དཔལ་ནཱ་ལེནྡྲ། བྱོན་པ་ལེགས།
ན༽ གྲུབ་ཆེན་བརྒྱད་ཅུ་རྩ་བཞིའི་མཛད་རྗེས།
དེ་ཡང་། གྲུབ་ཆེན་གྱ་བཞིས་རྒྱ་བོད་ཀྱི་ནང་བསྟན་ལ་བཞག་པའི་མཛད་རྗེས་ལས། རྒྱ་གར་དུ་ནང་བསྟན་དར་བའི་དུས་རིམ་ཆེན་པོ་བཞི་སྟེ། ༡ རྒྱལ་ཕྲན་སིལ་མ་བཅུ་དྲུག་སྐབས་གདོད་མའི་ནང་བསྟན་གྱི་དུས་སྐབས་དང་། ༢ མཽརྱཱའི་རྒྱལ་རབས་སྐབས་ཐེག་དམན་ཉན་ཐོས་སྡེ་པ་དར་བའི་དུས་སྐབས། ༣ ཀུ་ཤ་ཎ་དང་གུཔྟའི་རྒྱལ་རབས་སྐབས་ཐེག་ཆེན་དབུ་སེམས་གཙོ་བོར་དར་བའི་དུས་སྐབས། ༤ རྒྱལ་པོ་ཧར་ཤ་དང་པཱ་ལའི་རྒྱལ་རབས་སྐབས་ཐེག་ཆེན་གསང་སྔགས་གཙོ་བོར་དར་བའི་དུས་སྐབས་བཞིའོ།།
རྒྱུ་མཚན་ཉིད་ཐེག་པའི་ཟབ་རྒྱས་ཀྱི་ལམ་རིམ་གསལ་བར་བྱེད་པ་ལ་གཙོ་བོ་རྒྱན་དྲུག་མཆོག་གཉིས་འཕྲིན་ལས་ཆེ་བ་ཇི་ལྟར་དུ། འབྲས་བུ་རྡོ་རྗེའི་ཐེག་པའི་ཟབ་རྒྱས་ཀྱི་ལམ་རིམ་གསལ་བར་བྱེད་པ་ལ་གཙོ་བོ་རྒྱ་གར་གྲུབ་ཆེན་བརྒྱད་ཅུ་རྩ་བཞི་རྣམས་མཛད་པ་རླབས་ཆེ། སྔགས་ཕྱོགས་སུ། ཆོས་རྒྱུན་སྣ་ཚོགས་སྤེལ་བ་དང་། རྒྱུད་འགྲེལ་མང་པོ་མཛད་པ། བསྟན་བཅོས་མང་པོ་བོད་སྐད་དུ་བསྒྱུར་བ། དེ་ཡང་སྡེ་དགེའི་བསྟན་འགྱུར་དཔེར་དྲངས་ན། ཁྱོན་ཆོས་ཚན་ ༣༤༦༨ བཞུགས་པར། སྔགས་ཕྱོགས་ཀྱི་ཆོས་ཚན་ ༢༦༨༥ ཡོད་ (77.5%) ལ། དེ་ལས་ཆོས་ཚན་ ༧༨༨ ཙམ་ནི་གྲུབ་ཆེན་གྱ་བཞི་ཡིས་མཛད་པའམ་བོད་སྐད་དུ་བསྒྱུར་ཡོད།
མདོ་ཕྱོགས་སུ། གྲུབ་ཆེན་ནཱ་གརྫུ་ན་(སློབ་དཔོན་ཀླུ་སྒྲུབ་)དང་། གྲུབ་ཆེན་ཀཎ་རི་པ་(འཕགས་པ་ལྷ་)གཉིས་ཀྱིས་ཟབ་མོ་ལྟ་བརྒྱུད་ཀྱི་ལམ་རིམ་གསལ་བར་བྱས་པ་དང༌། གྲུབ་ཆེན་བྷུ་སུ་ཀུ་(རྒྱལ་སྲས་ཞི་བ་ལྷ་)ཡིས་རླབས་ཆེན་སྤྱོད་བརྒྱུད་དམ་བྱིན་རླབས་ཉེ་བརྒྱུད་ཀྱི་ལམ་རིམ་གསལ་བར་བྱས། མདོར་ན། གནའ་བོའི་རྒྱ་བོད་དུ་སངས་རྒྱས་ཆོས་ལུགས་དར་བ་ལ་མདོ་སྔགས་གཉིས་ཆར་གྲུབ་ཆེན་གྱ་བཞི་རྣམས་འཕྲིན་ལས་ནམ་མཁའ་དང་མཉམ་མོ།།
