུག་པ༔ དམྱལ་སྨད་མི་རྣམས་གཏམ་པའི་བདེན་རྣམས་མེད༔ ཡེ་ཤེས་མཚོ་རྒྱལ་ཐུགས་ལ་དེ་ལྟར་ཞོག༔ སྔགས་འཆང་པདྨ་སྲིན་པོའི་གླིང་དུ་འགྲོ༔ ཁོ་མོ་ཡེ་ཤེས་མཚོ་རྒྱལ་རྗེས་ཕྱིར་འདུག༔ སྲིན་པོ་ཐམས་ཅད་ཆོས་ལ་ངས་འཛུད་འགྲོ༔ ཞེས་གསུངས༔

ཡེ་ཤེས་མཚོ་རྒྱལ་ཞལ་ནས༔ ཀྱེ་ཀྱེ་ཨུ་རྒྱན་རིན་པོ་ཆེ༔ སངས་རྒྱས་ཐམས་ཅད་འདུས་པའི་སྐུ༔ སྔགས་འཆང་ལྷོ་ནུབ་ཡུལ་དུ་འགྲོ་ཙམ་ན༔ ཁོ་མོ་ཡེ་ཤེས་མཚོ་རྒྱལ་སུ་ལ་བསྟེན༔ ཁོ་མོ་ལྟ་བའི་ཁ་ཏ་སུ་ཡིས་བྱེད༔ ཁོ་མོ་རྟེན་མེད་ལུས་འདི་གང་དུ་འདུག༔ འདི་ཙམ་གནས་སུ་རི་ཁྲོད་གནས་སུ་འདུག༔ ཁོ་མོ་རྟེན་པའི་ས་དེ་སུ་ལ་བྱེད༔ རྫུས་སྐྱེས་པདྨ་ད་ནི་བཞུགས་འཚལ་ལོ༔ ཞེས་ཞུས༔ ཨུ་རྒྱན་གྱི་ཞལ་ནས༔ བདག་འདྲ་ཁོ་མོ་ཡེ་ཤེས་མཚོ་རྒྱལ་ཉོན༔ ལྷོ་བྲག་གནས་སུ་ལོ་ནི་ལྔ་བཅུར་བཞུགས༔ བསམ་ཡས་གླིང་དུ་ལོ་ནི་བཅུར་འདུག་པ༔ རྐོང་པོ་ཡུལ་དུ་ལོ་ནི་བཅུ་གཉིས་འདུག༔ ཡར་ལུང་གནས་སུ་ལོ་ནི་བརྒྱད་འདུག་པ༔ དྭགས་པོ་གནས་སུ་ལོ་ནི་དྲུག་འདུག་པ༔ ཏིལ་སྟོད་གནས་སུ་ལོ་ནི་བཅུ་བཞིར་འདུག༔ ཁོང་སྟོང་གནས་སུ་ལོ་ནི་བཅུར་འདུག་གོ༔ སྒྲུབ་ཕུག་ཀུན་ལ་ཟླ་རེ་ཞག་རེ་འདུག༔ རྒྱལ་བའི་ལུང་བསྟན་བརྒྱ་དང་བཅུ་ཡི་བར༔ རྟེན་འབྲེལ་དེ་ཕྱིར་ཡོད་པའི་མཁར་ཟ་ཉོན༔ ཁྱོད་ནི་བཅུ་གསུམ་ལོ་ཏོག་ཞབས་ཏོག་བྱེད༔ ཁྱོད་ཀྱིས་ཅི་བྱེད་བཀའ་རྣམས་ཐར་མྱོང་བ༔ ཁོ་མོ་ལས་ཅན་འདི་ལྟར་མི་འདུག་གོ༔ ལོ་གཅིག་ཁར་དུ་ཁྱོད་ཀྱིས་བཞུགས་ཞུས་ཕུལ༔ ཁྱོད་ནི་བཀའ་ཞུས་དེ་ལྟར་ལོ་གཅིག་འདུག༔ དེ་ལྟར་མ་འདུག་དམ་ཚིག་ཉམས་རེ་ཀན༔ མཁར་ཟ་ཡེ་ཤེས་མཚོ་རྒྱལ་ཤིན་ཏུ་བདེན༔ རྟེན་པའི་ས་ཡང་ཡོད་པ་མ་ཡིན་ནོ༔ ཡེ་ཤེས་མཚོ་རྒྱལ་སྙིང་རུས་ཤིན་ཏུ་གྱིས༔ ལོ་གཅིག་བར་དུ་མ་འདུག་སྙིང་རེ་རྗེ༔ བདག་འདྲ་སྲིན་པོ་ཡུལ་དུ་མ་བྱོན་ན༔ སྲིན་པོ་གདུག་པ་བྱེད་ནས་བོད་ཁམས་བརླག༔ ལུས་རྣམས་བསྒྲལ་ནས་མཚོ་རྒྱལ་ཁྱེད་དང་འདུ་འབྲལ་མེད༔ ལོ་གཅིག་བར་དུ་འདིར་ཡང་བཞུགས་པ་ཡིན་ཞེས་གསུངས༔ ཡེ་ཤེས་མཚོ་རྒྱལ་མྱ་ངན་མང་པོ་བྱེད་ནས༔ སུ་ལ་བརྟེན་བསམ་ནས་མགུར་འདི་བཞེངས་སོ༔

ཀྱི་ཧུད་ཀྱི་ཧུད་ཨུ་རྒྱན་རིན་པོ་ཆེ༔ བདག་གིས་རྙེད་པ་རྫུས་སྐྱེས་ཁྱེད་འདྲ་རྙེད༔ བདག་གིས་ཅི་ཞུས་པདྨ་ཁྱེད་ལ་ཐར༔ གངས་སྟོད་སེང་གེ་དཀར་མོ་གངས་ལ་བརྟེན༔ གངས་ལ་བརྟེན་ཏེ་སྐྱིད་པའི་ལས༔ བྱ་རྒྱལ་ཁྱུང་ཆེན་བྲག་ལ་རྟེན་སུ་ཡོད༔ མཁར་ཟ་ཡེ་ཤེས་མཚོ་རྒྱལ་འདྲ་བ་སུ་ལ་བརྟེན༔ རྒྱ་སྟག་དམར་པོ་ནགས་ལ་བརྟེན༔ ཡེ་ཤེས་མཚོ་རྒྱལ་ལུས་འདི་སུ་ལ་བརྟེན༔ གཙང་ཆུ་འགྲམ་གྱི་ཉ་མོ་ཆུ་ལ་བརྟེན༔ མཁར་ཟ་མཚོ་རྒྱལ་འདྲ་བ་སུ་ལ་བརྟེན༔ དབུས་དང་གཙང་གི་བུ་མོ་གནས་ལ་བརྟེན༔ ཇོ་མོ་མཁར་ཆུ་ཟ་འདི་སུ་ལ་བརྟེན༔ ལྟ་རྟོག་སེམས་ཀྱི་ཁ་ཏ་སུ་ཡིས་བྱེད༔ མི་མིན་གནས་སུ་སུ་ལ་བརྟེན་ནས་འདུག༔ དེ་སྔར་རྫུས་སྐྱེས་པདྨའི་བཀའ་གནང་ངོ༔ དྲིན་ཅན་སྔགས་འཆང་པདྨ་འབྱུང་གནས་འདི༔ སྲིན་པོ་གླིང་དུ་བྱོན་ན་ཁོ་མོ་ཅི་ལ་བརྟེན༔ ཀྱི་ཧུད་ཀྱི་ཧུད་ཨུ་རྒྱན་རིན་པོ་ཆེ༔ བདག་དང་འདུ་འབྲལ་མེད་པར་བྱིན་གྱིས་རློབས༔ རི་ཁྲོད་གནས་སུ་གང་འདྲ་ཅི་ལ་འདུག༔ ཁོ་མོ་ལྟ་ས་རྟེན་ས་སུ་ལ་བྱེད༔ བདག་གི་ལུས་འདི་མ་བོར་བར་དུ་བཞུགས༔ ནམ་འཆི་ཆ་མེད་ཁོ་མོ་བདག་གི་ལུས༔ འཆི་ན་དགའ་དེར་རྫུས་སྐྱེས་རྗེ་ཕྱིར་འབྲང་༔ མཚོ་རྒྱལ་བདག་ལ་ད་ཡང་ཆོས་གཅིག་གསུངས༔ ཞེས་ཞུས་ནས༔ མིག་མཆི་མས་བརྣངས་ནས༔ རྫུས་སྐྱེས་པང་དུ་མགོ་བཞག་ནས་མང་པོ་བཤུམ་མོ༔

ཨུ་རྒྱན་གྱི་ཞལ་ནས༔ ཀྱེ་མ་མཁར་ཟ་ཡེ་ཤེས་མཚོ་རྒྱལ་འདི༔ རྗེ་ཕྱིར་འབྲང་སྟེ་ཁོ་མོ་འདི་ཐུབ་སྟེ༔ གྲུབ་ཆེན་ལོ་ཙཱ་རྗེ་འབངས་དེ་འདྲའོ༔ བོད་འབངས་སེམས་ཅན་དེ་ཡང་སྙིང་རེ་རྗེ༔ མཚོ་རྒྱལ་དད་གུས་ཅན་དུ་ཤུལ་དུ་བསྐྱུར་བ་འདི༔ ཅི་ཡང་མ་འོངས་འགྲོ་བའི་དོན་ཡིན་ཏེ༔ མཚོ་རྒྱལ་མྱ་ངན་མ་བྱེད་སྙིང་རུས་མཛོད༔ ཆོས་གཅིག་བསྒྲུབ་པའི་འགྲོ་བའི་དོན་མཛད་པ༔ མྱ་ངན་མ་བྱེད་མཁར་ཟ་ཆོས་ཀྱི་རྒྱལ༔ དེ་ཕྱིར་འདི་ལ་རབ་ཏུ་གཅེས༔ ལྷོ་ནུབ་རྔ་ཡབ་གླིང་ཕྲན་སྲིན་ཡུལ་དུ༔ ཟངས་མདོག་དཔལ་གྱི་རི་བོ་ཙིཏྟའི་དབྱིབས༔ རི་རྒྱལ་ཁྱད་པར་ཅན་ལ་གསོལ་བ་ཐོབ༔ དེ་ཕྱིར་གུས་གཅིག་མཁར་ཟ་མཚོ་རྒྱལ་ཉོན༔ མི་ལུས་འདི་ཡི་བར་དུ་ཞབས་ཏོག་བྱས༔ ཆོས་ལ་མཛོད་ཅིག་ང་དྲན་གྱིས༔ ཞེས་གསུངས་ནས༔ ཡེ་ཤེས་མཚོ་རྒྱལ་དེ་འདྲ་བྱས་ཏེ༔ ཨུ་རྒྱན་གྱི་སྤྱན་ཆབ་ཤོར་ཏེ༔ ཁྱེད་མྱ་ངན་མ་བྱེད་གསུངས༔ མཚོ་རྒྱལ་ཞལ་ནས༔ ཀྱི་ཧུད་བདག་འདྲ་རྨོངས་པའི་མཚོ་རྒྱལ་ང་༔ མི་ལོ་གྱ་བཞི་བར་དུ་ཆག་ཕྱིས་མཛད༔ ཁམས་གསུམ་དབང་དུ་བསྡུ་བའི་རྒྱན་དུ་བཞུགས༔ སྲིད་གསུམ་རྒྱན་དུ་བཞུགས་པར་ཞུས༔ སེང་གེ་གངས་སྟོད་རྒྱན་དུ་བཞུགས་པར་ཞུ༔ བྱ་རྒྱལ་བྲག་གི་རྒྱན་དུ་བཞུགས་པར་ཞུ༔ ཁྱུང་ཆེན་ནམ་འཕངས་གཅོད་ནི་འགྲོ་ཙམ་ན༔ བྱ་ཕྲུག་ནམ་འཕངས་མི་ཆོད་ཅི་ལ་རྟེན༔ སྔགས་འཆང་བོད་ཀྱི་དོན་དུ་འདིར་བཞུགས་སོ༔ སྔགས་འཆང་མི་འདུག་སྲིན་ཡུལ་བྱོན་ཙམ་ན༔ ཁོ་མོ་ཡེ་ཤེས་མཚོ་རྒྱལ་སུ་ལ་བསྟེན༔ ལྟ་བའི་མིག་གི་ཅི་ལ་བྱེད༔ འདི་འདྲ་ཤུལ་དུ་བསྐྱུར་བ་ཅང་སྲིད་དམ༔ ཁོ་མོ་བདག་ལ་ད་ཡང་ཆོས་གཅིག་གནོངས༔ གསོལ་བ་འདེབས་པའི་ཆོས་གཅིག་བཞག་པར་ཞུ༔

ཨུ་རྒྱན་གྱི་ཞལ་ནས༔ མྱ་ངན་མ་བྱེད་མཁར་ཆུ་ཟ༔ གསོལ་བ་འདི་ལྟར་འདེབས་པར་གྱིས༔ ཨེ་མ་ཧོ༔ གནས་བཅས་ཆོས་སྐུ་རྣམ་དག་ཀློང་ཡངས་ནས༔ འགྱུ་བ་སྤྲུལ་སྐུ་རྣམ་དག་ཐབས་ཤེས་དབྱིངས༔ རིག་པ་ཆོས་ཀྱི་སྐུ་ལ་གསོལ་བ་འདེབས༔ ཆོས་སྐུ་ཀུན་བཟང་རྡོ་རྗེ་སེམས་དཔའ་པའ་སོགས༔ དགའ་རབ་འཇམ་དཔལ་ཤྲྀ་རི་སེང་ཧ་སོགས༔ གྲུབ་ཆེན་ཉི་ཤུ་ལྔ་ལ་གསོལ་བ་འདེབས༔ མཁར་ཆུ་ཟ་ཡིས་ཉམས་སུ་ལོངས༔ ལུས་ནི་སྡིག་ལ་མ་གཏད་སྙིང་རུས་ཀྱིས༔ སེམས་ནི་སྡིག་ལ་མ་ཟད་སྙིང་རུས་ཀྱིས༔ མིག་ནི་ཆུ་ལ་མ་གཟག་སྙིང་རུས་གྱིས༔ མྱ་ངན་མ་བྱེད་ཁྱོད་ལ་ཐུགས་རྗེའི་ཡོད༔ མྱ་ངན་མ་བྱེད་མཁར་ཟ་སྙིང་རུས་མཛོད༔ རྒྱལ་བའི་ལུང་བསྟན་རྟེན་འབྲེལ་བརྒྱ་དང་བཅུ༔ ལོ་གཅིག་བར་དུ་མཚོ་རྒྱལ་སྙིང་ཞུས་ཡིན༔ དེ་བས་ལྷག་པོ་འདུག་པའི་ཕན་མི་འགྱུར༔ དེ་ཕྱིར་བོད་རྣམས་གཏེར་ཤོག་བྱ་བ་སྦས༔ སྲིན་པོ་གླིང་དུ་མ་བྱོན་སྟོང་ཟད་ཡོང་༔ དེ་ཕྱིར་མིན་པའི་མཁར་ཟ་སྐྱུར་མི་སྲིད༔ སྲིན་པོ་ཐམས་ཅད་ཆོས་ལ་འཛུད་ཙམ་ན༔ འགྲོ་བའི་བོད་འབངས་དོན་དུ་ངེས་མེད་ཡོང་༔ ལོ་གཅིག་བར་དུ་བདག་འདྲ་མ་བཞུགས་ན༔ བུད་མེད་ལུས་བླངས་ཡིན་པའི་ཡིད་རེ་ཆད༔ མཚོ་རྒྱལ་འདྲ་བའི་སྙིང་རུས་ཆུང་༔ མཚོ་རྒྱལ་མིག་ལྟར་སེམས་ལྟར་ཡིན་པར་ངེས༔ རྟེན་ས་སུ་ལ་མེད་དེ་སྙིང་རུས་མཛོད༔ དེ་ཕྱིར་མཚོ་རྒྱལ་བསྒྱུར་བ་ཅང་སྲིད་དམ༔ ང་ལ་གསོལ་བ་ཐོབ་ཅིག་རྟེན་ས་ཡིན༔ ཡེ་ཤེས་མཚོ་རྒྱལ་ཐུགས་ལ་དེ་ལྟར་ཞོག༔ མྱ་ངན་མ་བྱེད་བོད་འབངས་བུ་ལྟར་སྐྱོངས༔ ཞེས་གསུངས༔

ཡེ་ཤེས་མཚོ་རྒྱལ་ཞུས་པ༔ ཀྱེ་ཧུད་ཨུ་རྒྱན་ཆེན་པོ་པདྨ་འབྱུང་༔ ཁོ་མོ་བརྟེན་ས་མེད་པ་ཅི་བྱེད་དམ༔ འགྲོ་དོན་མི་ཡོང་ཙམ་དུ་བྱེད་པ་ན༔ རྫུས་སྐྱེས་བྱོན་ཏེ་བདག་ལ་ཞལ་ཏ་མཛོད༔ བེམ་པོ་བྲལ་ནས་ཐུགས་རྗེ་ཨེ་ཡོད་དམ༔ བདག་ཅག་རྨོངས་པའི་ཁོ་མོ་སྙིང་རེ་རྗེ༔ ཀྱེ་མ་ཀྱི་ཧུད་ཨུ་རྒྱན་རིན་པོ་ཆེ༔ དགོངས་ཤིག་དགོངས་ཤིག་ཁོ་མོ་བདག་ལ་དགོངས༔ སྐད་ནི་པི་ཝང་སྒྲོག་པ་སུ་ཡི་བྱེད༔ བདག་ལ་དམ་པའི་ཆོས་རྣམས་སུ་ཡིས་གསུངས༔ ལུས་བཅས་བརྟེན་སོ་སྐྱབས་སུ་སུ་མི་བྱེད༔ བདག་ལ་ལྟ་བའི་ཁ་ཏ་བྱེད་པར་གྱིས༔ ཞེས་ཞུས༔ མཁར་ཟ་ཡེ་ཤེས་མཚོ་རྒྱལ་ལ་ཉོན༔ སེམས་ཀྱི་སྣང་ཐག་ཆོད་པའི་རང་རིག་འཚོས༔ སྙིང་གི་དཀྱིལ་ནས་རྗེ་བཙུན་ང་དྲན་གྱིས༔ ངག་གི་དཀྱིལ་ནས་གུ་རུ་སིདྡྷི་བཟློས༔ སྙིང་རུས་མཛོད་ཅིག་མྱ་ངན་ཅི་ལ་མཛད༔ ཚེ་གཅིག་བསྒོམ་པའི་གསོལ་བ་ཐོབ༔ མ་འོངས་སེམས་ཅན་དོན་དུ་འགྲོ་དོན་གྱིས་གསུངས༔

ཡེ་ཤེས་མཚོ་རྒྱལ་ཞལ་ནས་འདི་གསུངས་སོ༔ ཀྱི་ཧུད་སྔགས་འཆང་ཆེན་པོ་པདྨ་འབྱུང་༔ ལར་འགྲོ་བ་སེམས་ཅན་ཐམས་ཅད་སྙིང་རེ་རྗེ༔ ཁྱད་པར་ཁོ་མོ་བདག་ནི་སུ་ལ་བརྟེན༔ འགྲོ་བའི་དོན་དུ་བཞུགས་པར་ཞུ༔ མི་མིན་འདྲེ་ཡུལ་བྱ་རོག་གདོང་ཅན་དུ༔ ཁོ་མོ་སུ་ལ་བརྟེན་ཏེ་འདུག་པའམ༔ ལྟོ་གོས་ཟས་རྣམས་ཡོང་པ་སྲིད་མེད་པ༔ དབུས་དང་གཙང་རྣམས་ཉི་མ་རྡལ་བར་འདུག༔ ཁོ་མོ་བདག་གི་སྙིང་དབུས་མུན་རུབ་པ༔ རྫུས་སྐྱེས་པདྨ་གང་དུ་བྱོན་སྲིད་པ༔ མ་རྙེད་རྙེད་པའི་བླ་མ་འདི་འདྲ་རྙེད༔ རྙེད་པ་བླ་མ་མཆོག་འདི་གང་དུ་བྱོན༔ ཁོ་མོ་ཤུལ་དུ་བསྐྱུར་བ་ཅང་སྲིད་པ༔ རྫུས་སྐྱེས་རིན་པོ་ཆེ་ཡི་བདག་ལ་དགོངས༔ ཁོ་མོ་མིག་དྲག་བསོགས་ནས་རྒྱ་མཚོ་ཙམ༔ བོད་འབངས་སེམས་ཅན་ཐམས་ཅད་སྙིང་རེ་རྗེ༔ ཁྱད་པར་ཁོ་མོ་ང་འདྲ་ཅི་ལ་བརྟེན༔ རྗེ་བཙུན་འདི་འདྲ་གང་དུ་འགྲོ་བ་སྲིད༔ ཁོ་མོ་ད་ཡང་ཅི་འདྲ་བྱེད་པར་ཞུ༔

ཨུ་རྒྱན་གྱི་ཞལ་ནས༔ ཀྱེ་མ༔ མཁར་ཆུ་ལས་ཅན་སྲས་མོ་ཁྱོད་འདྲ་བ༔ བོད་འབངས་དོན་དུ་འདས་བཞུགས་འགྲོ་དོན་ཡོང་མི་སྲིད༔ ཤོག་དྲིལ་དཔག་མེད་སྦས་ནས་སྲིན་ཡུལ་བྱོན༔ མ་འོངས་རྗེས་འབངས་དོན་དུ་བྱོན་དེའོ༔ སྲིན་པོ་ཐམས་ཅད་ཆོས་ལ་འཛུད་འགྲོ་བ༔ སྔགས་འཆང་ང་ཉིད་མིན་པའི་འདུལ་མི་མེད༔ ཡེ་ཤེས་མཚོ་རྒྱལ་བསྐྱུར་བ་མི་སྲིད་དེ༔ དེ་ཕྱིར་སྲིན་ཡུལ་གླིང་དུ་མ་བྱོན་ན༔ ཁོ་མོ་ཁྱོད་ཀྱི་ཆག་ནི་རབ་ཆེ་བ༔ འགྲོ་དོན་མཆོག་གི་དོན་བྱ་མི་ཡོང་ངམ༔ དེ་ཕྱིར་མུན་པའི་མཚོ་རྒྱལ་ཤུལ་མི་བཞག༔ རྗེ་འབངས་རྣམས་ལ་ཞལ་ཏ་མཚོ་རྒྱལ་གྱིས༔ མ་འོངས་དོན་དུ་ཁྱོད་ཀྱིས་བརྡ་བཀྲོལ་དགོས༔ མྱ་ངན་མ་བྱེད་དམ་ཆོས་བྱེད༔ དེ་ཕྱིར་རྗེ་འབངས་སྲིན་ཡུལ་འགྲོ༔ སྲིན་པོ་ཐམས་ཅད་ཆོས་ལ་འཛུད་དུ་འགྲོ༔ ཞེས་གསུངས༔ མཚོ་རྒྱལ་ཞུས་པ༔ སྔགས་འཆང་མི་འདུག་རྒྱ་གར་ཡུལ་ནས་བྱོན་ཙམ་ན༔ འགྲོ་དོན་ཁོ་མོ་སྐྱེས་རབས་སྦས་བསམ་སྟེ༔ ས་ཡུལ་གང་འདྲ་གཅིག་ལ་སྦས་པར་ཞུ༔ དུས་ཚད་ཆོས་བདག་གང་གིས་བྱེད་དུ་ཡོང་༔ ཞེས་ཞུས༔ ཨུ་རྒྱན་གྱི་ཞལ་ནས༔ བསམ་ཡས་རྒྱལ་པོ་བྲན་ལ་གཏད་པར་གྱིས༔ བདུད་དང་སྒོ་བཞི་རྣམས་ལ་གཏད་ནས༔ སྲིན་ཡུལ་ས་ནས་ས་ཁྱེར༔ ཁྲག་འཁོར་བསྐོར་བའི་སྲིན་པོ་མི་ རྣམས་ཀྱིས༔ དགེ་མེད་སྡིག་ལ་མོས་པའི་རི་ཙམ་སྤོངས༔ སྲིན་པོ་ཤ་ལ་དགའ་བས་མི་ཤ་བཟའ༔ སྲིན་པོ་ཁྲག་ལ་དགའ་བས་མི་ཁྲག་འཐུང་༔ སྲིན་མོ་དགྲ་ལ་དགའ་བས་དམག་དཔོན་བྱེད༔ དགེ་སློང་ཟས་རྔམ་ཆོས་གོས་མཚོན་གདན་བྱེད༔ གཙུག་ལག་ཁང་སྐོར་དུག་རྣམས་ཁྲག་གི་བཅུད༔ མཐུ་དང་དུག་རྣམས་ནང་འཁྲུགས་དར་བའི་དུས༔ རིག་འཛིན་རྡོ་རྗེ་གླིང་པ་དེ་སྐལ་གྱིས༔ ཡིད་ལ་ཟུངས་ཤིག་ཡེ་ཤེས་མཚོ་རྒྱལ་ཉོན༔ ང་ཉིད་སྲིན་པོའི་གླིང་དུ་འགྲོ་བ་ཡིན༔ ང་འགྲོ་ཆོས་དབྱིངས་ཡེ་ཤེས་ཡུལ་དུ་འགྲོ༔ ཆོས་དབྱིངས་ཡེ་ཤེས་ཡུལ་དུ་འགྲོ་ཙམ་ན༔ ཉོན་མོངས་གཏི་མུག་འདུལ་བའི་གཉེན་པོར་འགྲོ༔ ང་འགྲོ་མེ་ལོང་ཡེ་ཤེས་ཡུལ་དུ་འགྲོ༔ མེ་ལོང་ཡེ་ཤེས་ཡུལ་དུ་འགྲོ་ཙམ་ན༔ ཉོན་མོངས་ཞེ་སྡང་གཉེན་པོ་འཇོམས་དུ་འགྲོ༔ ང་འགྲོ་མཉམ་ཉིད་ཡེ་ཤེས་ཡུལ་དུ་འགྲོ༔ མཉམ་ཉིད་ཡེ་ཤེས་ཡུལ་དུ་འགྲོ་ཙམ་ན༔ ཉོན་མོངས་ང་རྒྱལ་གཉེན་པོ་འཇོམས་དུ་འགྲོ༔ ང་འགྲོ་སོར་རྟོགས་ཡེ་ཤེས་ཡུལ་དུ་འགྲོ༔ སོར་རྟོགས་ཡེ་ཤེས་ཡུལ་དུ་འགྲོ་ཙམ་ན༔ ཉོན་མོངས་འདོད་ཆགས་གཉེན་པོ་འཇོམས་དུ་འགྲོ༔ ང་འགྲོ་བྱ་གྲུབ་ཡེ་ཤེས་ཡུལ་དུ་འགྲོ༔ བྱ་གྲུབ་ཡེ་ཤེས་ཡུལ་དུ་འགྲོ་ཙམ་ན༔ ཉོན་མོངས་ཕྲག་དོག་གཉེན་པོ་འཇོམས་དུ་འགྲོ༔ ང་འགྲོ་སྤྱོད་པའི་ལ་ལ་བུད་ནས་འགྲོ༔ སྤྱོད་པའི་ལ་ལ་བུད་ནས་འགྲོ་ཙམ་ན༔ རིག་པ་དྲི་མེད་རྟ་ལ་ཞོན་ནས་འགྲོ༔ ང་འགྲོ་བསྒོམ་པའི་ལ་ལ་བུད་ནས་འགྲོ༔ བསྒོམ་པའི་ལ་ལ་བུད་ནས་འགྲོ་ཙམ་ན༔ རང་རིག་ཆོས་སྐུ་དྲི་མེད་ཡལ་ནས་འགྲོ༔ ང་འགྲོ་གོང་ཐང་ལ་ཁར་བུད་ནས་འགྲོ༔ གོང་ཐང་ལ་ཁར་བུད་ནས་འགྲོ་ཙམ་ན༔ རྟ་མཆོག་བྷ་ལ་ཧ་དང་འགྲོགས་ནས་འགྲོ༔ ང་འགྲོ་ནམ་མཁའ་འཇའ་འོད་ཡལ་ནས་འགྲོ༔ ནམ་མཁའ་འཇའ་འོད་ཡལ་ནས་འགྲོ་ཙམ་ན༔ ཕྱོགས་བཅུ་རྣམས་དང་མཁའ་འགྲོ་འགྲོགས་ནས་འགྲོ༔ ང་འགྲོ་ལྷོ་ནུབ་སྲིན་པོའི་ཡུལ་དུ་འགྲོ༔ སྲིན་གླིང་ཟངས་མདོག་ཡུལ་དུ་འགྲོ་ཙམ་ན༔ སྲིན་པོ་ཐམས་ཅད་ཆོས་ལ་འཛུད་དུ་འགྲོ༔ པད་འབྱུང་མིན་པའི་སུས་ཀྱང་ཐུལ་མི་མེད༔ ཡེ་ཤེས་མཚོ་རྒྱལ་མྱ་ངན་མ་བྱེད་ཅིག༔ མུ་ཁྲི་བཙན་པོ་རྒྱལ་རྒྱུད་ རྣམས་ཀྱི་མྱ་ངན་མ་བྱེད་ཅིག༔ ནམ་མཁའི་སྙིང་པོ་རྗེ་འབངས་རྣམས་ཀྱིས་མྱ་ངན་མ་བྱེད་ཅིག༔ ཅོག་རོ་རྒྱལ་མཚན་ལ་སོགས་ལོ་ཙཱ་རྣམས་ཀྱིས་མྱ་ངན་མ་བྱེད་ཅིག༔ མ་འོངས་སེམས་ཅན་རྣམས་ཀྱིས་ང་དྲན་གྱི༔ ང་འགྲོ་གོང་ཐང་ལ་ཁར་བུད་ནས་འགྲོ༔ མཚོ་རྒྱལ་རྗེ་འབངས་དོས་དྲན་སྐྱོན༔ ཕ་བཀའ་རྒྱུད་བླ་མའི་ཞབས་ཏོག་མཛོད༔ རྒྱ་གར་བུ་མོ་མནྡྷ་ར་བ་མོ༔ སྔོན་དུ་བསུ་བའི་རྒྱ་གར་ཡུལ་ན་འདུག༔ བོད་ཀྱི་བུ་མོ་མཁར་ཟ་མཚོ་རྒྱལ་འདི༔ གོང་ཐང་ལ་ཁར་བར་དུ་ཆགས་ཕྱིས་མཛོད༔ མྱ་ངན་མ་བྱེད་ཡེ་ཤེས་མཚོ་རྒྱལ་ཉོན༔ བརྒྱ་ཅུ་རྩ་ལྔའི་བར་དུ་བསྐྱུར་བ་ཅང་བདེན་ནམ༔ འདི་འདྲ་རྨི་ལམ་ལྟ་བུ་ཡིན་སྲིད་པ༔ དེ་ཕྱིར་འདི་འདྲ་ཡོང་བ་ཅང་བདེན་ནམ༔ བརྒྱ་ཅུ་རྩ་ལྔའི་བར་དུ་ཞབས་ཏོག་བྱས༔ བདག་ལ་ཕྲུ་གུ་ཕོ་མོ་གང་ཡང་མེད༔ མི་མིན་འདྲེ་ཡུལ་ས་འདིར་ཅི་ལ་བརྟེན༔ མཁར་ཆེན་གནས་ནས་འགྲོ་སྟེ་ཕ་མ་འཆི༔ ཁོ་མོ་བདག་ནི་སུ་ལ་རེ་ནི་འདུག༔ ཁོ་མོ་ཤུལ་དུ་བསྐྱུར་བ་ཅང་བདེན་ནམ༔ མུན་ཁང་གསལ་སྒྲོན་རྗེ་བཙུན་གང་དུ་ཕེབས༔ རྒྱལ་ཁམས་ཐམས་ཅད་ཕ་མེད་དྭ་ཕྲུག་གང་༔ སྤྲིན་གྱི་གསེབ་ན་བྱུང་བའི་རྟ་མཆོག་འདི༔ བདག་གི་བླ་མ་གང་དུ་སྤྱན་དྲངས་སོ༔ ཁོ་མོ་ཤུལ་དུ་བསྐྱུར་བ་ཅང་བདེན་ནམ༔ ལུས་ལ་གཅེས་པའི་སྙིང་འདི་གར་བོར་རམ༔ སྙིང་གི་དྭངས་མ་ཁྲག་འདི་གར་བོར་རམ༔ སྔགས་འཆང་པདྨ་གང་དུ་འགྲོ་བར་ངེས༔ མཁར་ཟ་མཚོ་རྒྱལ་བསྐྱུར་བ་ཅང་བདེན་ནམ༔ མུ་ཁྲི་བཙན་པོ་འདྲ་བ་ཤུལ་དུ་བསྐྱུར༔ རྗེ་འབངས་ལས་ངན་འདི་རྣམས་སུ་ལ་རེ༔ འདི་འདྲ་ཤུལ་དུ་བསྐྱུར་བ་ཅང་བདེན་ནམ༔ ཁོ་མོ་བདག་གི་འདི་འདྲ་ཅུང་མིན་བསམ༔ སེམས་ཀྱི་ལྟ་བ་རྟོགས་པ་སུ་ལ་བྱེད༔ ཁོ་མོ་བརྟེན་ས་སྐྱེས་པ་སུ་ལ་བྱེད༔ འདི་འདྲ་མི་ལུས་འདི་ཙམ་ཞབས་ཏོག་བྱེད༔ ཁོ་མོ་ཤུལ་དུ་བསྐྱུར་བ་ཅང་སྲིད་དམ༔ ནམ་མཁའི་དཀྱིལ་ན་ཉི་མ་སེར་པོ་འདི༔ འདི་རྡལ་ཙམ་གྱིས་འགྲོ་ལ་ཅི་ལ་གསལ༔ མཚོ་རྒྱལ་ཤུལ་དུ་བསྐྱུར་བ་ཅང་སྲིད་པ༔

