དཔལ་ནཱ་ལེནྡྲ། བྱོན་པ་ལེགས།
༄༅། །མ་ཅིག་གྲུབ་པའི་རྒྱལ་མོའི་ལོ་རྒྱུས་ཅུང་ཟད་བརྗོད་པ་ངོ་མཚར་ཡིད་ཆེས་ཞེས་བྱ་བ་བཞུགས་སོ། །
༼མཛད་པ་པོ། ཤཱཀྱ་རིན་ཆེན་གྱིས་དྲི་མེད་རིགས་པའི་བློ་གྲོས།[1]༽
ཀུན་ཁྱབ་ཀུན་གྱི་སྙིང་པོ་གདོད་མའི་གཤིས། །དྲི་བཅས་དྲི་མས་མ་ནོགས་ཡེ་ཤེས་སྐུ། །
ཟག་མེད་མཆོག་གི་བདེ་སྟེར་མཁའ་འགྲོ་མ། །རྒྱལ་ཀུན་ཡུམ་གཅིག་དེ་ལ་ཕྱག་འཚལ་ལོ། །
གང་གི་གསང་གསུམ་ཡེ་ཤེས་སྒྱུ་མའི་གར། །རྡུལ་སྙེད་རྒྱལ་བ་ཡིས་ཀྱང་གཞལ་དཀའ་མོད། །
འོན་ཀྱང་འགྲོ་བློའི་རྗེས་མཐུན་ངོ་མཚར་གཏམ། །ཅུང་ཟད་གྲུབ་པའི་ཞལ་ལུང་ཇི་བཞིན་བཀོད། །
དེ་ཡང་དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་ཀྱི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མའམ། རྡོ་རྗེ་ཕག་མོའི་ངོ་བོར་གྱུར་པ་མ་ཅིག་གྲུབ་པའི་རྒྱལ་མོ་ཞེས་འཇིག་རྟེན་གྱི་ཁམས་ཀུན་དང་། དག་པ་མཁའ་སྤྱོད་ཀྱི་ཞིང་རབ་འབྱམས་རྒྱ་མཚོ་རྣམས་སུ་ཉི་མ་ལྟར་གྲགས་པ་དེ་ཉིད་ཀྱི་ངོ་མཚར་བའི་ཚུལ་མཐའ་དག་ནི། སངས་རྒྱས་བཅོམ་ལྡན་འདས་རྣམས་ཀྱིས་བསྐལ་པའམ། བསྐལ་པ་ལས་ལྷག་པར་བཞུགས་ནས་གསུངས་ཀྱང་། བསྐལ་པའི་མཐའ་རྫོགས་པ་ཁོ་ན་ལས་དེའི་ངོ་མཚར་གྱི་ཚུལ་བརྗོད་པའི་མཐའ་རྫོགས་པ་ནི་རྣམ་པ་ཀུན་ཏུ་སྲིད་པ་མ་ཡིན་པའི་ཕྱིར། མ་རིག་པའི་གཞན་དབང་དུ་གྱུར་པའི་བྱིས་པའི་བློ་གྲོས་ཀྱིས་གཞལ་བར་བྱ་བ་ནི་ནམ་ཡང་རིགས་པ་མ་ཡིན་ལ། འོན་ཀྱང་གྲུབ་པའི་ཞལ་ལུང་ལས་ཅུང་ཟད་རྙེད་པ་དག་རང་གཞན་ཡིད་ཆེས་ཀྱི་དད་པ་གོང་དུ་སྤེལ་བའི་དམིགས་རྐྱེན་དུ་བསམ་ཅུང་ཟད་བཤད་པར་བྱ་སྟེ། མི་མཇེད་འཇིག་རྟེན་གྱི་ཁམས་ན་འཛམ་བུའི་གླིང་བྱེ་བ་ཕྲག་བརྒྱ་ཡོད་པའི་དབུས་མ་འདིའི་སའི་ལྟེ་བ་ནི། བསྐལ་པ་བཟང་པོའི་སངས་རྒྱས་སྟོང་མངོན་པར་བྱང་ཆུབ་པའི་གནས་དབུས་འགྱུར་མ་ག་དྷ་རྡོ་རྗེ་གདན་ཡིན་ལ། དེ་ནས་ནུབ་ཕྱོགས་སུ་དཔག་ཚད་དུ་མས་བགྲོད་པའི་ས་ན། ཨུ་རྒྱན་གྱི་ཡུལ་ཁམས་ཞེས་བྱ་བ་ཡོད་དེ། ས་གཞི་ལག་མཐིལ་ལྟར་མཉམ་ཞིང་། བྱང་ཆུབ་ཀྱི་ཤིང་ཨ་ཤྭ་ཏྠ་དང་། ཙན་དན་དང་། སེང་ལྡེང་ལ་སོགས་པའི་ཤིང་ལྗོན་པ་སྣ་ཚོགས་ཀྱི་ནགས་ཚལ་རབ་ཏུ་རྒྱས་པས་བརྒྱན་པ། ཨུ་དུམ་ཝ་ར་ལ་སོགས་པའི་མེ་ཏོག་གི་ཤིང་མང་པོའི་ཚལ་ཡོད་པ། རྩ་བ་དང་། སྡོང་པོ་དང་། ཡལ་ག་དང་། ལོ་མ་དང་། མེ་ཏོག་དང་། འབྲས་བུ་ཕུན་སུམ་ཚོགས་པ། ཡན་ལག་བརྒྱད་དང་ལྡན་པའི་ཆུ་བོ་དང་། ཆུ་ཕྲན་དང་། འབབ་ཆུ་དུ་མ་འབབ་པ། ལྡེང་ཀ་དང་། རྫིང་བུ་དང་། མཚོ་ལ་སོགས་པ་ཐམས་ཅད་ཡན་ལག་བརྒྱད་དང་ལྡན་པའི་ཆུས་གང་བ། རིན་པོ་ཆེའི་ཁ་དོག་ཏུ་སྣང་བའི་རི་བོ་རི་ཕྲན་དུ་མས་མཛེས་པ། མ་རྨོས་མ་བཏབ་པའི་ལོ་ཏོག་ཕུན་སུམ་ཚོགས་པ་དང་ལྡན་པའི་གནས་དེར། གང་དག་སྐྱེས་པའི་དབང་པོ་དང་ལྡན་པ་དེ་དག་ཐམས་ཅད་ནི་དཔའ་བོ་དང་། གང་དག་བུད་མེད་ཀྱི་དབང་པོ་དང་ལྡན་པ་ཐམས་ཅད་ནི་མཁའ་འགྲོ་མ་ཡིན་ནོ་ཞེས་གྲགས་སོ། །དེ་དག་གི་གོས་དང་། རྒྱན་དང་བཟའ་བ་དང་། བཏུང་བ་ལ་སོགས་པའི་འདོད་དགུ་ཐམས་ཅད་ནི། ཡིད་ལ་བསམ་པ་ཙམ་གྱིས་ལྷུན་གྱིས་གྲུབ་བོ། །
དེ་ལྟ་བུའི་སྣོད་བཅུད་ཀྱི་འབྱོར་པ་ཕུན་སུམ་ཚོགས་པའི་ཞིང་ཁམས་ཀྱི་དབུས་ན་མེ་ཏོག་བཀོད་པ་ཞེས་བྱ་བའི་གནས་ཡོད་དོ། །མེ་ཏོག་བཀོད་པའི་གནས་དེ་ནི་མེ་ཏོག་གི་ནགས་ཚལ་ཕུན་སུམ་ཚོགས་པས་བརྒྱན་ཅིང་། ནོར་བུའི་སྤུ་མདངས་ཀྱིས་མཛེས་པའི་རི་དྭགས་ཡིད་དུ་འོང་བ་སྣ་ཚོགས་མེ་ཏོག་གི་ཚལ་དེ་དག་ན་རྩེ་བ་ཡོད་དོ། །དེའི་དབུས་ན་རང་བྱུང་གནྡྷོ་ལའི་གཞལ་ཡས་ཁང་ཞེས་བྱ་བ་རྒྱན་དང་བཀོད་པ་མེད་པས་བརྒྱན་པ། སིལ་སྙན་དང་རོལ་མོ་སྣ་ཚོགས་ཀྱི་སྒྲ་སྙན་པ་རང་བཞིན་གྱིས་སྒྲོག་པ་ཡོད་དོ། །གནྡྷོ་ལ་དེ་ལ་ཨུ་རྒྱན་གྱི་མཁའ་འགྲོ་དང་མཁའ་འགྲོ་མ་རྣམས་དུས་རྟག་ཏུ་མཆོད་པ་བྱེད་དོ། །
