དཔལ་ནཱ་ལེནྡྲ། བྱོན་པ་ལེགས།
༄༅། །ཕྱི་ལོ་ ༢༠༡༨ ཟླ་བ་ ༩ ཚེས་ ༣ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་དབུས་གཙང་ཆོལ་ཁ་དང་། མདོ་སྨད་ཆོལ་ཁ། དྷ་སར་རྟེན་གཞི་བྱས་པའི་ཆུ་སྒང་། ཀ་རྡོར་སྒང་གསུམ། ར་ཝང་ལ་བཅས་ཀྱི་ཚོགས་སྐྱིད་ཁག་ནས་སྒྲོལ་དཀར་ཡེ་ཤེས་འཁོར་ལོའི་སྒོ་ནས་བརྟན་བཞུགས་བསྟར་འབུལ་སྐབས་སུ་སྩལ་བའི་བཀའ་སློབ་ལས་ཟུར་འདོན་ཞུས།
ཁྱེད་རང་ཚོས་པཎ་གྲུབ་བཅུ་བདུན་གྱི་སྐུ་ཐང་ཞིག་བཟོས་འདུག །དེང་གི་དུས་འདིར་པཎ་གྲུབ་བཅུ་བདུན་ཞེས་འཛམ་གླིང་འདིར་སངས་རྒྱས་ཀྱི་བསྟན་པ་རིགས་པའི་ལམ་ནས་གཏན་ལ་ཕབ་པ་དང་། རྒྱུ་མཚན་ལྡན་པའི་ཐོག་ནས་ངོ་སྤྲོད་བྱ་རྒྱུ་ཡོད་པ་དེ་ལ་པཎ་གྲུབ་བཅུ་བདུན་ཧ་ཅང་བཀའ་དྲིན་ཆེན་པོ་རེད།
དེ་སྔ་ང་རང་ཚོར་རྒྱན་དྲུག་མཆོག་གཉིས་ལས་པཎ་གྲུབ་བཅུ་བདུན་ཆ་ཚང་བ་མེད་པས། པཎ་གྲུབ་གཞན་རྣམས་ཁུ་སིམ་དུ་བཞུགས་པའི་སྲོལ་ལྟ་བུ་ཆགས་ཡོད། མདོར་ན། པཎ་གྲུབ་བཅུ་བདུན་གྱི་མཚན་ལ་གུང་ལ་འདེགས་མཁན་དེ་ངོས་རང་ཆགས་ཡོད། དེ་དག་གིས་དངོས་ཡོད་གནས་ཚུལ་དང་མཐུན་པར་རིགས་པའི་ལམ་ནས་འགྲེལ་བཤད་བརྒྱབ་པ་རྣམས་ནི་ཧ་ཅང་རྩ་ཆེན་པོ་རེད། སྐྱབས་སུ་མཆིའོ་རྩ་ཆེན་པོ་དང་བསམ་གྱིས་མི་ཁྱབ་པ་རེད། ཅེས་པའི་སྐད་ཆ་དེ་ཙམ་མིན་པར་དངོས་ཡོད་གནས་ཚུལ་ལ་རྒྱུ་མཚན་བཀོད་ནས་འཆད་མཁན་ཞིག་རེད།
ཁྱེད་རང་ཚོའི་ཡིག་ཆ་ཞིག་གི་ནང་དུ་བོད་ཀྱི་སྐད་ཡིག་གཅེས་འཛིན་བྱེད་པ་ལ་དམ་བཅའ་ལྟ་བུ་འཇོག་གི་ཡིན། གོང་བུ་གཅིག་གྱུར་གྱི་དམ་ཚིག་ལྡན་པ་ཞིག་བྱེད་ཀྱི་ཡིན། ཞེས་བྲིས་ཡོད་པ་ངོས་ནས་རགས་ཙམ་མཐོང་བྱུང་། དེར་བརྟེན། ངོས་ནས་རྒྱུན་དུ་བརྗོད་བཞིན་པ་ལྟར། དཔལ་ནཱ་ལེནྡྲའི་ཆོས་བརྒྱུད་རིགས་པ་དང་ལྡན་པའི་ཐོག་ནས་གཞི་ཡི་གནས་ཚུལ་བདེན་པ་གཉིས་དང་། ལམ་གྱི་གནས་ཚུལ་བདེན་པ་གཉིས་དང་འབྲེལ་བའི་བདེན་བཞིའི་རྣམ་གཞག་ཅེས་བཤད་རྒྱུ་ཡོད་པ་འདི་དག་ནི་བོད་གངས་ཅན་ལྗོངས་ཀྱི་སངས་རྒྱས་ཀྱི་བསྟན་པ་གཅིག་པུ་ལས་གཞན་སུ་ལའང་མེད།