ཀྱེ་མ་ཀྱེ་ཧུད་ཨུ་རྒྱན་རིན་པོ་ཆེ༔ ཅི་ལ་དྲན་ཀྱང་པད་འབྱུང་མེད་ཐབས་མེད༔ ཁོ་མོ་ཤུལ་དུ་བསྐྱུར་བ་ཅང་སྲིད་དམ༔ ལས་ངན་ཁོ་མོ་བདག་འདི་ཅི་ལ་བརྟེན༔ ལུས་འདི་བེམ་རིག་བྲལ་ནས་ཅི་ལ་བརྟེན༔ ཁོ་མོ་བསྐྱུར་བ་ཅང་བདེན་ནམ༔ ཞུས་ནས༔ ས་ལ་འགྱེལ་ལོ༔ རྗེ་འབངས་རྣམས་ས་ལ་འགྱེལ་ནས༔ མྱ་ངན་མང་པོ་བྱས་ནས༔ ཨུ་རྒྱན་ནམ་མཁའ་ནས་ཡལ་ནས་སོང་བ་དེ་ཕྱིར་ཡོང་ནས༔ སྒ་ཕྱི་རུ་འོག་ནས་ལག་པ་བཞག་ནས༔ མཁར་ཟ་ཡེ་ཤེས་མཚོ་རྒྱལ་ང་ལ་ཉོན༔ ང་དང་འདྲ་བ་ཡོད་ན་ང་ཕྱིར་ཤོག༔ བྱ་བ་སྤངས་ན་ང་ཕྱིར་ཤོག༔ ཤ་ཁྲག་བེམ་པོ་མེད་ན་ང་ཕྱིར་ཤོག༔ བེམ་པོ་བྲལ་ན་འདུ་འབྲལ་མེད༔ མྱ་ངན་མ་བྱེད་མཁར་ཆུ་ཟ༔ མ་འོངས་སེར་མོ་ཁྱོད་ཀྱི་བུ༔ ཞེས་གསུངས་ནས་ནམ་མཁར་ཡལ་ནས་སོང་༔ རྗེ་འབངས་རྣམས་དང་ཁོ་མོ་ལ་སོགས་སྔ་དྲོ་ཙམ་ནས་ཕྱི་དྲོ་ཙམ་བར་དབང་པོ་མ་ཡོང་པ༔ ཡར་ལང་ནས་རྗེ་འབངས་རྣམས་ཀྱིས་འབུ་ཏིར་བྱེད་པ༔ ཉི་མ་རྡལ་བ་ལྟར་དུ་ཡོང་ནས་ས་ཐམས་ཅད་འཇིག་པའི་སྣང་བ་ཡོང་ནས༔ ཡེ་ཤེས་མཚོ་རྒྱལ་བསམ་ནས༔ ད་ཡང་མྱ་ངན་བྱེད་ནི་དགོས་མི་སྣང་བ༔ ཨུ་རྒྱན་པདྨ་འདྲ་བ་ལྷོ་ནུབ་བྱོན༔ རང་ལུས་ཤ་ཁྲག་ནམ་འཆི་ཆ་མེད༔ རྗེ་འབངས་རྣམས་ཀྱི་རི་ཁྲོད་ཉུག་ནས་ཆོས་བྱེད་པར་འགྲོ༔ མྱ་ངན་མ་བྱེད་དམ༔ ཨུ་རྒྱན་དང་ལུས་འདི་རྗེས་ནས་འདུ་འབྲལ་མེད་བསམ་པ་ཡིན་གསུངས༔ མུ་ཁྲི་བཙད་པོས་མཚོ་རྒྱལ་ལ་འདི་ཞུས་སོ༔ ཀྱེ་མ་མ་གཅིག་མཚོ་རྒྱལ་རིན་པོ་ཆེ༔ རྒྱལ་ས་ལས་བཅུད་དཔོན་ས་སུ་ཡིས་འཛིན༔ ལྟ་བའི་ཁ་ཏ་སུ་ཡི་བྱེད་པར་འདུག༔ གསོལ་བ་བཏབ་པའི་རེ་ས་སུ་ལ་བྱེད༔ ཨུ་རྒྱན་པདྨ་འདྲ་བ་ལྷོ་ནུབ་བྱོན༔ འདི་འདྲ་བོད་ཁམས་ཉི་མ་ལས་ལ་རྡལ༔ རྒྱལ་རྒྱུད་མཐའ་མ་རྣམས་འདི་ཅི་ལ་བྱེད༔ མཚོ་རྒྱལ་གྱི་ཞལ་ནས༔ ཀྱི་ཧུད་ལྷ་སྲས་མུ་ཁྲི་བཙད་པོ་གསོན༔ དཔོན་ས་བཅུད་བཟུང་པདྨར་གསོལ་བ་ཐོབ༔ བོད་ཡུལ་གླིང་དུ་མུན་འགོ་འདི་ལྟར་རུབ༔ རྗེ་འབངས་ཉེར་ལྔ་མིག་ནི་འདི་ལྟར་བུད༔ ཁོ་མོ་མཚོ་རྒྱལ་སེམས་ནི་འདི་འདྲ་བོར༔ ཉི་མ་ཟླ་བ་ནམ་མཁའ་འདི་ལྟར་ནུབ༔ ད་ཡང་མྱ་ངན་བྱེད་དགོས་མེད༔ རི་ཁྲོད་གནས་སུ་དམ་པའི་ལྷ་ཆོས་མཛོད༔ རྗེ་བཙུན་དྲན་ཏེ་ཐུགས་རྗེ་ཨེ་མི་བཟུང་༔ ཞེས་གསུངས༔ སྣ་ནམ་རྡོ་རྗེ་བདུད་འཇོམས་ཀྱིས་ཞུས་པ༔ ཀྱེ་ཧུད་མ་གཅིག་མཁའ་འགྲོ་མཚོ་རྒྱལ་དགོངས༔ རྒྱལ་ཁམས་ཕ་མེད་དྭ་ཕྲུག་འདི་འདྲ་བུད༔ དྭ་ཕྲུག་རྣམས་ཀྱིས་ཅི་འདྲ་བྱེད་ཤིན་འདུག༔ བོད་ཡུལ་འདི་ཡང་འདི་ལྟར་སྟོང་པ་ཉན༔ བསྐལ་པ་འདི་འདྲ་འཇིག་པའི་དུས་ཡོད་དམ༔ བོད་ འབངས་ལས་ཅན་འདི་རྣམས་སུ་ལ་སྐྱབས༔ འདི་འདྲ་སྡུག་བསྔལ་དགག་མེད་ཀ་ལ་མྱོང་༔ མ་ཅིག་ཡེ་ཤེས་མཚོ་རྒྱལ་ཅི་བྱེད་དམ༔ རྗེ་འབངས་འདི་རྣམས་མཚོ་རྒྱལ་ཆགས་ཕྱིས་མཛད༔ མ་རིག་སྨག་རྣམས་འདི་ལྟར་འཐིབས་པར་སྣང་༔ རྗེ་འབངས་འདི་འདྲ་བྱེད་ནི་འདུག༔ སྐུ་མདོག་དུང་ལྡན་རྫུས་སྐྱེས་པདྨ་འདི༔ ལན་གཅིག་བལྟས་ན་བསྐལ་པ་མཐའ་མ་སྐྱིད༔ འདི་འདྲ་དུས་སུ་སངས་རྒྱས་གང་དུ་ཡོད༔ མཚོ་རྒྱལ་རྗེ་འབངས་འདི་རྣམས་ཤུལ་དུ་བསྐྱུར༔ བོད་ཁམས་ཡོང་ལ་མུན་འགོ་རབ་རིབ་ཡང་༔ ཀྱེ་ཧུད་ཀྱི་ཧུད་མ་གཅིག་མཚོ་རྒྱལ་ཁྱེད༔ རྗེ་འབངས་འདི་རྣམས་གང་འདྲ་ཅི་ལ་བསྟེན༔ མ་ཅིག་མཚོ་རྒྱལ་ཁྱེད་ཀྱིས་ཐུགས་རྗེས་ཟུངས༔ ཞེས་ཞུས་མིག་སྤྱན་ཆབ་མང་པོ་ཡོང་ནས་ཐམས་ཅད་ཀྱིས་མྱ་ངན་བྱེད་པ༔ གོང་ཐང་ནས་ཕྱིར་ཡོང་པ༔ ཡེ་ཤེས་མཚོ་རྒྱལ་ཞལ་ནས༔

ཀྱེ་མ་གསོན་ཅིག་སྣ་ནམ་བདུད་འཇོམས་ཞེས༔ ད་ཡང་སྙིང་རུས་མཛད་པར་གྱིས༔ ཁོ་མོ་བུད་མེད་ལུས་བླངས་སེམས་ཁོག་འཐོར༔ རྗེ་འབངས་ལྟ་བའི་མིག་ནི་བུད་ནས་འདུག༔ ཁོ་མོ་སྙིང་གི་དྭངས་མ་བུད་ནས་འདུག༔ སྒྲུབ་ཕུག་གནས་སུ་ཆོས་མཛད་པ༔ ད་ཡང་མྱ་ངན་མ་བྱེད་ཅིག༔ མྱ་ངན་བྱེད་པའི་ངག་མི་སླེབས༔ དེ་ཕྱིར་སྙིང་རུས་མཛོད་ཅིག་རྗེ་འབངས་རྣམས༔ སློབ་དཔོན་པདྨ་འདྲ་བ་ལྷོ་ནུབ་ཡལ༔ མྱ་ངན་མ་བྱེད་རྗེ་འབངས་རྣམས༔ རི་ཁྲོད་གནས་སུ་ཆོས་སྒྲུབས་ཤིག༔ ཅེས་གསུངས་ནས༔ ཁོ་མོ་ཞེས་དང་སེམས་ཡལ་ནི་འགྲོ་བ༔ ངག་གི་རྗེ་འབངས་རྣམས་ལ་སྙིང་རུས་བཏབ་པ་དང་༔ སེམས་གསོ་བྱེད་པ་ཡིན༔ ཀྱེ་མ་དལ་འབྱོར་ལུས་འདི་ཐོབ་པའི་དོན་ཆུང་སྟེ༔ ནམ་འཆི་ཆ་མེད་རང་དབང་མེད་པའི་དུས༔ རང་དབང་མེད་པའི་རྫུས་སྐྱེས་ལྷོ་ནུབ་བྱོན༔ རྗེ་འབངས་སྙིང་རུས་མཛོད་ཅིག་ཆོས་སྤྱོད་ཅིག༔ མྱ་ངན་བྱེད་པའི་ངག་མི་སླེབས༔ རི་ཁྲོད་གནས་སུ་ཆོས་གཅིག་བསྒྲུབ༔ ལྷོ་ནུབ་དྲུང་དུ་མཆོད་རྟེན་རབ་བཀོད་པ༔ སློབ་དཔོན་སྤྱན་སྔར་སྐྱེ་བ་ཐེ་ཚོམ་མེད༔ མྱ་ངན་མ་བྱེད་རྗེ་འབངས་རྣམས༔ ཆོས་གཅིག་མཛད་ཙམ་བདེ་བའི་རྒྱུ༔ པདྨ་གསོལ་བ་བཏབ་ན་སྤྱན་སྔར་འཁོད༔ ཉིན་དྲན་པདྨ་འབྱུང་གནས་དྲན༔ དེ་ཕྱིར་ཆོས་ལ་དད་གུས་པ༔ མྱ་ངན་མ་བྱེད་རྗེ་འབངས་རྣམས༔ རྫུས་སྐྱེས་དྲན་ནམ་གང་ལ་མེད༔ མ་འོངས་སེར་མོ་ཐམས་ཅད་བདག་གི་བུ༔ ཡིད་དྲན་པའི་ཁོ་མོ་ལ་གསོལ་བ་ཨེ་བཏབ་བམ༔ སྔགས་འཆང་པདྨ་འདྲ་བ་ལྷོ་ནུབ་བྱོན༔ ཡེ་ཤེས་མཚོ་རྒྱལ་འདྲ་བ་ཤུལ་དུ་བསྐྱུར༔ དྲིན་ཅན་བླ་མས་ཐུགས་རྗེས་ཟུངས༔ ཁོ་མོ་ལས་ངན་འདི་འདྲ་ཅང་སྲིད་དམ༔ རྗེ་འབངས་ཉི་ཤུ་རྩ་ལྔའི་རི་ཁྲོད་འགྲིམ༔ རང་རིག་མི་རྟག་ལུས་འདི་བྲལ་ལ་ཁད༔ མཚོ་སྐྱེས་རྡོ་རྗེ་འདྲ་བ་ལྷོ་ནུབ་བྱོན༔ མྱ་ངན་མ་བྱེད་རྗེ་འབངས་ཆོས་ལྟར་བགྱིས༔ ཞེས་གསུངས༔ ཡེ་ཤེས་མཚོ་རྒྱལ་གཉིས་གཅིག་ནང་པར་ཨུ་རྒྱན་སྲིན་ཡུལ་དུ་ཆོས་གསུང་པ་རིག་ནས༔ མནྡྷ་ར་བ་ལ་ཉན་པར་འདུག༔ དེ་ནས་གསོལ་བ་འདི་ལྟར་བཏབ༔

ཨེ་མ་ཧོ༔ ལྷོ་ནུབ་རྔ་ཡབ་སྲིན་ཡུལ་ཕོ་བྲང་ནས༔ ཨུ་རྒྱན་པདྨ་སྐུ་གསུམ་བྱིན་རླབས་ཅན༔ ཁོ་མོ་བདག་གི་ལུས་འདི་བྲལ་ལ་ཁད༔ དྲིན་ཆེན་པདྨའི་སྐུ་དང་དབྱེར་མེད་ཤོག༔ ཁོ་མོ་རང་དོན་ཆོས་སྐུ་འགྲུབ་པར་ཤོག༔ གཞན་དོན་གཟུགས་སྐུ་འབྱུང་བར་བྱིན་གྱིས་རློབས༔ བདག་གཞན་དོན་གཉིས་འགྲུབ་པར་བྱིན་གྱིས་རློབས༔ བདག་ནི་མི་རྟག་འཆི་བའི་དུས་བྱུང་ཚེ༔ སྔགས་འཆང་ཁྱོད་ལ་གསོལ་བ་བཏབ་པའི་མཐུས༔ གདོད་མ་ཟག་བཅས་ཤ་ཁྲག་ཕུང་པོ་འདི༔ ཤུལ་དུ་བསྐྱུར་བ་འདི་ལུས་མ་ཐོབ་སྟེ༔ ལུས་འདི་བྲལ་ནས་འོད་ལུས་ཐོབ་པར་ཤོག༔ ཟངས་མདོག་དཔལ་རི་འབར་བའི་རྩེ་མོ་ན༔ སྒོ་བཞི་གདུགས་བསྐོཪ་ཪིན་ཆེན་གཞལ་ཡས་ཁང་༔ ཕྱི་གསལ་ནང་གསལ་འཇའ་འོད་འབར་བའི་ཀློང་༔ རྫུས་སྐྱེས་པདྨའི་སྲིན་ཡུལ་ཆོས་གསུངས་ཏེ༔ རྗེ་འབངས་བེམ་རིག་བྲལ་བ་དེ་ཡོད་དམ༔ ཁོ་མོ་ལུས་འདི་ད་ཡང་བྲལ་ལ་དགའ༔ མནྡྷ་ར་བ་སྲིན་ཡུལ་གླིང་དུ་འདུག༔ མཚོ་རྒྱལ་ང་འདྲ་བོད་ཁམས་འདིར་ལྷུང་ནས༔ སྲིན་པོ་དགེ་མེད་སྡིག་ལ་དད་པའི་ས༔ ཁོ་མོ་འཇའ་ལུས་མེད་པའི་ཤུལ་དུ་བསྐྱུར༔ འཆི་བའི་ནང་པར་བེམ་རིག་བྲལ་ན་དགའ༔ ཁོ་མོ་འདྲ་བ་མཐའ་འཁོབ་འདས་ཡུལ་ན༔ རྟེན་པའི་ལྟ་བ་རྟོགས་པ་སུ་ལ་བྱེད༔ རྫུས་སྐྱེས་པདྨའི་རྗེས་ཕྱིར་བསྐྱུར་བ་འདུག༔ བེམ་རིག་བྲལ་ལ་ཁོ་མོ་དགའ་བསམ་ཡོད༔ བུ་མོ་ཡེ་ཤེས་མཚོ་རྒྱལ་ང་འདྲ་ན༔ ཐབས་ཤེས་དབྱེར་མེད་མི་འགྱུར་ཆོས་ཀྱི་སྐུ༔ ལུས་འདི་བྲལ་ནས་ཐུགས་རྗེས་ཨེ་བཟུང་ངམ༔ ཁོ་མོ་མཚོ་རྒྱལ་མི་མིན་འདྲེ་ཡུལ་འདིར༔ འདུག་པའི་སྙིང་རྗེ་འཆང་བ་ཨེ་ཡོད་དམ༔ ད་ཡང་ལུས་འདི་བྲལ་ནས་ཤིན་ཏུ་དགའ༔ བེམ་རིག་དཔལ་རི་གནས་སུ་མ་ཐོན་ན༔ རྫུས་སྐྱེས་ཞབས་ཏོག་བྱེད་པ་ཅི་སྲིད་དམ༔ སྲིན་ཡུལ་གླིང་དུ་དོན་མཛད་པ༔ དྲི་མེད་སྔགས་འཆང་སྐུ་དང་དབྱེར་མེད་ཤོག༔ བདག་ནི་མི་རྟག་འཆི་བའི་དུས་འབྱུང་ཚེ༔ བཀའ་རྒྱུད་སྔགས་འཆང་གསོལ་བ་བཏབ་པ་ཡི༔ ཟག་མེད་འོད་དཔུང་ངང་དུ་ཐོབ་པར་ཤོག༔ ཅེས་གསུངས༔