དུས་ལན་གཅིག་གི་ཚེ། གནྡྷོ་ལའི་གཞལ་ཡས་ཁང་དེའི་ཁྱིམ་དབུས་སུ་མེ་ཏོག་ཨུ་དུམ་ཝ་རའི་སྡོང་པོ་ཆེན་པོ་ཞིག་སྐྱེས་པར་གྱུར་ཏེ། པདྨའི་སྡོང་པོ་དེ་ནི་རིན་པོ་ཆེ་སྣ་ཚོགས་ཀྱི་རང་བཞིན་མཛེས་ཤིང་ཡིད་དུ་འོང་བ་ཡལ་ག་དང་ལོ་མ་ཕུན་སུམ་ཚོགས་པ་དང་ལྡན་པ་ཞིག་གོ ། དེ་ལ་མཁའ་འགྲོ་དང་མཁའ་འགྲོ་མའི་ཚོགས་ངོ་མཚར་དུ་གྱུར་ཏེ། ཕྱག་འཚལ་ཞིང་བསྐོར་བ་བྱེད་པ་དང་། མཆོད་པ་རྣམ་པ་སྣ་ཚོགས་དང་། ཚོགས་ཀྱི་འཁོར་ལོ་རྒྱ་ཆེན་པོས་མཆོད་པར་བྱེད་དོ། །དུས་རེ་ཞིག་གི་ཚེ་ཨུ་དུམ་ཝ་རའི་སྡོང་པོ་དེ་ལ་མེ་ཏོག་པདྨ་ཆེན་པོ་ཞིག་ཁ་འབུས་པར་གྱུར་ཏེ། དེའི་འདབ་མ་རྣམས་ཆེར་རྒྱས་པའི་གེ་སར་གྱི་དབུས་ནས། མཚན་དང་དཔེ་བྱད་ཀྱི་ལང་ཚོས་མཛེས་པའི་བུ་མོ་སྐུ་མདོག་དཀར་ལ་དམར་བའི་མདངས་ཆགས་པ་འཇའ་ལུས་རྡོ་རྗེའི་སྐུ་ཅན། གཞོན་ནུ་ལོ་བརྒྱད་ཀྱི་ན་ཚོད་ཙམ་པ་ཞིག་འཁྲུངས་པར་གྱུར་ཏོ། །
དེའི་ཚེ་ནམ་མཁའ་ནས་ལྷའི་བུ་དང་བུ་མོ་མང་པོས་མེ་ཏོག་གི་ཆར་མངོན་པར་ཕབ་ནས་མཆོད་པར་བྱེད་དོ། །ས་ཡང་རྣམ་པ་དྲུག་ཏུ་གཡོས་སོ། །རོལ་མོའི་སྒྲ་སྣ་ཚོགས་ཀྱང་རང་བཞིན་གྱིས་བྱུང་ངོ་། །མཁའ་སྤྱོད་ཀྱི་དཔའ་བོ་དང་མཁའ་འགྲོ་མ་རྣམས་སྟེང་གི་བར་སྣང་ལ་ལྷགས་ཏེ། རྡོ་རྗེའི་གར་བསྒྱུར་ཞིང་རྡོ་རྗེའི་གླུ་ལེན་པར་བྱེད་དོ། །ས་སྟེང་ལ་སྤྱོད་པ་དང་། ས་འོག་ལ་སྤྱོད་པའི་དཔའ་བོ་དང་མཁའ་འགྲོ་མ་ཐམས་ཅད་སྤྲིན་གཏིབས་པ་ལྟར་འདུས་ཏེ། བདེ་བ་ཆེན་པོའི་ཉམས་འབར་ཏེ། ཨ་ལ་ལ་ཧི་ཧི་ཞེས་པའི་སྒྲ་སྒྲོག་ཅིང་གར་བསྒྱུར་རོ། །དཔའ་བོ་དང་རྣལ་འབྱོར་མའི་ཚོགས་དེ་དག་གར་བསྒྱུར་བས། རུས་པའི་རྒྱན་ཆ་དང་དྲིལ་བུ་གཡེར་ཁའི་སྒྲ་ཁྲལ་ཁྲོལ་དྭངས་ལ་སིལ་དུ་འབྱིན་པར་གྱུར་ཏོ། །
