ཇ༽ དབང་ཕྱུག་སྡེ་བསྟེན་ནས་དཔལ་ལྡན་ཆོས་གྲགས་མཁས་པར་གྱུར་ཚུལ།

ཇ༽ དབང་ཕྱུག་སྡེ་བསྟེན་ནས་མཁས་པར་གྱུར་ཚུལ།

 

དེ་ཡང་ངག་དབང་ཀུན་དགའ་བློ་གྲོས་ (1729-1783) མཆོག་གིས་མཛད་པའི་ཆོས་གྲགས་ཀྱི་སྐུའི་འདོད་གསོལ་ལས^[1]།

ཞང་པོ་གཞོན་ནུ་ལེགས་ལྡན་གྱིས་བསྐྲད་པས། །

མུ་སྟེགས་མཐར་མཛད་ནང་པའི་བསྟན་ལ་བྱོན། །

དྷརྨཱ་ཀིརྟིའི་མཚན་འཆང་དབང་ཕྱུག་སྡེར། །

ཚད་མའི་གཞུང་གསན་སློབ་དཔོན་ལས་ལྷག་འདུད། །

ཅེས་དང་། ཆོས་རྗེ་བློ་བཟང་ཆོས་འཛིན་དཔལ་བཟང་པོས་མཛད་པའི་རིགས་པའི་དབང་ཕྱུག་ཆོས་ཀྱི་གྲགས་པ་ལ་བསྟོད་པ་སྨྲ་ངན་ཕམ་པའི་རྒྱལ་རྔ་ལས^[2]། ཁྱད་པར་སློབ་དཔོན་དབང་ཕྱུག་སྡེ་ཞེས་བྱ། །ཕྱོགས་གླང་དངོས་སློབ་རིག་པའི་གནས་ལྔ་པོ། །ཀུན་ལ་མཁས་པར་གྲགས་པའི་ཞབས་དྲུང་ནས། །ཀུན་བཏུས་ཚར་གསུམ་གསན་ལ་གསོལ་བ་འདེབས། །ལན་གཅིག་གསན་པས་བླ་མས་དགོངས་བཞིན་གོ །གཉིས་པས་ཕྱོགས་གླང་དགོངས་པ་ཇི་བཞིན་རྙེད། །གསུམ་པས་ཕྱོགས་གླང་དགོངས་པ་མ་ལོངས་མཁྱེན། །རྣམ་དཔྱོད་འགྲན་ཟླ་བྲལ་ལ་གསོལ་བ་འདེབས། །ཡིན་ཚུལ་བླ་མར་ཞུས་ཚེ་ཞལ་སྔ་ནས། །ཁྱོད་ནི་ཕྱོགས་ཀྱི་གླང་པོར་མཉམ་མོ་ཞེས། །ཤིན་ཏུ་མཉེས་ཤིང་ལན་བརྒྱར་བསྔགས་པ་ཡི། །མེ་ཏོག་འཐོར་ཡུལ་གྱུར་ལ་གསོལ་བ་འདེབས། །དེ་བས་ཁྱོད་ནི་ང་ཡིས་ནོར་བ་རྣམས། །ཕྱོགས་སྔར་གྱིས་ལ་འགྲེལ་པ་རྩོམས་ཤིག་ཅེས། །ཤིན་ཏུ་ཐེག་དཀའི་གསེར་གྱི་བཀའ་ལུང་སྩལ། །གུས་པས་སྤྱི་བོར་བླངས་ལ་གསོལ་བ་འདེབས། །ཞེས་གསུངས་པ་ལྟར་བུ་སྟོན་ (1290-1364) ཆོས་འབྱུང་ལས^[3]། ཁྱད་པར་སློབ་དཔོན་དབང་ཕྱུག་སྡེ་ལ་ཚད་མ་ཀུན་ལས་བཏུས་ཚར་གསུམ་དུ་ཉན་པར་དམ་བཅས་ནས་མཉན་པས་དང་པོ་ལ་སློབ་དཔོན་དབང་ཕྱུག་སྡེས་ཇི་ལྟར་དགོངས་པ་ལྟར་གོ །གཉིས་པ་ལ་ཕྱོགས་གླང་གིས་དགོངས་པ་བཞིན་གོ་སྟེ། དབང་ཕྱུག་སྡེའི་འདོད་པ་ནོར་བར་རྟོགས་ནས། གསུམ་པ་གསུང་བར་ཞུས་པས། ཕྱོགས་གླང་ལ་སློབ་མ་ང་ལྟ་བུ་ལས་མེད། ང་ལའང་ཁྱེད་ལྟ་བུ་ལས་མ་བྱུང་། ཚར་རེ་ལས་འཆད་པའི་སྲོལ་མེད་པ་ལ། གཉིས་སུའང་བཤད་པ་ཡིན། ང་འདི་གཅིག་པུ་འཆད་པས་མི་ཕན། པཎྜི་ཏའི་བྱ་བ་གཞན་ཡང་བྱ་དགོས་པས། རས་སྣུམ་སྟ་གོན་གྱིས་ཤིག་ནུབ་མོ་འཆད་དོ། །གསུངས་ནས་དེ་ལྟར་བྱས་པས། འབྲས་བུ་རྒྱུའི་ཁྱད་པར་གྱི་རྗེས་སུ་བྱེད་པ་ལྷག་པར་རྟོགས་ཏེ་སློབ་དཔོན་ལ་སྔར་གྱི་ཚུལ་བརྗོད་པས་ཤིན་ཏུ་མཉེས་ནས། ད་ཁྱོད་ཀྱིས་ངའི་གྲུབ་མཐའ་ནོར་བ་རྣམས་ཕྱོགས་སྔར་གྱིས་ལ། ཀུན་ལས་བཏུས་ལ་འགྲེལ་པ་རྩོམས་ཤིག །ཅེས་རྗེས་སུ་གནང་ངོ་། །ཞེས་བྱུང་ངོ་།།

