དཔལ་ནཱ་ལེནྡྲ། བྱོན་པ་ལེགས།
པཎ་གྲུབ་བསྟོད་ཆེན་ལྗགས་རྩོམ་མཛད་པའི་དགོས་དམིགས་སྐོར།
༢༠༡༤ ཕྱི་ཟླ་ ༡༠ ཚེས་ ༦ ཉིན་ཐའེ་ཝན་གསུང་ཆོས་སྐབས། སྔ་དྲོའི་ཆོས་ཐུན་སྐབས་ སྐར་མ་ ༣༢། ༥༠ ནས་བཀའ་སྩལ་ཡོད། དེ་ཡང་པཎ་གྲུབ་བཅུ་བདུན་གྱི་གསོལ་འདེབས་གསུང་འདོན་དང་བཅས་བོད་ཀྱི་ཆོས་བརྒྱུད་དེ་བླ་མའི་ཆོས་ལུགས་མིན་པར་དཔལ་ནཱ་ལེནྡྲའི་ཆོས་བརྒྱུད་ཡིན་པ་དང་། ས་དགེ་བཀའ་རྙིང་ཇོ་ནང་དང་བཅས་པར་རང་རང་གི་ཆོས་བརྒྱུད་ཀྱི་གཞུང་ལ་དོ་སྣང་གཙིགས་འཛིན་བྱེད་པ་ལས་རྩ་བའི་ནཱ་ལེནྡྲའི་གཞུང་ལ་དོ་སྣང་དང་།
དེ་ནས་བརྒྱུད་པ་མ་ཤེས་པས་རྒྱུ་མཚན་དེ་གཉིས་ལ་བརྟེན་ནས་པཎ་གྲུབ་བཅུ་བདུན་གསོལ་འདེབས་ལྗགས་རྩོམ་མཛད་ཚུལ་གསུངས་པ་ནི། ངོས་ནས་པཎ་གྲུབ་བཅུ་བདུན་གྱི་གསོལ་འདེབས་འབྲི་རྩོམ་དང་། བོད་ཀྱི་ཆོས་བརྒྱུད་དེ་བཞིན་དཔལ་ནཱ་ལེནྡྲའི་ཆོས་བརྒྱུད་ཡིན་ཞེས་བརྗོད་པ་དེར་རྒྱུ་མཚན་གཉིས་ཡོད། རྒྱུ་མཚན་དང་པོ་ནི། སྔར་བོད་ཀྱི་ཆོས་དེ་སངས་རྒྱས་པའི་ཆོས་ལུགས་མིན་པར་བླ་མའི་ཆོས་ལུགས་ཡིན་ཚུལ་བརྗོད་ཀྱི་ཡོད། དེ་ནི་ས་དགེ་བཀའ་རྙིང་རྣམས་གཙོ་བོ་གསང་སྔགས་ཀྱི་རྒྱུད་སྡེ་མི་འདྲ་བའི་ཁྱད་པར་ཕྲན་བུ་ཡོད་པ་ལས། གཞུང་ཆེན་བཅུ་གསུམ་ཞེས་བརྗོད་ན། རྩ་འཇུག་བཞི་གསུམ་དང་། མངོན་རྟོགས་རྒྱན་སོགས་ཚང་མ་ཐུན་མོང་བའི་གཞུང་ལུགས་ཡིན་པས། བོད་ཀྱི་ཆོས་ལུགས་ལ་བླ་མའི་ཆོས་ལུགས་ཞེས་བརྗོད་པ་ལྟར་མིན་པར་དཔལ་ནཱ་ལེནྡྲ་ནས་བརྒྱུད་པའི་ཆོས་བརྒྱུད་དྲི་མ་མེད་པ་ཞིག་ཡིན་པ་མཚོན་ཐུབ་པའམ་གོ་རྟོགས་ཐུབ་ཆེད་ངོ་སྤྲོད་ཀྱི་ཆེད་དུ་ཡིན།
རྒྱུ་མཚན་གཉིས་པ་ནི། ང་ཚོ་བོད་གངས་ཅན་གྱི་ལྗོངས་སུ་ས་དགེ་བཀའ་རྙིང་ཇོ་ནང་དང་བཅས་པ་རིས་སུ་མ་ཆད་པ་དག་གིས་རང་རང་སོ་སོའི་ཆོས་བརྒྱུད་དེ་ཉིད་ལས། རྩ་བའི་བོད་བརྒྱུད་ནང་བསྟན་དེ་ཉིད་འབྱུང་ཁུངས་དཔལ་ནཱ་ལེནྡྲ་ནས་བྱུང་བ་དེར་དོ་སྣང་དེ་ཙམ་མེད་པ་ལྟ་བུ་དང་། དེ་ཡང་རྒྱུད་སྡེ་མི་འདྲ་བ་དང་། ཆོ་ག་འདོན་ལུགས་མི་འདྲ་བ་སོགས་ལས་མི་འདྲ་བ་ཤུགས་ཆེ་ཡོད་པ་ལྟ་བུར་མཐོང་སྟེ། ས་དགེ་བཀའ་རྙིང་ཚང་མ་གཅིག་སྒྲིལ་ཡོང་བ་ཞིག་བྱེད་དགོས་ན། གཞུང་ཆེན་དེ་དག་གི་ཐོག་ཏུ་ཕྱིན་ན་ཚང་མ་གཅིག་སྒྲིལ་ཡིན་པས་དགོས་པ་གཅིག་དེ་མཐོང་གི་འདུག །དེས་ན་དཔལ་ནཱ་ལེནྡྲའི་ཆོས་བརྒྱུད་ཡིན་ཞེས་བརྗོད་པའི་རྒྱུ་མཚན་ཕྱོགས་གཅིག་ནས་གོང་གསལ་རྒྱུ་མཚན་གཉིས་པོ་དེ་ཡིན།