དེ་ནས་མེ་ཏོག་གི་དབུས་སུ་འཁྲུངས་པའི་བུ་མོ་དེ་ལ། གནས་གསུམ་གྱི་དཔའ་བོ་དང་རྣལ་འབྱོར་མའི་ཚོགས་ཐམས་ཅད་ཀྱིས་ཕྱག་དང་བསྐོར་བ་བྱེད། དར་གྱི་ཅོད་པན་དང་། ན་བཟའ་དང་རུས་པའི་རྒྱན་ལ་སོགས་པ་ཕུལ་ཞིང་བརྒྱན་ནས། ཚོགས་ཀྱི་འཁོར་ལོ་རྒྱ་ཆེན་པོས་མཆོད་པར་བྱས་སོ། །དེའི་ཚེ་དཔའ་བོ་དང་མཁའ་འགྲོ་མ་རྣམས་ཀྱིས་གསོལ་བ་བཏབ་ནས་གནྡྷོ་ལའི་གཞལ་ཡས་ཁང་གི་ནང་དུ་བྱོན་ཏེ། རིན་པོ་ཆེ་སྣ་ལྔའི་ཁྲི་ལ་བཞུགས་སོ། །དེར་མཆོད་པའི་ཚོགས་དུ་མས་མཆོད་དེ། རྡོ་རྗེ་ཕག་མོ་སྤྲུལ་པའི་སྐུ་སེམས་ཅན་གྱི་དོན་ལ་བྱོན་པ་དེ་ལ། གནས་གསུམ་གྱི་དཔའ་བོ་དང་ཌཱ་ཀིའི་ཚོགས་རྣམས་ཀྱིས་མགྲིན་གཅིག་ཏུ། མ་གཅིག་གྲུབ་པའི་རྒྱལ་མོ་ཞེས་མཚན་གསོལ་ཏོ། །
དེ་ནས་མ་གཅིག་གྲུབ་པའི་རྒྱལ་མོ་དེ་ཉིད་མཁའ་འགྲོ་ཐམས་ཅད་ཀྱི་ཚོགས་དཔོན་མཛད་ཅིང་། བཀོད་པ་ལུས་ཀྱི་རྫུ་འཕྲུལ་དཔག་ཏུ་མེད་པ་ལ་མངའ་བརྙེས་པས། སངས་རྒྱས་ཀྱི་ཞིང་ཁམས་བསམ་གྱིས་མི་ཁྱབ་པ་རྣམས་སུ་བྱོན་ནས། སངས་རྒྱས་གངྒཱའི་ཀླུང་གི་བྱེ་མ་སྙེད་མང་པོ་ལ་ཆོས་ཉན་པར་བྱེད་དེ། བདེ་ཆེན་པདྨ་བཀོད་པ་ཞེས་བྱ་བའི་ཞིང་ཁམས་སུ་གཤེགས་ཏེ། བཅོམ་ལྡན་འདས་ཚེ་དཔག་མེད་ཀྱི་ལྷ་ཚོགས་མང་པོའི་ཞལ་གཟིགས་ཤིང་། ཚེའི་དབང་བསྐུར་བ་དང་ཚེ་ཁྲིད་མང་པོ་གསན་པར་མཛད་ནས། འཆི་མེད་ཚེའི་རིག་འཛིན་མངོན་དུ་མཛད་པའི་ཚུལ་བསྟན་ཏོ། །དེའི་ཚེ་མཚན་ཡང་གོས་དཀར་མོ་ཞེས་གྲགས་སོ། །འཁོར་ནི་དཔའ་བོ་མཁའ་འགྲོ་འབུམ་གྱིས་བསྐོར་ཞིང་བསྟོད་པར་བྱེད་དོ། །འོག་མིན་སྟུག་པོ་བཀོད་པ་ཞེས་བྱ་བར་གཤེགས་ཏེ། ལོངས་སྐུ་རྡོ་རྗེ་འཆང་ཆེན་པོ་དང་མཇལ། གསང་བ་བླ་ན་མེད་པའི་དབང་བཞི་ཡོངས་སུ་རྫོགས་པར་གསན་ཏེ། སྐུ་བཞིའི་གོ་འཕང་མངོན་དུ་བྱས་པའི་ཚུལ་བསྟན་ཏོ། །དེའི་ཚེ་མཚན་ཡང་རྡོ་རྗེ་ཕག་མོ་ཞེས་གྲགས་སོ། །