མ་འོངས་བོད་ཀྱི་རྗེ་འབངས་གཏེར་སྟོན་རྣམས༔ མཚོ་རྒྱལ་ང་ཡི་ཞལ་ཏ་དེ་ལྟར་བྱེད༔ གཏེར་ཤོག་འདི་རྣམས་ཁོ་མོ་བདག་གིས་ཕེབ༔ ཨུ་རྒྱན་པདྨའི་ཐུགས་བཅུད་ཟབ་མོ་གནད༔ མཁའ་འགྲོ་ང་ཡི་སྙིང་གི་དྭངས་མའི་ཁྲག༔ མ་འོངས་གཏེར་སྟོན་རྣམས་ལ་གཏད་པ་འདི༔ མི་ལ་སྟེར་ན་བཀའ་བཅག་དམ་ཉམས་པའི༔ ཞིམ་པོ་མི་ལ་བྱིན་ན་སྐྱུགས་ཏེ་འོང་༔ སྙིང་གཏམ་མི་ལ་བྱེད་ན་ཐུགས་ཁྲེལ་གནང་༔ སྙིང་ཚིག་མི་ལ་སྤེལ་ན་ཀུ་སྒྲ་བྱེད༔ ལྟོ་གོས་མི་ལ་བྱིན་ན་གཙང་རྩོག་བྱེད༔ མི་ལ་སྙིང་གཏམ་མ་བྱེད་མཁའ་འགྲོའི་གཏམ༔ རློམ་པ་འཕྱོར་ཤེས་ཅན་གྱིས་ཚིག་ཞུས་པ༔ སྙིང་གི་གཏམ་པ་མ་བྱེད་མཁའ་འགྲོའི་གཏམ༔ དམ་ཆོས་མི་ལ་བསྟན་ནས་ཧབ་ཤ་བྱེད༔ གཏེར་སྟོན་མངོན་ལྐོག་ཡིན་མིན་ཤབ་ཤུབ་འབྱུང་༔ གཏམ་ཚུལ་གཅིག་གམ་མ་བྱེད་མཁའ་འགྲོའི་གཏམ༔ གདམས་ངག་ཟས་སུ་མ་འཇུག་མཁའ་འགྲོའི་གཏམ༔ མན་ངག་མི་ལ་སྤེལ་ན་མཁས་དུག་བྱེད༔ མཁས་པའི་མན་ངག་ཡིད་བཞིན་ནོར་བུ་འདི༔ མི་ལ་སྤེལ་ན་མཁས་རུལ་དུག་ལྟར་བྱེད༔ ཨུ་རྒྱན་པདྨའི་ཐུགས་ཀྱི་མན་ངག་གནད༔ ཐབས་མཁས་ཆེ་བ་ཡིད་བཞིན་ནོར་བུ་ཡིན༔ ཐབས་མི་མཁས་པ་ཙམ་གྱིས་དུག་སྦྲུལ་འཆིངས༔ ཡུན་རིང་དུས་གཅིག་བསྒྲུབ་པ་རིང་བར་རྒྱོབ༔ ཀུ་སྒྲ་ཏིར་ཏིར་མངོན་ལྐོག་ཤབ་ཤུབ་འབྱུང་༔ སྐབས་སྐབས་སྔགས་འཆང་པདྨར་གསོལ་བ་ཐོབ༔ གཏེར་སྟོན་ལྟ་བ་ཁ་ལ་མ་འཛོམ་གྱི༔ ཡུན་གནས་དུས་གཅིག་སྐྱེ་བ་ཅུང་མི་སྲིད༔ རློམ་ས་འཕྱོར་ཤེས་རིག་བཅོལ་མ་བྱེད་ཅིག༔ ལྟ་སྤྱོད་མ་ཡངས་སྙིང་གཏམ་མ་བྱེད་ཅིག༔ སྙིང་གཏམ་བྱེད་ཙམ་མཁའ་འགྲོའི་བཀའ་བཀྱོན་འོང་༔ འགལ་རྐྱེན་མེད་པའི་གནས་སུ་སྒྲུབ་པ་མཛོད༔ ཆོས་པ་རབ་འབྲིང་ལྷ་འདྲེ་རབ་གསུམ་ཚད༔ དཀར་པོ་ལྷ་ཟབ་པ་ལ་ནག་པོ་བདུད་ཀྱང་ཟབ༔ འགལ་རྐྱེན་བཅད་པའི་གནས་ཀྱི་སྒྲུབ་པ་མཛོད༔ སྒྲུབ་རྟགས་མ་ཐོན་བར་དུ་སྒྲུབ་པ་མཛོད༔ གཞན་འཕྱོར་ཤེས་བཞིན་རིག་བཅོལ་མ་བྱེད་ཅིག༔ རི་རབ་ལྟ་བུ་བློ་ལྡན་སྒོམ་པ་འདི༔ ཡང་བའི་ཤིང་བལ་ལྟ་བུ་མ་བྱེད་ཅིག༔ སྣང་སྲིད་ཆོས་སྐུ་རྟོགས་པའི་སངས་རྒྱས་འདི༔ ལྟ་བ་ཁ་འཛོམ་དམིགས་འཐུབ་མ་བྱེད་ཅིག༔ མན་ངག་སྙིང་གི་དྭངས་མའི་ཁྲག་འདྲ་འདི༔ ས་ལ་གཏོར་ཏེ་མན་ངག་ཐང་དུ་འཕོངས༔ བྱིས་པའི་རྩེ་མོ་ལྟ་བུ་མ་བྱེད་ཅིག༔ གཏེར་ཤོག་འདི་འདྲའི་ཡིད་བཞིན་ནོར་བུ་མེད༔ བཀའ་རྒྱ་མ་གྲོལ་བར་དུ་ཐབས་བསྟན་ནས༔ དུག་སྦྲུལ་འཆིངས་ཏེ་ཐར་པའི་གནས་སུ་འགྲོ༔ འགྲོ་བའི་དོན་མཛད་མེད་པའི་སྐྱེ་བ་འཕོས༔ སྙིང་ཟས་མི་ལ་མི་སྟེར་དགྲ་རུ་ལང་༔ སྙིང་གཏམ་མི་ལ་མ་བྱེད་བདུད་དུ་ལང་༔ མན་ངག་མི་ལ་མ་སྟེར་དུག་ཏུ་ཡོང་༔ མི་ལ་འཁྲོ་བ་མ་བྱེད་དམ་ཚིག་ཉམས༔ འཛུམ་པ་མ་བྱེད་འཁོར་གཡོག་དཔོན་དུ་ལང་༔ སུ་འགྲོགས་ཡོན་ཏན་མི་འབྱུང་གཅིག་པུར་འདུག༔ ལྟོ་གོས་གཡོག་བྱེད་ཕུང་པ་ཞིག་མ་བཞག༔ བུ་རྣམས་རྣམ་རྟོགས་མ་ཤོར་སྐྱོན་དུ་འགྱུར༔ རློམ་པ་འཕྱོར་ཤེས་བཞིན་པའི་ཚུལ་མ་རྟེན༔ ཟོལ་ཟོག་གཡོ་སྒྱུ་མཁན་ལ་ཆོས་མ་སྤེལ༔ རང་སེམས་ཆོས་སྐུ་ཡིད་བཞིན་ནོར་བུ་འདི༔ ཟོལ་ཟོག་གཡོ་སྒྱུ་མཁན་ལ་སྤེལ་ཙམ་ན༔ སྣོད་དང་མི་ལྡན་ཀི་ཏིར་ཧབ་ཤ་བྱེད༔ གཏེར་སྟོན་རྣམས་ཀྱིས་མཐོ་ངོ་དམའ་ཞེད་བྱེད༔ མཐོ་བདམ་དམའ་བསྐྱུར་མ་བྱེད་སྙིང་གཏམ་ཡིན༔ སྣང་བ་མིག་གིས་གཟུགས་ལ་བཟང་ངན་བྱེད༔ བཟང་ངན་མ་བྱེད་མཁའ་འགྲོའི་སྙིང་གཏམ་ཡིན༔ མཐོ་བདམ་བྱེད་པའི་ཐབས་ལ་མཁས་པ་མེད༔ ཐབས་ལ་མ་མཁས་ཚངས་པ་རྩལ་དུ་མེད༔ སྐབས་སྐབས་ཁོ་མོ་བདག་དང་འདུ་འབྲལ་མེད༔ ནམ་ཞིག་བསྒྲུབ་པ་བྱས་ན་མཁོ་བ་ཡོད༔ རྫུས་སྐྱེས་པདྨ་འདྲ་བ་ལྷོ་ནུབ་བྱོན༔ མཁར་ཟ་མཚོ་རྒྱལ་འདྲ་བ་ཤུལ་དུ་བསྐྱུར༔ མ་འོངས་གཏེར་སྟོན་རྣམས་ཀྱི་ཐུགས་ལ་ཞོག༔ སྔགས་འཆང་པདྨ་བོད་ལ་ཐུགས་རྗེ་ཆེ༔ མཁར་ཟ་མཚོ་རྒྱལ་བོད་ལ་དྲིན་ཆེའོ༔ ལས་འཕྲོ་དོན་དུ་རི་བྲག་ལུང་པ་རྣམས༔ ཨུ་རྒྱན་ཉིད་ཀྱིས་བསྒྲུབས་ཕྱིར་བྱིན་རླབས་ཡིན༔ མ་འོངས་བུ་ཆེན་རྣམས་ཀྱི་ཐུགས་ལ་ཞོག༔ ཀྱེ་མ་མ་འོངས་བླ་མ་རྣམས་ཀྱི་སྙན་ཕྱིར་དུ༔ སྣང་སྲིད་ཆོས་སྐུ་རྟོགས་པའི་བླ་མ་འདི༔ འགྲོ་དོན་བྱེད་པའི་ཐབས་མཁས་དངོས་གྲུབ་སྩོལ༔ མ་འོངས་དུས་ན་ཟོལ་ཟོག་གཡོ་སྒྱུ་མཁན༔ རྒྱལ་བའི་བཀའ་ལུང་མེད་པའི་དབང་བསྐུར་བྱེད༔ དེ་ལྟ་མ་བྱེད་རང་རིག་ཆོས་སྐུ་འཚོས༔ སྐྱེ་མེད་རྣམ་དག་ཆོས་སྐུའི་རང་བཞིན་ལ༔ འགགས་པ་མེད་པ་གཟུགས་སྐུ་རྣམ་གཉིས་འབྱུང་༔ འགགས་པ་མེད་པ་རང་རིག་དྲི་མེད་འཚོས༔ ཡི་དྭགས་ལྟ་བུ་སེར་སྣ་མ་བྱེད་ཅིག༔ སྟག་གཟིག་ལྟ་བུ་ང་རྒྱལ་མ་བཟུང་ཞིག༔ དུག་སྦྲུལ་ལྟ་བུ་ཁོང་ཁྲོ་མ་བྱེད་ཅིག༔ འཆལ་བའི་དབང་དུ་མ་བཏང་ཆོས་སྐུ་འཚོས༔ སྣང་སྲིད་ཆོས་སྐུ་རྟོགས་པའི་བླ་མ་ནི༔ ཀུན་གཞི་ཡངས་པའི་ཕྱོགས་ལྷུང་མཐའ་དང་བྲལ༔ མཐའ་ལྡོམ་བྱེད་ཀྱང་ཅང་སྲིད་དམ༔ རང་དོན་མ་འགྲུབ་གཞན་དོན་གང་ལ་ཡོང་༔ རང་རིག་སྣང་ཐག་རང་གིས་མ་ཆོད་ན༔ སྣང་བའི་ཡུལ་གྱི་སེམས་ཅན་མགོ་མ་བསྐོར༔ གཞན་དོན་ཤོར་ལ་རང་དོན་ལྟ་བ་གྱིས༔ རྒྱལ་པོ་མཆོད་གནས་བསྙེན་བཀུར་བྱེད་པ་ན༔ རང་དོན་བཞུགས་སུ་བརྡལ་ནི་འགྲོ་བ་ཡོད༔ ཡོན་བདག་ཐབས་ཀྱིས་ངོ་སྲུང་བྱེད་པ་ན༔ རང་དོན་བོར་ཙམ་ལམ་དུ་འཁྲུལ་པ་འདུག༔ ཕྱོགས་མེད་གདུལ་བྱ་ལྟ་བུ་ཉུག་ཙམ་ན༔ སྣང་བ་འཁྱམས་པའི་རང་དོན་བོར་ལ་ཁད༔ ཟང་ཟིང་འདི་རྣམས་དུས་རྣམས་བལྟས་པ་ན༔ རང་དོན་བཞུགས་སུ་བོར་བའི་གནས་ཡོད་དོ༔ རང་རིག་འཚོ་བའི་སེམས་ཉིད་ཏིང་གཅིག་སྒོམས༔ རང་རིག་སྟོང་གསལ་ཆོས་སྐུ་རྟོགས་ཙམ་ན༔ འགྲོ་བ་སེམས་ཅན་རྣམས་ཀྱི་དོན་བྱེད་དོ༔ མ་རྟོག་བདག་གཞན་འཁྲུལ་པ་མ་བྱེད་ཅིག༔ འགྲོ་བའི་དོན་དུ་གྲ་ལན་རྟེན་ཤེས་ཀྱིས༔ རང་གི་ཆོས་སྐུ་མན་ངག་གནད་ཤེས་ཀྱིས༔ དུག་ལྔའི་དབང་དུ་མ་གཏོང་ཁྲིད་ཤེས་ཀྱིས༔ མ་འོངས་བླ་མ་རྣམས་ཀྱིས་དེ་ལྟར་མཛོད༔ སྔགས་འཆང་པདྨ་གཅིག་པུར་ལྷོ་ནུབ་བྱོན༔ ཁོ་མོ་མཚོ་རྒྱལ་བོད་འབངས་རྗེས་ཕྱིར་བསྐྱུར༔ དཔེར་ན་རང་རིག་དོན་རྣམས་དེ་དང་འདྲ༔ མ་འོངས་བླ་མ་རྣམས་ཀྱི་ཐུགས་ལ་ཞོག༔ མཚོ་རྒྱལ་བདག་ལ་ཐུགས་ཁྲེལ་མ་གནང་ཞིག༔ ཀྱེ་མ་མ་འོངས་བོད་ཀྱི་སྒོམ་ཆེན་རྣམས༔ བརྟན་པ་ཐོབ་ཅིང་འོད་གསལ་གཡོ་འགུལ་མེད༔ སྒོམ་པ་བྱེད་ཟེར་སེང་གེ་ལྕགས་མི་བརྡོད༔ གླང་ཆེན་སྨྱོན་པ་ལྟ་བུ་ས་མི་ཉུག༔ སྔོན་བསུ་རྗེ་ཕྱིར་མ་བྱེད་སྒོམ་པ་རྣམས༔ སྟོང་གསལ་ཡིན་བསམ་བདེ་གསལ་གོལ་མ་བཅུག༔ སྣང་བའི་ཡུལ་དུ་འགྲོ་བའི་སྣང་ཐག་བཅད༔ ཉེར་བར་གནས་སུ་འདུག་པའི་རིག་ཐག་བཅད༔ རིག་པ་དྲི་མེད་ཤེལ་ལྟར་སྒོམས་པར་གྱིས༔ ནམ་མཁའ་ལྟ་བུ་རྒྱ་མ་ཆད་པའི་ཀློང་༔ ས་གཞི་ལྟ་བུ་དྲན་པའི་རྒྱ་བསྐྱེད་པ༔ ཉི་ཟླ་ལྟ་བུ་རིག་པའི་རང་མདངས་གསལ༔ སྒོམ་པ་བྱེད་ཟེར་ང་རྒྱལ་མ་བྱེད་ཅིག༔ སྒོམ་ཆེན་ལྟ་བུ་ཆོས་ཀྱི་དབྱིངས་ཉིད་དུ༔ མ་འགགས་རིག་པ་དྲི་མེད་ངང་ལ་ལྟོས༔ ཕྱོགས་རིས་གྱོད་རྣམས་དུས་འཁྲུག་མ་བཟུང་ཞིག༔ སེམས་བསྐྱེད་མེད་པའི་གཉིས་འཛིན་མ་བཟུང་ཞིག༔ རང་རིག་ཆོས་ཀྱི་སྐུ་ལ་འགྱུར་བ་མེད༔ སྒོམ་པའི་ལྟ་བ་ཁ་ལ་མ་འཛོམ་གྱིས༔ ཡོན་བདག་ངོ་བསྲུང་ཟས་ལ་མ་ཆགས་ཤིག༔ སྔགས་འཆང་པདྨ་ཡེ་ཤེས་མཚོ་རྒྱལ་གཉིས༔ རི་ཁྲོད་གནས་སུ་མང་པོ་འདུག་ཙམ་ན༔ རྫུས་སྐྱེས་པདྨ་ལྷོ་ནུབ་གཅིག་པུར་བྱོན༔ ཁོ་མོ་མཚོ་རྒྱལ་གཅིག་པུར་ཤུལ་དུ་བསྐྱུར༔ བསྒོམ་ཆེན་རྣམས་ཀྱི་ཐུགས་ལ་དེ་ལྟར་ཞོག༔ ཁོ་མོ་བདག་ལ་ཐུགས་ཁྲེལ་མ་གནང་ཞིག༔ ཀྱེ་མ་བོད་ཀྱི་བནྡེ་རྣམས༔ ཁོ་མོ་བོད་འབངས་བུ་ལྟར་སྐྱོངས༔ སློབ་དཔོན་རྒྱང་ནས་བརྟགས་ཙམ་དྲུང་ནས་བརྟགས༔ སློབ་དཔོན་སློབ་མ་མ་བརྟག་དམ་ཚིག་ཉམས༔ དགོན་སྡེ་ནང་དུ་དམ་པའི་ལྷ་ཆོས་མཛོད༔ ཚོང་ཁེ་ཟང་ཟིང་རྟེན་པ་མ་བྱེད་ཅིག༔ གོ་ཁང་མནའ་སྲིང་བུ་རྫི་མ་བྱེད་ཅིག༔ དམག་འགོ་ཇག་སྙིང་ང་རྒྱལ་མ་བྱེད་ཅིག༔ ཁྱིམ་ཐབ་མནའ་སྲིང་ཟས་ལ་མ་ཆགས་ཤིག༔ མི་ཁོམ་རང་བཞིན་གནས་བརྒྱད་ལྷོད་ཀྱིས་སྐྱུར༔ དགོན་སྡེ་ནང་དུ་དམ་ཆོས་མཛོད༔ བུ་རིག་འཛིན་རྣམས་ཀྱིས་ལྷ་ཆོས་མཛོད༔ མནའ་སྲིང་གོ་གཡོག་བུ་རྫི་བྱེད་པ་འཁྲུལ༔ སྐྱེ་རྒས་ན་འཆི་བདག་ཉིད་གཅིག་པུར་འཆི༔ རྫུས་སྐྱེས་པདྨ་འདྲ་བ་ལྷོ་ནུབ་བྱོན༔ མཁར་ཟ་མཚོ་རྒྱལ་འདྲ་བ་ཤུལ་དུ་བསྐྱུར༔ བོད་འབངས་བདྡྷེ་རྣམས་ཀྱི་ཐུགས་ལ་ཞོག༔ ཁོ་མོ་བདག་ལ་ཐུགས་ཁྲེལ་མ་བཏང་ཞིག༔ ཀྱེ་མ་མ་འོངས་བོད་ཀྱི་སྔགས་འཆང་བསྟན་སྐྱོང་རྣམས༔ སྔགས་གསུམ་མི་ཤེས་ལྷ་འདྲེ་མགོ་མ་བསྐོར༔ རྫུས་སྐྱེས་སྔགས་འཆང་པདྨའི་ཐུགས་རྗེ་གནང་༔ ལུས་ནི་ལྷ་རུ་ཤེས་པའི་གོས་སུ་བསྐྱེད༔ ངག་ནི་སྔགས་སུ་སྒྲོག་པའི་ཏིང་འཛིན་བསྐྱེད༔ སེམས་ཉིད་ཏིང་འཛིན་སྔགས་གསུམ་གོས་སུ་བསྐྱེད༔ སྤྱི་བོར་ཡེ་ཤེས་སེམས་དཔའ་དབུ་ལ་བརྒྱན༔ བདག་ལུས་དམ་ཚིག་སེམས་དཔའ་ལུས་ལ་བཀོད༔ ཐུགས་ཀར་ཡེ་ཤེས་སེམས་དཔའ་དྲན་བསྐྱེད་གྱིས༔ སྐྱེ་མེད་ཕན་པའི་ཐར་ལམ་བྱེད་པར་གྱིས༔ རང་ཉིད་སྔགས་སུ་ཆོས་སྐུ་མ་བསྐྱེད་ན༔ རྩང་ཆུ་ཕྱོགས་ལ་འགྲོ་བའི་ཕན་མི་མཆིས༔ སེམས་ཀྱི་ཟང་ཟིང་བསམ་པའི་རི་མ་བསྐོར༔ ངག་གིས་གསུངས་པ་ཆུ་དང་ཆུ་རྡོ་བྱེད༔ དེ་འདྲ་མ་བྱེད་མ་འོངས་སྔགས་པ་རྣམས༔ རྒྱུད་ལྡན་སྔགས་དང་ལྡན་པའི་ཕན་ཐབས་ཀྱིས༔ སྣང་ཡུལ་ཟ་བློ་འཐུང་བློ་མ་བྱེད་ཅིག༔ སྔགས་འཆང་རྟེན་བྱེད་རྫས་རྣམས་ཚང་བར་བྱེད༔ ཚང་བར་མ་བྱེད་སྔགས་འཆང་ཚེ་ལ་ཡོང་༔ རྟེན་བྱེད་རྫས་རྣམས་དགོས་མེད་སྔགས་བཅས་ནས༔ བདུད་རྩི་འགྲོ་མེད་དུག་ཏུ་ལང་བ་སྲིད༔ རྟེན་རྫས་དུས་རྣམས་འགྲོ་བ་སྲིད་པ་ཡི༔ ཕན་ཐབས་བྱེད་པའི་སེམས་བསྐྱེད་དུག་མ་ལྡན༔ གཏེར་མ་ཤེས་པའི་གནས་ཀྱི་སྒོས་བསྐྱེད་གྱིས༔ རྒྱལ་བ་བཀའ་ཡི་ཆགས་མཛད་མ་བཅས་ན༔ ཕན་པའི་ཐབས་མེད་གནོད་པ་འགྲོ་བ་སྲིད༔ རྒྱལ་བའི་བཀའ་ཡི་ཆགས་བཅས་ཐོས་པ་ན༔ ཕན་པའི་ཐབས་ནི་མི་འགྱུར་རོ༔ རྫུས་སྐྱེས་པདྨ་འདྲ་བ་ལྷོ་ནུབ་བྱོན༔ ཁོ་མོ་མཚོ་རྒྱལ་འདྲ་བ་རྗེས་ཕྱིར་བཞག༔ མ་འོངས་སྔགས་འཆང་རྣམས་ཀྱི་ཐུགས་ལ་ཞོག༔ ཁོ་མོ་བདག་ལ་ཐུགས་ཁྲེལ་མ་གནང་ཞིག༔