ཆོས་རྒྱུན་སྣ་ཚོགས་སྤེལ་བར་གྲུབ་ཆེན་གྱ་བཞི་སྐུ་དྲིན་ཆེ་ཚུལ་ཡང་། མདོ་ཕྱོགས་ལ་དཔེར་མཚོན་ན། གྲུབ་ཆེན་གྱ་བཞིའི་ཡ་གྱལ་སློབ་དཔོན་ཀླུ་སྒྲུབ་དང་། སློབ་དཔོན་འཕགས་པ་ལྷ་གཉིས་ནས་བརྒྱུད་པའི་ཟབ་མོ་དབུ་མའི་ལྟ་བ་དང་། གྲུབ་ཆེན་གྱ་བཞིའི་ཡ་གྱལ་རྒྱལ་སྲས་ཞི་བ་ལྷ་ནས་བརྒྱུད་པའི་རླབས་ཆེན་སྤྱོད་བརྒྱུད་དམ་བྱིན་རླབས་ཉེ་བརྒྱུད་དེ། མདོ་ཕྱོགས་ཀྱི་ཟབ་རྒྱས་ལམ་རིམ་གཉིས་ཀ་དང་། དེ་བཞིན་དུ་སྔགས་ཕྱོགས་སུ་ཡང་དཔེར་ན། གྲུབ་ཆེན་མཚོ་སྐྱེས་རྡོ་རྗེ་ལས་བརྒྱུད་པའི་ཕུར་པའི་ཆོས་སྐོར་དང༌། གྲུབ་ཆེན་ལཱུ་ཨི་པ་དང་ནག་པོ་སྤྱོད་པ་དང་དྲིལ་བུ་པ་སོགས་ལས་བརྒྱུད་པའི་བདེ་མཆོག་གི་ཆོས་སྐོར་དང་། གྲུབ་ཆེན་བི་རཱུ་པ་དང་ལཉྩི་ཀ་ར་སོགས་ལས་བརྒྱུད་པའི་རྡོ་རྗེ་ཕག་མོའི་ཆོས་སྐོར་དང་། གྲུབ་ཆེན་ལི་ལ་པ་དང་ཌོམྦྷི་པ་དང་ཝཱི་ན་པ་སོགས་ལས་བརྒྱུད་པའི་དགྱེས་རྡོར་གྱི་ཆོས་སྐོར་དང༌། གྲུབ་ཆེན་ཀརྣ་རི་པ་དང་བནྡྷེ་པ་དང་ན་ལི་ན་སོགས་ལས་བརྒྱུད་པའི་གསང་འདུས་ཀྱི་ཆོས་སྐོར་དང་། གྲུབ་ཆེན་ནཱ་རོ་པ་ལས་བརྒྱུད་པའི་ནཱ་རོ་ཆོས་དྲུག་གི་ཆོས་སྐོར་སོགས་ཡི་དམ་སྒྲུབ་ཐབས་དང༌། གྲུབ་ཆེན་གྱ་བཞི་སྤྱི་ལས་བརྒྱུད་པའི་ཕྱག་རྒྱ་ཆེན་པོའི་ཆོས་སྐོར་དང༌། གཞན་ཡང་། ས་ར་ཧའི་སློབ་མ་བྷཾ་ག་ལའི་དགེ་སློང་ཧ་ཡ་བ་ལ་ཞེས་པས་ཨོ་ཊི་ཡ་ན་རྡོ་རྗེའི་གནས་ནས་སྒྲོལ་མའི་རྒྱུད་སོགས་ཡུལ་དབུས་སུ་གདན་དྲངས་པ་དང༌། ཕྱིས་སུ་ཙནྡྲའི་རྒྱལ་ཕྲན་རབ་གསལ་ཟླ་བས་དེ་ཉིད་བསྡུས་པ་སོགས་རྣལ་འབྱོར་རྒྱུད་དང་། སྔར་ས་ར་ཧས་སངས་རྒྱས་ཐོད་པ་དང་། ཀླུ་སྒྲུབ་སློབ་མ་དང་བཅས་པས་གསང་བ་འདུས་པ་སོགས་དར་བར་མཛད་ཅིང༌། ཨོ་ཊི་ཡ་ནའི་ཡུལ་སོགས་ནས་ལྭ་བ་པ་དང་མཚོ་སྐྱེས་སོགས་ཀྱིས་ཀྱེ་རྡོར་སོགས་རྣལ་འབྱོར་མའི་རྒྱུད་དང་། ཤམྦྷ་ལ་ནས་ཙི་ལུ་པ་དང་བི་ཊོ་པ། དུས་ཞབས་ཆེ་བ་ཅི་རིགས་ཀྱིས་དུས་འཁོར་དང༌། ལཱ་ལི་ཏས་ཨུ་རྒྱན་ནས་གཤེད་སྐོར་དང་། བི་རཱུ་པས་དམར་པོའི་རྒྱུད། ཌོཾ་བི་ཧེ་རུ་ཀ་སོགས་ཀྱིས་ཀུ་རུ་ཀུལླེ་དང་ཨ་ར་ལི། ལཱུ་ཡི་པས་རྣལ་འབྱོར་མ་ཀུན་སྤྱོད་དང༌། ནག་པོ་སྤྱོད་པས་ཁ་སྦྱོར་དང་། ཀུ་ཀུ་རི་པས་མ་ཧཱ་མ་ཡ་སོགས་སྤྱན་དྲངས་ཏེ་དར་བར་མཛད་པ་ལྟ་བུའོ།།
ཡང་ཇོ་ནང་པའི་གྲུབ་མཐའ་སོགས་ལ་དར་བའི་ངོ་མཚར་བཀའ་བབས་བདུན་ལྡན་གྱི་བརྒྱུད་པ་ལ་དཔེར་མཚོན་ན་ཡང༌། བཀའ་བབས་དང་པོ་ཕྱག་རྒྱ་ཆེན་པོའི་གདམས་ངག་ནི། གྲུབ་ཆེན་བྲམ་ཟེ་སྒྲ་གཅན་འཛིན་ (ས་ར་ཧ་ཆེ་བ་ཡང་ཟེར།) ལས་འཕེལ་ཞིང༌། དེས་གྲུབ་ཆེན་ཀླུ་སྒྲུབ། དེས་གྲུབ་ཆེན་ཤ་བ་རི་ (ས་ར་ཧ་ཆུང་བ་ཡང་ཟེར།) དེས་གྲུབ་ཆེན་ལཱུ་ཡི་པ། དེས་གྲུབ་ཆེན་ཌེཾ་གི་པ། དེས་གྲུབ་ཆེན་ཏི་ལོ་པ། དེས་གྲུབ་ཆེན་ནཱ་རོ་པ། དེས་གྲུབ་ཆེན་ཌོཾ་བྷི་པ་ཆུང་བ་སོགས་ལ་བརྒྱུད་ཚུལ་དང་། བཀའ་བབས་གཉིས་པ་གཏུམ་མོའི་གདམས་པ་ནི། རྡོ་རྗེ་རྣལ་འབྱོར་མས་གྲུབ་ཆེན་བི་རཱུ་པ། དེས་ནག་པོ་བི་རཱུ་པ།(བི་རཱུ་པ་ཆུང་བ་ཡང་ཟེར།) དེས་གྲུབ་ཐོབ་བྱ་དཱ་ལི་པ། (གྲུབ་ཆེན་བྱ་རྔོན་ཞབས།) སོགས་ལ་བརྒྱུད་པས་མཚོན་བཀའ་བབས་བདུན་བརྒྱུད་ཐམས་ཅད་གྲུབ་ཆེན་གྱ་བཞིའི་ཡ་གྱལ་ལ་བརྟེན་ནས་རྒྱ་བོད་དུ་འཕེལ།