འཁོར་ནི་རྒྱལ་བ་རྒྱ་མཚོའི་ཚོགས་ཀྱིས་བསྐོར་ཞིང་བསྟོད་པར་བྱེད་དོ། །གནྡྷོ་ལ་ཤེལ་གྱི་གཞལ་ཡས་ཁང་དུ་གཤེགས་ཏེ། བཅོམ་ལྡན་འདས་བདེ་མཆོག་འཁོར་ལོ་དང་མཇལ། གསང་སྔགས་རྡོ་རྗེ་ཐེག་པ་མ་ལུས་པ་གསན་ནས། མཆོག་གི་དངོས་གྲུབ་བརྙེས་པའི་ཚུལ་བསྟན་ཏོ། །དེའི་ཚེ་མཚན་ཡང་རྡོ་རྗེ་མཁའ་འགྲོ་མ་ཞེས་གྲགས་སོ། །འཁོར་ན་གནས་གསུམ་གྱི་དཔའ་བོ་དང་ཌཱཀི་ཐམས་ཅད་ཀྱིས་བསྐོར་བར་བྱེད་དོ། །མེ་ཏོག་ཆེར་རྒྱས་ཞེས་བྱ་བའི་ཞིང་ཁམས་སུ་གཤེགས་ཏེ། བཅོམ་ལྡན་འདས་རྒྱལ་བ་རིགས་ལྔ་དང་མཇལ། དུག་ལྔ་འདུལ་བའི་ཆོས་རྣམས་གསན་ཏེ། ཡེ་ཤེས་ལྔ་རུ་མངོན་པར་སངས་རྒྱས་པའི་ཚུལ་བསྟན་ཏོ། །དེའི་ཚེ་མཚན་ཡང་རྣལ་འབྱོར་ཆེན་མོ་ཞེས་གྲགས་སོ། །འཁོར་ནི་མཁའ་འགྲོ་སྡེ་ལྔའི་འཁོར་གྱིས་བསྐོར་ཞིང་བསྟོད་པར་བྱེད་དོ། །རི་བོ་གྲུ་འཛིན་དུ་གཤེགས་ཏེ། བྱམས་མགོན་སྤྱན་རས་གཟིགས་དང་མཇལ། ཐེག་པ་ཆེན་པོའི་ཆོས་རྣམས་གསན་ཏེ། འགྲོ་བ་འདུལ་བའི་དངོས་གྲུབ་བརྙེས་པའི་ཚུལ་བསྟན་ཏོ། །དེའི་ཚེ་མཚན་ཡང་འགྲོ་འདུལ་མཁའ་འགྲོ་ཞེས་གྲགས་སོ། །འཁོར་ནི་སེམས་དཔའ་སེམས་མ་མང་པོའི་འཁོར་གྱིས་བསྐོར་ཞིང་བསྟོད་པར་བྱེད་དོ། །
བསིལ་བ་ཚལ་གྱི་དུར་ཁྲོད་དུ་གཤེགས་ཏེ། སློབ་དཔོན་རིན་པོ་ཆེ་པདྨ་འབྱུང་གནས་དང་མཇལ། གསང་སྔགས་ཟབ་མོའི་ཆོས་རྣམས་གསན་ཏེ། གསང་ཡུམ་གསང་བའི་མཆོད་པ་ཕུལ་བས། དགའ་བཞི་བདེ་སྟོང་གི་ཉམས་མྱོང་རྒྱས་ཤིང་ཆོས་ཉིད་ཟབ་མོའི་དངོས་གྲུབ་བརྙེས་པའི་ཚུལ་བསྟན་ཏོ། །དེའི་ཚེ་མཚན་ཡང་གཙུག་གི་རྒྱན་གཅིག་མ་ཞེས་གྲགས་སོ། །འཁོར་ནི་མཁའ་འགྲོ་མང་པོའི་བསྐོར་ཞིང་བསྟོད་པར་བྱེད་དོ། །ཡུལ་