ཀྱེ་མ་མ་འོངས་དུས་ཀྱི་ལྷ་བཟོ་རྣམས༔ རྒྱུད་ལྡན་སངས་རྒྱས་ལྷ་དང་ལྡན་པར་གྱིས༔ གཡོ་སྒྱུ་ཟོལ་ཟོག་མཁན་དུ་མ་བྱེད་ཅིག༔ གླ་དད་མ་ཆེ་རྒྱལ་བའི་སྐུ་བཟོ་གྱིས༔ རིན་པོ་ཆེའི་ནང་དུ་དུག་མ་བསྲེ༔ འབྲུ་བཅུད་རྐྱེན་སྦྱོར་ལྷ་རྣམས་ཤེས་པར་གྱིས༔ འགྲོ་བའི་སངས་རྒྱས་སྐུ་གཅིག་ལྟ་བུ་བཞེངས༔ སྟོང་གསལ་ནང་དུ་བྲི་བའི་དོན་བྱ་བ༔ རིག་པ་དྲི་མེད་ལྟ་བུ་ལྷ་གཅིག་བཟོ༔ རྫུས་སྐྱེས་གཅིག་པུ་སྲིན་པོའི་གླིང་དུ་བྱོན༔ མཁར་ཟ་མཚོ་རྒྱལ་ང་འདྲ་ཤུལ་དུ་བསྐྱུར༔ མ་འོངས་ལྷ་བཟོ་རྣམས་ཀྱི་ཐུགས་ལ་ཞོག༔ ཁོ་མོ་བདག་ལ་ཐུགས་ཁྲེལ་མ་གནངས་ཤིག༔ ཀྱེ་མ་མ་འོངས་བོད་ཀྱི་སྨན་པ་རྣམས༔ ཚད་མེད་བཞི་དང་ལྡན་པའི་སྨན་སྦྱོར་གྱིས༔ སྨན་སྦྱོར་མ་ཤེས་དུག་ཏུ་སོང་བ་སྲིད༔ བདེ་བ་ཆོས་སྐུ་ལྟ་བུའི་སྨན་ཁུང་དུ༔ གསལ་བ་ལོངས་སྐུ་ལྟ་བུའི་སྨན་སྦྱོར་གྱིས༔ མི་རྟོགས་ལྟ་བུ་ནད་རྣམས་སེལ་ཐབས་ཀྱིས༔ སྣང་བ་ཆོས་སྐུ་ལྟ་བུ་སྨན་མཆོག་དང་༔ རང་རིག་དྲི་མེད་ལྟ་བུ་སྨན་སྦྱོར་གྱིས༔ སྣང་བ་ཤ་ཁྲག་ནད་ལ་ཕན་ཐབས་གྱིས༔ ཁོ་མོ་སྐྱེ་བ་མེད་པ་སྨན་གྱི་མཆོག༔ རང་རིག་སྟོང་གསལ་ལྟ་བུའི་སྨན་སྦྱོར་གྱིས༔ རིག་པ་དྲི་མེད་ལྟ་བུའི་སྨན་གཅིག་མཛོད༔ ཉོན་མོངས་དུག་གསུམ་འཇོམས་པའི་ནད་འཇོམས་གྱིས༔ ཚད་མེད་བཞི་དང་ལྡན་པའི་སྨན་གསོས་གྱིས༔ སྨན་ཡོན་གླ་དད་མ་ཆེ་འགྲོ་དོན་གྱིས༔ རྫུས་སྐྱེས་པདྨ་འདྲ་བ་སྲིན་ཡུལ་བྱོན༔ ཁོ་མོ་མཚོ་རྒྱལ་འདྲ་བ་ཤུལ་དུ་བསྐྱུར༔ མ་འོངས་སྨན་པ་རྣམས་ཀྱི་ཐུགས་ལ་ཞོག༔ ཀྱེ་མ་འཇིག་རྟེན་བདེན་པའི་ཀུན་རྫོབ་མོ་བ་རྣམས༔ ལྟ་བྱེད་རྡེའུ་དཀར་ནག་རྩིས༔ སྲོག་ཆགས་མི་འབགས་ཐབས་ཀྱིས་མོ་རྩིས་མཛོད༔ འཇིག་རྟེན་ཁོ་ན་སྡིག་པ་འདི་རྣམས་ལ༔ རྫུས་སྐྱེས་པདྨ་འདྲ་བ་སེན་ཙམ་སྐྲག༔ ཐབས་ལམ་ལྡན་པའི་རིག་བཅོལ་མ་བྱེད་ཅིག༔ མོ་རྣམས་རྡེའུ་བཤད་པ་མི་འདུག་སྟེ༔ རིག་པའི་བཙལ་ནི་འགྲོ་བའི་སྲོག་ལ་འབགས༔ མོ་པ་ཆེ་མཁྱེན་རྡེའུ་དཀར་ནག་རྩིས༔ དགེ་བ་ཆེ་བའི་སྡིག་པའི་ཁ་ནོན་མཛོད༔ རྫུས་སྐྱེས་པདྨ་འདྲ་བ་ལྷོ་ནུབ་བྱོན༔ བུད་མེད་མཁར་ཟ་ཡིན་བསམ་འགྲོ་རྩིས་བྱེད༔ ཐུགས་ཁྲེལ་མ་གནང་འཇིག་རྟེན་བོད་ཀྱི་མོ་བ་རྣམས༔ མོ་པ་རྣམས་ཀྱི་ཐུགས་ལ་དེ་ལྟར་ཞོག༔

ཀྱེ་མ་བོད་ཀྱི་མི་དཔོན་གཙོ་བོ་རྣམས༔ མཐའ་དམག་དུས་འཁྲུག་དགོན་སྡེ་མ་བཤིགས་ཤིག༔ འཕྲུལ་བློན་འཁོར་འབངས་ཁ་ལ་ཉན་རོགས་མེད༔ བུད་མེད་ནག་པོ་ཁ་ལ་ཉན་རོགས་མེད༔ མཐའ་དམག་དགོན་སྡེ་མ་བཤིགས་དམ་ཆོས་མཛོད༔ མགོ་ནག་ཆེ་བའི་ཁྲི་སྲོང་ལྡེའུ་བཙན་འདི༔ བུད་མེད་དམར་རྒྱན་ཀླུ་གོང་ཁ་ལ་ཉན༔ བྷེ་རོ་ཙ་ན་འདྲ་བ་ཚ་རུང་སྤྱུགས༔ སྔགས་འཆང་པདྨ་འདྲ་བ་བསྐུར་པ་བཏབ༔ སྐྱེ་འཆི་རྒྱལ་པོ་རང་རིག་གཅིག་པོ་ཡིན༔ ཁྲི་སྲོང་ལྡེའུ་བཙན་མྱ་ངན་ལས་འདས་ནས༔ ཟངས་མདོག་པདྨའི་མདུན་དུ་མྱུར་དུ་ཐོན༔ དམར་རྒྱན་འཆི་ཙམ་རིག་པ་དགུ་འགྱུར་སོང་༔ དཔེར་ན་དེ་དང་དུས་མཚུངས་འདྲ་བའོ༔ སེར་མོ་དགོན་སྡེ་མ་བཅོམ་བོད་ཀྱི་དཔོན༔ ཁོ་མོ་བདག་གི་བུ་ནི་སེར་མོ་བ༔ བཅོམ་པ་ཙམ་གྱིས་པདྨའི་བཀའ་རྐྱེན་འོང་༔ ཁོ་མོ་ཡོད་པའི་མ་འོངས་སེར་མོ་འདི༔ བདག་གིས་བུ་ལྟར་སྐྱོང་བའི་དྲིན་ཆེ་བ༔ བཅོམ་པ་ཙམ་གྱིས་ཁོ་མོ་བཀའ་མེད་དོ༔ ཅི་བྱེད་མཁའ་འགྲོ་བཀའ་ནི་ཡོད་པར་ངེས༔ རྫུས་སྐྱེས་པདྨ་སྲིན་ཡུལ་གཅིག་པུར་བྱོན༔ ཁོ་མོ་གཅིག་པུར་མཁར་ཟ་ཤུལ་དུ་བསྐྱུར༔ བོད་ཀྱི་གཙོ་བོ་རྣམས་ཀྱི་ཐུགས་ལ་ཞོག༔ ཁོ་མོ་བདག་ལ་ཐུགས་ཁྲེལ་མ་གནང་ཞིག༔

ཀྱེ་མ་མ་འོངས་དུས་ཀྱི་སྐྱེས་བུ་རྣམས༔ ཆེ་འདོད་ཧོར་འདུག་ལས་ཀ་མ་བྱེད་པ༔ སྡིག་ལ་མོས་ཤིང་དགེ་བའི་བསམ་པ་མེད༔ ངན་སོང་གནས་སུ་ལྟུང་སྟེ་འགྱོད་པ་སྐྱེས༔ དེ་འདྲ་མ་བྱེད་མ་འོངས་སྐྱེས་པ་རྣམས༔ ང་རྒྱལ་ངས་གཏམ་ཚུལ་བཟུང་མ་བྱེད་པ༔ བསོགས་པའི་ཟང་ཟིང་སྡིག་ལ་མ་བཏང་ཞིག༔ རྒྱུ་རྐྱེན་རང་སེམས་མནའ་ལ་མ་བཏང་ཞིག༔ ཕྱོགས་དམག་དགོན་སྡེ་ཇག་སྣ་མ་ཁྲིད་ཅིག༔ མ་འོངས་སྐྱེས་པ་བུད་མེད་དབང་ཤོར་འཁྲུལ༔ བུད་མེད་གཏམ་དང་ཕོ་རོག་ནག་པོའི་སྐད༔ དགེ་བ་ཏིལ་ཙམ་མེད་པའི་སྡིག་ལ་མོས༔ གཟའ་འཐབ་ཆེ་གཏམ་ཧོར་འདུག་མ་བྱེད་ཅིག༔ ཁོང་རྒྱས་ངག་གིས་གླུ་མགུར་མ་བྱེད་ཅིག༔ དེ་བས་སྔགས་འཆང་པདྨར་གསོལ་བ་ཐོབ༔ མཆོར་ཕྱུག་བདམ་པའི་སྐྱེས་པ་ཐམས་ཅད་འཁྲུལ༔ བུད་མེད་ཁ་ལ་རྒྱུག་པའི་གྲོང་འཐབ་བཤིས༔ སྐྱེས་པའི་ལུས་དང་སྣང་བ་མ་ཡེངས་ཤིག༔ མནའ་དང་རྐུན་མ་ཇག་པ་མ་བྱེད་ཅིག༔ ངན་སོང་སྒོ་དྲུག་གནས་སུ་ལྷུང་ཙམ་ནས༔ འགྱོད་པ་བྱས་པས་རབ་ཏུ་ངག་མི་སླེབས༔ སྡིག་ཟས་མ་བྱེད་བསོགས་པའི་ཆོས་ལ་ཐོངས༔ གང་གི་མི་རྣམས་འཆི་རོག་མི་བྱེད་པ༔ ནམ་འཆི་ཆ་མེད་ནམ་ལང་སྐར་མ་འདྲ༔ ཐུང་རབ་གཟའ་མི་ཁྲོ་འཛུམ་མ་བྱེད་ཅིག༔ ཉེ་བ་དང་པོ་ཞལ་འཛུམ་མུ་ལེ་བྱས༔ ཐ་མ་ཁྲོ་བྱེད་འཐབ་པའི་རྒྱུན་མི་བཅད༔ ངན་སོང་ལོག་པའི་ལམ་དུ་ལྟུང་སྲིད་པ༔ སྣང་བ་འཕྱོར་དགའ་དར་གོས་རྒྱན་ལ་ལྟ༔ ཁུང་གནས་མེད་པའི་ལས་སུ་འགྱོད་པ་སྐྱེས༔ བསོགས་པའི་རྒྱུ་རྣམས་མནའ་དང་གཉེན་ལ་བཏང་༔ ཡི་དྭགས་སྐྱེས་ཙམ་འགྱོད་པའི་རང་བཞིན་རྒྱུ༔ སྐྱེས་པ་གོ་ཁམ་གནས་དང་མ་བྲལ་འཁྲུལ༔ རྫུས་སྐྱེས་པདྨ་འདྲ་བ་ལྷོ་ནུབ་བྱོན༔ མཁར་ཟ་མཚོ་རྒྱལ་འདྲ་བ་ཤུལ་དུ་བསྐྱུར༔ མ་འོངས་སྐྱེས་པ་རྣམས་ཀྱི་ཐུགས་ལ་ཞོག༔ ཁོ་མོ་བདག་ལ་ཐུགས་ཁྲེལ་མ་གནང་ཞིག༔

ཀྱེ་མ་མ་འོངས་དུས་ཀྱི་བུད་མེད་རྣམས༔ ཕ་ཁུས་སྦྱིན་པའི་མི་ལ་མི་འགྲོ་བས༔ སྣང་བའི་གཟུགས་ཡག་མཐོ་བདམ་མ་བྱེད་ཅིག༔ སྣ་ས་སྐྱིད་པའི་ས་ལ་མི་འདུག་སྟེ༔ མཐོན་པོ་བདམ་འགྲོ་བར་དུ་ཞབས་ཏོག་བྱས༔ བུ་མོ་འདི་འདྲ་སྙིང་རྗེ་ཆེ་བ་ཅན༔ སྙིང་རུས་མཛོད་ཅིག་མྱ་ངན་མ་མཛད་ཅིག༔ སྔགས་འཆང་པདྨ་འགྲོ་བའི་དུས་ལ་བབ༔ མཁར་ཟ་ཡེ་ཤེས་མཚོ་རྒྱལ་ང་ལ་ཉོན༔ གོང་ཐང་གནས་སུ་སྐྱོལ་བའི་དུས་བྱས་སོ༔ ཞེས་གསུངས༔ ཡེ་ཤེས་མཚོ་རྒྱལ་གྱིས་དགོངས་ཏེ༔ རྒྱ་གར་ནས་མནྡྷ་ར་བ་ལྔ་བརྒྱ་ཙམ་གྱིས་ཚོགས་དང་བསྐོར་བ་བྱེད་པར་རིགས༔ མྱ་ངན་མང་པོ་བྱེད་པ༔ ཡེ་ཤེས་མཚོ་རྒྱལ་ཞུས་པ༔ ཀྱེ་མ་ཨུ་རྒྱན་རིན་པོ་ཆེ༔ ཁོ་མོ་བདག་ནི་ཅི་འདྲར་བསྟེན་ནས་འདུག༔ མཚོ་རྒྱལ་བདག་ནི་རྗེས་ཕྱིར་འབྲང་བར་ཞུ༔ བུ་མོ་བདག་ལུས་གང་དུ་བསྐྱུར་བ་ཡིན༔ ཆགས་པའི་གནས་མེད་ང་ཕྱིར་ཁྲིད་པར་ཞུ༔ ཀྱེ་ཧུད་ཀྱེ་ཧུད་ཨུ་རྒྱན་རིན་པོ་ཆེ༔ ཁོ་མོ་ཤུལ་དུ་བསྐྱུར་བ་ཅང་བདེན་ནམ༔ ཞེས་ཞུས༔ ཨུ་རྒྱན་གྱི་ཞལ་ནས༔ མྱ་ངན་མ་བྱེད་མཁར་ཟ་མཚོ་རྒྱལ་ཉོན༔ གོང་ཐང་ལ་ཁ་པར་ཤོག་རྗེ་ཕྱིར་འདུག༔ མྱ་ངན་མ་བྱེད་སྙིང་རུས་ཆོས་གཅིག་མཛོད༔ ཅེས་གསུངས་ནས༔ གོང་ཐང་ལ་ཁར་དུ་བྱོན་ནས༔ རྗེ་འབངས་རྣམས་ཀྱི་དེར་བསྐྱལ༔ མཚོ་རྒྱལ་གྱིས་མྱ་ངན་བྱེད་པ༔ ཀྱེ་མ་ཀྱི་ཧུད་ཨུ་རྒྱན་རིན་པོ་ཆེ༔ བུ་མོ་བདག་ནི་སུ་ལ་རེ་ནས་འདུག༔ རྒྱལ་ཁམས་སེམས་ཅན་རྣམས་ཀྱི་ཅི་བྱེད་དམ༔ མིག་ཕོར་ནང་གི་མིག་ལྟར་དུ༔ མིག་ནི་མེད་ན་བུ་མོ་ཅི་ལ་བསྟེན༔ ཁོང་པའི་ནང་གི་སྙིང་ལྟ་བུ༔ སྙིང་འདི་མེད་ན་ལུས་འདི་ཅི་ལ་བརྟེན༔ ཁོ་མོ་རྟོག་པའི་ཁ་ཏ་སུ་ཡིས་བྱེད༔ མཚོ་རྒྱལ་ཤུལ་དུ་བསྐྱུར་བ་ཅང་སྲིད་དམ༔ ཤ་ཁྲག་འདི་ཡང་སུ་ལ་བརྟེན༔ ཀྱི་ཧུད་ཀྱི་ཧུད་བུ་མོ་སྙིང་རེ་རྗེ༔ ཡན་ལག་མེད་ན་ལུས་འདི་ཅི་ལ་འགྲོ༔ ཤིང་མོ་བྱ་ཡི་ལོ་ལ་ཁོ་མོ་སྐྱེས༔ མེ་མོ་བྱ་ཡི་ལོ་ལ་རྗེ་དང་མཇལ༔ ཁོ་མོ་ཤུལ་དུ་བསྐྱུར་བ་ཅང་བདེན་ནམ༔ ཁོ་མོ་བདག་ནི་འདི་འདྲ་ཅང་མིན་བསམ༔ སེང་གེ་མེད་ན་གཅན་གཟན་ཅི་ལ་བརྟེན༔ ཁྱུང་ཆེན་མེད་ན་ཁྱུང་ཕྲན་ཅི་ལ་བརྟེན༔ སྔགས་འཆང་མེད་ན་ཁོ་མོ་ཅི་ལ་བརྟེན༔ འདི་འདྲ་འཆི་བའི་རང་བཞིན་ཚོར་མྱོང་སྟེ༔ རྗེ་བཙུན་ཡལ་ནས་སོང་བ་ཅང་བདེན་ནམ༔ ཁོ་མོ་ཤུལ་སྤྲང་ས་བབ་ནས་འགྱོད༔ ཕ་ཁུ་མ་སྲིང་ཚིག་གིས་ཁ་ཏ་ལོངས༔ བུད་མེད་གཏམ་དང་སེམས་ལ་དག་པ་མེད༔ ཕ་མིང་རྒྱུད་ཡོད་སྣ་ས་ངོ་མཐོ་བྱེད༔ འདུག་རོགས་ཁྱོ་གར་ལྟ་བུ་ཁ་ཏ་ལོངས༔ ཟས་ཚལ་ཆོས་རྣམས་ལྟ་བུ་གསོ་བར་བྱ༔ རོགས་ངན་གླང་རྒན་ག་བཅིངས་ལྟ་བུ་ལ༔ འགྲོ་བའི་སྐྱབས་གནས་རེ་ས་སུ་ལ་མེད༔ རྒྱས་པ་གྲུ་འགུར་མི་ལ་འགྲོ་བ་ཡི༔ སྐྱབས་གནས་དཀོན་མཆོག་གསོལ་བ་བཏབ་པ་དགའ༔ གྱོ་སྐྱུག་ཁ་ཏ་ལྟ་བུའི་ཚིག་གིས་ཞལ་ཏ་ལོངས༔ མནའ་སྐྱུག་འཐབ་པའི་ལས་རྣམས་མ་བྱེད་ཅིག༔ སྙོན་བསྲུང་འཐབ་སྟེ་གཅིག་འདྲ་ཀུན་ལ་ཡོང་༔ ཚོར་དང་མ་ཚོར་གཏམ་པ་མ་བྱེད་ཅིག༔ མཐོང་དང་མ་མཐོང་གཡོ་སྒྱུ་མ་བྱེད་ཅིག༔ བསོགས་འཇོག་མེད་པའི་ཟས་ལྐོག་མ་བྱེད་ཅིག༔ གྱོ་སྐྱུག་བསྙེན་གནས་བར་དུ་བསྡད་ཙམ་ན༔ རྟག་པ་མེད་པ་ལྷ་ས་བསམ་ཡས་འདི༔ མཁར་ཟ་དེ་ལ་གསོལ་བ་བཏབ་པ་ན༔ སྟོང་རྩ་ཁྲི་སྲོང་ཨུ་རྒྱན་བཞེངས་པ་འདི༔ འདི་ལ་མཇལ་ཏེ་མཚོ་རྒྱལ་ང་ཟུངས་སྐྱེས༔ རོགས་ངན་མི་ཡི་དག་པ་མ་བྱེད་ན༔ གནས་ཡག་བདམ་པ་མ་བྱེད་སྐྲ་ཕུད་ལོངས༔ མཁར་ཟ་ཡེ་ཤེས་མཚོ་རྒྱལ་ཇོ་མོ་ཡིན༔ གཞན་པའི་མི་ལ་མི་འགྲོ་མཐོ་བདམ་མ་བྱེད་ཅིག༔ གནས་ལ་མི་འདུག་ཙམ་གྱིས་སྐྲ་ཕུད་ལོངས༔ གྱོ་སྐུད་སྐྱུག་གནས་ཡར་འཁོར་བུད་མེད་རྣམས༔ སྡིག་ལ་རང་དོན་ཡོང་པ་ཅི་སྲིད་དམ༔ ནངས་པར་ལང་སྔ་ནུབ་མོ་ཉལ་ཕྱི་གྱིས༔ ཡར་འཁོར་ཁྱི་གཡོག་རྣམས་ལ་བྱམས་སྙིང་མཛོད༔ ཁ་ཡག་ངོ་ཡག་གསར་རྙིང་མ་བྱེད་ཅིག༔ རང་རེ་ངན་ཙམ་བདེ་བའི་གནས་མི་འགྱུར༔ རོགས་འདུག་ཅི་ཚིགས་ཁ་ཡི་ཅི་གསུངས་ཁ་ཏ་ལོངས༔ ངན་དབང་ཆེ་བའི་བཟང་ཚོད་མ་བཟུང་ཞིག༔ བུད་མེད་ནག་མོའི་དབང་ཚོད་བཟུང་མི་སྲིད༔ ཁྱི་གཡོག་རྣམས་ལ་ཟས་ཞིམ་བཟང་པོ་སྦྱིན༔ ཤིན་ཏུ་སྣ་སའི་མི་བཞག་ཕུད་ཙམ་ན༔ མོངས་ཏོག་དཀར་ནག་འཚོ་བ་མ་བྱེད་ཅིག༔ སྣ་སའི་གོས་ལ་བདེ་འཇམ་བལྟས་ཙམ་ན༔ ངན་སོང་གནས་སུ་ལྟུང་བའི་ལས་ལམ་ཡིན༔ བུད་མེད་ནག་མོས་ཆེན་གཏམ་མ་བྱེད་ཅིག༔ ངས་མཐོང་ངས་ཚོར་ངས་གཏམ་མ་བྱེད་ཅིག༔ ངས་ཤེས་ངས་བཟང་རྒྱན་གོས་མ་བཏགས་ཤིག༔ བསོགས་པའི་མཐའ་མ་རྒྱུ་ནི་ཟད་གྱུར་པ༔ དམ་པའི་ཆོས་ཀྱི་དགེ་བསྐུལ་ལྷ་ཆོས་མཛོད༔