ད་ལྟ་ངོས་རང་ལོ་བརྒྱད་ཅུ་གྱ་གསུམ་ལ་སླེབས་ཡོད་པའི་མི་ཞིག་རེད། མི་མང་པོ་ཐུག་འཕྲད་ཡོང་གི་ཡོད་པས། དེ་དག་གི་ཉམས་མྱོང་ཕྱོགས་བསྡོམས་བྱེད་སྐབས་ང་ཚོ་བོད་ལ་སངས་རྒྱས་ཀྱི་བསྟན་པ་ཆ་ཚང་བ་ཞིག་དང་། སྤུས་དག་པོ་ཞིག་ཡོད་པ་ཧ་ཅང་གསལ་པོ་རེད་འདུག །དེའི་འགྲེལ་བཤད་རྒྱག་པར་བོད་ཀྱི་སྐད་ཡིག་ཡག་ཤོས་རེད་འདུག །དེང་སྐབས་རྒྱ་ནག་ཏུ་ནང་ཆོས་ལ་དོ་སྣང་བྱེད་མཁན་དག་གིས་བོད་ཡིག་ལ་དོ་སྣང་བྱེད་ཀྱི་འདུག །དེར་བརྟེན། སངས་རྒྱས་པའི་ཆོས་བོད་གངས་ཅན་གྱི་ལྗོངས་ལ་དཔལ་ནཱ་ལེནྡྲའི་མཁན་ཆེན་ཞི་བ་འཚོ་ཡབ་སྲས་ཀྱིས་ངོ་སྤྲོད་དང་རྩིས་སྤྲོད་གནང་བ་དེ་བོད་ཀྱི་མེས་པོ་རྣམས་ཀྱིས་ལོ་ངོ་སྟོང་ཕྲག་རིང་ལྷག་བསམ་རྣམ་དག་གིས་བདག་པོ་བརྒྱབ་པ་རེད། དུས་ཀྱི་མཐའ་འདི་ལྟ་བུ་ཞིག་ལའང་ང་ཚོ་བོད་གངས་ཅན་ལྗོངས་ཀྱི་སངས་རྒྱས་ཀྱི་བསྟན་པ་འདི་བོད་སྐད་རང་གི་ཐོག་ནས་གཞི་ལམ་འབྲས་གསུམ་གྱི་རྣམ་གཞག་དཔྱིས་ཕྱིན་པ་ཞིག་བཤད་རྒྱུ་ཡོད་པ་ནི་བོད་པ་གཅིག་པུ་རེད།
དེ་ནི་ང་རང་ཚོས་ཕྱོགས་གཅིག་ནས་བསྟན་པའི་ཞབས་འདེགས་སྒྲུབ་པ་རེད། བསྟན་པ་དང་འགྲོ་བའི་དོན་བྱེད་པའང་ཞིག་ཆགས་ཡོད། ཕྱོགས་གཉིས་ནས་ང་ཚོ་བོད་མི་རིགས་ཀྱི་རྣམ་དཔྱོད་ངོམ་པ་ལ་ང་ཚོའི་མེས་པོ་གོང་མ་དག་གིས་སངས་རྒྱས་ཀྱི་བསྟན་པ་སྔར་མེད་གསར་དུ་བཙུགས་ནས་བཀའ་འགྱུར་བསྟན་འགྱུར་པོ་ཏི་སུམ་བརྒྱ་ལྷག་རྒྱ་གར་ནས་བོད་དུ་བསྒྱུར་བ་དང་། དེ་དག་གི་འགྲེལ་པ་པོ་ཏི་ཁྲི་ཕྲག་ཡོད་པ་བོད་པ་རང་གིས་བརྩམས་པ་སོགས་ཧ་ལས་པ་རེད། དེ་དག་རྒྱུན་འཛིན་བྱ་རྒྱུ་ནི་ང་ཚོ་ཚང་མའི་ལས་འགན་རེད། ངོས་ཀྱིས་འགོ་ཁྲིད་ནས་སོ་སོ་ལའང་སྐུལ། ཁྱོད་རང་ཚོ་ཚང་མས་བསམ་པ་རྣམ་དག་བྱས་ཏེ་གཙོ་ཆེ་ཤོས་རིས་མེད་ཀྱི་བཤད་གྲྭ་ཁག་གིས་རྐང་འགན་ཁུར་ལེན་བྱེད་ཀྱི་ཡོད།
ཉེ་ལམ་ནུབ་ལ་དྭགས་ནས་ཤར་མོན་བར་དུ་བོད་གངས་ཅན་ལྗོངས་ཀྱི་སངས་རྒྱས་ཀྱི་བསྟན་པ་དང་འབྲེལ་བ་ཡོད་པའི་ས་ཁུལ་དེ་དག་ནས་ཚོགས་ཆུང་ཞིག་བཙུགས་ནས་གུ་རུ་རིན་པོ་ཆེ་ཉེ་སྔོན་ལྡི་ལིར་ཐུག་འཕྲད་བྱུང་བར། ཧི་མ་ལ་ཡའི་རི་རྒྱུད་དུ་ཡོད་པའི་དགོན་པ་ཚང་མ་སློབ་སྦྱོང་བྱེད་སའི་བསྟི་གནས་ཤིག་བཟོ་རྒྱུ་ཡིན། ཞེས་ཚོགས་ཆུང་དེས་ངོས་ལ་བཤད་བྱུང་བས་ཧ་ཅང་དགའ་པོ་བྱུང་། འགྲིག་འདུག་ཅེས་མངོན་པར་བསྟོད་པ་ཡིན། ཚོགས་ཆུང་ཞིག་ཡོད་པས་ལ་དྭགས་ལ་ཚོགས་ཆུང་གི་ཚོགས་མི་ཡོང་ནས་དམིགས་ཡུལ་གང་དག་ཡིན་པ་མང་ཚོགས་ལ་འགྲེལ་བཤད་བྱེད་ཐུབ་ན་ཡག་པོ་འདུག་ཅེས་བརྗོད་རྒྱུ་བྱུང་། གང་ལྟར་ཁུར་ཡག་པོ་ལེན་གྱི་འདུག་པས་ཧ་ཅང་ཡག་པོ་འདུག
ཆོས་ལུགས་ཚང་མར་ངོས་ཀྱིས་གུས་པ་བྱེད་ཀྱི་ཡོད་ལ་ཧ་ཅང་ཡག་པོ་རེད། ཆོས་ལུགས་ཚང་མ་མིའི་ཆོས་ལུགས་ཡིན་པས། མིར་སྐྱེས་པའི་སྐབས་ནས་རྩ་ཆེ་ཤོས་བྱམས་བརྩེ་ཆགས་ཡོད། སྐྱེས་པའི་སྐབས་ནས་མི་ལ་བྱམས་བརྩེ་མེད་ན་ཕྲུ་གུ་འཚོ་གནས་མི་ཐུབ་པར་ཤི་ངེས་ཡིན། བྱམས་བརྩེ་ལ་བརྟེན་ནས་མི་སྐྱེས་པ་དང་། བྱམས་བརྩེ་ལ་བརྟེན་ནས་མི་རྣམས་འཚོ་བཞིན་ཡོད། དེར་བརྟེན། མིའི་ཆོས་ལུགས་ཚང་མས་བྱམས་བརྩེ་གཙོ་བོར་བྱས་ཏེ་བཤད་ཡོད་པ་ཧ་ཅང་གསལ་པོ་རེད། ཆོས་ལུགས་ཚང་མས་མི་ལ་ཕན་གྱི་ཡོད་ལ། ཆོས་ལུགས་ཚང་མས་བྱམས་བརྩེ་གསུངས་ཡོད་ཀྱང་། ཆོས་ལུགས་བྱེད་མཁན་གྱིས་བྱམས་བརྩེ་གལ་ཆེན་པོར་མ་བརྩིས་པར་ཆོས་ལུགས་འཐེན་འཁྱེར་དང་ཞེན་ཁོག་བྱས་ཏེ་གསོད་རེས་གཏོང་མཁན་འདུག་པ་ནི་ཧ་ཅང་ཐབས་སྐྱོ་པོ་རེད། གང་ལྟར་ཆོས་ལུགས་ཚང་མ་མིའི་ཆོས་ལུགས་ཡིན་པས་བྱམས་བརྩེ་བཤད་མཁན་ཤ་སྟག་རེད། འོན་ཀྱང་རིགས་པའི་ཐོག་ནས་འགྲེལ་བཤད་རྒྱག་ཆེད་ཆོས་ལུགས་གཞན་པར་བཀའ་འདྲི་ཞུས་ན། དེ་ལྟར་འདྲི་རྒྱུ་ཡོད་པ་མ་རེད། དེ་ནི་དཀོན་མཆོག་རང་གིས་མཁྱེན་གྱི་རེད་ཟེར་བ་ལས་གང་ཡང་མེད། དེ་མིན་དྲི་བ་དྲིས་ཆོག་གི་མ་རེད་ཟེར་གྱི་འདུག །ནཱ་ལེནྡྲའི་ཆོས་བརྒྱུད་ནི་བཅོམ་ལྡན་འདས་རང་གིས་ཀྱང་། ང་ལ་དད་བྱས་མོས་བྱས་ཏེ་ངས་གང་བཤད་བརྩི་མི་དགོས། ངས་བཤད་པ་རྣམས་ལ་ཁྱེད་རང་ཚོས་བརྟག་དཔྱད་བྱེད་དགོས། རྒྱུ་མཚན་ལྡན་པ་ཞིག་ཡོང་གི་འདུག་ཚེ་དེ་ཉམས་ལེན་བྱོས།
དགེ་སློང་དག་གམ་མཁས་རྣམས་ཀྱིས། །
བསྲེགས་བཅད་བརྡར་བའི་གསེར་བཞིན་དུ། །
ལེགས་པར་བརྟགས་ལ་ང་ཡི་བཀའ། །
བླང་བར་བྱ་ཡི་གུས་ཕྱིར་མིན།།
ཞེས་གསུངས་ཡོད། དེར་བརྟེན་ནཱ་ལེནྡྲའི་ཀླུ་སྒྲུབ་ཡབ་སྲས་ལ་སོགས་ཀྱིས་མདོ་སྡེ་དགོངས་འགྲེལ་ལྟ་བུ་བཅོམ་ལྡན་འདས་ཀྱི་བཀའ་ཡིན་ནའང་། དེ་སྒྲ་ཇི་བཞིན་པར་ཁས་བླངས་ཚེ་རིགས་པས་གནོད་ཀྱི་འདུག་ཅེས་སྒྲ་ཇི་བཞིན་པ་ཁས་ལེན་གྱི་མེད།
རྣམ་པ་དེ་ལྟའི་མདོ་སྡེ་གཞན་ཡང་ནི། །
དྲང་དོན་ཉིད་དུ་ལུང་འདིས་གསལ་བར་བྱེད།།
ཅེས་གསུངས་ཡོད། དེང་སང་འཛམ་གླིང་འདིར་ཚན་རིག་གི་འགྲོ་སྟངས་ནི། དད་པ་མིན་པར་རྩ་ཆེན་པོ་བྱས་ཏེ་བརྟག་དཔྱད་ཡང་ཡང་བྱས་ཏེ་འགྲོ་བཞིན་ཡོད། ནཱ་ལེནྡྲའི་ཆོས་བརྒྱུད་ཀྱིས་བརྟག་དཔྱད་བྱས་ནས་གཏན་ལ་ཕབ་པ་དེ་ནི་ཚན་རིག་དང་མཉམ་དུ་འགྲོ་ཐུབ་པ་ཞིག་ཆགས་ཡོད། དེ་ལྟ་བུའི་ཆོས་བརྒྱུད་རྩ་ཆེན་པོ་དང་ཕན་ཐོགས་ཡོད་པ། བཤད་ན་བཤད་རྒྱུ་ཡོད་པ་སྟེ། གཞིའི་གནས་ཚུལ་འགྲེལ་བཤད་བརྒྱབ་ནས་བཤད་རྒྱུ་ཡོད་པ་དང་། གཞི་ཡི་གནས་ཚུལ་དེ་དང་འབྲེལ་བའི་ཐོག་ནས་སེམས་ལ་འགྱུར་བ་ཇི་ལྟར་གཏོང་དགོས་པ་སོགས་ཧ་ལས་པ་རེད།
ཁྱོད་རང་ཚོས་བོད་ཀྱི་རིག་གཞུང་སྤྱི་དང་། ལྷག་པར་དུ་བོད་ཀྱི་སྐད་ཡིག་ལ་དོ་སྣང་བྱས་ཏེ་བདག་པོ་རྒྱག་གི་ཡིན་ཞེས་ཡི་གེའི་ནང་བཀོད་འདུག་པ་ཧ་ཅང་ཡག་པོ་རེད། དེ་རིང་ཁྱེད་ཚོ་བོད་པ་མིན་པ་ཚོས་ཀྱང་གོང་དུ་བཤད་པ་ལྟར། སངས་རྒྱས་པའི་ཆོས་དང་སངས་རྒྱས་པའི་ལྟ་གྲུབ་ལ་དོ་སྣང་སླེབས་སྐབས་བོད་ཀྱི་སྐད་ཡིག་ཐོག་ལ་དོ་སྣང་བྱེད་མཁན་ཡོང་གི་ཡོད། ང་ཚོ་བོད་པར་རང་ཉིད་ཀྱི་སྐད་ཡིག་གི་ཆ་ནས་ཡིན་ནའང་བདག་པོ་རྒྱག་དགོས་པ་དེ་གལ་ཆེན་པོ་རེད། བདག་པོ་བརྒྱབ་ན་བརྒྱབ་རིན་ཡོད་པ་ཞིག་དང་། བོད་སྐད་དེ་བདག་པོ་ཡག་པོ་བརྒྱབ་ནས་དོན་དག་ཡག་པོ་ཞིག་ཤེས་ཚེ་འཛམ་གླིང་ལ་ཞབས་འདེགས་སྒྲུབ་ཐུབ་པ་ཞིག་ཏན་ཏན་ཡོད།[1] ཅེས་བཀའ་སྩལ་ཏོ།། །།
[1] https://gyalwarinpoche.com/news/2018/2018-09-03