རྒྱ་གར་གྲུབ་ཆེན་བརྒྱད་ཅུ་རྩ་བཞིས་མཛད་པའི་དགོངས་འགྲེལ་བསྟན་བཅོས་དག་བོད་སྐད་དུ་བསྒྱུར་བ་དང་། གྲུབ་ཆེན་གྱ་བཞི་ལས་བརྒྱུད་པའི་ཆོས་རྒྱུན་མང་པོ་བོད་ཡུལ་དུ་དར་བའི་གོ་རིམ་ཁྲོད་དུ། ཆོས་ཁུངས་བཙུན་པར་སྟོན་ཕྱིར་རམ། གསང་སྔགས་ཉམས་ལེན་པ་ཚད་ལྡན་གྱི་མིག་དཔེ་སྟོན་པའམ། བྱིན་རླབས་ཀྱི་རྩ་བ་བླ་མ་ཡིན་ཚུལ་སྟོན་ཕྱིར་སོགས་ཀྱི་དགོས་དབང་གིས་རྒྱ་གར་གྲུབ་ཆེན་གྱ་བཞིའི་རྣམ་ཐར་དང་། གྲུབ་ཆེན་གྱ་བཞིའི་རྟོགས་པའི་སྙིང་པོའམ་རྡོ་རྗེའི་གླུ། གྲུབ་ཆེན་གྱ་བཞི་ལ་བརྟེན་ནས་བྱིན་རླབས་བྱ་ཚུལ། གྲུབ་ཆེན་གྱ་བཞི་ཡི་དབང་དང་རྗེས་གནང་། གྲུབ་ཆེན་གྱ་བཞིའི་སྒྲུབ་ཐབས། གྲུབ་ཆེན་གྱ་བཞི་ལ་བརྟེན་ནས་བླ་མའི་རྣལ་འབྱོར་སྒོམ་ཚུལ། གྲུབ་ཆེན་གྱ་བཞིའི་སྐུ་བརྙན་བཞེངས་ཚུལ་སོགས་ས་དགེ་བཀའ་རྙིང་ཇོ་ནང་དང་བཅས་པའི་བོད་ཀྱི་གྲུབ་མཐའ་སོ་སོར་རྒྱ་ཆེར་དར་ཞིང་། བོད་ཀྱི་མཁས་གྲུབ་རྣམས་ཀྱིས་རྒྱ་གར་གྲུབ་ཆེན་གྱ་བཞིས་མཛད་པའི་བསྟན་བཅོས་མང་པོ་བསྒྱུར་ཅིང་། དེ་དག་ལ་དགོངས་འགྲེལ་བགྲང་གིས་མི་ལང་བ་བརྩམས་འདུག །མདོར་ན་མདོ་སྔགས་གཉིས་ཀའི་ཆོས་རྒྱུན་སྣ་ཚོགས་བོད་དུ་སྤེལ་བའི་གོ་རིམ་ཁྲོད་དུ། རྒྱ་བོད་ཀྱི་ལོ་པཎ་མང་པོས་གྲུབ་ཆེན་གྱ་བཞིས་མཛད་པའི་མདོ་རྒྱུད་ཀྱི་བསྟན་བཅོས་ཤིན་ཏུ་མང་པོ་བོད་སྐད་དུ་བསྒྱུར་ཡོད།[1] ཅེས་གསལ་བ་ལྟར་རོ།། །།
[1] མཚོ་སྔོན་མི་རིགས་སློབ་ཆེན་བོད་རིག་པའི་སློབ་གླིང་། འགྱུར་མེད་རྡོ་རྗེ། ༢༠༢༠ ལོའི་སྤྱི་ཟླ་ ༥ པའི་ཚེས་ ༨ ཉིན།
ཡོང་ཁུངས། པཎ་གྲུབ་བཅུ་བདུན་གྱི་རྣམ་ཐར་དང་འབྲེལ་བའི་དཔྱད་རྩོམ་ལུང་རིགས་མཛེས་རྒྱན།། ༼ཇ༽ རྩོམ་པ་པོ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༢༠༣ ནས་ ༢༠༦ བར་གསལ་བ་ལས་བཏུས་པའོ།།