ཉི་ཤུ་རྩ་བཞིར་གཤེགས་ཏེ། མཁའ་འགྲོ་སུམ་ཅུ་སོ་གཉིས་དང་མཇལ། མན་ངག་གནད་ཀྱི་གདམས་པ་གསན་ཏེ། གྲུབ་ཆེན་བརྒྱད་ཀྱི་དངོས་གྲུབ་བརྙེས་པའི་ཚུལ་བསྟན་ཏོ། །དེའི་ཚེ་མཚན་ཡང་ནམ་མཁའི་དབྱིངས་ཕྱུག་མ་ཞེས་གྲགས་སོ། །འཁོར་ནི་ཌཱཀི་དཀར་མོ་འབུམ་གྱིས་བསྐོར་ཞིང་བསྟོད་པར་བྱེད་དོ། །དུར་ཁྲོད་བརྒྱད་ཀྱི་གནས་སུ་གཤེགས་ཏེ། མཁའ་འགྲོ་མ་སེང་གེའི་གདོང་ཅན་མ་དང་མཇལ། བདེ་ཆེན་གསང་བའི་ངོ་སྤྲོད་གསན་ཏེ། འཕྲིན་ལས་རྣམ་པ་བཞིའི་དངོས་གྲུབ་བརྙེས་པའི་ཚུལ་བསྟན་ཏོ། །དེའི་ཚེ་མཚན་ཡང་དུར་ཁྲོད་རོ་ཟན་མ་ཞེས་གྲགས་སོ། །འཁོར་ནི་མཁའ་འགྲོ་སྤྲུལ་པའི་སྟག་གཟིག་དང་། དོམ་དང་ལྕེ་སྤྱང་ལ་སོགས་པ་མང་པོས་བསྐོར་ཞིང་བསྟོད་པར་བྱེད་དོ། །
རྒྱ་གར་གྱི་ཡུལ་ཆེན་རྣམས་སུ་གཤེགས་ཏེ་རྣལ་འབྱོར་གྲུབ་ཆེན་བརྒྱད་ཅུ་དང་མཇལ། ཆོས་སྒོ་བརྒྱད་ཁྲི་བཞི་སྟོང་གསན་ཏེ། ཁམས་གསུམ་དབང་སྡུད་ཀྱི་དངོས་གྲུབ་བརྙེས་པའི་ཚུལ་བསྟན་ཏོ། །དེའི་ཚེ་མཚན་ཡང་མཁའ་འགྲོ་བདེ་བྱེད་ཅེས་གྲགས་སོ། །འཁོར་ནི་སྐལ་ལྡན་ལས་ཅན་མང་པོས་བསྐོར་ཞིང་བསྟོད་པར་བྱེད་དོ། །པདྨ་དབང་གི་གནས་སུ་གཤེགས་ཏེ། དཔའ་བོ་ཆེན་པོ་དབང་ཆེན་རྟ་མགྲིན་དང་མཇལ། རྒྱུད་སྡེ་སྟོང་ཕྲག་མང་པོ་གསན་ཏེ། མཆོག་དང་ཐུན་མོང་གི་དངོས་གྲུབ་བརྙེས་པའི་ཚུལ་བསྟན་ཏོ། །དེའི་ཚེ་མཚན་ཡང་གསང་བ་ཡེ་ཤེས་སུ་གྲགས་སོ། །འཁོར་ནི་ཌཱཀི་ནཱི་སྟོང་ཕྲག་མང་པོས་བསྐོར་ཞིང་བསྟོད་པར་བྱེད་དོ། །ཇི་སྐད་བཤད་པའི་མཚན་གྱི་རྣམ་གྲངས་བཅུའི་སྒོ་ནས་སངས་རྒྱས་ཀྱི་ཞིང་ཁམས་དེ་དག་ལ་སོགས་པར་གཤེགས་ཏེ་ཆོས་ཉན་པ་དང་། དངོས་གྲུབ་བརྙེས་པའི་ཚུལ་སྟོན་པ་ནི་མཚོན་པ་ཙམ་སྟེ། དུས་སྐད་ཅིག་མ་རེར་ཡང་སྐུའི་བཀོད་པ་བསམ་གྱིས་མི་ཁྱབ་པས་ཅིག་ཅར་དུ་སངས་རྒྱས་ཀྱི་ཞིང་རབ་འབྱམས་རྒྱ་མཚོ་དཔག་ཏུ་མེད་པ་རྣམས་སུ། ལ་ལར་ནི་གཙོ་མོའི་ཚུལ། ལ་ལར་ནི་འཁོར་གྱི་ཚུལ། ལ་ལར་ནི་སྤྲུལ་པའི་ཚུལ་ལ་སོགས་ཏེ། དག་པ་དང་མ་དག་པའི་ཚུལ་སྣ་ཚོགས་སུ་སྟོན་པར་མཛད་པས་བསམ་གྱིས་མི་ཁྱབ་པའི་གནས་སོ། །ཞེས་པ་ནི་གྲུབ་ཆེན་ཏི་བུའི་གསུང་ལས་བྱུང་བ་གང་ཞིག་རས་ཆུང་ཞབས་ཀྱིས་ཐུགས་ཀྱི་བུམ་པར་བཟུང་པ་ནས་ཞལ་གྱི་བདུད་རྩིར་ཅུང་ཟད་འཛག་པ་གང་དག་སློབ་བུ་རྣམས་ཀྱིས་ཡི་གེའི་ལམ་དུ་འཁོད་སྣང་བ་བརྗོད་བདེ་བ་ཙམ་དུ་སྦྱར་བ་ཡིན་ནོ། །
ཡང་པཎྜི་ཏ་ཆེན་པོ་ནགས་ཀྱི་རིན་ཆེན་རྩེ་ཐང་དུ་བཞུགས་དུས། གྲུབ་རྒྱལ་ལུགས་ཀྱི་ཚེ་དཔག་ཏུ་མེད་པའི་དཀྱིལ་འཁོར་གཟིགས་པས། ནཱ་རོ་པའི་སྲིང་མོའི་ལུགས་ཞེས་གསུངས་པ་ལྟར། ཐམས་ཅད་མཁྱེན་པ་པདྨ་དཀར་པོའི་ཞབས་ཀྱང་བཞེད་བླ། དེ་ལྟར་ན་ལྕམ་ནེ་གུ་མའམ། མཁའ་འགྲོ་མ་རུས་པའི་རྒྱན་ཅན་དུ་གྲགས་པ་དེ་ཡང་མ་གཅིག་གྲུབ་པའི་རྒྱལ་མོ་ཉིད་དུ་ངེས་ཤིང་། ཡང་པཎྜི་ཏ་ག་ཡ་དྷ་ར་དང་ལྕམ་སྲིང་དུ་འཁྲུངས་ཤིང་། གྲུབ་ཆེན་ཏི་བུའི་ཨ་ནེ་ཡིན་པར་ཡང་བཤད་སྣང་བས། དུས་གཅིག་ཏུ་སྐུའི་བཀོད་པ་སྣ་ཚོགས་སུ་གནང་བའི་ཕྱིར་དེ་དག་ཐམས་ཅད་ཀྱང་བདེན་པ་ཁོ་ན་སྟེ་འགལ་བ་མ་ཡིན་ནོ། །ཞེས་པ་འདི་ཡང་ཤཱཀྱའི་དགེ་སློང་ཤཱཀྱ་རིན་ཆེན་དྲི་མེད་ལེགས་པའི་བློ་གྲོས་ཀྱིས་ཐུན་གསེང་གཅིག་ལ་སྦྱར་བའོ། །དགེའོ།། །།
[1] མ་གཅིག་གྲུབ་པའི་རྒྱལ་མོའི་ལོ་རྒྱུས་ཅུང་ཟད་བརྗོད་པ་ངོ་མཚར་ཡིད་ཆེས། ཤཱཀྱ་རིན་ཆེན་གྱི་གསུང་འབུམ། ༼ཀ༽ ཤིང་དཔར་དཔེ་རིང་། ཤོག་བུ་ལྔ་ཅན་དང་། འཕགས་བོད་ཀྱི་སྐྱེས་ཆེན་མ་དག་གི་རྣམ་པར་ཐར་པ་པདྨ་དཀར་པོའི་ཕྲེང་བ། ༼༥༽ བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༣ ལོ། ཤོག་གྲངས་ ༧༣ ནས་ ༧༩ བར་བཞུགས་པ་ལས་བཏུས་པའོ།།