དེ་བཞིན་རྡོ་གྲུབ་འཇིགས་མེད་བསྟན་པའི་ཉི་མས་ (1865-1926) མཛད་པའི་དཔལ་ཆོས་ཀྱི་གྲགས་པ་ལ་བསྟོད་པ་ལས^[4]།

ཐུབ་བསྟན་ཉིན་མོར་བྱེད་པའི་སྣང་བ་ཆེར། །

ལོག་རྟོག་སྤྲིན་རུམ་འཐུག་པོས་གླགས་ལྟ་བའི། །

རྒོལ་ངན་མིང་མཐར་འཐག་བྱེད་དངོས་སྟོབས་སུ། །

ཉེར་ཞུགས་སྤོབས་པའི་རླུང་ལྷ་ཆོས་གྲགས་ཞབས། །

ཞེས་གསུངས་པ་ལྟར་ཇོ་ནང་རྗེ་བཙུན་ཏཱ་ར་ནཱ་ཐས་ (1575-1634) མཛད་པའི་རྒྱ་གར་ཆོས་འབྱུང་ལས་^[5]ཀྱང་། རྟོག་གེའི་བསྟན་བཅོས་གཞན་མང་པོ་ཉན་ཡང་བློ་གྲོས་མ་ཁེངས་ཏེ། དཔལ་ཕྱོགས་ཀྱི་གླང་པོའི་སློབ་མ་དབང་ཕྱུག་སྡེ་ལས་ཚད་མ་ཀུན་ལས་བཏུས་པ་ཚར་གཅིག་ཉན་པས་དབང་ཕྱུག་སྡེ་ཉིད་དང་མཉམ་པར་གྱུར། ལན་གཉིས་པ་ཉན་པས་ཕྱོགས་ཀྱི་གླང་པོ་དང་མཉམ་པར་གྱུར། གསུམ་པ་ཉན་པ་ན། སློབ་དཔོན་དབང་ཕྱུག་སྡེས་ཀྱང་ཕྱོགས་ཀྱི་གླང་པོའི་དགོངས་པ་མ་ལོངས་པར་འགའ་ཞིག་ནོར་བར་མཁྱེན་ནས་སློབ་དཔོན་ཉིད་ལ་བཟླས་པས་ཤིན་ཏུ་དགྱེས་ཏེ། ཁྱོད་ནི་ཕྱོགས་ཀྱི་གླང་པོ་དང་མཉམ་སྟེ། གྲུབ་མཐའ་ནོར་བ་ཐམས་ཅད་སུན་ཕྱུང་ལ། ཚད་མ་ཀུན་ལས་བཏུས་ཀྱི་འགྲེལ་པ་ཡང་གྱིས་ཤིག་ཅེས་སློབ་དཔོན་ལས་གནང་བ་ཐོབ་བོ། །ཞེས་གསུངས་པ་ལྟར་དཀོན་མཆོག་འཇིགས་མེད་དབང་པོས་ (1728-1791) མཛད་པའི་འཛམ་གླིང་མཛེས་བྱེད་རྒྱན་དྲུག་མཆོག་གཉིས་ལ་གསོལ་འདེབས་ཕན་བདེའི་དཔག་བསམ་ལྗོན་པ་ལས^[6]།

