དཔལ་ནཱ་ལེནྡྲ། བྱོན་པ་ལེགས།
ཏ༽ ཁ་ཆེར་བསྟན་འགྲོའི་དོན་ཇི་ལྟར་མཛད་ཚུལ།
སློབ་དཔོན་ཤཱཀྱ་འོད་ཀྱིས་བསྟན་པ་དང་འགྲོ་བའི་དོན་ཇི་ལྟར་མཛད་པའི་ཚུལ་ནི། དགེ་སློང་ཤནྟིའི་མིང་ཅན་ཏེ་དཀའ་ཆེན་བློ་བཟང་བཟོད་པས་ (1922-1995) མཛད་པའི་རྒྱན་དྲུག་མཆོག་གཉིས་ཀྱི་བསྟོད་འགྲེལ་དད་ལྡན་དགའ་བསྐྱེད་ལས[1]།
ཤཱཀྱ་སེངྒེའི་བསྟན་ལ་རབ་ཞུགས་ཏེ། །
འདུལ་མངོན་མདོ་སྡེ་སྡེ་སྣོད་མང་དུ་ཐོས། །
ཁྲིམས་དང་ཏིང་འཛིན་ཤེས་རབ་ཀྱིས་ཕྱུག་པའི། །
ཤཱཀྱ་འོད་ཀྱི་ཞབས་ལ་ཕྱག་འཚལ་ལོ། །
ཞེས་བསྔགས་སོ། །དེ་ཡང་བདག་ཉིད་ཆེན་པོ་སློབ་དཔོན་ཤཱཀྱ་འོད་ཅེས་བྱ་བ་འདི་ནི། ཡུལ་རྒྱ་གར་ནུབ་ཕྱོགས་སུ་སྐུ་འཁྲུངས། ཆུང་ངུའི་དུས་ནའང་བློ་གྲོས་ཀྱི་སྤོབས་པ་རྒྱས་ཤིང་། སློབ་དཔོན་ཆེན་པོ་བསོད་ནམས་གྲགས་པས་མཁན་པོ་བགྱིས་ཏེ་རབ་ཏུ་བྱུང་ཞིང་ཚིགས་སྔ་མ་དགེ་ཚུལ་དང་། བསྟན་པ་ཡོངས་རྫོགས་ལ་ཞུགས་པའི་བསྙེན་རྫོགས་ཀྱི་སྡོམ་པ་བཞེས། རིག་པའི་གནས་ཀྱི་གཞུང་ལུགས་སྤྱི་དང་ནང་དོན་སྡེ་སྣོད་གསུམ་ལ་རབ་ཏུ་མཁས་པར་སྦྱངས། ལྷག་པར་སློབ་དཔོན་བསོaད་ནམས་གྲགས་པ་ལས་འདུལ་བའི་སྡེ་སྣོད་གསན་ནས་འདུལ་བ་ལུང་སྡེ་བཞིའི་ཚིག་དོན་མཐའ་དག་ལེགས་པར་མཁྱེན་ཏོ།།
དེ་ལྟར་འདུལ་བ་མཁྱེན་པའི་བརྗོད་དོན་ཐམས་ཅད་རྒྱལ་བའི་དགོངས་པ་ཇི་ལྟ་བ་བཞིན་ཐུགས་སུ་ཆུད་པས་ཕྱི་རབས་ཀྱི་གདུལ་བྱ་རྣམས་ཀྱི་དོན་དུ་འཕགས་པ་གཞི་ཐམས་ཅད་ཡོད་པར་སྨྲ་བའི་དགེ་ཚུལ་གྱི་ཚིག་ལེའུར་བྱས་པ་སུམ་བརྒྱ་པ་ཞེས་བྱ་བ་དང་། དེའི་རང་འགྲེལ་འོད་ལྡན་ཞེས་བྱ་བ་གཉིས་མཛད། དོན་དེ་ནི་འོད་ལྡན་ལས[2]། བདག་གི་མཁན་པོ་ས་མ་ཏ་ཏར་གནས་པའི་རྒྱན་དུ་གྱུར་པ་གྲགས་ཐོབ་པ། །བསོད་ནམས་གྲགས་པ་ལས་ནི་བདག་གིས་ཉན་ནས་རང་གི་འདུལ་བའི་ཆོ་ག་ཡི། །རྣམ་པར་བཤད་འདི་གསུམ་རིག་རྣམས་ཀྱིས་བཤད་པའི་ཕྱོགས་ཀྱི་གཞི་མཛད་བསྟན་པ་ཡིན། །ཞེས་གསུངས་སོ།།