བུད་མེད་ནག་པོ་ཁ་བཙན་ཆེ་ཙམ་ན༔ ཡར་འཁོར་མེད་པ་གཅིག་པུར་ལྟུང་སྲིད་པ༔ བུད་མེད་གཏམ་པའི་ལས་རྣམས་མང་མི་ཉན༔ ཟོལ་ཟོག་རྐུ་མཁན་གཡོ་སྒྱུ་མ་བྱེད་ཅིག༔ ཁོང་ཁྲོ་ནག་པོ་མ་བཟུང་བུད་མེད་རྣམས༔ སྐྱིད་ས་མི་འདུག་མཐོ་གཏམ་སྡུག་ས་འགྲོ༔ བུད་མེད་རང་བློ་རྒོད་ཆོད་བྱེད་པ་འཁྲུལ༔ རྒྱལ་ས་མི་འདུག་མཐོ་བདམ་སྤྲང་ས་བབ༔ སྣ་ས་ཕ་མིང་སེམས་ཏོག་མི་འདུག་པའི༔ མཐོ་བདམ་བྱེད་ན་སྣ་ས་ཕ་མིང་སྡང་༔ སྦྱིན་པའི་སྣ་ས་གནས་ལ་མི་འདུག་པའི༔ མཐོ་བདམ་བྱེད་པའི་སྣ་ས་ཕ་མིང་འཁྲུག༔ ད་ལྟ་ཕྱི་མ་གཉིས་ཀ་མེད་པར་བྱེད༔ བུད་མེད་སེམས་འདི་ཡང་བའི་རླུང་དང་འདྲ༔ བུད་མེད་གཏམ་འདི་གོ་སོག་སྔས་དང་འདྲ༔ བུད་མེད་བྱ་བ་རླུང་ཁའི་ཇོ་དར་འདྲ༔ བུད་མེད་སྤྱོད་པ་ཉོན་མོངས་དུག་དང་འདྲ༔ ལུས་འདི་ནམ་འཆི་མི་ཤེས་མི་གཉིས་ཞེ་སྡང་བཙོ༔ ཟང་ཟིང་ཟིལ་པ་ལྟ་བུ་འདྲིལ་མི་ཤེས༔ བསོགས་འཇོག་ཆེ་སྟེ་དགེ་བ་ཏིལ་ཙམ་མེད༔ དགེ་བའི་ལྷ་ཆོས་མཛོད་གཅིག་བུད་མེད་རྣམས༔ སུ་ཡི་འཆི་རོགས་སུ་ཡིས་མི་བྱེད་པ༔ མཁར་ཟ་ཡེ་ཤེས་མཚོ་རྒྱལ་བདག་གིས་ནི༔ བརྒྱ་བཅུ་རྩ་ལྔའི་བར་དུ་པདྨའི་ཞབས་ཏོག་བྱེད༔ ཨུ་རྒྱན་པདྨ་འདྲ་བ་ལྷོ་ནུབ་ཡལ༔ མཁར་ཟ་མཚོ་རྒྱལ་འདྲ་བ་ཤུལ་དུ་བསྐྱུར༔ མ་འོངས་བུད་མེད་རྣམས་ཀྱི་ཐུགས་ལ་ཞོགས༔ མཁར་ཟ་བདག་ལ་ཐུགས་ཁྲེལ་མ་བཏང་ཞིག༔ མ་འོངས་སེར་མོ་ཐམས་ཅད་བདག་གི་བུ༔ འགྲོ་བ་ཡོངས་ལ་བདག་གི་འགྲོ་དོན་ཆེ༔ ཁོ་མོ་དྲིན་ཆེན་བསམ་མི་ཨེ་ཡོད་དམ༔ རྣམ་དག་ཆོས་ཀྱི་དབྱིངས་ལས་མ་གཡོས་ཀྱང་༔ རྫུས་སྐྱེས་སྐུ་ལུས་སྐྱེ་འགགས་མེད་པའི་སྐུ༔ གསུང་སྐད་དྲི་མ་མེད་པའི་སཾསྐྲྀའི་སྐད༔ ཁོ་མོ་མི་བརྗེད་ཐོབ་པའི་རྣམ་པར་དག༔ དམ་ཆོས་དྲི་མ་མེད་པའི་རྣམ་པར་དག༔ མ་འོངས་དུས་ཀྱི་འགྲོ་དྲུག་སེམས་ཅན་ཐམས་ཅད་རྣམས༔ ཁོ་མོ་སྐྱེས་རབས་འདི་བཀོད་འཆང་བ་དང་༔ འདོན་ཀློག་མི་རྣམས་བྲི་བ་གང་བྱས་ནས༔ སྐྱེ་བ་གཉིས་ཀྱི་བར་དུ་ཟངས་མདོག་ཏུ༔ ཁོ་མོ་བདག་གི་དྲན་པའི་ཐར་ལམ་ཟིན༔ རྫུས་སྐྱེས་པདྨ་འབྱུང་གནས་ཐུགས་རྗེ་དང་༔ ཁོ་མོ་ཡེ་ཤེས་མཚོ་རྒྱལ་བྱིན་རླབས་དང་༔ དམ་ཆོས་སྐྱེས་རབས་འདི་ཡི་ནུས་མཐུ་དང་༔ འདི་འདྲ་འདོན་ཀློག་འཆང་བ་ཐམས་ཅད་རྣམས༔ ཟངས་མདོག་དཔལ་རིར་སྐྱེ་བ་ཐེ་ཚོམ་མེད༔ འདི་བྲི་འཆང་བ་རྣམས་ལ་དངོས་གྲུབ་འབྱུང་༔ ཡུལ་དེར་ཡོད་པ་རྣམས་ཀྱི་ནད་མུག་ཞི༔ ཁོ་མོ་སྐྱེ་བ་ལན་གཅིག་གཉིས་ཙམ་གྱི༔ སྐྱེ་བ་གཅིག་གི་བར་དུ་བྱང་ཆུབ་ཐོབ༔ གཏེར་ཤོག་འདི་རྣམས་བདག་གིས་དྲིན་ཆེ་བ༔ འགྲོ་བ་སེམས་ཅན་རྣམས་ཀྱི་ཐུགས་ལ་ཞོགས༔ ཁོ་མོ་བདག་ལ་ཐུགས་ཁྲེལ་མ་བཏང་ཞིག༔ ཅེས་གསུངས༔ ཡེ་ཤེས་མཚོ་རྒྱལ་གྱིས་བཀའ་སྲུང་ལ་གཏད་ནས༔ དམྱལ་སྨད་ཡུལ་དུ་བསྐུར་ནས༔ ཟངས་མདོག་ལ་འགྲོ་དགོངས་པའི་གསོལ་བ་འདི་ལྟར་བཏབ༔

ཨེ་མ་ཧོ༔ གནས་མཆོག་ཟངས་མདོག་དཔལ་གྱི་རི་བོ་ནས༔ སྔགས་འཆང་པདྨའི་སྐུ་ལ་གསོལ་བ་འདེབས༔ ཁོ་མོའི་བསམ་པ་འགྲུབ་པར་བྱིན་གྱིས་རློབས༔ ཟག་བཅས་དངོས་འཛིན་ཤ་ཁྲག་ཕུང་པོ་འདི༔ ཟག་མེད་འོད་ལུས་ངང་དུ་བྱིན་གྱིས་རློབས༔ ཞེས་གསུངས་ནས༔ ལྷུན་པོ་རབ་དྲུང་དུར་ཁྲོད་བརྩེགས་པའི་དྲུང་༔ འདི་བཀོད་དགེ་བས་འགྲོ་དྲུག་སོགས་སེམས་ཅན་རྣམས༔ སློབ་དཔོན་པདྨའི་སྤྱན་སྔར་སྐྱེ་བར་ཤོག༔ བདག་གིས་དུས་གསུམ་དགེ་བསགས་པ༔ བདུད་དང་བར་ཆད་རབ་ཞི་ནས༔ སངས་རྒྱས་བསྟན་པ་དར་ཞིང་རྒྱས་པར་ཤོག༔ ཨུ་རྒྱན་པདྨའི་ཐུགས་རྗེས་བྱིན་གྱིས་རློབས༔ ཁོ་མོ་འོད་ལུས་ཐོབ་པར་བྱིན་གྱིས་རློབས༔ འགྲོ་བ་སེམས་ཅན་སངས་རྒྱས་ཐོབ་པར་ཤོག༔ ཨེ་མ་ཧོ༔ རྣམ་དག་ཆོས་ཀྱི་དབྱིངས་ལས་མ་གཡོས་ཀྱང་༔ རྣམ་དག་ཆོས་ཀྱི་དབྱིངས་ཀྱི་སྐུར་སྟོན་པ༔ ཤེས་བྱ་རྣམ་གསུམ་མཆོག་གིས་བཀྲ་ཤིས་ཤོག༔ ཡེ་ཤེས་མཚོ་རྒྱལ་འཇའ་ལུས་གྲུབ་ནས་ ཟངས་མདོག་ལ་བྱོན་ནས༔ རྗེ་འབངས་ཕྱེད་ཙམ་ལུས་བརྗེས་ནས་ཟངས་མདོག་ལ་ཐོན༔

སྤྲེའུ་ཟླའི་རྒྱལ་ཉ་འཛོམས་པའི་ཤོག་དྲིལ་ཕེབས་ནས༔ བཀའ་སྲུང་ལ་གཏད་ནས༔ དག་པའི་གནས་ལ་ལྕགས་རིའི་མདུན་དྲུང་ནས་ཡོང་པ༔ ཨེ་མ་ཧོ༔ གནས་སྐྱོང་བསྟན་པའི་ཐབས་ཤེས་འདྲེན་མཛད་པ༔ བསྒྲུབ་པའི་མིང་ནི་རྡོ་རྗེ་དྲག་པོ་རྩལ༔ བྱའི་ཟླ་བའི་དུས་ཚོད་གཏེར་ཤོག་ཕྲད༔

བཀའ་རྒྱ༔ གཉན་རྒྱ༔ བརྡ་ཐིམ༔ ཟབ་རྒྱ༔ སྦས་རྒྱ༔ གསང་རྒྱ༔ གཏད་རྒྱ༔ གཏེར་རྒྱ༔ ས་མ་ཡ༔ རྒྱ་རྒྱ་རྒྱ༔ ཟླ་ངོ་གཉིས་ཀྱི་བར་དུ་བཀའ་རྒྱ་བསྡམ༔ བཀའ་རྒྱ་མང་པོ་མེད་པ་ཡི༔ དུས་སྐབས་ཚ་རྣམས་ནི་སྐྱོལ་ཆ་མེད་པ༔ ཁྱིའི་ཟླ་བའི་དུས་སུ་གཏེར་ཤོག་ཞེང་སོར་བཞི༔ དཀྱིལ་མཐོ་གསུམ་ལ་ཞལ་བཤུས་སོ༔ ཀ་ཞེས་པ་སྐྱོང་སྤྲང་བན་རྡོ་རྗེ་གླིང་གི་ཕབ༔ ཆོས་ཀྱི་རྒྱལ་པོ་དྷ་རུ་དྷེ་ཉ་ཞེས༔ མངྒ་ལཾ༔ ས་མ་ཡ༔ རྒྱ་རྒྱ་རྒྱ༔ རྒྱ་རྒྱ་རྒྱ༔ ཡི་གེ་པ་ནི་གྲགས་པ་རིན་ཆེན་གྱི་བགྱིས་པའོ༔[1]

[1] ཡེ་ཤེས་མཚོ་རྒྱལ་གྱི་སྐྱེས་རབས་རྣམ་ཐར་རྒྱས་པ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༣ ལོ། ཨརྱ་ཏཱ་རེའི་དཔེ་ཚོགས། འཕགས་བོད་ཀྱི་སྐྱེས་ཆེན་མ་དག་གི་རྣམ་པར་ཐར་པ་པདྨ་དཀར་པོའི་ཕྲེང་བ། ༼༦༽ ཤོག་ ༥ ནས་ ༡༧༩ བར་བཞུགས་པ་ལས་བཏུས་པའོ།།