དངོས་སྟོབས་རིགས་པའི་མཆེ་སྡེར་མི་བཟད་ལྡན། །

ཇི་ལྟ་ཇི་སྙེད་མཁྱེན་པའི་འདབ་གཤོག་གོས། །

ལོག་རྟོག་འཁྲུལ་རྨོངས་ཀླུ་དབང་མཐར་བྱེད་པ། །

ཆོས་གྲགས་མཁའ་ལྡིང་དབང་པོར་གསོལ་བ་འདེབས། །

ཞེས་བསྟོད་ཕྱག་ཀྱང་མཛད་དོ།།  །།

དཔྱད་གཞིའི་ལུང་ཁུངས་ཡིག་ཆ།

^[1]  ཀུན་བློའི་གསུང་འབུམ། ༼ཤྲཱི༽ ས་སྐྱ་རྒྱལ་ཡོངས་གསུང་རབ་སློབ་གཉེར་ཁང་། ༢༠༠༨ ལོ། དཔེ་རིང་། ཤོག་གྲངས་ ༦བ༤

^[2]  ཆོས་རྗེ་བློ་བཟང་ཆོས་འཛིན་དཔལ་བཟང་པོའི་གསུང་འབུམ། ཆོས་བསྟོད། དཔེ་རིང་ཤོག་ ༡ན༡ ནས་ ༣ན༥ བར།

^[3]  བུ་སྟོན་ཆོས་འབྱུང་། ཀྲུང་གོའི་བོད་ཀྱི་ཤེས་རིག་དཔེ་སྐྲུན་ཁང་། ༡༩༨༨ ལོ། ཤོག་གྲངས་ ༡༦༠

^[4]  འཇིགས་མེད་བསྟན་པའི་ཉི་མའི་གསུང་འབུམ། ༼ཀ༽ སི་ཁྲོན་མི་རིགས་དཔེ་སྐྲུན་ཁང་། ༢༠༠༣ ལོ། ཤོག་གྲངས་ ༡༥༢

^[5]  རྒྱ་གར་ཆོས་འབྱུང་། སི་ཁྲོན་མི་རིགས་དཔེ་སྐྲུན་ཁང་། ༡༩༨༦ ལོ། ཤོག་གྲངས་ ༢༡༥

^[6]  དཀོན་མཆོག་འཇིགས་མེད་དབང་པོའི་གསུང་འབུམ། ༼ཉ༽ བསྟོད་ཚོགས། དཔེ་རིང་ཤོག་ ༣༡བ༦ ནས་ ༣༣ན༢ བར།

 

ཡོང་ཁུངས། པཎ་གྲུབ་བཅུ་བདུན་གྱི་རྣམ་ཐར་འཛམ་གླིང་མཛེས་རྒྱན། ༼ང༽ རྩོམ་པ་པོ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༣༨༣ ནས་ ༣༨༦ བར་གསལ་བ་ལས་བཏུས་པའོ།།