གཞན་ཡང་སློབ་དཔོན་ཞི་བ་འོད་ཀྱང་དགེ་བའི་བཤེས་གཉེན་དུ་བསྟེན་ནས་མདོ་དང་སྔགས་ཀྱི་ཆོས་ཅི་རིགས་པ་མང་པོ་གསན་པར་མཛད་དོ། །དེ་ཡང་སློབ་དཔོན་ཤཱཀྱ་འོད་རང་ཉིད་ཀྱིས་མཛད་པའི་འོད་ལྡན་ལས[3]། བླ་མ་དག་ནི་རིང་ན་བཞུགས་པ་གྲགས་པས་རྣམ་པར་ཁྱབ་པ་ཞི་བའི་འོད་ཀྱི་བདག །དྲན་པས་དགོངས་པ་མཛད་པར་གྱུར་ཅིག་སྙམ་ནས་བདག་གིས་འགྲེལ་པ་དོན་གསལ་བྱས་པ་ཡིན། །ཞེས་གསུངས་སོ། །དེ་ལྟར་སློབ་དཔོན་དེ་དག་ལས་ཆོས་ཀྱི་གདམས་ངག་ནོད་པ་ཙམ་མིན་པར་རང་རྒྱུད་ལ་ཐུགས་ཉམས་སུ་བཞེས་ནས་འདུལ་བའི་བཅས་མཚམས་ཐམས་ཅད་མིག་འབྲས་ལྟར་བསྲུངས་ནས་ཉེས་བྱས་ཕྲ་མོ་རེས་གོས་ཀྱང་དེ་མ་ཐག་ཕྱིར་བཅོས་ཀྱིས་དག་པར་བྱས་ནས་ཚུལ་ཁྲིམས་ཀྱི་བསླབ་པ་ལ་གཅེས་སྤྲས་ཆེན་པོ་མཛད། ལུང་གི་ཆོས་རྣམས་ལ་ཐོས་བསམ་ཕུ་ཐག་ཆོད་པ་བགྱིས་ཏེ། རྟོགས་པའི་ཆོས་ཡོན་ཏན་ཀུན་གྱི་གཞི་མ་རང་རྒྱུད་ཀྱི་སྤོང་བདུན་འཁོར་བཅས་ཀྱི་ཚུལ་ཁྲིམས་རྣམ་པར་དག་པ་ལ་གནས་བཞིན་དུ་ཏིང་ངེ་འཛིན་གྱི་བསླབ་པ་དང་ཤེས་རབ་ཀྱི་བསླབ་པ་སྟེ། ལྷག་པའི་བསླབ་པ་གསུམ་གྱིས་རྒྱུད་ཕྱུག་ནས་འདུལ་བ་འཛིན་པའི་མཆོག་ཏུ་གྱུར་ཏོ།།
ད་ལྟ་ཡང་རྒྱ་བོད་ཀྱི་མཁས་གྲུབ་རྣམས་ཀྱིས་བདག་ཉིད་ཆེན་པོ་འདུལ་བ་འཛིན་པ་སློབ་དཔོན་ཤཱཀྱ་འོད་ཅེས་བསྔགས་བརྗོད་ཀྱི་མེ་ཏོག་ཕྱོགས་ཀུན་ཏུ་འཐོར་བཞིན་དུ་འཛིན་མ་མཐའ་དག་ཏུ་སྙན་གྲགས་ཀྱི་གཏམ་ཡོངས་སུ་གྲགས་སོ། །དེ་ནས་རང་ཉིད་རྟོགས་པའི་ཡོན་ཏན་ལམ་བསླབ་པ་གསུམ་ལ་ཚུལ་འཆལ་དང་། རང་གཅེས་འཛིན་གྱི་དྲི་མས་མ་གོས་པར་ཡར་ངོའི་རྒྱུ་སྐར་རྒྱལ་པོ་བཞིན་དུ་གྱུར་ཏེ། གདུལ་བྱ་གཞན་དག་ལ་ཡང་འཆད་སྤེལ་གྱི་སྒོ་ནས་རྒྱལ་བའི་བསྟན་པ་ཉིན་མོ་ལྟར་གསལ་བར་མཛད་བཞིན་དུ་ཁ་ཆེའི་ཡུལ་དུ་བཞུགས་ནས་འགྲོ་དོན་རྒྱ་ཆེན་པོ་མཛད་དོ།།
ཁ་ཅིག་སློབ་དཔོན་འདི་ས་གསུམ་བརྙེས་པ་ཡོན་ཏན་འོད་ཀྱི་སློབ་མར་འདོད། ཆོས་རྗེ་བུ་སྟོན་རིན་པོ་ཆེའི་ཆོས་འབྱུང་དུ་གོང་གི་འོད་ལྡན་གྱི་ལུང་གཉིས་དྲངས་ནས་ཡོན་ཏན་འོད་ཀྱི་སློབ་མ་ཡིན་ཞེས་པ་མི་བདེན་གྱི། བསོད་ནམས་གྲགས་པ་དང་། ཞི་བ་འོད་ཀྱི་སློབ་མ་ཡིན་པར་བཤད། དེའི་སློབ་མ་ཤཱཀྱ་བཤེས་གཉེན་ཡིན་པར་སུམ་བརྒྱ་པར་བཤད་དོ། །ཤཱཀྱ་འོད་ཀྱི་སློབ་མ་སེངྒེ་གདོང་ཅན་དང་། དེའི་སློབ་མ་ཛི་ན་མི་ཏྲ་ཡིན་ཟེར་བའང་བརྟག་དགོས་པར་བཤད། ཁ་ཅིག །སློབ་དཔོན་བསོད་ནམས་གྲགས་པ་དང་ཞི་བ་འོད་ཀྱི་སློབ་མ་ཡིན་ན། ཡོན་ཏན་འོད་ཀྱི་སློབ་མ་མིན་མི་དགོས་པས། དེ་གསུམ་ག་ལ་ཆོས་གསན་པ་དང་དེ་གསུམ་གའི་སློབ་མ་ཡིན་པ་མི་འགལ་ཞིང་། གལ་ཏེ་ཡོན་ཏན་འོད་དང་དུས་མི་མཚུངས་ན་བུས་བཤད་པ་ལྟར་གནས་སོ་ཟེར་རོ། །ཞེས་གསལ་བ་ལྟར་རོ།། །།
དཔྱད་གཞིའི་ལུང་ཁུངས་ཡིག་ཆ།
[1] བསྟན་འཛིན་འཕྲིན་ལས་འཇིགས་མེད་ཆོས་ཀྱི་དབང་ཕྱུག་གི་གསུང་འབུམ། ༼༡༽ བྲིས་མ། ཤོག་གྲངས་ ༤༡ན༢
[2] བསྟན་འགྱུར་དཔེ་བསྡུར་མ། འདུལ་བ། ༼ཤུ༽ དེབ་ཨང་ ༩༣ པ། ༢༠༠༨ ལོ། ཤོག་གྲངས་ ༤༡༩
[3] བསྟན་འགྱུར་དཔེ་བསྡུར་མ། འདུལ་བ། ༼ཤུ༽ དེབ་ཨང་ ༩༣ པ། ༢༠༠༨ ལོ། ཤོག་གྲངས་ ༤༡༩
ཡོང་ཁུངས། པཎ་གྲུབ་བཅུ་བདུན་གྱི་རྣམ་ཐར་འཛམ་གླིང་མཛེས་རྒྱན། ༼ཅ༽ རྩོམ་པ་པོ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༣༧༩ ནས་ ༣༨༡ བར་གསལ་བ་ལས་བཏུས་པའོ།།