ཡང་གཞན་ཞིག་ནས་ནང་ལོགས་སུ་ས་དགེ་བཀའ་རྙིང་ཇོ་དང་བཅས་པ་རྩ་བའི་འབྱུང་ཁུངས་གཅིག་ནས་བྱུང་བ་སྟེ། དཔེར་ན། སློབ་དཔོན་རིན་པོ་ཆེར་ཆ་མཚོན་ནའང་། རིག་འཛིན་རྣམ་བརྒྱད་ཀྱི་ཁྲོད་དུ་མགོན་པོ་ཀླུ་སྒྲུབ་ཡོད་པ་ལྟར་ཚང་མ་ནཱ་ལེནྡྲ་ནས་བརྒྱུད་པ་ཤ་སྟག་ཆགས་ཡོད། དེས་ན་མགོན་པོ་ཀླུ་སྒྲུབ་ཅེས་བརྗོད་ན། ས་སྐྱ་དང་། བཀའ་བརྒྱུད། རྙིང་མ། རི་བོ་དགེ་ལྡན་པ། ཇོ་ནང་དང་བཅས་པའི་བོད་ཀྱི་ཆོས་བརྒྱུད་ཚང་མས་སྟོན་པ་ལྟ་བུར་ངོས་འཛིན་ཞུ་བཞིན་ཡོད། དེ་ལྟར་ང་ཚོས་རྩ་བའི་ཐོག་ཏུ་ཕྱིན་ན་ང་ཚོ་ཚང་མ་གཅིག་གྱུར་ཆགས་ཡོད། འོན་ཀྱང་ཡན་ལག་ཕྲ་མོའི་ཐོག་ཏུ་ཕྱིན་ན་བཀའ་བརྒྱུད་ལ་ཆ་མཚོན་ན་བཀའ་བརྒྱུད་ཆེ་བཞི་ཆུང་བརྒྱད་དང་། དེ་བཞིན་རྙིང་མའི་རྫོགས་ཆེན་ལ་ཆ་མཚོན་ནའང་། དགོན་སྡེ་དང་བླ་མ་སོ་སོར་མི་འདྲ་བ་རེ་དང་། དེ་བཞིན་གཏེར་བཏོན་སོ་སོའི་གཏེར་ཆོས་མང་དུ་ཡོད་པས་ནང་གསེས་མང་པོ་ཞིག་ཆགས་ཀྱི་ཡོད། རི་བོ་དགེ་ལྡན་པར་ཆ་མཚོན་ནའང་། སྲད་རྒྱུད་དང་། དབེན་ས་སྙན་བརྒྱུད། དབུས་ཀྱི་གཞུང་པ་བ་བཅས་སྲད་དབེན་གཞུང་གསུམ་དང་། གཞན་ཡང་གདན་ས་ཆེ་ཁག་ས་ཆ་མཚོན་ནའང་ཡིག་ཆ་མི་འདྲ་བ་རེ་ཡོང་བཞིན་ཡོད། ང་ཚོ་ཚང་མ་རྩ་བའི་ཐོག་ཏུ་ཕྱིན་ན་ཚང་མ་གཅིག་གྱུར་ཆགས་ཡོད། དེ་ལྟར་འགྲོ་རྒྱུ་གལ་གནད་ཆེན་པོ་རེད་འདུག
འཛམ་གླིང་གི་ཤར་ནུབ་དང་། འཛམ་གླིང་ལྷོ་བྱང་ཚང་མ་དཔལ་འབྱོར་དང་། ཁོར་ཡུག་སོགས་ཀྱི་ཐོག་ནས་ང་ཚོ་ཚང་མ་མཉམ་རུབ་དང་། གཅིག་སྒྲིལ་བྱེད་པའི་དུས་སྐབས་ཤིག་ཡིན་ལ། དེ་བཞིན་ཆོས་པ་རྣམས་ཀྱང་མཐུན་ལམ་མཉམ་རུབ་བྱེད་པའི་དུས་ཚོད་ཤིག་ཏུ་སླེབས་ཡོད། དེས་ན་ང་ཚོ་ནང་པ་སངས་རྒྱས་པའི་ཆོས་བྱེད་རྣམས་མཐུན་ལམ་མཉམ་རུབ་བྱ་རྒྱུ་ཧ་ཅང་གལ་གནད་ཆེན་པོ་ཆགས་ཡོད། ཅེས་བཀའ་སྩལ་ཏོ།། །།